رواية دَلـِــيــــلَــــة الفصل الاول بقلم ندى العمر حصريه وجديده على مدونة النجم المتوهج
رواية دَلـِــيــــلَــــة الفصل الاول بقلم ندى العمر حصريه وجديده
ضلام الليل نعمة ونقمةة ...كاين لي خارج فيه خداام بالحلال وكاين لي تابع طريق الدرهم حتى يصبح الحال ..وبطلتنا وحدة منهم دارت من الليل صديق حيت هو لي لقات وقت الحزة والضيق...لوقت لي تسدو في وجهها البيبان وغرسات فيها الدنيا نياابهااا وعطااتها لگفه وفيقااتها من الگلبه, نهار لي ملقاتش أمان الأب وحماايتو ليها ..ومحساتش بحنان الأم ولا توسدت رجلييهاا ...نعار لي لقات غا راسها والضس ماشي حيت يتيمة ومقطوعة من الشجرة ...لا حيت لا لأب مهتم بيها ولا أم عاطفة عليها,
فداك الوقت شمرات على دراعها وخرجات تقلب باش تعمر جيبهاا وتسخنوو ممسوقاش للوسيلة كيفاش لأهم عندها تاكل وتشرب وتلبس ولي بغى ينعت فيهاا صبعو عندو تا حد مشادوو اما هضرة كحل راس لاحتها بين رجليها ..يقولو لي بغاو يقولو ، نساو بلي الدنياا دواار والزمان بداال وكل فوولة مسوسة عندها كيال عور
وكيال دليلة ها هو مقابل معاها وقدام عينيها وكيشوف فيها... غير هو بعينيه وعارف فين يحط رجليه ومدارش بيه
غمزها من بعيد مصيفط ليها بووسة في الهوا وعين هنا ولوخرا لهيه .. تم جاي قاصدهاا عينيه مهبطوش عليها ماشي حيت عجباتو وحمقاتو وزينها سطااه , وكيبغيها كيف كتموت عليه لا كان كيشووف فجسدها بشهوانية باغية الفرصة امتى يديرها تحت منو و يتمتع من ورااها ،على عكسها تماما عينيها كانو مضوين بالحب وباغة غير امتى تزوج بيه
وصل لعندها فين واقفة هي ولبنات لي خدامين معاها جبد گاروه يكمي و يبخ و يشوف في مگانتو و يهضر غا من فوق نيفو هذا هو حال لي زايد عليه گراض ينفخ و يبخ علييك و ينسا بلي الله كبر منو ومنك و من غيرنا .. جبد خلاص سيمانة و بدا يعطي لكل واحد رزقو تا وصل عندها و شاف ليها في عينيها و عض على فمو وجبد نصيبها وفوقهم زرقة
- " هبط لوذنيها وهضر بشوية " هادي ليك كيف ديما متنسايس غتلقايني نستناك في بلاصتنا خشات فلوسها في صاكهاا وضحكات من قلبها كيف دير تسنى مستحيل ،لأنو اي حاجة كتعلق بيه كتحفر فقلبها وعقلهاا حيت بالنسبة ليها " حسن " هو داك حبل النجاة لي غتشد فيه باش تبعد على محيطهاا وتنسى بيه حيااتها وتبدلها ملي كتكون معاه وقريبة منو كتنسى اي حاجة خانقاها وكتبان ليها الدنيا بالوان الربيع وغير كتفارق معاه كترجع تسواد فعينيهاا ..كتبغيه وولفاتو وشافت فيه عائلتها لي قسات عليها لوقت لي حن فيهااا داكشي علاش مكتشووفش غيرو
" خرجات برا يضرب فيها لغربي جبدات گارو تشعلو ورجعات لاحتو تحت رجليها و عفست علييه تا كتقوول غتقطعو وكتلقى يدها غادة لييه
تبلات وهي صغييرة حيت لقاتو دوااا كينسيها همها وراسها ولي ضاير بيهاا ...هزات شعرها بيديها مقوسة عينيها مبينة على قوتها و خى الخاطر كيعلم بيه غير الخالق بالحق كون ذيب ولا ياكلووك الذياب وفهاد الزقت الا معريتيش على نيااابك ياكلوك ويشربو دمك... نظموا ليها لبنات لي خدامين معاها كيتجاراو تستفو حداها حتى وقف با علال بطرانزيت ديالو كل وحدة فيهم طلعات شدات بلاصتها وعاطينها لقجيم معاه
-أسطوانة كل نهار اشيبااني ..ياكما طلعنا ليك في الراس تا وليتي تخلينا منشوورين هنااا وضو صباح يطلع عليناا
-غا سمحو ليا داتني عيني ومحسيتش بالوقت يكماا تزلل عليكم شي حد
- ويلي حتى نتا تعودناا ونهار مينگرش شي حد كنقوولو ناقصة حاجة فينااا
" ختمات كلامهاا بضحكة فرعاات ليا مخي وكملووها بتحاسيب كلهاا تشووف شحال جاها في نهارهااا "
- شحاال جااتكم البنات ...
