رواية مكتوبه على إسمي الحلقه السادسه والسابعه بقلم الكاتبه ملك إبراهيم حصريه وجديده على مدونة النجم المتوهج
رواية مكتوبه على إسمي الحلقه السادسه والسابعه بقلم الكاتبه ملك إبراهيم حصريه وجديده
زوزو: طبعا بجد وهاخدك عنده دلوقتي.. انتي قولتيلي اسمه ايه؟
ردت آيات: عامر الجارحي.
زوزو: اه هو وانا هتوه عنه.. تعالي معايا يلا اوصلك ليه.
آيات صدقت زوزو بكل برائه وعفويه وركبت معاها التاكسي وكانت متوتره جدا من مقابلة جوزها بعد خمس سنين وكانت طول الطريق بتسأل نفسها ياتري هو شكله ايه.. هي فاكره ان لما كتبوا الكتاب من خمس سنين أبوها كان بيتكلم مع مراته صباح في مرة قدامها وقالها العريس عنده 25 سنه ودلوقت فات علي جوازهم 5 سنين يعني عمره دلوقتي بقى 30 سنه وهي 19 سنه يعني هو اكبر منها ب 11 سنه وأكيد شكله اتغير في الخمس سنين دول زي ما هي كمان شكلها اتغير ومبقتش الطفلة اللي اتجوزها من خمس سنين ودلوقتي بقت شابة جميلة جاية من بلدها تدور على جوزها في مدينة عايش فيها الملايين.
بعد وقت وقف سواق التاكسي في منطقة كلها عمارات عالية وزوز نزلت من التاكسي ومعاها آيات اللي كانت بتبص حواليها بانبهار وقالت: هي البيوت هنا عاليه وكبيره كده ليه؟
ردت زوزو وهي بتضحك: عشان الناس هنا كتير والعمارة الواحدة بيعيش فيها بال50 عيله.
شهقت آيات بانبهار: 50 عيله في عمارة واحدة.. دا احنا كل عيلة ليهم بيت لوحدهم.
زوزو: الحياة هنا حاجة تانيه.. تعالي معايا يلا عشان اوصلك شقة جوزك.
آيات بتوتر: شقته!!
زوزو: ايوا هو ساكن في العمارة اللي قدامك دي.
آيات بتوتر: بس انا هقوله ايه اول لما اشوفه.. انا خايفه يزعقلي عشان سيبت البلد وجيت هنا لوحدي.
زوزو بخبث: متخافيش انا معاكي.. تعالي معايا يلا.
طلعوا في الاسانسير الدور العاشر وآيات كانت متوتره جدا وزوز بتبصلها بخبث ووقفت قدام شقة ورنة الجرس وبعد لحظات فتح لها رجل في بداية الأربعين وكان في جزء كبير من شعره ابيض وكان جسمه مليان وعنده كرش واول لما فتح الباب وشاف زوزو ابتسم وبص علي آيات بنظرة شهوا نية خوفتها وحست ان مش ده ابدا الشاب اللي كتب كتابه عليها من خمس سنين وزوزو بصتله وغمزتله بينه وبينها وقالتله: ازيك يا باشمهندس عامر انا جيبالك معايا مفاجأة.. مراتك آيات اللي انت متجوزها من خمس سنين.. ينفع كده يا باشمهندس بقى في حد يسيب مراته القمر دي كل السنين دي لوحدها كده!
رد عليها الرجل بمكر بعد ما فهم قصدها وقال:
اخيرا شوفت مراتي حبيبتي بعد السنين دي كلها..
وكان لسه هيقرب من آيات عشان يحضنها لكنها بعدت عنه بسرعة وقالت بخوف: بس انا متهيألي ان مش انت اللي انا اتجوزته من خمس سنين..
وبصت على جسمه السمين وشكله الكبير في السن وقالت: هو مكنش كده ابدا!
اتكلمت معاها زوزو بثقة: دول خمس سنين يا حبيبتي ولازم شكله يتغير وبعدين مش انتي قولتيلي انك مش فاكرة شكله!
ردت آيات بحيره: اه مش فاكره شكله اوي بس هو اكيد مش شكله كده.. انا حاسه انه مش هو.
