قيس بن الملوح في وسط البلد بقلم دينا جمال حصريه وجديده على مدونة النجم المتوهج للروايات والمعلومات

 قيس بن الملوح في وسط البلد بقلم دينا جمال حصريه وجديده على مدونة النجم المتوهج للروايات والمعلومات 

كريم وعماد شابين في سنة تالتة كلية آداب جامعة القاهرة تحديدا قسم اللغة العربية

كريم شاب حالم عاشق لليلى زميلتهم في نفس الدفعة ، أما عماد فأبسط ما يتقال عليه أنه كاره للحب بشكل عام وللمشاعر السخيفة على حسب تعبيره 

"في أوضة كريم "

رمى عماد الموبايل على السرير وهو بيزعق فيه بعلو صوته :

-يا ابني بقى بطل ندب صدعتني ، ليلى ليلى ليلى ، ما خلاص يا عم قيس

اتحرك كريم ناحية عماد وقعد قدامه مسح وشه بكف يده وخد نفس عميق وملا الحزن صوته وهو بيقوله :

- هتجنن يا عماد مش مدياني وش خالص ، وبتحب الواد المُعيد الملزق دا عشان قال إيه شاعر وبيكتب شعر وندوات وهو هتلاقيه سارق الشعر دا أساسًا من موقع فتكات

ضحك عماد ومد أيده وخد موبايله قبل ما يتريق على ليلى :

- أول بنت في العالم بتتثبت بالشعر ، دي كائن فضائي ، البنات بتتثبت بالهدايا الدباديب ، الكريب الشاورما ، وجبة بروستد ، إنما أقولها أن قلبي لمخبري ، يا حبيبي اللي بيمشي ورا قلبه بيتهدول على وشه 

سكت كريم وهو حزين ما عندوش كلام يقوله ، أما عماد فكان متضايق جداا على حال صاحبه ، ما بين منشور والتاني على فيس بوك وقعت عينيه على بوست خلاه ينفجر في الضحك ، بص لكريم وقال يضحكه معاه :

- بص يا كيمو الهبل دا ، بيقولك إيه بقى ، أنك ممكن تحضر روح أي واحد ميت ويبقى خادم ليك وحاطين الطريقة ، قوم حضر قيس بن الملوح اللي شيلت مادته وهو يساعدك 

بعد لحظات اختفت ضحكات عماد لما كريم شد منه الموبايل وركز جامد مع اللي مكتوب وبدأ يتحرك في الأوضة ويجيب شمع وورق وكبريت وقلم أحمر ، هنا عماد قام من مكانه يتريق عليه : 

- أنت اتهبلت يا كريم ، هو أنت فاكر فعلا أنك هتعرف تحضر عفريت ، كان العفريت نفع نفسه ، اتهد يا كريم وهات الموبايل

ولكن دا ما حصلش قعد كريم على الأرض وبدأ يكتب على الورقة اللي قدامه الحروف اللي موجودة في البوست ، ويرسم النجوم والدواير والمثلثات زي ما مطلوب وولع شمعة ووقفها في نص الورقة وغمض عينيه وبدأ يتكلم بصوت هامس ، وعماد بيزعق فيه :

- أنت يا زفت ، هنتلبس وهيطلع العفريت يعاملنا معاملة الجواري ، هيطلع يقولي ارقصلي ، يا ابني بطل برمطة بتقول ايييه 

كريم فضل مكمل عماد لاحظ أن كريم بدأ العرق يملا جبينه ويزيد أكتر وأكتر ، ولهب الشمعة نوره بيقل لحد ما الشمعة اتطفت تماما ، هنا اتحرك عماد بسرعة ناحية النور وشغله وهو بيزعق في كريم :

- خلاص حضرت ، قوم يا زفت من على الأرض ولم الكركبة دي أمك لو دخلت هتهزقك ، ما ترد عليا يلا 

لف عماد راسه ناحية كريم لقاه واقف مستغرب وعمال يبص حواليه وهو مذهول ، اتحرك ناحيته بيسأله :

