رواية أوتار أحد من السيف الفصل السادس بقلم الكاتبه زهرة الربيع حصريه وجديده على مدونة النجم المتوهج

رواية أوتار أحد من السيف الفصل السادس بقلم الكاتبه زهرة الربيع حصريه وجديده على مدونة النجم المتوهج 

رواية أوتار أحد من السيف الفصل السادس بقلم الكاتبه زهرة الربيع حصريه وجديده 

 فياض كان مصدوم جدا من اللي سمعه ازاي الاب وابنه على علاقه بنفس البنت حاول يهدى ويفهم اكتر وقال لنعيم... كيف يعني ما تعرفش اللي بينهم هو مش انت بتاجر الاوض دي اللي هنه للزباين بتوعك ...طيب ما حصلش انهم اخدوا اوضه سوا قبل كده

نعيم كان بيشرب الشاي بدون اهتمام وقال ....هما للامانه مخدوش اوضه....بس برضك قعدتهم سوا عند البير طول الليل متخلاش...وكيف ما قلت لك كان يدفع بالذايد لجل ياخدها هناك ويقعدوا يتونسوا والله اعلم ايه بيحصل بيناتهم انت راجل وفاهم 

فياض قعد بزهول وبقى يفكر في الموضوع مش فاهم ايه اللي بيحصل بالظبط

في الوقت ده طلعت اوصاف وبقت تكنس قدام البيت

 فياض بقى يبص لها وهو مش عارف يحل لغز البنت دي ابدا بس طالت نظراته فيها بسبب ملامحها المتغيره 180 درجه عن الليل ...كانت بدون اي مكياج ملامحها هاديه ومريحه للعين طرحتها كل شويه تقع من على شعرها اللي كان بلون سواد الليل 

فضل متابعها بعيونه في كل حركه بس فاق لنفسه وبعد عيونه وبلع ريقه بتوتر وقال.. استغفر الله العظيم 

نعيم ضحك جامد على شكله وقال ....مدام بتستغفر ايه اللي جايبك هنه ....والله انا شفت العجب في الشغلانه دي 

قال كده ومشي

فياض بص لطيفه بقرف وقال..... والله وانا شفت قرون كتير وقليل بس ماشوفت راجل قرن زييك ...و لا بلاش كلمه راجل دي مش ناقصه شبهه 

ووقف وقرب من اوصاف وقال...... صباح الخير يا صبيه... كان بودي اقول لك وشك ده ولا القمر بس احنا اول النهار 

اوصاف اتنهدت وبصت له بابتسامه وقالت ....صباح الخير... ان شاء الله نمت زين 

فياض ضحك بخفه وقال.... زين قوي ...كيف العشا تمام 

اوصاف ضحكت ضحكه جميله وقالت... كنت متاكد انه هيعجبك 

فياض قرب منها قوي وقال..... عجبني عشان من يدك 

اوصاف ارتبكت قوي من قربه ومن كلامه ونظراته خصوصا نظراته اللي بتفكرها بالحلم اللي حلمته

ولسه هتتكلم فياض قال بدون مقدمات.... ايه اللي بينك وبين دياب ود العمده 

اوصاف استغربت سؤاله وقالت ....دياب...اشمعنا دياب ما فهماش...وايه اللي هيكون  بيني وبينه يعني 

فياض قال...ما انا بسالك في ايه بينكم ....نمتي وياه قبل كده ولا لا

عند دياب صحي من النوم ونزل وساب غفران نايمه لانها تعبانه 

اول ما انزل لقى والده بيشرب الشاي بتاعه قال ...صباح الخير يا ابوي...كيف  احوالك 

وقعد يشرب معاه 

حطاب بص له بضيق وقال.... انا اللي رايد اسألك كيف احوالك ...امك بتقول سمعت خبط ورزع امبارح ...وجبت دكتور وكمان ما شفناش غفران يعني منزلتش النهارده 

دياب قال بخنقه..... الاحسن بدل ما جايه تخبص لك كانت جات خبطت علينا وسالت..... حسابي معاها بعدين 

