 |
الدلالة
رفيقة الشيطان
الفصل الثالث والرابع والخامس
بقلم هنا عادل
كامله على مدونة النجم المتوهج للروايات
هند بتضحك بصوت عالى.يخطبك مرة واحدة طيب يلا على بركة الله
عمرو بيضحك.وماله مش عيب برضه
مي بعبوث.هو انتى مش شايفة انه عيب تهزرى بكلام زى ده ولا ايه
اتحرجت من كلمتها
حسيت ان حد قلب على راسى قالب تلج
هند.فى ايه يا مي
سميرة بتهرج هى كده علطول بتحب تهزر وبتاخد على الناس بسرعة
مي بانفعال.ايه الهزار ده يا هند
هى تعرفنا منين علشان تقول كلمتين زى دول
وبعدين لو حد سمعها يعني يقول ا.....
عمرو.فى ايه بس يا مي مالك
الموضوع مش مستاهل كل ده
هى بتهزر واكيد هند فاهمة
وبعدين حتى لو حد سمع
هيقولوا ايه يعنى
ناس بتهزر مع بعضها
سميرة بأحراج.اا.ااا.ان.اانا أس.اسفة
والله مش قصدى حاجة
انا كنت بهزر عادي
كنت بتكلم وانا حاسة ان الدموع محبوسة فى عنيا من الاحراج والموقف اللى اتحطيت فيه
برغم انى فعلا كنت بهزر وقصدى اضحك واضحكهم
الا انى لومت نفسى انى اتعاملت بعشم مع ناس ميعرفونيش ولا اعرفهم
بس فكرتهم زى هند
احنا متعودين لما نتعامل مع بعض نهزر ونتكلم بطبيعتنا من غير اى قيود
مروة لاحظت انى واقفة وباين عليا الارتباك وواضح ان فيه حاجة مش طبيعية
هى مش متعودة عليا ابقى واقفة فى مناسبة مكشرة كده ووشى احمر من كتر السخونية
قربت مننا
مروة.مالك يا سميرة فى ايه
كنت مخنوقة مش عارفة ارد وخايفة اعيط من كسفتي قدامهم
هند.مفيش حاجة يا مروة
احنا بس كنا بنهزر شوية والهزار قلب جد
انتى عارفة اختك بقى وجنانها
مروة.فى ايه يا سميرة
عينك مدمعة ليه ووشك احمر
مي.هو انتى اختها
مروة.ايوة
مي.اقولك انا اللى حصل
عمرو.فى ايه بقى يا مي محصلش حاجة
سميرة بصوت واطي.مروة عايزة امشى
مروة بانفعال.انا لازم اعرف فى ايه
مين ضايقك قوليلي
فى اللحظة دى برغم انى كان نفسى اقولها اللى حصل
واستخبى فى حضنها من كلام مي الجاف معايا
الا انى خوفت اقولها
احسن تلومني قدامهم
عمرو.مفيش حاجة يا انسة
احنا كنا بنهزر بس اختى مي جد شوية مش بتحب الهزار
مروة.كنتم بتهزروا مع اختى يعني
مي بأنفعال.لاء هى اللى هزرت وهزار مبالغ فيه الحقيقة
بترمي نفسها على اخويا
فاكرة علشان وقفنا نضحك معاها شوية من باب المجاملة
يبقى فرصة تصطاد بيها عريس
فى اللحظة دى حسيت ان الدنيا بتلف بيا
ايه كل ده
انا اتفه من كده بكتير
والله ما كان فيه اى حاجة فى ضميرى
هند بانفعال.جرى ايه يا مي فى ايه
انتى ليه مصممة تعملى حوار من غير حوار
عمرو بأحراج.لاء يا مي ده انتى مش معقولة
انتى شايفة ان عادى اللى بتعمليه ده
مي.لاء يا سيدى مش عادي انا هروح اقول لماما واخليها هى اللى تيجي تقولك عادي ولا لاء
مروة مش فاهمة قصد مي من الكلام اللى قالته وواقفة تبص لاختها علشان تفهمها
لكن انا فى الوقت ده برغم انى شايفة نظرات مروة
وبحاول اتكلم يمكن تدافع عني وتقدر ترد على تقليل مي مني
لكن حسيت انى مش عارفة اتكلم
هو انا غلطت فى كلامي
طيب انا قولت كلام مكانش ينفع اقوله
طيب اللى حصل مني يستاهل انى اتحط فى موقف مهين بالشكل ده
مروة.لاء بقى انا عايزة افهم ايه اللى حصل بالظبط
ماهو مش هتقوليلى اختك بتدبس اخويا ولا بترمي نفسها عليه وتسيبينى اخمن
يعنى ايه كلامك ده
مي.رايحة تقول لبنت عمي ان اخويا عايز يخطبها
بتدبسه الانسة المؤدبة
تعرفه منين هى علشان تهزر معاه هزار زى ده
كانت مي مبالغة جدا فى رد فعلها
لكن غيرتها على اخوها الوحيد
خليتها مش قادرة تقبل ان اى بنت تهزر معاه هزار يكون داخل فيه كلام عن ارتباط
حتى لو هى متأكده ان مفيش اى حاجة من الهزار ده ممكن تحصل
لكن فكرة ان اخوها ممكن يرتبط او يحب او يخطب
دى فكرة بالنسبة لمي مقفولة
وكأن اخوها حكر عليها هى وبس
مروة.سميرة انتى قولتي كده
عمرو.يا انسة احنا كنا بنهزر
وانا اللى هزرت معاها وهى اتكلمت بتلقائية
يعنى مفيش حاجة حصلت
غير ان الكلام كان بينى انا واختى وبنت عمي وبين انسة سميرة يعنى محصلش حاجة
مروة بحدة.عموما يا جماعة حصل خير
هى بنت صغيرة مش فاهمة بتقول ايه
وعلى فكرة يا انسة
اختى مش بترمي نفسها على حد
واخوكي مع احترمي يعني
يخصك لواحدك ميخصناش احنا
ولا يفرق معانا فى حاجة اصلا
هند.خلاص يا مروة حقكم عليا
محصلش حاجة
مى بانفعال.اخويا
انتى بتتكلمي كده عن اخويا
الدكتور عمرو محمد جاد
صحيح هقول ايه
بس العيب على بنت عمي اللى بتعزم اشكال زى اللى شوفناها دى
مروة كانت حاسة انها هتمسكها تضربها
لكن عمرو منعا لزيادة الفضايح
