 |
الدلاله
البارت الاول والتاني
بقلم هنا عادل
كامله على مدونة النجم المتوهج للروايات
أقتباس
كان فيه سؤال شوفته امبارح هنا على الصفحة
بيسأل عن مين الاصعب
او مين الشر اكتر
سواء ام الزوج واخته
ولا ام الزوجة واختها
لقيت ناس كتير كاتبة اراء حيادية
ولقيت كمان اللى قالت ام جوزها كانت بمثابة امها التانية
زى ما لقيت اقلية بيقولوا انها عقربة
وبيدعوا عليها من قلبهم
انا مقدرتش اكتب زى اللى كتبوا ارائهم
ولا عرفت اهاجم ولا اكون حيادية
لأن اللى حصل معايا
خلاهم هما اللى محتاجين يقولوا رأيهم فى مرات الابن
وكمان يمكن محتاجة امي واختى هما كمان يقولوا رأيهم فى بنتهم
اصل الطرف الشرير فيهم كلهم
كان انا
سميرة
الدلالة
اللى قدرت اعمل فيهم كلهم اللى ميخطرش على بال حد
يمكن اللى شوفته منهم مش قليل
لكن انا عارفة ومتأكدة ان اللى عملته فيهم كان كتير
اصل انا افتريت اوى
ولو رجع بيا الزمن مرة تانية
هرجع افتري من تاني
ومش هعرف ارحمهم ولا حتى هقدر منتقمش منهم
كنت انا بالنسبالهم الشيطان اللى على هيئة انسان
هحكيلكم حكايتي
يمكن يمكن حد منكم رأيه يخلينى احس بالندم
لأن احساسى بأني مش ندمانة او اني فخورة باللى عملته فيهم
مخليني اشوف نفسي مش بني ادمة
هنعرفوا كل اللى حصل
يمكن تطمنونى اني ممكن اندم ولو حسيت انى ندمت يمكن ربنا يقبل توبتي
لأن ذنبي اكبر بكتير من انه يخلينى احس بالذنب
مش عايزاكم تفكروا انا ايه اللى ممكن اكون عملته بالظبط
لأني عملت كل اللى ييجى على بالكم
او حتى ميجيش
هستنى اشوف تفاعلكم بقى
بس هبدأء فيها الخميس ان شاء الله
وبالنسبة لأيام حياتى
بتتحدث يوميا وبينزل منها فصل كل يوم
والف الف شكر على كل كومنتاتكم
انا هرد عليها كلهاااااااااا
الدلالة
رفيقة الشيطان
الفصل الاول
هو انا لازم ابقى حلوة وزى القمر علشان احب واتحب
طيب لازم الوسيم
واللى معاه فلوس
واللى معاه شهادة ميتجوزش غير اللى زيه
طيب هو الراجل العادى ده الاسمراني ابو عيون سودة ولا عسلي
ولا عنده كرش مثلا
مينفعش يتجوز بنت جميلة ومفيهاش غلطة
بس هنقول ايه
احنا عايشين فى وسط مجتمع متخلف
ومينفعش حد يخرج عن نطاق التخلف ده
بالعكس ده احنا لازم نتمادى فى تخلفنا
علشان نقدر نواكب تفكير الفئة الغالبة
اسرتي
اختى مروة الكبيرة
امي ناجية
ابويا الله يرحمه عمر
انا سميرة
دلوقتى عندى 30 سنة
عادية يعنى طبيعية زيي زى اى بنت
انا عارفة انى حلوة
برغم انى سمرا شوية وعنيا مش ملونين
ويمكن تخينة حبتين
وشعرى مش سايح ونايح
وبيتكعبل ويغلبني لحد ما يتسرح
لكن لما بيتلف دوامة بيبقى عسل والله
لكن راضية جدا بنفسي من صغري
مخدتش شهادة عاليا
وهتعرفوا السبب
لكن كنت بفهم يعنى مش غبية
اختي مروة مخلصة كلية اداب قسم مكتبات
حلوة وزى القمر اكبر مني هى بخمس سنين
شبه ماما بالظبط وكأنهم اخوات تؤام
البشرة البيضا
العيون العسلي اللى بتلمع فى الشمس دى
