رواية حارة البطل الفصل السادس عشر حتى الفصل العشرون بقلم الكاتبه جنات حصريه وجديده على مدونة النجم المتوهج
رواية حارة البطل الفصل السادس عشر حتى الفصل العشرون بقلم الكاتبه جنات حصريه وجديده
رغد رجعت البيت وكانت رهف مستنياها .
رهف:طمنينى يا رغد هو عامل ايه ؟!
رغد قعدت على الكنبه وقلعت الطرحه:الجرح كبير بس الحمدلله مش عميق اوى .
رهف:الحمدلله ... بجد منظره كان صعب اوى .
رغد:صح ..... خلينا ناكل يلا عشان عايزة انام .
رهف:يلا .
بقلم الكاتبه جنات
ـــــــــــــــــ★ـــــــــــــــــ
فى بيت البطل .
محمود قاعد على الكرسي جمب السرير وهدى وحنين قاعدين على السرير جمب حسن وحمزة واقف وساند على الحيطه واولفت وعزة واقفين على الباب .
محمود بحده:ولزمته ايه كل اللى حصل ده ياحسن .
حسن:يعنى عايزنى اسيبه ياخد بنت حتتنا ياحاج هى دى بردو اخلاقنا.
محمود:مليون مرة يابنى اقولك خد كل حاجه بالهدواة ياحسن مش بالفتونه .
حمزة:ياحاج الواد اللى عمال يهدد ومش همه اى حد وبعدين ده شكله كان كمين من الاخر .
هدى ضربت على صدرها:يامصيبتى كمين ازاى ياحمزة يعنى الواد ده كان جاى وقاصد حسن .
حمزة:الواد سابنا كلنا ومعورش غير حسن ياحاج .
محمود:وهو هيعمل كدا ليه .... انت تعرفه ياحسن ؟!
حسن:اول مرة اشوفه ياحاج .
محمود بعصبيه:اول مرة تشوفه وعملت معاه عدواه وشوف عمل فيك ايه .
هدى:يووه ياحاج ما انت عارف ابنك دمك حامى وبيخاف على اهل حارته ... كنت عايزه يعنى يسيبه ياخد البت .
اولفت:ماهى اكيد بت شمال ياهدى .... ياما ماكنش هيعمل كدا معاها .
عزة:ماما معاها حق .
هدى بحده:نعمه زينه البنات حارة وبشهاده الحارة كلها وبعدين حارة البطل مافيش فيها بنات شمال يااولفت كلهم متربين احسن تربيه .
حنين:بابا ياحبيبي افرض اللى حصل ده كان حصل معايا ... يرضيك يعنى اهل منطقتى يسيبو واحد غريب ياخدنى معاه والله اعلم هيعمل فيا ايه .... حسن وحمزة وشباب الحارة كان معاهم حق فى اللى عملوه .
محمود فكر شويا وانه صح ميرضهوش ان ده يحصل مع بنته .
هدى:وبعدين ياحاج ابنك طالعلك دمه حامى وميرضاش بالغلط فبلاش تتعصب عليه بقي .
محمود:انا عصبيتى سببها خوفى عليهم ياام حسن واكيد ميرضنيش اللى حصل مع نعمه دى بت صاحبي وعارفها كويس .... على العموم سلامتك يابنى وبعد كدا خد بالك على نفسك .
حسن:الله يسلمك ياحاج .
محمود خرج من الاوضه واولفت وعزة خرجو بس فضلو قريبين من الاوضه عشان يسمعو بيقولو ايه .
وهدى بصت لحنين:ليكى حق يابت ياحنين تحبي الدكتورة دى بت زى السكر وروحها حلوة ودخلت قلبي من غير استاذان .
حنين:ورهف اختها كمان ياماما طيبه اوى وهاديه عكس رغد المجنونه .
حمزة قعد جمب هدى:ماتكلمى مع الحاج ياهدهد ينوبك فيا ثواب دانا يتيم وغلبان .
حنين وحسن ضحكوو .
هدى:بطل ياواد واياك تقول يتيم دى اومال انا وحاج بنعمل ايه فى حياتك هااا.
حمزة باس ايدها:دانتى حبيبه قلبي ياهدهد ...يعنى مش نفسك تفرحى بابنك بقي .
هدى ضحكت:نفسي طبعااا ... خلاص هتكلم مع الحاج .
حمزة:قلبي ياهدهد الجنانين .
هدى بصت لحسن:وانت مش عايزانى اتكلم مع الحاج كمان !
حسن ابتسم ومردتش عليها .
حنين:ابنك ده شبه التلاجه سبيه كدا لحد البت ماتطير منه .
حسن:بقولكو ايه انا تعبان وعايز اطلع انام .
هدى:تطلع فين انت هتفضل هنا مش هتتحرك زى الدكتورة ماقالت .
حسن:انا مش برتاح غير فى شقتى ياست الكل .
هدى:يابنى انت ماسمعتش هى قالت ايه ماينفعش تتحرك .... وبعدين لما تيجى تغيرلك على الجرح بكرة هتطلعلك فوق ازاى يعنى وانت لوحدك ؟!
حسن:انا مش فاهم انتى خليتها هى اللى تيجى ليه مانتى او حنين كنت غيرتو عليه او حتى الحيوان اللى قاعد ده .
حمزة:انا هحترمك بس عشان خاطر هدهد حبيبتى .
هدى:خلص الكلام هتنام هنا ويلا كل واحد على اوضته وانا هفضل معاه .
بقلم الكاتبه جنات
ـــــــــــ★ـــــــــــــــ
برا فى الصاله .
عزه بهمس:شوفتى ياما الاتنين وقعو فى حب البنات وحسن هيروح منى .
اولفت:البت دى زى المصيبه اللى دخلت حياتنا وخربتها كلها
عزت دخل البيت وهو بيدندن اغنيه شعبيه .
اولفت لما شافت جرت عليه وهمست:كنت فين يامخفى كل ده ؟!
عزت:انتى مش قولتلى اختفى اليومين اللى فاتو ! .... وبعدين انا سمعت ان البطل اتصاب قولت اجى اسال .
عزة:لا فيك الخير ياخويا .
عزة قالت كدا وراحت على اوضتها .
عزت:هو فين ؟!
اولفت:فى الاوضه دى .
عزت:هدخل اشوفه واجى .
عزت خبط على الباب ودخل وحمزة وحسن لما شافو اتعصبو وحنين خافت .
عزت:الف سلامه عليك يابطل .
حسن:الله يسلمك ياعزت .... اما خدى حنين وروحو نامو انا كويس .
هدى فهمت انه عايز يتكلم مع عزت:حاضر يابنى يلا ياحنين.
هدى وحنين خرجو وحسن بص لعزت بحده:كنت فين الفترة اللى فاتت ياعزت .
عزت:فى شغل ياحسن .
حمزة بسخريه:هو شغلك اليومين دول بقي فى الكابريهات ياعزت .
عزت:حاجه ماتخصكش .
حسن:ياريت تحترم البيت اللى انت قاعد فيه ياعزت .... ومتفكرش انى عديت موضوع كلامك مع حنين كدا ... بس مش وقت كلام ده .
عزت:ياحسن انا بــــ
حسن:تصبح على خير ياعزت ... انا تعبان وعايز انام .
عزت اضايق منه:تلاقى الخير ياابن عمتى .
عزت خرج ودخل هو وامه الاوضه .
حمزة:الواد ده مش سهل ووجوده هنا مش صح .
حسن:متقلقش ياحمزة .... يلا روح انت كمان عشان تنام .
حمزة:خلينى معاك عشان لو احتاجت حاجه .
حسن:انا هنام ياحمزة روح انت ارتاح .
حمزة:تمام ياصاحبي .
حمزة خرج من الاوضه وحسن طلع فونه وفتح على صوره رغد وافتكر وهى بتخيط جرحه وقربها منه وابتسم ونام وهو ماسك الفون .
بعد شويا دخلت هدى وشافته نايم وماسك الفون اخدته عشان تحطه على الكمدينو وشافته مفتوح على صوره رغد ابتسمت وهمست:ربنا يفرح قلبك ويفرحنى بيك يابنى يارب .
هدى حطت الفون على الكمدينو وغطت حسن كويس ونامت جمبه عشان لو احتاج حاجه .
بقلم الكاتبه جنات
ـــــــــــ★ـــــــــــــــ
صباح يوم جديد .
رغد صحت ولاقت لارا ورهف بيحضرو الفطار وفطرو سوا .
ولارا ورهف دخلو المرسم ورغد كلمت محمد ومها عشان تعرف اخبار المستشفى منهم .
بعد وقت طويل لما الضهر اذن .
رغد قامت ولبست اسدال وصلت وبعد ماخلصت خرجت من الاوضه .
رهف:انتى راحه فين يارغد ؟!
رغد:المفروض حسن يغير على الجرح ومامته قالتلى ابقي اروح اغيرله عليه .
رهف:اجى معاكى نطمن عليه .
رغد:انا كنت هقولك ادخلى البسي وهاتى لارا معانا .
رهف:حاضر .
رهف دخلت لبست اسدال وخرجت وبيفتحو الباب اتفاجاو بمؤمن قدامهم ولارا جرت عليه وحضنته وهو باسها من خدها بحب .
رغد:فى ايه يامؤمن جاى بدرى كدا ليه ؟!
مؤمن:قولت اقضي معاكو اليوم فيها حاجه دى !
رهف:لا بس خوفنا انت اول مرة تيجى بدرى كدا .
مؤمن:ماعنديش حاجه مهمه واخدت اجارة وجيتلكو .... انتو رايحين فين كدا ؟!
رغد:امبارح حصل خناقه فى الحارة وحسن اتعور وخيطله الجرح ومامته طلبت منى ابقا اروح اغيرله على الجرح .
مؤمن:اصابه جامده يعنى ولا ايه ؟!
رغد:جرح من كتفه لحد بطنه بس الحمدلله مش عميق بس طبعا احتاج خياطه كتير .
مؤمن:طب خلينى اجى معاكو اطمن عليه .
رغد:يلا .
رهف:هو ينفع نروح ايدينا فاضيه كدا ... مش المفروض ناخد زيارة معانا .
رغد:صح .
مؤمن:خليكو هنا هروح اجيب حلويات انا شايف محل قبل الحارة بشويا ونروح سوا .
رغد:اوكى .
مؤمن نزل وبعد شويا رجع كان شايل شنطتين كبار واحده فيها علب حلويات والتانيه فيها جاتوه .
ونزلو كلهم سوا وراحو على بيت البطل .
رغد رنت على حنين وعرفتها ان رهف ومؤمن معاها .
رغد رنت الجرس وحنين فتحتلها:البيت نور والله اتفضلو.
رغد:منور بيكو يانوناا .
هدى جت من وراها:ياميت اهلا وسهلا بيكو والله نورتونا يابنتى .
هدى حضنت رغد بحب وبصت لرهف:انتى رهف صح ؟!
رهف:ايوا ازى حضرتك ؟
هدى حضنتها:انا كويسه يابنتى .
لارا:ازيك ياطنط ؟
هدى باستها من خدها:ياروح قلب طنط .
رغد شاورت على مؤمن:ده مؤمن ابن خالتى وحب يجى معانا يطمن على حسن .
هدى سلمت عليه:فيك الخير والله يابنى اتفضلو هو انا هنفضل على الباب كدا .
كلهم دخلو سوا وقعدو فى الصاله وحنين بدات تقدم الضيافه .
اولفت وعزة نزلو من فوق ودخلو وسلمو عليهم بضيق طبعاا وقعدو .
الحاج محمود نزل مع حمزة اللى اتفاجأ وفرح بوجود رهف وانها اول مرة تخرج من وقت ما جت الحارة .
محمود:يادى النور يادى النور .... حصلنا البركه والله ياولاد .
رغد ورهف ومؤمن سلمو على محمود باحترام ومحمود باس ايد لارا وقعد معاهم .
وحمزة سلم على مؤمن واكتف بابتسامه لرغد ورهف اللى ردو ليه الابتسامه .
هدى:بس انا زعلانه منكو انتو بتتعاملو معانا على اننا اغراب وانتو ضيوف وجايين شايلين بقي ده كلام .
مؤمن:دى حاجه بسيطه ياست الكل مش من قيمتكو والله .
هدى:تسلم يابنى ربنا يبارك فيك ويحميك يارب .
مؤمن بص لمحمود:الف سلامه على حسن ياحاج لما رغد قالتلى قولت اجى اطمن عليه .
محمود:فيك الخير يابنى والله وبعدين انتو تشرفو فى اى وقت ... دانا وجدكو كنا قريبين اوى من بعض .
هدى:ده حتى مريم ومنى الله يرحمهم كانو ونعمه الاخوات والجيرة ..... وسبحان الله انتى يارغد حته من خالتك منى لكن رهف نسخه من مريم .
رغد:صح كل اللى كانو يشوفنا كانو يفكرونى بنت خالتو منى وخصوصاا فى قوتها لكن رهف حته بسكوتايه زى ماما .
حنين:رهف دى قمرايه مش عارفه هى تؤامك ازاى يارغد الصراحه .
رغد:وحياتك ولا انا .
كلهم ضحكو عليها .
رغد:هو حسن فين ياهدهد عايزة اغيرله على الجرح .
حنين:جوا يارغد تعالى معايا .
اولفت:هو انتى دكتورة بجد ولا ممرضه .
رغد:ممرضه !!
اولفت:اصل الجرح كان وجعه طول الليل وكمان سخن جامد اوى .
رغد بصت لهدى:انا قولت لحضرتك انه ياخد العلاج .
هدى:هو نام من غير ماياخده يابنتى ولما تعب اديته الدوا بقي كويس .
