جميع الروايات كامله

رواية روح_ملاكي عصابة_الحي الفصل الثالث عشر والرابع عشر بقلم رحمه نبيل حصريه وجديده علي مدونة النجم المتوهج للروايات والمعلومات 

الثالث_عشر

اتمنى بقى تفاعل عشان تشجعوني آكتر ارشوني يا عيال 😂 😂 😂

۞ فَوَيلٌ لِلقاسِيَةِ قُلوبُهُم مِن ذِكرِ اللَّهِ ۞

ما ضُربَ عبدٌ بعقوبة

أشدُّ من قسوة القلب ! 🌸

صلوا على النبي

عادت براءة بظهرها للخلف وهى تنظر لهم بكل برود تمتلكه / هو أنا كلامي ممل ولا حاجه

شادية وهى تبتسم باستفزاز / والله احنا مش عايزين نحرجك بس آه هو ممل جدا فعلا

ابتسمت لها براءة وهى تعود بجسدها للأمام وهى تقول / طب حلو اوي نكمل بقى كنت فين

سليم وهو يضع يده على خده بحنق / لما حمصة راحت لمكتب العميد

ضربته براءة على كتفه بمرح / عاش يا سولي مركز معايا، المهم بقى البت حمصة راحت عند العميد وكان معاها  ترمسة وهوبا وهما في الطريق قابلوا البت بطاطا و

قاطعها شادي بتذمر وهو يزفر / حمصة وترمسة وبطاطا هو احنا واقفين على الكورنيش ولا إيه

ابتسمت براءة بكل برود وهى تنظر لشادي  / وعشان الاستاذ شادي وكلامه ده فكرني بحكاية الكورنيش فخليني احكيها ليكم

صدحت صيحات الاستنكار بين الجميع وهم يزفرون بملل فقالت براءة بكل جمود / وبمناسبة حالة الملل اللي انتم فيها دي فكروني اخلص حكاية ترمسة وحمصة وبعدين حكاية الكورنيش وبعدين هقولكم بقى حكاية لما كنا في المحاضرة وبننفخ زيكم كده ومش طايقين الدكتور اللي بيتكلم

كاد سليم يتحدث فامسك شادي يده وهو يقول / ابوس ايدك ابوس ايدك متقولش كلمة لتفتكر حكاية تآني

ابتسمت براءة وهى تنظر للجميع وتقول / نكمل بقى

نظر كريم لادهم بتعجب / ازاى يعني

ادهم وهو يرفع حاجبه له / هو ايه اللي ازاى يعني بقولك هنروح دمياط ايه الغريب هنا

كريم بأعراض شديد وهو ينظر لخصره / الاعتراض ان حضرتك مصاب ولسه مبقتش كويس والسفر مش كويس عشانك والطرق كلها مطبات وممكن تتجرح

تحدث ادهم باصرار / أنا كويس يا كريم ومفيش حاجه وحتى الحرج بدأ يلم وهقدر على السفر

كريم بعدم تصديق / الجرح بدأ يلم فنفتحه تآني صح

نظر له ادهم بتذمر / انت عايز ايه يا كريم من الاخر لاني مش هتراجع ولو خطوة واحده لازم ألاقي اهل ملاك

نظر له كريم بتعجب شديد / ملاك

ابتسم ادهم له وهو يقول / ده اللي جذب انتباهك في كلامي ، خلاصه الحوار بكره من الصبح تكون جاهز انت والشباب عشان مش هيعدي بكره غير واحنا في دمياط يا كريم

ثم تركه ودخل للغرفه حيث الجميع بينما نظر كريم للباب حيث دخل وارجع شعره للخلف بضيق وهو يقول / ابو عِندك يا أخي فظيع

ثم لحق به للداخل وبمجرد دخولهم وجدوا الجميع ملامحهم ثابته بشكل يثير الحيرة وشادية تمسك هاتفها وهى تتحدث مع احد وتضحك بينما ام فتحي كانت تجلس على مقعد ادهم وهى تبتسم ببلاهه

تقدم ادهم منها وهو يقول بخفوت / هو فيه إيه

تحدثت براءة ببسمة / اهو ادهم جه اقعد يلا يا ادهم عشان نكمل السهرة سوا كلنا

نظر ادهم للجميع ثم نظر لبراءة بتعجب وهو يقول / عملتي ايه

Rahma Nabil 美心

هزت منة رأسها بضيق ويأس من تعنت والدتها ثم تقدمت للداخل وهى تحاول أن تتحكم في اعصابها وبمجرد رؤية الجميع لها حتى نهض ذلك الشاب المدعو رامي وهو يتجه لها ويقول بلكنته الاوروبية المنمقة/ماماميا منة واخيرا جيتي بقالي كتير مستني

منة وهى تتجاهله وتعبر بجانبه ثم اتجهت لوالدها وهى تقبله / حبيبي عامل ايه

ابتسم عبدالرحيم بشماته وهو يقول / كويس ياقلبي شكلك تعبانه لو كده اطلعي ريحي الأول

انهي عبدالرحيم حديثه بسرعه قبل أن يعترض او يعلق احد فابتسمت له منة وقالت وهى تخرج / آه والله يابابا تعبانه اوي اوي هطلع استريح انا عن اذنكم يا جماعه

نظر رامي لها وهى ترحل ثم نظر لوالدته بحنق وقال / هو احنا مش مرحب بينا ولا ايه يا شاهي هانم

نظرت شاهي لهم بحرج ثم ابتلعت ريقها وقالت / ازاى بس يارامي دي حتى موني مش على لسانها غير رامي رامي

نظر لها رامي بشك بينما نهضت مديحه وهى تقول / واضح يا مدام شاهي يلا يا رامي هنرجع البيت يا حبيبي

نظر لهم رامي بترفع ثم ذهب خلف والدته بينما شاهي تحاول أن تمنعهم ولكن لم يستمعوا لها

بعد ذهابهم نظرت شاهي لزوجها الذي يمسك هاتفه وهو يبتسم بسمة ساحرة فانطلقت له بغضب وهى تقول / طبعا فرحان دلوقتي لما خليت منظري زفت قدام مديحه هانم

نظر لها عبدالرحيم ببسمة متشفية / أنا يا شوشو اعمل كده لا اخص عليكي ده انا حتى بحبك وبهتم بمنظرك الاجتماعي قدامهم

رفعت حاجبها بسخريه / لا مهو واضح أمال لو مكنتش مهتم

نهض عبدالرحيم وهو يقترب منها يقول بسخريه / كنت جبت فسيخ وفرشت في الأرض هنا

ثم تركها وصعد للأعلى تاركا اياها تشتعل غيظا من بروده

Rahma Nabil 美心

دخلت أشرقت غرفتها وهى تلقي نفسها على الفراش بتعب شديد بعد يوم دراسي طويل فسمعت صوت وصول رسالة فامسكت هاتقها بلهفه وسرعان ما ابتسمت باتساع وهى تقول / اكل الطعم 

ثم أخرجت هاتفها واجرت اتصال وانتظرت قليلا حتى وصل لها صوت كريم وهو يقول / أشرقت ازيك 

أشرقت ببسمه وصوت متحمس / الحمدلله بخير ياكريم انت بخير؟؟ 

كريم بنبرة حنونة / الحمدلله يا.... اااااه 

أشرقت بتعجب / ها؟؟ 

نظر كريم بجانبه لسليم الذي ينظر له بشر وقال بخفوت / فيه إيه بقول الحمدلله هو أنا بعاكس 

سليم وهو يضع يده على الهاتف ويقول وهو يجز على أسنانه / شامم ريحة مش كويسه في نبرتك مش عايز لين ولا عايز حنان عايز دبش راجل ألي سامع 

ثم نزع يده من على الهاتف وأشار له ان يكمل فنظر له كريم بحنق وهو يتمتم بغيظ / لولا اختك اللي جوا دي كنت نفختك 

ثم تحدث بصوت حاول أن يجعله جاد / ايوة معاكي يا أشرقت كنت بتقولي ايه 

أشرقت وهى تقول بنبرة متعجبة / كنت بقول ان رأفت بعتلي رساله 

نظر سليم بشر للهاتف فابعده كريم بخوف وهو يقول/قالك ايه 

أشرقت بأمل / الحمدلله وافق يقابلني 

ضغط سليم على هاتفه واحمرت عينه بشده ثم رفع عينه لكريم وهو يشير له بالتحدث 

كريم وهو يبتلع ريقه / آيوه تمام مفهوم بلغيه انك هتقابليه كمان ثلاث ايام اكون رجعت من دمياط لاني عندي شغل هناك

أشرقت / تمام يا كريم هبلغه وبجد مش عارفه اشكرك ازاى يا كريم 

نظر كريم برعب لسليم وهو يقول برعب / متشكريش مش عايز شكر خالص 

أشرقت ببسمه وهى تظنه يقول ذلك كعادته من باب المساعده / لا أبدا والله لولاك يا كريم كنت.... 