الجسم المتقسم
الذوق واللباقة والشياكة من صغرها
بس الذوق مع الدنيا كلها الا معايا
ساكنين فى منطقة كويسة نوعا ما ولا هى شعبية لدرجة السوقية
ولا هى من المناطق الراقية زيادة عن اللزوم
لكن ظروفنا كويسة
بابا كمان معاشه كويس اوى
الله يرحمه كان مهندس
اه والله
متستغربوش اني مكملتش تعليمي برغم ان ابويا مهندس
لكن انا امي مكملتش تعليمها
كان معاها ثانوية عامة
اهل ماما كويسين ماديا جدا
لكن كلهم تقريبا مسافرين بيشتغلوا فى دول عربية
اللى بينا وبينهم اتصالات
ولما وصل بيتنا الانترنت
بقى اللى بينا وسائل التواصل
وعلطول بنتكلم مع بعض
برغم اننا ممكن نكون كل اللى اتجمعنا مع بعض فيهم مرات تتعد على الصوابع
اهل بابا كانوا رافضين جوازه من ماما تماما بسبب فرق التعليم
وبسبب ان جدى ابو ماما الله يرحمه كان مش موظف
وكان عنده محل بقالة هو اللى بيصرف منه على ماما واخواتها
وبرغم ان اخواتها كلهم اتعلموا
هى الوحيدة اللى قررت متكملش برغبتها
شقتنا فى عمارة محترمة
معروفين بسمعتنا الطيبة وسط الجيران
وعلاقاتنا بيهم كلهم كويسة
لحد ما مروة وصلت للكلية
كانت كل حاجة طبيعية جدا
علاقتنا فى البيت ماما وبابا
وانا واختى
بغض النظر عن انها كتير كانت بتحس بنفسها زيادة لأن جمالها كان مزود ثقتها بشكل مبالغ فيه
وكانت بترسم نفسها كتير عليا
لكن عادى اختى الكبيرة وانا كنت بفهمها وقتها ان هى بتعمل كده من باب انها توصلي انها اختى الكبيرة صاحبة الشخصية القوية
كنا نتخانق اوقات
واوقات تانية مشغلش بالي
واوقات بابا وماما يصالحونا
لكن ماما كانت دايما لها كلمة واحدة.سميرة دى اختك الكبيرة
اسمعي كلامها واللى تقوله هو الصح
سميرة.ياماما معملتش حاجة
هى اللى عمالة تتريق عليا
بتقولى يا ام كرش
ماما.يا سميرة اختك بتقولك كده علشان تشجعك علشان تخسي
جسمك مش حلو خالص يا سميرة
سميرة بزعل.ليه ياماما انا مش 200 كيلو يعني
وبعدين انا محدش بيتريق عليا غير اختى
اصحابى كلهم بيتعاملوا معايا عادى فى المدرسة
ومحدش بيضايقني بكلام زى ده
مروة.علشان انتى غبية وحمارة
انا عايزاكى تشوفي شكلك فى المرايا
هما مش هيشغلوا بالهم يبقى شكلك كويس او لاء
لكن انا اختك الكبيرة وعارفة مصلحتك
بابا.خلاص بقى يا بنات
معلش يا سميرة
اختك قصدها تنصحك
بس هى طريقتها فى النصيحة غلط
وانتى لازم تردى على اختك بطريقة احسن من كده
علشان الصوت العالي عيب
ماما.قولها يا سيدى انها لما توصل لسن العشرين هتبقى تخنت عن كده
ومش هتقدر تمشى على رجليها من وزنها
بابا.خلاص بقى هى خدت بالها وفهمت الكلام
سميرة.ماشى يا بابا
حقك عليا يامروة
بس بلاش تتريقى عليا بالطريقة دى علشان بزعل
بعد اذنكم بقى
دخلت اوضتى
وقفت قدام المرايا
بصيت لنفسي
مش شايفة انى مبالغ فيا
مليانة شوية اه
لكن خفيفة وبعرف اتحرك واعمل كل حاجة بسهولة
مش الوزن اللى مسببلي اى مشاكل
