رواية الصقر المتمرد الحلقه الاولى والثانية بقلم الكاتبه إيمان جمال حصريه وجديده على مدونة النجم المتوهج للروايات والمعلومات
حلقتنا بتبتدي في ڤيلا الألفي، دا وقت الصبح خلاص يعني كله هيصحى بس هما لسة في الأوض
أوضة تقى وليلى (الاتنين مع بعض في نفس الأوضة)
ليلى دايما اللي بتصحى بدري ولازم تعمل دوشة في الأوضة وتصحي تقى
تقى بصتلها بغضب: يابنتي نفسي مرة تسبيني انام براحتي
ليلى واقفة وايديها في وسطها: قومي يا اختي عشان عندنا تمارين لازم نعمله ولا انتي نسيتي الخطة اللي ماشيين عليها
تقى قامت من السرير: لا مانستش ياختي ما انا اللي جبته لنفسي كان لازم يعني اقولك اننا نلعب تمارين كل يوم الصبح
ليلى طبعا لابسة ترنج رياضي عشان تنزل: بصي انا هسبقك على الجنينة
ليلى نزلت وسابتها واقفة وخرجت البلكونة بتتنفس هوا الصبح وغمضت عنيها وشعرها طاير في الهوا
في البلكونة اللي جمبها دي بلكونة اوضة آدم اللي متعود كل يوم الصبح يصحى بدري ويقعد يشرب قهوته فيها
آدم شافها
 |
صباح الخير
تقى فتحت عنيها وبصتله بإبتسامة جميلة: صباح الخير
آدم: صاحيين بدري يعني
تقى: هننزل نعمل شوية تمارين
آدم: امممم ودا من امتى بقى؟
تقى: انا قولت لازم نخس شوية
آدم ابتسم: بس انتي كدا جميلة
تقى ابتسمت بخجل: شكراً، انا هنزل بقى
تقى سابته ونزلت وهو واقف مكانه سرحان في جمالها اللي بيخطف قلبه على الرغم انها مش بشرة بيضا بس بشرتها البرونزية دي لوحدها جمال رهيب، وعيونها الخضرا
في أوضة صقر وناريمان
صقر صحي على صوت ناريمان وهي في الحمام بتستفرغ وقام مفزوع جري عليها
صقر سندها: حبيبتي انتي كويسة
ناريمان بصتله بتعب: شكلي خلاص ياصقر
صقر بغضب: قولتلك بلاش كلامك دا
صقر شالها وخرج بيها للسرير ونيمها عليه وقعد جمبها: لازم نروح نشوف الدكتورة النهاردة
ناريمان بصتله بدموع: هتقول نفس كلام كل مرة ان خلاص الايام اللي باقية قليلة
صقر بصلها بغضب: انتي ليه مصممة تتعبيني كل شوية بكلامك، انا قولتلك ان شاء الله ربنا مش هيتخلى عننا
ناريمان بإنهيار: انا عارفة اني خلاص ياصقر انا بموت
صقر بغضب وصوت عالي: كفاية بقى واتفضلي معايا نروح للدكتورة
في الأوضة اللي جمب صقر اوضة أخته فريدة وسمعت صوته وهو عالي وكلامه كان واضح واتكلمت بكل غل: يلا خليها تموت ونخلص منها والحمدلله انها مخلفتش عشان الورث
في اوضة علي، صحي ودخل الحمام يتوضى ويصلي ركعتين ومراته قاعدة على السرير بتبصله بإستغراب
علي: بتبصيلي كدا ليه؟
نادية: اللي يشوفك وانت بتصلي ومش بتسيب ولا فرض مايشوفكش وانت بتحقد على اخوك وجواك غل له
علي: اسمعي يانادية انا قولتلك قبل كدا مالكيش دعوة باللي بيني وبين صقر وانتي نفسك قولتيلي انك مش هتدخلي مابنا
نادية وقفت واتكلمت بهدوء: ياعلي صقر والله طيب والولاد كمان بيحبوه اوي وهو قريب منهم جداً اقرب منك ومني
علي: هو انتي فاكرة ان شويتين الطيبة اللي بيعملهم على ولادي دول هيدخلوا عليا لا، هو بيعمل كدا عشان الكل يكون في صفه ومعاه انا اللي فاهمه وعارفه بيفكر ازاي
