رواية دموع قمر الحلقه السادسه بقلم الكاتب محمد منصور حصريه وجديده على مدونة النجم المتوهج
رواية دموع قمر الحلقه السادسه بقلم الكاتب محمد منصور حصريه وجديده
وقبل ما نبدأ الحلقة نوحد الله ونصلي علي خير خلق الله سيدنا محمد. وعلي بركة الله نبدأ
بسم الله توكلت علي الله. وهو رب العرش العظيم
ومن جوة احدي المستشفيات يقف صبحي وسهير مع الدكتور اللي كان بيكشف علي قمر وقال الدكتور
اول مرة تنزف دم من بوقها
صبحي
اول مرة اشوفها في الحالة دي
سهير
بس انا شوفتها اكتر من مرة بتمسك بطنها. وتتوجع وقولت لها كتير تروح تكشف لكن ما كانتش بترضي
الدكتور
انا كدة مش هقدر احدد عندها اية لان الاعراض اللي عندها اعراض لامراض كتير علشان كدة بنتك محتاج للتحاليل والاشعة دي
وكتب الدكتور في روشتة الاشعة والتحاليل اللي محتاجها قمر وادي الروشتة ل صبحي وقال
انا دلوقتي اديتها شوية مسكنات وهتبقي كويسة
صبحي
يعني هتروح معايا عادي
الدكتور
اة. هي كويسة دلوقتي بس لازم التحاليل والاشعة دي في اسرع وقت
وسابهم الدكتور ومشي وبصت سهير ل صبحي وقالت
لو حصل حاجة ل قمر هيكون من تحت راسك انت واللي بتعمله دة ما ينفعش حس ببنتك شوية. حرام عليك
وسابته سهير ودخلت الاوضة تطمئن علي قمر اللي بصت لها وهي لسة تعبانة وقالت
اية خلاص هموت
سهير
بعد الشر عليكي. دول شوية برد في معدتك وهيروحو.
قمر
كله خير. ربنا ما بيعملش حاجة وحشة. ،،،،،،،،،،
وبعدها بيوم كان عمار مع قمر قدام الكلية وبيقول لها وهو زعلان
كل دة يحصل وما تعرفنيش
قمر
عادي يعني. ما انا زي القردة قدامك اهو
عمار
برضو كان لازم تعرفيني
قمر
ما تكبرش الموضوع. انا كويسة.
عمار
وعملتي التحاليل والاشعة زي ما طلب الدكتور
قمر
هو كل حاجة يقولها الدكتور اعملها. دول شوية برد في المعدة وهيروحوا. لحالهم
عمار بحدة
انتي بتهرجي صح. ولو انت مش عايزا تعملي التحاليل والاشعة المفروض ابوكي يعملهم.
فتبتسم قمر باستهزاء وتقول
ابويا اللي روحني البيت وجري علي مراته التانية. والروشتة بساله عليها قال انها ضاعت منه.
عمار
بجد دة اب كدة
قمر
انا حكيت لك عن بابا. واخويا بما في الكفاية. الاول بياخد مني فلوس علشان اللي متجوزهم والتاني الفلوس اللي بيجبها بطيع علي المخدرات اللي بيشربها. وارجع واقول الحمد لله انا احسن من غيري
عمار
انتي ازاي جايبة الرضا دة كله وجايبا منين
فتخرج قمر مصحف من شنطتها وتضم المصحف لصدرها وتقول
من هنا. يجي الرضا
وهنا يظهر في المشهد حسان صاحب عمار اللي اول ما يشوف قمر يتاخد شوية من شكلها ومن هدومها ولحظة قمر بصت حسان ليها وفهمت معنها ما هي بصة مش جديدة عليها لكن حسان ابتسم وقال ل عمار
اية يا سيدي. كل يوم كدة لازم الف عليك الكلية علشان اعرف اوصل لك
عمار
ما تتصل عليه
حسان
مش معايا رصيد. بلاش تخرجني بقي
عمار
طيب اعرفك بقمر اللي حكيت لك عنها
حسان وهو بيبص ل قمر
ازيك يا قمر. عمار ما بقاش يتكلم غير عنك
قمر
يارب يكون بالخير
عمار
بالخير والله
قمر ل عمار
طيب اسيبك مع صاحبك واروح انا احضر المحاضرة الاخيرة
عمار
خلاص ماشي هبقي اكلمك لما اخلص.
