 |
نوارة الزين
البارت التالت والرابع
(بيت كامل العزايزي )
كامل: احم ..بسم الله الكل هنا ؟
مصطفى: ابدأ ياحج كامل الكل هنا .
عثمان : الحج ياحج كامل .
كامل : في ايه ياعثمان.
عثمان: زين علام حفيد رضوان بيه برا .
كامل بإستغراب: وفيها ايه خليه يجي .
عثمان :ياحج دا جي بأسطول عربيات ورجالة ووسلاح كأنه رايح حرب .
كامل بتعصب : كيف دا ؟ مفيش احترام بعد كده نشوف حكايته تعالى معايا ياحج مصطفي نشوف الموضوع دا.
حازم : احنا اللى جينا .
اكمل: ايه اللى انت بتعمله دا ياود حسن .
زين ببرود مخيف وهو يقترب من كامل : ود حسن بس تربيه رضوان .
شحب وجه كامل وكل الحضور ماعدا مصطفى وعلي فقد كانوا منبهرين من تصرفه الجرئ.
كامل : وينفع تخش بيوت الناس بالطريجة دي يابن الاصول.
زين بإبتسامه جانبية: مكنتش عامل حسابي اجي بيوت الناس كنت معدي انا وحازم ولجينا لمه سألت جالولي في معاد وكل عيل البلد موجودة ..كيف كل العيل موجودة واحنا مش موجودين ؟.. حتى حازم جالي انهم مش مجدرينا بس جولتله لا احنا مش محتاجين حد يجولنا تعالوا فجيت اكيد مش هتعملوا معاد واكبر عيله في البلد مش موجودة .
حازم بسخرية : ولا ايه ياعامر؟
عامر بخوف وتوتر : هاا اكيد.
مصطفى: طب ايه الرجالة والسلاح دا كله ؟
التفت زين لمصدر الصوت : دا العادي حتى لما جدي كان عايش بس هنمشيهم ...حازم .
حازم : تمام .
زين : مشيتهم ياحج يلا نبتدي.
فضل : مبجاش غير الصغار اللى هيتكلموا في المشاكل .
حازم بإندفاع : احنا مش صغار ي...
زين بهدوء أشار لحازم ليصمت : الله يرحمك ياجدي طول عمري بيجولي في كلام ميتمسحش غير بالدم بس معلش نبتدي ولا .
حازم بحزن مصطنع: ليه كده يازين جلبك الطيب ده هو اللى هيودينا ف داهيه .
فضل بغضب : عاجبك كده ياحج شايف .
كامل بإعجاب : شايف اتفضل يازين عشان نبدأ واتفضل انت كمان ياحج فضل .
فضل : انا معدش في مكان فيه الواد جليل الربايه ده .
حازم بعصبيه : شكلها ليله مش فايته.
فضل : كيف تجول كده متعرفش انا مين ؟... انا سيدك وسيد اللى جابوك اسكان انت ولا اللى جانبك ...
زين بنظرات من يراها يقسم انه هالك امسك بالعصا التي يمسكها فضل وبنبره كفحيح الافاعي: مليش اسياد ..سيادي جدي وابوي والاتنين ماتوا ومعنديش مانع ابعتك عندهم تسألهم بنفسك .
كامل : زين احترم البيت اللى انت فيه وحجج عليا اتفضل وياحج فضل لو مش هتحترم اي حد هنيه بابي مفتوح .
فضل : بتطردني من بيتك ياكامل.
كامل بغضب : حج كامل انت بتتكلم مع كبير العزايزية.
خرج فضل بغضب من المنزل وبدأ الميعاد بنظرات الإعجاب الموجه لزين خليفة الغول كما كانوا يلقبون جده .
________________________________
علي : زين دا حكاية يابوي .
مصطفى: حفيد الغول عايزة يطلع كيف .
علي : بس باين عليه راجل بصحيح اهو نواره اختي عايزة واحد كيفه .
مصطفى بصدمة: ليه بتقول كده؟
علي بحزن : مش عارف ليه جولت كده .
مصطفى: كيف مش عارف ؟
علي : مالك يابوي والله ماعرف ليه جولت كده هى طلعت مني .
مصطفى: خلاص دوس بنزين عايز اطمن على اختك.
