رواية دموع قمر الحلقه التاسعه والاخيره بقلم الكاتب محمد منصور حصريه وجديده على مدونة النجم المتوهج
رواية دموع قمر الحلقه التاسعه والاخيره بقلم الكاتب محمد منصور حصريه وجديده
وقبل ما نبدأ الحلقة نوحد الله ونصلي علي خير خلق الله سيدنا محمد. وعلي بركة الله نبدأ
بسم الله توكلت علي الله. وهو رب العرش العظيم
★ودخل عمار للبنك وهو بيقدم خطوة وبيرجع خطوة وسحب الفلوس وخرج من البنك ووقف تاكسي وقال سواق التاكسي
رايحين فين
حسان ل عمار
اقول للسواق اية. مركز التجميل ولا شقة قمر
عمار بص ل حسان. وبص في مرايا التاكسي وشاف الحرق وتخيل بعد العملية هيرجع ازاي ووشة هيبقي زي الاول فقال حسان تاني
اقول اية
بص عمار ل حسان وقال
اطلع علي عيادة التجميل
حسان بفرحة
هو دة الكلام،،،،،،،
وبعدها بشوية ومن جوة عيادة التجميل يقعد عمار ومعه حسان مستنين الدكتور يجي. فوقف عمار بص له حسان وقال له
وقفت لية
عمار
انا حاسس اني كده بغلط غلطه عمري
حسان
انت ليه مكبر الموضوع اوي كده انت كنت خاطب قمر من باب جبر الخواطر وخلاص بعد اللي جالها انا شايف انها ماتنفعكش. انما انك تعمل العمليه ويرجع وشك تاني زي ماكان هو دة الصح
عمار
يعني كده انا مش هاكون خونت قمر وسيبتها وقت ماهي محتجاني
حسان
خيانه أيه بلاش الكلام الكبير دة يا عمار انا نفسي اشوفك يا صاحبي وانت عايش حياتك طبيعيه من غير الحرق اللي وشك ده
عمار
بس، ،،،،
وهنا ترن قمر علي عمار فيبص عمار للموبيل ويقول
قمر بتتصل
حسان
كنسل عليها وماتردش
عمار
ازاي بس ممكن تكون عايزا حاجه
حسان
اسمع الكلام كنسل
ويبص عمار للموبيل وهو مش هاين عليه يعمل كدة فيمسك حسان الموبيل من ايد عمار ويقف حسان ويقول.
تعالي معايا
عمار
هنروح فين بس
حسان
لغايه المرايا اللي في الحمام
ويروحوا ناحيه المرايا ويحط حسان عمار قدام المرايا ويقول له
بص كده عجبك منظرك ده انت اوله انك تعمل العمليه بتاعتك. اللي كنت المفروض تعملها قبل ما تعرف قمر خالص
ويبص عمار للحرق وهو مخنوق من المنظر ولقي نفسه اقتنع بكلام حسان وترن قمر مره تانية فيبص عمار للموبيل ويكنسل عليها ويرجع ويقعد في مكانه مستني وصول الدكتور وكان قلبه بيتقطع وعيونه بتبكي حسرة و جسمه كله رافض اللي بيعمله لكن حسان قال
هتنسي مع الوقت.