رغد:كان لازم ياخده على الطول من الطبيعى انه يسخن ده جرح ومتخيط وكمان الطبيعى يوجعه عشان ماخدش المسكن .
حنين:قومى يارغد معايا وكل الحاجات اللى هحتاجيها جوا.
رغد:اوكى .
حنين ورغد دخلو الاوضه ومؤمن ومحمود وحمزة كانو بيتكلمو سوا ورهف كانت قاعده متوترة ومكسوفه .
بقلم الكاتبه جنات
ـــــــــــ★ـــــــــــــــ
فى الاوضه اللى فيها حسن .
حنين خبطت ودخلت ومعاها رغد وحسن ابتسم لما شافها.
رغد:اخبارك ايه ياحسن الوقت ؟
حسن:كويس جدا الحمدلله والبركه ليكى بردو يادكتورة .
رغد:الحمدلله انها جت على اد كدا .
حنين:اوبا نسيت شنطه الاسعافات فى الاوضه التانيه هجيبها واجى .
رغد:بس بسرعه .
حنين:حاضر .
حنين خرجت ورغد بصت لحسن:الجرح لسه واجعك ولا .
حسن:وجع بسيط يعنى .
رغد لسه هتتكلم دخلت عزة ومعاها حاجه سقعه:اتفضلى يادكتورة .
رغد بصتلها:شكرا مش عايزة .
عزة حطت الصنيه ووقفت:وانتى بقي دكتورة بجد ولا حته ممرضه زى ماما ماقالت !!
رغد:وده هيفرق معاكو يعنى لما تعرفو ؟!
عزة:اكيد طبعاا اصل حسن غالى علينا اوى ومش اى حد يعالجه بردو .
رغد بصتلها بقرف ومردتيش عليها وعزة اضايقت منها:والله تلاقيكى دكتورة بهايم .
حسن بحده:عزة .
رغد:ده انا مش كدا .... اه دكتورة بهايم بس تخيلى بقي اللى كانو بيجولى اعالجهم نسخه منك سبحان الله .
عزة:انتى قليله الادب ازاى تتكلمى معايا كدا وانتى ضيفه عندنا.
رغد قامت وقفت قدامها:انا متربيه غصبن عن عينك ماشي .... ولما تتعاملى مع حد بقله ذوق وادب اعرفى انتى هتلاقى الرد بنفس الطريقه .... ولو حابه تشوفى قله ذوق وادب ممكن اوريكى بس انا عامله حساب لعمو محمود وطنط هدى مش اكتر تمام .
عزة اضايقت وخرجت وهى مغلوله من رغد .
رغد قعدت مكانها تانى.
حسن:اسف يادكتورة هى دى طريقتها .
رغد:لا عادى بقدر اتعامل مع امثالها قابلت منهم كتير الصراحه ..... هى حنين اتاخرت ليه كدا .
بقلم الكاتبه جنات
ـــــــــــ★ـــــــــــــــ
برا فى الصاله كانو الكل بيتكلمو ورهف بدات تاخد على الجو وهدى كانت بتتكلم معاها وبتحكيلها على الايام اللى عاشت فيهم مع مريم ومنى .
حمزة اللى عينه على رهف و هى كل ما ترفع عينها تلاقيه بيبصلها تبعد عينيها عنه بسرعه .
جرس الباب رن ولارا راحت تفتح زى ماطلبت منها هدى وكان مراد اللى فرح لما شاف لارا وهى كمان فرحت جداا .
مراد شالها:لولى هانم وحشتينى والله .
لارا:وانت كمان يامراد .
مراد دخل وسلم على الكل وسلم بحب اخوى على مؤمن .
هدى:اتفضل يامراد .
مراد قعد:تسلمى ياهدهد ..... عامله ايه يا رهف ؟
رهف:الحمدلله يامراد ... انت عامل ايه ؟
مراد:زى الفل اهو قدامك .
رهف:ونورا والبيبي اخبارهم ايه وحمدلله على سلامتهم .
مراد:الله يسلمك يافنانه وهما كويسين جدااا .
رهف:دايما يارب .
مراد بص لهدى:هدهد عايز اشوف حسن واطمن عليه عشان مستعجل .
هدى:جوا فى الاوضه دى ومعاه رغد بتغيرله على الجرح .
مراد قام:تمام هدخلهم .
هدى:ادخل ياحبيبي .
مراد خبط على الباب ودخل:سلامتك الف سلامه يابطل .
حسن:الله يسلمك يامراد .
مراد:اهلا بالدكتورة .
رغد:اهلا بسياده الرائد .
مراد قعد على الكرسي:ايه اللى حصل يابنى ؟!
حسن:حوار كدا هابقي احكيلك عليه بعدين .... قوم ساعدنى ادخل الحمام وارجعلك تانى .
مراد ساعد حسن ودخله الحمام اللى فى الاوضه ورجع قعد مكانه .
مراد بص لرغد:رغد انا فى حاجات كتير عايز اتكلم معاكى فيها .
رغد باستغراب:حاجات ايه !!
مراد:الڤيلا اللى ولعت وانكو تيجو تعيشو هنا انا مش فاهم حاجه ولازم اعرف فى ايه .
رغد:ده موضوع طويل يامراد والله هابقي اقولك عليه .
مراد:وازاى الڤيلا تولع والتحقيق يقف كدا .
رغد:عشان انا اللى طلبت من مؤمن يعمل كدا .
مراد:الموضوع ده ليه علاقه بعمك هو اللى ولع الڤيلا ؟!
حسن كان هيخرج من الحمام وسمع كلامهم وقف .
رغد:ايوا يامراد هو اللى ولع الڤيلا وكان قاصد رهف ولارا .
مراد:وليه يعمل كدا وايه مصلحته اصلا .
رغد:بسبب وصيه بابا يامراد لانه ماكتبش اى حاجه ليه غير نصيبه فى الشركه بنسبه ٢٥٪ .
مراد:وايه دليلك انه هو ؟
رغد بدات تحكيله باختصار من اول ماحطو المايك لوقت حريق الڤيلا وزياره فاروق ليها فى المستشفى .
مراد:ازاى يبقي معاكى دليل زى ده ومتفكريش تستغليه ؟!
رغد:لان ببساطه فاروق وابنه مش هيقضو يوم واحد فى الحبس وكان غله هيزيد وبس .
مراد:اللى مستغرب منه انه مازن يفكر يأذيكى داحنا كلنا عارفين انه بيعشقك يارغد وبيتمنى اليوم اللى تبقي ليه .
رغد:هو كان مفكر لما يأذى رهف ولارا كدا هيكسرنى انا ومؤمن ووقتها يكحوشو على كل املاك بابا ... ووقت ضعف يقدر يستغل ده وابقي ليه بس ده على جثته انه يحصل .
مراد:مش عارف اقولك ايه يارغد ... بس اتاكدى ان اى وقت تحتاجينى هابقي فى ضهرك .
رغد:متاكده من ده يامراد .
حسن فى الوقت ده خرج ومراد سلم عليهم ومشي وحنين جت وبدات رغد تغير على الجرح .
وبعد شويا خلصت والكل دخلو وقعدو مع حسن .
مؤمن:الف سلامه عليك يابطل .
حسن:الله يسلمك يامؤمن تسلم .
هدى:غيرتو على الجرح خلاص .
رغد:ايوا ياهدهد والجرح زى الفل والله تسلم ايد الدكتورة اللى عالجته .
كلهم ضحكو على جنان رغد .
اولفت وهى بتبص لمؤمن:هو الشاب ده ابن خالتكو بس .
رغد:ايوا ليه فى حاجه ؟!
اولفت:اصله طالع نازل عندكو طول الوقت والناس اللى فى الحارة بداو يتكلمو يعنى .
هدى بحده:اولفت بلاش كلام مالوش لازمه .
رغد:معلش ياطنط هدى لحظه... يتكلمو على ايه مش فاهمه ؟!
اولفت:اصله بيجيلكو دايما واوقات بيبات عندكو وانتو بنات يعنى والمفروض تحافظو على سمعتكو .
رغد:لا ماهو انا ميهمنيش حد لا انتى ولا غيرك ... وبعدين مؤمن مش بس ابن خالتنا لا وكمان اخونا فى الرضاعه ... واى حد هيفكر ينطق نص كلمه فى حقى انا او رهف او يبص لينا بصه مش كويسه مستعده ادب صوابعى العشرة فى عينيه .
محمود:اهدى يابنتى وحقك عليا انا اسف .
رغد:حضرتك بتقول ايه ياعمو لا طبعاا متتاسفش مش ذنبك وبعدين انا بعرف اتعامل مع اى حد ومش بخاف .
هدى حبت تغير الموضوع:طب يلا بقي عشان ناكل كلنا سوا .
مؤمن:اعفينى انا ياست الكل .
هدى:ولا كلمه كلنا هنتغدى سوا عشان يبقي بينا عيش وملح ... يلا ياحنين نحضر الاكل .
رغد:وانا ورهف هنساعدكو كمان .
لارا:وانا وانا .
هدى ضحكت:ياخواتى ست العرايس القمرايه .. يلا تعالو ونسيب الرجاله سوا .
هدى والبنات راحو المطبخ والرجاله فضلو سوا واولفت وبنتها كانو مضايقين جدا من رغد ......
17=»» الفصل ١٧ ««
للجميع@
هدى والبنات حضرو الاكل وقعدو كلهم على السفرة واكلو سوا فى جو جميل كله هزار وضحك كأنهم عيله واحده .
اولفت وبنتها اللى كانو مضايقين من وجودهم وخصوصا عزة اللى ملاحظه نظرات الاعجاب من حسن لرغد .
حنين اللى كانت بتاكل لارا بنفسها وبيضحكو ويهزرو سوا ومؤمن متابعهم وملاحظ تعلق لارا بحنين واد ايه بتحبها .
وعزت اللى قعد معاهم ورغد كانت مضايقه منه بسبب نظراته الوقحه ليها ولرهف .
بعد ماخلصو الاكل البنات قررو هما اللى يغسلو الاطباق وضحكو كتير وهما سوا فى المطبخ .
اما الرجاله قعدو كلهم سوا فى صاله ورهف عملت ليهم قهوة .
البنات بعد ماخلصو غسيل الاطباق حنين اقترحت عليهم يطلعو السطح سوا ورغد ورهف رحبو جداا وخرجو من المطبخ .
حنين:ماما احنا هنطلع على السطح شويا .
هدى:اطلعو ياحبايبى .
محمود:قبل ماتطلعى يارهف ياريت فنجان قهوة كمان من ايدك .
هدى:مانت لسه شارب ياحاج والقهوة الكتير غلط .
محمود:بصراحه فنجان القهوة بتاع رهف بيعدل الدماغ ودى فرصه يا ام حسن .
هدى ضحكت:ماشي اعمليله يارهف .
رهف:حاضر من عيونى ياعمو .
محمود:تسلميلى عيونك يابنتى .
رهف بصت للبنات:اطلعو انتو وانا هعمل القهوة واجيلكو .
حنين:اوكى متتأخريش .
رهف:حاضر .
رهف دخلت المطبخ والبنات طلعو .
رهف كانت واقفه تعمل القهوة ولفت لما سمعت صوت وراها وكان عزت اللى قرب من التلاجه عشان يشرب .
رهف اتوترت من وجوده معاها وهما لوحدهم .
عزت:احم بصراحه القهوة بتاعتك بتعمل دماغ انما ايه تسلم ايدك .
رهف وهى مركزة فى القهوة:شكراا .
عزت لسه هيقرب من رهف حمزة دخل المطبخ :خير ياعزت بتعمل ايه هنا ؟!
رهف بصت لحمزة وتوترها بيزيد اكتر وخصوصا من حمزة اللى تقريبا من وقت مادخلو البيت وهو عينه عليها .
عزت اتوتر:لا ولا حاجه كنت جاى اشرب ياحمزة .
حمزة:وشربت؟
عزت:اه خلاص انا هخرج .
حمزة:تمام .
عزت خرج ورهف كانت بتبص لحمزة وفاقت على صوت القهوة اللى فارت .
رهف شالت الكنكه بسرعه وطفت النار وجابت فوطه مطبخ ومسحت القهوة اللى وقعت على البوتجاز .
حمزة:على مهملك عين البوتجاز سخنه .
رهف:حاضر .
حمزة شايفها متوترة:رهف .
رهف لفت وبصتله:نعم !
حمزة قرب خطوة بس كان فى مسافه بينهم:رهف انا معجب بيكى من اول ماشوفتك
.... تقدرى تقولى كدا انك دخلتى قلبي بدون استاذان ... انا كلمت الحاج محمود عشان اتقدم ليكى وهو قالى لما نشوف انتو هتستقرو هنا ولا هترجعو القاهرة تانى ... بس حتى لو رجعتو القاهرة هاجى واتقدملك يارهف .... انا عارف انه مينفعش اتكلم معاكى وان ده غلط وميصحش بس حبيت اقولك على اللى جوايا وعايزك تفكرى براحتى وصدقينى حتى لو هترفضينى انا مش هزعل اهم حاجه عندى راحتك واللى انتى عايزاه ...انا هخرج وانتى كملى القهوة براحتك بس خدى بالك .
رهف هزت راسها بتوتر وحمزة خرج من المطبخ ورهف حطت ايدها مكان قلبها اللى كان بيدق بقوة لدرجه انها حست انه هيخرج من بين ضلوعها .... بس حاولت تتماسك وعملت قهوة تانيه للحاج وخرجت قدمتها ليها وهى متوترة جداا وطلعت بسرعه السطح للبنات وقضو وقت جميل سوا واليوم خلص واستاذنو ومشو ومؤمن رجع القاهرة والبنات رجعو على بيتهم .