_______________________________
ليلى : علي ليه اتأخرتم ؟
علي بقلق :نواره فيها حاجة ؟
ليلى ببكاء : لا الحمدلله كويسة اديتها منوم ونامت بس انا اللى تعبانة اوي ياعلي والله حاولت احوش عنها بس معرفتش و ...
علي بحنان: اششششش اهدي اهدي ياليلى انا عارف انك بتحبي نواره مش عايز اشوف دمعه في بحري.
ليلى : بحرك؟
كور علي وجهها بين يديه : عيونك بحري اللى بغرج فيه بحر ادفع عمري واعرف سحرالي عند مين يابت العزايزة مخلي جلبي مش شايف غيرك ولا بيسمع غير صوتك .
ليلى بدموع حب : بحبك اوي ياعلي .
علي : قولت مفيش دموع اطلعي فوج وانا هشوف نواره واجيلك.
ليلى : اه صح فين عمي؟
علي : في الجنينه الخلفية بيكلم حد .
________________________
مصطفى: اعمل ايه ياابنوب؟
ابنوب : مش عارف ياخوي بس عموما انا معاك ف اي قرار هتاخده .
مصطفى: طب سلام انت .
اغلق الخط مع ابنوب واتجه لغرفة نواره فتح مصطفى باب الغرفة وكانت نائمة لكن اثار العنف تملئ وجهها اقترب منها وقبل مقدمة شعرها .
مصطفى بحزن :حجك عليا انا اللى مجدرتش احميكي واحافظ عليكي سامحيني بس خلاص هعمل اي حاجة بس تكون بخير وف أمان .
_______________________________
ملك : هو بصحيح اللى اتجال عليك يازين ؟
زين : ايه اللى اتجال ؟
كريمة : بس ياملك خالي اخوكي ياكل لجمة .
ملك إعتراض : استني انتي يا كريمة ... البت ايمان جالتلي ان ابوها بيجول انك وجفت المعاد على رجل وخاليتهم زي الطلاب اللى ف راوضة.
زين بضحكه: راوضة!!
محمد : وانا كمان سمعت عن الموضوع من الرجالة .
كريمة: كفاية كلام اللى حصل حصل يلا خلصي وروحي جامعتك.
زين : احمد.
احمد : ايه يازين ؟
زين : مش جولتلك امبارح اجهز المغرب .
احمد : جهزت بس سمر كان عندها معاد مع الدكتور وروحت معاها بس حازم جام بالواجب .
زين بعصبية حاول التحكم بها : معاد دكتور ... خالي سيدة تجبلي الجهوة ع المكتب ياحجة.
وقف زين استأذن وخرج بغضب.
احمد : انا عملت ايه ؟
كريمة : لا مفيش فوت معاد مهم وسيبت اخوك مع كبرات البلد لوحدة وروحت مع السنيورة للدكتور .
ملك : انا همشي.
___________________________________
ابنوب: هتجدر يا مصطفى.
مصطفى : مفيش حل تاني بنتي بتروح مني .
ابنوب : ربنا معاك.
جمال : وصلنا ياحج .
مصطفى : انزل واستأذن عشان ندخل .
__________________________________
سيدة : زين بيه .
زين : نعم يا سيدة.
سيدة : الحج مصطفى الجناوي برا واجف على البوابة مستني الإذن.
زين : مصطفى الجناوي وسيبينه على الباب بعدي.
خرج زين للبوابة لستقبال مصطفى.
زين : عوض افتح البوابه ... اهلا نورت المنطقة كلها ياحج مصطفى .
مصطفى: المكان منور بأهله.
زين : طب اتفضل مش هنفضل واجفين على البوابه.......
تحب نجعد فين .
مصطفى: ياريت ف المكتب الموضوع اللى جايلك فيه مهم جوي يازين.
زين بإستغرب: تمام .... سيدة جهوتك ايه ياحج؟
مصطفى:ساده.
زين: سيدة اتنين ساده...اتفضل .
مصطفى بإرتباك : لو وراك شغل انا ممكن اجيك وجت تاني.
زين: جيتك على راسي ولو ورايا شغل الدنيا افضيلك نفسي.
مصطفى: دا العشم ...الموضوع......
______________________________________
علي: كيفك يانوارتي ؟
نواره: بخير الحمدلله ....انت كيفك؟
علي بمزاح وضع رأسه على ساقيها: احسن منك .