بص له عمار وسكت، ،،،،،،،
وفي نفس الوقت ومن جوة شقه قمر كانت قمر ترقد علي السرير وهي تعبانه جدا وماسكه بطنها وعماله ترن علي عمار وهو بيكنسل فيدخل رمضان عليها الاوضة وهو بيقول
قمر انا مش عمال اندهه لك تقومي تعملي اكل لاخواتك الجعانين دول
قمر بصعوبه
رمضان انا تعبانه قوي خدني وديني المستشفي
رمضان بقلق
مالك يا قمر
وتتوجع قمر اوي وتصرخ من شدة الوجع وتجيب دم من بوقها. شالها رمضان علي ذراعه وخرج بيها من الشقة جري وتدي له قمر عنوان الدكتورة اللي كشفت عندها قبل كدة لما كانت مع عمار، ،،،،،،،
وبعدها بشوية ومن جوة المستشفي تقف الدكتورة مع رمضان وتحكي علي حاله اختة وتقول له
انتو كدة بتهرجوا بصراحة حالتها في النازل وماحدش فيكم جالي وقالي امتي نفتح العمليات ليها
رمضان ولاول مرة بصوت حزين
اديني بالظبط يومين وانا هاجي لغاية هنا واقول لك احنا جاهزين للعملية
الدكتورة
ياريت ما تتاخروش عن يومين
وتمشي الدكتور وهنا يسمع رمضان صوت قمر بتنادي وتقول
عمار عمار
فيقعد رمضان قدام منها ويمسك أيدها ويبوسها ويقول بشجن
انا رمضان اخوكي
فتبص له وتقول
عمار ما اتصلش بيا
رمضان وهو بيعيط وبيكذب
أتصل وقال انه جاي في السكه
وتبص قمر لدموع رمضان وتضحك وتقول
رمضان اول مره اشوفك بتعيط
رمضان بابتسامه وجع
اصل انا عندي دم
قمر ضاحكا
رمضان هو انا صعبانه عليك ولا انت بتحبني
رمضان
بحبك اوي ومش عايزك تموتي
وياخذها في حضنه وهو بيعيط اوي ويقول
وربنا بحبك واول مره احب حد كده. غير عم زلطه
وتبص له وتقول باستغراب
مين عم زلطه
رمضان
دة الفيزا بتاعتي بسحب منها فلوس وقت ما احب
فتضحك قمر وتقول مازحا
اه فهمت اكيد بتنصب علية. ما انا عرفاك
فتتالم قمر مره تانية فيقول لها
والله قلبي بيتوجع كل ما تقولي اه وتتوجعي يا لو ينفع ياخده الرحم بتاعي ويحطوا بدل اللي باظ عندك
فتضحك قمر بشده وتقول
الرحم بتاعك
رمضان بهزار
ايه مايجيش مقاسك
فتضحك قمر مرة تانية وتقول بصعوبه
رمضان وحياه ابوك تسكت انا تعبانه ومش قادره اضحك
رمضان
انا بهزر معاكي علشان تضحكي انا عارف ان الرحم ده عند الستات بس
قمر
بجد. طيب والرحم ده عند الستات بس ليه
رمضان
علشان ترضعه العيال منه. ماهو دة اللي معروف وسط النسوان الشعبي. بالب،،،،،،،،،
قمر وهي بتحط ايدها علي بوقه وتقول
بس. بلاش فضايح
رمضان
انا كنت هقول بزازه. اية هي البزازه عورة
فتضحك قمر اوي وتقول
انت كنت هتقول كدة. انت لسانك طويل وانا عرفاك ما بتسترش
رمضان
بس عارف كل حاجه وبخاف اقول لتحسد
قمر
واضح
وتبص جنب منها يمين وشمال وتقول
اومال فين الموبيل بتاعي
يطلعه رمضان من جيبة ويقول
اهو جيبته معايا
قمر وهي بتاخده منه
طيب هات لما اتصل ب عمار اشوفه مجاش لية
وتتصل ب عمار تاني وبرضو ما يردش فتستغرب اوي وتقول لنفسها
يا تري يا عمار ما بتردش ليه،،،،،،،،،
وفي نفس الوقت كان عمار قاعد مع دكتور التجميل واداة له جزء من مبلغ العملية. وحدد له الدكتور ميعاد العمليه بعد 3 أيام وخرج عمار من عند الدكتور وكان معه حسان،،،،،،،
وبعدها بشوية خرج رمضان من المستشفي وراح جاب شوية عصائر واكل ل قمر وحطهم قدام منها وقال لها
خلي الاكل والعصاير دول معاكي وانا رايح مشوار وراجع
قمر
هتروح فين بس
رمضان
هتصرف في فلوس علشان العملية
قمر
انت هتعرف تتصرف في 120 الف ج.