طيب ليه هى بتنصحنى بالطريقة اللى فيها اهانة دى
وبعدين ده انا جميلة والله وحلوة ودمي خفيف
ولا تزعلي نفسك يا سمسمة
دى تلاقيها بس متغاظة علشان انتى مدملكة عنها
ههههههه
فى اوضة ماما وبابا
بابا.بالراحة شوية يا ناجية على البنت
بلاش تعقدوها
ناجية.نعقدها ايه بس البت دى بكرة تقعد فى ارابيزنا
هتبقى شبه البيت الوقف
كل البنات من حواليها هتتجوز وتخلف وهى لا هتنفع فى جواز ولا هنشوفلها حتة عيل
بابا.ليه بس الكلام ده يا ناجية
مالها البنت
ماهى جميلة وشاطرة ومش ناقصها حاجة
ناجية.جميلة ايه بس يا راجل انت
انت عايز تجنني
البت دى هتفضل تتخن كده
لحد ما هتبقى مش قادرة تحرك رجليها
ولا هتقدر تخلف
ولا حد هيبصلها
بابا.بلاش كلام متخلف يا ناجية عيب
اولا الجواز دى قسمة ونصيب
وبعدين البنت صغيرة
غير انها مش تخينة للدرجة اللى تخليكي تقولى كده
ده فيه اتخن منها بمراحل وعايشين حياتهم
عايزة تنصحيها انصحيها بالعقل
خلوا فيه حب فى كلامكم معاها
بلاش علطول تبقوا بتهاجموها كده
سميرة بصوت عالى من برة باب الاوضة.ربنا يخليك يابابا
مش عارفة من غيرك فى البيت ده كانوا عملوا فيا ايه
بابا بيضحك وبصوت عالي.انتى واقفة بتتصنتي علينا يابنت
روحت خبطت على الباب وفتحت ودخلت وانا بضحك.والله ابدا
انتم صوتكم عالى وانا كنت رايحة المطبخ
ناجية.شوفت علشان تصدق
مبتعملش حاجة غير انها تطفح طول اليوم
علشان تصدقنى
دى هتموت ورجليها هتعجز بسبب طفاستها دى
سميرة بضحك.يا ست الكل اهون عليكي يعنى اموت ولا اعجز
هو ده نبع الحنان اللى بيقولوا عليه
اومال لو مش انا اخر العنقود السكر المعقود
كنتى عملتي فيا ايه
ناجية.كنت رميتك على اى باب جامع
سميرة.شايف بنتك يا باشمهندس بيتعمل فيها ايه
خلاص انا اتبهدلت اوى واتهانت كرامتي
وعلشان كده لازم امشى من المكان ده
بابا بيضحك
ناجية بأنفعال.انتى بنت قليلة الادب
فيه بنت محترمة ومتربية تقول همشى من المكان ده
ايه على اخرالزمن عايزة تطفشي
سميرة بصدمة من تفسير امها للجملة اللى قالتها.لاء والله يا ماما مش ده قصدى
انا كنت اقصد هطلع من الاوضة يعنى
ناجية بأنفعال.طيب اتفضلي اطلعى بقى وروحي على اوضتك مش المطبخ
انا قربت احط قفل على التلاجة
برغم انى كنت داخلة اضحك واهزر معاهم
ومع انى سمعت كلام ماما والله عن طريق الصدفة وانا فعلا داخلة المطبخ
لكن دفاع بابا عني
خلاني مزعلش من الكلام
واخده على انه نصيحة او خوف عليا
بس زعلت من ماما لما هاجمتنى بالشكل ده
واخدت كلامي على انه قلة ادب وفسرته بسوء ظن
رجعت اوضتي
وقفلت الباب
وحاسة من جوايا انى مضايقة
لكن برضه فى نفس الوقت بحاول اقنع نفسي ان ماما قلقانة عليا
ومن غير استئذان
دخلت مروة اوضتى
سميرة.جرى ايه يا مروة
طيب خبطي على الباب حتى
قولى احم
اعملى اى حاجة بدل ما تفجعيني كده
مروة.بقى انتى اللى تتفجعي
يابنتى انتى مش واخدة بالك من نفسك ولا ايه