كريم بسرعه وهو يرى نظرات سليم له التي تطلق شرار /لا لا والله مفيش حاجه خالص يا أشرقت المهم انتي الفتره دي مترديش على اى حاجه منه وخليكي دايما على تواصل معايا لحد ما ارجع...... تمام...... سلام 

أغلق الهاتف ونظر لسليم ولم يكد يتحدث حتى وجد سليم يقترب منه بسرعة كبيرة وهو يدفعة للحائط بعنف ويقول من بين أنفاسه التي تلفح وجه كريم / دلوقتي وحالا هتقولي ايه اللي بيحصل مع أشرقت وابن ال**** ده هيقابلها ليه 

نظر له كريم برعب فعندما جائت له مكالمه أشرقت كان سليم يجلس بجابنه ورأى اسمها فجذبه للخارج وجعله يفتح المكبر ابتلع كريم ريقه وقال / طب ندخل دلوقتي وه‍‍

سليم بعيون غاضبة وبهمس مرعب / دلوقتي 

Rahma Nabil 美心

تحدثت براءة ببرود وهى ترى الجميع يضحك بصخب بعد تركهم للغرفة وعودتهم لغرفة ادهم مجددا/ فيه إيه مالكم

شادي وهو يقترب منها وينحني لها بحركة مسرحية / ارفعلك القبعة ده انتي قادرة والله

ضحكت ام فتحي بشده وهى تقول / كل ما افتكر شكلهم وهما بيقولوا ليك انت لازم ترتاح عشان صحتك هموت يا عيني كانوا قربوا ينجلطوا ولا براءة كل خمس دقايق ( لا انا حاسة اني بزعجكم والله / اوعوا اكون بزعجكم) ست قادرة

ضحك ادهم بشده معها هو والجميع بينما تنظر له براءة  ببسمة سخرية وهى تقول / مش كنت حابب انك تفلسع ادينا خلتهم هما اللي يفلسعوك ويتحايلوا عليك كمان

ضحك ادهم وهو يمسك خصره بوجع / بس مش للدرجه دي يا عيني كانوا شوية وهيطردونا وشادية اللي ماشية تاخد اكونتاتهم دي

شادية وهى ترفع حاجبها بتعجب / فيه إيه حابة اضيفهم عشان لو احتاجت استشارة ولا حاجه

غمز لها ادهم وهو يجذبها ويقول / استشارة برضو يا شادية

شادية وهى تنظر له بخبث وتقول / انت تعرف عني ايه

ادهم وهو يحاول ان يكتم ضحكته / كل خير

غمزت له شادية وهى تضحك / خلاص بقى اطمن

ثم ابتعدت ونظرت لهم وهى تقول / أظن مهمتنا خلصت ودلوقتي لازم نرجع خلي ادهم يرتاح واحنا برضو نرتاح

وافق الجميع على ذلك وقالت مريم وهى تنظر لادهم ببسمة / تصبح علي خير يا ابيه

ابتسم لها ادهم بحنان / وانتي بخير يا ريمو

تحدث شادي وهو ينظر لادهم وقال ببسمة ومكر/ هى ريمو مقالتش ليك ولا إيه يا ادهم

نظر له ادهم بتعجب فقال شادي وهو ينظر لمريم / فيه عريس جه لريمو

فتح ادهم فمه بصدمه وهو يقول / ده بجد يا ريمو

مريم بخجل شديد / لسه والله يا ابيه مجاش سليم كلمه وأجل كل الكلام لغاية ما تقوملنا بخير

هز ادهم رأسه بشرود وهو يفكر بكريم وفي نفس اللحظه دخل كريم وخلفه سليم الذي كانت ملامحه توحي بالسواد الذي يحتويه الان تحدث بخفوت / شكل فيه كتير اوي فايتني

ام فتحي وهى تهمس له / فعلا في كتير فاتنا بسببك انت بقالي فتره ما شوفتش الكاندي شوب بتاعي وبعد ايام من الجبنة القديمة واخيرا الواحد داق حلويات

نظر لها ادهم بشر وغضب شديد وهمس لها / تعرفي تسكتي

نظرت له بحاحب مرفوع وقالت ببسمة مستفزه / لا

ثم نظرت لكريم وهى تقول / شايف اللولي بوب منور ازاى ما شاء الله يابني عيني عليك باردة الواد فولته عالي و

قطعت حديثها وهى تجد ادهم يجذبها بعنف

وينظر لها بغضب ابتلعت ريقها وهى تقول / ايه يا ادهم بس ده انت حتى الخير والبركة والله سيب بس وداني وخلينا نتكلم براحة.

تحدثت براءة وهى تنهض وتنظر للجميع / يلا يا جماعه خلينا نرتاح

وبالفعل ودع الجميع ادهم وعاد الكل لمنازله بينما نظر ادهم لام فتحي وتحدث / كريم لقى صورة ليكي لشخص كان بيدور عنك

نظرت له بلهفه شديدة وهى تقول / بجد في حد بيدور عليا عندي عيله

ابتسم لها بحزن وقال / اممم واحد كان رافع صورتك على الفيس وكريم جاب العنوان وبكرة هنروح ونشوف الموضوع

ابتسمت ام فتحي بشده وهى تنظر له بعدم تصديق / أنا مش مصدقه انا.. انا مش عارفه اقول ايه واخيرا هعرف انا مين

ثم نظرت فوجدت ملامحه غامضه بشكل غريب / مالك انت مش فرحان

نظر لها وأجاب على سؤالها بسؤال / هو آنتي ممكن تنسيني لو فوقتي ممكن تسبيني وترجعي لعيلتك

نظرت له بصمت وهى تفكر قليلا فقال هو بعيون حزينه وبسمة يحاول رسمها / عادي والله دي عيلتك ومن حقك ترجعي ليهم انا بس مش عايزك تسبيني و

قاطعته وهى تقول / يمكن انساك فعلا

Rahma Nabil 美心

خرج شادي من غرفته بعدما بدل ثيابه فوجد عوض يجلس في الصالة وهو يشاهد التلفاز مع براءة وشادية فقال ببسمه وهو يجلس بجانبه / عوض يا اجمل عوض ليا كنت ابويا واخويا وعيلتي كلها 

نظر له عوض ببرود وقال / لا 

ثم أعاد نظره للتلفاز بينما تحدث شادي بتذمر / هو ايه اللي لا ده انا لسه قولت حاجة 

ابتسم عوض ببرود / بالمقدمة دي اكيد بلوه انسى انا خلاص قربت ابيع القهوة واسرح بترمس عشان أسد البلاوي اللي بتعملوها

ثم نظر بجانبه لبراءة / واهي الأخت التانية شرفت يعني المشاكل بقت بالدابل فانسى بقى 

ابتسمت براءة وهى تتناول التفاح / تعيش يا غالي وتسدد يارب 

نظر لها عوض بقرف بينما قالت شادية لشادي/ عايز ايه ياض ياشادي قولي وانا أقنعه مش هيقولي لا 

نظر لها عوض بتذمر وهو يهتف / امي

ابتسم شادي وتحرك إلى جوار شادية / ضهرك كده يابراءة بصي يا شوشو انا بس عايز العربيه لمشوار مهم بكرة وهرجعها صاغ سليم 

نظر له عوض وقال له برفض / انسى يا بابا اخر مرة رجعتلي بتذكار منها 

شادي وهو يستدير له / الاه مش المهم اتصلحت ورجعت 

براءة وهى تأكل التفاح ببرود / اديها ليه يا عوض وانا هروح معاه

نظر لها عوض بسخريه / ما انيل من سيدي الا ستي يا ختي اتنيلي ده انا كده اقلق آكتر انسوا اني اديكم عربيتي 

نظر له شادي بنظرات بريئة وهو يقول / ولو قولتلك عشان خاطري ياعوض

عوض بحده / يا اخويا اولع انا مش مستعد اني اضيع عربيتي اللي ورثتها من جدودي

كادت براءة تتحدث ولكن قاطعها عوض بنفى قاطع / انكم تاخدوا عربيتي دي تنسوها خالص 

Rahma Nabil 美心

تحدث سليم لشادي ببسمة / هات المفتاح انا هسوق 

شادي بسخرية وهو يتجه لمقعد القيادة / انسى يا حبيبي ابويا المرة اللي فاتت كان هيروح فيها وانا اقنعته بالعافية وانت غبي في السواقة 

دخل كريم في الخلف بجوار ادهم وكانت معهم ام فتحي وهى تقول / دمياط وحلويات دمياط ومشبك دمياط وانا اقول بحب الحلويات ليه 

نظر لها ادهم بتشنج ثم أدار وجهه للأمام بينما هى تحدثت بتعجب / مالك 

نظر لها بسخرية /يعني مش عارفه 

هزت رأسها برفض فقال بغيظ / واللي عملتيه امبارح ده كان ايه 

ابتسمت ام فتحي وهى تقول بمشاغبة/ يا راجل انت لسه زعلان ده انا بهزر

نظر ادهم للأمام بتذمر بينما هى ضحكت بخفوت وهى تتذكر ما حدث 

F. B

قالت أم فتحي بحنان / يمكن انساك بس اتأكد أن قلبي عمره ما هينساك القلب اللي ارتاح ليك من غير ما يعرفك وحس انه يعرفك من سنين اكيد مش هينساك خصوصا بعد ما فضل جنبك طول الفتره دي 

نظر لها ادهم  وقال/ هتسبيني. 

