رواية العاشق البارت الاول والتاني والتالت

 رواية العاشق  البارت الاول والتاني والتالت 

    🔥  الجزء الأول🔥

نصيحة.  (( اللي قلبه ضعيف يقراء بالنهار فقط)) 

👇👇👇👇

 متغيره ونفسيتي مش متظبطه..يمكن عشان كملت ٢٨سنه ومتجوزتش ولا حتي اتخطبت،بس ده نصيب بتاع ربنا وانا الحمد لله مش ناقصه حاجه عشان متجوزش..أنا شكلي كده بصبر نفسي ب اي كلام.بس الحقيقه اني زعلانه اوي علي نفسي ومش مبينه ده لحد

كنت بكلم نفسي ومش واخده بالي من امي الي بتنده عليا بقالها ساعه..

-مريم..انتي يابت يامريم

-ايه ياماما معلش مخدتش بالي والله 

-مخدتيش بالك ايه.انا بقالي ساعه بناديلك

-خلاص والله كنت سرحانه شويه..قليلي بس عاوزه ايه انا معاكي

-قومي ساعدي اختك في باقي الاكل عشان تلحق تلبس قبل ماخطيبها يجي.

-يادي خطيبها الي ناطط عندنا كل يومين تلاته وتاعبنا معاه

-بتقولي ايه يابت انتي؟!

-لا مش بقول حاجه ياماما..بكلم نفسي

-طب قومي ياختي كلمي نفسك جوا في المطبخ

قمت دخلت المطبخ عشان اساعد هبه اختي في عمل الاكل للبيه الي هيشرفنا كمان شويه وهبه كالعاده دخلت تتذوق وتلبس..

دخلت المطبخ وواقفه حسيت بخطوات خفيفه ورايا كنت فكراها هبه ورجعت تبص علي حاجه..بت ياهبه ناوليني المعلقه الخشب من عندك..ببص ورايا ملقتش حد

(اعوذ بالله من الشيطان الرچيم)

هي راحت فين دي 

-ماما..ياماما هبه عندك؟!

-لا لسه بتلبس في اوضتها..عاوزه ايه!!

بتلبس في أوضتها..بتلبس في اوضتها ازاي

اومال مين الي كان واقف ورايا..الموضوع كان غريب بالنسبه ليا بس مديتوش اهتمام

بعدها بساعتين خطيب اختي جه وقعد.معانا شويه واتغدينا كلنا ونزل،ومام نزلت عند خالتي وبابا نزل عالقهوه وفضلت في البيت انا وهبه بس 

-مريم..تشربي شاي معايا ؟!

-لا اعمليلي قهوه حاسا اني مصدعه اووي معكيش اي اسبرين للصداع 

-اه متهيألي معايا..هعمل الشاي والقهوه واجيبلك

-لالا خليكي انتي قليلي بس حطاه فين

-هتلاقيه في الشنطه بتاعتي جمب التسريحه

دخلت الأوضه ووقفت قودام التسريحه وسرحت في المرايا حسيت عيني بتبرق وببص لنفسي بإعجاب وبدأت احسس علي شعري ورقبتي وفجاءه..

لقيت نفسي ببتسم ابتسامه غريبه..مش ابتسامتي وملامحي شبه اتغيرت..بعدت مره واحده عن المرايا وندهت هبه

-هبه ياهبه تعالي بسرعه

-ايه يابنتي في ايه؟!

-انا شفت خيال في المرايا كان بيضحكلي 

-خيال ايه..حاجه سوده يعني وكده انا مش فاهماكي

-لا ده انا..خيالي انا وكان بيبتسم ابتسامه مرعبه اووي وعيني برقت وبعدين شعري كان طاير كده..

-اهدي بس اهدي مافيش حاجه والله اهدي 

هبه خدتني في حضنها لحد ماهديت وكمان ماما جت وحكيتلها عن الي حصل..لكن محدش فاهم انا اقصد ايه.

قعدت انا وهبه في اوضتنا وحكيتلها عن حاجات كتير مدايقاني 

-هبه بقولك ايه؟!

-ايه ياحبيبتي قولي

-حلو احساس الحب ده مش كده!!