- ويلي طلع معايا صبع ولد لحراام حسب ليا نهار جاتني مسعوودة ورجعت فحالي جاب الله ناس تاع ليووم شوية طالقين ايديهم ورشوناا
-انا فلوسي هما هما لا زيادة لا نقصان سلامة
- قاطعهم علال کیفکرهم الا نساو " ...هی ليومة روبو البنات
- ايه كيكتعرف ليوم جمعو عيد المومنين مكاينة خدمةةة ومكاين لاش تفكرنا بشوفاتك راك في البال ..." مدات ايدها لكل وحدة عطاتها جط سيمانتا مخلصينو.
"علال راجل مزياان قلال لخطاافة بحالو من نهار حطات رجليها في هاد سربيس وهو لي كيديها وكيجيبها وفلووسو كل وحدة تمدهم ليه كل سيمانة مجموعين ....ثقتهم فيه كبيرة حيت ليل جامع غير لغدارة شحال من وحدة ركبات مع طاكسي وغبر ليها الاثر ..اما لي تكرفصو عليهم منهم عداد داكشي علاش شادين فيه بسنانهم لا همااا مفرطين فيه ولا هو مفرط فيهم"
حلات عينيها لي غمضتهم يرتاحوو على نغزة لبنت حدااها
- زين فيقي هانتي وصلتي ....
" هزات صااكها ومدات ليه لي قسم الله مخرجةة راسها من جماعتهم معندها معاهم ولا هو عندهم معاها عارفين عليها سميتها وفين كتسكن وهي معارفة عليهم حتى حاجةة....دمااغها هاز مهاز جبال مغتزيدش بصحابات حيت ماشي غدارات ولا طاعنينها في ظهرها وخاونين ليها صاحبها وداك لكلام ديال بلعاني ،لا وإنما ببساطة حيت صااحبتها هي راسها وراسها هو صاحبتها ..نهار تبغي تدوي مع شي حد وتشكي عليه كتتقابل مع لمرايا وتقول كلمة وترد عليها كتغوت على راسها وتحزرو كتسارا معاه وتبرعو ....مقال وحدة تصدع ليها دماغها وتطالع على سرارها وتخلي ليها الفجوة باش دوز بيهاا كيسان اتاي ....وتقوليها لا هادا ميليق ليك ولا هاداك غا كذاب وكيضحك عليك
"حطوها فدخلة ديال لكاريان كيف لعادة ....هاد لبلاصة لي جامعاهم وساتراهم ولي لخايب فيها كثر من زوين ...ولي تخرجو منو قضااة واساتذة وحتى بطلتنا وحدة منهم تخرجت بنت الليل ... اللقب لي تطلق عليها فور مشافوها كيديها الليل ويجيبها نهارو نساو بلي هاديك خدمة وهادي خدمة كلشي خارج كيتقاتل باش يجيب قوتو وكساااتوووو ولا غير حيت باها بزناز ومها قحبة راه غطلع تا هي بحالهم و تتشبه ليهم كيف كيقول المثل قلب البرمة على فمها تطلع البنت لمها ...ما ابن الدكتور طلع دكتور وبنت المحامي طلعت محامية وبنت سعدية طلعات قليلة التربية"
دفعات باب البراكة لي على سبة، لقاتو كيف عادتو مجبد في بلاصتو وصوت شخيرو الطربي منغم لمكان . ناعس على ظهرو وحال فمو نصو مغطي ونص لاخور شافيه الله ...جوان فوق طبلة وسبسي تحتها وزايدها بشيشة تا شاب عاد علقو ليه حجاب .. هزات مانطة وغطاتو مزيان عاد دخلات لبيتها ....
