رواية الحب كما ينبغي الفصل الاول والثاني بقلم الكاتبه فاطمه محمد حصريه وجديده على مدونة النجم المتوهج
رواية الحب كما ينبغي الفصل الاول والثاني بقلم الكاتبه فاطمه محمد حصريه وجديده على مدونة النجم المتوهج
داخل إحدى الغرف التي يدوي بداخلها رنين المنبه كي يُقظ صاحبه.
استيقظ الشاب على صوته وسرعان ما اغلقه ونهض من نومه بطريقة آلية، وكأنه إنسان آلي وليس بشر، يطمع ويطمح بالنوم أكثر، خاصة إذا كان اليوم هو عطلته.
هب عن الفراش، ولامست قدميه الأرض وقبل أن يخطو أي خطوات أضافية ويبتعد عن فراشه كان يرتبه بذات الطريقة الذي استيقظ بها.
لحظات وكان ينتهي من أمر فراشه، متحركًا نحو الخزانة مخرجًا ملابس له ثم أوصدها بهدوء وتحرك قاصدًا دورة المياه.
دقائق فقط وكان يخرج متقدمًا من التسريحة ملتقطًا قنينة عطره المفضل لينثر القليل عليه، ثم عاود إغلاقها و وضعها مثلما كانت تمامًا.
منطلقًا من حجرته متجهًا نحو المطبخ كي يعد له فنجانًا من القهوة السادة والذي أيضًا اعتاد عليها.
منتهزًا تلك الحالة من السكون والصمت التي تعم أرجاء المنزل ولن تكون متوفرة بعد وقت قليل وبمجرد استيقاظهم، راغبًا في الجلوس بحديقة المنزل واستنشاق الهواء، وارتشاف قهوته بتمزج مستمعًا بهذا الهدوء.
وهذا ما حدث معه وظل جالسًا دون أن يشعر بالوقت، أو حتى يدركه..فقط ما يدركه ويتمناه أن يظل بهذا الهدوء والسلام بعيدًا عن عائلته الكبيرة من والدين والده، واعمامه و زوجاتهم، وابنائهم فالجميع يعيش معًا وتحت سقف واحد.
أخذ نفسًا عميقًا ثم اطلقه بهدوء، وسارع بترك مكانه وبدأ بالسير واضعًا يديه داخل جيب سرواله.
وعلى حين غرة ظهر أمامه جده مروان (والد والدته) والذي يقبع بالمنزل المقابل مباشرة، صارخًا بوجهه وكأنه قد مسك به بجرم مشهود:
-أنت مين يالا؟؟!
طرح "مروان" سؤاله بأعين قد ضاقت شكًا، وقبل أن يأخذ جوابه كان يخمن متابعًا:
-أنت أكيد حرامي وجاي تسرق البيت، بس على مين قفشتك خلاص، يا ناس حرامي، جاي يسرقنا في عز النهار..
أوصد الشاب جفونه بنفاذ صبر محاولًا قدر الإمكان التحكم بذاته وبأعصابه، واضعًا يديه على يده التي تقبض على ملابسه وتسببت في انكماشها، قائلًا من بين أسنانه:
-حرامي مين بس، ارحم اللي خلفوني يا جدو، أنا مش حرامي، أنا صابر ابن بنتك.
ارتفع حاجبي "مروان" ورفض تركه، متمتم بإصرار وسخط:
-يخربيت بجاحتك، بنتي مين، أنا معنديش بنات يا أخويا، أنا اصلا لسة متجوزتش ومخلفتش، عرفت أنك كداب.
نفذ صبره وقال بنبرة غاضبة:
-طيب أنا حرامي، وكداب، وسبني بقى عشان قربت أفقد اعصابي وأنا لما بفقد أعصابي مبشوفش قدامي وممكن اتغابى، وأنا مش عايز اعمل كدة احترامًا ليك، ولأمي وأنك جدي ومينفعش اعمل معاك كدة نهائي.
-جدك مين يا حيوان، بقى أنا جدك يا شحط يا بغل أنت.
-يا مصبر الوحش على الجحش.
اتسعت عين مروان وصاح:
-أنا جحش ياض؟؟
-لا أنا اللي وحش، اوعي بقى يا جدو عشان صدقني مش عايز اتغابى عليك ومراعي حالتك.
-شوف برضو هيقولي جدو.
بتلك اللحظة خرج "أحمد" من المنزل وهو يدندن ويقفز بطريقة بلهاء، ولكنه توقف عن الدندنة ما أن التقطت عينيه ما يحدث بين شقيقه التوأم وجده "مروان" والد والدته، والذي يعاني من الزهايمر.
ارتفع حاجبيه وقال مندفعًا نحوهم:
-احيييه سيبه يا جدو.
وقف قبالتهم وهو يحاول الفصال بينهم متمتم:
-في ايه يا جدو، ماذا حدث؟ ماذا فعلت يا أخي تحدث؟
-يا عم متعصبنيش أنت كمان، أنا مهببتش حاجة هو اللي مسك فيا وانا كل ده صابر وحاطط جزمة في بُقي.
علق احمد وهو يهز كتفيه:
-ما لازم تبقى صابر ما أنت أسمك صابر، بقولك إيه يا جدو بعد إذن حضرتك يعني لو مفيهاش إساءة أدب ممكن تسيب اخي، وتفلته من قبضتك، أحسن يرفع ايده علينا وايده اصلا مزربة، ممكن؟
انعقد حاجبي مروان وبدلًا ما كان يمسك بتلابيب واحد فقط، بات ممسكًا بالاثنان مغمغم بشراسة وهو يهزهم بعنف:
-أنت مين أنت كمان، اكيد شريكه في السرقة.
-سرقة ايه بس صلي على النبي كدة، أنا أحمد ابن بنتك ثراء.
ارتفع حاجبيه ورمق الاثنان ثم قال مستنكرًا:
-انتوا إيه حكايتكم بضبط هو كل ما همسك واحد هيقولي أنا ابن ثراء؟؟؟
رد عليه أحمد يؤكد له:
-ما هي دي الحقيقة، انا هفكرك، ده صابر وأنا أحمد اخوه الكبير، اكبر منه بخمس دقايق بحالهم، ولاد بنتك ثراء، ها افتكرت؟
ارتخت قسمات مروان وصاح بترقب:
-أنتوا ولاد جابر؟؟
تنهد أحمد براحة وقال:
-خمسة عليك يا جدي، ها هي الذاكرة تعود، افلتني بقى، أنا لست متفرغًا و ورايا مشاغل بالكوم.
هزهم مروان من جديد متمتم بغضب كبير:
-برضو هيقولي جدي.
هنا ونفخ صابر وقال بنبرة قوية:
-استغفر الله العظيم يارب، ما تسبني بقى يا جدي، عشان بجد زهقت من موال كل كام يوم ده، واعصابي هتفلت.
اتسعت عين أحمد وصاح معترضًا:
-عيب ياض ده جدنا، ولازم نحترمه، ونستحمله وبعدين متتعصبش العصبية مش حلوة عشانك واخاف عليك من كترها يطقلك عرق.
لم يصمت صابر وعقب على كلماته بذات النبرة القوية:
-اقسم بالله يا أحمد همد ايدي عليك وهعملك كيس ملاكمة.
التوى ثغر احمد وعلق بأسف:
-واطي وتعملها يا خسارة الإخوة، عايز تضرب أخوك الكبير، لا بجد يا خسارة، فينك ياما تيجي تشوفي وتسمعي ابنك الصغير وهو بيقل أدبه وعايز يضرب اخوه الكبير.
-أنت هتصدق نفسك يالا، خمس دقايق إيه دول اللي هيعملوك كبير، اتوكس بدل ما اجيبك تحت رجلي افعصك.
-تفعصني ليه يسطا هل أنا طماطم أمامك؟
تلك المرة هزهم مروان بقوة مضاعفة لم تؤثر بصابر، وتسببت في ترنح أحمد نظرًا لضعف بنيته مقارنة مع شقيقه ذو الجسد الرياضي.
-انتوا هتحكوا قاعدين على المصطبة انتوا، تعالوا معايا أنا هبلغ البوليس يجي يقبض عليكم.
أجابه أحمد بحسرة:
-بوليس ايه بس يا جدو استهدى بالله، وبصلنا كويس كدة احنا ولاد ثراء بنتك وربنا، ما تعمل حاجة يا صابر بعضلاتك اللي مش باينلها أول من آخر دي، أوعى ياض تكون نفخهم ولا بتاخد حاجة كدة ولا كدة والله أقول لـ أبوك وأعمامك وجدك، بس مش جدك ده لا جدك سلطان على سنح ورمح......
صر صابر على أسنانه وتمتم بغل ونفاذ صبر:
-نافخ ايه ارحمني واخرس بدل ما امسكك وانفخ فيك أنا وأنت سبني بقى يا جدو، انا كنت قاعد في روقان ومبسوط بتعكنن عليا ليه بس؟
رفض مروان تركهم وبدأ بالتحرك بهم جبرًا نحو باب المنزل، مغمغم بشراسة:
-جدو في عينك، ومش سايبكم، لازم ابلغ عنكم يا شوية حرامية، القانون لازم ياخد مجراه.
