رواية مكتوبه على مدونة الحلقه الثالثه عشر والرابعة عشرة بقلم الكاتبه ملك إبراهيم حصريه وجديده على مدونة النجم المتوهج
رواية مكتوبه على مدونة الحلقه الثالثه عشر والرابعة عشرة بقلم الكاتبه ملك إبراهيم حصريه وجديده
كوكو ظبط لبسه اول لما شريف سابه وبص ل ميرنا وقالها: سيبك منه يا ميرو شوفتي البنت المتوحشة مشت قبل ما تعتذرلي ازاي !
ميرنا ردت عليه: متزعلش يا كوكو انا هخليها تعتذرلنا احنا الاتنين.
شريف زفر بغيظ وقال: اللهم طولك ياروح.. الله يسامحك يا عامر انت اللي دبستني التدبيسه دي!!
ومسك تليفونه وطلب عربيه وميرنا كانت واقفه تحرك رجليها بعصبيه وغضب من عامر.
....
في عربية امجد.
البنات كانوا بيتكلموا ورا على ميرنا والشاب صاحبها اللي كان معاها وكانوا بيضحكوا ويتريقوا عليهم وآيات كانت قاعده قدام ساكته وشارده في خطيب البنت اللي نظراته ليها كانت غريبه وكان جواها إحساس غريب وكأنها تعرفه من سنين.
امجد بص ل آيات لانها كانت ساكته ومش بتشارك البنات في الحديث وسألها: آيات انتي كويسه؟ حاسه انك تعبانه؟
دي كانت اول مرة آيات تتكلم مع امجد من يوم ما اشتغلت في شركته وكانت محروجة ومتوتره جدا وردت بخجل: الحمدلله يا باشمهندس انا كويسه.
اتكلمت نغم: معلش يا باشمهندس اصل آيات كانت نايمه وقت اللي حصل وصحت مفزوعه.
البنات ضحكوا وآيات نطقت اسمها بتحذير: نغممم.
نغم سكتت واتكلمت هدير وهي بتضحك: بجد اللي حصل الليلة دي عمري ما هنساه.
وبصت ل هاجر بحزن وقالتلها: اللي مزعلني ان عربية جوجو اتخبطت.. واللي مضايقني اكتر ان البنت المغروره دي مشيت من غير ما تدفع حتى تمن تصليح العربية.
رد عليها امجد: هي مش هتدفع تمن تصليح العربية لان هاجر هيجيلها عربية جديدة.
هاجر بسعادة: بجد يا ابيه؟!
امجد بثقة: بكره ان شاء الله انزلي اختاري العربيه اللي تعجبك!
ردت سلمى بضيق: بس المفروض البنت التانيه دي هي اللي غلطانه وهي اللي تتدفع حق العربية الجديدة عشان تتأدب.
امجد: خطيب البنت دي يبقى صاحبي وهو شخص محترم جدا ومستعد يدفع اي تعويض نطلبه.. لو مكانتش البنت دي مخطوبه ل عامر الجارحى انا كنت اتصرفت معاها.
الاسم لفت انتباه آيات اول لما سمعته.. قلبها دق بعنف وبصت ل امجد ونطقت الاسم بصدمة: هو اسمه عامر الجارحي؟
رد امجد بثقة: ايوا وهو شاب محترم جدا ومهندس وعنده شركه كبيرة ويعتبر من اكبر رجال الاعمال في البلد.. انا مش فاهم ازاي يخطب بنت مستهتره زي دي!
آيات بصت قدامها بصدمة لان كل المعلومات اللي قالها امجد عن خطيب البنت دي نفس المعلومات اللي عمها كان قايلها عن جوزها!!
البنات كانوا بيتكلموا مع بعض ورا ومش مركزين مع كلام امجد وآيات واسم عامر ملفتش انتباه حد غير آيات وكانت بتفكر جواها.. معقول يكون هو!!
وافتكرت نظراته ليها في القسم كانت غريبه وملفته وكانت مستغربه نظراته ومش فاهمه سببها!! همست لنفسها بصدمة وقالت: لا.. لا أكيد مش هو.. اكيد لا مش هو مش معقول!
رواية مكتوبة على إسمي بقلمي ملك إبراهيم.
أمجد وقف بعربيته قدام العمارة اللي البنات ساكنين فيها وعامر وقف بعربيته بعيد عنهم وهو مهتم يعرف هي عايشه فين ومع مين.