انفعل على مي.مي قسما بالله لو مسكتيش دلوقتى حالا لا هيكون حسابي معاكي قدام كل الناس
ومش هتتوقعي ايه اللى ممكن يصدر مني دلوقتى
خلاص بقى اسكتى
وسيبي الناس تمشى
وكلامى معاكي بعدين
مى انفعلت وسابتهم ومشيت من قصادهم
وبرغم ان فيه ناس ملاحظين ان فيه حاجة بتحصل فى المنطقة اللى هند واقفة فيها مع قرايبها
لكن محدش حاول يقرب
عمرو.اسف اوى يا انسة سميرة
اسف يا انسة مروة
مروة بهدوء واعجاب.محصلش حاجة يادكتور
وعموما اسفين لو هزار اختى كان غلس شوية
هى بس غشيمة ومش بتعرف تتكلم
هند.هى معملتش حاجة يا مروة
مي بس بتغير على عمرو زيادة عن اللزوم
علشان هو قريب اوى منها
مروة باعجاب.حقها طبعا
كانت مروة بتتكلم مع هند وعنيها متعلقة مع عمرو
كان مش جميل
اسمرانى اوى
وشعرى اسود ناعم وعالي
وجسمه مليان وبرغم انه طويل الا ان لا مانع من وجود كرش بسيط
لكن هدوئه وثقته واسلوبه كان ذوق بالنسبالها
عمرو.انسة سميرة من فضلك بلاش تزعلي
حقك عليا انا
انا اسف
كنت بسمع كلامه ومن الاحراج والكسوف
مش عارفة ارد عليه
مروة بابتسامة.لاء متقلقش يا دكتور محصلش حاجة
اختى مبتعرفش تزعل
دلوقتى تلاقيها راحت دورت على طبق الجاتوه وقعدت تسلي نفسها
مش عارفة ليه اضايقت اوى من كلام مروة
وشوفت فيها مي
اللى مقدرتش تلقائيتي وهانتني
بس مي غريبة زعلي منها
ميساويش زعلي من اختى اللى بتقلل مني قدام الناس
عمرو بأبتسامة وعنيه مع سميرة.مبتعرفش تزعل ايه يا انسة مروة
دى عنيها بتلمع
وخدودها بقيت لون الفراولة
لما سمعت وصفه ليا واحساسه بزعلي
حسيت بحاجة حلوة
مش علشان حاجة والله
بس فكرة انه لاحظ كسوفى وزعلي وانه مصدقش كلام مروة عني بأني باردة
حاجة فرحتنى
هند.خلاص بقى ياجماعة يلا بينا نروح نطفى الشمع
لأن الناس لاحظت توترنا ده
ومش عايزين حد يطلع من هنا يقعد على سيرة اللى حصل ده
مروة بابتسامة.عندك حق يلا بينا
ام مي(مدام مها) سنها مش كبير
دلوعة فى نفسها ومتعلمة تعليم عالي
خريجة فنون جميلة
وست شيك جدا وحازمة جدا
وام واب بسبب شغل جوزها اللى بيخليه علطول مسافر وبيغيب عن البيت شهور طويلة
مي.قومي بقى شوفى صرفة
ام هند.مي حبيبتى الناس موجودة عيب مفيش داعي للكلام ده دلوقتى
وبعدين البنت على طبيعتها
واكيد بتهزر
مها.اهدي يا مي مش وقته
نرجع بيتنا ونتكلم
مي بعصبية.ايه ده
هتسيبيها من غير ما تعلميها الادب
ام هند.يامي يا حبيبتى فى ايه
انتى ليه مكبرة الموضوع كده
كلمتين وراحوا لحالهم
انتى يعنى شوفتيها اخدت عمرو من ايديه ورحت بيه على المأذون
مي.اااااه ما هو ده اللى ناقص كمان يا طنط
دى بنت قليلة الادب
مش عارفة ايه الجرأة اللى هى فيها دى
دى رمية
مها بنظرة تحذير.مي خلاص قولنا
مش كده احنا مش فى البيت
بلاش انفعال مالهوش داعي
ام هند بابتسامة.هتعملى ايه انتى يامي يوم ما اخوكي يتجوز
مها بجدية.لسه بدرى على الكلام ده
عمرو صغير وقدامه مشوار طويل
على الاقل يعمل عيادته الاول
ام هند.الايام بتجرى بسرعة يا مها
والعيال بتكبر
مها بتبص لمي وبتبص للساعه.هتطفوا الشمع امتى بقى
علشان الوقت اتأخر ولازم نمشى
مي عندها كورس بدري
كانت مي متعصبة جدا
ومها حاسة بيها بش مش عارفة تكون براحتها علشان برستيجها قصاد الناس
ام هند.هقوم اشوف هند طيب واقولها
كانت فعلا هند واقفة عند الترابيزة اللى عليها التورتة
وحواليها جزء من اصحابها بتحاول تظبط اخر لمسات فيها
علشان يطفوا الشمع
ام هند.هند ياحبيبتى هتطفي الشمع امتى
الوقت اتأخر
هند بأبتسامة.اهو يا ماما حالا
ام هند.طيب يا حبيبتى هروح اقول للجماعة
راحت ام هند تبلغ الضيوف
وكان عمرو عنيه متعلقة على سميرة
فى الوقت اللى مروة مركزة معاه جدا
وخاصة لما قربت منه مها وحطيت ايديها على كتفه
وشافت ازاى يبان على مها الرقي والشياكة
اما انا كنت حاسة انى فى مكان مش بتاعي
كان المفروض اامشى
لكن اختى قررت اننا نمشى سوا
مينفعش نيجي مع بعض وواحدة ترجع البيت لواحدها
غير ان اعتذار عمرو بالنسبالها كان كافي بالعكس
ده المفروض انا اللى افضل اعتذر
ازاى واحدة زيي من وجهة نظر اختى توجه هزار سخيف بالشكل ده لواحد زى عمرو
لاحظت ان مى وشوشت مامتها وقالتلها ان انا اللى هزرت مع اخوها
علشان اسمع صوتها اللى برغم انه كان مش عالى الا انه كان نسبيا مقصود انى اسمعه
ومسمعتهوش لواحدى لكن عمرو ومروة وهند كمان سمعوه
مها.بقى هى دى اللى هزرت معاه
عادى يامي ما هو طبيعي يعنى انتى مش شايفاها عاملة ازاى
وبعدين هو اخوكي يعنى هيشغله هزار واحدة بالمنظر ده
اهدي يا ماما انفعلتي على الفاضي
حسيت ان ضربات قلبي بتزيد