ابتسمت هى وقالت / انت هتسبني امشي؟؟ 

نظر لها قليلا بصمت ثم ابتسم وقال / لو اقدر ارجع وحيد تآني هقدر اسيبك وقتها

نظرت له بتعجب لاجابته المراوغة تلك لاحظ ادهم نظرتها فقال ببسمة / بس انا مش هقدر ارجع تاني وحيد بعد ما حسيت يعني إيه يكون ليا حد دايما جنبي 

ابتسمت له بينما هو نظر لها نظرات جعلتها تتوتر بشده وتقول بسرعه لتجعله يكف عنها / طبعا يابني هتستغنى عني إزاي حتى انا مش هقدر امشي اسيب الكاندي شوب لمين ها قولي ولا الجلاكسي بتاعي وغزل البنات مين ياخد باله منهم 

نظر لها بغيظ شديد ثم تسطح على الفراش وتحدث/ غوري يابت من هنا 

نظرت له بتعجب لما غضب هكذا 

B

ضحكت ام فتحي وهى تقول / قفوش  آوي على فكره 

نظر شادي لهم وكاد ينطلق بالسيارة حتى وجد الجميع السيارة تفتح وحقيبه تلقى عليهم وبراءة تصعد بجانب كريم نظر لها الجميع بتعجب فتحدثت هى باستغراب لنظراتهم تلك / ايه مالكم فيه إيه 

تحدث شادي وهو يستدير لها حيث تجلس في الخلف / انتي بتعملي ايه يا براءه 

براءة بجدية / عوض جه وقالي بالله عليكي يا براءة تروحي معاهم عشان مش هطمن غير كده 

فتح الجميع فمه بغباء فقالت هى ببرود وهى تزفر / جاية عشان عايزه اجي فيها حاجه دي 

سليم وهو ينظر لها من خلال المرآه الامامية / هو احنا رايحين نلعب يا براءة 

براءة وهى تربع يدها بعناد / والله تلعبوا تشتغلوا تتنططوا على الحيطان انا هروح يعني هروح فوفروا على نفسكم وقت وامشي عشان نلحق الطريق من أوله 

نظر شادي لهم فاشار له ادهم بالانطلاق فبدأ شادي طريقه نحو البحث عن حقيقة تلك الروح 

Rahma Nabil 美心

زفرت منة بضيق وهى تنظر لوالدتها باختناق / هتخلص امتى 

تحدثت شاهي وهى ترفع نظرها عن بعض الأوراق وتقول بتهكم/ ليه حضرتك مشغوله ولا إيه 

صمتت منة قليلا ثم قالت / ليه هو انا معنديش حاجه غير العرض ده 

تركت شاهي الأوراق من يدها ببرود وهى تقول / احب اعرف حضرتك عندك ايه 

منة وهى تنظر لنفسها في المرآه وتقول / هروح النادي بقالي فتره مروحتش 

شاهي باستخفاف كبير / آه النادي طبعا هتروحي ترقصي 

منة وهى تبعد الفتاة التي تأخذ المقاسات الدقيقه لها / وماله يعني هو انا برقص في الكباريهات ولا إيه أنا بتدرب على رقص الباليه 

شاهي وهى تتحدث بقرف / ايه ألفاظك دي انتي عرفتي كباريه دي منين

منة باستخفاف شديد / يمكن عشان مصرية مثلا والكلمة دي معروفه يعني 

زفرت شاهي بضيق وهى تقول / انتي عايزة ايه 

منة باصرار شديد وشعور باختناق بدأ يزداد بتحكم والدتها / عايزه اخلص وامشي انا تعبت بقالي ساعه واقفه اقيس 

نهضت شاهي وهى ترحل وتقول بلا اهتمام/ ماشي ماشي 

نظرت منة لاثرها بسخريه ثم أخرجت هاتفها وهى تجري مكالمة وتقول  / الو شادية انتي في البيت 

Rahma Nabil 美心

براءة وهى تصفق باستمتاع / لو الظروف هتسخف

ثم صمتت ونظرت لهم في انتظار التكلمة فقالوا بضيق وهم يصفقون / صقف صقف صقف اوعى توقف صقف صقف اوعى توقف

براءة وهى تكمل غناء / عايزها متبقاش ضيقه بطل بص وبحلقة لو عايزها متبقاش ضيقة بطل بص وبحلقه الرضا بتجيب بغدده والبحلقة بتجيب زحلقة

توقفت عن الغناء ثم نظرت لسليم بشر فقال سليم برتابة وكأنه رجل الي / اهدى يابنك النرفزة وبلاش تنكش ع الاذى اهدى يابنك النرفزة وبلاش تنكش ع الاذى ما تنشنش وما تشدش وافرح هو احنا في عزا

براءة وهى تصفق / ولو الظروف هتسخف

لم يكد احد يتحدث حتى شعروا بالسيارة تتوقف بسرعه كبيرة فارتدت أجسامهم للأمام ونظروا بخوف للأمام وفجأة رفعت براءة جسدها وتقدمت لشادي وقامت بصفعة بحده على رقبته وهى تقول / انت ياض راضع من بجرة هبلة

نظر ادهم لام فتحي ببسمة فقالت بتعجب / ايه

تحدث ادهم بسخرية / نفس البجرة اللي شربتي منها اللبن تقريبا انتي تعرفي شادي

ام فتحي وهى تنظر لشادي وتقول ببسمة / الكاب كيك ده ياخويا ياريت هو أنا اكره

زفر ادهم بغيظ فهو كان يود ان يستفزها وقد انقلب الأمر ضده

تحدث شادي بوجع وهو ينظر امامه / ايه يابراءة فيه واحد غبي رمى نفسه قدام العربية

نظرت براءة من الزجاج الأمامي ثم قالت بغضب / طلعني كده عشان هخلي الجذمة تزغرط على خلقته

هبطت براءة بسرعه وخلفها الجميع بينما ام فتحي تقول بتأثر / الواحد حس بالأمان في وجودك يابنتي والله

بمجرد خروجهم قام الشخص الساقط بمسك قدمه وهو يصرخ بوجع / آه حرام عليكم مش تفتح وانت سايق ولا انت لوحدك في الطريق

نظر شادي له بتعجب وهتف باستنكار / انت كداب انا شوفتك وانت بترمي نفسك قدام العربية

نظرت السيدة التي تجاور ذلك الرجل بقلق وقالت بتمسكن / حرام عليك يابيه اكمننا غلابة يعني بتدوسوا علينا

تحدثت ام فتحي بسخريه / ميغركش شوية اللبس النضيف ده دول معفنين أساسا عندك ده مثلا ( وهى تشير لادهم) ده يا حبة عين أمة عنده طقمين يقلع واحد ويلبس التاني والتاني ده ( تقصد سليم) ده عنده اخت هبلة بيعالجها ومش لاقي ياكل وده ( تقصد شادي) ابوه شويه وهينزل يلف ببخور في السيدة والأخير ده( تقصد كريم) عنده اب جلاكسي وأم غزل بنات ومش عارفين يجيبوا حقن  الأنسولين بسبب السكر اللي هما عايشين فيه ده 

نظر لها ادهم بغباء وهو يقول / انتي بتقولي ايه 

نظرت له بتعجب / ايه بحاول أقنعه انكم معدومين يمكن يمد ايده في جيبه يطلع قرشين 

تحدثت براءة بملل / قوم من مكانك عشان مش فاضيين يلا يا بابا

ثم كانت في طريقها للعودة حتى سمعت صراخ السيدة وهى تقول / انتي ايه ده انتي حتى ست معندكيش قلب ولا إيه

ام فتحي بتأثر /يا ظلمه يا جبابرة هتروحوا من ربنا فين

انتم لا يمكن تكونوا بشر

ثم نظرت ببسمه هيام لكريم / انتم حلويات بالفراولة وال

توقفت وهى ترى يد ادهم على وشك صفعها فمنعته وهى تشير لفمها بعلامة الغلق /اعتبرني هوا

ادهم ببسمة وهو يكتم ضحكة / انتي فعلا هوا

نظرت براءة لهم بشر ثم ابتسمت وتقدمت من شادي وسحبت من يده مفتاح السيارة وقالت بأمر وهى تتجه للسيارة / اركبوا

نظرت السيدة لزوجها ونظر الجميع لبعضهم بتعجب فقالت براءة بصرامة شديده / كله على العربية اخلصوا

ركض الجميع للسيارة بعدم فهم وصعدت براءة لمقعد السائق وصعد الجميع نظرت براءة ببسمة باردة للطريق بينما الرجل يبتلع ريقه وهو ينظر للسيدة بجانبه بخوف

نظرت براءة للخلف ثم عادت بالسيارة للخلف وتوقفت ثم نظرت من السيارة وهى تقول / هاخدك وش وقفا وهلزقك في الأسفلت يا معفن

وفجأه تقدمت بالسيارة بسرعه والجميع يصرخ بها ان تتوقف والرجل ما يزال يتسطح أرضا وهو ينظر لها برعب

تحدثت ام فتحي وهى تصرخ بحماس / سفلتيه

نظر لها ادهم بصدمه وهو يقول / جزارين

وجد الرجل السيارة تقترب منه فصرخ برعب ونهض وركض بسرعه بعيدا عن الطريق وانطلقت السيارة تشق طريقها مجددا نحو دمياط فتحدثت براءة ببسمة / ولو الظروف هتسخف

صفقت ام فتحي بحماس / صقف صقف صقف اوعى توقف صقف صقف او توقف

ضحك ادهم بشده ثم اخذ يصفق ويغني هو والجميع حتى وصلوا للمكان المراد

وقف الجميع امام المنزل المطلوب قالت براءة بتعجب وهى تنظر للباب / قولولي تآني كده احنا بنعمل ايه هنا

تحدث شادي وهو ينظر للجميع / هنقولك بس خلينا ندخل الأول

طرق سليم الباب بينما ام فتحي تقف بكل لهفة وهى تنظر للباب حتى فُتح الباب وظهر من الباب شاب وهو ينظر لهم بتعجب فقالت ام فتحي بصدمه / أيعقل ؟؟؟؟؟؟

روح_ملاكي

عصابة_الحي

الرابع_عشر

أولا انا حاليا مش بعلق على تفاعل ولا على اى حاجه خالص البارت اللي فات يمكن كان عدد لايكاته اقل  انا مقدره ان الفتره دي الناس في امتحانات وبتذاكر عشان كده مش بعلق على تفاعل خالص طالما قدرت ارفه عنكم ولو لدقايق بس هو طلب ان اللي قرأ البارت وعجبه يضغط لايك لان ده بيفرق كتير جدا وياسلام لو كتب تعليق قمر كده وعلى فكره انا بقرا كل التعليقات حرفيا وبلا استثناء وحقيقي بفرح بيها عموما  حاليا كل واحد وضميره بقى هنراعي ان فيه امتحانات ومحدش فاضي أو بيقرا ويروح يكمل مذاكره بسرعه فمفيش اى عتاب او غيره وربنا يوفقنا جميعا بس بعد الامتحان يبقى نتنقاش سوا بقى

ودلوقتي اسيبكم مع البارت

_______________________________

۞ وَاتَّقُوا يَوْمًا تُرْجَعُونَ فِيهِ إِلَى اللَّهِ ثُمَّ تُوَفَّى كُلُّ نَفْسٍ مَا كَسَبَتْ وَهُمْ لَا يُظْلَمُونَ ۞

إفعل مابدا لك وحذارِ فإن هذه آخر آية نزلت من السماء!

