رواية شمس بقلمي أنا الكاتبة ليانة الفصل الاول حتى الفصل الحادي عشر حصريه وجديده

رواية شمس بقلمي أنا الكاتبة ليانة الفصل الاول حتى الفصل الحادي عشر حصريه وجديده 

رواية شمس بقلمي أنا الكاتبة ليانة الفصل الاول حتى الفصل الحادي عشر حصريه وجديده 

الو … آهلا نوسة، واش ديري؟ … والله لاباس، و نتي؟ … راني فالدار هذا وين دخلت من الخدمة.... والله يا مروة، لخدمة تاعك هاذي راح تجيبلك لبلا، حبسيها خير ماتطفر فيك...""".يا بنتي، علاه؟ أنا راني راضية فالشي لي ندير فيه، الله غالب، خدمة حلايلية مالقيتش. اضطريت نخدم لخدمة هاذي. وزيد تعرفي بابا، لوكان مايلقاش حق لقرعة، يدير فيا عاهة. راكي شاهدة باللي حوست على خدمة مليحة و محترمة، بصح الله غالب ما لقيتش.....اضطريت نخدم فنانة استعراضية فالأوتال…""فريال! نتي ماكيش تخدمي فنانة استعراضية… نتي تخدمي رقاصة رقااااصة! وزيد هذاك الأوتال راهو مشبوه، والله لوكان تدخل عليكم الدولة تروحي فيها تصبحي في خبر كان... ""يا نوسة واش ندير؟ الله غالب، أي بلاصة نروح ليها ما يبغوش يخدموني بسبة بابا… كامل يعرفوه من لقرعة ما يصحاش،....""واش نقولك يا صاحبتي… ربي معاك و خلاص و صاحبتك راهي معاك اي حاجة تحتاجيها ڨوليلي .....""تعيشي عمري علابالي ....

أنا فريال، عمري 19 سنة يتيمة الام ساكنة مع بابا في دار أقل ما يقال عليها خرابة وصلت للباك وحبست والسبب ماكانش شكون يصرف عليا وعلى قرايتي. ربي بلاني بأب ماشي كي باقي الآباء… محور حياتو القرعة والكاس... نهارو يفوتو رڨاد، وليل سهرات مع ولاد وبنات لحرام....ملي كان في عمري 10 سنين وأنا نعاني من تصرفاتو... وقتها ماما كانت عايشة، هي لي تخدم باش توكلني وتقريني... بصح فالعام تاعي تاع الباك… توفات بأزمة قلبية وقتها حسيت بلي فقدت اول و آخر سند ليا فالدنيا هاذي بعد وفاة ماما حبست قرايتي...دراهم ماكانش، وأنا يد وحدة ماقدرت ندير والو .... لوكان ماشي ناس الخير لي يصدقو عليا راني نمشي عريانة وحفيانة...كنت كل يوم نخرج نحوس على خدمة غير باه نجيب حق لماكلة على خاطر هاذيك تاع نشري لقش و لماكياج في احلامي و ماتصحليش  مي غير يعرفو باللي أنا "بنت موح روكا"، يرفضوني. كامل يعرفوه سكير، خافو من مشاكلو  و عندهم لحق رزقهم مالقاوهش يطايش حتى هوما تعبو عليه ...وقتها ما لقيتش حل و اضطريت اني نخدم راقصة في اوتال  كان مشبوه قريب من حومتنا  بصح نقسم بربي غير نشطح برك… حاجة أخرى لا....و نهار لي نسلك فيه، نصو يروح لبابا باينة وين يصرفهم  🍾....بابا اسمو محمد يلقبوه موح روكا يبيع و يشري ليريكا ....و شراب عشقوا و غرامو كي يسكر توصل بيه يدخل رجال لدار انا وقتها نقفل على روحي و نڨعد نشهد نخاف يدخلو عليا كاش مايديرولي بصح هوما غير يشربو برك و صباح كي يفطنو يروحو ....راح تقولولي اهربي ...وين نروح عمامي كامل خارج الولاية كل واحد وين راح و اسس عايلتو ....  عماماتي مستحيل رجالهم مايقبلوش اما عايلة ماما ماكانش جدة و جدي متوفيين خال واحد ساكن فالخارج برك هذا واش عندي من ناحية ماما نروح برا والله ينهشو لحمي يعني ماعنديش خيار من غير نڨعد معاه و نسكت ....بابا عمرو في حياتو ما هز مسؤوليتي ولا قال نوض ندمر على بنتي كيف باقي الأباء بالعكس… هو لي يدمر فيا و يرميني في بلايص مشبوهين على جال إدمانو....وعلى بالو بلي نخدم شطاحة… ويزيد يضغط عليا باه مانبطلش حتى واحد لمرة رحت عندو نبكي ونترجا فيه باه نحبس لانو تعرضت لمحاولة تحرش غير ربي لي سترني مي هو وقتها ضربني، دخلني للسبيطار، وقاللي: كي تحبسي نتي، شكون يصرف على الدار؟ هيه هاذي هي حياتي... عندي عمي مزوّج، مرتو ماتتتابع للحلقة 1

حياتي... عندي عمي مزوّج، مرتو ماتت وخلاّتلو طفل واحد اسمو سيف يخدم "بياري"...كي كنت صغيرة، عمي هذا كان رايح يدينا أنا وماما نعيشو عندو. قالها: "تعيشي عندي و فريال أنا نربّيها". لأنه كان عارف بلي بابا سكارجي وقادر يدير فينا حاجة وقتها كان عندي ياربي 13 عام برك....لكن بابا ما حبش. راح شكا بيه وقال بلي عمي باغي يخطفني وبلي ماما راهي تخون فيه معاه....المهم دار فضيحة ڨد عزرين لي ماسمعش سمع  بصح سيف يدو واصلة، خرج باباه و ماما من الشكاية كي الشعرة من لعجين.....ومن هذاك النهار ما عادش شفتهم....عرفت بلي سيف و عمي طلعت بيهم لانو مرت عمي ربي يرحمها بعد موتها طلعلها ورث كبير وسيف بقفازتو  دار مشروع حوانت ونجح و بحكم خدمتو ماعندوش وقت ليهم غير فالويكاند ولا كي يهز كونجي قرر يكلف عمي بيهم بصح كلشي بإسمو....أنا ما نعرفش سيف مليح و مانشفاش عليه حتى هو مستحيل يشفى عليا لانو تبدلت بزااااف  بصح خيرو مع ماما عمري ماننساه لوكان ماشي هو كانت وقتها دخلت للحبس بتهمة الزنى و سمعت بلي زوج ربي يهنيه على كل حال ....و حتى  عمي سمعت بلي عاود زّواج وزاد عندو طفلة""....و إذا راكم تحوسو على شكلي و مواصفاتي … واش نقول و واش نخلي "" لوكان ماجيتش زلة و عندي لاطاي، حتى خدمة رقاصة ماطيرليش....جاية بيضا حليب بياضي ديتو من عند ماما فمي صغير منفخ، نيفي مڨدود، خدودي منفخين شعري شاتا قصير يوصل لنص ظهري. عينيا كبار، نوازات، يعيطولي "عينين الريم"لدرجة لي يشوفهم يغيس فيهم  و أجمل حاجة فيا ليفوصات، غير نتبسم يتطبعو طبع....لاطاي؟ تعرفو الفتنة هاذيك هيا انا … عندي مناطق أنثوية بارزة بامتياز كرش ممسوحة، خصر مرسوم. أي حاجة نلبسها تبرزني و ترجعني فتنة تمشي لاطاي تاعي جات من شطيح تعرفو رقص يعتبر نوع من أنواع الرياضة يعني باه تقولو بلي خدمتها ولا نروح لاصال تاع سبور والله والو ياااو انا عشا ليلة ماكانش باه نروح ندير سبور ب 200 الف لشهر الله غالب عايشة في فقر مدقع و من كثر الضغوطات وليت إنسانة باردة يعني اي واحد يشريلي لمشاكل نصمطو و نفوت و هذا لي يستفزهم في شخصيتي انو لي يقلقني مانهدرش معاه كلمة غير نتبسم و نفوتو برد....بصح راح يجي نهار حتى سكاتي  يروح و نولي إنسانة متمردة لأقصى درجة....هاذي أنا… فريال....ربي عطاني الزين لي تتمناه اي وحدة… و بالمقابل نحالي حنانة لوالدين ماما ماتت، وبابا آخر همّو أنا....لبنات الحكايه شابه بزاااف طالعوها...🦋شمس🦋

