أنــــــــا عـــــــــايــــــــزه أتـــــــجـــوز حــــــــــــــــــرامـــــــــــي الحــــــــلقــــــــه الخامسه والسادسه والسابعه

أنــــــــا عـــــــــايــــــــزه أتـــــــجـــوز حــــــــــــــــــرامـــــــــــي

الحــــــــلقــــــــه الخامسه والسادسه والسابعه

وقفنا الحلقه اللى فاتت عند جميله وعواطف كانوا منتظرين سحس تحت فى حديقه المشفى عشان يتفقو معاه على الكلام اللى هيقولو لباباها

5/

سحس : مساااء الخير

جميله : مساء النور اتفضل اقعد

سحس ينظر لعواطف اللى كانت بتبص عليه بشك وخوف من فوق لتحت : مين الحاجه

عواطف : حاجه فى عينك

سحس : ايييييه هنبتدى بقى ولا ايه

جميله : فيه ايه بس معلش اهدى يا داده ارجوكى

سحس : داده هههههههههه

عواطف : مالها الداده يا حبيبى

سحس : ملهاش يا ستى ها اؤمرى جيبانى على ملا وشى بدرى كده ليه

جميله : الاول مش كنا متفقين انك تتكلم كويس عشان محدش يشك فيك

سحس : اوكيه يا قمر ها حلو اللون

عواطف ما يعجبهاش تصرفاته ولا كلامه : شكلك هتغلبنا معاك يااسمك ايه انت

سحس : اسمى سحس يا مودام

عواطف : مودام ؟؟

سحس : امال اقولك ايه يا خالتى

عواطف : لا بقولك ايه اقعد عدل واتكلم بادب انا مش تربيه سريات يا حبيبى

سحس : لا خوفتينى يا تنت

عواطف : اللهم يطولك يا روح

سحس : حاسبى بس لتفرقع منك يا تنت

عواطف : طنت فى عينك بقولك ايه احترم نفسك وما يغركش كبر سنى لا انا لسه شباب وممكن اقوم عليك اوريك شغلك

سحس : حلوتك يا تنت يا قمر ايوه بقى

جميله : ارجوكم بقى كفايه خلينا نخلص

سحس : الله مش هى اللى بدات

جميله : طيب بليز اهدى شويه دلوقتى عاوزين نتفق هنقول ايه لبابى على شغلك وكمان وانت بتتكلم معاه بلاش تزعجه بكلامك لانه مش مستحمل يعنى واحده واحده وتتكلم بطريقه كويسه

سحس : ما تقلقيش هعجبك هتتفاجىء اساسا منى

جميله : اوكيه لما نشوف هتقوله بقى انت شغال ايه

سحس بتفكير كبير : مممممممم ايه رايك لو قلت انى طيار اصلى كنت نفسى اطلع طيار من زمان

عواطف : ياريت كنت طلعت طيار كانت الطياره وقعت بيك وريحتنا منك

سحس : بتقولى ايه يا مودام انا سمعك

جميله : ما بتقولش دى بتهزر معاك

سحس : اه بحسب ها يلا بقى نطلع لابوكى عشان ورايا شغل

جميله : شغل ايه مش متفقين هتكون ليا وبس الفتره دى على الاقل

سحس : يعنى بلاش اشتغل لالالا ما يرضكيش ده حتى الايد البطاله نجسه

جميله : ارجوك ارجوك بلاش الكلام ده بليز قدام بابى

سحس : ما قلتلك هتتفاجىء فوق منى ومن اللى هقوله

جميله : ربنا يستر ما تنساش بس ..... احنا اتقابلنا فى كندا لما انا كنت بدرس هناك وانت كنت فى شغل اوعى تنسى حاجه

سحس : يا ستى مش هنسى قولتلك يلا بقى خلينا نخلص من ام الحوار داهو

*************************************************

كانت قاعده لسه معاه انشراح اخته وكانت على اخرها من ساعه لما قالها بموضوع العريس اللى متقدم لجميله بنته وشكلها موافقه عليه : انا بصراحه مش موافقه يا بدران وكمان انت اى حد كده هتوافق بيه

بدران : يا انشراح زى ما قلتلك انا مليش دخل فى حياتها تانى كفايه مره وندمت بعدها وكمان ده جواز يعنى عشره طويله

انشراح : وانت شوفته

بدران : لا هشوفه دلوقتى

اانشراح : اه عشان كده نزلت وخدت عواطف معاها

بدران : ايوه راحو يستقبلوه تحت

انشراح : شادى هيزعل خالص انت ما تعرفش بيحبها اد ايه

بدران : الجواز فى الاخر قسمه ونصيب ولسه مش عارفين النصيب فين يا انشراح

انشراح : طيب ادينا قاعدين لما نشوف العريس الغفله ده كمان مين

بدران : وائل عامل ايه

انشراح : كويس

بدران : هو مارحش معاكى الفيلا ليه

انشراح :اصل اه عنده شغل كتير وقالى انه هيفضل فى الشقه لحد ما يخلصه انت عارفه ما بيحبش الدوشه

بجدران : دوشه ايه بس ما البيت عندى واسع وكمان كان هيدرس القضايا بتاعته فى مكتبى تحت

