رواية دموع قمر الحلقه الثانيه بقلم الكاتب محمد منصور حصريه وجديده على مدونة النجم المتوهج
رواية دموع قمر الحلقه الثانيه بقلم الكاتب محمد منصور حصريه وجديده على مدونة النجم المتوهج
وقبل ما نبدأ الحلقة نوحد الله ونصلي علي خير خلق الله سيدنا محمد. وعلي بركة الله نبدأ
بسم الله توكلت علي الله. وهو رب العرش العظيم
و يخرج رمضان من بيت عم زلطه فيلاقي الحكومه في الشارع والظابط بيشاور ناحيته فيجري رمضان مسرعا فيقول الظابط للعساكر
هاتو
ويجري العساكر وراء رمضان اللي كان بيجري بمنتهي السرعه والعساكر وراء منه. وبعد مطاردة استمرت لكام دقيقة قدر عسكري يمسك رمضان وهو بينهج مش قادر فيبص رمضان للعسكري اللي ماسكة من قفاة ويقول
يارب امك تموت. معلش سابني اهرب
العسكري وهو بينهج
انكتم قطعت نفسي اية بجري وراء ارنب
فيضحك رمضان ويقول
ارنب وربنا انت عسول اوي. سابني اهرب بقي
العسكري وهو بيسحب رمضان من قفاة وراجع بي للبوكس
قولت انكتم.
رمضان
طيب انا عملت اية. دي هي 100 ج. اللي نصبت فيها علي عم زلطة. ولو عايزني ارجعها هرجعها
العسكري
قولت انكتم
رمضان
طيب انا مش هتكلم الا قدام المحامي بتاعي
العسكري
انت يا جربوع عندك محامي
رمضان
جربوع. الله يسامحك انا محترم وبابي صبحي رباني
العسكري باستهزاء
بابي صبحي. دي لوحديها جريمة تاخد فيها سنة اشغال شقة
فيوصلو للبوكس والعسكري يركب رمضان البوكس والظابط كان ببقول ل رمضان
عايز تهرب وحياة امك لنفخك
وكان جوة البوكس يقعد واحد اسمه جابر صاحب رمضان
وباين عليه سوابق بص له رمضان وقاله
انت اللي عرفتهم مكاني يا واطي
جابر
قالو رمضان قولت لهم هتلاقو عند زلطة. غلط انا
رمضان
وعايزنا في اية
جابر
انا عارف ادينا هنروح ونعرف الزيتونة فيها اية، ،،،،،،،،،،ذ
ومن جوة الكوافير اللي شغاله في قمر كانت قمر تظبط شعر زبونه وكان شغال مع قمر في الكوافير بنتين من سنها الاولي تدعي رشا والثانيه تدعي عبير وكانوا يقفون يبصو للزبائن وهم يتوافدون الي الكوافير ويروحو ناحيه قمر لان اسلوب قمر ومهارتها في هذا المجال كانت عاليه جدا وكانت بتضحك مع زبونه وتلاغي الزبونه الاخري ومعظم الزبائن تقريبا بيجوا للكوافير حبا في قمر واسلوبها
وكانت عبير بتبص بحقد لقمر وحب الزبائن ليها وراحت ناحية رشا وقالت بغل
وبعدين بقي في اللي اسمها قمر دي واللي واكله الجو
رشا
هانعمل ايه طيب البت شاطره بصراحه ولسانها حلو من الزباين
عبير
الزفته دي من ساعت ماجت الكوافير واحنا اتركنا علي الرف دي حتي سهير هانم صاحبه الكوافير طايره بيها في السما
رشا
سيبيها تاخد اليومين بتوعها بكره تتركن علي الرف زي ما احنا اتركنا
عبير بغل
نعم يا ست رشا وهو احنا هنفضل ساكتين عليها كده لغايه امتي
رشا
طيب هنعملها أيه
عبير
زي ما سهير هانم شالتها علي راسها نخليها تنزلها تحت رجليها
رشا
وده هيحصل ازاي
عبير
هاقول لك أزاي،،،،،،،،
وتنهي قمر اخر زبونة في ايدها وتروح ناحية مكتب سهير وتستاذن لكي تدخل وتاذن لها سهير هانم بالدخول وبعد ما دخلت وسلمت عليها قالت قمر
سهير هانم انا محتاجه سلفه 100 جنيه
