مظاهر الاحتفال بقلم جيجي حصريه وجديده على مدونة النجم المتوهج
مظاهر الاحتفال بقلم جيجي حصريه وجديده
نعيمه... اه والله يا ستى زى ما بقولك كدا.. جابلها عربيه بمفتاحها... هديه على راس السنه.. وجواب حب كمان كاتبلها فيه... كل سنه وانتى معايا يا قلبى... اه والله زى ما بقولك كدا يا ست منيره.. انا قريتو بعنيا الاتنين دول..
منيره... بقى سعاد الهبله.. جوزها جبلها عربيه هديه على راس السنه..
دى نعيمه.. مرات عبدو البواب.. بتطلع لشقق العماره كل واحده يوم تنضفلها شقتها وتاخد فلوس... ودى منيره صاحبه الشقه.. نرجع لحكايتنا...
نعيمه.. اه وجاب حاجه لحماته بس صراحه نسيت هى ايه
منيره طلعت فلوس كتير وادتهالها..
نعيمه اخدت الفلوس وحطيتها فى هدومها من فوق وقالت بطمع.. اه افتكرت.. جبلها خاتم الفص بتاعه قد كدا يا ستى.. اه والله زى ما بقولك كدا...
طب دا عبدو جوزى.. جابلى انا والبت نور بتى والواد رحيم طرطور الباب النويل ده.. الا بالحق هو سى شكرى جابلك.. ايه..
منيره.. ها... اه جبلى حجات كتيره.. يلا روحى انتى كملى شغلك فى المطبخ..
ودخلت اوضت النوم بتاعتها وصحت جوزها وقالت... قوم جايلك راحة بال ونايم يا شكرى افندى قوم فز..
شكرى.. فى ايه يا منيره ايه اللى هيقل راحت بالى بس....
منيره... انت عارف بكره ايه يا شكرى افندى..
شكرى.. ايه افندى دى اللى حطتيهالى ورا اسمى.. وفى ايه بكره عاملين اضراب على النوم ولا ايه..
منيره.. انت هتستهبل... قوم فز.. راس السنه بكره والعماره كلها بتجهز للاحتفال..
شكرى.. ايه يعنى مش فاهم دى معايده جديده كدا زى كل سنه وانت معايا.. بعدين العيد دا متذكرش فى الاسلام .. نحتفل احنا بيه ليه..
منيره.. اولا كده كل سنه وانت معايا دى بتتقال للى بيجيب هديه وهو داخل على مراتو فى راس السنه.. ثانيا ده بدايه لسنه جديده ولازم نحتفل بيه.. وتضامن اجتماعى لازم نحتفل سوا... واحتفال يعنى هديه...
نعيمه.. كانت واقفه ورا باب الاوضه وبتتسمع عليهم..
وخلصت شغلها ومشيت على الشقه التانيه... وكانت بتتكلم مع صاحبت الشقه وبتقول..
عارفه يا ست صباح.. الست منيره اما سالتني على جارتنا سعاد انا قلتلها ان جوزها جاب لها عربيه... اه مش جارتنا سعاد جوزها جبلها عربيه اه والله.. كل الناس بتقول كدا.. زي ما بقولك كده يا ستي هى بقى ايه اول ما انا قلت لها ان جوز الست سعاد جاب لها عربيه قامت كده مره واحده.... وقامت منفوضه وقامت داخلا لك على شكرى بيه جوه الاوضه هو كان نايم يا عيني ومرتاح ومش على باله اللي هيجرى له لما يقوم.. ولا دريان باللى ست منيره هتعملوا فيه يا عينى عليه يا قلب امه.... يا كبد امه ما كانش يعرف انه هيتنكد عليه وعلى اهله وعلى البلدان المجاوره.... انا سمعتهم اصل هي كان صوتها عالي بتتخانق معاه وبتقوله ازاي اختك سعاد جوزها يجيبلها عربيه وانت ما تجبليش حاجه...
صباح... طب هي مالها ومال سعاد يعنى... ايه المشكله اما جوز سعاد يجيبلها عربيه...
نعيمه.. انتى غلبانه وعلى نياتك ياستى.. اصل الست منيره معاها مشاكل ياما مع الست سعاد وبينهم ما صنع الحداد اصل الست سعاد ديت بتكره الست منيره... والست منيره بتحقد على الست سعاد... اصل الست سعاد دي تبقى اخت جوز الست منيره... فانتى عارفه بقى موضوع العمه الحربايه ده...
صباح.. دماغى لفت منك.. هي عمت ولادها.. واخت جوزها.. هي بقى من نفسنا منها ليه.. وليه زعلانه على اللى جوزها جاب لها عربيه.. هى مالها..
نعيمه.. عشان جوز الست منيره ما جابش للست منيره عربيه.. زى جوز الست سعاد ما جاب...
صباح... بقولك ايه يا بنت انتى اكلتى دماغي بحاجات ما لهاش لازمه روحي شوفي المطبخ انا مش عايزه اعرف اخبار الجيران اصلا..
نعيمه.. الحق عليا اللي بحكيلك انتى ما انتيش في الدنيا وجوزك ما بيجيب لكيش حاجه وانتى بتسكتي.. طب بالك انتى الست منيره لو جوزها دخل البيت من غير ما يجيب لها هديه.. والله ما تدخله البيت اصلا.
صباح.. وما دخلوش ليه.. جوز سعاد معاه فلوس فجاب لسعاد.. وجوز منيره معاه فلوس وهيجيب لمنيره انا مالى... انا اساسا باصرف على نفسي.. جوزي بيصرف علي البيت.. بس انا عندى فلوس وبجيب لفنسى كل اللى ناقصنى..