فتهيئ للرجوع إليه! 🌸

عطروا افواهكم بالصلاة على خير الأنام ♥️🌙

Rahma Napil 美心

نظر ادهم بفزع لام فتحي وهو يقول / فيه إيه يابنتي

نظرت له ام فتحي بتأثر شديد وهى تشير للشاب الذي فتح / اخويا الصغير طلع قمر آوي

نظر ادهم للشاب الذي فتح الباب ويبدو في الثامنة عشر من عمره فرفع حاجبه وهو يقول بخفوت / وانتي ايه اللي عرفك انه اخوكي الصغير

شهقت ام فتحي وهى تنظر للشاب بدموع مصطنعة / ابني؟؟؟ يا حبيب ماما شايف شبهي إزاي واخد مناخيري اهو وأكيد عيونه الملونه دي واخدها من ابوه

نظر لها ادهم بقرف وعض على شفتيه بغيظ حتى لا يصرخ بها امام الجميع

تحدث الشاب الصغير بتعجب منهم ومن صمتهم العجيب ذاك فقال بوقاحة  / نعم اتفضلوا عايزين مين

نظر ادهم لكريم الذي هز رأسه وأخرج هاتفه وفتحه ثم وضعه امام الشاب وقال بهدوء/ انت صاحب الاكونت ده

نظر الشاب لشاشة الهاتف ثم نظر لهم بتعجب وحاحب مرفوع بكبرياء / ليه فيه مشكله؟؟؟؟

تحدث سليم وهو يزفر بضيق / رد على السؤال من غير كلام كتير لو سمحت

نظرت له براءة بتأنيب وهى تقول /مش كده يا سليم اتكلم براحة مع الواد 

ثم نظرت للشاب وقالت وهى تشير برأسها للداخل / اجري ياض نادي اى حد كبير نتكلم معاه

كاد الشاب يتحدث حتى سمع الجميع صوت شاب يٱتي من الداخل وهو يقول / مؤمن فيه إيه

ثم اقترب منهم وهو يقول بتعجب / مين دول

ام فتحي وهى تنظر له بصدمه وهيام / يارب يكون جوزي يارب يكون جوزي 

فجأه سمعت صوت سيده من الداخل وهى تنادي / مين يا حبيبي 

ام فتحي بخيبة امل وصدمه / طلع متجوز يارب يبقى عشيقي 

شعرت بضربه في خصرها فنظرت بغضب لادهم 

تحدث الشاب الكبير بنظرات باردة قليلا /معرفش مين؟؟؟ مين حضراتكم 

فتحت ام فتحي فمها بصدمه شديده وهى تقول بهمس

لادهم / هو احنا فين كده يا كابتن

ادهم وهو يتحدث بتعجب /دمياط

ام فتحي وهى تنظر للشاب ببسمة غبية / طب اتأكد كده الله يكرمك اننا في دمياط لنكون روحنا اسكندريه بالغلط

كرمش ادهم وجهه بتعجب من حديثها فقالت له بهيام / ده مش مشبك دمياطي لا دي بسبوسة اسكندراني بالسمنة البلدي اسمع مني مش مصدق طب استني اروح ادوق 

امسكها ادهم من مرفقها وهو ينظر لها بشر ولكن فاق على حديث شادي وهو يقول / يلا يا ادهم

نظر له بتعجب فقال شادي وهو يشير للباب / بقولك ادخل يلا هنتكلم جوا

نظر ادهم مجددا لام فتحي بشر وهمس / كلمه إعجاب تآني وهشغل اية الكرسي وتنحرقي واخلص

نظرت له بتذمر ودخلت خلفه وجلست حيث الجميع ثم نظرت للبيت حولها قليلا وهى تغمض عينها بتأثر بينما ادهم يراقب ملامحها بدقه ثم قال لها / مالك

ام فتحي وهى تنظر حولها بحنين غريب عليها وشعور يمتلكها وقالت بتأثر شديد / انا افتكرت

نظر لها بصدمه فاكملت  له / حاسه اني شوفت البيت ده قبل كده مألوف ليا آوي

ثم أشارت لغرفه وهى تقول / الاوضه دي حاسه آوي انها كانت بتاعتي قلبي بيقولي كده

نظر الشاب للصورة التي أعطاها له كريم فقال بحاجب مرفوع / آيوه بس انا معرفش مين دي

تحدث ادهم بانتباه / إزاي حضرتك نزلت بوست بتسأل فيه عنها

رجع الشاب بظهره للخلف وبكل برود قال / ايوة بس انا معرفهاش دي بس نسيت شنطتها في العربيه اللي كنت مسافر بيها ولقيت الصوره دي في الشنطة  وكنت بسأل عنها بس انا اساسا معرفش مين دي

نظر ادهم لام فتحي وهو يبتسم بسخريه ويقول / حاسه اني شوفت البيت ده قبل كده حاسه بكده آوي وفي الاخر طلعتي مش من هنا أساسا آه يا زباله

قالت أم فتحي وهى تضحك بشده / الله يابني حاولت اني اتأثر زي ما بشوف

نظر ادهم للشاب وقال / طب متعرفش حاجه عنها ولا حتى شنطتها فيها اى حاجه تدلنا علي اى حاجه عنها

تحدث الشاب ببرود / لا معرفش حاجه وكمان الشنطة مش فيها غير لبسها وصورة ليها اللي هى نشرتها لان هى لما  نزلت الاستراحة أخدت معاها المحفظه اللي فيها اى أوراق خاصة

انتبه ادهم وتحفز جسده بشده وهو يقول بتركيز / استراحه ايه وكنتم مسافرين منين بالتحديد لفين

زفر الشاب بضيق وهو يقول / وانا ايه الاي يجبرني اقولك واحكيلك عنها تعرفها منين أساسا

ام فتحي ببسمه خجوله وهى تنظر أرضا / طلع بيغير

تجاهلها ادهم ثم نظر له وهو يقول / أنا دكتور في مستشفي في القاهره وهى هناك عامله حادثه ومحتاج حد من عيلتها

تحدث الشاب بضيق وكل برود / طالما مش من عيلتها يبقى مش هقدر اقولك حاجه بعتذر

نظرت أشرقت لشادي وقالت بهمس / هى مين دي بدل ما انا زى عواجيز الفرح كده وادهم مهتم آوي كده ليه بالمريضه دي

نظر لها شادي ثم نظر لادهم الذي ينظر للشاب بشر وقال بمكر /أصل ادهم بيحبها عشان كده بيحاول يلاقي أهلها يمكن يكونوا امل في انها تفوق

هزت رأسها ثم نظرت لذلك الشاب السمج كما اسمته ومدت يدها في بنطالها واخرحت مسدس ووضعته على الطاولة امام الجميع بعنف وقالت وهى تشير بعينها للمسدس / طب حاول تفتكر يمكن تفيدنا بحاجه

تحدث الشاب بتوتر قليل بسبب هذا السلاح ولكن قال بعناد / مفكراني هخاف من المسدس ده يعني

نهضت براءة من مكانها واتجهت له وقال بنبره مرعبه / لو مخفتش من المسدس ده خاف مني انا مصنفة اني بتعامل معامله أطفال يعني لو قتلتك دلوقتي ليس على حرج

تحدث الشاب برعب من نبرتها ونظرتها المرعبة وقال / أنا انا معرفش بس انا كنت مسافر من الاتوبيس اللي كان طالع من اسكندرية لدمياط بس في نص الطريق وقفنا في استراحة وهى نزلت بس مجتش ومحدش خد باله وكملنا الطريق ولما وصلنا اكتشفت انها مش موجوده من شنطتها والسواق عطاها ليا وقالي اعلن عنها فنزلت صورتها اسأل عنها مش اكتر بس معرفش حاجه تاني

دخلت عليهم فتاه وهى تنظر لهم بشك وتقول /مين دول يا محمد

نظرت له براءة ببسمة وعادت لمكانها بينما كانت أم فتحي شاردة بطريقه غريبه وكذلك الجميع

تحدث محمد وهو يقول بضيق شديد / موضوع البت اياها

انتبه له سليم فقالت الفتاه بتذمر وحنق / يا ستير يارب متفكرنيش هى البت دي مالها الكل بيسأل عليها كده

نظرت ام فتحي بلهفه لادهم ففهم عليها وبادر في السؤال وقال / مين تاني سأل عليها

تحدثت السيده بغضب / رجلين جم سألوا عليها وقالوا انها من عيلتهم 

ابتسمت ام فتحي بشده وقد بدأ امل ينبت في قلبها ولكن اختفى ذلك الأمل وهى تسمع بقية حديث السيده وهى تقول / بس كانوا يا بااااي ناس أتمة بيزعقوا ويشوحوا ولا كأنهم مفكرين الكل عبيد عندهم وكمان واضح آوي انهم مكنوش بيحبوا البنت دي