ووشى بيسخن اكتر ما كان سخن
والدنيا بتلف بيا
اكيد ضغطي مش مظبوط
حاسة بنفسى هقع من طولي
اه انا متعودة على الكلام ده من امى واختى
لكن مش بسمح لاى حد تانى يتريق عليا ايا كان هو مين
لكن انا فى مكان وعند ناس وفيه ناس غريبة
والغلط من الاول كان من عندى بسبب كلمة عبيطة طلعت مني بغشومية وعشم زايد مش عارفة اتعاملت بيه على اي اساس
لكن انا عارفة انى غلطانة
بس هو انتم شايفين انى غلطانة لدرجة التقليل والاهانة دى
مسمعتش صوتهم تانى
لكن لاحظت نظرة عمرو اللى التفت بيها لمامته واخته
مشوفتهاش فعليا لكن شوفت رد فعلهم لما بعدوا عنيهم عني وبصوا فى اتجاه تانى
مروة.عاجبك انتى قلة الذوق اللى اتعرضنالها بسببك دى يا زفته
نرجع البيت وهيبقى فيه كلام تانى
وانا غلطانة انى جيبتك معايا من الاساس
هند لاحظت فى الوقت اللى كانت جهزت كل حاجة
ومع صوت الاغاني حاولت تشغل اى حد عن اللى بيحصل بين ابن عمها ومامته واخته
وبين جارتها واختها
وفعلا تم الاحتفال
وكلهم غنوا وطفوا الشمع
لكن انا من جوايا نار مش بتطفى
اول مرة اتحط فى موقف زى ده
اه مها ومي مبصوش ناحيتى مرة تانية
لكن خلاص بقى اللى حصل حصل
وبمجرد ما انتهى الاحتفال وطفينا الشمع
حسيت ان روحى هترجعلى
وهخرج من المكان اللى مغصوبة على انى افضل موجودة فيه
مروة.كل سنة وانتى طيبة يا نودي
عقبال 100 سنة ياحبيبتى
واسفين لو ضايقناكي
هند بأبتسامة.شكرا ليكي يا مروة
وانا اللى اسفة جدا
والله سميرة معملتش حاجة اصلا علشان كل ده
مروة.هى علطول كده كل حاجة فيها تفضح
سميرة بحدة.مروة كفايا بقى لو سمحتى يلا بينا
اتصدمت من مروة
اللى عملت تصرف ابعد ما يكون عن خيالى وبالي
التصرف صدمني وصدم هند جدا
للدرجة اللى خلتنى احس انى اتربطت من رجليا فى مكانى
الدلالة
رفيقة الشيطان
الفصل الرابع
لقيت مروة مشيت ناحية عمرو واهله
وكانت مامت هند واقفة معاهم
مروة بأبتسامة.مساء الخير
كلهم.مساء النور
ام هند.منورة يا مروة يا حبيبتى
شكرا على تعبكم
مروة.هند اختنا يا طنط
معلش انا اسفة انى بتطفل عليكم
بس جاية اعتذر عن اللى اختى عملته
ام هند بابتسامة.عملت ايه بس يا مروة
انتم مكبرين الحكاية ليه
دى سميرة زى العسل
وبتتعامل بطبيعتها
مي.لاء دى اسمها قلة ادب مش طبيعية
عمرو.مي احترمي نفسك
مروة.سيبها يا دكتور
فعلا هى عندها حق
بس بعتذرلكم عن تصرفها
هى وعيها مش كامل
عندها خلل شوية فى الادراك
وده بيخليها تتصرف تصرفات مش طبيعية احيانا
مها بابتسامة.شوفتى بقى يا ميوش
مش قولتلك
هى اكيد مش فاهمة بتقول ايه
خلاص كده ارتاحتى
اهى طلعت من واعية لنفسها
ام هند كانت مصدومة من الكلمة
وعمرو عنيه بتروح لسميرة اللى واقفة بعيد
كنت واقفة جنب هند مش عارفة هى مروة واقفة معاهم بتقول ايه
لكن فى نفس الوقت نظرات عمرو وام هند ليا قلقتنى
وابتسامة امه واخته ومروة
كانت غريبة لانها عكس اللى ظهر عليه وعلى ام هند
هند.هو فى ايه يا سميرة
وبعدين ايه اللى يخلي اختك تروحلهم
سميرة بدموع محبوسة.مش عارفة يا هند
ومش عايزة اعرف
علشان انا النهاردة استكفيت من اللى حصل
لقيت مي بتقرب مني وعلى وشها ابتسامة غريبة
وفى نفس الوقت مروة ومها باصين عليا بأبتسامة مش مريحاني
مي.يا هند مش كنتى قولتي انها مريضة
عموما يا سميرة حصل خير
ليس على المريض حرج
بس حبيبتى بعد كده بلاش تروحى اى مكان فيه تجمعات علشان متحرجيش نفسك
مدام انتى مش بتعرفي تتعاملى مع الناس
كنت واقفة مش فاهمة هى بتقول ايه
لكن ابتسامة مروة
ومشاورتها بصوباعها على شفايفها انى اسكت ومردش
خلتنى متكلمش اكتر ما انا مش عارفة اتكلم
هند.مريضة ايه
هو فى ايه يا مي
مي ضحكت ومردتش على هند
ورجع لامها
مروة.بعتذر مرة تانية يادكتور
هى عيلة صغيرة
اتشرفت بحضرتك ياطنط
مها.شكرا ياحبيبتى
انا مش عارفة ازاى انتى وهى اخوات
بصراحة غير بعض خالص
مروة ابتسمت وبصيت لعمرو
لكن عمرو كانت عنيه على سميرة
معقول دى مريضة
معقول دى عقلها مش مكتمل
معقول بطبيعتها وضحكتها الحلوة دى
وكلامها ودمها الخفيف
مش واعية للى بتقوله
مروة.يلا بعد اذنكم
لازم امشى
وفرصة سعيدة يامي
واتمنى نبقى اصحاب
مي.اكيد طبعا لازم نبقى اصحاب
ابتسمت مروة
ومشيت وسابتهم
وقربت من سميرة ومسكتها من ايديها بقوة
وخرجت من البيت
وراحوا سوا على بيتهم
بمجرد ما دخلوا من باب الشقة
فى اللحظة دى
حسيت انى اخيرا باخد نفسى
ودموعي نزلت من غير ما اتكلم
امى سمعت صوت الباب اتقفل
طلعت من الصالون تبص علينا مدخلناش ليه وفضلنا واقفين على الباب
ماما بصدمة.ايه ده مالك يا سميرة بتعيطي ليه