إن حد يحبك ويخاف عليكي ويبقي عاوزك وشاريكي 

-اه طبعا احساس حلو اووي خاصة لو انتي كمان حبتيه

-طب هو انا ليه محبش واتحب واحس الاحساس ده!!..هو أنا وحشه أو فيا حاجه مش كويسه

-ليه بتقولي كده بس ياحبيبتي..والله انتي زي القمر هو بس نصيب واكيد ربنا شايلك حاجه حلوه أن شاءالله 

-امتي بس امتي؟!..انا عندي ٢٨سنه ولا اتخطبت ولا ارتبطت ولا اي حاجه هو انا معنديش مشاعر ونفسي احب واتحب وانسان يهتم بيا 

-صدقيني بكره افكرك لما ربنا يكرمك أن شاء الله وتلاقي ابن الحلال..ارتاحي كده وبطلي تفكير ويلا ننام بقي اليوم كان متعب اووي

مجرد ماحطيت راسي علي المخده روحت في النوم..حلمت الحلم الي بحلمه كل ليله

بشوف شخص جميل وملامحه حلوه اووي بنتجوز وبيقرب مني ويحسس علي شعري وياخدني في حضنه..الغريب بقي أن كل ده بيحصل في اوضتي دي وللاسف مش عارفه أفسر الحلم وبتكسف احكيه لحد..صحيت من النوم مفزوعه علي صويت وعياط هبه اختي وهي بتنده علي ماما 

-ماما يامامااا الحقيني ياماما 

-مين الي بيصوت؟!..في ايه ياهبه

-عطشت بليل وقمت اشرب ببص عالازازه لقيتها فاضيه..قمت اجيب مايا من المطبخ ولما رجعت وبفتح الباب لقيت حد نايم جمب مريم وببص عليه اختفي

-حد نايم جمبي انا؟!..انتي بتهزري حد مين وراح فين ويعني ايه اختفي

-والله العظيم زي مابقولكم كده..أنا هكدب ليه يعني 

علي اد مالموضوع مرعب علي اد ماهو بردو غريب..مين الشخص ده وراح فين ونايم جمبي ليه..اسئله كتير ملهاش تفسير وده الي خلاني مهتمش بالموضوع اووي وكلنا خدنا كلام هبه علي أنه تهياؤات 

دخلنا كملنا نومنا وتاني يوم صحينا بدري وباب نزل يصلي وماما شغلت قرآن وولعت بخور..حسيت أني مخنوقه ومش قادره اتنفس ودي اول مره تحصلي

-ماما اطفي البخور ده مش قادره اتنفس ووطي صوت القرآن ده شويه.

-يابنتي النهارده الجمعه والبخور حلو في البيت..

فجاءه صوت غريب وعالي خرج مني بيزعق في ماما..

بقوووولك اطفي القرآن ده..

ماما بصتلي باستغراب واتخضت اووي من الصوت وفعلا فصلت القرآن..وانا كمان استغربت ده مش انا..مش صوتي انا اصلا ازاي اكلم ماما كده وازاي الصوت ده خرج مني

جريت علي اوضتي بعيط وقاعده علي سريري حسيت بايد بتطبطب عليا وبتحسس علي شعري..انا كنت فاكرها ماما!!

رفعت راسي ببص ملقتش حد..ايه ده هو في ايه؟!..ايه الي بيحصلي ده 

ماما ياماما..جريت بره الاوضه علي ماما واترميت في حضنها وبعيط عياط هستيري..

-الحقيني ياماما في حاجه مش مظبوطه انا خايفه اووي والنبي خليكي معايا متسبنيش

-اهدي ياحبيبتي متخافيش انا معاكي اهو اهدي وصلي عالنبي 

ماما خدتني علي اوضتي ونامت جمبي ولما اتاكدت اني نمت سابتني في الاوضه لوحدي

حلمت بحلم مختلف المره دي..لا ده مش حلم ده حقيقه،انا صاحيه مش نايمه 

أنا مش فاهمه حاجه..شفت نفسي قاعده عالسرير والشقه كلها ضالمه ومافيش اي صوت ولمحت خيال طووويل اوي واقف جمب الدولاب..زي مايكون مستخبي..حاسا اني بردانه اووي جسمي متلج،فضلت بصااله وخايفه بترعش

 بس فجاءه وبصوت خفيف قالي... متخاااافيش انا جمبك

الجزء الثاني

--------------

رواية ((عاشق ))

                    بس فجاءه وبصوت خفيف قالي.      