#الحلقه2و3

الحلقة 2

🦋بقلمي أنا الكاتبة ليانة🦋

نضت مع الفجر، توضيت  فرشت سجادة صغيرة فشنبرتي. كبرت و صليت ملي كان عمري سبع سنين و أنا نصلي مع  ماما بصح اليوم راني وحدي لي كانت السند تاعي فالدنيا هاذي راحت و خلاتني كي لقفة بلا يدين .....مع كل سجدة نغرق في دموعي .... سلمت، هزيت يديا لربي و ندعي من اعماق قلبي:  يا ربي فرّج عليا، يا ربي راك عارف لحال لي راني عايشتها،  مانيش حابة هاذ الخدمة، بصح الله غالب كلشي فوق يدي … كنت حابة  نخدم خدمة حلايلية،و نجيب دراهم بعرق جبيني بصح مالقيتش ياااربي راني كيفي كيف لبنات نحب نعيش و نلبس ونفرح … يا ربي استرني و خرجني من لغرڨة لي راني فيها  مانيش باغية نخسر آخرتي على جال دنيا ما تسواش.....قعدت شوية على السجادة،  نبكي بصمت، غير تكالميت مسحت دموعي ونضت. لبست روبة كحلة من لغسيل بزاف فسخت و  رشيت ديودورو تاع عشرين ألف درت ماكياج خفيف برك آيلاينر غوج و ريسيل برك أصلا هذا ماعندي شفت روحي فلمرايا تبسمت صراحة لحاجة الوحيدة لي تفرحني هي زيني ...وليت فتحت باب الشنبرة مع نخرج و تضربني  ريحة شراب كانت حتى دار عليا ڨلبي حطيت يدي على خشمي و زربت، خرجت من الدار .....رحت نمشي للاوتال بحكم هو ڨريب من حومتنا حكايتها ربع ساعة فالطريق وصلت دخلت و رحت ديراكت  لشنبرة قفلت لباب ... بدلت قشي بزربة لبست روبة كحلة قصيرة و مزيرة بزااااف  لمعري كثرمن لمغطي ... غير شفت روحي فلمرايا ڨلبي تڨطع مانيش حابة لخدمة هاذي مانيش حابة لمعيشة تاع العاهرات هاذي بصح ما عنديش خيار غيرو...تنهدت و ڨابلت لكوافوز ليسيت شعري، غير كملت خليتو مطلوق على كتافي، ودرّت ماكياج سموكي بحكم خدمتي تعلمت نماكيي بطريقة وااااو لي تشوفني تقولي تعياي تولي مايكب أرتيست و انا غير نضحك و نڨول في ڨلبي غير نخرج من لبلاصة هاذي برك لا بغا نطلب المهم نخرج من لخماج لي راني غارقة فيه … مع كملت دخل عليا لمسؤول: "إذا كملتي، هيا… الناس راهي تستنى."...بمعنى آخر: الرجال برا يستناو يشوفو جسمي ويتفرجو في ميولي.....تنفست بعمق وخرجت. وقفت وسط القاعة، رجال قاعدين كل واحد كيفاه شايفني… واحد بشهوة، واحد بتلذذ، وواحد بإعجاب رخيص.....خذيت نفس طويل و بدات دربوكة المصرية تدوي، والإيقاع دخلي فالروح....جسمي يتحرك مع الدربوكة، خصري يتمايل يمين ويسار، يديّ يطلعو وينزلو، رجليا يخبطو مع الإيقاع. كل تفصيلة مني محسوبة: هزّة كتاف، انحناء بسيط، تبسيمة مرسومة لي كنت نخبي وراها ألف كسرة خاطر و ألف وجع قلب ...غير. نشوف فالعينين لي مقابلتني… كامل باغيين جسدي، ولا واحد فيهم يشوف فيا كإنسانة عندي كرامة غير ضروف حتمت عليا ذل هذا ....الموسيقى كملت، وأنا نحييت تبسيمتي المصطانعة رجعت للشنبرة. غير سكرت الباب طحت فالارض نبكي بالشهقة: "يا ربي، اغفرلي… يا ربي، راك عارف ضروفي. والله ماني حابة لخدمة هاذي… والله ما لقيت خدمة حلايلية، ما لقيتش! واش ندير يا ربي واااش ندير ؟" بكيت و بكيت و بكيت حتى تنفخو عينيا باه سكتت ....نضت من لرض مسحت وجهي، لبست قشّي وخرجت من الأوتال .... الطريق للدار كان طوييييل ....الف تخمام يدي فيا و يجيب بغيت غير نلقى طرف خيط برك يخرجني من لوسخ هذا والله غير نكبش فيه و مانفلتوش.... وصلت للدار، لقيت الدنيا مڨلبة. لعفن في كل بلاصة. نحيت قشي، جبت صاشي وجمعت القراعي تاع شراب من بعد مسحت الغبرة سيقت، رشيت شوية ريحة تاع دار.... كملت رحت للكوزينة، طيّبت العشا و طفيت عليه رجعت لشنبرتي باش نبدل قشّي.  مع دخلت… لقيت بابا يخرب فالصاك تاعي جبد سوارد لي بقاولي و تخنزر فيا: "هذا ما عندك؟" درتلو براسي: "إيه."...."وكتاه تسلكي؟"  "غدوة."....تبسم ا بخبث وخرج خلاني نبكي هذوك الصوارد كنت نخبي فيهم هاذي شحااال باه نشري فاست خاطر لي عندي رشات و ماعادتش دفي و باه تعرفو انا قشي كامل من شيفون ولا يصدقو عليا ناس في حياتي لا شريت جديد .....خذيت نفس طويل .... استغفرت من بعد رجعت للكوزينة، وجدت طابلة تاع لعشا وعيطتلو... قعدنا ناكلو مع بعض غير كمل، ناض وخرج حتى كلمة "يعطيك الصحة"ماقالهاليش.....هبطت راسي كملت عشايا كي شبعت نضت غسلت لماعن نشفت لكوزينة  ورجعت لشنبرتي. تكيت فوق لمطرح لي كان مفرش فلرض بقيت نشوف للسقف و انا هكاك  نخمم حتى حسيت بالسطر في كرشي… عرفتها  بلي لمدام غوج لانو ديما في نهار لخر كي تبغي تروح ديرلي هكاالحلقة 3

