رواية المعلمه شيكا الفصل الثالث والرابع بقلم سلوي عوض حصريه وجديده
شفاعه: طاب شوفي انتي رايحه فين احسن بدل منعملها معاكي
شيكا: تعملوها معايا طلبتوها ونولتوها
ثم تبدأ شيكا في ضرب شفاعه ونعناعه
شفاعه: اوعي يا بت جاتك وجع ف ايدك، والله لاطلع اشتكي لامك
نعناعه: وديني لاكسر عضمك يا بتاعت البهايم
شيكا: طاب ايه رايكم بقي هاءكلكم من اكل البهائم عشان تبقو زيهم
وهنا يقترب منهم زوج نعناعه الاستاذ ابراهيم
ابراهيم: في ايه يا ست شيكا
شيكا: اصلهم ناقصين ربايه وكت بربيهم
ابراهيم: تقومي تضربيهم ف قلب الحاره وقدام الناس
وهنا يدخل تاكسي الحاره وعليه شنط كثيره
لقط: الاستاذه شوقيه جات يا معلمه
شيكا: اختي حبيبتي حمدالله على السلامه نورتو
ثم تذهب إليها وتفتح باب التاكسي
شوقيه: شيكا بتتخانقي معاهم ليه
شيكا: سيبك منهم تعالي انزلي نورتي
ثم تحتضن اولاد اختها
شيكا: وحشتوني يا قلب خالتكم، تعالو نطلع ديه ستكم هتفرح بيكم اوي
شوقيه: استني بس ننزل الشنط
شيكا: تعالي بس، ولا يا لقط نزل شنط الاستاذه
ثم تاءخذ اختها وأطفالها ويصعدو الي شقتهم
شيكا: اما يا اما بتك جات
نعمات (بفرحه): يا الف خطوه عزيزه نورتي يا نور عين امك، احفادي حبايبي تعالو ف حضن ستكم ده انتو هتملو البيت علينا
لتضحك شوقيه
شوقيه: عارفه يا اما بتك كانت بتتخانق مع شفاعه ونعناعه وتضربهم
نعمات: ليه بس كده
شيكا: اصلهم لازم يتربو دول عليهم بكاسه تعشي فرح، قاعدين يا اختي يفرزو ديه ويتفرجو علي ديه مش سايبين حد ف حاله، بكلمهم بالذوق يقولولي روحي بدل منعملها معاكي، قومت روقت عليهم، لولاش انتي جيتي كان زماني باءكلهم برسيم
شوقيه: ايه عامله فتوه علي الناس يا حبيبتي انتي بنت، فين الرقه والانوثه
نعمات: قوليلها والله ما في كلب هيعبرها ولا يتجوزها وهيا عايشه ف دور حميده زند السبع، يا ستار البت ديه هتموتني ناقصه عمر
شيكا: بعد الشر عليكي يا نعومه
نعمات: لاء والنصيبه ايه، معلقالي روحها بالمدرس الكحيتي اللي ساكن تحت، يا بتي ده بيكمل عشاه نوم ومحيلتوش غير طقمين
شيكا: وبعدين معاكي يا اما، قومي اعملي لقمه لبتك
شوقيه: انا كلت ف الطياره
نعمات: امال جوزك مجاش معاكي ليه
شوقيه: جاي بعد يومين
نعمات: طاب خشي ارتاحي
شوقيه: معاكي حق يا اما، ده انا نفسي انام اوي، بقاللي يومين منمتش عشان كت بحضر الشنط، وجيبتلكم حاجات حلوه اوي هتعجبكم
نعمات: تعيشي وتجيبي
شيكا: خشي نامي انتي وانا ها اخد العيال يقعدو معايا تحت
شوقيه: اوعو تضايقو خالتكم
الاطفال: حاضر يا ماما
لتاءخذهم شيكا وينزلو الي أسفل
لتجد باب شقه منجي مفتوح
شيكا: تعالو يا عيال سلمو علي الاستاذ منجي
لتطرق شيكا علي الباب ثم تدخل ومعها الاطفال
شيكا: عامل ايه دلوقت، العيال صممو يسلمو عليك
