مجنونة اقتحمت حياتى رونى محمد الفصل الاول

 مجنونة اقتحمت حياتى 

رونى محمد 

الفصل الاول 

( اللهم لك الحمد كما ينبغى لجلال وجهك وعظيم سلطانك )

فى قصر عائلة السيوفى يجلس الجد الاكبر لهذه العائلة خلف مكتبه ومن امامه احفاده الأربعة 

الحفيد الأول ويسمى جاسر ٣٩ سنة 

والحفيد الثانى هو سراج ٣٢ سنة 

والثالث احمد ٢٩

واصغرهم حمزة ٢٠

حمزة : ها يا جدو مقولتلناش انت جامعنا هنا ليه كده برابطة المعلم ..

نكزه جاسم في كتفه وهو يهمس له قائلا 

-: اخرس انت ما اكيد اللمة دى اكيد وراها مصيبة من مصايبك ..

ليرد عليه الاخر بهمس ليقول 

-: وليه ميكونش عشان المزة الى اتقفشت بيها امبارح 

كمم جاسر فم حمزه قبل ان يوصل صوته الى الجد ويفتضح أمره ..

بينما همس احمد لسراج قائلا 

-: انت عملت ايه مع الواد الى ضربته امبارح 

تذمر سراج قائلا بهمس 

-: ششش اسكت بعدين مش وقته ..

قطع الهمس بينهم صوت الجد الذى ضرب بكلتا يديه على سطح المكتب ليجذب انتباههم قائلا 

-: باااس ركزوا معايا هنا عشان اقولكم انا جمعتكم ليه 

انتبه الجميع وتاهبوا لسماع حديث الجد الذى قال 

-: طبعا انتم عارفين قانون العيلة الى مينفعش اى بنت من العيلة تتجوز راجل غريب ..

أحمد : بس يعنى يا جدى ده كان زمان الزمن دلوقتى اتغير احنا 

قاطعه الجد قائلا 

-: مفيش فرق بين دلوقتى وزمان الاصول اصول وبعدين انتم عارفين ان مينفعش املاك العيلة تخرج برا ..

حمزة : ويعنى يا جدى انت شايف جواز العيلة ناجح اوى ما هو قدامك اهوه جاسر ونجلا افشل زوجين على وجه الكوكب ..

امسكه جاسر من الخلف وقال

-: بقولك ايه يلا ملكش دعوة بينا خليك في حالك بدال ما اعلقك ..

تجاهلهم سراج وعقد يديه امام صدره قائلا 

-: تمام اصلا الموضوع ده مفروغ منه يا جدى وكلنا عرفينه وبنات العيلة حاليا الى لسه متجوزوش هم هانيا الى فى اولى جامعة ودليدا الى عندها يا دوب عشر سنين ..

اكمل الجد معقبا على حديث سراج قائلا : وبسمة !!

نظر الجميع لبعضهم وقالوا في صوت واحد 

-: بسمة مين ؟

الجد : بسمة بنت عمك شريف ..

جاسر : هو احنا لينا عم اسمه شريف ..

الجد : اه انا كان عندى تلات ولاد وبنت الى هما خالد وشريف ومؤنس وعمتكم دلال ..

سراج : طب هو كان فين السنين دى كلها وازاى يعنى احنا منعرفش عنه حاجه 

-: الموضوع يطول شرحه مش وقته المهم انى عرفت من المحامى ان شريف خلف بنت قبل ما يموت وسماها بسمة ..

احمد : طب والمطلوب 

-: دوروا عليها الاول وبعدين اقولكم هنعمل ايه ؟

فى احدى الحارات الشعبية نجد تجمع غفير من الناس يلتفون الى شئ ما بينما فالمنتصف نجد تلك الفتاة التى تصرخ وهى ترفع حذائها اما ذلك الرجل ..

-: وربنا منا سيباك غير لما تقب بالستين جنيه ..

-: ما خلاص بقى يا بوسة سيبى الراجل يشوف اكل عيشه .

-: دا راجل حرامى ومفترى نصب عليه في تلاتين جنيه الاسبوع الى فات والاسبوع ده زيهم وفالاخر المروحة طلعت بايظة زى ماهى 

تكلم الرجل بانهاك قائلا 

-: يعنى انا كنت مغسل وضامن جنة انا صلحتها وعملت الى عليه اعمل ايه بقى المروحة بتاعتك اصلا خردة ومكنتش نافعة بحاجة ..

-: عالاقل كنت عرفنى انها خردة لامؤاخذة بدال ما ادفع فيها ستين جنية .. يلا قب بالفلوس بدال ما هخلى شبسبى يعلم على قرعتك الحلوة دى ..

اخرج الرجل المال واعطاهم لها لتقول 

-: توشكر يا زوق مظبوطين .. يلا منجلكش في حاجة وحشة ..