نادية بصتله بيأس: براحتك ياعلي بس حاول تكسب اخوك قبل فوات الآوان
منه ومنال في اوضة واحدة رغم ان منال عاوزة اوضة مستقلة ليها ودا فعلاً اللي جدها بيعملوا الفترة دي
منه: منال انا هنزل للبنات تحت
منال: ماشي ياحبيبتي وانا هغير لبسي وانزل معاكم
منه نزلت للبنات اللي واقفين في الجنينة بيعملوا رياضة ووقفت تتمرن معاهم
ليلى: فين الهانم اختك؟
منه ضحكت: هتغير هدومها وتنزل
تقى: اجهزوا لتمارين اليوجا
منه: يووه مش كل يوم بقى مش هستحمل ساعة ساكتة
ليلى ضحكت: مش كل يوم تقولي كدا يلا
تقى لمحت صقر وناريمان خارجين وسرحت
منه بصتلها: انتي ياست هانم
تقى فاقت من سرحانها وبصتلها: نعم؟
منه: يلا عشان نخلص
قعدوا يعملوا اليوجا وصقر ومراته مشيوا
بعد حوالي نص ساعة الفطار كان جاهز على السفرة ومراد الألفي قاعد على اول الترابيزة
مراد بيبص لفريدة: فين الولاد؟
فريدة بغيظ: البنات مع الهانم تقى بارة في الجنينة
مراد بصلها بغضب: شيلي تقى من دماغك عشان ترتاحي
علي: ماهو يابابا باردوا انت مصمم من سنين انها تعيش معانا وهي اصلا مش من العيلة
مراد بغضب: اياك اسمع الكلام دا تاني
آدم قاعد وبصلهم: انا بجد مش عارف هي عملت فيكم ايه
فريدة بغضب: خليك انت كدا حنين
آدم قام وبص لجده: انا رايح شغلي ياجده
مراد: والفطار؟
آدم بص لأمه ولخاله: نفسي اتسدت
آدم سابهم وخرج والبنات دخلوا عشان يفطروا
مراد: يلا ياحلوين الفطار
تقى قربت منه وباست ايديه: صباح الخير
مراد: مجاتيش ليا ليه ذي كل يوم؟
تقى: صحينا بدري قولت اكيد حضرتك هتبقى لسة نايم
مراد بص لمنه وليلى ومنال: فين صقر
فريدة اللي ردت بس ردت بشماتة: راحوا للدكتورة اصل السنيورة مراته بتودع
ليلى بصتلها بحزن: على فكرة ياماما دي عمتي وكمان اخت جوزك يبقى ليه بتكرهيها اوي كدا
مراد اللي رد: معلش يابنتي امك الغل ماليها وعاميها عن حاجات كتير بس هيجي الوقت اللي تفهم وتعرف انها غلطانة هي وخالك بس ساعتها الآوان هيكون فات خلاص
تقى قعدت تفطر بس هي عارفة ان علي وفريدة مش بيحبوها ولا بيحبوا وجودها معاهم بس هي موجودة معاهم عشان خاطر مراد وبس لانه هو اللي مصمم على وجودها
مراد: راحين الجامعة؟
تقى: ايوا ياجدو
فريدة بصتلها برفع حاجب: جدك منين
مراد بغضب وصوت عالي: فريدة كلمة كمان وهتشوفي وش تاني
تقى بصتلها بحزن وقامت سابت الفطار وطلعت اوضتها
ليلى وقفت وبصت لأمها: نفسي مرة تحبيها وتعتبريها واحدة مننا، تقى مافيش اطيب منها
البنات قاموا ورا تقى عشان زعلوا عشانها وهي دخلت اوضتها وقعدت على السرير منهارة وبتعيط
منال: انتي يعني تايهة عن عمتو وكلامها
تقى بإنهيار: انا طلبت ان امشي من هنا وجدو اللي رفض كدا وانا بجد مش قادرة استحمل والله انا تعبت ونفسيتي تعبت
منه قعدت جمبها: احنا كلنا بنحبك وازاي هتسبينا وتمشي، انتي اختنا ياتقى
ليلى: انا اسفه ياتقى
تقى بصتلها: وانتي ذنبك ايه
ليلى: ذنبي انها امي وانا بجد مخنوقة من تصرفاتها ومش بس معاكي لا كمان مع خالو صقر