منجي (بكحه): اهلا وسهلا بيكم، ازيكم يا حبايبي، حمدالله على السلامه
شيكا: الله يسلمك
شيكا: طاب احنا نازلين، هتعوز حاجه
منجي: شكرا كتر خيرك علي كل اللي عملتيه معايا
شيكا: علي ايه احنا جيران، والنبي وصي علي سابع جار، مبالك بقي باول جار
منجي: عليه الصلاة والسلام
شيكا: صليت ف الكعبه إنشاءالله، ياله يا عيال
نادين: ابنه اختها وهيا ف السادسه من عمرها هو مين ده يا خالتو
شيكا: ده الاستاذ منجي جارنا
نادين: وهو عامل كده ليه وانتي بتبصيله كده ليه هو انتي معجبه بيه
شيكا: ايه يا بت الكلام الكبير ده
عمرو: ابن اختها وهو ف الرابعه من عمره هيا كده يا خالتو لسانها طويل
شيكا: طاب ياله ننزل تحت
نادين: انتي قولتيله أننا عايزين نسلم عليه وهو احنا نعرفه
شيكا: ايه البت ديه تعالو اجيبلكم حاجه حلوه
نادين: لاء عايزين نتفرج علي الحيوانات اللي عندك ف المحل
شيكا: بس انا معنديش حيوانات صاحيه بدبحهم اول باول ف المجزر
نادين: طاب هاتيلي عناب من القهوه بتاعت حلاوه
شيكا: يعني فاكره حلاوه ومش فاكره الاستاذ
نادين: فاكراه فاكراه ياله بقي
شيكا: ولا يا لقط هاتلي شفشق عناب للعيال
لقط: حمامه
(يذهب اللقط الي المقهي)
حلاوه: عايز ايه
ابوسريع: خير يا صبي المعلمه
لقط: شفشق عناب لست المعلمين
حلاوه: طاب روح انته وانا هوديه عشان عايز المعلمه ف مساءله
لقط: طيب
(يعود اللقط)
شيكا: فين يا ولا العناب
لقط: المعلم حلاوه قال هيجيبه عشان عايزك
شيكا: مش هنخلص بقي من وجع الدماغ
نادين: هو مين اللي واجع دماغك يا خالتو
شيكا: الزفت حلاوه
نادين: طيب
(يقترب حلاوه)
حلاوه: العناب يا عناب
نادين: شكرا هات كده
(تتذوق)
نادين: ايه ده طعمه وحش اوي
حلاوه: ازاي ده زي الفل ايه يا ست البنات مش ناويه بقي تبلي ريقي بكلمه
نادين: عايزها تقولك ايه
حلاوه: بس يا حلوه
شيكا: قولتلك الف مره مبفكرش ف الجواز
نادين: هو انته عايز تتجوز خالتو القمر ديه وانته عجوز وشكلك وحش عن اذنك مش فاضيين
حلاوه: جري ايه يا مسخوطه انتي
نادين: هيا مين مسخوطه ياجدو وبعدين هو الجواز بالعافيه
(تدخل نادين المحل وتفتح المياه)
حلاوه: ايه ده يا بت انتي مش تاخدي بالك
نادين: مش قولتلك امشي وانته قاعد الله والمحل عايز يتنضف
حلاوه: ايه بت الشياطين ديه انا رايح قهوتي وابقي فكري ف اللي قولتلك عليه وخدي راحتك
شيكا: روح بقي
(تضحك)
شيكا: ايه اللى عملتيه ده يا قرده
نادين: أصله رخم اوي
عمرو: كده عيب تعملي ف الراجل كده
نادين: بس يا واد انته
عمرو: حاضر يا اختي
شيكا: انتي يابت اتعلمتي البلطجه ديه فين
نادين: الزمن
شيكا: زمن ايه ده انتي لسه مطلعتيش من البيضه
نادين: يعني الحق عليا اني خلصتك من الراجل الرخم ده انا غلطانه
(ويمر اليوم)