البنات نزلوا من العربية وآيات نزلت وشكروا امجد ودخلوا العمارة.
امجد اتحرك بعربيته واخته كانت قاعده جمبه بعد نزول البنات وعامر فضل واقف بعربيته شويه يبص علي العمارة وعقله رافض يستوعب انه يقابلها ويعرف مكانها بالصدفه الغريبه دي.
نزل من العربية وقرب من بواب العمارة اللي كان قاعد قدام العمارة بيشرب الشاي بتاعه.
عامر: مساء الخير ياريس.
البواب قام و رد: مساء الخير يا باشا أؤمرني.
عامر حط في ايد البواب فلوس وقاله: البنات اللي لسه طالعين دلوقتي دول ساكنين هنا في العمارة؟
البواب بص في الفلوس بسعادة وقال: بس ده كتير اوي يا باشا.. اه ساكنين هنا.
عامر: ساكنين مع مين يعني اهاليهم هنا في العمارة؟
رد البواب: لا يا بيه دول بنات في الجامعة وجاين من بلدهم عشان يدرسوا وساكنين مع بعض في شقة هنا.. بس كلهم بنات محترمين يا بيه واهاليهم ناس محترمين وموصيني عليهم.
عامر هز راسه بتفهم وسأله: طب انت تعرفهم كويس يعني وتعرف اهاليهم؟
رد البواب: اعرفهم يا بيه بس فيهم بنت معرفهاش لانها لسه جايه ساكنه معاهم من شهرين كده او آكتر بس الشهادة لله اخلاقها من اخلاقهم وشكلها محترمة وبنت ناس.. بس هي بتشتغل.
عامر بص قدامه بتفكير.. كل حاجة بتثبت انها هي.. جت هنا من حوالي شهرين ودي نفس الفترة اللي هربت فيها من اهلها عشان تدور عليه! بص للبواب وسأله: متعرفش هي بتشتغل فين؟
البواب: معرفش يا بيه بس هي بتنزل لشغلها كل يوم الساعة 7 الصبح بالظبط.
عامر هز راسه وشكر البواب ورجع ركب عربيته تاني.. كان محتار ومش عارف يعمل ايه.. يظهر فجأة كده في حياتها ويقولها انا جوزك! ولا يصبر لحد ما يجمع معلومات عنها ويتأكد اكتر.
اتحرك بعربيته وهو بيفكر فيها وشريف اتصل عليه وسأله: عامر انت فين؟ هو ايه اللي بيحصل؟
رد عامر: هقولك كل حاجة بكره في الشركة.. بس قولي روحت ميرنا؟
شريف بغيظ: روحتها هي وانثى البطريق.. ياساتر عليه!
عامر ضحك لما شريف قال كده لانه فكره ب آيات وشريف ابتسم وهو بيسمع ضحك عامر وقاله: بس بقولك ايه.. الواد كوكو ده مشكله.. انا كل ما افتكر اللي حصل في القسم اضحك.
عامر رد بشرود: اللي حصل في القسم النهاردة كان غريب وصدفة مش متوقعه ابدا.
شريف اعتقد ان عامر بيقصد مقابلتهم ل امجد وقاله: عندك حق مين كان يصدق اننا نقابل امجد نصار هناك والمشكله تطلع مع اخته كمان.
عامر مردش لانه كان بيفكر في آيات وشريف كمل كلامه وقال: بس بقولك ايه خالتي على اخرها منك وميرنا شكلها هتو لع الدنيا خلي بالك.
عامر بلا مباله: دا العادي يعني انا اتعودت خلاص.. انا راجع شقتي دلوقتي ونتقابل بكره في الشركة نكمل كلامنا.
شريف لاحظ ان عامر متغير وقال: تمام أشوفك بكره.
عامر قفل المكالمة وهو بيبص علي الطريق وصورة آيات في خياله مش بتغيب عنه.
بعد وقت وصل شقته ودخل الشقة بارهاق.. الشقة كانت واسعه وفاضيه والأضواء فيها خافته.. دخل اوضته وخلـ.ع الجاكيت بتاعه وقميصه ورماهم علي السرير باهمال.
اخد صورة آيات اللي معاه وبصلها وابتسم وقال: معقول انتي مراتي!!!