تقى مسحت دموعها: يلا نروح الجامعة عندنا محاضرات مهمة
ليلى حبت ترخم عليها: ايوا وعندنا كمان دكتور ماجد العاشق الولهان
تقى ضحكت غصب عنها: بطلي رخامة بقى
منال قعدت جمبها: ليه ماتوافقيش تتخطبيله؟
تقى: هو دكتور في الجامعة وانا بنت السواق والخدامة
منال بزعل: ليه شايفة نفسك قليلة انتي غالية اوي ياتقى، قيمة الانسان مش بعيلته ايه، قيمة الانسان بروحه وأدبه واحترامه لنفسه
تقى: بس انا مش عاوزة ارتبط بيه انا شايفاه دكتوري وبس
منال: يبقى بتحبي حد تاني
تقى بتوتر: لا حد تاني ايه بس يامنال
منال ابتسمت: هقولك نصيحة وانتي حرة تسمعيها ولا لا، انسي اللي في قلبك لانه مش شايف غيرها ومش حاسس بيكي انا زعلانة عليكي، حتى لو انتي عندك أمل فالأمل دا بعيد اوي ومش عشان شايفة نفسك قليلة لا عشان انتي عارفة انه مش بيفكر بالطريقة بتاعة بابا وعمتو
تقى بصتلها بتوتر: تقصدي ايه؟
منال: انا ذي اختك وعارفة انتي حاسة بإيه بس اعتبريني معرفتش اي حاجة وادي فرصة للدكتور ماجد
في الجامعة دكتور ماجد وصل الجامعة عشان عنده محاضرة مع دفعة تقى كمان ساعة وقعد في الكافتيريا يفطر (دكتور ماجد عنده 30 سنة بيحبها من اول يوم درسلها وهي شايفة اهتمامه بيها بس هي بتحب صقر، شاب وسيم جداً ومن عيلة كويسة وحالتهم المادية كويسة جداً، طويل وبيدخل الجامعة بيخطف الأنظار ولابس نضارة نظر وبشرته بيضا وشعره اسود غامق وسايح وعنيه لونها بني)
قاعد بيشرب قهوته وسعيد زميله جه قعد جمبه
سعيد: جاي بدري ليه؟
ماجد: أبداً لاقيت نفسي زهقان قولت اجي اشرب قهوتي هنا
سعيد: جاي باردوا عشان زهقان ولا عشانها
ماجد بصله واتكلم بتنهيدة: وحشاني ياسعيد ونفسي بجد اصارحها بمشاعري
سعيد: يعني ياماجد انت عاوز تفهمني انها مش حاسة بيك
ماجد: انا عارف انها حاسة بيا بس انا مش عاوز اضغط عليها وسايبها براحتها
سعيد: يبقى هتفضل واقف مكانك ومش هتتحرك
سعيد لمح تقى جايا من بعيد ومعاها ليلى: اهي جات
ماجد بص عليها وجايا من بعيد لابسة بنطلون چينز وعليه بلوزة بيضا وشعرها الاسود الطويل الناعم بيحركه الهوا ولابسة كوتشي ابيص وشايلة شنطة على ضهرها صغيرة لكتب الجامعة وحاجاتها اللي هتستخدمها وشايلة البالطوا الابيض وخصوصا انها في زراعة والبالطوا دا بيستعملوه في العملي وماشية تتكلم مع ليلى
سعيد: انا هسيبك عشان عندي محاضرة ربنا معاك
ليلى شافت ماجد بيبص عليها تقى: العاشق الولهان عينه عليكي
تقى: واخدة بالي بس مش هبص
ليلى: اديله فرصة ياتقى
تقى بحزن: مش قادرة ياليلى واسكتي بقى عشان هو جاي علينا اهو
ماجد قرب عليهم: صباح الخير
ليلى: صباح الخير يادكتور
ماجد بص لتقى: عاملة ايه؟
تقى: الحمدلله
ليلى حد من اصحابهم نده عليها ومشيت وسابتهم واقفين
ماجد: محتاج اتكلم معاكي شوية ممكن؟
تقى بتبص في ساعتها: فاضل نص ساعة على المحاضرة
ماجد ابتسم: عارف وبعدين دي محاضرتي يعني ماتقلقيش
تقى: ماشي
ماجد اخدها وقعدوا سوا في الكافتيريا
ماجد: تحبي تشربي ايه؟
تقى: أبداً مش عاوزة