شيكا: لتغلق شيكا المحل وتصعد شقتها لتجد اختها مازالت ناءمه وتجد نعمات تحضر العشاء
شيكا: هيا امكم ديه منامتش بقالها سنه
نادين: هيا كده بتحب النوم اوي
شيكا: طاب روحي صحيها عشان نتعشي
نادين: ياربي ديه هتوجع قلبي مش هيا اختك صحيها انتي
شيكا: ايه خلفه القرود ديه
عمرو: هيا كده لسانها طويل ماما بتقول طالعه لخالتها لسانها طويل زيها
نادين: بس يا حبيبي
عمرو: حاضر يا اختي
شيكا: انتو قاعدين معانا رمضان كله
نادين: طبعا
نادين: والعيد كمان وحياتك
شيكا: يا لهوي صبرني يارب
نادين: هو فيه ايه اهدي يا خالتو
(بعد أن استيقظت شوقيه وتناولوا وجبه العشاء)
شيكا: ايه يا شوشو جيبتي لنا ايه معاكي
نادين: جابتلك فساتين ومسكرات عشان رمضان وفوانيس
شيكا: انتي مالك انا بساءل اختي
نادين: انتي اختي انا بنتها
شيكا: يا بنتي ربي بتك ديه
(تضحك شوقيه)
شوقيه: سبحان الله طالعه نسخه منك نفس طوله اللسان والتشرد
نادين: انا متشرده يا مامي
شيكا: قصدك ايه يعني انا اللي متشرده
عمرو: عيب يا نادين
نادين: اسكت انته
عمرو: حاضر يا اختي
(وبعد مرور الليل أتي الصباح، والساعه الان التاسعه)
لتستيقظ شيكا وتنزل مسرعه لتقابل منجي علي سلم المنزل.
شيكا: ايه يا استاذ اخبار صحتك ايه
منجي: الحمدلله، عن اذنك عشان رايح المدرسه
شيكا بهيام: اذنك معاك
لتنزل نادين خلفها مسرعه.
نادين: ايه ده يا خالتو حد ينزل من غير ميفطر، وبعدين انا ملاحظه انك بتبصي علي اسمع ايه ده وبتسبلي عيونك، انته معجبه بيه
شيكا: بس يا بت قطع لسانك
نادين: انا غلطانه حقك عليا، وبعدين يعني هو عمره مهيبصلك وانتي كده
شيكا: قصدك ايه يا أم أربعة وأربعين
نادين: انا ولا حاجه، انا طالعه اصلي عايزه اكمل نوم، باي يا خالتوتو
لتتركها وتصعد.
شيكا: هيا البت ديه قصدها ايه، مالي فيا ايه وميبصليش ليه، يخربيت سنينك يا نادين
(ونتركها ونذهب الي المدرسه)
حيث كان الأستاذ منجي ف الفصل يشرح حصه التاريخ.
منجي: طبعا كلنا عارفين أن احمس هو اللي هزم الهكسوس
التلاميذ: طبعا يا استاذ منجي، ولازم كمان نعرف اننا عندنا حضاره عريقه عمرها ٧٠٠٠ تلاف سنه، اعرق حضره ف العالم
وهنا يدخل عليهم المدير.
المدير: حمدالله على السلامه يا استاذ منجي
منجي: الله يسلم حضرتك
المدير: المفتش جاي ورايا وهيسأل الولاد بنفسه
منجي: تحت امره
وهنا يدخل المفتش.
منجي: قيام… جلوس
المفتش: مين يقدر يقوللي من هو مكتشف مقبرة توت عنخ امون؟
ليرفع التلاميذ أصابعهم.
المفتش: ماشاء الله، قول يا ابني.
التلميذ: مكتشف مقبره توت عنخ امون هيوارد كارتر سنه ١٩٢٢ ميلاديه، ووجد بها أكثر من ٥٠٠٠ قطعه.
المفتش: برافو هايل، سقفوله يا ولاد.
المفتش: مكافأة شهرين يا استاذ منجي علي مجهودك الكبير مع الاولاد.
