اسكريبت روضني بحبك💖بقلم سولييه نصار
كامله على مدونة النجم المتوهج للروايات
- انتي يا زفتة قومي ....انتي يا عملي الاسود في الحياة ما تقومي قامت قيامتك
-اووف فيه ايه يا ماما حتي يوم إجازتي مش عايزاني انام فيه !
بصتلي بغضب وقالت:
اطلعي يا بت في عريس جالك برة
ضحكت وانا بقول:
-عريس ايه يا ماما محدش قالي علي الموضوع ده
-واحنا هنقولك ليه وعلي اي أساس ؟!
- علي أساس اني انا اللي هدبس فيه وهتجوزه....انتوا بقيتوا تتصرفوا من ورايا خايفة في يوم تصحيني امضي علي عقد الجواز وتقوليلي امشي مع عريسك
-تصدقي فكرة والله لاعملها معاكي لو طفشتي العريس اللي برة ده زي الباقي ...هعمل اي حاجة عشان تمشي من البيت واخلص منك
-تسلمي والله يا نبع الحنان بتطرديني من بيتي
- يالا قومي يا بت وبلاش غلبة الراجل وأهله مستنين برة.
شديت البطانية وانا بقول بكسل :
-خليهم يجوا يوم تاني وخليني اكمل نوم
اتعصبت ماما وشدت ودني جامد وقالت بغيظ :
هتقومي ولا اجيب الحزام وانزل فيكي ضرب
-خلاص خلاص هقوم اووف
طلعت طقمي الجديد وقالت.
روحي خدي شاور والبسي الطقم ده
- يا ماما ده جديد عايزاني البسه لواحد هرفضه ليييه!! ...
- ليه انتي ناوية ترفضيه ده انا اقتلك !!!...زعقتلي جامد فهزيت رأسي بخوف وانا بقول :
-لا يا نبع الحنان ربنا ميجبش رفض أن شاء الله عشر دقايق واجهز
...
وفعلا بعد عشر دقايق كنت علي سنجة عشرة وواقفة مع ماما عشان اقدم العصير لعريس الغفلة وطبعا نبع الحنان كانت بتوصيني
-اسمعيني يا مروة تدخلي وانتي حاطة عينيك في الارض
- ليه احط عينيا في الارض هو كان كاسر عيني بحاجة لا سمح الله
- يا بت بطلي غلبة واسمعي الكلام بدل ما اكسر دماغك
-حاضر يا فوزية حاجة تانية
- لا غوري اطلعي
- انا حاسة اني مش بنتكم والله قوليلي لو لقتوني علي باب جامع او لاقيني في كيس شيبسي قالولي دلوقتي ومش هزعل والله .
بصتلي بغضب فطلعت بسرعة من غير كلام.
حطيت عيني في الارض زي ما ماما قالتلي ...بصيت بطرف عيني لقيت واحد وواحدة كبار في السن...شكلهم كده محترم واكابر وواحد شاب قاعد بعيد بيبصلي بقرف ...اتغظت منه ومشيت بهدوء وعملت نفسي اتكعبلت ووقعت عليه العصير ....
-يا لهووي انا اسفة يا استاذ والله .
-انتي حمارة يا بت انتي
- انا حمارة يا عريس الندامة وديني لاوريك
وبكل قوتي رفعت الصينية وضربتها جامد علي راسه .
-اه يا راسي ....البت دي مجنونة ومستحيل اتجوزها
-احسن يا اخويا متتجوزنيش وغور من هنا بدل ما اجيب الشاكوش واكسر دماغك اللي شبه الدومة دي
-يا بنتي عيب كده ده احنا ضيوفكم. سمعت ابو العريس بيقول كده فرديت
-ما انتوا يا حاج بصراحة ضيوف مهزقين ويالا خد الحلو ابنك وامشوا من هنا معندناش بنات الجواز
-مروة احترمي نفسك
-ما هو يا ماما
-خلاص اخرسي .
سكت وانا متضايقة وسمعتها بتعتذر للناس وتطلب منهم يقعدوا بس لقيت عريس الغفلة بيقول
- لا يا ست لا نقعد ولا نقف احنا هنمشي وبنتك دي لو آخر بنت في الدنيا انا مستحيل اتجوزها!
-اول مرة تقول حاجة عدلة من اول ما دخلت يا قفل
-شفتي اسلوبها...احب اطمنك يا طنط ان بنتك دي مستحيل تتجوز هتقعد جمبك طول حياتها
-ودي تاني حاجة عدلة تقولها من ساعة ما دخلت
مشيوا الناس من هنا وامي بدأت تضربني بالشبشب من هنا
-اه يا ماما انا كبرت علي الشبشب حرام عليكي
- انت تفضحيني بالشكل ده وديني لأربيك من اول وجديد يا مروة
جريت علي اوضتي ودخلت تحت السرير وانا بقول
-يا ماما انا مش عايزة أتجوز.....افهميني ابوس ايديكي
-ليه يا اختي هو انتي ناوية تقعديلي كتير
-بصراحة ايوة ....انا مقدرش اسيبك واتجوز مش انا بسليكي يا فوزية !