بقلم الكاتبه جنات
ـــــــــــــــ★ــــــــــــــــ
صباح تانى يوم البنات صحو على صوت فرقه بتزمر وتطبل .
لارا قامت بحماس من على السرير وجرت على البلكونه عشان تتفرج ورغد ورهف ضحكو عليها .
فى الشارع .
كان جابر ابن المعلم منصور وصل الحارة بعد ماطلع من السجن وامه جابت الفرقه عشان تستقبله ورقصت وزغرطت من فرحتها بخروج ابنها من السجن والمعلم منصور من فرحته قال انه هيدبح ويوزع اللحم على اهل الحارة كلها بمناسبه خروج ابنه من السجن .
بقلم الكاتبه جنات
ـــــــــــــــ★ــــــــــــــــ
بعد وقت طويل فى بيت المعلم منصور .
كان جابر قاعد على السفرة اللى مليانه بانواع كتير من الاكل اللى هو بيحبه .
ومحروسه بتاكله بايدها .
جابر:خلاص ياما نفختينى اكل .
محروسه:كل ياقلب امك دانت خاسس وعدمان ... هو الاكل اللى كنت ببعته ماكنش بيوصلك ولا ايه ؟!
جابر:كان بيوصل ياما وكل اللى فى السجن بيدعولك والله .
محروسه:الحمدلله انك خرجت بالف سلامه ياقلب امك .
جابر بص لابوه:اومال يابا بيت الشهاوى لسه مش اتهد ليه ... دانا فكرت انى هخرج الاقيكو بداتو فى العمارة .
محروسه:ابوك بيته هيتخرب يابنى انت متعرفش حاجه .
جابر:معرفش ايه بظبط هو ايه اللى حصل فى غيابي ؟!
محروسه بدات تحكيله من اول يوم ظهرت فيه رغد وانها رفضت بيع البيت واللى عملته فى منصور قدام الحارة كلها .
جابر:وانت مش قادر على حته بت يابا .
منصور:البت دى قويه يابنى وبتتكلم بقلب جامد الظاهر كدا وراها حد تقيل اوى .
جابر:وانت يابا رايح تتقدم لاختها عايز تتجوز على امى .
منصور:ماخلصنا بقي من الحوار ده ... انا كنت عايز البيع باى طريقه ... الناس هبلنى وبيسالونى كل يوم هنبدا المشروع امته ؟
جابر:هتتحل يابا ..... اومال انا ماشوفتش البطل يعنى ؟!
محروسه:اسكت ده اجه واد كدا شكله بلطجى واتخانق مع حسن والشباب الحارة وعوره جامد فى بطنه والبت الدكتورة هى اللى عالجته .
جابر باستغراب مصتنع:معقول البطل يتعلم عليه .
منصور:بس الواد اخده على خوانه وهو بيدافع عن شباب الحارة .
جابر:لا سلامته الف سلامه البطل .
محروسه:انت هتفضل تتكلم كمل اكلك يابنى يلا .
بقلم الكاتبه جنات
ـــــــــــــــ★ــــــــــــــــ
فى القاهرة فى شركه الصاوى وتحديدا فى مكتب فاروق اللى قاعد معاه فؤاد .
فاروق:يعنى مش بتيجى المستشفى ابدا ؟!
فؤاد:لا محمد ومها اللى بيديرو كل حاجه وعلى تواصل معاها .
فاروق:هتجنن واعرف راحت فين البت دى مش موجوده فى القاهرة كلها .
فؤاد:اللى اعرفه واللى بيتقال فى المستشفى انها راحت تغير جو هى واختها لان نفسيتها تعبانه بعد الحريق اللى حصل فى الڤيلا .
فاروق:تمام سيبك منها الوقت .... عملت ايه مع الراجل عشان المشروع ؟
فؤاد:فى شويا مشاكل حصلت بس هتتحل متقلقش .
فاروق:احنا بقالنا سنه كامله بنديه الفلوس وهو مش بيعمل اى حاجه .
فؤاد:انا هروحله وهشوف المشكله دى يمكن اقدر احلها .
فاروق:تمام وياريت بسرعه بدل ماادخل بطريقتى .
فؤاد قام وقف:تمام همشي انا عشان عندى عمليه .
فاروق:تمام .
فؤاد خرج وفاروق كمل شغله .
بقلم الكاتبه جنات
ـــــــــــــــ★ــــــــــــــــ
مرت الايام وحسن اتحسن وكانت رغد كل يوم بتروح تغيرله على الجرح .
ورهف اللى كلام حمزة مش بيروح من بالها ولا حتى نظراته ليها وكل ماتفكر فيه قلبها بيدق .
واخيرا جه يوم حنه فرح ورغد ورهف وحنين كانو مع فرح من اول اليوم زى ماطلبت منهم ام فرح عشان فرح ملهاش اخوات ولا اصحاب والبنات راحو وهيصو لفرح اللى كانت فرحانه جداا بوجودهم معاها .
والشباب جابو سمعات كبيرة وصوت المهرجانات كان مالى الحارة كلها والشباب هيصو لمحمد وقضو اليوم كله رقص فى الشارع .
بقلم الكاتبه جنات
ــــــــــــــ★ــــــــــــــــ
صباح يوم فرح محمد وفرح .
شباب الحارة كلهم كانو بيجهزو الارض الفاضيه اللى فى اخر الحارة عشان هيتعمل فيها الفرح .
والبنات كانو مع فرح من اول اليوم .... وفى بنت جت عملت الميكب لفرح فى البيت والبنات ساعدوها تلبس فستانها الابيض وكانت جميله جداا وخرجت من البيت وركبت مع محمد العربيه اللى متزينه بالورد عشان يروحو يتصورو ويرجعو على الحارة تانى .
وشباب الحارة اللى مشو ورا العربيه بالعربيات وزفوهم بطريقه حلوة اوى .
حنين اللى راحت تلبس مع رغد ورهف فى بيتهم ولبسو فساتين بسيطه مع بعض اللمسات الرقيقه من الميكب وكانو حلوين جداا.
بقلم الكاتبه جنات
ــــــــــــــ★ــــــــــــــــ
بليل فى الارض الفاضيه اللى كانت متزينن بشكل ولا اروع بالانوار والورد .
والكراسي مصفوفه بشكل جميل للمعازيم وكمان مكان الخاص بالعروسين اللى متزين بالورد الابيض وشكله جميل فوق الوصف .
البنات راحو المكان اللى هيتعمل فيه الفرح وقعدو مع هدى اللى اول ماشافتهم فضلت تكبر وتريقهم من عيون اولفت وعزة اللى كانو بياكلو البنات بعينيهم .
هدى:بسم الله ماشاء الله ربنا يحميكم ويحفظكم من كل عين يابنات طالعين زى القمرات .
رغد:انتى اللى قمرايه ياهدهد .
ام فرح جت عليهم والكل سلمو عليها وباركو ليها .
وبعد شويا سمعو صوت العربيات اللى دخلت الحارة .
ونزلو العريس والعروسه ومشو شارع الحارة كله اللى متزين بالانوار لحد ماوصلو للارض الفاضيه .
وبدأ الفرح بالفرقه اللى كانت بتطبل وتزمر وبيغنو اغانى الافراح القديمه الجميله .
وبعد ماخلصو الفرقه محمد وفرح رقصو سوا سلوو .
حسن وحمزة اللى كانو مع الشباب راحو لتربيزة اللى عليها هدى والبنات .
حسن وحمزة عقلهم طار من جمال البنات ورقتهم .
حسن باس راس هدى اللى ابتسمت وبصتلهم بحب:عقبال مافرح بيكو ياحبايب قلبي يارب .
حنين:وانا بنت البطه السودا يعنى مثلا .
هدى ضحكت:دانتى بنت قلبي يانوناا .
حنين بعتتلها بوسه فى الهوا:حبيبتى يادودو .
حمزة عينه على رهف اللى كانت مكسوفه جداا وبتفرك فى ايدها من التوتر وابتسم على خجلها من اول مابتسمع صوته بس .
حسن خبطه فى كتفه:اتلم .... احنا منرضهاش لحنين .
حمزة بهمس:وانا عملت ايه يعنى اسكت ونبي سبنى فى حالى.
حسن ضحك:خلى رغد تشوفك كدا وانت بتسبل لاختها وقتها هتكره اليوم اللى فكرت تبصلها .
حمزة:ونبي اسكت دانا شايل هم ان دى هتبقي حماتى فى يوم من الايام واكيد هطلع عين اللى جابونى .
حسن ضحك وعينه جت على رغد اللى عينها على فرح ومحمد وهما بيرقصو سلو وبتدندن مع الاغنيه .
رغد عينها كانت على العريس والعروسه واد ايه شكلهم حلو وباين الحب فى عينيهم لبعض
...واتمنت لو كانت حياتها بسيطه كدا وماكنش يبقي فيها كل المشاكل دى والخوف اللى هى عايشه فيه .
بعدت نظرها عن محمد وفرح كانت خايفه انها تحسدهم على حياتهم وفرحتهم وحبهم لبعض .. وعينها جت فى عيون حسن اللى كان بيبصلها وابتسم اول ماجت عينه فى عينها ورغد كانت مستغرباه بس هى مش قادرة تحدد احساسها ناحيته الايام اللى فاتت لما كانت بتروح تغيرله على الجرح وبيتكلمو سوا واد ايه بتبقي مبسوطه وهى بتتكلم معاه .... واد ايه بيفكرها بوالدها جمال والامان اللى كانت بتحسه معاه هو نفس الامان اللى بتحسه مع حسن .
وافتكرت كلام مراد لما قالها تحكى لحسن على كل حاجه بتخص عمها وابنه عشان لو قدر يوصلهم تكون فى حمايته بس هى بتدعى ربنا انه عمها يفضل بعيد عنها ومايقدرش يوصلها ابدا .
رغد فاقت على صوت حنين:رغد تعالى نروح لفرح لانها وحدها .
رغد بصت على المسرح وشافت محمد مع اصحابه وفرح قاعده فى مكانها لوحدها .
رغد شاورت لرهف وحنين:قومو يلا .
البنات راحو واخدو لارا معاهم واخدو فرح ورقصو معاها واتصورو وفرح كانت مبسوطه بلمتهم حوليها .
على تربيزة منصور ومراته وابنه اللى كان قاعد معاهم وعينه منزلتش من على رهف ورغد
جابر:اماااا مين الوجوه الجديده اللى قاعدين مع عيله البطل دول ؟!
محروسه:دى حفيده الشهاوى اللى حكيتلك عليها.
جابر وهو عينه عليهم:انهو فيهم بقي اللى بهدلت ابويا ؟!
محروسه:اللى لابسه بيج .
جابر:واضح جدا على فكرة انها جامده .... حتى البت التانيه مزة من الاخر ليه حق ابويا يطلبها لجواز .
محروسه:انت هتخيب ولا ايه ياض ماتلم نفسك .
جابر ضحك:ماشي يامحروسه.
بقلم الكاتبه جنات
ــــــــــــــ★ــــــــــــــــ
بعد وقت طويل الفرح خلص ومحمد اخد عروسته وطلعو بيتهم اللى فى الحارة والكل رجعو على بيتهم .
وعيله البطل كانو واقفين مع رغد ورهف .
محمود:روح ياحسن وصل رغد ورهف على بيتهم .
رغد:لا ياعمو ده البيت قريب جدا مالوش لزوم .
محمود:الوقت متاخر يابنتى يلا روح معاهم ياحسن ... وبكرة يارغد ابقي تعالى عايزك فى موضوع .
رغد باستغراب:موضوع ايه ياعمو خير ؟!
محمود:بعد الضهر كدا هروح الورشه وانتى ابقي تعالى ووقتها هتعرفى متقلقيش .
رغد:حاضر ياعمو ... تصبحو على خير .
كلهم:تلاقى الخير .
البنات مشو مع حسن ووصلو عند بيت الشهاوى وجابر كان واقف مع اصحابه ولما شافهم جايين قال بصوت عالى يقصد بيه رهف اللى كانت لابسه لون ازرق:الازرق على الاسد يمنع الحسد .
الشباب اللى واقفين معاه ضحكو بصوت عالى ورغد اضايقت منهم .
رهف حست ان اختها هتعمل مشكله:رغد تعالى نطلع بلاش مشاكل ونبي .
رغد:انت مش سامعه الحيوان ده بيقول ايه ؟!
حسن:اطلعو يادكتورة يلا ومتشغليش بالك انا هتعامل معاه .
رغد:لا بلاش ياحسن دول ٥ شباب وانت لوحدك بلاش احسن .
حسن ابتسم:متقلقيش يادكتورة اطلعى انتى .
رغد:حاضر .
رغد طلعت هى ورهف ولارا .
وحسن قرب من جابر والشباب اللى خافو من حسن وبطلو ضحك .
حسن:اظن من الادب اللى انت متعرفوش يابن منصور انك تحترم بنات حتتك ولا ايه ؟!
جابر:حتتى ... هما فى ثانيه بقو بنات حتتى يابطل !
حسن:ايوا بنات حتتى ولو عينك راحت ناحيتهم متلومش غير نفسك .
جابر:صح يابطل نسيت اقولك حمدلله على سلامتك ... بس انا مستغرب بقي حته عيل لا راح ولا جه يعلم على ابن البطل والله دى عيبه فى حقنا .
حسن:وانت مفكر انى مش عارف ولا فاهم لعبتك ياابن منصور ... انا سالت على حته العيل ده وعرفت انه لسه خارج من السجن والصدفه بقي انه كان معاك فى نفس الزنزانه .. مش غريبه دى ياجابر ولا ايه .
جابر:وانا مالى بردو ؟!
حسن:ولا حاجه .... بس خليك فاكر ان ابن البطل مابينساش لو حد جه عليه تمام .... سلام ياابن منصور .