انشراح : مش عارفه بقى هو قالى كده وخلاص

بدران : وشادى بيروح الشركه

انشراح : ها اه طبعا يا بدران بيروحها ده حتى يا حبيبى بيتعب اوى فيها هناك

بدران : طيب كويس خليه يخلى باله منها

انشراح :اه طبعا امال ايه ما تقلقش من الناحيه دى خالص حتى اسال عليه هيقولوك انه بيروح ومخلى باله منها وهو فيه زى شادى ولا امانه شادى انا عيالى مفيش زيهم يا بدران

بدران : طبعا ربنا يوفقهم فى حياتهم

انشراح : ياااااااارب ياخويا يااااااااارب

*************************************************

لتطرق الباب وتفتحه وتدخل تلاقى عمتها لسه موجوده وتقول لباباها : بابى اااا ... وتفتكر انها ما تعرفش اسمه ايه هتقول ايه

بدران شعر بانها محرجه فقالها : فيه ايه مالك هو جه

جميله : اه اه برره

بدران : خليه يدخل طيب

جميله : اوكيه تخرج لسحس وتلاقيه واقف بيتكلم مع عواطف فتقوله : اتفضل وبليز حاسب على كلامك معاه

سحس : ما قلتلك اطمنى على الاخر ياحلوه

عواطف : والله انا خايفه على صحه الباشا منك

سحس : ليه يا مودام بس انا بعبع ولا ايه انا حتى بنى ادم زى زيك

عواطف : طيب يلا يا بنى ادم اتفضل للباشا وحسك عينك تتكلم كلمه كده او كده

سحس : الموادم دى عصبيه اوى يا جميله شكلها هتتعبنى ..... ويدخل جوه وجميله من وراه وتقول لنفسها : والله انت اللى شكلك هتتعبنى معاك ربنا يسترها

سحس اول ما يدخل يجد بدران راقد على سريره وبجانبه اخته انشراح اللى اول ما شافته بصت له من فوق لتحت بنظرات ناريه : السلام عليكم

بدران : وعليكم السلام ورحمه الله وبركاته اهلا وسهلا يا ابنى اتفضل

سحس : والله ما انت قايم خليك مرتاح صحتك اخبارها ايه

بدران : الحمدلله تمام

سحس : يارب دايما يا باشا

انشراح بارف : اهلا بيك ما اتعرفناش اسمك ايه

جميله وعواطف ينظرو لبعض بقلق واضح بينما انشراح واخده بالها من نظراتهم وكلام سحس : اسمى حسين ... حسين دهشان

بدران : اهلا وسهلا

جميله تتنهده بارتياح بينما يكمل بدران حديثه معه : بيتهألى انا سمعت اسم دهشان ده قبل كده انت من عيله دهشان اللى فى اسيوط

حسين : لا حضرتك احنا من هنا مش من هناك هههههههه

بدران : اهلا بيك ياابنى تشرفنا

حسين : عشت الله يحفظك

بدران : طيب خلونى مع حسين شويه لوحدينا

جميله : ايه

بدران : خدى عمتك وعواطف واطلعوا بره شويه عاوز اتكلم مع حسين لوحدنا

جميله تخاف من حسين وممكن يقع فى كلمه كده او كده معاه لكنها طاعت امر باباها وخرجت بره

انشراح: انتى عرفتيه ازاى

جميله مكنش واخده بالها من السوال لانها كانت بتفكر فى اللى بيحصل جوه وخايفه كتير لكن عواطف نكزتها عشان تفوق : نعم يا عمتو بتقولى ايه

انشراح :لالالا انتى مش معايا خالص

جميله : سورى كنت سرحانه شويه

انشراح : سرحانه من دلوقتى ما علينا انتى اتعرفتى عليه فين وامتى

جميله : من ايام دراستى فى كندا

انشراح : ااااه يعنى هو كان بيشتغل هناك

جميله : ها اه اه

انشراح : هو شغال ايه

جميله تنظر لعواطف لتنجدها من كلام عمتها وفعلا عواطف تدخل وتتكلم : انشراح هانم اجبلك شاى

انشراح : لا ميرسى مش عاوزه حاجه

ليتفاجئو بحسين خارج من الغرفه وكان على وجهه ابتسامه بسيطه

جميله : ها ايه الاخبار

عواطف تنحنحت عشان تعرفها ان انشراح واقفه معاهم وجميله خدت بالها

حسين بأدب : بابا هيقولك دلوقتى

جميله : اوكيه ماشى

حسين : مش عاوزه حاجه منى تانى

جميله : لا ميرسى هنبقى نتكلم فون بقى

حسين : اوكيه هستنى منك مكالمه باى

جميله : باى

حسين وهو معدى جنب عواطف : بيباى يا تنت ههههه

عواطف فى سرها : الهى ما توعى تلحق تروح بيتكم يا بعيد

وتدخل جرى عند والدها لتسمع منه ما يقوله

بدران : هو شخص كويس ومن عيله محترمه

انشراح : انت عرفته يعنى قالك على عيلته يا بدران

بدران : لا ما قالش واضح عليه انه طيب وخجول كمان

ينظرو لبعض جميله وعواطف باندهاش وتقول جميله : هو مين ده يا بابا اللى خجول

بدران : حسين يا حبيبتى

انشراح :بس انا شاكه فيه مش عارفه ليه

بدران : مش المهم احنا يا انشراح المهم جميله ايه رايك يا حبيبتى

جميله : اللى تشوفه يا بابى انا موافقه عليه

بدران : بكره هخلى منتصر يسال عنه وبعدين ربنا يقدم ما فيه الخير

جميله فى سرها : ربنا يستر

أنــــــــا عـــــــــايــــــــزه أتـــــــجـــوز حــــــــــــــــــرامـــــــــــي