رمضان وهو بيعيط. من وجعه علي وجع اخته اللي اول مرة يحس بيها
هتصرف لو حتي هبيع كليتي. بس تعملي العملية وتخفي يا قمر
قمر
رمضان انت مالك اول مرة اشوفك كدة
رمضان
مش عايزك تموتي يا بت.
ويعيط بحرقة ويقول
مش عايزك تموتي
وخرج من المستشفي جري علي شقة عم زلطة وخبط الباب وفتح عم زلطة ولسة هيشتم لقي رمضان بيعيط وبينزل يبوس رجله وبيقول
اختي هتموت لو ما عملتش عملية ب 120 الف ج.
اتاثر عم زلطة وقال له وهو بيقومة
طيب قوم بس وفهمني بالراحة كدة في اية،،،،،،،،
ومن جوة شقة عم زلطة يقعد رمضان قدام منه بعد ما حكي ولميس بتحط لهم الشاي ورمضان بيقول
انا لفيت علي كل اللي اعرفهم يمكن القي حد يساعدني
عم زلطة
بس يا ابني دة مبلغ كبير اوي. يتجمع ازاي بس في يومين
رمضان
كلم اي حد تعرفه. قول له لله. دي عيلة غلبانه والله. او اقول لك شوف حد معرفتك يشتري كليتي انا مستعد ابعيها
تبص له لميس باعجاب شديد وتسيبهم وتخش اوضتها وعم زلطة بيقول
رمضان عايزك تهدئة كدة مش اي كلام وخلاص بيتقال. وانا هكلم دكتور معرفة يشوف لينا حل يعني لو حتي قمر تعمل العملية علي نفقة الدولة
رمضان
ياريت يا عم زلطة بس بسرعه والنبي، ،،،،،،،،،،
ويسيب رمضان عم زلطة ويمشي ويسمع اذان العصر فيبص للجامع وهو بيفكر يخش يصلي. ويدعي لقمر ولقي شيخ الجامع داخل راح له وقاله
عايزك يا شيخ تدعي لاختي قمر
الشيخ
وما تدعيش انت لية.
رمضان
اصلي يعني. بعمل حاجات كتير غلط واكيد ربنا مش راضي عني
الشيخ بابتسامه
الشيطان هو اللي بيوسوس لك بكدة. ربنا بابه مفتوح ديما وبيفرح اوي باللي يرجع له. خش اتضواء وصلي وادعي لاختك بنفسك انت اولي بيها مني
رمضان
حتي لو كنت بشرب حشيش
الشيخ
لو علي الحشيش بس. فحكمة نفس حكم السيجارة ويجوز ان اللي بيشرب سجاير يدخل يصلي المهم انك تكون في وعيك والحشيش مش مخليك مغيب
رمضان
ولو باخد برشام مع الحشيش. اصلي برضو
الشيخ
برشام مخدر
رمضان
اومال باندول اكسترا
ابتسم الشيخ وقال
صلي لو انت في وعيك ومدرك
رمضان
ولو بضرب حقن
الشيخ بزهق
لا حول ولا قوة الا بالله. انت يا بني ما بتاخدتش حاجة حلال
رمضان
لما بعطش بشرب مية من الثلاجة
ابتسم الشيخ من المر والحال اللي وصل لي معظم شبابنا وقال
يا ابني لو في وعيك صلي. و كل اللي انت بتاخدة دة لو مخليك مش عارف انت مين وفين. لايجوز الصلاة
رمضان
لا انا في وعيي دلوقتي وعارف انا مين وفين
الشيخ
يبقي ادخل معايا و صلي
وفعلا قلع رمضان الكوتشي ودخل الجامع وصلي ودعي ل قمر من قلبه . ،،،،،،،،،،،
ويعدي يوم بحاله وقمر بتحاول توصل ل عمار اللي قفل موبيله ورمضان كان قاعد معها فقالت له
رمضان عمار شكلة مش كويس وحصل له حاجة
رمضان