                         متخاااافيش انا جمبك..

مسكني من دراعي وقالي محدش هيقدر ياذيكي طول منا جمبك..متخافيش من حاجه طول منا جمبك.

جسمي اتنفض وحسيت اني بردانه اووي ولساني تقيل مش قادره اتكلم..ومش عارفه افهم اللي بيحصل ده حلم ولا حقيقه

فجاءه سمعت صوت باب اوضتي بيخبط وبابا بينده علياا..

مريم اصحي يلا يابنتي امك حضرت الفطار..

انا مش فاهمه حاجه هو ده حلم ولا حقيقه ولا في ايه بالظبط.

وفجاءه لقيت نفسي قايمه من عالسرير وببص حواليا.

كل حاجه طبيعيه..

ساعتها عرفت أنه كان حلم..لا مش حلم ده كابوووس

فتحت باب اوضتي عيني جت علي دراعي،علامة ايد شخص معلمه علي دراعي وواضحه اوووي،،صوت وجريت علي ماما وانا بصوت ومرعوبه واغمي علياا

ولما فقت بس مش اوي لاني حاسا بدوخه سمعت بابا وماما بيتكلمو سوا..

-احنا لازم نشوف حل في الموضوع ده يا ابو مريم..نكلم شيخ أو نشوف الست الي بيقولو عليها في السيده دي 

-اكلم شيخ اقوله ايه؟!

بنتي أغمي عليها ونفسيتها تعبانه حبتين احنا نشوف دكتور نفساني افضل هي اكيد متدايقه من موضوع قلة العرسان ده ومأثر علي نفسيتها

-انا بنتي مش مجنونه ياحاج..

البنت صحيح فيها حاجه..بس مش مجنونه عشان اوديها لدكاتره نفسيين 

-افهمي..افهمي يا ام مريم..بنتك نفسيتها تعبانه مش اكتر ،شيلي اي افكار تانيه من مخك

بعد ماسمعت كلامهم وكنت ساكته..كان لازم أتدخل وافهم بابا أن الموضوع مش نفسيه خالص

-لا يابابا كلام ماما صح..انا مش مجنونه ومش تعبانه نفسيآ

انا فعلا حاسا بحاجه مش طبيعيه وحاسا اني دايما في حد معايا وجمبي غير الاحلام الي بحلمها وغير الحاجات الي بشوفها

حكيتلهم عن الي حصل كله ووريتهم دراعي بابا وماما بصو لبعض وكانو مستغربين جداا من الي سمعوه وشافوه.

-احنا دلوقتي نفطر وعلي العصر هنزل المسجد اصلي واحكي الموضوع للشيخ اسامة واشوف ايه رايه

فطرنا كلنا وبابا نزل يصلي العصر وماما دخلت المطبخ وقعدنا انا وهبه نتكلم في الموضوع

-مريم انا مش فاهمه حاجه؟! 

يعني اليوم الي شفت خيال نايم جمبك وصوت وندهت علي ماما مكنش بيتهيألي

-مش عارفه ياهبه..كل الي اعرفه انا حكيته وفعلا مش قادره اتكلم ومش عاوزه افكر في الحاجات دي تاني

-انا والله ماقصدش ياحبيبتي..بس الموضوع غريب وانا قلقانه عليكي مش اكتر 

خدت هبه في حضني واحنا علي الكنبه..

بس في حاجه غريبه حصلت

شخص ملامحه حلوه اووي ماشي في الصاله ابتسملي ودخل اوضتي..خطوات رجله واسعه وطويل اوي زياده عن اللزوم وأيده طويله واصله لحد رجله..شعره طويل وناعم نازل لحد نص ضهره.عيونه واسعه اوووي بطريقه غريبه..