الحــــــــلقــــــــه السادسه

الحلقه اللى فاتت على ان والد جميله قالها انه هيسال عن حسين دهشان العريس الملقب بــ سحس

(((6)))

كانت فى نفس اليوم نائما فى غرفتها لكنها فجاه استيقظت بعد ما سمعت صوت ياتى من الخارج لبست السدال بتاعها وفتحت باب اوضتها وسمعت ان الصوت جاى من تحت فنزلت براحه خالص عشان محدش ياخد باله لكنها توقفت فى منتصف السلم لما رأت خيال لشخص داخل غرفه مكتب والدها ... قالت لنفسها :

هعمل ايه دلوقتى تلاقيه حرامى وتذكرت حسين وقالت اكيد هو .. وبصوت تحدى : والله لو كنت انت لهوريك الغبيه الهبله دى هتعمل ايه فيك .... وفعلا ركضت بسرعه الى المكتب وقامت بفتح الباب واشعال النور واتفاجئت باابن عمتها شادى وهو واقف وبيحاول يفتح الخزنه

جميله بفزع : شادى انت بتعمل ايه عندك

شادى بارتباك ووضاح عليه حاله السكر : انا انا

جميله : انت ايه اتكلم

شادى : اصلى سمعت صوت من هنا وجيت اشوف من فين

جميله : صوت ايه وايه اللى موقفك عند الخزنه بتاعه بابى ... وتروح لهناك عشان تشوفه اخد ايه لكنها فرحت لانه ما قدرش انه يفتحها : اتفضل امشى من هنا لو سمحت

شادى وهو بينظر لها من فوق لتحت بشهوانيه : امشى اروح فين بس ما تيجى معايا

جميله تبعد ايده عنها : ابعد عنى وايه ريحتك دى انت شارب ايه

شادى : هههههههه شارب ولحيه

جميله : شادى اخرج بره بدل ما اصحى عمتو تيجى تشوفك

شادى : هههههههههههههه صحيها خليها تيجى تشوفنى وانا وانتى هنا متلبسين عشان نتجوز بسرعه اقولك انا هصلح غلطتى معاكى

جميله : ايه انت اتجننت ولا ايه

شادى وبيحاول يعتدى عليها وهى بتقاومه : ابعد عنى يا داده يا داده الحقوووونى

شادى : محدش هيقدر يحوشك عنى يا جميله انا بحبك اوى

جميله تحاول ان تبعده عنها راحت دفعته بعيد ليقع ارضا وهى تجرى بره المكتب تلاقى عواطف نازله جرى على السلم : فيه ايه يا جميله وبتعملى ايه هنا

جميله بدموع : الحقينى يا داده شادى كان عاوز

عواطف تلاقى شادى طالع من اوضه المكتب وهو بيطوح يمين وشمال ويقول : مسيرك ليا يا جميله وهتشوفى هعمل فيكى ايه ...... الهلومه دى كلها فى الاخر هتبقى ملكى انا انا مش حد تانى

عواطف : طب يلا اطلع اوضتك ربنا يهديك

شادى : اوعى كده يا وليه انتى

عواطف : ولولو عليك دسته يا بعيد ... وبعد ما مشى واطمنت عواطف : انتى ايه اللى نزلك دلوقتى

جميله : انا سمعت صوت خبط جاى من اوضه بابى دخلت لقيته كان عاوز يسرق الخزنه

عواطف : طيب يلا اطلعى قدامى بكره هنقول لعمتك كل ده

جميله : وهى يعنى هتعمله ايه ده مش همه وبيقولى قوليلها عشان اصلح غلطتى واتجوزك

عواطف : لالالا الكلام ده لا يمكن يتسكت عليه ابدا انا بكره ليا كلام معاهم

جميله : انا خايفه يا داده ليجيلى اوضتى

عواطف : ما تخافيش يا حبيبتى انا معاكى يلا اطلعى هنام معاكى فى اوضتك الليله عشان تطمنى وبكره هخلى مسعد يجيب نجار ويعمل ترابيس تانيه للاوض كلها بتاعه الفيلا

وتطلع معاها جميله لغرفتها تانى وتقفل عواطف الباب باحكام وتنيمها فى سريرها وتغطيها كويس وتفضل جنبها تربت عليها لحد ما راحت فى نوم عميق

************************************************

وفى الصباح الباكر كانت انشراح فى حديقه الفيلا وكان معها اتصال مهم جدا عشان كده خرجت الحديقه عشان تاخد راحتها فى الكلام

انشراح : ايوه ها ايه الاخبار لالالا مش عاوزه اتدخل خالص لاحسن اثير الشكوك حوليا بقولك ايه انت بس عليك بيها واهتم بيها شويه هما البنات بيحبو الاهتمام والكلام المعسول من الاخر خليها ما تشوفش غيرك اتفقنا يلا سلام انت دلوقتى عشان داخله ليها جوه

