جميع الروايات كامله

 البارت الثالث

قاع_الشياطين ( البصر والبصيره )

بقلم_أسماء_ديمير

همست بخوف نانه شكوو شنوو ..

ردت حراميه حرااميه يماا ..

دفنت نفسي بحظنها حيل و راي تالا دافنه راسها بضهري ، واحد يصيح ،،، 

و يحجون بينهم بعصبيه و يكله اكلب البيت كلب ماريد زوايه ما تكلبوها ، صاح  واحد، خطواتهم القويه والهوايه عرفتني عددهم مو قليل ..

بس الواكفين فوكنه اثنين يحجون بينهم ، اصواتهم قريبه و خشنه تخوف ، بس ماعدهم توتر ، يحجون  بثقه ..

اصوات نفسهم منتظمه ، ممضطربه ابد ، عيوني تفتر بالعدم بس بخوف ، دكات كلبي مسموعه ..

اسمع واحد يصيح على واحد و يلقبه بلقب غريب ..

عقدت حواجبي اركز ، يصيحله ، باسم غريب  .. وذاك يكله اسال ابو سين ..

اثناء الحديث و تكرار الالقاب عرفت هاي احرف عربي …

مو هواي واجه واحد نتر بعصبيه ماكووو ماكوو البيت يصفر شنو معقوله جايين للبيت الغلط ..

رد ذاك لا مستحيل متاكد اني ، سكتو لحظات واسمع نفس تغير وخطوات تقريت علينه دفنت نفسي حيل بحظن نانه مرعوبه ..

حجه مو ابوجن الصايغ اركان .. 

ردت نانه اي اي هو ، عيوني انتو بستر اماتهم عوفونه ومحمد ماعدنا شي بس هالبنيات ولا حول ولاقوه ..

صوت طكه ركبه عرفتني كنبص مقابيلنه حجه بهدوء وبتحذير..

الخزنه مال ابوجن وين …

ردت نانه ماندري ..

عاط بيها اكلي خراا انتي داسال الكح** الكاعدات اني ..

بجيت اني لزمت نانه حيل ،  تالا ردت ماندري والله ماندري ..

توه تحجي سوده عليه و جرها عاطت تصرخ جلبت بيده كوه ابجي وهيه مجلبه بيه تعيط ، عاط الخزززنه وين ..

ماحجينه بس نبجي ، عتها حيل و صرخت مرعوبه ..

بجيت حجيت بالمكتب بالمكتب وره الكتب الخزنه ..

سكت و صوت الخطوات وكفت ، بجيت بهدوء ، اندفعت تالا عليه وحظنتها لصدري وهيه تشهك ..

تقدم باتجاها بخطوات ثابته و عتني من زندي حيل خرعني خليت اديه على وجهي احتمي روحي  ..

حجيت والله ماعرف شي بعد مو كلت بالمكتب بالمكتب والله وره الكتب ..

نانه تتوسل تكله بت ضريره عوفها يما شرايدين منها …

                                  

              

                    

عتني حيل  جسمي يرجف مرعوبه ؛ مجلبه بيده اريد يهدني عثرت وكعت على وجهي ورجع جرني حيل وكفني ، تالا تبجي وراي وذاك اندار ويفشر عليهن …

جرني باتجاه المكتب ، ودفعني حجه وين بالضبط يله ..

اشرت  ،الجهه بصف شباك ، بعد عن شباك متر ونص بالطابق الثالث للمكتبه ..

خطواتهم اتجهت للمكتبه اني لميت اديه لصدري احمي نفسي ، صوت فتحته المكتب وازاحه الكتب بقوه وربد الكتب بالارض ، جسمي يختض ، اريد ارجع لنانه خايفه حيل ، 

توه ارجع خطواتي ليوره اجاني صوت رعبني اثبتي بمكاانج لج .. 

غمضت عيوني مرعوبه ، ودنجت راسي ..

حجه اكول .. هاي بيها رمز ..

ثواني سكتو اني رفعت راسي ، فريت راسي بخوف ، خطوات تحركت ..

بلعت ريك ، صوت نفس قريب مني ، قربه فززني من كال الرمز ياحلوه ..