نواره بإبتسامه رقيقه ارتسمت على شفتيها لمداعبه اخيها: يارب دايما تكون احسن مني .
علي : ها .. لسه جسمك واجعك؟
نواره : شوية المرهم اللى كتبه دكتور عزت ريحني علي عايزة اسألك على حاجة.
علي : عايزة ايه ؟
نواره : صابر عامل ايه ؟
علي بغيظ من طيبه نواره : متسأليش ياريت فعلا ابوكي كان جابها ف جلبه وريحنا .
نواره : بعد الشر مهما كان دا اخونا ياعلي متجوليش كده تاني وابوك زودها في ردت فعله .
علي: ابوكي وجفهم عند حدهم مفيش حد هيبصلك بعد كده.
نواره : وانت فاكر ان دا هيبسطني انا اصلا مديجة عشان هما مش راضيين يحبوني كيفك لجيت حاسه اني سبب الحزن ف البيت دا و .
علي: اششششش هيفيدك بإيه حبوكي ولا لأ انا بحبك وابوكي وليلى وكل البلد بتحبك عمرك مكنتش مصدر حزن يانوارتي دانتي نواره البيت وفرحته بجولك ايه متيجي ف حضني .
ليلى بتمثيل : كده ياقره عيني بجى سيبني مع البوم تحت وانت جاعد مع نواره هنا وكمان بتحضنها شكرا يابن الاصول.
شدها علي وعانقها بجانب نواره : ارتحتي كده.
ليلى : اه .
علي : اجوم انا احسن حد تاني يخش ويجولي احضني.
_________________________________
Part4....
مصطفى بحنيه: نوارتي عامله ايه دلوجتي؟
نواره بإبتسامه: ابوي اتفضل واجف على الباب ليه ؟
مصطفى: كبيرتي ياحبيبه ابوكي كيف ادخل من غير استأذن.؟
نواره : كبيرت ماشي عموما الجواب على السؤال بتاع عامله ايه انا بخير الحمد لله انت كنت فين طول النهار مش في البيت وسألت صباح جالتلي خرج من بدري ؟
مصطفى: روحت كذا مشوار ليه مش جاعدة تحت معاهم حد جالك حاجة ولا بصلك بصه وحشه ؟
نواره : لا والله محدش كلمني انا بس كنت بجرا كتاب دكتور بيحكي عن كل حاجة بتحصله في غرفة العمليات اهو احسن من الجاعده جربت انسى من جلت الاستخدام اللى اتعلمته.
مصطفى: وه كيف تنسي عايزة مريض ينعش الذاكرة خمس ثواني اضرب جمال رصاصة في دماغه وانتي عالجيه.
نواره بضحك : لا بلاش المساعده اللى تودي في داهيه دي.
مصطفى: انتي حره انا كنت عايز اساعد مع اني خايف اطخه تجي في دماغه وترد فيا.
نواره بضحك هستيري : بصراحة كل اما اشوفه افتكر الجلجاس سبحان الله هو احنا دلوجتي بنتنمر صح .
مصطفى بصدمة مصطنعه: احنا لا لا كيف تجول كده احنا بس يعني اممممممم بصراحة بنتنمر .
نواره : والله حاسه من كتر التنمر اللى بتنمره هخلف سلحفة .
مصطفى بحزن: بكرا تتجوزي واحد يحبك وتخلفي بدل العيل عشره وكلهم هيكونوا كيفك زي الجمر ليله تمامه.
نواره بمزاج: وه ليكون عندك عريس عموما اللى يجي جوله متجوزاني.
مصطفى: متجوزاني لا دا كلام كبير عايز جاعده تكون دماغي فيها رايجه انا هرتاح شوية يلا كملي جرايه.
هم مصطفى بالخروج.
نواره: مصطفى.
مصطفى: ايه ؟
نواره: انا جاي اطلب ايد بتك.
مصطفى: متجوزاني.
نواره : شاطر يلا نوم الهنا.
___________________________________
( مصنع مهجور )
حازم : اتأخرت ليه ؟
زين : مصطفى الجناوي كان عايزني في موضوع.
حازم بإستغرب: مصطفى الجناوي ليه؟
زين وهو ينزع قميصه: بعدين ... المهم جبتوه.؟
حازم: هو جوه.