كنت ساكتة مش قادرة اتنفس
اترميت فى حضنها وانا بعيط بقهرة وكسوف
وحاسة انى اتهانت ومخدتش حقي
ماما.فى ايه يا مروة
مالها اختك
بتعيطي ليه كده يا سميرة
مروة بأنفعال.دى حيوانة
مالهاش خروج من البيت مرة تانية
اللى زى دى توديها اعادة تأهيل
غبية ومتخلفة
حطتنى فى موقف مقرف شبهها
طلعت من حضن ماما وبصيت لمروة.حيوانة واعادة تأهيل
انا يا مروة
انا متخلفة
انا تسمحى ان واحدة زى مي دى تيجي تقول انى مريضة
انتى قولتلهم عني ايه
وليه
انا اصلا معملتش حاجة علشان كل ده
ماما بأنفعال.اخرسى بقى منك ليها
فهمونى ايه اللى حصل
فى ايه
ابتديت مروة تحكى اللى حصل بس بطريقة تصدم
شوفى ياست ماما
ماما.لاء تعالوا جوة مش هنتكلم على الباب الناس تسمعنا
على الصالون
دخلنا قعدنا فى الصالون
وابتديت مروة تقول.ياستى الحفلة كان فيها ناس كتير
ومن ضمن الناس اهل هند
منهم واحد دكتور يا ماما
انما ايه
يخربيت الشخصية
حاجة كده حلوة اوى
هو شكله عادى يعنى مش امور ولا حلو
بس كاريزما كده
وشيك اوى
ودكتور
ده يبقى ابن عمها
ومعاه اخته ومامته
حاجة كده برستيج مالهوش حل
ست متعلمة وشيك جدا
طبعا بنتك البهيمة اللى عايشة تملى كرشها وبس
اول ما شافت الولد
عنيها طلعت عليها
وراحت قالت لهند
ابنك عمك عايز يخطبنى
والولد اصلا ولا كلمها ولا عبر....
سميرة بأنفعال.ايه الهبل اللى بتقوليه ده
انتى جيبتى منين الكلام ده
والله يا ماما لاء مش ده اللى حصل
انا كنت بهزر عادى وهما كانوا بيهزروا معايا
قولت الكلمة عادي يعنى والله بسلامة نية
وهو هزر وضحك
وانا لما قولت لهند الكلمة كانت عارفة انى بهزر وضحكت هى كمان
لكن اخته هى اللى اضايقت وانفعلت جدا
وكسفتنى
غير الكلام اللى بقوا يقولوه عليا
كنت واقفة هموت من الكسوف
والله يا ماما ما كان قصدى حاجة انا كنت بهزر عادي
ومجرد ما خلصت اخر كلمة
لقيت ماما نازلة على ودنى بأيديها
من قوة الضربة
حسيت ان ودني بتصفر
ماما بانفعال.انتى هتفضلى غبية كده لحد امتى
انتى مش نافعة فى اى حاجة
تروحي عند الناس تفضحينا
رايحة تصطادي رجالة فى عيد الميلاد يا قليلة الرباية
ده لما ابوكي ييجى هخليه يقطع من لحمك
فضحتينا
انتى اللى زيك مالهوش طلوع من البيت
كنت واقفة مقهورة وانا حتى اللى كنت مستنياها تسندنى وتقولى انى مغلطتش
وتفهم طبيعتى وتبقى واثقة ان اللى حصل مني مكانش فيه من وراه اى هدف
لقيتها بتوجعني وتدوس عليا اكتر
مفرقش معاها اهانتهم ليا
ولا فرق معاها تقليل مروة مني لا بينى وبينها فى بيتنا
ولا حتى قدام الناس اللى راحت قالتلهم انى مريضة
سميرة.ياماما افهمينى والله ما .....
مروة.غورى بقى ادخلى اوضتك
ده انتى تفضحى يا شيخة
منك لله خليتي شكلنا زبالة
سميرة.ياماما اسمعيني...
ماما.ادخلى غورى على اوضتك يا سميرة
ومفيش طلوع منها غير لما ابوكي يقرر هيعاقبك ازاى
دخلت بعد ما حسيت بأحباط
ماما قررت انها متسمعنيش
او قررت تحكم عليا باللى مروة حبيت توصلهولها
وجعتنى اوى لما خذلتني
قفلت عليا الباب
ووقفت قدام المرايا ابص لنفسي
هو انا فعلا مريضة
طيب انا فعلا مينفعش اتعامل مع الناس
انا فيا حاجة غلط
فى اليوم ده حسيت لأول مرة ان ثقتي فى نفسي اتهزت
شكيت فى تصرفاتي
نظرات مي ومامتها ليا
خلونى ابص لنفسى على انى قليلة
برغم انى عمرى ما حسيت بكده
مروة.اسكتى ياماما
ايه الرقي ده وايه البرستيج ده
ماما.حلو يا بت يا مروة
مروة.مش حلو
اسمراني اوى هو وجسمه مش حلو يعنى
بس شخصية كده
ودكتور
وباين عليهم معاهم فلوس
مامته واخته لابسين دهب كتير ودبلتها باين عليها الماظ
مش هب اصفر ولا ابيض
وهو كان ماسك مفاتيح عربية بى ام
يعنى باين عليهم معديين اوي
ماما.بقى البت ام نضارة كعب كوباية ده
يبقى ابن عمها واصل كده
طيب ايه يا بت يا مروة
موقعتهوش
يا خايبة تطلعي كده من غير ما تجيبيه على بوزه
متعلمتيش حاجة من امك انتى
جيبت ابوكي لحد ما خليته قاطع عيلته كلها علشان خاطري
مروة.هو سهل يا ماما
الصعب امه واخته
باين عليهم مش سهلين
ودول اللى دخلتلهم الاول
هما اللى هيقدروا يوصلوني له
ماما بأعجاب.يا اروبة
مجرمة يابت يا مروة
طيب عملتي ايه
مروة.اعتذرتلهم
وبينتلهم انهم حاجة كبيرة اوى
وان اختى مش فى وعيها
وهى اقل من انها توجه كلام زى ده لأبنها
واتصاحبت على اخته
واخدنا ارقام بعض
ماما.اه يا لئيمة انتى
جدعة يابت
صح
لو حطيتى اهله فى جيبك
هتعرفي تحطيه هو كمان
المهم بس متبينيش انك مدلوقة اوى
مروة بثقة.عيب عليكي
بنتك استاذة
ماما.طيب وهو يابت يا مروة
كان رده ايه على كل اللى حصل
