حي رمضان جاي الحلقه الأولي بقلم الكاتب محمد منصور حصريه وجديده على مدونة النجم المتوهج
حي رمضان جاي الحلقه الأولي بقلم الكاتب محمد منصور حصريه وجديده
رمضان اخو قمر رجع لكم في كوميديا. مجنونه. تنفع انيميشن
**كنت قاعد جوة عيادة دكتور نفساوي من بتوع علم النفس وكدة. اصلي بقيت مريض نفساوي عقبال عندكم وببص للدكتور وبقول
حط نفسك مكاني كدة. تروح تشتري هدوم جاية من بلاد برة علشان تبيع وتكسب يعجبني منهم 7 اطقم اشي قمصان واشي بناطيل واشي جلاليب واذا بيا اعرف ان الهدوم دي مش بتاعت بلاد برة. دي بتاعت بلاد جوة. والاحية الكبيرة انها بتاعت ناس ميته. اة والنعمه هدوم ميتين وياخراشي علي اللي حصل والسواد اللي شوفته عايز تعرف هحكي لك. بس ما تيجي في الاول نقول
من تاليفي.
محمد منصور.
منص
وقبل ما نبدأ الحلقة نوحد الله ونصلي علي خير خلق الله سيدنا محمد. وعلي بركة الله نبدأ
بسم الله توكلت علي الله. وهو رب العرش العظيم
الحكاية بدات معايا لما الظهر اذن وانا كنت نايم. انا مين اصلا. انا رمضان ابن صبحي اخو قمر. يوووووو. دي حكاية تانية اسمها *دموع قمر*. ابقو اقروها. المهم دخلت عليه مراتي وهي بتضحك وبتقول
رمضان رمضان
فتحت عيوني عادي جدا. لقيتها لسة بتضحك وبتقول
انت نايم صح
ودة سؤال ملهوش الا اجابه واحدة. وهو يا بنت، ،،،،،،،
هسيب كل واحد ل خياله ويتوقع انا قولت اية وغمض عيني تاني وهنا سمعتها بتعيط استغربت اوي وفتحت عين وسبت التانية مقفولة قولت اتاكد انها فعلا بتعيط. طلعت فعلا بتعيط ما بدهاش بقي فتحت عيني التانية وقولت
في اية يا لميس
ضحكت وقالت
في اية. صح في اية. سؤال حلو اوي
وسقفت ووقفت وفضلت تبص لي وهي عماله تسقف وتقول
لا برافو. بجد برافو
فقولت لها
في اية يا بنت المجانين
قربت مني وحطيت عينها في عينية وقالت
عينك في عينك كدة ما تعرفش في اية
رمضان
والله ما عرف في اية.
لميس
انت بتخني يا رمضان
رمضان
امتي وفين وازاي
لميس
امباراح مين فينا اللي عامل الشاي قبل ما نام انا ولا انت
رمضان
انا
لميس
وطول عمرنا بنحط الشاي فوق ولا تحت
رمضان
فوق مين وتحت مين
لميس
فوق السكر ولا تحت السكر
رمضان
عادي
صرخت في وشي وقالت
ما تقولش عادي.
رمضان
بتصرخي لية كدة
لميس
علشان بتقول عادي.
رمضان وهو بيقعد علي السرير
يعني بذمة اهلك دي اصطباحة الواحد يصطبح بيها
لميس
طبعا هي احلي مني. طالما قدرت تخليك تحط الشاي تحت والسكر فوق. قدرت تغيرك. بعد 5 سنين جواز
رمضان
هو اية اللي فوق واية اللي تحت. ما تعقلي كدة يا لمار
لميس
اعقل ازاي. طول عمرك بتحط السكر تحت والشاي فوق اشمعني امباراح الشاي تحت والسكر فوق
رمضان
ممكن سؤال اهبل
لميس
من حقك تسال
رمضان
في شرع مين ان السكر والشاي دليل علي خيانه الراجل لمراته
لميس
انا متابعه للاستاذة سميرة حداية استاذة جامعه السلوم في الحياة الزوجية والمسالك البولية. وهي اللي قالت ان التفاصيل الصغيرة في حياة جوزك بتودي لتفاصيل كبيرة. واي تغيير يبان علي جوزك اعرفي انه بيخونك. ولازم وانتي بتوجهي جوزك بحقيقته تضحكي مرة و تعيطي مرة. علشان تربكي كل حساباته وتخلي يشوفك، ،،،،،،،
هنا انا قولت
متخلفة
لميس
هي مين دي المتخلفة
رمضان
سميرة حداية.
