محطات العمر البارت الحادي عشر حتى البارت الخامس عشر بقلم الكاتبه جمانه السعيدي حصريه وجديده على مدونة النجم المتوهج
محطات العمر البارت الحادي عشر حتى البارت الخامس عشر بقلم الكاتبه جمانه السعيدي حصريه وجديده على مدونة النجم المتوهج
اريج...بقيت اتكلب اكثر من ساعه مااعرف ليش ما مرتاحه
بعدين نمت
لان تعبانه طول النهار افتر على رجليه
كلش تعبانه اني ما متعوده هيج افتر هواي
نمت غفيت ورحت بلنوم
مااحس اله اكو ايد صارت على حلكي الساعه وحده بليل
فتحت عيوني بخوف
ماجد مدنك وخال ايده على حلكي
وضاغط برجليه عليه
يعني شلون كاعد وخال ركبه ثنيينهن على بطني
مثل طريقة الركوع بلصلا بس رجليه على بطني مو على الكاع حتى يسيطر عليه
وايد لازم بيها حلكي والايد الثانيه لازم اديه ثنيينهن
ضاغط على اديه
يعني مسيطر عليه
لو ما نايمه مجان كدر يسيطر عليه هيج
ماجد....اس لا اطلعين صوت حتلو طلعتي صوت محد راح يسمعج خالتج اخذت مسكن وراحت باسبع نومه
اريج...حاولت ادفعه عني ماكدرت مسيطر عليه
اريده يعوف ايدي حتى اكدر ادافع عن نفسي
دفعته مره ثانيه ضغط عليه حيل
صح هو ضعيف بس شكد قوي
ماجد....ديري بالج تقاومين مراح تكدرين وحتلو صحتي بصوت عالي
و كعدت خالتج اكول لكيت واحد وياها بلغرفه اذا قاومتي راح ابقه اضربج منا لمن تستلمين
اني مستحيل اعوفج
انتي اليه صيري حبابه وامشي عدل
تعاي وياي برضاج احسن ما غصبا عليج
اريج...شفت نفسي راح اكون خسرانه اذا حاولت
ابعده عني لان مااكدرله
قررت امشي ويا بلحيله لان اني فعلا راح اضيع
كاعد ولا زمني من اديه وضاغط على حلكي
جمانه السعيدي
اريج...أشرت براسي اي راح تكولون شلون فكرتي بهاي السرعه فكرت لان اني كنت متوقعه الغدر منه
وعندي تجربه سابقه بلدفاع عن نفسي وياا عمار
جان ضعت بيها لوما لطف رب العالمين
المهم أشرت براسي اي موافقه
راسا هو ابتسم وفتح عيونه ورفع حواجبه من ردت فعلي المفاجئه
ماجد...موافقه
اريج...رخيت جسمي لان جنت متشجنه حيل جسمي صاير بوضع الدفاع
ورخيت اديه واشرتله اي
ماجد...متأكده انتي موافقه
اريج....اشرت براسي اي
شال ايده من حلكي بس بعده ضاغط على جسمي ولا زم اديه
ماجد....انت موافقه
اريج....اي موافقه ووين اروح ماعندي مكان
بس عندي شروط لازم تنفذهن واكون الك
ماجد....احبج صدكي احبج اعرف انتي زعلانه عليه لان صيحت عليج
تخبلت من شفتج ادورين شغل خفت تعوفين البيت وطلعين
اني اول مره احب وحده بحياتي صدكي اني راح ادللج
ومراح تحتاجين شغل ابد شطلبين اكول تم واني الممنون
كولي شنو شروطج
اريج...ابتعد عني ترا بطني كامت توجعني
ماجد....هاا العفو نسيت نفسي
اريج..عاف اديه ورجع ليوره كعد بلكاع بصف فراش
اني كعدت على الفراش وهو يباوع عليه حاول يلزمني من
شعري على اساس حركه رومانسيه
بعدت ايده وكتله اسمع شروطي بلاول
همزين لابسه تراك شتوي مغطي جسمي كله
ماجد....اشري بكيفج اني بخدمتج
اريج... كلت بنفسي واني جاي اعدل كعدتي
اجت اللحظه الحاسمه لازم اكون قويه لو اعيش لو اموت
ماكو مفر لو اسكت واضيع للابد وانزل من عين كل الناس
لو اخلص نفسي من هاي المصيبه واطلع منها بأقل الخسارات
عدلت كعدتي صرت كاعده على ركبي ورافعه جسمي حيل هيج اكون قويه اكثر
هو كاعد كبالي مديت ايدي جوه المخده
هو توقع اريد اطلع قراصة شعري من جوه المخده
هو عينه عليه هم مامصدك اني وافقت علي بهاي السهوله
بس شنو هو مرخي جسمه كاعد عادي
ما متوقع اني ضامه سجينه جوه المخده يعتقد أقصى ماعندي ايجوز احاول ادفعه اضربه وهو راح يسيطر عليه
لزمت السجينه زين طلعته وكبل ضربته بيها
ؤعني حركتي كانت سريعه هم ضربته وهم دفعته
هو مثل الي تفاجئ صاح اخ من قوت ضربتي اله وكع على ضهره والدم كام يجري منه
الضربه اجت بصدره يمكن اجت بكلبه
حاول يعدل نفسه ماكدر
اني ركضت بكل قوتي وطلعت
من الغرفه وكبل للباب الخارجي
ركض بلشارع اركض وتلفت من الخوف
مالابسه بس تراك شتوي اسود
لا حجاب ولا رداء حافيه واركض والدنيا تكص كص من البرد شهر ١٢ والدنيا حيل بارده
ماكنت احس بلبرد بس جهي جمد ورجليه ثلجن
واديه هلكد مااحركهن واركض صارن عبالك قوالب ثلج
بقيت اركض اكثر من نص ساعه اركض خايفه
اكيد ماجد مات لان ضربته بكلبه
مات اريج ماجد مات صرتي مجرمه
جمانه السعيدي
تاليتج بلسجن اريج قتلتي زوج خالتج
هو الي وصلني الهاي الحاله اني كتله لا لا مايفهم بلكلام
هو جبرني اقتله
ليش ماابتعد عني ليش ماعافني بحالي
ليش ماسمع كلامي
جايني بهليل يريد يغدر بيه
شمتوقع اسلمه نفسي و اسكت
مات الرجال مات اريج اكيد راح يعرفون انتي قتلتي
الرجال مات اني صرت قاتله
ارتايحيتي يمه بتج قاتله بسببج وبسبب ابوي
هذا الشي الي جنتو تردو
كلكم صرتو ضدي كلكم حاربتوني لمن قتلت الرجال
يمه بتج صارت مجرمه ارتاحي ارتاحي عيشي
انتي وزوجك عيشي حياتج
اني ضعت بسببج
اركض وما منتبها هلكد ما خايفه من الشي الي سويته
طلعت من الفرع للشارع
راسا سمعت صوت هورن مال سياره
قوي وراي مااشوف اله سياره ضربتني فقدت الوعي وبعد ماادري شصار وياي
جمانه السعيدي
عوفونا من اريج تعالو نتعرف على بطل هاي القصه
# وصلنا البطل هاي القصه المنقذ
مرات الغريب يكون احن من القريب
اني عبد القادر
عمري ٤٢ سنه بلوقت الي دهست اريج بلسياره
كان عمري بوقتها ٤٢ سنه
صاحب تجاره وخير ولله الحمد
عندي اخ ازغر مني بسنتين عايش بلخارج
وعندي امي مره جبيره مو جبيره كلش خاف تزعل مني
امي عمرها ٦٠ سنه بوقتها يعني اكبر مني ١٨ سنه
بعد وفاة ابوي امي رفضت الزواج
وصممت لازم تربينا وماادخل اي رجال الحياتنا
رغم امي من ترملة كانت بعدها زغيره
تحملت كل الضغوطات وصممت تكعد ماتزوج ابد
رغم اهلها وكل الأقارب كانو يلحون عليها بهذا الموضوع
بس هي صممت على رائيها
المهم امي حيل تعبت علينا لمن كبرتنا
اني الحمد لله تخرجت وتوضفت
اما أكرم التحق بلجيش بعمر ١٩ سنه
لان عنده رسوب هواي وترك المدرسه كان لازم يخلص خدمه بلجيش اخر سنه من خدمته
صادف احتلال الكويت وهو من المجموعه الي