اتبدلت نبرة صوت زوزو للعصبيه وقالتلها: هو يا حبيبتي انا قولتلك هو وانتي مش هتعرفي اكتر مني.
آيات بصتلها بستغراب وقالت بتردد: طب ممكن اشوف اسمه في البطاقة؟
ردت زوزو بغضب: هو انتي ايه حكايتك يا حلوة هو انتي هتعملي للراجل فيش وتشبيه ولا ايه ليكون متجوز وزيرة الخارجية واحنا منعرفش..انا قولتلك هو ده جوزك ويلا ادخلي معاه احنا مش هنقف نحرق بنزين علي الفاضي.
آيات بخوف: انا مش هدخل في اي مكان انا همشي.
زوزو مسكتها من أيديها وشدتها بقوة عشان تدخلها البيت وآيات صرخت بكل صوتها والرجل اللي مع زوزو زعق فيها وقالها: بس يا زوزو سيبيها تغور البت هتفضحنا وتلم علينا الجيران.
زوزو باصرار: مش هتيجي لحد هنا وتمشي قبل ما ناخد منها اللي احنا عايزينه.
آيات كانت بتصرخ بكل صوتها وهي بتخلص نفسها من ايد زوزو والرجل صاحب الشقة خاف من الفضا يح ودخل شقته بسرعه وقفل على نفسه وسابهم هما الاتنين قدام الشقة وزوزو كانت مصممه انها تدخل آيات الشقة غصب عنها وآيات دفعتها بعيد عنها بكل قوتها وضربتها في دماغها بشنطتها اللي كانت معاها وزوزو وقعت علي الارض وآيات اخدت شنطتها بسرعه وجريت على السلم ونزلت ال10 اداور علي رجليها وهي في حالة اندفاع وتهور وكانت بتبكي وخايفه وعايزة تخرج من العمارة بسرعه واول لما خرجت من العمارة كانت بتجري بكل سرعتها لحد ما وقفت فجأة قدام عربية كان نورها عالي في وشها واخر حاجة سمعته صوت فرامل العربية وصوت صراخ بنت.
رواية مكتوبه على اسمي بقلمي ملك إبراهيم.
في بيت عرفان.
كان صوت القرأن عالي في البيت وأهل البلد متجمعين حوالين البيت بعد ما صباح صرخت مع طلوع الشمس وقالت انها صحيت من النوم لقت جوزها ميت!
وقف إسماعيل وابنه فارس يسمعوا كلام صباح بصدمة وهي بتتهم آيات في شرفها وبتقول ان عرفان مات من حسرته على بنته بعد ما جابت لهم العار.
اسماعيل زعق فيها وقالها: اخرسي قطـ.ع لسانك.. بنت أخويا مفيش اشرف منها وكل الكلام اللي بتقوليه ده افترى منك.
صباح بتمثيل وهي بتبكي: أخوك مات من حسرته علي بنته بعد ما عرف انها حامل وهربت مع عشيـ.قها.
أتكلم فارس بغضب: مين عشيـ.قها ده واحد من البلد؟
اتكلم معاه ابوه بصدمة: انت هتصدق كلام الخرفانه دي.. بنت عمك اشرف من الشرف واللي هيجيب سيرتها بكلمه واحدة انا هقطـ.ع لسانه.
اتكلم فارس بحيرة: لو هي شريفه تبقى هربت ليه يا أبويا.
رد ابوه بثقة: هربت من الذل اللي كانت عايشه فيه.
صباح كانت متغاظه من إسماعيل اخو جوزها اللي بيدافع عن آيات بثقة وقالت: والله هي بنتكم والعار عاركم.
أتكلم إسماعيل بغضب: خلينا ندفن أخويا الأول ونكرمه في قبره وبعدها انا هدور علي بنت أخويا واعرف منها الحقيقه.
صباح بصتله بتوتر وفارس قال باصرار: انا اللي هدور عليها يا أبويا ولو طلع الكلام ده صح يبقى حلال فيها المو ت.
رواية مكتوبة على إسمي بقلمي ملك إبراهيم.
بعد 3 ساعات في إحدى المستشفيات الخاصة.
