رواية همس القلوب الفصل الثالث عشر والرابع عشر والخامس عشر والسادس عشر بقلم الكاتبه أميره الشافعي حصريه وجديده على مدونة النجم المتوهج
رواية همس القلوب الفصل الثالث عشر والرابع عشر والخامس عشر والسادس عشر بقلم الكاتبه أميره الشافعي حصريه وجديده على مدونة النجم المتوهج
وصلت السيارة الي منزل ليلي
كانت الجده تتألم وتئن طوال الطريق رغما عنها.ورغم سعادتها بعودتها إلي منزلها
ترجلت ليلي وأيقظت همس النائمه
وساعدها السائق وحمل معها جدتها ولم يتركها إلا يعد أن وضع الجده علي فراشها
وقبل إنصرافه سألها إذا كانت تريد شيئآ
فقد أمره مراد بذلك
.................... ......................... ٌ........
كان كرم يجلس علي مكتبه وأمامه أحد المتهمين يحقق معه في قضية نصب واحتيال
حينما اتصلت به والدته فاطمه
فاطمه بحنان : إزيك يا قلب أمك
كرم بود : أهلا ست الكل
فاطمه : بقولك ياكرم مرات أخوك طبخالنا
ملوخيه بالإرانب وإنت بتحبها خلص شغل وتعالي إتغدي معانا هنستناك
كرم بمراوغه: لو عوزاني آجي إطلبي ماهي إعزميها أردف ضاحكآ أنا ماكلش من غير مراتي
فاطمه بطاعه :حاضر يا كرم هطلبها يا بني وهستناكم
مع السلامه
مع. السلامه يا ست الكل
تمصمصت فاطمه ونادت إيناس لتقول
كرم مش راضي يجي الا لما نطلب مراته
إيناس ضاحكه : والله عنده حق يا ماما.
وماهي زي العسل وأنا كمان بحبها
مع إنها من عيلة الخرافي وعندهم فيلا وعربيات وشركات
بس متواضعه جدا وعايشه مع كرم علي مستواه وراضيه
فاطمه بحنق : وهو كرم وحش ولا اقل منها يعني
إيناس بهدوء :لا يا ماما كرم سيد الرجاله بس برده مش غني زي عيلة الخرافي عنده شقه عاديه زينا وكده؛؛؛
فاطمه وهي تلوي فمها : طب إطلبيها يا حضرة المحاميه
ضحكت إيناس وهي تتجه لحيث وضعت هاتفها
لكنها تراجعت وهي تضع إصبعها تحت ذقنها تفكر
وقالت بهدوء : بقولك إيه يا ماما متكلميها إنتي بتهيألي المفروض كده زي ما كلمتي كرم كلميها!
حاضر يا إيناس! حاضر يا أم العريف قالتها فاطمه بتهكم،!!!
إعتادت إيناس طريقة حماتها في الحوار
وتعلم أنها رغم حدة إسلوبها طيبة القلب
اتصلت فاطمه بماهي التي تحدثت بإسلوب مهذب متحفظ
أهلآ يا طنط إزي حضرتك
فاطمه بجديه : الحمد لله أنا طالبه أعزمك إنتي وكرم تتغدو معانا عندنا ملوخيه بالإرانب وكرم بيحب الأكله دي قوي
لما يرجع بالسلامة من شغله تعالوا هنستناكم
ماهي بكياسه : شكرا لذوقك يا طنط هتصل بكرم وأشوف هيقول إيه!_____________________
عاد مراد من عمله ليجد والدته تجلس في بهو البيت ويبدو عليها الإنزعاج
السلام عليكم
عامله إيه يا ماما
نوال بموده : وعليكم السلام
الحمد لله يا مراد بس قلقانه علي همس ووحشنني كمان
مراد مبتسما : يا ماما يا نولا يا حبيبتي
همس. لسه ماشيه الصبح
وبعدين تقلقي ليه هيه مع مامتها
أيوه قالتها نوال بتنهيده ونادت وداد لتضع الطعام علي المائده وأمرتها أن تنادي شاكر وممدوح وعائلته....
بالغعل تجمعت الأسره علي طاولة الطعام
وكلا منهم يتناول طعامه بصمت إلي أن قال شاكر
بقولك يا مراد عمك كلمني عاوز نحدد ميعاد الخطوبه
رغما عنه نظر مراد لمكان ليلي الخالي وتململ قائلا!!
بابا إديني فرصه شهر ولا اتنين أنا مش مرتاح للموضوع ده بصراحة
شاكر بغضب لنوال : إشهدي يا ست هانم
البيه هو ال جالي المكتب وكلم عمه
دلوقتي يقول لي فرصه
عاوز يخسرني علاقتي بأخويا الوحيد
نظرت زيزي لمراد وقالت بطريقه مصطنعة
لأ بجد يا مراد حرام عليك البنت بتحبك
وبترفض ناس كويسين علشانك وبعدين
قاطعها بعصبيه وقال!
وبعدين مايخصكيش يا زيزي أخطب أتجوز أطلق ال يخصك ممدوح وبس
بهت وجه زيزي التي شعرت بالإحراج وقالت بغيظ : أنا عملت لك إيه يا مراد ديمآ واقف لي...
حتي ال إسمها شمس دي بتقف معاها ضدي وإنت لسه عارفها من كام شهر بس
شاكر بصرامه : خلاص يا مراد إنت راجل يا بني و عمرك ما رجعت في كلمتك علشان تعمل كده ::
مراد بتذمر : معلهش يا بابا أنا مش مستعد دلوقتي قلت لحضرتك شهر ولا اتنين ولو هيه مستعجلة نتجوز ولا تتخطب هو انا حوشتها يعني..
شاكر برجاء :أنا هقول له بعد شهر تكون حالة والدتك بقت أحسن
مراد بتململ : حضرتك قول ال تقوله يا بابا بس انا قلت لحضرتك إني لسه متردد
""""""'''''''''''''''''"""""'""""""""""""
في المنصوره
اتصلت ليلي بخالتها لتخبرها بمرض جدتها وبأنها ستصطحبها لعمل الأشعه الدقيقه التي طلبها الطبيب
وأخبرتها خالتها سحر بأنها سوف تحضر في الغد
تركت ليلي جدتها تنام عدة ساعات وأيقظتها لتصطحبها في سياره بالأجره لعمل الفحوصات اللازمه....
وعزمت أن تذهب غدا للبنك لسحب بعض الأموال اللازمه لعلاج جدتها
ماقاله الدكتور نادر نفس ما أخبرها به الطبيب الذي أجري الفحص والآشعه بالمنصوره
أخذت ليلي الأشعه
وذهبت لطبيب شهير بالمنصوره مختص بأمراض القلب
دفعت أموال أكثر من قيمة الكشف لتحصل علي موعد مبكر في نفس اليوم
وجلست مع جدتها وهمس في إنتظار دور جدتها للدخول للطبيب؛؛؛
في شقة والدة كرم
إصطحب كرم زوجته عقب عودته من عمله
كان مرهقآ وتمني ألا يذهب لأي مكان ولكنه خشي أن يخذل أمه
صف سيارته أسفل العماره التي تسكن فيها والدته
وصعد هو وزوجته
فوجئت ماهي بكرم يخرج مفتاح الشقه من محفظته ويفتح الباب
ليدخل ويرحب به الطفلان اللذان هللو وصاحو عند رؤية عمهم
كانت والدته تجلس بإبتظاره
فإنحني كرم ليقبل رأسها و يديها
وصافحتها ماهي مقبله وجنتيها
وجلسو معا...
كانت إيناس في المطبخ خرجت ترحب بهم ثم بدءت في وضع الطعام علي الطاوله وهي تقول
أظن يا كرم ميت من الجوع وزمان ماهي كمان جعانه
إبتسمت ماهي وقالت : كرم نسي نفسه لما شاف الولاد
تحبي أقوم أساعدك يا إيناس
شكرتها إيناس وقالت : تسلمي يا ماهي وأردفت
يلا كل حاجه جاهزه يلا يا ماما يلا ياكرم
إستنشق كرم رائحة الطعام وقال
الله يا روايحك يا إيناس
جلس يأكل بشهيه وكذلك فعلت ماهي
فالطعام كان بسيط ولذيذ
وهي وجبة كرم المفضله الملوخيه والأرز والخبز ولحم الأرانب المحمر...
أخذ كرم يداعب عمر ويضع بعض الطعام بفمه بمعلقته ثم يأكل هو بها دون إمتعاض
قالت فاطمه وهي تلوك الطعام بفمها
إيه يا ماهي مافيش حاجه كده ولا كده دخلتو في تالت شهر جواز وكرم بيموت في الأطفال
ماهي بإبتسامه : والله يا طنط أنا كمان بحبهم قوي
لو ربنا أراد يبقي خير
ولو
إتأخر الموضوع شويه عقبال ما خلص دراستي يبقي خير وبركه
لتنتفض أم كرم وتقول : لأ دراسة إيه وكلام فارغ إيه
أنا عاوزه أشوف ولاد كرم
ماهي بتفهم : ربنا يبعت يا طنط
أنهو طعامهم وإحتسي كرم الشاي وتناولت ماهي بعض الفاكهة
وإستأذنو للإنصراف
كرم بالسياره : مالك ساكته ليه يا ماهي
ماهي وهي تحاول ضبط مفرداتها : أنا مش عاوزه أضايقك يا كرم
بس مجرد ملحوظه
كرم يلتفت لها بوجهه : قول يا حبيبي
ماهي بتحفظ : مفتاح الشقه يا كرم آااااأقصد شقة والدتك
كرم بتساؤل : ماله مفتاح الشقه
ماهي تزدرد لعابها تحاول إخفاء إنفعالها وتقول بهدوء : إزاي يا كرم تفتح كده وتدخل
والدتك مش لوحدها معاها إيناس
كرم بعصبيه وصوت عالي : يوووووه يا ماهي يا دي إيناس طلعيها من دماغك بقي
ماهي بغضب : إيناس مش في دماغي يا كرم أنا بقول الأصول وبس
كرم بغضب : بلا أصول بلا فروع كلها غيرة نسوان.