رواية مكتوبة على إسمي بقلمي ملك إبراهيم.
عند آيات في الشقة مع البنات..
غيرت هدومها واخدت شاور وقعدت في البلكونه وهي بتفكر في خطيب البنت واللي اسمه وكل المعلومات اللي عرفتها عنه بتشبه كل المعلومات اللي تعرفها عن جوزها.
قربت منها هدير وقعدت جمبها في البلكونه وقالتلها: عامله ايه دلوقتي يا آيات.؟
آيات: الحمدلله كويسه.
هدير بقلق: الحمدلله اننا بخير بعد اللي حصل النهاردة.. البنت المجنونه دي كانت هتضيعنا كلنا!.
آيات بصتلها وقالت بتردد: هدير انتي خدتي بالك من الكلام اللي الباشمهندس أمجد قاله عن خطيب البنت دي؟
هدير: اه ماله؟
آيات قامت وقفت من مكانها وهي مش عارفه تقول إيه وهدير قامت وقفت جمبها وسألتها: في ايه يا آيات؟
آيات بصتلها بعمق وقالت: الشاب خطيب البنت إسمه عامر الجارحى وبيشتغل مهندس ورجل اعمال وعنده شركات هنا.
هدير بعدم فهم: ااه وبعدين!!
آيات بارتباك: ركزي معايا يا هدير.. المعلومات دي مش بتفكرك ب حاجة ؟
هدير بصتلها وبدأت تفتكر كلام آيات عن الوصف اللي عمها قالهولها عن جوزها وبصت ل آيات بصدمة وقالت: يعني ايه! معقول هو نفسه جوزك!!
آيات بصدمة: مش عارفه يا هدير.. انا مصدومة من ساعة ما سمعت كلام الباشمهندس امجد عنه.. كل المعلومات اللي قالها عنه نفس اللي عمي قالهالي قبل ما اجي هنا.. نفس الاسم ونفس كل حاجة.
هدير بصت ل آيات بتفكير وافتكرت نظراته ليها في القسم وقالت: معقول يكون هو.. فعلا نظراته ليكي في القسم كانت غريبه وكأنه يعرفك او بيشبه عليكي!.
آيات بلخبطة: ماهو ده اللي محيرني وفي نفس الوقت هو اصلا ميعرفش شكلي ايه.. انتي عارفه انه لما اتجوزني انا كنت لسه صغيرة وهو اصلا مبصش عليا حتى ولا يعرف شكلي ايه!
هدير بتفكير: فعلا حاجة غريبه .. بس انا متأكده ان نظراته ليكي دي مكانتش طبيعيه ابدا والكل اخد باله! ممكن يكون بيشبه عليكي مثلا او حاسس انه شافك قبل كده!؟
آيات: الغريب ان انا كمان جوايا احساس غريب وكأني شوفته قبل كده بس مش قادرة احدد اذا هو ولا ولا.. انا المرة الوحيدة اللي شوفت فيها جوزي كانت يوم كتب الكتاب ومقدرتش اشوفه كويس!
هدير بحيرة وهي بتفكر معاها: الموضوع غريب ويحير فعلا.. بس بسيطه احنا نحاول نجمع عنه معلومات ونعرف اذا هو فعلا ولا!
آيات بحزن: انا خايفه اوي يا هدير ومش عارفه اعمل ايه.
هدير عشان تطمنها: متخافيش يا حبيبتي احنا كلنا معاكي وسواء طلع هو او مش هو انتي اصلا مش عايزة حاجة من جوزك ده غير انك تحددي معاه مصيرك وتشوفي هتكملوا ولا تطلقوا وكل واحد فيكم يكمل حياته!
آيات بقلق: مش عارفه لو طلع هو هعمل ايه ربنا يستر.
هدير: متقلقيش ان شاء الله خير.
رواية مكتوبة على إسمي بقلمي ملك إبراهيم.
في بيت امجد نصار.
هاجر كانت قاعده بتحكي ل مامتها إللي حصل معاها وهما بياكلوا وامجد كان قاعد شارد ومش بيشاركهم الحديث وكأنه في عالم تاني.
والدته لاحظت شروده وسألته: ايه يا أمجد ليه ساكت من وقت ما رجعتوا!؟
امجد فاق من شروده على صوت والدته وقال: مفيش يا امي بس كنت بفكر في حاجة..