حسن قاله كدا ومشي وجابر كان مضايق وخاف عشان حسن كشفه.
رغد كانت واقفه فى الشباك وشايفه حسن وهو بيتكلم مع جابر بس مش سامعه كلامهم وشايفه وقفه حسن اللى واثق من نفسه ونظرة جابر اللى اتحولت لخوف وتوتر بعد ماحسن مشي .
رغد ابتسمت:لا كاريزما كاريزما يعنى يا ابو على .
بقلم الكاتبه جنات
ــــــــــــــ★ــــــــــــــــ
تانى يوم .
وصلت عربيه الحارة والكل عينهم كانو عليها لانها اول مرة تيجى الحارة .
ونزل منها راجل لابس بدله وسنه كبير وكان بيبص على الحارة بقرف .
ومنصور اول ماشافه جرى عليه:دكتور فؤاد اهلا وسهلا ده الحارة نورت والله تعالى اتفضل .
فؤاد:دخل معاه المحل وكان قرفان من ريحه اللحمه:انا جيتلك عشان نحل موضوع المشروع وصلت لايه مع البنت صاحبه البيت .
منصور:حاولت معاها وهددتها كمان وهى دماغها زى الجحر رافضه تبيع يابيه .
فؤاد:مانت غبي يامنصور ازاى تحط امل على ارض متعرفش اصحابها ... انا غلطان انى وثقت فيك .... انت عارف ان فاروق بيه مش هيعدى اخطاءك دى .
منصور خاف لانه عارف فاروق وجبروته .
بقلم الكاتبه جنات
ــــــــــــــ★ــــــــــــــــ
فى الوقت ده نزلت رغد وراحت على الورشه وكان الحاج محمود مستنيها .
محمود اتكلم مع رغد فى الموضوع اللى عايزها فيه وانه كان عايز يعمل عياده صغيرة فى الحارة عشان كل الحارة يستفيدو منها .
ورغد رحبت جدا بالموضوع وكانت فرحانه انها هترجع تشتغل تانى وانها كانت زعلانه جدا انها بعدت عن المستشفى والمرضي .
رغد خلصت كلام مع محمود واستاذنت عشان تمشي .
وخرجت من الورشه ولسه هتدخل بيتها وقفت مصدومه لما سمعت صوت فؤاد:دكتورة رغد ......
18 = »» الفصل ١٨ ««
للجميع@
فؤاد كان بيتكلم مع منصور وبيحاول يوصل لحل للمشكله عشان يبدأو فى بناء العمارة .
(فاروق وفؤاد ومنصور شركاا فى مشروع العمارة اللى ناوين يبنوها ويبيعو شققها ودى مش اول عمارة يشاركو فيها سواا )
فؤاد فونه رن وخرج برا المحل عشان يرد على المكالمه واتفاجأ لما شاف رغد خارجه من ورشه نجارة .
فؤاد:دكتورة رغد !
رغد وقفت مكانها لما سمعت الصوت لانها عارفاه كويس جداا ... وكانت مستغربه فؤاد بيعمل ايه هنا .. والاكيد انه هيقول لعمها على مكانهم ... بس حاولت تتماسك قدام فؤاد .
رغد لفت وبصت لفؤاد:دكتور فؤاد معقول ... ايه اللى جايبك هنا فى الحارة ؟!
فؤاد قرب منها:انتى ايه اللى جايبك هنا ؟!
رغد:اظن حاجه متخصش حضرتك ولا ايه .... والمفروض السؤال ده اساله ليك لان حضرتك سايب المستشفى وجاى هنا من غير حتى ماتاخد اجازة .
فؤاد:جاى لواحد معرفه وراجع القاهرة علطول ... صحيح انتى مختفيه بقالك فترة ومش بتيجى المستشفى تقريبا من وقت الحريق اللى حصل فى الڤيلا.
رغد:مع ان دى حاجه مش لازم تعرفها يعنى بس رهف اختى تعبت بسبب اللى حصل وانا وهى بنغير جو شويا وجينا هنا الحارة ... زى مانت شايف كان فى فرح امبارح ودى واحده صحبتى وجينا نحضر الفرح وهنسافر تانى .
فؤاد:هتسافرى القاهرة ؟!
رغد:لا مش هرجع غير لما رهف حالتها تتحسن .
فؤاد:تمام يادكتورة .
رغد دخلت البيت وطلعت تبص على فؤاد من الشباك وفؤاد رد على فونه اللى رن تانى ومشي من غير مايدخل لمنصور وركب عربيته ومشي .
بقلم الكاتبه جنات
ـــــــــــــــ★ــــــــــــــ
رغد طلعت البيت وكانت مرعوبه ان فؤاد يسال منصور عليها ويعرف انها عايشه هنا والاكيد انه هيقول لفاروق لانهم اصحاب جداا بس اطمنت لما فؤاد مشي من غير مايدخل لمنصور .
رغد كلمت مؤمن وقالتله اللى حصل وهو طمنها لما عرف ان فؤاد مشي علطول من غير مايدخل لمنصور ويساله عليها وهى اطمنت من كلام مؤمن وهدت شويا وراحت لرهف ولارا اللى فى المطبخ بيعملو كيك سوا .
رغد:ده ايه الروايح اللى تجنن وتجوع دى ؟!
رهف ضحكت:لولى نفسها فى كيك فقولت اعملها .
رغد:يعنى الكيك لـ لولى بس يعنى؟
رهف:اكيد لا ياروحى .
رغد باستها من خدها:قلبي يانصى التانى .
رهف:صح عمو محمود كان عايزك ليه ؟
رغد:عايز يفتح عياده فى الحارة واكون انا الدكتورة فيها عشان اهل الحارة يستفيدو بدل مابيروحو يكشفو برا الحارة بفلوس كتير العياده هتكون خيريه يعنى ببلاش .
رهف:فكرة حلوة جداا ...بس اكيد هيكون تعب عليكى لوحدك .
رغد:هو قال هيشوف بنات الحارة لو حد يقدر يساعدنى ...... هروح اغير .
بقلم الكاتبه جنات
ـــــــــــــــ★ــــــــــــــ
بعد وقت طويل فؤاد وصل القاهرة وراح لفاروق ڤيلته واتكلمو كتير فى موضوع المشروع.
فؤاد:انا قابلت حبيبتك النهارده .
فاروق:حبيبتى مين؟!
فؤاد:الدكتورة رغد .
مازن كان داخل المكتب وسمع كلام فؤاد:قابلتها فين ؟
فؤاد:فى اسكندريه فى حارة اللى ساكن فيها منصور .... بتقول انها كانت بتحضر فرح واحده صاحبتها وهتسافر تانى هى واختها لان نفسيتها تعبانه من وقت الحريق .
فاروق:وانت صدقتها اكيد بتكذب عليك .
فؤاد:الحارة فعلا كان متعلق فيها نور والعمال كانو بيشلوه معنى كدا ان الفرح كان امبارح .
مازن:ومسالتش منصور عليها ؟!
فؤاد:لا جالى مكالمه ومشيت علطول .
مازن:طب كلمه بسرعه نتاكد منه يعرفها ولا لأ.
فؤاد:حاضر .
فؤاد طلع فونه ورن على منصور اللى رد عليه:فؤاد باشا انت مشيت بسرعه ليه كدا ؟!
فؤاد:جالى مكالمه مهمه ومشيت ... بقولك يامنصور .
منصور:أؤمرنى ياباشا .
فؤاد:النهارده وانا عندكو فى الحارة قابلت دكتورة معرفه وكنت مستغرب هى بتعمل ايه فى الحارة عندكو قولت اسالك يمكن تكون عارفها .
منصور:قصدك مين يابااشا ؟!
فؤاد:اسمها الدكتورة رغد .
منصور:متجبش سيرتها ياباشا دى بت فقر.
فؤاد بص لفاروق:انت تعرفها يعنى ؟!
منصور:ماهى دي ياباشا حفيده صاحب البيت اللى المفروض نهده عشان نبنى العمارة وجت سكنت هى واختها هنا من فترة ورافضه انها تبيع .
مازن بص لابوه والاتنين ضحكو انهم اخيرا عرفو مكانهم .
فؤاد:امممم تمام يامنصور انا هحاول اتصرف فى موضوع العمارة ده سلام .
منصور:سلام يابااشا .
فؤاد قفل وبص لمنصور:حلاوتى هتبقي كام بقي ؟!
فاروق:٥٠٠ الف مش خسارة فيك .
فؤاد:ماشي حالهم ... انا همشي انا بقي .
فاروق:تمام .
فؤاد مشي وفاروق بص لابنه:بيت الشهاوى .... صالح الشهاوى جدهم .....
هنعمل ايه الوقت؟!
مازن:اقولك انا هنعمل ايه .
بقلم الكاتبه جنات
ـــــــــــــــ★ــــــــــــــ
بليل فى بيت البطل وتحديدا على السطح .
حمزة وحسن كانو قاعدين سواا .
حنين طلعت:ايه ده بتعملو ايه هنا ؟!
حسن:ممنوع نطلع يعنى !
حنين:لا بس انت بالعاده بتحب تقعد فى بلكونتك غيرت قعدتك ولا ايه ياابو على .
حمزة:انا اللى قولتله نطلع نشم شويا هوا ....انتى بقي طالعه هنا ليه ؟!
حنين قعدت على كرسي وقدامه تربيزة صغيرة:هكلم لارا عشان ارجعلها شويا عشان امتحاناتها قربت .
حسن:ننزل يعنى لو وجودنا هيضايقك !
حنين:لا خليكو عادى .
حنين رنت على فون رهف مكالمه فيديو ولارا ردت عليها وكانت قاعده فى الاوضه لوحدها:نونااا .
حنين:قلب نونا ... اومال هما فين ؟!
لارا:رهف بترسم ورغد بتكلم اونكل محمد .
حنين:طب يلا نبدأ بقي هاتى كتابك يلا
لارا:اوكى .
حنين سندت الفون على التربيزة اللى قدامها ومسكت كتاب زى بتاع لارا وبدات تشرحلها ولارا كانت بتستوعب بسرعه لانها شاطرة جدا فى مدرستها وبتحب الدراسه والمذاكرة جداا .
بعد شويا برا الاوضه رغد خلصت مكالمتها مع محمد اللى بيقولها كل حاجه بتحصل فى المستشفى ده غير التقارير اللى بتبعتها مها ليها كل يوم .
رغد دخلت المرسم كانت رهف قاعده مشغوله فى رسم لوحه ولامه شعرها على شكل كحكه ومثبتاها بفرشه رسم نضيفه .
رغد:اومال لولى فين يارهف ؟!
رهف:بتذاكر مع حنين اون لاين .
رغد:هروح ارخم عليهم شويا .
رهف ضحكت ورغد راحت الاوضه اللى فيها لارا ونطنت فجأه جمبها على السرير:اهلا ياقمرات .
حسن بص على حنين بس طبعا ضهر الفون ليه يعنى مش شايف لارا ولا رغد .
لارا بخوف:خضتينى يادودو .
رغد باستها من خدها:متزعليش ياقلب دودو انتى .
حنين:انتى ايه اللى جايبك هنا مش شيفانا بنذاكر .
رغد:عادى نوقف مذاكرة ونرغى شويا ... وبعدين مش انتى قولتلى هتيجى وتذاكرلها هنا .
حنين:كسلت اخرج الصراحه وقلت عشان نذاكر براحتنا .
رغد:لولى عامله معاكى ايه ؟
حنين:لولى اشطر بنوته ماشاء الله عليها بجد .
رغد حضنت لارا:طبعا مش طلعالى .
حنين بصت على حمزة اللى بيشاورلها وحرك بوقه باسم رهف .
حنين بصت لرغد:اومال فين رهف ؟!
رغد:بدام انتى سامعه موسيقى هاديه فى البيت تبقي رهف بتعمل ايه؟
حنين:اكيد بترسم .
رغد:ايوا ... استنى انادى عليها ..... رهف ... يارورووو .
رهف فتحت الباب:فى ايه يابنتى مالك؟!
رغد:تعالى ياروحى قعدى ارغى معانا شويا .
رهف قعدت جمبهم وشافت حنين:مش المفروض انتو بتذاكروو .
حنين:ده المفروض بس رغد هانم عندها رأى تاني .
رغد:انتو بقالكو اد ايه بتذاكرو.
حنين:ماكملناش ساعه على فكرة .
رغد:عادى بكرة ابقو كلمو .
رهف:على فكرة انا عملت الكيك على اساس انك هتيجى النهارده .
حنين:اوبا بقي كيك رهف الذى لا يقاوم انا ماليش فيه عايزة حته .
رهف:لما عرفت انك مش جايه عملت صنيه كيك ليكى وعشان كمان هدهد طلبت تدوق الكيك بتاعى.
حنين:ده قشطااا اوى يارهف.
حنين بصت لرغد ورهف:تعرفو انكو قمرات اوى بشعركوو .... انا بجيلكو دايما بس بتبقو لابسين اسدالات وطرح .
رغد:طبعاا يابنتى داحنا مزز وجامدين اخر حاجه .... بس الحاج جمال الصاوى علمنا من صغرنا ان بنات الصاوى شعرهم مايتكشفش على رجاله غير فى الحلال وبس .
البنات ضحكو وحمزة بص لحسن وبيحاول يكتم ضحكته .
رغد بصت لـ لارا:لولى احنا بنغنى ايه سوا دايما ؟
رغد ولارا غنو سوا .
" اطعم مالمربي ... بس بابا ربي ... لا شطانك يوزك .... تلقى الوجع ده حظك ... مش كل الطير بينفع يتأكل ... لا اسمع هسقف على وشك ... على احلى دوم دوم تك تك "
لارا:كمان يادودو كمان .
رغد:يلا ياقلب دودو .