طلعت للسعوديه وطلبو لجوء سياسي
مااريد اذكر ذيج الايام كانت صعبه بشكل مو معقول
اني وامي كنا متاكدين أكرم من الناس الي راحت بلحرب
لان ٣ اشهر احنا ندور علي وماكو اي خبر منه
امي دموعها ما نشفت ابد ليل نهار تبجي علي
الحد ما فضت الحرب وواحد من جماعته الي رجعو للعراق
بعد ما طلعو للسعوديه
لان همه خيروهم منو الي يريد يرجع للعراق يرجع
هذا صديقه مزوج وعنده طفل زغير رجع علمود عائلته
ووصل النا خبر
عن أكرم وشلون عبر هو وياا جماعه للسعوديه
وطلبو لجوء سياسي
جمانه السعيدي
طبعا همه بقو فتره اكثر من ست اشهر عايشين بخيم بلصحراء تحت حماية الصليب الاحمر
اكو قسم منهم رجعو للعراق بس أكرم رفض بوقتها يرجع
المهم بعد كل هاي المعانا امي اطمنت على اكرم
رغم احنا ماكنا نسمع عنه اخبار دائما بس على الاقل كنا نعرف هو عايش اكو جماعه كانو يوصلونها اخباره بين فتره وفتره
امي من بعد هجرت أكرم صممت عليه لازم ازوج
كانت خايفه لايصير عليه شي قبل لا تشوف جهالي
امي....يمه عبد فدوه ازوج انت مو زغير عمرك ٢٦ سنه
واني اريد افرح بيك خاف اموت ومااشوف جهالك
عبدالقادر....يمه ليش تلحين بهذا الموضوع هواي
امي...خايفه اموت وماشايفه واحد منكم مزوج
أكرم اني بعد غسلت ايدي منه مدام صدام بلحكم
مايرجع للعراق
ازوج يمه الخاطري اريد افرح بيك
عبد القادر....خلاص شوفلي بنيه على ذوقج
بدت امي ادورلي عروسه بعد فتره قليله كالت لكيتلك وحده بت حلال
هاي بت الحلال امي ماتعرفها بس تعرف صديقه جيرانها
وعلى حساب مدح هاي وذيج امي راحت شافت العروسه وعجبتها
امي....يمه البنيه حلوه ما ناقصها شي واني عجبتني
والبنات الي عرفني عليها يمدحن بااخلاقها وأخلاق اهلها حيل
عبد القادر...خلاص يمه الي تشوفي
حددنا موعد نروح نشوف بي العروسه
رحت البيتهم اني وامي طلعت عليه البنيه حلوه ماعليها قصور اني طبعا هنا شفت شكلها وبس
اما اطباعها اكيد راح اعرفها من بعد الزواج
اتفقنا على الخطوبه
كلشي ماشي سهل وبسيط وافقنا على كل طلباتهم
قبل ماكو فون ولا مكالمات للصبح
ولا انتي شنوتحبين واني شحب
مطولة الخطبه غير شهر واحد ما شفتها غير مرتين
مره بلمهر ومره ثانيه اخوها ازوج ورحت باركت الهم
الكلام بينا كان عادي وبسيط
المهم ازوجنا اني واحلام بلبدايه كان كلشي تمام
بعد ماعرفت اطباعي واطباع امي تفرعنت علينا
بس مجرد ماطلعت حامل
اتغيرت عليه ١٨٠ درجه صارت تتملل مني تشكي هوواي
اطلع المشاكل من جوه الكاع
اذا ماكو شي تتعارك وياا امي
اخر شي من كبرت بطنها كالت اني مااكدر اصعد فوك
امك تصعد فوك واني انزل جوه
نزل غرفتي جوه
للامانه امي ماكانت تقبل احلام تزعل ابد تكول خطيه
حامل وتعبانه على كيفك وياها
واني هم كنت منطيها العذر
اكول حامل والهرومانات تتغير أثناء الحمل
صابر ومتحمل اتوقع تتغير بعد الولاده
نزلت غرفتنا جوه وامي المسكينه صعدت فوك رغم امي
تعبها صعدت الدرج
مرات تنام بلهول ما تصعد فوك
امي تريد المركب تمشي ماتريد حياتي تخرب
واحلام كانت فاهمه الوضع كلش زين
وجاي تلعب على هاي النقطه
رغم هي كلشي ما تشتغل بلبيت
امي تخلص كل الشغل
تنظيف وطبخ وغسل ملابس امي بوقتها زينه
بعدها بيها حيل
امي تخلص شغلها وتكعد بعيد عن احلام ماتقرب عليها حتى لاتصير مشكله
امي عكس الأمهات الي عدهن ولد واحد مزوج يخلقن المشاكل من جوه الكاع
امي كانت تتستر وتسكت وتصبر
كل ضنها الوضع راح يتغير
بس هذا الحلم كان من أصعب المعجزات الي ما ممكن تتحقق
وخاصه وياا احلام
#محطات العمر
#البارت الثاني عشر
#جمانه السعيدي
عبد القادر....بدت احلام تتمرد وتحجي و تتطلب هواي
رغم اهلها حالتهم اقل من حالتنا
ووقت الحصار تقريبا الناس كلها نفس الشي
اكو طبقه راقيه
بلنسبه النا احنا الطبقه المتوسطه كلنا نفس الشي
اهل احلام كانت حالتهم الماديه اقل من حالتنا
ادخل واطلع طلباتها ما تخلص
قررت ادور شغل واشتغل لان الراتب مايكفي
لازم لكه شغل حتى اكدر اوفر طلباتها وطلبات البيت
لكيت خوش شغله وولد صديقي كال تعال نتشارك اني وياك
نشتري ونبيع شغلات مستعمله
بس محتاجين راس مال للشغل
قررت افتح هذا الموضوع وياا احلام بلكت تنطيني ذهب العرس ابيعه وبس اشتغل ارجعه الها
عبد القادر....انتي مو تكولين اريد فلوس اني على وجه ولاده
احلام... اي طبعا انت المسؤل عن مصاريفي كلها
عبد القادر...اني لكيت شغل بس محتاج فلوس افتح مشروع اني وصديقي
احلام...اي واني شكووو
عبد القادر....انطيني الذهب ابيعه ومن اشتغل ارجعه اللج
واكثر منه
احلام...لا ولله شنو انطيك ذهبي على يا اساس
ليش تريد تفتح مشروعك براسي
اني شنو دخلي روح اتقرض من كرايبك أصدقائك
وافتح المشروع
عبد القادر...محد.يقبل يقرضني
احلام...روح شوف شغله ثانيه ماتريد فلوس
حتلو تشتغل حمال المهم اني اريد فلوس
اني على وجه ولاده لازم أدبر نفسك
جمانه السعيدي
عبد القادر...كلش ضجت من كلامها شكد انانيه
يعني اني المن اريد اشتغل واتعب غير علمودها
ثاني يوم قبل لا اطلع للدوام امي حست اني ضايج
امي...ليش ضايج شكوووو
عبد القادر. .احلام طلباتها ما تخلص عود ردت اشتغل
حتى احصل فلوس أكثر اساعد بيهن على مصرفنا
البارحه سعيد كال تعال نتشارك اني وياك
نشتري شغلات مستعمله ونبيع
امي.....اي واحلام شنو علاقتها بلموضوع
عبد القادر...ردتها تنطيني الذهب افتح مشروعي
وكتلها بس اشتغل ارجعه اللج اكثر
ماقبلت لا تقبل ترحمني من كثر طلباتها
ولا تقبل تساعدني
امي...انت ضايج على هاي اني عندي باون ذهب
ضامته الموتي اطيك ايا وابدي مشروعك
وعوف احلام لا تحجي وياها
عبد القادر...يمه الباون هذا اخر شي انتي ضامته للزمن
للموت شلون أخذه منج
امي...بعدني زغيره هسه مااموت اشتغل ورجعه اليه بعدين
عبدالقادر....عمرج طويل انشاء الله
جمانه السعيدي
امي صممت اخذ الباون بعته وجابلي خوش مبلغ
دخلت بي شريك وياا سعيد
كمنا نشتغل ثنيبنه اني من ارجع من الدوام اتغده واطلع للمحل
النوب احلام من سمعت اني فتحت مشروعي بدت ازود بلطلبات اكثر واكثر