وبص ل اخته وسألها باهتمام: كلمتي آيات تطمني عليها ؟
هاجر إستغربت سؤال اخوها عن آيات ووالدته بصتله بدهشة وامجد اتوتر وندم انه سألها بالطريقه المباشرة دي وقال: البنت كانت مجروحه في راسها ولازم نطمن عليها.. هي برضه موظفه عندي ويهمني اعرف حالتها ايه!
والدته كانت متابعه توتره بدهشة وهاجر ابتسمت وقالت: اطمن يا ابيه آيات كويسه والبنات معاها.
امجد هز راسه بالايجاب وقام وقف وقال بتوتر: تمام انا هطلع انام تصبحوا على خير.
امجد طلع على اوضته ووالدته بصت ل هاجر وسألتها: مين آيات دي! ؟
هاجر بعفويه: دي صحبتي اللي كانت ظروفها صعبة وطلبت من ابيه يشغلها عنده في الشركة.
والدتها بستغراب: واشمعنا يعني دي اللي امجد سأل عليها من بين كل صحباتك!؟
هاجر: معرفش يا ماما وبعدين ابيه قال قدامك لانها موظفه عنده!
والدتها بصتلها بتفكير وقالتلها: طب قومي يلا إطلعي نامي انتي كمان.
هاجر قامت وقفت وهي مستغربه كل الاسئلة اللي والدتها سألتها لها ووالدتها قعدت تفكر وهمست: وايه حكايتها آيات دي اللي شاغله تفكيرك يا امجد!!...
#الحلقة_14
هاجر قامت وقفت وهي مستغربه كل الاسئلة اللي والدتها سألتها لها ووالدتها قعدت تفكر وهمست: وايه حكايتها آيات دي اللي شاغله تفكيرك يا امجد!!
...
في الصباح .
آيات جهزت وراحت شغلها في شركة امجد.
وعامر صحى بدري ونزل علي شركته وهو عنده اصرار انه يعرف كل حاجة عن آيات النهاردة ويتأكد اذا هي مراته فعلا ولا لا رغم ان كل حاجة بتأكد انها مراته!
امجد صحى من النوم وهو لسه بيفكر في آيات ونزل فطر مع والدته قبل ما يروح شركته وكانت والدته متابعه شروده الغريب وقلبها كان حاسس ان البنت اللي سأل عليها امبارح هي اللي شاغله تفكيره.
....
في بيت عزيز وميسرة.
ميسرة دخلت تصحي ميرنا من النوم وقعدت جمبها علي السرير وقالتلها: ميرنا قومي.
ميرنا بنعاس: لسه بدري يا طنط انا نايمه متأخر!
ميسرة بإصرار: قومي باباكي سألني علي عربيتك ومعرفتش أقوله ايه.. انا معرفتش اتكلم معاكي إمبارح عشان باباكي ميعرفش حاجة ولما سألني عنك قولتله انك كنتي سهرانه مع عامر.
قامت ميرنا قعدت على السرير وقالت بغضب: عامر حرجني جدا إمبارح يا طنط وضيع حقي.. يارتني كنت كلمت بابا كان عرف يتعامل مع البنات البيئه دول.
ميسرة بهدوء: معلش يا حبيبتي بس فهميني هو عمل ايه؟
ميرنا: اتنازل عن حقي ومش بس كده دا كمان هيدفع تعويض للبنات البيئه دول ومش بعيد يشتري عربيه جديدة ل اخت صاحبه بدل اللي انا خبطها ويسيبني انا بقى من غير عربيه.
ميسرة: طب اهدي بس عشان باباك ميسمعكيش ويزعل من عامر آكتر وانا هقوله يشتريلك عربيه اخر موديل.
دخل عزيز وسمع اخر جملة ميسرة قالتها وقال: عربيتك فين يا ميرنا؟
ردت ميرنا بتوتر وهي بتبص ل ميسرة: عربيتي!!
ردت ميسرة بسرعه: عربيتها كان فيها مشكله وعامر اخدها يصلحها وقالها هيجيبلها عربية بدالها.
اتكلم عزيز بسخريه: وياترى الباشا ابنك ناوي يجيب لبنتي عربية بقيمتها ولا هيفكر ان احنا طمعانين فيه زي العادة.