مروة.هو بقى ياستى
كان كل شوية يهدي امه واخته من ناحية اللى حصل
وصعبت عليه البت سميرة
لكن ميمنعش ان عنيه كانت هتطلع عليا
بنتك كانت منورة عيد الميلاد انتى عارفة بقى
ماما بفخر.بنتي حبيبتى
انا قولت العيون الحلوة المكحلة دى
مش هترجعلى بأيديها فاضية
مش تقوليلى زميلي فى الكلية
ولا صاحب المحل اللى جنبنا
دكتور كده قيمة وسيما
وفلوس
حاجة تشرف
واعية لامك
لما قررت اجيب عريس
قولت لازم يكون اعلى مني
فى كل حاجة
علامه
وفلوسه
وشغله
حاجة كده ترفعنى مش تعيشنى فقرانة العمر كله
مروة بثقة.ايوة ياماما انتى طلعتى مش سهلة ابدا
توقعى مهندس للدرجة اللى تخليه يسيب اهله كلهم علشانك
بس برضه ياماما انا مش واقعة علشان الف وراه ويشوف ده
انا برضه تعليمي عالي
وحلوة
وابويا مهندس
ومش فقرانين يعني ولا معدمين
لكن هما ممكن اعلى مننا كمستوى مادى بكتير مش اكتر
ماما.المهم انه يطلعك لمستواه
مش حد يخليكي مطرحك
ولا ينزلك معاه لتحت
ده اللى تحطيه فى بالك
وبعدين اللى عملته اختك ده تروحي تشكريها عليه
لان هى كانت السبب فى السكة اللى اتفتحت بينكم
مروة بحقد.دى مقرفة
بألوان عروسة المولد اللى كانت رايحة بيها دى
ترمي نفسها على الولد وتطلب منه يخطبها ايه البجاحة وقلة الذوق دى
ولا هى اتوهمت انه شايفها اصلا
دى كانت شبه البالونة اللى بيحطوها على ابواب القاعات فى الافراح
وبيكتبوا عليها اسم العريس والعروسة
الغريب ان مروة اختى لما بتتكلم عني بتتعمد تعلي صوتها
وكأنها قاصدة تسمعني
مش عارفة انا عملالها ايه يخليها تعمل فيا كده
والله عمرى ما بزعلها
ولا بقولها حاجة تحسسها انها فيها اى عيب
بتتعمد تهيني علطول وتحسسنى بالنقص
ودايما تسمعني الاهانة بودني
لأنها عارفة ان ماما فى صفها علطول
وعارفين انى مش بحب اعمل مشاكل فى البيت
او اكون انا سببها
وعلشان كده مش برضى اشتكى لبابا كل حاجة بتحصل
علشان مبقاش انا سبب العكننة فى البيت
ماما بصوت واطي.سيبك من سميرة دلوقتى
انتى بقى بتفكرى تفتحي سكة معاهم ازاى
مروة بأبتسامة.بيكي يا حلوة انتى
ماما .بيا انا
ازاى يا حبيبة امك
مروة.انتى هتتصلى بيهم من تليفونى
وتعتذري على اللى بنتك عملته
وتوضحي انها مختلة او مش بكمل قواها العقلية
وبتتعامل احيانا بعدم اتزان
ومن هنا لهنا
تتعرفوا على بعض
تاخدى رقم مامته
تتصاحبى عليها
تعزميها مرة على الغدا فى اى مكان
وطبعا بقى انتى عارفة اى ام بيكون عندها بنت وعايزة تجيبلها عريس كويس
بترسم بنتها الملاك ابو جناحات
مش انا اللى هفهمك يا نوجا يا حلوة انتى
ناجية وعجبها جدا تفكير بنتها.يخربيت مخك ده
لحقتى يابت ترسمى الحكاية
وتخططي
وتعملى التمثيلية كمان اللى هتتمثل
مروة.ايوة طبعا
حلاوتها فى حموتها كده
علشان مينسوش اللى حصل
وينسونا
انا عايزاهم يبقوا فى وسطنا فى اقرب وقت
الواد ده انا حطيته فى دماغي بصراحة
ومش هرتاح غير لما ييجى
ماما.يبقى ييجى يا حبيبة امك
الصبح نتصل بيهم
واعمل اللى هتقوليلي عليه
مروة قامت باست ناجية من خدها
وسابتها ودخلت اوضتها
تتفرج على نفسها فى المرايا
وهى حاسة انها هتبقى مرات الدكتور
وهتركب العربية البي ام
وتلبس الماظ
وتتنقل لمكان تانى احسن من اللى هما فيه
اه اكيد كل انسان بيطمح يكون احسن
بس مش بالطريقة دى
ومش بالرخص ده
ولا حتى بالتقليل من حد علشان يقدر يوصل لهدفه
قعدت ناجية فى الصالون
سرحانة فى اللى حصل مع بناتها فى عيد الميلاد
بس مهتمتش باللى حصل لسميرة ولا لزعلها واحراجها
زى ما اهتمت ان بنتها حطيت عنيها على شاب غني ومركز
وده اللى خلاها تبتسم وتحط رجل على رجل
وهى بتمثل لنفسها ازاى هتتعامل مع ام الشاب ده
بعد ما قالتلها مروة
ان الست مش سهلة
وانها شايفة نفسها شويتين تلاتة
سمعت صوت المفاتيح
عرفت ان عمر رجع من برة
اختفيت ابتسامتها اللى كانت مرسومة
وقعدت حاطة رأسها بين ايديها
وباصة فى الارض
دخل عمر من الباب.السلام عليكم
رفعت راسها وهى بتمثل الحزن.عليكم السلام ورحمة الله
حمد الله على السلامة
عمر.الله يسلمك
مالك يا ناجية
فى ايه
قاعدة كده ليه
ناجية.مالى
مال حالى خلاص يا عمر
انا حطيت صوابعى فى الشق من بنتك دى
انت لازم تشوفلها حل بقى
علشان خلاص البت اتجننت
عمر بعدم استيعاب.بنتي مين
واتجننت يعني ايه
هو حصل ايه يا ناجية ما تتكلمي
ناجية بتمثيل.طيب اقعد يا خويا احكيلك اللى حصل
حقك عليا هنكد عليك
بس اعمل ايه غلبت معاها
بس هى مفيش فيها فايدة
عمر.مين يا ناجية
قصدك سميرة
ناجية.واحنا عندنا حد بيعمل مصايب غيرها
اسمع يا سيدى اللى عملته النهاردة عند الناس وفضحت اختها