زين : دخلتله.
حازم : لو دخلت كنت هموته.
زين بابتسامة جانبية ساخره: طب تعالى نتسلى شوية بجالي كتير مشوفتش دم .
دلف كل من زين وحازم الى غرفة محكمة.
حازم : ميرو اتأخرنا مردتش اخش عليك لوحدي
عامر بخوف ورعشه دبت في اوصاله: والله يازين بيه ماجولت حاجة انا انا بس نفذت اللى اتأمرت بيه سماح والنبي .
وقف زين امام طاولة مليئة بالأسلحة وتحدث بهدوء مرعب : لسانك....لسانك اللى جايبك ورا ياغجري .
انهى كلامه وامسك سكين حاده واقترب منه.
حازم : زيفير لسانك زيفير .
امسك زين فكه وضغط عليه بقوه وبنبره كفاحيح الافاعي: افتح عينك .
ما كان عليه الا تنفيذ الأمر وفتح عيناه وأقسم داخله انه هالك فقد رأى الجحيم في عيناي زين رأى موته : والله والله ياز......
زين: اششششش عشان انا خير وبحب اساعد الناس هجدملك خدمة هتشكرني عليها هخلصك من همك وسبب وجوعك في المشاكل.
حازم : هرجع اجولك جلبك الطيب دا يازين هيوديك في داهيه.
زين : معلش عامر حبيب هو اه غجري ومالوش اصل بس بردوا حبيب وغالي ..... افتح خشمك .
عامر ببكاء: زين بيه وال...
زين بابتسامة: افتح .
خرجت صرخه متألمه.
حازم : شوفت حصلك حاجة شكه دبوس بطل بجى صراخ كيف الحريم بس مطلعش لسانك بس اللى زيفير كمان دمك زيفير .
زين: انا ماشي خلص انت الباجي.
____________________________________
عبدالعزيز: زين بيه الملف دا فيه كل المعلومات بس معرفتش اجيب ولا صوره تأمرني بحاجة تاني .
زين: لا سيب الملف هنا ورح عند منصور .
عبد العزيز: ربنا يديم عزك يازين بيه.
خرج عبدالعزيز وامسك زين بالملف وبدأ في قرأته.
زين : نواره ... دكتور ...٢٥ سنه فرج سبع سنين....
قرأ زين الملف بتمعن شديد وكل حرف يزداد حيره واستغراب .
امسك زين الهاتف واتاه الرد ما ان ضغط على الرقم .
مصطفى بتوتر : هاا رأيك.
زين : بكرا الساعة ٨ بعد العشا هكون عندك انا وخوي.
مصطفى: تنور بيتي يازين.
Flash back..
زين : اتفضل جهوتك ياحج.
مصطفى: الفضل لله ياولدي المهم الموضوع اللى جايك فيه .
زين : معاك ياحج كمل .
مصطفى بإرتباك: انا مش هلف ولا ادور زين انا عايزك تتجوز بتي نواره .
زين بصدمة: أتجوز بتك؟
مصطفى بحزن: انا جاي عشان اطلب منك تتجوز بتي عارف انها غريبه بس انا هعمل اي حاجة تخلي بتي في امان .
زين: وليه انا ؟
مصطفى: عشان انت اللى هتحميها.
زين بستغراب: هحميها من ايه؟
مصطفى: من أخواتها...متستغربش نواره تبجى بتي من واحده غير بت عمي جصدي ام صابر وسالم وعلي اسكان على علي هو بيحبها بس صابر وسالم لا امهم مكرهاهم فيها وانا كبيرت رجلي ولجبر عايز اطمن عليها جبل ما موت يعني نواره هتكون امانه في رجبتك تجبلها حجها تحافظ عليهاوانا متأكد انك هتصونها.
زين: انا اسف بس انا هستفاد ايه ؟
مصطفى: نسب ... عيلة الجناوي اكبر عيلة في البر الغربي كله
حاجة هتسبتك وسط الناس وهتديك جوه اكتر .
زين: وتفتكر انا محتاجها.
مصطفى: اكيد انت عارف انك محتاجها بس ممكن ترفض وكأن حاجة محصلتش و...
زين: هرد عليك النهارده بس اديني وجت .
مصطفى: هستناك استأذن انا .