ميسرة بتوتر: طمع ايه بس يا عزيز دا عامر بيحبك وبيحب ميرنا وعمره ما يستخسر فيها حاجة.
عزيز بجمود: هنشوف يا ميسرة..
وبص ل بنته وقالها: وانتى قومي البسي وروحيله الشركة خليه يجبلك العربية اللي تعجبك.
ميرنا هزت راسها بالايجاب وعزيز خرج من أوضة بنته ومسك تليفونه وبعت ل ميرنا رساله على تليفونها فيها صورة عربية غاليه جدا وكتبلها"اختاري العربية دي وصممي عليها وهاتي العقد بتاعها وانتي راجعه ومش عايز ميسرة تلاحظ اني بعتلك حاجة"
ميرنا فتحت الرساله وقرأتها وميسرة سألتها: ايه يا حبيبتي في حاجة؟
ميرنا بتوتر: لا ياطنط دي واحدة صحبتي بتطمن عليا.. هقوم انا البس واروح الشركة ل عامر.
ميسرة هزت راسها وقالتلها: البسي برحتك وانا هروح أشوف باباكى.
ميسرة خرجت وميرنا فتحت الرساله وبصت لصورة العربية باعجاب وقالت: واااو.. بابا ذوقه يجنن في العربيات.. انا فعلا استاهل عربية زي دي.
....
في شركة امجد.
امجد اول لما دخل الشركة كانت آيات واقفه هي وموظفة الاستقبال زميلتها وبيعملوا شغلهم زي كل يوم.
امجد قرب منهم وابتسم وقال: صباح الخير.
آيات بصتله وابتسمت و ردت هي وزميلتها باحترام.. اتكلم امجد معاها وهو بيبصلها اوي: عامله إيه النهاردة يا آيات؟
آيات بخجل: الحمد لله كويسه شكرا يا باشمهندس.
امجد: لو حاسه انك تعبانه خدي اجازة يومين وارتاحي في البيت ومتقلقيش الاجازة علي حساب الشركة.
آيات ابتسمت وقالت: شكرا يا باشمهندس انا الحمدلله بقيت احسن.
امجد: الحمدلله.
ابتسملها وطلع على مكتبه وخلود كانت بتبص ل آيات بستغراب وسألتها: هو ايه اللي حصل والباشمهندس امجد بيسألك انتي تعبانه ليه؟
آيات اتوترت وقالتلها: لان انا وهاجر اخته كنا خارجين امبارح وانا تعبت.
خلود بصتلها باهتمام وآيات اتوترت وقالتلها: خلينا نشوف شغلنا أحسن يا خلود.
خلود ابتسمت وركزت في شغلها وآيات كانت لسه بتفكر في الشاب اللي احساسها بيقولها انه جوزها وبتفكر ازاي تتأكد.
رواية مكتوبة على إسمي بقلمي ملك إبراهيم.
في شركة الجارحى.
عامر كان في مكتبه وكلم واحد من رجالته وطلب منه يجمعله معلومات كاملة عن البنات اللي عايشين في الشقة وبعتله عنوان الشقة بالتفصيل.
دخل شريف غرفة مكتب عامر واتكلم بفضول: عامر انت جاي الشركة النهاردة بدري عن ميعادك صح ؟
عامر: صح يا شريف.. انا اصلا منمتش طول الليل.
شريف بقلق: ليه كده.. بسبب اللي حصل إمبارح ؟
عامر: لا في حاجة تانيه.
شريف بقلق: في ايه قلقتني؟
عامر بص ل شريف وقاله: لقيتها.
شريف: هي ايه؟
عامر: مراتي.
شريف بصله بصدمة وسأله بدهشة: لقيتها فين وإزاي ؟!
عامر بصله وخرج صورة آيات إللي محتفظ بيها معاه وحطها قدام شريف.
شريف بص في الصورة واستغرب لأنها كانت نفس البنت المحجبه اللي شافها في القسم إمبارح.. بص ل عامر بصدمة وفي اللحظة دي فهم سبب نظرات عامر ليها في القسم إمبارح!
شريف بدهشة: هي نفس البنت بتاع إمبارح ؟
عامر هز راسه وقال: كل حاجة بتأكد انها هي.. صورتها.. آسمها.. ظروف وجودها هنا في القاهرة.. كل حاجة.