هلكتني طلبات ادخل اطلع جيب جيب
وصلت للولاده جابت بنيه نسخه من امها
حمدت ربي وشكرته واخيرا احلام جابت وراح تخف عليه طلباتها يعني فوك مصرف البيت
النوب هي ماتسكت ابد مشاكل طلبات
تعبت حيل حيل حيل تعبت
مجاي اكدر ارتاح الصبح دوام والعصر شغل
وحتى من ارجع للبيت تتلكاني احلام ما تسكت ابد
اذا وفرتها كلشي وماعدها طلبات اطلع مشكله من جوه الكاع وتتعارك وياا امي
شكد جنت اشتغل ليلةنهار بس كلشي مامحصل من
شغلي كل الي احصله هي تاخذه
وماكو لا حمد ولا شكر بس شكوى وتذمر
صدكوني بقيت ٣ سنوات اني ما مشتري قميص ولا بنطرون
اداوم بنفس ملابسي
لان مجاي اللحك عليها الفلوس مابيهن بركه
احصلهن منا يرحن منا
شكلي كله تغير تعبان على طول مامرتاح ابد
لمن صار عمر روان سنتين طلعتلي بشغله جديده
انت ما مكفيني بلمصرف اني اريد اشتغل
عبد القادر...يمعوده كولي يالله ولج هلكت من التعب وكل فلس احصله تاخذي مني
شنو ناقصج فهميني اني بيش قصرت وياج
احلام...يااا وينها الفلوس حتى ذهب مثل النسوان ماعندي
شنو بيش انت مان عليه
موزين متحملتك ومتحمله ضروفك
اريد اشتغل حالي حال النسوان ألبس اطلع اكشخ
خوما اضل عليك تقطر عليه تقطر
تعال شوف النسوان شلون الزلم حايرين بيهن
وانت تطلع من الصبح لليل
تجيني تعبان ومالك خلك الاي شي
عبد القادر.. على اساس الكاج منتظرتني بلهله
والمرحبه تكعدين تفرجيلي وتسولفين عليه
شو بس ادخل عوجتي بوزج
واهم شي عندج الفلوس تاخذيهن وترحين بلغرفه
بعد مااشوف وجهج
جمانه السعيدي
احلام....يااا فوك ماتحملتك ومتحمله بتك
النوب انت ماراضي وهي وينها الفلوس
ذني كم فلس تنطينايهن حاسبهن فلوس كون هسه انت تشتغل ابدال الشغله ثنيين وثلاثه
كون اني هسه لابسه كيلوين ذهب
اسكت بله اسكت لا تخليني اطلع ضيم كلبي
عبد القادر...لا احجي هم عندج بعد كلام تردين تحجي بعد كل هذا الكلام اله اكتل نفسي يله تقتنعين
بابا حصار والناس جاي تبيع غراض بيوتها بس علمود اللكمه
وانتي بطرانه كلشي ما يعجبج
عبد القادر...بقينا اكثر من شهر كلما تفتح موضوع الشغل نتعارك اني وياها الحد ما مليت منها
كتلها اشتغلي بله خل اشوف شغلج
ردت اشوفها شراح تشتغل وهم اخلص من طلباتها
وحده من خواتها تشتغل بمحل ملابس وابو المحل فتح فرع ثاني ومحتاج وحده تشتغل بهذا المحل
راحت احلام شافها ابو المحل وافق عليها
كامت تكعد الصبح تبدل وتضرب طقم مكياج عبالك عروسه
وأخذت من هذا المحل نفسه ملابس تسدد من راتبها
تكول مو عامله بلمحل تكول هي صاحبة المحل
كاشخه كل قوتها
تعوف روان يم امي تطلع بلتسعه الصبح ترجع المغرب
وضعها كلش ما عاجبني
بس اريدها وحدها تتعب وتبطل
لان شغل من الصبح لليل متعب حيل
ابشركم بتها نسخه منها عمرها سنتين ونصى وما تنحمل ابد
كلشي ما يعجبها وبس تتعارك ويا امي
عبالك امها موصيتها على المشاكل
احلام مابطلت لايوم ولا يومين بلعكس جان عاجبها الوضع
شهر يجر شهر
وابد ما رحمتني من المصرف
تشتغل وتقبض راتب وبعدها عينها على فلوسي
تعبت منها حيل
بس صابر ومتحمل واكول بلكت باجر تتغير
جمانه السعيدي
بعد مرور شهرين على شغلها وياا ابوحميد صاحب المحلات
ابو حمدي رجال جبير عمره ستين سنه بس يصبغ شعره
ويلبس على الموديل يحب النسوان
صارت علاقه حب بينها وبينه
كل يوم تكشخ وتتعطر عبالك عروس وتروح للشغل
عبد القادر...شدعوه هيج عطرج قوي وشنو هاي الكشخه
انتي وين رايحه حفله
احلام.. انت شمعرفك هو هذا الشغل يريد كشخه
احنا نبيع ملابس نسائيه
لازم الزبونه تقتنع بينا يله تشتري منا
بعدين انت شنو تريد اروح مبهذله
ابقى انت على هذا وضعك حتى ملابس بيهن خير ماعندك
عبد القادر.. غير من وراج انتي مخليه عليه فلوس
احلام...ولله هو المرتب مرتب شوف اني شلون مرتبه
عبد القادر...وانتي تقارنيين شغلج وياا شغلي
اني كل الوقت اشيل غراص وارتب واحمل وياا العمال
وانتي كاعده ورا الكرسي وتخافين حمرتج تخرب
احلام...اوووي الحجي وياك مابي فايده اخرتني على شغلي
عبد القادر.. اني وياها وصلنا مرحله مابينا اي تفاهم
ولا نلتقي اني وياها باي نقطه
هي من عالم واني من عالم ثاني
بعدت نفسها عني اي شي ماكو بينا اني وياها
طبعا هي خلت عينها على ابو حميد عندا اكثر من محل
ولأن شغله وياا النسوان يجي كاشخ ومعطر
ويحجي ويضحك ويا هاي وذيج
جمانه السعيدي
رغم هو رجال جبير بس عينه على هاي وذيج
احلام طمعت بفلوسه وقررت تغري وتقربه منها
وفعلا حصلت الشي الي تريده
الرجال خله عينه عليها وبدت تصير بينهم غراميات
وتجاوازات واني مااعرف
بهاي الفتره هي منعتني حتى اقرب عليها
ولا تقبل مني كلمه ولا تباوع بوجهي حتى
بقت تقرب من ابو حميد وتغري بكلامها الناعم
الحد ماسيطرت علي وصار ولهان عليها مو بس يحبها
ابو حميد....حرامات انتي مزوجه
احلام...ههه ليش
ابو حميد...جان ازوجنا اني وياج وسلمتج الحال والمال كله
احلام.. احنا بيها
ابو حميد .....شلون احنا بيها ما فهمت
احلام...اطلك ونزوج اني وياك
ابو حميد....زوجج يقبل بلطلاك
احلام...على اساس هو بكيفه يطلك غصبا ماعلي
ابو حميد....زين اطلكي واني وياج نزوج
بس بدون ماتعرف ام حميد
احلام....موافقه
عبد القادر...احلام جانت ناويه تقبل بلزواج بلسر بلبدايه
منا لمن تزوج وتستقر وساعته تخلي ابو حميد يطلك زوجته
وتبقى بس هي على ذمته
وتسيطر على كلشي
بعد مااخذت الاوكي من ابو حميد وتأكدت هو يريد
يزوجها من صدك
شنت عليه هجوم ماله مثيل مشاكل لليل نهار
كلمه والثانيه وكالت طلكني
اني مااكدر اعيش وياك اني استاهل واحد احسن منك
ليش ادفن نفسي ويا واحد مثلك
عبد القادر...امي الوحيده الي كانت رافضه فكرت الطلاك
وما تقبل اطلك احلام
بس اني جزعت منها كلش ووحده بلا اخلاق
ولا تربيه كلشي مايغزر بيها
لا تعب ولا مصرف ولا كلمه حلوه
اخر شي تعاركت وياي عركه شكبرها فرجت علينا الجواربن
احلام.. ليش ماتطلك انت واحد ماعندك كرامه طلكني يااخي مااريدك مااحبك هي كوه
امي...ليش خاله هيج وهاي بتج شنو ذنبها
احلام.. انتي اسكتي عجوز البين مالج دخل لا اجي اطيح حظج بلنعال