أنهى كلماته واقفًا محله، مطالعًا المنزل الذي يقف أمامه، ضيق عينيه بدهشة ثم تساءل:
-ايه البيت ده؟؟ ده مش بيتنا؟؟
رد عليه أحمد يؤكد له:
-أيوة فعلا مش بيتك أنت ده بيتنا إحنا، بيت سلطان و ولاده و أحفاده، أما بيتك أنت بقى فهناك في وش البيت ده.
وبحركة مباغتة استطاع صابر نفض يد مروان عنه، مهندمًا ملابسه بضيق واضح و قسمات مظلمة تعكس مدى غضبه.
اتسعت عين مروان، ودنا منه مرة أخرى كي يمسك به ولا يجعله يفلت من قبضته ويهرب بجريمته، فرفض صابر أن يتم الامساك به وبدأ بالابتعاد عنه متحركًا بخطوات سريعة داخل المنزل…
ومروان خلفه يلحق به وهو لايزال ممسكًا بـ أحمد الذي يتعثر ويرجوه:
-دي مش معاملة دي، لو عايز تمسح الأرض بهدومي قولي والله اقلعهم مش خسارة فيك، بس مش كدة أنت كدة مسحت بيا الأرض ومسحت بيا الأرض هنا مش كلام لا دي فعليًا.
اغلق صابر باب المنزل بوجهه مروان قبل أن يلحق به للداخل فاتسعت عين مروان من فعلته و وقاحته، وقبل أن يبدي أي رد فعل كان أحمد يخرج له المفتاح ويمد يده له، قائلًا:
-اتفضل يا جدو المفتاح اهو، سبني بقى.
انتشل المفتاح من يده هاتفًا:
-كمان معاكم المفاتيح يا شوية حرامية.
-حرامية صحاب بيت بقى معلش، مبنحبش نخشلكم لا من شباك ولا من سور من الباب علطول، إحنا ناس دوغري.
فتح مروان الباب وهو يصيح بعلو صوته بحثًا عن ذلك اللص:
-أنت فين يا حرامي يا بن الحرامي، شريكك في أيدي وهيعترف عليك بكل حاجة وهجيبك يعني هجيبك هتروح مني فين يعني؟؟؟
صاح أحمد بنبرة مشابهة:
-اه هتروح فين يعني هتجاب يعني هتجاب، بقولك ايه يا جدو ممكن توطي صوتك شوية محدش لسة صحي.
-اوطي صوتي ايه، ده أنا هفرج عليكم أمه لا إله إلا الله، وهجيب عيال صغيرة يزفوكم ويجروا وراكم ويقولوا الحرامية اهم الحرامية اهم..بس لما اقفش شريكك هو فين؟؟
رفع أحمد يديه وأشار نحو الأعلى يخبره:
-أكيد في اوضته، و اوضته فوق، بس خلي بالك ده عصبي وعيل بارد وتنح هتقولي ازاي عصبي وبارد مع بعض هقولك معرفش أمر ربنا.
-أنت هتحكي معايا ياض هتصاحبني، بينا نطلعله نمسكه.
وقبل أن يتحرك كان "جابر" يهبط الدرج بهدوء و ببطء شديد، قائلًا بدهشة:
-حمايا العزيز؟ ماذا تفعل هنا في الصباح الباكر؟ هل رأيتنا في الحلم أم ماذا؟
انعقد حاجبي مروان ومال على أحمد يسأله بهمس:
-مين ده؟ شريكم؟
نفى أحمد برأسه مجيبًا إياه بهمس مماثل له:
-لا أبونا، وجوز بنتك اتجوزها زمان رغمًا عن أنفك، عشان كدة أنت مش بتقبله ولا بتقبلنا.
ارتخت قسمات مروان وعاد ينظر نحو جابر ثم إلى أحمد وعلى الفور ضاقت عينيه وصاح متذكرًا:
-ده جابر صح؟
-ازغرط أيوة هو، امسك فيه هو بقى، أنا مليش ذنب في عملته المهببة مش أنا اللي قولتله يتجوز ماما وأنت مش بطيقه.
وبالفعل حرره مروان واستبدله بجابر الذي سرعان ما قال مازحًا:
-آه هو الزهايمر اشتغل تاني، لا بص مش هتخانق معاك لو قولت ايه وعملت ايه، أنا فوض أمري إلى الله.
********************
بالأعلى، خرج "يوسف" من غرفته موصدًا الباب خلفه بهدوء شديد، وعلى الفور انعقد حاجبيه مستمعًا لتلك الاصوات التي تأتي من الأسفل.
رفع يديه معدلًا من وضع نظارته الطبيه العريضة والتي تخفي الكثير من ملامحه واعتاد على ارتدائها منذ أن كان صغير لضعف بصره، متقدمًا بحذر من الدرج كي يرى من أعلاه ما يحدث، وأثناء فعله لهذا ظهر "أحمد" أمامه من العدم.
اوقفه يوسف يستفسر منه:
-في إيه يا أحمد؟
-هيكون إيه يعني يا أخويا أبويا وجدي بيتخانقوا يعني مفيش جديد، وقبلها مسك فيا وفي صابر ومصمم أننا حرامية.
ابتسم يوسف قائلًا:
-طب أرجع الاوضة لحد ما الخناقة دي تخلص ولا إيه النظام؟
-يا عم اعمل اللي تعمله، سبني بقى و وسع كدة أنا ورايا مشاغل بالكوم.
أفصح يوسف له المجال كي يمر، وبعد مروره ظل هو واقفًا مكانه يفكر فيما عليه فعله فالطالما كان هادئًا، حنونًا، محبًا للهدوء.
حسم آمر وقرر إيقاظ أبناء أعمامه، فارق مكانه ثم تقدم من أقرب حجرة إليه.
وقف أمامها وطرق على الباب يطلب الأذن بالدخول:
-آسر..آسر ممكن ادخل.
فتح أحمد باب غرفته فتحة صغيرة وطل برأسه فقط يجيب على استفسار يوسف والذي نما إليه بأسلوب مرح فكاهي:
-نايم يسطا نايم هيرد عليك ازاي، خش علطول أنت لسة هتخبط !
اعترض يوسف وقال بتوتر بسيط:
-لا طبعا مينفعش ادخل غير لما يقولي، في حاجة اسمها احترام خصوصية البني آدمين.
ارتفع حاجبي أحمد وعلق ساخرًا:
-صح مينفعش تدخل وهو نايم، عشان لو عملت كدة يبقى بتقتحم خصوصيته ويمكن مخدته ولا دولابه مش مغطين وشهم وهما مبيكشفوش على رجالة غير آسر، واد يا يوسف متشلنيش خش ياض وشوف كنت داخله ليه.
أوصد الباب في وجهه تاركًا إياه في حيرة من آمره.
لحظات وكان يوسف يفتح الباب بحذر شديد ويدخل رأسه فقط، ينادي عليه بصوت خافض:
-آسر، آسر.
سقط بصره عليه ممددًا على الفراش ويذهب في سبات عميق.
لازم الصمت ودخل مغلق الباب خلفه، مقتربًا من الفراش يهزه برفق مناديًا عليه:
-آسر، يلا اصحى، يا آسر.
فتح "آسر" عين واحدة يجيبه بصوت متحشرج ناعس:
-اصحى ليه؟ انا نايم وش الصبح، سبني شوية، اقولك لف لفة على الباقي وابقى ارجعلي أو مترجعش وصدقني هحبك فوق الحب حب.
جلس يوسف على طرف الفراش يلقي عليه حديثه ونصائحه الذين أطلقوا عليها إسم "محاضرة".
-وليه تنام وش الصبح، أي بني آدم المفروض ينام بدري، ويصحى بدري، النوم بدري مفيد والصحيان بدري برضو مفيد، وبليل اتعمل عشان ننام، والنهار عشان نمارس حياتنا و أنشطتنا، يعني اللي بتعمله ده ضد الطبيعة وضد الفطرة.
فتح آسر عينيه واجابه بلامبالاه:
-متحبكهاش الله يكرمك، وسبني نايم، روح شوف فريد ولا أحمد ولا محمد، اقولك روح لصابر.
بتلك اللحظة دوى رنين هاتفه الموضوع أعلى الكومود، فمد يديه وانتشل الهاتف مجيبًا عليه تحت متابعة يوسف له:
"صباح التوت يا قمر يا كيوت."
لانت قسمات يوسف وبدأ عليه الانهماك بطريقة حديث إن عمه مع الفتاة.
وظل على تلك الحالة حتى انتبه لاتفاقه معها على المقابلة اليوم.