شريف بصله بدهشة: وانت ناوي علي ايه دلوقتي؟
رد عامر: انا بجمع معلومات كاملة عنها وعن البنات اللي عايشين معاها واول لما المعلومات دي توصل هقرر اعمل ايه.
شريف بتردد: قصدي يعني.. انت هتطلقها؟
دخلت ميرنا في نفس اللحظة وسمعت كلمة شريف الاخيرة...
ميرنا بصدمة: يطلق مين؟
عامر وشريف بصوا ل ميرنا بصدمة وميرنا قربت منهم بخطوات بطيئه وقالت بفضول: انتوا كنتوا بتتكلموا عن مين! ؟
شريف قام وقف وقالها: كنا بنتكلم عن واحد صاحبنا اتجوز من فترة وفي مشاكل بينه وبين مراته...
ميرنا بصتله بفضول وقالت: وبعدين؟
شريف بص ل عامر وقال: صاحبنا ده واقع في ورطه دلوقتي وانا كنت بحكي ل عامر عن مشكلته.
عامر قام وقف وقاله: روح شوف شغلك يا شريف وجهز نفسك عشان هتيجي معايا شركة امجد النهاردة.
شريف هز راسه بالايجاب وخرج من المكتب وعامر بص ل ميرنا وقالها: ايه اللي جابك دلوقتي يا ميرنا؟
ميرنا قعدت قدامه وقالت بدلع: طنط قالتلي انك هتشتريلي عربية جديدة بدل اللي اتخبطت.
عامر بغضب: عربية ايه اللي اشتريهالك وانتي اصلا انسانه مستهترة وكنتي هتضيعي حياة الناس بسبب تهورك.
وقعد على مكتبه وكمل كلامه : انتي تحمدي ربنا ان المشكله اللي انتي عملتيها دي طلعت مع حد انا اعرفه وقدرنا نحل الموضوع على طول.. لو كانت مع حد تاني كان زمانك في الحبس دلوقتي.
ميرنا بغضب: عامر انت ضيعت حقي إمبارح وانا مش هسمحلك تضيعلي حقي دلوقتي.. انت المسؤل تشتريلي عربية وطنط وعدتني.
عامر كان متعصب من برودها وعدم مبالاتها بالمصيبـ.ـه اللي كانت عملاها وقالها: مفيش عربيات يا ميرنا.. اللي تستحق العربية البنت اللي انتي خبطيلها عربيتها وكنتي هتضيعي حياتها هي واصحابها!
ميرنا وقفت وقالت بغضب: انا كنت متأكدة انك هتعمل كده.. وهعرف بابا وطنط ميسرة بكلامك ده.
عامر بصلها بغضب وهو كاتم غضب كبير جواه واول لما خرجت كسر كل إللي كان قدامه علي المكتب لانه كان حاسس بالعجز بسبب امه وكان نفسه يحاسب ميرنا وابوها علي كل اخطاءهم معاه بس والدته هي اللي ضغطه عليه وهتحمله مسؤلية فشل حياتها الزوجية لو حصل اي خلاف بينه وبين جوزها!
اول لما ميرنا خرجت من مكتب عامر اتصلت على باباها وقالتله كل الكلام اللي عامر قاله وعرفته برفض عامر انه يشتريلها عربية جديدة.
رواية مكتوبة على إسمي بقلمي ملك إبراهيم.
في مكتب شريف دخل عامر مكتبه وقاله بصوت غاضب: يلا هنروح شركة امجد دلوقتي.
شريف بستغراب: ايه اللي حصل شكلك مضايق؟
عامر: مفيش حاجة حصلت.. خلينا نروح شركة امجد دلوقتي.
شريف: انا برضه مش فاهم هنروح ل امجد شركته ليه.. انت اتفقت معاه انك متكفل بأي تعويض يطلبوه وهو متصلش ولا اتكلم!
عامر بص ل شريف وقاله: انا رايح شركة امجد عشان احاول اعرف منه اي معلومة عن آيات.
شريف ابتسم وقال: اااه قولتلي.
عامر هز راسه واتحرك قدام شريف وشريف خرج وراه.
....
بعد وقت في شركة امجد.
آيات كانت حاسه بصداع قوي من قلة النوم وكتر التفكير وحطت أيديها علي راسها وهي بتتألم وخلود بصتلها بقلق وسألتها: آيات انتي كويسه؟
آيات بتعب: حاسه بصداع جامد اوي يا خلود.