وتنهى المحادثه وتدخل ليهم تلاقيهم على مائده الافطار ... قاعدت معاهم وقبل ما تاكل قالتلها جميله باللى حصل من شادى بالليل بانه كان عاوز يسرق الخزنه بتاعه باباها وانه كمان حاول يعتدى عليها ... وكالعاده انشراح كذبتها وقالتها ان ابنها ما يعملش حاجه زى كده ولازم تصدقها وان شادى بيحبها ممكن عشان كده كان بيحاول يقرب بس مش اكتر قالت كلامها وطلعت ليه فوق اوضته عشان تصحيه

اما جميله وعواطف فضلوا يبصوا لبعض ومشيوا وراحو على المشفى وفى الطريق

جميله : مش قلتلك يا داده مش هتصدقنى

عواطف : اما وليه قادره بصحيح معلش يا حبيبتى هتعملى ايه نصيبك كده بقى

جميله : شوفتى اديكى قولتى عشان كده فكرت فى موضوع حسين ده

عواطف : بس لسه قلبى مش مرتاح للموضوع ده يا جميله ما تراجعى نفسك يا بنتى

جميله : يا داده ما انتى شايفه صحه بابى كل يوم فى النازل انا خايفه عليه اوى وهو راسه ناشفه ومش عاوز يعمل العمليه غير لما يطمن عليا

عواطف : طب افرضى الحرامى ده ما طلقكيش ايه العمل بقى

جميله : لا منا هاخد عليه وصل امانه لو محصلش الطلاق هسجنه

عواطف : وصل امانه ايه هما الناس دول بتوع كده اكيد قضى طول حياته فى السجن وهيقول عادى ما اسجن بس اعمل اللى على هوايا

جميله : يا داده ما تقلقنيش بقى اهو انا فكرت فى كده وبس

عواطف : ياخوفى ليطلع زى ابن عمتك ياخوفى

جميله تبص ليها وبعدين تركز فى السواقه والطريق وتتذكر ما عمله معها ابن عمتها ليله امس ...

اما اانشراح فقد دخلت الاوضه اللى ابنها نايم فيها ونكزته عشان يصحى وهو كالعاده حط البطانيه على وشه ... راحت شالتها من فوقه بعصبيه

قوملى هنا يا واد انت انا عاوزه اعرف ايه اللى هبتته امبارح ده

شادى : هببت ايه انا ما عملتش حاجه

انشراح : على امك برده جميله قالتلى انك كنت فى اوضه مكتب خالك كنت بتعمل هناك ايه

شادى : اعملكم ايه يعنى منا محتاج فلوس وانتى دايما بتقوليلى اجبلك منين ومفيش فلوس وهتسمعينى الموشح اياه احنا جينا هنا عشان ما نتفضحش لاننا معناش فلوس

انشراح : صح بس ده برده ما يدلكش الحق تدخل مكتب خالك وتسرقه

شادى : انا قلت اخد ايه حاجه القيها انا مديون لطوب الارض يا ماما

انشراح : طبعا من الهباب اللى بتلعبه انت واصحابك دول

شادى : يووووه

انشراح : بقولك ايه حاجات زى دى تانى ما تحلصش فاهم ولا اقوم تانى وحسك عينك تقرب منها هى كمان احنا مش ناقصين

شادى : اصلك ما شفتهاش امبارح كانت لبسه ايه ياااهو عليها وعلى جسمها ولا حلوتها فى الضلمه اموووت انا

انشراح : انا عارفه انى اخرتى على ايدك شادى لو سمعت منها الكلام ده تانى هتشوف منى حاجات عمرك ما كنت تتخيلها منى فاهم

شادى : بالحق ايه موضوع الواد اللى متقدم ليها ده

انشراح : اعملك ايه ما انت مش موجود وكتير بقولك اتقربلها واهتم بيها عشان تحبك بس اقول ايه بقى

شادى : يعنى كده خلاص راحت منى

انشراح : مين قال كده لسه التقيل جاى ورا يا حبيبى

شادى : احبك يا شوشو يا مولعاها

************************************************

توصل المشفى وبعد ما تطمئن على والدها وتفطرو زى كل يوم تروح على عيادتها بها اللى بقالها كتير ما رحتهاش عشان مرض والدها

صباح الخير يا نسمه

نسمه : صباح الخير يا دكتوره اخيرا جيتى

جميله وبتقعد على مكتبها : معلش بقى انتى عارفه صحه بابى

نسمه : ربنا يطمنا عليه ان شاء الله

جميله : ها دكتوره نهال كانت تمام هنا

نسمه 😕 ايوه بس طبعا مش زى حضرتك عارفه كتير اوى من الامهات والاطفال كانوا بيسالو عنك ولما بنقول ان حضرتك غايبه كانوا بيزعلوا اوى وفيه منهم بيرحو ومنهم بيدخل للدكتوره نهال

جميله : هعمل ايه بس مكنش بايدى اسيب بابى بالحاله دى وانزل شغلى

نسمه : مفهوم يا دكتوره

جميله : طيب يلا لوفيه حد دخليه بسرعه

نسمه : حاضر بعد اذنك

وخرجت نسمه ودخلت لها اول حاله وكانت طفله ومعها والدتها واول ما شافت جميله جريت عليها وحضنتها

