رواية بسمة موجوعه الفصل السادس والسابع والثامن والتاسع والعاشر بقلم زينب مجدي
 |
الفصل السادس
كانت المستشفى مليئه بأهالي الحادثه
النساء يبكون والرجال يجرون في الطرقات يحاولون أن
يعرفوا حالة أبنائهم.ولكنهم لم يجدوا أحد يبرد النار التي
تشتعل في صدورهم ويطمئنوهم على أبنائهم
فالأطباء داخل غرفة العمليات وحولهم الممرضات يساعدوهم كانت الحادثة كبيره وعدد الضحايا كثير
عندما كانو ينتهون من حاله يخبرو أهلها بحالتها الصحية ويطمئنوهم ...كان والد اسلام قد انهكه التعب من كثرة
الانتظار.وهو لا يعلم شيئاً عن ولده وكانت بجانبه زوجته تبكي وتتضرع إلي الله أن يحفظ ولدها ويطمئنها عليه
وبجانبها بسمه تبكي . تبكي أخاها تبكي سنداً قوياً
تبكي حالها.تتذكر زكرياتهم سويا وتزيد في البكاء .كم كان حاميا لها منذ طفولتهم كم كان عطوفا عليها.
كم ضحي من أجلها .. تدعو الله ألا يريهم فيه مكروهاً
كم انتظرو حتي خرج عليهم الطبيب يطمئنهم أن ابنهم بخير ويستطيعو الآن أن يروه
دخلو الغرفة التي يوجد بها اسلام وبعض من الضحايا
دخلت بسمه رأت أخاها الشاش حول رأسه واخبرهم الطبيب أنه أخذ فيها اثنان وعشرون غرزه ووجه به بعض الخدوش
ويده اليمين في الجبس. وقدمه اليمين في الجبس ومعلقة لأعلي.عندما رأت أخاها في هذه الحالة وقعت على الأرض
مغشياً عليها .اجتمع حولها الممرضات ونقولها إلي غرفة
الكشف ....كشف عليها الطبيب وعلق لها محلول
كان والدها ووالدتها مابين غرفة اسلام وبين الغرفه التي
ترقد بها بسمه... عندما أفاقت بسمه كليا واستطاعت أن تقف
على قدميها ذهبت إلى غرفة أخيها وجلست بجواره وبكت بكاءا شديدا كأنها لم تبكي من قبل
أخرجت المصحف من حقيبتها وظلت تقرأ وتبكي كانت أمه تمسك في يده السليمه وتقبلها وتبكي وعند قدميه يجلس والده والدموع محبوسه في عينيه يحاول أن يحافظ على ثباته حتي لا ينهار من حوله
وبعد وقت وجدت أم اسلام أن أحد ما يمسح دموعها بوهن شديد ويقول لها بصوت ضعيف يملأه التعب
.
متعيطيش يا أمي . مبحبش اشوف دموعك
هبت أم اسلام واقفه وذادت دموعها وقالت
يا حبيبي يا إبني .نور عيني يا إبني
ياريت أنا كنت مكانك
اسلام.. بعد الشر عليكي
وهنا لم يتمالك والد اسلام دموعه وانهمرت على خديه
معلنه إنهيار حصونه
اسلام امتلأت عينينه بالدموع... متعيطش ياحاج أنا والله كويس وحاول أن يقوم من مكانه لكنه لم يستطع أن يتحرك
.
امسكته بسمه ووالدته من يديه
بسمه وكانت عينيها بلون الدم وخدودها شديدة الاحمرار من كثرة بكائها وكانت تتكلم بصوت متقطع من كثرة بكائها
إنت بتعمل ايه يا حبيبي خليك مستريح
اسلام.... إيه إللي إنتي عملاه في نفسك ده يا بسمه
بسمه..... ربنا ما يخضني أبدا عليك يا حبيبي
كان جيران المنطقة التي يسكن فيها والد اسلام جميعهم مجتمعين خارج المستشفى .لا يستطيعون الدخول من كثرة الناس داخل المشفي فمنعو دخولهم .وكان معهم حما بسمه ووالديه محسن ومحمد
دخل عليهم الطبيب واخبرهم أنه يجب أن يتركو المستشفى فيوجد حالات كثيرة تحتاج إلي سراير عندما يخرجون من غرفة العمليات . وكتب لهم على خروج.واخبر كل عائله بما يجب عليهم فعله تجاه المريض
خرج والد اسلام من المستشفى حتي يأتي بتاكسي يأخذ فيه ولده
وجد كل رجال منطقته يجرون عليه ويحاولون أن يطمئنو على اسلام
أبو إسلام..... إيه ده يا جماعه تعبتو نفسكم ليه وجيتو
أبو محسن..... دول هنا من الصبح وبحاول معاهم إنهم يروحو يشوفو مصالحهم محدش رضي منهم يمشي
اصحاب اسلام...... طمنا على اسلام هو كويس
احد رجال منطقته.....قلبنا واقع في رجلنا من الصبح طمنا عليه
والد اسلام. .هو الحمد لله كويس واتكتبله على خروج وأنا رايح اجيب تاكسي
محمد..... أنا معايا العربية بتاعتي وابويا كمان معاه عربيه
علي ما تنزلوه أكون جهزت العربيه
طلع محسن مع أبو إسلام وأصدقاء اسلام حتي يأتو به
عندما رأي اصدقاء اسلام .. اسلام. لم يتمالكو انفسهم واجهشو في البكاء
اسلام..... يا جماعه أنا بخير والله
أخو دعاء خطيبته السابقة واحد اصدقائه.ببكاء ...