ماع…

بعدني ممكمله حجه ، اختج لو الرمز ، خطيه اختج بعدها صغيره ..

نزلت دموعي بخوف ..

الفلوس تروح وتجي ، بس اختج اذا ماتت شيردها فكري زين ..

جرني من معصمي باتجاه الخزنه ، وكفت كبالها ابالع ريك ، شال جف ايدي وخلاها على البورد وحجه يله بساع ماعدنه وقت …

تلمست البورد اديه ترجف والله ، اديه مو ثابته ابد دست الي اعرفه و طلع صوت من خزنه يرفض الرمز ..

حجيت والله مااعرف مااعرف ..

حجه جيب اختها ..

بجيت عفيه والله ماعرف ..

رد بخشونه .. جربي ..

صوت تالا عاطت وتانه تحجي يمااا بداعت امهاتكم شتردون منه احنه بس نسوان اخذو تردو وعوفونه ..

خليت ايدي على بورد اكتب وهم رفض بجيت بخوف مااعرف وربي ، ماعرف ضيعت الرمز ماذكره ..

صراخ تالا رعبني ، بجيت يمامااا ، عفيه خلي يوخر عنهاا وربي مااعرف ..

حاوولي حااولي هاي اخر محاوله وبعدهاو تقفل الخزنه لمده سنه واذا قفلت اقفل عمرج و عمر اختج سوه ..

ضميت جف ايدي الي يرجف لصدري …

انداريت على مصدر صوت بجي تالا تبجي مخترعه ..

لزم جف ايدي ايده خشنه وكانو لابس جف ،  وانجر مره ثانيه ضغط عليه ، هو رمز حاولي تتذكري ، بعدها ترجعين انتي واختج تعيشون بامان ، الخزنه و الي بالخزنه ماراح يفيدجن اذا صار بيجن شي بشع صح …

هزيت راسي اي ..

يله سبااعيه ..

غمضت عيوني اتذكر الرمز الكاله بابا ، بس معقوله ماغيره ضل على حاله .. 

            

              

                    

٧٨٩٥١٢٣ …

كتبه عليك يالله ..

صوت ززززززن وتكه مال خزنه رجفت اصابعي من انفتحت ، رجعت وجهي باهت الخزنه كلشي راح يروح ويضيع معناها …

تالا سكتت و صوت ركض باتجاه الخزنه ، اندفعت حيل ليوره و يكله وين البقيه بعد ..

شدراني ..

اجاني صوت بس ذني ..

همست باسف شنوو ..

الفلوس ..

ماعرف والله وداعت اهلي مااعرف ..

نانه صاحت من بعيد يماا وحده ضريره و ثانيه طفله شعرفهم بفلوس اهلهن اخذو تردو وعوفونه بحالنه يستر على اعراضكم انشالله …

حجه واحد عليهم ..

حجيت همس اتوسل .. اكو تراجي والله حتى ثمنهم مو شي خلوهن هذني ذكره الوحيده من بابا ، رفعت محبسي مثل هذني شكلهم مثل هذا والله مو غاليات اصلا بس بقو هذني واخذو تردو  ..

ماكو رد ..

اندفعت حيل ليوره وكعت على تالا حظنتي و سكتنه نتفس بخوف ..

صوت تعبي بالكراتين ، و يكله شكد يطلعن ..

نشوف لا تستعجل .. 

لميت نفسي بحظن تالا الي تهمس باذني اخذو كلشي اخذو كلشي صفينه على حديد حتى لابتوب اخذو …

دنجت راسي اشهك ، الربد مال صفطات الفلوس بعثرت روحي ، اسمع سحل كراين بالارض و ربد بيهن ، ماطولو دقايق و شالوهن وطلعو ..

والله الالم الي بروحي مو قصه ماده ، بس شكد ضاقت بينه دنيا ماتجرأت افكر لو تفكير بالخزنه ، لو احاول افتحها واسحب منهم ، حسيتهم ذكره و استخصرتهم بينه ، تالي راح يرحن هيج ... 

قبل لايسدون الباب صاحو قسم بالي خلقجن اذا تحركتن منا لربع ساعه ارجع اكتلجن خلاص افتهمتن ..

