أناأتجوزت عليكي
البارت الثالث والرابع👇👇
بصيت ولقيت دكتور عدي قدامي الدكتور اللي وقعت قدام عربيته ووداني المستشفي وهو هو اللي عملي التحاليل وقال إني حامل.
مسحت دموعي بسرعة وقمت من مكاني وكنت همشي وقف قدامي وقال :
-استني شوية انتي كويسة يا مدام.
بصتله بغيظ وقولتله :
-خير جاي ورايا هنا ليه... للدرجادي معندكمش ضمير لدرجة أنك تيجي ورايا عشان مشيت من غير ما ادفع فلوس المستشفي... مش معايا فلوس يا أخي ومش هدفع حد قالك وديني المستشفي... كنت سبتني علي الطريق ياكش كنت مت وارتحت..
وبعدين بدأت أبكي بصوت عالي... اتوتر عدي وقال :
-يا مدام أهدي هيفتكروني بضايقك
بس فضلت أبكي ومسكتش.
قرب رجلين كبار وقالوا :
-فيه حاجة يا بنتي
بصتله وقولت بسرعة :
-أيوة الراجل ده بيعاكسني وبيتحرش بيا.
-الاتنين
قالها عدي وهو مصدوم.
راح راجل منهم مسك دراعه وقال :
-مش عيب عليك تعاكس في بنات الناس ده انت شكلك محترم ليه بتعمل كده.
-وانتوا مالكم واحد ومراته ليه بتدخلوا بينهم
اتصدمت وأنا بقوله :.
-مراتك مين يا أخ أنا معرفهوش
-روان حبيبتي أنا عارف أنك زعلانة مني عشان شغلي واخد كل وقتي بس متأفوريش الجماعة هيفتكروا إني مجرم... يرضيكي جوزك أبو اللي في بطنك يطلع مجرم.
اتخرست خالص ومقدرتش أنطق.. ايه الإنسان ه قلب كل حاجة فوق رأسي كنت لسه هعترض لقيت الراجل بيقول :.
-صحيح الكلام ده يا استاذة الأستاذ ده يبقي جوزك
كنت لسه هرد برضه لما عدي مسك أيدي وقال :
-طبعا جوزها وأبو ابنها هو بس فيه مشاكل بيننا أنا وهي وأنا بحاول اصالحها.. خلاص يا أخويا حصل خير.
مشيوا الرجالة وأنا واقفة بذهول من كلام المجنون ده.... بصلي بإبتسامة وقال؛.
-يالا يا حبيبتي.
شديت أيدي وأنا بقول :
-حبك برص يا نصاب يا كداب.
-انتي اللي بدأتي
-وأنت اللي جاي هنا تاخد فلوس من واحدة مفلسة!
ضحك عدي وقال :
-يظهر أنك فاهمة الموضوع غلط أنا مش جاي اخد فلوس ولا حاجة أنا بس شوفتك بتبكي وقولت أسألك فيه ايه.... صحيح انتي كنتي بتبكي ليه.
كنت لسه هقوله وأنت مالك بس دموعي سبقتني وفتحت في العياط تاني... اتوتر وقال :
-يا ست بطلي عياط هيفتكروني بتحرش بيكي
-كلكم خاينين كلكم.
مسك دراعي ومشي بيا وقال :
-كلنا مين بس يا ست أنا لسه عارفك من خمس دقايق... اركبي بس العربية شكلك تعبانة.
زقيته وأنا بقول :
-هو انت فاكرني ايه؟! هو أنا عشان اتطلقت ومبقاش ليا بيت هتفتكرني شمال اتقوا الله.
-انتي مطلقة
قالها بصدمة
فعيطت تاني وقولت :
-الندل الواطي طلقني عشان سلعوة ضاربة شعرها اوكسجين واسمها كاميليا قولي في حد يسمي كاميليا.... اسم ده ولا دوا كحة.
ضحك وقال :
-انتي مصيبة علي فكرة في الظروف دي بتألشي... احكيلي من الأول....
.......
بعد ما حكيتله.
-علي فكرة طليقك واطي
-متقولش عليه كده... بأي حق تهينه
-لا راجل واطي اللي يرمي واحدة عاش معاها لسنتين عشان سبب تافه زي الخلفة يبقي واطي.... اللي يكسر واحدة ملهاش حد ويطردها يبقي واطي.... اللي يقهر قلب مراته ويحسسها أنها مجرد آله عشان تخلف بس يبقي واطي.... بس انتي السبب.... انتي الغبية .
-أنا جاية اتهزق هنا ولا ايه.
-عارفة ليه عشان انتي اللي خليتيه كل حياتك.... لما لقاكي ضعيفة وملكيش حد اتجبر عارفة لو عرفتي من الأول أنك الوحيدة اللي سند لنفسك مش حد تاني مكانش هيقدر يعاملك كده الراجل لما يلاقي نفسه محور حياتك هيتغر أكتر... نفسك برضه ليها حق عليكي فاهماني. هزيت رأسي ومسحت دموعي وأنا بقول بسخرية:
-فهمت متأخر للأسف.
-مش متأخر ولا حاجة عندك حياتك وابنك عيشي عشانهم.
-أعيش ازاي بس لا عندي بيت ولا شغل مش عارفة أروح فين أنا يتيمة زي ما أنت عارف وكنت عايشة في مع خالتي في بيتها قبل ما اتجوز يامن وخالتي ماتت ومبقاش ليا لا أهل ولا بيت.