جميله : اهلا بوسى ازيك يا عثوله

بوسى : الحمدلله ازيك انتى انا جيت كتير وانتى مش كنتى موجوده

جميله : اه اسفه بقى بابى كان تعبان شويه وكان المفروض ابقى جنبه

مامت بوسى : الف سلامه عليه ... احنا اول ما جينا اول الشهر وعرفنا زعلنا خالص حتى بوسى مكنتش راضيه حد يكشف عليها غير حضرتك

جميله تربت على شعرها : ليه كده بس يا بوسى كده هزعل منك

بوسى : كلهم وحشين انتى حلوه

جميله : هههههههه ودكتوره نهال طيبه برده وحلوه

بوسى : لا بتزعق و ولما العب بالقلم تزعق فيا جامد

جميله : هههههههههه معلش هى مكنتش تقصد لو تعرف انك صحبتى مكنتش تعمل كده ابدا

بوسى : خصميها بقى زيا

جميله : ههههههههه حاضر هخصمها يا بوسى عشان خاطرك انتى وبس

وتلتفت لمامتها : ها ايه اخبار المتابعه ماشيه على العلاج كويس

الام : ايوه الحمدلله بتاخده بانتظام بس اكلها بقى خفيف اوى يا دكتوره

جميله : لالالا كده يا بوسى انا اللى هزعل منك واخصمك احنا اتفقنا اننا ناكل حلو ونكتر من الفاكهه اوى والعصاير صح ولا مش صح

بوسى : صح

جميله : امال ليه بقى ما بتسمعيش كلام مامى

بوسى : هسمع

جدميله : لو مامى قالتلى ان بوسى ما بتاكلش كويس تانى انا هزعل منك اوى اوى ومش هكلمك تانى اتفقنا

بوسى : اتفقنا

جميله : طب يلا على السرير عشان اكشف عليكى

وتجرى بوسى على السرير وتوجه جميله كلامها للام : لازم تاكليها كويس باين ان وزنها قل عن اخر مره شوفتها فيها

الام : والله بعمل اللى عليا يا دكتوره بس هى عنديه اوى

جميله : يبقى نشوفها هى عاوزه ايه ونعمله مقابل انها تاكل الاكل بتاعها كله

الام : حاضر يا دكتوره

وتقوم جميله عشان تكشف على بوسى ونسيبها بقى تشوف شغلها

************************************************

ونروح عند بدران وكان بيتكلم مع الداده عواطف عن حسين وانه سال عنه ناس معرفه وقالوا ومداحو فى اهله الله يرحمهم

عواطف كانت تستمع ليه ومندهشه من كلامه على حسين لانها عارفه انه حرامى مش انسان كويس بس فضلت ساكته عشان ما تزعلش منها جميله وكمان لما شافت الفرحه فى عيون باباها

بدران : روحتى فيه يا عواطف

عواطف : معاك يا دكتور بدران

بدران : ايه رايك لو قرينا الفاتحه بكره هنا

عواطف : اللى تشوفه

بدران : طيب انتى معكيش رقمه

عواطف : فى الحقيقه لا

بدران : كنت عاوز اكلمه واقوله اننا وافقنا ويجى بكره عشان نقرا الفاتحه

كانت اتت اليهم انشراح وجلست وفضلت تنظر لعواطف وقلقت لتكون حكيت لاخيها على موضوع شادى واللى عمله مع جميله لكنها اطمنت لما قالها انه بكره هيقرا فاتحه جميله على حسين دهشان واصطنعت الفرحه والسعاده

انشراح : انت مش شايف اننا استعجلنا يا بدران

بدران : انا ايامى معدوده يا انشراح وعاوز افرح بيها

انشراح : اصلنا ما نعرفهوش عشان فى يوم وليله نجوزه بنتنا بالشكل ده

بدران : انا سالت عنه ناس كتير فى العنوان اللى قالى عليه وكلهم شكرو فيه وفي عيلته

انشراح : هما عيلته كلهم ماتوا

بدران : تقريبا كده بس سمعت انه ليه اعمام بس مش عارف فينهم

انشراح : اممممم طيب

بدران : ابقى قولى لوائل وشادى وخليهم يجو يحضرو

انشراح برسم ابتسامه اصطناعيه : اكيد واحنا لينا بركه غير فيك وفى جميله بكره الكل لازم يجى عشان يفرح ليها ... وفى سرها ... وقرب برده اليوم اللى همتلك كل حاجه يا بدران

أنــــــــا عـــــــــايــــــــزه أتـــــــجـــوز حــــــــــــــــــرامـــــــــــي

الحــــــــلقــــــــه السابعه

الحلقه اللى فاتت لما خلاص اتفق بدران ان غدا هو قراءه فاتحه بنته جميله على حسين بعد ما سال عليه والكل شكره فيه

(((7)))

فى اليوم التالى كانت فى غرفتها واقفه تنظر للسما وتدعى ربها بانه يكمل الزيجه اللعبه دى على خير لانها فكرت فيها بس عشان خاطر باباها واشتكت ربها من عمتها وابنها اللى طمعانين فيها وفيه ثروتها فهى فكرت فى الحل ده عشان تبعدهم عنها وما يقدروش يتحكموا فيها ... دخلت عليها عواطف وراحت لها وربتت عليها وخدتها فى حضنها