لميس
اوعي تفكر تشتم الدكتورة سميرة. ولا علشان كشفتك علي حقيقتك.
رمضان
لميس. دي لو دكتورة شاطرة كانو ودوها السلوم لية. وبعدين انتي قولتي بتاعت مسالك بولية. يعني سباكة. ملها ومال الكلام في الجواز والمتجوزين دي واحدة اكيد مسجونه هناك. وفيديوهاتها بتتهرب من جوة السجن. بطلي تسمعي لوحدة اسمها حداية
وقومت من فوق السرير وزي اي مصري اول حاجة المفروض اعملها اول ما اصحي من النوم اني اخش الحمام لسة بفتح باب الحمام لقيت لميس بتقول
امسك
بصيت لها وقولت
اية
لميس
داخل الحمام يعني
رمضان
وفيها اية دي كمان. ولا سميرة حداية قالت لو جوزك صحي ودخل الحمام اعرفي انه مش داخل ي ا ا ح. دة داخل يكلم عشيقته
لميس
لا. بس انت متعود طول عمرك
قطعتها وقولت
اعمل الكيكي برة الحمام وبعد كدة اخش وهي تيجي وريا
لميس
لا. مش كدة. بس انت
ما كنتش قادر بصراحة وقفلت الباب في وشها وهي وقفت علي الباب وقالت
اول مرة تعمل حمام والباب مقفول
صرخت من جوة الحمام. وكنت بفكر اقتلها هي وحداية،،،،،
ومن جوة عيادة الدكتور النفساوي اللي انا بتعالج عنده ووقت ما كان الدكتور قاعد قدام ماكينة غزل البنات اللي بتعمل الحلاوة الشعر. وقاعد بيلف الحلاوة علي شفاطة وبيستعد ل اكلها والدكتور دة صحيح اسمه دكتور. وئام. بص لي وئام وقال
واضح من حكايتك ان مراتك مش واثقة فيك بجنية
قولت له وانا عيني علي الحلاوة الشعر. ونفسي في حتة
فعلا يا دكتور ودة بسبب اني كنت زمان راجل بصباص لكن انا توبت وبقيت محترم
وئام وهو بيحط الحلاوة الشعر في بوقة وتقريبا في شوبة دخله في مناخيرة بس عادي. قال
دي عايزا كام جلسة وهترجع سليمة. بس اخلص عليك انت الاول. وبعدها افوق ل مراتك. المهم كمل وبعدين
رمضان
قولت اغير هدومي وانزل اقعد في محل الملابس بتاعي شوية. وفعلا فتحت الدولاب ولبست اول طقم
وئام
بتاع واحد من الميتين
رمضان
اسم الله عليك.
وئام
وبعد ما لبست الطقم اية اللي حصل
رمضان
لبست الطقم وبفتح باب الشقة وخرجت لقيت نفسي في عربية ملاكي وبعيط واغنية اعذريني في يوم زفافك ما قدرتش افرح زيهم ما خطرتش ابدأ يوم في بالي اني ابقي واحد منهم. جاي لك بغني
وئام قطعني وقال
يا ابني انتي هتغني الاغنية كلها احكي لي اللي حصل،،،،
ونروح للعربية الملاكي ورمضان جوة منها وسايق العربية وهو مش فاهم في اية. وجنب منه يلاقي ست في الستينات من عمرها بتقول له
ما تعملش في نفسك كدة يا مشموم
رمضان باستغراب
انتي مين يا ولية واية مشموم دي
الست ردت وقالت بدلع
انا ماما ستو زمردة
رمضان
ماما ستو ودة من امتي
زمردة
من زمان انا اللي ربيتك بعد ما قتلت ابوك وامك
رمضان
هو ابويا صبحي مات مقتول سبحان الله ولا كان باين علبه وهو قاعد علي القهوة امباراح
وبدات تيطبطب عليه وتقول
عارفة انك بتحبها يا مشموم بس هي بتحب غيرك خلي عندك كرامه يا مهزق
رمضان
مشموم ومهزق يا ولية هتخليني ازعلك. انا بقيت محترم ما ترجعنيش ل قلة الادب
زمردة
انت الصدمة عملت لك خلل في وظائف الكلي حاسة بيك. يا قلب ستك.