ومشيت قمر فراح عمار وراء منها وبص لها في عيونها وقال
خلي بالك من نفسك
ابتسمت قمر وقالت
طول ما انت كويس انا كويسة
عمار
لا اله الا الله
قمر
محمد رسول الله
ومشيت قمر وعمار رجع ل حسان وقال حسان
عمار سؤال وترد عليه بصراحة انت بتحب البت دي فعلا ولا بتعطف عليها
عمار مصدوم
اية السؤال الغريب دة
حسان
مش شبهك يا عمار وباين عليها البهدلة يعني الفستان مقطع والجذ،،،،،،،،
عمار مقاطعه ل حسان
حسان مالك في اية. هي ذنبها انها طلعت لقيت نفسها في الظروف دي. ما انا حاكي لك ابوها واخوها عاملين ازاي. دي قسما بالله جبل انها مستحملة القرف دة
حسان
هكون صريح معاك. لو انت عمار بتاع زمان قبل الحادثة كنت ممكن تبص ل قمر
هنا بقي ارتبك عمار لكن حسان كمل عليه وقال
ولا من جواك انت قولت اهي واحدة وخلاص ترجع لي ثقة في نفسي واتجوزها واسكت بيها ابويا
عمار والارتباك زاد لكن حسان فضل دايس علي الجرح ومكمل وقال
بتحبها يا عمار ولا صعبانه عليك
عمار
مش عارف انا بحبها ولا صعبانه عليه وخلاص مش عارف. بس ما انكرش انها هي الوحيدة اللي حسستني اني مش مشوة
حسان
يعني ايه مش عارف. من كلامك عن قمر باين اوي انها بتحبك ونفسها تتجوزك
عمار
انا عارف انها بتحبني. وانا كمان بارتاح لما بكلمها ولما بشوفها.
حسان
ازاي ترتاح لما تشوف واحدة شايلة الهم دة كلة وفستانها الاسود مخليها عندها 40 س.
عمار
قولت لك غصب عنها يا حسان لازم تقدر. اللي هي في ده كتير اوي ومايستحملهوش اي بشر
حسان
انا خايف يا عمار تعشم البت دي بحاجه مش هاتقدر تقدمها ليها. لازم تعرف انت عايز ايه منها بالظبط
عمار
عايز اتكلم معها واخرج واعوضها عن اي حاجه اتحرمت منها بس،،،،،،،،،،
ويسكت عمار فيقول حسان
بس ما تنفعش تكون مراتك
عمار بتردد شديد
مش عارف. كلامك خلاني احتار وكانك فوقتني من حلم ما كنتش عايز افوق منه
حسان
انا خايف عليك من بكرة لما تفوق وتصحي وتلاقي نفسك وقعت في جوازة من بنت مش من طينتك. ونسب اب واخ ما ينفعوش يكونو نسايبك. انت ابن عيلة الي حد ما فوق المتوسطة وهي،،،،،،،
عمار مقاطعة له
بس بقي. انت جيت لية دلوقتي لية خلتني احتار دة انا أول ما بشوفها بنسي الدنيا كلها بنسي وشي بنسي همومي بنسي تنمر الناس عليه. وببقي عايش معها ملك. وهي اميرتي
حسان
يارب يكون الكلام دة من قلبك
عمار
