 |
الجميلة والذئب
من الحلقة الاولي حتي الحلقه السابعه والاخيره
يتجمع الناس علي صوت صراخ يخرج من صيدلية دكتور سعد .يدخلوا الصيدلية ليجدوا جثة دكتور سعد ملقاه علي الارض غارقا في دمائه بينما نانسي التي تعمل عنده في الصيدلية تبكي بانهيار وصراخ مدوي.
تاتي سيارة النجدة وسيارة الاسعاف والطب الشرعي الي الصيدلية بينما يتجمع اهالي الشارع يتحدث كل مجموعة منهم عن دكتور سعد البعض يتحدث عن مهارة دكتور سعد الطبية وشطارته في عمله وانه لا يستحق هذه النهاية المؤلمة .والبعض يتحدث عن اتجاره في الحبوب والادوية الممنوعة وكم الشباب الذي ضاع بسببه.والبعض يتكلم عن انه رغم انه تعدي الخمسين من عمره الا انه كان متصابي وزير نساء.
انتهي عمل البحث الجنائي وتم وضع الجثة في سيارة الاسعاف وغادرت سيارات الشرطة والاسعاف مكان الحادث .
وفي قسم الشرطة تم اخذ اقوال نانسي عاملة الصيدلية :
الضابط: اسمك وسنك وعملك؟
نانسي: اسمي نانسي عندي ٢٤سنة وبشتغل في صيدلية دكتور سعد في شفت الصبح من ٨ ص الي ٨ م.
الضابط: تعرفي ايه عن الحادث؟
نانسي: في يوم الحادث استلمت الشفت الساعة٨ زي كل يوم وبعدها ب ٥ دقائق وصل دكتور سعد للصيدلية لانه بيستلم الصيدلية معايا في نفس الشفت وابنه ومعاه شاب تاني اسمه وائل بيستلموا شفت الليل.اليوم كان طبيعي جدا بس دكتور سعد مش كان زي كل يوم .كان متضايق وعصبي شوية.و بعد العصر طلب مني اني اشتري غداء لينا وفعلا اشتريت ساندوتشات ورجعت واول ما دخلت الصيدلية شفت دكتور سعد مرمي غرقان في دمه علي الارض صرخت ورميت الساندوتشات علي الارض ولما صرخت اتجمع الناس من الشارع ومن وقتها لدلوقتي وانا مش مصدقة اللي حصل.
وبعد خروج نانسي من مكتب التحقيقات دخل وائل اللي بيشتغل في شفت الليل مع دكتور كمال ابن دكتور سعد وكانت اقواله:
الضابط: اسمك وسنك وعملك؟
وائل: انا اسمي وائل عندي٢٩ سنة بشتغل مساعد صيدلي في صيدلية دكتور سعد.
الضابط: تعرف ايه عن الحادث؟
انا مش اعرف اي حاجة عن الحادث لاني سلمت الشفت الساعة ٨ ص وروحت نمت ومش صحيت الا علي الخبر ده .
الضابط: تعرف ايه عن دكتور سعد ؟
وائل: دكتور سعد هو صاحب الصيدلية اللي انا بشتغل فيها وهو مقسم العمل بينه وبين ابنه شفتين .في الاول كان بيشتغل معايا في شفت الليل وابنه دكتور كمال كان في شفت النهار بس من ساعة ما نانسي اشتغلت في الصيدلية هو غير الشفت مع ابنه رغم ان زباينه كان اغلبهم بيروحوا الصيدلية بالليل.
الضابط: زباينه؟ تقصد ايه بزباينه؟
وائل: دكتور سعد كان له زباين كانوا بيشتروا منه بعض الادوية الممنوعة ومش كانوا بيشتروا الا منه هو شخصيا ولما غير الشفت بقوا بيشتروا منه بالنهار.
الضابط؛ انت قلت ان دكتور سعد غير الشفت من الليل للصبح بعد ما نانسي اشتغلت في الصيدلية .هو كان معجب بيها ولا هو كانت عينه زايغة عموما ولا مجرد صدفة؟
وائل: دكتور سعد كانت عينه زايغة عموما وبالاخص علي نانسي .
وبعد خروج وائل من مكتب التحقيقات دخل دكتور كمال ابن القتيل وكانت اقواله :
الضابط: اسمك وسنك وعملك؟
انا اسمي كمال عندي ٢٦ سنة دكتور صيدلي بشتغل في صيدلية والدي دكتور سعد.
الضابط: تعرف ايه عن الحادث ؟
كمال: معرفش اي حاجة غير اني كنت نايم بعد ما رجعت من الصيدلية وصحيت علي صراخ ماما لما عرفت الخبر .
الضابط: والدك كان له اعداء ؟ او تتهم حد بقتله؟
كمال: مفيش حد اقدر اتهمه بقتل بابا لانه مكانش له اعداء .
الضابط: والدك كان بيبيع ادوية ممنوعة ؟
كمال:لا دي اشاعات والدي كان صيدلي محترم وكا الناس تشهد بكده.
الضابط: يعني متعرفش حاجة عن بيع والدك للادوية الممنوعة؟
كمال: لا يا فندم
وبعد خروج كمال من مكتب ضابط التحقيق دخل العديد من جيران دكتور سعد للادلاء باقوالهم التي اختلفت ما بين بيعه للادوية الممنوعة وبين علاقاته النسائية وبين انه دكتور صيدلي متميز مشهور بالكفاءة والتميز..
ومن معاينة مكان الحادث وجثة القتيل تبين انه تلقي عدة طعنات في القلب والرقبة اودت بحياته في الحال .كما تبين سرقة كل الاموال الموجودة من الصيدلية وتبين سرقة كميات من الادوية الممنوعة.
نانسي تجلس في منزلها غير مصدقة لما حدث وتجد تليفونها بيرن فتمسك التليفون فتجد وائل يتصل بها.
نانسي ترد علي تليفون وائل فتجد وائل بيختلق معها اي حوار ليتكلم معها (هي عارفة في نفسها ان وائل معجب بها من يوم ما بدات شغل في الصيدلية) ترد عليه بزهق وتقفل مع وائل الحوار بسرعة .