منجي بفرحه: متشكر يا افندم، ربنا يبارك ف حضرتك يارب.
المفتش: انته تستحق.
ثم يخرج المفتش والمدير من الفصل، ليذهبا إلى فصل الأبله سنيه.
ليجدوها تجلس فوق اول ديسك أمام التلاميذ، وخلفها تلميذه ترسم علي البلوزه الخاصة بها وهيا لا تشعر.
المفتش: تعالي هنا يا بنت، ارفعي ايدك علي السبوره، قليله الادب.
المفتش: اتفضلي يا ابله اشرحي.
سنيه: بما أن مصر تقع في الركن الشمالي الشرقي لقاره أفريقيا بين خطي عرض وطول...
المفتش: في ايه يا استاذه؟ ديه تالت مره ادخل عليكي الحصه الاقيكي بتشرحي نفس الكلام.
سنيه بنوم: اصلهم مخهم تخين.
المفتش: حد يا ولاد يقدر يقوللي ما عدد الواحات البحريه؟
التلاميذ: (لا رد)
المدير باحراج: ايه يا ولاد محدش عارف؟ في ايه يا استاذه؟ الولاد كلهم مش عارفين.
سنيه بنوم: ما انا بقول لحضرتك اغبيا.
المفتش: انا جاي اخر الاسبوع، والمره ديه مش هجازيكي، بس اتمني المره الجايه لما اسأل الولاد يعرفو يجاوبو.
المفتش: خدي استاذ منجي قدوه، فصله ماشاء الله الولاد شطار جدا.
سنيه بلهفه: هو منجي جيه؟ طاب وسع حضرتك اروح اطمن عليه.
لتتركهم وتخرج.
المفتش: جري ايه يا حضره المدير، مش عارف تحكم المدرسين؟
التلاميذ: أصلها كل يوم بتجيبله اكل معاها، مع انها بخيله اوي ومش بترضي تدي لاي حد.
المفتش: الله الله! طاب منعملهم كازينو بقي يقعدو يحبو بعض فيه.
المفتش: الغي المكافأة بتاعت استاذ منجي، وعايز لما اجي المره الجايه اتمني مشوفش التسيب ده.
المدير: أمر حضرتك… منك لله يا سنيه.
ليذهب المدير الي فصل منجي، ليجد سنيه جالسه تتناول الطعام، ومنجي يقف ويشرح للتلاميذ.
المدير: جري ايه يا استاذه، سايبه فصلك وقاعده تأكلي هنا؟
منجي: هو حضرتك هتصرفلي المكافأة أمته؟
المدير: لاء، ما هو المفتش لغاها لما الاولاد قالوله أن حضرتك والاستاذه بتفطرو كل يوم، قام موبخني وقاللي ابقي اعملهم كازينو.
منجي بحزن: وانا مالي طيب؟
المدير: مش شغلي… علي فصلك يا ابله! ايه التسيب ده؟ مش هعرف احكم المدرسه ولا ايه؟
المدير: وبعدين لما انتو تعملو كده، الاولاد يعملو ايه؟ المفروض المدرسه يكون قدوه.
4= الرابع 4/
بارت 4
المدير: المفروض المدرس يكون قدوه.
منجي: منك لله يا سنيه، ضيعتي المكافأة… كل ده عشان سندوتشين جبنه! اعمل ايه بس، ده انا فرحت امي واخواتي.
منجي: اسمعي يا استاذه سنيه، من النهارده متدخليش فصلي وسيبيني ف حالي، انا ورايا هم ميتلم.
سنيه: وانا عملتلك ايه؟ ده انا حتي عامله جبنه بطماطم وخيار.
منجي: خليهالك.
سنيه: خلاص نبقي نفطر ف الفسحه.
منجي: إنشاءالله… روحي فصلك بقي.
(اما ف الحاره)
فكانت شيكا تقف ف محلها توضب طلبيات الزبائن.
لقط: اعملي ايه يا معلمه؟ في اتنين كيلو لحمه عشان سماره الحلاق.