_____________________________________
مصطفى: صباح .
صباح بإحترام: امرك يابيه.
مصطفى: نادي كل اللى في البيت خليهم يجوا على تحت بما فيهم نواره.
اومأت صباح وهرولت لتنفيذ الأوامر وترجل مصطفى الى الأسفل للانتظار .
علي : خير يابوي في حاجة؟
مصطفى: اجعد ياعلى انت ومرتك.
دخل كل من سعاد وصابر وسالم وزوجاتهم وفاء و رغدة.
سعاد : خير ؟
تجاهلها مصطفى وانتظر قدوم نواره ولم يمر سوا بعض الثواني ودلفت نواره وما ان وقعت عيناها عليهم صارت قشعريرة خوف في جسدها بالكامل .
مصطفى: نواره تعالي جنبي .
علي : ها يابوي كلنا هنه ايه الموضوع.
مصطفى: نواره جيلها عريس وانا موفج هو هيجي بكرا الساعة ٨ .
نواره بصدمة: عريس ايه ؟ انا مش عايزة اتجوز .
علي: اهدي بس يا نواره نفهم عريس مين دا يابوي ؟
مصطفى: زين علام وزي ماجولت هيجي بكرا وانا موافج .
نواره : بس انا مش موافجه انا معرفوش .
مصطفى: وعايزة تعرفيه كيف نواره احنا صعايدة واللى انت بتجوليه دا عيب .
نواره بدموع: ومش عيب اتجوز واحد معرفوش.
مصطفى: هتعرفيه بعدين كل واحد على اوضته وبكرا كل حاجة تبجى جهزة.
نهض مصطفى متجها لغرفته.
نواره ببكاء: علي مش عايزة .
علي : اهدي ياحبه عيني انا هطلع اشوفة.
سعاد : اهي غوره هنرتاح من منظرك العفش.
صابر: ابوي وافج على العريس وهو مبيرجعش في كلامه شكلنا هنروح فعلنا يلا يا وفاء .
___________________________________
كريمة: ايه ياولدي ليه مجمعنا؟
زين بهدوء : انا هتجوز .
عمرو : كيف يعني ؟
زين : هما بيتجوزو كيف ياود ابوي.
ملك : مين العروسة ؟ ومِتى خدت القرار ده؟
زين : اخدت القرار دا من فترة وكتب الكتاب والدخلة هبجى احددهم..
سمر وهبه بفرحة اعتقاداً ان هبه هى العروس.
سمر بفرحة لم تستطيع إخفائها: والعروسة مش هتلاجي احسن منك دي ه..
زين وهو يعلم بما يدور في ذهنها : امااال بس بردوا انا مش هلاجي احسن من بنت مصطفى الجناوي.
ملك بفرحة : نواره .
كريمة : تعرفيها ياملك؟
ملك : ألا اعرفها دي ملاك كانت معايا في المدرسة جمال وادب ودم كيف السكر والمدرسة كلها كانت بتحبها حتى افتكر انها دخلت طب .
كريمة بفرحة : وانت كلمت ابوها؟
زين : كلمته وهو مستني بكرا الساعة ٨ لو اخوي الكبير معندوش معاد ينفع يجي معايا .
احمد بفرحة : اكيد دا يوم الهنا يوم ما شوفك عريس.
زين : تمام خلاص كل واحد يجوم ينام .
حسن : يازين .
مريم : ايه يازين دي هو بيلعب معاك ؟
زين : بس يامريم انا وهو صحاب عايز ايه ياحسن.
حسن : العروسة حلوه .
انهى كلامه بغمزة .
زين: معرفش بس من الكلام اللى سمعته انها حلوة .
حسن : بكرا نشوف .
ذهب كل واحد الى غرفتة وبقى زين وحازم .
زين : تعالى بوسني بتبص كدا ليه؟
حازم : هو دا الموضوع اللى كلمك فيه مصطفى الجناوي.
زين بضجر: عايز ايه ؟ هتفيدك بإيه الاجابه ؟ بس عموما هو دا الموضوع .
حازم : يبجى مبروك ياود عمتي انا همشي تصبح على خير .
زين : هتيجي معانا انت وابوك متنساش تجوله.
_______________________________
يتبع....
البارت الخامس من هنا 👇👇👇