🦋بقلمي أنا الكاتبة ليانة🦋

سطر تاع كرشي غير يزيد يقوى وليت نضت و انا هكاك متوجعة نجر في روحي، للكوزينة  غلّيت كاس تيزانة، شربتها كامل على فرد نفس و رجعت لبلاصتي و نستنى غير ضرك يروح سطر بصح والو غير يزيد حتى ضرني راسي  و حكمتني دوخة....ما لقيت حتى حل من غير لامجي … لبست عباية خفيفة هزيت تلفوني، وخرجت. مشيت على رجليا لانو ماعنديش حق لفرود و مزية  لامجي ڨريب من الدار تالي راني تعوقت من لوجاع .... غير وصلت فرحت كي مالقيتش لغاشي ،دخلت ديراكت  دارولي برا و ڨعدت حتى خفّ عليا  شوية نضت نجر في روحي  خرجت من لامجي نمشي و سرحت بتخمامي بعييييد  فطنت غير كي وصلت لباب دار … غير دخلت، طاحت وذني على صوت موسيقى عالية وضحك رجال مع نسا....لحظتها تسمرت في بلاصتي من شوك…هاذي ماشي أول مرة بابا يدخل رجال بصح كانت أول مرة يدخل نسا يعني وصلت بيه يزني و بنتو فالدار هنا نزلت دمعة سخونة على خدي غاضتني منو بزااااف... في حياتو ماخمم فيا و ڨلت معليش دمرني نخدم فلحرام و سكتت بصح باه يزني فالدار و على فراش ماما هاذي لي ماقدرش ڨلبي يتحملها ضرني بزااااف.....صراحة دارنا ولات دعارة بامتياز..... بداو دموعي يطيحو وحدهم من  الحالة لي راني  عايشتها، وعلى الراجل لي كان من لمفروض يحميني، ولا هو لي يجيبلي  في ولاد لحرام لدار .....حطيت يدي على. فمي و زربت دخلت لشنبرتي قفلت لباب بصح نسيت نبلجو من لخلعة ...رحت لخزانتي نحوس على "أوان"مالقيتش وليت جبدت  صاك و مع راح نحلو حتى تفكرت بلي بابا نحالي دراهم لي  كانو عندي على جال رهج تاعو....رجعتو لخزانة و  جبدت جبة قديمة تاعي  قطعتها و درتها في بلاصة لفوطة.... رجعت تكسلت في بلاصتي عينيا ذابلين من الدوخة، جسمي نحس فيه ثقيييل … نفس تاعي يروح و يجي كنت في حالة مايعلم بيها غير ربي سبحانو ...وانا هكاك متكية مغمضة عينيا بغيت غير نرڨد باه نهرب من لواقع لي راني عايشة فيه و نهرب من صوت لموسيقى والضحك تاعهم عفتهم بزاااف لدرجة تقييت …مافيقني من تخمامي غير كي سمعت صوت لباب تاعي تحل....مع طلعت راسي و نتصدم صدمة حياتي لقيت واحد من صحاب بابا دخل عليا يتمايل عرفتها بلي ماشي صاحي ....فالدقيقة هاذيك تصنّدت في بلاصتي، .....يشوف فيا و يعض في شفافو غير سمعتو ڨالي ليوم راح نتمتع و نمتعك  تخطفت من بلاصتي جيت هاربة حتى حكمني من يدي خبطني للحيط ضهري حسيتو تعوج ......طلعت عيني فيه عينو لقيتو رايح فيها العالمين الحكايه شابه بزاف طالعوها.....يتبع ديري جام وعشرة ملصقات نكملو..🦋شمس🦋

#الحلقه4و5

🦋بقلمي أنا الكاتبة ليانة🦋

 قرب مني بخطوات حتى تقطع فيا النفس... قلبي يخبط بالقوة دموعي طاحوا نشوف فيه و نهدر شفافي يرجفو :""لالا ربي عيشك بعد عليا لالاااااا روح روووووح بابااااا يا بابااااا غير شافني نعيط بالصوت مد يديه شدني من ذراعي، زاد حشرني للحيط كثر حتى حسيت ضهري تكسر حط يدو على فمي و صوتو كان يخلع ريحة شراب تضرب منو وعينيه يشوفو فيا و يتلذذو:"آه يا الزينة… خليها تجي سهلا عليك وعليا "...حط يدو على وجهي وبدى يتجرأ في لمساتو انا غير نبكي و ندمر فيه كنت نرجف من  لخوف....حاولت ندفعو، بصح لفارق الجسماني بيناتنا كبير انا ڨدامو نبان قطة....عضيتو على يدو غير نحاها و نغوث: "باباااااااا! بابااااااااا الحڨني يا بابااااا!" صوتي يتقطع من الشهقة عييت و انا نضبح بالصوت باش يسمعني… بصح والو كان غارق في لقرعة و لكاس...ماتذكّرش باللي عندو بنت ولازم يطمن عليها كل همو نسا و شراب....ذاك الحيوان حكم يدي بكل قوتو وحشرني للحيط حتى لعبت بيا لرض دوخة تدي فيا و تجيب ڨريب طحت....مانعرف منين جاتني القوة في ذيك دقيقة… رفدت رجلي وضربتو لتحت لبلاصة هاذيك ...طلقني حط يديه وين ضربة و بقى يعيط و يتلوى، هنا اغتنمت الفرصة، دفعتو و خرجت نجري من الشمبرة، نجري و ننهج قلبي راح يخرج من بلاصتو....هبطت فالدروج نعيط: "عاونونييييييي!!! يا نااااااااااس!!! عاونوني!!!" خرجت للرود، نعيط  بالصوت.... بصح ولا واحد قرب، خاطر يعرفو بابا و مشاكلو… يخافو منو، موش غير سكير… راهو خريج حبوس، لسانو مسخ، دعاوي الشر كامل يديرهم، على هاذي الناس كامل يتحاشوه....مالقيت عندمن نروح… إلا نوسة. صاحبتي و عشيرة عمري.....جريت و انا غارقة في دموعي غير وصلت طبطبت على الباب بالقوة، قلبي يخبط بالقاوي راح يخرج من نص صدري ...فتحت نوسة و غير شافتني تخلعت:  "وشبيك فريال؟ واش الحالة هاذي؟!" ما قدرتش نجاوب، غير ارتميت في حضنها وبكيت كي طفلة صغيرة:  "نوسة… نوسة عاونيني ختي عاونيني راني وليت كي ضايعة لي بلا مأوى…"ولات دخلتني و قفلت لباب داتي لشنبرتها ڨعدت جابتلي لما حكمتو عليها و انا نرجف شربت من بعد ڨعدت ڨدامي تحاول تفهم ... :""فريال خير وش كاين و علاه راكي ترجفي ""هنا رجعت نبكي بالشهقة غاضتني روحي بزااااف حسيت روحي مقطوعة من شجرة لا عم لا عمة لا خال و لا خالة وليت خذيت نفس طويييل وحكيتلها كلش…، بلا ما نخبي حاجة...كانت تسمع و  الصدمة باينة  على وجهها حطت يدها على فمها مشوكية : "لدرجة هاذي باباك دار فيك هكا؟ اسمحيلي بصح باباك ضهر رخيس و مايسواش كيفاه قدر يخاطر بحياة بنتو ريحة رجولة مايسعاهاش ""من بعد حكمتلي يدي و شافت فيا: "اسمعيني مليح… من اليوم، الدار هذيك تحرم عليك خلاص، ماتزيديش تحطي رجلك في عتبتها أڨعدي عندي حتى يفرج ربي."...غير ڨاتلي هكاك دمعة تحجرت بين شفاري حسيت جبل كان فوق صدري و تزاح. تلحت عليها، حضنتها بكل قوتي، بكيت وبكيت و بكيييت حتى نشفو دموعي.. من بعد جبدت عليا : "يلاّ… روحي دوشي نحي عليك تعب و انا ضرك نجيبلك قش تلبسيه و فوطة ديريها لجبة تاعك راهي دم كامل....."