علي عيني أشوفك كده يا حبيبي ومقدرش اخفف عنك تعبك
اسلام..... والله أنا بخير يا جماعه دموعكم دي غاليه عليا أوي
محسن..... ألف سلامة عليك يا اسلام . الحمد لله إننا اطمنا عليك إنك بخير .قوموه معايا علشان نعرف نشيله يا جماعه
التف حوله أصدقائه ورفعوه من على السرير وكانو يمشون ببطئ يخافون أن يألموه
عندما خرج خارج المشفي وجد الرجال يلتفون حوله ليطمئنو عليه ويحاولون أن يحملوه
أبو محسن.....براحه عليه يا جماعه نوديه البيت وتعالو اطمنو عليه براحتكم
دخل اسلام في عربه محمد ومعه والده وأحد أصدقائه
وركبت بسمه ووالدتها في عربه حماها
ووصولو إلي البيت وكان البيت عند ابو اسلام ممتلئ بالناس يريدون أن يطمئنو على اسلام لطالما كان اسلام ووالده محبوبين من الجميع
ادخلوا اسلام إلي سريره وجلسو بجواره واستأذن البعض عندما رأي البيت مليئا بالناس
وبعد وقت كثير جداً عاد كلا إلي بيته
ولكن أصدقاء اسلام ظلو بجانبه
أخو دعاء.... هروح أغير هدومي يا حبيبي واجيلك على طول
اسلام.... متتعبش نفسك يا طارق أنا كويس
طارق..... لأ والله لازم ابات معاك انهارده
غادر طارق بسرعه حتي يأتي إليه سريعاً وعندما وصل إلي المنزل وجد دعاء في انتظاره
دعاء. ... اسلام عامل إيه يا طارق
طارق...... كويس الحمد لله
دعاء.. بإحراج .. يعني ماله حالته ايه
طارق.....بتسألي ليه يا دعاء مش خلاص كل واحد راح لحاله
دعاء.....فضول يا طارق في إيه
طارق.....تعبان يا دعاء تعبان أوي ادعيله ربنا يشفيه ..عمال يكابر وبيحاول يرسم الابتسامة على وشه على شان يطمن إللي حواليه ..بس تعبه باين أوي على وشه
............... ............. ......... ......
في شقة محمد
علا..... طول النهار قاعد بتعمل ايه هناك
محمد.....نسيبنا تعبان وعامل حادثة وعايزاني أروح زيي زي الغريب
علا كانت الغيره تتحكم بها..... فقالت
ولا قاعد هناك علشان تواسي أخته
محمد... بزعيق احترمي نفسك شويه علشان أنا جايب أخري متخليش إللي أنا فيه يطلع عليكي
تركته علا وذهبت من أمامه حتي لا يتهور عليها فهو في حالة عصبيه شديده
........ .... ............ ....... ...
في شقة محسن
آمال...... أخو بسمه عامل ايه يا محسن
محسن......تعبان أوي يا آمال
آمال...... طيب بسمه وأمها عاملين ايه
محسن.....هناك هيموتو عليه
وجيرانهم يا آمال ناس كويسه أوي من الصبح وهما قدام المستشفى محدش فيهم رضي يمشي
آمال.....هما ناس محترمه وكويسين مع الدنيا كلها علشان كده تلاقي الدنيا كلها بتحبهم
........... ... . .......... .........
في شقة محمود
محمود... .هما فين ولا احمد أخويا نامو ولا ايه
أميره..... آه نامو. محمود إنت روحت شوفت أخو بسمه
محمود..... أيوه طلعت من الشغل علي هناك
اميره.....طيب هو عامل ايه .وبسمه عامله ايه
محمود..... الحمد لله كويس .وهي كمان كويسه
اميره... الحمد لله ربنا يتم شفاه على خير .
..محمود كان في حاجة كده كنت عايزه اقولك عليها
محمود....قولي خير
اميره. . العادة الشهرية متأخره بقالها سبع أيام وإنت حلفت عليا إني مشتريش إختبار حمل ممكن تنزل تشتريه إنت
بالله عليك نفسي أفرح
محمود.. .. يا اميره كل شهر بتجبيه وتفضلي منكده على نفسك بعدها اسبوع
اميره برجاء..... علشان خاطري يا محمود علشان خاطري
محمود.... ماشي يا اميره بس اوعديني لو مفيش حاجه متعيطيش زي كل مره
اميره.. أوعدك
ذهب محمود إلي الصيدليه وجاء بالاختبار واعطاه إلي أميره
دخلت أميره إلي الحمام وخرجت بعد وقت قصير وهي مزهوله ولا تتكلم
محمود.. مالك كده في إيه
اميره..... بزهول شرطتين يا محمود أنا حامل . أنا حامل لوالتفاعل حلواكمل
بسمة موجوعه.....
الفصل السابع 💞💞
بسمة..... اقتربت من ودن اسلام وقالت عامل ايه دلوقتي يا حبيبي
اسلام..... أنا كويس والله يا أم ياسين .اطمني عليا خالص إنتي وأمي
أنا عايزك تطلعي تنامي في الشقه إللي فوق إنتي وأمي
علشان أصحابي مصرين إنهم يباتو معايا
بسمه....خلينا في الاوضه إللي جمبك علشان لو احتجت حاجه
اسلام....بقولك في شباب هيباتو معايا تنامي في الاوضه إللي جمبي إزاي
تاخدي أمي وتطلعي ومتنزليش غير لما ارن عليكي تنزلي
بسمه..... طيب لو احتجت حاجه
اسلام.... معايا ابوكي ومعايا أصحابي..اطلعي بقي
مش عايز ألمح طيفك تحت يا بسمه
بسمه... حاضر يا اسلام.بس لو عوزت أي حاجة أي حاجة
ترن على طول أنا مش هنام
اسلام..... لأ نامي وخدي راحتك أنا لو احتجت حاجه الرجاله معايا اهه اطلعي يلي
ذهبت بسمه إلي الشقه العلويه ودخلت أم اسلام إلي اسلام واطمئنت عليه وأصر عليها اسلام أن تذهب إلى الأعلى
وبعد الكثير من المجادلات رضخت لطلبه وذهبت للاعلي
توضأت وصلت وظلت تحمد الله أنه حفظ لها ولدها
وكانت بجانبها بسمه تصلي وتتضرع إلي الله أن يتم شفاء أخاها على خير
وعندما فرغت من صلاتها قامت بالاتصال على اميره لتطمئن علي أولادها
اميره...... السلام عليكم..ازيك يا بسمه وإسلام عامل ايه دلوقتي
بسمه.... إحنا كويسين والله الحمد لله في نعمه
الاولاد عاملين ايه تعبوكي
اميره.....لأ والله دول هاديين خالص ربنا يحفظهملك يارب
بسمه.....هما نامو
اميره....رؤي ورقيه نامو من بدري
وياسين وياسمين لسه نايمين من شويه
همت اميره بإخبار بسمه بالحمل لكن محمود أشار لها ألا تخبرها بعدما أغلقت مع الهاتف
اميره. .. إنت مخلتنيش أقول لبسمه ليه على الحمل
محمود.... نروح بكره الأول نكشف ونتأكد وبعدين نقول للدنيا كلها
اميره.. . يارب فرح قلبي يارب
................ ................. ......... ......