ماجد طلب من جرسون الكافتيريا يجيب ليهم عصير برتقال
ماجد: ممكن تسمعي كلامي للآخر من غير ماتردي
تقى: حاضر
ماجد: احنا لسة في اول ترم في آخر سنة ليكي وهتتخرجي، فأنا عارف انك حاسة بمشاعري ليكي ياتقى وانا مش بضغط عليكي انا بس عاوزك تديني فرصة ومعاكي لآخر ترم في السنة وانا مستني رأيك
تقى بصتله: انا بس عاوزة اقول حاجة
ماجد: مش عاوز اسمع منك اي حاجة دلوقتي انا بس عاوز فرصة وصدقيني ياتقى لو حسيت انك مش قادرة هبعد لوحدي بس مش هعمل كدا غير في آخر السنة عشان اكون اديتك وقتك بس ممكن اطلب منك طلب؟
تقى: اتفضل
ماجد: ممكن لو اخد رقمك ابقى اطمن عليكي، محتاجك تعرفيني اكتر
تقى كانت مترددة تقبل ولا ترفض: سبني فرصة افكر بخصوص الرقم
ماجد ابتسم: حاضر
طبعاً العصير جه بس تقى قامت وراحت لصحابها
ليلى اول ماشفتها جايا عليها قربت منها: كان بيقولك ايه
تقى: هقولك بعدين يلا نحضر المحاضرة
صقر وناريمان عند الدكتورة، والدكتورة طلبت ان ناريمان يتركب ليها محاليل
صقر قاعد مع الدكتورة في اوضة الكشف بعيد عن ناريمان…….صقر: ايه الاخبار يادكتورة؟
الدكتورة بحزن: الاخبار ماطمنش خالص، الحالة بتسوء اكتر من الأول
صقر بدموع: طب مافيش اي حل؟
الدكتورة: انا قولت لحضرتك من الاول ان حالتها متأخرة وللأسف هنكمل كيماوي لحد مانشوف النتيجة ايه
صقر دموعه نزلت على حب عمره اللي بتموت ادامه ومش قادر يعملها حاجة: يعني فيه امل؟
الدكتورة بصت للأرض بحزن: مقدرش اوعدك بحاجة انا مش متأكدة منها، هي نفسيتها وحشة ودا بيأثر على الدوا
صقر: هي خلاص شايفة انها مش عايشة وان الايام بتعدي يوم ورا التاني وكلها مسألة وقت وبس
الدكتورة للأسف معتش عندها أي رد وصقر خرج من عندها راح الأوضة اللي فيها ناريمان بس قبل مايدخل مسح دموعه وبيحاول يتماسك
صقر دخل بإبتسامته: الدكتورة طمنتني
ناريمان: ماتحاولش تكدب عليا ياصقر انا عارفة كل حاجة وخلاص انا راضية باللي ربنا كاتبه ليا بس عاوزة اطلب منك طلب واعتبره اخر طلب هطلبه منك في حياتي
صقر: طلب ايه؟
ناريمان: انك تتجوز
#الحلقة_التانية
#الصقر_المتمرد
#بقلم_إيمان_جمال
#لؤلؤة_الكتابة
تقى طول المحاضرة وهي مش مركزة وبتفكر في كلام دكتور ماجد وبتكلم نفسها من غير صوت: وفيها ايه لما تديله وتدي لنفسك فرصة عشان تقربي من حد شايفك وعاوزك؟ طب لو عرف أصلي هيوافق يكمل ارتباطه بيا؟ يارب انا محتارة مش عارفة اعمل ايه، يارب إختارلي ولا تخيرني
المحاضرة انتهت وليلى ملاحظة سرحان تقى
ليلى: مالك؟
تقى: قولتلك هحكيلك بعدين بس انا محتاجة اعرف حاجة دلوقتي
ليلى: حاجة ايه دي؟
تقى: ازاي اقدر اجيب رقم دكتور ماجد
ليلى بصتلها باستغراب: رقم دكتور ماجد؟! طب ليه واشمعنا؟
تقى بدأت تحكي ليها عن الكلام اللي قاله ماجد وانها بتفكر تدي لنفسها وتديله فرصة
ليلى: انتي كدا بقى بدأتي تفكري صح لما بدأتي تفكري في نفسك وفي حياتك
تقى بصتلها بعيون مليانة حزن: خايفة اكون بختار غلط او ماشية طريق مش طريقي
ليلى: وليه ماتقوليش انك باللي انتي هتعمليه دا بتختاري الصح وبتفكري بالعقل