وائل بيكلم نفسه ( يعني بردو مش هعرف اوصلك حتي بعد ما غار في داهية).
بعدها بقليل تليفون نانسي بيرن تمسك التليفون تجد رامي ( رامي هو الانسان الوحيد اللي بتحبه نانسي ) ترد نانسي بلهفه عليه ..
رامي: ازيك يا نانسي عاملة ايه؟
نانسي: تمام. عرفت اللي حصل؟
رامي:خير؟
نانسي: دكتور سعد اتقتل
رامي: مش معقول .وعرفوا مين اللي قتله؟
نانسي: لا لسه بس الدنيا مقلوبة وبيحققو مع الكل .
رامي: وحققوا معاكي؟
نانسي: ايوه
رامي: وبعدين ايه اللي حصل؟
نانسي: ولا اي حاجة .سالوني شوية اسئلة وبعدها مشيت.
في قسم الشرطة يجلس الضابط ومعه اوراق اقوال المحيطين بالقتيل ويحاول استخراج اي خيط يمشي وراه في القضية وفي هذه الاثناء يدخل عليه الضابط المعاون له ويقول له: في مفاجاءة يا فندم.
يرد الضابط : خير؟
يقول الضابط المعاون : كاميرات المراقبة اللي في الصيدلية كانت معطلة قبل الجريمة بربع ساعة.
يتبع ......
( الجميلة والذئب )
الحلقة الثانية
دخل معاون المباحث علي الضابط رئيس المباحث وقال له ان في مفاجأة وهي ان كاميرات الصيدلية كانت معطلة قبل الحادث بربع ساعة .وقد علم هذا من متابعة الكاميرات في هذا اليوم .فامر الضابط باحضار جميع كاميرات الصيدلية وجلس مع المعاون يشاهدون سجل الكاميرات من قبل الحادث بايام .
وفي اثناء مشاهدة الكاميرات لاحظ ان دكتور سعد كان بيدخل عنده الصيدلية شباب واضح عليهم اعراض الادمان وانهم كانوا بيدخلوا مكان بعيد عن الكاميرات وهو مكان اعطاء الحقن للمرضي.واتضح ان نانسي كانت بتكون موجودة في تلك الاوقات في الصيدلية.وكان يحدث هذا في الشفت الصباحي فقط اثناء وجود دكتور سعد .
وفي اثناء تفريغ ومشاهدة الكاميرات وجدوا شيء عجيب ...
دكتور سعد كان مركب كاميرا في مخزن الادوية وهي كاميرا مختلفة عن باقي الكاميرات فهي اعلي دقة في التصوير واصغر حجما .وبمشاهدة سجل هذه الكاميرا وجدوا شئ غير متوقع ...
شاهدوا دكتور سعد يدخل الي المخزن وبعده مباشرة نانسي .يحتضنها فتخلع نانسي بلوزتها بشكل تلقائي وكانها معتادة علي هذا الامر. المشهد يبدو غريب للضابط .هذا الرجل الذي اوشك علي الستين من عمره يحتضن بشهوة فتاة في العشرينات ذات جسم ممشوق وجمال يخطف الانظار وهي تجاري هذا الرجل وكأنها معتادة علي ذلك .
دكتور سعد يتحسس جسدها الممشوق العاري ويقطف زهور شبابها وهي في استسلام كامل له بل والاغرب انها اكملت خلع ملابسها وبدأ يمارس معها الجنس بشكل كامل .
هنا يقف الضابط ويامر باستدعاء نانسي لاخذ اقوالها مرة اخري.
تحضر نانسي الي مكتب الضابط ثم يسألها:
الضابط: هل كان دكتور سعد يتاجر في الادوية الممنوعة ؟
نانسي: انا معرفش حاجة عن الكلام ده.انا كنت بشتغل مساعدة ليه فقط ومعرفش اذا كانت الادوية دي ممنوعة ولا لا واذا كان بيصرف الادوية دي بروشتة طبيب ولا لا.
الضابط: ملاحظتيش ان في مدمنين بياخدوا منه ادوية ممنوعة؟
نانسي: انا مقدرش اميز المدمن من غيره.
الضابط: ما مدي علاقتك بدكتور سعد؟
نانسي: صاحب الصيدلية اللي بشتغل فيها.
الضابط: بس؟
نانسي: ايوه.
الضابط: مكانشي فيه علاقة جنسية بينك وبين القتيل؟
نانسي بصوت عالي وعصبية: ايه اللي حضرتك بتقوله ده..انا عاوزة امشي من فضلك.
الضابط: اهدي بس ..انا هوريكي حاجة وتقوليلي تفسيرها ايه؟
ويبدء في تشغيل سجل كاميرا المخزن حتي تبدء العلاقة الجنسية بينها وبين القتيل.
وهنا تبكي نانسي بشدة وتنهار وتقول للضابط انا هحكي لك علي كل حاجة...
وتبدأ نانسي في سرد قصتها من البداية: بعد ما اشتغلت في اماكن كتير بعد تخرجي كان دايما بتحصلي معاكسات ومضايقات كتير بسبب جمالي اللي كان نقمة عليا في كل مكان اشتغل فيه سواء من الزملاء او اصحاب الشغل او في المواصلات لغاية ما لقيت شغل عند دكتور سعد.
لما قلت لماما في الاول رفضت وقالتلي ده عينه زايغة وراجل مش كويس وانا اخاف عليكي منه.
انا قلت لها يا ماما المضايقات في كل مكان بس الميزة هنا ان الشغل جنب البيت يعني مش هكون بعيدة عنك وبعدين ده دكتور صيدلي محترم ومعروف عن الصيادلة انهم كلهم فوق مستوي الشبهات وفي قمة الاخلاق العالية والاحترام الا نسبة ضعيفة جدا منهم وكمان ده راجل كبير ومش معقوله يبص لوحدة في سن اولاده ده غير اني هشتغل هناك الصبح وهو ببكون بالليل.