نظر لها محمد بشر وقال / خلاص خلصنا ملناش دعوه بيهم

نظر لها ادهم باهتمام شديد وقال / يعني إيه مش بيحبوا البنت يعني

الفتاة بثرثرة / أصل اول ما جم هنا كانوا عمالين يزعقوا ومضايقين ومره واحده قام واحد منهم واتكلم في التليفون وهو بيزعق ويشتم في البنت دي ويقول لا لسه ملقناش بنت ال**** دي بقى حتة واحده زبالة لا راحت ولا جات تبهدلنا كده انا بقى هجبها ولو من تحت الارض ووقتها هعرفها قيمتها 

نظر لها محمد بشر وهو يقول / قولت خلصنا مش عايز اسمع كلمه

ثم نظر لهم بحده وقال / أظن كده عرفتم اللي انتم عايزينه شرفتونا

نظرت براءة لهم بتعجب وهى تقول / هو طردنا من شوية؟؟؟ 

امسك شادي يدها وهو يقول بحذر / لا يا عمتو اقعدي بس هو ميقصدش 

نهضوا جميعا بينما كانت أم فتحي شارده بطريقه تثير الشفقه

تحدث ادهم لمحمد وهو يتقدم ليصافحة / هكون مشكور لو قدرت تساعدنا نوصل لبيتها ده

نظر له الشاب قليلا ثم هز رأسه وذهب لمكان ما ثم عاد وهو يحمل كارت ما وهو يقول / ده واحد منهم سابه ليا عشان لو جات تدور على شنطتها لاني سيبت خبر في كل المحطات ان الشنطة معايا

نظر ادهم للكارت بدقه وهو يفكر جيدا في القادم

بينما نهض الجميع بتعجب وصدمه مما سمعوا وبراءة تنظر لادهم بتركيز

وبعد انتهاء الحديث خرج ادهم وهو ينظر للكارت بشرود وخلفه ام فتحي وهى تنظر أرضا بتعب وحزن

تحدث سليم لبراءة بتعجب / انتي من امتى وانتي معاكي  المسدس ده يا براءة

براءة وهى تنظر للمسدس بيدها بضحك  / ده؟؟؟ ده لعبة عشان الظروف اللي زي دي

كاد ادهم يقترب من ام فتحي ليتحدث ولكن فجأه سمع الجميع صوت إطلاق النيران والرصاص يُضرب بجهتهم

Rahma Napil 美心

سارت منة تجاه العمارة الخاصه بشادية ولكن أثناء سيرها اوقفتها سيده ما وهى تنادي عليها / يا عروسه انتي يا عروسه

توقفت منة بتعجب وهى تشير لنفسها فهزت السيدة رأسها وهى تشير لها لتقترب منها

اقتربت منها منة بدهشة فقالت السيدة / انتي بنت مين يابنتي هنا 

نظرت لها منة بتعجب وهى لا تتحدث فقالت السيده / إيه القمر ده بس لا ونضيفه كمان قوليلي يابنتي انتي مخطوبه ولا متجوزة

تحدثت منة بتعجب شديد من حديثها / لا مش متجوزة ولا مخطوبه بس ليه

السيده ببسمة وهى تربت على كتفها / انتي منين يابنتي وبنت مين

كادت منة تجيب عليها ولكن قاطعهم صوت شاديه التي خرجت من النافذه وهى تنادي على منة وتحدث السيده بحنق / جرا ايه يا حبيبتي ما تسيبي البنت بعدين دي أساسا قريب هنقرا فتحتها على الواد شادي

نظرت السيده بخيبة امل لمنى فتحدثت شادية من الأعلى / اطلعي يابنتي يلا

نظرت منة بحرج للسيده وقالت ببسمة / عن اذن حضرتك يا طنط

ثم صعدت بسرعه لشادية بينما نظرت لها السيده بتكسر وهى تقول / طنط؟؟؟ ايه الرقة دي ملكش نصيب يابني فيها

ثم غادرت بينما وصلت منة للشقه وجدت مريم تفتح الباب وتنتظرها فابتسمت لها منة وعانقتها بحب شديد وهى تقول / وحشتيني اوي يا مريم

مريم بحب شديد / وانتي اكتر ياقلبي والله وحشتيني جدا

خرجت شاديه وجذبتهم للداخل بحنق / يلا ياختي منك ليها

دخلت منة وهى تضحك على تصرفات شادية وقالت / على فكره انتي احرجتي الست وبعدين ايه اللي هنقرا فاتحتها على شادي دي

شادية وهى تجذبها لغرفه التلفاز / لو مقولتش كده كانت هتخليكي تعترفي على كل حاجه انتي متعرفيش النسوان يابنتي يشوفوا اى بنت حلوه ينادوها وهاتك يا اسأله اسمك ايه بنت مين مخطوبه ولا لا ويا سلام بقى لو في فرح تروح تقفشها من وسط صحابها وتقررها

ضحكت منة ومريم بشده فتحدثت شادية وهى تشير للارض / يلا بقى جهزت قاعده محترمة على شرف البت منة

نظرت منة للارض فوجدت حلوى وتسالي كثيره جدا فقالت بفرحه / والله يا شاديه انتي مفيش منك

ضحكت شادية وهى تجلس وهن كذلك فقالت بخبث / نبدأ اللعب بقى

نظرت الفتاتان لبعضهن بتعجب ثم قالت مريم وهى تخلص نظارتها وتمسحها جيدا / لعب ايه

ابتسمت شاديه بخبث شديد فابتلعت مريم ريقها وهى تقول / الستر من عندك يا رب

Rahma Napil 美心

نظر الجميع برعب لجهه ضرب الرصاص وفي ثواني ولم يستوعب احد كانت براءة تخرج المسدس وتطلق به على سيارة ثم ركضت بعيدا عنهم وهى تصرخ بصوت عالي/ فندق المنشي

وفجأه اختفت عن الانظار وخلفها تلك السياره والجميع لم يستوعب بعد هذا المشهد والذي يروه لأول مره ماذا حدث منذ قليل لا أحد يعلم اول من خرج من الصدمه كان سليم حيث ركض للسياره وهو يصرخ بهم / اطلعوا بسرعه نلحقها

نظر الجميع لبعضهم البعض بتعجب وصدمه فصرخ بهم  سليم وركض لهم الجميع بينما تحدثت ام فتحي وقد نست ما حدث منذ دقائق /هو فيه إيه انتم طلعتوا مافيا ولا إيه

‏تحدث ادهم وهو ينظر امامه برعب وشادي الذي كانت حالته سيئة وهو يصرخ بسليم  بسرعه وكريم الذي مازال بصدمته /اسكتي دلوقتي لو سمحتي

‏نظرت لهم ام فتحي بشفقه لحالتهم بينما سليم يحاول اللحاق بهم

وبراءة كانت تركض في شوارع جانبيه وضيقه لتعيق عليهم اللحاق بها وفجأه وجدت نفسها خرجت لطريق عام فزفرت بضيق ونظرت حولها ولكن سمعت صوت شخص يصرخ خلفها ويضرب رصاص تجاهها فانحنت بسرعه وأخذت تركض في الطريق وهى تقفز من على السيارات والجميع يصرخ بها بينما هى تركض وتنظر خلفها لهذه السيارة والتي توقفت عن إطلاق النار بسبب دخولهم لطريق ملئ بالناس زفرت براءة واخفت مسدسها وهى تنظر خلفها وتسب في نفسها / ناقصه امكم هى

فجأه وجدت سيارة تتجه لها بسرعه كبيره وتتوقف امامها وشخص يفتح لها الباب وهو يقول / اركبي

صعدت براءة بسرعه وهى تتنفس بحده  وأخرجت هاتفها وأرسلت رسالة لشادي ثم إعادته ثانيا لجيبها بينما انطلق ذلك الشخص بسرعه كبيره مقتحم الطريق الجانبي وهو يبتعد عن تلك السياره ثم قال ببسمة / لسه فيكي العادة دي يا براءة كل مكان رجلك تدب فيه بتعملي بلوة 

نظرت له براءة وهى تتنفس بحده ثم قالت ببسمة ساخره /هى الدنيا كده مبتجيش غير على الغلبان وبس

ابتسم بجانبية ثم قال /بس انا شاكر المصايب دي عشان خلتني اشوفك 

نظرت له براءة ببسمة وقالت / وانا مش شاكره ليها خالص عشان خلتني اشوف خلقتك دي تآني 

ضحك الشاب بصخب وهو يقول / لسه لسانك طويل 

براءة وهى تنظر امامها بتعب وتزفر بضيق / عايز ايه يا مؤنس وعرفت مكاني ازاى 

Rahma Napil 美心

نظرت منة للاشياء امامها بغباء شديد وهى تقول / ايه ده 

ابتسمت شاديه بحماس شديد وهى تنظر للاشياء التي احضرتها وقالت وهى تشرح لهم اللعبة / دلوقتي قدامكم برطمانين واحد فيه ورق مكتوب فيها الحروف وواحده فيه ورق مكتوب فيه كوبليه من اغنيه ما 

ثم مدت يدها واحضرت هاتفها وأخرجت منه شئ وأخذت تعبث به قليلا ثم قالت بمكر وهى تضعه أرضا الفون ده فيه خط جديد ومش متسجل 

نظرت بجانبها وهى تمسك زجاجه فارغة وتقول ببسمة خبيثة / هنلف الازازه دي واللي تقف عندها هتسحب ورقة بحرف و ورقة بكوبليه وهتاخد الفون ده وتسجل الاسم الأول عندها اللي بالحرف اللي سحبته واول ما يرد عليها هتغني الكوبليه ده من غير ما تتكلم كلمة بعدين تقفل 