فهتف بصوت هامس:
-آسر مش هينفع تخرج انهاردة، انهاردة اليوم عائلي، قولها حرام عشان متفضلش مستنية وفي الاخر متعرفش تروحلها.
رفع أسر يديه و وضعها أمام ثغره يحثه على التزام الصمت، منهيًا حديثه مع الفتاة بوعد بلقائها اليوم.
وما أن اغلق معها حتى صاح وهو يهب عن الفراش:
-أنت عبيط يا يوسف هو أنت فاكرني هقابلها بجد، دول كلمتين عشان تحل عن دماغي، انا أصلا زهقت وبفكر اخلع منها، فكرالي نفسها امي، عايزة كل يوم تصحيني قبل ما تروح المدرسة، ده غير بقى الاسطوانة الحمضانة بتاعة انت فين بتعمل إيه، مع مين، فطرت ولا لسة، اتغديت ولا لسة، اتعشيت ولا لسة، وحاجة آخر تلزيق.
اتسعت عين يوسف وهتف مستنكرًا:
-مدرسة ايه !!! انت بتحب عيلة لسة في مدرسة يا آسر، و يا ترى هي في ابتدائي ولا إعدادي؟؟
رد عليه آسر قبل أن يغلق باب دورة المياه بوجهه:
-لا لسة في الحضانة يا ظريف.
جحظت عين "يوسف" مردد مع ذاته بصدمة من حديثه الذي صدقه بالفعل:
-حضانة !!! بتكلم واحدة في حضانة، ودي لما لما تيجي تجوزها هتستناها كام سنة دي ؟؟؟
****************
-فريد، فريد، الحق آسر ابن عمك بيكلم واحدة لسة في حضانة، يا فريد اصحى شوف المصيبة، آسر بيكلم بنت صغيرة لسة في الحضانة.
القى يوسف كلماته على مسامع فريد المُمدد على ظهره ولايزال نائمًا، يهزه بصدمة تليح على وجهه.
فتح فريد عينيه مفزوعًا، ثم قال:
-في إيه يا عم، حد يصحي حد كدة..
-مش وقته، بقولك آسر بيكلم واحدة لسة في حضانة.
هب فريد من نومته بصعوبة لوزنه الزائد، فهو يعاني من السمنة، والتي جعلته أقل وسامة مقارنة مع البقية.
أسند ظهره بظهر الفراش، مغمغم:
-حضانة مين يا ابني أنت عبيط؟؟
-صدقني هو قالي كدة، أنا مش كداب.
زفر فريد واضعًا يديه على كتفيه، موضحًا له مدركًا طيبته وبلاهته الزائدة المبالغ بها والتي تجعله يصدق أي شيء يقال، غير قادرًا على تمييز الحقيقة من السخرية.
-يوسف يا حبيبي هتلاقيه بيشتغلك، الكلام اللي بتقوله ده هبل ومستحيل، أنت لازم تبطل هبل ومش أي حاجة تتقالك تصدقها، وبعدين بالعقل كدة في حضانة دي يعني عيلة لسة بيبي لا تفقه شيء في الحياة، وبعدين اللي أعرفه أن اللي بيكلمها في ثانوية عامة وتبقى صاحبة البت اللي قصي بيكلمها.
-وأنت عرفت منين الكلام ده؟
-هيكون من مين يعني أكيد أحمد يعني، هو ده بيتبلى في بُقه فولة أصلا؟
*************************
داهم "أحمد" غرفة شقيقه صابر، والجًا الغرفة بأعين تجوب بها بعدم أعجاب من تنظيمها وترتيبها بهذا الشكل الذي لايتناسب مع كونه شابًا، فمن يراها قد يظنها تعود لفتاة عاشقة للنظافة وترتيب حجرتها، قائلًا بصوت عالي وصل إلى صابر الواقف داخل الشرفة المفتوحة على مصراعيها:
-مبسوط أنت وأنت قاعد في اوضة لوحدك بعيد عن توأمك الكبير، لا حقيقي اخص، لا ومش اخص واحدة لا دي مليون اخص، مليون اخص على شقيق ظننته يحبني واعتدت عليه، وحين اولته ظهري طعنني وانتقل لغرفة أخرى تاركًا أخيه خلفه وحيدًا.
التفت إليه صابر وطالعه من خلف الستائر البيضاء الشفافة، يجيبه بسخرية ممزوجه ببروده المعتاد منه:
-أنت مش ناوي تنسى بقى وتبطل تكلم في الموضوع ده، انا سايبلك الاوضة من سنين، من وأحنا لسة عيال صغيرة، وأنت عارف كويس ليه، وياريت تبطل تعيد وتزيد في الموضوع ده، عشان خلاص زهقت، ولو فتحته قدامي تاني هيصدر مني رد فعل مش هيعجبك ولا هيعجب حد.
ارتفع حاجبي أحمد ورد عليه وهو يقترب بهدوء محاولًا تقليد طريقته بالحديث، مجيب عليه بذات الطريقة الباردة:
-ده أنت بتهددني بقى !! أنت متعرفش اني مبتهددش، مش أحمد جابر سلطان اللي يتهدد، أنا بهدد وبس يا شبح.
تحرك صابر خطوة واحدة كي يقترب منه ويعلق على كلماته وربما يتطاول عليه بيديه، لولا فزع الآخر وتحول قسماته ونبرته من بادرة إلى أخرى مفزوعة، عائدًا بادراجه نحو الخارج ولسانه لا يردد إلا تلك الكلمات:
-خلاص بهزر، بهزر وربنا يخربيت اللي يهزر معاك يا جدع.
ظل صابر يتابع خروجه بل وصفعه للباب من خلفه بتعابير جامدة وكأنه إنسان آلي خالي من المشاعر.
أما بالخارج فقد تعثر أحمد بتلك السجادة الطويلة الموضوعة بطول الطرقة وأمام أبواب الغرف وما كاد يعتدل ويهندم ذاته ويستجمع شتاته حتى صدح صوت ضحكات أنثوية من خلفه، يحفظها عن ظهر قلب.
استدار ببطء يطالع صاحبة الضحكات، مستمعًا لسؤالها المشاغب:
-مالك يا أحمد، صابر مد أيده عليك ولا ايه؟؟
وباندفاع رد يدافع عن نفسه:
-مين ده اللي يمد ايده عليا، لا عاش ولا كان اللي يعمل كدة ولو حد فكر يعملها اقطعله أيده قبلها يا مجنونة أنتِ.
ضاقت عينيها وظلت ترمقه بنظرات متفرسة، جعلت الأخر يقترب منها ممسكًا بيديها يرجوها بهمس:
-استري على اخوكي الكبير، ومتقوليش لحد شكلي هيبقى زبالة يا زهر، يرضيكي اخوكي منظره يبقى زبالة قدام العيلة؟
ردت عليه زهر، شقيقتهم الصغرى والتي تصغرهم بعام واحد فقط:
-لا يا حبيبي متخافش أنت كدة كدة شكلك زبالة من غير حاجة، وكلهم عارفين صابر و وسام بيعملوا فيك إيه وانك مبتعرفش تعمل معاهم حاجة، يعني أنا مش لسة هعرفهم هما عارفين اصلا.
ابتلع ريقه على ذكر "وسام" والذي يكبره بثماني سنوات ويكون ابن صديق والده، و زوج شقيقته بذات الوقت فقد عقد قرآنه عليها في حفل بسيط وقبل انتهائها من دراستها متفقين على أن يتم حفل الزفاف عقب تخرجها، ولكن هذا لم يحدث حتى الآن رغم تخرجها ونيل شهادتها فكلما اقترب الموعد تقم هي بتأجيله لأسباب غير منطقية بررها الجميع بأنه خوف ما يسبق الحياة الزوجية.
-وهما دول حد يعرف يعمل معاهم حاجة بأجسامهم دي، بس متخافيش يا بت بكرة هلعب في الجيم بتاع وسام واعمل عضلات أكبر من عضلاته هو وصابر، صحيح بقولك إيه.
-ايه قول؟؟
اقترب منها وعانق عنقها يهمس لها:
-هو أنتِ متاكدة من خطوة الجواز من وسام؟؟ يعني أنتِ قد القرار ده؟ وهتستحملي عواقبه؟؟ انا عارف أنه كاتب عليكي بس إحنا لسة فيها، ممكن نفركش قبل الفرح عادي، انا خايف عليكي صدقيني.
قطبت حاجبيها و سألته بدهشة:
-عواقب ايه مش فاهمة؟ ونفركش ليه !!
-عشان حمارة مش عارف هفضل افهم فيكي لحد امتى، ركزي معايا وافتحي ودانك، دلوقتي جوزك عامل زي الثور، فده لما هتعيشي معاه في بيت واحد وهتتخانقي معاه، هيبقى خطر عليكي، ولو مد أيده عليكي لقدر الله مش هنعرف نوقفله يا ماما، ومش بعيد نضرب معاكي.
وبهمس مماثل قالت ببسمة :
-لا متخافش وسام حنين ومش هيمد أيده عليا، ولو بعد الشر حصل، هبقى اوقفله صابر.