ماما وافقت بعد ما اقنعتها واستلمت شغلي هناك.كنت بشتغل مع دكتور كمال ابنه وبصراحه كان محترم جدا واخلاقه عالية وبعد كام يوم لقيت دكتور سعد بدل الشفت مع ابنه وبقي يروح هناك في نفس الشفت بتاعي .بدأت اقلق بس لقيته بيتعامل معايا عادي في الاول بعدها كنت بلاحظ اني لما بطلع للارفف علي السلم كان بيبص علي جسمي جامد.انا قلت في نفسي انه زي ما بيقولوا عينه زايغة بس انا اشتغلت عادي بس احذر منه بس لاني ما صدقت لقيت شغل جنب البيت .
بعدها بدأ يتحرش بيا.... مرة يحاول يمسك ايدي ومرة يخبط فيا وهو ماشي .واجهته وهددته انه لو مش هيبطل الحركات دي اني همشي من الشغل. وفعلا بدأ يتغير وبطل تحرش بيا لفترة لحد ما في يوم اسود بعد ما اطمنت له وبعد ما اتغديت لقيته بيعزم عليا بعصير انا رفضت بس هو صمم وانا مقدرتش اكسفه علشان راجل كبير وصاحب الشغل بتاعي.
بعد ما شربت العصير انا حسيت ان جسمي بيسخن وعندي حالة غريبة بعدها دخل هو مخزن الادوية وبعدها لقيته بيسالني علي نوع دواء وصفت له مكانه قالي مش لاقيه تعالي هاتيه انتي.انا وقتها كانت عندي حالة غريبة .دخلت المخزن علشان اعرفه مكان الدواء .
فوجئت بيه بيهجم عليا وبيحاول معايا .حاولت اصده لفترة مش طويلة بعدها الحالة الغريبة اللي كنت حاساها خلتني استسلم له مع استمرار محاولاته.
وقتها انا فقدت عزريتي وفضلت ابكي فترة طويلة. بعدها هو هدأني وقالي انا بصراحة مقدرش اوعدك اني اتجوزك بس اوعدك ان قبل فرحك علي اي عريس هعملك عملية هترجعي فيها زي الاول بالظبط.
لما قالي كده عرفت انا اد ايه الرجل ده ندل وجبان وانهارت ابكي وقلت له انه انسان ندل وجبان وهددته اني هقول لزوجته وابنه.
ضحك ضحكة سافلة وقالي وانا هقول للعالم كله.تعالي هوريكي حاجة. شفت تصوير كاميرا في المخزن صورت كل حاجة . كنت اول مرة اعرف ان فيه كاميرا في المخزن وعرفت كمان انه حط لي مثير جنسي في العصير هو اللي خلاني في الحالة الغريبه اللي كنت فيها.
بعدها هددني اني لو اتكلمت هيفضحني وهيخلي العالم كله يشوف الغديو.
في الوقت ده حسيت اني وقعت فريسة لذئب في صورة انسان.وقررت اني اترك العمل عنده .
بعد ما غبت يومين لقيته بيتصل بيا وبيهددني انه هينشر الفيديو في كل مكان ولما تحصلي الفضيحة دي مستحيل اني اتجوز بعدها ده غير سمعتي وسمعة اهلي اللي هتكون في الطين.واني لازم ارجع للشغل وفعلا رجعت للشغل.
يتبع.......
( الجميلة والذئب )
الحلقة الثالثة
وتكمل نانسي اقوالها: بعد ما دكتور سعد هددني بالفضيحة لو مرجعتش الشغل اضطريت اني ارجع غصب عني.
ولما رجعت حاول يكرر معايا الموضوع ده وانا كنت رافضة نهائيا ولكنه كان بيضغط عليا بالفيديو اللي صوره.وبعد تكرار ضغطه عليا استسلمت له وبقه يعمل معايا كده باستمرار رغم اني بكون مشمئزة منه جدا وهو كان حاسس بكده بس هو كان كل اللي بيهمه متعته بس.
الضابط بعد ما سمع منها سالها عن علمها بتجارته في الادوية الممنوعة .قالت له انها كانت عارفة بس مكانتش قادرة تتكلم.
الضابط لنانسي: وطبعا انتي قتلتيه علشان تتخلصي من تهديداته ليكي؟
نانسي ببكاء وانهيار: لا انا مقتلتوش ومقدرش اعمل كده.
الضابط يأمر بحبس نانسي ٤ ايام علي ذمة التحقيق.
ينتشر خبر حبس نانسي بتهمة قتل الدكتور سعد بين اهالي المنطقة .يجلس وائل في حزن عميق علي نانسي وغير مصدق انها هي من قامت بهذه الجريمة ويحاولل ايجاد مخرج لها من هذه التهمة.يذهب وائل لزيارة نانسي ويقول لها احكي لي اللي حصل في اليوم ده لازم اساعدك علشان تخرجي من هنا.
تحكي له نانسي عن انها ذهبت لشراء الطعام ولما رجعت وجدت الدكتور مقتول ومرمي علي الارض .سألها وائل عن المحل اللي اشتريت منه الطعام .
ثم يذهب وائل لمحل الساندوتشات ويطلب منه الشهادة في صالح نانسي.
ضابط الشرطة يحاول فك لغز تعطيل كاميرات الصيدلية وقت الحادث ويكتشف انه تم فصل التيار الكهربائي عن الصيدلية قبل الحادث بربع ساعة ولكنه لم يتوصل لمن فصل التيار الكهربائي.
تجلس ام نانسي حزينة علي بنتها والتهمة الموجهة لها ولا تعلم هي ولا اي احد بتفاصيل العلاقة الجنسية بين نانسي والقتيل.
يذهب وائل لزيارة والدة نانسي ويحاول مواساتها وطمئنتها بان الموضوع مجرد تهمة باطلة وستخرج منها نانسي في اقرب وقت .