سهير
يا بنتي حرام عليكي نفسك انتي بتسحبي تقريبا مرتبك كله قبل يوم القبض
قمر
معلش يا سهير هانم انتي عارفه الظروف اللي عندي
سهير هانم
والله حرام اللي انتي في ده بتتعلمي وتشتغلي وتصرفي علي ابوكي واخواتك و مش عارفه تجيبي لنفسك فستان
قمر برضا
الحمد لله انا احسن من غيري
وتتالم قمر وتمسك بطنها وتتوجع اوي فتقف سهير وتروح ناحيه قمر بسرعة وهي خايفه عليها وتقول لها
مالك يا قمر
قمر وهي تتوجع علي خفيف
وجع في بطني بس الحمد لله بقيت احسن
سهير
يا بنتي روحي اكشفي انتي مش اول مره تشتكي من بطنك
قمر
انا كويسه يا سهير هانم بعد اذنك بس ممكن ال 100 جنيه اللي طلبتها من حضرتك
فتخرج لها سهير الفلوس وتقول لها
قمر لو تعبانه أمشي
فتبتسم قمر وتقول
انا بخير والحمد لله بعد اذنك
وتخرج قمر من مكتب سهير بعد ماتاخد الفلوس وعبير بتبص لها بغيظ شديد ويرن موبيل سهير وتتكلم مع زبونة من زباين المحل ثم تقول بعصبية
انتي متاكدة انها عملت كدة
فتسكت للحظات ثم تقول
طيب اقفلي انتي دلوقتي وانا هاتصرف معها
وتنهي المكالمة وتقف عند باب المكتب وتقول
خدي يا عبير عايزاكي
فتروح عبير ناحيه سهير هانم فتدخل سهير هانم الي مكتبها وتدخل عبير من ورائها وتقفل الباب وراء منها فتبص سهير لعبير وتقول بقلبة وش
ايه اللي انا عرفته ده
عبير باستغراب
في ايه يا سهير هانم
سهير هانم
في انك بتروحي لزباين في البيت من ورايا وبطلعي منهم مصلحه ليكي وانتي عارفه ان في الكوافير بتاعي ما فيش واحده تروح لزبونه في البيت من ورايا ولو مش عجبك نظام الكوافير تاخدي حسابك والباب يفوت جمل
عبير
مين اللي قال لك الكلام ده انا عمري ما روحت لزبونه في البيت من غير علمك اللي قالت كده عايزا توقع بيني وبينك وانا عارفها
وكانت تقصد قمر لان عبير افتكرت ان قمر كانت في المكتب علشان تيبعها لكن سهير قالت
انت مالكيش دعوي باللي قال واللي ماقالش انت تلمي نفسك بالذوق بدل ما اعرف شغلي معاكي. يلا ارجعي شوفي شغلك
فتخرج عبير من المكتب وهي غاضبا جدا وتبص ناحيه قمر بمنتهي الحقد وتقول لنفسها
طلعتي عصفورة. لسهير وبتنقلي الكلام. وحياه امي لوريكي يا قمر ،،،،،،،
وفي نفس الوقت ومن اوضة عمار كان عمار واقف قدام المرايا وهو حزين وبيعيط وبيبص للحرق اللي في وشة ويفتكر كلام حسان لي وهو يقول
عمار انت مش ها تنفع تطلع أوردارات العائلات تاني
فيمشي عمار بأيده علي مكان الحرق وهو يقول لنفسه
بيحسبوني علي اراده ربنا هو الناس حصل لها أيه.
ويسمع صوت خبط علي باب اوضة فيبص عمار للباب ويسمع صوت ابوة جمعه من وراء الباب بيقول
عمار انت صاحي
فيمسح عمار دموعه ويرد بسرعه قائلا
ايوه يا حج انا صاحي. ادخل
فيدخل جمعه ويبص ل عمار اللي كان بيحاول انه يخفي اي اثر ل دموعه ويقول
خير يا حج
جمعه
قاعد ليه لوحدك
عمار
ما فيش يا حج اصلى تعبان شويه
جمعه وهو بيبص لعيون ابنه واللي الدموع محبوسة جوة منها وقال
كنت بتعيط ولا اية
فيسكت عمار فيقول جمعه
مخنوق علشان الحرق اللي في وشك عامل لك مشاكل في شغلك. وان مدير الفرع مش هيطلعك اي اوردر تاني.
