رواية ليه يازمن الفصل 26/27/28/29/30 بقلم نسرين بلعجيلي Nisrine Bellaajili حصريه وجديده على مدونة النجم المتوهج
 |
الفصل 26
سماح بقت كويسة والدكتور كتب لها علي خروج من المستشفى
نوال فكرت ان المعلم هايجي ياخدها
لاقت كريم دخل الأوضه
نوال: فين ابوك؟
كريم : مش فاضي عنده شغل
نوال: اه ما احنا آخر تفكيره
كريم : ماينفعش الكلام ده قدامها
نوال: خليها تسمع وتعرف قيمتها عند ابوها
كريم بعصبيه
كريم : إنت ايه ؟ ليه كده ؟ حرام عليكي انتي عارفه الدكتور قال نبعدها عن أي ضغط عصبي
نوال: قول لابوك الكلام ده مش ليا
انا خلصت يلا قومي خلينا نروح انا جتتي نحست من النومه علي الكرسي وفي الآخر تقولوا عليا إني مش ام ساعد اختك تقوم ولا انت شاطر تساعد بس فرح
الا صحيح مالها ما جاتش تشوف اختك ولا هي لسه عروسه ممنوع تزور حد في المستشفى
سماح: كفايه بقي ارحميني من الصبح وانتي مش سايبه حد في حاله مافيش حاجه بتعجبك لازم تتكلمي علي كل حاجه انا اتخنقت منك ومن اسلوبك وانتي السبب اني عايزه اموت
نوال: بقي كده هو دة اللي استاهله منك من ساعة ما اتنيلتي انتحرتي وانا قاعده معاكي تقوليلي كده؟
سماح : انت مش قاعده معايا علشان سواد عيوني ولا خايفه عليا انتي هنا علشان الكل يقول انك ام كويسه ويمكن المعلم بتاعك يرجعك لذمته
يلا بينا يا كريم انا تعبت
كريم مكانش عاجبه اسلوب امه في الكلام ولا الحاله اللي وصلت ليها اخته
اخدوا اوبر وراحوا علي الحاره
نزلت سماح وهي مش عايزه تشوف حد طلعت علي طول شقتهم فتح لها كريم الباب وقفت مش عارفه تروح فين
كريم: تعالي ارتاحي في اوضتي
أما نوال راحت علي اوضتها وهي متنرفزه ان المعلم معبرهاش ولا سأل فيها
رحمه و فكريه طلعوا عندهم و رحمه خبطت علي الباب
فتحت لهم الشغاله
الشغاله: اهلا وسهلا ياست رحمه يا خطوه عزيزه اتفضلي
رحمه: يزيد فضلك نوال فين ؟
الشغاله : من ساعة ما رجعت دخلت اوضتها بتستحمي
كريم سمع صوتهم و طلع لهم بره
كريم : إزيك يا أمي عامله ايه؟
رحمه: الحمدلله حمدالله علي سلامه اختك
كريم : الله يسلمك إزيك يا عمتو
فكريه: الحمدالله يابني اختك فين؟
كريم: نايمه في اوضتي خافت تدخل اوضتها وتفتكر اللي حصل
رحمه: طيب شكلنا جينا في وقت مش مناسب خلينا ننزل ونبقي نيجي في وقت تاني
فكريه : يلا بينا على مشوارنا
رحمه: ابقي قول لامك اننا جينا
فتحت الباب نوال وهي لابسه عبايه بيتي ولفه شعرها بفوطه
نوال: انا جيت اهه مشوار ايه اللي انتم رايحينه ده؟
فكريه : يا ساتر يارب انت ودانك ايه سمعتينا ازاي؟
نوال: حكمه ربنا بقي بيفضحكم قدامي
رحمه: فضيحة ايه يا نوال استهدي بالله
نوال: اكيد رايحين تخطبوا للمعلم انتي يا رحمه معنديكيش كرامه ولا قلب راضيه انه يجيب عليكي ضره أما أنا فلا كرامتي فوق اي حاجه
فكريه: اهو طلقك يا ام كرامه يلا بينا يا رحمه
نوال : مسيره يرجعني مايقدرش يستغني عني
فكريه: دا عشم ابليس في الجنه
رحمه: بس يا فكريه يالا نمشي
نوال: ما انا لازم اعرف رايحين علي فين؟
رحمه: رايحين نخطب لعلي استريحتي دلوقتي
نوال: يا الف مبروك مين العروسه ؟
رحمه: زهره بنت فاطمه
نوال: فاطمه مين؟
رحمه: فاطمه اللي بتيجي تساعدني
نوال: يا لهوي عايزه تجوزي الافوكاتو علي لزهره بنت الشغاله؟؟
فكريه: ومالها الشغاله ؟
نوال: الناس مقامات برضه ماينفعش اهو دا اللي ناقص بنت الشغاله تعمل رأسها براسنا حتت بنت معفنه كوافيرة لا راحت ولا جات
لا لا مالكيش حق يا رحمه
رحمه: عيب تتكلمي علي الناس بالأسلوب ده
فكريه: و دي برضه بتفهم في العيب اللي بيته من ازاز مايحدفش الناس بالطوب فوتكم بعافيه يلا يا رحمه
وخرجوا من الشقه وفكريه متغاظه منها
فكريه: آه لو تسيبيني عليها بنت الهرمه شايفه نفسها بنت بارم ديله الله يرحم ايام زمان لما جابها من كباريه وقال ايه الناس مقامات
رحمه: استغفر الله العظيم خلينا نمشي
وصلت رحمه وفكريه بيت زهره
فتحت لهم فاطمه الباب واتخضت
فكريه: مالك ياوليه كاانك واكله سد الحنك
فاطمة: اهلا وسهلا نورتونا والله بس مصدومه انكم جيتوا عندنا اتفضلوا خشوا
دخلوا الصالون
فاطمه: تشربوا ايه؟
فكريه: تعالي اقعدي خلينا نتكلم وبعدها نشرب الشربات
فاطمه ارتبكت وبان عليها
رحمه : أومال زهره فين؟
فاطمه: راحت الشغل
فكريه: إنت اكيد عارفه احنا جايين ليه؟
فاطمه: وانا اعرف منين؟
فكريه: احنا جايين نخطب زهره لابننا علي وبلاش حكاية إنها مخطوبه لابن عمها
فاطمه: ما هي دي الحقيقه
رحمه: إنت بتكدبي ليه طول عمركم قاعدين هنا ولا عمرنا شوفنا لكم حد من قرايبكم دلوقتي طلع ابن عمها
فاطمه : ماهي ماقري فتحتها من وهي صغيره
فكريه : سيبك من الكلام دا يعني ابن عمها احسن من علي؟
فاطمه : لا مش القصد
فكريه: و ايه قولك بقي ان زهره وعلي متفقين علي الجواز يعني البت مش عارفه حوار ابن عمها دا
فاطمه: اصلنا لسه ماقولنلهاش عليه
رحمه: احسن برضوا خلاص اول ما يرجع علي من دبي نكتب الكتاب وبعد شهر الدخله