فتحت آيات عينيها علي ضوء الغرفة وكان في دكتور وممرضة وبنت واقفه معاهم بتسأل الدكتور عن حالة المصابة.
آيات اول لما فتحت عينيها همست: انا فين؟
اتكلمت الممرضه: فاقت يا دكتور.
الدكتور قرب منها ومعاه البنت اللي كانت بتتكلم معاه والدكتور سألها بهدوء: انتي شايفاني يا انسه؟
آيات بصتله وهي بتفوق وقالت: انا فين؟
الدكتور: انتي في المستشفى.
آيات بصتله وفي لحظة افتكرت اللي حصل معاها وزوزو اللي كانت عايزة تدخلها الشقة بالقوة وانتفضت علي الفراش وقالت بصراخ: مين اللي جابني هنا هما عملوا فيا ايه؟
اتكلمت البنت اللي كانت واقفه مع الدكتور: اهدي يا انسه انا اللي جبتك هنا انا اسفه جدا انا اللي خبطك بعربيتي بس صدقيني انتي كمان كنتي غلطانه لانك كنتي بتجري على الطريق بسرعه جدا وظهرتي قدامي فجأة!
آيات بصتلها وافتكرت اللي حصل ودموعها نزلت من عينيها فجأة وقالت: كانوا عايزين يخطفوني.
البنت بصت للدكتور بصدمة وسألتها: مين دول؟
آيات ببكاء: اللي اسمها زوزو.. ضحكت عليا وانا صدقتها وكانت عايزه تخطفني وأنا كنت بهرب منها.
الدكتور: طب ممكن تقوليلنا علي عنوان حد من أهلك او رقم تليفون نتواصل معاهم ونبلغهم ان انتي هنا.
ردت وهي بتبكي: أهلي مش هنا.
البنت بصتلها بحزن وقالتلها: اهلك مسافرين؟
آيات بصتلها وهزت راسها بالايجاب وهي بتبكي والبنت اتعاطفت معاها جدا وقالت للدكتور: من فضلك يا دكتور ممكن أتكلم معاها شويه ؟
الدكتور: تمام يا انسه هاجر.. ولو احتاجتوا اي حاجة انا موجود في مكتبي.
وخرج الدكتور والممرضه.. وهاجر بصت ل آيات وقالتلها بحزن: انا اسفه جدا على اللي حصل بس الحمدلله ان انتي بخير والدكتور طمني وانا مستعدة لأي تعويض تطلبيه بس بلاش الشرطة ومحضر لان أخويا لو عرف اني عملت حادثة بالعربية هياخدها مني.
آيات بصتلها بحزن وقالت: انا مش عايزة اي حاجة وعارفه ان انا كمان غلطانه.. بس صدقيني كان غصب عني انا كنت بنقذ نفسي منهم.
هاجر: هما مين؟
آيات: ناس معرفهمش.. ست قابلتها في محطة القطر اول لما وصلت هنا وقالتلي انها هتساعدني اني الاقي جوزي واكتشفت انها عايزة تخطفني.
هاجر بدهشة: معقول انتي متجوزة!! انتي شكلك صغيرة اوي!
آيات بحزن: انا عندي 19 سنه.
هاجر بحماس: بجد يعني انا اكبر منك ب سنه واحدة بس.. طب ممكن اعرف اسمك ايه؟
ردت بتوتر: اسمي آيات.
هاجر بأبتسامة: وانا هاجر.. طب قوليلي هو جوزك ساكن فين وانا اساعدك توصليله.
رواية مكتوبة على إسمي بقلمي ملك إبراهيم.
داخل شركة الجارحى.
وصل عامر الشركة بعد رجوعه من السفر وكان شريف في اسقباله.
دخل عامر علي مكتبه مباشرة وشريف دخل وراه وقال بنبرة مرحة: في حد يجي من المطار على الشركة على طول كده!
رد عامر وهو بيقعد علي مكتبه: الايام اللي جايه مش هينفع فيها راحة هيبقى شغل ليل ونهار وهنكثف العمل عشان نلحق المشروع اللي اتعقدنا عليه.
شريف بحماس: شكلك متحمس للمشروع ده.