تقى: طب تفتكري لما يعرف أمي كانت شغالة ايه او ابويا كان شغال ايه هيوافق يرتبط بيا وهو دكتور جامعي؟
ليلى ردت عليها بإبتسامة: ببساطة دكتور ماجد من الواضح عليه انه مش بيفكر بالطريقة دي لانه دكتور جامعي وفاهم الحياة مش لسة عيل تافه
تقى: خايفة أوي ياليلى
ليلى: سلمي أمرك لربنا وقولي يارب وهو هيقف جمبك
تقى: يارب خليك جمبي
نيجي لناريمان وصقر، صقر قاعد ادامها بيبصلها باستغراب وصدمة
صقر: ايه اللي انتي بتقوليه دا ياناريمان؟
ناريمان بتعب: دا اللي لازم يحصل لو انت فعلاً بتحبني، انا هبقى مرتاحة وانا شايفاك مبسوط ومرتاح وعندك إبن من دمك
صقر: بس انا قولت مش عاوزه غير منك انتي وبس، وخلاص ربنا مش رايد دا يبقى انا هقول لا ليه، انا بحمد ربنا عليكي
ناريمان: ارجوك ياصقر دا آخر طلب ليا
صقر مسك ايديها وباسها ودموعه مغرقة وشه: بلاش كلام في الموضوع دا دلوقتي
ناريمان: عشان خاطري اوعدني انك هتعمل دا، وانك هتفكر فيه وانا كمان اللي هختارلك
صقر بصلها باستغراب: انتي كمان عارفة هتختاري ليا مين؟
ناريمان ابتسمت بتعب: مش بالظبط كدا بس انا اللي هختارلك
صقر محبش يزود في الكلام وسكت بس هو مش عاوز يعمل دا لانه مش هيقدر على كدا
مراد قاعد في محل العطارة بتاعه اللي بيعشق القاعدة فيه في حي السيدة زينب، وقاعد جمبه مختار صاحب عمره
مختار: هتفضل شايل الهم كدا لحد امتى؟
مراد بصله: مش عارف يامختار
مختار: طب هتعمل إيه مع صقر؟
مراد: انا عارف إبني كويس مش هيوافق بسهولة
مختار: طب انت فاتحته في موضوع الجواز دا؟
مراد: لا عشان خايف من ردة فعله، انا بس عاوز اشوفله إبن قبل ما اموت اشوف حفيدي ابن صقر ويكون سنده
مختار: سيبه هو اللي يقرر بنفسه يامراد
مراد: لو انا سبته ذي مابتقول يبقى مش هيعمل حاجة وهيفضل عايش حياته لوحده من غير سند
مختار: طب انت حاولت تتكلم مع مراته؟
مراد بصله بصدمة: ازاي دا؟ عاوني اروح اقول لبنت اخويا اللي هي مرات ابني عاوز اجوز ابني واحدة تانية غيرك؟
مختار: وفيها ايه يامراد، دلوقتي انت بتقولي ان حالتها الصحية بتسوء يوم عن يوم، يبقى لازم تتكلم معاها ولو هي بتحب صقر فعلاً ويهمها سعادته هتسمع كلامك وتعمل بيه
مراد تقريباً كدا اقتنع بكلام مختار وبدأ يفكر فيه
آدم قاعد في مكتبه بيشتغل ودخلت عليه السكرتيرة
وفاء: فيه واحد مستني حضرتك بارة؟
آدم: مين الواحد دا؟
وفاء لسة هترد بس هنا دخل الشخص دا اللي كان فريد صاحبه اللي مسافر من اول سنة في الجامعة كان بيدرس بارة: هو يعني مين يعرفك يا اخويا
آدم وقف بفرحة وجري عليه حضنه: فريد ايه دا انت نزلت مصر امتى
وفاء خرجت وقفت الباب، وفريد بيحضنه اوي: لسة واصل من يومين وحشتني اوي ياصاحبي
آدم: انت اللي وحشتني اوي تعالى اقعد واحكيلي عملت ايه
منال في شغلها اللي في مستشفى كبيرة وبتابع الحالات وهي دكتورة قلب، منال ماشية في الممر وجمبها الممرضة وبتشوف الملفات اللي في ايديها ومن غير ماتقصد خبطت في شخص ماشي
منال بصتله بغضب: مش تفتح يا اخ انت