فاطمه: بالسرعه دي؟! مش هنلحق نجهزها
فكريه: احنا عارفين الظروف ومش عايزين منكم حاجه خالص يلا زغردي خلينا نفرح
فكريه فضلت تزغرد كثير
أما فاطمه كانت مصدومه و ساكته
طول القعده فكريه و رحمه بيتكلموا وفاطمه ساكته
وداد كانت سامعه كل حاجه
اول مامشيوا
طلعت وداد من الاوضه
وداد: ممكن تفهميني في ايه؟؟
فاطمه: في إنك هتقفلي بؤك دا واياكي تطلعي حرف واحد لزهرة انتي فاهمه؟
وداد: كذبتي علي زهره ليه ان علي اتجوز ؟ و مين ابن عمنا دا الي خاطب زهره؟
فاطمه: ابعدي عني الساعه دي وحسك عينك تنطقي بكلمه واحده لزهرة ولازم تعرفي لو هي عرفت ابوكي هيخش السجن واحسن حاجه تعمليها ارجعي بيتك و ارضي بنصيبك اهو دخل السرايا الصفرا هترتاحي منه يبقي ارجعي
وداد: إنت بتقولي ايه؟ ارجع بعد كل اللي عملوه فيا ؟
فاطمه: علشان انت وحده خايبه ومعرفتيش تتصرفي هتطلع عليكي سمعه وحشه وماحدش هيتجوزك و تحمدي ربنا ان المجنون رضي بيكي يلا غوري من وشي جاتكم القرف خلفه تشل
**************************
Nisrine Bellaajili
في دبي
علي مكانش مستوعب كل الي بيحصل طلبوا منه يدافع عن مجرم في جريمه قتل
مليونير قتل واحده مصريه شغاله في فندق
وعايزين يقلبوا القضيه إنها دفاع عن النفس و إنها دخلت الجناح عنده تسرقه و تقتله
علي كان قاعد ومش قادر يفهم ليه هو بالذات
علي : معلش انا غبي شويه ليه انا؟؟
وبعدين انت في دبي اكيد عندك محاميين هنا
يعني انت جايبني من مصر علشان ادافع عنك هنا مش مستوعب
هايدي: انت ليه مكبر الموضوع انت هتدرس القضيه وبابي كمان ونشوف ليها حل وانت هتكون من ضمن طاقم المحامين اللي هتحضر المحكمه وفي واحد هو المتحدث الرسمي
علي: طالما فيه طقم محاماه ليه انا يعني انا اشطر منهم في إيه وبعدين كل بلد وليها قوانينها انا ادافع في قضايا بلدي بس انا مش عارف القوانين هنا
هايدي: لا سهله لان في محامي هيكون معاك
علي: وانا مش موافق
سالم : نعم ماسمعتش قولت ايه؟
علي: اخيرا اتكلمت كنت مفكر انك مش بتتكلم طول القاعده وانت ساكت
سالم: لا ما انا مركز معاك
علي: طيب زي ما سمعت انا مش عايز ولو سمحت عايز جواز سفري ارجع مصر
سالم: هو دخول الحمام زي خروجه
في حاجات تانيه لازم تعملها
علي: معلش هو انت مقتنع ان فعلا كنت بتدافع عن نفسك وقتلتها الورق اللي قدامي بيقول انك اغتصبتها بالعنف و دبحتها
دا تقرير الطب الشرعي والجريمه دي أقل حكم فيها تأبيده لو مكانش إعدام
سالم: تعرف هي كانت قاعده في نفس مكانك كده
علي ارتبك
هايدي : سالم بيه معلش علي مالوش في السكه دي وانا جيت معاه علي حسب كلام بابي انك عايز تصفي كل أعمالك هنا وتعمل فرع للاوتيل ده في مصر كنت عارفه ان في قضيه هنا بس مش اغتصاب ولا قتل بالطريقه البشعه دي
سالم: ماطلعتيش لابوكي خالص
هايدي: الحمدلله أبويا انت السبب في كل حاجه حصلت له و اهو بندفع الثمن
سالم وقف وهو ماسك كأس ويسكي في ايده وسيجار في ايد الثانيه
سالم: انتم هنا ومفيش لا على اي حاجه اقولها
علي خاف علي زهره لو رفضت في فيديو حلو اوي اوي هينزل قريب فالحاره
وتبقي سيريتها علي كل لسان
علي وقف من الخضه
علي: إيه دخل خطيبتي في الموضوع وفيديو ايه ده اللي بتتكلم عليه ؟؟
سالم ضحك ضحكه مستفزه
سالم: شغل الفيديو خلينا نستمتع شويه
الفيديو اشتغل
لما علي كان بيبوس زهره تحت السلم وش زهره كان باين اوي أما علي كان باين بس ضهره
اللي صورهم اخد زاويه معينه
علي كان عقله هيطير وهو شايفهم بيبصوا علي زهره بشهوه
علي: وقف الفيديو
وقفوا الفيديو علي صوره زهره
سالم: اسمع بقي طالما انت هنا يبقي لازم تسمع الكلام و تنفذ بس لأنك لو طلعت من هنا من غير ماتعمل اللي انا عايزه اهلك هيبقوا في خطر اوعي تركب دماغك وتعمل زي ما عمل عدوك طارق
في الآخر خسر مراته
علي ..فكر كويس بمكالمه واحده
اخليك تتحسر على صاحب عمرك حادثه عربيه بسيطه يبقي الله يرحمه واختك تبقي ارمله او ممكن تكون معاه في العربيه
اخوك كريم حقنه صغيره اخليه مدمن و مجنون في الشارع
أما البت سماح دي محتاجه جرعه حنان و حب عيل سيس اخليه يلعب بيها و يجيب شرفكم الأرض المعلم بقي ست ماتسواش تعريفه اخليها تلف عليه وتبيعه اللي قدامه و اللي وراه امك بقي ليها ربنا هتشوف كل الي استحملته في سنين راح في غمضة عين
زهره دي بقي تنساها خالص مش من مستواك ولو اتجوزتها هتبقي طعم سهل في السوق
سيبك من الحب وخليك في مصلحتك
اتحول لحسابك دلوقتي مليون جنيه
اه نسيت اقولك زهره وصلتها رساله علي انك اتجوزت هايدي و انت في شهر العسل
علي مسك تليفونه يشوف رسالة
سالم: ضحك انت بجد غبي
لو عايز ارسل رساله ارسلها من اي مكان مش ضروري تليفونك
اه وقبل ماتطلع من هنا اكون خلصت عليك برصاصه واحده دفاع عن النفس
وتنفذ كل اللي قولت عليه برضه مابرجعش في كلامي