وخليت الناس تضحك عليها
الدلالة
رفيقة الشيطان
الفصل الخامس
مش عايزة احكيلكم ازاى ماما كبرت الموضوع لبابا علشان تضمن ان رد فعله يكون اقسى من كل مرة تشتكيله مني فيها
صورتله الموضوع وكأنى فعلا كنت رايحة عيد الميلاد ادور على واحد ارمي عليه نفسي
حتى برغم ان بابا حاول يبرر تصرفي بأن ممكن يكون وصلها بطريقة مبالغ فيها
لكن هى متوصيتش فى انها تنادى على مروة
علشان تمثل قصاد بابا اللى حصل من اهانات وتقليل ومتاخرتش فى انها تعيط قدامه كمان
دليل على كسوفها واهانتها وسط الناس بسبب تصرفى اللى كان مالهوش علاقة بالادب والتربية
زعل بابا جدا
زعل مني حتى لو مجرد هزار مينفعش اهزر مع شاب بالطريقة دى
ولا اهزر مع شاب ماليش علاقة بيه اصلا
ده ولا قريبي ولا لينا علاقة بيه لا من قريب ولا من بعيد
وده كان سبب كافى يخليه يعاقبني فعلا
اه بالنسبالي ايا كان اللى بابا بيعمله اهون بكتير من اللى امي ومروة بيعملوه
خاصة ان مروة وماما بيكونوا متعمدين يزعلوني
لكن بابا الصورة اللى وصلتله كان لازم تخليه يعاقبني
وعلشان كده قرر انى ميبقاش معايا تليفونى ويتاخد مني
وانى مخرجش خالص غير للمدرسة
وبرغم انى حاولت كتير ابرر لبابا اللى حصل
لكن هو كان مقتنع بحاجة واحدة
انى مجرد هزارى مع شاب غريب عني ده فى حد ذاته يستاهل العقاب
مش مهم بقى ايه اللى حصل
ولا ايه المناسبة ولا ولا ولا
هو اخد قراره وخلاص
فاتت الليلة
مش هقول انها من اصعب الليالى اللى فاتت عليا
لان فيه اصعب منها بكتير عيشته
لكن كانت مش حلوة بكل حاجة حصلت فيها
نمت وقلبى واجعني
اهانتى والظلم اللى اتظلمته بسبب حاجة مش مقصودة كان تاعبنى
وده كان سبب فى انى اصحى تانى يوم
وجنب كامل من جسمي مش بيتحرك
شفايفي معووجة
ولسانى تقيل
وايدي مش قادرة احركها
ورجليا مش قادرة اقف عليها
خوفت من شكلى وخوفت. من اللى حصلى
عيطت بصوت عالى
دخلت ماما تجرى على الاوضة
ماما.يالهوى
فى ايه ايه يا سميرة
مالك
اتكلمت بالعافية.مم.مش عارفة
مش ق.قادرة احرك ايدي ورجلي
وشى منمل
ماما صرخت من خضتها
مروة دخلت على صوتها
لما شافتنى اتصدمت.ايه ده مالك يابت فى ايه
ماما بخوف.البت مش بتحرك ايديها ولا رجليها يا مروة
اختك مش حاسة بوشها
مروة.يعني ايه يا ماما اتشليت يعني
ماما.فى ايه يا مروة
دى كلمة تقوليها انتى كمان
انتى بتخففى عن العيان ولا بتمرضيه زيادة
روحى كلمي ابوكى ييجى يودينا لدكتور
مروة.طيب وليه نستنى بابا
ما تيجي ننزل احنا بيها دلوقتى
ناخد تاكسى ونطلع على اقرب مستشفى
بدل ما التأخير يكون غلط
ووشها يثبت على كده وتبقى كملت بقى
اصل هى ناقصة عوجان سحنة كمان
ماما.طيب هقوم البس
قامت ماما خرجت من الاوضة
وخرجت بعدها مروة وهى بتقولى .انتى ناقصة حلاوة على حلاوتك
امرى لله اروح اغير هدومي
كان نفسي حد منهم يطبطب عليا او ياخدني فى حضنه
لكن محصلش
دى كمان اتريقت على التعب اللى ماليش فيه يد
فعلا نزلنا على اقرب مستشفى
وهناك قالوا ان ده التهاب عصب سابع
وانى هحتاج شوية وقت علشان ارجع لطبيعتى تانى
لان اللى حصل ده حصل معايا من بليل
وانا رايحة المستشفى على العصر
والوقت الطويل ده على انى ماخدش اى علاج سريع
كان سبب فى انى احتاج شوية وقت لحد ما ارجع تانى لطبيعتي
ماما.زعل ايه اللى زعلتيه انتى يا سميرة علشان يجرالك كده
انتى بتعرفى تزعلى يا بنتي
مروة.زعل ايه يا ماما بس
هى سميرة بتعرف تزعل
دى تلاقيها زعلانة لأنها مشيت من عيد الميلاد امبارح من غير ما تاكل تورتة
ماما.بس بقى يا مروة
متغلسيش عليها دلوقتى
مش ناقصين بلاوى تانية كفايا اللى حصل
مروة.ههههه شكلها كوميدي اوى بصراحة
ماما.وبعدين بقى يا مروة
قولت كفايا
مروة.طيب بقولك ايه يا ماما
مش هتتصلي بالناس زى ما اتفقنا
ماما.احنا فى ايه ولا فى ايه دلوقتى يا مروة
نرجع بس البيت
ونشوف حكاية اختك دى
وبعدين نبقى نشوف موضوع الناس
مروة.ياماما كده كده سميرة هتاخد شوية وقت وهتخف
الدكتور قالك علاج طبيعي وشوية حقن وخلاص
لكن الموضوع ده لو نسيناه
يبقى خلاص كده
ماما.طيب استنى نوصل البيت بس واكلمهم حاضر
مروة.بقولك ايه قوليلها انك بهدلتيها
وروحنا بيها المستشفى من كتر ما عاقبتيها
ماما.خلاص يا مروة
خلاص يا حبيبتى
نرجع البيت ونتكلم
كل ده كان بيحصل فى التاكسي
ماما قاعدة جنب السواق
ومروة قاعدة جنبي
والكلام قدامي وقدام السواق
تقريبا صعبت عليه
كل شوية كان يبص لمروة بقرف فى المرايا بتاعت العربية
كنت عايزة الفت انتباهها انها تركز شوية احنا مش فى البيت علشان كل اللى بتقوله ده ولا بتعمله
