القائمة الرئيسية

الصفحات

الأخبار[LastPost]

سكريبت انهارده قررت اغير شكلى كله و استايل لبسي عشان جوزى المحترم عمال يعيب عليا فى الطلعه و النزله

 سكريبت 




❤️💙❤️💙❤️💙❤️💙❤️💙❤️💙

الصفحه الرئيسيه للروايات الكامله اضغطوا هنا  

❤️💙❤️💙❤️💙❤️💙❤️

انهارده قررت اغير شكلى كله و استايل لبسي عشان جوزى المحترم عمال يعيب عليا فى الطلعه و النزله 😏😏


اخدت مبلغ محترم  كان عامل بيه جمعيه عشان يطلعنا مصيف و قلت لنفسي  انا اهم من المصيف 😃

و طلعت على نص البلد و قلت ادلع نفسي ما هو أن مكنتش انا هتدلعنى مين هيدلعنى 🤔


المهم نزلت اشتريت لى شويه بلوزات و بناطيل و جيبات و شويه طرح مدندشه كدا و كام شوز على كام شنطه و شويه ملابس بيتى 😍😍


طلعت جبت شويه مكياجات و الوان مطرقعه عمرى ما كنت افكر احطها و اشتريت لى باروكتين واحده بنى وواحده كستنائى ناعمه كدا زى شعر الصينين 💁


بعد كدا طلعت على البيوتى سنتر اللى كل شويه اشوف إعلانه ع النت و قلت اصرفى يا بت و كلفى محدش واخد منها حاجه 🙄


دخلت لقيت نظام اللهم صلى على النبى زى اللى بشوفه فى الافلام و اكتشفت أن فى الدور التانى عندهم سونا و سبا 😳😳


ايه السبا دا يا اولاد ؟؟ 🤔


المهم قلت للى واقفه تحجز انا عاوزه احجز اى حاجه ممكن تتحجز هنا ...شوفى ميهمكيش الفلوس ...انا عاوزه معرفنيش و انا طالعه من عندكم 😃😃


الست قعدت تشرح لى عروض كدا عندهم مكنتش فاهمه منها حاجه و اخر ما زهقت من كلامها و هى عماله دو دو دو دو .....😏

قلت لها اختاريلى انتى احلى عرض فيهم 😍😍

قالت ارشح لحضرتك العرض دا لأن ....

قلت لها متبررليش انا واثقه فيكى 

المهم قالت لى هتطلعى الدور التانى عشان السونه و التقشير 👍


طلعت لقيت بنات زى القمر بيلمعوا دخلونى اوضه سخنه كدا كنت حاسه انهم ولعوا عليا و سابونى اتحمص بس كنت بصبر نفسي و اقول اصبرى يا بت عشان تلمعى زى البنات الحلوه دى ❤️😍


بعد كدا البنات دى خدتنى و ال ايه عملت لى مساج بزيوت عمرى ما شفت زيها كنت حاسه انى فى الجنه و نعيمها 🙆


بعد ما خلصوا و كنت حاسه انى مرتاحه لدرجه انى نمت فى ايدهم رحت بقا على الدور الاول عشان يوضبونى بقا 😉😉


الست قالت لى عاوزه تعملى ايه بالظبط ؟ 🤔


قلت لها معرفش انا عاوزه ابقى ست حلوه و خلاص زى اللى بشوفهم فى التلفزيون 💁


قالت لى سبيلى نفسك 👍


قلت سايباها 😉😉


الست عملت لى ميكروبليدنج فى حواجبى و بقت حواجبى اللهم صلى على النبى مرسومه و تخن كدا بعد ما كانت عامله زى الخط المسموح نصه 😉

و بعد كدا عملت لى توريد و نفخ شفايف و بقيت فشر انجيلينا جولى 💋

بعدها ال ركبت لى رموش دايمه و بقى عليا رمش ميتحرمش 😜


و بعدها صبغت لى شعرى خصلات بنى فى اصفر 

و جابت لى عدستين لونهم رصاصى لبستهم لى 👁️👁️


و بعد كدا مكيجتنى زى العروسه 

كل دا و انا مش راضيه ابص فى المرايه عشان اتفاجئ بقا 😳😳


بعد ما خلصت قالت لى بصى و اتفرجى و بعيونك بحلقى 😳


ببص فى المرايا معرفتنيش قلت لها مين دى ؟؟ 


و لولا انى شفت بقى بيتحرك فى المرايه مع صوتى كنت قلت دى واحده تانيه 

بقيت مش عارفه اعمل ايه عاوزه ازغرط و خايفه الست تقول عليا هبله 

بقيت مذبهله اذبهلال ملوش مثيل 

المهم خلصت و رحت احاسب


 لقيت الموظفه اللى واقفه بتبتسم و تقولى ارجو انك تكونى انبسطت يا فندم 


قلت لها انبسطت اوى و أن شاء الله هكررها تانى و اجيلكم كتير 


قالت من دواعى سرورنا يا فندم 


قلت لها طب قوليلى حسابكم كام 


قالت خلى يا فندم 


قلت الله يخليكى ...كام من فضلك


قالت عشرين ألف وتسعميه سبعه و تسعين و نص بس.


بس ؟؟؟ 


عارفين اللى غاظنى ايه ؟؟ مش العشرين ألف و لا التسعميه و لا حتى السبعه و تسعين ....اللى غاظنى النص دا بتاع ايه ؟؟ 


طبعا مش عاوزه اقولكم انى جالى جلطه و وقعت وودونى المستشفى و بكتب لكم دلوقتى و الخراطيم متعلقه فى كل حته فى جتتى و لما جوزى جه و عرف الحكايه دفع المبلغ  لهم و جالى الاوضه و قالى بعد ما تقومى بالسلامه على بيت أهلك يا اعتدال


طب بذمتكم انا غلطت فى ايه ؟ 🤔

دا انا كنت عاوزه ادلعه 😏😏


صحيح راجل ملوش فى الطيب 😏

تمت


❤️💙❤️💙❤️💙❤️💙❤️💙❤️💙

الصفحه الرئيسيه للروايات الكامله اضغطوا هنا  

❤️💙❤️💙❤️💙❤️💙❤️

تعليقات

CLOSE ADS
CLOSE ADS
close