كلمه مني الفيديو دا هينتشر بسرعه البرق في الحاره و مصر كلها وتبقي ترند الموسم ما أنت عارف الناس بقت تافهه ازاي ومش بعيد زهره تنتحر مسكينه مش هتقدر تستحمل كلام الناس
هنا كانت زهره بتتصل
سالم اخد مسدسه وحطه علي راس علي
سالم : رد عليها
علي بص له وبص لشاب اكيد هاكر و معاه جهاز الكمبيوتر
علي : ألو
زهره: اللي سمعته دا صح؟؟
علي غمض عينيه بقسوه
علي: ايوه صح
بقلم نسرين بلعجيلي
***************************
علي دخل عش الدابابير ياترا هيعرف يطلع منه ولا خلاص
ليه يازمن
بقلم نسرين بلعجيلي
Nisrine Bellaajili
الفصل 27
زهره: ازاي؟
علي: زي ما سمعتي
زهرة: يعني بجد انت اتجوزت وسافرت تقضي شهر العسل ؟؟
علي: آيوه يا زهرة
زهرة : ليه؟ عملت فيه كده ليه؟ فين وعدك ليه ؟
علي: زهرة انسيني
زهرة : بالسهوله دي؟ ضيعت سنين عمري معاك وفي الآخر تغدر بيا وتتجوز ؟
علي: كفايه يا زهرة
و قفل الخط
سالم : برافو عليك كده تعجبني
انسي زهرة حياتها مش معاك لازم تتعلم مايكونش ليك نقطه ضعف و نقطه ضعف الراجل هي الست لو بيحبها
علي: ازاي عايزني اسيب حب عمري علشان قضيه
سالم: إنت بجد غبي
قضيه ايه ؟ القضيه خلصانه بيك أو من غيرك
انا عايزك إيدي اليمين في الشغل عايزك تمسك مجموعه شركاتنا في مصر ..علي انت دخلت العالم بتاعنا
علي: دخلت ازاي ؟ انا مش موافق اصلا انتوا كدبتوا عليا
سالم: خلاص الي حصل حصل و انت خلاص معانا و خاف علي اهلك و علي زهره وعلي صاحبك مراد
...اه نسيت اللي حصل هنا مش عايز جنس مخلوق يعرفه والا انت عارف النتيجه
علي خرج من عنده وهو تايه مش عارف يعمل إيه ؟
سالم : إنت لسه قاعده روحي وراه بسرعه
هايدي: سالم بيه علي مش كده خالص بابا اللي ورطه في كل دا وهو مايعرفش
سالم: الله الله القطه بتحب علي.؟لو بتحبيه روحي الحقيه و عقليه
لو فعلا خايفه عليه
طلعت هايدي تجري ورا علي لحد ما لحقته
هايدي: استني يا علي
علي: عايزه ايه؟؟
هايدي: علي لازم نتكلم
علي: مش عايز اتكلم مع حد
هايدي : علي الموضوع كبير جدا و خطير ولازم نتكلم علشان نعرف نطلع منه من غير خساير
علي: نعم !!! قولتي ايه؟ من غير خساير ؟
هايدي: اهدا وتعالي نتكلم .
زهره بعد مكالمه علي اتجننت مش قادره تصدق ان علي اتجوز
عقلها مش قادر يستوعب ليه يعمل فيها كده ازاي يسافر من غير مايقول يعني كان بيضحك عليها كل السنين دي
كانت واقفه علي الكورنيش المكان اللي كانوا بيتقابلوا فيه دايما
ودموعها ماليه وشها
لحد ما تليفونها رن
وكانت امها فاطمه بتقول لها إن البوليس اخد أبوها
راحت علي قسم البوليس لاقت امها و وداد
فاطمه :كله منك إنت ماقبلتيش تتجوزي اهم حبسوا ابوكي
زهرة : حبسوه ليه ؟
فاطمه: اتخانق مع صاحب الشقه
وكمان الكمبيالات الي عليه علشان يجوز المدعوقه الي جنبك جاتكم القرف خلفه تشل
زهره فضلت واقفه وهي مش فاهمه حاجه .
خرج أبوها مع العسكري
عم محمد : اتصرفي يا زهره اوعي تسيبيني هنا
فاطمه: قالولك ايه؟
عم محمد: لازم محامي والا هتسجن
حاولي معاها يا فاطمه انا خايف
فاطمه: حاضر يا خويا خلي بالك من نفسك
خدوا عم محمد عالتخشيبه
وداد: هنعمل ايه دلوقتي ؟
فاطمه: العمل عمل ربنا لازم اختك توافق علي العريس
زهرة : هو انت بتتكلمي جد يعني انا لو وافقت عليه أبويا هيطلع من السجن ازاي اتجوز واحد هو اللي سجن أبويا عارفه معني ده ايه ؟ انه انسان معندوش ضمير و مابيخافش من ربنا
فاطمه: احنا في مشكله وحلها في إيدك انت وافقي علي العريس علشان خاطر ابوكي يطلع من الحبس .
زهرة : انا هطلع اشوف اي محامي
فاطمه: وهتجيبي فلوس المحامي منين يا حيلتها
زهرة : هتصرف
بعدت عنهم وراحت بره اول حاجه جت في بالها لو علي كان موجود كان اتصرف
طارق كان في القسم وشاف زهرة هو وخالد صاحبه
طارق: مش دي زهرة تبع علي؟
خالد: ايوه هي
طارق: شكلها عندها مشكله
خالد: باين ..اه نسيت اقولك ان علي سافر دبي هو و هايدي
طارق: عرفت امبارح.
وعرفت سافروا عند مين ؟
خالد: لا بصراحه
طارق: عند سالم الدهشان
خالد: ايه؟!!
طارق: مستغرب ليه؟
خالد: إنت عارف بتقول ايه؟؟
طارق: عارف امال انا حاطط علي في دماغي ليه ؟
خالد: بس ازاي وصل له؟
طارق: سهله اوي هو بيشتغل عند مين؟
خالد بعد ما استوعب
خالد: ايوه صح
طارق: خليني اروح اشوفها عايزه ايه
طارق راح لها
طارق: السلام عليكم
زهرة : وعليكم السلام
طارق: إنت زهرة خطيبه علي؟
زهره بلعت ريقها بصعوبه وغصه في حلقها من كلمه خطيبة علي
زهرة: كنت خطيبته
طارق: ازاي؟
زهرة : علي اتجوز بنت صاحب المكتب اللي شغال فيه
طارق: قصدك هايدي؟
زهرة: معرفهش اسمها إيه
طارق: طيب انت هنا ليه اسف علي سؤالي انت محتاجه مساعده ؟
زهرة : أيوه أبويا اتمسك النهارده عليه كمبيالات و كمان صاحب الشقه عمل له محضر تعدي مش فاهمه اوي و محدش بيقول حاجه وانا لازم اشوف محامي
طارق: طيب ممكن اساعدك ؟ انا محامي
زهرة بصت له اوي
زهرة: بس انا مش معايا فلوس لحضرتك و اكيد اتعابك غاليه
طارق: ولا يهمك تعالي معايا .