من قلبي ولو ظروفها خلت لبسها بالشكل دة وتبان انها تحت انا هسحبها من ايديها وهخليها في مستوايا. وهتبقي احلي بت في الكلية، ،،،،،،،
وبعدها بيوم بالظبط قرر عمار يجيب هدوم ل قمر وجذمة وشنطة جديدة واستنها قدام الكلية وفي ايدة تلت شنط بص ل قمر اول ما شافها وقال
ازيك يا قمر
قمر
انا كويسه انت عامل ايه
عمار
انا بخير والحمد لله
قمر
كنت عاوزني في ايه
عمار
هانروح مشوار سواء بس قبل ما نتحرك عايزك تشوفي اللبس ده مقاسك ولا لا
ويمد ايدة بالتلت شنط. شنطة منهم فيها فستان جديد بخمار والشنطة التانية فيها شنطه أيد شبه الفستان والشنطه الاخيره فيها جذمه فتبص قمر للتلت شنط وهما في ايد عمار وتفرح اوي وتمسك الشنط وتبص فيهم وتقول
الهدوم دي ليا انا
عمار ضاحكا
لا ليا انا طبعا ليكي
قمر وهي بتبص للشنط بدموع الفرح
انا اول مره حد يجيب ليا حاجه
عمار
ومش اخر حاجه هاتيجي ليك طول منا معاكي
قمر بفرحة شديدة
بجد انت هتفضل معايا.
يسكت. عمار للحظات وكانه خايف يرد وقمر تبتسم لانها فهمت واديته الشنط تاني وقالت
انا اسفه مش هاقدر اخد حاجه منك
عمار باستغراب
ليه بتقولي كده
قمر
ما فيش حاجه تربطني بيك وانت بالنسبه لي مجرد زميل في الكليه هاخد منك الشنط دي مقابل ايه
عمار
ولا اي مقابل دي هديه مني ليكي
قمر
وانا ما قدرش اقبل هديه من حد غريب. ولا صدقة من حد انا مجرد صعبانه عليه
عمار باستغراب
انا غريب يا قمر. وصدقة اية انا عمار
قمر
عمار ماتزعلش مني انت ولد لو خد هديه من اي بنت ما حدش ها يقول لك حاجه ولا حد هايقول ايه اللي انت عملته ده انما انا بنت الخدش البسيط في مجتمعنا ده بيبقي فضيحه وانا مش مستعده ان يتقال عليه كلمه ملهاش لزمه. في حكاية الغرض منها الصدقة علي فقير
فيتعجب عمار برد فعلها ولكنه استغرب ازاي في بني ادمه لغايه دلوقتي بتفكر كده ازاي في بني ادمه محرومه من كل حاجه ويوم ما يجي لها حاجه نفسها فيها ترفضها علشان خايفه علي نفسيها فتقطع قمر حبل تفكيره قائلا
مش عايزاك تكون زعلت من كلامي
عمار
عايز أسالك سؤال بس تردي عليه بصراحه
قمر
وانا سمعاك
عمار
انتي ماسالتنيش ولا مرة رغم اننا اتقابلنا اكتر من مرة عن سبب الحرق اللي في وشي
فتضحك قمر وتقول
علشان انا من ساعه ما عرفيتك وانا بابص في عينيك بس، وما شوفتش غيرهم وفي عيونك شوفت كل اللي بحلم بي في البني ادم اللي ارتاح معه.