في شقة محمد
.علا.... محمد أنا عايزة بكره أروح عند بسمه
محمد....... طبعاً روحي ده واجب
وأثناء حديثهم سمعو صوت صراخ ولدهم
دخلو عليه بسرعه
علا بلهفه.....مالك يا معاذ
معاذ.....بطني هموووووت
محمد..... بسرعه لبسيه اوديه أي مستشفى
علا....... أنا جايه معاك
.محمد....هتروحي فين بالليل كده لبسي الواد وأنا هكلم محمود ونروح أنا وهو
رن محسن على محمود ونزلو سريعاً بالطفل
استيقظ جميع من في البيت على صوت صراخ الطفل
خرج محسن من شقته.....ماله معاذ يا محمد
محمد بسرعه.... بطنه تعباه هوديه المستشفى
محسن..... استني هاجي معاك
محمد.... محمود رايح معايا خليك ولو احتجتك هرن عليك
محسن..... ماشي يبقي طمني عليه
والد محسن..... ماله الواد يا محمد بيصرخ ليه كده
محمد.... بطنه تعباه هوديه المستشفى أنا ومحمود
والده...... استني هاجي معاك
محمد...... ملوش لزوم يا حاج معايا محمود
والدة...... لأ إنت شايف الولد بيصرخ إزاي دقيقه واحده واجيلك
اخذو الولد إلي أقرب مستشفى وكشف عليه الطبيب
محمد......ماله يا دكتور
الدكتور.بسرعه .... ده عنده حالة تسمم
....................... ................ ...... ........
عند اسلام
كان أصدقاءه بجواره يحاولون أن يخففو عنه ألمه
احد أصدقائه......بس إنت اتخرشمت أوي يا اسلام
اسلام.....اتريق يا خويا اتريق
احد اصدقائه..... بس إللي يشوف وشك يقول واخد علقه تمام
اسلام......هديك واحده زيها بس لما اقوملك
صديق اخر.....بس بقي إنت وهو ده مش وقت هزار الواد تعبان ...بس تحت عينك أزرق يا اسلام كأن حد مديك بونيه فيها
ضحكو جميعاً....هم يحاولون أن يضحكوه ويخففو عنه ولو قليلاً
ــــــــــــــــــــــــــــــــــــــــــــــــ
ــــــــــــــــــــــــــــــــــــــــــــــــــ
اسلام...... إللي يصاحب ناس زيكم يتوقع منهم إيه.....لازم يكون معندكمش دم
صديقه...... اسكت اسكت دا إحنا دمنا زي العسل....اش عرفك إنت بخفة الدم
صديق اخر......بس بقي يا جماعه بجد....مش عايز أي حاجة يا اسلام....اعدلك المخده اقومك تقعد
اسلام......هو لو مش هتقل عليك اسندني أدخل الحمام
هب أصدقائه كلهم واقفين وقالو..... لأ إحنا هنشيلك
اسلام...... لأ يا جماعه متتعبوش نفسكم هتشيلو إيه..
اصدقائه...... إحنا نشيلك فوق راسنا يا اسلام متخافش مش هتتعبنا
ادخلوه الحمام ووقف معه والدة أنا هدخل معاك
اسلام..... لأ يا حاج متقلقش أنا تمام
والده......لأ يا بني مينفعش ...اسندك حتي دا أنا أبوك يا اسلام ...هتتكسف مني
اسلام.....بص يا حاج أنا هدخل ولو معرفتش اتعامل هنادي عليك ...ماشي
دخل اسلام.واصدقائه جميعاً واقفين أمام الباب منتظرينه
وعندما نادي عليهم دخلو جميعاً وحملوه ووضعوه على السرير
اسلام..... شكرا يا جماعه تعبتكو معايا
صديقه.....تعبك راحه المهم إنت بس تقوم بالسلامه
نام بعض أصدقائه والبعض الآخر ظل مستيقظ حتي يستطيعوا أن يأخذوا بالهم من اسلام إن احتاج لأي شئ
أقترب طارق من اسلام...ووضع بعض النقود في يديه
خلي دول معاك يا اسلام
اسلام..... إيه ده يا طارق والله معايا الفلوس
طارق..... خليهم معاك بس هتحتاجهم
اسلام......يا إبني والله معايا
طارق.... . اسلام إنت زعلان مني علشان موضوع دعاء
أنا قولتلك من ساعة ما جيت خطبتها إن أي حاجة تحصل بينك وبينها ملهاش علاقه بصداقتنا .. إحنا طول عمرنا واحنا صحاب
اسلام.... والله أبدا مفيش أي حاجة من الكلام ده
طارق.....طيب علشان خاطري خليهم معاك
رفع اسلام المخده حتي يضع النقود تحتها وجد الكثير من النقود.فأصدقائه عندما كان داخل الحمام وضع كل واحد منهم بعض النقود حتي يساعدوه بهم
............. ..................... ........
في المستشفى
محمد بلهفه.....خير يا دكتور إبني عمل إيه
الدكتور...... الحمد لله عملناله غسيل معدة وهو دلوقتي كويس
هيبات في المستشفى لحد الصبح وبعدين يقدر يرجع البيت
سجد محمد علي الأرض شكراً لله أنه نجا إبنه
بسمة موجوعه
الفصل الثامن 💞💞
في منزل اسلام
في الصباح استيقظ اصدقائه وذهب كل واحد منهم إلي عمله
وبقي اسلام ووالده فقط فنزلت والدة اسلام التي لم تستطع أن تنام طوال الليل من فرط قلقها علي ولدها دخلت عليه قبلت رأسه وقالت
عامل ايه دلوقتي يا حبيبي طمني عليك
اسلام..... والله يا ماما أنا كويس اطمني إنتي بس
والدته.....مش هطمن غير لما اشوفك بتمشي وتتحرك طبيعي تاني
مش قولتلك يا اسلام متروحش أنا كان قلبي حاسس
اسلام..... يا حبيبتي دا نصيبي ومحدش يقدر يهرب من قدره
والحمد لله إنها جت على قد كده
بسمه..... حضرتلك الفطار يا غالي قوم كل لقمه
اسلام.... أكل على الصبح كده يا بسومه...مليش نفس والله
بسمه.....ملكش نفس إيه دا إنت هتاكل الصنيه دي كلها
اسلام..... تعالي بس في موضوع كده كنت عايز أكلمك فيه
أنا كنت ماشي في الموضوع ده.بس مش هعرف أكمله وأنا كده فإنتي إللي هتكمليه
بسمه..... موضوع إيه خير....اوعي تكون ناوي تخطب
دا أنا هفرحلك أوي
اسلام..... لأ خطوبه إيه .بصي هو إنتي عجبك عقدتك كده في البيت
