رواية أسرار الأخوات الحلقه التاسعه بقلم الكاتب مصطفى محسن حصريه وجديده على مدونة النجم المتوهج
رواية أسرار الأخوات الحلقه التاسعه بقلم الكاتب مصطفى محسن حصريه وجديده على مدونة النجم المتوهج
زوجة جابر قربت من منى بعنين مليانة حزن وقالت لها: يا بنتي… إخواتك عملوا عمل ليكي ولوالدتك. منى حطّت إيدها على بقها وقالت بصوت مكسور: أمي؟! مرات جابر هزّت راسها وقالت: أيوه يا بنتي… والدتك. منى قالت لها: أنا عارفة إن شيرين وشريهان عاملين لي أنا عمل… بس ليه يعملوا عمل لأمي؟ زوجة جابر قالت: علشان والدتك كانت عارفة بالموضوع… وما كانتش موافقة عليه… وإخواتك أجبروها غصب عنها. منى قالت: والعمل… من عطوه؟
زوجة جابر قالت: أيوه يا بنتي… عطوه هو السبب في كل اللي حصل… وللأسف بسبب عطوه ده… أنا فقدت ابني. منى اتصدمت وقالت: فقدتِى ابنك؟ إزاي؟ زوجة جابر عينيها دمعت وقالت: جابر… جابر هو اللي ضحّى بابنه. منى قالت بصدمة: أنا مش فاهمة… احكيلي من الأول.
مرات جابر أخدت نفس طويل وقالت: هقول لك كل حاجة يا بنتي… اللي حصل من سنين… في يوم من الأيام والد جابر كان تعبان جامد وحرارته ما بتنزلش، رحنا لدكاترة كتير ومفيش فايدة، وفي عز الليل حد خبط على الباب، جابر فتح، لقى راجل واقف وقال له: أنا عطوه… عطوه الدهشاني…
وعرفت إن والدك تعبان ومش لاقي له علاج… وأنا عندي العلاج. جابر فرح ودخّله البيت وقعد، عطوه سأله: عندك كام عيل؟ جابر استغرب وقال له: بتسأل ليه؟ عطوه قال له: إنت مش عايز أبوك يخف؟ جابر قال له: أيوه.
عطوه قال له: يبقى تسمع كلامي. جابر قال له: هسمع كلامك في أي حاجة. عطوه قال له: لو عايز والدك يخف… لازم تضحي بواحد من ولادك. جابر اتصدم وقال: إزاي أضحي بابني؟! عطوه قال: علشان تنقذ والدك.
جابر بعد لحظات خوف هز راسه وقال: موافق. عطوه وقف وقال: عايز أدخل لأبوك دلوقتي. ودخل فعلاً، وبعد دقيقة خرج وقال: أبوك هيقوم بعد ساعة… وهيبقى كويس… ومفيهوش أي حاجة… ميعادنا بكره بالليل… تجيلي… إنت وابنك معاك… ولو ما جيتش… أبوك وولادك ومراتك هيجرالهم أكتر من اللي حصله.
جابر سأله: أجيلك فين؟ عطوه قال له: مكان شغلك… المقابر. وجابر وافق، وثاني يوم الساعة عشرة… جابر خد ابني وراح سلمه لعطوه… ومن يومها يا بنتي… ابني اختفى… ما شوفتهوش تاني… وكل ما أسأل جابر… كان يقول لي: مالكيش دعوة. منى خرجت من بيت مرات جابر واتصلت على مروه وهي بتتنفس بسرعة…
وقالت لها أنا لازم أقابل الشيخ عثمان حالاً هتيجي معايا ولا؟ مروه ردّت فوراً وقالت لها طبعاً هاجي معاكي وفعلاً راحوا سوا لبيت الشيخ عثمان وخبطوا على الباب ولما فتح شاف على وشهم الخضة وقال لهم خير يا بنتي في إيه؟ منى قالت له بصوت مكسور يا شيخ عثمان احنا عرفنا سر تاني، شيرين وشريهان عاملين عمل لماما كمان.
ومرات جابر قالت لي كل حاجة، وجابر ضحّى بابنه علشان يعالج أبوه، وعطوه هو اللي خد الولد ومحدش شافه تاني. الشيخ عثمان هز راسه وقال لها كده الصورة وضحت يا بنتي ولازم أشوف والدتك بنفسي، يمكن العمل اللي معمول لها بسيط ونقدر نفكه خصوصاً إنها كانت عارفة جزء من اللي حصل. منى قالت له أنا هجيبها لك بعد العصر، قال لها خلاص وانا مستنيكم، ورجعت منى البيت وقالت لاخواتها إنها هتاخد ماما تتمشى شويه عشان نفسيتها تعبانة، بصّوا لها باستغراب لكن وافقوا، وخرجت منى بأمها وراحت بيها لبيت الشيخ عثمان، وأول ما شاف والدة منى حط إيده على راسها وبدأ يقرا قرآن بصوت تقيل وعالى، وبعد ثواني أم منى وقعت على الكنبة واغمى عليها.
الشيخ عثمان قال لمنى اسنديها وسيبيها ترتاح وبعدين بص لها وقال احنا لازم نروح مقابر والدك دلوقتي حالاً، العمل مدفون هناك. منى ارتبكت وقالت له طيب وماما؟ الشيخ قال لها متخافيش هترتاح لحد ما نرجع بس لازم نتحرك دلوقتي، وفعلاً راح هو ومنى المقابر، والجو كان مرعب لدرجة إن منى حست إن الهواء نفسه واقف، والشيخ بدأ يقرا قرآن وصوته بقى يعلى والثواني كانت تقيلة، وفجأة الأرض تحت رجليه تفتحت بسيط وطلع منها كيس أسود صغير، منى شهقت ورجعت لورا بخضة، والشيخ عثمان رفع إيده وقال لها سمي بالله وما تخافيش، ومسك الكيس بحذر وحطه في جيبه، ورجعوا على بيته بسرعة، أول ما وصلوا قعد على الترابيزة وفتح الكيس طلع العمل وبدأ يقرا آيات من القرآن وبعدين ولّع فيه بالولاعة وجاب ميه وملح وحطهم فوقه، وبعدها والدة منى بدأت تفوق وبصت حواليها وقالت لها احنا فين يا منى؟ إيه اللي جابني هنا؟ ومين الراجل ده؟ الشيخ عثمان قال لها:، حمد لله على السلامة يا حاجة، والدة منى قالت له: حمد لله على السلامة على إيه؟ إنت مين؟ قال لها: أنا الشيخ عثمان، أنا عرفت يا حجة كل حاجة، وعارف إن أخوات منى عاملين لك عمل وعاملين لمنى عمل، بس العمل اللي معمول لمنى مش هيتفك أبداً غير لما نحصل على عظام والد منى، والدة منى بصت له وقالت له: أنا… أنا عارفة فين.
انتظروا الجزء العاشر بكرة إن شاء الله
تفتكروا أم منى هتقدر تقول الحقيقة؟ ولا في سرّ أكبر لسه مستني يظهر؟
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
جميع الروايات كامله من هنا 👇 ❤️ 👇
اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇
تعليقات
إرسال تعليق