***************************
Nisrine Bellaajili
في دبي
هايدي خدت علي وراحوا مكان هادئ
علي: بصي عايزك تحكيلي كل حاجه مين الراجل دا ومين وراه وإيه حكايه طارق
هايدي: حاضر بس انت اهدي شويه الموضوع مش سهل زي ما انت فاكر
علي: ارجوكي انا مش قادر استوعب تهديد الراجل دا ازاي صورني وليه وعاوز مني ايه ؟
هايدي: الكلام اللي هتعرفه لازم يكون سر لولا إني خايفه عليك ماكنتش هتكلم
علي: خايفه عليا لا قولي كلام غير ده انت جايباني لحد هنا وتقوليلي خايفه عليك
هايدي: اقسم بالله انا كمان اتصدمت ماكنتش متخيله اننا هنقابله هو شخصيا بابا مقاليش حاجه وماكنش يعرف لانه اكيد مكانش هيخليني اسافر للخطر
لان أبويا أكثر واحد عارفهم واتأذى منهم
علي: ازاي؟
هايدي : من 15 سنه والدي كان محامي كبير ومعروف عنه النزاهة و الإخلاص لحد ما في يوم جاله واحد وطلب منه انه يشتغل معاهم
بابا طبعا رفض لان الشغل دا كان تزوير في حاجات مهمه تبع الدوله
فضلوا يهددوا فيه هو قال يرفض وبعدين هما هيزهقوا ويبعدوا عنه
بس للأسف ماما راحت ضحيه
علي: ايه؟ قتلوها ؟
هايدي: عملت حادثه عربيه وفي المستشفي جاتله رساله إنها قرصة ودن ولو ماوافقش ممكن يموتوها
أبويا طبعا خاف وراح عمل محضر بس للأسف لما رجع المستشفى كانت ماما ماتت جالها هبوط حاد في الدوره الدمويه
بعد العزا بعتوا له رساله تهديد ان حياتي في خطر
وإنه لازم يخاف عليه والا هيقتلوني وتهديدات تانيه على حسب شغله طبعا خاف وبقي معاهم ومن ساعتها حياتنا اتغيرت جدا
بقي عندنا مكتب المحاماه الكبير والفيلا وشاليهات
بس أبويا عايش ديما تحت التهديد على حياتي .
علي مافيش مجال ترفض لأنهم بجد ممكن ينفذوا اللي قالوه وفي الآخر غصب عنك هتبقي معاهم
عيلتك في خطر وكمان البنت اللي بتحبها اكيد هيفضحوها ويمكن يقتلوها
علي قلبه وجعه علي زهرة
هايدي: انا عارفه انك بتحبها بس لو خايف عليها لازم تنفذ اللي طلبوه منك .
علي: وإيه حكايه طارق
هايدي: طارق بقي وصلوا له وكمان طلبوا منه يساعدهم بس هو رفض و للأسف راحت مراته ضحية لرفضه .
انا كنت صاحبة مسك كانت ست طيبه جدا وبتعشق طارق وهو كمان
علي: لحظه يعني كلام طارق كان صح ان الحادثه كانت مدبره
هايدي: ايوه
علي: يعني انا شاركت في الجريمه دي اني دافعت عن الشخص اللي عمل معاها الحادثه
هايدي: آه وكمان هو اللي كان سايق مش صاحبه اللي مات بس هما قالوا اللي مات هو اللي كان سايق
علي: وطبعا ابوكي كان عارف وهو اللي خلاني ادافع عنه وجابلي دلائل واثباتات انا نفسي صدقتهم وطلعته براءة
هايدي: آه وطارق مفكر انك معانا وانك مشارك في قتل مراته
علي: بس ليه سابوه مش قولتي ان ابوكي في الاخر بقي معاهم يعني طارق هو كمان معاهم؟
هايدي : لا طارق بقي حويط جدا جدا ومسك عليهم حاجات خلتهم يبعدوا عنه او هما مفهمينه كده بص مش عارفه
كل اللي اعرفه انك لازم توافق دلوقتي لو عايز تنقذ اهلك
علي: عارفه انت بتطلبي ايه ؟ اني ابعد عن البنت اللي بحبها من سنين وكمان اخالف ضميري
هايدي : ربنا شاهد انه غصب عنك وكل الي هتعمله انك هتخلص لناس هيبعتوهم ليك أوراق جمارك وحاجات كده
علي: علشان كده ابوكي كل سنه يطلع عمره يكفر عن ذنوبه
هايدي: علي أبويا اتظلم منهم .
عارف يعني ايه انك تعيش خايف علي بنتك ؟ أبويا حتي مارضيش يتجوز و يجيب أطفال تانيه لانه خايف
انت مش فاهم ولا مستوعب الناس دي ممكن تعمل ايه
دول مافيا عالميه بيتاجروا في كل حاجه ممكن تخطر علي بالك
خاف علي نفسك وعلي اهلك ممكن يقتلوك و يقتلوا اهلك كلهم من غير شفقه ولا رحمه هتقولي في قانون في البلد هقولك هما القانون وهما اللي ممشين البلد
علي إياك تفكر تعمل اي حاجه ضدهم مهما قاومت مش هتعرف تبعد لأنهم حطوك في دماغهم وبتقول ليه انا ؟
لانك محامي شاطر ولسه صغير هما عايزين محامي كده علشان الشكوك وكمان تبقي تحت ايدهم لحد ما تكبر انت ممكن تبقي غني ومعروف و مشهور
علي: بالحرام ؟!
هايدي : دول مابيفهموش حرام ولا حلال
كل همهم مصالحهم تمشي
علي : أنا مش قادر أصدق نفسي دا حلم ولا كابوس ولا إيه دا
هايدي: دي الحقيقه المره
علي: بس انت قولتي ان طارق مش معاهم يعني اهو في امل ممكن ابعد من غير ما يأذوني
هايدي: صعب تطلع منهم اكيد طارق معاهم بطريقه غير مباشره طارق لما ماتت مراته فضل سنه تعبان مش بيخرج من بيته خالص كان في حاله وحشه جدا وراح اتعالج من الإكتئاب ورافض يتجوز وبنته لسه صغيره
وهمه اوهموه انهم مالهمش علاقه أنا عارفه التفاصيل كلها
بس الي اعرفه طارق مش سهل وعايز ينتقم من اي حد كان سبب في موت مراته من ساعة العزا مروحتش بيتهم ولا شوفت بنته
وبقيت بعيده خالص عنهم
علي: دلوقتي فهمت سبب كرهه ليا عنده حق ما انا دافعت عن اللي قتل مراته
هايدي: هو مفكر انك معاهم مايعرفش حاجه
علي: بعد ايه ابوكي ورطني من زمان يعني القضايا اللي كنت بترافع فيها ضد طارق كانت من طرفهم صح؟
هادي : ايوه كنت تحت الاختبار
علي: طول الوقت شايف نظرات طارق ليا مش تمام وماكنتش عارف السبب وكل ماكان يربح قضيه كنت بفرح عارفه ليه؟
هايدي : لا
علي: لأني كنت حاسس ان في حاجه غلط
هايدي: علي احنا دلوقتي في مركب واحده ولازم نحط ايدينا في ايدين بعض
علي: مركب واحده حلوه دي
هايدي: علي انا بحبك من زمان
علي: بتحبيني؟!
هايدي: ايوه انت اول راجل حبيته وكنت عارفه انك بتحب زهرة
علي: زهرة دي طفله اتربت علي إيدي الله أعلم هي عامله ايه دلوقتي ؟ حسبي الله ونعم الوكيل فيهم
هايدي : تتجوزني يا علي ؟
بقلم نسرين بلعجيلي
**************************
هيحصل ايه مع علي؟
و هل هيتجوز هايدي؟
ليه يازمن بقلم نسرين بلعجيلي
Nisrine Bellaajili
الفصل 29
رحمه: مالك يا بنتي فيكي ايه؟؟
المعلم: انتم ماتعرفوش ان أبوها في القسم و احتمال يتسجن
فكريه: لا حول ولا قوه الا الله
بس علي مسافر مش موجود
زهرة اول ما سمعت كده اتأكدت اكثر ان خلاص النهايه قربت وان الكلام صح
مبقتش سامعه ولا شايفه حاجه واغمي عليها
رحمه: يا ساتر يارب
الحق يا معلم البنت وقعت من طولها
المعلم راح الاوضه يعمل مكالمه
فكريه : يا مسعده تعالي شيلي معايا
شالوا زهره دخلوها الاوضه
وحاولوا يفوقوها
فكريه: اتصلي بامها تيجي تشوفها
رحمه: حاضر يارب جيب العواقب سليمه
زهره فاقت بس كانت ساكته
المعلم دخل الاوضه وشافها حزينه وبتعيط
رحمه: اعمل حاجه يا معلم
المعلم : هو انت فكرك انا معملتش حاجة دا راجل شغال معايا سنين ماشوفتش منه حاجه وحشة .