لارا ورغد كملو غنى " احلى من النوتيلا ... انا رايقه ومش مملة ... من جوا بيضه وفله ... ولا حد ماسكلى زلة ... لو فاكرنى هرضي انا شوك وفى قلبي ورده ... مش هتكسب حبي خالص غير زى ماقلبي عايز "
رغد ولارا خلصو غنى وضحكو سوا وحنين ورهف بيضحكو على جنانهم .
وحسن ابتسم على جنان رغد اللى سكنت قلبه وعقله من اول مرة شافها .
حنين:يعنى انا افضل اذاكر للبت وفى الاخر تحفظيها الاغانى دى .
رغد ضحكت:بصى انا ماشيه مع لارا بمبدأ ايه .. ماتصلحه رهف وحنين تفسده رغد .
حنين:حرام عليكى البت امتحاناتها قربت ...لارا اياكى تقعدى مع البت دى تانى وتحفظى اغانى ركزى فى المذاكرة وبس .
رغد:حنين معلش سؤال رفيعه انتى مش قاعده فى بيتكو لابسه اسدال وطرحه وخانقه نفسك ليه يااوختى ده حتى الجو حر موت !
حنين:ببساطه لانى على السطح واحتمال تروح فيها رقاب لو قلعت الطرحه .
رغد:مش فاهمه يعنى .
حنين ضحكت:لان حمزة وحسن قاعدين معايا على السطح .
رغد:امممم عشان كدا .
لارا:يعنى عمو حسن وعمو حمزة سمعونا واحنا بنغنى يادودو ؟!
رغد:لا حنين اكيد لابسه الهدفون مش كدا .
حنين ضحكت وهزت راسها يمين وشمال .
رغد:نعم ياختى ... الله يخربيتك عالبيت اللى جمب بيتك ياحنين .
حنين ورهف بيضحكو عليها .
رغد بصت لرهف:اضحكى اضحكى ما انتى قاعده صامته مش بتتكلمى .... انا ماشيه وسيباكو .
رغد خرجت من الاوضه والبنات لسه بيضحكو عليها .
رهف:هتاخدى الكيك ازاى يانونه .
حنين وهى لسه بتضحك:هبعت حد ياخدها اهو ... ومرسي يارهف بجد .
رهف:دى حاجه بسيطه عشان خاطر عيونك انتى وهدهد .
حنين بعتتلها بوسه فى الهوا:تسلملى عيونك ياقمرايه انتى .... يلا يا لارا روحى نامى وبكرا نكمل مذاكرة .
لارا:اوكى باى .
حنين:تصبحو على خير .
رهف:تلاقى الخير يانوناا .
حنين قفلت وبصت لشباب اللى كانو مركزين معاها اوى:مبسوطين انتو مش كدا ؟!
حسن:انا نازل انام .
حنين:ماشي ياابو على .... زومه ممكن تروح تجيبلى الكيك منها .
حمزة:طبعا ياقلب زومه انتى .
حمزة نزل وحنين بعتت مسدج لرهف انها بعتت حمزة ياخد الكيك .
بقلم الكاتبه جنات
ـــــــــــــــ★ــــــــــــــ
فى بيت الشهاوى
رهف دخلت الاوضه كانت رغد بتتكلم فى الفون .
رهف:رغد حنين بعتت ان حمزة ابن عمها هيجى ياخد الكيك انزلى اديه ليه لو سمحتى .
رغد:انا بكلم مها يارهف معلش نزليها انتى .
رف اتوترت هى بتحاول تتجنب حمزة من وقت مااعترفلها بمشاعره .
رهف لبست الاسدال واخدت الصنيه ونزلت كان حمزة واقف وضهره للباب ولما سمع الباب بيفتح لف وابتسم لما شافها قدامه باسدالها الابيض وكانها ملاك رقيق .
حمزة قرب عليها كام خطوه عشان هى متخرجش برا البيت ورهف كانت متوترة جدا:ازيك يارهف ؟
رهف:الحمدلله اتفضل الكيك .
حمزة اخدها منها:ريحتها تجنن الصراحه تسلم ايدكى .
رهف ابتسمت ومردتيش عليه .
حمزة:شكلى كدا هاكلها فى الطريق من جمال ريحتها .
رهف ابتسمت:بالف هنا .
حمزة:ادخلى يلا واقفلى الباب .
رهف:حاضر ... تصبح على خير .
حمزة:وانتى من اهله يارهف .
رهف دخلت وقفلت الباب وحمزة ابتسم ومشي .
وراح البيت كانت حنين مستنياه واكلو كيك سوا وكان معاهم هدى وكان طعمها حلو جداا وحنين طلعت قطعه لحسن وبعدها الكل نامووو .
بقلم الكاتبه جنات
ـــــــــــــــ★ــــــــــــــ
تانى يوم رغد نزلت من البيت وكان حسن مستنيها زى ماقالها الحاج محمود عشان يفرجها على الشقه اللى هيعملوها عياده فى الحارة .
الشقه كانت فى نفس البيت اللى فيه ورشه البطل .... لان الدور الاول كان الورشه والدور التانى معرض للاثاث والدور التالت كان فى شقه مقفوله .
رغد:صباح الخير ياحسن .
حسن:صباح النور يادكتورة ... اتفضلى معايا .
رغد مشت معاه وطلعو البيت وشافت المعرض .
رغد:ماشاء الله انتو بتعرضو شغلكو هنا ؟!
حسن:ايوا عشان الزباين يطلعو يتفرجو ويختارو اللى يناسبهم ..... الشقه فوق فى الدور التالت .
رغد:عمو محمود قالى .
رغد طلعت مع حسن اللى فتح الشقه وكانت كلها تراب لانها مقفوله من فترة .
حسن:كل ده هيتنضف وهيتعمل اللى انتى عايزاه اكيد .
رغد بدات تتفرج على الشقه اللى كانت عبارة عن صاله كبيرة و٣ اوض ومطبخ وحمام .
رغد:ماشاء الله الشقه كبيرة ومناسبه جداا .
حسن:من بكرة هجيب ناس ينضفو وبعدها هخلى حد يدهنها وتشوفى انتى عايزة ايه تانى .
رغد:لا التنضيف سيبه عليا انا وحنين ورهف اتفقنا ننضفها سوا .
حسن:بس الشقه كلها تراب هتتعبو فيها .
رغد:اهو هنسلى وقتنا بدل ماحنا قاعدين فاضين كدا .
حسن:وتحبي دهان الحيطان يبقي لونه ايه ؟!
رغد:مش عارفه ممكن ابيض او بيبي بلو عشان عياده بقي وكدا .
حسن:تمام .
فون رغد رن وكان مؤمن
رغد بصت لحسن:معلش هرد على الفون .
حسن:اتفضلى .
رغد ردت على الفون:صباح الخير يامؤ .
مؤمن:صباح النور ... ده ايه النشاط ده من الصبح !!
رغد ضحكت:صحيت من بدرى كالعاده ونزلت عشان اشوف الشقه اللى هنعملها عياده فى الحارة .
مؤمن:شايفك فرحانه انك هترجعى تشتغلى تانى ؟!
رغد:جدا الصراحه .... روحت الشركه ؟
مؤمن:ايوا وكان فى اجتماع مهم بس غريبه فاروق وابنه محضروش .
رغد:ليه هما فى الشركه ولا ؟!
مؤمن:لا محدش فيهم ظهر .
رغد:معقول فؤاد يكون قاله !
مؤمن:مش عارف ... ممكن تسالى محمد اذا كان فؤاد جه المستشفى ولا لأ .... لان اكيد هيكون معاها عشان يعرفهم الطريق .
رغد:صح طب اقفل وانا هكلمه باى
مؤمن:باى .
رغد قفلت وكان حسن واقف فى بلكونه الصاله بس مركز مع كل كلمه بتقولها .... رغد رنت على محمد اللى رد عليها.
رغد:صباح الخير يامحمد .
محمد:صباح النور يارغد ... عاملين ايه ؟
رغد:بخير يامحمد ... بقولك هو فؤاد جه النهارده المستشفى ؟!
محمد:ايوا موجود من بدرى وبيجهز للعمليه .... فى حاجه يارغد؟!
رغد:لا بس فاروق وابنه مروحوش الشركه وده خوفنى بس .
محمد:حتى لو ماروحوش الشركه تخافى ليه ؟!
رغد حكت لمحمد ان فؤاد شافها فى الحارة .
محمد:ولما هو شافك يارغد ازاى تفضلى عندك لازم تمشي .
رغد:طب هنمشي من الحارة نروح فين ؟!
حسن كان سمعها هو مش متخيل انها ممكن تبعد عنه .
محمد:اى حته يارغد .
رغد:مش عارفه يامحمد انا خوفى كله على رهف انا اقدر اقف فى وش فاروق وابنه بس رهف تبقي بعيد عن الموضوع كله .
محمد:وهتعملى ايه الوقــ
قطع كلام محمد لما باب مكتبه اتفتح ودخل فاروق ومحمد نزل الفون بسرعه .
محمد:اهلا فاروق بيه نورت المستشفى .
رغد قلبها دق معقول سمع كلام محمد .
فاروق:رغد بنت اخويا فين يامحمد ؟!
محمد:اللى اعرفه ان انسه رهف اختها نفسيتها تعبانه وهما سافرو يغيرو جو وهى رجعت من كام يوم عشان تحضر فرح واحده صاحبتها فى اسكندريه وسافرو تانى .
فاروق:سافرو برا مصر يعنى؟!
محمد:معنديش علم بالمكان يافاروق بيه الصراحه .
فى الوقت ده كانت رغد بتسمع كلامهم وحسن دخل وقرب منها:دكتورة رغـــــ
رغد شاورتله انه يسكت:هشششش
حسن استغرب وحس انها خايفه من حاجه ورجعت تسمع تانى .
فاروق:يعنى انت مش بتكلمها خالص ؟!
محمد:لا انا ببعتلها تقارير المستشفى على ايميل بتاعها بس .
فاروق قام وقف:تمام يادكتور وياريت لو عرفت هى فين تعرفنى .
محمد:اكيد يافاروق بيه نورت .
فاروق خرج من المكتب وقفل الباب .
رغد:مشي يامحمد ؟!
محمد قام وبص من الشباك وشاف فاروق خارج من المستشفى:ايوا يارغد .
رغد:معقول سمعك وانت بتكلمنى !
محمد:معتقدش اهدى انتى ومتخافيش من حاجه .
رغد:تمام يامحمد وبلاش اى حد من المستشفى يعرف انك بتتواصل معايا .
محمد:محدش يعرف غير مها وفؤاد
رغد:تمام سلام يامحمد .
محمد:سلام
رغد قفلت وبصت لحسن اللى بيبصلها باستغراب:انا اسفه انى سكتك بالطريقه دى .
حسن:ولا يهمك بس فى مشكله ولا حاجه ؟!
رغد:لالا هى مشكله فى المستشفى بس مش اكتر .... انا هنزل وهابقي اتفق مع البنات ونيجى ننضف الشقه .
حسن:تمام .
رغد نزلت بسرعه وراحت على البيت وحسن كان شايفها من الشباك وافتكر كلامها مع مراد وان حياتها هى واختها فى خطر بسبب عمها وابنه .
واقسم بينه وبين نفسه انه مستحيل يسمح لحد يأذيها او يمس شعره منها هى واختها ........
19=»» الفصل ١٩ ««
للجميع@
عدى اسبوع .
رغد اطمنت شويا بان فؤاد ماقالش حاجه لفاروق لانه لو كان قاله كان اكيد هيجى ويفكر يأذيهم باى طريقه .
رغد والبنات نضفو الشقه اللى هتتعمل عياده ...وحسن جاب واحد دهن الشقه وظبطها ..... وكل يوم تقريبا البنات بيروحو يجهزوها .
رغد اتفقت مع محمد يبعتلها الاجهزة والأدوات الطبيه اللى هتحتاجها فى العياده .
مؤمن كان بعتلها شحنه ادويه من المصنع وده بدون علم فاروق وابنه طبعااا .
رغد ورهف تقريبا بداو ينسو خوفهم من فاروق وانشغلو فى تجهيز العياده .
ورهف اللى قررت ترسم على حيطان العياده ورغد رحبت جدا بالموضوع .
محمود اللى طلب من بنات الحارة اللى يقدر يشتغل فى العياده مع رغد وفى اكتر من بنت قررو يساعدوها فى اعطاء حقن او تركيب المحلول وغيره من اعمال التمريض .
فرح اللى قررت تساعدهم وده فرح رغد والبنات لانهم حبو فرح جدااا .
بقلم الكاتبه جنات
ــــــــــــــ★ـــــــــــــــ
يوم جديد على الكل .
فى العياده .
البنات كانو بيرتبو الأدوية والحاجات اللى بعتها مؤمن .
حنين:كدا كل الادويه فى اماكنها ... لسه ناقص ايه ؟!
رغد:الاجهزة هتوصل النهارده بليل او بكرة باذن الله .
حنين بصت لرهف اللى كانت بترسم على الحيطه:الفنانه قدامها كتير ؟!
رهف وهى بترسم:لسه شويا .
رغد بصت على اختها اللى بترسم منظر طبيعى ادى شكل جميل لصاله العياده:الرسمه حلوة اوى يارهف بجد تسلم ايدك .
رهف بصتلها وابتسمت .
باب الشقه خبط والبنات كل واحده رفعت طرحه الاسدال اللى لبساها بسرعه .
حنين راحت تفتح كان مؤمن اللى ابتسم اول ماشافها:ازيك ياحنين ؟
حنين:بخير الحمدلله اتفضل .
حنين بعدت عن الباب ومؤمن دخل وبص على العياده:ماشاء الله ظبطتو كل حاجه .