شيكا: لما يبقي يجيب الفلوس اللي عليه الاول.
ليقترب عليهم سماره.
سماره: حسابك يا معلمه.
ثم يخرج رزمه ماليه من جيبه.
شيكا: هات احسن من عينك.
سماره: عايز بقي لحمه رمضان.
شيكا: كام كيلو؟
سماره: خمسه، وهبقي اخدهم وانا مروح، واتنين دلوقت عشان نفطر.
شيكا: هتفطر لحمه؟
سماره: ومفطرش ليه؟ الخير كتير والحمدلله.
شيكا: طاب روح محلك، متقفليش كده ديه ساعه رزق.
سماره: الله ما انا واقف بشتري.
شيكا: هات يا سقط اللحمه ديه… خد يا اخويا وهوينا.
سماره: كده احنا حسابنا خالص، عن اذنك يا جميل.
شيكا: يا اخي غور بقي يخربيت ثقالتك ورخامتك.
(وهنا تنزل نادين ابنه اختها)
نادين: خالتو حبيبتي عايزه شيبسي.
شيكا: فطرتي؟
نادين: اه فطرت.
شيكا: روح يا سقط هاتلها كل اللي عايزاه.
لتقبلها نادين.
نادين: ميرسي يا خالتو.
شيكا: تعالى نقعد قدام المحل.
نادين: عايزه أجر عجله.
شيكا: ماشي، بس قوليلي… انتي امبارح قولتيلي أن منجي مستحيل يبصلي وانا كده.
نادين: اه طبعا.
شيكا: ليه يعني؟ هو انا وحشه؟
نادين: لاء انتي قمر، بس يعني اللي انتي عاملاه ف نفسك.
شيكا: عامله ايه يا بت شوقيه؟
نادين: عايشالي ف دور بوحه، صبح صبح يا عم الحج! فين الانوثه؟ هدومك كلها دم وريحتك لحمه، ايه ده؟
شيكا: مش شغلتي يا بت.
نادين: مقولناش حاجه، بس المفروض بعد الشغل تلبسي دريس شيك، تعملي شعرك، ضوافرك…
نادين: وبعدين الصراحه يعني، ايدك عامله زي ايد الرجاله، خشنه كده… البنات ايديهم بتبقي ناعمه.
شيكا وديه اعملها ايه ديه كمان
نادين خليكي معايا وانا هخليكي فله شمعه منوره
شيكا انتي متاءكده يابت انك طفله
نادين انتي شايفه ايه
شيكا ده انتي وليه عجوزه
نادين وبعدين معاكي واه صح فين تليفونك
شيكا اهو
نادين ايه ده يا حجه ده تليفون بزراير مش جايبه ليه فون تاتش ومنزله فيس بوك ووتساب وانستا وتويتر وكل حاجه
شيكا مبحبش
نادين يعني ايه مش بتحبي لازم تبقي عارفه كل حاجه بتحصل حواليكي مش كل حياتك ف المحل لازم تعيشي سنك هاتي تليفونك العجيب ده
شيكا خدي
نادين هو فيه رصيد اتكلم دولي
شيكا اه لسه شاحنه
نادين نمره بابا عندك
شيكا اه متسجل ابو عمرو
نادين لتضحك عليها ابوعمرو حد قالك أنه بيبع بطاطا اسمه محمد أو انشته
شيكا لا اتكسف
نادين نعم بقي انتي اللي بتمسكي الجاموسه تدبحيها وتقطعيها تتكسفي تنادي جوز اختك باءسمه وبعدين هو انتي مش متعلمه
شيكا اه يا بت امال ايه ده انا متخرجه من الجامعه
نادين امال عامله ف نفسك كده ليه
شيكا عشان احنا ولايا ملناش راجل بعد وفاه جدك كان لازم حد يقف ف المحلات والحته كلها تعمله الف حساب اوعي تكوني فاكره اني مش نفسي البس زي البنات واعمل زيهم لكن لو عملت كده الناس هنا هيستهيفوني ويقولو لقمه طريه
نادين وجهه نظر بردك