اتنفض من حضن هبه وصوت ودخلت في حالة فزع وقعدت انده علي ماما وبابا واعيط عياط هستيري

-ايه ده في ايه؟!

اهدي يامريم اهدي ياحبيبتي..ماما يامامااا الحقيني مريم بتصووت وبتعيط 

-ايه ده مالها مريم في ايه؟!

-معرفش والله معرف كنا بنتكلم وبعدين حضنتني وحصل كده ومش فاهمه حاجه

-اهدي يا مريم انا ماما ياحبيبتي قوليلي ايه الي حصل..شيليها معايا ياهبه ندخلها اوضتهاا

-لااااا محدش يدخلني الاوضه دي..مشوني من هنا انا عايزه امشي من الشقه دي 

طلعت جري علي باب الشقه وفتحت الباب وطلعت اجري عالسلم وانا بصوت وبعيط بطريقه هستيريه..وانا نازله عالسلم لقيت بابا طالع عالسلم ومعاه الشيخ اسامة..وطيت علي رجل الشيخ اسامة

-ارجوك الحقني والنبي..انا خايفه وتعبانه اووي بالله عليك ارحمني من الي انا فيه ده

-استغفر الله العظيم ..قومي يابنتي ومتقلقيش كل حاجه هتتحل باذن الله وقولي يارب 

-مش عاوزه اخش الشقه دي والنبي يابابا ومش عاوزه اخش اوضتي والنبي محدش يدخلني ابوس ايديكم

كنت في حاله هستيريه من العياط والخوف والرعب ومش فاهمه حاجه كل الي فهمته وعايزاه اني مخشش الشقه دي تاني خالص وخاصة اوضتي..بابا والشيخ اسامة استنو لحد ماهديت ودخلوني الشقه وماما وهبه واقفين يعيطو عالسلم..دخلت الشقه وقاعده جمب ماما في حضنها ومش عاوزه افتح عيني من الخوف..لحد مالشيخ اسامة كلمني

-قليلي يامريم..احكيلي عن الي بيحصل وعن الي حصل

-معرفش ومش فاهمه حاجه.. أنا حاسه أن في حاجه معايا دايما في كل مكان وبحلم احلام كتيره اووي مينفعش احكيها..ولما بخش استحمي بحس أن في حد شايفني في حد معايا دايما،حتي في اوضتي بحس دايما اني في حد عالسرير جمبي ، والفتره الاخيره شفت حلم أو حقيقه معرفش وحد قالي متخافيش ومسكني من دراعي ومن شويه شفت حد ماشي في الشقه ودخل الاوضه بتاعتي

وصفتلهم شكله وحكيتلهم عن كل التفاصيل الي حصلتلي وشفتها وحسيت بيها..ماما وبابا وهبه والشيخ اسامة قاعدين وفي شخص قاعد جنب الشيخ اسامة  باصصلي ومبستم من ساعة ماشفته..فضلت اتكلم واحكي وكل ما ابصله الاقيه باصللي وبيضحك..الموضوع ضايقني اووي هو ليه الشخص ده بيبصلي كده 

-معلش ياشيخ أنا اسفه بس الشخص الي حضرتك جايبه معاك ده مدايقني وباصصلي ومبتسم ابتسامه مدايقاني ارجوك الموضوع مش مضحك خالص 

-شخص مين يابنتي؟!

-الاستاذ الي حضرتك جايبه معاك 

-انا مش جايب حد معايا يابنتي 

-مش جايب حد ازاي اومال الي قاعد جمبك ده وبيبصلي بابتسامه ده مين 

وفجاءه الشخص ده وقف..طوويل اووي وابتسامته علي وشه علي طول وعينه واسعه ونظراته غريبه..وبصوت تخين وغريب قالي...قولي للراجل ده يمشي بدل ما أذيه

ياتري مين الشخص اللي شفته ده ؟؟

وهل الشيخ هيعرف يعالج الموضوع؟؟

(   الجزء الأخير )

🙋‍♀🙋‍♀🙋‍♀🙋‍♀

رواية  💓  عاشق مجهول. 💓

نختم الرواية بالصلاة على النبي صلى الله عليه وسلم 

                            👇👇👇👇

             (قولي للراجل ده يمشي بدل ما أذيه)

سمعت الجمله دي منه وحسيت اني في عالم تاني خالص،حواليا نار من كل حته..حاسا بسخونتها في جسمي..طايره في الهوا جوا مكان واسع عيني مش جايبه اخره،شايفه كذا خيال بيتحرك حواليا ،عاوزه اعيط بس دموعي مش راضيه تنزل.صوتي مكتوم ومش عارفه اصرخ 

هو في ايه؟!