ده انتى تفجعي العفريت
سميرة بضيق.فى ايه طيب
عايزة ايه
مروة.عيد ميلاد هند جارتنا النهاردة
هتيجي معايا ولا ايه
سميرة بسعادة.يا سلام بقى هو ده الكلام
خلينا نتبسط شوية بقى
بدل جو البيت الممل ده
مروة.طيب بس البسي حاجة كويسة
بلاش الهلاهيل بتاعتك دى
سميرة.بقولك ايه يا مروة
البسي انتى ياستى اللى يعجبك
وانا سيبيني البس اللى على مزاجي
اعملى نفسك متعرفنيش
مروة.خلاص انتى حرة
انا بقولك علشان محدش يعايب عليكي
وساعتها هعمل نفسي معرفكيش
سميرة بتضحك.ايه يابنتى الجدعنة دى
ده انتى بتحبيني اوى
مروة بغرور.نفسى اعرف ازاى انا وانتى جايين من نفس البطن
بس صحيح بيقولوا القرف اللى فى البطن بينزل مع اخر طفل بيتولد
بس شكله لزق فيكي ومطلعش
سميرة.طيب يلا بقى اتفضلي اطلعي
علشان ابداء اجهز هدوم البلياتوش اللى هروح اعمل بيها نمرتي فى عيد الميلاد
مروة.بتتريقى على كلامي
سميرة بنفاذ صبر.ياستى مش بتريق ولا بتنيل
ما خلاص بقى
يا مروة
انتى ليه مصممة تحرقى دمي
انا باخد كل الكلام بهزار وضحك
بلاش تخلينى ابقى مضايقة
مروة.ههههههههههههههه
ايه ده يا بطة
انتى بتضايقي زى الناس
دى ماما بتقول ان تخنك ده بسبب ان دمك بارد علشان كده بتتخني وبس
يلا انا هروح اجهز بقى
خرجت مروة من الاوضة
وانا من جوايا حاسة ان قلبى واجعني
اختى وامي اقرب اتنين ليا
المفروض هما اللى يزودوا ثقتي فى نفسي
يشجعونى بطريقة تحببنى فى انى اتغير
مش يضايقونى للدرجة اللى توصلني للتفكير فى الانتحار
لكن كنت بحس ان كلام بابا بيقويني
وبقتنع بأنهم بيحبونى
بس طريقتهم فى توصيل المعلومة هى اللى غلط
الدلالة
رفيقة الشيطان
الفصل الثاني
عارفين انا هدومي حلوة
وغالية مش رخيصة
لكن انا بحب الالوان الكتير
يمكن معنديش ذوق اوى فى تنسيق الطقم على بعضه
لكن الحاجة لما بتبقى مريحة بالنسبالى والوانها مبهجة كده
ببقى فرحانة بيها اوى
وقفت قدام دولابى
ادور على طقم اروح بيه عيد الميلاد
وبعيد عن ان كلام ايمان مشغلنيش
لكن لقيت نفسى بدور على طقم يكون شكله حلو عليا
ويكون ذوق وشيك
علشان متلاقيش حاجة تضايقني بيها ولا تعلق عليها
طلعت دولابي كله
وبقيت واقفة تقريبا اقيس فى كل هدومي
لحد ما اخيرا اقتنعت بالطقم اللى هلبسه
كان دريس لونه اخضر نص كم وقصير شوية بس تحت الركبة بشوية
وفيه على الصدر ورد صغير بخيوط صفرا
اصل انا مش محجبة يعني
اه شعرى مش حلو اوي بس لسه مقررتش اتحجب
حضرت هدومي
ودخلت اخد حمام
وروحت اوضتى تانى من غير ما اتكلم مع اى حد
لان مروة
كده كده فى اوضتها
وبابا وماما بيناموا شوية
لازم القيلولة دى
المهم طلعت تانى لأوضتى
فردت جسمي على السرير
وبفكر فى حياتي عموما
هو انا بعمل ايه
بروح المدرسة
بهزر وبضحك وعلاقاتى حلوة مع المدرسين بتوعي
واصحابي
برجع البيت اغلس على ماما وعلى مروة لو موجودة
اوقات نهزر شوية
وكتير نتخانق ونغلس على بعض