بسمه.... يعني ايه مش فاهمه
اسلام...... يعني إنتي مش عايزه تشغلي وقتك بحاجه
بسمه..... حاجه زي إيه
اسلام.....بصي أنا سألتلك علي موضوع الجامعه المفتوحه دي
وإنتي ينفع ترجعي تكملي تعليمك ... روحي الجامعه واتعرفي علي ناس جديده...واخرجي وشوفي الدنيا
بسمه..... أنا معايا أربع اطفال يا اسلام
اسلام..... الجامعة بتكون يوم الجمعه بس وتقدري تسيبي العيال هنا مع أمك
بسمه.....دا بيقولو مصاريفها كتير اوي يا اسلام
اسلام... . أنا رقبتي سداده يا حبيبتي من جنيه ل100الف جنيه ... الفلوس اللي كنت هصبلك بيها الشقه.تاخديهم وتخليهم معاكي وقت ما تحتاجيهم يكونو تحت عينك
ولما يخلصو تقوليلي واديكي غيرهم
بكت بسمه ونظرت إليه.... إنت إزاي ملاك كده ربنا يخليك ليا يا حبيبي شايل همي حتي وإنت كده تعبان
اسلام..... أنا اخوكي يا عبيطه لو أنا مش هشيل همك مين اللي هيشيله
أم اسلام.....بس يا اسلام هو حماها هيرضي
اسلام....... أنا هكلمه يا ماما وهقنعه
أم اسلام......ولو مرضيش بقي هتعمل ايه
اسلام..... أولا هو ملوش حكم عليها دلوقتي... أنا هكلمه واستأذنه علشان الأصول مش اكتر
وبعدين هو راجل محترم ومتفهم ومش هيعترض
أم اسلام......طيب إنتي إيه رأيك يا بسمه في الموضوع ده
بسمه.....مش عارفه والله يا ماما هفكر
اسلام...... لأ هتفكري إيه أنا كنت ماشي في الموضوع وكنت بجهزلك الورق وابوكي عارف وموافق وبيجهزلك الورق معايا
اعملي حسابك إنك هتروحي بإذن الله السنادي مفيهاش تفكير دي
جاء إلي بسمه إتصال فخرجت حتي تستطيع الرد على الهاتف فقالت والدة اسلام له
ــــــــــــــــــــــــــــــــــــــــــــــــ
ــــــــــــــــــــــــــــــــــــــــــــــــــ
يا إبني يمكن هي مش عايزه تروح متغصبش عليها
اسلام.....يا ماما بسمه طيبه أوي ومش بتيجي غير بالأمر الواقع ولازم أعمل معاها كده علشان تخرج من الحزن إللي هي فيه ده وتخرج وتتصاحب علي ناس جديده
وتدرس وتتعلم
أم اسلام.... وإنت هتجيب فلوس منين لده كله
اسلام.....كل حاجه بتيجي برزقها يا أمي
أم اسلام......وابوك إزاي وافق
اسلام..... أنا بقنع فيه بالموضوع ده من ساعة ما مات جوز بسمه وهو رافض ...وفاتحته تاني بالموضوع لما بسمه تعبت وجالها إنهيار عصبي كان ساعتها بدأ يلين للفكره
وبما إن الزن على الودان أمر من السحر وافق
وافق في الآخر
أم اسلام...... ربنا يصلح حالك يابني يارب ويرزقك ببنت الحلال إللي تكون طيبه زيك
................. ................ ...........
في الخارج كانت بسمه تتحدث في الهاتف
استغربت بسمه كثيراً عندما وجدت أن المتصل دعاء خطيبة اسلام السابقة
بسمه..... السلام عليكم ازيك يا دعاء
دعاء بإحراج.....ازيك يا بسمه عامله ايه
بسمه..... أنا تمام الحمد لله إنتي إيه أخبارك
دعاء. الحمد لله.انا كنت بتصل بيكي علشان اعتذرلك على آخر مره كلمتك فيها على التليفون كنت قليلة الذوق أوي معاكي
بسمه.....لا خلاص ولا يهمك حصل خير
دعاء..... يعني إنتي مش زعلانه مني.يعني ينفع نرجع نتكلم في التليفون مع بعض تاني
بسمه..... آه عادي وقت ما تحبي تتكلمي معايا هتلاقيني موجوده
دعاء بإحراج......طيب أنا كنت عايزاكي تطمنيني علي اسلام
علشان طارق اخويا مش عايز يطمني
بسمه.....هو كويس والله الحمد لله
دعاء.....طيب هو فيه ايه يعني حصله ايه
بسمه......ايده ورجله اليمين مكسورين وواخد واحد وعشرين غرزه في دماغه
شهقت دعاء بصوت عالي وقالت بصوت يغلب عليه البكاء
ألف سلامة عليه ولو سمحتي يا بسمه متقوليش ليه إني أنا كلمتك وسألت عليه..ولو تسمحيلي كل فتره ارن عليكي
بسمه..... ماشي يا دعاء.. مع السلامه
وأغلقت بسمه معها الهاتف وقالت خسرتي كتير اوي يا دعاء
خسرتي راجل بمعني الكلمة ربنا يرزقه ببنت الحلال.. إللي تطلع حبك من قلبه ... أو ربنا يهديه ويرجعلك ولو أنه صعب يرجعلك
.. .................... .........................
في المنزل عند حما بسمه
كانت آمال واميره يجلسون حول علا يحاولون أن يهدأوها
فمنذ أن علمت أن ولدها عنده حالة تسمم وهي في حالة إنهيار تام.... رغم أن محمد لم يخبرها إلا في الصباح
وهو آتي من المستشفى بالولد سليم ... إلا أنها لم تكف عن الصراخ
دخل عليها محمد بالولد جريت عليه وأخذته داخل أحضانها وظلت تبكي
اطمأنت أميره وآمال علي الولد وعادت كل واحدة إلي شقتها
نظر محمد إلي علا بغضب وقال
شايفه نتيجة استهتارك إبنك جاله تسمم من أكل الشارع الملوث إللي اكلتيه للولد امبارح
ورايحه تقولي للولد متقولش لأبوك
إبنك كان هيموت يا هانم لولا لطف ربنا بينا فوقي بقي.. شويه
فوقي لنفسك ولعيالك...سيبي التليفون من إيدك وشوفي عيالك محتاجين إيه واعمليه في البيت
مش تستسهلي وتبعتي الواد يجيب أكل من الشارع
الواد لو كان جراله حاجه أنا كنت سودت عيشتك يا علا
وده آخر إنذار ليكي إلا العيال
دول هما دول إللي أنا مستحملك علشانهم
جلست علا على الأرض بإنهيار..وكلما تذكرت أن ولدها كان سوف يموت بسبب إهمالها تبكي بشدة
................ ................ ...............