بابا وماما واختي وكل الناس دي فين انا في مكان غريب زي مايكون ميته.. لا انا فعلا ميته

مش عارفه افكر مافيش عقل ومافيش حركه زي مايكون متكتفه ومربوطه بحبل 

لحد ماسمعته بيكلمني..

صوت تخين اووي ومنغمش ومش واضح وتقيل..وبين كله كلمه وكلمه في لحظة سكوت

-انتي  فاکره أن  في  حد هيقدر ياخدك  مني؟!

-انت مين ارجوك سيبني في حالي

-متخافيش  طول  مانا  جمبك  هتملكي الدنيا  ومافيها، هيجيلك  اي  حاجه تحلمي بيها ومن غير حتي ماتحلمي..هيجيلك اي حاجه عينيكي بس تيجي عليها

-انا مش عاوزه حاجه منك انا كل الي عاوزه تسيبني في حالي وبس ارجوك ابعد عني 

-اسكتي ماتقوليش كده لو قلتي كده تاني هموتلك اهلك هموت اي حد ياخدك مني

-ابعد عني بقااااا

وفجاءه قالي بصوت تخين وعالي اوووي

                                (yapamam)            

                     *كلمة تركيه معناها لا أستطيع*

من قوه صوته خفت وقعدت اعيط واصوت غمضت عيني ولما فتحتها لقيت ماما حضناني،وكلهم واقفين حواليا وانا نايمه عالسرير،مش حاسا بجسمي ومش قادره اقوم اصلا من عالسرير..بصيت لماما وانا منهاره 

-ماما في ايه؟! 

ايه الي بيحصلي ده..انا مش فاهمه حاجه

-ياررب بنتي يارب وحياة حبيبك النبي بنتي يارب 

بصيت لبابا لقيته هو كمان بيعيط..كلهم منهارين الا واحد بس هو الي متماسك..الشيخ اسامة

-ابوس ايدك ياشيخ اسامة أنا مش عارفه ايه الي بيحصلي..ابوس ايدك فهمني 

-صلي عالنبي يابنتي واهدي،واحكيلي ايه الي شفتيه؟!

وبعد ماحكيت جزء من اللي شفته لاني مش قادره افتكر واميز الباقي..لقيت الشيخ اسامة خد بابا علي جمب،وفضلو يتكلمو شويه،ولا انا ولا ماما واختي فاهمين اي حاجه 

لحد مابابا جالي وقالي،

-بصي يامريم يابنتي..الموضوع مش سهل بس انتي تقدري تعديه باذن الله 

-موضوع ايه ؟!

أنا مش فاهمه..حد.يفهمني هو لغز يعني ولا ايه ارجوكم فهموني في ايييه 

-بصي يامريم يابنتي انا هشرحلك كل حاجه بس عاوزك تكوني فاهمه أن كل الي بحكيه ده انتي تقدري تتغلبي عليه وتعدي.من المحنه دي بايمانك وصبرك

-يوووووه كفايه الغاز بقي فهموني في ايه !!

ولسه الشيخ اسامة هيتكلم ويشرحلي..

فجاءه الاوضه ضلمت وكلهم اختفو من حواليا مره واحده. وباب الاوضه بتاعتي بيتفتح ببطئ وانا عماله اصوت واصرخ واعيط وانده عليهم ومافيش فايده..لقيت خيال طويل ملوش رجلين ولا ايدين وطاير في الهوا عنده عيون واسعه اوووي وشعر كتييير نازل علي جسمه وبيتحرك بسرعه اووي في الاوضه..ده هو ايوه هو،انا شفت الخيال ده قبل كده..ياتري عاوز مني ليبيه حاولت انده عليه واقوله عاوووز ايه بس مش قادره صوتي مش طالع لساني متلجم جسمي متلج متكتفه ومخنوءه..