لكن هى مهتمتش تبص عليا اصلا غير علشان تضحك على وشى اللى كان معووج
سابت ان الدكتور قال من الزعل ومسكت فى ان شكلى بقى مضحك اكتر من الاول
اه انا مش باخد حاجة على اعصابي
لكن اللى حصل معايا امبارح كان غير اى حاجة بعديها
وفكرة انهم يستهونوا كمان بتعبي
كانت اصعب واكبر
رجعنا على البيت
سندتنى ماما ومروة
وطالعين العمارة
ام هند وهند كانوا نازلين سوا
ام هند بخضة.ايه ده خير فى ايه
مالك يا سميرة
مالها يا مدام ناجية بعد الشر
ماما.بسيطة الحمد لله
الدكتور قال شوية زعل
هند.بعد الشر عنك يا سميرة
يابنتى مش قولتلك الموضوع تافه
ليه تاخديه على اعصابك كده
حاولت ارد عليها ولساني تقيل.الحمد لله
ام هند.يا مدام ناجية البنت كانت بتهزر والله
بس هى مرات عم هند كده
طبعها صعب شويتين
بتغير على ابنها غيرة ولا كأنه جوزها
واى واحدة تقرب منه حتى لو زميلته
لازم تتعمد تقلل منها
لكن الشهادة لله سميرة مغلطتش
وهند بنتي كانت واقفة وحاضرة الموضوع
واللى عندنا احنا هما اللى اتمادوا فى الغلط
هند.اه والله يا طنط
سميرة معملتش حاجة تزعل
حتى عمرو كان مضايق جدا من رد فعل اخته ومامته
بس هما طبعهم كده الغيرة عندهم صعبة اوى
مروة.عندهم حق
اى حد بيحب حد بيغير عليه
ام هند.ايوة طبعا يا حبيبتى
بس مش للدرجة اللى تخلى الواحد يجرح الناس ويزعلهم
انا والله هكلمها واقولها اللى حصل لسميرة علشان تعرف كلامها اللى بيوجع ده عمل ايه فى البنت
ناجية.لالالالا مفيش داعي
هى بس علشان باباها بليل عاقبها على انها هزرت مع شاب
فهى زعلت
لكن الناس مالهاش علاقة بالموضوع
سميرة اصلا مشغلتش بالها بكلامهم
هند.ازاى يعنى يا طنط
دى سميرة كانت هتعيط من كتر زعلها امبارح
مروة.يا هند سميرة مش بتزعل من حاجة
لكن هو علشان بابا منعها من التليفون والخروج
ده اللى فرق معاها
لكن غير كده والله مش بتشغل بالها بحاجة
والناس اصلا مغلطوش
هو فعلا اكيد ابنهم مش هيشغل باله بكلمة واحدة زى سميرة
ام هند.ومالها سميرة يا مروة
دى ست البنات
وبعدين اختك ياحبيبتى متتكلميش عليها كده قصاد حد
ده انتى تدافعي عنها حتى لو غلطانة
متشمتيش حد فيها
مروة بقرف.ازاى يعني يا طنط
تبقى غلطانة واقول انها صح
علشان محدش يشمت فيها
لاء طبعا
لازم قدام الناس تعرف انها غلطت
علشان تحس على دمها ومتكررش غلطها تانى
هند.خلاص يا جماعة مش وقت الكلام ده
سميرة اصلا باين عليها التعب جدا
والموضوع مكانش مستاهل
الف سلامة عليكي يا سمسمة
اطلعي ارتاحى
ونبقى نيجي نطمن عليكي
حاولت ابتسم بس مقدرتش
حاسة ان الزعل اللى جوايا اكبر من انى اكدب على حد بضحكة صغيرة
طلعنا على البيت
ودخلنا على الصالون علطول
مروة.يلا بقى يا ست الكل هتصل انا على مي واخليها تديني مامتها علشان تكلميها
ماما.استنى يا مروة طيب اخد نفسي من المشوار
مروة.ماما بقى هو انتى علطول كده لازم تذليني علشان تعمليلي اى طلب اطلبه منك
تعالي شوفى امهات صحابى فى الكلية
مصاحبين بناتهم ازاى
وهما اللى بيفكرولهم وبيدورولهم على مصالحهم
لكن انتى بصى عايزة تضيعي الفرصة من ايدي
ماما.مش عارفة انا يا مروة انتى ياحبيبتى مفيش حاجة بترضيكي
اطلبيها يا مروة هكلمها حاضر
كانت ماما ضعيفة جدا وسلبية اوى من ناحية مروة
مش عارفة ايه السبب بجد
بس انا محدش منهم وجهلي كلمة من وقت ما طلعنا من المستشفى
ولا حتى فكروا يتكلموا فى كل الكلام ده لما يدخلونى اوضتى
وانا كنت تعبانة للدرجة اللى بيها حاسة انى مش قادرة امسك اعصابي علشان اقوم انا ادخل اوضتى
فعلا طلبت مروة التليفون
وفتحت الاسبيكر علشان لما ماما تكلم مامت عمرو
تبقى سامعه اللى بيتقال ايه
مروة.مساء الخير
مي عاملة ايه
مي.مساء النور
مين
مروة.انتى مسجلتيش الرقم ولا ايه
انا مروة اللى اتقابلنا امبارح فى عيد ميلاد هند
مي.ااااااه
اخت البنت اللى كانت بتعاكس اخويا
مروة.اه انا
بصى انا رجعت امبارح حكيت لماما اللى حصل
وكانت عايزة تكلم مامتك تعتذرلها
فلو مامتك فاضية ممكن تكلمها دقيقة واحدة
مي بعجرفة.طيب ثواني اشوفها فاضية ولا لاء
فعلا مها كلمت ماما
مها.الو
ماما.السلام عليكم
مها.عليكم السلام
ايوة يافندم
ماما.انا مامت سميرة
مها.سميرة مين
ماما.انا كنت بكلم حضرتك اعتذرلك على اللى حصل امبارح فى عيد ميلاد هند
مها.اااااه
البنت التخينة دى
خلاص حصل خير
اختها اعتذرت بما فيه الكفايا
ربنا يشفيها
ماما.ايه ده عرفتي منين انها تعبت
مها.ماهى اختها امبارح قالت ان عقلها غير مكتمل
ماما.دى يا عيني من اللى باباها عمله فيها امبارح