ماهي بإمتعاض : نسوان
ممكن تتكلم بطريقه أحسن من كده دي مش طريقه
كرم وهو يصيح : حرام عليكي أنا من الصبح شقيان مش قادر وإنتي إيه دماغك فاضيه مافيش حاجه شغلاكي أبدا
إيه الملل ده
كانا قدوصلا
فترجلت ماهي غاضبه وصفعت باب السياره بعنف لتصعد وهي تقاوم دموعها
بدلت ملابسها بمنامه قطنيه مريحه وصعدت علي فراشها ونامت بطرف الفراش وتدثرت بغطاء خفيف يخفي وجهها الحزين
'. ،'''''''''''""""'''"""""""""""""'''""""""'"''''''''
في العياده
قال الطبيب لليلي علي إنفراد أن حالة جدتها متدهوره وذلك بجانب مشاكل الشيخوخه....
حاولت ليلي التماسك قدر المستطاع حتي لا تشعر جدتها بشئ ويصيبها القلق
وأخذتها وإنصرفت بعدأن أحضرت دواء معين وصفه الطبيب
في منزلهم كان جدتها نائمه تحرك أصابعها بحبات السبحه المضيئه وتذكر الله بصمت ورضا
وحاولت ليلي إسعاد جدتها والعنايه بها
كانت تنظر لجدتها وتدعو الله أن يعافيها
فهي تشعر أنها سندها وأقرب إنسان لها بعد والديها
'"""""""""""""""""
صعد كرم الفراش لينام ولأول مره منذ زواجهما لم تكن ماهي تضع رأسها علي كتفه
بل كانت بعيده علي الطرف الاخر من الفراش
شبك يديه تحت رأسه حيث كان ينظر لسقف للغرفه ويراجع ما حدث بينهما من حوار
أغمضت ماهي عيناها ونامت صامته
ظل كرم يتململ في فراشه
وأخيرا قال بهمس : ماهي... ماهي
لم ترد عليه
فحذبها بالقوه وقال برفق
حقك عليه يا ماهي متزعليش يا حبيبتي
لم ترد عليه
فقال ممازحآ : هتردي ولا أخليكي تسلمي نفسك بطريقتي
تجاهلته تماما
كرم بمراوغه : طيب بدال نمتي خلاص تصبحي علي خير
وبخفه جلب زجاجة الماء من طاوله صغيره بجوار الفراش ثم ملأ فمه بالماء ونثره علي وجها لتصيح
وتنهض مسرعه لتقذفه هي الأخري بالماء
فقال
خلااااص خدتي حقك وإنتقمتي الغلط قد بعضه يعني نتصالح بقي
ليجذبها ويناما متعانقين.. لتغمض ماهي عيناها وتبتسم
في المنصورة
في اليوم التالي حضرت سحر لرؤية والدتها
سحر سيده في السابعة والأربعين لكنها تبدو أصغر من ذلك فوجهها بيضاوي بملامح بريئه وعندما تنزع حجابها في المنزل يظهر شعرها القصير بلون الحناء البني المائل للأحمر فهي تصبغه بذلك اللون باستمرار
كانت تبكي حينما وجدت أمها صامته لا تتحدث إلا قليلا
وتعجبت من وجود همس لكنها تفهمت الأمر حينما أخبرتها ليلي به....
كانت ليلي تطهو الطعام وتلهو بجوارها همس علي هاتف ليلي الذي عليه بعض الألعاب التي تلعبها ليلي معها للتسليه. .
قالت همس : ماما ممكن أكلم تيته نوال
ليلي بتفهم : أنا مش معايا رقم موبايلها يا همس بس عندك رقم التليفون الأرضي
مكتوب عليه فيلا الخرافي
بالفعل طلبت همس الرقم :
ولكنها صاحت بطفوله : عمو مراد أنا ال طلبت لوحدي
لوهله شعرت ليلي بالإرتباك حينما وجدت صغيرتها تتحدث مع مراد
وبعد قليل قالت همس : عمو مراد عاوز يكلمك يا ماما
حملت ليلي الهاتف وقالت بهدوء
سلام عليكم
وعليكم السلام أتاها صوته دافئآ
تنحنح مراد وقال : جدتك عامله إيه
ليلي بحزن : تعبانة قوي الحمد لله على كل شئ
مراد بإهتمام : طيب رقم التليفون ال همس اتصلت منه ده بتاعك
أيوه قالتها ليلي
مراد بهدوء : أنا هرن عليكي بعد ما أقفل سجلي رقمي عندك علشان لو إحتجتي حاجه
وشوفي هترجعي إمتي علشان أبعت لك العربيه علشان متتبهدليش أقصد إنتي وهمس يعني
ليلي : شكرا يا باشمهندس لو سمحت خلي نوال هانم تكلم همس
مراد بلطف : ماما والله أنا رجعت من الشغل لقيتها نايمه أصحيها
ليلي برقه : لأ خليها نايمه لما تصحي هنكلمها إن شاء الله وشكرا ليك
همس لليلي : هاتي أكلم عمو مراد
بالفعل أخذت همس تثرثر بأمور طفوليه وتضحك بسعادة فهي تحب عمها كثيرا
أغلق مراد الهاتف وسجل رقم هاتف ليلي عنده علي هاتفه ثم طلبها لثواني لتسجل رقمه ثم أغلق الخط بسرعه ......
في نهاية الإسبوع............... وقبل آذان الفجر بقليل
إستيقظت ليلي علي صراخ وعويل
لتهب مفزوعه علي صوت نحيب خالتها وعويلها
لتجحظ عيناها وتهمس مرعوبه : تيته "'"''"''''''"""""""""""""""""""""""""""""""""""""""
في فيلا الخرافي
وقف مراد ينظر من النافذه تجاه المسبح وشبه إبتسامه مرسومه علي شفتيه
كان يتذكر يوم قذفته همس في الماء ليصبحو ثلاثتهم معا كم كان وقت سعيد تعالت فيه الضحكات
لكنه حك رأسه وهمس
إيه ال إنت بتفكر فيه يا مراد ده إنت إتجننت من بين نساء الأرض تفكر في مرات مجدي تؤ تؤ تؤ
خرج من حجرته وقدقرر النزول للأسفل لإستنشاق الهواء في الحديقه
الوقت متأخر وقد إقترب الفجر وهو يشعر بالأرق لسبب لا يعلمه
بالفعل خرج وعند مروره بجناح الذي تقطنه ليلي
تفاجئ بأنه مضئ
تعجب هل عادت ليلي وعائلتها ولكنه تحدث معها
إذن من بالداخل هل يوجد لص بالفيلا
فتح الباب بهدوء
وإجحظت عيناه بذهول وهو يري زيزي
تعبث بأشياء ليلي
وقد قذفت ملابسها و كتبها علي الأرض
وأخذت تقلب في محتويات خزانتها بحقد
شهقت عندما رأت مراد الذي وقف لثواني
يتأملها وهي منهمكه فيما تفعله
مراد قالتها بذهول
ليصيح مراد ؛ بتعملي إيه هنا يا زيزي بتدوري علي إيه
زيزي بإرتباااك : أصل..... أصل فستان بيري إتقطع
وكنت...... ك ن ت
وكنت بدور علي خيط وإبره آه صح كده خيط وإبره
إقترب منها مراد وقدكشر عن أنيابه وصاح بإنفعال : عاوزه منها إيه مالك ومالها
إبعدي عنها وعن البنت فاهمه ولا لأ
لو عملتي حاجه غلط محدش هيحاسبك غيري يلا إمشي من هنا.
لتهرول زيزي إلي الخارج مذعوره
يجلس مراد علي الفراش ليلتقط أنفاسه ويهدأ فهو غاضب ومنفعل مرر يده علي شعره وذقنه بعصبيه
وظل ساكن لثواني
إنحني بعدها ليلتقط كتب ليلي وأوراقها المبعثره
ويفتح كتاب تلو الآخر
ليجد بعض الكلمات التي خطتها ليلي بعشوائيه دون ترتيب في إحد السجلات
*من ذلك الغريب الذي دخل بيتي وإقتحم* حياتي دون إستئذان
أيها الغبي كيف تدخل من البوابه الخشبيه
وتراني أرتدي قميص وسروال
وعلي رأسي طرطورآ أحمر اللون
وألتقط حبات التوت وأنا فوق الشجره العتيقه....
كيف تفعل ذلك أيها المتطفل
*نعم أنتي أول غبي رأيته * وإلتقطني بين يديه كما ألتقط أنا حبات التوت اللذيذه
أنت مجرد لص .....مجردحرامي التوت الوسيم....... أنت اللص الوسيم
إبتسم مراد ثم ضحك بقهقهه وإنتزع الورقه من الدفتر
ليثنيها ويضعها يجيبه ويخرج مبتسما!!!!!