فتدمع عيون عمار ويقترب منها ويمسك راسها ويبوسها في جيبنها ويقول
انا لازم امشي دلوقتي
ويسيبها ويمشي فتحط أيدها مكان ما باسها وتبتسم، ،،،،،
وبعداربع ساعات ومن جوة شقه قمر كان رمضان قاعد قدام التيلفزيون بيتفرج علي قناه التت وبيبص للرقاصه وهو مبسوط وفي أيده سيجاره حشيش وبيغني مع الاغنية اللي شغاله وبيقول
الجو رايق خالص والدنيا هس هس وانا وانت يا حبيبي ونجوم الليل وبس
ويقوم يرقص مع الاغنية. ويسمع صوت خبط علي الباب فيقول
بت يا قمر تعالي شوفي مين الحمار اللي بيخبط
فترد قمر من المطبخ
مش فاضيه بغسل المواعين اقوم انت افتح
رمضان
مواعين ايه يا بنت الكدابه. دول كل اللي عندنا كوبيه وطبق تعالي يا بت افتحي الباب
قمر
ما تفتحة انت
رمضان
برقص وجسمي عرقان ولو فتحت ممكن الهواء يلفحني
ويتكرر الخبط علي الباب فيتعصب رمضان ومن غير ما يحس يدوس علي الريموت بـيده فيلاقي بت محجبة بتتكلم في احدي البرامج فيبص لها ويقول
انتي لبستي ليه قومي كملي رقص
ولكن الخبط يفضل مستمر فيروح رمضان ناحية الباب وهو بيقول
ماشي يا قمر علشان تقومي الراجل الكبير هو اللي يفتح روحي يا قمر قلبي وربي غضبان عليكي
ويفتح الباب ويلاقي عمار. وهو لابس بدله علي احدث موديل ومعه الثلاث الشنط اللي رفضتهم قمر وعلبهم شيكولاته فبص له رمضان بانبهار وقال
انت العريس بتاع الفرح اللي علي اول الشارع. صح. وجاي ليه هنا عايز تطرطر
فيضحك عمار ويقول
لا. انا عمار وكنت جاي عايز اقابل عم صبحي والد قمر
رمضان
انا صبحي ابن قمر نعم عايز ايه
عمار
طيب مش هاتقول لي اتفضل
رمضان
عايز تتفضل طيب اتفضل
ويقفل الباب في وش عمار ولكن عمار يمنع الباب بايده قبل ما يتقفل ويقول
ايه ده قفلت الباب ليه
رمضان
مش بتقول انا عايز اتفضل
عمار
اه اتفضل اخش مش اتفضل امشي
رمضان
اه انت عايز تخش. تبقي تقول بقي اتخشش فعل خشة مش اتفضل فعل فضل
عمار ولانة عرفة من كلام قمر عنه. انه ضايع قال
ممكن اتخشش فعل خشة
رمضان
اوف كرسي. مدام
فيفتح له رمضان الباب ويدخل عمار فيجري رمضان بسرعه ناحيه الكنبه ويقعد وهو يقول
لحقت مكان
فيضحك عمار وهو مستغربه ويروح ناحيه الكنبه وهو يقول
زي ما قمر حكيت لي عنك دمك خفيف
ولسة عمار هيقعد جنب رمضان علي الكنبه رمضان صرخ فانفزع عمار وقال
في ايه
رمضان
اوعي تقعد هنا ده مكان المرحومه
عمار
المرحومه والدتك
رمضان
لا. سعاد. شقطها من الشارع قعدت مكانك وماتت ومن ساعتها واي حد عايز يقعد مكان سعاد بيقعد عادي
عمار باستغراب
بيقعد عادي طيب مش عايزني اقعد انا ليه
رمضان
مش عارف يمكن علشان ما بحبكش
عمار وهو واقفا قدام رمضان لان مافيش اي عفش تاني يقعد عليه يقول
طيب هو فين عم صبحي
رمضان ضاحكا
الراجل العجه بتقوله يا عم صبحي انت متربي اوي يا حمار
عمار وهو يكتم غيظه
اسمي عمار مش حمار
رمضان
يعني احنا غلطنا في رئيس جمهورية الكنغر لو عايز صبحي صبحي دلوقتي في جامعه الدول بيزف عروسه بالاتوبيس بتاعه
عمار وهو هايتجنن
بيزف عروسه باتوبيس هيئة . هو ما فيش حد غيرك في الشقه
فيمسك رمضان هدومة من عند صدره ويضمهم وكانه بيحمي نفسه من بصة عمار ويقول رمضان
ليه انت عايز تحترش بيه. يا بيه اللي انت بتطلبه دة عيب وحرام.