عواطف : خلاص بقى اللى انتى فكرتى فيه حصل وانهارده قراءه فاتحتك

جميله : ايوه يا داده

عواطف : امال مالك بقى

جميله : مش عارفه حاسه ان قلبى وجعنى اوى

عواطف : سلامه قلبك يا حبيبتى

جميله : هى عمتو هنا

عواطف : لا راحت شقتها عشان تقول لوائل ابنها

جميله : طب وشادى

عواطف : اهو مخمود جوه انا مش عارفه الواد ده جبله والا ايه بقى خاله فى المستشفى وهو داير على حل شعره كده ويجى مطوح كل ليله وش الفجر

جميله : ربنا يهديه لروحه يا داده

عواطف : ربنا ياخده هو وامه

جميله تبتسم رغما عنها

عواطف : مالك ايه اللى بيضحكك

جميله : افتكرت مناقرتك مع حسين ده

عواطف : طب اسكتى بقى انا سامعه صوت جاى علينا ... وفعلا كانت الخادمه حُسنيه بتقولهم ان فيه واحده تحت بتسال على جميله وكانت صحبتها لمياء

جميله : اه خليها تطلع

حُسنيه : حاضر

عواطف بعد ما نزلت الخدامه : هى لمياء تعرف

جميله : لالالا يا داده اوعى تعرفيها بحاجه زى دى

عواطف : كويس برده انك عرفتينى بدل ما كان لسانى يوقع منى ولا حاجه

جميله : هههههههههه لا امسكيه على الاخر لحد النهايه الله يخليكى

عواطف :ايوه كده خلى الابتسامه تنور وشك الجميل ده تانى

وتيجى ليهم لمياء وتقعد معاها شويه وتحكى لها جميله بان فيه عريس متقدم ليها وهى وافقت وانهارده المفروض هيقراو الفاتحه

لمياء : اخص عليكى يا ندله كده برده من غير ما تقوليلى

جميله : الموضوع جه فجاه والله يا لمياء

لمياء : طب بسرعه بقى قوليلى اوصافه اسمه وشغله وسنه وطوله بسرعه بسرعه

جميله : حيلك حيلك يا بنتى

لمياء : حيلى ايه بس دلوقتى انا عاوزه اعرف التفاصيل كلها ومين ده اللى خطف قلب الدكتوره جميله الجميلات

جميله بابتسامه : عمرك ما هتتغيرى ابدا

لمياء وتقول كلامها متلحن : اهو ده اللى مش ممكن ابدا

ونسيبهم بقى جميله تقولها على حسين ...

*********************************

نروح لانشراح مع وائل كانت قاعده قصاده بتكلمه

وائل : انا قولتلك مش جاى يعنى مش جاى

انشراح : يا وائل حرام عليك خالك هو اللى طلبك بالاسم

وائل : وانا بقولك مش رايح لانى لو روحت هعك الدنيا

انشراح : انت بتهددنى يا ولد

وائل : افهميها زى ما تفهميها

انشراح : واقول ايه لخالك

وائل ينظر بطرف عينه : انتى هتغلبى يعنى قوليلو زى ما طول عمرك بتفبركى كلام وتقوليه

انشراح : فقرى وعندى ولسانك طويل زى ابوك

وائل ينظر لصوره باباه المتعلقه على الحائط : الله يرحمه كان اطيب واحن وانقى واطهر اب

انشراح بتافف : اه يانى منك انا عارفه مش هخلص ابدا انا امشى احسن

يرجع ينظر لصوره باباه من تانى ويتذكر حديثه دائما معه على مامته ان عمرها ما حمدت ربنا على اللى معاها ابدا ودايما كانت باصه على اللى فى ايد غيرها وخصوصا اخوها بدران وكانت دايما بتدعى ان ربنا ما يدلوش ولد عشان ما يورث ثروته وكفايه عليه البنت عشان هى هتورث معاها وهيبقى ليها كل حاجه لو اللى بتفكر فيه يتحقق بان تجوز ابنها شادى لجميله وعشان كده طبعت شادى بطبعها وكان دايما بيحذره منها ومن تفكيرها ده

*********************************

ويمر الوقت وكانت نازله من عربيتها امام المشفى متألقه فى ملابسها

الثانيه على التوالى ? هاتولى عريس ? نورهــــان

دخلت من باب المشفى لاحظت احد يقرب منها وبيقولها : ازيك يا عروستى

التفتت جميله وجدت حسين مرتدى بدله سوده شيك وحاطط برفييوم حلو اوى ... تنحنحت وقالت : احم احم الحمدلله تمام

حسين : امال فين تنت عواطف

جميله بتشاورله بيدها كاتحذير : بليز يا حسين داده عواطف فى مقام مامتى يعنى بلاش كلامك ده معاها وتحترمها شويه