عبد القادر...كل الحجي عليه ميخالف ممكن اتحمله
بس تجاوز على امي مااقبل
اني سمتعها تغلط وتجاوز على امي
ضربتها راشدي شمرتها مترين بلكاع بعدين
سحلتها وشمرتها بلشارع
عبد القادر....انتي طالك هسه اروح للشيخ واطلكج
انتي وحده بلا اخلاق ولا تربيه
احلام...للللوووش اطلكني يوم الفرح والهنا
ياناس خلصت من هذا الرجال الفكر تعالو باركولي
عبد القادر...طلعت للشيخ طلكتها ثاني يوم دزيتلها غراضها بيت اهلها وورقة الطلاك
من بعدها طلكته بلمحكمه وانطيتها كل حقوقها
بس خلصت عدت الطلاك ازوجت ابو حميد
وبدت تطلع عليها اشاعات الحب هي وابو حميد
طلعت الناس كلها تعرف بقصة غرامهم واني اخر من يعلم
الحقيره على ذمتي وتلعب من وراي
الله لا يوفقها كرهتني بلنسوان كلهن
#محطات العمر
#البارت الثالث عشر
#جمانه السعيدي
@الجميع
عبد القادر....خلصت من احلام ومشاكلها
من يوم دخلت الهذا البيت بس المشاكل من وراها
مره لا تقنع ولا تشبع صح اني ارتاحيت منها بس الشي الوحيد الي كان مضوجني
خيانتها لعبها من وراي تاكل بخيري وتلعب ويا غيري
وحده بلاضمير ماكو بكلبها مخافة رب العالمين
المهم زواجي من احلام كان محطه صعبه بحياتي وخلصت منها
الشي العجيب الي صار وياي وابد ابد ابد ماكنت متوقعه
مجرد احلام طلعت من هذا البيت وأبواب الخير انفتحت من كل الجهات
صدكوني لو شمااحجيلكم مااكدر اوصف الخير الي شفته بعد ما طلعت احلام اني نفسي متعجب
وما مصدك ابد صلوات على النبي ماشاء الله
اذا كنت ابيع بليوم حاجه لو ثنيين صرت ماالحك على البيع
اذا كنت احصل بلحاجه الفين لو تلاته كمت احصل خمسه وعشره
كمت مالحك على البيع خير خير شكد ما تتوقعون
واهس مو طبيعي بلبيع والشرا
كمت ماالحك على الزباين لا ويجون يدورون عليه
ويردون بس يشترون مني فتحنا فرع ثاني
صرت اني لازم فرع وسعيد لازم فرع
حياتي اتغيرت تغيير شامل صرت غير انسان
هلكد مالي واهس حتى شكلي كله تغير امي تكول يمه انت شو صاير حلو
ومن تدخل للبيت كلك طاقه وايجابيه مو مثل قبل
تدخل تعبان ومابيك حيل
كمت اشتري ملابس واكشخ اشتريت سياره مستعمله بلقسط
حياتي تغيرت تغيير جذري
صدك لو كالو النسوان كرفه واحلام جانت فكر عليه
تخلصت منها واجاني الخير كله
اما احلام بعد ماازوجت
اول بدايه الأمور زينه بس ابو حميد بدا يخسر شويه شويه
بعد ماكان ماملحك على البيع وكل فتره يفتح فرع جديد
بدا البيع والمشتر يقل شويه شويه
اضطر يسد الفرع الي تشتغل بي احلام
بعدها بفتره سد الفرع الي فتحه قبله
مابقا عنده بس محل واحد وماعلي بيع ولا شره
الناس كلها تحجي بوضعه الديون تراكمت علي
بدا يتعارك وياا احلام ويقصر وياها بلمصرف
على فكره هي ازوجته علمود فلوسه لان هو اكبر منها
٣٠ سنه بس ماتت على فلوسه
جمانه السعيدي
المهم الرجال خلال سنتين من بعد زواجه من احلام
كعد على الحديده
مايعرف شنو المشكله شلون تحول من تاجر مايلحك على البيع الواحد مطلوب
احلام...وينك ليش ماتجي اريد مصرف
ابو حميد...منيين اجيبلج ماتشوفين الديانه تركض وراي
كله منج
احلام...اني شكوووو اني خسرتك
ابو حميد...ولله من يوم ازوجنا لليوم ماشفت الخير
كله بسببج
انتي وحده فكر هي كوه
احلام...شنو فكر هو انت ماتعرف تتصرف هي كوه
ابو حميد...قابل اني اليوم جاي للشغل
انتي فكر وفكرتيني
عبد القادر....المشاكل بينهم كانت مستمره احلام تعبد الفلوس عباده وابو حميد أصبح مفلس
من بعد هاي الاحداث ابو حميد لا يوصل احلام ولا يصرف عليها
الحد مااجتها ورقة طلاكها بعد سنتين ونص زواج من ابو حميد
واصبحت احلام مطلقه مرتين بسبب طمعها
عبد القادر.....اما اني الله فتحلي أبواب الخير والسعاده
نجاح مستمر
فكيت الشراكه وياا سعيد وصرت اشتغل وحدي
اما بعد السقوط صار العراق يستورد اثاث من الخارج
بعد ماكان الاستيراد ممنوع بسبب الحصار
وبدت تدخل النا أشكال المنتجات الكهربائيه
وصار عندي بمكان المحل الزغير محلين
اشتريت سياره حديثه من بعد ذيج السياره القديمه
اخوي أكرم بعد السقوط اخذ تعويض من الدوله بسبب
تعرضه للاضدهاد بسبب الحكم السابق وهو انهزم من العراق بسبب
ضلم الدوله
الدوله انطته تعويض رقم خيالي وصار عنده راتب
يستلمه كل شهر من العراق
بلنسبه للتعويض انطانيا كال شغلي فلوسي وياك
والأرباح الامي لان تعبت هواي علينا
ازوج أكرم وحده اوكرانيه ورافض يرجع للعراق
تعود على الحياة هناك وصار عنده اطفال ثنيين
جمانه السعيدي
بعد ماااكرم انطاني الفلوس توسع شغلي اكثر واكثر
بنيت مجمع ٣ طوابق وخليت بي بضاعتي كلها
رب العالمين ماناسيني ابد فتحلي أبواب الرزق من كل الجهات
يعني شما احجيلكم ما تصدكون لان اني نفسي ماكنت مصدك وضعي شلون اتبدل سبحان العاطي الوهاب
هذا الخير كله اجاني وكبر شغلي وصرت تاجر
بعد مرور خمس سنوات من طلاكي الأحلام
امي رجعت تفتح وياي موضوع زواجي
تريدني ازوج واستقر بس اني رافض الفكره نهائيا
صار عندي فكره ابالي مقتنع بيها الف بلميه
النسوان كلهن فكر الي يعيش بدون مره
يعيش ملك زمانه لان اني ماحجيتلكم بالتفصيل الممل احلام شسوت بيه
حقيقتا دمرت حياتي
تفننت شلون تخليني اكره النسوان والدنيا كلها
احلام من بعد ماانفصلت من ابو حميد ورجعت البيت اهلها حسره عليها الفلس
بدت تتبع اخباري خلت عينها على الخير الصار عندي
ورجعت تحاول تتواصل ويااا
تريدني ارجعها بعد اني حالي تغير وصرت من التجار
بدت ادز عليه ناس حتى يأثرون عليه
بحجة بنتك خطيه زغيره وشلون تعوفها
بس اني حلفت بعد لا احلام ولا غيرها كرهت النسوان كلهن
بعد ماارتاحيت شلون اجيبلي مره تخرب حياتي
اني هيج سعيد ومرتاح على الآخر
مااريد مره بحياتي غير امي
شكد حاولت احلام وياي حتى اجتني للمجمع اعتذرت مني لان اخر مره غلطت على امي
جمانه السعيدي
اني كاعد ومااشوف غير احلام داخله عليه
لابسه وكاشخه وجايتني تتمسكن
احلام...اني اعرف غلطت بحقك وجايه اليوم اعتذر منك
واريد اروح اعتذر من عمتي
اني كنت عصبيه ابو حميد ضحك عليه