اغير هدومى واكل وانام شوية
اقوم اتغدى واقعد اغلس عليهم وبعدين اقعد اذاكر
مش باخد دروس
بس مش متفوقة يعنى احسن حد يقول شاطرة
لكن كنت مش رافضة اتعلم
طيب غير كده بعمل ايه
ولا حاجة
بحب اقرا كتير القصص الخيالية
يمكن علشان كده مش بتعلم حاجة من القصص
لأن كلها بتبقى خارج حدود العقل والمنطق
وخارج حدود مجتمعنا
حياتي روتينية
لقيت نفسي فكرت فى حياتي كتير اوي
وموصلتش لحاجة من التفكير ده
هو انا اصلا كنت بفكر ليه
محتاجة ايه يخليني افكر
اللى بحتاجه بابا مش بيتاخر عني فيه
وعايشة زى الناس ماهى عايشة
ويمكن احسن من غيري كتير
قومت من على السرير بكلم نفسي.عايزة تعملى فيها عميقة وبتفكرى يعني
يابنتى دماغك دى بطيخة اصلا
قومي العبي فى وشك شوية بقى شوفى حطيلك حاجة تنورك كده
بدل ما البنات بتلعلط من البياض
وقفت اجرب احط ميك اب بس انا بحس انه مش بيليق عليا
مش عارفة ليه
يمكن انا مش بعرف اتعامل مع الميك اب
علشان كده مش بيبقى حلو
المهم انى قررت امسح كل اللى حطيته
واروح عيد الميلاد بطبيعتي
وقفت اكلم نفسي فى المرايا.جاتك خيبة
ده عيد ميلاد هند
يعنى مش ملكة جمال العشوائيات مثلا
ايه عايزة تبقى احلى منها تروحى تغطي على البنت فى عيد ميلادها
مالها خلقة ربنا ما هى جميلة اهي
طلعت من اوضتي
وروحت على اوضة مروة
خبطت على الباب
(بلفت انتباهها علشان تخبط عليا بعد كده)
مروة.ادخل
سميرة.ايه يا مورا
هتلبسي ايه
يخربيت سنينك
ايه يابت الحلاوة دى
مروة ضحكت ومرديتش
سميرة.لاء والله ماشاء الله زى القمر
عنيكي بالكحل جميلة كمان الله اكبر
مروة بأبتسامة.بلاش حقد عارفة لو حصل لعنيا حاجة
هتبقى انتي السبب
سميرة بتضحك.حقك عليا انا غلطانة يعني انى برفع من معنوياتك
مروة بثقة.ليه يابنتى انتى مجنونة ولا ايه
وانا مستنياكي انتى يا قلبظ علشان تقوليلي انى حلوة
بصراحة كلمة قلبظ دى ضايقتنى
سميرة.هو يابنتى انا معرفش اهزر معاكي
غير لما تدورى على اى كلمة تعصبيني بيها
ايه ياربي الاخوات دول بس
مروة بتضحك.انهي كلمة بالظبط اللى ضايقتك
اوعي تقولى قلبظ
دى جميلة والله ولايقة عليكي
سميرة.عارفة انا لو مش كسلانة هلعب رياضة وهخس وهبقى قمرة القمرات
بس مش عايزة اغطي عليكي
مروة باستهزاء.لاء ياستى بطلي كسل ووريني هتبقى قمرة القمرات ازاى
انا موافقة تغطي عليا
سميرة.بت تسدى النفس
وانا اللى كنت جاية اشوفك لو محتاجة تاخدى رأيي فى اللبس ولا حاجة
مروة بنفي.لاء شكراااااااااااااااااا
كل واحدة تحتفظ برأيها لنفسها
سميرة.طيب جيبتي هدية ولا ايه
هنروح فاضيين كده
مروة.اه ماما قالتلى اطلع طقم من اطقم السرير اللى شايلاهالى اديهولها هدية
اصل ماما شايلاهم من زمان
وموضتهم قدمت
هتجيبلي هى غيره
سميرة.خلاص حلو اوى
وبما انك اختى الكبيرة هتقدمي الهدية وكأننا بقى جايبينها سوا
مروة.طيب روحى اخلصي بقى واجهزى
سميرة.ماشى
انا طلعت الفستان بتاعى ال.....