نعيمه ضربت على صدرها وقالت.... يا ندامه يا ست صباح يعني هو بيصرف على نفسه... وانتى بتصرفى على نفسك .. طب ليه تصرفي على نفسك.. ها ليه تخبي مرتبك ليكي بالباديكير والمناكير والفاتيكير.. وهو يدفع في كل احتياجاتك اه.. ويدفع للبيت.. مش انتى بتتزوقيلو يبقى يدفع... ويدفع لاولاده مش هم ولاده بردك يا ست صباح..
صباح... ايوه ولاده بس ايه المشكله اني اساعده..
نعيمه... مشكله كبيره دى الست هايدي جارتنا اللي في التالت جوزها جاب لها خاتم الفص فيه قد كده.. اه والله يا ست صباح زي ما بقول لك كده.. بصي تخبطي بيه الواحد في دماغه تتفتح وادلها فلوس قد كده للبيت... وادالها فلوس قد كدا ليها هى ... هتروح بيها الكوافير وتعمل بقى الحاجات اللي بيعملوها في البشره والضوافر والحاجات دي علشان راس السنه يا ست صباح.. كل سنه وانتى طيبه.. عارفه وجابلها شويه هدوم قد كده اديتني منهم يا اما قولتلها احسن جوزك يسالك عليهم قالتلي... يسالني ايه ده انا كل ما اقولو الدولاب بيكب يقولي خلاص خلاص خدي يا حبيبتي ما يغلاش عليكى.. ودولابها بيكب يا ستى.. قال على راي المثل ناس يجيلها التكس... وناس ينمشى بيها عكس..
صباح... بقولك ايه يا بت انتى.. روحى على مطبخك.. مالكيش دعوه خالص بيا ولا بالجيران.... ما تيجيش تحكيلي حاجه عن حد... انتى حرام عليكى اللى بتعمليه ده.. فى ناس بتسقط من على الصراط بعدين لحدة لسانها.. وعلى الله الاقيكى مطلعه اسرار البيت ده للجيران...
نعيمه.. هو انتى بتقوليلى اسرار اصلا عشان اقولها..
ومشيت وهى بتقول بهمس.. وليه فقر ولا بستنفع منها بفلوس ولا بهدوم ولا حتى بعرف افضفض معاها.. ايه يا خواتشى ده...
وطلعت من عندها وراحت الشقه التالته.. وقالت ازيك يا ست سعاد عامله ايه..
سعاد.. الحمد لله يلا تعالى عشان ننضف للكريسماس..
نعيمه.. اه ما انا جيتك اهو انا لسه مخلصه تنظيف عند الست منيره وجيت على طول..
سعاد.. ايه ده انتى روحتى لمنيره قبل منى.. !!
نعيمه.. شبطت فيا وقالتى.. هدفعلك اللى انتى عيزاه.. واما قولتلها لا هروح لست سعاد الاول.. قابلت عبدو ودفعتلو كتير خلتو قالى اجى هنا الاول وحلف عليا كمان.. منفسنا منك جامد يا ستى.. وغسلتلها شويه مواعين وجيت جرى... عشان تلحقى سفرتك الا قوليلي يا ستي انتى مسافره فين المره دي...
سعاد.. لا انا مش مسافره انا هسافر ليه يعنى..
نعيمه... اه معلش ما تاخذينيش اصل انا بحسب ان انتى كمان هتسافري..
سعاد.. انا كمان ليه هو مين مسافر !!
نعيمه.... ست منيره مرات اخوكى... اه والله اصل جوزها حجزلها اسبوعين.. اسبوع في شرم الشيخ.. واسبوع فى اسمها ايه دى.. قولي معايا.. اه راس البر...
سعاد.. دا تجديد لشهر العسل...
نعيمه... هيهى شهر عسل ايه يا ستي. والنبى انتى اللى عسل.. هو انتى مش في الدنيا.. ده عشان راس السنه.. وحجزلها التذاكر اصل هناك في فنادق بيجوا فيها نجوم بيحيو الحفلات على راس السنه.. فهو بقى واخدها ورايحين هيحضروا ويقعدوا في الفندق وهيحضروا الحفلات اللي بتتحضر هناك... وواخدين ا بتهم ميار معاهم.. وهيقعدو اسبوعين يا لا ولو شفتى هديه سى شكرى اللى جبهالها بس هي قالتلي ما اقولش لحد.. بالاخص انتى...
سعاد طلعت فلوس كتيره واديتها لها.. اخدتهم بطمع وخبتهم فى هدومها من فوق وقالت..
... بس انا هقولك يا ستي.. انا اصلى بحبك لله في لله كده... وبحس قلبي انشرحلك... عشان كده هقولك بس ما تقوليش لحد.. اصل انا عمري ما اطلع اسرار بيت من اللي بدخلهم ابدا.. اه انا بدخل شقه الناس عاميه ما اشوفش اي حاجه بتحصل فيها.. وطرشه ما اسمعش اي حاجه بتحصل فيها... وخرسه ما اقولش اي حاجه بتحصل فيها لاى مخلوق .... اه امال ايه...انا ما ركزش في البيوت... بيوت الناس عوره ومات غما من راقب الناس...
سعاد.. اخلصي بقى شكرى اخويا جاب ايه للهبله دى.. دا عمرو ما حتفل بيه معانا الواطى.. واما نكلمو يقول دا مش تبعنا مش مذكور فى الاسلام..
نعيمه.. اه افتكرت جبلها عقد في علبه قطيفه كل حجر والتاني قد كده...
سعاد.. عقد فى علبه قطيفه..
نعيمه.. اه وهى كانت قافل عليهم اصل هي قالت انكم حريم فقر وعماره قراره وما فيش راجل بيشتري لمراته حاجه فهي بتخاف من الحسد فبتخبي الهدايا اللى جوزها بيجيبهالها....