رغد:ايه رايك ؟!
مؤمن:تسلم ايدكو بجد .... انا جايب اكل معايا يلا عشان ناكل سوا .... اومال لارا فين ؟
رهف:تحت مع حمزة فى الورشه .
مؤمن:طب استنو هكلم حسن يجيبها ويجيب حمزة ويطلعو .
مؤمن فعلا كلمهم وكانو رافضين يطلعو بس مؤمن اصر عليهم .
بعد شويا الشباب طلعو ومعاهم لارا اللى جرت على مؤمن:وحشتنى يابابى .
مؤمن رفعها من على الارض وباسها من خدها:وانتى ياروح بابا وحشتينى .
مؤمن سلم على حسن وحمزة اللى عينه جت على رهف اللى مركزة فى رسمتها وحسن على المجنونه اللى سكنت قلبه .
حنين ورغد بداو يطلعو الاكل من الشنط اللى كان عبارة عن فراخ مشويه وعيش ابيض وطحينه وسلطات ورهف غسلت ايدها جت عشان تاكل معاهم .
رغد:يلا عشان يبقي بينا عيش وفراخ مشويه .
حنين:هى راحت على الملح ولا ايه ؟!
رغد:الملح بقي موضه قديمه يااوختى الوقت بيتزا كريب بانيه كدا يعنى .
حنين:على رايك .
اكلو كلهم سوا وبعدها الشباب دخلو يقفو فى البلكونه اللى بطل على شارع الحارة .
ورهف راحت المطبخ تعملهم قهوة .
بعد شويا خرجت ومعاها صنيه وعليها القهوة وقربت من البلكونه .
حمزة شافها قرب منها واخد الصنيه منها:تسلم ايدكى يارهف .
رهف وهى وشها فى الارض:بالف هنا .
رهف خرجت بسرعه وراحت تكمل رسمتها وحمزة ابتسم ودخل لشباب يديهم القهوة .
بقلم الكاتبه جنات
ـــــــــــــــ★ــــــــــــــ
مرت الايام والبنات مشغولين فى العياده اللى اصبحت جاهزة .
فى بيت الشهاوى .
رغد فى اوضتها ورهف فى المرسم وسمعو جرس الباب .
رغد خرجت فى نفس الوقت خرجت رهف من المرسم .
رهف:هو مؤمن جاى ؟!
رغد:لا ... استنى اشوف مين !
رغد بصت من العين السحريه وشافت جابر ابن منصور .... راحت لبست اسدال وفتحت الباب:يا نعم !
جابر:الناس تقول اهلا وسهلا اتفضل شرفتو مش يانعم .
رغد:انت جاى هنا ليه وعايز ايه ؟!
جابر:جاى اتفاوض معاك ياجميل على بيع البيت .
رغد:ليه هو بابا مقالكش انا قولته ايه ولا عملت معاه ايه عشان قرب منى انا واختى .
جابر:قالى ... واللى عملتيه انا مش ناسيه ياحلوة واكيد هتتعاقبي عليه .
رغد:تصدق خوفت ..... طب يلا يابابا خد بعضك وانزل عند ابوك واتفاوضو مع بعض هتعاقبونى ازاى .
جابر:ده اخر كلام عندك ؟!
رغد:ايوا ويلا هوينا بقي ومتفكرش تطلع هنا مرة تانيه انت فاهم .
رغد دخلت وقفلت الباب فى وشه وجابر ضحك بخبث وطلع الفون اللى كان حاطه فى جيب القميص وابتسم لما شاف مازن قدامه كان بيكلمه مكالمه فيديو .
جابر:اتاكدت ياباشا ؟!
مازن:تشكر ياجابر يلا سلام بقي .
جابر:سلام ياباشا .
جابر قفل المكالمه وخرج من بيت الشهاوى وراح على بيته .
بقلم الكاتبة جنات
ـــــــــــــــ★ـــــــــــــ
رغد جهزت ونزلت العياده وكانت متحمسه جدا لاول يوم .
رغد خرجت من بيت الشهاوى وكان حسن واقف على باب الورشه .
رغد عدت الطريق:صباح الخير يابطل .
حسن ابتسم:صباح النور يادكتورة ... هتبدائى النهارده ؟!
رغد:باذن الله دعواتك انت بس .
حسن:ربنا معاكى ويوفقك وانتى اكيد قدها .
رغد بصت على شبابيك العياده اللى كانت كلها مفتوحه:يارب .... هطلع انا بقي شكل فرح والبنات وصلو.
حسن:وصولو من شويا وطلعو .
رغد:طب كويس يلا سلام ياحسن .
رغد طلعت وكانت فرح ومعاها ٣ بنات ايه ورحمه وسارة قاعدين فى صاله العياده .
رغد:ياصباح الحلويات .
البنات ضحكو:صباح الخير يادكتورة .
رغد:اول يوم لينا سوا وربنا يوفقنا باذن الله .
فرح:ان شاء الله هننجح يارغد .
رغد:قولو يارب انتو بس .
البنات:يااااااارب .
رغد:هدخل اظبط الدنيا وعلى ما ربنا يفرجها .
رحمه:تحبي اعملك قهوة يادكتورة .
رغد:ياريت والله يارحومه .
رحمه:من عيونى .
رحمه راحت المطبخ وبعد شويا خرجت بالقهوة ودخلتها لرغد مكتبها وخرجت .
اول يوم فى العياده كان خفيف وجالهم حالات قليله جدا واكترهم اطفال .
رغد كانت مبسوطه جداا والبنات خلصو ومشو وهى فضلت قاعده شويا فى العياده .
رغد شغلت اغانى على فونها بصوت هادى يعنى تسمعه هى بس وخرجت تقف فى البلكونه وعينها على حسن اللى واقف مع شباب الحارة قدام الورشه وبيضحكو ويهزرو سواا وبدات تندندن مع الاغنيه .
"انت حبيبي حبيبي حبيبي انا .... قبل لقونا مايجى بكام سنه .... ياللى عيونك دول خدونى ... و خطفونى ورمونى ..... خطفونى عينك خطفونى .... ورمونى فى نار وسابونى ..... واوام اوام نظرة وسلام ناديتك لاقيتك مجننى "
حنين جت من وراها وشايفاها بتبص على حد فى الشارع ولما بصت لاقيت عينها على حسن وهى مبتسمه .
حنين:اللى واخد عقلك يادكتورة ؟!
رغد بتوهان:حسن.
حنين بصوت عالى:احلفى كدا !
رغد فاقت على صوتها العالى:انتى جيتى امته ؟!
حنين:انتى عبيطه يارغد مانتى لسه راده عليا !
رغد:انا ؟!
حنين:ايوا بقولك اللى واخد عقلك رديتى قولتيلى حسن .
رغد:لا طبعا مستحيل وبعدين انا كنت مركزة مع الاغنيه لانى بحب اسمعها من وقت مانزلت مش اكتر .
حنين:امممم بتحبي الاغنيه بس بردو ؟!
رغد:اااااه دانا شكلى مش هخلص منك ... انا هسيبلك العياده وهمشي باى .
حنين راحت وراها:خدى يا مجنونه تعالى .
رغد وحنين نزلو وكانو بيضحكو ومحمود كان خارج من الورشه وشافهم .
محمود:ربنا يحلى ايامكو وتبقي دايما ضحك وفرحه يابنات .
حنين:حبيبي يابابا ربنا يخليك لينا .
رغد:ربنا يباركلنا فى عمرك ياعمو .
محمود:اخبار اول يوم فى العياده ايه ؟!
رغد:كان خفيف واكتر الحالات اللى جت اطفال بس كنت مبسوطه جداا .
محمود:ربنا يسعد قلبك يارغد بنتى .
رغد:حبيبي ياعمو محمود .... ماتيجى بقي اتفضل عندنا شويا واشرب قهوة رهف التى لا تقاوم .
محمود ضحك:هى قهوتها جميله مافيش كلام ... بس الحاجه ام حسن مستنيانا على الغدا ... ماتيجى انتى بقي معانا وناخد لارا ورهف بالمرة.
رغد:تسلم ياعمو بس رهف طبخت وحرام بعد وقفتها دى مناكلش .
محمود:ربنا يخليكو لبعض يارب.
رغد:يارب ياعمو .
حنين:هو حضرتك راجع البيت يابابا ؟!
محمود:اه ياحبيبتى يلا عشان نرجع سوا .
رغد:طب عن اذنكو انتو انا هطلع بقي .
محمود:اطلعى يابنتى .
رغد طلعت ومحمود بيبص على حسن لاقاه مركز مع رغد وعينه عليها لحد مااتخفت من قدامه .
محمود فهم نظرة حسن لرغد وابتسم وقال فى نفسه:احفادك وقعو ولادى فى حبهم ياصالح مين كان يصدق ؟! ... ربنا يرحمك ياصاحبي .... ومتخافش عليهم هيبقو جوا عيونى .
حسن:ياحااااج .
محمود:هاااا فى ايه ياحسن .
حنين:اللى واخد عقلك ياحودااا حسن بقاله ساعه بينادى عليك .
محمود:سرحت شويا يابنى يلا نرجع البيت ... اخوك حمزة فين .
حسن:راح يسلم فلوس شحنه الخشب للمعلم عبد الرحمن وهيجى .
محمود:اكد عليه يجى ياكل معانا ياحسن .
حسن:طب روح انت ياحاج مع حنين وانا هستناه لما يرجع وهنيجى سوا .
محمود:حاضر يابنى
محمود مشي مع حنين وحسن دخل الورشه .
بقلم الكاتبة جنات
ـــــــــــــــ★ـــــــــــــ
بعد منتصف الليل .
وصلت عربيه مازن الحارة ونزل وكان معاه ٤ رجاله والحارة كانت فاضيه ومافيش حد ماشي فى شوارعها .
جابر قرب من مازن والرجاله:نورت الحارة يا باشا .
مازن:بيتها فين ؟!
جابر شاورله على بيت الشهاوى:ده يا باشا.
مازن بص لرجالته:هتاخدو البنت اللى وريهولكو فى الصوره وتسيبو التانيه ولو عملت قلق رشو عليها من البنج اللى معاكو اياكو تمسو شعره منها فاهمين ؟
الرجاله:تمام يا باشا .
الرجاله بداو يتحركو ناحيه بيت الشهاوى ... واحد منهم فتح الباب بمهارة وطلعو وفتح باب الشقه بنفس المهارة ودخلو براحه على اول اوضه كانت المرسم واوضه التانيه كان فيها سريرين كانت فاضيه .
واحد منهم شافهم فى الاوضه الكبيرة سوا وشاور لزمايله اللى قربو منه ودخلو الاوضه وبصو على رهف هى دى اللى مازن عايزها .
رهف فاقت على صوت حركه فى الاوضه وصرخت لما شافت رجاله لابسين اقنعه سودا معاهم فى الاوضه .
رغد ولارا صحو على صوت رهف ولارا صرخت بخوف لما شافت الرجاله ورغد كانت مصدومه ... بس الرجاله كل واحد كتم بوق واحده فيهم ... واللى ماسك رهف اخدها وخرج من الاوضه ورغد كانت بتحاول تقاوم اللى ماسكها عشان تلحق اختها بس كان اسرع منها وطلع منديل من جيبه وحطه على بوقها ومناخيرها وفى ثوانى كان اغمى عليها والراجل سابها على الارض .
وقرب من لارا ورش فى وشها من بخاخ البنج وسابها وخرجو من الاوضه .
كان الراجل التالت خدر رهف وشالها ونزلو من البيت وبسرعه ركبو العربيه ومازن اتحرك بيها وجابر رجع على بيته .
بقلم الكاتبه جنات
ــــــــــــــــ★ـــــــــــــــ
صباح يوم جديد فى الحارة .
حسن راح الورشه وبص على بيت الشهاوى وشاف الباب مفتوح ورفع عينه وبص على العياده بس شبابيكها لسه مقفوله بمعنى كدا رغد والبنات لسه مش راحو .
حسن دخل الورشه كان حمزة واقف مع الشباب وحسن قرب ووقف معاهم .
بقلم الكاتبه جنات
ــــــــــــــــ★ـــــــــــــــ
فى بيت الشهاوى .
لارا بدات تفوق وافتكرت اللى حصل وعيطت من الخوف لما شافت رغد واقعه على الارض .
لارا قربت منها:رغد ... اصحى يارغد .
لارا خرجت من الاوضه وفضلت تدور على رهف وتعيط .
لارا من خوفها نزلت من البيت ولما شافت حسن وحمزة جوا الورشه جرت عليهم .
حسن اتفاجأ بلارا بتعيط:مالك يالارا .
لارا كانت بتعيط وبس .
حسن شالها ودخل المكتب وقال لحمزة يجيب ميا .
حسن قعد على الكرسي وقعد لارا قدامه على المكتب:اهدى يا لارا مالك ؟
حمزة دخل:اشربي ميا يالولى متخافيش .
لارا شربت ميا وبصت لحسن:فى ناس وحشه اخدو رهف ومعرفش عملو ايه فى رغد هى مش بتصحى .
حسن بص لحمزة
حمزة:ناس مين يالارا.
لارا بدات تحكيلهم اللى حصل لما صحت على صوت صرخه رهف لحد ماراجل منهم رش حاجه فى وشها .
حسن:طب اهدى ياحبيبتى احنا معاكى ...حمزة كلم امى وحنين خليهم يجو بسرعه .
حمزة:حاضر .
حمزة رن على حنين وفهمها اللى حصل وخلال دقايق كانو جايين وطلعو بيت الشهاوى .
حسن:ادخلو شوفو النظام وبعد كدا نادو علينا .
حنين:حاضر
حنين وهدى دخلو ولارا قالتلهم على مكان رغد وجرو عليها .