نانه حجت و الله منتحرك منتحرك يمااا ..

طلعو واخذو كلشي ثمين وياهم ، اني بحظن تالا دخت و غمضت غلبني التعب و الارهاق فجأه ..

نانه تعيط بصوت على ساري و تالا تهز بيه تكلي موو وكتج اكعدي ساري يمكن مات ، كوه سيطرت على دوخه ، وخرن منها وحجيت شوفي اتصلي على الاسعاف على شرطه اي شي امشي ..

ركضت و عافتني كاعده بالارض وسانده نفسي بتعب على الحايط ماكدر حتى اكوم اشوف ساري شبي ، نانه تعيط و تصيح يماا ساااري بعد عينها يايمه اكعد.حاجيني ..

لميت رجليه لصدري ، شكد الحياه بشعه لعد ، همزين ماجاي اشوف المنظر جان متت بمكاني ..

ماعرف شكد مر بس الوقت جان بطيئ حيل لحد.ما سمعت صوت سياره الشرطه و صفارات انذارها ، اجت بعد فوات الاوان ، شراح يسون النه يعني ..

            

              

                    

كمت لحيلي اتلمس الحياطين اتجهت على نانه اشوف ساري شبي ، اسامه  اخر شي طلع من غرفه يحجي شكوو ....

تالا ركضت تفتح تصيح لعناصر شرطه و تكللهم هناا اهناا الحكونه ضربو ساري مات ساري ..

نانه تبجي كعدت بصف مصدر صوتها و طخيت بيها همست نانه شوو شبي ساري ..

بجت يايمه وجها ماينشاق من دم راح اوليدي يما راح ..

مديت ايدي باتجاه الارض اجت اصابعي على صدره لساري و جسمه دافي …

همست ساري شبيك و لك ، تلمست صدره يصعد وينزل حجيت ينتفس نانه يتتفس ..

اديه صارت بيها رطوبه رفعت اصابعي لخشمي دم ريحه زفره …

دخلو الشرطه يحجون ها سلامات خما اكو شي شبيكم يله احنه هنا انتو بامان ..

كلامهم رسمي مابي حياه مابي امان من صدك ..

يمشون بحذر و يترقبون البيت بخوف ، عناصر شرطه نفسهم يفتقرون للامان شلون احنه حنحس بالامان بوجودهم او عدمه ..

اجرائات روتينه و اجت الاسعاف  تشيل ساري ، الي ضاربي بالاخمس على وجهه ..

الشرطه سوو تحقيقات لل٥ الفجر همه يفترون بالبيت و يصورون ، العالم وجوارين التمو  ..

خاله ابويا اجت هيه وابنها ابو يقين من سمعو بيت الصايغ اركان انباك ..

بالساعات احنه كاعدات بالارض مصدومات ، ام ساري ركضت وره ابنها للمستشفى مفجوعه حقها ، ابنها ماله ذنب ينضرب بهل شكل ليش ..

؛ وخاله ابويا اجت احتظنتنه و كالت اني هنا يمكم يماا ميخالف بالمال ولاعيال ميخالف ..

تسجلت القضيه و تحقيقات سرقه و اعتداء بسلاح  وخلص ، كالو راجعو عليها ..

مجرد ماطلعو باب البيت اني قريت سلام على ممتلكاتنه و الفلوس راحت ، اصلا راح تتسجل باسم مجهول و المتهم مجهول ..

تسجيلات كامرات ممبين منهم شي لان لابسين اسود وملثمين وجاين بسياره مقفله مال البان ..

ساري بالمستشفى اربع خياطات بوجهه ، و خياطين براسه ، يومين ويله صحه ..

خاله بابا ماقصرت اما ابنها ابو يقين بالنهار ياكل و يشرب و يفتر باليل يطفر لبيتهم يخاف ..

.بعد هاليوم احنه تعلمنه درس انام كلنه بغرفه وحده و البيت تتقفل شبابيكه و بوبه ووالكتيبه الحديد مال البوب بقفل ..

خاله بابا ايام تقنع بينه نترك البيت ، تالا باليل تبجي مرعوبه لحد ما كلت كاعدتنه هنا مالها داعي واحنه بس نسوان ..