صاحية النهاردة وشها معووج
ويديها ورجليها مش بيتحركوا
والله لسة راجعين بيها من المستشفى
مها.طيب يا مدام لما هى مش بتعرف تتصرف كده
بلاش تخلوها تتواجد مع ناس متعرفهمش
علشان متتحطش فى مواقف محرجة كده
وتضطركم تعتذروا وتبرروا
ماما.ولا كان على بالنا تعمل حاجة زى دى يا مدام والله
المهم انتى بس ما تزعليش وقولى للدكتور ما يزعلش
دى مروة بنتى من امبارح دمها محروق من الموقف
معرفتش تنام ولا راضية تاكل
وتقولى يا ماما كنت فى نص هدومى من الكسفة
اصل احنا يا مدام مش متعودين على الحفلات والحاجات دى
ويوم ما تروح تحضر مناسبة
تحرج اختها كده وتقلل منها
مها.محصلش حاجة صدقينى
خلص الموضوع من امبارح
ماما.يبقى تقبلي عزومتى بقى علشان اتأكد انك خلاص مش زعلانة بجد
وكمان لازم نتأسف للدكتور بنفسي
مها.مفيش داعي صدقيني
الموضوع مش مستاهل كل ده
والدكتور كمان معندهوش وقت
ماما بألحاح.هو حضرتك مش عيزانا نتعرف عليكي بقى ولا ايه
دى مروة من امبارح عمالة تقول فى اشعار فى ذوقك وشياكتك
شوقتنى انى اشوف حضرتك واتعرف عليكي
انا مشعارفة ازاى بقالنا سنين جيران ام هند
ومنعرفش بعض
مها.احنا مش بنيجي كتير
وعموما اهى جت الفرصة واتعرفنا
اتشرفت بحضرتك
ماما.وانا اكتر وعلشان الشرف ده بقى يكمل
تقبلي عزومتى
شوفى تحبي نتقابل فى النادى ولا تحبى نتغدى عندنا فى البيت
هعملك شوية اكل بقى انما ايه
اتحداكي اكلتى فى طعامتهم
مها.طيب هشوف بس ظروفى ايه علشان عندى التزامات والله
واخلى مى تكلم مروة تأكد عليها
ماما بألحاح.هستناكي
اوعى تنسي
والله هاخد على خاطري
وبعدين طول ما انا لسه مش مقتنعة انك مش زعلانة من عملة البت سميرة
هفضل اعاقب فيها كده
يرضيكي
احسن تتخن اكتر ما هى
حاكم دى لما بتتعاقب بتفضل تاكل اكتر
مها.ان شاء الله نتقابل قريب
ناجية.فى انتظار الرد
مها.مع السلامة
فعلا قفلت مها الخط مع ناجية
وكانت بتتكلم معاها بمنتهى التعالى
مي.فى ايه يا ماما
مالهم
هما وسعوا الدنيا كده ليه
مها بتضحك.ولا وسعوها ولا حاجة
دول تلاقيهم بس اخوكي دخل دماغهم
فاكرين انهم بالطريقة دى
هيعرفوا يوصلوله يعنى
مي.ايه
ايه الهبل ده
انتى ايه اللى خلاكي تقولى كده
وبعدين هو خلاص يعنى
عمرو يوم ما يفكر هيبقى بيفكر فى الاشكال دى
مها.يابت يا عبيطة مش اخوكي اللى بيفكر
هما اللى بيفكروا
خليهم بقى على راحتهم
يشوفوا مين ينولهم اللى فى بالهم
مي.همسح رقمها حالا
ايه رمى الجتت ده
مها.ولا تمسحيه ولا حاجة
علشان لما تتصل بيكي تانى تبقى عارفة انها هى ومترديش عليها
خليهم يسلونا
هههههههه
مي.قال يحطوا عنيهم على عمرو قال
ليه وهو عمرو هيختار اى بنت والسلام كده
ده لو مكانتش االبنت دى انا راضية عنها من شعر راسها لصوباع رجليها
والله ما اهنيها عليه ساعة زمن
مها.يابت يا عبيطة
انتى اللى يشوفك كده يقول عليه جوزك مش اخوكي
ده انتى اللى هتبقى حما يا مي مش انا
مي.ايوة انتى عايزة عمرو واحدة تيجي تشاركني فى الدلع اللى بيدلعهولى
ولا تاخد من حبه ليا كده واسيبها
لاء ياخد واحدة علشان يبقى اتجوز وخلاص
لكن ميحبهاش
تبقى زيها زى اى حاجة فى البيت
مش كفايا بابا وسفره
كمان تيجي واحدة تاخد عمرو مني
لاء مش هقبل
مها بتضحك.يابنتى ما هو انتى مسيرك تتجوزى برضه
مي.بس برضه ميحبش اى واحدة غيري
الا انتى طبعا يا مامتى
مها بتضحك.احنا اللى يحكمنا على حد ميخلصش مننا
مي.ايوة ياست الكل
ما انا بنتك بقى
مها.شاطرة يا مي
اوعى فى عمرك تسيبي حد يشاركك فى حاجة بتحبيها
فى الوقت ده كنت انا قاعدة
مأكلتش اى حاجة من الصبح
حتى الادوية بتاعتى ماما نسيت تجيبها واحنا طالعين
ماما.يااااه يا مروة
بصى نسينا نجيب الدوا بتاع اختك
مروة.بصراحة كنت مشغولة بموضوع الست دى
كنت عايزاكى تكلميها
ماما.طيب ما تنزلى يا مروة تجيبي لأختك الدوا بتاعها
خليها تاخده علشان يعمل معاها مفعول
احسن بجد تفضل على الحال ده
مروة.ييييه بقى ي ماما
انا فرهدت اصلا من مشوار المستشفى
بصى انا هقوم اخد دش كده واهدا شوية
وانزل اجيبهولها
او ابقى اما اطلع اجيبلك رقم الصيدلية تتصلى بيهم
يجيبولنا هما الادوية
ماما.خلاص يا حبيبتى ماشى
انا هقوم اغير هدومى وافرد جسمي شوية
احسن تعبت من المشوار
وانتى يا سميرة قومى بقى غيري هدومك دى
وشوية وابقى اجيبلك علاجك
سكاكين بتقطع فى قلبي
تصرفات مستحيل تخرج من ام واخت شقيقة
وافعال محدش يتحملها
للدرجة اللى كنت حاسة بيها ان قلبى هيقف من كتر زعلي منهم
لكن اللى فوقنى شوية من صدمتى من تصرفاتهم
جرس الباب لما رن
يتبع
تعليقات
إرسال تعليق