في منزل والد بسمه
كان البيت ملئ بالناس الذين أتوا ليطمئنو على صحة اسلام
وأتت أميره ومعها أولاد بسمه وآمال
استقبلت بسمه أولادها بالاحضان ورحبت ببسمه وآمال وادخلتهم
جلسو قليلاً ولكثرة الناس الذين يأتون ذهبوا بعدما اطمئنوا على اسلام.وعلي بسمه
اميره......هاتي الاولاد معايا يا بسمه مش هتعرفي تاخدي بالك منهم الناس إللي داخله وخارجه كتير اوي
بسمه.....لا متقلقيش أنا هخلي بالي منهم وشكراً يا أميره علي تعبك معايا ومع أولادي..... أما أنا شوفتلك رؤية حلوه أوي من كام يوم وكان تفسيرها إن في أخبار سعيده جايه
اميره بفرحه...... إن شاء الله يكون في أخبار سعيده أنا رايحه أكشف انهارده ولو اتأكدت إن في حاجة هرن عليك على طول افرحك
بسمه بسعادة...... بجد يا اميره إنتي شاكه في حاجة
اميره...... آه ادعيلي إنتي بس
بسمه........ بدعيلك والله ليل ونهار ربنا يفرح قلبك يارب
ذهبت آمال وأميرة إلي منزلهم وذهبت بسمه إلي المطبخ تكمل ما كانت تفعله ومعها أطفالها الذي وحشوها كثيراً
ــــــــــــــــــــــــــــــــــــــــــــــــــ
ــــــــــــــــــــــــــــــــــــــــــــــــــ
عادت اميره إلي شقتها تعد الساعات والدقائق والثواني
حتي يأتي ميعاد رجوع محمود من عمله وميعاد الدكتوره
استنفزت كل الصبر الذي لديها حتي اتي محمود من عمله
كانت قد استعدت ولبست ملابسها وعندما علمت أن محمود في الأسفل نزلت له سريعاً قبل أن يأتي ويطلب منها تجهيز العشاء فليس لديها أي صبر آخر للإنتظار
ذهبت الى الطبيبة وانتظرت دورها حتي اتي ودخلت إلي الطبيبه وهي تدعو الله أن يفرح قلبها
بعدما فحصتها الطبيبة قالت
ألف مبروك يا مدام اميره إنتي فعلاً حامل الكيس ظاهر قدامي اهه خر محمود علي الأرض ساجداً يحمد الله ويشكره على نعمه آلتي لا تعد ولاتحصى عليه
بسمه موجوعه 💔💔
الفصل التاسع
عاد محمود واميره إلي المنزل وهم يشعرون بسعادة كبيرة
فحلم كان صعب المنال أصبح الآن حقيقة
اميره..... محمود أنا مش بحلم صح
محمود..... أنا إللي خايف إني أكون بحلم .بقولك ايه اقرصيني كده.علشان لو بحلم اصحي
اميره....طيب خلينا لما نروح البيت علشان ميبقاش شكلنا أهبل في الشارع
وصلو إلي المنزل واخبروهم بهذا الخبر السعيد
فرحو لهم كثيرا
محمد..... علشان الخبر السعيد ده إنت لازم تعملنا حاجه حلوه
خروجه مثلاً.....عشوه مثلاً
محسن.....خلو الخروجه دي عليا... الحمد لله إن ربنا فرحنا
والد محسن.... مفيش خروجات غير لما اميره تقوم بالسلامه
مينفعش تركب عربيات
محسن..... خلاص نخليها عشوه... أنا عازمكم على العشا
واختارو كل إللي نفسكم فيه
محمود...... خلو طيب الموضوع ده عليا
محسن..... لأ عليا أنا
والد محسن......نخليه المره دي على محسن... ومحمود يعزمنا كمان مره لما مرات احمد ترجع البيت ونبقي متجمعين كلنا سوا.....
.... ............... ...... ............... .........
عند اسلام
اسلام.....بسمه أصحابي هيباتو معايا تاني انهارده تاخدي أمك وعيالك وتطلعي فوق متنزلوش
والدته...... مينفعش كده يا إبني إحنا تعبناهم وبعدين أنا ببقي هموت واطمن عليك
اسلام.....هما إللي أصروا والله يا ماما أعمل إيه
خدي بسمه إنتي بس واطلعي وهما بيخلو بالهم مني وبعدين أبويا ربنا يباركله في صحته معايا ومش بيسبني أبدا
والده......يا إبني معنديش في الدنيا كلها أعز منك أنت واختك افديكم برقبتي
بسمه..... ربنا يباركلنا فيك يا حاج
اسلام...... ربنا يحفظك لينا يارب واحنا معندناش أغلي منك إنت وأمي
ـــــــــــــــــــــــــــــــــــــــــــ
ــــــــــــــــــــــــــــــــــــــــــــــــــ
والدته... هقوم اجهزلك لقمه تاكلها
والدة.... وأنا هقوم أصلي العشا
ظلت بسمه وإسلام بمفردهم
بسمه...... اسلام إنت ليه مش عايز تطاوع قلبك وترجع لدعاء
اسلام.... لما يكون قلبي مختار غلط طبيعي إني مش هطاوعو
بسمه......بس إنت بتحبها وهي بتحبك وممكن الحب إللي بينكم يخليكم تعرفو تتفاهمو
اسلام......هي على فكره ماحبتنيش هي ممكن تكون منبهره بإن أهلها دايما بيشكرو فيا ... إن أخوها بيقول عليا كلام كويس . إنما موصلتش لمرحلة الحب .... إللي بيحب عمره ما يعرف يفرط في إللي بيحبه بسهولة ... إللي بيحب بيواجه المشاكل علشان إللي بيحبه . مش من اول مشكله يروح قافل بابه....ولما كلمتك انهارده الصبح علشان تطمن عليا كان فضول بس مش اكتر
بهتت بسمه وقالت
إنت مين إللي قالك إنها كلمتني انهارده
اسلام.....كان باين علي وشك أوي وإنتي داخله ومتوترة وكأنك عايزه تداري حاجه..ولما فتحتي الموضوع دلوقتي اتأكدت إنها كانت هي
بسمه.....طيب إنت بتحبها يا اسلام ارجعلها وريح قلبك
اسلام.... أنا مش عارف أنا بحبها ولا لأ أنا ممكن أكون كنت معجب بشكلها الحلو .كنت عمري ما اتكلمت معاها فكان فضولي عايزني أعرفها أعرف طريقه تفكيرها
بس لما حصلت الخطوبه وقربت فعلاً... حسيت إن إحنا بينا مسافه مش سهل إن إحنا نقربها
كانت تقولي أنا عايزة دهب اكتر من إللي جه لصاحبتي
أنا عايزة اعمل في الشقه ديكورات أحسن من إللي شوفتها عند بنت خالتي
أنا عايزة اعمل الفرح في قاعة احسن من قاعة صاحبتي كذا
إنتي عارفه هي لو بتطلب الحاجات علشان هي فعلاً عجباها وعايزه زيها...كنت هقول ماشي
إنها هي بتبص لغيرها عايزه الحاجات دي علشان تبقي أحسن من غيرها.....مش عايزاها علشان هو ده اختيارها وذوقها
ولما حصلت المشكلة الاخيره بينا ...وهي بسرعه اختارت البعد وماحولتش حتي تقف جمبي
اتأكدت إنه لأ.... الموضوع ده مينفعش يكمل
أنا عايز أم لعيالي .... أم تعرف مشاكلهم وتواجهها مش أم بتهرب من المشاكل
عايز زوجه صالحه ليا تقدر تواجه معايا الحياه وتقف في ضهري..لما يكون ظروفي وحشه ومش معايا... تستحملني
وتصبر عليا لما ظروفي تتحسن....تبقا الحياه بينا مشاركه
وحياه لطيفه وكلها حب.. علشان نعرف نربي عيالنا صح....