-تعالي عيشي عندي... وقبل ما تهبي في وشي زي البوتاجاز أمي عايشة معايا هي وأختي وانتي هتقعدي معاهم.
-آه يا أخويا تاخدني لبيتكم وملاقيش حد وتقولي أصل أمي راحت تجيب طماطم وأختي راحت الدرس وبعدين تسلبني أعز ما أملك.
-ايه جو الأفلام الرخيص ده بطلي تسمعي افلام عربي هتبوظ دماغك... يالا اركبي العربية ولو حسيتي إني مجرم ولا حاجة ابقي امشي
........
بعد نص ساعة وصلنا لفيلا كبيرة... نزلت من العربية وأنا بقول :
-ايه العز ده كله... هو انت تاجر أعضاء.
ضحك عدي وقالي :
-ادخلي وبطلي لماضة
دخلت البيت أنا وهو قابلتنا أمه كانت ست راقية وباين عليها العز.
-مين دي يا عدي
مسك أيدي وقال :
-دي مراتي يا ماما
#ملحوظه مهمه جدا
لو عوزه البارت الرابع والخامس👇👇
تعملى متابعة
من غير المتابعه مش هيصلك باقى القصه👆👆
-الرابع من انا اتجوزت عليكى
ايه... لا أنا مش مراته... أنت كداب جايبني هنا عشان تسلب مني أعز ما أملك!
-يخربيت غباء أمك
قال عدي بصوت واطي.
ابتسمت والدة عدي رغم أنها برضه مكانتش فاهمة حاجة وقالت :
-طيب يا عدي سيب ضيفتك ترتاح وتعالي عايزاك.
مشيت من قدامنا فبصلي عدي بقرف وقال بصوت واطي:
-بقرة اووي
-بتقول ايه يا عم أنت
-بقول اطلعي أول أوضة علي اليمين وارتاحي فيها لحد ما أصلح اللي هببتيه مع أمي يا اذكي أخواتك.
.......
قعد عدي قدام أمه....
-مين دي يا عدي من غير كذب!
-أنا هحكيلك
وبعد ما عدي حكالها كل حاجة.
عيونها دمعت وقالت:
-معقول في ناس بالبشاعة دي
-أنا مصدقتش لما قالتلي بس كان شكلها منهار لما شوفتها
-كويس أنك مسبتهاش في الشارع يا بني بارك الله فيك.
.....
كنت قاعدة علي السرير وأنا متوترة معرفش لو اطردت من هنا كمان ممكن يحصلي ايه لما دخلت عليا والدة عدي... وقفت لما شوفتها فقربت مني وحضنتني وهو بتقول:
-متخافيش محدش هيأذيكي هنا!...
كان أول مرة حد يحضني بالحنان ده من وقت طويل من وقت ما حضنت خالتي آخر مرة.... عيطت جامد وأنا بحضنها.... حسيت اخيرا أن بقي فيه حد يهتم بيا.....
مرت الأيام والشهور مع عدي ووالدته صفاء... كانت طنط صفاء بتعاملني زي بنتها بالضبط... ولاحظت اهتمام كبير من عدي بيا بس عملت نفسي مش واخدة بالي... أنا دلوقتي مبفكرش إلا في حياتي الجديدة اللي هبنيها بعد ما اولد أبني خصوصا أن عدي قدر يلقي ليا شغل في يوم كنت نايمة لما صرخت من الوجع.... والدة عدي دخلت فصرخت وقلت :
-أنا بولد الحقوني...
نقلوني علي المستشفى
وبعد ساعات قدرت أخيرا اجيب أبني للحياة... قررت اسميه نور لأنه اللي نور حياتي كلها.
مرت الأيام ونور كمل شهرين بس في يوم اتغير كل حاجة حصل حاجتين مكنتش اتوقعهم... طلب عدي يكلمني شوية
....
-ها يا سيدي كنت عايز ايه؟!
-روان تتجوزيني
-بتقول ايه!!!
-سمعتيني... أنا بحبك وانتي عارفة كده استنيت تجيبي البيبي عشان يبقي حلال اطلبك من غير ما احسسك بالذنب.
-بس...
-من غير بس هديكي الوقت اللي انتي عايزاه تفكري فيه وأنا مستني
......
كنت بتمشي في الشارع أنا وابني وانا بفكر في عرض عدي.... بعد ما قفلت قلبي وقررت أعيش لابني عدي بيعرض عليا فرصة جديد.... أنا بثق في عدي وبحس بالأمان معاه بس هل ده كفاية.... عقلي كان مشتت لدرجة إني مشوفتش الراجل اللي جاي ناحيتي واللي خبط فيا...
-آسفة
-روان حبيبتي انتي.
-يامن
بصيت ليامن بصدمة... عينيه كانت مدمعة وفرحانة أنها شافتني... بص لنور وقال :
-ده أبني صح... متكدبيش يا روان أمي قبل ما تموت قالتلي الحقيقة... قالت أنك كنتي حامل وهي طردتك ومن وقتها وأنا هتجنن عشان اعرف مكانك....
مسك أيدي وقال :
-يالا يا حبيبتي خلينا نرجع بيتنا
شديت أيدي منه وأنا بقول :
-أنت اتجننت احنا اتطلقنا!!
أبتسم وقال بحب:
-ما أنا رديتك في العدة بتاعتك!
يتبع الفصل الخامس بعد المتابعه
اعملى متابعه ليصلك اشعار الجديد
ليصلك باقى القصه فورا
تعليقات
إرسال تعليق