كالت افرغ الكم غرفه يمنه بالبيت بالطابق الثاني انتي و اختج ، لحد ما اخلي ابو يقين يكمل اوراقكم وترحون لعند عمكم بهولندا ..

            

              

                    

مشكله كلشي يرادله اجرائات ، كلشي لازم انته تمشي عليه ، اني اعتبر غير مؤهله و تالا قاصر . ماعدنا غير ام ساري و هاي مايعترفون بيها بالقانون ..

خالاتي صح علاقتنه بيهم شبه معدومه بس عتبت لان ماراجعو علينه ، لو عمي معقوله ماسمع بينه لحد هسه .. 

تالا مشت لمت الغراض و الهدوم والاوراق المهمه ، و اجه ابو يقين اخذنه و قفلنه البيت دكينه على ام ساري نطيناها علم كالت بعد احسن ، امن عليجن هيج ..

قبل لا نعوف البيت ، حجه ابو يقين اروح اودي ابنها اسامه ليمها ..

رديت لا عوفه هو متعود علينه مايستغرب ..

رد لا لا بيتنه هناك كله جهال و هوسه وجوز ينحصر عند امه احسن ..

اضطريت اخلي ياخذه يودي الها ، كلت كم يوم و تفرج انشالله ...

طلعت المفاتيح وقفلنه البيت ، صوت السركي لو فرت المفتاح توجع الروح ، لازمه جنطه الاوراق مهمه ، و ابو يقين شال جنط الملابس ..

حجه جيبي هاي هم ..

رديت لاا اني اشيلها ، اشكرك ..

صعدتني تالا بالسياره ،  مشت بينه السياره ، خليت راسي جتف تالا ، حاظنه الجنطه على صدرها مال مدرسه ، همست يم اذني مدرستي شلون ..

تدبر انشالله ، لايضل بالج ..

بيت خاله ابويا يبعد ساعه عن منطقتنه و صلنه و نزلت ، شلت العصا مالتي فتحتها ، وكفت على صفحه بين ماينزلون غراضنه ..

جراتني خاله ابويا و دخلتني وراي تالا ،مجرد ماتدخل للبيت اجاني صوت و عياط جهال و الهوسه والفوضى مالتهم ..

وام يقين تصيح و لك نعاااال تعال ليش ذاب الشكر بالكاع وملتم النمل ..

وذاك يصيح خليت فوك زبد و كع مني شسويلج يعني ..

صاحت بصوت عالي، دالعب نعال على حلكك اوكفلي ، ربدات رجليها و هيه تركض وصلت ليمنه و شهكت ياااااا بنات اركان ذني ..

تقربت تضحك ياعمه جبتيهن هلاا بيجن هلاااا ..

جرتني من زندي و اخذت تمطك بيه ، حجت عنج عنج اني اشيل جنط وخري ..

اخذت جنطه من ايده حيل و مشت ..

دخلت وراها اني و تالا ، كعدنه بالصاله مثل الغربه ، لامات نفسنه  ام يقين صاحت دصبلجن اكل اكيد ميتات جووع سوده عليه ..

ابو يقين يصيح لا لاا اجيب من بره ماياكلن الا الغالي هذني يدلل اشيلهن على راسي .. 

ابتسمت بخجل ، راح ساعه واجه جايب اكل من بره دجاجه و صمون و طرشي .

خاله ابويا خلت جدامي الاكل ، و تكومو جهال فوكانه ..

الله يشهد.مو نفس ضيكه لا ابد بس بعدني ما ماده ايدي و حسيت على واحد داس على فخذي بعكسه و كعد ياكل من ماعوني نوب يمطك ..

            

              

                    

وصوت لوك مالته باذني لعبت روحي بس سكتت ..

حجت ام يقين ياا ولك عليووي اشتعلت صفحه امك مال بنيه لا تاكل ، تاكل سم كوون كوووم ولك و نطته هطره لدرجه الهوى لفح و جهي من قوتها ..

وخر من يمي يصيح اووووو دناكل لحم صار شكد مماكلي شبيج ..