متسمعوش بيت ويمشي بالكوم لديك جيه ناموسية وديرسينغ وكوافوز عامر ماكياج وروايج
ابداا كان مترو طول على نص مترو عرض وبلا باب خامية قاضية الغرض ... . فالارض كانت بونجة ملوية بلحاف وبلاكار تاع بلاستيك جامع حوايجهاا
نصلات سروال وتبعاتو تريكو لاحت عليهاا بينوار ..غسلات وجها من غبرة وتمارة الليل وتسرحات كتشوف لفووق تا داتها عينيهااا
ضربتها الفيقة على صوت الدقان مجهد عند بالها عاد غفات ومزال لحال هزات راسها فلحيط لقات نص النهار داز ...لاحت عليها الغطا بنثرة وخرجاات لقاتو باقي على نفس الوضعية لي شافو يحلف عليه تا ميت مكيتحركش مشات ليه نيشاان بدات زعزع
- نوض شووف شكون بغااك
" كمش عينيه وبدا يتكسل وهي حاطة يدها على حنكها وتشووفيه " ...
- ياكما نشبشبك اسي مختار ، وانوض تكلم فرعو ليا مخي على صبااح
مختار ...."گعد نصو ويديه مشاو ديريكت لتحت راسو جبد جوان "... صباحاتو لله ، هادا هو لفطور لي موجدة لباك مفيقاني نحل لباب نتي معند اصل مك يدين باش تخليه
_ اشبيني وبين رباعة لكماية تا نحل ليهم.. " تمات داخلة لبيتها " خليهم تا يدخلو عليك هنا ومنك ليهم اما انا ماتسالني ندير غااا دفة لهاد لبيت
كتجمع حوايج الحمام وكتسمع ليه وهو كشاكشو خارجين
_المختار...كنتي تشري فيها الالة يدخلو علياا ونتي اش دخل مك فحيااتي سيري قلبي عليا وجلسي عندها شوية ماشي هي خراتك وانا طليتك ...وزايدون معندي مندير بوحدة لي تجيب ليا الهضرة گاع عباد الله شادين فيك لحتيت شوهتيني بحالك بحال حناك ..
- "ردخات صاكها في الارض بنثرة وتگرفضت ليه "...مالي جايبة ليك كرش ولا جارة فيدي زوج ...شفتي غا شووهتني انا ونتا شنو ملاك ..." رجعات سمعات صوت دقان من جديد وهي تدوي بسخرية "......شافوك نسيتي موذنتي جاو يفكروك ...شايلاه ادينار لي مصور فجبهتك بكثرة الصلاااة .." هزات صاكها وتمات خارجة "..الله يلعن لي ميحشم
حلات لباب لقات في وجهاا وجه گاع مخطط تحت فمو عامر كالة ومعرت علاش جاي يقلب تاني
مجيد ....اي عيني نوورك ابنت لمختار عماني
- " خسرات سيفتها "...هاااء بوطو تاع ضو انا ومفخباريش , دوز حيد بلا بسالة دخل عندو تقضى اش خصك قبل متسرا معاك القطعة وتحيح تاني ... " تمات غادا هو تابعها
مجيد...."خدا من عندها صاك لاحو فوق كتافو "...هي انا ماشي راجل لي نخليك هازة تقل ونبقى نشوف " غمزهاا " فين غادا نوارة الدرب
- غادا لسخوون
مجيد......احححح ياكما بغيتي لي يدوز ليك على ظهرك
- " بغات تاخد من عندو صاك مخلاهاش وهي تبدا تهلل عليه "....شفتي داك تنوعير لي كديرو على بنات توصل عندي وبدلو ولا ميعجبك حال متندميش حيت عطيتك زوج كلمات
_مجيد ....نزيد كلمة وحدة ونضرب طم
- "تنهدات بقلة الصبر عارفاه ماشي على برجو "....طلقني كنسمع ...