#الفصل_١٤
الفصل الرابع عشر
(وداع يا جدتي يا رفيقة دنيتي)
(خلاص يا صاحبتي سيباني لوحدتي)
(مع السلامه وإبقي تعاليلي يا تيته ف المنام
(وهتبقي ذكراكي في قلبي علي الدوام)
(وسلمي علي ماما و بابا و أختي كمان)
(مع السلامه يا أنسي مافيش بعدك كلام)
(يا إيد في وسط العتمه أخدتني لبر أمان)
( عمر ماهنساكي حبيبتي ولو مر الزمان)
كانت تبكي بعينيها وقلبها بتمزق لقد ماتت نعمه
رحلت جدتها التي كانت رفيقة دربها
رحلت مبتسمه بوجه قدرحل عنه الألم وإرتسم عليه الصفاء والرضا
حمدت الله علي وجود خالتها معها وأنها لم تكن وحيده في ذلك الموقف العصيب
تركت صغيرتها نائمه وقامت مفزوعه علي صوت نحيب خالتها
لتجد جدتها قد فارقت الدنيا راضية مرضية
إحتضنتها خالتها وربتت عليها وأخذتها خارج غرفة جدتها الممده في سكينه علي الفراش
عند آذان الظهر كان قد تم تغلسيلها وتكفينها وحمل المشيعون الجثمان إلي مقابر عائلة ليلي
خرجت من المنزل إلي الأبد ولكنها لن تخرج من قلب ليلاها
جاءت هاله جارتها لتعزيها حامله معها بعض الطعام
وظلت تحاول أن تطعم ليلي وخالتها
بعد أن توسلت إليهم أكلت سحر بعض الطعام بدون شهيه
ورفضت ليلي تمامآ
فقد أغلقت علي نفسها حجرة جدتها لتنام علي فراشها وتحتضن ملابسها
وتمسك بيدها سبحتها البيضاء بحبات مضيئه وتهمس......
يا رب إرحمها كما رحمتني صغيره
كما عوضتني مرارة اليتم : يا رب إرزقها الجنه
قال رسولك الكريم
أنا وكافل اليتيم كهاتين في الجنه وأشاربإصبعيه السبابه والوسطى
وقد كفلت نعمه ليلي وأحسنت إليها كانت دموع ليلي المنهمره وإنفطار قلبها علي جدتها الحنونه لم تنسيها همس كانت تشرد وتفكر
هل ستخسر همس أيضا لتبقي وحيده إنها أبدا لم تكن مرتبطه بخالتها كثيرا بحكم البعد والمسافه التي تفصل بينهما كانت تأتي علي فترات لزيارة جدتها وأثناء تلك الزيارات تحنو علي ليلي ولكن ما أن تبتعد حتي تأخذها دوامة حياتها وبيتها....
وزوجها الذي يحب النساء وتخاف عليه أن يقع في براثن إحداهن فتخطفه منها..
فلذلك لا تترك بيتها كثيرآ فلها مشاكلها الخاصه و حياتها المستقله... """""""""""""""""""""""""''"""""""""""""""
في شقة كرم !
إستيقظت ماهي من النوم ووكزت كرم وقالت
كرم
قوم آه يا معدتي مش قادره
مالك يا ماهي. مالك يا حبيبتي قالها كرم بإهتمام.
ماهي بضعف : معدتي يا كرم هتموتني معدتي تعبانة قوي مش عارفه أنام
كرم وهي يحك رأسه ويحاول مقاومة النعاس : لا حبيبتي ألف سلامه عليكي
وأغمض عيناه مره أخري
لتصيح ماهي. كرم إنت هتنام وتسبني بقولك تعبانة.
هرولت علي المرحاض وهي تضع يدها علي فمها تقاوم الإحساس بالغثيان
تقيئت وغسلت وجهها وفمهما ونثرت بعض البرفان علي يديها وخرجت لتجد كرم يغط في النوم.....
صعدت علي الفراش ووكزته ثانيآ
كرم تعبانه ياكرم
كرم بنعاس : يا ليلة أهلك ال مش فايته يا كرم
يا حبيبتي إغلي شوية كمون وإشربيهم
ماهي بإمتعاض : مبحبش الكمون
كرم بكسل : ينسون.... نعناع أي حاجه
ماهي بغضب : مابحبش الينسون ولا النعناع
عاوزه شاي.
كرم حاضر وصاح بصوت عالي :شاي يا شاويش عطيه
لتنفجر ماهي في الضحك وتصيح بجوار أذنه : باللبن يا شاويش عطيه
هب كرم جالسآ وقال وهو يزم شفتيه : عاوزه إيه يا ماهي
ماهي بدلال : تعبانه يا كركر
يجذبها كرم في أحضانه ويقول : طب نامي يا حبيبتي والصبح نشوف الموضوع ده....
لتغمض عيناها وتبتسم أيكون ما تفكر به حقيقيآ أتحمل في أحشائها طفلآ وضعت يدها علي بطنها وتثاءبت لتعاود النوم.....
فجأه هب كرم جالسآ وقال بسعاده.
ماهي.... ماهي.... لتكوني حامل
ماهي وهي مغمضه : إن شاء الله يكون كدهٌ....... أنا عندي كل أعراض الحمل ...
كرم بسعاده : حيث كده هقوم أعملك الشاي والنعناع والكمون والينسون يا حبيبتي يا ماهي
لتضحك ماهي بدلال وتقول : مصلحجي كل ده علشان النونو
كرم وهو يهز كتفيه ؛ النونو وأم النونو في عيون أبوالنونو يا ميهو ... وأردف
أنا هقوم. أفرح ماما
ماهي ضاحكه : مش لما نتأكد الأول
كرم بسعاده: إن شاء الله أبوحميد جاي.... """""""""""""""""'"""""""''"""""'''''''''''''''''
في صباح اليوم التالي
يا ألف نهار أبيض يا ألف مبروك يا كرم يا بني إن شاء الله ال قلته دا أعراض حمل
تعيش وتشيل يا ضنايا..... قالت ذلك فاطمه لكرم هاتفيآ وأغلقت الهاتف.....
وهي تصيح يا إيناس تعالي لما أقولك خبر
في شقة كرم
وضعت ماهي طعام الإفطار
نظر لها كرم وقال : مش هتقعدي تفطري معايا
ماهي بإمتعاض : لأ ماليش نفس يا كرم
بس عاوزه نروح بقي أكشف وأعمل تحليل أتأكد
كرم بمرح :حاضر بس النهارده عندي مأموريه يا ماهي
خليكي بكره ولا بعده
ماهي بتفهم : ماشي يا كركر خلي بالك علي نفسك يا حبيبي
كرم وهو يقبل وجنتيها : إدعي لي
ما أن إنصرف حتي وقفت ماهي أمام المرآة لتشد ثوبها للأمام وتتخيل بطنها المنتفخ بجنينها وتبتسم!!
"'""""""""""""""""""""""""""""""".
في المنصورة
ظلت هاله تجلس مع سحر وهمس
قالت هاله : يا سحر ليلي لازم تاكل حاجه مش هنسيبها قافله علي روحها يوم ورا التاني...
قالت هاله : محدش هيأكلها إلا همس
روحي يا همس هجهز الأكل وإنتي إدخلي أكليها...
بالفعل حملت همس صينيه صغيره عليها صحن مكروه وآخر به دجاج...
ركلت همس الباب بقدمها وقالت : إفتحيلي يا ماما أنا همس يا حبيبتي
همس نقطة ضعف ليلي تناديها حبيبتي
لا لن تترك همس أمام الباب
نهضت وجففت دموعها حتي لا تراها همس تبكي هي طفله ويجب ألا تشعر بأحزانها
تريد همس مبتسمه دائما
فتحت الباب وإنحنت تحمل الطعام عن الصغيره وتضعه علي طاوله صغيره بجوار فراش جدتها وجذبت همس لتجلسا
سويآ علي الفراش وتحتضنها بقوه
همس ببراءة : ماما متعيطيش تيته في السما عند ربنا وبتلعب في الجنه كمان
لتبتسم ليلي وتهمس : بتلعب في الجنه
وتضحك همس وتقبل ليلي التي تنهدت وإحتضنتها مره أخري لتقول
ماعدليش إلا إنتي يا همس وخايفه كمان يا خدوكي مني
همس بطريقه طفوليه : لأ يا ماما أنا مش هسيبك أبدآ يا حبيبتي
مش هتجوز كمان علشان ما أمشيش زي عمتو ماهي
لتضحك ليلي : حبيبتي يا همس قلبي
همس بوداعه... يلا ناكل سوا يا ماما
علشان لو ما أكلتيش أنا هروح الجنه عند تيته نعمه!
إحتضنتها ليلي بقوه وقالت : لأ يا همس لأ يا حبيبتي متقوليش كده تاني.
طب كلي يا ماما لو بتحبي همس كلي
حاضر يا همس يلا ناكل سوا وقطعت بيدها قطعه من الدجاج لتضعها في فم همس
وتتناول هي بالملعقه بعض حبيبات المكرونة لتضعها في فمها وتلوكها بدون شهيه..
دخلت سحر وقالت : يعني أتحايل عليكي ما ترضيش
وهمس تاخدي منها الأكل
ضحكت همس بإنتصار طفولي
إقتربت سحر من ليلي ووضعت في يدها شئ
لتنظر همس بيدها وتقول بشجن : سلسلة تيته نعمه
سحر بحنان : قالت لي إن السلسله دي تلبسها ليلي
ليلي بحزن : أيوه كانت قايلالي إن السلسله
أخدها لو جرالها حاجه
القلب الصغير ده فيه صورة ماما و صورتي وأنا قد همس
إحتضنت قلب السلسله الذهبيه براحة يدها
قالت سحر بتأثر : وإدتني الحلق بتاعها الله يرحمها
نظرت ليلي لأقراط جدتها بيد خالتها سحر وقالت بتنهيده
الله يرحمك يا تيته نعمه!!!!!