وأنا بقولك الكلام ده دلوقتي علشان متفتحيش معايا الموضوع ده تاني... أنا ودعاء صعب نرجع لبعض
هي مش هتكون الزوجة إللي بتمناها أم لعيالي
ولا أنا هكون الزوج إللي بتتمناه
ومش محتاج أقولك يابسمه إن الكلام إللي بينا ده مش عايز حد يعرفه.... علشان أنا واثق فيكي فتحتلك قلبي
دخلت عليهم والدتهم في هذا الوقت وهي تحمل الطعام
............. ................ .................
عند طارق
دعاء...... إنت ليه مقولتليش يا طارق إن اسلام ايده ورجله مكسورين وكمان دماغه مفتوحة
طارق..... طالما كل واحد فيكم راح لحاله يبقي مينفعش إنك تقفي تسأليني عليه .... والمفروض إنك ملكيش دعوة بيه
دعاء بتوتر...... إحنا جيران وعشرة سنين ومفيهاش حاجه لما نطمن على بعض
طارق...... دعاء إنتي عايزه توصلي لإيه .... إنتي عايزه الخطوبه دي ترجع تاني
دعاء.....هو متمسكش بيا ياطارق ... أول لما أبوك قاله إني مش عايزه أكمل في الخطوبه وإن كل شيء قسمه ونصيب
محاولش مع أبوك....مرجعش تاني وطلب ايدي تاني
طارق..... إنتي عبيطه.. إيه تفكيرك المتخلف ده .هيرجعلك تاني بعد ما مافشكلتي الخطوبه ومحاولتيش حتي تقفي جمبه إن شالله بالكلام حتي...جو الروايات إللي إنتي عايشاه فوقي منه .وعيشي علي أرض الواقع
دعاء...... يعني مفيش أمل إنه ممكن يرجع يخطبني تاني
طارق......بيتهيألي خليكي في العريس إللي متقدملك أحسن
ظروفه المادية كويسه وإنتي بتحبي الماديات
دعاء..... مش عيب ولا حرام إني أكون عايزه أعيش عيشه كويسه وظروفي تبقي كويسه وأكون مرتاحه
طارق.... فعلاً مش عيب ولا حرام بس عمرها الدنيا ما بتمشي حلوه على طول لازم ييجي وقت وتضيق ساعتها هتعملي إيه
لازم تبقي عارفه من جواكي إن الدنيا ساعات كويسه وساعات لأ...تكيفي نفسك على كده وكده
دعاء..... خلينا في المهم.. اسلام محاولش يلمحلك إنه عايز يرجع الخطوبه تاني.
نظر لها طارق مطولاً وقال....هو لمح
نظرت له دعاء بفرحه وقالت... بجد يا طارق لمحلك
ـــــــــــــــــــــــــــــــــــــــــــ
ــــــــــــــــــــــــــــــــــــــــــــــــــ
طارق...... آه بس كنت عايز اقولك حاجه قبل ما تفرحي كده
اسلام لما يفك الجبس من رجله...رجله مش هيعرف يمشي عليها طبيعي تاني هيمشي يعرج بيها
نظرت له دعاء بصدمه وقالت بجد...طيب لو لمحلك بحاجة بعد كده أقفل معاه الموضوع ده
نظر لها طارق بخيبة أمل وقال...علي فكرة هو ملمحليش بحاجة
دعاء..... يعني ايه
طارق.... لأ متخديش في بالك أنا نازل... سلام
.......... ............. ................
في شقة محمد
محمد....انزلي جهزي معاهم العشا وحسسيهم إنك فرحانه زيهم حتى ولو بالكدب
نظرت له علا بهدوء وقالت.... حاضر
محمد.....يحضرلك الخير يا اختي
علا..... ممكن اطلب منك طلب يا محمد
محمد. ومالك بتتكلمي بأدب كده..مش واخد عليكي كده خايف تتحسدي
علا.....لو سمحت يا محمد ممكن نرجع كويسين مع بعض
ترجع تعاملني زي الأول بلاش معاملتك الجافة دي معايا
محمد......بقالنا اكتر من تسع سنين وأنا بعملك كويس وبما يرضي الله....عملتي ايه إنتي ..صوتك بقي عالي وبقيتي بتقلي ادبك على الكبير والصغير ومش محترماني
وقليتي من نفسك ومني قدام الناس...وخليتي الناس تبصلي بعين الراجل الضعيف إللي ملوش كلمه علي مراته
وخليتي عيل صغير زي أخو بسمه يقولك
ما إنتي لو ليكي راجل كان لمك
خلتيني صغير في عيون الناس كلها وجايه بكل سهولة تقوليلي نرجع تاني مبقاش ينفع يا مدام
تركها محمد ورحل وجلست علا مع نفسها تبكي
................. ..... ................
في منزل اسلام
تجمع أصحاب اسلام حوله يمزحون معه ويحاولن أن يضحكوه.