مروة مقاطعة.ياستي البسي اللى تلبسيه
يلا بقى خليني اخلص
طلعت من اوضة مروة اللى كانت واقفة تدور على لون روج هادي
هى اصلها كمان مش بتحب الميك اب
حلوة ومش محتاجاه فلو حطيت بيبقى حاجات خفيفة اوى وهادية
بتزود جمالها بصراحة
وروحت على اوضتى
غيرت هدومي
الدريس حلو عليا اصلا
هو مش ضيق
مش مبين ان جسمي مليان او ان بطني بارزة شوية
رفعت شعري ديل حصان هو كان هايش شوية بس والله شكله حلو
كان شكلى مقبول
مش هبالغ واقول جميلة
لكن عادية
الباب اتفتح
ماما.ايه خلصتي يا سميرة
سميرة بأبتسامة.ياجدعان خبطوا على باب الاوضة
ماما.ليه ياختى عندك ضيوف ولا بتعملى حاجة عيب
وبعدين انا امك ادخل اى وقت بالطريقة اللى تعجبني
سميرة.وماله يا ست الحبايب
انتى حد يقدر يقولك لاء على حاجة
قوليلي بقى ايه رأيك فى الفستان عليا
ماما.كويس مداري كرشك
بس بصى دراعاتك عاملة ازاى منه
يابت دمك محبوس
سميرة بضحك.والله يا ماما انتى اللى حبسالي دمي
وبعدين ياستى هو مش انتى اللى اشتريتيه معايا
ماما.يابت ما هو انتى عماله تعجلي وتفشولي
بس هقولك ايه
اهو كويس
مداري البلاوي اللى تحته
بقولك ايه يا بت يا سميرة
صوتك ميعلاش انا عارفاكى لما بتضحكي الدنيا كلها لازم تسمع صوت صهللتك
عيب انتى هتبقى فى بيت ناس
وهتلاقى ناس منعرفهاش
احترمي نفسك
علشان هعرف
سميرة.يا ماما اوطي على رجليكي ابوسها
هو انا مفيش اى حاجة فيا ولا اى حاجة بعملها صح
علطول كده كله غلط
شكلى وكلامى وضحكتي وردودي
ده انا لو لقيطة مش هتعامليني كده
ماما.اهو شوفتى ردودك عاملة ازاى
اللى يسمعك بتردى كده يقول قليلة الادب
سميرة.ماما خلاص انا غلطانة انتى عندك حق
حاضر هعمل كل حاجة قولتيها
ويلا بقى اتفضلي روحى اطمنى على حبيبة قلبك
ماما بتضحك.اه ياختي حبيبة قلبي
مش شبهي
لازم تبقى حبيبة قلبي
كفايا انتى عليكي ابوكي ودلعه ليكي
خرجت ماما وانا برد عليها.ابويا ايه وابوها ايه
هو انا بنت جوزك يا ست ماما ولا ايه
بيت غريب عليا النعمة
جهزت انا بسرعة
وطلعت برة لقيت ماما طالعة هى ومروة بيضحكو
ماما.خمسة عليكي من عنيا يا مرمر
قمر يا حبيبتى
هتروحى تجيبليى عريس وتيجي انا عارفة
مروة.عريس ايه بس يا ماما
احنا رايحين نعمل واجب وراجعين
وبعدين هو اى عريس والسلام
ده انا مش هتجوز الا واحد له مواصفات
سميرة.اااه هاتيلها ظابط ولا ضاقتور يا حاجة
مروة.واحسن منهم كمان يا قلبظ
ناجية.خلاص بقى بطلوا مناقرة فى بعض
وبلاش فضايح عند الناس
بلا واحدة فيكم تضايق التانية
متخلوش حد يعلق عليكم
فاهمين
مروة.ولا هعبرها اصلا
سميرة.لاء والنبي شعلقيني فى ديلك
امشى امشى يا مروة ربنا يهديكي