قشمرني وطمعني بفلوسه
وخلاني اتصرف هيج وياكم
عبد القادر...باوعت عليها هاي عود صدك اني اكثر واحد اعرفها واعرف طبعها كلش زين
هي رجعت لان حياتي تغيرت وصار عندي فلوس
.عبدالقادر...وهسه شتريدين
احلام....اعتذر منك ومن عمتي
عبد القادر...اعتذارج مقبول يلله الله وياج
احلام...بس اروح اعتذر من عمتي
عبد القادر...اني اوصلها اعتذارج بعد اكو شي
احلام...بتك
عبد القادر...شبيها
احلام...مافكرت بيها بلمدرسه البنات يسئلنها عنك
تكول البنات كلهن عدهن إباء واني ماعندي
عبد القادر....اذا يحتاجوني بلمدرسه اروح وياها
احلام...بس احنا تبهذلنا اني وياها من بعدك
عبد القادر...احجي من الاخير شتريدبن
احلام...نرجع اني وياك اني اعترف غلطانه وراح تشوف احلام ثانيه
بعمري مراح اسوي مشاكل ولا ازعجك ابد
بس سامحني هلمره وخل نرجع اني وياك مو الخاطري الخاطر هاي الطفله المسكينه
عبد القادر....شوفي احلام لو تخلص النسوان من الكره الارضيه وما تبقين بس انتي
وحياتي بيدج يعني اذا ماارجعج امو ت
عندي الموت احسن من شوفة هذاوالوجه
انتي شنو نسيتي شسويتي بيه اني شفت وجه الله من طلكتج شفت الخير كله
صار خمس سنوات من انفصلنا اني وياج
شفت الخير والنعيم كله
ولج جان حسره عليه الفلس بس طلعتي من حياتي شفت الخير كله
روحي احلام وبعد لا تخليني اشوف وجهج ابد
اني وياج من سابع المستحيلات نرجع بعد فهمتي لو لا
احلام...بس هلمره انطيتي فرصه مو كتلك اني عرفت غلطتي
عبد القادر.....لا ولله اني الي عرفت غلطتي من ازوجت وحده مثلج روحي منا وبعد لا تخليني اشوف وجهج ابد
طردتها من المجمع ووصيت العمال اذا اجت مره ثانيه
مايخلوها تدخل للمكان ابد
بس عبالكم بطلت لا شلون تعوفني وهي تشوفني
عايش بهذا الخير كله
سلطته روان عليه كل يوم والثاني جايه روان البيتنا
اريد مصرف اريد اشتري كتب اريد ملابس
تسحب مني فلوس وكل يوم طالعه بحجه
اني مجاي اقصر وياها بلمصرف بلاخير هاي بنتي
وواجب عليه اصرف عليها
جمانه السعيدي
الحد مايوم امي لزمت روان وهي جاي ترش سحر بيتنا
امها دتزتها تخليلنا سحر حتى ارجعها على ذمتي
همزين امي انتبهت الها
امي...يااا هاي شجاي تسوين
روان كلشي مااسوي
امي...هذا سحر يااا ولج
روان...شنو سحر بيبي لا هذا ماي عادي
امي...هذا سحر ولج منيين جبتي احجي
روان....امي كالت رشي بيتهم حتى ابوج يرجعنا اني وياج للبيت ويصرف علينا
امي اتصلت عليه كالت الحك عليه تعال شوف بتك شجاي تسوي
بطلنا السحر اني وامي ومنعت روان تدخل بيتنا
حددتلها مصرف شهري ادزه الها البيت جدها
حتى بنتي مااريد اشوفها
ولكم هاي مو مره ضيم شكد حاقده وطماعه
صار ١٢ سنه من طلكت احلام ومصمم ماازوج ابد
رغم امي كل يوم تفتح هذا الموضوع وياي
نرجع لليوم الي دعمت بي اريج
كنت سهران يم جماعتي طبعا اني مو من طبعي اسهر ولا احب السهر بس بهذا اليوم الأجواء جانت حلوه
بارده وجماعتي محضرين اكل وسوالف وضحك اخذني الوكت
طلعت الساعه وحده ونص بليل من بيت صديقي بتاريخ ٢٠١٣/١٢
الجو جان حيل بارد بليلتها
مااحس اله طلعت بنيه تركض من الفرع
وصارت فجئه كدام السياره صدكوني ماشفتها
لان الدنيا ليل من صارت كدام السياره يله شفتها
اني جنت مشغل لايت من صارت كدامي يله شفتها
ضربتها بسيارتي نزلت لكيتها منتهيا
شفت النبض الحمد لله اكو نبض نقلتها للمستشفي
حتى اتأكد من سلامتها
اريج....اسمع صوت اكو ناس تحجي يمي بس مااعرف اني وين احس نفسي دفيانه مو بردانه
بس اكو شي لازم ركبتي ردت ارفع ايدي اشوف شنو
ماكدرت ارفع ايدي ثكيله
مغمضه عيوني اسمع حجي وناس داخله وطالعه
بس مجاي اكدر افتح عيوني ثكيلات
اسمع واحد يكول دكتور يعني ماعليها شي
الدكتور....لا لا تخاف مجرد رضوض بس ايدها
بيها كسر هسه احنا جبسنا ايدها
محتاجين مسند الرجلها لان بيها رضوض
اريج...ماكدرت افتح عيوني دفيانه واحس بتعب
غفيت وبعد ماادري شصار وياي
#محطات العمر
#البارت الرابع عشر
#جمانه السعيدي
عبد القادر ... بعد ما دعمت هاي البنيه الي مااعرف منيين طلعتلي نقلتها للمستشفى
سجلت بياناتي وكتلهم اني دعمتها
واني مسؤل عن أي شي يصير وياها
طلبت من الكادر الطبي بعد مااخذو هويتي يعالجونها
اكو ولد صيدلي يعرفني ساعدني
حتى البنيه تتعالج لان يعرفني كاللهم على مسؤليتي
هذا انسان محترم ومراح يقصر ابد
البنيه طلع عدها كسر بايدها ورضوض بلرجل اليمنى
جبسو ايدها وطلبو مسند الرجلها حتى يجبسون الرجل عدل
ولبسوها رقبه طبيه تحسبا اذا اكو شي صاير
من وكعتها
ضليت كاعد للصبح يمها وهي رايحه بلنوم
ماتدري بلدنيا وين ماوين
طلع الصبح اريد اروح اغسل وابدل واطلع الشغلي
عفتها ورحت للبيت
طلعت امي نايمه واصلا ماتدري بيه مارجعت للبيت
فتحت الباب ودخلت امي سمعت الصوت وكعدت
امي....يااا يمه عبد وين جنت
عبد القادر.... صارا وياا شغله موزينه
تعاي احجيلج البارحه من رجعت بليل
طلعت كد.امي بنيه تركض بلشارع
دكيت هورن ماالحكت تعبر الشارع
ضربتها ووكعت بلكاع
امي....يااا يمه ماتت ماتت يمه
عبد القادر....لا ما ماتت كلشي مابيها بس ايدها انكسرت
ورجلها بيها رضرض
امي...وووين هي هسه
عبد القادر...نقلتها للمستشفي عالجوها الكادر
امي...خاف تشتكي عليك
عبد القادر... يمكنها مخبله
امي....يااا مخبله شلون عرفت انت حجيت وياها
عبد القادر....لا ماحجيت وياها بس منضرها يكول مخبله
تركض بلشارع نص اليل حافيه وشعرها مخربط
وحالتها حاله
اني اكول مخبله واهلها جانو حابسيها
من نامو اهلها انهزمت منهم لان جانت تركض بلشارع حافيه تركض بسرعه عبالك خايفه من شي يركض وراها
جمانه السعيدي
امي....يااا يمه حتلو مخبله خطيه
عبد القادر....هسه اريدج ترحين تكعدين يمها منا لمن تصحى واذا صار شي اتصلي عليه
لان اريد اروح الشغلي
بلكت تكعد ودلينا اهلها وين اني لازم اتواصل وياا اهلها
ادفعلهم تعويض واسلمهم بتهم
ولو ما يستاهلون شلون عافوها تطلع بهليل
الدنيا بارده ورجليها مجروحات من الركض بلشارع حافيه
اذا صدك مخبله لازم يقفلون عليها الباب