فكري في نفسك دلوقتي. لانه المفروض هو يتصل يطمئن عليكي مش يهرب منك
قمر بصوت حزين
تلاقي مكسوف وزعلان علشان ما قدرش يجمع فلوس العملية
رمضان
برضو لازم يطمئن عليكي مش يسيبك كدة
قمر
ما نعرفش ظروفة اية. انا عايزا اروح اطمئن عليه
رمضان
انتي اللي تروحي. وربنا بتهرجي
قمر
مش هرتاح الا لما اطمئن عليه. ،،،،،،،،،
ومن قدام باب شقة عمار تقف قمر ورمضان ويرن رمضان الجرس ويفتح عمار فتقول قمر بلهفة
عمار انت كويس ما بترديش عليه ليه
عمار مصدوم
قمر انتي ايه اللي جابك هنا
قمر
جيت علشان اطمئن عليك
عمار
انا كويس
قمر بطيبة
طيب مابتردتش عليه ليه. شكلك زعلان علشان ما عرفتش تجمع حق العملية مش مهم المهم انك معايا
عمار بجحود
بس انا عندي ظروف غير اللي انتي بتقوليها دي
رمضان
انت مالك بتتكلم معانا وانت قرفان كدة
عمار بحدة
قمر احنا مش هاننفع نكمل
فتبص له قمر باستغراب شديد وتقول
انت بتقول أيه
عمار بقسوة
بقول اللي سمعتي
قمر
ليه ايه اللي حصل
رمضان وهو بيبص لقمر ويقول
خلصت يا قمر بعد الكلام ده ما يتقالش ليه
ويمسكها من ايدها لكن قمر تبص ل رمضان وتقول
استني بس.
وبصت ل عمار وقالت
مالك يا عمار
لكن عمار ما يردش وفهمت قمر فقالت ودموعها علي خدها
فهمت. لما تشوف عمار اللي حبني وانا حبيته قول له قمر بتقول لك شكرا. علي انك عرفت تبقي ندل معها زي الدنيا
وبصت لاخوها وقالت
يلا يا رمضان
وتبص قمر ل عمار وتعيط وعمار يبعد عيونه عن عيونها ويقف وراء منه ابوه ويقول
بكرة هتفرح كام دقيقة لما وشك يرجع زي الاول. لكن عمر قلبك ما هيلاقي اللي ضيعته من ايدك.
بص له عمار وقال وهو قلبه بيتقطع
انا عايز ارجع زي ما كنت. من حقي اعيش من غير ما حد يشوفني ويخاف من شكلي
جمعه
عارف انك بعد العملية انت اللي هتخاف من شكلك
استغرب عمار فكمل جمعه وقال
كل ما هتبص في المرايا وتشوف وشك اللي رجع زي ما كان هتفتكر قمر وهتخاف من نفسك اوي وهتشوف قد اية انت كنت وحش. وتتمني ترجع تاني وشك محروق بس تبقي راضي عن نفسك. ،،،،،،،،،،
ومن جوة ميكروباص يقعد رمضان جنب قمر وفي طريقهم للرجوع لبيتهم فيبص رمضان ل قمر الذي كانت دموعها علي خدها وتفتكر كلام عمار. ليها وكل حاجة حلوة عملها معها وتسال نفسها
معقوله دة عمار اللي حبيته علشان خاطر تعبانه يسيبني دة انا ممكن اكون بعيش اخر كام يوم ليا يحرمني منه. لية بس لية يا عمار
حس بيها رمضان ومسح دموعها اللي علي خدها ومسك خدها وقال بهزار
ايه ده انتي نافخه خدك فين
فتبتسم قمر ابتسامه المر وتقول
هو انا لاقيه اكل علشان انفخ خدودي
رمضان
حقك عليه انا السبب كان لازم اكون راجل معاكي وماخلكيش تدوري برة عن اللي اتحرمتي منه جوة