-طب اطلعي من تحت السرير نتفاهم بس
- لا انتي هتضربيني تاني.
- لا تاني ولا تالت .
رمت الشبشب وطلعت وهي بتحسبن فيا
-اووف بتحسبن فيا ليه دلوقتي ....قولتلها ميت مرة اني شخص تافه ومش قد الجواز ....طلعت من تحت السرير وشديت البطانية وكملت نوم فجأة لقيت امي فوق راسي بتضربني في الحزام وبتقول :
- انا هموتك النهاردة!.
......
مر اسبوع وامي مخصماني مهما حاولت معاها قررت النهاردة اشتريلها هدية واروح اعتذر منها تاني ...اشتريت سلسلة فضة ليها عشان عارفة انها بتحب الفضة ورحت علي البيت .
-يا فوزية يا فوزية تعالي شوفي جيبتلك ايه !
-لقيت امي بتحط ايدها علي بقي وبتقول
-وطي صوتك في عريس في الصالون مستنيكي
-تاني يا ماما حرام عليكي !
-حرمت عليكي عيشتك غوري اقعدي معاه.
-طب استني اغير هدومي واعمله عصير
- لا انا هعمله عصير وانتي زي القمر كده ادخلي اتكلمي معاه .
-طيب اووف وايه رايك كنت جيبالك سلسلة فضة بس هاخدها انا عشان مواقفك دي .
....
دخلت لعريس الغفلة عشان اطفشه زي الباقي بس وقفت مكاني وانا بشوف اجمل عيون شفتها في حياتي ...كان قمر بصراحة وقلت لنفسي:
-الجواز مش وحش برضه ما اتجوز واتستت بدل ما ثانية كده وامي هترميني في الشارع !
- لا يا مروة اجمدي هو عشان الواد موز هتضعفي الجواز مسئولية وانتي واحدة تافه مش قد المسئولية ..
قربت منه وانا بقول
-ازيك يسطا
-اهلا يا معلمة
اتصدمت وانا ببص عليه افتكرته هيستنكر اسلوبي وهنتخانق وبعدين اطفشه...باين عليه صعب مش هيستسلم بسهولة
-امي قالتلي انك عايز تتجوزني
-ايوة صح
-وانت تعرفني من فين...شفتني فين ...تعرف عليا ايه
-بسم الله الرحمن الرحيم انا بشوفك دايما قاعده في كافيه اللي علي البحر ...بتكوني لوحدك ودايما بتشربي قهوة من غير سكر ...بتحبي تقري قصص بوليسية ....بتحبي دايما تربطي شعرك ورافضة فكرة الجواز
كلامه اثر فيا بس برضه مستسلمتش
- طب علي فكرة ده مش كل حاجة...انا نفسي اشتغل رقاصة لما نتجوز
-اشغلك رقاصة وابقي الطبال
-بحب اشرب سجاير
-مفيش مشكلة نشرب سوا
اتغظت وقلت :
-علي فكرة انا بشرب حشيش
-وانا اموت في المزاج والفرفشة ...يا شيخة ده انتي جيتيلي من السما نقرا الفاتحة....سمعينا زغروطة يا ام مروة .
....
مر شهر وانا مخطوبة لأمجد وطول الفترة دي حاولت اطفشه كذا مرة بس هو كان صبور جدا لحد ما خلاني أحبه...هو الوحيد اللي قدر يروضني قدر يفهمني وقدر ياخد قلبي ....الجواز مطلعش وحش برضه.
النهاردة فرحنا كنت متوترة وانا قاعدة علي الكوشة لما شدني وقعدنا نرقص التوتر راح .
....
بعد ما دخلنا بيتنا .
-ما انتي طلعتي بتتكسفي اهو
-بس بقا .قلتها بكسوف .
-طيب الطبلة والسجاير اللي انا جايبها عشان ترقصي ونشرب سجاير ..
-امجد.متهزرش
- انا بتكلم جد قومي ارقصي يا سعدية
-سعدية ؟
-طب اشربي معايا بانجو يا سعدية
-بانجو!
-هتموتي يا سوسو
-امجد اعقل شوية
قعدت اجري وهو يجري ورايا...يظهر أن اللي انا عملته مع العرسان المساكين هيطلع عليا انا ...الله يسامح امي الل خلتني اتجوز...انا قولتلها اني انسانة تافه تقوم تجوزني واحد اتفه مني ....بس الجواز مش وحش
تمت 💖
تعليقات
إرسال تعليق