خطاب قال بغضب ....ما تقلبش الحق بالباطل يا دياب انا بكلمك عملت ايه في البت 

دياب هرش دماغه وقال بحرج....دراعها اتكسر

بقلم...زهرة الربيع

خطاب غمض عنيه بغضب شديد ودياب قال بسرعه..... اقسملك بالله ما قصدي.... ساعه شيطان عصلتني واتغاشمت زياده .....ورحمه ابوك يا ابوي انا ماناقص تقطيم...من غير حاجه انا قلبي واجعني

خطاب قال بخنقه..... ده على اساس انك عندك قلب ..ولا نافع فيك حاجه ده انت جبله معندكش ريحة الدم 

دياب اتنهد ووقف وقال..... انا هروح امر على المزارعين وهاجي على الضهر باذن الله 

ابوه قال بخنقه .....اقعد اهرب كده وخليك ما فاهمش ولا حاجه معايزش تسايس امورك ولا عايز تفهم..... انا ما عرفش كيف هسيب لك كل ده ولا وكمان المفروض انك العمده من بعدي..... يا حمار افهم اللي عمال تلطش فيها دي مكتوب باسمها قد ملككك وملكي..شغل دماغك المقفله دي واطويها تحت جناحك  

دياب قال بضيق..... قلت لك من غير قصدي يا ابوي...و بعدين غفران بت عمي يعني المفروض تخاف عليها وتبقى زعلان عليها هيه مش على الفلوس

ابوه لسه هيتكلم دياب قاطعه بسرعه وقال....اسمعني زين يا ابوي  انا سمعت كلامك واتجوزتها من غير اي كلام ولا فتحت خشمي وياك عملت كل اللي انت قلته ولسه هعمل كل اللي تعوزه....بس لو هيه من زعلها مني قالت لك اي حاجه تاخذ رايي فيها الاول يا ابوي.... ما تعملش حاجه من دماغك سمعتني 

ابوه قال باستغراب... حاجه زي ايه يعني

دياب قال بسرعه.... اي حاجه.... اي حاجه تطلبها منك تاخد رايي انا فيها الاول ...خلصانه يا ابوي 

قال كده وخرج وابوه بص لطيفه باستغراب وقال  .... ربنا يهديك يا دياب

دياب اول ما خرج دور بعيونه على فياض يمين وشمال ما لقاهوش نادى لواحد من الغفر وقال.....فياض فين 

الغفير قال ....لسه ما جاش جنابك

دياب ابتسم بخبث وقال.... زين قوي ....شوف هتعمل ايه ونفذ بالحرف الواحد 

في البيت عند  فاطمه كانت بتلبس علشان تروح مدرستها وسمعت الباب بيخبط

راحت تفتح وكان عقبه ومعاه والدته 

فاطمه قالت بابتسامه مصتنعه....خاله فهيمه...كيفك اتفضلو 

فهيمه سلمت عليها وقالت ...اذيك يا فاطمه يا بتي ...اخبارك ايه واخبار امك 

فاطه قالت.... بخير يا خاله 

ودخلتهم وعقبه كان واقف بيحاول ميبصلهاش وهيه كانت عايزه تضحك على كسوفه ولانه جايب والدته معاه 

والدة فاطمه قالت بابتسامه وحب.... فهيمه اتوحشتك والله

وسلمت عليها وعلى عقبه لحب شديد وقالت....والله منورينا قوي انا بحبك قعدتك يا فهيمه ليه ما عتجيش واصل 

فهيمه ابتسمت وقالت ......ان شاء الله ناجي في الفرح دايما يا ست عطيات ....والله حتى قعدتك ما يتشبع منها بس الدنيا مشاغل..... اصل عقبه عقبال فياض يا رب كان شغال في شقته وخلاص فاضل على التشطيب وعايزين نشوف له عروسه و...