ربتت سحر علي كتف ليلي وقالت
ليلي حبيبتي إن شاء الله بكره هروح بيتي في طنطا علشان عمك فريد لوحده يا بنتي
وطبعآ مينفعش تفضلي لوحدك
تعالي يا حبيبتي معايا هنقفل البيت بالقفل
وتيجي تعيشي معايا لأن أنا هبقي قلقانه عليكي!
ليلي شاكره! متحرمش منك يا خالتي بس أنا بيتي هنا
البيت ال عاش فيه أمي وأبويا وعشت فيه مع تيته نعمه
وكمان أنا خلاص قدمت في كلية التجاره في القاهر ه يمكن أشوف سكن هناك لحد ما أخلص السنتين بتوع الدراسة
نعمه برفق : تعالي عندي وإبقي روحي الجامعه من هناك يا بنتي
لظروف سحر ولأنها لا تأمن علي ليلي بوجود زوجها زائغ العين لم تتمسك بوجود ليلي عندها وأذعنت لرغبتها في المكوث ببيتها!
"""""""''""""""""""""''"""""""""
في قسم الشرطه
دخل الشاويش عطيه مكتب كرم ليؤدي التحيه العسكريه قائلا : تمام يا فندم
الباشا بهجت عاوز حضرتك فوق.
لينهض كرم من مقعده ويقول
طيب رايحله
صعد كرم للطابق العلوي وطرق الباب وأدي التحيه العسكريه لرئيسه قائلا
حضرتك طلبتني يا فندم
تعالي يا كرم إتفصل
جلس كرم ليتحدث بهجت
المهمه ال إنت رايحها صعبه يا كرم
عاوزك تجيب راس المجرم الكبير
علشان زودوها قوي يا كرم متاجره ف الأعضاء البشريه وخطف
كرم بطاعه : حاضر يا فندم إن شاء الله أكون عند حسن ظن حضرتك يا فندم
بهجت : ربنا معاك يا كرم إتفصل جهز نفسك.
تمام يا فندم قالها كرم. وهو ينصرف
""''''''''"""""""""""''''''''""''''''''''''''
في شركة مراد :
جلس علي مكتبه يوقع بعض العقود
وإستئذنه رامي أن يدخل إليه هو ومهندس
يريد توقيع بعض الأوراق
فأذن له وجلس يتكلم معهم عن العمل والمشروع الكبير بترميم سلسلة مدارس بإحدي المحافظات. ...
أنهي مراد عمله معهم وشعر بالإرهاق فطلب من سها إرسال عصير منعش
أحضرت سها زجاجة العصير وضعتها أمامه وإنصرفت
حمل الزجاجه ليحتسيها ليجدها عصير التوت الأحمر إبتسم وتذكر مطويته التي حملها بمحفظته
أخرج الورقه المطويه بعنايه
وقرأها ليبتسم ثم أعادها مكانها أخذ يملس ذقنه عدة مرات بشرود وتذكر أنه لم يخبر أمه عن مكالمة همس
حمل هاتفه وقدسجل عليه إسم شمس نظر للرقم بتمعن وتردد
ولكنها هاتفها بالفعل
بعد دقيقه سمع صوت همس
لكنها لم تكن مرحه كالمرات السابقه
مراد :إزيك يا همس
همس بلطف : الحمد لله
مراد بتساؤل : هتيجو إمتي
همس ببراءة : ماما بس ال بتعرف
مراد بمراوغه : إيه كلتي توت من الشجره
همس بحنق : لأ ماما مش راضيه تطلعني علي الشجره
أخيرآ قال : فين ماما يا همس
همس بتأثر : نايمه علي طول علي طول علي طول
شعر مراد بالقلق فسألها : ليه نايمه
همس بحزن : زعلانه وبتعيط علشان تيته نعمه راحت عند ربنا في الجنه
ماتت قالها مراد بذهول ثم أردف إديهالي يا همس
همس بملل : نايمه يا عمو
طيب مع السلامة يا حبيبتي وضع هاتفه أمامه علي المكتب وشعر بالقلق...... """''''''''''''''"''''''"''"''"'"'''''''''""""""
عادت سحر إلي بيتها بعد أن حاولت إقناع ليلي لإصطحابها معها ورفضت ليلي. ..
ظلت ليلي تشعر بالكآبه. ...
تطعم همس وتحاول أن تتناول طعامها فلا تستطيع حتي ضعفت وأصبحت تنام ولا تستيقظ إلا لإطعام همس
تلمس السلسله الصغيره وتبتسم بحزن
كم تركت نعمه فراغ لليلي....
نامت وجلست بجوارها همس وقد شعرت هي الأخري بالملل فخرجت لتشاهد برامج الكارتون بالتلفاز
،،،،،،،،،،،،،،،،،،،,,,
كما أصبحت ليلي أمست بنفس الكآبه والحزن المصيطر عليها
تطعم همس وتؤدي فروضها وتنام بمجرد أن تضع رأسها علي الوساده
لتسنغرق في أحلامها تبتسم أحيانا لرؤية جدتها أو أمها في هلاوس من عقلها الباطن
وتبكي أحيانا
خرجت همس لتلعب عند شجرتها حينما سمعت سمعت رنين الجرس الخارجي للباب
إقتربت منه وقالت
مين..... طنط هاله
أتاها صوت عمها : أنا مراد إفتحي يا همس
فتحت همس الباب وقذفت نفسها في أحضان عمها وقالت
إقفل البوابه يا عمو علشان الحرامي لأنه ممكن ياخدني زي المره ال فاتت
ليبتسم مراد ويحملها ليعانقها
قال لها بحنان : همس ماما فين
همس بملل : طبعا نايمه : نايمه يوم ويوم ويوم تلت أيام
صحيها يا همس
دخلت همس تحاول إيقاظ ليلي فتململت ولم تستطيع أن تستيقظ تشعر بالضعف
خرجت لمراد الذي يقف بالفناء الخارجي
وجذبته من يده وقالت
تعالي إدخل يا عمو مراد
مراد بتوتر : هيه ماما نايمه فين
أشارت لغرفة جدتها
وقف بجانب الحائط ونادي : شمس
شمس ثلاث مرات
إلتقطت آ ذان ليلي النداء : ظنت أنها تحلم
قالت : مراد..... مراد
نهضت من فراشها وخرجت من الحجره
بشعرهاالمبعثر وقالت
همس أنا بحلم
مراد مبتسم : لأ علم
علم همست ليلي لتدلف إلي حجرتها مسرعه
ترتدي حجابها بسرعه كانت ترتدي عباءه سوداء لم تبدلها منذ ساعدتها خالتها على إرتدائها
دخلت همس وقالت : عمو مراد بره يا ماما
هو واقف بره بينادي عليكي
ليلي تنحي وتزدرد لعابها بإرتباك : طيب يا همس إخرجي خليكي معاه وأنا هآجي
خرجت ليلي وهمست : سلام عليكم
رد السلام ونظر بحزن لوجهها الشاحب وعيناها الحمراوتين من أثر البكاء
قالت بضعف : هو حضرتك جاي تاخد همس مراد بنفي : لا أبدآ أنا كان عندي شغل هنا ف المنصوره
خطر ببالي أعدي يمكن تحبو ترجعو
ليلي بلا مبالاه : لأ مش دلوقتي مش قادره أشوف حد
مراد بمراوغه : تقصدي بالحد ده انا
ليلي بسرعه : لا والله
آه فجأه دارت الدنيا بليلي وشعرت بدوار
همت أن تقع ولكن يدا مراد القويه ساندتها
مالك يا حبيب...... ؟؟؟؟؟؟؟هم ان يقول حبيبتي لكنه قطع الكلمه بسرعه....
وجحظت عينا ليلي بتعجب وقالت
أنا أنا مكلتش حاجه من امبارح فدخت
مراد بلهجه آمره : طب إدخلي إلبسي ولبسي همس هنخرج
لأ لأ مقدرش
مراد بتصميم : لا هتقدري يلا إسمعي الكلام
ليلي بضعف : حاضر يا مراد بيه
مراد بإبتسامه : ممكن بلاش بيه دي
ليلي برقه : حاضر يا مراد بيه
ليضحك مراد قائلا : لأ مطيعه قوي
ليلي بشبه إبتسامه : آسفه يا باشمهندس
همس القلوب
الفصل من ١٥ الي ١٦
للكاتبة اميرة الشافعي
#الفصل_١٥
الفصل الخامس عشر
جلس مراد في سيارته ينتظر خروج ليلي وهمس
رق قلبه لمظهرها الحزين وضعفها...
كان يفكر كيف قاده تفكيره إلي القدوم إليها
ظل يصارع عقله بعد أن أخبرته همس بوفاة الجدة....
روادته الأفكار بشراسه هل يذهب إليها قالت له همس أن والدتها نائمه منذ ثلاثة أيام....
أخيرآ وبعد تفكير قرر المجئ إليها
مشاعر مراد متضاربه بين قلب يريد وعقل يرفض......