عمار
بطلب ايه بس انا عايز اختك قمر
فيسيب رمضان هدومة ويقول
طلعت بتاع بنات. وانا اللي افتكرت حاجه تانيه طلعت عايز قمر عموما الاهتمام مابيطلبش
فتخرج قمر من المطبخ وهي لابسة جلبية بيت مقطعه تماما علي بنطلون بيجامة وبتقول لرمضان
انت عمال ترغي مع مي،،،،،،،،
و تشوف عمار فتتصدم من المنظهر وتقول
يا لهوي
وتجري ناحية اوضتها فيبص لها رمضان ويرجع رمضان يبص ل عمار ويقول
لامواخذه يا حمار اصلها مش متوعده تشوف حد نظيف
عمار
اسمي عمار. حمار دي شتيمة.
رمضان
ما تكبرش الحكاية. دة مخلوق من مخلوقات ما وراء الطبيعة
عمار
هو مين دة
رمضان
عمار. مش دة كائن هولامي فضفاض
عمار وهو بيتنهد
يعني انا دقيقة تاني معاك وهجيب اجلك دي قمر جبل علشان مستحملاك
رمضان
هي جمل صحيح. دة لولا انها اختي انا كن،،،،،،،،
فتخرج قمر بسرعه وتقول
انكتم بقي. هتقول اية تاني. قوم روق الشقة
وتبص ل عمار وتقول
انت ايه اللي جابك هنا. انا غلطانه اني عرفتك عنواني
عمار
ماكنتيش عايزاني اجي علشان اطلب أيدك
قمر مصدومة
تطلب ايدي. انت مجنون. صح
عمار
اة مجنون. ومخبوط في دماغي وعايز اتجوزك
قمر وعيونها كلها فرحه
بتقول أيه. انت
عمار
بحبك
قمر
وانا كمان بحبك
فيمسك عمار أيد قمر ويبوسها فيصرخ رمضان
ايه ده
فيبص عمار وقمر الي رمضان وهم مفزوعين ويبعد عمار أيد قمر عنه فيقول رمضان
هو لسه في حد بيبوس حد في ايده اخلص ياعم وهات من الاخر
ويشاور علي اوضتة ويقول
الاوضه اهي فاضيه والشيطان قاعد مستني جوه من ساعه ما ام عبير كانت هنا خش واخلص وكده كده الاوضه دي هاتخش النار. بس ابقي سيب اي حاجة في الصندوق اللي جنب الاوضة
قمر
هتبيعني يا رمضان
رمضان
يا بت دة انا بلم حق كولدير هحطة قدام الجامع ثواب
فيبص عمار ل قمر ويقول
انتي متاكده ان ده اخوكي
قمر
اه ايه رايك في مش راجل
ثم تلاحظ ان عمار واقف ورمضان قاعد فتقول لي عمار
انت واقف ليه لغايه دلوقتي
عمار
اخوكي ياستي واخد كنبه لي ملاكي هو وسعاد المشقوطة
فتضحك قمر وتقول
حقك عليه انا
وتبص لرمضان وتقول له
خلي عندك دم وقعد عمار جنبك
رمضان
ما فيش مكان ايه هاخده علي حجري
عمار وهو بيبص لقمر
يا ستي مش مهم اقعد المهم انا عايز اقابل عم صبحي
رمضان
عايز صبحي انا عارف هو فين يا حضرة الظابط
ويقوم من علي الكنبه بسرعه ويدخل اوضة وبعد لحظات يخرج رمضان من الاوضة وهو بيسحب ابوة من البنطلون المقطوع الذي كان لابسة ويقول
هو ده صبحي يا حضره الظابط
فيفزع صبحي وهو كان باين عليه النوم ويفتح عيونه بصعوبه ويقول وهو بيبص لعمار
والله انا برئ يا حضره الظابط
قمر
ظابط ايه بس ده عمار زميلي في الكليه
صبحي وهو بيبص ل رمضان