زهره: قدمت الكمبيالات ليه يا معلم ؟ انت عارف ان أبويا مش معاه فلوس ؟
المعلم: انا ماقدمتش حاجه دا انا ساعدته بطيب خاطر بس لولا ان ابوكي كرامته نقحت عليه و طلب مني امضيه علي كمبيالات انا ماكنش عملت كده
فكريه: يا حوستي كمبيالات ايه؟
المعلم : هو كان مزنوق في قرشين علشان جهاز البت ادتهمله بس الظاهر انه اتكسف يطلب تاني وراح استلف من حد تاني و هو اللي قدم الكمبيالات بس ماتخافيش انا هشوف الموضوع دا
جت فاطمه و دخلت لبنتها
فاطمه: معلش احنا اسفين ليكم
رحمه: عيب يا فاطمه تقولي كده
فاطمه قربت من بنتها ضربتها في كتفها
فاطمه: قومي فزي يا وش المصايب كله منك لو كنتي وافقتي مكانش ابوكي اتسجن
رحمه: سيبي البت في حالها مالك داخله كده وبتشديها من كثفها
عامله ايه يا بنتي لسه تعبانه ؟ اجيب الدكتور
فاطمه: دكتور ايه بس دي بتدلع يلا قومي
المعلم: انتم قاعدين فين؟؟
فاطمه: هيكون فين يعني عند الوليه اللي ما تتسمي جمالات
فكريه: هي صحيح بنتك هربت الصبح من بيتها؟
فاطمه: اسكتي مش جوزها طلع مجنون ولا مؤاخده حاول مع البت و لما طلعت امه تحوشه عن البت قام استغفر الله كان عايز امه
رحمه: اعوذ بالله ايه اللي بتقوليه دا يا فاطمه ؟؟؟
فاطمه: والله زي ما بقولك واخدوه سرايه المجانين وامه قامت ضربت وداد و يا حبه عيني هربت من اللي شافته عندهم ..
بس هنعمل ايه ملناش حد نروحله صاحب البيت طردنا ..منه لله
المعلم : يلا علشان اوصلكم وبعدين نشوف موضوع البيت دا
رحمه علي بيتصل
رحمه : ايوه يا ضنايا عامل ايه؟
زهره قلبها وجعها اوي
زهره اخدت التليفون من رحمه من غير ما تستأذنها..ورحمه استغربت
زهره: ايوه يا علي انا زهره
رحمه يلا اطلعوا خليها تتكلم علي راحتها معاه .
المعلم فضل يبص علي فاطمه
فكريه: ما تيالا مبلمين كده ليه
الكل طلع
علي: بتعملي ايه في بيتنا؟
زهرة وهي بتعيط
زهره: قولي انك كنت بتهزر معاية قولي ان كله كذب وانك لسه بتحبني
علي: معلش يا زهرة غصب عني والله غصب عني انتي عارفه انا عمري ماحبيت غيرك انتي حبي الأول انت كل حاجه بس غصب عني والله يا زهرة انا بحميكي مش هاقدر اقولك اكثر من كده
اوعي تفكري انه سهل عليا بس الظروف كده
زهره: مافيش حاجه اسمها ظروف انا استحملت و صبرت ابقي معاك في الظلمه وفي الآخر ده جزاتي تتخلي عني وتقولي بحميكي
علي: كفايه يا زهرة انا مش قادر استحمل صوت عياطك انا ماستهلش دموعك دي
زهرة: كويس انك عارف دا
بس ليه اتجوزت؟
علي: قولتلك ظروف
زهرة : من يوم ماعرفتك وانت عندك ظروف واستحملتها بس انت ما طلعتش راجل يستحق التضحيه هنساك يا علي وحشيل قلبي اللي بيحبك منك الله يا علي مش مسامحاك ليوم الدين هتشيل ذنبي لغايه ماتموت لأني عمري ما هسامحك علي اللي عملته فيا
وقفلت الخط وفضلت تعيط
أما علي كانت دموعه بتعبر عن كميه الألم اللي بيحس بيه
وافتكر سؤال زهرة ووعده ليها
*************************
زهرة: خايفه تنساني
علي: انساكي ازاي وانا مربيكي على إيدي صحيح مشيت من الحاره بس عمري مانسيتك ولا هنساكي
انت الحب الأول و الاخير
************************
Nisrine Bellaajili
هايدي: علي ماتعملش في نفسك كده
علي : لو سمحتي عايز أفضل لوحدي
هايدي: انا هرجع الاوتيل
علي : تمام
علي دخل عش الدابير من غير ذنب مطلوب منه يتخلي عن حبيبته و يشتغل في الشمال حاجه ضد أخلاقه و مبادئه اللي اتربي عليها
ازاي يطلع من المصيبه دي بس اهم حاجه لازم يحمي زهرة .