نظرت الفتاتان بغباء لها فزفرت شادية بضيق وقالت / مثلا انا سحبت ورقة فيها حرف وطلع حرف العين وسحبت ورقة فيها اى اغنيه همسك تليفوني واجيب اول اسم عندي بحرف العين اللي هو عوض هتصل بعوض بقى واغني ليه مقطع الاغنيه من غير ولا كلمة بعدين هقفل وبس كده اتفقنا 

ابتلعت مريم ريقها بتوجس وهى تقول بتردد / طب منلعب الشايب مثلا ولا اى حاجه تانيه غير اللعبه دي ممكن يحصل مشاكل بسببها 

ضربتها شادية بخفه وهى تقول / بس يا هبلة احنا نتتسلى بس ها اية رأيك يا بت يا منة 

ابتسمت منة باتساع وهى تقول بحماس شديد / موافقة جدا حبيتها آوي آوي 

ابتسمت شادية بفرحة ثم أمسكت الزجاجه ونظرت لهم ببسمة خبيثه وهى تقول /جاهزين 

ثم قامت بلف الزجاجه التي اخذت تدور بسرعه كبيرة ثم بدأت تبطئ بالتدريج شيئا فشئ وعيون الجميع تدور معها بتركيز كبير جدا  حتى توقفت على مريم التي صرخت بفزع وهى تعود للخلف برعب وكأن وحش على وشك الانقضاض عليها بينما صرخت منة أيضا ونهضت بسرعة وهى تظن ان هناك شئ خاطئ بيننا اقترب شادية منها وضربتها بغيظ / انتي هبلة يابنتي هو احنا بنجرب انبوبه وهبت في وشك 

ثم نظرت لمنة وهى تقول / وانت كمان يا هبلة تعالي اقعدي انا مش عارفه قاعدة معاكم ليه 

نظرت مريم لها وهى تعدل نظارتها وتمرر لسانها على تقويمها بتوتر وقالت / بلاش انا بالله عليكي خليها منة 

شادية بهدوء وجدية /معلش يا حبيبتي هخليكي تقولي المقدمة 

ثم صرخت بنفاذ صبر / هو أنا بقولك تعالي تعالي قولي الإذاعة المدرسية معانا اخلصي يا مريم بقولك انا هختار ليكي 

ثم مدت يدها واختارت ورقه من كل وعاء فنظرت لها مريم بقلق وأخذت الورقة ونظرت لها جيدا وهى ترى اغنيه رومانسيه لمحمد فؤاد فابتلعت ريقها وهى تقول / يارب يطلع حرف السين 

ثم فتحت الورقة برعب وهى تغمض عين وتفتح عين حتى صرخت بفزع وهى تقول /حرف الكاف 

ابتسمت شادية باستمتاع شديد وهى تقول/ ياترى مين اول اسم عندك بحرف الكاف 

نظرت مريم الورقة بصدمه وهى تهمس بدون وهى / مفيش غير كريم عندي بحرف الكاف 

اتسعت بسمة شادية وهى تمد يدها بالهاتف وتقول ببسمة ماكرة / ياترى هنسمع كريم اغنيه ايه 

لم تخبرها مريم اسم الاغنيه وكادت تكذب عليها ولكن شادية سارعت بنزع الورقة من يدها بعنف ثم نظرت لها ببسمة وقالت / حبيبي يا؟؟؟ 

فجأه مدت يدها لمريم بالهاتف وهى تقول ببسمة سمجة سجلتلك الرقم عندك يلا بقى يا فنانة ابهرينا 

نظرت لها مريم برجاء الا تفعل ذلك ولكن حدجتها سعدية بنظره مليئة بالتوعد فابتلعت ريقها وهى تنظر لهم بتوتر شديد فقالت شادية بملل / ايه يا ختي اشحال انك كروان العمارة انتي واخوكي اللي قرفتونا بالرقة بتاعكم هو يعزف وانتي تغني يلا يا نجمة جات فرصتك تشتغلي دولي وتوري العالم موهبتك 

نظرت مريم للهاتف بخوف ووضعت اصبعها على الرقم وفجأه وجدت منة تضغط على زر الاتصال فنظرت لها بصدمه وهى توشك على البكاء وفجأه سمعت صوت كريم الهادئ وهو يقول / الو 

Rahma Napil 美心

في السيارة كان سليم يضرب المقود بغضب شديد وتوقف في منطقه بعيده عن منزل ذلك الشاب بعد أن فقد أثر السيارة وبراءة بينما الجميع لا يعي بعد ماذا حدث واى حلم هم فيه حياتهم أصبحت اشبه بأفلام الاكشن 

هبط سليم من السيارة بغضب وهو يرجع شعره للخلف بعنف ويصرخ بهياج هبط خلفه الجميع وهم يفكرون في حل حتى سمع شادي صوت رسالة وصلت له من براءة مضمونها هو انها بخير والا يقلقوا وانها في طريقها لفندق المنشي زفر شادي براحه وهو يستند على السيارة ويقول / هى بخير الحمدلله قالت إنها في طريقها للفندق 

نزع سليم الهاتف منه وهو يمرر عينه على حروف الرسالة حتى ابتسم براحة /الحمدلله قلبي كان هيقف 

نظر له شادي فجأه وصرخ به / تعالى هنا بقى عشان انا سايبك ترزع وتخبط في العربية من بدري 

نظر له سليم بصدمه وفي ثواني كان يركض سريعا وهو يضحك وخلفه شادي بينما نظر ادهم لام فتحي وقال لها تعالى معايا 

نظر كريم للجميع وهو يقف وحده بجانب السيارة ثم قال بمزاح / بيبي طب وانا وضعي ايه 

فجأه سمع صوت رنين هاتفه أخرجه ونظر له بتفكير وهو يرى رقم محجوب يتصل به فكر في عدم الرد ولكن توقف رنين الهاتف ثم عاد يصدح مجددا تردد كريم قبل أن يجيب بصوت هادئ ويقول / الو 

مريم من الجهه الأخرى اغمضت عينها وهى تشعر بقلبها يقفز بشده في قفصها الصدري وفجأه لم تشعر بنفسها الا وهى تبدأ الغناء بصوتها الجميل الذي لطالما اثني عليه سليم بينما كان كريم يشعر بخفقاته التي بدأت تعلو بجنون وابتلع ريقه وهو يسمع ذلك الصوت الذي يعرفه جيدا وكيف لا يعرفه وهو صوت من تمثل له الحياة كلها اغمض عينه وهو يستمع لكلامها بعدم تصديق ومشاعر كثيره تكاد تجعله يغشى عليه 

بينما مريم لم تشعر بنفسها سوى وهى تغمض عينيها وتبدأ الغناء / دايما في بالي وبعد الليالى.... وحشني يا غالي يا اجمل ملاك.... آه لو تجيلي لبوسك بعيني واطفي حنيني اللي دايب معاك...... انت الجميل اللي لايق عليك الغرام..... وانت اللي عمري ما خلصت في الكلام.... انت فين... حبيبي يا.... يا حلمي انا عشت عمري بتمناه واستناه الفرقة عليا صعبه وازاى يدارى شوقي وانا اعمل ايه لو اغمض عيني واصحى الاقيك هنا في البعد نهاية وانت بقالك سنة يلا وتعالى انا قلبي هيتعب كده انت فين

انهت مريم غنائها وهى تتنفس بعنف بينما منة تنظر لها بتأثر شديد وهى تشعر بكل كلمة تخرجها من فمها وشاديه تبتسم بحنان 

بينما كريم كانت حالته صعبه الوصف كان يغمض عينه بشده وهو يقنع نفسه انه يحلم هذا حلم نعم فمريم لن تفعل ذلك أبدا هى لا تحبه من الأساس ولكن عندما استمع لغنائها نسى كل شئ حوله حتى نسى أين هو وبعد أن توقفت مريم عن الغناء تحدث دون وعى وكأن قلبه هو من خرج صوته من كثره تلك المشاعر وقال بصوت محمل بعواطف كثيرة / بحبك 

ولكن سمع فجأه صوت إغلاق المكالمه فنظر للهاتف وهو يتنفس بعنف وعدم فهم لما حدث هل كانت مريم حقا نظر 

تحدث شادي بعدما اقترب منه وهو يتنفس بصوت مرتفع بسبب الركض /مالك يابني مسهم كده ليه 

اقترب سليم وهو يخرج قنينة مياة من السيارة ويتجرعها بشراهه / ماله ده 

هز شادي كتفه بعدم فهم بينما نظر لهم كريم بعيون مفتوحه بصدمه وعدم استيعاب مما يحدث ثم تركهم  وابتعد عنهم وجلس جانبا واخذ ينظر للهاتف كالمجنون 

بينما مريم على الجانب الاخر لم تختلف كليا فقد كانت تنظر للهاتف بصدمه كبيرة هل علم كريم من هى وهل قال لها احبك ام لم يكن يقصدها هى تشعر ان رأسها سينفجر 

تحدثت شادية دون الانتباه لحالة مريم / يلا نكمل 

ثم أدارت الزجاجه فتوقفت عليها فابتسمت بمتعة وقالت / دوري 

Rahma Napil 美心

تحدث ادهم ببسمة وهو ينظر لها / يعني عجبك آوي لدرجه اتمنيتي يكون جوزك 

نظرت له بتذمر / الواد حلو وانا بقدر الجمال 

هز ادهم رأسه ثم نهض ووقف امامها وقال ببسمة / وانا؟؟؟؟ 

تحدثت وهى تنظر له بتعجب شديد / وانت ايه؟؟؟ 

ابتسم ادهم لها بسمة حنونه ثم قال بمشاكسه / قدريني زي ما بتقدري اى شاب تشوفيه قيميني 