مجيد ....شوفي فيا وقولي ليا واش حسيتي بداك شي لي حسيت بيه
- " وقفات مقابلة معاه وبقات ساكتة شحال وهي تجاوبو " ..بغيتي تغرف باش حسيت ،حسيت بشفقة عليك وعليا حيت بزووجنااا نتيجة مجتمع فاسد ..بنادم مكفاهش يمسحو صبابطهم فينا ولاو كيعفطو عليناا...يمكن انا قريب يسهل عليا الله ونتهنى ولكن ونتا ..شحال قدك تدير الطعريجة بالليل " هي سيليسيون البنات " ...وشيشا بنهار ...تفطر بالكالة وتعشى بشراب ووقت لغدا تدوزها جوانات ...اودي الله يتوب عليك وعلينا من هاد العيشة الكحلة
"خدات من عندو صاكهاا و كملت على طريقها اما هوو قلب الدورة ورجع عند با المختار ياخد باش يزيد يتلف عقلوو .. هضرتها دخلت ليه من وذن و خرجتها من ختهاا .. العقل باش يفكر و لا باش يسرا كلامها معاه مكاينش من نهار وعى و عرف راسو من رجليه لقا مو ما هي الا ق*** تدخل و تخرج في الرجالة عندها كيف الليل كيف النهار .. لا لعب لعبو مع صحابو لا قراية قراها كيف گرانو ... خوفو و الهاجس الاكبر ديالو هي كلمة مك فاعلة وتاركة وصانعة .. ونهار فاق ليها و بغى يرجع ليها عقلها لقى هو عقلو هرب عليه .. بانت ليه غير جنوية هزها وضربها ليها الضهر وخلاها على طول حياتها مشلولة ... اما هو فدخل الحبس و زاد تبلى كتر من الاول .. ولي زادت دمراتو و هي فاش تكرفسو عليه داخل الحبس ... هداك كيبقى غير حبس جامع الظالم و المظلوم .. وجامع لي كيخاف الله و لي بينو و بين الخوف غير الشيطان ... خرج من الحبس بعد مدوز سنينو حالتو غادا وكترجع اللور ... مرة يقوليهم انا طبيب .. ومرة يقوليهم انا فقيه هذا حالو نهار لي كيجلس و يرجع ليه الذي كيبغي يقتل راسو ماشي مرة ماشي جوج عتقوه غا الناس ... و المهرب الوحيد ديالو و ديال لي بحالو هو داك السم وهدا علاش رجلو تعودت على خطوات دار با المختار "
دخلات لْحمام شي يسلم عليها من هنا وشي يشير من لهيه كانت معروفة تم حيت هادا هو يومها في الاسبووع فين كتجي
#الجمعة......السخوون كيكون خاوي فيه غير عيالات لكبار صحابات حكي ليا ضهري وسگي ليا ابنتي معاك هاد السطل وحيت هي صبرها قليل وجهدها مقادي كتدخل لبيت لخر تسخن فيه حتى كتعيط عليها لكساالة تحك ليهااا من ساسها لراسهاا وتسگي ليهاا وتجيب لما تال عندها ....واخا الميزيرية والفلوس على قد الحال مهلية فرااسهااا ومحارماش نفسها من اي حاجة ايدها متقوبة الله يجعلها تخسر فلوسها كاملين وتجلس الله كريم معندهاش حس المشكيل
فطريقها لمكانها المعتاد داخلة كتجر في رجليها وگاع الاعين عليهاا المثير فيها عينيهاا الزرقا اما جسمها كان عادي بحال گاع لبنات عندها عيووب ومحاسن غدا مرفوعة محسات غا بالما كيترش عليها وشي وحدة كتعيط
- واالبنية هاااه
- " دارت شافت فيها كتطلب فنفسها متطلبش منها لي في بالها " ...نعام الحاجةة !!