عمار
هو حسان ده ما يتبلش فى بوقه فوله
جمعه
أجدع منك ما بيخبيش عليه حاجه مش زيك عيل ندل
عمار ضاحكا
ماشى ياسيدي. والله يسهلك انت وحسان
جمعه
عمار أوعي موضوع الحرق اللي فى وشك يخليك تنسي تعيش حياتك لازم تكون أقوي من أى حد بيحاول أنه يعيرك بحاجه كتبها عليك ربنا وعلشان كده أنت لازم تتجوز علشان مراتك وعيالك من بعد كده يخلوك تركز معاهم هما بس مش حد تانى
عمار بضحكه استهزاء
ومين تتجوز واحد مشوه زيه
جمعه بنرفزة
مشوه. أوعى تقول الكلام دا تاني فاهم ولا لا
عمار
طيب أهدئه يا حج خلاص حقك عليه بس بلاش النرفزه دي غلط عليك
جمعه
أنا أبنى ما يستسلمش لاى حاجه ممكن تمنعه من أنه يعيش حياته وده أخر كلام عندي أنت لازم تتجوز يا عمار والا لساني مش هيخاطب لسانك. فكر في كلامي كويس
عمار
يا حج. خلينا نحسبها بالعقل ومن غير ما تزعل. مين ترضي تتجوز واحد زيي
جمعه
تاني. انا مش هقعد معاك طالما هتفضل تتكلم بالشكل دة
ويسيبة جمعه ويخرج من الاوضة. فيمسك عمار موبيلة ويتصل بحسان واول ما يرد حسان يقول عمار بحدة
انت مش هتبطل بقي كل حاجة تحصل في الشغل تحكيها لابويا
حسان
علشان هو الوحيد اللي بيعرف يخرجك من اللي انت في
عمار
انا ماحدش هيعرفني يخرجني من اللي انا في. انا خلاص فقد اي ثقة في نفسي
حسان
غلط. اللي انت بتقوله دة غلط. انت بخير واحسن من غيرك
عمار
انا بخير. بس مش لدرجة اني الاقي واحدة تتجوزني وترضي بمنظري دة
حسان باستغراب
جواز اية.
عمار
ابويا يا سيدي حلف عليه لو ما اتجوزتش مش هيعرفني وهيقلب عليه
فيضحك حسان. ويقول
اما مطب.
عمار
ما كله بسبب رغيك معه. فهو افتكر بقي ان الجواز هو الحل وهو اللي هيرجع لي ثقتي في نفسي. ما يعرفش ان الموضوع اكبر من كدة.
حسان
والله انا ما كنتش اعرف ان كلامي معه هيوصل الدنيا لحوار الجواز. انا بس كنت عايزه يخرجك من،،،،،،
عمار مقاطعه له
خلاص يا حسان اللي حصل حصل. والمطلوب بقي دلوقتي اشوف واحدة ارمله ولا مطلقة او واحدة معيوبة علشان ترضي تتجوز واحد زيي. يمكن ابويا يرضي عني
حسان
لا. طبعا ودي تبقي عيشة لازم تتجوز اللي تحبك وتحبها مش تتجوز واحدة بتشفق عليك. اقول لك سيبك من كلام ابوك وهو هينسي
عمار
تبقي ما تعرفش ابويا. ابويا دماغه انشف من الحجر وطالما قال اتجوز يبقي لازم اتجوز. شفقة بقي او حالة انسانية الجواز لازم يتم
ويبص عمار في المرايا ويقول
بس مين ترضي بالخلقة المشوة دي، ،،،،،،،،،،،،،
ومن جوة مكتب الظابط. اللي قبض علي رمضان يقف رمضان ومع واحد تاني اسمه جابر باين عليه انه سوابق والظابط كان بيقول ل جابر بعصبية
ولا. بطل شغل الهبل ده وقولي فين سيد الحرجاوي
جابر
مين الحجراوي ده يا باشا
في نفس الوقت كان في عسكري احول واقف وراء رمضان. وضربه علي قفاه بمنتهي القوة فتوجع رمضان وبص للعسكري لقاه بيقول له
رد علي الباشا عدل
رمضان وهو بيهرش في قفاه
أنا ماتكلمتش يا عم
ويركز رمضان في عيون العسكري فيلاقي احول فيقول
ياحرام عينيه مخصمه بعضيها يارب عينيه اليمين ترجع تقعد جنب الشمال تاني
فيقول الظابط بنرفزه لرمضان
رمضان فين سيد الحرجاوي
رمضان
اخر مره شفته يا باشا كان في فرح اخته
الظابط
ماتحورش ياروح امك انت وجابر أصحاب سيد ومش هاتخرجوا من هنا الا لما تقوله سيد. فين. وراح فين بالدهب اللي سرقة من محل جورج كميل
جابر
يا باشا احنا اصحابه اه لكن مش حراميه زيه ومانعرفش هو فين
فيضرب العسكري رمضان مره تانية علي قفاه فيصرخ رمضان ويبص للعسكري ويقول له
يخرب بيت امك أنت أشتغلت عسكري ازاي بعينك دي.