يعني كان لازم يتجنن ويبوسها في اليوم دة اهو بقي نقطه ضعفه دلوقتي
وكمان هددوه انهم هيعملوا لها فيديوهات اباحيه وممكن يشوه صورتها
يستحمل الفتره دي لحد مايعرف راسه من رجليه واكيد زهرة هتستناه
لأنها بتحبه بجد وبعدين يتجوزها اول ما ينزل مصر هيروح عند طارق يشرح له كل حاجه ويحط ايده في ايديه ويتخلصوا من المافيا دي
و كمان لازم يحمي اهله
ايوه لازم يعمل كده
هو دا التفكير اللي وصل له
فرح طلعت من الشغل لقت مراد مستنيها
ركبت العربيه
فرح : اسفه اتاخرت عليك
مراد : ولا يهمك يا حبيبتي تحبي تروحي فين؟؟
فرح: معلش مش هينفع نروح اي مكان انت عارف الظروف
مراد: مش عارف اقولك ايه بس انا مش فاهم في حد تهون عليه حياته كده والله يا فرح عمري ما كلمتها ولا وعدتها بحاجه
فرح: من غير ما تحلف انا عارفه بس مش عارفه هي ليه عملت كده معقوله تكون بتحبك؟
مراد: مش عارف
فرح: لو فعلا بتحبك يبقي انا انانيه فكرت في نفسي و مافكرتش في اختي مهما كان دي اختي الصغيره
مراد: معني كلامك إننا نبعد عن بعض علشان هي ترتاح علي فكره هي اللي انانيه مش انتي كان لازم تفهم اننا بنحب بعض
فرح: مش عارفه اتعامل مع الموضوع ازاي؟ انا لسه لحد دلوقتي ماشوفتهاش والله يا مراد صعبانه عليه
مراد: لأن قلبك ابيض و بعدين يمكن عملت كده علشان والدك طلق امها يعني مش شرط موضوعنا
Nisrine Bellaajili
فرح : يارب يكون هو دا الموضوع عارف انا ماقدرتش اطلع اطمن عليها
مراد: انت معملتيش حاجه حرام علشان تخافي اطلعي واطمني عليها مهما كان دي اختك
المعلم اخد فاطمه و زهره القسم
و طول الطريق بحاول يطمن زهره انه هيوقف جنبهم لحد ما يطلعوا أبوها من الحجز
وصلوا القسم
المعلم دخل لرئيس المباحث
فاطمه: قوليلي يابت علي قالك ايه؟
زهره: و عايزه تعرفي ليه؟؟
فاطمه: يا بت مالك من ساعه ماطلعتي من الاوضه وانت وشك أصفر وبتترعشي
ها شفتي قولتلك اتجوز معقوله يسيب هايدي بنت الحسب و النسب ويتجوزك انتي
زهره : وانا مالي ؟ ناقصه إيد ولا ناقصه رجل ؟
فاطمه: ناقصه جاه معقوله علي افوكاتو اد الدنيا يتجوز بنت الشغاله ؟ هيتجوز وحده شبهه بقولك إيه اوعي تكوني فرطتي في نفسك وقاعده تعيطي ؟
زهره: إنت اتجننتي انك تشكي فيا ؟
فاطمه: يعني ماحصلش حاجه بينكم وانت ساخ سليم؟
زهره: علي ابن ناس وكان بخاف عليه ومافيش حاجه حصلت بينا اطمني
فاطمه : الحمدلله
شويه جه عم محمد وحالته تصعب علي الكافر مع العسكري
فاطمه: إزيك يا خويا؟
عم محمد زي ما انتي شايفه ؟
دخلوه عند الضابط
بعد شويه طلع المعلم وقال لزهرة تدخل عنده
زهرة: إزيك يابا ؟
عم محمد : زي ما انت شايفه يا بنتي اقعدي عايز اتكلم معاكي
زهره: ايوه يابا
عم محمد : بصي يا بنتي كل دا حصل لاني روحت للراجل وقولتله ماعنديش بنات للجواز
و اهو شوفتي عمل فيه ايه ولعلمك بقي هو اللي اشتري العماره
و بيهددني لو ما اتجوزكيش هيدمرنا دا واحد واصل
زهرة: اشمعني انا ؟
عم محمد : حظك كده يا بنتي
بالله عليكي وافقي بقي اللي بتحبيه اتجوز غيرك .
اتجوزي دا راجل غني وانت صغيره و حلوه استمتعي بحياتك خدي من الدنيا حقك طالما ده نصيبك يبقي ترضي بيه وتعيشيه و تتمتعي بيه اعملي لمستقبلك انا مش هاعيشلك
وحتي لو عشت زي ما انت شايفه انا لا حول ولا قوه مش هنفعك بحاجه لا جاه ولا سلطه و لا فلوس
فكري يا بنتي و ردي عليا
زهره: يعني لو وافقت هتطلع من الحجز؟
عم محمد : آه و لو رفضتي هتسجن و اموت في السجن ولا حد هيسأل فيه
فكري و فكري كمان في الفلوس اسألك سؤال لو كان معاكي فلوس كان علي سابك؟؟
احنا في زمن الفلوس اتجوزيه و اضمني مستقبلك كوشي علي قد ما تقدري وبعدها اطلقي
و اتجوزي حد بتحبيه عارف انك مستغربه الكلام اللي بقوله بس هي دي الحياه لازم نستفيد منها زي ما بتدينا بتاخد مننا
مش كل حاجه عايزينها بناخدها
زهرة: ياه اول مره اسمعك بتتكلم كده يابا الموضوع مش سهل لاني قلبي مش ملكي ازاي اعيش مع واحد وقلبي مع واحد تاني
عم محمد: هتنسي مع الوقت وقلبك هيداوي جرحه
دخل العسكري واخد عم محمد
المعلم رجعهم شقة جمالات و وعدهم تاني يوم يشوف لهم شقه
و هما طالعين علي السلم
جمالات فتحت الشقه
جمالات : يا اهلا و سهلا شرفتوا ما احنا فاتحينها لوكاندا هنا
فاطمه: في ايه يا ست جمالات ؟
جمالات : في اني قولتلك انزلي ساعديني وعملتي نفسك مش سامعه ودن من طين و ودن من عجين
زهرة: علي فكره دي قله ادب امي مش خدامه عندك وكمان احنا قاعدين في شقه اختي اللي هي مرات إبنك المجنون
جمالات : اسمعوا دا وبطلو دا انت يابنت الشغاله بقي عندك لسان و بتردي علي اسيادك دا انتي حتت كوافيرة لا راحت ولا جت
فاطمه: معلش يا ست جمالات احنا راجعين تعبانين وعايزين نطلع نريح شويه
جمالات: والمعلم سعد موصلكم ليه؟ معلش دي سمعه لو الناس شافوكم هيقولوا ايه؟
زهره: هو انت اتجننتي بتقولي ايه؟
جمالات : لا انت اللي اتجننتي بقولكم إيه عايزين تقعدوا هنا يبقي تقعدوا بادبكم
زهره: يلا ياما قبل ما ارتكب جريمه
وطلعوا فوق
و دخلت جمالات شقتها
عواطف: في إيه ياما ؟
جمالات : مافيش ام المزغوده جت هي واختها مع المعلم سعد
عواطف: و فيها ايه؟
جمالات : لا دي فيها كثير
عواطف: مش فاهمه
جمالات: هو المعلم معاهم ليه ؟ مش حكايه امهم بتشتغل عندهم لا الموضوع دا فيه إن وانا لازم اعرفها
زهره دخلت الشقه و هي مش شايفه قدامها
وداد : في ايه؟
فاطمه : الوليه حماتك سممت بدنا بكلامها اللي زي السم
منها الله
وداد : آه لو تعرفي دي نزلتني روقت لها الشقه و طبخت وهي و بناتها قاعدين خفت اقول لا احسن تطردنا واحنا ملناش مكان نقعد فيه
فاطمه: عين العقل يا بنتي لازم نوطي راسنا لي اللي يسوا و اللي مايسواش علشان نعرف نعيش
زهره كانت سامعه كلامهم
وطلعت
زهره: بقولكم ايه ... انا موافقه علي العريس
لازم احرق قلبه زي ما حرق قلبي
ياترا مين العريس؟؟
وقرار زهرة صح ولا غلط ؟
بقلم نسرين بلعجيلي
Nisrine Bellaajili
ليع يازمن بقلم نسرين بلعجيلي
Nisrine Bellaajili
الفصل 30
مر أسبوع على أبطالنا....
سماح زي ما هي رافضه تتكلم مع أي حد.
و رحمه كانت رافضه إن فرح تطلع عندها علشان تطمن عليها،
لأنها عارفه إن نوال مش هتسيبها في حالها بعد ما المعلم رفض يرجعها.
بس اليوم قررت تطلع مع مراد
لأنهم لازم يتكلموا معاها.
رحمه صممت إنها تطلع معاهم هي و فكريه..
اما حسنين فبقى ينزل مع المعلم في المحلات و الوكاله، ولاحظ غياب المعلم وكان عنده احساس إنه اتجوز في السر، بس ما حبش يتكلم ولا يقول حاجه.