عامر: طبعا دا اهم مشروع في الشرق الأوسط والحمد لله اننا قدرنا ناخد المشروع ده ومن اللحظة دي مش عايز أي تقصير والكل لازم يشتغل بجد.
شريف ابتسم وقال: متقلقش كل اللي انت عايزه هيحصل.
عامر بص في الورق اللي قدامه على المكتب وقال: قولي اخبار الشغل هنا ايه حصل اي مشاكل وانا مسافر؟
شريف: لا كله تمام متقلقش..
وافتكر حاجة مهمة وقال: اااه كان في حاجة غريبه كده حصلت بعد ما انت سافرت على طول وانا مرضتش اقولك عليها غير لما ترجع.
عامر بستغراب: حاجة إيه؟
شريف قام وفتح درج المكتب وخرج منه ظرف فيه جواب وقال: في واحد جه الشركة هنا يسأل عليك وبيقول انه صاحب العزبة اللي اشتراها من جدك قبل ما يموت.
عامر افتكره وقال: اه افتكرته ماله ده!
شريف: جه سأل عليك وقالي حاجة غريبه كده..
عامر: ايه؟
شريف: بيقول ان عم مراتك بعتلك جواب معاه وبيقولك لازم تروح تاخد مراتك لان ابوها ومرات ابوها مبهدلينها هناك.
عامر بصدمة: مراتي مين!!!.. بقلمي ملك إبراهيم
مراتك مين دا احنا اللي هنطلع عينك وناخد حق البنت الغلبانه اللي متبهدله بسببك دي🥺 الباشا رجع من السفر حمدلله على السلامه بس ده مش هيصعب علينا مهما آيات تعمل فيه اتفقنا🤝😂 حق بنتنا لازم يرجع💪
#الحلقة_السابعة
عم مراتك بعتلك جواب معاه وبيقولك لازم تروح تاخد مراتك لان ابوها ومرات ابوها مبهدلينها هناك.
عامر بصدمة: مراتي مين!!!
شريف: انا اللي المفروض اسألك.. انت اتجوزت من ورايا ولا ايه يا عامر!
عامر بصله بصدمة وقاله: هات الجواب ده كده.
واخد الجواب من شريف وفتحه وبدء يقرأ المكتوب فيه.
"السلام عليكم ورحمة الله وبركاته..
انا الحاج اسماعيل اخو عرفان ابو مراتك.. ياريت يا باشمهندس تيجي في أسرع وقت تنقذ مراتك من ابوها ومراته.. من يوم ما كتبت كتابك عليها من خمس سنين وقولت انك مسافر وانت لا حس ولا خبر وانا عرفت انك مش مسافر ولا حاجة.. حرام عليك تسيب مراتك متعلقه كده خمس سنين علي إسمك وابوها مبهدلها ومرات ابوها مشغلاها خدامه عندها.. اتقي الله في مراتك هي مسؤولة منك قدام ربنا وتعالى خدها وارحمها من العذاب اللي هي عايشة فيه"
عامر قراء الجواب بصدمة وهمس: يعني ايه الكلام ده!! مراتي ازااي!!
وبص قدامه وقال بذهول: معقول انا نسيت اطلقها!!
شريف بدهشة: في إيه يا عامر فهمني ؟
عامر بص ل شريف وهو مش قادر يفتكر هو طلقها ولا لا.. كل الأحداث اللي في دماغه كانت متلخبطه وداخله في بعضها!
حط الجواب على مكتبه بصدمة واتصل على المحامي بتاعه وطلب منه يجيله بسرعه في المكتب واول لما قفل المكالمة مع المحامي اخد الجواب تاني وقرأه بصدمة وهو هيتجنن ومش قادر يصدق انه نسى موضوع جوازه ده ويمكن نسى يطلقها كل السنين دي وهي لسه على ذمته!
شريف بصله بقلق وسأله: إيه الحكايه يا عامر قلقتني هما الناس دول نصابين ولا ايه!؟
عامر بصدمة: لو اللي في دماغي طلع صح هتبقي مصيبه يا شريف.
شريف: مصيبة إيه متفهمني.
عامر: لما استاذ عاطف المحامي يجي وافهم انا الأول.
رواية مكتوبة على إسمي بقلمي ملك إبراهيم.