همست خلي ياكل ماجوعانه اصلا و الله بالعافيه تعال اخذه حبيبي زحت الماعون من كبالي و رجعت ليوره اكول مجوعاانه و الله بالعافيه   ..

صوت خواشيك و لوك اطن براسي ، بلعت ريك ودرت وجهي عنهم ، صوت جهال ، وهوستهم ..

يمكن الي الله نطا بصر ماينتبه على هذني التفاصيل او مايسمعهم  لان صور تشوش عليه ..

بس مثلي فاقد لهل النعمه حتى طبه الرجل يحس عليها ، صوت الاكل لوك وطريقه المضغ ، نبره صوت الحنين لو عصبي لو بغيض ، كلهن احس بيهن و مركزه و ياهن ..

لان ماعندي طريقه تواصل ويه محيط غير سمع و الاحساس و الشم و ذوق ..

تعبت حيل و البارحه مانايمات و هبطه تعبت و نهك جسمي ..

حجيت اريد انام اذا متصير زحمه ..

حجت ام يقين اي عيوني تدللي تعاي بغرفتي ..

لا لاا ماريد اسوي عليج زحمه خليج كملي اكل ، بس فد ساعه ، افرشيلي حتى لو هناا ، 

لا و الله مايصير ، حجت و كالت يالله و كامت من السفره ، تقدمت باتجاهي 

و تلزمني من جف ايدي عود تكومني و لان ايدها كلها دهن مال دجاج ..

غمضت عيوني حيل ، كزيت على سنوني ، جرتني و مشت وياي ، ريحه زفرررره يااالله ريحه زفررره …

جرتني تعتعت عبالها كسيحه مو امشي بس ماشوف ..

فتحت الباب و دخلتني لغرفتها جرت الغطا و تكلي بله تمددي داغطيج ..

حجيت افرشيلي بالارض واكفه حيل انام بفراشكم و الله ..

لا عيوني شكوو بيها احنه اهل انشالله ..

كعدتني على جربايه كوه تكلي تمددي عيوني ، تلمست المخده بصفي ياابسه حيل ، حجيت افضل والله اذا تفرشيلي بالارض ..

يااا بس لا تتنكسين منه ..

ابتسمت لا بس اشوفها صعبه ..

كولي يالله نطتني دفعه و نومتني كوه على مخده و شمرت الغطا فوكي ..

وتجيني ريحه من الفراش ما اتمناها لعدوي ، ريحه عفن عبالك الفراش ممغسول لو ما شايف شمس ، خلت الغطا على على وجهي ..

بعدته عن وجهي بسرعه قرافانه ولعبانه روحي ، كمت لحيلي ماكو صوت وماكو حتى نفس بالغرفه  ..

حتى نومه طارت من عيوني بعد هالريحه ، عبالك كن مال دجاج ، 

مددت ملا جاره شسوي و خليت اديه على خشمي اهود ريحه هاي ..

            

              

                    

والله مو تبطر بس اكو شغلات ماينسكت عليها تحز بنفسك ، ريحه البيت ابسط شي ، ريحه اكل و جكاير ابد ماكو معطر لو ريحه طيبه لااا ..

لو الغرفه هم جكاير نوب الفراش مرطب عبالك عفن ، يااربي ..

وين احنه بيتنه ، نانه تغسل البيت وتفتح الشبابيك حتى يشمس البيت ،و تمسحه بديتول و تخبط وياه معطر ، حتى الارضيه لاتطلع منها ريحه زفر لو رطوبه . 

و البيت يتبخر يوميه ، حتى مطبخ بعد الطبخ لازم ، خلي امي تشوف لو تلمح ريحه لو وصخ بذاك اليوم تكلب دنيا ..

مو نحسه بس لان ماعدنا احد يوصخ فليش البيت مو نظيف ..

غفيت على صور الذكريات و صوت امي شوي ، مالحكت حتى احلم و حسيت بيد تتلمس  ركبتي ، فزيت بسرعه حجت تالااا ..

ماكو رد ..

بس اكو طبات رجل خفيفه ..

حجيت بخوف و ستغراب منوو هنااا تالا ..