خلود: طب أقعد ارتاحي شويه وانا شغاله اهو متقلقيش.
آيات فعلا كانت تعبانه ومقدرش تعترض وقعدت تحت المكتب بتاع الاستقبال وهي حاطه أيديها علي راسها ومغمضة عينيها.
_ صباح الخير
قالها عامر بصوته المميز وهو واقف قدام خلود وآيات كانت لسه قاعدة تحت المكتب وشريف كان واقف جمب عامر.
ردت خلود الصباح بأبتسامة واتكلم عامر وقالها: انا المهندس عامر الجارحى.. ياريت تبلغي الباشمهندس امجد اني عايز اقابله.
آيات كانت مغمضة عينيها واول لما سمعت اسمه قامت بسرعه من تحت المكتب وفجأة صرخت اول لما راسها اتخبطت في طرف المكتب وهي بتقوم.
عامر اتفاجئ لما شافها بتطلع من تحت المكتب وصوت صرختها لما اتخبطت وحطت أيديها علي راسها مكان الخبطه وبتبصله بصدمة.
الاتنين بصوا لبعض بصدمة وشريف كان متابع إللي حصل وكان مركز مع نظرات آيات ل عامر.
عامر اتكلم معاها بدون ما يشعر وسألها بقلق: انتي كويسه؟
هزت راسها وهي بتتألم وقالت: اااااه.
عامر كتم ضحكته وقالها: ااااه دي وجع ولا كويسه؟
آيات وهي حاطه ايديها على راسها: مش عارفه.
اتكلمت خلود معاها: انتي صحيتي ليه نامي وهتبقي كويسه دلوقتي.
شريف ضحك وقال: احنا اسفين لو كنا ازعجناكم يعني وصحناكم من النوم.
ردت آيات بعفوية: لا عادي انا اصلا كنت صاحيه.
شريف ضحك وحس انها بنت عفويه جدا وعامر كان مركز معاها بطريقه ملفته للانتباه.. شريف هز عامر عشان يركز معاهم وقال ل خلود: احنا كنا عايزين الباشمهندس امجد.
خلود: ااه انا اسفه جدا.. لحظة واحدة.
واتصلت علي مكتب امجد وقالت: المهندس عامر الجارحى عايز يقابل حضرتك.
آيات بصت ل خلود لما نطقت اسم عامر تاني قدامها ورجعت بصتله تاني ونفسها تسأله وتقول انت هو؟ وهو كمان كان نفسه يسألها نفس السؤال.
رد امجد على خلود وقالها: طبعا خليه يطلع بسرعه واي وقت الباشمهندس عامر يجي الشركة يدخل على طول.
خلود بصت ل عامر وقالت: اتفضل يا باشمهندس.
عامر كان واقف قدام آيات وبيبصوا لبعض ومش سامع صوت خلود وهي بتكلمه.
شريف قرب من عامر وقاله: يلا يا عامر نطلع.
عامر بصله وآيات لفت بجسمها عشان ميبصوش لبعض تاني وعامر طلع مع شريف وآيات قالت ل خلود انها هتروح الحمام وجريت علي الحمام وقفلت علي نفسها وفتحت المايه وبقت تغسل وشها وتهمس لنفسها: فوقي يا آيات.. اكيد مش هو انتي غلطانه.. دا واحد خاطب اكيد مش هو خليكي طبيعيه ومتتصرفيش اي تصرف تندمي عليه.
في الاسانسير.
شريف ضحك وقال ل عامر: ايه النظرات والتوهان اللي حصلك قدامها ده..؟
رد عامر بحيره: مش عارف يا شريف في حاجة بتحصل جوايا لما ببصلها!
شريف ابتسم وقال: بصراحة البنت شكلها عفويه جدا وكمان دمها خفيف.
عامر بصله بغضب وشريف قال وهو بيكتم ضحكته: ايه يا عم النظرة دي هتحرقني وأنا واقف دي مرات اخويا!
وكمل كلامه وقال: وتقريبا نفس الحاجة بتحصلها.. انا خدت بالي من نظراتها ليك والتوتر اللي كانت فيه اول لما شافتك.