ام نانسي تشعر براحة من كلام وائل وتشكره علي وقوفه بجوارها هي وابنتها في هذه الظروف الصعبة.فيرد وائل بأنه هذا هو واجبه وان نانسي لها قدر كبير عنده وانه لن يتركها حتي تنال البراءة.
وبعد مرور ٤ ايام من حبس نانسي يذهب وائل مع عم مجدي صاحب محل الساندوتشات للشهادة بأن نانسي كانت موجودة عنده في المحل وقت وقوع الحادث.واخذ معه كاميرات محل الساندوتشات الذي يملكه بعد ما اقنعه وائل ببراءة نانسي .
وبعد انتهاء عم مجدي من اقواله يتم تجديد حبس نانسي مرة اخري وتحويلها لمحكمة الجنايات بتهمة القتل العمد مع سبق الاصرار والترصد.
رامي(حبيب نانسي) موجود في جلسة تجديد حبس نانسي وعند سماعها لتجديد حبسها وتحويلها الي محكمة الجنايات بتهمة القتل العمد تسقط نانسي مغشيا عليها.. وبعد افاقتها تحد بجوارها والدتها ورامي ووائل ويمسك بها عسكري لتحويلها للسجن تنهار نانسي باكية وتقول لرامي امام والدتها ووائل متسبنيش يا رامي متسبنيش انا بريئة .يرد عليها رامي متخافيش مش هسيبك.
والدتها لا تعرف رامي وتتعجب من كلامه مع نانسي . وبعد رحيل نانسي للسجن تقول والدتها لرامي: انت مين يا ابني؟ يرد رامي : انا رامي كنت زميل نانسي في الجامعة و احنا كنا متفقين علي الجواز بس كنت مستني اجهز نفسي واتقدم في الوقت المناسب.
يسمع وائل هذا الكلام الذي يقع عليه مثل جبل الثلج ويقول في نفسه دلوقتي انا عرفت ليه مكانتش بتديني فرصة اتقرب لها.بس انا مقدرش ابعد عنها لاني بحبها وبموت فيها ومقدرش اشوفها وهي بتضيع بالشكل ده.ولكن ما دامت مش بتفكر فيا خلي صاحبها دا يساعدها انا خلاص لازم ابعد مش هفضل واهم نفسي اكتر من كده.
وبعد عدة ايام تتصل ام نانسي بوائل : ايه يا ابني انت فين بقالي كام يوم مش بسمع صوتك ولا بتيجي تطمن عليا زي ما كنت بتعمل ؟ انت عارف انا مليش حد في الدنيا بعد ربنا غير نانسي وتبكي وتقول ودلوقتي مفيش حد بيسال عني.
وائل يرد عليها بتهكم : والاستاذ رامي مش بيسأل عليكي؟
ترد عليه: رامي ده انا معرفوش انا برتحلك انت وبعتبرك زي ابني وكنت عاوزاك تيجي معايا للمحامي علشان نشوف هنعمل ايه.
يذهب وائل لدكتور كمال ابن القتيل ويقول له: انت مصدق يا دكتور ان نانسي هي اللي قتلت والدك؟
يرد دكتور كمال: انا معرفش نانسي كويس لانها مش اشتغلت معايا الا كام يوم في اول عملها ولكني متوقعش انها ممكن تعمل كده.
وائل: يبقي احنا لازم ندور علي اللي عمل كده؟
كمال: واحنا هندور ليه ده عمل جهات التحقيق. وبعدين انت مهتم اوي ليه؟
وائل: ابدا انا صعبان عليا البنت المسكينة دي تتعاقب علي تهمة ملهاش ذنب فيها .واللي عمل الجريمة دي لازم يتعاقب.
كمال ينظر اليه نظرة شك في كلامه ويسأله: هو انت بتحب نانسي؟
وائل بارتباك:مش مسألة حب دي مسألة تعاطف معاها مش اكتر وعلشان القاتل الحقيقي يتعاقب.
وبعد هذا اللقاء بين وائل ودكتور كمال يشك كمال في وائل ان فيه سر وراء اصراره علي تبرئة نانسي كأنه يعرف القاتل الحقيقي او انه بيحب نانسي ويريد ابعاد التهمة عنها باي شكل .وايضا وائل يشك في كمال لانه مش عاوز يساعد نانسي كأنه ما صدق التهمة تلصق بأي حد فيشك وائل في كمال انه ممكن يكون مقتل ابيه.
وفي مكتب المحامي تجلس ام نانسي ووائل مع المحامي لبحث قضية ابنتها ويسأل المحامي والدة نانسي : هو حضرتك قرأتي القضية؟ فترد عليه: لا فيسالها مرة اخري : حضرتك تعرفي سبب اتهام نانسي؟ ترد الام: لا .
فيسالها المحامي : بعد ما قرأت القضية بصراحة موقف بنت حضرتك صعب خصوصا بسبب العلاقة الجنسية بينها وبين القتيل ده ممكن تثبت عليها التهمة خصوصا لتواجدها في مكان الحادث وقت وقوعه . وهنا تصرخ ام نانسي : علاقة جنسية!!!!!!! انا بنتي عمرها ما تعمل كده ابدا .ويسمع وائل هذا الكلام وينصدم بشدة لدرجة جعلته يطلب الاستأذان والرحيل من المكتب.
( الجميلة والذئب )
الحلقة الرابعة
وفي محكمة الجنايات تقف نانسي في القفص عندما بدأ محاميها الدفاع عنها وقد نفي وجودها في مكان الجريمة وقت وقوع الحادث بحجة انها كانت تشتري طعام .كما نفي صحة تسجيلات الفيديو الجنسية للمتهمة مع القتيل بحجة انها مزيفة محاولا بذلك تطويل مدة المحاكمة حتي يجد دليل براءة نانسي كما ادعي ان اقوال المتهمة في المحاضر السابقة ادلت بها تحت ضغط.
قررت المحكمة تأجيل القضية لحين توقيع الكشف الطبي علي المتهمة لاثبات عذريتها من عدمها.