- إيه مالك حضرت عفريت جابلك فقدان في الذاكرة ، ما ترد عليا يا كريم بدل ما أهزقك

بس اللي حصل فضل يبص حواليه وهو مستغرب وكأنه بيشوف المكان لأول مرة اتحرك ناحية المراية وبدأ يبص على انعكاسه ، رفع أيده وحطها على وشه ، فجحظت عينيه رجع لورا يبص حواليه ، ركز مع عماد وهو بيسأله :

- أين أنا ؟ ومن أنت ؟ ، وأين ليلى ؟

عماد كان متأكد أنه مقلب من كريم ، اتحرك ناحيته وهو بيتريق عليه :

- إيه عفريت نزلك سوفت وير جديد ، كريم ما تحاولش ، هابطة منك أوي ، واخلص عشان ننزل على القهوة شوية

ولكن كريم فضل يبصله باستغراب وبعدين أتكلم بصوت حاد :

- من كريم هذا ؟ أنا قيس ، قيس بن الملوح ، أين ليلى العامرية ، أين ليلى القلب ، أين ليلاي يا هذا 

هنا عماد فعلا بدأ يتوتر بس لسه شاكك أن كريم بيعمل فيه مقلب فبدأ يهدده :

- كريم لو طلع مقلب هقطع علاقتي بيك وأنت عارف أن أنا كلمتي واحدة ، وهروح أفضحك في الكلية وأقول أنك بتحب ليلى 

ظن عماد أن كريم هيعترف أنه مقلب لما اتحرك ناحيته بسرعة ومسك أيده وصوته علي :

- ليلى ، أين ليلى القلب ، أتعرف أين هي ، أتعرف أين ديارها ، زوجها أبيها لورد بني ثقيف ، خذني إليها ولكِ مني ما تريد ، أين نحن ؟ ، لمَ المكان غريب ؟! 

اتحرك كريم بسرعة ناحية المراية يشارو عليها وهو بيقول :

- من هذا؟ ، من ينظر إلينا ؟ ، وكيف يفعل ذلك؟ ، أرجوك أجبني أين ليلى ، ماذا تفعل ؟ أجننت ؟

حط عماد ايديه فوق دماغه قبل ما يصوت في وش كريم : 

- هعقب من الصدمة ، حضرت قيس بجد يا كريم ، قيس لبسك يا كريم ، طب اصرفه إزاي ، أوديك عند دجال ، ولا أوديك ساقية الصاوي ولا نروح لهشام الجخ يعزم عليه 

وقبل ما كريم ينطق اتفتح باب الأوضة وظهرت والدة كريم بتقوله وهي غضبانة :

- كريم أنت لسه ما نزلتش ، أنا مش قولتلك روح بيت عمتك هاتلي الجمعية ، اخلص يا كريم بدل ما أقول لأبوك ، ولا فالح بس تحبلي في البت اللي اسمها ليلى 

جري كريم ناحية والدته لما سمع منها اسم ليلى :

- ليلى القلب ، ليلاي ، أين هي ، أين ديارها ، سرقها مني ورد ، سيلتهمها كما يلتهم الذئب الشاه 

والدة كريم رقعت بالصوت وخرجت للصالة وهي بتصوت :

 - يالهوي يالهوي يالهوي ، الحقني يا أبو كريم ، ابنك اتجنن وبيقول كلام زي اللي بيقولوه الكفار في الافلام بتاعت زمان يا أخويا ، الواد مخه اتلحس ، يا حسرتك على خلفتك يا سعااااد 

يتبع

🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺

اتفضلوا حضراتكم كملوا معنا هنا 👇 ❤️ 👇 

أجدد وأحدث الروايات من هنا

روايات كامله وحصريه من هنا

وكمان اروع الروايات هنا 👇

روايات جديده وكامله من هنا

انضموا معنا على تليجرام ليصلكم اشعار بالروايات فور نزولها من هنااااااااا

🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