- عاايش بنيتي دوزي ليا على ظهر ملحگتووش بغيت نخرج غتفووتني جامووعةة
تنهدات معندها مدير باقا كتغلب عليها العاطفة وكيغلبها وجهاا وكدير بحساب سن......خدات من عندها الكيس خشاتو في ايديها وجلسات الارض فوق الجلدة كتحك لمرا ومكاايسةة عليهاا لتخلي ليها ليمارا بحكم كبر سنهاا وتكمااش لي ولا مغطي لحمهاا وفي دماغها كتساائل مرا بحال هادي معندها بنات لي تجي لحمام راسهااا اش فيها متسگي ولا تهز صيكان كان كلشي فيها مسالي ماعادا حاجة وحدة وهي الفم ...لدرجة ملي بدات تحك ليها مسكتاش
- تم تم ابنتي !!..طلعي لفوق..!!بلاتي نزلي لتحت..!!سيري الله يرضي عليك...باينة فيك ممزوجاش ...ولكن تبارك الله عاطية لعين الله يسهل عليك ويجيب ليك لي يسترك ....نوصيك ابنتي الا عندك ميمتك وبوك تهلاي فيهم مديريش بحال واحد خطيات عندي انا سااخطة عليهم كبرت وخدمت وخرقت وراريت وسهرت ومعقلوش عليا لبنات تزادو عليهم زبو**. ولولاد طباب** ..
لبنت تقووليا راجلي مخلانيش امي والولد لمدام الواليدة عيانة ....واناااا ليا الله
- " مدات ليها لخرقة وباست على راسها ونطقات " ....الله يخلي ليك صحيحتك ولي باغي يمشي بسلامةة ، يالله بصحتك الحاجةة
- " شدات ليها يديها " اش سماك الله ابنتي ...
- سميتي *دَلـِــيــــلَــــة*
- انا راضية عليك ادليلة قدما صبات وسحات ، الله يسهل عليك وينقي طريقك من شووك ...
دليلة ..." بتاسمات ليها وعطاتها بالظهر وهي كتردد ". ..امين اميمتي امين
"دليلة , المعشووقة أو المدللة ....هاد المعاني لي لا يمتون لها بصلةة حيت هي والدلال خطان متوازياان عمرها سمعات اجي ابنتي نعنقك، ولا شوفي ابنتي اش شريت ليك، ولا حتى ماالك اش ضاارك ...تزادت و تربات وسط المعاناة و الدل و الحگرة ...ملي حلات عينيها و هي حاسة براسها كورة وكتلاوح بين رجلين تعييا منها مها تلوحها لباها والعكس كان... كل واحد فيهم أناني كيعيط غا راسي اراسي ...ومعتابرينها غلطةة وعقااب على جرم رتاكبووه بزووج ..في صغرهاا كانت كتأثر من كلامهم ومعاملتهم ليها لكن محدها وهي كتكبر قلبها كيقصااح ومناعتها كتضااعف ومبقاتش كتأثر فيها اي كلمةة ..