طبه رجل خفيفه بس اسمعها وكانو شخص ديتكرص ، جهال بره تتتعايط يلعبون ..

حجيت يقين هذا انته  ، خاله ..

انفتحت الباب بهدوء و انسدت .

.كعدت لحيلي  لفيت اديه على صدري ، شوي و كمت ، صحت تااالاا ام يقين ماندل حتى الباب وين بالضبط و كم خطوه و اوصل الها ..

مشيت هيج عليك يالله ،  انردمت بالكنتور تلمست الكنتور امشي بحذر لحد نهاايه و صلت للحايط استمريت امشي و اتلمس بالحايط وصلت لكومدينو ، وكفت هاي شنو ..

مشيت اكمل مشي و تلمس وصلت للجربايه نوب جنت نايمه عليها ياللهي سهلها شنو جاي افتر بدائره اني صحت تاللاااا ..

دخلت تالا تركض هاا ..

برطمت اريد ابجي وووينج مو جاي اصيح عليج ..

جنت بالطرمه كاعده و يه الحجيه ..

دتعااي طلعيني مناا ..

حجت مانمتي ..

غفيت شوي ..

ماصار ساعه  نومتيش هاي ..

دكي على ام ساري دنشوف وين صارو .

طلعنه يمهم بره شوي و حجيت للحجيه خاله ابويا  دكو على ام ساري دنطمن على  وضع ساري  ..

حجت بس يجي ابو يقين اكله يدك لايضل بالج .

حجت ام يقين توه جان هنا و ين راح .

كال اجيب كرزات واجي ..

 بس اجه كناله ودك على ام ساري ، ردت هيه اي زين بس يرادله مراقبه ، وضعه مو مستقر ..

كتلها اسامه خما معذبج ادز ابو يقين يجي ياخذه  ..

ردت لا زحمه يمه يطلع ساري والله كريم ..

            

              

                    

محتاجه شي ام ساري كولي الله عليج .

ماعلينه شي ابوعبد هنا ، بس ادعو لساري الله يكومه بالسلامه ..

همست يرجع بسلامه انشالله يقر عيونج بشوفته .. 

حجيت وياها شوي و سديته ، حجه ابو يقين منو هذا ابو عبد ..

ماعرف يمكن كرايبهم ..

بيومها نمت اني و تالا ويه الحجيه بغرفتها ، ابو يقين كال يومين وافرغ الجن الغرفه الفوك و انضفها هم …

ام يقين حظرت النه ملابسنه ، تركض جوانه ، وجهالها هم ، بناتها مكابلاتنه وكاعدات ..

ثاني يوم دوام ، حاجيت تالا ملابسنه وين و غراضنه ..

ردت عد ام يقين هسه اجيبهم ..

شسوين عدها ..

غير من اجينه هيه تلكتني اخذتهم ..

راحت تحجي وياها مشيت وراها على كيف و على نفس خطواتها حتى ماعثر ..

وصلت يم حايط و كفت لازمته ، اسمع تالا سالتها على حاجاتنه ..

ذيج راحت للغرفه و تكللها اي اني ضميتهم خاف جهال يبعثروهن الكم ..

سمعت صوت خرخشه مفاتيح و طكه باب كنتور ، عقدت حواجبي عزا قافله على حاجاتنه ..

حاجيتها من بعيد ام يقين فدوه ماريد اتعبج بس الغراض جيبهم يمي هنا جوه اديه .

صحت لا لااا شنو جوه ايدج غير جهال يسوهن لعبه لو ملوطه ، و الله هذا كنتور يمج و يم اختج خلن غراضجن بي و اقفل عليهن …

طلعت تالا ملابس الي و الها ، و جنطنه و تفوناتنه رغم مابيهن رصيد صار شكد ماشاده بيهن ..

لبسنه و طلعنه ، ام يقين خلف الله عليها الواحد يحجي الحق ، خلت الي و لتالا لفات جبن و كرفس ، ماعرف هاي شلون بس مشكوره و كفت تحجي وتكول سويت الجن ويه جهال كل وحده لفه جبن و كرفس تردن بطل ماي ..

ردينه اني و تالا لااا خلفه عليج ..