...هيا نضت دخلت للدووش، حليت المرش و جيت تحتو خليت الما يسيل عليا بالاك يبرد النار لي كانت شاعلة في ڨلبي غير كملت خرجت، لفيت روحي بمنشفة....مشيت للشمبرة، لقيت نوسة مستنيتني. جابتلي بيجامة نظيفة وفوطة ....تبسمت معايا: "ديري هذي، و ارڨدي، ترتاحي زيد ماتخمي حتى في حاجة يحلها ربي من عندو "هزيتلها براسي برك....هي خرجت و انا درت ذيك لفوطة من بعد لبست قشي ...مشيت لسرير ، تكسلت و من تعب و لخلعة لي ديتهم اليوم عينيا تقفلو وحدهم …الحلقة 5

🦋بقلمي أنا الكاتبة ليانة🦋

نضت مع الفجر، عينيا مازالو منفخين من لبكاء، جسمي ثقيل رجليا عييت نحركهم...بالرغم من لفشلة هاذي كامل بصح كنت حاسة براحة غريبة، ماكانش صوت رجال  ولا ريحة الشراب الي كانت مغرقة الدار ولا صوت عياط نسا بالمختصر خرجت من بيت الدعارة لي كان فاتحها بابا…وليت نضت نكركر في رجليا دخلت لدوش لقيت روحي صفيت من العادة وليت دوشت  و توضيت مسحت روحي لبست قشي من بعد رجعت لشنبرة فرشت سجادة تاع نوسة كانت حاطتها فوق لخزانة صليت الصبح سلمت هزيت يديا لربي و ندعي بين كلمة و كلمة تهبط دمعتي: "اللهم إني أستغفرك من كل ذنب قوي عليه بدني بعافيتك، أو نالته مني قوة أو مهما بسطت يدي إليه بفضل نعمتك أو اتكلت فيه إلى جمالك أو وثقت به في إحسانك أو غرني به حسن خلفي وطول محلمي أو هممت به أو أقمت عليه أو أصررت عليه....اللهم إني أستغفرك من كل ذنب خنت فيه أمانتي أو آويت إليه في سريرتي أو اجترحته في أمري أو أبديته في عياني أو تباهيت به أو نميته أو كتمته أو أظهرته أو علمته مني أو نسيته أو ذكرته.....اللهم إني أستغفرك لكل ذنب تبت إليك منه وأنت ناظري ثم عدت إليه وأنت رقيب على سريرتي وعلانيتي فاستحييت من نظري إليك وأنت عليه رقيب ومددت إليه يدي وأنت علي رقيب فلك الحمد إن رجعت إليك تائباً وأنت الحليم العليم....."دعيت لربي سبحانو لانو هو وحدو لي سامعني، وكل دمعة خرجت مني كانت من ڨلبي تضريت و توجعت بزاااف ڨلبي ماعادش يتحمل كثرمن هكا....بعد ماكملت صليت دخلت عندي نوسة و في يدها كاس حليب سخون:"صباح الخير حبي كيفاه صبحتي ""والله حمدالله خيرمن لبارح ""مليح هيل اڨعدي و اشربي حليبك على خاطر، لازم تقواي."...شربتو بشق نفس غير كملت حطيت لكاس هبطت راسي و رحت بتخمامي بعييييد فطنت غير كي  نوسة حطت يدها على يدي شفت فيها لقيتها متبسمتلي من بعد هدرت : "شوفي فريال، لازمك من اليوم تبدلي حياتك....و اول حاجة ديريها انك ماتزيديش تروحي لذاك الأوتال ارواحي نخدمو مع بعض، حتى نلڨالك خدمة، حتى و فوندميناج المهم خدمة حلايلية"...كلامها كان صح فالدقيقة هاذي حسيت بلي عندي أمل انو نخرج من لغرڨة لي حطني فيها بابا…""شفت فيها من بعد تنهدت :""عندك الحق في كل كلمة ڨلتيها بصح راكي عارفة بلي بابا ما راحش يخليني هانية، خصوصًا كي يفطن من رهج لي مدوخو و يعرف بلي مانيش فالدار""فريال ماتخافيش ماكانش حاجة فالدنيا هاذي ماعندهاش حل ""درتلها براسي هيه و سكت...بقيت طول النهار مع نوسة، عاونتها في شغل الدار، حكينا وضحكنا شوية صراحة نفسيتي رتاحت و نسيت شوية مي ساعة على ساعة نروح بتخمامي بعيد: واش مازالت مخبيتلي الدنيا هاذي ؟ و واش راهو يستنا فيا لڨدام؟......مع العشية، خرجنا نتمشاو شوية، نوسة غير تحكي و تلهي فيا مسكينة بغات تخرجني من جو الكآبة لي راني فيه.... …يتبع ديري جام وعشرة ملصقات نكملو