فتحت همس البوابه وخرجت تجذب يد ليلي
ترجل مراد من السياره وفتح الباب لهمس لتجلس في المقعد الخلفي
ونظر بتمعن لليلي التي إرتدت فستان باللون الأسود وحجاب رصاصي اللون ثم فتح باب السياره الأمامي لتجلس هي بجواره
لفت رأسه لهمس ملتفتآ وقال : نروح مطعم إيه يا همس دي بلدكم بقي وعارفينها
صاحت همس بمرح : أنا عاوزه بيتزا وبس
نظر لليلي الهادئه الصامته وقال : وماما بتحب إيه
همس بسعاده : بيتزا
إختار مراد مطعم هادئ ودخل تتبعه ليلي وهمس
ليجلسو معا
وطلب لهمس ما طلبت وبعض الأطعمه والعصائر الأخري....
يلا كلي : قالها مراد لليلي التي نظرت للطعام بلا شهيه رغم إحساسها بالجوع
وبدءت تتناول بعض الطعام.
مراد بإبتسامه : علي فكره الهدوء الشديد ده مش لايق عليكي أبدآ
ليلي بتعجب : إزاي
مراد ممازحا : واخد عليكي قويه
ليلي بمراره وهي تتلمس سلسلة جدتها : موتها هزني قوي كانت حنونه.....
مراد بتفهم : الدنيا مبتقفش يا شمس
همس بإعتراض : كلام.... كلام..... كلو بقي
لتضحك ليلي وتنظر لها بمحبه.
مراد بتساؤل : بيعجبك كل ال همس بتقوله ليلي مبتسمه : همس دي حياتي
وضع مراد بعد الطعام بفمه ثم قال...
أنا ملاحظ حاجه علي فكره ياشمس
همس معترضه : لولو ماما قول لولو
مراد يبتسم بتعجب : إيه لولو دي
ليلي بسرعه وإرتباك : دلعي لولو شوشو اي حاجه
كنت بتقول ملاحظ إيه..
مراد وهو ينظر لعيناها : مبتجبيش سيرة مجدي الله يرحمه أبدا مع إني أسمع إنكم كنتو .......
قاطعته ليلي بإرتباك : الله يرحمه هو إنت جيت ليه وعرفت منين إن جدتي ماتت...
همس بسعاده.... أنا ال قلتله صح يا عمو مراد في التليفون
صح يا همس
صمت مراد قليلا وقال : أنا شايف ترجعو معايا أحسن
ليلي بإعتراض : علي فكرة أنا بحب بيتي قوي ومش متضايقه هنا بالعكس....
أردفت بنبره حزينه: أنا عارفه إن كل ال يهمك همس وبس لو رضت تيجي معاك خدهأنا كده.. كدة.... لازم أتعود أعيش لوحدي مرر مراد يده علي وجهه بعصبيه وقال...
مين قالك إني كل ال يهمني همس وبس
أنا بطريقه أو بأخري حاسس بمسئوليه تجاهكم ""
ليلي بعصبيه : أنا مش محتاجه مسئول عني فاهم ولا لأ أنا قويه وأقدر أعتمد علي نفسي يا ريتك ما ظهرت في حياتي يا ريتك ما خدت همس وخلتني آجي وراها
إنت إتسببت لي في حاجات صعبه
عايشه بطريقه غير طريقتي ومكان غير مكاني وناس غير ناسي وقابله
قابله ومضطره علشان همس
بس تعبت والله تعبت.... وفي الاخر أنا في حرب خسرانه... معركه محسومه لصالح فخامة عيلة الخرافي
ال بيبصو للناس من فوق
فوق قوي من برج عاجي عالي وبالتالي بيشوفوهم أقزام ....
قذف مراد شوكته ومرر ال المنديل الورقي علي فمه بعصبيه وقال...
هغسل إيدي في الحمام جوه لحد ما تخلصو
بعد إنصرافه عبست همس بوجهها
وقالت ببراءه : أنا زعلانه منك يا ماما بتزعقي لعمو مراد وعمو مراد حلو
شعرت ليلي بأنها خرجت عن وعيها وربما ندمت لما قالته بالفعل
نظرت لهمس التي تركت الطعام وقالت
شبعتي يا همس
همس ببراءة : اه كلت كتير آد كده وفتحت يديها الصغيرتين
ليلي بهدوء : قومي يلا تغسل إيدينا
دخلت الحمام النسائي ونظفت لهمس يديها وفمها وعادت لتجد مراد يقف بجوار الطاوله....
وعندما إقتربو قال بجديه : يلا علشان أروحكم وأمشي...
تبعته ليلي وهي تشعر بالأسف لما قالته ضغطت علي شفتها السفلي بأسنانها العلويه. تشعر بالندم لم يتحدث مراد وظل صامتآ
إلي أن قالت ليلي
أنا آسفه بجد آسفه بس أعصابي تعبانه لكن والله أنا فرحت لما شفتك قصدي لما جيت يعني....
عندما وصلو لمنزل ليلي كان مراد لا يزال صامتآ.... جاد الملامح..
ترجلت ليلى. وكذلك همس وقال مراد بخشونه
سلام عليكم أنا ماشي عاوزين حاجه
ليلي. وهي تدفع همس نحوه
هتسيبي عمو عماد يمشي زعلان يا همس
يلا هاتيه نشرب شاي في المدخل جنب الشجره...
لتدخل همس كالقذيفه بجوار مراد وما زالت ليلي تقف بجوار باب السياره الأمامي
تضحك علي همس التي أخذت تجذب مراد
وتقول بطريقه طفوليه
ممكن تدخل نشرب الشاي ماما بتقول
علشان أخليك تلعب معايا بالكوره.
مراد بجديه..... لأ يا همس إنزلي يلا أنا مش جاي
همس وهي تنظر لأمها بغيظ : إنتي غلطانه يا ماما. وزعلتي عمو مراد ومن الشجاعه المؤدبه ال يغلط يقول أنا غلطان صح
ضحك مراد رغمآ عنه لطريقه همس الجاده وقال..
الشجاعه الأدبيه مش المؤدبه
إنزل بقي : قالتها ليلي بتوسل
وأخيرا ترجل من السياره وسبقهما بخطوات إلي الداخل...
سارت ليلي وهمس تتشابك أيديهما
همست ليلي مازحه : يا واد تقيل
لتصيح همس ضاحكه : ماما بتقول يا واد تقيل عليك يا عمو مراد
لتحمر وجنتا ليلي وتهرول للداخل وهي تقول
أنا داخله أعمل شاي
و يضحك مراد مع همس بصوت عالي وبعد قليل حملها ليرفعها إلي شجرة التوت لتلتقط بعض حبات التوت وتمنحه إياها
ثم أحضرت الكره ولعبت معه ليركلاها بالأقدام
في الداخل قالت ليلي لنفسها : منك لله يا همس يا فتانه كسفتيني ،!! "'"'"'''''''''"""""""""''''''''''''''''''""'''''''
في شقة كرم :
رن هاتفها لتجدإسم المتصل كرم الذي دونته علي هاتفها كركر حبيبي....
لتجد صوت غريب جاد
السلام عليكم
وعليكم السلام.... فكرت هل ضاع هاتف كرم ووجده هذا الشخص
مين معايا دا موبايل كرم..
أيوه يا فندم
حضرة الضابط إتصاب في المأموريه وهو دلوقتي بمستشفي القوات المسلحة
صرخت ماهي : كرم جراله حاجه
مات ليكونو قتلوه اتكلم
والله مصاب بس يا فندم بس هو ف"''''(( العمليات
لم تنتظر وهبت واقفه لتهرول لخزانة ملابسها وترتدي ثياب بسيطه علي عجل
هاتفت والدتها. وهي تصرخ : إلحقيني يا ماما كرم في المستشفي
لم تستطع ماهي قيادة سيارتها فذهنها مشتت إستقلت تاكسي وأمرته وهي منهاره أن يسرع.....
"""""""""""''''''""""""""""""""
جلس مراد يحتسي الشاي وسألته ليلي
إنت مرحتش الشركه النهارده
مراد بنفي : لأ عارفين اني عندي شغل بره
إبتسمت ليلي بطريقه ماكره وقالت
وجاي المنصوره بالصدفه
مراد يتساءل ضاحكآ : عاوزاني أقولك إيه
إرتبكت ليلي وقالت : ولا حاجه هتقولي إيه يعني..
جاءه إتصال مباغت : فنظر بشاشة هاتفه وقال دي ماما
السلام عليكم إزيك يا ماما
نوال بإضطراب : إنت فين يا مراد
مراد بثبات : عندي شغل في المنصوره يا ماما
نوال بحزن : طيب يا حبيبي كرم كان في مأموريه والمجرمين ضربوه وف المستشفى وأختك منهاره
نهض مراد وقال بفزع : كرم جراله إيه
نوال ببكاء : ضربينه بالرصاص يا بني
طيب يا ماما مسافة السكة وهكون عندكم
هم أن يغلق الخط حينما قالت نوال
بتقول ف المنصوره يا مراد
أيوه يا ماما
طب يا بني ماتعدي تجيب همس وحشتني وقلقانه عليها
مراد موافقآ : حاضر يا ماما هجبهم معايا وأردف مع السلامه.....
نظر مراد لليلي المتسائله وقال : ضربو كرم بالرصاص
أنا لازم أمشي حالآ تحبو تيجو معايا
ليلي بهدوء : طيب إديني ربع ساعه أجهز همس وأجهز
مراد : هستناكم ف العربيه.... """"""""'''""""""""""""""""""""""""""
في فيلا الخرافي جلست زيزي تبرد أظافرها
وتتابع بعينيها آني وهي تدرس لبيري المتململه العابسه..بعض قواعد الإتيكيت...