ده انتى خميرة عكننة
فى الوقت ده كان بابا صحى من النوم وطالع من باب اوضته
وشافنا
بابا بضحكة.بسم الله ما شاء الله
عروستين
الواحد مش عارف ازاى هييجى اليوم اللى يوافق ان انتم تسيبوني وتروحوا تتجوزوا
لالالا انا مش هقبل
مروة بضحكة.ايه رأيك يا بابا
بابا.رأيي ايه بس
ربنا يحفظكم يا حبيبتى
سميرة.شكلي حلو صح
بابا.انتى علطول زى القمر يا سمسمة
ماما.متخافش كده كده سميرة قاعدالنا مش رايحة فى حتة
تبقى تونسك
لكن مرمر
لا ياحبيبى لازم افرح بيها
ده انا هخليه يعملها فرح
ولا الف ليلة وليلة
بابا.طيب يا بنات روحوا انتم بقى يلا
ومتتأخروش
مروة.ماشى يابابا
يلا سلام مؤقت بقى
سميرة.سلام
طلعنا سوا
كانت سميرة شايلة الهدية لحد ما رنوا الجرس على باب هند
واخدت مروة الهدية من ايديها علشان هى اللى تقدمها
سميرة.ايه ده هو انا شغالتك
انتى كنتى مشيلهالي اوصلك بيها
مروة.ششششششششششششش
اسكتي خالص
اتفتح الباب
هند بترحيب.معقوووووول
قولت مش هتيجوا
ادخلوا ادخلوا
مروة.هنود حبيبتى كل سنة وانتى طيبة
اتفضلي دى حاجة بسيطة
هند بفرحة.وانتى طيبة يا قلبي
كفاية ان انتم جيتوا
احلى من اى هدية
سميرة بفرحة.يا هنود فرصة فرصة المناسبات دى حلاوتها
المفاجأت
هند.ان اصحابي حواليا دى احلى هدية
ادخلوا بقى جوة
يلا مش هنقف على الباب
فعلا دخلت انا ومروة
وكان البيت مليان ناس
جيران
واصحاب هند فى المدرسة
وقرايبها
منهم ناس نعرفها
ومنهم اللى منعرفهمش
وقفت انا ومروة مع جيران لينا
بعد ما سلمنا على كل الناس اللى نعرفهم
وهند بترحب بكل ضيوفها
علشان كده بتقف مع كل مجموعة شوية
وباباها ومامتها قاعدين مع الناس الكبيرة
اميرة.لاء بس هند النهاردة فقرة
انا مش عارفة هى مش ناوية تغير كعب الكوباية اللى هى لابساها دى
ولاء.بت الايه وعندها ثقة فى نفسها كأنها الأميرة ديانا
دعاء.اصلا باباها ومامتها مدلعينها دلع اوفر اوي
مالهمش غيرها بقى
ايمان.بيستفزني جدا البنت لما تبقى عارفة امكانياتها وقدرات نفسها
وتبالغ فى ثقتها بنفسها
سميرة.هو فى ايه بس يا جماعة
مالها هند
والله زى العسل
ودمها خفيف
وبتتعامل حلو اوى مع كل الناس
ولاء.ههههه صح ما هو لازم تدافعي عنها
سميرة.وعن اى واحدة تانية غيرها
دعاء.هو عادى على فكرة احنا مش بنتريق عليها
بس هى واخدة فى نفسها قلم يعني
المفروض متبقاش بالعوجان ده
ايمان بتضحك.لاء هى الصراحة مش معووجة خالص
لكن اه حاسة نفسها احلى البنات
سميرة.علشان باباها ومامتها محسسينها بكده
زودوا ثقتها فى نفسها
وخلوها متهتمش بكلام اى حد تانى
وبعدين هو احنا جايين عند الناس علشان نتريق عليهم
ولاء.لالا مش كله تريقة
بس شوفتى ولاد عمها