في تلك الاثناء اصبحت فضيحة نانسي علي كل لسان مما جعل الكل يبعد عن والدتها .فاصبحت والدتها وحيدة لا تجد من يسأل عنها حتي وائل زميل ابنتها في الشغل ابتعد ايضا.وذات يوم تقع ام نانسي علي الارض داخل شقتها وتشعر بانها علي وشك الموت.تزحف ام نانسي علي الارض حتي تصل للتليفون وتتصل بوائل ليأتي لينقذها.
وصل وائل لشقة ام نانسي ويأخذها ويذهب للطبيب وينجح في انقاذ حياتها .وبعد تعافي ام نانسي من مرضها تقول لوائل وهي تبكي: انا عارفة يا ابني انك بتحب بنتي وانك زعلت بعد الكلام اللي سمعته بس صدقني بنتي بريئة والكلام اللي سمعته ده كله كدب انا مربية بنتي كويس وهي عمرها ما تعمل كده. واللي بيحب حد لازم يقف جنبه في اصعب الظروف واظن ان مفيش اصعب من ظروف نانسي دلوقتي. لازم تقف جنبها وانا اعتبرني زي امك لأني حاساك زي ابني وابقي اسأل عليا من وقت للتاني بدل ما اموت من غير ما يحس بيا حد.
وائل يتأثر بكلام ام نانسي ويتعهد لها بأنه سيراعيها مثل امه و سيسأل عليها كل يوم وهيقف جنب نانسي للنهاية.
يذهب وائل لرامي ويقول له : يا استاذ رامي احنا لازم نساعد بعض ونحاول نبحث عن دليل لبراءة نانسي ومعرفة القاتل الحقيقي.
يرد رامي: وانت حضرتك دخلك ايه بحاجة زي دي؟
وائل : تقدر تقول من باب الزمالة في الشغل او من باب الشفقة عليها وعلي امها الوحيدة المسكينة.المهم اننا لازم نساعدهم.
رامي: انت بتحب نانسي؟
وائل: مش مهم مين بيحب مين دلوقتي المهم اننا نساعدها هي وامها.
رامي: لو عاوز تساعدها اتفضل ساعدها بطريقتك وانا هساعدها بطريقتي.
استمر وائل في مراعاة ام نانسي والسؤال عنها وفي نفس الوقت متابعة المحامي والبحث عن براءة نانسي .
وفي احدي زياراته للمحامي مع ام نانسي عرف ان كاميرات مراقبة الصيدلية تم تعطيلها بقطع التيار الكهربائي كما هو معروف من قبل ولكن الجديد انه تم قطع التيار الكهربائي من خارج الصيدلية .
هنا وجد وائل مع المحامي دليل ان نانسي لا علاقة لها بالحادث .
وفي المحكمة ترافع المحامي وقال: ان كاميرات مراقبة الصيدلية تم قطع التيار الكهربائي عنها بقطع التيار من خارجها مع العلم انه تم سرقة الصيدلية في الحادث مع وجود نانسي وقت الحادث بعيد عن مكان الجريمة في وقت وقوعها وبالتالي فأن الجريمة وقعت بغرض السرقة وان المتهمة بريئة من التهمة الموجهة اليها.
وهنا تتدخل النيابة وتقول ان الفيديو الذي توجد فيه المتهمة وهي تمارس الجنس مع القتيل تم فحصة واثبات صحته وانه غير مزيف كما ان التقرير الطبي للمتهمة بعد توقيع الكشف الطبي عليها اثبت ان المتهمة غير عزراء وانها فقدت عزريتها منذ عدة سنوات حتي من قبل عملها بالصيدلية عند القتيل.
وهنا تصرخ نانسي باكية داخل قفص الاتهام : بريئة...بريئة....بريئة.وتبكي ام نانسي بمرارة بينما وائل ينظر لنانسي بصدمة فهو كان يرسم لها صورة في خياله كملاك برئ ولم يظن يوما ان سلوكها سئ لهذه الدرجة ويشعر بالندم علي حبه لها ومحاولة مساعدتها في محنتها .
يتمسك محامي نانسي بالدليل الذي حصل عليه لقطع التيار الكهربائي عن الصيدلية من الخارج مع سرقة الصيدلية ويطالب المحكمة وجهات التحقيق بفحص كاميرات المراقبة الخارجية للمحلات بمكان الحادث لمعرفة من قام بقطع الكهرباء عن الصيدلية.
وتقرر المحكمة تاجيل القضية لحين فحص كاميرات المراقبة المحيطة بمكان الحادث مع استمرار حبس المتهمة.
( الجميلة والذئب )
الحلقة الخامسة
بعد فحص جهات التحقيق لكاميرات المراقبة الخارجية للمحلات الموجودة في الشارع ليجدوا مفاجأة وهي ان احد الشباب قام بفصل التيار الكهربائي عن الصيدلية وان هذا الشاب استمر بالقرب من مكان الجريمة حتي تجمع الناس علي صوت صراخ نانسي عنداكتشافها للجريمة و دخول الناس الصيدلية ثم قام باعادة الكهرباء .
وعند البحث عن هوية من قام بفصل الكهرباء وجدوا انه شاب يدعي رفعت كان يعمل فني كهرباء في احدي الشركات الخاصة وانه مفصول من عمله بسبب سوء سلوكه وتعاطيه للمواد المخدرة .
وتقرر النيابة استدعاء رفعت للتحقيق مع عمل تحريات كاملة عنه.
وبعد عمل التحريات عن رفعت وجدوا ان رفعت كان يعمل فني كهرباء لدي احدي الشركات الخاصة وتم فصله من مدة قليلة منها لسوء سلوكه وانه سيئ الاخلاق ويتعاطي المواد المخدرة ويسكن في نفس الحي الذي وقعت فيه الجريمة.وقد ظهرت عليه بعض الاموال علي غير العادة خلال الفترة القصيرة السابقة.