نظرت له بصدمه من حديثه المفاجئ فقال هو ببسمة / اديني درجه قدريني يا ام فتحي ولا هو أنا خارج التصنيف أساسا 

نظرت له ببهوت وهى تحاول أن تخرج من حالتها تلك / مش لاعبه لا 

ثم كادت تذهب فوقف امامها واقترب منها وهو ينظر لعينها وقال بهدوء وصوت حنون / قيميني يا ملاكي اديني درجه قدريني زيهم 

نظرت في عينه جيدا وقالت بصدق / انت مش زيهم يا ادهم انت غير الكل 

ابتسم لها وقال وهو يقترب اكثر / غير الكل ازاى 

ابتلعت ريقها وقالت بتخدر / عشان انت الوحيد اللي بشوفه بقلبي مش بعيني

نظر لها ادهم بحب شديد ثم اغمض عينه قليلا وبعدها فتحها وقال بكل ذرة عشق يشعر بها / وانا مش بشوفك بقلبي لان ببساطة انتي قلبي نفسه 

فتحت ام  فتحي عينها بصدمه كبيرة فاكمل ادهم حديثه بعشق / لو عيلتك رفضتك هتلاقي بيتي وقلبي وحضني مفتوحين ليكي هكون ليكي الدنيا كلها وعيلتك كلها هعوضك  اى حد ممكن تفتقديه هعمل كل حاجة واى حاجه بس خليكي معايا خليكي جنبي واوعى تسبيني عشان لو سبتيني انا هموت ومش هستحمل الضربه دي والله هستحمل اى حاجه بس خليكي جنبي 

كانت أم فتحي تنظر له بصدمه ودموعها تهبط بشده فنظر لها ادهم وصدره يعلو ويهبط بشده ثم قال بعشق /ملاكي ااااااا

لم يكمل حديثه بسبب صوت شادي الذي نادى بصوت مرتفع علية فاغمض ادهم عيونه بشده ليتحكم في مشاعره ثم فتحها ونظر لها وقال ببسمة / خلينا نمشي يلا 

نظرت له قليلا ثم ركضت امامه بسرعه وهى تحاول أن تستوعب وتصدق ما سمعته منذ لحظات 

Rahma Napil 美心

تحدثت شادية ببسمة شرير / حرف الفاء واغنيه شمس المجره

ضحكت منة بشده وهى تصفق / اوعى الشعبي بس ياترى مين عندك بحرف الفاء 

نظرت شادية للهاتف وهى تقول / ادينا هنشوف 

وفجأه انفجرت بالضحك وهى تقول / يخربيت كده يا أخي من بين كل الناس اللي على تليفوني مفيش غيرك انت 

تحدثت مريم وهى تحاول الاندماج معهم لتبتعد عن تفكيرها ما حدث / مين؟؟؟ 

شادية وهى تضحك بشدة / فرج الحاج فرج ابن عمي وكبير البلد 

نظرت لها الفتاتان بصدمه وقالت منة / اكيد مش هتعملي كده 

غمزت لها شاديه ثم اخذت تضغط على ازرار كثيرة في هاتفها وفجأه صدح صوت رنين الهاتف فانتبهت الفتاتان جيدا وفجأه صدح صوت رجل يبدو كبير في السن وهو يقول بصوت عالي / الووو مين معايا 

في قرية بعيده كان يجلس بين كبار عائلات البلد كلهم وهو يحل خلاف بينهم زفر فرج بضيق ثم قال بصوت عالي / يعني هو سرق البجرة بتاعتك ولا سرق الحمار 

تحدث احد الرجال / يا عمده اسمعني هو الأول سرق الحمار بتاعي ولما روحت زعقت ليه لقيته كمان واخد البجرة بتاعتي 

فرج بتعجب وجدية / يعني انت اخدت بالك ان الحمارة غايبه وما اخدتش بالك ان البجرة غايبه؟؟ ليه كنت بتنام في حضن الحمارة واستغيبتها ولا إيه؟؟؟ 

ضحك الجميع بشده فضرب فرج بعصاه أرضا وهو يقول / بس منك ليه 

ثم نظر لذلك الشاب الاخر وقال بعنف / وانت ازاى تجيلك الجرأه انك تسرق ومش حاجة واحده لا دول آتنين ايه البجاحة دي 

تحدث الشاب باندفاع وغباء / والله يا عمده هى البجرة بس 

فرج بسخرية / والحمارة اللي لقاها عندك دي ايه؟؟؟شبطت فيك وانت ماشي؟؟؟ 

تحدث الشاب بتذمر / يا عمده هو اللي اخد الأول الديكين والفرخة بتوعي قال ايه هخليهم يطلعوا كتاكيت وضحك عليا ولقيت امه دبحاهم وطبختهم ليه 

نظر فرج للشاب الاخر وقال / وانت تاخد الديكين والفرحة بتوعه  ليه بترَضّع إياك 

صدحت ضحكات الجميع بشده فقال الشاب بدفاع عنه نفسه / يا عمده دي امي اللي دبحتهم انا خرجت مشوار رجعت لقيتها طبخاهم على الغدا 

زفر فرج ثم قال بهدوء مصطنع / وياترى بقى اكلت جنبهم ايه رز وبسلة 

الشاب وهو يبتسم بغباء / لا يا عمده الحاجه الله يبارك ليها عملت عليهم صينيه بطاطس في الفرن إنما ايه تستاهل خشمك والله 

صرخ الشاب التاني بغضب / آه يا زباله عملت حسن وحسنين وروبي صينيه بطاطس 

فرج بسخريه / حسن وحسنين وروبي؟؟؟ يا خويا بركة انه اكلهم وخلصهم من الذل اللي هما فيه 

فجأه صرخ الاثنان ببعضهم وعلت الأصوات بشده فصرخ فرج بعنف / بس منك ليه اسمع انت هتروح تجيب ليه البجره بتاعته 

قال الشاب الاخر بلهفة / والحمار يا عمده 

فرج بضيق / وهاتله الحمار كمان عشان ميسهرش بليل يغني لينا سبت فراغ كبير، وانت تدفعله حق حسن وحسنين والأخت روبي فاهم 

كاد احد الشابان يتحدث ولكن قاطع صوتهم صوت رنين هاتف فرج هنظر لهم بغضب وهو ينادي الغفير الذي يقف بجانبه / خد يابني افتح المخروب ده عشان مش بفهم فيه وافتح ليا الصوت العالي عشان مش بسمع كويس

فعل الغفير ما أمره به العمده وفتح المكاملة وايضا المكبر فقال فرج بصوت عالي / الووووو مين معايا

ولم يسمع سوى صوت بدأ في الغناء / اللي عنده جراح تشبهني يتفضل جنبي

كرمش فرج حاجبه بتعجب / الاه هى الست دي بتقول ايه هى مفكره نفسها متصله بالوحدة الصحيه ولا إيه

اكملت شاديه وهى تكمل الغناء / طول عمر الفرحة بتكرهني والطيبة ذنبي

فرج بتأثر / تؤتؤ تؤتؤ يا حول الله يارب

كان الجميع في القاعة يستمع بانتباه لما يحدث فاكملت شاديه / لو بتدور على الإخلاص عمرك هيفوتك واللي تقول ده اعز الناس نفسه يشوف مووووتك

وفجأه صرخت شاديه بصوت حاد جعل فرج يعود للخلف بعنف وهو يلقي الهاتف أرضا / لااااا مش مخلصين لا مش سالكنين ااااااااه دول خوافين في الشدة تلج وساحوا مين يفرحني اليوم مين يشيل الهموم العتاب ملوش لزوم

نظر الجميع لفرج وانفجروا في الضحك بينما بصق فرج على الهاتف / يلا يلعن ابو اللي جابوك يا ابن الكلب ياواطي

اغلقت شادية الهاتف بسرعه وهى تسقط أرضا وتنفجر بالضحك بينما منة تصرخ من كثرة الضحك ومريم تدمع من الضحك فقالت منة وهى لا تستطيع السيطرة على الضحك / ااااااااه همووووووووت

شادية وهى تنفجر بالضحك / مش معقول فرج لسه تافهه زى ما هو لولا انه الولد الوحيد في العيله مكنش هينفع يكون عمدة ابدا ده عنده جنب لو ساب ليه الحرية هيروح يمثل مع أشرف عبدالباقي في مسرح مصر

ضحك الجميع بعنف على حديثها وبعد أن هدئوا تحدث شاديه وهى تقول لمنة / مفضلش غيرك ومن غير ما نلف الازازة اسحبي يلا ورقتين

نظرت لهم منة ببسمة ثم سحبت ورقتين وفتحت اول ورقه وهى تقول / اغنيه على بالي

صفرت شادية بمكر / ايوة بقى يا عم الرومانسي شوفي حرف ايه

فتحت منة الورقة الأخرى وهى تقول / حرف الميم

نظرت لها شادية بحماس وقالت / بسرعه شوفي مين اول اسم بالحرف ده

فتحت منة هاتفها وهى تفكر في الأسماء التي تحتوي على هذا الحرف عندها وعندما رأت ما ظهر لها قلبت عينيها بملل وهى تقول / مستحيل ياربي الا ده