سعاد.. ايه واحنا هنحسدها ليه بقى ان شاء الله.. طب ده انا جوزي جايبلى حاجات كتيره كتيره قوي على راس السنه ولسه بيجيب..
نعيمه.. جوزها كمان بيجيب لها هدوم بتقول الدولاب مش شايل.... فبتقوم تديني من الهدوم اللي عندها كل يومين تلاته تدينى كرتونه مليانه... اه والله يا ستي.. اقولها لسه ما لحقتش البس.. تقولى كلها ترزق من فضله.. دى بتلبس الفستان مره وما تحطوش تاني على جتتها ابدا عمرها ما تغسل الهدوم.. تقلعها وتديها لي تقولي اغسلي دول وخديهم.. اه والله يا ستي زي ما بقولك كده عمرها عمرها ما تعرف الغسيل ولا مساحيق الغسيل دى دخلت بيتها..
سعاد... فكرتينى في عندي هدوم كتيره وانتى طالعه فكريني اديهالك... اصل جوزي جابلي هدوم كتيره قوي هديه علشان راس السنه...
نعيمه بطمع.. طب يا ستى شكرا اما قوم اغسلك المواعين والمعلك الشقه..
سعاد.. تمام روحى..
نعيمه راحت المطبخ وبقت تغسل الواعين وتقول...
يا حلولي على راس السنه واللي بيحصل فيها.. عقبال بقى العيد الكبير....
فى مدخل العماره... كانوا قاعدين ٣ بنات ميار بنت منيره.. وسميه بنت سعاد.. ونور بنت نعيمه.. ميار طلعت شقتها لما شافت سميه..
نور قالت لسميه... والله العظيم يا بنت يا سميه زي ما بقولك كده.. ابوها جاب لها لعب كتيره قوى لحد ما السبت بتاعها اتملى وبقى ينزل الالعاب في الارض... بقت تقولو يا بابا يا حبيبي كفايه العاب.. اودي فين العابى القديمه السبت مليان.. كفياك مصاريف... يقولها ما تقوليش كده يا ميار.. انتى في القلب كده كده... اللعب اللي تلاقي نفسك مش عايزاها خالص ابقى اديها للبنت نور... قامت نازله الصبح ومعاها العاب قد كده... قال ابوها جبلها العاب كتيره قوي ولسه هيجيبلها عشان راس السنه...
سميه... وايه اللي حصل كمان... جابلها ايه العاب يعنى..
ميار.. يا اختي كل حاجه... عربيه ولعب وميكي ماوس ودباديب.. وحاجات... ياما وهدوم... هدوم كتير... هى بتجبلى الهدوم بتاعتها وعامله ان هي صاحبتي وانها بتديني الحاجات بتاعتها عشان احنا صحاب... بس انا عارفه هي بتديهملي ليه.. مش عشان كدا لا..
سميه.. بتديلك هدوم والعاب ليه..
نور... عشان كل اللي قابلني يقول لي خدي يا بنت يا نور ايه اللي انتى لابساه ده من فين جبتيه.. اقوم اقولهم دي بتاعت ميار ابوها جابلها العاب وفساتين.. واصيطها في العماره.. واقول ان هى بتديني على طول الهدوم عشان ابوها بيجبلها حجات جديده.....
سميه... اما تطلعي عندنا ابقي فكرينى هديك الكرتونه اللي جنب الدولاب.... مليانه هدوم والعاب وكل ما اجي اديهالك.. حاجه تنسي..
نور بخبث... ايه ده انتى هتدينى العاب ليه اصلا..
سميه... انا كمان بابا هيجيبلي على راس السنه العاب وهدوم..
نور.. طب خليهم احسن ما يجيبش..
سميه... مين ده اللى ما يجيبش.. انا بابا كل راس سنه بيجيبلي.. اشى هدوم والعاب.. وكباب.. قصدى حجات..
نور.. امم كل راس وانتم طيبين...
سميه... وانتى طيبه....
ومشيت وهى بتقول بهمس... ده انا هنكد على اللي جابوك يا بابا... بقى انا ما تجيبليش العاب...
جيه ولد ده رحيم تؤم نور... وقال..
مش ناويه تخفى على مخاليق ربنا وتبطلي فتنه في الناس..... ميار امتى ادتلك هدوم اصلا...
نور.. لا يا ناصح هى ما دتنيش بس انا باللي قلته سميه هتديني كرتونه.. هي طلعت تجهزها... ولما اقول لميار نفس اللى قولتلو لسميه.. ميار هتدينى زيهم.. ما لكش دعوه انت...
رحيم... وليه بتعملي كده وتفتني ناس في بعضها.. انتى عارفه ان هي اساسا بتكره ميار...
نور.. على رأى ماما خلينا ناخد من عدوتهم حاجه تفيدنا...
رحيم.. وليه كل ده عشان شويه هدوم كرامتك فين وانتى بتاخدى باقيهم.. اللى هما بريموه بيدوهولك وتلبسيه.. لا وبتفتنيهم فى بعض عشانو كمان..
نور.. انا مش بفتن حد دى كدبه بيضه.... انت اصلا غيران عشان مش بتعرف تعمل زى.. ولما هرجع لماما بالهدوم هتسقفلى وتقول انى شاطره...
بس شافت ميار جايه جريت عليها وقالت.. انتى مشيتى ليه اما شوفتى سميه فرقعتهالك ومشيتها بنارها...
ميار... ليه يعنى قلتيلها ايه !!