احمد دكتور لسة منقول جديد وهي ماتعرفوش بس الأرخم بقى انه هيكون رئيسها😂 بصلها من فوق لتحت: انتي بتكلميني انا؟
منال بعصبية: يعني مش بس معندكش دم لا وكمان بارد
احمد بصلها بغضب: تطلعي مين انتي عشان تكلميني بالاسلوب دا
منال بصتله بغضب واضح: وانت مالك اطلع مين ولا ما اطلعش مين
منال سابته ومشيت من أدامه واقف بيغلي وراح لمكتب كبير الدكاترة
نيجي للڤيلا بقا، الكل كان موجود ماعدا صقر وناريمان كانوا لسة عند الدكتورة وبعد حوالي ساعة وصلوا الڤيلا
مراد: طمنوني ياولاد؟
ناريمان اللي ردت عليه بتعب: اطمن ياعمي انا كويسة
صقر واقف جمبها ساندها وبيبصلها بحزن
علي: الدكتورة قالتلكم ايه في جديد في حالتك؟
صقر بصله بغضب: وانت اصلا بتسأل ليه انت مالك
علي بغضب: انت ازاي تتكلم مع اخوك الكبير كدا
صقر بعصبية وبصوت عالي: انت لا يمكن تكون اخ، انت انسان حاقد وقلبك مليان غل وعاوز تشوفني بقع وبنكسر بس لا ياعلي عمري ماهقع ودايما هتلاقيني واقف على رجلي وقوي
البنات كلهم اتجمعوا وواقفين يشوفوا اللي بيحصل
فريدة: مافيش حاجة حصلت لعصبيتك دي ياصقر، علي مقالش حاجة لكل دا
صقر بصلها بحزن: كان نفسي تكون مكان امي وتكوني حنينة بس للأسف طلعتي ذيه ماتستاهليش تكوني حتى ام لاولادك
صقر اخد ناريمان وطلعوا اوضتهم والكل واقف مكانه تحت
جميلة قربت من ابوها: بابا اللي بيحصل دا ماينفعش لازم نشوف حل كدا اخواتي مش سايبين صقر في حاله
مراد بصلها بنظرات توهان: عندك حق يابنتي، اطلعي انتي ورا اخوكي وانا هتصرف
جميلة طلعت ورا صقر وناريمان تشوفهم لو عاوزين حاجة
جميلة: اخليهم يطلعوا الغدا ليكم هنا؟
ناريمان: مش قادرة أكل اي حاجة دلوقتي ياجميلة
صقر: اقعدي ياجميلة عاوز اتكلم معاكي
جميلة قعدت ومستنية تسمع صقر هيقول ايه: سمعاك اتكلم
صقر: اوعي تكوني ذيهم خليكي ذي ما انتي بريئة وطيبة، اوعي يغيروكي انتي الوحيدة اللي في اخواتي بتحبيني وعمرك ماكرهتيني ذيهم
جميلة: انا هفضل ذي ما انا ياصقر عشان انت اخويا، وهما الزمن هيعرفهم ان اللي هما فيه دا غفلة وهيفوقوا منها
ناريمان: يارب يفوقوا قبل فوات الآوان
جميلة: يارب، انا هسيبكم ترتاحوا شوية ولو احتاجتوا أي حاجة عرفوني بس
صقر باس راسها: ماشي ياحبيبتي
جميلة خرجت وصقر قعد جمب مراته اللي باين عليها التعب أوي وخلاص هي بتحاول تتماسك غصب عنها وكأنها بتحاول تعافر عشان بس تجوز صقر وبعد كدا تموت
في الأوضة عند تقى وليلى
ليلى: ناريمان باين عليها التعب اوي المرة دي
تقى: فعلاً ربنا يشفيها يارب
ليلى: ها ماقولتيش بقى هتوصلي لرقم دكتور ماجد ازاي؟
تقى: مش عارفة بس يعني لو انا مكتوبلي ان اوصله هوصله
ليلى وهي بتتكلم أصلاً كانت ماسكة تليفونها وفاتحة جروب واتس كدا خاص بمادة دكتور ماجد وبدور في الأرقام وبالصدفة شافت رقم دكتور ماجد، لان طبعاً احنا عارفين ان في اي جروب بيكون الرقم جمبه اسمه حتى لو مش متسجل على تليفون الشخص دا
ليلى بصتلها وضحكت: مكتوبلك ياقلبي
تقى بصتلها باستغراب: هو ايه دا؟!