عقبه قاطعها وقال بدهشه.... اما اطمني على صحة الحاجه ...عرايس ايه دلوك

عطيات قالت بسرعه ....وهو عقبه محتاج تدوري له على عروسه.....ده  العرايس تاجيلو لحد عنده بسم الله ما شاء الله يا زين ما ربيتي يا فهيمه .... ده امام جامع دي لوحدها كفايه 

فاطمه كانت سمعاهم وعايزه تضحك وجابتلهم كوبايات الشاي وقالت.... انا رايحه مدرستي ياما ...عايزين حاجه يا جماعه 

عطيات قالت بسرعه..... امانه توصل معها لحد ما تركب المواصله بس يا عقبه ...اصل  فياض كل يوم بيوصلها وانا خايفه عليها 

فاطمه بصت لها بخنقه و قالت..... اما انا قلت لك بروح لحالي 

عقبه وقف بسرعه وقال و عيونه في الارض.... تؤمري يا خاله ...اتفضلي يا فاطمه 

فاطمه نفخت بخنقه وطلعت واول ما طلعه من البيت وقفت وقالت .....تقدر تروح تشوف اشغالك يا عقبه احنا ممحتاجينش حاجه ...وبوصل لوحدي هي امي بس بتخاف عليا ذياده عن اللزوم

ابتسم و حاول ما يركزش في ملامحها قوي وقال..... انا عارف انك مخنوقه من اللي بيحصل....وانط معايزاش اوصلك ولا عايزه اجي حتى اسال عليكم..... فياض دايما يحكي لي انك عايزاه يعتمد عليك لما يكون مش قاعد ....بس يا فاطمه البنات كيف الورد اللي متتحرسش تتقطف.... خوف اخوكي عليك دي حاجه المفروض ما تزعلكيش واصل 

فاطمه ضحكت بخفه وقالت..... طب ما اهيك بتعرف تقول كلام حلو اها ...امال مشغل وضع الصامت ليه ....على العموم انا بعرف اكون شوك للي يقربلي  ومحدش يقدر يلمسني 

عقبه ابتسم وقال ...محدش عنديه شك في كده....بس يعني تقدري تعتبريها حاجة في نفس يعقوب قضاها 

فاطمه ابتسمت ابتسامه جانبيه وقالت...طيب اديك قضيتها ..كفايه كده.. ولو لزم الامر انك تاجي متتعبش الحاجه احنا مبنخطفوش الضيوف 

عقبه بصلها شويه ونسي نفسه وقال بهمس ...بس انا مخطوف بقالي كتير قوي 

فاطمه مسمعتهوش كويس قالت ....ايه

عقبه قال بسرعه .لا..احم....بقول هيه امي يعني معندهاش مانع تاجي.... الا اذا انتو مش عايزين تشوفوها 

فاطمه قالت بسرعه..لالا انت بتقول ايه اكيد مقصديش كده...عموما براحتك انت اللي غاوي تعب 

عقبه لسه  هيرد جه واحد من الغفر بتوع خطاب وقال.... ست فاطمه....زين اني لحقتك دياب بيه  الخطاب بيقول لك السلسله دي وقعت منك في عربيته لما كان بيوصلك ليلة امبارح 

ومد عليها سلسله جميله

فاطمه مسكت السلسله بصدمه من كلامه اللي قاله قدام عقبه وبصت له ولقت ملامحه اتغيرت 180 درجه وهو بيبص لها بصدمه وذهول 

عند اوصاف بصت لفياض بغضب من جرئته وقالت .....ايه قله الحيا دي ....واشمعنى دياب اللي بتسال عليه وتسال ليه اصلا ما اكونش مرتك وانا ما اعرفش 

فياض نفخ بضيق وقال..... ما جاوبتيش بردك ....هو السؤال صعب للدرجه دي..... عموما انا سمعت عنكم سمع خير قالولي انكم  عشاق وبتروحوا تتونسوا عند البير البعيده... يا ترى انتي عارفه انه متجوز 

اوصاف قالت بضيق.... عارفه..... هو قايل لي كل حاجه ....وانسى اني اقول لك حاجه تخصه خلصنا كده 

