سكريبت جديد وحصري
 |
سكريبت جديد وحصري
_حاسس انك تخنتي شويه ؟
=هو فيها مشكله يعني ؟
اتنفض_ نعم ؟ انتي بتهزري
= انت متعصب ليه وبعدين دة من الادويه والله
_مليش فيه تخسي قبل الخطوبه
= اخس ايه بقولك من الادويه ومقدرش أبطلها
زعق فيا _ لا هتبطليها وتخسي أنا مليش ذنب اتجوز بقرة مش كفايه تعبك وقرفك
قومت مكاني وضربته بالقلم = البقرة دي اللي فضلت سنين تجري ورايا وتحلم بصه مني والله لتندم علي كل كلمه قولتها
_بالله بطلي عياط والله ما يستاهل ضفرك
= أنا تخينه يا سمـا ؟
_ والله اعمي ومبيشوفش فين التخن دة لا أراه ؟
= دة فضل يجري ورايا شهور عشان ارد عليه بس
_ معلش يا حبيبتي ربنا نجدك منه مش انا قولتلك مش مستريحاله ؟
= خلاص فكك احنا هنقضيها مندبه راح فداهيه مش مشكله المهم أن في الشغل اتصلو بيا عشان اسافر المؤتمر أنا فرحانه جدا
_ اه يا بنت الهطله انتي مش كنتي لسه بتندبي حظك من شويه
_ ما تفكي بقا دة حتي كان معفن سيبك منه
=بتموڤ اون في سبع دقايق ماشاء الله
ضحكت _ طب قومي يختي روحي بيتكو بقا
خدتني في حضنها = لو عوزتي حاجة كلميني
هزيت راسي " سمـا دي صحبتي الوحيدة وحته مني لو هشحت كدة محبش الا هي بيقولو مفيش حد كامل بس هي فيها كل حاجة دة يبخته اللي هتبقي من بخته والله جمال هيلاقي حنيه يلاقي عقل يلاقي خفه دم يلاقي "
_ نعم يماما
طلعت لقيت يوسف قاعد معاها " يوسف ابن خالتي كنا قريبين جدا من بعض ومعرفش ايه اللي حصل خلانا بعاد كدة "
= احمد باعت عاوز حاجته ليه يا ايسل انتو اتخانقتو
_ أيوة
زعقت = هو ايه اللي أيوة اكيد زعلتيه ما أنا عارفاكي دبش صحيح
زعقت وانا مش قادرة اطلع صوتي _ ومسألتهوش ليه
= مرضاش يتكلم أنا هعزمه بكرة يجي وتتأسفيله
_ دة حيوان أنا مش عاوزاه
= وانا مقدرش علي مصاريف علاجك يا ايسل احمد كان هيتكفل بيكي أنا تعبت وانتي حالتك مفيهاش تحسن
_ عاوزاني اعمل ايه يماما اتجوز واحد بيذلني بمرضي ؟ ترضيهالي
= أنا طالب ايد ايسل منك يا خالتو
_ ايه دة ؟
شدني من ايدي للبلكونه = معلش يا خالتو عاوز اتكلم معاها شويه
ماما هزت راسها
شديت ايدي _ يوسف سيب ايدي انت بتقول ايه
= في ايه يا ايسل
_ هو ايه اللي في ايه انت هتجوزني شفقه يا يوسف ؟
= سبتيه ليه
_ وانت مالك ؟
زغرلي =ردي يا ايسل
دمعت _ شايف اني تخينه و مراته لازم تكون ميس ايجيبت طبعا وكفايه تعبي وقرفي بالنسبه له مش هبقي تخينه كمان
زعق = انتي بتقولي ايه والله لأخليه يندم
_ يوسف يوسف استني يا بني
=يوسف راح فين يا ايسل
_ معرفش يا ماما معرفش نزل بسرعه
= يعني ايه نزل قولتيله ايه
_ أنا عاوزة انام يا ماما ممكن ؟
=أنا تعبت منك حرام عليكي
" يارب أنا راضيه بقضاءك والله وصابرة أنا مقتنعه أن المرض مش بلاء هو محنه صعبه عليا بس انا قدها أن شاءالله أنا عندي كانسـر بقالي خمـس سنين تعبت من الكيماوي و الادويه وشي بهت وجسمي اتغير و شعري خف بس في اخر خمس شهور جسمي اخيرا استجاب للعلاج والدكتور اضطر يزود جرعه العلاج عشان تبقي مكثفه وكان فيه نسب كيرتيزون كتيرة شويه ودة ادي اني اتخن شويه و اكبر صدمه خدتها أن اللي بيحارب معاك بقاله سنه وبيدعمك يتخلي عنك عشان شويه ملامح اتغيرت"
_ يوسف ؟
= أيوة يا ايسل
اتوترت_ انت كويس ؟
= كنتي بتحبيه ؟
_ ...
= ايسل ردي كنتي بتحبيه ؟
_ لا
= كتب كتابي عليكي بكرة وهنسافر الاسبوع الجاي تعملي العمليه في امريكا
" معرفتش ارد أنا بحب يوسف من يوم ما دخلت أولي ثانوي كان بيذاكرلي وايام امتحانات تالته ثانوي جه عاش معانا عشان يفضل معايا ويراجعلي يوسف دكتور بس معرفش تخصص ايه هو نفسه يدخل قسم جراحة قلب ويوسف ماسك في حلمه اكيد وصله ويوم ما جيبنا نتيجة التحاليل كان ميعاد انه يكتب التخصص بس من يومها مشوفتوش اختفي من حياتي وسابني وانا في أولي كليه بواجه لوحدي وبس"
=ايسل معايا ؟
_ أيوة يا يوسف
= موافقه
عيطت _ ايوة
= طب مالك بس بتعيطي ليه ؟
مقدرش ارد وعيطت اكتر والخط فصل
"مش سهل عليا اني اكون محملاه ذنب كبير أنه سايبني كل دة ويجي هو يضحي بحياته ويتجوزني ويسافر و يسيب حياته عشان اعمل العمليه واقدر اتعافي"
سمعت صوته حد في البلكونه لسه هصوت
_هشش أنا يوسف اهدي
= ي.يوسف انت اي اللي جابك
_ كنتي بتعيطي ليه
= انت نطيت من البلكونه ؟ انت مجنون
_ متأڤوريش دة انتي بلكونتك لازقه في بلكونتي
= أيوة صح
_ كنتي بتعيطي ليه ؟
_ يادي النيله طب بتعيطي ليه تاني
= انت عاوز تتجوزني ليه ؟
_ عشان تسافري وتعملي العمليه
= وهنطلق ؟
_ أيوة بعد ما تخفي أن شاءالله
=أنا خايفه العمليه كبيرة يا يوسف
_ هتقومي بالسلامه والله
= هتتعب معايا جامد
_ يهون لأجل عيونك يا قمر
ضحكت = ممكن تفشل ؟
_ ربنا مش هيخذلنا ابدا ان شاء الله
= شكرا ليك يا يوسف بجد مش عارفه اقولك ايه
_ دة أنا اللي المفروض اقول شكرا لربنا أنه خلقك والله
مشي بسرعه وانا ضحكت عليه
_ ايسل تعالي
=أيوة
_ يوسف طلب ايدك
= طيب
_ هو ايه اللي طيب هتسافري معاه عشان تعملي العمليه
= ماما هو العمليه ممكن متنجحش ؟
_ اكيد بس مقدمناش حل تاني هتفضلي طول حياتك بالادويه يعني ؟
= ولو فشلت ؟
_ قدر ربنا
عيطت
_ بتعيطي ليه ؟ عاجبك حالك يعني
اخدت طرحة علي راسي وطلعت اجري علي السطح وانا بعيط
لقيت يوسف قاعد واتخض
_ مالك في ايه
= أنا تعبت
مسك ايدي _ فاكرة زمان أما كنتي بتعيطي كنت بقولك ايه
ضحكت = انت كل ما تشوفني بعيط تضحكني
_ يعني بذمتك لما العيون دي تعيط ايه اللي يضحك يجدعان
" ممكن نقول إنه الطف حد فعلا ممكن يدخل حياه اي حد "
= صحيح انت نضفت الشقه ازاي؟
_ روقت اوضتي بس وكدة كدة هنسافر
= امم مش عاوز تشرب قهوة ؟
ضحك وخد قلبي يعسل والله " كنت زمان بقوله يبختها اللي هتبقي من بختها ومكدبتش فعلا "
_ اصحي يلا ايسل اصحي عشان يوسف بره
"فكرة إني هتكتب علي اسمه بعد شويه دي حاجة مفروض تفرحني بس حس بالذنب هو بعيد عني بقاله خمس سنين اكيد حب خايفه اكون سبب اني فرقت بينهم أنا بحبه اه بس هو و...ايه دة هو زي القمر وبيضحك كدة ليه جوزي قرة عيني "
_ حاسس انك عاوزة تقولي حاجة ؟
= ه..هو يعني الصراحة
_ كملي أنا سامعك
= انت كنت بتحب؟
بصلي _مش فاهم ؟
= يعني اقصد انت قعدت خمس سنين ف يعني هو ممكن تكون حبيت
بص بعيد شويه وبعدين بصلي _ أيوة
= يخربيتك
ضحك _ مش انتي اللي سألتي طيب؟
= كان ممكن تكدب عليا عادي علي فكرة
_فعـلا
اتوترت = اعملك قهوة ؟
"العمليه بعد بكرة خوفي من فشل العمليه كبير بس يوسف بيعمل كل اللي عليه عشان يطمني مفتحش موضوع الطلاق من يوم ما اتجوزنا وطبعا ماما متصلتش تسأل عليا حتي بعمله سبعين فنجان قهوة تقريبا كل يوم ما هو مش بقالي خمس سنين بتعلم اعمل قهوة ويبقي عايش معايا كدة وأفوتها كدة يعني "
_ يوسف يلا تعالي الغدا
= ايه دة سمك ؟
_ أيوة بص ريحته حلوة ازاي
= ايسل أنا مبحبش السمك
_ ازاي يا يوسف دة أنا عاملاهولك في الفرن زي ما بتحب
= ايه ؟ انتي عرفتي ازاي ؟
"اقولك اني بحبك يعني وحافظة كل فتفوته بتحبها دة انت غبي "
_ جهزتي الشنط ؟
= اه خلاص اهو فاضلي حاجات بسيطة
_ مالك شكلك تعبان
= لالا مفيش فرهدت بس
مسكني من ايدي _ طب تعالي اقعدي و قوليلي اعمل ايه بس
"هو حنين اوي ! حنين بدرجة تتحب اوي عمرة ما حسسني بالشفقه أو أنه مغصوب عليا "
_ هي كانت حلوة؟
= هي مين ؟
_ اللي بتحبها
=روحها كانت احلـي
_ كنت هتخطبها ؟
= يوم ما روحت اخطبها كانت بتلبس دبله غيري
_ ربنا يعوضك أن شاءالله
ابتسملي
_ فاضل كتير انا زهقت
= نص ساعه خلاص
رجعت راسي لورا
" خايفه شويه لا كتير صراحة خلاص نص ساعه وهننزل المطار و الصبح هكون في العمليه ممكن خوفي من بعد العمليه اكتر هيطلقني طب ؟ "
_ هو احنا رايحين المستشفي ليه ؟
= هنعمل شويه تحاليل بس
_يلا تعالي
"خلصنا التحاليل وروحنا الاوتيل دخلت الاوضه واتصلت بسـما"
_الو
= سما أنا ايسل
صوتت_وحشتنيي وصلتي ؟
عيطت = أيوة وبكرة العمليه أنا خايفه اوي يا سما
_ متخافيش يا حبيبتي والله فين ايسل اللي فضلت خمس سنين بتحارب وتقع وتقوم أنا كنت بقوي بيكي
=تفتكري هيسيبني ؟
_ قوليلي اجيبلك بسبوسه ولا كنافه بالمنجا لما اشوفك ؟
= مش هيحبني صح ؟
_ هيموت فيكي ايش فهمك انتي بس
= ودة ازاي يعني ؟
_ عشان صحبتي زي القمر ومفيش منها اتنين اصلا
=ويبخته اللي هبقي من بخته صح؟
_طبعا اومال
= يوسف بينادي استني خليكي معايا
_ هجيب حته بسبوسه واجيلك
طلعت البلكونه
_ أيوة يا يوسف
= وحشتني القهوة من ايدك
ضحكت _ ثواني وتبقي قدامك
_ انتي يعديمه الكرامه
= ايه يا سما استني القهوة هتفور
_ انتي بتعمليله قهوة ؟
= طبعا مش طلبها مني
_ يشيخة ؟
= شوفتيه وهو بيقولي وحشتني القهوة من ايديك؟
_ اقتلوهاااا
" ياه تخيلو يجي يقولي انتي البنت اللي بحبها وتوته تخلص الحدوته و نتجوز ونعيش في اسكندريه كدة ياهههه يجماعه يااه"
_ تسلملي ايدك
= كان اسمها ايه البنت اللي بتحبها دي ؟
_ شاغله دماغك بيها ليه ؟
= لا ي...يعني هو فضو..فضول بس عادي
_ تمـارا
= كانت زميلتك في الكليـه ؟
_ لا كانت اخت صاحبي
= مقولتلهاش ليه انك بتحبها ؟
_ النصيب بقا ويلا ادخلي نامي عشان تصحي فايقه للعمليه
هزيت راسي ودخلت صليت وقعدت اعيط
فتحت عيني لقيته جنبي
_ انتي كويسه ؟
= كان اسمها ايه البنت اللي بتحبها دي ؟
_ شاغله دماغك بيها ليه ؟
= لا ي...يعني هو فضو..فضول بس عادي
_ تمـارا
= كانت زميلتك في الكليـه ؟
_ لا كانت اخت صاحبي
= مقولتلهاش ليه انك بتحبها ؟
_ النصيب بقا ويلا ادخلي نامي عشان تصحي فايقه للعمليه
هزيت راسي ودخلت صليت وقعدت اعيط
فتحت عيني لقيته جنبي
_ انتي كويسه ؟
= هو ايه اللي حصل
_سمعت صوتك كنتي بتعيطي ودخلت لقيتك واقعه
= اه أيوة
_ كنتي بتعيطي ليه
= مفيش افتكرت بابا بس
_ طب خليني اقيسلك الضغط عشان اشوف جاهزة ولا نأجل العمليه
_لا الحمدلله كويس اهو جهزي نفسك عشان يدوب نلحق نروح المستشفي
= حاضر ، هو انت سهرت جنبي طول الليل
_ اكيد مش هسيبك لوحدك يعني
" حبه بان يجماعه بان"
قومت لبست وبعدت لسما ماسدج_ ادعيلي دة اكتر وقت محتاجة دعواتك ،بحبك
" كنت مستغربه نفسي بس انا مش خايفه أنا بقالي خمس سنين بحارب لوحدي لما قابلت احمد فكرت أنه عوضي و أنه هيقف جنبي بس هه اول ما تعبت شويه اتكل علي الله"
_ جاهزة ؟
= انت لابس كدة ليه
_ لابس ايه
= ه..هو مش الدكتور اللي بيبقي لابس كدة ؟
_ أنا الدكتور يا ايسل
= اييه؟
مسك ايدي واداني حقنه _ هتقومي بالسلامه متخافيش
غمضت عيني ومحستش بحاجة ..
_ ايسل فتحي عينك ؟
فتحت عيني كانت كل حاجة باهته قدامي
= نج..حت يا يوس..ف ؟
_نجحت يا حبيبتي نجحت
غمضت عيني وانا حس براحة رهيبه سيطرت عليا وعلي لساني "الحمدلله يارب الحمدلله"
فتحت عيني لقيته مركز في الادويه
_ ي..يوسف ؟
الادويه وقعت منه وجري عليا = انتي بخير يا ايسل ؟
هزيت راسي ولساني تقيل_بب..بخ ..بخير
اداني حقنه وقعد جنبي يقرأ قراءن " يوسف طول عمره صوته حلو وعارف اني بخف علي صوته في القراءن "
" عدي يومين وانا بنام بس وعايشه علي الادويه والمحاليل وبحس بيوسف جنبي طول الوقت "
"فتحت عيني واول مرة احس لساني خفيف ضحكت وحمدت ربنا "
_ يوسف فين
= Can I help you؟
_yes , Where is Yussef ؟
=Do you mean Dr. Youssef
_ yes؟
=I'll call him to you
_ ok, thanks
_ ايسل انتي كويسه ؟
= أيوة الحمدلله هو انت يعني الدكتور ه..
مسك ايدي _ مالك بس ملغبطة ليه
= انت كان نفسك تدخل قسم جراحة قلب ؟
قام وقف _ امم فعلا
= فعلا ايه انت كنت بتجرب فيا ولا ايه يااض
ضحك جامد _ عيب والله يتقال ياض لواحد من أكبر دكاترة الأورام في مصر ونيويورك
تنحت= أورام ؟
_ فاكرة يوم ما روحتي تجيب التحاليل؟
هزيت راسي = كان يوم تخصصك؟
_ أنا اتخصصت أورام عشانك
= مشيت ليه يا يوسف
_ أنا ممشتش والله أنا كنت بكلم خالتو لحظة بلحظة وكنت بدرس عشان اللحظة دي اللحظة اللي تيجي واعملك العمليه خمس سنين وانا بدرس وبسافر عشانك والله
_ طب بتعيطي ليه بس
= عشان انت كان نفسك تدخل جراحة قلب
_ يا سوسو مش انتي اللي دايما بتقولي اي مجال حلو طالما ناجحة فيه ؟
هزيت راسي = ربنا يوفقك يا چو
_ عارفه ؟ أنا عملت عمليات كتير جدا بس اول مرة احس نفسي عملت عمليه ناجحة
ضحكت= شكرا بجد
= شكرا ايه تعالي يلا مين تمـارا دي ؟
_ انتي بتتحولي ليه يخربيتك
= أنا بتحول يا يوسف اناا؟
_ اهدي بقا انتي لسه تعبانه
= انطق يا يوسف مين تمارا دي انت بتخوني ؟
_ اخون مين يا ايسل هو احنا مرتبطين عشان اخونك
= يوسف احنا متجوزين؟
_ بس زي اختي
= ايه ؟
_ مالك يا بنتي
= لا سوري اندمجت بس المهم احكيلي مين تمارا دي
_ كانت اخت صاحبي وروحت اتقدمتلها و....
= نهارك اسود اتقدمت لمين ؟
_ في ايه يا ايسل
كتمت نفسي = لا ابدا سوري كمل
_ بس هي رفضت
= احسن احسن
_ نعم ؟
= اتكتم خالص رفضت ليه
_ عشان كنت لسه بدرس
= يحبيب ماما معلش
=بتبص علي مين يا ابو عين زايغه انت
_ بصي البنت دي زي القمر
= يا بن الجزمه هتدخل النار محروق يكش عينك تتخزق
_ أنا قايم اكتبلك علي خروج ابو شكلك
_ حبيب قلبي تسلم
" حظي حظ الكتكوت المبلول والله بكرة تجري ورايا كدة وتتحايل عليا عشان انا بحبك وانا اشوح بإيدي كدة واقوله ابدا انت اخويااا"
_اطفي النور يبني
= قومي خدي الدوا وبعدين اتخمدي
_ اهو يلا اطلع
=اتخمدي
_ يوسف
= أيوة يا حبيبي
" كلمه عفويه يا جماعه اتهدو"
_ هرجع مصر أمتي ؟
= عاوزة ترجعي ؟
هزيت راسي
= هحجز طيارة بكرة
_ طب وانت ؟
= هاجي معاكي طبعا
ابتسمت _ طب طفي النور واتكل علي الله يلا
= تصبحي علي خير يسوسو
"رجعوني مصر بس وانا هخليه يموت فيا "
_ يوسف يووووسف
= ايه ايه
_ موبايلي فين عاوزة اكلم سما ؟
= ثواني اجيبهولك
= ايسل هو مين اللي كاتباله الجمله دي ؟
"ستبقي عيناك تربكني مهما اعتدت روئيتهـا"
" أقوله اني كاتباها بقالي ست سنين ليك وانت لوح؟"
_ جمله عجبتني عادي هات الموبايل يلا
هو رأسه وطلع وبعدها بدقيقه دخل تاني = يعني مش لأحمد ؟
_ أحمد ايه يا يوسف انت عبيط ؟
= هو مش انتي كنتي بتحبيه ؟
_ مين قال ؟
= خالتو
ضحكت ودمعت _ خالتو؟ أنا محدش دمرني غيرها
=خالتو مش قصدها يا ايسل افهمي
زعقت _ مش قصدها ؟ مش قصدها ايه ؟ عملت نفسها مش واخدة بالها سنه كامله وهي سامعه عياطي كل يوم ورفضت مرة واتنين وتلاته اني اسيب بني ادم مريض زي دة وافقت عليه وغصبت عليا اتقبله! وكانت عاوزاني ارجعله بعد كل دة وكان قدام عينك رد ؟رد ساكت ليه دي مرفعتش الموبايل واطمنت عليا برنه حتي هي ليه بتكرهني ليه ؟
= مفيش أم بتكره ولادها صدقيني
_ ممكن تسيبني لوحدي ؟
دخل قعد علي السرير = كان نفسي والله بس معندناش الاوبشن دة
_يوسف !
= اعملك فشار ؟
" طول عمري بعيط وانام معيطة واول مرة حد يجاهد عشان يطلعني من الحزن دة "
_ يوسف ؟
= أيوة خلصتي ؟
_ اه نزل الشنط في العربيه بس
= طيب يلا
" كنت خايفه اجيب سيرة الطلاق بس خوفت اكتر اني اكون تقيله عليه "
_ احم يوسف هو ممكن اعيش معاك بس لحد ما والله الاقي شغل واقعد في شقه لوحدي ؟
بصلي = انتي للدرجة دي مش عاوزة تعيشي مع خالتو ؟
عيطت _ هتفكر أن أنا السبب في طلاقنا يا يوسف والله وهتعوز تخلص مني وتجوزني حد تاني مبحبوش
= ايسل هو انتي مبتحبنيش
_ ايه ؟
= ايسل ردي عليا انتي مبتحبنيش
_ لا طبعا بحبك انت زي اخويا يعني
هز رأسه
_ يوسف رد عليا ؟
= أنا مش هطلقك يا ايسـل
_ ليه ؟
= مش عارف مش عارف
_ يعني ايه مش عارف
=في حاجة ربطاني بيكي بس انا مش عارف ايه هيا
_ بتحبني ؟
= لا
بصتله
= أنا مقدرش اوعدك بحاجة ممكن متحصلش
هزيت راسي
= يلا وصلنا انزلي
" زمان قالو أن القلب بيحس قبل صاحبه يعني اول مرة بتشوفي فيها مامتك قلبك بيدق وينتفض وانتي لسه مش عارفه دي مين ؟ اول مرة هتشوفي فيها جوزك هتلاقي قلبك حاسس بيه لوحدي وبيدق هو طالما قلبه دق يبقي هيحبني صح ؟"
_ مش هتتغدي ؟
= مليش نفس
_ عاملالك مكرونه وبانيه
بصلي وضحك = انتي مبتعرفيش تعملي غيرهم يا ايسل
_ مش المهم طعمهم حلو وخلاص
_ عجبك؟
= هو أنا لسه كلت
_ الله طب ما تاكل هو أنا ماسكاك
_ حلو ؟
= تسلم ايديك
_ طب كمل طيب رايح فين
= عندي شغل كتير في المستشفى معلش والله خدي الدوا وكلي كويس و نامي عشان متتعبيش
_ترجع بالسلامه
باس راسي ومشي
--بيحبني والله بيموت فيا
= يا بنتي دة باس راسك اومال لو باس ايديك هتعملي ايه
_ انا بحبه اوي يا سما
= معلش يا حبيبي
_ ما تردي عليا بدل ما انتي شبه الفجله كدة مليش لازمه
= أنا مليش لازمه ؟ دة أنا كنت لسه جايبالك حته فكرة
_ هه هه حبيبي هل أنا ليا حبيب غيرك
= هنشوف الموضوع دة بعدين المهم مش انتي قولتي هو كان بيقول أنه بيحب باين ؟
_ تبا لكي أيوة
= جيبي سيرتها براحة قدامه وراقبيه وساعتها هنعرف لو مبقتش يحبها يبقي الموضوع سهل جدا انك تاخدي قلبه
دمعت_ طب لو لسه بيحبها ؟
= مع إن شايفه دة مش هيحصل بس هندعي أنا وانتي وناهد وكلنا ربنا يطلع حبه من قلبك
_ أنا تعبت حياتي عامله زي حياه الكتكوت المبلول بالظبط والله
= اجبلك تورته ؟
_ أيوة نفسي فيها
= لي لي عاوزة تشوفك
_ يا روحي هاتيها معاكي والنبي يا سما
= حاضر هروح اجيبها واجيلك
_ اوكي مستنياكو
_ ايسل ايسل انتي فين
= تعالي يا يوسف
_ بتعملي ايه ؟
= بعمل كب كيك لي لي بتحبها اوي
_ لي لي مين ؟
= بنت اخت سما صحبتي
_ كنتي جبتي من بره طيب عشان متتعبيش
= لا هي بتحبها من ايدي وبعدين اتعب وانا بعملها ل لي لي بس
_ بتحبي الاطفال اوي كدة ؟
= في حد مبيحبش الاطفال ؟
= ممكن تفتح ل سما؟
هز رأسه
_ لي لي اعععع وحشتييني
= لي لي بس اللي وحشتك ؟
عيطت واخدتها في حضني _ وحشتيني اوي بجد
= عامله ايه يا حبيبتي
_ الحمدلله تعالو بصو عملت كيكه
= عامله ايه مع يوسف ؟
هزيت راسي _ معملتش حاجة
_انا شويه احس انه بيهتم بيا وبعدين يرميلي كلمه دبش تجيبني الأرض
_ هيحبك هيحبك
بصتلها = هل انتي عبيطة ؟
_ اسكتي انتي ايش فهمك
ضحكت _ الكيكه حلوة يا لي لي ؟
= عمو اللي برا دة حلو اوي يا سوسو
_ امم فعلا ؟
هزت راسها = وشكله بيحبك اوي
اخدتها في حضني وسما ضحكت
" ممكن نقول اني كنت محتاجهم جدا وخصوصا لي لي اطيب حد في العالم وطالما لي لي قالت هيحبني يبقي هيحبني حبني بقا يلا لي لي مبتغلطش "
_ ممكن تعمليلي قهوة ؟
= عنيا طبعا
_ اسمها ايه البنوته قريبه صحبتك دي ؟
= قصدك لي لي
_ باين انك بتحبيها اوي ؟
= جدا والله نفسي اجيب بنوته زيها
_ يبختها
= هي مين ؟
ابتسم _ بنوتك متأكد انها هيكون عندها اجمل أم في الدنيا
" ما تقول بحبك يبني هو أنا بعُض؟"
_ فاكرة زمان أما قولتيلي يبختها اللي هتبقي من بختها ؟
= امم
_ امم ايه انتي مش فرحانه ؟
= افرح ليه يبني
_ عشان انتي بختي مثلا ؟
= هو احنا مش هنطلق مثلا
_ مين قال أنا قولت طلاق؟ هاتي القهوة يلا
= يوسف اقف رد عليا ممكن ؟
_ عاوزة ايه يا ايسل
= فهمني بالله اقعد وفهمني أنا متلغبطة وتعبت
_ عاوزة تسيبيني
= لا
_ طب في ايه بقا
= انت بتحبها يا يوسف ؟
_ احب مين ؟
= ت...تتمارا؟
_ احب مين يا ايسل انتي عبيطة ؟ أنا مشوفتهاش من خمس سنين
= بجد ؟
_ والله
اتنطط = عععععع أنا بحبك
مسكني من ايدي _ فعلا ؟
دخلت اوضتي جري
_ انتي بتضحكي علي ايه يا بقرة انتي ما تنطقي اهبب ايه
= مش قادرة والله
_ منك لله
"فضلت تلت ايام مبخرجش من الاوضه صعب عليا قولت اطلع اعمله اكل بسرعه قبل ما يجي من الشغل "
_ لا لا ايسل بتطبخ ؟
الطبق وقع من ايـدي _ انتي كويسه ؟
= أيوة أيوة
_ طب وسعي عشان متتعوريش
كنت لسه ندخل الأوضه بس مسكني _ مش هتدخلي تاني لا
= يوسف سيب ايدي والنبي
_ بتهربي ليه يا ايسل
= ط..طب سيب ايدي والنبي
_ شعرك طول كتير
= ايه؟
_ شطورة كان نفسك تقصيه وتدهنيه اصفر
_ ادهن مين يلا هي حيطة ؟ اسمها هصبغه
= تدهني
_ اصبغ
=تدهني
_ أصبغ
= تدهني
_ ادهن
ضحك جامد وانا ضحكت ضحكته جميله متضحكش قدام حد بقا بدل ما انكد عليك
_ بتبصيلي كدة ليه
= اعملك قهوة ؟
_ هموت منك كفايه قهوة