فتبص له ست طخينة كانت قاعدة جنب منه ولابسة عباية سوداء وضحكت كدة ضحكة. معنها الله يرحم الرجاله فهمها رمضان وبص لها وقال
لا. اوعي تفهمي غلط انا راجل فعلا ودي اختي مش مراتي
فتبتسم المراه وتبص الناحيه التانية فيقول رمضان
ايوا بقي. هو الشيطان عندكم بيقعد في اني اوضة
فتضحك الست وهي بتبص له من تحت لتحت فتقول قمر
رمضان لاحظ اني انا معاك
فيبص رمضان ل قمر ويقول
هو انتي لسه هنا كنت بقول ايه بجد حقك عليه انا اسف بس من هنا ورايح انا هاكون انسان يتحمل المسئوليه وهاعمل المستحيل علشان اجيب لك فلوس العمليه وهاتعملي العمليه وهاتخفي ان شاء الله بس علشان خاطري اعملي نفسك نزلتي
قمر باستغراب
ليه
رمضان
علشان انا هاكمل كلامي مع الجمل
ويبص تاني للست الطخينة وقمر تضحك وهو يقول
وانتي بقي انسة ولا بنت بنوت
قمر وهي بتهز في دماغها
ما فيش فايده، ،، ،،
ويعدي كمان يوم ومن جوة اوضة عمار وبعد نص الليل يرن موبيل عمار ويرد قائلا وبفزع
يعني ايه ماتت قمر لسه عايشه انت كداب. فاهم كذاب
ويصحي من نومه وهو مفزوع لانة كان بيحلم ويقول
قمر،،،،،،،،
وتعدي الليله ويطلع النار ويروح حسان للعيادة يلاقي عمار بيقول للدكتور
من فضلك عايز استرد المبلغ اللي حضرتك خده. انا مش هعمل عمليات
ويسمعه حسان فيقول
عمار انت بتقول اية
عمار قال بحدة
هو ده اخر كلام عندي انا غلطان اني مشيت وراءك
حسان
يعني ايه
عمار
يعني لو في عملية هتتعمل فهتكون عملية قمر. انا مش هقدر اكمل حياتي من غير قمر
ويسيبة ويمشي ، ،،،،،،،،،
ومن جوة المستشفي المحجوزة فيها قمر كان عمار بيجري في الطرقا بتاعت المستشفي وفي ايدة شنطة الفلوس. وسال وعرف قمر محجوزة فين ووصل ليها وفرحت قمر اول ما شافته وهو جري ناحبتها وقعد قدام منها ومسك ايديها وباسها وقال
حقك عليه يا قمر عمري. انا جيت لك ومعايا الفلوس وهاتعملي العمليه ان شاء الله وهاتبقي كويسه
قمر وهي بتضحك
كنت عارفه انك جاي وكنت مراهنه نفسي اني مش هاهون عليك. حتي اسال رمضان
رمضان
بصراحة كانت واثقة فيك اوي
قمر
لا. يا بابا انا واثقة في نفسي
عمار
يا سلام عليك وانت واثق في نفسك
قمر بضحكة بسيطة
لا انا كنت واثقه فيك انت وعارفه ومتاكده اني اخترت صح وان ربنا راضي عني وبيراضيني بيك
عمار وهو بيبوس ايدها مره تانية
وانا كمان اخترت صح اللي احبها. عموما انا فلوس العمليه معايا وهاروح للدكتوره وهاتفق معها علي كل حاجه وهاخليها تعمل لك العمليه في اسرع وقت
قمر
بس احنا لو اتجوزنا انا مش هخلف خالص
عمار
انتي هتكوني بنتي ومراني وصاحبتي
قمر
انت كدة بضحي بانك تبقي اب
عمار
وانا معاكي هبقي ابوكي
رمضان
لا يا اخي بعد الشر عليك من انك تبقي صبحي
فبضحكوا الاثنين. ففال رمضان
بس والله رغم انه صبحي لكن واحشني.