فكريه خبطت الباب على نوال والشغالة فتحت...
دخلت فكريه و رحمه و فرح و مراد.
نوال أول ماشافت فرح اتجننت، وخصوصا إن مراد معاها
نوال: هو انتي لسه فاكره اختك وجايه تطمني عليها؟! لا وكمان جره في ديلك عريس الغفله، عايزين تموتوا بنتي بحسرتها.
فكريه : اتلمي يا نوال وعيب اللي بتعمليه ده احنا اللي كنا مانعينها تطلع علشان ما تسميميش بدنها بكلامك.
نوال : بقى كده! انا كلامي زي السم دلوقتي؟؟
فكريه: لا من زمان وانتي مش واخده بالك. وسعي كده خلينا نشوف سماح.
نوال : لأ يا فكريه مش هخليها تدخل، بنتي مش حمل صدمه تانيه، ازاي تشوفهم مع بعض كده؟!!
رحمه : لا حول ولاقوة إلا بالله العلي العظيم، إنت إيه يا نوال؟ مش هاتستريحي أبدا؟
نوال : مش هستريح إلا لما المعلم يرجعني، أكيد ضغطتي عليه علشان ميرجعنيش.
رحمه : مش هرد عليكي و وسعي كده، وعيب تعملي كده.
نوال : دا حتى بنته ماطلعش يطمن عليها، يرضي ربنا ده ؟
فكريه : آه، وطبعا الكلام دا قولتيه لبنتك علشان تكره أبوها.
رحمه : نوال إوعي كده انا مابقتش قادرة على المناهده معاكي.
فكريه و رحمه دخلوا عند سماح
لقوها نايمه على السرير.
رحمه : إزيك يا سماح؟؟ احنا جايين نطمن عليكي.
سماح لفت بسرعه فكرت أبوها جاي معاهم. بس أول ماشافت فرح مع مراد وهو ماسك إيديها اتجننت. كانت كوبايه مياه جنبها شالتها وحذفتها على فرح، لولا ستر ربنا ومراد بعدها، كانت جت في نافوخها فتحته.
سماح مابقتش مسيطره على نفسها.
سماح : انتي طالعه تغيظيني انك خطفتيه مني ؟
طالعه تقوليلي انك كسبتي وهو بقى جوزك انتي ؟؟
مراد : عيب مايصحش كده، فرح زعلانه علشانك جدا.
سماح : ماهو واضح زعلها!! وماسألتش فيا ولا عبرتني، ما خلاص عندها عريس مشغوله بيه.
رحمه : عيب يا سماح، وازاي تحدفي الكبايه على اختك ؟؟؟
سماح : ماتقوليش أختك، انا ماليش اخوات، اطلعوا بره و سيبوني في حالي انا بكرهكم كلكم. وانتي بالذات يا فرح بكرهك ومش هخليكي تتهني بيه.
فرح : انا معملتش ليكي حاجه، انتي ليه عايزانا نبقى أعداء
سماح : لأننا فعلا أعداء. انا بنت ضرة امك مهما حاولتوا تضحكوا الضحكه الصفرا، إحنا آخر اهتمامات المعلم.
أول حاجه رحمه و عيالها، أما نوال اياكشي تولع هي و عيالها على طول.
فكريه : ده سم زرعته أمك في دماغك، مافيش الكلام ده.
سماح : فيه، تقدري تقولي ليا ليه المعلم مارجعش أمي لحد دلوقتي، وليه ماطلعش يشوفني ولا مره ولا حتى يتصل بيا في التليفون؟
فكريه : إبقي اسأليه هو مش احنا.
سماح : اطلعوا بره مش عايزه اشوف اي حد فيكم، انا بكرهكم كلكم. وانت يا فرح مش هتتهني معاه، افتكري كلامي كويس مش هاسيبهولك خالص.
رحمه : لا لا إنت اتجننتي رسمي. خلاص يلا بينا.
هنا دخلت نوال
نوال : إنت السبب في اللي بنتي فيه، حسبي الله ونعم الوكيل فيكم.
فكريه : وليكي عين تحسبني علينا؟ يا بجاحتك يا شيخه.
نوال : مش هتكون زي بجاحتكم إنتم.
مراد : يلا يا حبيبتي إنت عملتي بأصلك ومافيش قوه في الدنيا ممكن تفرقنا عن بعض.
وخرجوا من عندها...
نوال : برافو عليكي يا بت... انت بنت بطني، عجبتيني بالي عملتيه فيهم.
سماح : من فضلك إطلعي انت كمان مش عايزه اشوف حد
نوال : ماشي.
طلعت وقفلت الباب...
سماح انهارت من العياط، ماقدرتش تشوف عمتها مع فرح اللي معاها مراد بيحبها وماسك إيديها، ولا أمها رحمه اللي بدافع عنها وهي لوحدها ماحدش معاها.
حست إنها حشره، وجودها مالوش أي معنى، مافيش اهتمام من أي حد. حتى أمها كل ماتدخل عندها الاوضه تفضل تشتكي ان المعلم ما رجعهاش لعصمته من تاني.
أخوها كريم مش حاسه بيه خالص، ولا علي اتصل بيها يطمن عليها.
فضلت تعيط كثير على وضعها.
سماح حاسه بالوحده وإن مافيش حد بيحبها، و أول مره تكون عايزه حاجه و ماتوصلش ليها.
إنها تشوف فرح مع مراد كان صعب عليها لأنها حست بالهزيمه قدام فرح، وخصوصا لما صاحبتها اللي من الحاره قالت لها إن كل ستات الحاره بيتكلموا عليها وانها كسرت فرحت اختها، وإن ولاد رحمه متربين أحسن تربيه، و إن هي حاولت تسرق عريس اختها، و فضيحتها في الحاره كلها. وأمها ولا هي هنا، كل اللي يهمها إزاي المعلم يرجعها.
Nisrine Bellaajili
عند رحمه....
فرح كانت بتعيط وما استحملتش اللي عملته سماح قدام مراد.
مراد : ممكن أفهم بتعيطي ليه؟
فرح : صعبت عليا، شكلها بتحبك.
روايات نسرين بلعجيلي Nisrine Bellaajili
فكريه : أعوذ بالله، البت لا بتحب ولا نيله، البت اتعودت تاخد اللي في إيد غيرها، طالعه لامها. ما هي خذت ابوكي من امك.
رحمه : فضيها سيره بقى يا فكريه.
مراد : على فكره يا جماعه، لازم سماح تتعرض على دكتور نفسي
رحمه : انا قولت لامها، بس هعمل إيه؟ فكرت إني بقولها بنتك مجنونه.
فكريه : يا عيني عليكي يا سماح، البت اتغيرت أوي وشكلها اتغير، دي خست كثير. شكل أمها مش بتأكلها ولا مهتمه بيها.
رحمه : بس عندها حق، المعلم ماسألش عليها.
فكريه : أخويا مشغول في حاجه مهمه، يا ترى هي إيه ؟
مراد : هو علي ما اتصلش بيكم ؟
رحمه : والله اتصل مرتين سألني على سماح و زهرة اذا كنت سمعت حاجه عنها.