سميرة بنفاذ صبر.لاء والله ده انتم مش طبيعيين
انا هروح ادورلى على كوباية حاجة ساقعة ابل ريقى
مشيت من قدامهم
بدل ما افضل اسمع تريقة على دي ودي
اه قدامي هما كويسين معايا جدا
وبيتعاملوا كويس
لكن اكيد بوشين
زى ما بيتعاملوا مع هند كويس
ومن وراها بيتريقوا عليها
لكن اكتر حاجة ريحتنى
ان مروة اختى مستغلتش حلفلة التريقة دى واشتغلت عليا قدامهم
كنت هضايق فعلا
ولاء ودعاء بنات طنط بدرية جارتنا
عاديين يعنى مش حلوين اوى على تريقتهم على خلق الله دى
بس من الناس اللى معاها فلوس
لأن باباهم شغال فى الخليج
وبالنسبالهم هو البنك
عايشين براحتهم
بس ده ميمنعش انهم بأحترامهم
لكن مش بيسيبوا رايح ولا جاى من غير ما يجيبوا سيرته
ويبقوا عارفين تفاصيل حياته
بسبب تدخلهم مع كل الجيران فى المنطقة
سميرة.هند عمالة ادور على حاجة اشربها هموت من العطش
ايه انتى جايبانا تلمي هدايا بس ولا ايه
هند بتضحك.يخربيت سنينك يابنتى مش هتبطلى العفوية اللى انتى فيها دى
طيب اتكسفي من الناس الغريبة
سميرة بتضحك.ما غريب الا الشيطان ياستي
وبعدين ما انا عارفة ان دول ولاد عمك يعني مش حد غريب
ازيك يا كابتن
ازيك يا انسة
كلهم بيضحكوا
هند.اعرفكم يا جماعة
سميرة جارتي وصاحبتي
اعرفك يا سميرة
عمرو ومي ولاد عمي محمد
سميرة.يا اهلا يا اهلا
ازيك يا عمرو
عاملة ايه يا مي وحشاني والله
فين بقى الحاجة الساقعه ياستي
انا ايه اللى جابني عيد الميلاد الفقران ده
هند بتضحك.استنى ياستى هروح اجيبلك كوكاكولا
راحت هند فعلا وسابتنى واقفة مع ولاد عمها
عمرو.انتى تعرفينا منين بقى يا سميرة
سميرة.هو ايه اللى اعرفكم منين
مش انتم بتيجوا هنا كتير
يبقى اكيد شوفتكم كتير ما انا جارة هند مش من الفلبين يعني
وبعدين انا بشوفها بتخرج مع مي كتير
اه مش عارفة اسمها
بس اكيد يعنى قرايب
ما هو محدش يروح لحد كتير كده الا لو كانوا اهل يعني
مي بتضحك.ايه يابنتي ده
ده انتى مالكيش حل
ايه لسانك مبرد
سميرة بتضحك.بهزر معاكم علشان تاخدوا على الجوا كده
خليكم براحتكم بقى انتم مش ضيوف
عمرو بيضحك بصوت عالي.لاء والله ده انتى مصيبة بجد
وانا اللى فاكر ان مي اختى مفيش فى لماضتها
طلعت ظلمك يا ميوش
سميرة.يالهووووووى بقى انا لمضة
لالالا الكلام ده ميتسكتش عليه
تعالي بقى ياست هند
شوفى البيه عمل ايه فيه
هند جاية وهى بتضحك وماسكة معاها حاجة ساقعة
مي.سميرة دى مالهاش حل يا هند
ازاى متعرفنيش عليها
سميرة.شوفتى قريبك ياستى بيقولى ايه
سيبك من مي واللى بتقوله
هند بتضحك.ماله ياستي عملك ايه
سميرة.بيقولى عايز يخطبنى
تكملة الرواية من هنا 👇👇👇
تعليقات
إرسال تعليق