حسين : وهو انا قلت حاجه دلوقتى انا بسال عليها عادى

جميله : طيب انا قلتلك وبس

حسين : وافتكر ده تهديد يعنى

جميله بخوف منه : احم لا ابدا وانا اهددك ليه انا بلفت نظرك مش اكتر

حسين : اوكيه يلا بينا

جميله : يلا بينا على فين

حسين : على ابوكى عشان الفاتحه انتى نسيتى ولا ايه

جميله : قلتلك مليون مره اسمه باباكى مش ابوكى

حسين : طيب يا ستى باباكى حلو الكلام

جميله بتأفف : كويس انا هستنى داده عواطف عشان نطلع سوا

جسين : وهى راحت فين

جميله : نسيت حاجه وراحت تجيبها من البيت

حسين : طيب تعالى نستناها جوه ما يصحش نفضل واقفين هنا كده

جميله تنظر له وعلى اسلوبه ساعات يكون كويس وسعات بيكون اوفر اوى فى كل حاجه

وبعد شويه تأتى اليهم عواطف وكانت بتسرع عشان تلحقهم : معلش اتاخرت عليكى يا حبيتى

جميله : كل ده يا داده

داده : معلش غصب عنى كوتش العربيه فرقع واحنا ماشين واضطر لطفى يغيره هو ده اللى اخارنى

جميله : طيب يلا بينا عشان بابى ما يقلقش

عواطف : يلا يا حبيبتى

حسين لعواطف : مفيش ازيك يا تنت ولا انا مش باين انى قاعد

عواطف بأرف : لا مش باين ما خدتش بالى

حسين : ليه نظرك ضعيف اوى كده

عواطف : نظرى احسن منك ومن اللى خلفوك

حسين يقوم ويروح لها بانفعال: تؤتؤتؤتو اغلطى فيا اعديها انما تغلطى فى اهلى وحيات

جميله تقاطعه : خلاص خلاص حقك عليا انا ... داده ارجوكى مش عاوزه مشاكل

عواطف : هو انا قولت حاجه ما قصدتش وكمان مهو غلط فيا اسكتله

حسين : لا ياختى ما تسكتيش اتكلمى وخدى راحتك فى الكلام

عواطف : شوفتى بيقول ايه

جميله : يا جماعه ارجوكم بقى كفايه

حسين يرجع يقعد من تانى : خلاص خلاص حصل خير ما تتعصبيش بقى

جميله تنظر لحسين: انت مش هتيجى معانا ولا ايه

حسين : لا مش هروح

جميله : نعم

حسين : انا مستنى واحد جاى دلوقتى

جميله : واحد مين ده بقى

حسين : قريبى

جميله : وقريبك جاى ليه

حسين : هيكون جاى ليه يعنى عشان يتفق مع ابوكى يوووو اقصد السيد الوالد

جميله : وانت صدقت ولا ايه دى تمثليه

حسين : وهو انا قلت غير كده لازم يكون معايا حد انا بشوفهم بيعملوا كده فى التلفزيون عشان اشرفك يا جميل

جميله بنفاذ صبر : وان شاء الله بقى الواحد ده زيك كده

حسين يفهم ما تعنيه : تقصدى حرامى طبعا

جميله : ما اقصدش اقصد يعنى

حسين مقاطعا لها : ما تقلقيش مش حرامى هو محترم غيرى خاااالص

جميله : اوكيه انا هسبقك ... بليز مش هفكرك كل شويه بلاش كلامك ده مع بابى

حسين : قلتلك ما تقلقيش اتفضلى انتى دلوقتى

جميله : اوكيه يلا يا داده

حسين : ايوه يلا روحى معاها يا داده

عواطف تنظر له بحده وهو يبصلها ويضحك ويطلع لها لسانه

جميله : خلاص بقى يا داده امشى عشان خاطرى

*********************************

وبعد قليل نجدهم كلهم فوق فى غرفه بدران وكان جالس امامه حسين ومعه شخص كبير فى السن قال لهم بانه خاله وبعد ما اتفقوا بكل شىء تمت قراءه الفاتحه وسط فرحه من والدها وحزن والم بداخلها هى وشر بداخل انشراح وابنها شادى اللى كانوا على اخرهم فى القاعده دى لما عرفوا بان حسين بعد الجواز هيعيش معاهم فى الفيلا

شادى بهمس : سامعه اللى سمعته

انشراح : بس هس عشان محدش ياخد باله

شادى : ده باينه هو اللى هيأوش

انشراح : مين اللى قالك كده اللى هيأش احنا يا حبيبى

شادى : يا ماما ما انتى شايفه خلاص كتب كتابهم قرب

انشراح : ولولا ما تقلقش وهتشوف فى الاخر اننا احنا اللى هنكوش على كل حاجه

شادى بابتسامه : حلوتك يا شوشو

انشراح : هس قولتلك ...

وبعد شويه انشراح مشيت مع شادى ابنها وخدو معاهم عواطف .... وظلت فى المشفى مع والدها جميله وكان معاها حسين

بدران : ابقى روح بقى الفيلا عشان تختارو اوضه

جميله تنظر لحسين ثم الى باباها : احم ما لسه بدرى يا بابى على كده

بدران : يا بنتى انا عاوز افرح بيكى قبل ما اموت دى امنيه حياتى

جميله تروح لوالدها وتمسك ايده : وحياتى بلاش الكلام ده تانى عشان خاطرى بلاش تقوله

بدران : خلاص يبقى انتى نفذى اللى بقولك عليه لو عاوزانى اكون مطمن ومرتاح

جميله بدموع : حاضر يا بابى كل اللى انت عاوزاه هيحصل

بدران : حسين ابقى شوف بقى قاعه عشان تلحقوا تحجزو فيها انا عاوز فرح كبير

جميله : ازاى يعنى اعمل فرح وانت تعبان لا يمكن ابدا

بدران : يا بنتى انا نفسى افرح بيكى

جميله : وانا مش عاوزه كده ازاى عاوزنى افرح وارقص واتنطط وانت هنا تعبان ازاى يا بابا بس