ده انت ما تنفعش تبقي عسكري شطرنج حتي
الظابط
خلصنا ياروح يا أمك هتقولو فين سيد ولا اخليهم يعلقوكم ملط
جابر
انا ما بعش صاحبي ابدا
فيمسك العسكري رمضان فيصرخ رمضان قائلا
مش انا. انا هبيع صاحبي عادي
الظابط
خد التاني وسيب دة
فيفضل العسكري يسحب في رمضان ورمضان يقول
الله يخرب بيتك بيقول لك التاني التاني، ،،،،،،،
ومن قدام القسم كان رمضان واقف عند عربية بطاطا ومعه جابر وبيقول رمضان وهو بياكل بطاطا
يلعن أبو أم معرفتكم معرفه تجيب الفقر انا مالي انا ومال الاشكال الوسخة اللي شبهم
جابر
مالك يا ابن وزير البيئة. مش عجباك معرفتنا لية. دة انت نصاب يلا
رمضان
نصاب بس مش حرامي
ويخلصو البطاطا ولسة هيمشوا بص رمضان بطرف عينية للعسكري اللي واقف علي باب القسم خدمة فوقف فقال له جابر
وقفت ليه يا رمضان
رمضان
مش هامشي الا لما أجيب حق قفايه من أحول الكلب الى كان بيضربني جوه
ويرجع للعسكرى ويقف قدامه ويقول له
أنت أسمك أيه يا دفعه
العسكرى
انا المنوفي
ويركز في عيونه يلاقي هو كمان احول فقال
هو في أيه هما جابه عسكرى واحد وطلعوا عليه
ثم يقول للعسكرى
انا أخوك الدمياطي وكنت محبوس جوه في القسم ولقيت عسكرى أحول كلب. ما يتخيرش عنك كان عمال يشتم فيك
العسكرى بنرفزه
بيشتم قال أيه
رمضان
كان بيقول أنك أمك مش أمك وأبوك يلعن أبوة امك وخالك في شبه من خالتك وكمان يلعن أبوه أمك ومراتك متجوزه منك لكنها مرات المنوفي وكلام كتير ماعرفش جابه منين
فيلاقي العسكرى أحول زيادة فقال له رمضان
مالك مبلم ليه كده
العسكرى
أنا مش فاهم أنت قولت أيه
رمضان
ليه أنت منين يا دفعه
العسكرى
أنا من الصعيد
رمضان
من الصعيد وأسمك المنوفي أنت أحول كمان في أسمك
العسكرى
مش مهم أسمى المهم أعرف احول الكلب شتم قال أيه
رمضان
قال انك ما بتخلفش
العسكرى بنرفزه
أبن الكلاب أزاي يقول عليه أني ما بخلفش وأنا عندى تيمور وشفيقه. نهايته علي أيدي
ويرفع سلاحه ويشد أجزاء السلاح ويستعد لضرب النار ويدخل الي القسم مسرعا وهو في شده الغضب ويرجع رمضان الي جابر وجابر يقول له
أيه ده كله يا عم
رمضان
كنت بعمل خير
ويسمع الاثنين صوت ضرب النار فيقول رمضان
والله اكيد بعينة دي ضرب نار على نفسه، ،،،،،،،،
ومن جوة شقه قمر اللي كانت مافيهاش عفش تقريبا كانت قمر بتدي ابوها 50 ج. وبتقول له
خد يا بابا ال 50 جنيه اللى أنت كت عايزها
فياخذ صبحي منها ال 50 ج. وهو بيكح كذب وبيقول
ربنا يخليكي ليا يا بنتي
قمر
ويخليك ليا
فى الوقت دة يسمعوا صوت خبط علي الباب فتفتح قمر الباب فتلاقي واحدة اسمها ام عبير مرات ابوها التانية غير نعمه واقفة وبتقول لها
فين أبوكي يابت
قمر بعصبية
أنتي مين وأيه بت دي
ام عبير
أن مرات ابوكي يا حلوة. والدكر سايب البيت بقاله اسبوع من غير ولا مليم
فتتصدم قمر وتبص لابوها صبحي.،،،،،،،،،،،
ولغاية هنا. خلصت حلقتنا اللي يارب تكون عحبتكم ولو في العمر بقية هاكمل لكم الحكاية دية. سلام
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
جميع الروايات كامله من هنا 👇 ❤️ 👇
اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇
❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺
تعليقات
إرسال تعليق