سكريبت شخص يفهمني بقلم ايسو إبراهيم حصريه وجديده على مدونة النجم المتوهج
 |
كان قاعد في أوضته محتار يروح الخطوبة ولا لأ وعينه على لبسه اللي عالسرير قصاده
دخل صاحبه بعد لما خبط عليه وقال: أنت لسه مالبستش ليه يا بني
قال معاذ: مش عايز أروح ماليش نفس
بصله خالد بصدمة وقال: أنت مجنون دي خطوبتك يا بني مش خطوبة جاركم عشان ترفض تروح
معاذ بضيق: ما أنا مابحبش الجو دا، لأ وفوق دا كله عاملينه في القاعة وعازمين البلد كلها، اومال في الفرح هيعزموا البلاد المجاورة ولا إيه؟
خالد بيحاول يهدي نفسه وقال: معلش هما ساعتين بالكتير وهترجع على أوضتك تاني يا معقد
بصله معاذ بسخرية وقال: معقد عشان اللي بيعملوه دا مش صح، وبعدين اللي أعرفه إن الخطوبة بتبقى عالضيق بين الأسرتين بس
خالد بضيق: معلش الحال اتغير
معاذ بضيق: للأسوأ يا حبيبي
خالد: بلاش كلام كتير اخلص معاك عشر دقايق تكون لبست وظبطت نفسك وتطلع بسرعة خلينا ننجز ونلحق الناس اللي مشيت دي، وأنا هنزل أشغل العربية ونجيب العروسة ونطلع عالقاعة
بعد نص ساعة كان في طريقهم للقاعة وقاعد جنب عروسته اللي كانت طايرة من الفرحة
بقلم إيسو إبراهيم
وصلوا عند القاعة واللي ماكانش راضي عنها أبدا، بس وافق بعد إصرار أهله عليه إنه عادي طالما العروسة عايزه تعملها في قاعه زي صحابها
نزل من العربية وراح ناحية عروسته، كانت مستنية يمد إيده ليها لكن وقف زي ما هو منتظرها تنزل، مشيوا جنب بعض وأهلهم ببستقبلوهم بالسلام والصور
فقال خالد: ما تفرد وشك دا ياض دي خطوبتك يا بني فين الفرحة اللي كنت بتحكي عنها يوم خطوبتك وإنك مابقتش سنجل
ميل معاذ عليه وقال: دي لو كانت مشيت على مزاجي يا خالد مش زي ما أنا شايف دلوقتي شوف حتى منظرنا عامل إزاي؟ كان فيها إيه لو كانت في البيت عندها بين أهلي وأهلها مع إني قولت لأهلي أكلمها وأقول ليها على اللي حابه يكون مارضيوش وقالوا هتقول إني بفرض رأيي عليها من دلوقتي
خالد: عديها يا عم بقى ماتقرفناش، اومال لو دافع حق القاعة كنت عملت إيه؟
معاذ بضيق بصله وماتكلمش شاف مهما اتكلم مفيش فايدة وماحدش هيعمله
قعدوا مكانهم عالكوشة، فقالت عروسته: معاذ أنت مش مبسوط ليه في حاجة حصلت مضايقاك؟
معاذ: لأ
العروسة: اومال مالك حاسة إنك بتبتسم حتى بالغصب، في إيه؟
معاذ بنفاذ صبر: في إني ماكنتش عايز أجي الخطوبة دي
بصتله العروسة بصدمة وقالت: أنت قصدك إيه؟
يا ترى هتفهمه ولا هيحصل إيه؟
أنا ماكنتش عايز أجي الخطوبة
بصتله العروسة بصدمة وقالت: قصدك إيه؟ دي خطوبتنا مش خطوبة حد تاني يعني ماعندكش حرية الاختيار إنك تفكر تيجي أو لأ؟
بصلها معاذ بضيق بعد لما شاف حزنها وصدمتها وأكيد فهمت غلط هو بردوا لسه مش عارف طريقة تفكيرها عشان يحكم عليها