احد اصدقائه...... فاكر يا اسلام لما كنا صغيرين وقررنا نطلع يوم اسكندريه نصيف .وابوك مرضيش وإنت ساعتها قعدت تعيط
ضحكو جميعاً.فأكمل صديقه
وإنت صحيت تاني يوم الصبح وقولت لأبوك إنك رايح الشغل وجيت روحت معانا
اسلام.......وهو يضحك دا أنا كلت حتة علقة في اليوم ده
وطارق..... وأنا روحت قولت لأبوك إنك كنت هتغرق
اسلام......ورجع ضربني تاني علقه أسود من العلقه الأولي
ضحكو بشدة أكثر
اسلام..... ياريتني كنت سمعت كلامه أنا فعلاً كنت هموت في اليوم ده....لولا إن الراجل جه انقذني
وانتو السابعه مفيش واحد فيكم بيعرف يعوم
طارق.... مش عارف لما إحنا مش بنعرف نعوم إيه إللي ودانا
اسلام.....كنا داخلين بقي على مرحلة الشباب وعايزين نثبت لنفسنا إننا رجاله
ظل اصدقاء اسلام حوله يتذكرون زكرياتهم ويضحكون عليها
صدق الذي قال الصديق وقت الضيق
بسمة موجوعه 💞💞
الفصل العاشر
داعبت نسائم الهواء اللطيفة خد بسمه لتستيقظ مبتسمة بهذا الشعور الجميل فلطالما أحبت هذا الهواء
استيقظت وايقظت أبنائها لأداء فريضة الفجر فهذه عادتهم يصلون الفجر في جماعة
بسمه.... ياسمين ياسمينا قومي يا قلبي نصلي الفجر
رؤي رقيه الفجر أذن يا حبايبي
ياسمين.... صباح الخير يا ماما
بسمه.... صباح النور ياقلب ماما..روحي صحي ياسين وتيته
رؤي ورقيه..... صباح الخير يا ماما
بسمه.....حبايب ماما صباح الفل والياسمين عليكم يلو يا حبايبي
رؤي..... أنا عايزة أنام شويه يا ماما
بسمه....نصلي الأول ونامي تاني يا حبيبتي
رؤى..... لأ أنا عايزة أنام
بسمه..... لأ يا قلبي كله إلا النوم عن الفريضة.. إحنا مسلمين صح
رؤي....صح يا ماما
بسمه..... مفيش مسلم يا رؤي بيأجل الصلاة....مش إنتي حافظه سورة الماعون
رؤى..... أيوه يا ماما
بسمه..... شوفي ربنا بيقول فيها إيه.....ويل للمصلين.. الذين هم عن صلاتهم ساهون
يعني الناس دي بتصلي... بس بيأجلو الصلاة.. ربنا بيتوعدهم
بوادي في جهنم إسمه ويل.. عايزه تبقي مع الناس دي يا حبيبتي في النار
ولا عايزه تدخلي الجنه وتلاقي فيها كل حاجه نفسك فيها
رؤي..... لأ عايزه أدخل الجنه يا ماما
بسمه... طيب يلي نصلي
رقيه... هو ليه يا ماما ربنا هيدخل الناس النار إحنا بنحب ربنا
بسمه.... إللي بيحب حد يا رقيه بيسمع كلامه
ينفع تقولي أنا بحب ماما وكل ماما ما تقولك اعملي حاجه تقوليلي لأ ما أنا كده هبقي زعلانه منك
ينفع تبقي رؤي بتسمع كلامي في كل حاجه وإنتي مش بتسمعي كلامي خالص..ينفع اساوي بينكم في المعاملة طبعاً لأ
هجيب لرؤي حاجة حلوة علشان هي بتسمع كلامي ومريحة قلبي وإنتي مش هجبلك.ومش من حقك إنك تزعلي علشان إنتي مش بتسمعي كلامي ..
كذلك ربنا هيكافئ الناس إللي بتنفذ أوامر ربنا بالجنه
شوفي ربنا مديكي نعم أد إيه..
ـــــــــــــــــــــــــــــــــــــــــــــــــ
ــــــــــــــــــــــــــــــــــــــــــــــــــ
اداكي بوقك وعنيكي ومناخيرك وودانك وايدك ورجلك
وقلبك... واداكي جسم سليم معافى من الأمراض
واداكي أم بتحبك أوي أوي
واداكي عيله بتحبك وبتخاف عليكي
يبقي ربنا مديكي النعم دي كلها وإنتي متسمعيش كلامه عز وجل ينفع يا حبيبتي
رقيه.. لأ يا ماما أنا بحب ربنا أوي أوي وسمع كلامه.
بسمه. ... شاطره يا حبيبتي وإنتي علشان بتسمعي كلام ربنا ربنا هيدخلك الجنه وهتلاقي فيها كل إللي نفسك فيه واكتر كمان
والدة بسمه.....يلي يا بسمه هاتي العيال وتعالي هنبدأ الصلاة
اجتمعو وصلو الفجر في جماعه
وكان والد اسلام وأصدقاء اسلام في الأسفل يصلون الفجر في الجامع وإسلام يصلي وهو راقد على سريره
أنتهي كل شخص من صلاته وعاد والد اسلام إلي منزله
وذهب أصحاب اسلام كل إلي عمله طالبا للزرق في هذه الساعة التي تقسم فيها الأرزاق
جلست بسمه تقرأ وردها حتي أضاءت الدنيا من حولها بنور الصباح ونزلت إلي الأسفل كي تقوم بتجهيز الفطار
جهزت الفطار وجلست هي ووالدتها وأولادها يتناولون وجبة الإفطار وإسلام يأكل على سريره
أم اسلام.... أما يا اسلام شوفتلك حتة عروسه إنها أدب إيه وأخلاق إيه
اسلام.. عروسه إيه يا ماما وأنا متخرشم كده وكمان لسه مفشكل خطوبتي
أم اسلام.....ما انت بكره تقوم بالسلامه...دا أنا من ساعة ما شوفتها وأنا بقول يسلم إللي رباها..ونعم الاخلاق يا اسلام
لما شوفتها كنت أنت خاطب وقولت لو كان اسلام مش خاطب كنت قولته عليها وخطبتهالو وطالما إنت مش هترجع تاني لخطيبتك شوفها كده يمكن تكون من نصيبك
جت في دماغي وأنا بصلي الفجر وقولت يارب تبقي من نصيبك يا اسلام
اسلام..... أنا حالياً يا أمي مش بفكر في الجواز
أم اسلام.... ليه يا إبني.داانا نفسي أفرح بيك
اسلام.....يا ماما كل شيء بأوانه...وهييجي وقت واتجوز فيه بس مش دلوقتي
.......... .. ............ ............ ........