عندما لمحت وداد تنزل الدرج وبيدها بعض الأغطيه والمفروشات
وداد..... نادت زيزي لتهرع إليها وداد
إقتربت وداد وقالت.... نعم يا ست زيزي
زيزي بلهجه آمره : تعالي معايا أوضتي عاوزاكي
دخلت عرفتها تتبعها وداد
جلست زيزي علي مقعد مريح أما م مرآتها الكبيره
وقالت بدلال : بصي يا دودو إنتي الوحيده ال بتتنقلي في كل مكان في البيت
أنا قلت لك قبل كده لما تعرفي حاجه عن اي حد قوليلهالي
خصوصا الزفته ال إسمها شمس لكن مقلتليش حاجه.....
وداد بإرتباك : أقول لك إيه بس
زيزي بإبتسامه مزيفه : أي حاجه بتروح فين بتيجي منين بتكلم مين
بتقول إيه لطنط نوال لما بتقعد معاها فهمتي
إبتسمت إبتسامه ماكره وفتحت درج أسفل الطاوله المثبت عليها المرآه وقالت. وهي تخرج أوراق ماليه
خدي يا وداد دول ألفين جنيه ولما تعملي ال بقولك عليه هديكي أكتر..... أكتر بكتير
لمعت عينا وداد حينما رأت الجنيهات
وتناولتها بسعاده وهي تقول : حاضر يا هانم
وتبتسم زيزي وهي تلوي فمها بمكر شديد """"""""""""""""""""""""""""""""""
في المستشفي
أخذت ماهي تزرع الإستراحه ذهابآ وإيآبآ بقلق
إقتربت منها نوال تتوكأ علي عكازها وقالت
بحنان : إهدي يا بنتي إن شاء الله خير
ماهي بعويل : محدش راضي يقول فيه إيه يا ماما كل ما أسآل يقولو في العمليات أنا هتجنن ممكن أخسر كرم يا ماما ؟ أنا مقدرش يا ماما أعيش من غيره أبدآ..
لتجذبها نوال برفق إلي أحضانها تهدئها
أشارت نوال إلي شاكر وممدوح القادمين بإتجاههم وقالت
أبوكي وأخوكي رجعو من عند الدكتور أهم وهيقولو لنا قالهم إيه
هرولت ما هي بإتجاههم وصاحت : طمني يا بابا طمني يا ممدوح قالكم إيه الدكتور كرم ماله صاحت بكل ما لديها من طاقه : يا ناااااس طمنوني
شاكر بحنان : يا حبيبتي كرم كويس خد رصاصه في الطحال
و لازم يستأصلو الطحال
ماهي بحسره : هيشيلوله الطحال يا حبيبي يا كرم ربنا ينتقم من الظلمه
حسبي الله ونعم الوكيل في المجرمين ال ضربوه
إندفعت لتبكي بأحضان والدها المتأثر بحزن إبنته
وربت علي ظهرها ممدوح بحنا ن وقال إهدي يا ماهي
مراد.... قالتها نوال لمراد المندفع بسرعه تجاههم
حمد الله علي سلامتك يا حبيبي إنت جيت
أيوه يا ماما .... وهمس ومامتها روحتهم البيت
ربت علي زراعها والدته بحنان
وما أن رأته ماهي حتي هرولت عليه
ليحتضنها وقالت : شفت يا مراد شفت كرم حصله إيه
مراد بحزن : إن شاء الله ربنا هيسترها يا حبيبتي....إجمدي شويه...
نظر حوله وقال : ممدوح فين
ماهي بضعف : كان هنا من شويه وقال هيروح يغير هدومه وجاي أصله من الصبح باللبس ال عليه...
"""""""""""""""""""""'""""""'"'
في فيلا الخرافي
ما أن دلفت همس التي هرولت تسبق أمها إلي داخل الفيلا ورأت بيري تجلس مع آني إلا وجرت عليها تصفق بيديها بطريقه طفوليه
وقالت
بيري أنا جيت
هبت بيري واقفه لتقترب من همس وتعانقها
في نفس اللحظه التي خرجت زيزي من غرفتها لتجلس حيث تجلس بيري وآني في الردهه
لتجد الطفلتان متعانقتان تقفزان معا ببراءه
صاحت زيزي بكل قوتها : بيري
لتنظر بيري وهمس لزيزي وتأففت همس قائله... ييييييه
لتقترب زيزي من الطفلتين وتجذب بيري لتقذفها بجوار آني
لتصيح همس بغضب طفولي : إنتي وحشه
لتصيح زيزي فيها بقسوه مالكيش دعوه ببيري فاهمه ولا لأ
إنت وحشه وأنا بكرهك قالتها همس
لتصفعها زيزي قائله بغيظ : بنت قليلة الأدب و لازم تتربي
جحظت عينا ليلي التي دخلت للتو لتري مافعلته زيزي
وبدون أن تلفظ كلمه واحده وثبت عليها كنمر صغير لتجذبها من شعرها صارخه
بتضربي همس إنتي إتجننتي دأنا عمري ما مديت إيدي عليها يا كلبه
أنا كلبه يا بنت البوابين قالتها زيزي بحنق
لتصر ليلي علي أسنانها وتقول بغيظ ووعيد : أنا هوريكي بنت البوابين لو حد ضرب بنتها بتعمل فيه إيه قالت ذلك وهي تبتعد برأسها لتخبط زيزي التي صرخت
آه
وهمست ليلي : منفوخه علي إيه يا حقيره
رفعت زيزي قدمها بحذائها ذو الكعب العالي الحاد ودعست أصابع ليلي التي صرخت ،،،،آااااااه
ولكنها قاومت ألمها لتجذب شعر زيزي من جديد فتصرخ هي الأخري
صوت ممدوح الجهوري جعلت كلا منهم تنتفض وتبتعد عن الأخري
ممدوح بصوت أجش : إيه ال بتعملوه ده
لتقترب منه زيزي بشعرها المشعت وهي تضع يدها علي جبهتها وتصيح
تعالي يا ممدوح شوف بنت البوابين بتضربني
لينظر إلي ليلي بغضب ويتساءل : بتضربيها ليه
ليلي بكبرياء : إسمها بنضرب بعض مش أنا يضربها مراتك المحترمه بنت الذوات
بتضرب همس بالقلم وتزقها
عارف ليه علشان بتسلم علي بيري وإسأل آني لو مش مصدقني كمان
إيه ال حصل يا آني. سأل مراد
لتجيب آني بكل صراحه بلهجتها الغريبه
حيث تنطق حرف الحاء هاء....
ال هصل إن همس بتسلم علي بيري وتبوس هوه
المدام زيزي ضربت همس وهدفتو علي الكرسي
مدام شمس زعل ضرب مدام زيزي هصل إشتباااك كبير
الاتنين غلطان كتير بس المدام زيزي غلط الأول بصراهه...
لتصيح زيزي بآني :حد قالك قولي رأيك ولا إحكمي إخرسي يا آني
تلفت ممدوح بنظره بين ليلي المتحفزه وزيزي الغاضبه وتجاهلهن تمامآ
وإقترب من همس التي جلست تبكي بخوف وفزع لأنها تري المعركه الطاحنه بين ليلي وزيزي
حينما إقترب منها ممدوح
قالت بصوت باكي مؤثر : والله يا عمو ماعملت حاجه
أنا بوست بيري بس وطنط زيزي ضربتني هنا
أصابع زيزي الطويله التي تركت آثارها علي وجنة الصغيره أحزنت ممدوح
فجذبها إليه يحتضنها وقال : معلهش يا حبيبتي حقك عليه يا همس
وينظر لبيري المذعوره : ليحتضنها هي الأخري فتبكي
بتعيطي ليه يا حبيبتي سألها ممدوح لتقول وهي تنهنه : علشان مامي ضربت همس
إقتربت زيزي من ممدوح وقالت غاضبه :
بتتحداني يا ممدوح ولا كأني مراتك
رايح تصالح البنت حفيدة البوابين
صفعه : مدويه مباغته علي وجنتها من ممدوح ألجمتها لتصمت تمامآ
إخرسي يا زيزي
همس بنت مجدي أخويا وليها في الفيلا وفي كل حاجه زيها زي بيري
جذبت ليلي همس لتصعد جناحها مسرعه
وتتعالي صيحات زيزي الغاضبه * "'''''"'''''""""'""'''''''''''''''''''''''''''''''''
في المشفي
خرج الأطباء مرهقين منهكين القوي من غرفة العمليات
لتهرع إليهم ماهي لتسأل بلهفه : طمني يا دكتور
أجابها الطبيب بوقار : إطمني يا مدام الحمد لله ربنا ستر إستخرجنا الرصاصة ولكن إضطرينا نستأصل الطحال
الكابتن الحمد لله هيبقي كويس بس هو تحت تأثير المخدر لسه
ماهي برجاء : الله يخليك دخلني أشوفه ومش هتكلم أبص عليه بس....
أقنعه مراد أن يوافق علي طلب شقيقته لعلها تهدأ قليلآ
بالفعل إرتدت ماهي كمامه طبيه وثياب معقمه ودخلت
لتري كرم ممدآ علي الفراش لا حول له ولا قوه
يتنفس بهدوء ويهمس بضعف
ماهي.ببكاء....
حبيبي كرم سلامتك يا روحي
لتجذبها الممرضه برفق إلي الخارج...