هدى:حنين هاتى ميا بسرعه .
هدى بدات تخبط بخفه على وش رغد بس بردو مش بتفوق .
حنين جابت الميا وهدى بدات تاخد ميا فى ايدها وترش على وش رغد اللى بدات تفوق تدريجيااا .... وفتحت عينيها على اخرها لما افتكرت اللى حصل .
رغد عيطت:رهف ... رهف فين ... اختى فين ياحنين اختى فين ؟!
حنين:اهدى يارغد .
هدى اخدتها فى حضنها:ياحبيبتى يابنتى ... اهدى ياضى عينى .... حنين هاتى اسدال لرغد .
حنين جابته كان محطوط على كرسي فى اوضه وساعدت رغد تلبسه وخرجت تنادى على الشباب اللى دخلو .
حسن عينه جت على رغد اللى بتعيط فى حضن امه وكان نفسه يخطفها ويدخلها جوا حضنه ويبعد عنها اى وجع او زعل .
حمزة:اهدى يارغد واكيد هنعرف مين عمل كدا .
حسن:اكيد عمك يادكتورة صح .
رغد رفعت عينيها وبصتله باستغراب .
حسن:مراد حكالى على موضوع عمك عشان لو حصل اى حاجه نقدر نحميكى بس للاسف مقدرتش .
رغد عيطت اكتر وهدى اخدتها فى حضنها اكتر وفضلت تهدى فيها .
حمزة:طب انتى شوفتى وش حد فيهم .
رغد هزت راسها بلا .
حسن:حمزة انزل شوف الكاميرات يمكن نلاقى اى خيط .
حمزة خرج من البيت بسرعه هو قلبه وجعه على رهف وهيتجنن عليها ومش متخيل ان ممكن حد يأذيها .
رغد بعدت عن هدى ومسحت دموعها:حنين هاتلى فونى .
حنين جابته ورغد رنت على مؤمن وفتحت الاسبيكر ومؤمن رد عليها:صباح الحلويات .
رغد بصوت مخنوق:مؤمن .
مؤمن:مالك يارغد فيكى ايه ؟!
رغد:انت فى الشركه ؟
مؤمن:ايوا فى ايه مالك طمنينى ؟!
رغد:فاروق وابنه عندك ؟
مؤمن:فاروق بس مازن مجاش .
رغد بعصبيه:الواطى بعت ناس خطفو رهف يامؤمن ... اختى معرفش هى فين .
مؤمن:انتى بتقولى ايه مين دول اللى خطفوها ؟
رغد بدات تحكيله اللى حصل ومؤمن كان هيتجنن .
رغد:انا هاجى القاهرة .
مؤمن:لا مش هتتحركى من عندك فاهمه انا هتصرف بس انتى اهدى خالص .
حمزة طلع ومعاه اللاب .
رغد بعصبيه اكبر:اهدى ازاى ... واختى مع الكلب اللى اسمه مازن انت عارف ده واطى وممكن يعمل فيها ايه !
مؤمن:اهدى يارغد لو سمحتى انا هكلم مراد وهخليه يجيلك عشان متبقيش لوحدك .
حسن رد عليه:احنا كلنا معاها يامؤمن متقلقش .
مؤمن:طب الحمدلله خد بالك عليها يابطل اختى فى امانتك .
حسن:اكيد يامؤمن .
مؤمن:رغد ابوس ايدك ورحمه عمى جمال ماتتحركى من عندك عشان خاطرى .
رغد عيطت:بس اتصرف ابوس ايدك انا عايزة رهف يامؤمن انا ممكن اموت من غيرها .
مؤمن:حاضر والله سلام الوقت .
رغد:سلام
حسن:جبت الفيديوهات ياحمزة ؟!
حمزة فتح الفيديو والكل ركزو فيه ورغد شافت مازن واقف مع جابر وشافت الراجل وهو نازل وشايل رهف وكان باين ان مغمى عليها .
رغد:مازن وجابر ازاى .... يعنى هو اتفق معاه عشان يخطف اختى .
رغد قامت بعصبيه وخرجت من البيت ونزلو بسرعه وماكنش فى حد فى محل منصور فطلعت البيت بسرعه وخبطت بقوة على الباب .
حسن جه وراها:اهدى يارغد مش كدا .
رغد ولا كأنها سمعاه ومكمله خبط على الباب .
محروسه فتحت وهى مضايقه:ايه حد يخبط كدا على الناس .
رغد زقتها بقوة ودخلت كانت منصور وجابر بيفطرو على السفرة .
قربت من جابر:اختى فين ؟
جابر:وانا ايش عرفنى كنت مخبيها فى جيبى مثلا .
محروسه:انتى جايه ترمى بلاكى علينا ولا ايه يابت انتى .
منصور بص لحسن:هو فى ايه ياحسن واحنا هنعرف اختها فين منين !
رغد شافت سكينه على طبق الفاكهه اخدتها بسرعه وحطتها على رقبه جابر ومحروسه ومنصور خافو على ابنهم .
رغد:قسما بربي لو مانطقت مازن الكلب اخد اختى فين لاكون دبحاك ومخلصه البشريه منك ..... انطــــــــق .
جابر كان خايف لانها كانت مقربه السكينه منه وكانت متعصبه جدا ومش فارق معاها حاجه .
فى الوقت ده مراد وصل الحارة وشاف حمزة واقف على باب بيت منصور وقرب منها وحمزة قاله ان رغد فوق ... مراد طلع بسرعه يشوفها.
مراد دخل البيت وبعد رغد عن جابر واخد السكينه منها:اهدى يارغد مش كدا اهدى واحنا هنعرف رهف فين .
مراد بص لجابر:شكل السجن وحشك ياجابر مش كدا ... انطق وقول مازن اخد رهف فين ؟!
جابر:يا باشا كل اللى اعرفه واللى قاله ليا انها بنت عمه وعايزها وقالى متقلقش انه مش هيأذيها يعنى هو عايزها فى شغل مش اكتر .... عشان تطمنو كمان هو قال هياخدها القاهرة عنده فى ڤيلته .
رغد استغربت لو خاطفها هياخدها عنده ليه وخرجت من البيت وحسن جرى وراها:راحه فين تانى؟
رغد:راحه القاهرة .
حسن:مش هتتحركى من هنا يادكتورة ... مؤمن قال هيتصرف ممكن تهدى .
رغد بصتله ودموعها نزلت وسابته وراحت على بيت الشهاوى ... كانت هدى وحنين قاعدين مع لارا.
مراد وحمزة وحسن دخلو الشقه.
مراد:رغد انتى لازم تهدى عشان نتحرك صح ... عمك مش سهل وممكن يأذى رهف عشان كدا بقولك اهدى .
رغد كانت باصه فى الارض ودموعها مش بتقف وفاقت على صوت رنه فونها وكان رقم مازن .. واستغربت هو جاب رقمها منين هى اصلا جابت خطوط جديده ليها هى ورهف عشان فاروق ميقدرش يوصلهم .
رغد بصت لمراد:ده رقم مازن .
مراد:ردى عليه وافتحى الاسبيكر .
رغد عملت زى مراد ماقال:الو .
مازن:متعرفيش وحشتينى اد ايه يارغد .
رغد:اختى فين يامازن ؟!
مازن:بعشق اسمى لما بتنطقيه .
رغد اتنهدت بضيق وحسن كان مضايق من البنى ادم ده .
مازن:على العموم رهف عندنا فى الڤيلا معززه مكرمه .... ولو عايزة اختك ترجع لحضنك من تانى .... تيجى زى الشاطرة وتمضو على تنازل انتى واختك على المصنع والشركه والمستشفى كمان .
رغد:ولو رفضت ؟!
مازن:اختك الحلو تحت ايدى وانتى عارفه ممكن اعمل فيها ايه !
حمزة كان بيضغط على ايديه بقوة من عصبيته .
رغد:وانا اضمن منين انك هتسيبنا فى حالنا لما نتنازل عنهم ؟!
مازن ضحك بصوت عالى:انتى متخيله انك لما تيجى وتبقي قدامى هسيبك تبعدى عنى تانى ... تبقي عبيطه يارغد .... لان بعد ماحضرتك تتنازلى انتى واختى وحبيتى اختك تفضل عايشه وبخير لازم انا وانتى نكتب الكتاب ياقمرى .
رغد بعصبيه:انت مجنون اكيد يامازن مش هيحصل ابدا اللى انت عايزه .
مراد شاور لرغد انها تهدى خالص .
مازن:انا قولتلك اللى عندى بكرة تبقي هنا فى القاهرة وعندنا فى الفيلا بتحديد ولو ماجيتش يارغد او فكرتى تدخلى الشرطه او اى حد ابقي روحى اقرئى الفاتحه لابوكى وامك واختك معاهم .
مازن قفل ورغد رمت الفون على الارض وحطت ايدها على وشها وعيطت جامد وهدى اخدتها فى حضنها وبقت تهديها .
بقلم الكاتبه جنات
ــــــــــــــــ★ـــــــــــــــ
عدى اليوم .
والكل كانو مع رغد والحاج محمود جالها وحاول يهديها واتكلم معاها كتير .
الشباب كلمو مؤمن وطلبو منه ميبلغش الشرطه عشان ميعرضوش رهف لاى خطر .
رغد اللى كانت رافضه تاكل او تشرب حتى وقلبها واجعها على فراق اختها ونصها التانى .
الكل بيفكرو ومش عارفين يتصرفو ازاى وخايفين يتصرفو اى تصرف يعرض رهف لخطر .
على الجانب الاخر كانت رهف من وقت مافاقت وهى بتعيط وقاعده فى اوضه لوحدها وشهيرة دخلت ليها الاكل بس رفضت تاكل وخوفها وحزنها زاد خصوصا بعد ماعرفت الطلب اللى طلبه مازن من رغد .
بقلم الكاتبه جنات
ــــــــــــــــ★ـــــــــــــــ
بليل رغد كانت قاعده لوحدها فى الصاله بعد مارفضت انها تروح مع هدى البيت .
حنين فضلت معاها بس دخلت عشان تنيم لارا فى الاوضه .
رغد دموعها مش بتنشف ودماغها عماله تودى وتجيب ومش عارفه هتعمل ايه فاقت على صوت جرس الباب .
حطت طرحه الاسدال اللى هى لسه لابساه من الصبح وراحت فتحت اتفاجأت بحسن قدامها واستغربت لان الوقت متاخر جداا .......
20=»» الفصل ٢٠ ««
للجميع@
الليل عدى على الكل صعب جدا .
رغد ورهف اللى مناموش طول الليل وكل واحده بتفكر فى اختها وخايفه عليها .
حمزة اللى كان طول الليل صاحى ومش قادر يستوعب كل اللى حصل ولسه بيحصل مع رهف ورغد بعد ماحسن حكاله كل قصتهم مع عمهم وابنه .
حنين اللى كانت طول الليل بتحاول تهدى وتخفف عن رغد .
مؤمن اللى سافر الاسكندريه بليل عشان يبقي مع رغد .
مازن اللى كان طاير من الفرحه ومش متخيله ان اخيراا رغد هتبقا ليه وعلى اسمه .
وفاروق اللى مش متخيله انه اخيرااا هيملك كل حاجه كانت ملك اخوه جمال .
بقلم الكاتبة جنات
ــــــــــــــ★ــــــــــــ
صباح تانى يوم .
جرس باب بيت الشهاوى رن .
وقامت حنين تفتح كانت هدى وحسن وحمزة .
هدى:صباح الخير يابنتى .
حنين:صباح النور ياماما .
هدى دخلت قعدت على الكنبه وحسن وحمزة واقفين وساندين على الحيطه .
هدى:رغد فين يابنتى ؟
حنين:بتلبس ياماما فى الاوضه .
هدى:نامت ولا فضلت صاحيه بردو؟!
حنين:انا طول الليل بحاول اهديها واخليها تنام وهى مش بتبطل عياط ... عينيها عامله زى الشلال يا ماما .
هدى:يا حول الله يارب ... ربنا يرجعلها اختها بسلامه .
حنين:يارب .
حسن:اومال مؤمن ولارا فين ؟!
حنين:مؤمن اخد لارا ونزلو يلبسها حاجه من تحت وزمانهم جايين .
جرس الباب رن وكان مؤمن ولارا وسلم على الكل.
مؤمن:هى رغد لسه بتلبس ؟!
حنين:ايوا .
حسن:انا هاجى معاكو يامؤمن .
مؤمن:حاضر ياحسن .
لارا:بابي انا هاجى معاكو .
مؤمن:مانا اكيد مش هسيبك لوحدك يالولى .
حنين:لوحدها ليه ... لولى هتفضل معايا مش كدا .
لارا جرت على حنين:اه يانونااا
مؤمن:مش عايز اتعبك ياحنين معانا .
حنين:لا تعب ولا حاجه وبعدين انا ولولى صحاب وبنحب نقضي وقتنا سوا صح .
لارا:صح يابابي انا هفضل هنا مع نونا .
هدى:كدا احسن يابنى بدل ماتتبهدل معاكو فى الراحه والجايه .
مؤمن:حاضر .
بقلم الكاتبة جنات
ــــــــــــــ★ــــــــــــ
عند رغد اللى كانت فى اوضتها بتجهز عشان تروح القاهرة .
رغد لبست وواقفه قدام المرايا وبتص على نفسها اول مرة تبقي ضعيفه كدا ودموعها مش راضيه تقف .... يمكن اخر مرة كانت بنفس الحاله دى لما باباها ومامتها اتوفو .... بتتمنى كل حاجه تبقي بخير واختها ترجع لحضنها من تانى .
رغد مسحت دموعها وخرجت من الاوضه والكل بصو عليها .