ولسه هتمشي مسك ايدها وحاول يهدى وقال  ...بس يهمني قوي اعرف انتي نمتي وياه ولا لا.... مش ههملك في حالك غير لما اعرف 

اوصاف دفعت ايده و قالت بغضب .....يدك لاعملها مقام هنه .....قلت لك ما لكش دخل بيا ولا يحق لك تسال حاجه...و كملت بخبث وقالت..... بس هريحك شكله دياب يهمك قوي ايوه نمت معاه ...واكتر من مره كمان ....لو هو يهمك بقى ولا صاحبك ولا قريبك اديني قلت لك الحقيقه خد بعطيك وامشي من هنه وريحني وريح دماغك اصلا لو عرف انك بتضايقني قول على نفسك يارحمن يا رحيم  

قالت كده وسابته ودخلت وهو جذب شعره لورا بتوتر وهو مش فاهم اذا كانت بتوزعه ولا فعلا في بينهم حاجه بس كان لازم يعمل اللي عليه

بعد عن البيت بتاعهم  وطلع تليفونه بسرعه وعمل مكالمه واول ما الخط فتح قال بسرعه..... خطاب بيه انا فياض فيه مشكله

عند فاطمه نشف الدم في عروقها لما الغفير قال على السلسله قدام عقبه اللي بصلها بذهول شديد بس حاول يتمالك نفسه قدام الغفير  وقال قول  لدياب بيه شكرا بارك الله فيه

الغفير هز راسه ومشي وعقبه بص لفاطمه باستفهام وهو مستني تفسير للي حصل 

فاطمه قالت ارتباك شديد...انا هفهمك ... انا كنت جايه من الدكانه اول امبارح بالليل و هو كان هيخبطني بالعربيه من غير قصده ...و وقعت على الارض واتعورت عشان  كده وصلني بعربيته  هي دي كل الحكايه ...سايقه عليك سيدنا النبي ما تقول لفياض لانه مش بيوافق اطلع من البيت لحالي خصوصا بالليل 

عقبه حاول يكبت غضبه قد ما يقدر وقال....فياض....وفياض ايه دخله بيكي علشان تخافي منه 

فاطمه قالت بسرعه.... كيف يعني ما لوش دخل فياض اخوي الكبير 

عقبه داس على اسنانه بغضب علشان ما يزعقش وقال.... ولما انتي عارفه انه اخوك الكبير ما بتسمعيش كلامه ليه ...طلعتي من البيت لوحدك وبالليل كمان و راجعه في عربيه واحد غريب.. بعني لما يوقف العربيه هنه في انصاص الليالي علشان ينزلك الناس تقول عليكي ايه 

فاطمه نزلت دموعها ونزلت عيونها بخوف وقالت...يبقى  اكيد هتقول لفياض

عقبه ضرب كف على كف وبص بعيد وهو بيحاول يتمالك نفسه وبقى يقول.... اعوذ بالله من الشيطان الرجيم ....و صلي على رسول الله عشان يهدى واخد نفس عميق وقال.... يلا عشان تروحي مدرستك يا فاطمه ...وما تخافيش مهقولش حاجه لاخوكي...وهتبقى دي اول مره اخبي عنيه حاجه تهمه... بس مهقولوش لاني ما ضامنش رد فعله هيبقى كيف 

وبصلها وقال بتحذير وغضب....بس قسما عظما يا فاطمه لو عرفت انك ركبتي مع الجدع ده ولا كلمتيه حتى انا اللي هتدخل قبل فياض واللي هعمله ولا هيعجبك ولا هيعجبه 

فاطمه ارتبكت من نظراته بس ابتسمت  ومسحت دموعها وقالت..... شكرا يا عقبه ربنا يخليك.... انا كده كده مش هقابله تاني.... هقابله فين يعني دي كانت صدفه والله صدفه.... يلا عشان اتاخرت 