وعند ارسال امر الاستدعاء لرفعت لم يحضر لاخذ اقواله كما انه اختفي وتغيب عن المنزل من وقتها الي الان ولم يظهر
ام نانسي تدخل في مرض شديد وتشعر بقرب اجلها فتتصل بوائل .يحضر وائل الي منزل ام نانسي ويجدها تحتضر وتقول له وتوصيه بعدم ترك ابنتها نانسي تواجه مصيرها الاسود وحيدة في هذه الدنيا وبعد ان يطمنها بانه سيفعل ذلك تلفظ ام نانسي انفاسها الاخيرة ويبكي وائل علي هذه السيدة المسكينة.
يذهب وائل للمحامي ويعرف منه ان من قام بقطع الكهرباء عن الصيدلية هو شاب اسمه رفعت وعند استدعائه للتحقيق معه اختفي !!!!!
ياخذ وائل عنوان رفعت لبحث عنه .
يذهب وائل الي منزل رفعت ويسأل عنه ليعرف انه مختفي منذ عدة ايام ويطلع الي منزله ويلتقي بأهله الذين تظهر عليهم علامات الاجرام والشر ويقومون بطرده من منزلهم بعد محاولة ضربه وايذاءه.
ينزل وائل من عند اهل رفعت ويسأل عن عناوين اصدقاءه واقربائه.
ويبدء رحلة البحث عن رفعت .يذهب الي اصدقاءه واحد واحد للسؤال عنه ولا يجد له اثر واصدقائه منهم من يدعي قطع علاقته معه ومنهم من يدعي انه لا يعرفه من الاساس ومنهم من يدعي انه علم انه سافر .....وهكذا لم يعرف له اي طريق.
ثم ذهب الي اقاربه سواء الموجودين في نفس المدينة او مدينةاخري.
وكلما بحث وائل عن المدعو رفعت ولم يجده ازداد يقينا بأن مفتاح براءة نانسي في يد رفعت وان رفعت هو القاتل.
بعد فترة من البحث والتعب ذهب وائل الي رامي مرة اخري ليساعده في البحث عن رفعت.
ولكن وائل لا يجد رامي وعند السؤال عليه عرف انه سافر للعمل في محافظة اخري .
وقرر وائل تكملة رحلة البحث وحيدا.
وفي اثناء بحثه عن رفعت ذات يوم وهو في طريق العودة لمنزله فؤجي وائل بأيدي تكتفه من الخلف واخري تعصب عينيه ثم ياخذوه في سيارة .
وفي السيارة وهو مكتوف الايدي معصوب العينين يحاول ان يعرف منه هما مين او عاوزين منه ايه ولكن دون رد منهم حتي تصل السيارة الي مكان مجهول .تقف السيارة وينزل ويتم فك العصابه من علي عينيه فيجد امامه شابين لم يعرفهم من قبل.يسألهم وائل: انتو مين وعاوزين مني ايه؟
يرد احدهم: انا رفعت اللي انت بتدور عليه في كل مكان. ممكن اعرف انت عاوز مني ايه قبل ما اموتك؟؟؟؟؟
( الجميلة والذئب )
الحلقة السادسة
يقف وائل مكتوف الايدي امام رجلين لا يعرفهم ويسألهم انتو مين وعاوزين مني ايه؟ يرد احدهما انا رفعت اللي انت بتدور عليه .قولي بقه بتدور عليا ليه قبل ما اموتك؟
يسكت وائل ويفكر داخل راسه.....(بقه انا هضحي بنفسي واموت علشان نانسي اللي ظهرت انها مش كويسه ؟؟ بس الوعد اللي وعدته لامها قبل ما تموت هو اللي جابرني اني اكمل للنهاية.).
رفعت: انت هتتكلم ولا اخلص عليك؟
وائل : ماهو انت كده ولا كده هتموتني اتكلم ليه بقه؟
رفعت يمسك بسلاح ابيض في يده ويضرب وائل بالرجل في بطنه ويقول له اتكلم انت بتدور عليا ليه؟
وائل يتألم بشدة ويرد: كاميرات المراقبة انت ظهرت فيها وانت بتقطع التيار الكهربائي عن الصيدلية قبل الحادث بربع ساعة وكنت عاوز اعرف انت ليه عملت كده واذا كنت تعرف الجاني؟
رفعت : عايزني اقول كده علشان يعدموني؟؟ طب لما اشهد بكده انت هتستفيد ايه؟
وائل: هنقذ البنت المسكينة اللي محبوسة ظلم بسببك.
رفعت: علشان البنت يعني...وانت بقه الواد الحبيب اللي هينقذها واتعدم انا مكانها؟؟؟؟؟ ويضحك بسخرية انت يابني هتموت دلوقتي علشانها وهي اصلا مش بتفكر فيك.
ويكمل رفعت: احب اعرفك يا روميو اللي انت متعرفوش اولا البنت دي تبقي البت بتاعت واحد اسمه رامي ورامي ده كان بيشتري برشام مخدر من دكتور سعد وهو اللي شغل نانسي عنده في الصيدلية ولما الدكتور كان بيتحرش بيها هي اشتكت لرامي ولما رامي راح يكلم الدكتور ويعاتبه وقال للدكتور ان نانسي تبقي زوجته عرفي .الدكتور هنا طمع فيها اكتر وعرف انها واحدة سهلة بما انها اتجوزت رامي عرفي . وفضل وراها لحد ما وقعها وصورها علشان تبقي تحت ايده في اي وقت . بعدها نانسي قالت لرامي انها لازم تسيب الشغل عند الراجل ده بحجة انه لسه بيضايقها ولما راح رامي يعاتب الدكتور تاني وكان هيعمل معاه مشكلة راح الدكتور فرجه علي الفيديو اللي صوره ليها.
هنا بقه رامي خطط انه يقتله. واتفق معايا اني اقطع الكهرباء عن الصيدلية وقت ما يدخل يقتله. يعني رامي هو اللي قتله مش انا ..انا كل اللي عملته اني قطعت الكهرباء ودخلت وراه قلبت الصيدلية واخدت الفلوس اللي فيها وشوية شرايط برشام وبس .