في منزل طارق
دعاء..... أنا موافقه ياماما علي العريس إللي متقدم
والدتها.....فكرتي يا بنتي كويس ...دا ابوكي حساه مش ميال ليه...بس مستني يسمع ردك الأول... وبعدين إنتي لسه مفشكله خطوبتك خدي وقتك في التفكير
دعاء..... أنا فكرت يا ماما
والدتها. .. إيه هي مميزاته إللي خلتك توافقي عليه
دعاء.... وايه هي عيوبه إللي تخليني ارفضه
والدتها....لما قعدتي معاه حسيتك نفسك مستريحاله
سألتيه على إللي إنتي بتتمني تلاقيه في شريك حياتك
دعاء.... إنتي أمي وأنا مش هكدب عليكي.. أنا شايفه أنه شكله كويس ومستواه ماديا كويس...ودي اكتر حاجه تهمني فيه
والدتها....بس يا بنتي المفروض تفكري في دينه قبل مستواه وأخلاقه قبل شكله
دعاء.....دينه ده حاجه بينه وبين ربنا.. وأخلاقه أنا مشوفتش منه حاجه وحشه
وبعدين لما اسلام اتقدملي إنتي كنتي مش موافقه علشان حالته المادية على قدهم
والدتها..... أنا كأم بتمني لبنتي احسن حاجه في الدنيا وإسلام كان كله مميزات علشان كده وافقت في الآخر وتغاضيت عن موضوع حالته المادية دي
............. .............. .....
في منزل حما بسمه
كانت النساء مجتمعين في المطبخ يحضرون الطعام
آمال... محسن عايز ياكل جلاش باللحمه
علا بحزن.... محمد قال هياكل من أي حاجة هتعملوها
اميره بفرحه.... محمود بقي بيحب المحاشي هنعمل تصنيفه محاشي
آمال... وحمايا بيحب الحلويات أوي. عايزين نعمل كذا نوع
اميره.. طيب عايزين نكتب كل حاجه هناحتجها قبل ما نروح نشتري علشان مننساش حاجه
علا بنفس الحزن.... خليكي يا أميره إنتي أنا هروح مع آمال
علشان متشليش إنتي حاجه تقيله
آمال....مالك يا علا تعبانه ولا ايه
علا.... لأ مفيش أنا كويسه الحمد لله
اميره....معاذ في حاجة ولا ايه
علا بدموع.... الحمد لله كويس كان ممكن يموت بسبب اهمالي.... أنا إللي اذيت إبني بإيدي
آمال.....هوني علي نفسك يا علا الحمد لله بقي كويس
وربنا نجاه . ...سيبك من إللي فات بقي وخليكي في إللي جاي
علا.... خلاص مفيش حاجه..يلي يا آمال علشان منتأخرش
ـــــــــــــــــــــــــــــــــــــــــــــ
ــــــــــــــــــــــــــــــــــــــــــــــــــ
ذهبت آمال وعلا واحضرو متطلباتهم
وقامو بتجهيز الطعام بين جو من الفرحة والسعادة
واجتمع الرجال في المساء وقامت النساء برص الطعام
أبو محسن.... اللهم صل على سيدنا محمد. إيه الأكل الجامد ده
محمود.... شكراً والله يا جماعه على المحشي كان نفسي فيه
اميره.... إحنا لو عملناه كل يوم هتقول كان نفسي فيه
محمود.... أعمل إيه بحبه
محسن..... وأنا عملتولي الجلاش شكراً والله ياجماعه تسلم ايدك يا آمال
آمال....علا هي إللي عملت الجلاش
محسن.... تسلم ايدك يا أم معاذ
علا.... الله يسلمك يا رب
محمد..... يعني كده هتاكلو محشي وجلاش سيبولي أنا بقي اللحمة والفراخ أنا بحب البروتين
اميره... كلو بألف هنا الأكل لسه جوه كتير
محسن.. تسلم ايديكم والله يا جماعه على الأكل الجامد ده يلو يا اولاد يلو قربو علي الأكل
اجتمعو على الطعام وكلهم سعيدين
............... ................... ............
في منزل طارق
طارق..... إنتي متأكدة من قرارك يا دعاء
دعاء.... آه متأكده
والدها. خدي وقتك في التفكير يا بنتي
دعاء....بقالي يومين بفكر يا بابا
والدها.... خلاص أنا هرن عليه وأبلغه بموافقتك
رن والدها على العريس وأخبره أنهم موافقين
فطلب منهم المتقدم أن يأتي اليوم لقراءه الفاتحه مع أهله ووافق والد طارق
والد دعاء.. أنا قولتله أننا موافقين وهو قال إنه هييجي انهارده يقرأ الفاتحة
دعاء.... بالسرعة دي يابابا
طارق.... طيب كنت قولتله بعد اسبوع
والدة..... طالما كده كده موافقين يبقي نقعد نأجل ليه خير البر عاجله
ام دعاء.. إحنا مش مجهزين أي حاجة يا حاج ينفع كده
هنضايف الناس إزاي دلوقتي
والد دعاء.....في دي عندك حق. انزل ياطارق اشتري دستتين جاتوه وهات حاجه ساقعه
والدة دعاء..... وإنتي قومي البسي وجهزي نفسك يا دعاء وأنا هقوم اظبط اوضة الصالون
قامو بتجهيز كل شئ وحضر العريس مع عائلته
وقامو بالاتفاق على كل شيء. وأن الفرح بعد ثلاثة أشهر
كانت دعاء واقفه في غرفتها تغلي من هذه المدة القصيرة
ولكن الرجال اتفقو على كل شيء وامتلأ البيت بالزغاريد
معلنه على انتهائهم من الاتفاق وقبول الطرفين شروط بعضهم البعض
.............. ؟..........
عند اسلام
اسلام...... إيه صوت الزغاريد إللي في الشارع دي يا ماما
والدته.....دا جاي من بيت طارق صاحبك
اسلام...... معقول طارق هيخطب من غير ما يقولي
والده..... لأ دي دعاء إللي اتخطبت
اسلام بصدمه حاول أن يداريها..... بجد مين اللي قالك يابابا
والده.. قابلت طارق كان بيشتري جاتوه وهو إللي قالي
اسلام في نفسه.... بالسرعة دي يا دعاء للدرجادي مكنتش فارق معاكي
والدته.. . اوعى تكون زعلان يا اسلام
اسلام..... لأ هزعل من إيه ربنا يتمملها على خير يارب
أنزل اسلام عينيه حتي لا تري والدته الحزن الذي بداخلها
ولكنها الأم التي تشعر بأولادها وحزنهم قبل أن يشعروا هم بها💕
تعليقات
إرسال تعليق