استحسن أحمد تلك الفكرة، وعلى الفور ابتعد قائلًا ببسمة واسعة:
-احبك وأنتِ بتفكري احنا نوقفهم قصاد بعض لحد ما يخلصوا على بعض ونرتاح منهم بدل الرعب اللي عملينه فينا ده، ألا هو هيجي امتى.
كادت بسمتها أن تختفي لكنها حافظت على تعابير وجهها مجيبة إياه بهدوء:
-مش عارفة كلمته اول ما صحيت بس مردش.
وقبل أن يعقب ويتفوه بأي شيء قالت وهي تهم بالعودة داخل حجرتها عازمة على الاتصال به مرة أخرى:
-بقولك إيه أنزل أنت وأنا هجرب اكلمه تاني.
على الطرف الآخر كان يتواجد حبيبها داخل غرفته المفضلة والأقرب إلى قلبه بالمنزل.
حيث تتواجد بها الأجهزة الرياضية والأوزان الثقيلة الذي كان يحملها ويمرن نفسه فلا يكفيه عمله بصالة الألعاب الرياضية الذي قام بفتحها ويعمل بها كمدرب.
مستمعًا للموسيقى مستمرًا في تدريبه رغم إرهاقه وشعوره بالألم وتصبب العرق من جسده.
إلا أنه لا يتوقف شاعرًا بالغضب يسيطر عليه ويتملك منه كليًا.
وبالطبع حبيبته السبب بتلك الحالة..
انفرج باب الغرفة ودخلت منه "أبرار" زوجة والده و وأم أخيه والذي لم يراها يومًا زوجة أب.
بل كانت أمًا له ولم تفرق يومًا بينه وبين ابنها الحقيقي.
اغلقت الموسيقى التي تصدح بالإرجاء مجبرة إياه على الإيقاف وترك الوزن الذي يحمله، قائلة:
-في إيه يا وسام؟؟؟
هز رأسه مجيبًا بسؤال آخر:
-في ايه يا ماما؟
تفرست النظر إليه ثم إجابته بهدوء:
-مالك؟ متخانق مع زهر ؟؟
-لا مش متخانق إحنا زي الفل وعشرة على عشرة.
ارتفع حاجبيها ثم قالت:
-طيب هعمل نفسي مصدقاك وهعمل نفسي معرفش أنك لما بتبقى متخانق معاها بتبقى بالمنظر ده وبتقعد تطلع غلك في الرياضة، ويلا ادخل خد شور عقبال ما احضر الفطار.
تركته ورحلت فظل ينظر أثرها، وبدون أن يشعر كان يكز على أسنانه ويلتقط هاتفه ويذهب تجاه غرفته وهو يعبث به..
وعلى الفور وجد مكالمات فائتة منها لم يسمعها بفضل الموسيقى.
شرد قليلًا يفكر فيما عليه فعله الآن، وبالنهاية قرر تجاهلها في هذا الوقت كي لا تزيد الأمور سوءًا ومحادثتها لاحقًا وحينما يهدأ.
***************
ولجت أبرار المطبخ كي تعد الفطار مثلما أخبرت وسام، وأثناء فعلها لهذا نادت بصوت عالى على ابنها التي سبق لها ايقاظه عدة مرات حتى الآن ولم ينهض بعد.
-واد يا قصي قوم ياض عشان زهقت، هبعتلك أخوك يجيبك من قفاك.
تناهى صوتها العالى إلى مسامع أبنها والذي كان يتحدث بالهاتف بهذا الوقت مع صديقته.
فلحق ذاته وكتم الصوت كي لا يصل صراخها إلى فتاته مجيبًا إياها:
-صحيت يا مامي، صحيت، وجاي اهو.
ثم عاد ملغيًا كتمه للصوت متحدثًا مع الفتاة:
-كنا بنقول ايه يا حبيبتي؟؟
ردت عليه بنعومة تتصنعها:
-كنا بنقول هتعدي عليا بكرة بعد المدرسة ومعاك آسر عشان هو كمان يشوف يارا.
-اه صح، قوليلي بقى تحبي نروح فين بكرة؟؟
وقبل أن يستمع لجوابها استمع لوالدته التي تنادي عليه مرة أخرى واستمعت أيضًا تلك المرة فتاته والتي تدعو "همسة".
صر على أسنانه وقال:
-جاي يا مامي جاي.
ابتسمت الفتاة وسألته بعفوية متعمدة:
-دي مامتك؟؟
استفزه سؤالها ورد عليها بسماجة:
-لا بابي وبقوله مامي، ايه السؤال ده يا همسة.
أطلقت ضحكة عالية ثم ردت:
-معلش معلش، يلا بقى روح شوف مامتك وأنا كمان هقعد اذاكر.
-ماشي، وهكلمك تاني لما اعرف أنتِ عارفة النهاردة الجمعة والعيلة بتتجمع، يلا سلام يا قلبي.
-سلام.
وما أن أغلق حتى وجد أبرار تردد بصياح مزعج:
-يا قصي بقى.
رد عليها بزهق وصوت عالي مماثل وهو يخرج من غرفته:
-ياما بقى، جاي ياما وربنا، دي مبقتش عيشة دي.
*******************
خرج "وسام" من دورة المياه، حاملًا بين يديه منشفة يمسح بها على رأسه وخصلاته شبه المنعدمة.
منتبهًا لهاتفه ولاسمها الذي يزين شاشته
"زهرتي".
أخذ نفسًا عميقًا يصارع كل ما يدور بداخله، مقررًا الإيجاب عليها.
"صباح الخير".
تراقص قلبها ما أن استمعت لصوته أخيرًا، قائلة:
"صباح النور يا وسام، فينك مش بترد عليا ليه؟ أنت زعلان مني؟"
ورغم إدراكها للحقيقة وإدراكها لصبره عليها وانتظاره لها الكثير من السنوات، إلا أنها سألته والقته بوجهه، مما جعله يجيب مستنكرًا:
"ازعل منك ليه؟؟ هو أنتِ بتعملي حاجة تزعل؟؟ ده كل ما في الأمر أني خطبتك بعد الثانوية العامة، وكتبت عليكي في إجازة نص السنة لسنة رابعة، والمفروض كنا نعمل الفرح بعد ما تخلصي علطول، واديكي خلصتي و الإجازة خلصت والسنة الدراسية الجديدة بدأت، وجاية امبارح تقوليلي نأجل تاني؟؟ لا تاني ايه قولي عاشر، ايه بقى اللي يزعل في كدة !! أنا مش زعلان خالص أنا مبسوط جدا ومنشكح كمان".
ابتلعت ريقها وانعقد لسانها لا تدري بما عليها أخباره فهي حتى لا تعترف مع ذاتها باسبابها الحقيقية التى تجعلها تؤجل موعد زواجهم.
استنكر هذا الصمت من طرفها فقال ساخطًا:
"أنتِ متصلة عشان تسكتي؟؟"
"لا يا وسام متصلة عشان اشوفك جاي امتى، ولما تيجي نتكلم مع بعض"
رفض هذا وقال دفعة واحدة وبنبرة غاضبة:
"مش جاي ومعنديش كلام معاكِ، والجوازة هتتأجل تاني زي ما طلبتي، ويارب تكوني مبسوطة"
انزعجت من رفضه المجئ فقالت محاولة الضغط عليه:
"يعني ايه مش جاي، أنا عايزة اشوفك، وصدقني مش هضايقك وهنتكلم ومش عايزة اغير ميعاد الفرح، كل حاجة هتفضل زي ما هي، بس تعالى نتكلم.
حل صمت بين الطرفين لم يقطعه سوى صوته المتألم مما تفعله به:
"افهم من كدة إيه؟؟ أنتِ بتلعبي بيا يعني؟؟ بتلعبي بمشاعري عشان عارفة أني بحبك من زمان، اسمعي يا زهر لو مش عايزاني قولي وخليكي دوغري بس متلعبيش بيا".
"أنت بتقول ايه مش عايزاك ازاي يعني، أنت عارف اني بحبك يا وسام، ومعرفتش طعم الحب غير معاك"
"مش بالكلام، بالأفعال، وأفعالك مش بتقول كدة، شوفي عايزة إيه وابقي بلغيني قرارك الأخير يا زهر".
*******************
حل المساء ولم يحضر وسام بالفعل مع عائلته، ولا يزال الجميع متواجد بمنزل سلطان فقد خصصا يوم الجمعة من كل أسبوع للتجمع، متشاركين مع بعض المزاح والضحكات، وبالطبع بعض الجدالات الطفيفة بين بعض أفراد العائلة.
وبعد بعض الوقت غادرت عائلة الحلواني..
وبعد ذهابهم مال "آسر" على أذن قصي والذي يكون الأقرب إليه لتشاركهم ذات الصفات:
-واد يا قصي ما تيجي نخرج بليل ونسهر سهرة صباحي من اللي قلبك يحبها.