نور.. انا اقولك.. اصل هي قالتلي البنت ميار مشيت عشان ابوها مش هيجيبلهاش حاجه على راس السنه... اتكسفت.. وانا بابا هيجيبلي ويجيبلي... قمت انا بقى اسكت ما اسكتش انتى صاحبتي.. انا مسكتش قلتلها ايه بقى قلتلها ... تصدقي انا دايما بنسى اللي بقوله يا بت يا ميار...
ميار قلعت ساعه كانت لبساها في ايدها وقالت...
خدي دي انا كنت جايه اجيبها لك.. وانتى لهتينى...
نور لبست الساعه وبقت تتفرج عليها وقالت....
بجد الله حلوه قوي الساعه دي... اه انا افتكرت قلتلها ايه... قولتلها.. لما ميار ابوها ما يجلهاش مين ابوها يجبلها... دى ابوها جبلها هدوم والعاب ياما.. قالتى اش عرفك طب ما هي يمكن كدابه... ممكن تنزل تقول
بابا جايبلي من غير ما يكون جبلها .. قمت انا بقى دمى فار وجري في عروقي اما قالت عليكى كذابه.. وانا اسكت لا.. قمت قلتلها طب والله العظيم جبلها اصل هي امبارح جابتلي كرتونه قد كده فيها لعب وفساتين مالينها ملى.. وقالتلى اصل دولابي ما بقاش شايل الفساتين القديمه مع الجديده فقلت اديكى شويه يا بنت يا نور.. سميه بقى قالتلى مش مصدقتك انتى كذابه قلتلها والله العظيم قالت مش اصدقك غير اما اشوفك لابسه واحد حلو من اللى ادتهولك... معروفه اللي ابوها بيجيبلها جديد.. بتدي القديم عشان الدولاب مش بيشيل...
ميار.... عارفه يا بت يا نور.. كأنك كنتى معانا بابا جبلى كومت حجات قمت اخدتهم حطيتهم في الكرتونه.. وجيت اقولك تاخديهم اصل انا مش هقدر انزلهملك.. اما تيجي مامتك عندنا هنخليها تاخدها...
نور... انا هاجي اخدهم..
ميار.. هتيجي انتى الحاجات كتير قوي عليكى... اصل بابا جبلي فعلا حاجات كتير وهديلك كل القديم اللي كان عندي.. وتلبسي براحتك كده وتوريلهم ان انا اديتك هدوم كتيره والعاب اكثر...
نور.. طبعا انا هعمل كده انتى صاحبتي على فكره...
يلا هروح اخد الحجات اللى هتديهالى...
ومشيت ورحيم مشى وراها وهو بيقول...
كده غلط وانتى كده بتوقعي الناس في بعضها.. حرام عليكى يا نور... الفتنه اشد من القتل...
نور.... ما لكش دعوه انت خليك في نفسك.. وراحت على شقت ميار جابت الصندوق اللي فيه الهدوم من عند ميار ورجعت... جابت صندوق من عند سميه.... نعيمه شافتها قالت بذهول...
ايه يا بنت الحاجات دي كلها.... جبتيها من اين يا بت..
نور..... تعالي يا ماما شوفي... شوفى الجمال وملى عينك وشوفي بنتك عملت ايه...
نعيمه... عملت ايه بنتى..
نور.. شوفى كل الحجات دى بقت بتاعتى... كلها كلها.. بقت ليا لوحدى.. شوفى...
نعيمه... ايوه يعنى جبتيهم ازاي دول..
نور.... قولت لسميه كلام على ميار وكلام لميار على سميه.. ميار ادتنى صندوق.. وسميه ادتنى صندوق..
نعيمه... الله بنتى كبرت وبقت تشتغل... اللهم صل على النبي...
نور.... عليه الصلاه والسلام... شوفي بقى انا جبت كل الحاجات دي... بصى لعب وفساتين وحجات كتيره...
نعيمه حضنتها بفرحه وقالت بفخر... شاطره يا نور.. اهى دى بنتى بنتى اللى بحبها...
عبدو جوز نعيمه قال بضيق... على فكره لو واحده بس من نسوان العماره شكت ان انتم بتنقلوا الكلام من بيت لبيت.. وبتكدبو كمان يعنى بتقولو حجات ما حصلتش اصلا... هيمشونا... هيمشونا وهنقعد في الشارع... مش هنلاقي حته تتاوينه.... لا انا ولا انتى ولا بنتك... ولا ابنك.. كلنا هنبات فى الشارع.. البنت بقت نسخه منك..
نور... ماله ده !!
نعيمه... كئيب ما بيحبش يفرح... غيران عشان انتى جبتى هدوم كتيره والعاب كتيره وهو ما جابش حاجه... قاعد على قصاد الامانه بتاعته.. حراسته قدام العماره يستنى لما واحد من السكان يديلو 20 جنيه يتيمه.. ما تجيبش حاجه في الزمن الاغبر اللي احنا فيه ده...
عبدو بغضب... ايه اللي انتى بتقوليه للبنت ده ما فيش حاجه من الكلام ده كله.. ده هرى على الفاضى... اولا انا بحرس العماره علشان دي شغلتي... لان احنا لو ناسيه يا مدام بيدونا مرتب اخر الشهر علشان نحرس العماره.. وده شغلنا يعني انا بقعد عشان دي شغلتي اقعد احرس العماره مش بحرس واحد يديني 20 جنيه... وليه هبله..
نعيمه... بقى كده .. طب وانت زعلت ليه.. لاهو انت يا خايب فاكر ان الفلوس اللي انت بتجيبها اخر الشهر دي مرتب اصلا... ولا يتقال عليها مرتب ولا تقضي حاجه دلوقت.. لازم تلقط رزقك من هنا ومن هنا... ما هو انت لو كنت بتروح وتعمل زينا كان سى حسن اداك شويه بدل وسي كريم اداك شويه قمصان.. وسى شكرى ادالك شويه بنطلونات...