فقال بتنهيدة: قصدي إني ماكنتش حابب حكاية الخطوبة في قاعة وكدا والمعازيم دي كلها، كنت حابب تكون بسيطة بينا وبين أهلك بس دا لصالحنا احنا، دي بتبقى فترة تعارف رسمية ووعد بالزواج ودي الخطوبة اتعملت عشان كدا نبقى في نطاق رسمي بدل اللي بنسمع عنه الفترة دي نلاقي ظهر اتنين انخطبوا ويقولوا بعد كام سنة حب وماكنش حد يعرف من أهلهم، ولا في خاتم في إيد البنت يديها الحق تتكلم معاه في السر فهمتيني
بصتله ندى بابتسامة وقالت: تعرف أنا مبسوطة من تفكيرك، أنا كنت برفض عرسان كتير أوي، لكن لما جيت اتقدمتلي حاجة جوايا قالت هو دا الشخص الصح، وأتمنى فعلا تفضل كدا في نظري
وكمان أنا ماكنتش حابة أعمل خطوبتي بالطريقة دي بس أهلي أصروا عليا بما إن دلوقتي المعظم بقى بيعملها في قاعة ومعازيم كتيرة والكلام دا، قالولي كل صحابك ما عملوا كدا، لكن أنا ماببصش لحد ولا بحب أقلد حد
وقالوا إن أنت ممكن تكون حابب الخطوبة تبقى كدا، وكمان من كلام مامتك إن بنات عمك وولاد خالتك كانوا عاملينهم في قاعة فقالوا أكيد أنت كمان نفسك تكون خطوبتك زيهم، لكن لو كنت أعرف إنك بتفكر زي ما بفكر كدا كنت فضلت مصرة على قراري وإنها تبقى في البيت، بس ماتقلقش أنا حجزت القاعة ساعة واحدة بس
معاذ بتنهيدة: طب ودلوقتي هيقولوا يلا يا عريس هات عروستك واتفضل معانا عالاستيدج ويشغلوا بقى موسيقى للسلو، ياختي عالتعب لما بتخيل كدا وإن أصلا حرام إن العريس يلمس عروسته بالشكل دا في الرقصة ومش مكتوب كتابهم، لأ وبعدها هيشغلوا أغنية تفضل تدب في قلب الواحد ويقولوا يلا صحاب العريس والعروسة ينضموا ليهم وشغل التنطيط زي القرود يشتغل وحاجة آخر ذنوب وقرف من المنظر
بقلم إيسو إبراهيم
ابتسمت ندى على طريقة كلامه وقالت: أنت مش واخد بالك بالأنشودة اللي شغالة طول الساعة هيبقى عالنظام دا ومفيش رقص أصلا احنا مش ناقصين ذنوب، وماكنتش هسمح أصلا لك إنك ترقص معايا بالتلزيق والقرب اللي بيحصل، وبعدين ماتقلقش الساعة دي
هتعدي في السلامات والتصوير وتلبيس الدهب وخلص الموضوع، كان مستمع ليها وهو مبتسم وحمد ربنا إنه لقى الشخص اللي هيفهمه لأنهم تفكيرهم إلى حد ما متقارب بالذات في الدين والأخلاق
فقال: مفيش رقص أصلا حتى بعد ما نكتب الكتاب ما أنا مش هاخدك أعرضك على كل الولاد والرجالة اللي في القاعة وأقولهم تعالوا اتفرجوا وصقفوا لعروستي وهي بترقص
بصتله بابتسامة واتنهدت وقالت: أنا مستحيل كنت هعمل كدا، بس ممكن نبقى وقتها نرقص سلو أهو شوية لف في القاعة وخلاص وكل شوية أقولك حاسب الفستان بتدوس عليه، والكل بيبقى نفسه يعرف احنا بنقول إيه
قال بضحك: نبقى وقتها نشوف الموضوع دا سيبيها لوقتها، مع إني مش هخليكي تقومي من جنبي أصلا
بصتله بابتسامة وهي بتدعي في سرها إن الموضوع يتم على خير
«في حاجات حلَّها الصبر، وملهاش حل تاني غير إنك تصبر💙»
تمت
🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹
ادخلوا بسرعه حملوه وخلوه علي موبيلاتكم من هنا 👇👇👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺
تعليقات
إرسال تعليق