ركبت بالصدر و بحظني بنته لابو يقين ، و تالا و بقيه جهال ليوره انمردو مرد ناس فوك ناس عده خير من الله هو ابو يقين ..

بنات ٣  ولد ٢ ، فاطمه  وايه و زينب ، والولد يقين و علي كلهم بالمدرسه  ..

وصلنه تالا بعدين جهاله ، و طلع بيه للمعهد نطيته عنوان المعهد ، صافنه و شارده بوضعنه و اجاني صوت ابو يقين ..

بنبره ضحكه شلوون عطر بالمخده البارحه الا يصفن ..

مافتهمت انداريت على جهته وحجيت بستغراب ، العفوا ..

صاح بصوت عالي يسمعني عباله اني طرشه يمكن خبطت عنده ، اكوووول العطررر العطررر ..

شبي ؟؟!

ضال بالمخده معلك يدووخ و الله اليل كله ماانمت بسببه ..

عطر منو  ..

عطرج انتي هو هذا عطر لو مال شعر لو شنوو دوخني ..

والله مافهمت يعني نقرف يقصد لو طيب لو شنو ..

سكتت مو فاهمه و جهي خارط ..

ضحك اي عمي كله عطورات فرنسي اكيد هيج قابل مثل عطرنه ، خبط لو دهني و بالصيف يسل و يلزك على العلباه ..

انتو حتى شيشه العطر نفسها تنكرط مال اخليها بجام خانه و اتفرج عليها ..

ابتسمت بفشله ماعرف ارد علي …

رد ها يابه شو ساكته ..

رديت انته جنت بالغرفه من جنت نايمه مو ؟؟!

سكت فجأءه بعد ماجان طالع صوته و يضحك ، كح حيل جن توتر ، ركزت وياه عيوني تفتر ، ما رد كانو ماسمعني ..

خليت اديه بحظني افرك بيهم ، درت وجهي عنه و سكتت ..

وصلت للمعهد ونزلت راد يلزمني يساعدني كتلها ادبر نفسي بس انطيني عصاتي ..

جريتها منه و مشيت بضوجه ، شعري يهف على وجهي ..

همس دساعدج شبيج لزمني من زندي يتلمس نترت ووخر ، كتلك ماريد ..

شعري دخل لحلكني نوب بسبب الهوى ، ابتعد هو وخر ، ثواني سمعت سيارته تحركت ..

همست طايح الحظ  ، شعري زعجني وترني نوب ما لميته اليوم عفته ، بس الهوى ديطيره على وجهي ..

عندي ماشه بالجنطه ، مشيت و كفت على رصيف باب المعهد ، كفت على صفحه ادور بالجنطه على هاي المصخمه ، لزمت موبايل لو كلينس لو قلم ، لو عطر ..

وين الكاها هاي ، لكيتها دالم كذله و اخلي ماشه .. 

خاله ماشه بحلكي و رافعه اديه الم بكذلتي ..

سمعت صوت قريب مني حيل و همس ميرال صباح موو ..

فزيت وكفت اديه رمشت بهدوء ، نزلت اديه وخرت الماشه من بين شفايفي ، رديت العفوو منوو ….

طخ جتف و احد بصدري وكانو اني اكفه مقابل جهته اليمنه …

ابتعدت شوي مستغربه ، منوو ؟؟!

ماكو رد بس اكو حاجز بيني وبين الهوى متأكده ، توه الهوى يطير بكذلتي هسه وكف معناها بعده و اكف ، بس نفس ضعيف او هادئ..

فزيت من لزم جف ايدي ، ردت اجرها جلب بيها حجه اهدئي ، فتح كفي و خله بي شي ..

ضليت جامده خايفه ..

رفع ايده وثبت الماشه براسي ، ابتعدت عني شوي  خليت اصابعي على حاجه الي بجف ايدي ، لان تراجي مالتي الي اخذهم الي بابا ..

رفعت راسي باتجاهه  منوو انته ..

لفحني الهوى غمضت ، وين رحت تعاال انته منووو ؟؟!

يتبع ...

بقلم_اسماء_ديمير 

باجر ينزل بارت هديه ..

تعديل المقال