عبدو... لا يا اختي مش عايز اوقع الناس في بعضها انا اقعد بجلابيتي دي وانا اضميرى مرتاح ومش عامل حاجه احسن ما البس بدله وانا مفتن الناس في بعضها.. واصلا مش هلبس باقى الناس..
نعيمه... والنبي انت تافه وما بتعرف تعمل حاجه.
عبدو.. انتى طماعه.. انا مش لسه جايبلك فستان.
نعيمه.. هيهئ اه فستان كان من سنه باين. النبى تتلهى.. قولى هي اختك الحربايه هتيجي امتى.. هتيجى السنه دى زي ما بتيجى كل سنه...
عبدو... هتروح عند امي.. وبعدين تبقى تيجى هنا..
نعيمه... اما تيجي عندنا وتلاقينى لابسه الفستان السواريه ده هتغل مني... وتنفسن ياه هقهرها..
وبقت تطلع الحجات هى ونور بفرحه وفخر باللى عملوه .
وطلعت تنضف شقه واحده من سكان العماره وكانت في واحده من السكان جميله جدا ولابسه نص كم دى انشراح ... .. كانت واقفه تزين شقتها.. ورجاله العماره كلها واقفين جمبها وبيساعدوها.. ودى طبعا شهامت المصرين المعروفين بيها.. بيساعدو اى قاروره حلوه محتاجه مساعده الا القاروره اللى معاهم... المهم الرجاله كانو واقفين جنبها وبيقولوا بحب
نساعدك فى ايه تانى يا انشو..
انشراح... اه يعني هو انا محتاجه شويه ترتيب هنا في الشقه كده.. عشان راس السنه لو تساعدوني يعني اكون شاكره...
نعيمه شافت كدا تسكت لا طبعا طلعت تكمل شغلها.. ودخلت الشقه اللى عليها الدور وقالت...
الحقى يا ست منى.. اما انا شوفت العجب وصيام رجب.
منى.. في ايه يا بنت يا نعيمه شوفتى ايه !!
نعيمه... انا شفتلك البنت انشراح واقفه في الشقه بالنص كم وبنطلون ضيق وعماله تتنطط فى الشقه ولا بتوع الجمباز.... وقال ايه بتروق لراس السنه... ورجاله العماره كلهم متجمعين بيساعدوها في تنفيض السجاد وترتيب البيت... وتلاقي الواحد مراته في البيت يشرب كوبايه الشاي ما يقومش يشيلها.. اه والله زي ما بقول لك كده يا ستى... شفتهم مرصوصين رص عندها... ودايبين دوب زى الملح فى الشوربه...
منى... يادى النيله الا يكون جوزي معاهم يا مصبتى...
نعيمه.. لا يا ستي انت بتقولي ايه.. ده انتى جوزك الوحيد اللي ما كانش معاهم... اه امال ايه انا ضربت بطرف عينى كدا ما لقتوش وسطهم... بجد سى محمود مش هناك لأ مالكيش حق تشكى فيه.. سى محمود.. ده اصلا قال الاحتفال حرام وعمل شيخ.. قصدى قال حرام...
منى بفرحه... ده خبر حلو قوي.. تستاهلى تحلى عليه.. خدى الفلوس دي وعايزاكي تراقبيلي بيتها.. ولو حصل بعيد الشر يعنى.. وشفتى جوزي معتب على هناك تبقي تقوليلي جري يا بنت يا نعيمه...
نعيمه اخدت الفلوس بسرعه وخبتها فى هدومها وقالت...
.. يوه يا ستى عينيا يا ستي من غير ما تقولي. ومن غير فلوس ده انا يشهد ربنا بحبك.. لله فى لله كدا..
تانى يوم نعيمه كانت عند شقة انشراح وكانو الرجاله مشيو بصت بعينها وشافت محمود واقف بعيد شويه راحت عندو وقالت.. سى محمود.. يا سى محمود..
محمود بص لنعيمه بقرف وقال..
يا نعم...
نعيمه.. ليه كدا بس ده انى بصبح بنقول صباحك قشطه يا سي محمود.. تقول يا نعم...
محمود بضيق منها... ما هو ياما بيجيب الغراب لامه.. انتى كل ما بتهلي كده بتبقى جايه بمصيبه في ايه !!
نعيمه... اصل انا امبارح شوفت الرجاله مرصوصين قدام بيت الست دى.... وقال ايه بيساعدوها..
محمود بتوتر... لا رجالة ايه يا بت انتى... انتى هتلبسينا مصيبه... انا ما شفتش حاجه انا كنت... كنت هنا اصلا معايا شغل على الفون...
نعيمه... كنت فين ده انت كنت هناك... واقف تشيل التقيل في اول الصفوف.. وعند مراتك يا عيني يجيلك الغضروف
حاكم مراتك سالتني عليك وقالتلي جوزي هناك... وانا بقى ربنا يسامحنى كدبت كده وقلتلها ان انت ما كنتش هناك
محمود... الله يخرب بيتك قطعتيلي الخلف مش تقولي من الاول انك ما قلتلهاش ان انا هناك..
نعيمه.. مش بنسى ممكن لما تقابلني تانى اقولها عادى...
وعملت بإيدها حركة الفلوس المشهوره وقالت...
مش بنسى.... عادى اقولها لا يا ستي ده انا غلطت حقك عليا العتب على النظر... كنت فاكراه سى كريم وطلع جوزك.... عادي....
محمود.. لا ما تنسيش خدي الفلوس دي انت ما شفتنيش عند انشراح.. ابدا ابدا..
انشرح اخدت الفلوس وخبتهم فى هدوم وقالت..