وهنا يدخل عليهم اللقط ووجهه به بعض الخدوش
شيكا ايه اللي ف وشك ده يا ولا لقط
لقط الواد ابوسريع ف الرايحه والجايه بيقوللي يا كلب الست
شيكا بعصبيه طاب وسع بقي انا هعرفه شغله صبي النقر ده
لتذهب شيكا مسرعه الي القهوه
شيكا انته يا واد يا ابوالزفت مالك ومال صبيي يا صبي النقر انته
حلاوه يا مرحب بست البنات تعالي اقعدي نجيبلك عناب
شيكا شكرا يا اخويا كتر خيرك
حلاوه مالك بس مين مزعلك
شيكا محدش يقدر يزعلني ولا يدوسلي علي طرف بس الظاهر صبيك ده عايز ربايه
حلاوه عملت ايه يا زفت زعل ست الكل مننا
لتقترب منه شيكا وتضربه بالرصيه ليقع ابوسريع
شيكا عشان تبقي تقول لصبيي بعد كده يا كلب الست
حلاوه ينفع بر ده يا ست شكريه تضربي الواد وانا واقف
شيكا عشان لسانه طويل وانا اشتكيتلك منه كتير قبل كده وانته شكلك مش قادر عليه فقولت اربيه بنفسي
حلاوه خلاص حقك عليا انا
شيكا خلاص بس لو اتكررت تاني مش هتلاقي قطع غيار لوشه عالم تخاف متختشيش
لتتركهم شيكا وتذهب الي محلها
نادين ايه اللي عملتيه ده ده احنا كنا بنتكلم عن الانوثه ده انتي عامله زي الشحات مبروك
شيكا اطلعي لامك انا مش طايقه نفسي قال انوثه قالول غجر عايزين العين الحمرا
نادين وانا مصممه اني اغيرك
شيكا قولت اطلعي يا نادين
وهنا يدخل عليهم سماره
سماره مين اللي مزعل القمر
شيكا اللهم طولك ياروح
سماره الولا ابوسريع ده هربيهولك
شيكا شكرا انا ربيته بنفسي
سماره خلي بالك انا هنا ف الحته عشان اخد باللي منك
شيكا سماره روح محلك يا أبا الحكايه مش ناقصه
سماره طاب عندك كبده
شيكا يا عم حرام عليك خلي حاجه للزبائن
سماره عندك بس
شيكا اه وفي محاوله منها لتعجيزه الكبده بتتباع علي بعضها
سماره وماله أخدها كلها
شيكا فلوسك يا خفيف
سماره يا سلام وهو في اكتر من الفلوس
شيكا طاب هات يا خفيف
سماره ياسلام كل جنيه طالع من جنب قلبي
شيكا وجع ف اللي اسمه قلبك بس قوللي صحيح هو فين قلبك ده ده باين عليك معندكش غير كرش
سماره اهي خفه دمك ديه اللي مشعلقاني فيكي
وهنا يدخل استاذ منجي الحاره
شيكا طاب سكه وطريق بقي استاذ يا استاذ تعالي عايزاك
منجي حاضر جاي
سماره عايزه ايه من المصدي ده
شيكا عارف محلك ولا اوديك
سماره لاء ماشي بس ابقي شيعي الكبده احسن عصافير بطني بتصوصو
شيكا قصدك الغربان والحدادي اللي بطنك غور بقي
ليقترب منهم منجي
منجي خير يا معلمه شيكا
شيكا اقعد يا استاذ كت عايزاك ف حاجه
منجي خير يعني
شيكا اه خير وخير اوي كمان ولا يا سقط روح هات شاي للاستاذ ولا اجيبلك عناب ولا خروب اؤمر
منجي شكرا الشاي كفايه
شيكا شوف بقي يا استاذ انا عندي لخبطه ف الحساب وكت يعني عايزه حضرتك تمسكلي حساب المحلين واعملك مرتب محترم
ليعدل منجي نظارته الطبيه
منجي انا اخدمك من غير اي حاجه