امي...ابجوز مايدرون بيها تلكاهم هسه خابصين الدنيا يدورون عليها
عبد القادر ...هسه اوصلج للمستشفى وبعدين ارجع اسئل
عن اهلها بهاي المنطقه
اذا صدك مهزومه منهم اكيد جاي يدورون عليها
امي...خل احضر الريوك نتريك ونطلع اني وياك
عبد القادر...اسبح وابدل علما تحضرين الريوك
عبد القادر بعد ماكملنا اكل طلعنا اني وامي اشتريت فواكه
ونساتل وعصير خاف هاي البنيه تكعد جوعانه
وصلت امي للمستشفى
صعدنا اني وياها للغرفه الي بيها هاي البنيه
اريج... بين نايمه بين واعيه بس مااكدر اتحرك
احس جسمي ثكيل
اسمع واحد يحجي وياا وحده
عبد القادر....يمه هاي هيه شوفيها
امي....يااا ولله حلوه جنها ورد معقوله هاي مخبله
عبد القادر...ابقي يمها اني راح اسئل على اهلها
اريج...سمعت هذا الحديث بس ماجنت مركزه حيل وياا كلامهم
عبد القادر....رجعت للشارع الي طلعت منه هاي البنبه
( طبعا اريج ركضت مايقارب اربع اوخمس شوارع عن بيت خالتها سهيله لان جانت حيل خايفه)
جمانه السعيدي
عبد القادر وصلت للشارع الي طلعت منه ركنت سيارتي
على صفحه ونزلت اسئل بلشارع
لكيت واحد عنده محل حلويات مفتح
عبد القادر...السلام عليكم
....عليكم السلام
عبد القادر....البارحه اكو بنيه اندعمت بهذا للشارع
اعتقد مخبله لان جانت تركض حافيه وشعرها مخربط
الساعه بلوحده ونص بليل اوقريب على الثنتين بليل
.....اي وبعدين
عبد القادر...اريد اسئلك هم اكو احد هنا بمنطقتكم عنده بنيه مخبله سامع هيج شي مثلا اهلها رابطيها ما تطلع للشارع
....لا ابد ماكو بهذ الشارع وحده مخبله لا ولد ولا بنبه
عبد القادر...حتى لومو بشارعكم هذا الشارع الثاني
الشارع الي بعدكم
....ابد ماسامع اكو وحده مخبله هنا
عبد القادر...هي بنيه شابه تقريبا واحد وعشرين لو ثنيين وعشربن ايجوز اكبر شويه
بيضه شكلها حلو لا بسه تراك اسود
....ابد ما سامع وحده بهيج موصفات مخبله بلمنطقه
عبد القادر....زين اني راح اعوفلك رقم تليفوني
اذا سمعت اكو بنيه مخبله مهزومه من اهلها اتصل عليه
...تمام انشاء الله خير
عبدالقادر ...عفت رقم تليفوني وطلعت للشغل
كل شويه اتصل عل امي اطمن عليها وعلى هاي البنيه
اريج....سمعت واحد يحجي وياا وحده عني بس ماركزت بلكلام بعدين اجت الممرضه كعدتني
لكيت اكو مره جبيره كاعده يمي
ام عبد القادر....هااا حبيبتي سلامتج الف سلامه
اريج...مااعرفها وحتى ماكدرت ارد عليها
اخذت العلاج ورجعت غمضت عيوني
عبد القادر......الضهر رجعت للمستشفى
عبد القادر...هااا يمه كعدت حجيتي وياها
ام عبد القادر....كعدت اخذت العلاج ورجعت غمضت عيونها
عبد القادر...هذا العلاج كله مسكنات تخليها تنام
اني البارحه جبتلها علاجات اصليه من الصيدليه البرا
ام عبد القادر....شلون يمه هم عرفت اهلها
عبد القادر....سئلت عنها محد يعرفها عفت رقمي إذا أحد عرف اهلها او شافهم يدورون عليها
يتصل عليه
ام عبد القادر...اذا ماكو اهلها ناخذها للبيت منا لمن يطلعون اهلها ويستلموها
عبد القادر...لا انشاء الله يطلعون اهلها
اني شمعرفني شنو المصيبه الي وراها شلون ادخلها بيتي
ام عبد القادر.... يايمه شنو هلمسكينه مبينه فقيره
النوب جسمها تكسر بهلبرد شلون راح اطيب
العظم بلبرد ما يطيب بسرعه
جمانه السعيدي
اريج...سمعت كلامهم كله واذكرت مصيبتي
شلون بيه اكيد الشرطه جايةادور عليه ايجوز هسه خالتي اشتكت عليه لان قتلت ماجد
هسه شلون ياربي شلون راح اطلع من هاي المصيبه مااعرف
بقيت مغمضه عيوني لان اذا كعدت ماعندي اي جواب الاسئلتهم
شراح اكول اذا سئلوني انتي منو واهلج منو
اذاحجيت الحقيقه الشرطه راح تلزمني وادخل سجن
اذا سكتت اكيد مراح اسكت هواي
سكوتي شنو تاليته
ماكو احد بدون اهل اواقارب اكيد راح يبقون يدورون وراي
عبد القادر...يمه انتي تعبتي تعاي اوصلج للبيت وارجع
اني ابقى هنا يمها منا لمن تكعد واسألها عن اهلها
ام عبد القادر.... اني شعندي راجعه للبيت روح الشغلك
وتعال المغرب رجعني للبيت
اني راح ابقى كاعده هنا منا لمن ترجع
هاي الجربايه فارغه راح اتمدد عليها منا لمن ترجع
عبد القادر....اني راح اجيب غده نتغدا اني وياج وبعدين اطلع للشغل
عبد القادر...طلعت رحت جبت غده من اقرب مطعم ورجعت
ام عبد القادر... يمه حبيبتي اكعدي يوجعك شي
انتي نايمه من البارحه لليوم
يوجعج شي اجيبلج الدكتور انتي لا اكلتي ولا شربتي
اريج...فتحت عيوني ماي اريد ماي
ام عبد القادر....اي اني اجيبلج ماي
اريج...قربت عليه رفعت راسي وشربتني ماي
رغم الدنيا بارده بس احس كلبي يابس من العطش
راسا دخل علينا عبد القادر شايل علاليك الاكل
بس شافني كاعده اشرب ماي ابتسم
عبد القادر...اي همزين كعدت يمه سئلتيها عن اسمها
ام عبد القادر...بسم اله توها فتحت عيونها
اريج...نزل العلاليك عبد القادر واجا قرب عليه من جهة الجربايه الثانيه
عبد القادر....شلونج
اريج...سكتت
عبد القادر...جاي تشوفيني
اريج...أشرت براسي اي
عبد القادر....اني شلابس
اريج...سكتت
عبد القادر....اذا تشوفيني زين كولي اني شلابس
اريج...بنطرون وبلوز
عبد القادر...انتي شنو اسمج ووين اهلج
اريج...سكتت
عبد القادر....لازم تعرفين اسمج اسمج شنو
اريج...سكتت
عبد القادر...ليش سكتي جاوبي
اريج... مااعرف
عبد القادر...اسمج اسمج ماتعرفي
اريج...أشرت براسي اي
اني مستحيل اكول اسمي لو اسم اهلي اكيد اذا عرف اسمي راح يدور اهلي وساعته الشرطه راح تلكاني
وادخل السجن
اكيد هسه كلها ادور عليه شلون اني محبوبه
والنوب قتلت ماجد
هسه يطلع ماجد ماكو منه واني ام المصايب
احسن شي اكول كلشي مااعرف عن اهلي منا لمن اصير زينه
واسافر الاي محافظه ثانيه اعيش بيها
اني بعد هنا بغداد مالي مكان
جمانه السعيدي
عبد القادر....اسمج تعرفين اسمج
اريج...لا مااذكر اي شي
عبد القادر...كلشي ماتذكرين ولا اهلج ولا وين بيتكم
اريج...أشرت براسي اي
ام عبد القادر... يمه البنيه صاحيه لامخبله ولا شي
بس ناسيه اهلها
ايجوز من الوكعه على الرصيف نست كلشي
عبد القادر.....وهسه شلون اروح اسئل الدكتور عنها واجي