عامر: تفتكر هي عرفاني؟
شريف: أكيد لو هي عارفه اسمك تبقى عرفتك! بس انا بأكدلك ان نظراتها وتوترها ده مكنش طبيعي ابدا وإحساسي بيقولي انها هي مراتك وشكلها عرفتك ومش متأكده زيك وخايفه تاخد خطوة.
عامر : يعني هي كده شغاله في شركة امجد..طب كويس كده سهلت علينا كتير.
شريف بصله وقاله: انت ناوي على ايه؟
عامر: هتعرف في مكتب امجد.
وصلوا مكتب امجد والسكرتيرة دخلتهم وامجد استقبلهم بترحاب شديد وقعدوا اتكلموا مع بعض كتير عن ايام الجامعة ومواقف كتير كانت بتجمعهم وعامر كان بيتكلم وعقله مشغول ب آيات واتكلم مع امجد بفضول وسأله: البنت المحجبه اللي كانت مع اختك في القسم إمبارح شوفناها وإحنا طالعين دلوقتي!
امجد: ااه.. آيات تبقى موظفه عندي وتبقى صحبة هاجر أختي.
شريف سأل أمجد عنها وهو بيبص ل عامر عشان امجد مياخدش باله ان عامر مهتم بالسؤال عن آيات: هي شغاله في الشركة بقالها كتير؟
أمجد: لا بقالها شهرين او تلاته بالكتير.
شريف وعامر بصوا لبعض وأمجد اتكلم مع عامر بنبرة عتاب: بس انا زعلان منك يا عامر.. كده تخطب ومتفكرش تعزم أصحابك!
عامر بصله وافتكر موضوع خطوبته وقاله: موضوع الخطوبه ده مكنش مترتبله وفيه شوية لخبطه كده!
امجد هز راسه بتفهم لانه شايف ان خطيبة عامر مش مناسبه له ابدا واحتفظ برأيه لنفسه حفاظا علي مشاعر صديقه وقال بنبرة مرحة: انتوا نورتوني في الشركة النهاردة.
عامر ابتسم وقاله: انا جيت عشان اعرف طلباتكم ايه وزي ما قولتلك انا مستعد لأي تعويض تطلبوه.
امجد ابتسم وقال: احنا مفيش بينا الكلام ده يا عامر.. انا قولت كده قدام خطيبتك إمبارح عشان اعرفها ان غلطها مش سهل لكن أختي انا هجبلها عربية جديدة هتفرح بيها وتنسى اللي حصل.
عامر: يبقى انا اللي اجيب العربية دي لانه حقها.
أمجد بإصرار: شكرا يا عامر وصدقني الموضوع مش مستاهل وكفايه انهم كانوا سبب اني اشوفكم.
عامر بص ل امجد بتفكير وقال: طب علي الاقل اهدي اصحابها بأي حاجة ويبقى اعتذار ليهم علي اللي حصل.
امجد ابتسم وقال: والله دي بقى حاجة ترجعلك.
عامر بصله وقال: كنت بفكر اني اقدملهم هدايا مميزة ويكون مكتوب عليها اسمائهم.
امجد بصله وقال: بصراحة انا معرفش اسمائهم.. معرفش غير آيات لانها موظفه عندي وباقي البنات أصحابهم معرفهمش بس ممكن اكلم هاجر اختي وأسألها.
عامر وشريف بصوا لبعض وامجد اتصل علي اخته وسألها عن أسماء البنات وهي قالتله على اسمائهم.
امجد كتبله اسمائهم وكتب اسم آيات معاهم.
آيات عرفان.
عامر اول لما شاف الأسماء وقرأ اسم آيات عرفان واتأكد انها هي مراته رجع ضهره ل ورا براحة وكأن كان في هم تقيل على قلبه وخف.
قام وقف هو وشريف وشكروا امجد ونزلوا في الاسانسير وشريف سأل عامر بفضول: ايه اتأكدت؟
عامر بسعادة: هي مراتي.
شريف ابتسم وقاله: طب وناوي على ايه؟... بقلمي ملك إبراهيم.
.. يتبع
تفتكروا عامر ناوي على ايه وايه الهدية اللي ممكن يجيبها ل آيات عشان يعرفها انها مراته 🤔😍 منتظرة رأيكم في التعليقات🌹 فين التفاعل القوي علي البارت شجعونى 🥺♥️
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
جميع الروايات كامله من هنا 👇 ❤️ 👇
اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇
❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺
تعليقات
إرسال تعليق