الأم تعيط نهارر توقف على فلوس ولا توقع فشي مشكل ..والاب معتبرها غريبة وحاطة الرحال عندو باغي امتى يكركبها ويتهنى منهاا...اما هي دايرة ليه وذن وعين ميكةة حيت اللهم هو راجل تجلس معاه واخا بزناز وحشايشي مكاينش لي غيطاول عليها ويقرب ليها ولا تكون عند مها داخل كثر من لخاارج ولي برا شاد الصف شي نهار يجمعوها مع معا ولا يتعداو عليهاا
لبسات حوايجها وتعطراات خلصاات الكساالة فعرق كتافهاا بلي يرضييها مكتبغي تدي عرق شي حد .....عاد خرجات نيشان لصالون قادات شعرها وحجبانهاا وفي طريقها لدار تغدات ودات معاها لباها.....تمضغو ومتسرطوش المختار وسعدية دايرين بحال شووكة لي واحلة في حلقها متقد تخرجها ولا تسرطهم كيجيها وقت كيطلع ليها دم بالمعقول وكتكره راسها والحياة وميجي منها وكتقول نكون يتيمة ومقطوعة من شجرة ولا نكون بنت زنااا وأوقات كتقوول باراكا نحس بيني وبين راسي انا عندي با ومي واخا غا بسميةة ومنحسش بلي بووحدي في هاد دنياا
وصلات لبراكة لقاتها خاوية غا ريحة دخان لمختار لي حاضر حطات ليه غداه فوق طبلة... وجبدات بينوارها يا الله غتنشر ترتاح تا تم داخل كيخنزر وفجنبو لي خارجة في عودها ولي بسبابها كتسمع سم من عندو .. مشا جلس في الارض تقابل معاها كان مشارجي بجهد عينيه حمرين وعلاين يتفرگع حدو نزل وجهو بان ليه بوكاديوس بفريتو وموناضتو محطوطين ناض على وقفتو تقابل معاها ولاحو عليهاا
المختار .." عينيه مقلوبين وكشاكشو خارجة " .. هادشي ما عندي ما ندير بيه الالة الى غير كرشي راني مشبعها وفايتها لهيه .. بغيت تخرجي تعطيني بالتيساع و قلبي على فين تجلسي
_دليلة.... " هزات فوطة كتمسح وجها وحجبانها معقوودين ...كون كان شي حد اخور تدير فيه ايدها ولكن جاها بااها وهاد الصفة هي لي واقفة عقبة في طريقهاا ...حطات يديها على جنابها كتبان من برا مبردة اما داخلها عالم بيه الخالق شافت فلي معاه وتوجهات ليها بالهضرة " ......عمرتيه تاني مكتعيايش بغيت غا نعرف اش دخلك بين راجل وبنتو .." شافت فيه"...سير نعل شيطاان اباا
_المختار ... وكون غا نعلت الشيطان ديك الليلة و مقصتش الخانزة تاعت مك ... راك غير حيوان منوي غلط و شد بلاصتو فيقي و عيقي ..." خلاتو حال داك قادوس عكراش ودخلات لبيتها كتوجد حوايجها باش تخرج تبدل ساعة بختها.... لبسات دجين و قوبية و سبرديلة في رجليها و خرجات حلات بزطامعا و حطات ليه ميتين درهم هزها خشاها في جيبو مفلتهاش عاد كمل " ...
_المختار .... يصحابك هاد جوج دريال غتسكتيني بيهم ا خرجي الحاجة قلبي على فين تجلسي ....معنديش لوطيل هنا راني باغي ندگ لوتاد ونتزوج وداك البيت لي جالسة فيه زايد فيا ندخل انا ومرتي ليه
_دليلة....."كتقاد فشعرها وتضحك " .....مغاداش ندي عليك دابا نخليك تا تفووتك الحالة وتبرد ...هاد الكاسيطة عندك حفظتهاا يالله دوز بخير
_المختار ..." تبعها لزنقة كيغوت ويسمع لعباد الله بالحق حتى حد مداها فيه حيت ولفو عليه كيف ديما نفس سينتا كتبان ليه غا هي حيط قصير ينقز عليه ". واتي سيري ديري مخدة و حطي الراس عند مك .. انا باغي نتزوج الالة خوي ليا داري فين نلقى راحتي مع مرتي كتسمعي
يتب_______________ع
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
جميع الروايات كامله من هنا 👇 ❤️ 👇
اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇
❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺
تعليقات
إرسال تعليق