خطف قصي النظرات نحو أفراد العائلة يسأله بخفوت:
-من اللي قلبي يحبها افهم من كدة أن فيها حريم؟
-أكيد ياض، ها ايه رأيك، دايس معايا؟
-دايس جدًا، دايس اوي.
وبحركة مباغتة كان يقف أحمد خلفهم ويدخل برأسه بينهم مسببًا فزعهم مردد :
-بتقولوا إيه يا جوز شياطين أنتوا؟؟؟
ابتلع قصي ريقه بينما لكزه آسر مردد بحنق:
-أنت مالك يا تنح !!!
أيده جابر وهز رأسه وهو يقول:
-صدقت يا ولدي، هو تنح فعلا، واتنح منه مشوفتش.
ابتسم أحمد بسمة واسعة مضيفًا:
-ولا هتشوف يا أبي، عشان هو أحمد واحد بس.
ثم عاد مرة أخرى بانظاره نحو آسر وقصي يستفسر منهم:
-مقولتوش برضو كنتوا بتقولوا إيه؟؟
تدخل جده "سلطان" قائلًا:
-الله !!! أنت مالك بيقولوا إيه ده أنت حشري اوي يالا، الخالق الناطق أبوك.
رمقه جابر بجانب عينيه متمتم بعتاب:
-أبي أرجوك لا تقل هذا بحضور الجميع.
هنا وتثاؤب "محمد" واضعًا يديه على فمه، مستأذنًا من الجميع:
-بعد أذنكم أنا بقى يا جماعة طالع أنام تصبحوا على خير.
قطب خليل والده حاجبيه وسأله:
-هتنام بدري كدة يا محمد؟
-ولا بدري ولا حاجة يا بابا، وبعدين أنا تعبان جدا ومحتاج انام، بس لو حضرتك عايزني اقعد معاكم شوية كمان ممكن اقعد عادي.
ابتسم خليل له ورفض هذا متمتم:
-لا يا حبيبي اطلع نام يلا.
استجاب محمد وصعد لغرفته، فقال جابر معلقًا أثناء صعوده، حادقًا بابنائه الاثنان أحمد وصابر:
-شايف ياض أنت وهو، شايفين الأدب والاحترام، ايكش تتعلموا؟؟
رفع صابر أنظاره الباردة وثبتها على والده، والذي ما انتبه إليها، حتى قال متراجعًا:
-بهزر على فكرة، أنت زي الفل، هو اللي مهزق وقليل رباية.
وبالطبع لم ينصت أحمد لأي من هذا ذاهبًا بذهنه وشروده مع ابن عمه الذي صعد للأعلى كي يذهب بسبات عميق.
فهو الوحيد الذي أدرك سره الصغير الذي يخفيه عن الجميع صدفة، مدركًا بأنه ليس بتلك البراءة والاحترام الذي يرسمه أمام الجميع، بل هو مخادع كبير……………………..
الحب كما ينبغي.
فاطمة محمد.
الفصل الثاني:
-ايه ياسطا نزلت؟؟
طرح "آسر" سؤاله على مسامع "قصي"عبر الهاتف وأثناء تسلله من غرفته بعد نوم الجميع، حارصًا على أن تكن نبرة صوته منخفضة.
رد عليه قصي نافيًا هذا:
-لسه، وسام صاحي وعمال يفرك ومستنيه يخش اوضته لو شافني هيقعد يحقق معايا ورايح فين ومش رايح فين وأنا مش عايز وجع دماغ.
وبذات النبرة المنخفضة هتف آسر، دون التوقف عن الحركة والهبوط إلى الاسفل متلفتًا حوله بقلق:
-ماشي، انا نازل أهو وهقعدي عليك ونكسب وقت، يلا سلام.
أغلق معه ثم دس هاتفه في جيب سرواله، وبتلك الأثناء وجد من يظهر أمامه من العدم مسببًا فزعه الذي أدى إلى فزع الآخر وعلو أصواتهم.
وما أن ادرك آسر هويته هدأ وسارع بكتم فمه، مغمغم:
-اخرس يخربيتك، ويخربيت معرفتك الهباب هتفضحني.
أصدر "يوسف" همهمات عكست محاولته للحديث وفشله بفضل يد ابن عمه.
ازال آسر يديه تدريجيًا فطرح يوسف سؤاله بدهشة:
-أنت رايح فين دلوقتي؟ مش كنت طالع تنام.
-لا منمتش وخارج مع قصي، وحذاري يا يوسف حذاري تقول لحد أنك شوفتني وإلا قسمًا بالله
قاطعه يوسف بعدما ابتلع ريقه، قائلًا:
-من غير حلفان أو تهديد أنا أصلا مشفتكش، آسر ابن عمي نايم فوق في اوضته، حضرتك مين؟؟
ابتسم آسر ورد عليه بأسلوب مشاكس:
-أنا الديب يالا.
وقبل أن يفارق محله، تراجع مقترحًا عليه:
-بقولك إيه ما تيجي معانا واهو تغير جو ، وتفك شوية بدل ما أنت قفل كدة.
على الفور هز يوسف رأسه يرفض هذا الاقتراح بشدة:
-لا طبعا، أنا مبسهرش وطالع اكمل نوم، انا أصلا مش زيك.
وبوقاحة غير متعمدة بل خرجت تلقائية رد عليه:
-متعرفش تبقى زيي، وبعدين أنا نسيت أنك مبتتحركش لمكان من غير ما تاخد إذن ماما وبابا يا نونو عشان لو عملت كدة ماما هتعاقبك.
غمز له مع قوله الأخيرة تاركًا إياه خلفه بملامح وجه تعبر عن حزنه، وما أوصلته إليه والدته من سوء معاملتها له ظنًا منها بأنها تحسن هكذا من تربيته.
بعد خروجه وتحركه نحو مكان سيارته المصفوفة، خرج أمامه "أحمد" على حين غرة متمتم بصوت عالي تلاها ضحكات عالية على رد فعله وخوفه وفزعه الشديد:
-بخ…
صرخ آسر عليه متناسيًا خروجه خلسة، وخوفه قبل قليل من أن يراه أحد ويدرك خروجه:
-هو في إيه النهاردة ، اخلص من واحد يطلعلي التاني، في ايه يالا، حد يخض حد كدة يا متخلف.
هز أحمد رأسه قائلًا بفخر:
-أجل هناك أحد يخض أحد آخر كدة والأحد ده أنا والأحد الآخر ده أنت، أما عن متخلف التي نعتني بها فسوف اتجاهلها قولي ليه بقى.
وقبل أن يجيب آسر كان أحمد يتابع بمرح:
-عشان الشتيمة بتلف تلف وترجع لصاحبها.
صر آسر على اسنانه وقال وهو يهم بالمغادرة:
-أنا مش هضيع وقتي أكتر من كدة معاك، الرد على أمثالك خسارة ومضيعة للوقت.
اوقفه أحمد متمتم:
-على فين العزم إن شاء الله؟ وايه الشياكة دي كلها ياض ، رايح فين قولي؟
-خليك في حالك يا أحمد.
كاد يتحرك آسر ليكرر الآخر فعلته ويمنعه مسترسلًا:
-خارج مع قصي مش كدة؟؟ مش بقولكم جوز شياطين، بقولك ايه من الآخر كدة مفيش خروج.
ارتفع حاجبي آسر مستنكرًا، وارتفع جانب شفتاه استهزاءًا، معلقًا:
-ومين بقى اللي هيمنعني ؟؟؟ أنت !!!
هز رأسه نافيًا مجيبًا ببساطة وبراءة لا تليق به وبكلماته:
-لا مش أنا أبوك، أو أقولك جدك سلطان، ولا اقولك بلاش كل دول اونكل خالد لو عرف اللي بتعملوه هيسيب عليكم وسام و وقتها مش بعيد يعملكم كيس ملاكمة، ويالهوي بقى لو صابر دخل معاه وكل واحد فيهم مسك واحد فيكم، بالله بعدها ما هتنفعوا، فـ ليه كل ده بقى وليه تخليني افتن عليك؟؟ أنت متعرفش أن الفتنة حرام !! وأشد من القتل ؟؟
-طب ما تقول لنفسك وتخليك في حالك وملكش دعوة إحنا بنعمل ايه.
-لا ما أنا بقولك أنت، ما أنت وهو اللي هتبقوا السبب أني ابقى فتان، وبعدين أنا عارف الأماكن اللي بترحوها، حرام ياض الأماكن دي واللي فيها مش شبهكم.
سحب آسر نفسًا عميقًا يكبح به غضبه وكلماته الذي يرغب بإخراجها والقائها بوجه أحمد الذي يتدخل بشؤنه وما لا يعنيه.
رفع أحمد يديه وربت على كتفيه يشجعه على العودة داخل المنزل:
-يلا ياض، ولو مش جايلك نوم تعالى نعمل أي حاجة، اقولك تعالى نشوفلنا فيلم كوميدي نتفرج عليه ، يلا.