اومال ابن الكلب ده بيقول لي مباحث التموين بره وجايين علشان المحل في تونه حمضانه وهايشمعو المحل
قمر
بابا انت عندك محل اصلا
صبحي
لا
قمر
طيب خايف من مباحث التموين ليه
رمضان وهو يقف عند باب الشقه
انا خارج
صبحي
رايح فين يا ابن الكلب
رمضان
رايح اجيب راجل من علي القهوه علشان يقعد مع حمار وقمر علشان ما ينفعش راجل غريب يقعد مع اختي لوحديها
صبحي
رايح تجيب راجل اومال انا أيه ياخلفه العار
رمضان
انت صبحي واول مره اشوف صبحي راجل
صبحي يوطي يجيب الجذمة ويقول
صبحي يا كلب
ويطلع يجري ناحية رمضان ورمضان يجري برة الشقة فتبص قمر ل عمار وتقول وهي مكسوفة
حقك عليا يا عمار بس انا حكيالك عن رمضان وابويا كل حاجه
فيضحك عمار ويقول وهو بيبص في عيونها
كل ده مش مهم عندي. المهم عندي قمر عمري
ويدي لها الشنط اللي رفضتها قبل كدة وهو بيقول
دلوقتي تنفعي تاخدي الشنط دي
قمر وهي بتبص للشنطة
مش لما تكلم بابا
عمار وهو بيضحك
طيب ما تيجي لغاية ابوكي ما يرجع ندخل نشوف الشيطان اللي بيقول عليه رمضان
فترفع قمر حاجب وتنزل التاني ل عمار وتقول
لا والله
عمار
دة ثواب علشان الكولدير
فتضحك قمر ويضحك عمار، ،،،،،،،،،
وفعلا اتخطبت قمر ل عمار بعد ما جاب ابوة جمعه ولبسها الشبكة وكان الاتفاق ان عمار هيتكفل بكل شئ بسبب ظروف قمر. وهيعيشوا في شقة جمعه والد عمار، ،،،،،،،،،،
وبعد اسبوع بالظبط. تتعب وتسخن اوي. الساعه 1. بعد نص الليل اخت قمر الصغيرة وكان رمضان بايت برة وصبحي بايت عن مراته نعمه فراحت قمر ناحية شنطتها تشوف معها كام لكن صبحي كالعادة خت كل الفلوس اللي معها حاولت تتصل باي حد منهم لكن موييلاتهم كانت مقفوله فراحت قمر شايلة اختها علي ذراعها وراحت لاقرب مستشفي وراحتها مشي. ووصلت المستشفي وكان لازم علشان يقبلو اختها تدفع 10 ج. رسوم دخول فضلت تترجي موظف الاستقبال انه يعرضها علي الدكتور النبطشي وهي هتتصرف في الفلوس. لكن موظف الاستقبال قال
بقول لك اية هو نظام المستشفي كدة. مش عجبك خدي اختك وامشي من هنا
قمر بقهر
ابوس ايدك ورجلك. البت سخنة مولعة. يطمني عليها بس
الموظف بكل جحود
قولت مش هينفع لازم حق تذكرة الدخول. دة نظام بطلو تسول بقي جتكو القرف. دي 10 ج. اية. شحطة زيك مش معها 10 ج.
تصرخ قمر في وش موظف الاستقبال وتقول
ربنا ينتقم منك. هو لو معايا هبخل بيها علي اختي انت مش انسان. ما فيش رحمة. وانا لو متسولة هتسول في المرض
الموظف بعصبية
اما انتي لسانك طويل وعايز قطعه
في الوقت دة تقف ممرضة باين علي وشها الرحمة والطيبة وتقول وهي بتفرق بين الموظف وقمر
بس بس.
وتبص ل قمر وتقول
في ايه يا انسه
قمر
اختي عيانه جدا والسخنيه عندها عدت الاربعين ومش عايز يدخلني بيها الا لما ياخد 10 ج.