عند آيات في المستشفى.
هاجر كانت قاعده مع آيات في الغرفة وعايزة تساعدها ب أي طريقه لانها حست انها بنت طيبه وخافت ان حد يستغلها وهي غريبه لوحدها هنا.
هاجر: طب قوليلي هو جوزك ساكن فين وانا اساعدك توصليله.
آيات بحزن: معرفش هو ساكن فين ولا اعرف اي حاجة عنه.. هو اتجوزني من خمس سنين وكنت انا صغيرة ومن يومها مرجعش عشان ياخدني وانا جيت ادور عليه هنا.
هاجر بستغراب: غريبه اوي حكايتك دي انا اول مرة اسمع حاجة زي كده.. يعني انتي متعرفيش عنه حاجة اومال هتوصليله ازاي! طب ليكي اهل هنا او قرايب؟
ردت آيات بخجل: لا مليش حد هنا.
هاجر بستغراب: ازاي يعني طب وهتعيشي فين هنا؟
آيات بكت بحزن وقالت: انا جيت ادور عليه ومفكرتش في اي حاجة تانيه!
هاجر قربت منها وقالتلها: طب امسحي دموعك وهنلاقي حل ان شاء الله.
آيات اتكلمت بخوف: انا مش عارف لو ملقتوش هنا هعمل ايه! انا مش معايا فلوس كفايه ومش هينفع ارجع البلد تاني.
هاجر بتفكير: انتي ممكن تشتغلي هنا وانتي بتدوري عليه عادي!
آيات ببكاء: هشتغل ايه بس هنا وانا مش معايا غير شهادة الثانوي.
هاجر بصتلها بتفكير وقالت: الشغل سهل.. انا اقدر اساعدك تشتغلي في شركة اخويا.. هو عنده شركة صغيرة كده واكيد لو عرف ظروفك هيوافق تشتغلي عنده..
وابتسمت وقالت بمرح: بس بشرط ميعرفش ان انا اللي خبطك بالعربيه.
آيات ابتسمت وقالت باحراج: بس انا عمري ما اشتغلت قبل كده وكمان انا مش معايا شهادة جامعيه.. وبابا كان رافض اروح الجامعة عشان مش عايزني اخرج من البلد.
هاجر بأبتسامه: ولا يهمك انا هكلم أخويا وهقوله انك صحبتي وهطلب منه يشغلك في الشركة.
آيات كانت خايفه تثق فيها زي ما حصل مع زوزو..
هاجر حست بخوفها وقالتلها: متخافيش دي شركة فيها موظفين وامن وناس كتير بتشتغل فيها يعني مش هتكوني لوحدك.
آيات بحزن: اصل انا بعد اللي حصل معايا ده بقيت خايفه أثق في حد.
هاجر: طب عشان تطمني انا هديكي رقم تليفوني وعنوان الشركة وروحي شوفي الشركة وشوفي عدد الموظفين اللي فيها ولما تطمني اتصلي عليا وانا اكلمه.
آيات باحراج: انا اصلا معرفش اي حاجة هنا وخايفه اخرج من المستشفى اتوه في البلد ومعرفش اوصل ل اي مكان.
هاجر: طب آنتي لو لقيتي شغل هتعملي إيه في السكن.
آيات: مش عارفه.
هاجر بصت قدامها بتفكير وآيات فجأة افتكرت هدير صحبتها اللي كانت معاها في المدرسة وبتكمل تعليمها في الجامعة هنا في القاهرة وكانت عارفه انها عايشه في سكن خاص مع مجموعة بنات مغتربات وبيدرسوا معاها في الجامعة.
بصت آيات ل هاجر وقالتلها: انا افتكرت حاجة.. انا ليا واحدة صحبتي عايشه هنا وبتدرس في الجامعة.. انا مش عارفة ازاي مفكرتش فيها!
هاجر إبتسمت وسألتها: إسمها ايه صحبتك دي.. وعارفه عنوانها؟
آيات: اسمها هدير ومعرفش عنوانها بس رقم تليفونها معايا احنا أصحاب من واحنا صغيرين وكنا مع بعض في المدرسة لحد الثانوي بس هي ابوها دخلها الجامعة هنا.