شيكا لاء الشغل شغل وهربطلك مهيه ٣٠٠٠ف الشهر وكل اللي هتقعدهم ساعه ولا ساعتين ف اليوم وكل شهر ليك تلاته كيلو لحمه غير السقط
منجي بفرحه بجد يا معلمه شيكا
شيكا اه بجد هيا حاجه مش اد مقامك
ليضحك منجي لتظهر غمازاته
لتهيم شيكا به وتقول في داخلها يخربيت جمالك وعيونك العسلي ده انته لو لبست واتقيفت البنات هيقطعو بعض عليك احسن خليك كده بعبلك
منجي معلمه يا معلمه شيكا
شيكا هاه
منجي بكلم حضرتك
شيكا لامؤاخذه
منجي تحبي نبدء من أمته
شيكا من دلوقتي لو حبيت
منجي بس في هنا مشكله
شيكا خير كفاالله الشر
منجي اصلي مسافر اول يوم رمضان يعني اجازه وكده وخطوبه اختي
شيكا كل سنه وانت طيب والف مبروك مش مشكله نعتبرها اجازه خد بقا الدفاتر وراجع الحسابات وانا طالعه فوق وجايه
منجي حاضر
لتتركه شيكا وتصعد الي شقتها
شيكا اما يا اما
نعمات خير طالعه ليه
شيكا زودي ف الغدا واعملي حساب نفر زياده
نعمات مين ده
شيكا الاستاذ منجي عشان هيمسكلي حسابات المحلين
نعمات يا بت نعمات حسابات ايه اللي يمسكها وانتي خريجه كليه التجاره
شوقيه متسيبيها يا اما
نعمات طيب يا اختي
نادين ايه يا شيكا الصناره غمزت
شيكا الا قوليلي يا شوشو انتي متاءكده انك مربيه البت ديه
شوقيه قصدك يعني عشان لسانها طويل
شيكا طويل بس
شوقيه اصل ابوها عنده الدنيا كلها كوم ونادو كوم تاني معاها كارت بلانش محدش يقدر يكلمها وبعدين بيني وبينك أصلها طالعه لحماتي نسخه منسخه منها
شيكا حرام عليكي والله حماتك غلبانه
نادين مخلاص بقي يا شيكا روحي شوفي شغلك
عمرو عيب كده يا نادين
نادين وانته مالك
عمرو كلامك صح يا اختي
نادين: ايه رءيك يا ماما نكتب قصه ونسميها غرام المعلمه
لتتمسك بها شيكا
شيكا: انا بقي هعرفك المعلمه ديه هتعمل فيكي ايه يا قرده
نادين: ولا تقدري تعملي حاجه انتي فاكراني أهل الحاره اللي انتي عماله تضربي فيهم وعامله عليهم الشحات مبروك لا يا حلوه انا بلعب كاراتيه
لتتركها شيكا
شيكا: يا بت احترميني انا خالتك
شوقيه: والله ديه بتحبك اوي وبتقول لما اكبر عايزه ابقي معلمه زي خالتو
نادين: اه بس مش هحب واحد عبيط زيها
نعمات: جيبتش انا حاجه من عندي اهي العيله نطقت
شيكا: انا نازله ولما الغدا يجهز ابقي رني عليا اشيعلك حد من الصبيان
نادين: خالتو حبيبتي خديني معاكي
شيكا: بس يا بت
نادين (بصوت واطي): عشان اشوف الاستاذ واكلمه عنك
شيكا: لاء شكرا
نادين: خلاص براحتك انا كنت عايزه اخدمك
---
شيكا: حبيبتي يا نادو تعالي معايا
عمرو: وانا يا خالتو
نادين: بس يا حبيبي انته تقعد مع ماما وتيته مش لازم يبقي معاهم راجل
عمرو: حاضر يا اختي
شيكا: ده انتي جباره يخربيتك
شوقيه: تقعدي مع خالتك ومتروحيش بعيد احسن تتوهي ولا حد يخطفك
شيكا: ديه تتوه ومين اللي أمه داعيه عليه عشان يخطفها حد يجيب لنفسه بلوه