عينيا يا سى محمود.. ما انا قلتلها كده قلتلها ان انت ما كنتش هناك.. وقلتلها جوزك الوحيد من دولا عن رجاله العماره كلهم ما كانش هناك.. اه والله زى ما بقولك كدا..
محمود.. طيب شكرا واقفه ليه ما انا لسه مديكى فلوس اهو..
نعيمه.. دول عشان بكره ما اقولهاش انك كنت هناك.. يا بيه.. فين بقى بتوع الكلمتين الحلوين دول..
محمود ادالها فلوس تانى وقال..
خد اشتري حلويات... وحلي عني...
نعيمه لسه هتنزل نادت عليها انشراح وقالت...
صباح الخير يا نعيمه... ابقي نادي عبده يغيرلى الانبوبه عشان انا مش قادره اغيرها لوحدى..
نعيمه.. لا وعلى ايه اطلعهالك انا عليا الطلاق... عبده ما يخش بيتك.. طول ما انا عايشه...
انشراح بضيق من طريقتها.. اكيد مش هبصلو ده البواب.
نعيمه.. ومالو بواب يهنينى.. ولا غني مطلع عيني..
ودخلت غيرتلها الامبوبه..
انشراح.. كل سنه وانتم طيبين..
ومدت عليها فلوس بس نعيمه قالت..
مش عايزه منك يا اختي ابقى اتقي ربنا فينا اعملى حسنه لوجه الله والبسيلك حاجه كم..
انشراح.. كم ايه الجو لسه حر.
نعيمه.. ايه ده الجو سقع انتى ما بتبرديش..
انشراح.... لا لما بطلع من الشقه بلبس انا ما جوه الشقه البس ليه الجو حلو يلا شكرا..
نعيمه راحت للشقه التانيه بتاعت شفا وقالت..
تعالي يا بنت يا نعيمه عايزاكى تقلى معايا الترابيزه دي عشان ادخل السجاده تحتيها..
نعيمه قلت وهى بتقول.. ما هو احنا لو كنا حلوين كان زمان الرجاله واقفين طوابير يساعدونا زي انشراح ديه..
شفا.... اسكتي قطعت وقطعت سيرتها.. جوزى نازل على السلم يبحلق فيها طلع على السلم يبحلق فيها... ويقولى اهى الستات.. الا يا بنت يا نعيمه انشراح احلى منى..
نعيمه.... مين دي اللي احلى منك ده انتى مال وجمال وحسب ونسب.. طب دي حتى ما بتدخلش المطبخ يا دوبها قاعده تحط كريمات.. طب انتى لو جوزك ريحك وقعدك وجابلك وسائل الراحه بتاعتها.... اقسم بالله لا تضربيها بجزمتك.. هى اصلا لو معاها راجل ينكد عليها كانت تحلو كدا.. اصلا تاجى ايه فيكى... هى دي تعرف تعمل طشه ملوخيه زي بتاعتك... ولا تعرف تعمل ورك فرخه زي ما انتى بتعملي.... دى ما تعرفش تسلق بيضه بس هما يا اختي مش حارسين غير الميك اب اللي طافح لما كب ده... ولا البيجامه بتاعتها.. قال على رأى المثل..
اللبس النص... يخلى الشايب يبص
شفا... والله يا بنت يا نعيمه انتى بتفهمي خدي خلى دول معاكى..
نعيمه خدت الفلوس وحطتها فى هدومها من فوق..
وقالت.. تسلميلي يا ستي.. تعيشي وتديني... انتى الوحيده فى العماره اللي بتديني دول نسوان رمه وايحه عمرهم ما ادولنا حاجه ابدا.. والله ياستى اخش انضف الاقى الاكل كده اكوام اكوام كده.. الا يقولولى خديلك حتى نص فرخه ولا رغيف عيش ابدا.. بخله قوى يا ستى...
شفا... اه صحيح فكرتيني في اكل فايض من امبارح ابقى خديه وانتى نازله كان في التلاجه.. بس انا عملت غيره النهارده...
نعيمه.. يدوم العز ياستى.. ما يقل.. ما يقل منك ابدا..
شفا.. امين يا رب... في ايه.. ايه الصوت ده..
نعيمه... مش عارفه في ايه.. هنزل اشوف..
وجريت لتحت تشوف فيه ايه.. ولقت منيره وسعاد ماسكين في بعض..
نعيمه نزلت وقالت... فى ايه يا جماعه اهدو يا جماعه.. ده شيطان ودخل بينكم.. الناس مبسوطه وبتحتفل.. وانتو بتتخانقو.. لا اهدو كدا يا جماعه...
منيره بصتلها بغضب وقالت.. يا بنت انتى اطلعي من الموضوع...
نعيمه.. يوه في ايه يا ست سعاد..
سعاد.. مش منيره قالتلك اخرسى.. بقى انا يا حيوانه جوزى جابلى عربيه.. انا بغير منها وحاطه عيني عليها.. فين العربيه يا بت ها فين..
منيره.. ايه هو جوزك ما جبلكيش عربيه.. وانتى ما قولتيش انى عمه حربايه..
سعاد.. هو جوزى معاه يجيب عربيات.. ولا زفت.. هى قالت ان جوزك جابك عقد وخاتم وانك اديتيها هدوم وخدت منى... ومنك.. وبتقول كلام ما حصلش.. وبتسخن السكان على بعضها.. وبتسخن الستات على رجالتها..
ميار قالت... وبنتها اخدت لعب وهدوم منى.. وقالت ان سميه بنتها قالت ان بابا ما بيجبليش حاجه.. وانى كدابه...
سميه.. دى حقيقه انتو بتغيرو مننا اصلا.. طب ده حتى انا سمعت نعيمه بتقول لطنط صباح. ان امك اول ما سمعت ان بابا جاب هديه لماما قامت داخله على خالى شكرى الاوضه وفضلت تتخانق معاه وتقولو يجبلها حجات زى اللى بابا جابها لماما..