ظلت تنتظر حوالي نصف ساعه أخري مع والديها ومراد
حتي إستفاق كرم.... وركضت ماهي إليه لتركع علي الأرض وتقبل يده لتبللها بدموعها الغزيره
إلا أن همس كرم بضعف : أنا كويس يا حبيبتي الحمد لله
نظر لمراد وأبويها وقال أمال ماما فين
وضعت ماهي يدها علي وجنتها وشهقت
لقد نسيت تمامآ أن تتصل بها وقد أقبل الليل...
قالت ماهي بإرتباك حاضر يا حبيبي هيجو حالا
وخرجت لتتصل بوالدته التي صرخت وصاحت
من إمتي وإبني مرمي في المستشفي
ماهي بإرتباك : هو كويس يا طنط مستنينك يا حبيبتي....... وأغلقت الهاتف في وجل.
#الفصل_١٦
الفصل السادس عشر
صاحت فاطمه وهي تتجه صوب ماهي تتبعها إيناس بطفليها
إبني فين... كرم رجاله إيه يا ماهيتاب
ماهي بتوتر : كرم الحمد لله عمل العملية وفاق بس الدكتور المتابع طلعنا كلنا علشان ينام ويرتاح...
نظرت فاطمه لوالديها ومراد وقالت
إنتي هنا من إمتي يا ماهي
ماهي بصوت منخفض : من قبل الضهر يا طنط
فاطمه بصوت عالي : إبني مرمي من الصبح مضروب بالنار وإنتي هنا إنتي وعيلتك وأنا معرفش
ماهي بآسف : حقك عليه يا طنط بس والله إتلبخت و...
قاطعتها بخنق : واللبخه دي عليه بس
عديني لما أروح أشوف إبني يا ماهي.. يلا يا إيناس تعالي ورايا
لمعت عينا ماهي بالدموع لتقترب منها نوال وتقول بحنان : مالها يا ماهي حماتك مشت من غير ما تسلم علينا
ماهي بحزن : زعلانه علشان متصلتش بيها من ساعة ما عرفت
نوال بتفهم ،: ليها حق يا حبيبتي لو أنا مكانها هزعل راضيها يا بنتي بكلمتين
ماهي بقلة حيله : والله إعتذرت لها يا ماما
نوال برفق : معلهش أنا هراضيها يا بنتي
إقترب شاكر من نوال وقال : تعالو بقي روحو معايا أنا ومراد ونيجي الصبح والدته قالت إنها هتفضل معاه
ماهي بحزن : لا يا بابا أنا مش هامشي بس ماما تعبت وإنتم كمان
يلا إتفضلو إنتو
يلا يا ماما. علشان خاطري روحي معاهم
نوال بآسي : طيب يا حبيبتي هنيجي لك الصبح
وهبعت لك أكل وغيار مع السواق
طيب يا ماما قالتها ماهي وأردفت وهي تربت علي يد أبيها ومراد
ربنا ميحرمنيش منكم أبدآ؛؛؛
جلست فاطمه تبكي بجوار كرم وتهدئها إيناس
خلاص يا ماما إهدي يا حبيبتي ما الدكاتره
قالو إنه كويس بس نايم
فاطمه وهي تجفف دموعها : إفتكرت أخوه الله يرحمه
إقتربت فاطمه من كرم لتمسد علي رأسه بحنان وتقول من بين دموعها
فوق يا كرم إصحي يا قلب امك جيبالك حبايبك عمر وعلي معايا.....
دخلت ماهي بهدوء وقالت بتأثر : الدكتور قايل ساعه كده وهيفوق ويكلمنا يا طنط
لتنظر لها فاطمه بإستياء وتقول : إسكتي اإنتي خالص لولا ما إحنا ف المستشفى وحالة إبني دي كان بقالي حساب تاني معاكي
بكره تعرفي يعني ايه ضني....
لتخرج ماهي مهروله وتجلس في الإستراحه وتبكي بصوت مسموع وتقول
مس كفايه زعلي علي جوزي ناقصاكي كمان تبهدليني كل شويه
لتجد يد حنونه تربت علي كتفها رفعت رأسها لتجد إيناس التي جلست بجوارها
وقالت : معلهش يا حبيبتي قلب أم برده دلوقتي لما كرم يضحي وربنا يتم شفاه هتنسي دي طيبه والله بس هيه ال ف قلبها علي لسانها
ماهي بتفهم : إن شاء الله.... شكرا يا إيناس
متحرمش منك.......... ""'"""""""''''"""""""""""""""""""""
أمام الفيلا صف مراد السياره ليترجل منها هو ووالديه
تعجبو جميعا حينما إقتربت منهم زيزي تحمل حقيبتها بيد وتجذب بيري من الأخري
خير يا زيزي راحه فين يا بنتي.... سأل شاكر
لتنهار زيزي وتقول بصوت عالي باكي : ماشيه يا عمو شاكر راحه بيت باباه
حصل إيه بس فهميني : قالت نوال
قال مراد بتعقل : طب بس تعالو ندخل جوا تتفاهم ولو ليكي حق أنا هوصلك بنفسي
إنتهزت زيزي الفرصه لتدخل فكرامتها دفعتها لتترك البيت أما ما تريده حقا أن تبقي جاثمه علي أنفاس ليلي وابنتها
كان ممدوح يقف في الردهه يراقب المشهد
لقد حاول كثيرا أن يمنعها ويراضيها ولكنها رفضت
شاكر بجديه : حصل إيه يا ممدوح
ممدوح بضيق : إسألها يا بابا
زيزي بغضب عارم : البيه يا عمي بيضربني علشان بنت البواب
همس مراد : شمس
أيوه زفت قالت ذلك زيزي وهي ترفع شعرها ليظهر جبينها الأحمر المتورم
نوال بتعجب : هيه ال عملت فيكي كده
صاح شاكر : أنا مش فاهم حاجه يا وداد إندهي همس ومامتها من فوق
لتنزل ليلي بعد قليل بكل إباء وهي تجذب همس لتجد الجميع جالسين بغرفة الصالون
مجرد أن دخلت الغرفه
سألها شاكر بعبوس : إنتي ضربتي زيزي يا شمس
إلتقطت ليلي أنفاسها وقالت بكبرياء : أيوه ضربتها
لا يعلم مراد لما كان يريد الإبتسام ويحاول منع نفسه بشده.....
وقفت تلك القصيره لتعترف لشاكر بلا أدني خوف
نوال بلوم : إزاي تعملي كده
لتجذب ليلي همس وتديرها لتظهر آثار أصابع زيزي علي وجنتها وتقول
علشان كده...
شهقت نوال : مين عمل فيكي كده يا همس
لتشير همس لزيزي وهي تمد شفتها السفلي بطريقه طفوليه وتقول بحزن : طنط زيزي ضربتني وزقتني وقعتني
علشان بسلم علي بيري بس وبكت وقالت
والله ماعملت حاجه يا عمو مراد
ليجذبها مراد ويقول بغضب لزيزي ؛ إزاي تضربيها يا زيزي كده
زيزي وهي تصيح ؛: وأنا ال بنت البوابين ضربتني وممدوح ضربني علشانها
ممدوح : أنا ضربتك علشان ال بتقوليه علي همس وإنتي عارفه
زيزي بعصبيه : وهقولها تاني يا ممدوح حفيدة البوابين مالهاش دعوه ببنتي
لتصيح نوال : دي بنت مجدي يا زيزي
مراد غاضبا : أقسم بالله لومديتي إيدك عليها تاني
لتقاطعه نوال..... يعني إنتي يا زيزي ضربتي همس من غير سبب
ليلي وهي تنظر لزيزي بتحدي : وحتي لو بسبب مش من حقها تمد إيدها عليها
بغبائها
سامع يا عمو بتقولي إيه
نظر شاكر لهمس وقال معلهش يا حبيبتي متزعليش
وإنتي يا زيزي أول وآخر مره تمدي إيديكي علي بنت مجدي هيه حفيدتي زي بيري بالظبط نظر لليلي بإستياء وقال : بغض النظر عن أي حاجة.....
وأمعن النظر لليلي وقال بلهجه آمره ؛؛؛؛ إنك لازم تعتذري يا شمس لزيزي
ميصحش تضربيها
تدخل مراد : خلاص يا بابا الاتنين غلطو وزيزي إل بدءت
لتقول ليلي بتحدي : مافيش مشكله يا مراد
بيه خلاص لو شاكر بيه عاوزني أعتذر لها
خلوها تعتذر لهمس وتبوس رأسها كمان
قدام بيري وآني وساعتها هعتذر لها...
نظر لها مراد بإعجاب : فقد وضعت الكره بملعب زيزي
زيزي بلهجه متعاليه : إنتي إتجننتي
نوال بحكمه : فعلا يا زيري همس بنت صغيره وإنت زعلتيها مافيهاش حاجة لما تصالحيها
حاول ممدوح إقناع زيزي أن تفعل ووعدها أن يعتذر لها أيضا
إقتربت زيزي من همس وهي تزدرد لعابها بغصه....