فتبص الممرضة ل موظف الاستقبال وتقول
هو مافيش فايدة فيك. من امتي بناخد في حالات الاستقبال تذكرة كشف
الموظف
وهي دي حاله استقبال. هي جاية في حادثة دي سخنية يعني كشف
فتحط الممرضة ايديها في جيبها وطلع 10 ج. وتدبهم للموظف ودخل قمر واختها وتاخذها الممرضه الي الدكتور وتمر دقائق وتخرح الممرضه ومعها ورقه مكتوب فيها اسم علاج مضاد حيوي. وعلاج اخر مخفض للحراره وتدي الورقه الي قمر وتقول لها
هاتي العلاج ده حالا
قمر
هي اختي عندها ايه
الممرضه
نزله شعبيه حاده بسرعه هاتي العلاج
قمر
ومافيش هنا في المستشفي
الممرضه
لا والله النوع ده مش موجود
قمر
طيب وبعدين
الممرضه
مش معاكي فلوس ولا ايه
قمر وهي تصرخ من وجع الفقر والحوجه تقول
معايا معايا
فتمد الممرضه ايديها ب 100 جنيه وتقول لها
طيب خدي دول وهاتي العلاج لاختك
فتنظر لها قمر ودموعها علي خدها وتقول
لا شكرا انا معايا. بس في الشقة هروح اجيب العلاج حالا وبالمرة اجيب لك ال 10 ج.
وتبعد قمر ايد الممرضه عنها وتخرج من المستشفي بسرعه وترجع شقتها يمكن تلاقي ابوها او اخوها حد منهم رجع لكن مافيش فايدة فكرت تتصل ب عمار تستلف منه الفلوس لغاية ما تطبق من الكوافير لكنها اتكسفت. وفضلت تفكر ودخلت اوضتها تدور علي اي حاجة ممكن تتباع ولقيت شنط الهدوم اللي جيبهم عمار ولسة الهدوم جوة منهم ما تلبسوش فمسكت الشنط وخرجت جري من الشقة،،،،،
ومن جوة محل ملابس وقبل ما يقفل صاحب المحل تقف قدام منه قمر اللي كانت بتنهج وتقول
الحمد لله اني لحقتك قبل ما تقفل يا عم احمد
عم احمد
خير يا قمر.
فتمد قمر ايديها بشنط الهدوم هدية عمار ليها وتقول
عايزا ابيع الطقم دة
فيبص عم احمد في الهدوم ويقول
اخدهم منك ب 200 ج.
قمر
حرام يا عم احمد دي هدوم غالية والشنطة والجذمة ماركة. ومالبستهومش الا مرة واحدة
عم احمد
يا بنتي الحال نايم هو في حد بيشتري دلوقتي. دة انا بس واخدهم من وشك. علشان احنا جيران
قمر في سرها
يصعب عليه ابيع اول هدية تيجي لك منك يا عمار بس والله غصب عني، ،،،،،،،
وباعت الطقم وجابت العلاج لاختها وخدتها وروحت ونامت وهي مضايقة علي هدية عمار اللي ما لحقتش تتهني بيها وتاني يوم الصبح صحيت علي موبيلها بيرن ردت وسمعت عمار بيقول
البسي حالا واخرجي انا مستنيكي عند اول الشارع هاخرجك خروجه عنب. مع اصحابي وقرايبي اللي عايزين يتعرفو عليكي.
قمر
خروجه
عمار
ايوا يالا بسرعه. البسي الطقم اللي انا جيبتهولك. عايزك تبقي قمر يا قمر
وينهي المكالمة فتقول قمر لنفسها
وبعدين بقي هاعمل ايه انا دلوقتي ،،،،،،
يارب تكون الحلقة عجبتكم. مستني رايكم.
من الحلقه الاولى حتى الحلقه السادسه علي صفحتنا من هنا
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
جميع الروايات كامله من هنا 👇 ❤️ 👇
اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇
❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺
تعليقات
إرسال تعليق