أنا وسواق التوكتوك وصاحبه بقلم الكاتب عادل عبد الله حصريه وجديده وكامله جميع الفصول على مدونة النجم المتوهج
أنا وسواق التوكتوك وصاحبه
أنا وسواق التوكتوك وصاحبه
أنا وسواق التوكتوك وصاحبه
أنا وسواق التوكتوك وصاحبه بقلم الكاتب عادل عبد الله حصريه وجديده وكامله جميع الفصول على مدونة النجم المتوهج
( قصة حقيقية )
في ليلة من ليالي الشتاء القارص وكانت العيادة ممتلئة بالمرضي واضطر الدكتور يستمر في الكشف علي كل المرضي حتي وقت متأخر من الليل .
وطبعا كنت لازم اقعد في العيادة لحد اخر مريض لأن انا اللي بدخل المرضي وبساعد الدكتور في كل حاجة .
قفلنا العيادة و الساعة كانت ١٢ ونص بعد نص الليل والدكتور عرض عليا يوصلني بعربيته لكن انا اتكسفت و قولتله اني هشتري حاجة الاول وبعدها اركب توكتوك لحد البيت ، والمسافة مش بعيدة حوالي عشر دقايق بالتوكتوك .
الدكتور لما شافني مصممة امشي لوحدي سابني ومشي بعربيته ، ووقفت ببص في الشارع حوليا كان الشارع تقريبا فاضي مفيش فيه الا شخصين او تلت اشخاص تقريبا والمحلات كلها مقفولة مفيش الا سوبر ماركت مفتوح علي بعد حوالي ٧٠ متر والشارع كله ضلمه و فاضي والجو سقعة تلج !!!
وقفت حوالي دقيقة علشان اشوف توكتوك مفيش ولا واحد عدا من قدامي .
قررت امشي شوية يمكن اشوف اي توكتوك في اي مكان تاني .
مشيت شوية ، ماما اتصلت عليا وسألتني اتأخرت ليه قولتلها ان الدكتور اتأخر شوية و اني في الطريق للبيت .
ومشيت حوالي خمس دقايق لغاية ما شوفت توكتوك جاي من اول الشارع ، كان التوكتوك له انوار واضاءة كتير ولما قرب مني سمعت صوت الاغاني طالعة منه .
افتكرت في لحظتها كلام ماما ليا دايما ….
– اوعي تركبي توكتوك يكون السواق شكله شارب ، العيال دي بتكون مش في وعيها .
– اوعي تركبي توكتوك يكون مشغل اغاني بصوت عالي ، ده بيكون غالبا شارب مخدرات وفي حالة مش طبيعية .
– اوعي تركبي توكتوك يكون السواق مقعد صحبه جنبه ، دول غالبا بيكونوا شاربين و ممكن يعملوا فيكي حاجة وحشة .
– لو ركبتي توكتوك لوحدك اوعي يمشي بالتكوكتوك في شارع فاضي .
– اوعي تركبي توكتوك بالليل لوحدك .
لكن رغم اني افتكرت كل الكلام ده لكن كان مفيش قدامي حل تاني !!
الوقت اتأخر والجو برد جدا و مفيش ناس في الشارع !!!
ووجودي لوحدي في الشارع اكتر من كده خطر عليا !!
شاورت بايدي للتوكتوك وقف قدامي وشوفت شاب تاني جنب السواق ، الاتنين كانت اعمارهم في اوائل العشرينات .
اترددت لحظات لكن اضطريت اركب بسرعة قبل ما يحسوا اني خايفة منهم .
اول حاجة لاحظتها السواق قفل انوار التوكتوك كلها ولما سألته قالي انه قفل النور لأن البطارية قربت تفصل وممكن التوكتوك يتعطل خصوصا في الجو البرد ده .
بعدها لاحظت نظرات السواق في المراية !!! وكمان صحبه كان بيبص عليا في المراية !!!
المفروض اننا وصلنا للدائري وهنمشي جنبه دقيقتين قبل ما نوصل لأول المنطقة اللي انا ساكنة فيها .
واول لما وصلنا جنب الدائري قلل من سرعته ومشي بالتوكتوك ببطئ !!!
اتأكدت وقتها من نيته هو وصحبه !!!!
طلعت الفون بالراحة وشغلت ال Gps واتصلت بسرعة بأمي وشغلت الاسبيكر اول لما ماما ردت عليا … وقولتلها : ايوه يا ماما ردت عليا صوت ماما ايوه يا حبيبتي اتأخرتي ليه ؟
قولتلها انا شغلت الجي بي اس علشان تعرفي مكاني فين علشان مش مطمنة .
سواق التوكتوك قالي بصوت تخين : مالك يا انسة ؟ هو فيه حد جه جنبك ؟؟
قولتله طيب يلا امشي بسرعة انت ماشي براحة كده ليه ؟
ماما قالتلي ” وطبعا كانوا سمعين صوتها ” : صوت مين ده يا بت ؟
قولتلها صوت سواق التوكتوك ومعاه واحد تاني صحبه .
ماما قالتلي مصورتيش السواق والتوكتوك ليه ؟
قولتلها صورتهم وبعتلك صورهم علي الواتس .
صاحب السواق اتكلم باسلوب وحش وقالي : اوعي تفتكري اللي عملتيه ده هو اللي يحميكي مننا ؟ انا لو عايز اعمل حاجة هعملها بمزاجي بس انتي مش عجباني علشان كده انتي تنزلي هنا احسن ، وقال لصحبه يلا نزلها هنا ياض .
السواق رد وقالي طلعي الاجرة يا بت .
صرخت وقولتله : بت لما تبتك يلا اتكلم عدل .
سمعنا صوت ماما من الفون بتسألني اتصل بالنجدة ولا استني ؟
قولتلها استني وقولت للسواق : نزلني علي اول الطريق عند النور اللي هناك ده .
قالي : ماشي ، وراح وقف قدام كشك ، نزلت من التوكتوك ورميت له الاجرة في التوكتوك ، اخدها ومشي .
بعدها مشيت لوحدي لحد البيت كانت المسافة مش بعيدة .
والحمد لله ربنا انقذني لما بعتلي فكرة اني اشغل الجي بي اس واكلم ماما ، ومن بعدها وانا مش بتأخر في الشغل تاني .
انتهت .
إرسال تعليق