فكريه : يا حبت عيني، باله مشغول بيها. بس المعلم عداه العيب، طلع أبوها من القسم و اجر لهم شقه تانيه قاعدين فيها، وابوها بهدلة الحجز خلته تعبان. حسنين قالي انهم راحوا يطمنوا عليه
أهو عامل حساب علي وبيراعي خطيبته في غيابه.
رحمه : بس في حاجه مش فاهماها، علي اخر مكالمه قالي إدعيلي يا أمي محتاج دعواتك، و إوعي تزعلي مني
فكريه : عايز رضاكي يا رحمه، ماتكبريش الموضوع.
رحمه : لا يا فكريه، إبني فيه حاجه. أنا حلمت بيه إنه في أوضه ظلمه و تعابين بتلف حواليه وهو بيقولي هاتي إيدك طلعيني. بس مالحقتش، في تعبان لسعه وصحيت مخضوضه.
فكريه : التعابين دول ناس وحشه، اعداء يعني إنت بس اللي بالك مشغول لأنه أول مرة يسافر ويبعد عنك.
رحمه : آه والله ربنا يحميه و يحرصه.
طارق أخذ بنته المستشفى علشان يطمن عليها...
الدكتوره : التحاليل طلعت كويسه الحمدلله.
هي بس هتفضل كده 6 أسابيع. وبعد كده نفك الجبس.
سيلا : بس بيوجعني أوي وبحس إيدي و رجلي سخنه أوي.
الدكتوره : عارفه حبيبتي، بس كده كويس علشان تخفي بسرعه.
سيلا : آه! وكمان بيخليني أهرش، بس مش بعرف اوصل لي جوه، و بحسه ماسك أوي على إيدي، حتي بصي إيدي منفوخه.
الدكتوره : خليني أشوف كده..
آه عندك حق، بصي أنا هفكه ليكي ونعمل الأشعه نطمن على إيدك وبعدين أعملك واحد تاني من غير مايكون ماسك على إيدك.
طارق : شكرا ليكي، لأنها فعلا مضايقه جدا منه.
الدكتورة : مافيش شكر ولا حاجه، دا شغلي حضرتك.
طارق من يوم ما وقعت بنته وهو معاها. ساب الشغل وفضل معاها لدرجة إنه نسي موضوع زهرة.
وبنته بتعمل الفحوصات إتصل بخالد صاحبه..
خالد : اخيرا افتكرتني؟
طارق : معلش يا خالد كنت مشغول مع بنتي. قولي التحقيقات وصلت لفين ؟
خالد : بص يا طارق، عارف إن إللي هقوله هيزعلك، بس لازم تعرف.
طارق : خير يارب!!
خالد : التحقيقات وصلت إن فعلا طفل دخل المدرسه وهو اللي زق سيلا من على السلم، بس للأسف الكاميرات مش جايبه وشه لأنه كان حاطط ايشارب على نص وشه.
طارق : يعني اللي فهمته إن الطفل دا مش من المدرسه، هو دخل المدرسه أو بالأصح حد سهل دخوله، وراح زق بنتي وهرب؟
خالد : أيوه، بس الغريبه إنه دخل عادي من البوابه، ويمكن استخبى في أي حته، وبعد كده عمل عملته.
طارق : خلاص الموضوع مفهوم.
خالد : إزاي؟؟!
طارق : اليوم دا أنا كنت مع زهرة، وكنت بحاول اساعدها و حسيت ان في حاجه غريبه. أبوها راجل كبير و صاحب مرض، إزاي يضرب راجل بالطريقه الوحشه دي زي ما مكتوب في المحضر؟؟ غير إن عليه كمبيالات. وزهرة قالت إن المعلم أبو علي هو اللي مضى أبوها عليهم، و اللي عمل المحضر راجل تاني غير المعلم، و الوقت اللي كنت حاجيب قرار الموضوع، وكنت هطلع أبوها بكفاله، و اروح أنا وهي للراجل دا نتفاوض معاه، هو نفس توقيت وقوع سيلا.
خالد : يعني تقصد إنهم عملوا كده مع بنتك علشان يبعدوك عن قضيه أبو زهرة؟؟؟
طارق : أيوه بالظبط. و طالما علي سافر عش الدابابير، يبقى هما عايزين يبعدوه عنها.
خالد : ياه كل دا!؟ وليه يعملوا كده ؟
طارق : الله أعلم. بنتي في خطر يا خالد، أنا ماصدقت إنهم نسيوني
خالد : إنت لسه معاك الملفات ؟
طارق : أكيد. بقولك أنا في المستشفى مع سيلا، تخلص وأوديها البيت، أبعتلك العنوان بيتهم الجديد وتيجيلي. لازم أقابل زهرة وافهم منها.
خالد : في معلومه كده وصلتني من حبايبنا.
طارق: معلومة إيه؟
خالد : المعلم أبو علي بيتاجر في الذهب المسروق، وكمان في الآثار وبلاوي تانيه.
طارق : وعلي يعرف دا؟؟
خالد : اكيد لأ. بس اللي فهمته إنهم ورطوا أبو علي علشان يعرفوا يضغطوا عليه لو هو رفض يشتغل معاهم.
طارق : علي شخصيته ضعيفه وهيشتغل معاهم من غير ما يضغطوا عليه.
خالد : على فكره، أنا علي صعبان عليا.
طارق : كل واحد بيختار طريقه، وهو اختار طريقه.
في بيت فاطمه و عم محمد.
عم محمد : بنتك جاهزه ؟
فاطمه : أهي لبست الفستان بالعافيه. دي حتى مارضيتش تروح الكوافير تعمل شعرها ولا تزبط وشها.
عم محمد : مش وقت الكلام ده. سألتك مين العريس؟
فاطمه : بنتك مش فارق معاها يا محمد، البت صعبانه عليا قوي.
عم محمد : وانا مش صعبان عليكي اللي كل يوم بيهددوني؟؟؟ خلاص دا نصيبها بقى ودي حكمة ربنا
فاطمه : كله منك ومن جنانك، بهدلتني و بهدلت بناتي معاك غلطه بندفع ثمنها لحد دلوقتي.
عم محمد : بناتك؟!!
روحي افتحي شكل العريس و المأذون جم..
زهرة كانت في الأوضه لابسه فستان فرح ومش حاطه حاجه في وشها
ودموعها بتنزل.
وبعثت رساله لعلي كتبت ليه إنها دقايق وهتبقى على ذمة راجل تاني، وإنها مش مسامحاه إنه اتخلى عنها.
علي إتصل كثير بيها لقى تليفونها مقفول.
اتصل بأمه وقال لها تروح لزهرة توقف الجوازة
الكل نزل من البيت يجري. فكريه مع رحمه و مراد و فرح.
وصلوا البيت وهما طالعين السلالم شافوا طارق مع خالد طالعين، وسمعوا زغروتة فاطمه.
ساعتها كان المأذون قال جملته: بارك الله لكما وبارك عليكما وجمع بينكما في خير.
رحمه : ياحبيبي يابني.
خبطت الباب و فتحت فاطمه وهي مصدومه. الكل دخل والصدمه سيطرت على الكل.
يا تري زهره اتجوزت مين؟؟؟
🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹
ادخلوا بسرعه حملوه وخلوه علي موبيلاتكم من هنا 👇👇👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺
تعليقات
إرسال تعليق