هدى قامت واخدتها فى حضنها:ياقلبي يابنتى .... ربنا يريح قلبك ويرجع اختك لحضنك سالمه يارب .
رغد:يارب .
حسن عينه على رغد مش حابب ولا قادر يشوفها بالحاله دى ابدااا .
مؤمن قرب من رغد:رغد انا عايز اعرف انتى ناويه تعملى ايه ... لازم نعرف هتتصرفى ازاى عشان نقدر نكون معاكى .
رغد:متقلقش يامؤمن .
مؤمن:مقلقش ازاى يارغد ... عرفينى هتعملى ايه متخوفنيش عليكى .
رغد بعصبيه:هو انا عيله يامؤمن فى ايه مالك ... قولتلك متقلقش .
مؤمن استغربها لانها اول مرة تتكلم معاه كدا:فعلا انتى مش عيله يارغد انتى كبيرة وواعيه وعارفه انتى بتعملى ايه ... وانا اسف انى خوفت وقلقت عليكى .
مؤمن مشي ولسه هيخرج من الشقه .
رغد بصوت مخنوق:انت رايح فين يامؤمن .... انت كمان هتسبنى لوحدى وتمشي .... مش كفايه غياب رهف عنى .
مؤمن لف وشاف عينيها كلها دموع اللى بدات تنزل على خدها وقرب منها واخدها فى حضنه .
رغد عيطت جوا حضنه :انا خايفه عليها اوى يامؤمن ... بعدها عنى قتلنى والله العظيم ... بس بلاش تمشي انت كمان انا قوتى بيكو انتو الاتنين .
مؤمن بعد عندها ومسح دموعها:انا اسف ياحبيبتى اهدى بقي وبلاش تعيطى انتى بذات مش بحب اشوف دموعك .... انا متعود عليكى قويه ومستقويه يابت الله .
رغد ضحكت من وسك دموعها .
حسن كان جوا نار بسبب قرب مؤمن منها ... كان نفسه تعيط جوا حضنه وتطلع كل وجعها وهو اللى يخفف عنها مش اى حد تانى .
حسن:يلا عشان نمشي .
رغد بصت لحسن اوى وبعدت عينيها تانى عنه .
حمزة:انا هاجى معاكو ياحسن .
حسن:ماينفعش نسيبهم هنا لوحدهم ياحمزة خليك انت هنا وانا هابقي اطمنك .
حمزة هز راسه وحسن طبطب على كتفه لانه حاسس بخوفه على رهف .
مؤمن ورغد وحسن نزلو وركبو عربيه مؤمن اللى ساق وجمبه حسن ورغد قعدت فى الكرسي اللى ورا .
بقلم الكاتبة جنات
ــــــــــــــ★ــــــــــــ
فى القاهرة وتحديدا فى ڤيلا فاروق .
رهف كانت قاعده فى الاوضه وبتستنى اللحظه اللى رغد توصل القاهرة .
الباب اتفتح ودخلت شهيرة ومعاها واحده من الخدم شايله صنيه عليها اكل وعصير .
شهيرة بصت للبنت:حطى الصنيه على التربيزة وانزلى انتى .
البنت عملت زى ماقالت ونزلت وقفلت الباب وراها.
شهيرة قعدت على السرير جمب رهف:رهف ياحبيبتى يلا عشان تاكلى لقمه انى من امبارح من غير اكل .
رهف من غير ماتبصلها:شكرا انا شبعانه .
شهيرة:انا عارفه انك اكيد مضايقه من اللى عمله فاروق ومازن ومفكرة انى معاهم ... بس انا ماليش دخل ولا كنت اعرف خطتهم يارهف ... ولو كنت اعرف عمرى ماكنت هوافق عليها ابداا ... عارفه انك ممكن متصدقيش كلامى ... بس انا ام يارهف ومرضاش ابدا الأذى لابنى .... ودايما كنت بقول لفاروق انى عمرى ما اتمنى الاذى ليكى انتى واختك عشان فى من الايام ميردش ليا فى ابنى .
رهف بصتلها وكانت حاسه بصدق كلامها .
شهيرة:ممكن بقي تاكلى ؟!
رهف:صدقينى ماليش نفس والله مش هقدر .
شهيرة قامت من على السرير وجابت كوبايه العصير:يبقي تشربي العصير ده .. يلا بقي مش هقولك عشان خاطرى لا عشان خاطر رغد .
رهف اخدت منها العصير وبدات تشربه .
شهيرة:انا جبتلك الهدوم دى البسيهم ياحبيبتى .
رهف:شكرااا .
بقلم الكاتبة جنات
ــــــــــــــ★ــــــــــــ
بعد وقت طويل فى ڤيلا فاروق اللى كان قاعد مع ابنه وجايب المحامى بتاعهم ومأذون عشان يكتب كتابه على رغد .
فاروق:انا مش مصدق ان رغد هتستلم كدا بسهوله البت دى مش سهله واكيد بتخطط لحاجه.
مازن:متقلقش ياولدى هى مش قدامها حل غير ده ومش هتقدر تخطط لان اختها تحت ايدى .
فاروق:لما نشوف .
دخل واحد من الحرس:الدكتورة رغد وصلت برا .
مازن قام وقف بفرحه:دخلها بسرعه يلا .
فاروق بص لابنه:مانفرحش اوى كدا انا مش مطمن للبت دى .
مازن طنش كلام ابوه وعينه على الباب لحد ماظهرت رغد اللى عينيها كانت حمرا من العياط بس رغم ده بتحاول تظهر قوتها قدامهم مستحيل تظهر ضعيفه ابدا .
مازن قرب منها:نورتى يارغد اتفضلى .
رغد:رهف فين ؟!
مازن:فوق ثوانى هتنزل .
مازن نادى على واحده من الخدم عشان تنادى على رهف .
رغد اول ماشافت رهف نازله جرت عليها وحضنو بعض ورهف عيطت .
رغد بعدت عنها:انتى كويسه حد عمل فيكى حاجه ؟!
فاروق:متقلقيش محدش قرب منها .... بس لو انتى فكرتى تلعبي معانا هنقرب اكيد .
رغد بصتله بغل وفاقت على صوت شهيرة:ازيك يارغد ؟
رغد بصتلها:اكيد مش كويسه وانا فى وسطكو .
رهف:عيب يارغد طنط شهيرة مالهاش دخل اللى هما عملوه .
شهيرة:هى معزورة يارهف سبيها .
مازن:يلا يارغد عشان نكتب الكتاب وبعد كدا تمضي على التنازل .
رغد بصتله:مش قولت هنمضي الاول !!
مازن:انا غيرت الخطه هنكتب الكتاب وبعد كدا تمضي ... ماهو لما انتى تبقي ليا املاك هتبقي ليا بردو .
رهف:انتى هتعملى كدا بجد يا رغد .
رغد بصتلها:متقلقيش ياحبيبتى .
رغد راحت قعدت جمب المأذون ومازن قعد وفاروق عينه على رغد ومش مطمن وحاسس انها بتفكر فى حاجه .
مازن:اكتب ياشيخنا .
رغد:يكتب ايه؟!
مازن:كتابنا يارغد مالك ؟!
رغد بصت للمأذون:قولى ياشيخنا هو ينفع بردو حد يكتب كتابه مرتين ؟
الماذون:لا طبعا يابنتى .
رغد بصت لمازن:طب ونبي قوله انه ماينفعش يكتب عليا وانا مكتوب كتابي وعلى ذمه راجل حالياااا .
كل الموجودين اتفاجأو.
مازن كان هيتجنن:على ذمه راجل ازاى يعنى ؟ .... ايه الكلام العبيط ده يارغد !
رغد:للاسف مش كلام عبيط ياميزو ... انا مكتوب كتابي وعلى ذمه راجل .
مازن:انتى بتقولى اى كلام وخلاص يارغد مش كدا ؟!
كلهم لفو على صوت مؤمن اللى دخل الڤيلا ومعاه حسن .
مؤمن:لا مش اى كلام يامازن ... رغد فعلا متجوزة .
مازن اتعصب وقرب من رغد:انت بتلعبي معايا يارغد بس ورحمه ابوكى وامك ماهرحمك
مازن رفع ايده عشان يضرب رغدب القلم بس ايد حسن كانت اسرع منه ومسك ايده: مش مرات حسن البطل اللى عيل برياله زيك يمد ايده عليها .
رغد بصت لحسن وابتسمت .
مازن:انت مين ياحيوان ومين سمحلك تدخل هنا اصلا ؟!
حسن:انا مين ف انا حسن البطل جوز الدكتورة رغد .... اما بقي مين سمحلى ف انا ادخل المكان اللى يعجبنى وبمزاجى ..... اما بقي بالنسبه للغلط اللى غلطه فى حق .... انا هديك نصيحه صغيرة لما تفكر تغلط فى حد اعرف الشخص اللى قدامك ده بيسمح لحد يغلط فيه ولا بيعدى ويفوت عادى .
مازن اتفاجأ ببوكس قوى فى وشه من حسن .
حسن:انا بقي من الناس اللى مش بتسمح ان حته عيله بتاع امه يغلط فيه وده رد صغير على غلطك .
فاورق:انا كنت عارف انك مش هتستلمى بسهوله وكنت متاكد انك فى دماغك خطه .... بس انا اللعب معايا غلط يابنت جمال .
رغد قربت من عمها:انت عارف لولا جمال كنت زمانك انت وابنك معفنين فى اوسخ سجن .... انا بس عشان خاطره وانك اخوه سيبتك مع ان بتسجيلات اللى معايا وانت بتتفق مع ابنك على قتل رهف ولارا وكمان الكاميرات اللى جايبه ابنك وهو جايب رجاله واخدو رهف من البيت كنت سلمتك وبايدى لشرطه يافاروق ..... بس ورحمه جمال الصاوى لو فكرت تقرب منى او من رهف انا اللى رميك انت وابنك بايدى فى سجن عشان هو ده مكانكو اللى تستاهلوه .
مازن:راحه تتجوزى حته بلطجى عشان تتحامى فيه يادكتورة !
رغد بصتله بقرف:مش احسن مااتجوز واحد بتاع امه ياميزو .... انت مفكر ان فى يوم من الايام ممكن اكون على اسمك .... ده على جثتك لو ده حصل ... وهلينى اقولك على حاجه الدكتورة رغد جمال الصاوى يوم ماتفكر تتجوز اكيد مش هتتجوز بلطجى زى ماحضرتك بتقول عليه انا متجوزة سيد سيدك يامازن راجل على حق وقد كلمته مش عيل بتاع امه بس هنقول ايه مانت طالع لابوك .
حسن ابتسم .
رغد بصت لرهف:يلا يارهف خلينا نمشي من البيت ده .
رهف جرت على رغد وخرجو من الڤيلا ومعاهم مؤمن وحسن اللى ركبو قدام ورهف ورغد فى الكرسي اللى ورا وحاضنين بعض .
مؤمن بصلهم:حمدلله على سلامتك يارهف .
رهف:الله يسلمك يامؤمن .
رغد حضنتها بقوة:وحشتينى يانصي التانى .
رهف:انتى كمان وحشتينى انا كنت خايفه عليكى جدااا .
مؤمن:لا فى دى مش معاكى حق الصراحه يارهف هى دى يتخاف عليها بردو دى مسحت بكرامه فاروق وابنه ارض الڤيلا .
رهف ورغد ضحكوو ومؤمن اتحرك بالعربيه .
بقلم الكاتبه جنات
ـــــــــــــــــ★ــــــــــــــــ
بعد وقت طويل فى عربيه مؤمن اللى سايق العربيه وحسن جمبه ورغد اخده رهف فى حارة ورافضه تسيبها والصامت كان مالى المكان .
وقطع الصمت صوت فون حسن وكان حمزة .
حسن:ايوا ياحمزة .
رهف قلبها دق وابتسمت لما سمعت اسمه .
حسن:الكل كويسين متقلقش وجاين فى الطريق .
رهف قلبها ده اكتر وكانت حاسه انه اكيد بيسال عليها .
بقلم الكاتبه جنات
ـــــــــــــــــ★ــــــــــــــــ
بليل فى حارة البطل .
الحاج محمود وهدى وحنين ولارا ومعاهم حمزة كلهم قاعدين فى الورشه بعد ماكل الشباب مشو وبيستنو البنات يوصلو .
بعد شويا عربيه مؤمن دخلت الحارة .
حمزة شافهم وقالهم وكلهم خرجو من الورشه .
حمزة قلبه دق بفرحه لما شاف رهف نازله من العربيه وعينها جت فى عينه وبعدت نظرها بسرعه عنه .
الشباب والبنات قربو منهم وهدى اخدت رهف فى حضنها:حمدلله على سلامتك يابنتى .
رهف:الله يسلمك ياهدهد .
حنين حضنت رهف:كنت خايفه عليكى اوى يارهف .
رهف:انا الحمدلله كويسه .
لارا جرت عليها وعيطت فى حضنها ورهف هديتها شويا وطمنتها انها كويسه .
محمود:حمدلله على سلامتك يابنتى .
رهف ابتسمت:الله يسلمك ياعمو محمود .
حمزة اتنهد:حمدلله على السلامه .
رهف من غير ماتبصله:الله يسلمك
هدى:انتو اكيد تعبانين وجعانين انا طبختلكو اكل هتاكلو صوابعكو وراه يلا ناكل كلنا سوا .
كلهم طلعو بيت الشهاوى واكلو سواا وبعدها كلهم مشو ومؤمن قرر يبات معاهم ويسافر
الصبح ودخل عشان ينام ولارا نامت فى حضنه ......
&&&&&&&&&
الفصل الحادي والعشرون حتى الفصل الخامس والعشرين من هنا
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
جميع الروايات كامله من هنا 👇 ❤️ 👇
اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇
❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺
0 تعليقات