انتو بقه كلكم عاوزين تخلعوا واحد ورا التاني والبسها لوحدي ؟؟ ده مش هيحصل وقبل ما اموت هموتكم كلكم.
وائل: طب انت لحد دلوقتي قضيتك مش كبيرة يعني مش هتشيل القضية كلها اقصي حكم هيكون سجن ١٠ سنين مثلا واللي هيشيل القضية رامي.انما لو قتلتني هتتعدم اكيد . انت ليه بقه خطفتني وعاوز تقتلني وتودي نفسك لحبل المشنقة؟
رفعت: لما انا عرفت اني ظهرت في الكاميرات وانا بقطع الكهرباء روحت لرامي علشان نشوف هنعمل ايه لقيته بيقولي انه مفيش دليل عليه وان انا اللي هشيل القضية كلها .اتخانقت معاه وبعدها لقيته اختفي.ولقيتك انت بتدور ورايا فقلت اخلص منك واشوف مكان استخبي فيه.
وائل:انت لو قتلتني هتتعدم اكيد انما لو سبتني انا ممكن اساعدك اننا نثبت ان رامي هو اللي قتل الدكتور وانت هتاخد حكم بسيط والبنت البريئة اللي انا بساعدها هتخرج براءة وعلي فكرة انا بساعدها عشان وعدت امها قبل ما تموت اني هقف جنبها مش علشان حاجة تانية.
ينظر رفعت لوائل وفي يده السلاح الابيض.......
يتبع.....
الجميلة والذئب
الحلقة السابعة
يقف رفعت وفي يده السلاح الابيض وينظر لوائل ويقتنع بكلامه.ويقول له: طب انا ايه اللي هيضمن لي انك هتساعدني ومش هتبلغ عني و عن مكاني؟
وائل: انا هكون معاك ومش همشي واسيبك لغاية ما نعرف مكان رامي.
يوافق رفعت ويفك قيود وائل ويبدأ رفعت في الاطمئنان لوائل ويبحثوا سويا طريقة لايجاد دليل علي ان القاتل الحقيقي هو رامي ثم اعتراف رفعت علي رامي لضمان محاكمته كشاهد اثبات ضد رامي وبالتالي حصوله علي اقل عقوبة .
يتوصل وائل ورفعت لمكان رامي ويذهب رفعت اليه فيقول رامي لرفعت : انت ايه اللي جابك هنا؟ وعاوز ايه؟
رفعت: انا جيت لك علشان تشوفلي حل لأني بالشكل ده انا هشيل القضية لوحدي.
رامي: طب وانا مالي انا مفيش اي دليل عليا . وبعدين ما تهرب في اي مكان. انا اعملك ايه؟
رفعت: مش انت اللي اتفقت معايا اني افصل الكهرباء وانت هتدخل الصيدلية تقتل الدكتور علشان تنتقم منه بعد اللي عمله مع نانسي صاحبتك؟ هو حد قالك تقتله؟ودلوقتي جاي عاوز تخلع من القضية والبسها انا؟
رامي : اومال كنت عاوزني اعمله ايه بعد اللي عمله مع نانسي ؟ اه اتفقت معاك و قتلت الحيوان ده وكان نفسي اقتلها هي كمان لانها خانتني وكنت فاكر انها هتلبس القضية بس انت اللي طلعت غبي وظهرت في الكاميرات المحيطة بمكان الحادث .
(في الوقت ده كان وائل موجود في المكان بعلم رفعت دون ان يشعر رامي بوجوده وبيسجل الحوار اللي دار بين رفعت ورامي ) وبعد ما سجل وائل اعتراف رامي بارتكاب الجريمة بمساعدة رفعت يترك وائل رفعت ورامي ويترك المكان مسرعا.
يرد رفعت علي رامي: المهم دلوقتي ايه الحل؟
( يفكر رامي في كلام رفعت وان رفعت هو الوحيد االي ممكن يوصله لحبل المشنقة.ويفكر في التخلص منه)
رامي: بص يا رفعت تنت هتبقي معايا هنا لغاية ما نشوف طريقة نهرب بيها للخارج.
يشعر رفعت بنية الغدر من رامي ولكنه يوافق بحذر حتي يذهب وائل بتسجيل الاعتراف للنيابة ليتم القبض علي رامي.
يذهب وائل لتقديم ما تم تسجيله بين رامي ورفعت كدليل علي ان القاتل الحقيقي هو رامي لتبرئة نانسي .
ولكنه بعد تقديم ما تم تسجيله يعلم ان نانسي حاولت الانتحار في السجن وانها ترقد الان في المستشفي بين الحياة والموت .
يذهب وائل الي مستشفي السجن لزيارة نانسي وعندما يقابل نانسي يقول لها: حمد لله علي سلامتك ليه عملتي في نفسك كده؟
نانسي: انا عاوزة اموت .انا خلاص ضعت ومبقاش ليا حد في الدنيا دي بعد موت أمي وكمان رامي معرفش ليه بعد عني ومبقاش يسأل عني خالص.وكمان سمعتي اللي بقيت في الطين.يبقي عاوزني اعيش ليه ولمين؟
وائل: تعيشي علشان تصلحي الاخطاء اللي عملتيها قبل كده وتبدأي حياتك من جديد .وبعدين مش انتي بتحبي رامي عيشي علشانه.
نانسي:بقولك رامي مش بيسال عني خالص ومعرفش بعد عني ليه ؟ وبعدين هو انا هخرج من هنا ؟؟؟؟؟ دا انا شكلي هموت هنا يبقي اموت دلوقتي وارتاح.
وائل: بصي يا نانسي انا جاي النهارده لسببين الاول اني اطمن عليكي والتاني اني ابارك لك .