الجميع 🦋#شمس🦋

11.#الحلقه6و7

الحلقة 6

🦋بقلمي أنا الكاتبة ليانة🦋

قعدت عند نوسة يومين كاملين، نرڨد معاها نفيّق معاها، نعاونها في أمور الدار ....بغيت غير نلهي روحي باه مانتفكرش واش صرا فيا ،  بصح ديما نحس في قلبي مشدود…اغلب اوقاتي يروح تخمام: بابا واش راه يدير؟ و كي فاق بعد ما هربت واش دار باش نقولكم ماخفتش نكون نكذب مع انو لخوف في جيهة و انا فالجيهة ثانية عمري ماخفت من بنادم و السبب الجو لي كنت عايشة فيه مع بابا خلاني نقوا و نكون محتمة عليا مانخافش من غير بابا لي نخافو مووووت .....نهار ثالث مع العشية، كنت قاعدة نشرب فالقهوة مع نوسة، حتى سمعنا لخبيط على الباب .... قلب نوسة طاح من الخلعة : "بسم الله واش لخبيط هذا ....ياااا فريال ختي مايكونش باباك لي جا يحوس عليك ؟"غير سمعتها رجفة سرات فيا ،تسمرت في بلاصتي ....حاطة يدي على ڨلبي و ندعي :""ياربي مايكونش هو ياااربي مانيش باغية نرجع للمقبرة هاذيك "" من لخوف دوخة لعبت بيا .... كي حلت نوسة الباب، لقاتو مولى الدار جاها على جال صوارد لكرا....هنا تنفست الصعداء و ريحت شوية، مي هذيك الخلعة خلاتني نفهم بلي ماشي حل نضل هاربة....و ثاني ماتصلحش نثقل على نوسة عيب وليت تنهدت و شفت عندها : "شوفي حبيبتي راح نهدر معاك هدرة بصح قبل توعديني مايغيضكش الحال ""شافت فيا باستغراب :""خير فريال واش من هدرة لي قادر يغيضني منها الحال....انا هنا شفت فيها و تنهدت :""نوسة والله مانقدر نثقل عليك كثرمن هكا على هاذي لازم نلقى حل صدقيني غير راني من لبارح و انا نخمم باه وصلت للقرار هذا :""هيه يا لالة واش من قرار "" قررت نرجع نخدم فالاوتال و نكري دار وحدي حتى يفرج ربي ...غير سمعتني شعلت فيا: "لالااااااا هبلتي واشط من ترجعي للاوتال هذا نتي مستغنية على روحك ....راكي علابالك واش معناها ترجعي لخماج هذاك يعني باي باي للحرية و مرحبا بالعبودية راكي عارفة كي يسمع مو الأوتال بلي خرجتي من دار و ماعندكش وين تروحي  واش يقدر يدير صدقيني غير يستعبدك و يحطك تحت رجليه غير هني روحك ڨاتلها نرجع للاوتال فريال من فضلك مانيش حابة تزيد نسمع لهدرة هاذي....حطت يدها على يدي خذات نفس طويل و شافت فيا :"فريال حبيبتي راكي مشي غير صاحبتي راكي  ختي لي ماولدتهاش يما و هاذ دار دارك ....و ضرك نهدر مع عمتي تسكن في وهران كاش ماتلقالك خدمة و تخرجي من هنا خلاص و عاودي ابني مستقبلك بعيد على لخماج تاع باباك "...حظنتها و بستها :""نوسة ربي يخليك و يعطيك ما تتمناي والله يا وقفتك معايا عمري ماننساها ""ضربتني على راسي ضربة خفيفة من بعد تلاحت عليا دغدغ فيا و انا فاااسخة بالضحك 🤣🤣🤣...هيا في الليل، وأنا متكية نخمم حتى رجعت نهدر وحدي بالصوت:"يا ربي فرجها عليا ...ياربي افتحلي بيبان الخير ياربي نورلي طريقي راني مانقدرش نرجع لدار هاذيك راهي ولات جحيم بالنسبة ليا " من بعد درت على جنبي غمضت عينيا و رڨدت لصباح فطنت على نوسة تنوض فيا :""فريااااال نوضي ماشي تفاهمنا نخرجو هيا راهي تسعة ياربي ""حليت عينيا و شفت فيها :""نوسة واش رايك نأجلوها والله ما شبعت رڨاد ""غير ڨتلها هكذا و تنحيلي زاورة ...حكمتني من يدي و تجبد فيا حتى دخلتني لدوش :""هيا اتوضاي و صلي صلاتك لي فاتاتك و البسي ڨاتلها نأجلوها ""ضحكت بالصوت من بعد توضيت قضيت صلاتي لبست ليكات طويلة بلوغوا و سروال دجين تاع نوسة انا ماجبت والو من دار ....حطيت آيلاينر ريسيل و غوج كلار مانحبش نكثر بزاف هكاك و جيت فتنة ....لبست صباط بيض حكمت شعري كوتشيفال هزيت تلفوني نوسة لي مدتهولي و شراتلي بيس جديدة ....رشيت بارفا و خرجنا مع بعض غير عتبنا باب دار و نسمعو في وحدة تعيط باسمي:  "فريال! فريال!" صوت هذا نعرفو كي درت لقيتها نسيمة جارتي لحيط فالحيط …سلمت عليها و زادت سلمت عليها نوسة كانت تنهج :"يا بنتي… باباك راهو داير كارثة فالرود ! من البارح وهو يحوس عليك وصلت بيه يتقابض مع الجيران و يڨولهم نتوما لي خبيتوها راهي عندكم خرجوها ولا تعرفوني واش نقدر ندير  و حتى وصلت بيه يقول لي لقاها نعطيه واش بغا… راهو ناوي على شر كبير شوفي يابنتي يماك وقفت معايا نهار لي مالقيت حتى واحد و خيرها سبق على هاذي هاكي هاذو بيعيهم و اهربي من هنا خير ماتطفر فيك   ...نحات فلايك تاع ذهب خفاف و عطاتهملي انا دمعة هبطتلي شافت فيا و حظنتني :""لالا يابنتي ماتبكيش راكي وصية المرحومة تعرفي بلي نهار لي مرضت بالكونسار يماك باعت لخاتم تاعها غير باه داويني مع اني ماكنت لا ختها ولا وحدة من عايلتها علابالك بلي وقتها ولادي و بناتي في خمسة ماسقسوش عليا ولا حتى طمنو يا بنتي باط دوا ماشراوهوليش بصح يماك كانت تشريلي بالدرڨة على باباك و نهار فاق بيها قتلها بالضرب انا عمري ماننسا خيرها و شي لي درتو معاك ليوم راهو ربع واش دارت هيا معايا لوكان نخدمك برموش عينيا و مانقدرش نوفي حقها و ضرك ماكلاه تضيعي لوقت و شوفي وين تهربي خير ماتطفر فيك "... هنا نوسة شدتني من يدي وقالت للجارة: " كثر خيرك يا خالتي و خليها عليا ضرك نلقالها حل "..هاذيك راحت و  نوسة ڨاتلي: "فريال، لازم نتصرفو قبل ما يلقاك. نتي عارفة باباك مايخافش ربي و قادر يدير اي حاجة باه يرجعك عندو و وقتها راح يعفس عليك و مايرحمكش"...كي سمعت كلامها عرفت بلي حياتي مازال قدامها بزاف عواصف، و باه نقدر نعيش بسلام يلزم عليا نخرج من لولاية هاذي خلاص و نبدل الف حاجة في حياتي و أولهم إسمي باه مايقدرش يلقاني هاذ شي كامل لانو بابا رجع كوشمار في حياتي و محال يخليني على راحتي....الحلقة 7

🦋 بقلمي انا الكاتبة ليانة 🦋 

مشيت مع نوسة لشيفون شراتلي زوج بيجامات بعشرين ألف للوحدة و شراتلي زوج زوج ڨنادر تاع دار وحدة حمرة و ثانية كحلة زادتلي زوج روبات تاع برا وحدة كحلة و وحدة مارو و زوج صبابط هاذو كامل سقامولها ب 450 كثر خيرها جامي ننسا وقفتها معايا طول عمري من بعد ڨتلها نروح نبيع لفلايك هاذوك لانو خلاص خذيت قرار اني نروح لوهرن .....رحت انا وياها لسايغي عطيتهملو وزنهم ....شوية هكا ڨالي يجيبولك زوج ملايين ڨتلو موافقة عطاني سوارد خبيتهم فالصاك و خرجنا رحنا فلاري تاع لبيس بقينا نستناو حتى وصل ركبنا حكمنا زوج بلايص حذا بعضانا نوسة بقات تهدر بصح انا ماكنتش معاها غير نخمم و سرحت بعييييد حتى فطنتني نوسة من سرحتي:""فريال خلاص حبيبتي بركاي ما تخمي خليها على ربي  راح يحلها من عندو لانو ربي سبحانو وحدو لي عالم بظروفك و صدقيني راح يفرج عليك و زيد راني معاك راح ندير لي عليا باه تخرجي من هنا و تعاودي تبني حياتك من جديد""حظنتها و دموع في عينيا :""ربي يخليك ليا عمري والله ماكنت راح نعرف ندير حاجة بلا بيك ""تبسمتلي و رجعنا للدار بصح بقيت مخنوقة من الهم والعيون لي تلحق فيا وين ما نروح كي هربت من دار وليت حديث الموسم رايح و لجاي يهدر عليا.....مع وصلنا دخلت لشنبرة و رميت روحي فوق سرير  ونوسة تكات ڨدامي بقيت نشوف لبلافو و مطلعة يديا:" نوسة، مانقدرش نبقى عندك بزاف راني خايفة عليك من بابا يعود يعرف بلي راني عندك و يضرك تعرفيه بلي رحمة ماكانش في ڨلبو و على هاذي لازم نروح من عندك بأسرع وقت."....غير سمعتني دورت راسها عندي: "ماتخافيش عليا قادرة على شقايا الي يهم نتي لازم نخرجك من لبلاصة ""ولات ناضت و هزت تلفونها و عيطت لعمتها:""الووووو اهلين عمتي واش حوالك ""لاباس يا بنت خويا و نتي ""والله حمدالله ""هاه ماكيش مالفة تعيطيلي خير برك ""لالا عمتي خير خير بغيتك في موضوع إذا تقدري تعاونيني ""إذا نقدر والله مانبخلك ""و هنا نوسة بدات تحكي لعمتها عليا و واش من مشاكل راني فيهم ""سمعت غير عمتها كي ڨاتلها اعطيني يومين و نردلك بالخبر من بعد كوبات عليها ""شافت عندي لقاتني نبكي ""حظنتني و تنهدت :""خلاااص فريال ماشي كل دورة تبداي دمعي عليا خلاص ڨتلك بلي نتي ختي و انا محال نخلي ختي تعاني بلا مانعاونها ....هزيتلها براسي وسكت…ولينا نضنا للكوزينة تعشينا من بعد هي غسلت لماعن و انا نشفت لكوزينة غير كملنا سهرنا على فيلم هندي تاع كابهي كوشي كابهي نام و حنا هكاك  غايسين مع لفيلم حتى سمعنا صوت بابا يعيط الحومة كامل نوضها من ضبيحو ...صوتو جمدلي الدم في لعروڨ طليت انا و نوسة بلعقل من طاقة كان في حالة حيط يدي و حيط يجيب عرفتها رآهو خابط للخر:"" "فريييييال! فريااااال يابنت لكلبة واش تبالك مانيش قادر نجيبك ... يابنت لحرام علابالي راكي تسمعي فيا يا ترجعي للدار برضايتك ولا نجيبك على طريقتي وقتها واحد لا يقدر يسلكك من بين يديا فريااااال ياكلبة والله نقتلك على آخر عمري جبتيلي العار ....."نسمع فيه و دموعي لا حبسو غاضتني هدرتو بزاااف حتى طحت فلرض نضرب في وجهي و نعيط بالصوت :""اسككككت اسكت خلاااااص مانيش حابة نسمع صوتك نوسة قوليلو يسكت ربي عيشك ياااااربي علاااه عطيتني اب كيفو ياربي علاه ماديتوش في بلاصة ماما علااااه يا مامااااا وينك وين رحتي و خليتيني وحدي نعاني معاه روووووح اخطيني ماكش بابا رووووح""