اريج...كلت بكلبي لو مو اجيب الدكتور لو اجيب المستشفى
كلها اني مااذكر اي شي مستحيل اذكر اني منو لو منو اهلي
لو يكصون ركبتي مراح اكول اني منووووو
اني خلاص من هاي الساعه فقدت الذاكره
اتمنى صدك افقد الذاكره وانسى كلشي مر عليه بحياتي
وابدي من جديد هلمره ابدي وحدي
بدون اهل ولا أقارب اهلي الي ماحصلت منهم بس الضيم ولا ذيه
رجع عبد القادر وياا الدكتور
عبد القادر....دكتور معقوله الحادث اثر عليها
تكول كلشي مااذكر
الدكتور....هسه انشوف
اريج ...قرب عليه الدكتور فتح عيني وخله بيها لايت زغير يعني سلط ضوه الايت على عيني
ورجع فتح عيني الثانيه ونفس الشي
الدكتور.... شسمج
اريج...مااعرف
الدكتور...اذا ذكرتلج مجموعة اسماء اطلعين اسمج منهن
اريج...احاول اذا اذكرت
الدكتور....زينب فاطمه ايمان حلا غفران شهد
اريج...كلشي مااذكر
الدكتور... سويلها اشعه على الدماغ خاف صاير عدها
ارتجاج بلدماغ
ام عبد القادر....دكتور يصير تاكل لان من البارحه كلشي مااكلت
الدكتور اي خل تاكل
اريج عافني الدكتور وطلع
كلت بكلبي لو مو اشعه لو اشعه ومفراز واسكان وتسلطون عليه الاشعه فوق البنفسجيه كلشي مااذكر
لو تخلون دماغي بالخلاط هم مااكول اني منو
قربت عليه ام عبد القادر وبدت توكلني شويه شويه
وعبد القادر كاعد كبالي ويباوع عليه
كملت اكل كعد عبد القادر امه ياكلون ويحجون
بيه شلون مصيبه اجتهم
لا على البال ولا على الخاطر
وحده هم مدعومه وهم فاقده الذاكره
#محطات العمر
#االبارت الخامس عشر
#جمانه السعيدي
@الجميع
اريج....اجو ممرضين ثنيين وياهم ممرضه اخذوني الغرفة الاشعه
عبد القادر راح وياي بقا ينتظرني برا
لمن خلصت رجعوني للغرفه وعبد القادر بقا وياهم
منتظر نتائج الاشعه
بس شكله كلش ضايج
حقه منيين اجته هاي البلوه
اريج...شويه اجا هو الدكتور الاشعه سليمه مابيها شي
اجا الدكتور فحص عيوني مره ثانيه
الدكتور....انتي اي شي ماتذكرين
اريج...هزيت راسي اي
الدكتور....اي تفصيله زغيره حتى مكدر نوصل الاهلج
اذا وصلنا الاهلج وشفتيهم اكيد راح يساعدوج
تتذكرين
اريج...كلت بكلبي اذا وصلتو الاهلي يموتني خلاص
يمسحون ذاكرتي مو يرجعوها
اريج...كلشي مااذكر
عبد القادر...دكتور اذا طلعت بلاشعه مابيها شي
ليش ناسيه
الدكتور...لاتخاف احتمال فقدان ذاكره مؤقت
ايجوز يومين اتلاثه وترجعلها الذاكره
كلشي تمام ماكو شي يخوف
عبد القادر....اني راح ارجع للشارع الي دعمتها بي بلكت
احد يعرفها لو يعرف اهلها
الدكتور...تمام
اريج....خفت لا يروح هناك ويعرف اني قتلت ماجد وانهزمت
اكيد الشرطه هسه سئلو بلمنطقه كلها عليه
والناس كلها عرفت قصتي
حتلو عرف اني راح استمر اكول اني فاقده الذاكره
ومااذكر لا ماجد ولا سهيله
جمانه السعيدي
طلع عبد القادر امه بقت وياي خطيه خايفه لا يصير بيه شي وابنها يبتلي
ساعه تغطيني ساعه اجيبلي مي
انكسر كلبي عليها مره جبيره حقها تخاف على ابنها
اني اصلا مااريد اشتكي على عبد القادر لان اني الغلطانه
اني طلعت علي من الفرع وفاجئته
بس اتحسن شويه اروح اشوفلي شغل اي شي
حتلو عامله بمستشفى واعيش
منا لمن يطلع التعيين ولله كريم
عبد القادر...رجعت للشارع نفسه وسئلت اكثر من واحد
كلهم مايعرفوها
اصلا ماصاير شي بلشارع يخلي واحد يسئل
عنه حتى ما كو بلاغ باختفاء بنيه
ولله عجيبه منيين طلعت معقوله تكون مو من هاي المنطقه اذا مو من هاي المنطقه
ليش طالعه تركض بليل حافيه وخايفه
هاي البنيه وراها سر ولله اعلم شنو هو
عبد القادر...تعبت ورجعت للمستشفى كلشي ماحصلت
دخلت لكيت امي نايمه وهاي البنيه كاعده
جمانه السعيدي
عبد القادر....شلون صرتي
اريج...الحمد لله احسن
عبد القادر.....معقوله اختفت ذاكرتي هيج فجئه
لازم اكو شي خلاص تطلعين بليل تركضين خايفه
ماتذكرين اي شي
اي شي حتلو شي بسيط
اريج...كلشي مااذكر
كعدت ام عبد القادر ....هااا يمه اجيت
عبد القادر...تعبتج وياي تعاي اوصلج للبيت
ام عبد القادر....اي اريد اروح للبيت تعبت حيل
اريج...نزلت ام عبد القادر التفت عليه هااا حبيبتي
محتاجه شي
اريج....سلامتج
عبد القادر....هسه اوصل امي واجيب عشى واجي
طلع عبد القادر وامه وبقيت وحدي
شلون شنو نهاية هاي الجذبه اذا تحملوني يوم يومين
اتلاثه خوما يتحملوني العمر كله
امبين عبد القادر خايف من وجودي بحياتهم
جاي يلح بلسوال ويدور وراي حقه يخاف ماكو بنيه
تطلع من العدم وتكول مااذكر كلشي
وين اهلها ووين اقاربها
اني مستحيل احجي الحقيقه العبد القادر وامه
لان حقيقتي مره شراح اكووول اهلي مايردوني
ابن خالي حاول يعتدي عليه بمساعدت امه
لو عمي الي تبرأ مني لو امي الي طردتني
وكملت بماجد الي قتلته حتى اخلص نفسي من الفضيحه
ماضي اضلم وغير مشرف مااكدر احجي عنه اي شي
بعدين من يكول عبد القادر اذا سمع قصتي
مايطمع بيه مثل ماجد
لو يعوفني واني مكسره ويدير وجها ويروح
لان ماعندي اهل يسئلون عني ويحسب احسابهم
هو هسه مهتم بيه لان يخاف من اهلي
يخاف يطلعون ويشتكون علي ويدخل وياهم مشاكل مالها نهايه
اسكت احسن منا لمن يعالجني عبد القادر اصير زينه
من بعدها اروح اشوفلي شغله واشتغلها
بلكت الشرطه بهاي الفتره تبطل ادور عليه
رجع عبد القادر جايب عشى من المطعم وماي
وترمز جاي
جمانه السعيدي
عبد القادر....تتعشين
اريج....ماجوعانه
عبد القادر....لازم تاخذين علاج والعلاج قوي محتاج اكل
اكلي حتى لاينزل العلاج على معده فارغه
وهاي جبتلج جاي
اريج...فتح الاكل وجابه قربه عليه
ايدي اليمنى مجبره حاولت اكل بليسره
مااكدر اكطع اللحم
عبد القادر...اوكفي اني اوكلج
اريج....لا
عبد القادر....شنو لا ايدج ماتكدرين تاكلين بيها
اريج...يسوي لفه زغيره وينطي اخذ الاكل بليد اليسرى واكل جنت محرجه بشكل
طبعا هو للامانه ينطيني اللفه ويدور وجها عني
حتى لا يحسسني بلاحراج
اكلت لفتين وكتله كافي
عبد القادر....شنو كافي ليل الشتا طويل وانتي راح تاخذين علاج اكلي ترا الاكل مابي احراج لو عيب
اكلي اشبعي حيل
اريج...مااكدر كافي بس اريد جاي راسي يوجعني