منيره.. ايه يا واطيه وكمان بتتجسسي علينا طب ايه رايك بقى ان هي قالتلي ان انتى يا سعاد كنتى بتسلطي شكري جوزي عليا...
سعاد.. وبتقولى انك بتقولى عليا لبنتك انى انا عمتو الحربايه... وان انا وحشه..
منيره.. يعنى انتى ما سلطتيش جوزى عليا وهو قالك موتي بغيظك مراتي وعايزها..
سعاد... انا مش شايفاكى اصلا.. عشان اغير منك.. او اقسى اخويا عليكى.. انتى اساسا مأيحه..
سمين... صح ماما تغير منك انتى مقيحه وجربوعه ده انتوا اساسا خالي يا لولا ما صعبتيه عليه يا لولا ما تجوزك.. متجوزك شفقه..
نعيمه... ما تدخلوش في الموضوع انتو... اما الكبار يتكلموا... انتوا تسكتوا..
منيره... يسكتو انتى اول واحده هتطلعي بره العماره دي طلعوا البنت دي من العماره ... يلا مشوها احنا هنجيب بواب جديد اساسا..
سعاد.. لا فى حاجه الاول هموت وعملها..
نعيمه رجعت لورا بخوف وقالت.. ايه هتعملو ايه ..
بعد شويه كانت نعيمه وعبده ورحيم ونور.. قاعدين قدام العماره.. ونعيمه مضروبه فى وشها ومبهدله..
عبده.. ان شاء الله تكوني مبسوطه بقعدتنا في الشارع كدا يا نعيمه... ارتحتى كدا.. ارتحتى اما رمونا بره.. ساعه وانا بحاول اطلعك من تحت نسوان العماره مبسوطه كدا...
نعيمه.. اموت واعرف عرفوا ازاى.. كانو قاعدين وزى الفل...
نور... ما هو انا يا ماما اصلي كنت بعمل زي ما بعمل كل مره... وبقول لسميه ميار بتغير منك فجاه وانا بوشوشها لقيت ميار على دماغي سمعتني قالتلها بقى انا بغير منك.. بقى انا اغير منك يا معفنه يا جربوعه... قامت سميه قالت.. اه بأمارة كذا وكذا.. ميار تسكت ما سكتتش ادتلها امارة كمان.. كذا وكذا وكذا.... كلمه من دي على كلمه من دي.. طلعت ام دي وطلعت ام دي... والستات مسكوا في بعض والبنتين مسكوا في بعض... ودى قالت الكلام اللى انتى قولتيلها ان دى قالتو.. ودى قالت كلام من اللي انتى مطلعاه.. وحاجات حصلت وحاجات ما حصلتش يا ماما وبقت مجزره...
نعيمه.. انا مش قايلالك 100 مره تاخدي بالك وانتى بتنمي على الناس...
عبده بغضب.... احنا مالنا.. احنا مالنا ما كل بيت قافل عليه بابو.. امال هما عملوا البيوت ليه... ليه ما سكناش كلنا في بيت واحد يا نعيمه... خربتيها ورتحتى.. خربتيها وقعدتى على تلها..
جيه شاب وقال.... السلام عليكم..
عبده.. وعليكم سلام يا استاذ حسن اتفضل..
حسن.. ايه ده فين الاحتفال انتوا بقتوه ولا ايه.. يلا احسن تكاليف على الفاضي...
نعيمه... لا يا بيه نسوان العماره كل واحده مسكت في التانيه وما فيش ولا واحده بتكلم التانيه دلوقت هيحتفلوا بايه بقى ما خلاص كل واحده مسكت فى التانيه وبقت هيصه.. اصل يا بيه...
عبده... بس بقى... بس يا نعيمه كفايه حرام عليكى هتشيليني... ادخل جوه... ادخل جوه لو قالولك.. تموتى لو سكتى.. تقولى اموت
حسن دخل وقال.... السلام عليكم يا جماعه ميعاد الدرس بتاع البنات جيه... انا اصلى مش بحتفل..
سعاد.. ما فيش درس انا بنتي مستحيل تاخد درس مع بنت دي ما يحصل اللي يحصل...
منيره... جرى ايه يا سعاد ما تلمي نفسك ولا هو جر شكل وخلاص ما فضيناها يا حبيبتي ولا عشان اخوكى واقف لك..
سعاد.. يعني هتعملى ايه لو شكرى ما وقفش..
حسن.. يا جماعه اهدو انتم مش ضراير عشان كل شويه تمسكو فى بعض...
منيره.. هى بتغير مني وقايله للشغاله كلام زباله عني..
سعاد.. طب ما انتى كمان قايله للشغاله كلام زباله عنى لازم اقول انا كمان.. يعنى تقولى بتشتمك اقولها دى حبيبتى... الله يجازيها بقى...
حسن.... يا جماعه استهدوا بالله في ايه .. ايه كل الخناقه دي..
منيره بحرج...... اصل انا جوزي ما جابليش هديه..
سعاد... اول ما الخدامه قالتلها ان جوزها ما جابهاش هديه .. وانا جوزي جابلي هديه قامت داخله جوه عند جوزها اللى هو اخويا وفضلت تقولو يجبلها وبتاع وقالت للخدامه كلام وحش عنى قال هي غيرانه منى...
حسن... افترض ان جوزك ما جابلكش هديه.. هى الهديه انزلت.. مش وارده في اي حاجه موضوع الهدايا ده... ولا الاحتفال كله وارد فى الاسلام اصلا.. احنا لما بنجيب هديه بتبقى تقديريه انه من باب انه الشخص ده كويس انو عديت معانا سنه فاتت .. وان شاء الله نبتدي معاك سنه جديده...