نوسة كي شافتني فالحالة هاذيك جبدتني عندها و حضنتني:"ما تخافيش فريال شوفي عندي شوفي ""طلعت راسي عندها و عييت نشوفها من ضبابة تاع دموع لي في عينيا ولات مسحتلي عينيا و تنهدت:""فريال خلاص حبيبتي ماتخافيش منو و زيد مستحيل يلقاك و محال يعرف بلي راكي عندي خلاص اتهدني مابقاش و تروحي من لولاية هاذي و تتهناي غير اصبري يومين زيادة  ""هزيتلها براسي برك لهدرة راحتلي ...وليت حكمت بلاصتي نوسة غطاتني و ڨعدت معايا حتى غفيت باش راحت لشنبرة تاعها....وصلوها500جام نكمل..🦋شمس🦋

#الحلقه8و9

الحلقة 8

🦋بقلمي أنا الكاتبة ليانة🦋

 كل دقيقة نتخطف من منامي ساعة نسمع صوت خطواتو جاي عندي ساعة نشوفو يخنق فيا ساعة نشوفو واقف برا يعيط ويكسّر ليل كامل و انا نكوبس .....بقيت هكاك حتى سمعت اذان الفجر وليت استغفرت و نضت لدوش توضيت و رجعت لشنبرة لبست طقم صلاة و فرشت سجادة كبرت و بديت نصلي مع كل سورة نقراها دموعي يطيحو وحدهم كملت سلمت و هزيت يديا لربي ندعي من عروش ڨلبي :""اللهم فرج كربتي ويسر أمري وارزقني من حيث لا أحتسب. اللهم إنك أنت العزيز الحكيم، فرج عني ما ضاق به صدري. يا حي يا قيوم، برحمتك أستغيث، أصلح لي شأني كله، ولا تكلني إلى نفسي طرفة عين. اللهم اكفني ما أهمّني، وبلغني رضاك، واجعلني من عبادك الصالحين. آمين....كملت وقفت و نحيت طقم صلاة مشطت شعري حكمتو طمطومة و رحت للكوزينة لقيت نوسة وجدت لفطور صبحت عليها و ڨعدت معاها فطرنا بالسكات كملنا هي غسلت لماعن و انا نصبت لغدا غير كملت طفيت عليه و ڨعدت على لكرسي نخمم و نخمم و نخمم حتى قاطعت نوسة تخمامي: "فريال، لازم تقوي روحك و تحاربي على جال كرامتك لي سلبهالك باباك....فريال خلاص وقت تخمام و جا وقت الفعل ....""عندك الحق نوسة بزايد عليا تحملت بزاف و وصل وقت نبدل حياتي و نعيش غير على جال روحي"" .....مع العشية خرجت انا و نوسة ديراكت للمحكمة قدمت طلب تغيير إسمي و الحمدلله وافقولي عطاوني واش لازم نخرج رجعنا رحنا للبلدية خرجت واش لازملي من بعد عاودت رحت للمحكمة قدمت الوثائق لازمة و غيرت اسمي من فريال لشمس خيرت الاسم هذا بالذات لعل و عسى حياتي تنور و نخرج من ضلمة لي كنت فيها ....كملنا خرجنا و انا هازة اسم و هوية جديدة كنت فرحانة بزاااف .....نوسة تشوف فيا تغني و تضحك:""شمس يا شموسة راكي  نورتي الحومة ""ضربتها على ضهرها و نضحك بصح دنيا حالفة ماتخلينيش نتهنى مع وصلنا لباب دار حتى سمعت صوت جارنا يعيط بإسمي : "فريال ...فريااال ""درت عندو نشوف فيه و لخوف باين من عينيا ""خير بدرو واش كاين ""… فريال والله راكي كي ختي علبيها جيت عندك باه نحذرك باباك راهو منوض لالارت عليك حتى جاب صحابو و راهم يحوسو عليك و البارح كان فالقهوة يهدر و يقول بلي لوكان ماترجعيش برضايتك راح  يندمك نهار يلقاك""مع سمعتو رجفة مشات فيا عييت نمد لخطوة رجليا تخذرو، حسيت روحي طحت فحفرة ماعندهاش مخرج ....ولات نوسة تشكراتو من بعد حكمتني من يدي و دخلتني لدار اما انا في فمي غير كلمة: "ياربي واش درت في حياتي باش يكون عندي اب كيما هذا " دخلت للشنبرة وبكيت بحرقة، بكيت على طفولتي لي راحت، بكيت على أمان لي  عمري ماحسيت بيه، بكيت على ماما لي راحت و خلاتني نعاني وحدي .....نوسة هنا دورتني عندها و حكمتلي وجهي بيديها لزوج : " فريال اسمعيني حبيبتي خلاص لازم نسرعو في روحتك من هنا و زيد عمتي ردتلي لبارح بلي كاينة وحدة تخدم فالخياطة وتحتاج خدامة و انا قتلها راح نبعثك عندها حنا كنا مخططين تروحي على يومين بصح راني نشوف فيها تروحي ليوم فاليل ....""يانوسة مانقدرش نروح لبلاصة مانعرف فيها حتى واحد  انا كنت حاسبتها ساهلة بصح كي وصلت لصح عرفتها بلي صعيبة مانقدرش نوسة مانقدرش :"فريااااال واش راكي تهدري لالا هاذي ماشي نتي انا فريال لي نعرفها عمرها ماخافت ولا استسلمت.... في رايك نتي وينهي لي مليحة تروحي من هنا و تبداي من جديد ولا ترجعي عند باباك باه تكملي تعيشي فالسجن تاعو حتى تموتي بين يديه ....فريال والله غير تستاهلي تعيشي حياة خيرمن هاذي والله ....كلامها كان صواب و صحيح وليت مسحت دموعي و شفت فيها:"خلاص نوسة  إذا كان الهروب هو الطريق الوحيد باه نقدر نسلك روحي من لقبر  دنيا لي دارهولي بابا نهرب بلا مانشوف ورايا...""حظنتها و قتلها:"" نوسة… نتي أغلى حاجة صراتلي فهاذ الدنيا والله ماني باغية نروح نخليكم وشرايك تروحي معايا ""تبسمتلي :""والله مهبولة شوفي انا مانقدرش نروح بصح نوعدك إذا وصل نهار و كنت محتاجاتك فيه راح نجي عندك ""توعديني ""هههه والله نوعدك ....""نوسة راني خايفة عليك من بابا خايفة يعرف بلي كنت عندك و هربتيني وقتها ماتعرفيش واش يقدر يدير"":"فريال خمي غير في روحك اما انا راني نعرف كيفاه نتعامل مع باباك إذا جا. المهم نتي تروحي منا و تبداي حياة جديدة "......ــــــــــــ …....الحلقة 9