رمضان
اية المرض دة. اعراضة اية يعني
وهنا لقيت العربية وققت لوحديها قدام قاعه افراح. كبيرة
لقيت العربية بتتفتح وانا بنزل من العربية ما عرفش ازاي عايز اقول لكم ان جسمي بطل يسمع كلامي لقيت اللي اسمها زمردة دي مسكت ذراعي وقالت
استني ما تخشش لوحدك يقولو عليك اية هزق وفخد
رمضان وهو مش عايز يدخل بص ل زمردة وقال
اية فخد دي يا ولية. اوعي تكوني فكراني متربي دة اصلا سوابق
هنا لقيت العروسة وجنب منها العريس واقفين علي الباب بستقبلو المعازيم وكانت العروسة بتقول وهي بتلم النقطة
سعيكم مشكور
استغربت وقولت
هي ما بقتش الف مبروك.
وقفت قدام منها وانا مش فاهم حاجة بصت لي وقالت وهي بتغني
لو جاي في رجوع انساني. حوارك مشموم يا اناني
رمضان
وانتي مين بقي. حماقي
زمردة قالت للعروسة
سامحي يا مشمومة يا بنتي جوازك من الحمار دة
وبصت علي العريس. وراحت مكملة كلامها وقالت
عمله خلل في وظائف الكبد
بصيت للولية المستفزة دي وقولت
هو اي هبد وخلاص. ما تنكتمي شوية. انا معرفهاش علشان اتعب علشانها او ازعل حتي
زمردة
كدة برضو دة كلام تقولو ل ماما ستو. نسيت لما كنت بتبقي جعان واقوم اسخن لك اللبن واشربة انا
رمضان
انتي عبيطة يا ولية
مشمومة. قالت
خشوا الحريم مع الستات جوة اقعدوا مع بعض عادي بس بالله عليكم برجاء الدعاء.
بصيت للعريس وقولت
هو دة عزاء ولا فرح. يارب لو بحلم. الحلم الاهبل دة يخلص علي خير واطلع منه من غير خلل. في اعصابي
لكني لقيت نفسي بمشي تقولش رجلي ركبت علي جسم واحد تاني. ودخلنا الفرح وقعدت ولقيت المعازيم عمالين يبصوا لي واصوات كلها داخلة في بعضيها واللي يقول
اية اللي جابه الفرح دة
واحد تاني قال
لوغت وسيتغ. جاي الفرح وكانه فرحه. مع انها رفضته البارد
وحد تالت بيقول
لو عنده ب اتنين جنية دم مستحيل كان جة الفرح
وحد رابع يشتم وحد خامس يسب وحد سادس يتف هنا لقيت زمردة دي بتحط ايدها علي رجلي وتقول
مش عايزاك يا مهزق كمية الشتايم اللي بتسمعها وكلها عليك تجيب لك خلل في القولون
بصت لها وانا قرفان وقولت
تصدقي بالله ما حد جايب لي خلل في دماغي غيرك انتي
قالت
مش كدة عيب دة انا ماما ستو. نسيت لما كنت بتعيط وانا قاعدة بتفرج علي المسلسل وفضلت اعلي في صوت المسلسل علشان صوته يغطي علي صوتك المقرف
رمضان
دة اية الحنية دي. دة المفروض اللي اسمه مشموم. دة كان جاب وشك ب موس.