ليلى قربت منها شوية: رقم دكتور ماجد انا لاقيته في شات المادة على الواتس، وبعتهولك كمان في رسالة
تقى مسكت تليفونها وشافت فعلاً الرقم وليلى سابتها وخرجت بارة، بس تقى كانت مترددة أوي تكلمه وقعدت تفكر ترن ولا لا بس في النهاية فضلت عند ترددها ومارنتش عليه
اما بالنسبة لدكتور ماجد فهو أصلاً معاه رقمها بس من شئون الطلاب بس مش عاوز يضغط عليها او يرن هو وسايبها تاخد قراها بنفسها من غير اضغط او تكون مجبورة على انها تعمل حاجة غصب عنها
مراد كان محتاج يتكلم مع ناريمان في الكلام اللي قالوا مختار واستنى ان صقر ينزل يقعد تحت وبعد نزول صقر بشوية دخل مراد الأوضة عند ناريمان
ناريمان ابتسمت بتعب: تعالى ياعمي
مراد قعد قصادها على الكرسي اللي جمب سريرها: عاملة ايه دلوقتي؟
ناريمان: مش كويسة بس هبقى كويسة لو نفذت اللي في دماغي
مراد بصلها: ايه اللي في دماغك؟
ناريمان: انا كنت هكلم حضرتك عشان كنت عاوزة اتكلم معاك بخصوص موضوع كدا
مراد بعدم فهم: موضوع ايه انا مش فاهم حاجة
ناريمان: انا عاوزة صقر يتجوز ياعمي
مراد اتفاجئ بكلامها وبصلها بنظرات وكأنه بيقولها أخدتي الكلام من على لساني…..ناريمان فهمت من نظراته ان دا اللي هو كمان عاوزه: انا عارفة ان حضرتك ياعمي نفسك تشوف إبن صقر وتفرح بحفيدك منه، وانا عارفة ان انا مش هقدر اعمل دا ولا هقدر احقق دا فبحاول ان اعمل اي حاجة تسعده وبعدها همشي من الدنيا خالص
مراد بحزن: ماتقوليش كدا يابنتي ان شاء الله هتبقي كويسه
ناريمان: كويسة ازاي بس ياعمي، لو انتو شايفين حالتي وبتحاولوا تهونوا عليا فأنا شايفة ومتأكدة باللي بقوله وباللي شايفاه وحساه، انا خلاص ايامي معدودة وبتنتهي تماما
مراد كان لسة هيرد بس هي قاطعته….ناريمان: اسمعني ياعمي للآخر، انا طلبت من صقر انه يتجوز بس هو رفض وطبعا عشان حبه ليا، بس هو لو عمل كدا والله هبقى مرتاحة ومبسوطة عشان هيحقق اللي هو بيحلم بيه من سنين، فعشان خاطري ياعمي ساعدني نعمل دا
مراد مسك ايديها بحنان أب: يصعب عليا اخد قرار ذي دا معاكي يابنتي
ناريمان دموعها نزلت: ماهو مش سهل عليا باردوا ياعمي بس كل اللي يهمني ان اسيبه في الدنيا دي فرحان وسعيد حتى لو مع غيري
مراد حزين على بنت أخوه أوي بس مش في ايده حاجة يعملها……ناريمان: انا قولتله ان انا اللي هختارله العروسة
مراد: يعني انتي عارفة هتختاري مين؟
ناريمان لسة هترد بس تقى دخلت وهنا ناريمان بصت لمراد: دلوقتي اجابتي وصلت لخضرتك
مراد بصلها بإنه مش فاهم بس اخد باله من نظراتها لتقى وبص لتقى اللي واقفة عند الباب ورجع بص لناريمان باستغراب وهي هزت دماغها وابتسمت بإنها بتقوله ايوا
تقى مشيت خطوتين: عاملة ايه دلوقتي؟
ناريمان بابتسامة: الحمدلله بقيت أحسن
تقى: يارب دايما تكوني في احسن حال، احب اجيبلك الأكل
ناريمان: لا ياحبيبتي انا مش عاوزة دلوقتي مستنية معاد الدوا بس