عمار
باذن الله نفوق من عملية قمر وبعد كدة نقوق له
فتضحك قمر وتقول
ولو قولت لك ان ما فيش عمليات هتتعمل
عمار باستغراب
ازاي
قمر
انا ما طلعش عندي سرطان الرحم دة كان فيرس نادر شوية اتنقل لي عن طريق زبونة سبب لي التهابات شديدة في الرحم كانت السبب في كل اللي حصل لي دة
عمار بفرحة شديدة
بجد. اومال لية الدكتورة اول مرة قالت سرطان
قمر
تشخيص غلط. لكن في واحدة اسمها لميس من المنصورة معرفة عم زلطة
هنا رمضان قال بفشخرة
صاحبي زلطة دة.
عمار وهو بيبص ل قمر باهتمام
هه كملي. لميس بقي معرفة عم زلطة دي
رمضان قال بفشخرة
صاحبي زلطة دة
عمار بزهق
يا عم ابوس ايدك. عرفنا انك صاحب زلطة. خليني افهم
قمر قالت
لميس بقي ليها صاحبة من المنطقة اخوها يبقي استشاري كبير في معهد الاورام شافت رمضان وهو بيحكي حكايتي. كلمته وعرفته حالتي وهو قرر انه يعملي العملية ببلاش لوجه الله جه شاف التحاليل والاشعة اتاكد ان التشخيص غلط وانه فيرس هيروح بالعلاج وهرجع زي الاول باذن الله
عمار
يا مانت كريم يا رب. طيب مش عايزا تعرفي انا ماكنتش عايز ارد عليكي ليه. ولية بعد عنك
قمر
مش عايزا اعرف حاجه المهم انك معايا دلوقتي
عمار
انت ازاي كده
قمر
كده اللي هو ايه
عمار
متسامحه اوي معايا مع اني كنت، ،،
قمر مقاطعه له كلامه
بلاش تقولي حاجه تزعلني منك انا ياما الدنيا دقت علي دماغي كتبر وما زعلتش منها. هاتبجي عليك انت، ،،،،،،
وعديت الايام. وقمر خفت وعمار عمل العملية. ورجع وشة زي الاول. وصبحي اتحكم عليه ب 5 سنين. قضية شروع في قتل. زعلت قمر لكن صبحي طلب من عمار انه لو لسة عايز قمر يتجوزها وميستناش خروجة من السجن. فقالت قمر
عمار لسة في رابعة وبعدها سنة جيش وبعد الجيش هيشتغل بعني هيبقي عدي 3 سنين من الخمسة. هستناك تبقي وكيلي.
صبحي
يا بنتي افرحي
قمر
فرحتي هتبقي ناقصة من غبرك. اخرج لنا انت بس بالسلامة
صبحي
الحمل هيبقي تقيل عليكي اوي يا قمر
قمر
معايا ربنا. وعمار واخويا رمضان. اخرج لينا انت بس بالسلامة. ،،،،،،،،
وتعدي السنين وقمر حالها بقي احسن بعد ما رمضان انصلح حاله وبدأ يشتغل ويصرف علي البيت وبطل المخدرات. وقطع علاقته نهائي بشله السوء ورجع فلوس عم زلطة. وخطب لميس. وطلع صبحي من السجن واتعمل فرح عمار وقمر. ورمضان ولميس في يوم واحد. وربنا وسع رزق عمار اللي اشتغل في البترول. وعرف يسحب معه رمضان. وبدأت دموع قمر تنزل من الفرحة. وكمان الشاورمة بقيت ديما عندها في البيت. وصبحي سوي معاشة وقعد علي باب البيت الكرة اللي تيجي قصاده من العيال اللي بيلعبوا في الشارع يفسيها وارجع واقول صدق ربي لما قال
★ فأن مع العسر يسر ★
ربنا يفرح قلب كل محروم. ويكسي جسم كل عريان. ويكفينا واياكم. الفقر. والحرمان
النهايه
يارب تكون القصه عجبتكم
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
جميع الروايات كامله من هنا 👇 ❤️ 👇
اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇
❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺
تعليقات
إرسال تعليق