بدران : يا جميله

يقاطعه حسين : تسمحلى بدون قطع كلام حضرتك اقول حاجه

ينظرو اليه هما الاتنين : اتفضل ياابنى

حسين : انا بقول بلاش نعمل فرح دلوقتى نكتفى بكتب كتاب بس وان شاء الله نطمن عليك وعلى صحتك بعد العمليه نبقى نعمل ساعتها فرح كبير منه لفرحنا ومنه لرجوعك لينا بالسلامه ها ايه رايك

جميله تنظر اليه بابتسامه وفرحه لانه انقذها وقال كلام حلو اوى وعجبها : وانا رايى من راى حسين يا بابى بلاش نعمل فرح دلوقتى كفايه كتب الكتاب

بدران : بس كنت نفسى افرح بيكى يا حبيبتى

جميله : ما انت هتفرح وكمان مش كنت عاوزانى اتجوز عشان تطمن اهو اديك هتطمن عليا قبل العمليه وهكتب كتابى وان شاء الله اول ما تقوم بالسلامه هنعمل فرح كبير اوى

بدران : خلاص زى ما انتو عاوزين

جميله تضم نفسها اليه وتنظر لحسين اللى كان باصص عليهم

*********************************

بعد ما راحو الفيلا دخلت انشراح ومعاها ابنها شادى الاوضه وفضلوا يتكلمو على اللى حصل فى المشفى

شادى : يعنى انت عجبك كده كل حاجه هتروح فى ثانيه

انشراح : قلتلك ما تقلقش انا عامله حسابى مش عاوزه تتجوزو خلاص تتجوزو بس مش هتلحق تتنهى باى حاجه

شادى : ازاى بقى انتى ناويه على ايه

انشراح : ملكش دعوه باى حاجه وسبنى انا افكر واخطط

شادى : وياترى بقى مين المره دى عليه التنفيذ

انشراح بنظره انتصار ومكر : بكره هتعرف

شادى : طب ايدك على فلوس عشان نازل

انشراح : انت مش هتبطل سهر بقى انا خايفه جميله تقول لخالك وتبقى مصيبه لو عرف

شادى : تقولو ولا ما تقولهوش ما يهمنيش فى حاجه

انشراح : مهو لو عرف ياغبى هيمشيك من الشركه بتاعته وما تنساش انك بعد ما يموت خالك هتمسكها وهتبقى المدير كمان

شادى : يااااااااريت امتى بقى يجى اليوم ده

انشراح : اهو قرب خالص انت بس بلاش تسهر كتير الايام دى وحاول على قد ما تقدر تتقرب من جميله ونبين لها اننا مبسوطين بانها اتخطبت وهتتجوز قريب عشان ما حدش يشك فينا بعدين

شادى : مااااشى يا شوشو انتى دماغك دى متكلفه جامد اوى

انشراح : اهو ده اللى انت فالح فيه

شادى : طيب انهارده اجازه ادينى بقى فلوس خلينى اروح اسهر وما تقلقيش مش هتاخر زى كل ليله

انشراح : اتفضل ادى اللى معايا وعلى فكره دول اخر فلوس فى ايدى

شادى : امتى بقى نقب لوش الدنيا زى الناس العليا ونمسك الفلوس كده بايدنا

انشراح : قريب اوى يا حبيبى قريب اوى

*********************************

يمر الوقت نلاقيهم مع بعض ماشين ورايحين ناحيه المصعد عشان ينزلوا بيه لتحت

جميله : انا متشكره جدا على كل حاجه

حسين : ايه رايك عجبك الكلام

جميله : ما تتصورش اد ايه حتى جالى احساس ان مش انت خالص سحس ده

حسين : انفع يعنى اكون ممثل

جميله : تنفع بس بجد انت ازهلتنى فوق

حسين : اى خدمه يا قمر

جميله : انت معاك عربيه ولو تحب اوصلك

حسين : لا معايا اللى هناك دى

جميله بتبص عليها وتتفاجىء : دى عربيتك

الثانيه على التوالى ? هاتولى عريس ? نورهــــان

حسين : ايه مالها مش عجباكى ولا ايه

جميله : لا بس موديلها قديم جدا

حسين : مش مهم المهم انها تقضى الغرض وخلاص

جميله : تقضى غرض ايه بس لو عمتو او حد شافك بيها ممكن نتكشف

حسين : ليه يعنى مالها مهى عربيه زى باقى العربيات ولا لازم تكون على اعلى مستوى عشان اعجب

جميله : ما انت عارف الناس بيتكلمو ازاى وبيفكرو ازاى

حسين : والله انا مليش دعوه بالناس انا ليا دعوه بيا انا واللى يمشى على هوايا يعنى لو قلعت هدومى كلها دلوقتى ومشيت فى الشارع محدش ليه عندى كلمه

جميله : ايـــــــــــــه

حسين وبيبدأ يخلع جاكيت بدلته : ايه تحبى تشوفى بنفسك

جميله من اللى سمعته خافت ليعمل كده فركضت بسرعه على عربيتها وهى بتقول : انت اكيد مجنون مش طبيعى مش طبيعى

يتبع