مراد قاعد بيحاول يستوعب اللي بيحصل واللي بتفكر فيه ناريمان وبيكلم نفسه من غير صوت: معقولة ياناريمان فكرتي في اللي انا فكرت فيه؟ طب ازاي معقولة دي؟…..مراد بص لتقى أوي: طب وصقر هيوافق انا عارف انه بيعتبرها واحدة مننا بس ياترى هيوافق انها تكون مراته؟ طب دا باردوا ازاي او هيحصل ازاي؟
تقى بصتله: انت كويس ياجدو؟
(هي بتقوله ياجدو مش ياعمي عشان احفاده من دورها فهي اتعودت على كدا)
مراد وقف: ايوا كويس يابنتي يلا هسيبكم لوحدكم
مراد خرج وسابهم وهي قعدت مكانه قصاد ناريمان
ناريمان بصتلها: انتي جميلة اوي ياتقى
تقى ابتسمت: بس مش أجمل منك
ناريمان ابتسمت: بالعكس لونك جميل اوي تعرفي ان بحب اوي البشرة البرونزية بيكون ليها سحر خاص كدا وجمال مش عند حد
تقى: انتي اللي عيونك جميلة عشان كدا شايفاني جميلة
ناريمان: عاوزة أسألك سؤال
تقى: اكيد اتفضلي
ناريمان: انتي في حياتك حد؟
تقى استغربت من سؤالها: ليه سألتيني سؤال ذي دا؟
ناريمان: عادي بدردش معاكي
تقى ابتسمت: ماشي، عالعموم لا
ناريمان: طب ليه؟
تقى: مين هيوافق يرتبط بواحدة امها كانت خدامة وابوها كان سواق
ناريمان: ليه دايما بتقولي كدا ليه دايما شايفة نفسك قليلة ليه حاطة نفسك جوا مكانة صغيرة اوي عليكي
تقى بحزن: عشان هي دي فعلاً مكانتي
ناريمان: لا ياتقى الانسان مش بأمه كانت بتشتغل ايه او ابوه بالعكس الانسان بطبعه وأدبه واحترامه وسمعته
تقى: محدش دلوقتي بيفكر كدا، الكل دلوقتي بيفكر في زوجة تشيل اسمه وتكون ام لاولاده يفتخر بيها ادام الناس
ناريمان: انتي ماشاء الله عليكي انتي زوجة يفتخر بيها اي حد
تقى: يمكن دا من نظرك لكن نظر المجتمع والناس لا
ناريمان: صدقيني في ناس كتير مش بتفكر بالطريقة اللي بتقولي عليها دي
تقى: اهي الناس دي اللي ذيي، اللي هيكونوا نفس حياتي واهلهم ذي اهلي
ناريمان: لا ياتقى بالعكس هتلاقي انسان يحبك ذي ما انتي وتكوني حياته
تقى: ما افتكرش
تقى قامت وقفت: انا هقوم بقى عشان صدعتك يلا اسيبك ترتاحي
تقى خرجت وناريمان قاعدة بتفكر ازاي هتقول لصقر على اللي هي بتفكر فيه
تقى بعد ماخرجت من اوضة ناريمان قالت هتنزل تحت تقعد مع الباقيين، وهي نازلة من على السلم كانت سرحانة في كلام ناريمان وليه هي سألتها السؤال دا دلوقتي وعشان إيه وما أخدتش بالها باللي طالع على السلم، تقى مكانتش مركزة في خطواتها ورجلها اتنت وكانت هتقع بس ايد صقر كانت الأسرع ولحقها قبل ماتقع، تقى اتفاجأت بإن هو اللي مسكها و سرحت في عيونه اللي مش بتقدر تبصلها من قرب اوي كدا
الحلقة خلصت ياترى هيحصل ايه؟
يتبع
❤️🌺❤️💙🌺❤️💙🌺❤️💙🌺❤️💙🌺❤️💙🌺
الروايات الكامله والحصريه من هنا
انضموا معنا على تليجرام ليصلكم اشعار بالروايات فور نزولها من هنا
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺
اتفضلوا حضراتكم كملوا معنا هنا 👇 ❤️ 👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺
