رواية لعنة الماضي للكاتبة الشيماء محمد الفصل السادس والسابع والثامن والتاسع حصريه وجديده
منيره قامت من الارض قدام بيتها ونزلت راحت لابنها ورشته واول ما شافها جري عليها
فارس: ازيك يا ست الكل عامله ايه؟ اتفضلي
منيره: اهلا يا حبيبي، انا لسه جايه من بيتك وخبطت كتير
فارس: هيام نومها تقيل معلش
منيره: طيب انا سيبت حاجتي قدام الباب
فارس: اه طيب يالا بينا يالا
اخد مامتو وراح علي بيته فتح ودخلها ورحب بيها جدا وفرح بيها جدا
فارس: اخيرا رجعتي بيتك!
منيره: لا يا حبيبي ده بيتك انت وانت الل.
فارس قاطعها: ده بيتك انتي واحنا هنا ضيوف عندك، خلي بالك من النقطه دي، ده بيتك انتي، انتي هنا مش ضيفه ابدا احنا هنا اللي ضيوف يا ست الكل..
منيره: ربنا يحميك يا حبيبي انزل انت يالا علي شغلك
فارس: طيب هصحيلك هيام؟
منيره: لا لا سيبها براحتها انا كده كده هفضي حاجتي واريح شويه...
سابها ونزل وبعدين افتكر ان البيت فاضي لان مراته ما بتعملش اكل وبتشتري جاهز فراح اشتري اي حاجه ممكن البيت يحتاجها وطلعها البيت.
 |
منيره: ايه ده كله؟
فارس: حاجات خليها في البيت، يالا بقي هسيبك انا وهحاول ما اتأخرش ولو احتجتي حاجه كلميني
منيره: ربنا يفتحلك طريقك ويوسع رزقك
نزل فارس علي شغله وحس ان الحياه هتختلف وتفاءل بوجود مامته في البيت...
فارس: مجدي كنت عايزك ثواني
مجدي: خير قول
فارس: كنت عايز 50 الف
مجدي ضحك: ههههههه اشترت ايه المره دي؟
فارس: معاك ولا لأ وبطل ظرافه! مش لمراتي اصلا دول...
مجدي: امال ايه؟
فارس: فرح، اول مره تطلب مني فلوس وانا اكسفها كده، كانت هتشتري شقه والفلوس عجزت معاها
مجدي: انت لازم تشوفلك حل علي فكره
فارس: هشوف المهم دلوقتي معاك ولا لأ؟
مجدي: معايا
فارس: ينفع تجيبهم دلوقتي؟
مجدي: قصدك اروح البنك دلوقتي؟
فارس: اه ينفع؟
مجدي: ينفع اوك، اديني ساعتين اكون جيبتهم
وفعلا مجدي جاب الفلوس وعطاها لفارس اللي اخدهم وراح لبيت اخته اللي كانت بتكلم في مامتها علشان ترجع
محمود: اهلا فارس اتفضل.
فارس: اهلا يا محمود، ازيكم اخباركم ايه؟
وبعد السلامات والعيال رحبوا بخالهم وقعدوا مع بعض
فرح: هيا ماما زعلانه من حاجه؟ مشيت ليه؟ قالتلك ايه؟ هاه؟
فارس: حيلك حيلك، ماما مش زعلانه من حاجه ومقالتليش حاجه، هو في حد زعلها يعني؟
فرح: لا محدش زعلها طيب مشيت ليه؟
فارس: رجعت لبيتها يا فرح، اكيد اشتاقتله ورجعتلو
فرح: بجد يا فارس ماما مش زعلانه؟
فارس: والله ابدا ما قالتلي اي حاجه المهم، اتفضلي.
فرح بصت لجوزها: ايه دول؟
فارس: ال 50 الف اللي طلبتيهم روحي اشتري الشقه اللي انتي عيزاها
فرح باستغراب: بس انت امبارح قلت مش معاك؟
فارس: اتصرفت ما تشغليش بالك انتي المهم اقضي مصلحتك
محمود سابهم وقايم
فارس: انت رايح فين ما تقعد؟
محمود: دي امور خاصه بينك وبين اختك تحلوها مع بعض
فارس: وانت جوزها اقعد مفيش حاجه خاصه عليك
فرح: جبتهم منين يا فارس؟ اوعي تكون اخدتهم من حماك؟
فارس: لا طبعا انتي مجنونه ولا ايه؟ حمايا ايه اللي اخد منه؟ علشان تطمني دول من مجدي، وانا هردهملو من الشغل ما تشغليش بالك
فرح: ومراتك ومصاريفها؟ هتعمل ايه فيهم؟
فارس: هظبط الدنيا ان شاءالله، هظبط كل حاجه يا فرح، هصلح كل حاجه
فرح: انا مش عيزاك تكون مديون.
فارس: انا ومجدي بينا كتير وامورنا بنظبطها مع بعض ما تقلقيش انتي المهم قومي الحقي الشقه قبل ما تطير وانا هقوم علي البيت اشوف ماما وهيام عملو ايه في بعض يالا سلام
وهو ماشي حضنته جامد وعرفت ان اخوها زي ماهو ما اتغيرش، ايوه الظروف اللي حواليه اتغيرت بس هو زي ماهو
فارس: علي فكره هدومي مش نظيفه وهتبهدلك
اخته بصتله بحب: مش مهم فداك، وحشتني يا فارس قوي
فارس: وانتي كمان بس انتي اللي بتبعدي مش انا
فرح: مش هبعد.
فارس: امك في البيت وهيام مش اجتماعيه قوي فانتي تروحيلها كل شويه وتقعدي معاها براحتك
فرح بهزار: مراتك هتولع فيا وفي عيالي
فارس: ما تقدرش وبعدين ده بيت ابوكي تروحيه في الوقت اللي يعجبك وبعدين كتر خير امك انها سيبانا نقعد فيه اصلا، خلاص؟
فرح: خلاص ما تقلقش
سابها ونزل وهو فرحان انه قدر يفرحها ويساعدها وراح علي بيته واول ما دخل شم ريحه مفتقدها من زماااان قوي
منيره: حمدلله علي السلامه حبيبي، اكيد جعان؟
فارس: هيا ريحه الاكل دي هنا؟
منيره ضحكت
فارس: ميت من الجوع يا امي ميت
منيره: بعد الشر عليك روح غير بسرعه وانا هحط ناكل
فارس دخل اوضته كانت مراته علي السرير
فارس: ايه مالك؟
هيام: ماليش
فارس: قاعده هنا ليه مش بره مع ماما؟
هيام: كنت بريح شويه، هيا مامتك هتفضل هنا لامتي؟
فارس: مامتي رجعت بيتها مفيش حاجه اسمها لامتي
هيام: امممم بيتها طيب
فارس: ايه مالك؟
هيام: لا ابدا روح غير هدومك روح.
دخل غير وطلعو وقعدوا ياكلوا وفارس مع كل لقمه بياكلها بيشكر مامته وعايز يبوس ايديها
فارس: انتي مش متخيله اكلك وحشني قد ايه؟ معدتي اشتكت من الاكل الجاهز
هيام: بالعكس الاكل الجاهز صحي مش دسم زي ده، ده هيجيبلك الكوليسترول وامراض كتير
فارس: انا عايز يجيلي الكوليسترول مالكيش دعوه
منيره: الواد بيشقي ويتعب يبقي اقل حاجه يلاقي لقمه هنيه ترم عظمه
هيام: اه طيب البركه فيكي بعد اذنكم
سابتهم ودخلت.
منيره: هيا مراتك متضايقه من حاجه يا فارس؟
فارس: ما تشغليش بالك، هيا بس متضايقه علشان ما اشترتش حاجه النهارده
ضحكوا الاتنين، عدت ايام حلوه علي الكل بس طبعا هيام مش عاجبها الوضع وحست انها متكتفه وان حماتها ماسكه كل حاجه وهيا ملهاش دور وفي نفس الوقت هيا مش مستعده تتعب، بدأت تضايقها بالكلام وبالافعال وتضايق فرح كل ما تيجي واعتمدت علي نقطه انهم مش هيقولو لفارس منعا للمشاكل..
فارس شغله بدأ يتعدل بعد ما منع مراته من الفواتير اللي كانت بتبعتهالو وعمل كونترول علي مصاريفها بس لاحظ انه امه بدئت تتعب وصحتها في النازل
فارس: هيام هيا امي مالها؟
هيام: مالها ماهي زي الحصان اهي؟
فارس: اتكلمي عدل عنها، انتي ما بتساعديهاش ليه في اي حاجه تعملها؟
هيام: لاني معرفش
فارس: يعني ايه ما تعرفيش؟ اقفي معاها واللي تعمله ساعديها فيه.
هيام: بقولك ايه انا استحملت كتير قوي وجيت علي نفسي اكتر لكن لحد شغل في البيت ولأ والف لأ
فارس: امال ايه امي تخدمك ولا ايه؟
هيام: انا ماليش فيه! مش انت اللي عايز تاكل من ايدها؟ ولا انا؟ هاه؟ وبعدين بتتكلم عن المصاريف واختك طول الوقت لازقه هنا هيا والشياطين عيالها واكلين شا.
فارس قاطعها: كلمه زياده قسما بالله لامد ايدي عليكي، البيت ده بيت ابويا يعني بيت امي واحنا هنا قاعدين عندها وفرح تيجي بيت ابوها في الوقت اللي يعجبها وتقعد زي ما يعجبها فاهمه ولا لأ؟
هيام: ولو انا مش عاجبني الكلام ده؟
فارس: الباب مفتوح انا مش قافلو
هيام بصدمه: للدرجه دي مستغني عني؟ ومش طايقني؟
فارس: ما تفسريش الكلام علي مزاجك، انتي هنا مراتي وحبيبتي واحطك جوه عنيا لكن مالكيش دعوه باختي وامي، هما في كفه وانتي في كفه، هما الاتنين غالين عندي زيك انتو التلاته غلاوه واحده
هيام: ولما احنا غلاوه واحده ليه مستعد تتخلي عني انا؟
فارس: لان هما عمرهم ما حاولو يبعدوكي وبيحبوكي لكن انتي اللي عايزه تبعديهم وغير كده الام ما تتعوضش ابدا ولا الاخت، هيام ما تزعليش امي ولا اختي لو سمحتي.
هيام: حاضر يا فارس حاضر
فارس جاب شغاله في البيت بس للاسف كل ما يجيب واحده امه تمشيها ورافضه الفكره تماما ورافضه تريح وخناقها مع هيام بيزيد، هيام بتضايق فرح كتير لحد ما خلتها تبطل تيجي ولو جت بتيجي وحدها تشوف امها وتمشي...
رجعت هيام تعزم صحباتها وامها وامها وتخلي حماتها تعمل الكل وتخيرها تخلي فارس يشتري جاهز ولا تعمل هيا؟ وطبعا الام عايزه توفر شقي وتعب ابنها.
فارس: وبعدين معاكي يا امي؟ هتهلكي نفسك لامتي؟
منيره: انا مش بهلك نفسي ولا حاجه
فارس: انتي شايفه كده؟ هيام ماتعزميش حد تاني هنا فاهمه ولا لأ؟
هيام: نعم؟ ما اعزمش؟
منيره: فارس مش كده
فارس: اسكتي انتي يا أما، محدش يجي تاني هنا
هيام: اه يعني انا مش من حقي ابويا وامي يزوروني هنا صح لكن انت اختك البيت مفتوح ليها نهار وليل، هو ده بقي الصح في نظرك؟
منيره: فارس اللي انت بتقولو غلط.
هيام: ماهو ده مش بيتي ده بيت مامتك وانا هنا ضيفه صح كده؟ ماليش حق اني اتنفس حتي، انت جبتني من بيت ابويا ليه هاه؟ ماليش حق اشتري؟ ماليش حق اقول مين يدخل ومين لأ؟ ماليش حق اجيب اكل بحبه؟ ماليش حق ابويا وامي يجوا عندي؟ ماليش حق اعزم اصحابي؟ امال انا هنا ليه؟
سابتهم ودخلت اوضتها تعيط
منيره: مراتك عندها حق في كل كلمه
فارس: انتي عايزاني اعمل ايه؟ انتي السبب
منيره شهقت: انا السبب؟
فارس: ايوه يا امي انتي السبب، كل ما اجيب شغاله تمشيها، كل ما اشتري حاجه ترجعيها، ومصره تعملي كل حاجه بايدك وهيا ما بتحسش وما بتساعدش وانا مش هقبل انك تشتغلي كده في البيت يبقي الحل ان انا امنعها هيا تجيب حد البيت طالما سيادتك مصره تعملي كل حاجه، يبقي انتي السبب ولا لأ؟
منيره دموعها نزلت لان دي اول مره فارس يعلي صوته عليها
منيره: طيب حقك عليا
فارس: يا الله يا امي انا عايز اريحك
منيره: وانا عايزه اوفرلك.
فارس: هو انا اشتكيتلك؟
منيره: وهيا محتاجه ابنها يشتكي علشان تحس بيه، لما اشوفك راجع اخر الليل مهدود مش قادر حتي تدخل اوضتك مش عايزني احس؟ لما اشوفك نازل بدري والنوم لسه في عنيك مش عايزني احس؟ لما اشوفك جاي علي نفسك في كل حاجه مش عايزني احس؟ لما اشوفك بتيجي علي مراتك مش عايزني احس؟ طيب اعمل ايه انا؟ قلبي بيحس؟ اعمل ايه يا فارس؟ قولي انت.
فارس: معرفش يا امي، انا ما اعرفش بس زي ما انتي قلبك بيحس انا كمان قلبي بيحس ومش هقدر اشوفك واقفه تعبانه وهيا نايمه في السرير واقف اتفرج وطالما مش قادر عليكي امنعك يبقي اجي عليها هيا
منيره: يا ابني انا مش تعبانه
فارس: وانا مش تعبان، دي زي دي، بعد اذنك
سابلهم البيت وخرج وبعد ما مشي هيام خرجت لحماتها
هيام: اعتقد انتي كده مبسوطه صح؟
منيره: يا بنتي ابدا.
هيام: ما تقوليش بنتي، انتي بنتك فرح هانم اللي فاتحالها البيت دي، لكن انا ضيفه زي ما فارس قال، كلتي عقله صح؟ ورتيه ازاي بتخافي عليه وعلي فلوسه ووريتيه ازاي مراته كخه ووحشه وما بتحبوش، عمرتي ما تخيلتك هتعملي شغل الحموات ده والتمثيل ده عليا
منيره: تمثيل؟ ربنا يسامحك
هيام: هيسامحني لكن مش هيسامحك انتي علشان بتفرقي بيني وبين جوزي.
قالت كلامها ودخلت اوضتها واول ما جوزها رجع فضلت تعيطلو لحد ما قعد جنبها يسكتها
فارس: وبعدين هتعيطي لامتي؟
هيام: مالكش دعوه بيا
فارس: امال ليا دعوه بمين بس، انتي حبيبتي
هيام: حبيبتك؟ انا؟ علشان كده بتعمل فيا كل ده؟
فارس: طيب ما تزعليش، اعزمي باباكي ومامتك براحتك بس يوم ما تعزمي حد اشتري اكل من بره، عرفيني وانا هجيب اللي تحتاجيه، لكن ما توقفيش امي كده
هيام: علي فكره انا ما بوقفهاش هيا اللي بتصر.
فارس: عارف، عارف، خلاص بقي
هيام: لا مش خلاص زعلانه منك
فارس: وانا مقدرش علي زعلك
هيام: لا بتقدر وبتزعلني
فارس: طيب اصالحك ازاي؟ قولي انتي
هيام: هتعمل اللي اطلبو؟
فارس: جربي
هيام: عايزه اطلع اسهر بره، بقالنا كتير جدا ما خرجناش مع بعض، نسهر انا وانت وبس
فارس: بس كده؟ قومي اجهزي.
قامت بسرعه ولبسوا وخرجوا الاتنين وسهروا زي ما هيام عايزه لحد الفجر ورجعوا وداخلين البيت هو شايلها وهيا متعلقه في رقبته بتبوسه وامه قاعده مستنياهم والقلق ماليها ودموعها علي خدها واول ماشافتهم
منيره: اخيرا رجعت؟ كنت هموت من القلق
فارس اول ما شاف مامته نزل مراته بسرعه وراح لامه
فارس: حقك عليا يا ست الكل بس تخيلت انك نمتي من بدري وما حبتش ازعجك
منيره: وانا من امتي بنام وانت بره البيت هاه؟
فارس: نسيت بقي معلش
باس ايد مامته واخدها يدخلها اوضتها ومراته هتفرقع
دخل مامته ترتاح وقعد جنبها شويه ورجع لمراته اللي كانت غيرت وهتنام
فارس: انتي هتعملي ايه؟
هيام: هنام
فارس: نعم يا اختي تنامي؟ وانا بصالح فيكي كل ده وبفسح فيكي ونسهر بره علشان في الاخر ترجعي تنامي؟
هيام: روح لحضن مامتك، خد منها اللي انت عايزو
فارس: اه حضن امي ما استغناش عنه بس اللي انا عايزو دلوقتي ما ينفعش غير معاكي انتي.
هيام: كويس انك عارف ان في حاجات ما تنفعش غير معايا انا، تصبح علي خير
فارس: وحياه امك ما هتنامي تعالي هنا
هيام بدلع: بس يا فارس ابعد
فارس: ما انا هبعد اهوه، ،
نزل فارس متأخر تاني يوم علي شغله ومراته وصلتو للباب بقميص نومها
فارس: ادخلي بقي ما ينفعش تخرجي كده اصلا
هيام: مفيش حد
فارس: امي هتتحرج وانتي كده، روحي البسي
هيام: حاضر يالا باي
مشي وهيا قعدت كده ومنيره خرجت بعد ما ابنها نزل وحطت وشها في الارض.
هيام: خطتك ما نفعتش
منيره: خطه ايه بس
هيام: سهرك وتمثيلك انك خايفه عليه وحواراتك دي، وقال ايه ما بنامش وانت بره؟
منيره: لا حول ولا قوه الا بالله، يابنتي من وهو عيل صغير عمري ما نمت وهو بره وهو عارف ده كويس
هيام: تنامي ما تناميش دي حاجه ترجعلك لكن ماتعمليش بقي كل شويه الحبتين دول، وهو في الاخر جه في حضني انا
منيره: وانا بفرح لما يبقي في حضنك وعايزاه علي طول مبسوط.
هيام: لا يا اختي وفري الكلام ده لابنك لانه ما بياكلش معايا بعد اذنك، واه صح انا اصحابي جاينلي اقعدي بقي في اوضتك وما تعمليش بقي فيها ستي اللهلوبه
هيام بقت بتعامل منيره وحش وبتخليها طول النهار في اوضتها بحجه ان فارس قال ما تعملش حاجه
لحد في يوم كانت عازمه اصحابها وكلمت في الفون فارس وقالتلو يوصي علي اكل
هيام: مامتك مصره انها تعمل هيا اكل.
فارس: لا انا هوصيلك علي غدا بس سيادتك مش ملاحظه ان عزوماتك كترت قوي ولا ايه؟ قولنا ابوكي وامك ماشي لكن اصحابك لازمتها ايه؟
هيام: خلاص خليني اخرج معاهم
فارس: انتي هتستعبطي؟ انتي يا بره معاهم يا هما معاكي في البيت! اسيبك تخرجي اكتر من كده ايه؟ تباتي بره؟ اعملي كنترول يا هيام والا همنعه خالص
قفل معاها وهيا متغاظه طلعت بره شافت حماتها
هيام: اوووف ايه الريحه دي، انتي بتعملي ايه يا وليه انتي؟
منيره: بغلي حبه حلبه وينسون تعبانه شويه يا بنتي
هيام: يعني الناس جايه وانتي جايه تعمليلي القرف ده
تعبانه روحي نامي في اوضتك لكن القرف ده لأ اتفضلي
مسكت اللي حطاه علي النار ودلقته في الحوض وفتحت الشبابيك وبترش معطر جو
هيام: دي حاجه تقرف، وبعدين ايه منظرك ده؟ رابطالي دماغك وشكلك زي الخدامين كده؟ لو سمحتي ما تطلعيش بره اوضتك طول ما الناس هنا والا هقولك انك انتي الخدامه اتفضلي.
منيره: انا هروح لفارس واقوله انتي استحاله تكوني بني ادمه بقولك تعبانه
هيام مسكت منيره من ايدها وشدتها غصب دخلتها اوضتها وقفلت عليها
منيره خبطت شويه وسكتت لانها تعبت جامد
هيام اصحابها وصلوا وفضلت معاهم تهزر وتضحك وفارس بعتلها الاكل زي ما قال وكلمها يطمن علي الوضع ايه
فارس: هيا امي فين يا هيام بكلمها علي موبيلها ما بتردش.
هيام: الموبيل هنا اهو اصلها نامت يا حبيبي، قالت طالما مش هتعمل حاجه تريح شويه، تحب ادخل اصحيهالك؟
فارس: لا يا قمر طالما نايمه خليها ترتاح لما تصحي تبقي تكلمني..
هيام: انت هتيجي امتي؟
فارس: مش قبل المغرب
هيام: اوكي بيبي باي
راحت لصحباتها تكمل معاهم وشويه والباب خبط وكانت فرح
هيام: افندم؟ عندي ضيوف مش فاضيالك
فرح: عايزه اشوف امي
هيام: انتي ما بتفهميش؟ ما بتحسيش؟ بقولك عندي ضيوف.
فرح: وانا بقولك عايزه اشوف امي ابعدي عن وشي
هيام: مش هتدخلي يا فرح ابقي تعالي وقت تاني ده ايه البجاحه دي؟
فرح اتنرفزت: البجاحه دي متأصله عندك اوعي من وشي اشوف امي
زقتها ودخلت بصت للبنات بقرف ودخلت لامها واتفاجئت ان الباب مقفول بالمفتاح من بره، فتحت بسرعه واتفاجئت من اللي شافته وصرخت
فرح: ماما، ماما ردي عليا.
كانت مرميه في الارض ومغمي عليها، هيام جت تجري علي صوت فرح وشافت المنظر وخافت لان كده ممكن فارس يعرف...
فرح طلبت الاسعاف اللي جت بسرعه واخدوها
مجدي: خير، الاسعاف جه الحته ليه؟
فارس: ربك يسترها ان شاءالله
مجدي: شكله حد من ناحيتكم لانها رايحه علي شارعكم
فارس قلق من جواه واتوتر فاتصل بامه وما ردتش واتصل بمراته
فارس: هيام انتو كويسين؟ انا شايف اسعاف في الحته معرفش ليه بس قلقت.
اترددت تقوله ولا لأ؟ بس خافت ما تقولوش يعرف ويلومها
هيام: مامتك تعبت شويه والاسعاف اخدتها
فارس مكملش يسمع وطلع يجري ومجدي بيسألوه في ايه؟
فارس: الاسعاف لامي يا مجدي
طلع مجدي معاه وراحوا علي المستشفي وهناك شاف اخته اللي مش مبطله عياط
فارس: ايه اللي حصل يا فرح؟
فرح: معرفش انا لقيتها في الارض لمادخلتلها اسأل الهانم بتاعتك
فارس سكت واستنوا الدكتور يخرج ويطمنهم
الدكتور: الحمد لله هيا كويسه.
فارس: هيا مالها اصلا؟
الدكتور: الضغط عالي شويتين، مع ارهاق مع تعب، مع زعل، اكيد بتزعلوها كتير وبتتعبوها، والدتكم كبرت ريحوها بقي، علي العموم هيا حاليا اتحسنت واحنا بنظبطلها الضغط واول ما يتظبط ويستقو تقدروا تاخدوها
فرح: ينفع ندخلها؟
الدكتور: اه بس بلاش انفاعلات لو سمحتم..
دخلولها واطمنوا عليها وفضلوا جنبها، منيره انتهزت فرصه فارس راح يغير هدومه ويجيبلهم اكل
منيره: انا جيت هنا ازاي؟
فرح: انا جبتك.
منيره: يعني مش اخوكي؟ الحمد لله
فرح: الحمد لله علي ايه؟ انتي لازم تقولي لفارس، الهانم كانت قافله عليكي بالمفتاح
منيره: هيتخانق معاها ويمكن يطلقها فيها ساعتها هترتاحي انتي؟
فرح: ما تغور في ستين داهيه ده فارس ما طلعش يوم قدام من ساعه ما عرفها، البعد عنها غنيمه يا امي
منيره: بيحبها يا فرح، دي حته من قلبه، عايزاني اوجع قلب ابني ويطلقها بسببي.؟
فرح: امال توجعي قلبك انتي؟
منيره: طول ماهو مبسوط انا مبسوطه، وبعدين دي خلافات عاديه بيني وبين مرات ابني، مالكيش دعوه انتي انا مش زعلانه منها..
فرح: مش زعلانه منها ليه؟ هاه؟ باقيه عليها ليه؟
منيره: علشان ابني بيحبها، ما زعلتش منها لانها بتسعد ابني زي ما مازعلتش من محمود جوزك لما قال انه مش ملزم بيا وان ابني اولي بيا ( فرح بصت للارض) مازعلتش علشان هو جوزك وانتي بتحبيه ولو قال كلمه بعديها، نفس الوضع ريهام، فهمتي بقي؟ ما تقوليش كلمه لفارس
فرح: بس يا ماما
منيره: ما بسش ولا حرف
فارس دخل: ولا حرف ايه؟
منيره: لا اصلها عايزه تقلق جوزها وتودي العيال لحماتها وتقلب الدنيا فبقولها ولا حرف وتروح لبيتها ولعيالها
فارس: اه امك عندها حق اديكي اطمنتي عليها روحي انتي وانا بايت هنا معاها
فرح: انا اللي هبات معاها
فارس: انتي عندك عيال عندهم مدارس ووجودك مهم في بيتك انا ما ورايش حاجه اتفضلي يالا
فارس مشي اخته وهو قعد جنب امه يرغوا لحد الصبح ويضحكوا ويهزروا...
اخدها البيت تاني يوم وفضل معاها النهار كله وما نزلش شغله وقعد يدلع فيها وهيام فهمت ان محدش قالو حاجه
فارس اتصل بفرح اخته: فرح انا نزلت الشغل علشان عندي حاجات ضروريه لازم اعملها ينفع انتي تستأذني من الشغل وتروحي لماما علشان ما تفضلش لوحدها انتي عارفه هيام مالهاش لازمه
فرح: ماشي حبيبي هحاول استأذن واروحلها بس العيال؟
فارس: مالهم العيال؟
فرح: مراتك ما بتطيقهمش وانت عارف.
فارس: مالكيش دعوه بمراتي لو متضايقه قوليلها تروح عند امها ولا تدخل اوضتها، عيالك دول روح قلبي، ريهام ما تقدرش تتكلم ولو اتكلمت كلميني
قفل مع اخته وغرق في اشغالو المتأخره وفرح راحت لامها وعيالها معاها وهيام حبست نفسها في اوضتها
العيال زهقوا من القعده وطلبوا من امهم بس يفتحوا التليفزيون فوافقت
فارس في الشغل قلق وخاف ان فرح تكون معرفتش تستأذن
مجدي: مالك قلقان ليه؟
فارس: خايف احسن تكون فرح ما راحتش لامي.
مجدي: طيب ما تتصل تسألها؟
فارس: مش عايز اضغط عليها ماهي لو ما راحتش يبقي معرفتش تستأذن
مجدي: طيب خلاص روح انت اطمن واهو البيت قريب
فارس: عندك حق واهو اطمن علي امي كمان يالا مش هتأخر عايز حاجه؟
مجدي: هو مراتك صح مش في البيت؟
فارس: لا في البيت بس وجودها مش هيفرق كتير
مجدي: نفسي اعرف انت متجوزها ليه؟ ايه الميزه اللي مخلياك مستحملها ومتمسك بيها؟ ميزه واحده
فارس ضحك وهو ماشي وفرد ايديه: مدلعاني ههههه.
العيال طلعوا قعدوا قدام التلفزيون وكاي عيال لعبوا وفضلوا يجروا وري بعض وهما بيجروا عمرو خبط في التربيزه اللي عليها الشاشه وللاسف الشاشه وقعت بالتربيزه وكل اللي عليها اتكسر والشاشه كمان اتكسرت
هيام كانت طالعه في الوقت ده وشافت المنظر مسكت عمرو وضربته جامد وفرح كانت خارجه علي الصوت فشافت هيام بتضرب ابنها فجريت شدت ابنها
فرح: لا انتي زودتيها قوي
هيام: انتي مش شايفه عمل ايه؟
فرح: ده برضه ما يديكيش الحق انك تمدي ايدك عليه انتي اتجننتي؟
هيام: ماهو لو انتي مربياهم ولا معلماهم الادب مكنش ده حصل
فرح: عيالي متربين احسن تربيه
هيام: ماهو باين صح؟ انا عايزه اعرف انتي بتعملي ايه هنا؟ وجودك مش مرغوب فيه خديهم وامشي.
فرح: انا هنا في بيت ابويا فاهمه؟ ولا مش همشي وهقول لفارس علي عمايلك دي كلها هقوله ان سيادتك كنتي قافله علي ماما بالمفتاح وانها قالتلك انها تعبانه وانتي علشان اصحابك حبستيها في اوضتها وقفلتي عليها بدال ما تتصلي بفارس وتاخديها للدكتور هقولو علي كل حاجه
هيام: مش هيصدقك فارس بيحبني عارفه يعني ايه بيحبني، وبعدين هو زي الخاتم في صباعي ومهما اعمل هيسامحني فاتفضلي انتي بقي من هنا بقرودك دول يالا اطلعي بره.
فرح: انا لايمكن اطلع واسيب امي هنا لوحدها معاكي
هيام اتنرفزت ومسكت فرح جامد وبتحاول تخرجها وفرح بتقاومها
فرح: مش هطلع
هيام: هتطلعي غصب عن انفك
زقتها جامد وقعتها علي الارض قدام الباب وتحت رجلين فارس اللي واقف مصدوم..
الاتنين: فارس...
رواية لعنة الماضي للكاتبة الشيماء محمد الفصل السابع
هيام: هتطلعي غصب عن انفك
زقتها جامد وقعتها علي الارض قدام الباب وتحت رجلين فارس اللي واقف مصدوم..
الاتنين: فارس...
فارس واقف مصدوم من اللي سمعه واللي شافه بعينه. مش قادر ينطق او يتكلم، للدرجه دي كان اعمي؟
مد ايده وقف اخته من الارض وبصلها وبص لعيالها اللي واقفين علي جنب خايفين بيعيطوا وبص لمراته اللي اول مره يشوفها علي حقيقتها.
هيام: فارس حبيبي شايف اختك بتكسر بيتي وبتقولي ان ده بيت ابوها وان انا ماليش مكان هنا
فرح: كدابه
هيام: بتكدب يا فارس كل اللي قالته كدب هيا عايزه تطفشني من هنا
فارس: هششش اسكتي ولا كلمه زياده ولا حرف
قرب عليها ورفع ايده فصرخت نزل ايده ومضربهاش
هيام: فارس.
معطهاش فرصه تتكلم مسكها من شعرها وجرجرها لبره البيت، حاولت فرح توقفه بس زقها بعيد، اخد مراته من شعرها ونزل لعربيته رماها فيها واخدها ومشي وكل ده من غير ولا حرف ومهما هيام تتكلم مش سامعها، عقله بيعيد السنتين اللي عاشهم معاها، افتكر كل حاجه استحملها علشانها، استحمل كتير قوي، افتكر موت ابوه وهو بيرقص في حفلتها، افتكر امه اللي كانت هتموت علشان مراته قافله عليها، افتكر حاجات كتير جدا كان بيتجاهلها دلوقتي واضحه وضوح الشمس قدامه، عقله هينفجر من كتر التفكير.
اخيرا وصل ووقف واتفاجئت هيام انها في بيت ابوها نزل فارس وفتح بابها ومسكها من شعرها تاني وفضل يجرجر فيها لحد ما خبط وفتحوله الباب وهو داخل بيها وهيا بتصرخ
عاصم ورجاء طلعوا يجروا علي صويت بنتهم
عاصم: ايه ده في ايه؟
هنا فارس رماها من ايده تحت رجلين ابوها
فارس: بنتك عندك ماعدتش تلزمني، انتي طالق يا هيام
هيام: لا يا فارس اسمعني.
فارس: سمعتك كتير، انتي طالق فاهمه؟ طالق، طالق بالتلاته وهطلع دلوقتي علي اقرب مأذون اطلقك نهائي علشان مايبقاش في اي طريق تاني، مش عايز اشوف وشك ولا اسمع صوتك تاني، حاجتك هبعتهالك هنا
خرج فارس ومشي وروح علي بيته
عاصم: عملتي ايه جننه بالشكل ده؟
رجاء: هو ده اللي ربنا قدرك عليه؟ بدال ما تقول هحبسه ولا ادبه تقولها عملتي ايه؟
عاصم: لان هو مش هيوصل للحاله دي الا اذا هيا جننته بحاجه
هيام: فارس طلقني.
رجاء: يغور في داهيه
فضلت تعيط وامها تهدي فيها وابوها واقف ساكت
فارس روح بيته واول ما دخل كان محمود هناك بيحاول يشيل الشاشه المكسوره، فرح جريت عليه
فرح: عملت ايه يا فارس وديتها فين؟
فارس: طلقتها ووديتها بيت ابوها، انت بتعمل ايه يا محمود؟ سيبها دلوقتي
محمود: لا هاخدها اشوف تتصلح ولا ايه النظام
فارس اتنرفز وشدها من ايدها ورماها اتكسرت زياده
فارس: يا شيخ ملعون ابو الشاشه، فدي ظفر عيل، انت بتتكلم ازاي؟
فرح: ماهو العيال اللي كسروها يا فارس
فارس: فداهم وفداهم الشقه كلها باللي فيها، هما فين اصلا العيال؟
فرح: جوه في اوضتي
فارس: طيب انا داخلهم
دخل فارس للعيال كانوا خايفين بيعيطوا فقرب منهم وقعد وسطهم
عمرو: انا اسف يا خالو اني كسرت الشاشه انا وقعت عليها مكنش قصدي
فارس: فداك يا حبيبي مليون شاشه، حقك عليا انا ما تزعلش مني، هيا هيام ضربتك فعلا؟
عمرو: ايوه ضربتي وزعلت ماما جامد.
ملك: كل مره تزعقلنا يا خالو وتقول لماما ما تجيش هنا وما تجيبيش عيالك وماما مكنتش بتخلينا نيجي مع اننا بنبقي عايزين نشوفك ونشوف تيته
فارس: معلش يا ملك، خلاص هيام مشيت ومش هتيجي تاني وانتو من هنا ورايح العبوا براحتكم واعملوا اللي انتو عايزينو براحتكم حبايبي كسروا كل حاجه انتو عايزينها
عمرو: بس احنا مش عايزين نكسر حاجه يا خالو احنا بنحبك وبنحب تيته وبنبقي بس عايزين نشوفكم.
فارس ضمهم الاتنين واعتذرلهم وسابهم وخرج
فرح: ليه يا فارس عملت كده؟
فارس: كنتي عيزاني اعمل ايه؟
فرح: اتخانق معاها! زعلها! مشيها يومين لكن مش طلاق
فارس: انتي شايفه ان اللي هيا عملته ده يتغفر!
فرح: انا مسمحاها.
فارس: وانا مش مسامحها وحتي لو سامحتها علي الطريقه اللي عاملتك بيها مش هسامحها علي حبستها لامي وبعدين تخيلي لو انتي مكنتيش جيتي وجيبتلها الاسعاف كان ايه اللي حصل؟، اجي اخر النهار الاقيها ميته وملحقهاش زي ما ملحقتش ابويا؟ انتي شايفه دي حاجه يتسامح فيها؟ وبعدين انا ساعتها كلمتها وسألتها عن ماما قالتلي انها نايمه وانا صدقتها.
احنا من الاول يافرح كان ارتباطنا غلط واستمرارنا كان غلط اكبر، المهم امك فين وعامله ايه؟
فرح: جوه وزعلانه ادخلها
فارس دخل لامه اللي اول ما شافته مدت ايديها لابنها اللي رمي نفسه في حضنها
منيره: ليه كده يا فارس ليه؟
فارس: علشان لو كان جرالك حاجه مكنتش هسامح نفسي ابدا، وبعدين كان لازم تقوليلي
منيره: علشان تعمل اللي انت عملته دلوقتي؟
فارس: اللي انا عملته اتأخرت عليه كتير قوي يا امي، كان لازم اعملها من زمان من ساعت ابويا اللي يرحمه كان غلط اصلا من الاول
منيره: بس انت بتحبها يا فارس
فارس: ملعون ابو الحب اللي يذل الواحد ويخليه اعمي بالشكل ده، المهم ارتاحي انتي وما تزعليش نفسك وما تفكريش في حاجه
مجدي اتصل بفارس كتير ولما مردش عليه جالو البيت
مجدي: خير يا فارس ما رجعتش الشغل خفت يكون الحجه جرالها حاجه؟
فارس: لا امي كويسه تعال ادخل.
دخل مجدي وشاف الشاشه المكسوره والتربيزه المقلوبه
مجدي: ايه اللي حصل هنا؟
فارس: مفيش الشاشه وقعت اتكسرت
مجدي: وقعت كده لله في لله يعني؟ فارس في ايه؟
فرح خرجت وشافت مجدي سلمت عليه
فرح: فارس انا مشيت محمود وهنبات هنا النهارده لو معندكش مانع؟
فارس: البيت بيتك يا فرح بس مكنتيش سيبتي جوزك لوحده مالوش لازمه
فرح: خليه يحس بقيمتنا ما تشغلش بالك انت، المهم اعملكم ايه تشربوه؟ تشرب ايه يا مجدي؟
مجدي: في ايه اللي حصل الوضع هنا مش طبيعي الحجه فين؟ هيا كويسه؟ فارس؟
فارس: يا ابني امي كويسه جوه لو عايز ادخل اطمن عليها
مجدي: ايوه عايز اطمن عليها فرح لو سمحتي شوفيها صاحيه ولا ايه؟
فرح دخلت قدام مجدي ودخلته عندها
مجدي اطمن عليها وقعد جنبها
مجدي: حضرتك كويسه امال فارس مالو وايه اللي كسر الشاشه بره ايه اللي حصل يا ام فارس؟
منيره: عمرو بيجري وقع واخد الشاشه معاه فاتكسرت.
مجدي: طيب وهو كويس؟ اوعي يكون اتعور ولا حاجه؟ ولا اوعي يكون فارس زعلان علي الشاشه؟
منيره: لا يا حبيبي فارس مش زعلان علي الشاشه ولا حاجه هو زيك قال فدا ظفر عمرو
مجدي: يبقي مراته اللي زعلت وعكننت عليه؟ اه كده صح؟
منيره: زعلت واتخانقت مع فرح ومدت ايدها علي عمرو واتخانقوا الاتنين في داخله فارس وسمع هيام بتطرد فرح بعيالها وبعدها اتجنن اخدها من شعرها وداها علي بيت ابوها وبيقول انه طلقها.
مجدي: لا حول ولا قوه الا بالله، بس انتي عارفه والله ما كانت تستاهله يا ام فارس، دي اخرته لوري كتير، احنا لولاها كان زمانا، كان زمانا اغني من ابوها، ما تزعليش انتي هو كده هيفوق لنفسه بقي، ايوه هو كان بيحبها بس اهو يزعل شويه ويفوق بقي لنفسه
مجدي خرج لصاحبه وقعد معاه
مجدي: زعلان؟
فارس: عادي بقي
مجدي: بس عارف كده احسن
فارس: عارف
مجدي: هيا مكنتش تستاهلك وكانت واقفه في طريقك
فارس: عارف
مجدي: لسه بتحبها؟
فارس: لسه مطلقها مكملتش كام ساعه فاكيد لسه بحبها
مجدي: علي العموم ركز في شغلك وبكره هتنساها وتنسي امها، ما تستاهلكش يا صاحبي.
هيام حاولت كتير هيا وباباها يصالحوه بس فارس قفل صفحتها تماما ورفض حتي يتكلم معاها وراح طلقها عند مأذون وبعتلها ورقتها ومنعها تيجيلو تاني.
هنا خلصت الذكريات نرجع للواقع بقي.
شريط حياته كلها مر قدامه، الخمس سنين مروا قدامه عدي دلوقتي ثلاث سنوات علي طلاقه لهيام بس لسه بيحبها للاسف ولسه بيشتاقلها وكتير بيحلم يرجعلها من تاني، صحي الصبح علي اخته بتكلمه
فرح: صباح الخير يا فارس بقولك حبيبي؟
فارس: قولي
فرح: النهارده تروح معايا هنقابل العروسه ايه رأيك؟ هشوف اي مكان نتقابل فيه كصدفه مثلا هاه؟
فارس: عادي بقي..
فرح: يعني اظبط معاها؟
فارس: اي حاجه واللي هتعمليه بلغيني بيه انا مش فارق معايا سلام
قفل السكه وهيا زعلت ان اخوها مش مهتم باي شكل من اشكال الحياه...
اتصلت بهدي صاحبتها
فرح: مرديتيش عليا يا هدي ايمان رأيها ايه؟
هدي: والله ما عارفه بس تقريبا موافقه
فرح: طيب ايه رأيك نتقابل احنا الاربعه في ماك النهارده علي المغرب كده؟ واهو يتكلموا ونشوف الوضع ايه؟
هدي: طيب هشوف ايمان وارد عليكي تمام؟
وفعلا اخر النهار اتفقوا يتقابلوا.
فارس: مين هيا بقي؟ حد انا اعرفو؟
فرح: مستعجل علي ايه ادينا قربنا نوصل وهتشوفها وان شاءالله تعجبك
فارس: تعجبني؟ انتي عارفه انا بتجوز ليه صح ولا لأ؟
فرح: عارفه بس بتمني انها تكون تعويض ليك
فارس: هه ما علينا
وصلوا ماك وهناك شافوا هدي وايمان وراحولهم
فارس: دودا ازيك ليكي وحشه عامله ايه؟ وعيالك اخبارهم ايه؟
هدي: الحمد لله بخير تمام وانت؟
فارس: عايش، معدش حد بيشوفك يعني؟ الله يرحم ايام مكنتيش بتفارقي بيتنا، الواحد كل ما يتلفت يشوفك
هدي: يااه ايام بقي
فارس: فعلا كانت ايام حلوه، ايمو ازيك يا قمر كبرتي اهو، عامله ايه؟
ايمان: الحمد لله كويسه
فارس: هو انتي كبرتي واللي احنا اللي عجزنا ولا ايه؟ بطلتي تيجي تلعبي قدام الورشه، وتاخدي دروس في السنتر اللي هناك؟
ايمان: ما خلاص كبرنا بقي اتخرجت واشتغلت كمان
فارس: بقولك تعالي نجيب ايس كريم لسه بتحبيه؟
ايمان: طبعا ده عشق
فارس: يعني لسه بتجري وري الراجل لو عدي في الشارع وتاخدي منه الزماره تزمري بيها؟
ضحكت وسكتت كان نفسها تقوله انه كان مجرد حجه علشان تلمحه بيها او تطول وقفتها مش اكتر، او حجه تنزل بيها الشارع وتتأخر لحد ما الراجل يوصل قدام الورشه وبعدها تطلع تجري توقفه كل ده بس علشان تشوفه مش اكتر
فارس: هيييه فينك؟
ايمان: انا اهو يالا نجيب الايس كريم
راحو يجيب الايس كريم.
هدي: تصدقي لايقين علي بعض؟ فارس شكله كده لسه شايفها العيله ام ضفاير؟
فرح: فارس امم
فرح سكتت لان فارس لسه ما يعرفش ان ايمان هيا العروسه اللي هيا اختارتهالو
رجعوا الاتنين بيهزروا ويضحكوا واكلوا الايس كريم
فارس بيهمس لفرح: امال فين صاحبتك اللي جايه؟ مش المفروض هنقابلها؟
فرح بتوتر: ما احنا اهو معاهم
فارس: مش فاهم يعني ايه؟ مين هيا العروسه؟ هدي صاحبتك علي حد علمي لسه متجوزه ولا ايه؟
فرح: اه هدي متجوزه العروسه هيا ايمان
فارس كان بيشرب فشرق وبص لاخته بصدمه ومش مصدق هيا قالت ايه؟
هدي: مالك يا فارس في حاجه؟
فارس: لا لا، بعد اذنكم لحظه هدخل الحمام
قام فارس وراح الحمام وفضل رايح جاي كتير واتصل بمجدي
فارس: ايوه يا مجدي بقولك هقفل معاك ودقيقتين بالظبط وتكلمني وتقولي ان في مصيبه عندك وانا لازم اجي فاهم ولا لأ؟
مجدي: في ايه هيا العروسه وحشه قوي كده؟
فارس بعصبيه: فاهم ولا لأ؟ مش وقت هزار.
مجدي: حاضر، حاضر يا فارس
قفل وطلع معاهم وفعلا تليفونه رن ورد علي مجدي اللي قالو يجي بسرعه
فرح: في ايه؟ مجدي ماله؟
فارس: والله ما عارف تقريبا كده اتخانق مع زبون وطلبله البوليس والدنيا مقلوبه في الورشه، معلش انا لازم امشي بسرعه
هدي: اه طبعا بس ابقي طمنا
فارس: اوكي فرح هتروحي ولا قاعده؟
فرح: لا احنا قاعدين شويه هنروح مع بعض اتكل انت وابقي طمني
مشي فارس علي الورشه ومجدي اول ما شافه ضحك
فارس: اضحك اضحك قوي.
مجدي: سوري يا فارس بس متخيل الوضع، البنت وحشه قوي وانت متدبس يا عيني ومش عارف تفلفط
فارس سابه يكمل ضحك لحد ما سكت
فارس: هاه خلصت ضحك؟ لعلمك بقي مكنتش وحشه ولا حاجه؟
مجدي: امال طلعت تجري ليه؟ معجبتكش في ايه؟
فارس: انت عارف طلعت مين العروسه؟
مجدي: مين؟ حد نعرفه ولا ايه؟
فارس: ايمان
مجدي: ايمان؟ ايمان مين؟
فارس: ايمان بنت عمي سيد اخت هدي صاحبه فرح، ايمان يالا.
مجدي: البت ايمان اللي كانت بتلعب قدام الورشه علي طول؟
فارس: ايوه هيا دي
مجدي: وهيا دي كبيره اصلا في سن جواز؟ ولا احنا عجزنا ولا ايه؟
فارس: تخيل بقي؟ هتجوز عيله كانت اول امبارح بتلعب في الشارع؟ اتهبلت فرح
مجدي: بس صراحه يا فارس البت ايه؟ فرسه؟ لو هيا موافقه ليه لأ؟
فارس: نقطني بسكاتك يالا! دي عيله
مجدي: والله انت اللي فقري.
فارس: ولا هيا مش ناقصه خنقه، انا مروح سلام وصح لو حد فيهم سألك انا قلتلهم انك اتخانقت مع زبون وطلبلك البوليس
مجدي: البوليس مره واحده؟ ولو سألوا حد وعرفوا ان مفيش بوليس؟
فارس: هقولهم حليناها ودي يا حلو سلام
روح فارس وفضل مستني اخته تيجي علي نار علشان يتخانق معاها، واخيرا رجعت
فرح: نفسي افهم انت مشيت كده ليه؟ وكدبت كدبه دمها تقيل قوي
فارس: انتي بقي اتهبلتي ولا اتهبلتي ولا جري لمخك ايه؟ هاه؟ ايمان؟
فرح: ايوه مالها بقي ايمان هاه؟ شباب الحته كلهم هيتجننوا عليها؟ ادب واخلاق وجمال عايز ايه تاني؟
فارس: بالظبط اديكي جبتي المفيد
فرح: يعني ايه مش فاهمه؟
فارس: يعني واحده شباب الحته هيموتوا عليها تتجوز واحد زيي ليه؟ هاه؟
فرح: مش فاهمه يا فارس انت اعتراضك علي ايه؟
فارس: انها عيله، عيله يا فرح كانت بتلعب من كام يوم قدام الورشه بضفايرها، انتي عارفه انا اكبر منها بقد ايه؟
فرح: محسسني انك عندك 60 سنه وبعدين ساعت ما هيا كانت بتلعب قدام الورشه انت كنت لسه في الكليه بتشتغل في الصيف مكنتش متخرج اصلا يعني انت كمان كنت عيل زيها
فارس: انا اكبر منها باكتر من 8 سنين
فرح: ولو عشره ايه يعني؟
فارس: بلاش يا ستي فرق السن، انا متجوز ومطلق، وبعدين المهم بقي ان دول ناس اصحابنا وبنعزهم وبعدين انا مش هتجوز حبا فيها انا عايز واحده تيجي تخدم امي مش زوجه ليا، دي عيله عايزه شاب يحبها ويدلعها وتعيش معاه، لكن انا مش كده ومش هعمل كده، انا عايز شغاله بس بمسمي زوجه، انا كنت متخيل انك عاقله وهتشوفي واحده ارمله؟ مطلقه؟ يتيمه وعايزه اي اربع حيطان حواليها؟ واحده تعيش خدامه لامك وتحمد ربنا ان في بيت بيأويها؟ مش جيبالي عيله بتحلم بالحب والجواز والفستان الابيض، فهمتي بقي انا معترض علي ايه؟
فرح: اول مره اعرف انك متخلف يا فارس للدرجه دي، كل ده ليه؟ هاه؟ اديني ميزه واحده كانت فيها علشان تعيش عمرك كله علي ذكراها؟ يا اخي ده انا مشفتكش يوم واحد مبسوط معاها؟ الا كنت علي طول مطحون متداين متأخر تعبان، باقي عليها ليه؟ حتي لما هتيجي تتجوز، عايز واحده كسر، واحده تكون متطمن علي نفسك ان عمرك ما هتبصلها ولا هتحبها؟ ليه يا فارس؟ انت لسه شاب والعمر قدامك؟ ليه بتعمل كده؟
فارس: يا ستي اناحر حياتي وانا حر فيها؟
فرح: وامك هاه؟ اللي كل ما تشوفك مهموم تتوجع؟ مش مهمه؟
فارس: ما انا اهو هتجوز علشانها؟
فرح: ده علي اساس انك لما تتجوز واحده زي ما انت بتقول هيا هتفرح؟ ولا هيا غبيه وداقه عصافير؟ وبعدين ايمان نفسها موافقه عليك وفرحانه كمان؟ ومش عايزه اقولك انها بتحبك من وهيا عيله وكانت بتيجي قدام الورشه علشانك انت.
فارس: اهو ده سبب كمان يخلينا ارفضها تماما انها هتحلم وتحلم وتتمني وتستني وانا مش هديها اللي هيا عيزاه وهظلمها ومش هحبها وهدمرها تماما معايا، وانا بحب العيله دي وبحترم والدها وبحبه ومش هرضي ابدا اعمل كده في بنته، ده غير ان اختها صاحبه عمرك انتي المفروض من نفسك ترفضي ده.
فرح: انا تخيلت انك هتفرح وتحاول تبدأ حياه جديده علي العموم انا غلطانالك بس انا روحت وطلبتها ومش هروح واقولهم سوري اصل فارس قال لأ عليكي انت بقي اتصرف وقولها انك مش عايزها.
فارس: وانتي فكراني هتكسف واقولك لأ؟ لا يا حلوه ومالو انا هقولها بس كده؟ اطلعي انتي بقي بره الموضوع ده خالص انا هشوف حد مناسب بنفسي.
فرح: والله ريحتني هيا اصلا خساره في شكلك
فارس: خساره خساره بقي اتفضلي شوفي وراكي ايه
فرح: ماشيه بس قسما بالله يا فارس لو امك جرالها حاجه بسببك عمري ما هسامحك ابدا واعتقد ان ولا انت هتسامح نفسك لانك هتلوم نفسك علي الاتنين، ابوك ومكنتش موجود وامك موتها بحسرتها
فارس بصلها بوجع: امشي يا فرح وروحي بيتك انا مش هجيب واحده واظلمها معايا علشان سيادتك ترتاحي.
فرح ندمت علي الكلمه اللي قالتها بس هيا متغاظه منه
فارس تاني يوم في الورشه مستني ايمان تعدي وهيا مروحه من شغلها وبلغ مجدي انه لو شافها يقوله..
بعدها بفتره مجدي راحلو
مجدي: فارس، فارس، اهي جايه اهي
فارس طلع يوقفها وهيا ماشيه هيا اول ما شافتو وقفت وسلمت عليه
ايمان: ازيك يا فارس
فارس: ازيك انتي
ايمان: اخبار مشكله امبارح ايه؟ عدت علي خير؟
فارس: اه الحمد لله حليناها ودي، بقولك ينفع نتكلم شويه؟
ايمان: اه اتفضل.
فارس: لا مش هينفع دلوقتي لا وقته ولا مكانه، لو ينفع اشوفك في ماك زي امبارح؟
ايمان: مع فرح وهدي؟
فارس: لا معلش لو ينفع انا وانتي وبس؟ لو عايزه انا ممكن اتصل بعم سيد استاذنه؟
ايمان: لا انا هقوله بس يا ريت بدري مش متأخر طالما لوحدي؟
فارس: 5 العصر يناسبك؟
ايمان: اوكي ماشي، يالا سلام بقي دلوقتي
مشيت ومجدي جه وقف جنبه
مجدي: دي يتقالها لأ، فقري من يومك، طيب والله لو انا مكانك ما افكرش اصلا، دي تتاكل اكل.
فارس: امال ان مكنتش بتحب مراتك والله لاقولها
# تقولي ايه؟
الاتنين بصوا وراهم: نوجا قلبي انا
نجاه: يقولي ايه يا مجدي؟
مجدي: يقولك قد ايه انا بموت فيكي انتي والمز الصغنن ده، زوزا قلب بابا تعال
نجاه: فارس حبيبي كنت عايز تقولي ايه؟
فارس بص لصاحبه
نجاه: ما تبصلوش هوه قول قول ايه هاه؟ ايه؟
فارس: انتي عندك شك ان البأف ده بيحبك؟
نجاه: امم مش عارفه بصراحه اليومين دول كل حاجه ملخبطه عندي وبشوفها بالشقلوب.
مجدي: يا عمري انا دي بس هرمونات حمل، هو انا قلتلك يا فارس ان نوجا حامل؟ هنجيب ان شاءالله بنوته زي القمر
فارس: لا مقولتليش مبروك يا نوجا ان شاءالله تقومي بالسلامه وربنا يرزقك باللي بتتمنيه
نوجا: يا رب يا فارس وعقبالك انت بقي، يالا غير مننا بقي
فارس: ربك يسهل.
مجدي: تعالي يا قلبي اقعدي وانت اهي قالتلك غير بقي ايه ما نفسكش في عيل كده زي زياد تلاعبه ويقولك بابا؟ العيال دول اكبر نعمه من ربنا اوعي تحرم نفسك منها
فارس: روح لمراتك يا عم الفيلسوف بدال ما اروح اقولها انك بتعاكس في الرايحه والجايه؟
مجدي: واطي من يومك يا مان، بس برضه البت خساره في شكلك ده.
فارس: امشي ياد روح لمراتك، انت تقولي خساره في شكلك وفرح تقولي خساره في شكلك انا هلاقيها منك ولا منها غور لمراتك يالا غور
مشي مجدي وفارس بصلهم من بعيد شايل ابنه علي حجره وبيلاعبه ومراته حامل وجوزها بيدلعها وتخيل نفسه في وضعه ومعاه هيام...
فيها ايه لو قبلت بحالته ووقفت جنبه وخلفوا عيل هما كمان؟ يمكن لو كانوا خلفوا كانوا فضلوا مع بعض؟ بس هو السبب هو ما وقفش مع مراته في تعبها ولا اخدها لدكاتره؟ بس هو خاف لو اهتم يجرح مشاعرها وتتهمه ان همه علي الخلفه وبس؟ يمكن لو كان اهتم كان هو كمان معاه عيل زي زياد ابن مجدي
يوووووه يا فارس فوق بقي خلاص هيام راحت، راحت ومش هترجع تاني، فوق لنفسك بقي...
طيب ايمان اهي ليه لأ؟ مش يمكن تحبها زي ما بيقولوا؟ مش يمكن تخلفلك عيل وتعيش مبسوط معاها؟
لأ انت قلبك مع هيام وبس عمرك ما هتحب تاني؟ بلاش تظلم البنت معاك؟ اوعي تعمل فيها اللي اتعمل فيك انت؟ اوعي تظلمها؟
راح فارس في معاده وقابل ايمان اللي كانت طايره من الفرح وبتحلم طول النهار بفارس وهو بيقولها بحبك وبتفكر هترد عليه بإيه لما يقولهالها؟ هتقوله ان هيا كمان بتحبه؟ ولا هتتقل لحد ما يتجوزوا مثلا وبعدها تبقي تعترف بحبها؟ النهار كله حيرانه هتقول ايه؟
قابلته بابتسامه عريضه وقعدت قصاده
ايمان: اديني اهوه اتفضل يا سيدي قول عايز تقول ايه اللي كان لا وقته ولا مكانه في الورشه؟
فارس: تشربي حاجه الاول؟
ايمان: فارس اتكلم علي طول لاني مش هينفع اتأخر
فارس: اوكي، هتكلم وهقولك علي كل اللي في دماغي.
رواية لعنة الماضي للكاتبة الشيماء محمد الفصل الثامن
ايمان: اديني اهوه اتفضل يا سيدي قول عايز تقول ايه اللي كان لا وقته ولا مكانه في الورشه؟
فارس: تشربي حاجه الاول؟
ايمان: فارس اتكلم علي طول لاني مش هينفع اتأخر
فارس: اوكي، هتكلم وهقولك علي كل اللي في دماغي
طبعا انتي عارفه ان انا كنت متجوز
ايمان: اكيد طبعا ومش محتاجه اعرف تفاصيل عن جوازك يا فارس او عن طلاقك
فارس: ممكن تسمعيني لو سمحتي؟
ايمان: اتفضل.
فارس: انا معرفش اذا كنتي تعرفي ولا لأ ان انا كنت بحب مراتي جدا او يمكن بعشقها
ايمان: انت بتقولي الكلام ده ليه؟
فارس: لان انا لسه لحد اللحظه دي بحب مراتي وخلي بالك ان انا بقول مراتي مش طليقتي
ايمان ابتسامتها اختفت ومعرفتش في اللحظه دي تفكر في ايه وهو عايز يقول ايه؟
ايمان: يعني ايه؟ تقصد ايه؟ انت مطلقتهاش يعني؟ هيا علي ذمتك؟ ولا انت ردتها ولا ايه؟ انا مش فاهمه اي حاجه؟
فارس: لا انا مردتهاش وايوه هيا طليقتي ومش علي ذمتي اللي انا بقوله ان انا لسه بحبها
ايمان: امال مرجعتلهاش ليه؟ او عايز تتجوز ليه؟
فارس: رجوع مش هرجعلها احنا كل الطرق بينا اتقفلت وما ينفعش نرجع لبعض اما عايز اتجوز ليه فهو ده السؤال المهم، هو ده اللي انا جاي النهارده اقولهولك لان انتو عيله قريبين مننا قوي وانا الصراحه بحب والدك وبحترمه وبعتبره في مقام والدي بالظبط.
شوفي يا ايمان فرح فهمت غلط لما قولتلها ان انا موافق اتجوز وطلبت منها تشوفلي عروسه
ايمان: يعني انت مش عايز تتجوز ولا انت مش عايز تتجوزني انا بالذات؟
فارس: مش حكايه انتي بالذات لأ الحكايه اني عايز واحده تخدم امي وتاخد بالها منها، امي كبرت وتعبانه وفرح عماله تلومني انا اني السبب في تعبها وان انا المفروض اريحها وانا بصراحه حاولت كذا مره اجيبلها شغاله في البيت الا انها رافضه وبتمشيها وعايزاني اتجوز ومعرفش انتي عرفتي ولا لأ انها من اسبوع كده تقريبا تعبت جامد وفضلت في المستشفي كام يوم.
ايمان: فارس، فارس لو سمحت، انا مش فاهمه انت عايز تقولي ايه؟ انت بتتكلم كلام كتير جدا بس مش فاهماك..
فارس: عايز اقول اني مش عايز زوجه بالمعني المتعارف عليه، انا عايز خدامه بس باسلوب شيك عايز واحده تعيش معانا في البيت من غير ما امي تطردها ومن غير ما حد يقول دي عايشه معاهم بصفه ايه؟ وتخيلت ان فرح فاهمه ده وكان في دماغي انها هتشوفلي واحده مطلقه او ارمله او يتيمه او اي واحده تحمد ربنا ان في اربع حيطان بيداروها لكن ما تخيلتش ابدا انها هتختارلي واحده الشباب كلها يتمنوها، ايمان انتي تستاهلي راجل يحبك ويقدرك ويدلعك ويديكي حقك كزوجه، يحبك وتحبيه لكن مش واحد زيي ابدا، انا خلاص حبيت وانتهيت وقفلت قلبي ومش ناوي افتحه ولا عايز اصلا افتحه، فانا ما انفعكيش كزوج، انتي تستاهلي راجل يقدرك، تستاهلي حد احسن مني مش انا ابدا، حطام راجل...
ايمان: امال فرح
فارس: فرح افتكرت ان انا هتجوز واعيش حياتي لكن انا زي ما قلتلك عايز خدامه مش زوجه، ومش هكون لها زوج، هحترمها هعاملها كويس، هجيبلها طلباتها لكن مش هكون زوج، مش عارف انتي فهماني ولا لأ؟ انا متفرقش معايا هتجوز مين؟ اي واحده تقضي الغرض طالما هيا موافقه علي الجواز بالطريقه دي فهمتيني؟
ايمان كانت عايزه تعيط بس مش عايزه تعيط قدامه كفايه لحد كده بهدله، فقامت وقفت.
ايمان: انا فهمت كويس قوي واسفه علي الازعاج اللي احنا عملناهولك
فارس: ايمان لو سمحتي
ايمان: خلاص يا فارس ما تتكلمش زياده بعد اذنك انا اتأخرت ولازم اروح.
سابته وجريت لانها لازم تعيط، حبته من قلبها، اول حب ليها وتقريبا اخر حب لانها مش قادره تشوف غيره حتي، اليومين اللي فاتوا عاشت في وهم حب كبير، بنت احلام كتير في الهوا اتدمرت علي ارض الواقع، عاشت في قصه حب من نسج خيالها وتخيلت ان هو كمان كان واخد بالو منها وهيقولها ان هو حبها ولاي سبب بعد لكن ما تخيلتش ابدا انه هيرفضها ويرفض حبها بالطريقه دي..
روحت وحبست نفسها وفضلت تعيط كتير جدا ومحدش عارف مالها بتعيط ليه؟
فارس روح هو كمان مخنوق ومش طايق حد ومجدي مارحموش ابدا
مجدي: غبي انت راجل غبي، في واحد عاقل يجيلو القمر ويدق علي بابه يقوله لأ مايلزمناش، انتي غبي يالا، يعني حتي لو مش هتحب يا اخي اتجوزها وخلفلك عيلين منها وعيش معاها واحترمها وقدرها مش لازم حب اصلا، علي الاقل الاحترام بيدوم العمر كله...
فارس: مجدي وحياة ابوك ما هي نقصاك، ابوس ايدك نقطني بسكاتك
مجدي: ماهو انت غايظني بطريقه ما تتخيلهاش، طول عمري بحسدك علي ذكائك مره واحده كده قلبت معاك بتخلف ماتفهم؟ غبي ما تفهم؟ مش قادر افهم انت جرالك ايه؟ الغباء بقي متوفر عندك بكتره
فارس: مجدي وحياه ابوك لتسكت
فارس سابه وروح علي بيته وهناك امه اول ما شافته راحتله فرحانه وطايره
منيره: بجد يا فارس؟ بجد اللي انا سمعته؟
فارس: ايه هو اللي بجد وسمعتي ايه؟
منيره: ان انت عايز تتجوز ايمان اخت هدي؟ انت مش متخيل قلبي كان هيقف من فرحتي بالخبر ده، اول ما امها كلمتني وقالتلي انكم مع بعض كنت، كنت عايزه ازغرد وانزل ارقص في الشارع والناس كلها تقول الوليه اتجننت علي كبر، فارس انت مش عارف انا فرحانه قد ايه؟ كنت خايفه قوي لتقول هعيش حياتي كده ولا تروح تجيبلي واحده ما تسواش ضفرك وتقول اهي جوازه والسلام، لا بس انت حبيبي نقيت ست البنات، هتتجوزا امتي هاه؟ بسرعه والنبي نفسي اشيل عيالك بقي، بص انت تعملها فرح ما اتعملش وتشتريها شبكه تليق بيها ايوه، وتشتريها الفستان اللي هيا تشاور عليه، ايوه حبيبي انت مش قليل اه، انت الباشمهندس فارس.
فارس غمض عنيه ومش عايز يسمع زياده ولا عارف يسكتها ولا عارف يتكلم ويدمرلها احلامها اللي بتبنيها في الهوا، وفي نفس الوقت مش قادر يسمع زياده..
فارس: امي امي امي، اهدي، واحده واحده، اولا لسه مفيش اي حاجه من اللي انتي بتقوليها دي كلها، احنا مجرد قعدنا مع بعض، ما اتكلمناش في اي حاجه مهمه وبعدين انا لسه ما اتقدمتلهاش وبعدين هتقدم ازاي من غير حتي ما اقولك؟ هاه؟
منيره بحزن: اوعي تكون مش ناوي وهما فهموا غلط..
ويدوب دموعها هتنزل
فارس: لا لا مش كده بس لسه يعني، الموضوع محتاج صبر يا امي مش سربعه واحده واحده اوكي وماتحطيش امال كبيره ممكن هيا ترفض؟
منيره: لا هما بيحبونا من زمان وما هيصدقوا هو انت شويه ولا ايه؟ انت بس قول يارب
فارس: يا رب المهم انا عايز ارتاح ممكن؟
منيره: اه يا حبيبي ادخل ريح ادخل وربنا يجعلها من نصيبك يارب ويجعلك منها ذريه صالحه يارب.
فارس ابتسملها ودخل اوضته، اهو ده بقي اللي معملش حسابه ابدا، هيقول لامه ايه؟
ايمان في بيتها في اوضتها بتعيط فابوها دخلها يطمن عليها ويشوف عملت ايه مع فارس؟
عم سيد: ايمان مجيتيش قولتي لابوكي وحكيتيلو عملتي ايه؟ هاه هيجي يقابلني امتي؟
ايمان عيطت جامد وابوها بدأ يقلق
عم سيد: في ايه اللي حصل يا بنتي! انطقي قولي؟
ايمان: هو ما بيحبنيش يا بابا.
عم سيد: وهو هيحبك بتاع ايه؟ ولا يحبك امتي؟ وبعدين حب ايه اللي انتي بتعيطي علشانه؟ محسساني انكم تعرفوا بعض من سنين وكان بيسرح بيكي وجيتي اكتشفتي انه بيتسلي مش بيحبك؟ ايه يا ايمان ده انتي العاقله اللي في عيالي؟
ايمان: انت مش فاهم حاجه يا بابا
عم سيد: طيب ابوكي دقه قديمه وما بيفهمش انتي قولي ياللي بتفهمي!
ايمان: هو بيحب طليقته وعايز يتجوز بس علشان امه اهي واحده تراعيها وتراعي بيته وتبقي علاقته بيها مبنيه علي الاحترام وبس لكن مفيش حب
عم سيد: هاه وايه كمان؟
ايمان: يعني ايه ايه كمان؟ بقولك عايز خدامه في بيته مش زوجه؟ وبيقولي ان هو متخيلش ابدا ان انا ممكن اوافق عليه وان انا استاهل حققد احسن منه مليون مره واشوف حد شاب زيي يستاهلني مش راجل محطم وبواقي راجل.
عم سيد: طول عمري بحترم الواد ده واحترامي كل يوم بيزيد ليه، انتي معترضه علي ايه؟
ايمان: بقولك عايز خدامه؟
عم سيد: ربنا بيقول انه لو حلل ان حد يسجد لحد كان امر المرأه تسجد لجوزها، عارفه يعني ايه تسجد، يعني الزوج بعد ربنا، مقالش الاب ولا الام لأ قال الزوج، الواحده في بيت جوزها خدامه، مطيعه مربيه ام زوجه حبيبه عشيقه والست الشاطره تكون كل دول مجتمعين فيها، ايه يعني مزعلك؟ انه شرط عليكي تخدمي امه؟ راجل جدع وبار بأمه، هو ده مضايقك! كان المفروض تردي عليه في وقتها وتقوليلو امك في عنيا وفوق راسي وانت مش محتاج تشرط عليا حاجه زي دي، مش تيجي تعيطي وتقولي ما بيحبنيش.
ايمان: بابا لأ هو مش قصده كده هو قال انه حب مراته ومعندوش استعداد يحب تاني ومش هيحب تاني.
عم سيد: يا بنتي وهما اللي حبوا اخدوا ايه؟ مرايه الحب ديما عاميه ولما بتروح زهوه الحب وبيشتغل العقل الحياه بتتدمر لان العقل ما بيشوفوش حاجه من اللي القلب شافها وبيبدأ الانسان يندم ويستغرب انا ازاي كنت اعمي؟ انا ازاي عملت كده؟ وده نفس اللي حصل لفارس وعلشان كده مش عايز حب تاني، الجواز الصح بيقوم علي الاختيار بالعقل ولما العقل بيكون مقتنع مهما الايام تعدي هو مقتنع وباقتناعه ده بيتولد حب متين قوي حب مهما الايام تعدي عليه ما بيتهزش لانه اتبني علي اساس متين ولان العقل هيطوع القلب..
ايمان: يعني ايه؟ انت عايزني اروح اقوله انا موافقه اتجوزك من غير حب؟
عم سيد: انا بقول ان الانسان اللي شايف نفسه مش جدير بيكي هو اكتر انسان هيحاول ديما يبقي جدير وهيعمل كل اللي يقدر عليه علشان يسعدك وبعدين انتي محتاجه ايه من الراجل غير انه يحترمك ويقدرك ويعرف قيمتك ويكفي بيته؟
ايمان: محتاجه الحب.
عم سيد: وايه هو الحب في نظرك؟ يعني ازاي تحكمي ان البني ادم ده بيحب؟ هل مثلا علشان بيقول كلمه بحبك يبقي بيحب او لو مقلهاش يبقي ما بيحبش؟ ايه هو الحب؟
ايمان: معرفش بس ان الانسان يهتم بمشاعر الانسان التاني ويحاول ديما يسعده
عم سيد: ولو هو عمل كده اللي قدامه هيعمل ايه؟
ايمان: هيبادله نفس المشاعر دي.
عم سيد: طيب اعملي كده مع فارس وهو هيبادلك نفس المشاعر دي، هو هيبدأ حياته معاكي بأدب واحترام وموده واحتياج لان هو محتاج زوجه وانتي كملي ده بالحب وخليه يبادلك الحب، انتي دخلي الحب بيتك انتي اخلقي الحب ده
ايمان: ولو فشلت؟ لو معرفتش اخليه يحبني؟
عم سيد: لو انتي مش هتعرفي تخلي جوزك يحبك يبقي هتفشلي برضه مع اي حد تاني حتي لو بيحبك...
ايمان: انت منطقك غريب.
عم سيد: انا منطقي مبني علي الحب بعد الجواز، زمان كنا بنتجوز جواز اللي انتو بتسموا جواز صالونات وكنا بنحب بعض بعد الجواز وكان نادرا ما تسمعي عن حد طلق مراته، دلوقتي الكل يقول لا لازم اتجوز عن حب و90 % من حالات الجواز عن حب بتفشل، وبيطلقوا قبل اول سنه، واهو اكبر دليل لده فارس نفسه، حب واحده لا هيا مناسبه ولا هيا من مستواه وفضل يعافر ويعافر وبرضه في الاخر طلقها فهو استوعب الدرس كويس وعايز يتجوز بعقله، علي العموم دي حياتك انتي وانا برضه راجل عجوز ودقه قديمه شوفي انتي عايزه تعملي ايه وانا وراكي في اي قرار تاخديه، هتقوليلو اه يا اهلا وسهلا، هتقوليله لأ يبقي مع السلامه وخلينا حبايب، خدي قرارك علي مهلك وشوفي هل هتقدري تزرعي الحب في بيتك ولا انتي عايزه زرعه جاهزه والسلام؟ تصبحي علي خير يا بنتي فكري واستخيري ربنا وان شاءالله يلهمك للصح، وانا هدعيلك من كل قلبي ان لو هو خير ليكي ربنا يسهلك ولو شر يبعدك عنه..
سابها في حيره غريبه، منطق غريب عمرها ما فكرت بيه ابدا، بس فارس مقلهاش انه عايز يتجوزها هيا لأ هو رفضها تماما وقالها انه بيحب مراته، طيب تعمل ايه تقوله تعال اتجوزني وانا موافقه ابقي خدامه؟ ولا تصرف نظر خالص عنه وعلي رأي ابوها تشوف حد بيحبها؟ ولا تعمل ايه؟ هيا مش عارفه غير حاجه واحده وبس انها بتحب فارس، دي كانت بتنزل الشارع وتجري وري عربيه ايس كريم لمجرد انها تشوفه، وطول حياتها بتقبل باي شيئ لمجرد انها تلمحه جايه دلوقتي ترفض انها تبقي في بيته ومراته كمان لمجرد انه قال انه عايز واحده تخدم مامته؟ دي هيا كانت مستعده تشتغل خدامه بس وبجد لمجرد انها تبقي قريبه لكن ده هو عايزها زوجه كمان، ازاي ترفض؟ طيب بلاش مش يمكن يحبها زي ما بتحبه؟ مش يمكن يكون عايش في ماضي مراته وينساها لما يعيش الحاضر، مش يمكن يخلف منها وتبقي هيا كل دنيته؟ في افتراضات كتيره قوي لازم تفكر فيها وتاخدها في الاعتبار.....
فارس محتار مش عارف يقول لمامته ايه هو كمان؟ ولا ازاي يروح يقول لايمان اتجوزيني او ارفضيني انتي؟ مش عارف يعمل ايه؟
تاني يوم نزل الشغل وطول الوقت سرحان ومجدي حاول يعرف ماله بس مقالوش حاجه..
وقت رجوع ايمان طلع بره الورشه وهو معندوش ادني فكره هيعمل ايه؟ ولا عارف هو واقف ليه؟ ولا عارف لو شافها هيعمل ايه او يقول ايه؟
اخيرا شافها جايه وبيجهز اي كلام يقوله بس مش عارف، ايمان كمان متلخبطه مش عارفه تقوله ايه؟
وصلت عنده ووقفت قصاده والاتنين ساكتين..
الاتنين: اااا
فارس: قولي عايزه تقولي ايه؟
ايمان: قول انت الاول..
فارس: انا مش عايز اقول حاجه كنت هسلم بس
ايمان: وانا كمان..
فارس: طيب
ايمان: طيب انا ماشيه بعد اذنك
فارس: اه اتفضلي...
مشيت خطوتين
فارس: ايمان
وقفت وبصتله
فارس: والدتك كلمت والدتي وقالتلها ان انا طلبت ايدك وانك انتي وافقتي
ايمان: امم وبعدين؟
فارس: وبعدين ايه؟ انتي لسه موافقه؟
ايمان: انت لسه متقدملي؟
فارس: لو قلتلك اه؟
ايمان: هقولك اه
فارس: بس انا كلامي بتاع امبارح ما اتغيرش
ايمان: عارفه وموافقه
فارس: طيب اقدر اقابل والدك امتي؟
ايمان: كلمه وحدد معاه، بعد اذنك
فارس: اتفضلي
سابته ومشيت وهو فضل كتير مكانه يبصلها لحد ما طلعت بيتهم واختفت وهو برضه واقف فاق علي صوت مجدي وراه
مجدي: تيرارارااااا
فارس: اخرس يا واطي
مجدي: ما كان من الاول
فارس: ايه هو اللي من الاول؟ انت متخيل اني هتجوزها حبا فيها؟
مجدي: متجوزها تلاعبها شاطرنج
فارس: هههههه خفه تصدق ضحكتني
مجدي: من يومي يا ابني، بص يا فارس، خطوه الجواز في حد ذاتها صح واختيار اختك صح جدا، الحياه جايالك فاتحه ايديها باقي عليك انت يا حلو تنتهز الفرصه وتعيش بقي..
فارس: ما اسهل الكلام، تخيل يا مجدي للحظه ان انت ونجاه لاقدر الله انفصلتو لاي سبب كان، وجابولك ملكه جمال الكون هتعمل ايه؟ بامانه سيبك بقي من الهزار والضحك فكر للحظه اخدت منك نجاه وجبتلك واحده تانيه مكانها، جمالها هيفرق؟ هتعمل ايه؟ هتقول في داهيه؟ الحياه فاتحه ايديها؟ هتسمع للي حواليك وبيقولولك ارمي وري ضهرك عيش يالا؟
مجدي: ...
فارس: ايوه هو ده، الحياه ملهاش معني من غير الانسان اللي بتحبه، حتي لو نزلك ملك من السما وحتي لو كان اللي بتحبه شيطان، الحب هو الحب، مش بايدك تلغيه او تنساه او تديله ضهرك وتعيش حياه جديده، اتمني يا مجدي ما تتكلمش تاني في الموضوع ده معايا
سابه ودخل لشغله واخر النهار رجع وكانت والدته مستنياه علي نار هيا واخته
منيره: اخص عليك اتأخرت يا فارس.
فارس: ما اتاخرتش ولا حاجه معادنا معاهم بعد العشا واحنا يدوب المغرب اهو
فرح: علي اساس ان انت هتروح بمنظرك ده؟
فارس: نقطيني بسكاتك انتي
منيره: اسكتي يا بت انتي، ادخل يا حبيبي خد دش كده وغير هدومك ويالا علشان نلحق نشتري حاجه في ايدينا واحنا رايحين
فارس: انتي يا بت مش قولتلك شوفي الموضوع ده؟
فرح: علي فكره انا اكبر منك، ما تقولش بت دي تاني، ، وبعدين انا جبت اللي هناخده معانا بس ماما ما تقصدش ده.
فارس: امال تقصد ايه؟ تقصدي ايه يا أما
منيره: اقصد هديه لعروستك حبيبي، دي اول مره هتروح عندهم لازم تجيبلها حاجه
فارس: احنا لسه هنروح نتقدم يا أما
منيره: دي حاجات شكليه هما موافقين واحنا عارفين يبقي تنجز وتخلص علشان ما نتأخرش
فارس: بدأنا، انا عارف انها شوره
منيره: بتقول ايه يا حبيبي؟
فارس وهو داخل: ما بقولش.
دخل وقف تحت الدش كتير يفكر في مدي غباء الخطوه دي ومش قادر يتخيل نفسه مع واحده غير حبيبته ابدا غير ولبس وخرجلهم
منيره: ما لبستش بدله ليه؟
فارس: امي ما تضغطيش عليا، انا مش رايح فرح
منيره: انت مش متخيل فرحتي، سيبني افرح يا فارس
فارس: انا مش اول مره اتجوز وكل ده اتعمل قبل كده.
منيره: بالنسبالي انا دي اول مره، جوازتك الاولانيه كل حاجه فيها كانت غريبه ومش طبيعيه وكانوا ناس غير الناس لكن دول جيرانا وحبايبنا ولو سمحت سيبني اعمل اللي انا عيزاه...
فارس: حاضر يالا بقي علشان ما نتأخرش
منيره: يالا، استني، انت معاك فلوس؟
فارس: معايا يا أما
منيره: فلوس كتيره مش قليله
فارس: كتير قد ايه؟ انتي في دماغك ايه؟
منيره: ٥٠٠٠ كده ولا حاجه
فارس: معايا.
اخدته علي محل دهب يشتري حاجه لايمان وهناك فضلوا كتير
منيره: ما تنجز يا ابني
فارس: انا اللي انجز برضه؟ ما تنقوا انتو اي حاجه وتخلصو
فرح: المفروض انت اللي تنقي احنا بنوريك
فارس: انا فاضلي ثانيه ومش بس هسيب المحل لا ده انا هسيبلكم الدنيا كلها واطفش انجزوا
منيره: فارس اختار لعروستك حاجه
فارس اتنرفز وبيفكر جديا يسيبهم ويمشي ومش عارف يسيطر علي غضبه، اخيرا مد ايده ومسك سلسله في قلب وجواه قلب اصغر.
فارس: هاخد دي لو سمحت شوفهالي بكام؟
الاتنين سكتوا ومحدش فيهم نطق لانهم عارفين انه علي اخره
منيره: لو سمحت يا ابني حطهالنا في علبه صغيره شيك كده
اخدوها ومشيوا وراحوا عند بيت ايمان، فضلوا كتير يسلموا علي بعض ويرحبوا بيهم
ايمان من جوه عنيها علي فارس اللي ساكت وسرحان اصلا، ولو حد كلمه بيرد علي قد السؤال
منيره: اتأخرنا عليكم معلش، بس اللي اخرنا فارس
فارس بص لامه باستغراب
فارس: انا اخرتكم؟
منيره: اصر انه لازم يشتري هديه لعروسته وجننا في المحل مش عاجبو حاجه خالص، قلتله يا فارس يا حبيبي دي مش شبكه دي بس هديه، فين لحد ما اختار..
فارس مذبهل من كلام مامته وفرح كانت هتضحك من شكله وكانت عايزه تقوله اقفل بوقك...
فضلوا يرغوا كتير وبعدها ايمان خرجت ومنيره قامت وحضنتها جامد، كان نفسها تخطفها منهم وتاخدها وتمشي وتقولهم دي مرات ابني، سلمت علي فرح وفارس وقعدت علي جنب.
منيره: طبعا يا عم سيد احنا جايين نطلب ايد ايمان لفارس ويارب يجعلهم من نصيب بعض ويسعدهم ويعوضهم خير ببعض
عم سيد: اللهم امين، انا يشرفني ان فارس يبقي واحد من عيالي ويتجوز بنتي، فارس عارف معزته ايه عندي!
فارس: والله يا عمي المعزه متبادله، انا بحترمك وبقدرك وبعتبرك في مقام والدي...
قروا الفاتحه مع بعض وفارس عطي هديته لايمان اللي كانت طايره بيها من الفرح..
اخيرا سابوهم لوحدهم شويه...
ايمان: متشكره علي الهديه
فارس: المهم انها تعجبك؟
ايمان: زوق مامتك ولا فرح؟
فارس: زوقي انا
بصتله باستغراب
فارس: ايه مستغربه ليه؟
ايمان: تخيلت ان مامتك بتألف لما كانت بتقول علي الهديه وده من نظرتك انت ليها فقلت اكيد هيا اللي جابتها او فرح وهيا بتقول كده بس.
فارس: والله هو كده وكده، هما اللي اتاخروا لانهم مكنوش مستقرين علي حاجه مش انا، وبعدين اخترت انا دي وما اخدتش رأيهم علشان نخلص فبالتالي انا استغربت لانها قالت ان انا اللي محتار مش هما...
ايمان: يعني دي ذوقك؟
فارس لاحظ انها مسكتها وابتسمت وفرحت وبانت فرحتها قوي.
فارس: ايوه ذوقي بس ما تبنيش عليها حاجه، امي قالت اني لازم اجيب حاجه وزي ما قلتلك انهم فضلوا كتير فشديت اول حاجه عيني وقعت عليها مش اكتر ولا اقل، متبنيش امال، وارجوكي قبل ما ناخد الخطوه دي بجد ونتجوز فعلا انتي لازم تشيلي فكره الحب دي من دماغك نهائي، انا مش هحبك يا ايمان مهما تعملي، فلو انتي حاطه في دماغك اني مع الوقت ومع عشرتنا هحبك فتراجعي من دلوقتي احنا لسه علي البر...
ايمان: طيب علشان افهم بس يا فارس هو انت هتقدملي ايه؟
فارس: يعني ايه هقدملك ايه؟
ايمان: يعني انت عايز واحده تخلي بالها من والدتك وتراعيها وتراعي بيتك، انت في المقابل هتعملها ايه؟ مش معقوله هتعيش بلقمتها وبس..
فارس: مش فاهم برضه انتي عايزه توصلي لايه؟ اللي هيا عيزاه هعملهولها بس نخرج الحب بره علاقتنا
ايمان: ايوه علاقتكم بقي شكلها ايه؟
فارس: مبنيه علي الاحترام والتفاهم او ده اللي بتمناه.
ايمان: طيب وده اللي انا عيزاه، علاقه مبنيه علي الاحترام والتفاهم، اللي جوايا بقي يا فارس خليه جوايا مالكش دعوه بيه، احلم اتمني ابني في الهوا، ده شيئ يخصني اتفقنا؟
فارس: اتفقنا؟
منيره اصرت انهم يعملوا الفرح بسرعه وراحوا اشتروا الشبكه
منيره: نقي يا حبيبتي اللي يعجبك يالا
ايمان بصت لفارس اللي واقف علي جنب
فارس: شوفي اللي يعجبك ايه؟ واهو معاكي فرح وهدي يساعدوكي.
وقف هو بعيد وسابهم لوحدهم ينقوا ويختاروا وهو وقف بره المحل مستنيهم يخلصوا
ام هدي: بقولك يا ام فارس؟ هو فارس مالو مش مبسوط كده؟ وبعدين واقف بره ليه مش مع خطيبته يختار معاها شبكتها مش ده برضه هديته ليها ولا ايه؟
منيره: هو بس يا حبيبتي مالوش طولت بال ابدا للشري والتنقيه فديما يقولنا نقوا وفي الاخر يجي يدفع، هو اتعود علي كده..
ام هدي: بس دي شبكته؟
منيره: هو بس مستنيهم يستقروا وبعدها هو يجي، خليني اشوف البنات وصلوا لايه؟
قامت وراحت للبنات لقتهم محتارين بين كذا حاجه، فطلعت لفارس بره
فارس: خلصتو؟
منيره: انت واقف بره ليه؟ مش بتختار شبكتك ليه مع خطيبتك؟ ادخلها يالا وشوفها هتختار ايه؟ اتحرك
زعقتله وهو علشان ما يزعلهاش دخل وراح للبنات وقف وري ايمان وكان طويل عنها كتير، كانت دماغها عند صدره
فارس: وصلتو لايه؟
ايمان: محتارين.
فارس مد ايده ومسك طقم لفت نظره وايمان حست انها محاصره في حضنه وهو وراها..
فارس: ده احلاهم، ولا انتي ايه رأيك؟
ايمان بصتله وعنيها اتعلقت بعنيه: طالما عجبك هاخده
فارس: انتي اللي هتلبسيه المهم يعجبك انتي؟
ايمان: عاجبني
فارس: خلاص هناخد ده...
فرح: اختاروا الدبل يالا
ايمان نقت كذا واحده لفارس وهو اختار منهم وبعدها نقتله واحده رجالي
ايمان: قيسها...
فارس بصلها كتير وبعدها اخدها من ايدها ولبسها في ايده اليمين وهو بيلبسها لمحت دبله في ايده الشمال فبصتله باستغراب وهو بصلها كتير وبعدها بص للبياع
فارس: هاخد دي خلاص...
اشتري هديه لامه ولحماته وكان عايز يجيب لفرح ولهدي بس الاتنين رفضوا تماما وقالوا كفايه كده المره دي..
ايمان بعد ما شافت الدبله في ايده قعدت علي جنب هاديه وساكته
فارس خلص حسابه مع البايع واخدهم وطلع وعزمهم علي العشا بره..
فارس: ساكته ليه؟
ايمان: عادي ما تاخدش في بالك
فارس: براحتك
فضل يتكلم مع هدي وفرح ويهزر معاهم وهيا بتتفرج عليهم وساكته، خلصوا ومشيوا وفارس وصل كل واحده بيتها، فرح وهدي وامه نزلها وفاضل حماته وايمان وصلهم ونزلت حماته سبقت وسابت ايمان معاه
ام هدي: ما تتأخريش حبيبتي، انتو في الشارع
فارس: هتتطلع علي طول يا حماتي
طلعت وسابتهم وهو قاعد مستنيها تتكلم وهيا ساكته ولما طال سكاتها، طفي العربيه ورجع لوري في كرسيه والدنيا بقت ظلمه.
فارس: قولي اللي جواكي وطلعيه
ايمان: مفيش حاجه جوايا وبعدين احنا اتفقنا ان اللي جوايا يفضل جوايا..
فارس: ايوه اتفقنا بس ده مش معناه انك هتفضلي بالمنظر ده في ايه مالك؟
ايمان: لو مصر تعرف، الدبله اللي انت لابسها في ايدك ايه دي ولابسها ليه؟
فارس سكت شويه: بلاش، اطلعي يا ايمان وفرجي ابوكي واخواتك علي شبكتك اطلعي
ايمان: لابسها ليه؟
فارس: اجابتي مش هتعجبك فاطلعي
ايمان: عايزه اسمعها.
فارس: بما انك مصره، دي دبله مراتي ولبستهالي يوم فرحنا، نسينا ننقل الدبل في الفرح ونقلناهم في بيتنا وبعد ما بقت مراتي كانت في حضني واخدنا بالنا ان الدبل لسه في اليمين فنقلناهم واتواعدنا ساعتها انه مهما يحصل ما نقلعهمش ابدا..
دموعها نزلت بصمت وهو شاف دموعها
فارس: قولتلك بلاش
ايمان: طيب انت مش هتقلعها؟
فارس: لا مش هقلعها
ايمان: ودبلتي هتلبسها ازاي؟
فارس اتردد كتير بس في الاخر نطق: مش هلبسها.
ايمان هنا نزلت تجري من عربيته ودخلت بيتهم تعيط وفضلت كتير تعيط وتحاول تسيطر علي نفسها قبل ما تدخل بيتهم..
فارس فضل واقف هو كمان مكانه، متضايق مخنوق بس هيا اختارت ده وهو قلبه مش ملكه، وفي الاخر دور عربيته ومشي وهيا سمعت عربيته فلازم تطلع هيا كمان، دخلت واستأذنت ودخلت اوضتها علي طول
ابوها دخل وراها لانه عارف انها هتعيط
عم سيد: مالك بس يا بنتي، ايه اللي زعلك؟
فضلت تعيط شويه في حضن ابوها وهو ضاممها وساكت.
عم سيد: مش هتقولي مالك؟ ولا عايزه تعيطي بس؟
ايمان: فارس لابس دبله مراته ومش عايز يقلعها ولا عايز يلبس دبلتي
عم سيد: وده اللي عامل فيكي كده؟ يا بنتي الدبله دي شيئ صوري، اهو لابس دبله والسلام حد هيجي يقوله الدبله دي بتاعت مين وعليها اسم مين؟
ايمان: انا عارفه يا بابا، هيكون معايا وقلبه وعقله معاها.
عم سيد: ممكن في الاول بس بشطارتك انتي تخليه بكيانه كله معاكي انتي، خديها تحدي انك هتخليه يقلعها بنفسه ويطلب منك تحطي دبلتك في ايده، ايمان اللي جاي هيكون اصعب من مجرد دبله فلو كل شويه هتعيطي كده وهتبقي بالمنظر ده يبقي بلاها يا بنتي من دلوقتي، لو انتي مش قد الخطوه دي بلاش. ، انتي لسه علي البر سيبيه، بلاها الجوازه دي يا ايمان، انتي مش هتستحملي فارس ولا طباعه ولا تقلباته ولا معارضته عليكي ولا محاربته لحبك لانه هيحارب وخصوصا اول ما يبدأ يحبك هيحارب الحب ده بكل قوته فلو انتي مش هتقدري تقفي قصاده يبقي استسلمي من دلوقتي ووفري علينا كلنا الدراما اللي جايه، وفري الدموع والوجع..
ايمان: انت عندك حق انا مش هقدر احارب ولا هقدر اقف قصاده يا بابا ولا هستحمل حبه لغيري. ، . خلينا نقطع العلاقه دي في الاول، انا هفسخ خطوبتي يا بابا مش هقدر اكمل معاه، بكره هرجعله شبكته تصبح علي خير.
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
الفصل السادس والسابع والثامن والتاسع من هنا
أدخلوا واعملوا متابعة لصفحتي عليها كل الروايات بمنتهي السهوله بدون لينكات من هنا 👇 ❤️ 👇
تعليقات
إرسال تعليق