-مش داخل يا أحمد ومش هتمنعنى.
ردد الأخيرة بقوة وهو يحسم أمره مقررًا الذهاب مهما حدث قاذفًا بحديث أحمد عرض الحائط.
راقبه أحمد أثناء صعوده سيارته بل وتدويره لها وقبل أن يتحرك كان يهتف بصوت عالي يشوبه قلة الحيلة:
-خلاص يبقى أنا كدة عملت اللي عليا، متزعلش من اللي هعمله دلوقتي بقى.
أولاه ظهره وبدأ يشق طريقه نحو المنزل مجددًا، فـ لاح الخوف على وجه آسر المناقض تمامًا لما كان يظهره من قوة وقرار حاسم.
تاركًا سيارته محاولًا اللحاق به متمتم بقلق:
-خلاص يالا مش رايح في حتة والله، خد ياض.
توقف أحمد وابتسامة عابثة تشق ثغره، ملتفتًا إليه متحدث بسعادة:
-حسنًا، هيا أمامي.
تحرك عدة خطوات عائدًا بادراجه داخل المنزل، وآسر من خلفه يرغب في بطحه بأي شيء لكن يكبح ذلك الشعور بصعوبة متوعدًا له.
ومن جديد توقف أحمد عن المسير يخبره بهمس:
-متنساش تكلم الشيطان التاني تقوله بح، فركش السهرة.
ومن بين أسنانه رد عليه وهو يخرج هاتفه عازمًا على الاتصال بـ قصي وأخباره بالغاء سهرتهم:
-طيب، ادخل بقى خليني أكلمه واطلع اتخمد ونخلص من أم الليلة دي.
****************
في صباح اليوم التالي، غادرت زهر منزلها باكرًا، قاصدة منزل حبيبها ومن كسرت بفؤاده بطلبها الذي يتكرر وتطرحه عليه للمرة الذي لا تدرك عددها.
وصلت قبالة المنزل وصفت السيارة ثم هبطت منها ودنت من الباب قارعة الجرس.
مترقبة فتح أحدهم لها، وكان لها هذا واستقبلتها أبرار بحفاوة بعدما فتحت لها، مشجعة إياها على الدخول.
-تعالي، أنتِ بنت حلال وجيتي في وقتك.
وعلى حين غره مالت على أذنيها تهمس لها بنبرة سريعة:
-وسام لسة مخرجش، وهيفرح أوي لما يشوفك بس مش هيبين ومش بعيد يقولك أنتِ ايه اللي جابك هنا، بس ولا تاخدي في بالك عشان ده أي كلام، والحقيقة أنه هيبقى طاير من الفرحة أنه شافك، وأنتِ اياكي تقولي كلام يعصب، خليكي دلوعة و رقيقة.
ابتسمت لها زهر قائلة بهمس مماثل:
-أنا كدة كدة رقيقة، بابا علطول يقولي أني زي بسكوت نواعم، رقيقة وناعمة.
وقبل أن تضيف أبرار أي كلمات أخرى، كان صوت وسام الذي خرج من غرفته مستعدًا للذهاب إلى صالة الألعاب الرياضية الخاصة به، يصل إليهم:
-أنتِ اللي جابك هنا؟؟؟؟
تبادلت أبرار و زهر النظرات وبصعوبة كانت زهر تمنع بسمتها من الارتسام على وجهها ، بينما حملقتها الأخرى بنظرات وكأنها تخبرها ألم أخبرك ؟؟؟
خرج صوت زهر، مجيبة على سؤاله بنبرة ناعمة :
-اللي جابني أنت ، أصلك مجتش امبارح ومشوفتكش حتى مكالماتي مكنتش بترد عليها، فقولت لا كدة كتير بصراحة ومش قادرة استحمل فأول ما صحيت خدت بعضي وقولت اجي اشوفك ، ايه مفرحتش أنك شوفتني ولا ايه.
عض على شفتيه من الداخل وقبل أن يعقب كان ينتبه إلى ما ترتديه، من بنطال من الجينز ضيقًا على ساقيها، اثار غضبه، وغيرته خاصة أنها ليست بالنحيفة، بل ذات جسد ممتلئ قليلًا.
جحظت عينيه وعلى الفور سارع بقذف حقيبته الذي كان يحملها على ظهره أرضًا، منطلقًا من مكانه كي ينال منها ويمسك بذراعيها:
-نهارك مش معدي يا بنت جابر، ايه اللي لبسك البنطلون ده، أنا مش قايلك عليه متلبسيهوش.
ارتعدت واندفعت هي الأخرى مختبئة خلف أبرار معقبة بدفاع وقلق:
-هو ده اللي أنت قولتلي عليه ملبسهوش تصدق مخدتش بالي، وبعدين هو مش باين أوي، ما أنا لبسة طويل عليه اهو.
صر على أسنانه، واقفًا أمام زوجة أبيه، صارخًا عليها بغضب يطلق من عينيه:
-أنتِ بتستعبطي ولا بتستهبلي ولا عايزة تجننيني ولا ايه حكايتك بضبط ، لبس ايه اللي طويل، هو البنطلون المحزق ده يمشي مع حجابك اللى على رأسك؟؟؟ مش المفروض يا هانم أنه لبسك يبقى واسع!؟؟ أبوكي وأخواتك شافوكي وأنتِ خارجة بالمنظر ده.
تدخلت أبرار أخيرًا و ربتت على صدره تهدأ من روعه:
-يا بني اهدا الله يباركلك كدة ممكن تبلعنا، البت لبسه طويل عليه اهو ملوش لازمه اللي أنت عاملة ده، وبعدين جاية تصالحك وتحلوا مشكلتكم بدخلها ليه في مشكلة تانية مش لما تحلوا الأولى ابقوا خشوا في التانية.
في تلك اللحظة خرج قصي على أصواتهم ، قائلًا بصوت ناعس وهو يغلق باب غرفته:
-جود مورنينج يا جماعة.
لم يجيب عليه أي حد، واسترسل وسام صراخه، هاتفًا:
-ردي على سؤالي أبوكي وأخواتك شافوكي وأنتِ خارجة بالبنطلون ده ؟؟؟
عقد قصي حاجبيه بعدم فهم، مطالعًا السروال الذي يتحدث عنه أخيه فلم يجد به أي شيء يجعله يغضب لهذا الحد، فقال هو الآخر مدافعًا عنها:
-ماله البنطلون ؟؟ هو باين اصلا؟؟
سارعت زهر بالحديث متمتمة:
-قوله يا قصي.
كاد يتحدث فالتفت إليه وسام صارخًا عليه هو الآخر بنبرة جعلت الآخر يهاب:
-ما أنت لازم تسأل، بقولك ايه اخرس خالص يالا.
هز قصي رأسه مبدلًا حديثه السابق:
-طب على فكرة بقى وسام معاه حق، ايه البنطلون ده؟؟؟ حد يلبس بنطلون جينز كدة وعليه بتاع طويل كدة؟؟ يعع بجد.
هتف الأخيرة باشمئزاز وقبل أن يضيف أي كلمة أخرى كان يركض خوفًا من وسام الذي أوشك على التحرك والنيل منه بل وصب غضبه عليه، عائدًا لغرفته مغلقًا الباب خلفه، مغمغم بتلك الكلمات:
-أنا ابن كلب أني خرجت من اوضتي اصلا، صحيح من خرج من داره اتقل مقداره.
ثم ركض نحو الفراش دافعًا جسده عليه وهو يقول بمرح:
-يا حبيبي يا داري، قصدي يا سريري.
بالخارج، طفح كيل أبرار مما يحدث ومن صراخه، فقالت وهي تتخلى عن زهر وتتركها في مواجهة هذا الأسد الثائر:
-لا معطلكوش بقى أنا ورايا حاجات في المطبخ بعملها، الراجل عايز ياكل أم علي من أيدي وسعوا كدة كتكم القرف، عيال غم.
ورغم استنجاد زهر بها إلا أنها سدت أذنيها ودخلت مطبخها..
بعد رحيلها، ابتلعت ريقها وحملقت بوسام الذي كف عن الصراخ وبدأ يقترب منها رويدًا رويدًا.
وبعفوية كان كلما اقترب منها خطوة تعود هي بها إلى الخلف وتبتعد عنه، قائلة:
-اقسم بالله نسيت أنك قايلي متلبسيهوش، بص انا مش جاية اتخانق معاك أصلا ، أنا جاية اقولك أني بحبك، وأني عايزة ابقى معاك، بس..بس.
كررت الأخيرة بتردد مما جعله يتوقف، فقد انتبه لكل حرف وكلمة تصدر منها.