هاجر بصتلها وابتسمت وقالتلها: طب خلينا نكلمها يمكن تقدر تساعدك في موضوع السكن.
آيات هزت راسها بالايجاب وقالت: انا كاتبه رقمها في دفتر المذكرات بتاعي والمذكرة في الشنطة.. هي شنطتي فين؟
ردت هاجر: شنطتك هنا معايا.
واخدت آيات الشنطة بتاعها وفتحت الشنطة وطلعت منها دفتر ملاحظات صغير جدا وبحثت فيه عن رقم تليفون هدير وقالت: لقيت رقمها اهو بس هكلمها ازاي؟
هاجر بستغراب: هو آنتي مش معاكي موبيل ؟
ردت آيات باحراج: للأسف لا مش معايا.
هاجر هزت راسها بتفهم وكانت متعاطفه جدا مع آيات وقالتلها: انا معايا موبيل خلينا نكلمها دلوقتي.
اخدت هاجر الرقم واتصلت عليه وآيات مسكت الموبيل بتوتر واول لما سمعت صوت هدير اتكلمت بلهفة: الوو.. هدير انا آيات عرفان.
ردت هدير بسعادة: آيات عامله ايه وحشتيني.. انتي اشتريتي تليفون ولا ايه ؟
ردت آيات بحزن: لا يا هدير انا بكلمك من تليفون واحدة عرفتها هنا.. انا في القاهرة يا هدير وعايزة أشوفك ينفع؟
هدير بقلق: اه طبعا انتي فين وانا اجيلك؟
آيات: انا في المستشفى.
هدير شهقت بصدمة وآيات طمنتها وقالتلها: متقلقيش انا كويسه.. بس عايزة أشوفك بسرعه يا هدير انا معرفش حد هنا غيرك.
هاجر كلمتها وقالتلها: خليها تقولك عنوانها وانا هوصلك ليها.
آيات قالتلها: هدير انتي عنوانك فين عشان اجيلك.
هدير: قوليلي انتي في مستشفى ايه وانا هجيلك يا آيات.
هاجر شاورت ل آيات واخدت منها التليفون وكلمت هي هدير: استاذة هدير ممكن تقوليلي عنوانك وانا هوصل آيات ل عندك متقلقيش هي الحمد لله كويسة.
هدير قالتلها العنوان وقالتلها انها في انتظارهم بقلق عشان تطمن علي صحبتها.
هاجر آبتسمت ل آيات وقالتلها: انا عرفت عنوانها ومش بعيد عن هنا.. هروح ادفع مصاريف المستشفى علي ما انتي تجهزي وهاخدك اوصلك ليها.
آيات هزت راسها بالايجاب وكانت حاسه ان هاجر دي الملاك اللي ظهرلها عشان يساعدها وكانت خايفه ان هدير متقدرش تستضيفها في الشقة اللي هي عايشة فيها وزمايل هدير يرفضوا ورفعت وشها للسما وقالت من قلبها: يارب مليش غيرك.
رواية مكتوبة على إسمي بقلمي ملك إبراهيم.
في شركة عامر.
بعد وقت وصل المحامي وعامر استقبله وهو لسه تحت تأثير الصدمة واول لما المحامي قعد قدامه اتكلم عامر: استاذ عاطف.. من خمس سنين انت في يوم كلمتني وقولتلي ان جدي هيتجوز بنت صغيرة عندها 14سنه وابوها موافق وجدي طمعه بالفلوس صح؟
شريف بص ل عامر بصدمة لانه اول مرة يعرف الموضوع ده والمحامي قال بثقة: مظبوط.
عامر: وانا روحت عشان أوقف الجوازة دي وحضرتك كنت معايا ودفعت ل ابو البنت الفلوس بس هو صمم ان لازم يبقي في عريس يكتب الكتاب قدام اهل البلد وحضرتك نصحتني اني اكتب عليها وبعد فترة اطلقها عشان جدي ميقدرش يتجوزها بعد كده صح ؟
المحامي: مظبوط.