= طبعا يطلع عيني أنا خمس سنين اتعلم اعمل قهوة عشانك ومعملكش يعني ؟
ابتسم _ عشاني ؟
= احم يعني مش قص.دي اللي ..اعملك قهوة
هز رأسه ودخلت بسرعه اعمله
_ شوفت تمارا
= وحيات امك ؟
_ معاها بنوته
= حلوة ؟
_ هي مين
= تمارا
_ انتي احلي واحدة فعنيا
= احيه يا أبو سوسو احيه
_ سما انتي اتخرستي ليه ؟
= انتي عارفه دة معناه ايه ؟
_ هه؟
= أنه بيحبك
_ أنا اصلا اتحب
= يا قلب امك
_ طب انا عاوزاه ينطق ؟
= افتحيله موضوع الطلاق
_ عشان يفتح دماغي ؟
= انتو كلتو دماغي
_ أنا تعبت
_ يوسف ؟
= أيوة تعالي
_ ايه دة الله انت بتعمل ايه
= هنزرع ورد هنا و نحط الكنبه دي هنا ايه رايك ؟
_ كنبه في البلكونه ؟
= أيوة عشان نسهر عليها
_ هو احنا مش هنطلق ؟
= هاتي الورد اللي هناك دة
_ يوسف ؟
= نحط الكنبه ورا الحيطة دي ولا ورا دي؟
_ رد عليا !
= نحطها هنا احلي صح ؟
زعقت _ بقولك رد عليا
زعق هو كمان أنا آسف طب أنا عيل صغير = وانا قولت لا
_ ليه انت عاجبك عيشتنا دي ؟ أنا مش فاهماك أنا تعبت
= عاوزة ايه يا ايسل تطلقي ؟
قولت بسرعه _ لا يعني أنا عاوزة افهم ؟
= تفهمي ايه ؟
_ ه..هو أنت بتحب ؟
= أيوة
_ ومتجوزتهاش ليه بقا ؟
= اتجوزتها بس هي غبيه شويه
_ نهارك اسود انت متجوز عليا يا يوسف
= قولت غبيه والله قولت غبيه انتي ليه بتستبعدي كل حاجة عنك ؟
_ عشان انت مقولتهاش وقولت اني اختك اصلا فاكر؟ وبعدي...
= بحبك
_ ها ؟
= اعمليلي قهوة
_ وحيات خالتك
ضحك وقعدني جنبه = خلاص والله تعالي أنا آسف أنا بس كنت خايف اظلمك معايا
_ بتحبني من أمتي ؟
= من يوم ما اتخرجتي حسيت ان بنتي اللي مربيها فجأه كبرت وبتتخرج كنت فخور جدا بيكي
_ كنت محتاجاك اليوم دة
= كنت جنبك والله طول اليوم من غير ما تحسي
_ كنت محتاجة احس
= أنا آسف
_ قولها تاني كدة ؟
= هي ايه ؟
بصتله بطرف عيني
= خلاص والله بحبك
كنا قاعدين قصاد التليفزيون وجه خبر هروب أحد دكاترة الأورام راح اللواء اللي معاه قاله زي دكتور احمد السالمي
_ ايه ؟
= مالك ؟
_ هما بيتكلم عن أحمد
= اه
_ انت اللي عملت كدة ؟
= أنا معملتش حاجة أنا كل اللي قدرت اعمله اني اكشفه وهو بيتاجر في الاعضاء ولو اقدر اعمل اكتر من كدة هعمل لأجل عيونك
_ شكرا
= دة شكرا لربنا أنه خلقك والله
ضحكت
تمت
اللي بيحب الروايات الكامله والحصريه من هنا 👇 ❤️ 👇
❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺
الصفحه الرئيسيه للروايات الجديده من هنا
جميع الروايات الحصريه والكامله من هنا
انضموا معنا علي قناتنا بها جميع الروايات على تليجرام من هنا
❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺
تعليقات
إرسال تعليق