🦋بقلمي أنا الكاتبة ليانة🦋

فات عليا نهار كامل غير تخمام  و لخوف راكبني من ساسي لراسي بغيت يزرب يطيح ليل باه نهرب بصح غير نخمم انو قادر يحكمني ...قادر يشوفني نتردد و نتراجع من بعد نلقى دعم نفسي و معنوي من عند نوسة نرجع نستقوى مهما يكون راني ولية باش نخرج وحدي  نسافر من ولاية لولاية واعرة .....شوية هكا حتى دخلت عندي نوسة في يدها بلاطو فيه فريت اوملات و جي كسرة هريسة و حميص حطتهولي في حجري و شافت فيا: "فريال، الليلة لازم تتحركي. نعرف طاكسيور ثقة، خويا يخدم معاه راح يديك لاجونس و يبقى معاك حتى تركبي و يديماري لبيس باه يرجع."...هزيتلها براسي برك و بديت ناكل .... مع شبعت هزيت لبلاطو ديتو للكوزينة غسلت لماعن و رجعت لشنبرة تاعي  لميت قشي ماكياجي  صوارد لميت كلشي حتى من  لكارني ديتو من بعد لبست ليكات و سروال كوحل  حكمت شعري كوتشيفال درت ماكياج خفيف آيلاينر ريسيل غوج مارو كلار لبست باسكات بيضا و ڨعدت نستنى مع طاح ليل نوسة فتحت الطاقة غير شويّة وبانت دارنا من بعيد… الضو شاعل والموسيقى قاوية شافت فيا و ڨاتلي: " فريال هذا هو أنسب وقت باش تخرجي على خاطر باباك رآهو غارق فالرهج تاعو و محال يتلهى بيك ""هزت التلفون و عيطت لفرود واحد خمس دقايق وصل هزيت كابتي سلمت عليها و حظنتها بالدموع جبدت عليا و عطاتني ورقة فيها رقم تاع عمتها : "فريال مع توصلي لوهران، عيطيلها  راح تستقبلك و غدوة تديك للخياطة لي راح تخدمي عندها حتى الإقامة راح توفرهالك ."درتلها براسي هيه و خرجت من لباب غير وصلت لطاكسي و فتحت لباب رجعت شفت في نوسة درتلها بيدي باي و ركبت غطيت وجهي بيديا باه واحد لا يشوفني .....كي خرجنا من لحومة باش تنفست الصعداء الطريق ضلمة، والهدوء يخوف....وصلت لاجونس سلكت تيكي و ركبت نص ساعة ديمارا لبيس هنا هزيت تلفوني و بعثت ميساج لنوسة طمنتها عليا .... تالمو طريق طويل حتى دخت من صغري مانحملش لفواياج  وليت سندت راسي على لكوسالة و نخمم حتى شفت بلاكة مكتوب عليها ولاية وهران ترحب بكم باش تبسمت يعني خلاص تهنيت من بابا و دار هاذيك لي كانت بالنسبة ليا قبر دنيا ....و انا هكاك حتى حبس لبيس طليت من لكارو لقيت دنيا مسركلة بالبياري طلع واحد فيهم وجهو مغطي كامل يبانو فيه غير العينين تخنزر فينا و ڨالنا اهبطووووو بالعياط ""انا رجفة مشات فيا ولينا هبطنا بالواحد وقفونا صف ....دقايق معدودة حتى شفناه دار التحية و قال :""تحياتي شاف ""مع درت و نشوفلك واحد يا ربي ربي ربي واش من طول و واش من عرض كتافو وحدهم بحر عضلاتو راح يخرجو من لبسة كان ضخم بزاااف .... مغطي وجهو يبانو فيه غير العينين ڨدم عندنا بقى يتخنزر فينا زمااان من بعد نحى على وجهو ""يااااااا انا مع شفتو غست فيه ياااربي هاذوك العينين كيفاه كبار و كوحل و زيد مشفرين لحواجب كبار مڨرونين لخشم مرسوم رسم لفم متحوف يبالي هذا هو الكور و الديكور لي يهدرو عليه والله يا هو و الهيبة يد وحدة صراحة شخصية و رجولة و زيد سلاح فالكومبا تاعو واش نحكي و واش نخلي اول مرة ياتيريني راجل بصح يستاهل بغيت غير نحطو مقابلني و نتفرج فيه مافقت من سرحتي غير كي وقف مقابلني و طرطڨ صباعو في وجهي ياااااا واش حشمت هبطت راسي و خدودي رجعو حومر طماطم بقيت نخمم واش راهو يقول عليا ضرك ....ڨعد زمان يتخنزر فيا من بعد شاف عند هذاك لي معاه و ڨالو راني رايح نڨعد ابعثهملي بالواحد .....هيا بداو يروحو عندو واحد رايح واحد جاي حتى وصلت دالتي رحت عندو غير وقفت ڨدامو رجفة حكمتني ڨالي بصوت كان خشين و مبحوووح بالمختصر صوت رجولي بإمتياز:""اڨعدي ....ڨعدت و انا مهبطة راسي ....من بعد زاد ڨالي:""طلعي راسك ""انا غير طلعت راسي و جات عيني في عينو ڨريب دخت ياربي واش راهو صاريلي ...تخنزر فيا بواحد شوفة تقتل :""واش اسمك.....اذا حبيتو نكمل طالعو التفاعل وصلوها600جام نكمل..🦋شمس🦋

#الحلقه10و11

🦋بقلمي أنا الكاتبة ليانة 🦋

كان واقف مقابلني، خزراتو يخوفو… بقى يشوف معايا زمان من بعد هدر بواحد صوت خشين يركب رهبة  : “واش اسمك؟”غير سمعتو لساني تعقد، و قلبي يخبط بقوة… كنت راح نقولو “فريال”، بصح فقت مع روحي، و تفكّرت بلي لازم عليا نخبي هويتي، شفت فيه و جاوبتو: “شمس…”رفع حاجبو و ثبت فيا نظرة طويلة وكأنو يحاول يحفظ ملامحي، من بعد جبد ستيلو وكتب اسمي في واحد لكراس كان عندو غير كمل طلع راسو و دارلي براسو تاع هيه انا مافهمتش و لا تنهد : “هيه عرفت اسمك شمس ؟بصح  لقبك واش؟”من لخوف  خرجت الكلمة من فمي بلا ما نحس  لقبي “#&#.”غير سمع اللقب بانت في وجهو ملامح استغراب، حتى طريقة خزرتو ليا تبدلت بطريقة غريبة…حطّ يديه على الطابلة وقدّم وجهو ناحيتي نفس تاعو يضرب في وجهي :“قوليلي شمس… واش يقربلك  #&#؟ واش تكونيلو؟”أنا غير سمعت اسم جدي دم جمدلي فلعروڨ شفت فيه مصدومة و بديت نهدر مع روحي :""وين يعرف جدي هذا بقيت غير نخمم "" ما عرفتش واش نقول بديت نفرك في يديا و بان عليا توتر وليت راح نهدر و نجاوبو حتى سمعت صوت واحد ورايا هدر معاه:“سيف! واش الحالة ولد الخال ؟ هنا هو طلع راسو و تبسم مع هذاك يااااااا ربي ربي انا غير شفت تبسيمتو رحت فيها كلشي فيه ياتيري و زيد شخصية و هيبة من لفوق ....ولا ناض  صافح على هذاك و قالو :""اهلا فؤاد واش لغيبة هاذي ""والله داتني الخدمة راك تعرف " "" والله كامل رانا هكاك هيه كيفاه تفكرتني ليوم ""يا ولد الخال  كنت فايت لمحت لوطو تاع لبياري عرفتك نتا على خاطر جيت عندك و قالي باباك راهو فالخدمة  "" هيا مليح ""هوما يهدر و انا غير سمعت اسمو تسمرت في بلاصتي. رجليا حسيتهم تخذرو غير اسم سيف يدندن في وذني ! حتى وليت نهدر بيني وبين نفسي : “لاااااا… مستحيل يكون هو… مستحيل… علاه غير هو لي اسمو سيف؟ يمكن صدفة، إيه إيه صدفة برك…”كنت غايسة في تخمامي حتى سمعت فؤاد هذاك قالو: “واش يدير عمّي عيسى؟""والله  راهو بخير؟” كي سمعت اسم عمي عينيا غرغرو و رحت بعيييد بتخمامي...""يعني سيف نفسو ولد عمي، وذاك اللي معاه فؤاد ولد عمتي""....وانا هكاك سارحة بتخمامي حتى حسيت بضيقة في صدري و ڨلبي مزير عليا وليت نتمتم بلعقل بلا مايسمعوني:“لا لا لا، ما لازمش يعرفني… ما لازمش يعرف بلي انا نفسي فريال بنت عمو  على خاطر راح يقول لعمي و عمي يقول لبابا… وأنا نرجع لنفس الجحيم… لالالالااااااااا مستحيل نرجع لدار هاذيك محال نرجع لڨبر حياتي ياربي سلكها على خير و مايدققش معايا بزاف.”...كنت نخمم و في نفس الوقت نحاول ما نبيّن والو، مي فؤاد كان يشوف فيا بتركيز كبير حسيتو عرفني...سيف كي شافو مثبت معايا حط يدو على. كتف فؤاد و شاف فيه :“ علابالك بلي هاذي هازة نفس لقب تاعي”...فؤاد غير سمعو ، دور راسو عندي و شاف فيا بقى مركز مع تفاصيل وجهي من بعد شاف عند سيف: “ماشي فيها شبايه فريال بنت محمد؟” غير سمعتو نطق اسم بابا سرات فيا رعشة....سيف شاف فيه  من بعد رجع يتخنزر فيا زمان و نطق صوتو كان يخلع: “طلّعي راسك و شوفي عندي.”....غير سمعتو ڨلت خلاص عرفوني وليت خذيت نفس طويل و هزيت راسي بلعقل حطيت عيني في عينو و غير نشوف معاه نظرة وحدة منو كانت كافية باش تركب فيا لخلعة.....  أما هو بقى مركز فيا، حتى شفت ملامح وجهو تبدّلو، وكأنو مش مصدّق واش يشوف....وأنا؟ ضيّعت كل الحروف… غير عيني في عينو وقلبي راح يخرج من بلاصتو ....الحلقة 11