نانسي: تبارك لي!!!!!! علي ايه؟
وائل: علي البراءة
نانسي: براءة!!!!! بجد؟؟؟؟؟ مش ممكن وعرفت ازاي؟
يحكي وائل لها ما حدث من بداية بحثه علي رفعت حتي تسجيل اعتراف رامي بارتكاب الجريمة وان رامي بعد عنها بعد ما شاهد الفيديو بينها وبين الدكتور وانه كان عاوز ينتقم من الدكتور و يتخلص منها هي ايضا.وانه قدم تسجيل هذا الاعتراف كدليل لبرائتها للمحكمة وفي انتظار قرار الافراج عنها .
نانسي يعود لها الامل في الحياة مرة اخري ولكنها مش قادرة تصدق ان رامي هو اللي عمل كده وانه كمان كان عاوز يتخلص منها.
بعد صدور قرار الافراج عن نانسي تخرج من السجن فلا تجد في انتظارها احدا غير وائل .
( الجميلة والذئب )
الحلقة الاخيرة
بعد صدور قرار الافراج عن نانسي تخرج من السجن فلا تجد في انتظارها احدا غير وائل .
تقول نانسي له: انا مش عارفه اقولك ايه علي وقوفك جنبي لولاك كان زماني ضعت.
وائل: متقوليش حاجة انا عملت اللي كان لازم يتعمل وكمان والدتك كانت موصياني عليكي قبل ما تموت.ويبتسم ويقولها : انا كده خلاص دوري انتهي اسيبك بقه ...اشوف وشك علي خير.
نانسي: انت هتسيبني وتمشي؟
وائل: اظن خلاص انك مش محتاجاني في حاجة تاني.
نانسي : لا متسبنيش ارجوك يا وائل .انا كنت عامية وفتحت .ازاي مكنتش شايفة حبك ليا ورجولتك وشهامتك .مش عاوزاك تبعد عني .انا دلوقتي مليش في الدنيا حد غيرك .
وائل: انا مقدرش اتخلي عنك وقت ما تحتاجيني انتي عارفة انتي غالية عندي ازاي.
نانسي: انا عاوزاك جنبي علطول.
وائل: مش هينفع.
نانسي: يا وائل متظلمنيش زي بقية الناس . انا ضحية لاتنين الاول وثقت فيه واديته كل حاجة علي اساس اني مراته طول العمر وهو للاسف مقدرش الحب والثقة دي وصدق اني ممكن اخونه .والتاني مجرم حقير حيوان اغتصبني وعذبني وبهدلني.
وائل:اللي انتي بتقوليه ده انا عارفه كويس بس انا بردو عارف انك لسه بتحبي رامي . اشوف وشك علي خير.
تتمكن الشرطة من القبض علي رامي ورفعت سريعا قبل ان يتخلص رامي من رفعت .
وكلما مرت عدة ايام تتصل نانسي بوائل لتطلب منه مقابلته ولكن وائل رغم حبه لها الشديد كان دائما يرفض لقائها رغم شعوره بتغير مشاعرها ونسيانها حب رامي وانها بدأت تحبه حقيقي.
تتألم نانسي كثيرا من جفاء وائل لها بعد احساسها ان وائل هو الانسان الوحيد في العالم الذيتطمئن علي نفسها معه.
وبعد عدة اشهر وفي يوم المحاكمة تلتقي نانسي بوائل في قاعة المحكمة ويري وائل نظرات حب واشتياق حقيقي في عيون نانسي بينما رامي ورفعت يقفان في قفص الاتهام .
نانسي: وحشتني يا وائل ليه مكنتش عاوز تقابلني؟
وائل: يا نانسي انا وانتي عارفين ان اللي في قلبك رامي مش انا.
نانسي: ده كان قبل الازمة اللي حصلتلي وكشفت لي كل حاجة.ياريت يا وائل كنا قبلتك قبل ما كل ده يحصل.انا فعلا بحبك انت....مش علشان وقفت جنبي بس علشان اكتشفت فيك شهامة ورجولة وحب مش لقيتهم في حد تاني.
تبدأ جلسة المحاكمة وتطالب النيابة باعدام كلا من رامي ورفعت ولكن استند دفاع رامي علي عقد الزواج العرفي لرامي ونانسي وتسجيل الفيديو للقاء الجنسي بين القتيل ونانسي مما ادي لتخفيف الحكم علي رامي للسجن المؤبد بينما تم الحكم علي رفعت بالسجن ٥ سنوات بتهمة تسهيل ارتكاب الجريمة لرامي .
بعد النطق بالحكم تستأذن نانسي من وائل وتطلب منه انتظارها دقائق معدودة وتذهب لرامي في قفص الاتهام وتقول له : انت ازاي تصدق اني ممكن اعمل كده بارادتي؟ يبقي انت للاسف معرفتنيش..انت ضحكت عليا وسلمتلك قلبي ونفسي وكنت فاكره انك هتقدر حبي ليك لكن للاسف انت مقدرتش..واتسرعت وقتلت الحيوان ده رغم ان كنا ممكن ناخد منه حقنا بالقانون بس علشان نزعة الاجرام جواك مقدرتش تقاومها وقتلته.وتطلب منه ان يطلقها.
ينظر لها رامي من وراء القضبان ويرمي عليها يمين الطلاق ويتركها ويرحل .
تعود نانسي لوائل و تقوله: انا اسفة يا وائل بس كنت بقفل صفحة للاسف كانت صفحة سودا في حياتي علشان عاوزه ابدأ صفحة جديدة معاك.
وائل: نانسي انتي عارفه انه ما .......
تضع نانسي يدها علي فم وائل وتقوله اوعي تقولي مينفعش ....وائل انا بحبك ومش هعيش الا وانت معايا.ولا عاوزني انتحر تاني؟
وائل يضحك ويقولها لا طبعا مش عاوزك تنتحري.
نانسي : تضحك وتقوله يبقي هتتجوزني غصب عنك.
يضحك وائل ويقولها ده كان حلم عمري بس كنت عاوز اتأكد من حبك ليا وانك قفلتي الصفحة القديمة.
تضع نانسي يدها في يد وائل ويرحلا علي ان يبدئا حياتهما مع بعض
انتهت
اتمني ان تكون حازت على اعجابكم
تعليقات
إرسال تعليق