فقالت ليلي إستني لما أنادي بيري واآني
لتنظر لها زيزي بكراهيه
بالفعل تحضر بيري بصحبة مربيتها
لتقبل زيزي رأس همس وتقول.... متزعليش يا همس.... سوري
فيقبلها ممدوح قائلا : حقك عليه يا حبيبتي
لتقترب منها ليلي مبتسمه... وتقول بدلال مفتعل
أسفه يا زيزي .. سوري
ثم جذبت همس لتصعد جناحهما
ونظر شاكر لممدوح وقال : يلا يا ممدوح خد مراتك وإطلع صالحها
هم ممدوح أن يمسك ذراع زوجته فإنتفضت ودفعت يده بعيدآ وهرولت لتصعد غرفتها غاضبه
ليشير له مراد وهو يضحك : وراها يا معلم
ليصعد ممدوح في آثر زوجته وهو يغمز لمراد يضحكان سويآ
تنحنح شاكر وقال : البنت شمس دي زودتها قوي ومش عارف طالعه فيها علي إيه لتكون قعدتها هنا نسيتها أصلها
و عامله ندها بند زيزي
مراد بإعتراض : إسمحلي يا بابا أعترض علي رأي حضرتك كل إنسان عنده كرامه
لتتنهد نوال بحزن وتقول :
إيه رأيكم أقول لوداد تخلي صالح يحضر العشا
شاكر بهدوء : لأ أنا تعبان وهطلع أنام
صعد شاكر ليتجاذب مراد مع أمه أطراف الحديث
لتدخل وداد وتقول : شهد هانم وأخوها بره
خليهم يدخلو قالتها نوال
دخلت شهد لتلقي السلام وتقول بغضب
إزاي يا مراد متقوليش علي ال حصل لكرم
نوال : مين قالكم
محمد بمرح : بابا ولسه جايين من المستشفي كمان
تلفت محمد حوله وقال : أمال فين همس
نوال بطيبه : مع مامتها في أوضتها
وداد بنفي : لا يا ست هانم نزلو من شويه راحو الجنينه
ليخرج محمد منطلقا وهو يقول : طيب هروح ألعب مع همس لحسن وحشتني
ونهضت نوال وقالت : هخلي وداد تعمل لكم حاجه تاكلوها وهدخل أستريح شويه
تنحنح مراد وقال لشهد : ما تيجي نروح الجنينه يا شهد
شهد بإعتراض : لأ خلينا هنا لوحدنا بيني وبينك محمد معجب قوي بشمس ونفسه يتكلم معاها
ليهب مراد واقفآ ويقول : أنا رايح الجنينه فتتبعه شهد متزمره....
نظر مراد بحده لمحمد الذي يقذف الكره لهمس
وتقف ليلي في المنتصف تحاول إلتقاط الكره ويجري ثلاثتهم عليها بمرح
تعمد محمد أن يلقي بالكره لمسافه بعيده لتجري همس ورائها
ويقترب هو من ليلي ويقول بمحبه
تعرفي إني جاي مخصوص علشان أشوفك
ليلي بتعجب : ليه مش فاهمه
محمد : عاوزه أعزمك إنتي وهمس يوم في مزرعتي
إقترب منهم مراد وقال بغضب : عزومه مرفوضه يا محمد
ليلي بإعتراض : ليه لأ عادي هنيجي
أنا نفسي أشوف المزرعه قوي
شهد لمراد : وإنت هتيجي يا مراد مش كده
نظر لليلي بإستياء وقال : كده يا شهد
،،،،،،،،،،،،،،،،،،،،،،،،،،،،،،،
في المستشفي
فتح كرم عينيه بتثاقل ليجد أمه الباكيه بجواره
أنا كويس يا ماما الحمد لله ربنا ستر
رأي الطفلين فقال بضعف
قربيهم ليه يا ماما أبوسهم
إزيك يا إيناس
إيناس بحنان :الله يسلمك ياكرم حمد الله علي سلامتك
تلفت حوله وقال : أومال فين ماهي
إيناس بود : قاعده بره في الإستراحه هروح أنده لها
فاطمه بعتاب : يرضيك ماهي ما تتصلش عليه غير لما إنت تعمل العملية وتفوق كمان
ونجيب قرايبها كلهم...
كرم بإبتسامه : يا ماما ماهي إتخضت وإتوترت معلهش متزعليش
دخلت ماهي باكيه : ليقول كرم بحب : أنا كويس يا حبيبتي متخافيش
تجفف دموعها وتقول : الحمد لله يا كرم
الدكتور بيقول ممكن نروح بعدأسبوع واحد
فاطمه بإصرار : يروح عندي لحد ما يطيب
مش كده يا كرم
ماهي بإعتراض : حضرتك تعالي عندي
إيناس بتعقل :يا جماعه مش وقته بعد الإسبوع نبقى نتكلم
وسيبو كرم يرتاح
كرم لأمه :يلا يا ماما خدي إيناس والولاد وروحو إرتاحو أنا كويس
وماهي معايا مبتسبنيش
لتلوي فاطمه فمها بإستياء وتقول : لا أناقاعده معاك
ماهي وإيناس يروحو
إيناس مبتسمه : جري ايه يا ماما
الراجل عاوز مراته تفضل جنبه قومي يلا نمشي ونيجي الصبح إن شاء الله ... متشكره يا إيناس قالتها ماهي وهي تربت علي كتفها بمحبه....
إتصل محمد علي ممدوح ليعزمه أيضا هو وزيزي
فقال ممدوح : خليها بقي لما كرم يروح بيته يا محمد ولا إيه
ماشي يا كبير.. .. ... قالها محمد بموافقه """''''''''""""""""""""""""
مر الأسبوع سريعآ وتحسنت صحة كرم الذي تلقي الرعايه والعنايه
وصممت ماهي أن يعود معها زوجها إلي شقتهم
فذهبت معهم فاطمه التي أصرت ألا تترك كرم حتي تطمئن عليه تماما...
في شقة كرم :
جلست فاطمة مع كرم تطعمه بيدها
فسألها : فين ماهي
فاطمه : نزلت من نص ساعه قالت هتجيب طلب وجايه
يلا قوم أقف علي رجلك بقي علشان أطمن عليك وأرجع بيتي
كرم بإبتسامه : إرجعي بالسلامة يا ماما أنا بقيت كويس وماهي معايا
فاطمه بمحبه : يا بني خليني!أديني بطمن عليك وفرصه إيناس راحت تزور أهلها...
إنقطع الحوار حينما دخلت ماهي وهي تبكي وتنهنه
كرم بفزع : مالك يا ماهي فيكي إيه
ماهي وهي تزدرد لعابها : أنا مش حامل يا كرم
الدكتوره قالت لي كده
كرم بوجل : وعملتي تحليل
آه قالت لي ممكن تكون نزلة برد!
أو حمل كاذب
فاطمه بلوم : كاذب إيه وصادق إيه مش تتأكدي قبل ماتقولي
كرم بحنان : ولا يهمك يا حبيبتي متزعليش إحنا مبقلناش شهور
لترتب فاطمه طرحتها وتقول
طيب أنا هروح ياكرم لحسن ولاد إبني وحشوني
فيزداد بكاء ماهي التي إقتربت لتجلس بجوار زوجها الذي جذبها لأحضانه
وأخذ يتمتم ببعض كلمات جعلها تضحك بشده فقال
بس كده مش عاوز أشوفك زعلانه أخف أنا وإن شاء الله هنخلف عشر عيال
أنا بحبك قوي يا كركر
كرم....... حياتي يا مراتي ،،،، ،،،،،،، """"""""""""""""""
في المزرعه تعالت ضحكات ليلي وهمس
حيث كانتا تلعبان
وتربط ليلي عينا همس لتغميهاوتطلب منها أنت تجدها بين الجالسين
لتحسس همس مراد وتصبح :عمو مراد
. عمو ممدوح....... طنط شهد.....
فين ماما
ثم تتحسس وجه زيزي وتقول ببراء :ييييييييه دي طنط زيزي
ليضحك الجميع وتهرول زيزي غاضبه ليظل ممدوح يحايلها ويداعبها
جلس مراد أسفل شجره وجلست بجواره شهد وهي تلومه وتطلب منه أن يخطبها رسميا
جو المزرعه جميل فهي واسعه بها أشجار وزروع
وجزء جعله محمد إسطبل للخيل
كان الجميع سعداء بالتجربه
و ليلي تلعب كره مع همس كعادتها
حينما إقترب منهم محمد وقال لليلي
عاوز أتكلم معاكي تابعه مراد بعينه لينهض ويقترب منه ليستمع إلي حديثه مع ليلي
ليلي : في إيه
محمد بهيام : إنتي مش ملاحظه إني معجب بيكي يا شمس
ليلي بجديه : محمد الكلام ده لو سمحت آخر مره أسمعه متخلنيش أندم إني ماسمعتش كلام مراد ورفضت آجي
لاحظ مراد وقوف محمد بجوار ليلي
فإقترب منهم وهو يشعر بالضيق من إسلوب محمد ومحاولته الواضحه التقرب من ليلي
أنا فعلا بفكر فيكي و حاسس إني
ليقترب مراد ويجذب ليلي بعنف صائحآ
إيه يا محمد متحترم نفسك يا أخي إيه شغل العيال بتاعك ده
نظر محمد لمراد بلوم وقال بجديه : أنا يحبها يا مراد وعاوز أتجوزها
طلبك مرفوض
قالها وهو ينصرف ويجذب ليلي بعنف لتصيح : سيب إيدي إنت بتعمل كده ليه أنا مغلطش
مراد بغضب : غلطتي لما بتسمحي لأي حد يقرب منك وتشيلي الحدود ال بينك وبينه!!
ليلي بإستياء : يا سلام ما أنت قاعد مع شهد من ساعتها وأنا مدخلتش..
مراد بإندفاع: بس انا بحبك إنتي مش شهد....
يتبع
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
جميع الروايات كامله من هنا 👇 ❤️ 👇
اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇
❤️🌺💙🌹❤️🌺💙🌹❤️🌺💙🌹❤️🌺🌹❤️🌺🌹🌹❤️🌺💙
تعليقات
إرسال تعليق