🦋بقلمي أنا الكاتبة ليانة 🦋

بقى يشوف فيا بنظرة الشك اسمعي واش يقربلك محمد #$# ؟” غير سقساني لساني تلعثم : “لـ... لاااا، مانعرفش واحد بالاسم هذا.”...كي شفتو ماصدقنيش زيرت على روحي و هدرت بثقة و انا لداخل نار لخوف لاهبة فيا:""انا راني جديدة فـ الولاية هاذي و ماعندي لا أب لا أم... توفاو عندهم عشر سنين.”...هو ما قال والو، غير شاف فيا بريبة، باين عليه ما صدقنيش....سكت شوية، ومن بعد هدر بواحد لبرود يقتل: “اعطيني تلفونك.”...استغربت : “علاه واش راح دير بيه ” تخنزر فيا و عيط :“قــــلتـــــلــــك اعطينــــي تــــلفــــوووونــــك!!! صوتو خلعني زربت جبدتو من الصاك و مديتهولو، حكمو و حلو شاف فيه لقا لكود، رجعهولي و قالي:“حليه.”...رجعت حكمتو بيديا لي كانو يرجفو، كتبت الكود مع تفتح خطفو من يدي  و بدى يخرب فيه....مافهمتش واش راهو يدير، غير نشوف في صباعو يتمشاو على الشاشة، شوية هكا زاد جبد تلفونو وبدا يخدم بيهم في زوج، حواسي كامل حبسو غير نشوف فيه و نهدر في ڨلبي: “يا ربي واش راو يدير هذا ؟”غير كمل  رجّعلي تلفوني.....و تخنزر فيا بعينيه لي كانو حادين كي سيف : “تقدري تروحي... لبيس راهو يستنا فيك.” أنا ما صدقت خرجت نجري مع صلت للبيس  ركبت و انا نحمد فـ ربي ....حكمت بلاصتي حطيت راسي على لكوسالة و مع غمضت عينيا جا تصويرة وجهو في مخيلتي نظراتو، صوتو، الحضور لي فيه…حتى حسّيت بڨلبي يخبط بطريقة غريبة،  و رجعت بيا ذاكرة لورى، للطفولة…و راحت بيا لنهار هذاك كي دافع على ماما قدام بابا هو الوحيد لي وقف ند لند معاه حتى واحد نهار بابا رفع يدو باش يضربني و سيف دمرو و حكمو من رقبتو تخنزر فيه و قالو :""تزيد ترفع يدك عليها نكسرهالك ""ثما كان عمري  10 سنين فالدقيقة هاذيك قلبي بدا يميل ليه....كنت نحسو البطل تاعي، ومن ذاك النهار، ماقدرتش ننساه…كبرت ومحبتي ليه كبرت معايا، رغم أني نعرف مستحيل يكون ليا…فقت من سرحتي على صوت شخير واحد من الركّاب، وليت نستغفر و نهمس بيني بين روحي واش راكي ديري شمس؟ السيد مزوّج، وبالاك حتى عندو ولادو… ماكلاه تطمعي فيه، غير ، سكّري هاذ لباب لانو ماراح يجيك منو غير وجع راس ...رجعت غمضت عينيا و رڨدت فطنت على صوت روسوفار يعيط :“وصلنا لاجونس ” هزيت كابتي مع نزلت من لبيس ضربتني نسمة بااااردة حسستني بواحد غريبة هيا بديت نشوف هنا و لهيه نحوس على يمينة، عمة نوسة حتى لقيتها...كانت واقفة تستنى فيا واحد لمرا ملامحها طيبة و وجها منور، كي شافتني تبسمت و سلمت عليا :""مرحبا بيك في وهران بنتي ""وليت حتى انا تبسمت معاها :“ترحب بيك الجنة ميمتي و كثر خيرك كي استقبلتيني عندك و فتحتيلي دارك ""حطت يدها على يدي و شافت فيا  : “شوفي بنتي انا والله ماعلابالي واش حكايتك نوسة ماحكاتلي والو من غير انو هربتي من ولايتك على خاطر ناسك ضروك و انا على هاذي قررت نستقبلك عندي لانو نكره الضلم و الحڨرة و من اليوم، ديريني كيما يماك، وراكِي راح تسكني عندي حتى يفرج ربي .....غير سمعتها دمعتي طاحت حظنتها و زيرت عليها: “ربي يعيشك ميمتي و خيرك معايا عمري ماننساه.” ركبنا مع بعض فـ طوموبيلتها طول طريق و انا ساكتة ساندة راسي على لكارو و نشوف فالدنيا ولاية جديدة حياة جديدة صراحة رتحت بزاااف وليت هبطت لكارو و بقيت نستنشق فالهوا عجبتني ريحة البحر....و نسمات لهوا حسنتلي نفسيتي اول مرة نحس براحة كيما هاذي من سنين و عوام ....مع وصلنا للدار، فتحت الباب ودخلتني، كانت دارها صغيرة بصح تهبل فيها ريحة الحنانة و دفا لعايلة لي تحرمت منو من صغري...داتني لواحد شنبرة و قاتلي من ليوم هاذي شنبرتك  مع فتحت لباب و دخلتلها تبهرت كانت بناتية بزاف، فيها سرير مفروش بالغوز، كوافوز صغير، خزانة غوز حتى لكاش ريدو غوز نسبة الأنوثة فالشنبرة هاذي طاغية....هنا درت عندها و شفت فيها : “ربي يبارك تهبل خالتي هاذي شنبرة تاع ” يمينة غير سمعتني عينيها دمعو، سكتت لحظة، شدّت نفسها و هبطت راسها : “كانت عندي بنتي و ضرك راهي عند مولاها…” .يتبع ديري جام وعشرة ملصقات نكملو

لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم 

جميع الروايات كامله من هنا 👇 ❤️ 👇 

روايات كامله وحصريه

اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇 

روايات كامله وحديثه

❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