مدت مريم رأسها وقرأت الاسم بتعجب / ماماميا ابن مديحه بتاعة الطعمية؟؟؟؟؟؟

Rahma Napil 美心

تحدث مؤنس وهو ينظر لها ببسمة / عايز سلامتك دايما يا براءة هعوز ايه يعني 

ضحكت براءة بشده وهى تضرب كف بكف / اشطا ماشي طب لو سمحت يا سلامه نزلني على جنب 

ابتسم مؤنس ببرود على حديثها ثم قام بركن سيارته على جانب الطريق وتوقف ثم قال دون أن ينظر لها / هشوفك تآني؟؟؟؟ 

نظرت له براءة بنظرات جامدة لا تكشف شئ بداخلها / ادعى انه يكون لا لاني مش عايزه اشوف وشك يا مؤنس 

ثم هبطت من السيارة وقالت قبل أن تغلق الباب / آه صحيح شكرا على مساعدتك يا مؤنس مردودة ليك

ثم ضربت الباب بعنف وسارت بعيدا عنه وهى تحاول أن تطرد رؤيته مجددا من رأسها بينما هو نظر لذهابها بغموض وقال ببسمة / مش بمزاجك يا براءة هتشوفيني تآني وتالت ورابع وده مش بمزاجك أبدا استنيت كتير تظهري ومش هضيع الفرصه دي 

أنهى حديثه وهو يحمل هاتفه ويجري مكالمه / الو يا شامل...... ايوة انا سافرت الصبح عشان البضاعه اللي كانت في مينا دمياط..... آه خلاص استلمتها وهتتوزع على الفروع بتاعتنا....... منا قولت اجي بنفسي احسن وخصوصا اني بقالي فتره مجتش فرع دمياط عشان كده صحيت الصبح وجيت على طول المهم اسمعني كويس اوي يا شامل انا هغيب هنا فتره خلي بالك من ابوك وساره سامع لو حصل خدش او واحد منهم حصله حاجه يا شامل انا هخليك تشوف الويل انت سامع وخلي فادي يتابع معاك في الشركات بدل ما هو مقضيها سهرات وقرف 

انا هقفل دلوقتي بس هقولها تآني ابوك وسارة برقبتك يا شامل 

Rahma Napil 美心

خرجت أشرقت من المدرسة التى تعمل بها وهى تسير مع صديقتها وتتحدث إليها فجأه وجدت رأفت ينتظرها امام المدرسه وهو يبتسم لها بسمة قذرة ويشير لها أن تقترب نظرت أشرقت جانبها بخوف ثم قالت لصديقتها / معلش انتي يا نهى روحي وانا عندي مشوار هخلصه واروح 

ابتسمت لها نهى وقالت بود / تمام يا حبيبتي عايزه حاجه 

هزت أشرقت رأسها برفض وهى ترسم بسمة متجمده وبعدما ذهبت نهى اتجهت سريعا لرأفت وهى تنظر حولها بقلق وبمجرد وصولها قالت بصوت غاضب وحاد / عايز ايه وايه اللي جابك هنا انت اتجننت 

تحدث رأفت ببسمة لزجه / عايزك يا شوشو 

صدمت من وقاحته وقالت له وهى تحاول تمالك اعصابها بصعوبه / مش قولتلك هقابلك بعد تالت ايام ايه مبتفهمش 

تحدث رأفت وهو يقترب منها ويقول بخبث / شكلك مفهمتيش كلامي بقول عايزك مش عايز اقابلك يعني هتجوزك يا أشرقت ودلوقتي هتيجي معايا الماذون والا صورك الحلوة هتكون على تليفون كل شاب في الحارة 

Rahma Napil 美心

كان الجميع ينظر لبراءة بشك بينما هى تنظر لهم بحنق 

امسك سليم المسدس وقال بسخريه / قولتيلي بقى مسدس لعبة 

براءة وهى تبتسم بغباء /اهو هنا بقى تكمن المعجزات الإلهية انا اساسا اشتريته العيد اللي فات من الراجل على اساس انه لعبة وعطاني معاه كيس بِلى كمان وشوف سبحان الله اتفاجات انه بيضرب رصاص بجد 

سليم وهو ينظر للمسدس ببسمة مصطنعة / والراجل اللي باعه ليكي ده كان بيبع في وزارة الخارجية ولا إيه 

براءة وهى تهز رأسها برفض / لا في سيتي ستار وكان عليه خصم ١٪ 

تحدث شادي بغضب / انتي بتهزري يا براءة انتي مش مستوعبة اللي حصل ولا إيه فيه عصابه طلعت علينا وضربت نار وكان واضح انها مستقصداكي وانتي بتهزري 

زفرت براءة بضيق / يووه منا قولتلكم انهم تبع راجل كان مشيه شمال وبيدخل شحنات مخدرات للبلد ايام مكنت بشتغل في مكتب جمارك في بور سعيد ووقتها بلغت عنهم وبوظت ليهم صفقة كبيرة وحبست الكبير بتاعهم وهما دلوقتي لسه فاكرين يجوا ينتقموا مني 

ادهم بتفكير / بس إزاي عرفوا انك هنا 

ضحكت براءة بسخريه / يابني دول عصابه كبيرة ومسيطرين على مواني كتير اوي وليهم مقر في كل محافظه مفيش نملة بتدخلها غير لما يعرفوا عنها وأكيد عرفوا اني رجعت تاني بس عموما متخافوش مش هيعملوا حاجه احنا هنمشي من هنا وهكلم اللوا اللي كان ماسك القضيه وهو هيأمني زي الاول 

ثم حاولت تغيير الموضوع / المهم قررت ايه هتروح لأهل البنت دي دول شكلهم لبش وعالم معفنه 

علم شادي انها تحاول تغيير الموضوع ولكنه لن يصمت فقط يعودوا لبيتهم وسيخبر شاكر لعله يجد حلا لهم 

ذمت ام فتحي شفتيها بسخرية /ذوق آوي براءة 

ضحك ادهم ثم قال / قصدك ام فتحي 

براءة بتعجب وتأثر / يا ضنايا يابنتي هى مخلفه كمان 

ادهم وهو يهز رأسه باسف / اممم ارملة وكانت بتجري على يتامى بس تقريبا وهى بتجري اتكفت على وشها 

ام فتحي وهى ترفع يدها بالدعاء / يا أخي اتكفيت على وشك في تركة معنفه تكون مفتوحه على صرف صحي ريحته متروحش ولو نقعت نفسك في ياسمين لشهر 

نظر لها ادهم بشر ثم قال لها بخفوت / ماشي يا ام فتحي لسه لينا كلام 

صمتت ام فتحي بسرعه وهى تنظر جانبا بينما هو ابتسم ثم نظر لهم وقال بجديه / اول حاجه هنعملها هى اننا ندور على كل شئ يخص العيله دي عشان نعرف نتصرف كويس مش عايزين تخاطر ونرجع نندم 

ثم اخرج الكارت الذي أخذه من الشاب ووضعه على الطاولة امام كريم وقال بجدية / ودي شغلتك يا كريم عايزك تدور ورا العيله دي سواء ليهم اى شركات او حسابات او غيره وكمان تخلي شاكر يدور عنهم بطريقته 

هز كريم رأسه بهدوء شديد ومخيف وحمل الكارت ونظر فيه بشرود 

بينما تحدث سليم وهو ينظر لادهم / طب ودلوقتي هنعمل ايه 

نظر ادهم لام فتحي بجانبه وقال وهو يتنهد بتعب وخيبة امل / هترجع للقاهرة تآني ولما يجي الوقت هنروح لاسكندرية عشان نشوف اللي هيحصل 

Rahma Napil 美心

كان يسير بسيارته وهو يفكر فيها وهو يبتسم بشرود ونظرات غامضه حتى وجد سيارة تقف في منتصف طريقه وقد بدأ الظلام ينتشر وأمام تلك السياره كان يقف بجاكته الأسود وهو ينظر بعيون تظهر جيدا ومظهرها مرعب وهناك بسمة شيطانية ترتسم على شفتيه توقف مؤنس بسيارته وهبط منها وأغلق الباب ثم سار ووقف امامها وانعكس جسده في الأرض بسبب ضوء المصابيح 

قال مؤنس ببسمة ساخرة/ اووووووه شوفوا مين اللي منور دمياط اكلت مشبك ولا لسه ياباشا؟؟ 

لم يجب ذلك الرجل ولكن استمر في نظراته التي بمقدورها أن تبث الرعب في قلب من يراه 

تحدث مؤنس وهو يستند على السيارة خلفه ثم ابتسم وهو يقول / بمجرد ما نقرب من سمو الملكة على طول نلاقي الوحش ظهر عشان يحميها بعيد عن اى حد 

ابتسم ذلك الرجل ومال برأسه وهو ينظر له ببسمه باردة برود مخيف فضحك مؤنس بشدة وهو يقول / يعني حقيقي نشكر براءة انها عطتني فرصه اقابلك بنفسي 

ثم قال بهمس مرعب مبطن بالكره /المقدم زين الدين الهلالي ايامك بقت معدودة 

خلص فصلنا لحد هنا اتمنى يعجبكم يارب ولسه اللي جاى آكتر واكتر وما خفى كان أعظم والاسرار بدأت تظهر وتنكشف 

دمتم سالمين  ❤️

تكملة الرواية من هنا

بداية الروايه من هنا

روايات شيقه وجديده من هنا

🌺🌹🌺🌹🌺🌹🌺🌹🌺🌺🌹🌺🌹🌺🌹🌺🌹🌺

الصفحه الرئيسيه للمدونه من هنا

🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹

اللي عاوز باقي الروايه يعمل متابعه لصفحتي من هنا 👇👇

ملك الروايات

لعيونكم متابعيني ادخلوا بسرعه

👇👇👇👇👇

جميع الروايات الكامله من هنا

تعديل المقال