وهنا سمعت صويت وصريخ اتفزعت وقولت
في اية
زمردة
دي التورتة داخلة. يا عرة الرجاله. ياللي جاي تحضر فرح اللي ضربتك علي قفاك
وقامت من جنبي وجريت ومش هي بس. هي و كل المعازيم قامو وراحو للتورته جري وفضلو واقفين قدام منها وساكتين خالص تقولو نامو. استغربت المنظر بس عادي الاستغراب ما بقاش يفرق معايا. وهنا لقيت حمامه طايرة بسرعه وجت وقفت علي رجلي ومربوط في رجليها ورقة. سحبت الورقة طارت الحمامة ووقفت فوق مني بالظبط بصيت لها باستغراب وهي فضلت تبص لي وفجاة شخت عليه وطارت جري وحسيت انها بتضحك اة والله كانت بتضحك حتي الحمامة طلعت متخلفة قولت بعصبية
يا بنت الكلب
بصوا لي كل اللي في الفرح وقالت زمردة بشويش
هسسسسسسسسسسس
قولت
في اية
زمردة بشويش
النوتيلا سايحة.
ورجعت تاني تبص للتورتة. وانا ببص وعايز اشتم واقول ولية بنت. ولا بلاش المهم فتحت الورقة ولقيت مكتوب
★انا مشموم الميت صاحب الهدوم اللي انت لبسها وقدرت قبل ما اموت اسيب الرساله دي مع الساحر اوز علشان لو ندمت يقدر الساحر اوز بتعويذة سحرية يسخر لي اللي يصلح غلطتي★
بصيت لهدومي وقولت
اية الهبل دة اوز وتعويذة اية. انا مش فاهم حاجة
لكني لقيت نفسي بفتح الورقة تاني واكمل المكتوب
★اسمعني كويس التورتة اللي قدام عيلتي كلها مسمومة وانا اللي حاطتت السم بايدية. علشان اموتهم واخلص منهم ومن تريقتهم عليه لكنهم بعد ما متو وانا مت صعبوا عليه. علشان كدة امنعهم من انهم ياكلو منها. غير الماضي علشان خاطري يا رمضان وخلي عيلتي يعيشوا وبمجرد ما تعمل كدة. هترجع تاني ل حياتك. اوعي تخليهم ياكلو منها. وحياة امك. سلام ★
ولقيت الحمامة رجعت تاني تقف علي رجلي وخدت الورقة مني وهي بتبص لي بقرف وطارت ووقفت فوق مني لكني قومت ما انا عارف اللي عايزا تعمله. وروحت قعد علي الكرسي اللي جنب مني لقيتها ضحكت برضو لانها كانت شخت عليه قبل ماتاخد مني الورقة. قرفت اوي وبصيت لها وقولت بعصبية
لية يا بنت الرخمة
بصت لي زمردة وقالت
هسسسسسسسسسس
قولت بعصبية
اية. النوتيلا بطلت تسيح علشان صوتي عالي
زمردة
الكريمة هتقابل النوتيلا في قلب نص التورتة. منظر رهيب ما بنشفوهوش الا في الافراح. تعالي اتفرج معانا
رمضان
في اية انتو بتعبدوا التورتة. ما تاكلوها واخلصوا
هنا لقيت الحمامة جت تاني ووقفت علي رجلي وهي بتنفخ وباين عليها زهقانه ورمت ورقة علي رجلي وطارت وهي قرفانه فقولت
هي مالها عندها تسلخلات تحت جناحتها
وفتحت الورقة لقيت
★لو كلو من التورتة يا غبي انت مش هترجع تاني ل زمنك ودنيتك وهتعيش مشموم طول عمرك★
جيت الحمامه وخدت الورقة وطارت وهي عماله تبص لي بقرف فقولت
صحيح ما فيش حد مرتاح في شغله. دي اكيد مش حمامه بس هي شغاله الشغلانه دي لغاية ما تتعين في شركة امن
وقررت اتصرف ما انا مش هعيش طول حياتي مشموم. بس اتصرف اعمل اية. ما انتم لو شايفين هما بيبصوا للتورتة ازاي. ولا بصة حمدي الوزير. لليلي علوي في الفيلم بس كان لازم اتصرف وفعلا اتصرفت. ولو في العمر بقية هكمل لكم بكرة الحكاية واقول لكم انا عملت اية. سلام، ،،،،،،،،،
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
جميع الروايات كامله من هنا 👇 ❤️ 👇
اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇
❤️🌺💙🌹❤️🌺💙🌹❤️🌺💙🌹❤️🌺🌹❤️🌺🌹🌹❤️🌺💙
تعليقات
إرسال تعليق