ومشيت معاه وهي متغاظه جدا منه بس كان المهم عندها ان فياض ما يعرفش 

بقلم...زهرة الربيع

اما عقبه كان حزين جدا والغضب مالي قلبه من اللي سمعه والقلق كمان لانه متاكد ان الحركه دي مقصوده من دياب لانه هو اكتر واحد عارف العداوه بينه وبين فياض بقى يحاول يبعد الافكار السيئه من دماغه ويحسن الظن يمكن يكون الموضوع بدون قصد ومشي معاها لحد ماركبها الميكروباص وقعدها جنب واحده ست كبيره ودفع لها الاجره 

عند غفران صحيت بتعب وغسلت وشها بالعافيه كانت عايزه تستحمى بس معرفتش اتنهدت بدموع وبقت تحاول تلبس هدومها بتعب وهيه ناويه تنهي كل العذاب ده 

خلصت بعد مشقه ولسه هتنزل جاتلها مكالمه من دياب اتنهدت لانها حاولت متردش بس كان بيتصل كتير ردت بضيق وقالت...خير 

دياب بعد عن المزارعين واتكأ على عربيته  وقال...قومتي...احسن دلوك 

غفران قالت بخنقه...كنت زينه لحد ما سمعت صوتك 

دياب ابتسم بسخريه وقال....بسيطه..... كنتي زينه يعني لما اقفل هتبقي احسن وده المهم...خدي علاجك متنسهوش قولت افكرك عليه

غفران بصت للعلاج كانت فعلا ناسياه وقالت بخنفه....هاخد الحبوب بس ..فيه حقن...شوف غفير يروح للست غاليه تاجي تدهالي 

دياب قال بجديه ...لاه الحقن معادها  الضهر ..خدي الحبوب وانا لما اجبي هدهالك 

احتدت عيون غفران بغضب وقالت...بطل تصتاد في الميه العكره الله يعكر ايامك كلها قادر يا كريم..ده انا لو حياتي فيهم مهخليكش تقربلي وتدهملي ..كنك اتخبطت في نافوخك على الصبح 

قالت كده ودياب لسه هيرد لقاها قفلت في وشو داس على التليفون بغيظ شديد وقال...طيب يا بت الرفضي راجعلك ولسه هيركب العربيه لقى عقبه في وشه وقال بغضب شديد ...عايز منها ايه يا دياب....ممكن افهم ناوي على ايه

عند خطاب وقف بحماس لما فياض كلمه وقال ....ولدي حبيبي زين انك طمنتني عليك... اخبارك ايه 

فياض قال..... انا زين بس اسمعني كويس.... انا اتصرفت في موضوع البت وان شاء الله يمكن النهارده اجيبها وياي...بس سمعت حاجه  كده كان لازم تعرفها قبل ما اجيبها ....لان الموضوع فيه دفع فلوس والمبلغ مش هين ..والموضوع اللي عرفته كمان مش هين

خطاب قال بسرعه.... ادفع له قد ما يريد ...المهم تجيبها وما يعرفوش مكانها 

فياض قال .....ما تقلقش هجيبها ومحدش هيعرف.... بس كيف ما قلت لك في موضوع لازم اسالك عليها الاول قبل ما ادفع اي قرش ....سمعت هنه انو ..... احم..... انه دياب بياجي هنه.... وانه مش بيقعد غير مع البت دي وبيطلعوا مكان قريب هنا سوا فقلت يعني انت لازم تعرف قبل ما نجيبها  لانو لو فيه بينهم حاجه مش هينفع تتجوزها اكيد 

خطاب اتسعت عنيه بزهول شديد وقال .....دياب ولدي ووووو

أوتار_احد_من_السيف

السادس

بقلم_زهرة_الربيع

البارت اهوه ولا يغلى على عيون الغالين ياريت الاقي تفاعل بقى وحتى لو مشغولين انا مش هطلب اكتر من لايك مش هيأخركم دعما للروايه اذا حابينها فعلا ❤️

الفصل السابع من هنا

بداية الرواية من هنا

لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم 

جميع الروايات كامله من هنا 👇 ❤️ 👇 

روايات كامله وحصريه

اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇 

روايات كامله وحديثه

❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