شريف كان بيتابع الكلام بينهم بصدمة ومش قادر يصدق اللي بيسمعه وعامر اتكلم مرة تانيه وهو خلاص هيتجنن من الصدمة: استاذ عاطف.. هو انا طلقت البنت دي بعد فترة زي ما اتفقنا؟
المحامي بصله وقال: بصراحة مش فاكر.. احنا ايامها كنا في مشاكل كتير وكان شغل جدك كله واقع وحضرتك كنت بتشتغل ليل ونهار وجدك بعدها مات واكتشفنا ديون كتير عليه وانشغلنا بالمشاكل الكتير اللي كانت بتحصل ساعتها ومش فاكر اذا كنت طلقتها او لا!
عامر ضرب علي المكتب بغضب من نفسه وقال: يعني انا مطلقتهاش!
المحامي بتوتر: أكيد لو كنت طلقتها كنت انا اللي هخلص الإجراءات بس انا مش فاكر اني عملت حاجة زي كده بس ممكن تديني ساعة واعرفلك اذا كنت طلقتها او لا.
عامر هز راسه بالايجاب وهو مصدوم وبدء يتأكد انه مطلقهاش والمحامي قام خرج وشريف قاعد قدام عامر مصدوم وقاله: معقول يا عامر انت اتجوزت بنت من خمس سنين ومتقوليش!
عامر بغضب من نفسه: انا نفسي كنت نسيت يا شريف.. من كتر الشغل والمشاكل والزفت اللي كنت فيه نسيت.. بس ازاي نسيت حاجة مهمة زي كده.. ازاي البنت على ذمتي وشايله اسمي طول الخمس سنين وانا معرفش!! ذنبها ايه البنت دي يضيع خمس سنين من عمرها وهي على ذمتي وانا اصلا ناسيها!
شريف حاول يخفف عليه وقاله: انت معذور برضه يا عامر وإللي جدك الله يرحمه حطك فيه كان كتير اوي ومش اي حد يستحمل كل ده.. دا جدك مات وسابلك مشاكل تنسي الواحد اسمه!
عامر بغضب مكتوم: بس مش لدرجة اني انسى ان في بنت علي ذمتي ومستنياني ارجع بقالها خمس سنين.. خمس سنين ضاعوا من عمرها وهي مستنياني وملهاش ذنب في كل المشاكل اللي كانت عندي!
شريف سكت وعامر كمل كلامه بغضب: انا ضيعت من عمرها خمس سنين يا شريف وانا المسؤول عنها.. في الخمس سنين دول كان ممكن يجيلها فرص جواز وانا ضيعت عليها كل الفرص.
شريف: فرص إيه اللي ضيعتها عليها يا عامر انت بتقول انك اتجوزتها وهي عندها 14 سنه وكان من خمس سنين يعني هي دلوقتي عندها 19 يعني لسه صغيرة والعمر قدامها طويل.
عامر: بس انا لازم اعوضها عن اللي عملته يا شريف.
شريف: خلينا نستنا بس استاذ عاطف يتأكد اذا انت كنت طلقتها او لا الاول.
رواية مكتوبة على إسمي بقلمي ملك إبراهيم.
عند آيات.
خرجت آيات من المستشفى وركبت العربيه مع هاجر عشان توصلها عند صحبتها.
آيات كان جواها إحساس بالراحة اتجاه هاجر عكس اللي حسته اتجاه زوزو وكمان هاجر كان واضح عليها من لبسها وطريقتها انها بنت كويسه وكان واضح على عربيتها ان مستواها المادي كويس وكانت مختلفه تماما عن زوزو في كل حاجة.
وصلوا قدام العمارة وهدير نزلت استقبلتهم وحضنت آيات باشتياق وسلمت على هاجر واتعرفت عليها وطلبت منها تطلع معاهم الشقة تتعرف على البنات.
هاجر طلعت مع آيات عشان تطمن ان صحبتها هتوافق تستقبلها في الشقة معاها لحد ما تلاقي جوزها..
طلعوا كلهم الشقة وكان فيها بنتين غير هدير عايشين معاها في الشقة وهدير عرفتهم على آيات صديقة طفولتها وعلى هاجر صحبة آيات وعرفت آيات وهاجر علي زمايلها في الشقة.
البنت الأولى اسمها سلمى في كلية اعلام.