سمعت صوت تخين كالعاده بيقولي،

عاوووزه تفهمي..انا هفهمك

انتي بتاعتي ملكي خاتم في صوباعي انتي حبيبتي عشيقتي انتي الي انا اختارتها ومحدش هيقدر يبعدني عنك.. انا العاشق الي ساكن جواكي،انا الدم الي بيجري جواكي،انا الروح الي ساكنه جوااااكي

                          انا الملك تيمارووون

بحكم الف جان مسخرين لخدمتي وخدمتك

تؤمري كل شي تحت امرك..تشاوري تلاقي كل حاجه تحت رجليكي

ايه الي بيحصلي ده..انا مش فاهمه يعني ايه بيعشقني ويعني ايه عاوزني ليه وملكو وبتاعته..يااارب أنا عبدك الضعيف انقذني منه ياارب

فجاءه لقيت نفسي علي سريري ووسط عيلتي والشيخ اسامة ماسك المصحف وبيقرأ منه..

-الحقوووني..الحقني ياشيخ اسامة ابوس ايدك الحقني 

الشيخ اسامة مش بيرد عليا وبيقرأ قرآن وبابا واقف جمبه ومعاه واحد صاحبه ومكتفني علي السرير..ندهت بعلو صوتي علي ماما لكن محدش راضي يسمعني سمعت ابويا بيكلم الشيخ سعيد وبيقوله.

- البنت بتنده علينا ياشيخ اسامة

-دي مش بنتك يا ابو مريم..ده الملعون الي جواها هو الي بيحركها وبيتكلم بلسانهاا

لا ياباباا ارجوك ده انا صدقني اناا..

ماما فتحت باب الأوضه وجريت علي السرير وحضنتي والشيخ اسامة وقف قراءة القرآن

-الحقيني ياماما والله انا بنتك مريم صدقيني

-مصدقاكي ياحبيبتي مصدقاكي ربنا يبعد عنك اي اذي ياقلب امك يارب.

بصيت للشيخ اسامة وحكيتله علي كل الي حصل وفهمت منه أن في ملك من ملوك الجن العاااشق عايش معايا وبيعشقني من وانا عندي ١٧سنه يعني بقاله ١١سنه عايش معايا ومش بس كده..للاسف عمل معايا كذا مره علاقه وطبعا من غير ما احس..انا مش مصدقه ومش مستوعبه الي بيحصل،بعد ما الشيخ اسامة خلص كلامه حسيت اني في دنيا تانيه بس بدأت افهم واستوعب أن اكيد هيكلمني واني مش في وعي وكل ده جوا عقلي الباطن.

.فعلا الأوضه كلها ولعت نار والسرير اتحرك لنص الاوضه ولقيته ظاهرلي ولاول مره وطالع من وسط النار لاول مره بتفاصيله الحقيقه..كائن من النار بعيون سودا وواسعه اوووي مسحوبه لآخر وشه..طالعه قرنين ملفوفين علي بعض،ده غير شوية تفاصيل مش عارفه اوصفها..بيقولي بصوته المزعج اني بتاعته ومحدش هيقدر ياخدني منه..

في الوقت ده سامعه صوت الشيخ اسامة حواليا بس مش عارفه جاي منين.والاوضه بدأت تضيق عليا والسرير بيترفع بيا وانا مش عارفه اصرخ ولا اتكلم وعالكعاده حاسا اني مربوطه ومتكتفه.ركزت شويه في صوت الشيخ اسامة لقيته بيقرأ قرآن..ويسكت شويه ويقولي حاولي يامريم حاولي..صرخت وبقوله مش قاااادره..لقيت صوتي طلع،

ايه ده انا صوتي ظهر اهوو..اخيرا صوتي طلع..كلمت الشيخ وعليت صوتي لاني حاسا أنه سامعني

تمت