متسائلًا بحاجب معقود:
-بس إيه ؟؟
-أنا مكنتش حبة نعمل الفرح وأنا مليانة كدة، وفي نفس الوقت مش عارفة امشي على نظام الدايت، بمشي أسبوع ولا اتنين وبعدين بلخبط تاني زي ما أنت عارف، مش بعرف امنع نفسي عن الأكل يا وسام وكمان فستان الفرح بيبقى منفوش ومنفوخ، وهيتخني أكتر ما أنا تخينة، وأنت ما شاء الله عليك يعني قمر، اصلا أي واحدة بتشوفك معايا بتستكترك عليا، وهما معاهم حق يعني، أنت أحلى مني و
لم يدعها تتابع، أوقفها واضعًا سبابته أمام شفتيها دون أن يلامسهما، مسببًا تركيز بصرها عليه بعدما كان يزوغ أثناء حديثها واعترافها الجاثم على قلبها.
متحدث معها بعدم تصديق لما يسمعه:
-أنتِ بتقولي ايه ؟؟؟ مين دي اللي تخينة ومليانه؟؟ أنتِ عامية؟؟؟ ولو نفترض أنك كدة فعلا أنا مالي بـ ده؟؟
هو أنا حبيتك عشان أنتِ رفيعة، ولا عشان تخينة، وزنك ميفرقش معايا يا متخلفة، أنا ميفرقش معايا غيرك، ولو أنتِ شيفاني أحلى منك وكل الناس شايفة كدة، فـ أنا مش شايف كدة، أنا أصلا عيوني مش بتشوف غيرك يا زهر، وأنا اللي بستكترك عليا.
بالفعل هي ليست بـ سمينة أو حتى نحيفة، بل تمتلك قوام متوسط، يناسبها ويناسب طول قامتها.
ولكن رغم هذا لا ترى نفسها إلا سمينة لا تليق بهذا الوسيم الذي عشقها دون أن يهتم بتلك الشكليات التي لا تفرق معه بشيء..ولكنها تفرق معها، وتسبب لها الكثير من المخاوف.
ظلت صامتة فقط ترقرقت الدموع بعينيها، أما هو فقال وهو يحتضن يديها بين يديه:
-زهر شيلي كل الكلام الفارغ ده من دماغك، وخلينا نعمل الفرح بقى ونعيش مع بعض تحت سقف واحد، أنا مبحلمش غير باليوم ده.
لاحت بسمة على وجهها الجميل، وبدون تفكير كانت تبدي موافقتها وتعلن قرارها بالموافقة مسببة في غزو السعادة قلبه و وجهه بل وكيانه بأكمله:
-وأنا موافقة يا وسام، موافقة أوي.
*************
صف "محمد" سيارته في مكان اعتاد على صفها به، مبدلًا هاتفه باهظ الثمن بآخر زهيد،كذلك ساعة يده بأخرى،مترجلًا منها مسترسلًا ما تبقى على قدميه حتى وصل لإحدى الحارات الشعبية التي سرعان ما سارع بعض رجالها بالترحيب به بمثل تلك الكلمات
"ازيك يا أبو حميد"
"صباح الخير يا محمد ابقى تعالى أشرب معايا كوباية شاي"
وهو يجيب ببسمة واسعة، وبحفاوة وحرارة شديدة وظل على هذا الوضع حتى وصل لمبتغاه والذي كان مطعمًا كبيرًا لإحدى أشهر الأكلات الشعبية المصرية.
"كشري"
والذي يملكه رجل يدعى "شكري" كبير في العُمر ويكون من إحدى سكان الحارة، ويدير مطعمه ثلاث من فتياته بالصباح لتفرغ اثنان منهم من الدراسة وهما "إسلام"و "جهاد"، أما الثالثة فتدعو "برق" وعزمت على الذهاب للامتحانات في سنتها الأخيرة مباشرة، أما البقية فلا يزالون طالبات…
فقد انجب ثماني فتيات واطلق عليهم أسماء من اختياره تسببت للبعض منهم أن يكونوا محض سخرية للبعض.
فقد كان دائمًا يحلم ويتمنى بإنجاب الذكر، ولكن لم يحدث هذا.
دخل محمد إلى المطعم ملقيًا السلام على الفتيات وعينيه تدور بحثًا عن من دق قلبه لها وتسببت في فعله ما لم يتوقع فعله يومًا:
-صباح الفل عليكم.
ردت عليه "جهاد" بنبرة عملية ويديها لا تتوقف عن تعبئة العلب البلاستيكية:
-صباح النور يا محمد، يلا بسرعة غير هدومك والبس هدوم الشغل، عشان تنزل الطلبات على التربيزات.
-عنيا حاضر.
وبالفعل سارع بالتحرك كي يبدل ملابسه ويباشر عمله معهم..
وأثناء تحركه سقط بصره عليها "إسلام" تلك التي أسرت قلبه وسكنت به، حتى عقله ترفض الخروج منه.
فكانت تضع بعض الطلبات على إحدى الطاولات، وما أن انتهت حتى غادرت ورأته يقف ويتابعها، فقالت وهي تقترب منه:
-اتاخرت على فكرة، يلا متقفش كدة، اتحرك.
ابتلع ريقه وحاول تخطي تلك الحالة التي تتمكن منه بحضورها، مخفضًا بصره عنها منصاعًا لطلبها…
في ذات الوقت ولج "أحمد" المطعم وبسمة مرحة ترتسم على قسمات وجهه، منتقيًا واحدة من الطاولات المخصصة لفردين جالسًا عليها، وعينيه تبحث عن ابن عمه، مترقبًا اللحظة الذي سيراه به وكيف ستكون رد فعله……..
********************
داخل إحدى المدارس المخصصة للمرحلة الثانوية للبنات فقط، وتحديدًا داخل إحدى الفصول شبه الفارغة عدا من أربع فتيات في ذات العُمر وبالصف الثالث الثانوي.
فكان يصدع صوت ضحكات ثلاث منهم، أما الرابعة فكانت تجلس بمفردها وتاخذ جانبًا، فقط تسترق النظرات نحوهم من حين لآخر.
رفعت واحدة من الفتيات والتي تكن صديقة لـ آسر المدعوة يارا، مصوبة حديثها للفتاة الجالسة بعيدًا تستهزء منها:
-ايه يا رياض ما تيجي تقعدي معانا.
وما أن انهت عرضها الساخر حتى أطلقت ضحكاتها وشاركتها كل من همسة صديقة قصي، و "ضياء" توأم رياض الغير متطابق.
قائلة من بينهم بأسلوب ساخر:
-يالهوي ايه الضحك ده، مش ماشي خالص رياض مع تقعدي معانا، المفروض نقولها تقعد معانا.
باغتتها "رياض" بالرد عليها قائلة بأسلوب قوي:
-اقسم بالله لو قمت هجيبك من شعرك وهنتفهولك زي الفرخة، انا مسكة نفسي عنك بالعافية، وأنتِ يا مهزقة مبسوطة وهي بتغلط في اختك قدامك وقاعدة تضحكي معاها، شكلك نسيتي أنك أنتِ كمان اسمك ضياء واكيد زي ما بيتريقوا عليا بيتريقوا عليكي بس الفرق أنه هيبقى من وراكي.
انتهت ناهضة من مكانها قائلة بحسم:
-قومي، انا غلطانة اني سمعت منك وجيت معاكي على هنا واحنا معندناش حصص، قومي اتحركي، هنروح لحد ميعاد الدرس.
هزت ضياء كتفيها وقالت برفض وأسلوب متعجرف:
-لا امشي أنتِ أنا قاعدة مع صحابي.
-بقولك قومي، ودول مش صحابك، ولا بيحبوكي، ولا حتى بيحبوا بعض، وأنتِ مش شبهم ولا هتكوني متحاوليش على الفاضي.
هبت همسة عاقدة ساعديها تستفسر منها بغضب:
-قصدك ايه يا بت أنتِ بـ مش شبهنا دي انطقي؟؟
-يختي هنطق هو أنا هخاف منكم، وقصدي أنها معدنها نضيف، بس أنتم معدنكم واطي.
هبت يارا هي الأخرى وقبل أن يبدأ ذلك الشجار بينهم، تدخلت ضياء معنفة شقيقتها:
-امشي يا رياض امشي، وكفاية قلة أدب، ولو عليا انا مش صغيرة وعارفة أنا بعمل إيه كويس اوي، أنتِ مش وصية عليا.
هزت رياض رأسها بتوعد قبل أن ترحل وتتركها رفقتهم:
-ماشي يا ضياء ماشي، أنا هوريكي.
عقب رحيلها هتفت همسة بتأفف:
-ايه البت دي؟؟ مستحملاها إزاي ؟؟؟ ربنا يكون في عونك يا بنتي والله.
هنا وأعلن هاتف يارا عن إتصال فاخرجته وأجابت على اتصال آسر، مبدلة نبرة صوتها قائلة بدلال وغنج:
-صباح الخير يا حبيبي؟؟؟
-صباح الخس على اللي قلبي ليها وبس، أنتِ فين ؟؟
-في المدرسة، قوم بقى مدام صحيت عدي عليا، ونقعد مع بعض اكتر قبل ميعاد الدرس يلا.