البنت التانيه اسمها نغم في كلية إدارة الأعمال.
وهدير كانت بتدرس تجارة.
هاجر لما شافت نغم عرفتها لانها بتدرس معاها في نفس الجامعة وكانت مفاجأة بالنسبة ل هاجر ونغم وقعدوا البنات كلهم مع بعض وهدير سألت آيات عن اللي حصل معاها وآيات حكتلها اللي حصل بينها وبين مرات ابوها وحكتلهم ازاي هربت في القطر وحكت عن زوزو اللي قابلتها والرجل الغريب اللي كان بيقولها انه جوزها وازاي هي هربت منهم لحد ما هاجر خبطتها بعربيتها واخدتها علي المستشفى.
البنات كانوا متعاطفين معاها جدا وهما بيسمعوها وهاجر كانت فاهمه احراج آيات انها تطلب من البنات انها تعيش معاهم هنا فترة مؤقته وقالت: احنا لازم نساعد آيات لحد ما تقدر توصل ل جوزها.. والاهم ان لازم يكون لها هنا سكن تعيش فيه وشغل تعيش منه.
كل البنات كانوا موافقين على كلام هاجر وهدير بصت للبنات وقالت: آيات ممكن تعيش معانا هنا انتوا رأيكم ايه يا بنات؟
ردو البنات بدون تفكير: اه طبعا موافقين.
واتكلمت هاجر: وانا هحاول اظبطلها موضوع الشغل وهكلم أخويا يشغلها في الشركة عنده.
هدير ابتسمت وقالت: هيبقى كويس جدا.
اتكلمت نغم مع آيات: اهم حاجة يا آيات انك تتعلمي من اللي حصل معاكي واوعي تثقي في اي حد متعرفهوش بعد كده والحمد لله ان ربنا نجاكي من اللي اسمها زوزو دي.
اتكلمت آيات بحزن: انا كنت فاكره انها هتساعدني بجد وهتوصلني ل جوزي.
هدير حطت ايديها على ايد آيات تطمنها وقالت: القاهرة هنا كبيرة يا آيات مش زي القريه عندنا.. احنا عندنا في البلد كل الناس عارفين بعض لكن هنا صعب توصلي لحد بالسهولة دي يعني عشان توصلي ل جوزك ده هياخد منك وقت طويل ومش أي حد تسأليه عنه هيعرف هو مين او ساكن فين!
اتكلمت سلمي: انا من رأيي انك تركزي في موضوع الشغل دلوقتي وتظبطي وضعك هنا الأول وبعدين تبقي تدوري عليه برحتك ولو قدرتي توصليله يبقى تمام ولو مقدرتيش يبقى تخلعيه وتريحي دماغك ما انتي مش هتضيعي عمرك كله تدوري علي واحد متعرفيش حتى شكله ايه!
هاجر بصت ل آيات وقالت: خلينا نأجل اي كلام في الموضوع ده لحد ما آيات تهدا وحياتها هنا تستقر.
البنات وافقوا هاجر علي كلامها وكلهم اتفقوا انهم يساعدوا آيات وهاجر وعدتها انها هتتكلم مع اخوها النهاردة ومشيت هاجر عشان ترجع بيتها وهدير أخدت آيات معاها اوضتها عشان ترتاح.
رواية مكتوبة على اسمي بقلمي ملك إبراهيم.
بعد ساعتين في شركة الجارحي..
داخل مكتب عامر.
تليفون عامر رن برقم المحامي بتاعه.. عامر رد عليه بلهفة وسأله: قدرت توصل لحاجة؟
المحامي بأسف: للأسف البنت لسه مراتك فعلا وعلى ذمتك انت مطلقتهاش... بقلمي ملك إبراهيم.
... يتبع
أخيرا الباشا عرف ان في بنت علي ذمته🤔 لما نشوف بقى هيعمل إيه وازاي هيلاقي مراته اللي هربت 😍 حبايب ملوكة عايزة تفاعل قوي على البارت اللي متحمسة لباقي الأحداث تظهر هنا كده شجعونى 🙈❤️
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
جميع الروايات كامله من هنا 👇 ❤️ 👇
اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇
❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺
تعليقات
إرسال تعليق