عبد القادر....اجيبلج مهدء
اريج...لا هو العلاج هذا كله مسكنات اريد بس جاي
شال الاكل من كدامي خلا على الميز
وجابلي كوب جاي
وهو راح يتعشى كمل شال الباقي خلا بلزباله
وراح غسل ادي ورجع يشرب جاي
اجا اتصال من واحد يريد يشتري ثلاجه
عددله كل النوعيات الي موجوده عنده واسعارهن
بعدين رجع اتصل علي واحد ثاني يمكن صديقه
لان سئله ليش اليوم ما موجود بلمجمع
رد عليه وكال عندي ضروف بعدين احجيلك عنهن
نزل التليفون وصفن
اريج....تكدر تروح للبيت اني راح اخذ العلاج وانام
بس الصبح تعال لان اني وحدي ومااكدر
عبد القادر.....لا مااعوفج انتي بسببي تكسرتي
مستحيل اعوفج لازم اتأكد من وضعج
بلكت تتذكرين اهلج
اريج....تعبتك وياي
عبد القادر...بلعكس اني الي كسرتج وياي هههههه
اريج...ممكن اجيب الممرضه تنطيني العلاج حتى انام
عبد القادر....ممكن
اجت الممرضه انطتني العلاج وطلعت
تمدد هو على الجربايه
عبد القادر....راح اسئلج كم سؤال إذا تكدرين جاوبي
واذا سكتي اعرف نمتي
اريج...اسئل
عبد القادر....انتي مخلصه دراسه
اريج...مااعرف
عبد القادر.....يعني ممكن تكونين واصله الاي مرحله مثلا
اريج...مااعرف
عبد القادر...انتي مزوجه
اريج...اعتقد لا لان ماكو حلقه بايدي
عبد القادر....اكو شي تخافين منه بحياتج
لان اني من شفتج جنتي تركضين بسرعه وخايفه
اريج...مااذكر بيني وبين نفسي اكول ذكي هذا عبدو يريد يكشفني باسئلته بلكت انسى واحجي معلومه
اني أذكى منك مراح تكدرلي
عبد القادر...اذا اخذج النفس المكان وننزل نتمشى بلشارع
ايجوز تذكرين
اريج....شلون اتمشى واني رجلي مااكدر احركها
مورمه وتوجعني حيل
عبد القادر...من تصيرين زينه انشاء الله
اريج...انشاء الله اذا ضجت مني عوفني اني مراح اشتكي عليك انت مالك ذنب اني طلعت كدامك
عبد القادر...مستحيل اعوفج اذا ما ترجعين تمشين على رجليج واتأكد من سلامتج مليون بلميه
دقيقه شلون عرفتي انتي طلعتي كدامي تذكرين ليلة الحادث
اريج... خفت ذكي وجاي يدقق بكلامي
.لا مااذكر بس انت كل شويه تكول موقصدي ادعمها هي طلعت كدامي
عبد القادر.....توقعت اذكرتي ليلة الحادث
اريج...اني بس اصير زينه حتلو ما رجعتلي الذاكره
اشوفلي مكان واروح علي
انت مالك ذنب تتحمل مسؤليتي
جمانه السعيدي
عبد القادر.....اني ما متعاجز من مسؤليتج ولا فقير وخايف اصرف عليج عندي خير من الله
بس شايل هم اهلج اكيد جاي يدورون عليج
واحد اذا اضيعله دجاجه يخبص الجو عليها
كيف اذا ضاعت بنيه شابه
اريج....ممكن اني اسئلك
عبد القادر...اي اسئلي
اريج...ليش جبت امك مره جبيره تبقى يمي وين زوجتك
اكيد انت مزوج لان مو زغير
عبد القادر.... اني منفصل وعايش بلبيت بس اني وامي
اريج...يعني امك ماعدها غيرك
عبد القادر...لا عندي اخ عايش بلخارج
عبد القادر....زينه اسئلتج ذكيه يعني عقلج تمام
اكيد راح ترجعلج الذاكره وترجعين الاهلج
راح احجيلج شغله بس لا تزعلين
اريج...لا ماازعل
عبد القادر.....اني من شفتج عبالي مخبله لان تركضين حافيه بليل
من رحت اسئل بلمنطقه الي شفتج بيها
كتلهم هم اكو وحده مخبله مهزومه من اهلها
الكل كال لا
اريج....ضحكت ودنكت
عبد القادر...هااا ضحكتي ولله شكلج عبالك مخبله
اريج...شكر كلتها واني زعلانه
عبد القادر.. ليش زعلتي باجر اجيبلج مرايه شوفي شكلج
اريج...مااذكر شنو صار وياي وطلعت هيج للشارع
عبد القادر...انشاء الله تتذكرين
اريج...غفيت لان بدا مفعول العلاج يشتغل
وهو اسمعه يسولف عليه
عبد القادر...هااا نمتي نوم العوافي
نزلت من الحربايه غطيتها زين ورجعت نزعت الحذاء وصعدت على الجربايه ونمت
جمانه السعيدي
اريج...حلمت ا ني بيت سهيله وماجد اجاني بيده سجينه يريد يقتلني وخاله سهيله تكله عوفها
وهو لازمني ويضرب بيه بلسجينه
كعدت واني اعيط ومختنكه
طفر عبد القادر على صوتي
عبد القادر...نايم واسمعها تصبح لا لا عوفني
طفرت لكيتها كاعده وترجف
اسم الله يمكن جنتي تحلمين اجيبلج مي
اخذت البطل مني شربت شويه
اريج...فحطانه وخايفه
عبد القادر....سلامتج الف سلامه
اريج...الله يسلمك
عبد القادر...رجعت كعدت على الجربايه باوعت الساعه بلاربعه الصبح
بقت هي ممده وتحوس اكثر من ربع ساعه وهي تحوس
عبد القادر....شبيج يوجعج شي
اريج....رجلي حيل توجعني
عبد القادر.....اي ليش ما تحجين هسه اروح اجيب احد. يشوفها
رحت جبت الممرض
الممرض...هي أخذت علاجها
عبد القادر .اي اخذت
الممرض.. عادي يصير وجع الدنيا بارده ورجلها مورمه وبيها رضوض
عبد القادر. انطيها مسكن شي
الممرض...اخذت علاجها مايصير كثرة الادويه موزينه عليها
اريج...توجعني
عبد القادر.....ترا الوجع ما ينحمل لازم تساعدها
الممرض.... خلي مخده جواها حتى ينزل الدم منها
ويخف الوجع
عبد القادر ...اخذت مخدتي الي نايم عليها
خليتها جوه رجلها وغطيتها
بقيت كاعد وهي بعدها تتالم
عبد القادر...ماصرتي احسن
اريج...توجعني
عبد القادر...شسوي ما تسمعين يكول موزين عليها العلاج
اريج...ارجع نام انت هسه اصير احسن
عبد القادر...شلون انام وانتي كاعده
اريج...كعدتك مراح تخفف عليه الالم نام ورتاح
عبد القادر....خل نسولف حتى تنسين الوجع
اريج...مااكدر احجي توجعني
عبد القادر...خل اغطيها اكثر اذا دفت يروح الوجع
نزعت قمصلتي ولفيت بيها رجلها
اريج...بارده عليك
عبد القادر...لا زينه مو بارده اغطيها بعد
اريج....لا كافي دفت
عبد القادر.....حاولي تنامين
اريج...اي هسه من دفت رجلي هدء الوجع شويه
اريج.. غفيت كعدت الصبح لكيت عبد القادر متغطي ومتكرفص ونايم خطيه ما ماخذ راحته بسببي
شويه واجت خاله من عبد القادر جايبه ريوك وجايه
كعد عبد القادر على صوتها
....امي شجابج
ام عبد القادر....اجرت تكسي واجيت شنو مااندل
يله تعال تريك
اريج...باوع عليه وكال شلون صارت رجلج
اريج...زينه احسن من البارحه
ام عبد القادر...ليش البارحه توجعج
اريج...ما نمت منها من البرد توجعني
ام عبد القادر...لو ادري جايبه صوبه وياي
عبد القادر...اني اجيب اليوم وياي من اجي
انتظرونا القادم اجمل
تعليقات
إرسال تعليق