هى اصلا السنه الجديده يعنى فرصه جديده.... نفكر احنا اذينا مين في السنه اللي فاتت وهنعمل ايه في السنه الجايه.... نشوف الناس اللي كنا بنبتدي بيهم السنه الجديده ومش معانا السنه دي. ونترحم عليهم اذا اتوفو..... ولو في حد مكمل معانا في السنه دي نقوله شكرا ان هو واقف جنبنا في كل اللي حصل وما سابناش..... نفكر احنا عملنا ايه في السنه اللي فاتت لينا لنفسنا كويس... وايه اللي كان وحش ولو في حاجه مش كويسه عملناها في السنه اللي فاتت نصلحها في السنه الجايه.....
دي بدايه سنه جديده يعنى لو في خلاف مع حد حصل من السنه اللي فاتت احنا المفروض نصالحه وننهيه... نقفل صفحة السنه اللي فاتت... وننفتح صفحه السنه الجديده زندعي انها تكون سنه مليئه بالطاعه تكون سنه سعيده.. وندعى ربنا يغفرلنا فيها ذنوبنا تكون سنه جديده سعيده علينا... ربنا يكملها لنا بحبايبنا
سنه جديده ربنا يهدينا فيها.... ربنا يكفينا شرها ويدينا خيرها ويا سلام لو ربنا قدرنا وبدانا السنه الجديده وختمنا القديمه بركعتين صلاه من الساعه 12:58 تقفوا على المصلايه لحد ما تيجي الساعه 1 تختمو سنه 2025 بالصلاه وتبدؤ.. 2026 بالصلاه تبقى... حاجه جميله وحاجه لطيفه.... وندعي كده ان ربنا يجعلها سنه جديده سعيده علينا.... مش كل واحده تتخانق مع جوزها وتقول له عايزه هديه...
شوفوا انتوا بديتو السنه الجديده بايه بسبب الهدايا والاحتفال والمناظر الكذابه دي زعلت مع جوزها ودي زعلت مع سلفتها... ودي زعلت مع جارتها والبنات زعلوا مع بعض.... والاستاذ شكرى مضطر يقف مع اخته او يقف مع مراته ليه كده يا جماعه ربنا قدرو وجابلها هديه خلاص ربنا يهنيكى انتى وجوزك... ما جبش هديه خلاص ان شاء الله تدعي ربنا يوسع رزقه ويجيبلك هديه جميله السنه الجايهاو من غير مناسبه اصلا... بعدين انت ايه اللي يخليكى تصدقي اصلا انها قالت عليكى الكلام ده... يا جماعه ربنا قال...
اذا جاءكم فاسق بنبا فتبينوا ان تصيبوا قوما بجهاله فتصبحوا على ما فعلتم نادمين... صدق الله العظيم
انتوا تخسروا بعض وانتم ساكنين في مكان واحد علشان كلمه قالتها واحده ايه يضمنك انها حصلت اصلا... نفترض حسن النيه.. يلا يا جماعه نقفل السنه القديمه بكل مشاكلها ونبدا السنه الجديده بسلام... سلام نفسي ما بين كل سكان العماره دي انسو الكلام اللي قالته... وهى تنسى الكلام اللي انتى قلتيه...
عبده.. اهو ارتحتى يا نعيمه اهما هيتصالحو وانتى قعدتي من غير بيت ومن غير شغل... عارفه ليه عشان اللى يدخل بين البصله وقشرتها ما ياخدش منها غير ريحتها.... وانتى اللي كنتى بتوقعى ما بينهم خسرتى شغلك.. عارفه خسرتى شغلك ليه عشان وقعتى ما بين الناس.. لو كنتى عملتى شغلك زي ما قال ربنا ما كنتيش اتلقحتى كدا.
حسن.. يلا تعالى يا ام رحيم.. معلش يا جماعه نرجعها لشغلها...
نعيمه... والله توبت عمري ما انقل اي سر لاي حد خلاص يا جماعه ولا اقول كلام من راسى.. بس فرصه تانيه..
منيره... ابدا ما اديها فرصه..
حسن.. ليه طب ما انتو عصيتو ربنا في السنه اللي فاتت وربنا مديكم فرصه السنه الجايه ان انتم تتوبوا.. اذا كان ربنا عز وجل بيدي فرص... احنا ما نديش بعدين لو احنا ما سامحناش يبقى ندعي ربنا ازاي انه يسامحنا واحنا مش قادرين نسامح... يبقى ربنا ما يسامحناش.. الاول نسامح عشان نقدر ندعي ربنا انه يسامحنا.. يلا يا جماعه رجعوها.. ورجعو عبده لشغله... دي سنه جديده ما تنكدوش عليهم فيها...
منيره... ماشي خلاص خليها ترجع الشغل..
نعيمه... ربنا يخليك..
حسن.. يلا كلنا ندعي كده انها تكون سنه جديده علينا ان شاء الله.... وربنا يرزق فيها كل متمنى بامنيته... وربنا يصلح حالنا فيها وبيوفقنا للخير..... ويقدرلنا الخير حيث كان ويرضينا به.. ويجمعنا مع ما نتمناه في القريب العاجل ان شاء الله..... ربنا يجعلنا في السنه الجديده من اللي ربنا هيقوللهم لقد اوتيتوا سؤالكم... واجابه لكل ما سألناه... امين امين يا رب العالمين..
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
جميع الروايات كامله من هنا 👇 ❤️ 👇
اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇
❤️🌺💙🌹❤️🌺💙🌹❤️🌺💙🌹❤️🌺🌹❤️🌺🌹🌹❤️🌺💙
تعليقات
إرسال تعليق