-وهو كذلك.
هنا وهمست لها همسة:
-وقصي خليه يجي معاه.
اماءت لها ثم تابعت:
-ومتنساش تكلم قصي همسة معايا.
-لا مش هنسى، سلام.
*********************
تسمر "محمد" مكانه بعدما أبدل ملابسه وكان على وشك البدء بعمله الذي يخفيه عن الجميع، واتسعت عينيه وهو يرى ابن عمه يجلس على طاولة ما، وتقابلت عينيه معه، مخربًا مخططه للاختفاء حتى يتأكد من ذهابه.
مجبرًا إياه على التقدم نحوه، وهو يتلفت حوله، حتى وقف أمام طاولته ليهمس له:
-أنت بتعمل إيه هنا يا أحمد، قوم من هنا بسرعة وامشي ابوس ايدك.
وباعين متسعة تتفحص تلك الملابس الذي يرتديها، مزيفًا صدمته:
-لا يا عم استغفر الله متبوس أيدي أنا مش والدتك، بس أنت بتعمل إيه هنا؟؟؟؟ أنت مش المفروض في المطعم بتعمل ايه هنا بقى؟؟
وبصدمة مضاعفة قال:
-أحيييه، هو أنت شغال هنا ؟؟؟ سايب مطاعم جدك، وناسك وأهلك وبتشتغل في مطاعم ناس غريبة، أخص، لا أخص ايه ده اتفوه عليك.
ومن بين أسنانه رد عليه بنبرة سريعة منخفضة:
-اسكت هتفضحني وهتبوظلي كل اللي أنا عملته، قوم امشي وانا هحكيلك كل حاجة، بس امشي.
-مش ماشي قبل ما اعرف كل حاجة، واعرف بتعمل إيه هنا؟؟ يلا قول.
-وحياة أمي هقولك بس قوم دلوقتي، أنا عارف أنك لو قعدت أكتر من كدة هتفضح..
ارتفع حاجبي أحمد وقال معلقًا:
-حرام ياض تحلف بغير الله، قول لا إله إلا الله.
-لا إله إلا الله، قوم بقى دلوقتي، أنجز يا عم.
في ذات الوقت انتبهت إسلام لما يحدث بين محمد و وأحد الزبائن التي تراه للمرة الأولى، فقطبت حاجبيها واقتربت كي ترى ما يحدث، متسائلة بصوت جامد:
-في إيه يا محمد؟؟؟ بقالك حبة واقف وبتكلم مع الزبون، ومخدتش طلبه، في حاجة ؟؟؟
زيف أحمد صدمته واتسعت عينيه أكثر واكثر متقنًا دوره ببراعة خافيًا معرفته السابقة بكل شيء.
مجيبًا عليها بدلًا منه:
-لا مفيش بس كنت بقوله يجبلي ازازة ماية أصلي مصدوم على الآخر، لسة جايلي خبر أن ابن عمي أبوه اداله علقة موت اصله طلع كداب وبتاع حوارات.
ثم طالع محمد متحدث بنبرة آمرة مستغلًا هذا الوضع:
-هاتلي واحد كشري كبير و زودلي التقلية عشان بحبها و
لم تستمع إسلام لحديثهم أكثر وتركتهم بمفردهم، وعقب تأكد الاثنان من ذهابها هتف أحمد بأسلوب مرح:
-اه يا كذاب قايلهم ايه ها عشان يشغلوك، متعرفش أن الكدب حرام ياض، وأن الكداب بيروح النار.
تأفف محمد ثم رد بصوت منخفض:
-أحمد متوجعش دماغي، هروح دلوقتي اجبلك علبة الكشري تاكلها وتتكل وبليل لينا قعدة سوا، تمام؟؟؟
أراح أحمد ظهره للخلف يجيبه:
-حسنًا، اتفقنا فلنتحدث بالمساء وبعد نوم الجميع، فـ أنا اتلهف لمعرفة ما يحدث وما تخفيه.
*************
أوقف "آسر" سيارته على بُعد ليس بالكبير عن المدرسة، وبجواره يقبع قصي الذي مر عليه وأخذه معه لمقابلة الفتيات.
متمتم بنبرة عابثة وهو يطالع قصي:
-كلم البت صاحبتك خليهم يخرجوا.
رضخ قصي لطلبه، وسارع بمهاتفة همسة وأخبارها بتواجدهم بالخارج.
لحظات وكان يخرج من بوابة المدرسة الحديدية ثلاثة فتيات، فوقع بصر قصي عليهم وانتبه لتلك الفتاة الثالثة التي ترافقهم ويراها للمرة الأولى.
فالتوى ثغره ببسمة وهو يلكز آسر الذي أسند رأسه للخلف وأراح عينيه من خلف نظارة الشمس الذي يرتديها:
-بص كدة على البت اللي معاهم دي.
انتبه آسر لحديثه واعتدل برأسه مطالعًا بهم ليثبت بصره بالاخير على "ضياء".
مستمعًا لتغزل قصي بها:
-حلوة اوي، أحلى من همسة، بس قصيرة شوية وسمرا عنهم، ايه ده هما وقفوا ليه؟؟؟؟؟
على الطرف الآخر توقفت يارا حادقة بـ ضياء، مخبرة إياها ببسمة:
-آسر وقصي هناك أهم في العربية السودا دي، يلا باي ونشوفك في الدرس بقى متتاخريش، وصحيح مش نسياكي هخلي آسر يشوفلك واحد صاحبه يبقى سنجل.
رفضت وهزت رأسها قائلة:
-لا مش عايزة، انا مفركشتش مع طارق عشان اروح ارتبط بواحد تاني، انا عايزة أريح دماغي شوية، يلا سلام.
قالت كلماتها الأخيرة وهي تشق طريقها نحو منزلها، أما عن صديقاتها فاقتربا من سيارة آسر واستقلا بالخلف ملقين عليهم التحية.
رد قصي عليهم أولا ثم آسر الذي سرعان ما استفسر منهما بلامبالاة طفيفة ودون النظر إليهم:
-هي مين اللي كانت معاكم دي ومجتش معاكم ليه؟؟؟
ردت يارا بغيرة بسيطة:
-وتيجي تعمل ايه إن شاء الله؟؟؟
بينما ردت همسة بضحكة خافضة مجيبة على سؤاله:
-دي واحدة صاحبتنا مش هتصدقوا اسمها ايه.
تساءل قصي الحادق بهم بترقب:
-اسمها ايه يعني.
ردت يارا تلك المرة:
-ضياء، إسمها ضياء.
التفت إليها آسر والدهشة تتشكل على محياه مردد إسمها بتعجب:
-ضياء ازاي يعني؟؟؟؟؟؟
هزت همسة كتفيها قائلة:
-والله اسمها ضياء واختها اسمها رياض وفي اختهم إحسان كمان بس دي اصغر مننا بسنتين ولسة في أولى، وبقولكم ايه فككم منها ويلا خلونا نشوف هنروح فين.
******************
فارق أحمد المطعم أخيرًا، واستقل سيارته وتحرك بها منطلقًا في طريقه، مقررًا الذهاب إلى المطعم الذي يديره، ولكن بعد مرور بضعة دقائق من انطلاقه ذاك، جذب أنظاره ما يراه من خلال الزجاج الأمامي للسيارة ويقع على مسافة كبيرة من أمامه.
حيث كان يقوم إحدى الرجال بالوقوف أمام فتاة ما ترتدي الزي الخاص بمدرستها، وتلك الفتاة تتشاحن معه وتلوح بيديها في الهواء..
مما جعله يتوقع ويخمن بأنه يقوم بمضايقتها، لذا فاقم من سرعة السيارة كي يساعد تلك الفتاة……….
أوقف السيارة وهبط على الفور وهو يردد بصوت عالي جاذبًا أنظار الرجل والفتاة نحوه:
-عفوًا، ما الذي يحدث هنا يا رجل ؟؟؟؟؟؟؟
يتبع.
فاطمة محمد.
عشان اللخبطة ده ملخص سريع للشخصيات الجديدة اللي ظهرت
عندنا شكري ده صاحب المطعم اللي محمد شغال فيه، والراجل ده عنده ٨ بنات مظهروش كلهم انهاردة
وهما إسلام وجهاد و برق
إسلام وجهاد مخلصين دراسة، برق لسة في الجامعة في سنة رابعة يعني آخر سنة ليها، ومش بتروح غير على الامتحانات علطول وهما اللي شغالين في المحل.
أما ضياء ورياض دول توأم مختلف وفي ٣ ثانوي
وعندنا إحسان دي معاهم في المدرسة بس في أولى ثانوي ولسة من ضمن اللي مظهروش.❤️
يتبع
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
جميع الروايات كامله من هنا 👇 ❤️ 👇
اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇
❤️🌺💙🌹❤️🌺💙🌹❤️🌺💙🌹❤️🌺🌹❤️🌺🌹🌹❤️🌺💙
تعليقات
إرسال تعليق