-: منك لله يا بوسة انا مش عارف جتلنا من اهنى داهية بس ..

بعدما ابتعدت عدة خطوات رجعت اليه قائلة 

-: ايه انت عاوزنى اعلم عليك تانى قدام الحارة ولا ايه ؟

-: ولا تعلمى ولا اعلم روحى ربنا يكفينا شرك ..

بعد نص ساعة كانت بوسة تقف فى ورشتها تمسك بالمنشار الحديدى وهى تحاول ان تقطع قطعة من الخشب ليدخل الى ورشتها رجل مسن وهو امام الجامع التابع للحارة عندما راته بوسة اقتربت ترحب به قائلة 

-: يا اهلا يا أهلا ده احنا زرنا النبى والله الشيخ لطفى بحاله عندنا ..

ابتسم وقال 

-: الى يشوفك دلوقتى ميشوفكيش وانتى ماسكة الاسطى سيد وممرطاه قدام الحته كلها ..

-: هعمل ايه بس يا شيخنا ما هو الى راجل حرامى ذمته واسعة ..

-: يابنتى الكلام اخد وعطا انتى بردو بنت ووحيدة وميصحش تمسكى راجل قد ابوكى تهزقيه كده ..

-: ولله يا شيخ لطفى انا عشان بنت لازم اعمل كده انت عارف انى وحدانية وعايشة لوحدى ولازم استرجل كده عشان مطمعش فيه حد ..

-: ربنا يحميكى يا بنتى ويبعد عنك ولاد الحرام انا هقوم بقى اروح الجامع يا دوب استعد لصلاة العصر ..

-: استنى بس انت حتى مشربتش كوباية الشاى 

-: لا معلش مرة تانية ان شاء الله ..

فى قصر السيوفى 

خرج الاربع شباب من المكتب وعلى وجههم علامات الصدمة مما سمعوه من حديث الجد .. اقتربت منهم الفتاتان نجلا زوجة جاسر واخت حمزة وهانيا .. 

نجلا : ها قولوا جدى كان عاوزكم في ايه ؟ عشان يوزع الميراث صح ؟

اجابها جاسر بدون اهتمام وهو يجلس امامها قائلا 

-: لأ وانتى الصادقة عشان يصدمنا بإن العيلة ذادت وريث ..

هانيا : وريث !! وريث ده مين انا مش فاهمة حاجة ؟

سراج سأل مستفهما 

-: هو فى حد فيكم كان يعرف ان لينا عم اسمه شريف ؟

تعجب الجميع واخذا ينظران الى بعضهما ليقطع هذا الصمت صوت دلال العمة الصغرى لهم عندما قالت 

-: محدش يعرف غيرى انا وجدكم ..

تجمعت الانظار حولها ليسالها سراج بفضول 

-: ازاى لينا عم ومنعرفش بيه السنين دى كلها !! وازاى مكنش عايش معانا هنا في القصر ..

-: عشان هو مكنش اخونا شقيقنا ..

تفاجأ الجميع وهم ينظرون لبعضهم البعض ليقول احمد مستفسرا

-: ازاى ... جدى كام متجوز واحدة تانية ؟

ضحك حمزة قائلا 

-: هههه ده جدى طلع خلبوص واحنا مكناش نعرف 

دلال : ولد الزم حدودك عيب تتكلم كده على جدك ..

جاسر : سيبك منه وقوليلنا جدى ازاى كان متجوز على جدتى وهل جدتى الله يرحمها كانت تعرف ..

-: لأ ماما مكنتش تعرف وانا كمان معرفتش غير من وقت قصير .. 

حمزة : طب وفين عمى شريف ده وبنته 

دلال : للاسف اتوفى قبل ما اشوفه حتى ..

سراج : طب واحنا مالنا بكل ده جدى عاوز يجبها تمام ما يدور عليها هو ويجبها 

نجلا : معنى كده ان البنت دى هتشاركنا فالورث

احمد : وهو ده كل الى فرق معاكى الورث !!

نجلا : اه هو الى فرق معايا ان هتيجى واحدة منعرفهاش هتقاسمنا فى فلوسنا ..

دلال : لا مش فلوسكم دى فلوس بابا وهو حر فيها وحتى لو بابا كتبلها حاجه ولا عطاهلها فأعتقد ان ده حقها ..

نجلا : حق ايه الى تاخده واحدة من الشارع منعرفلهاش اصل من فصل ..

جاسر : نجلااااا متعليش صوتك ..

نجلا : بقولك اين متزعقليش انا بدافع عن حقى ..

جاسر : بقولكم ايه طلعونى انا من الليلة دى انا ورايا شغل مش فاضي ..

احمد : وانا افتكرت مشوار مهم لازم اروح 

حمزة : خدنى معاك فى طريقك ..

وقفت دلال وعقدت زراعيها امام صدرها وقالت 

-: وانت يا سراج مش هتهرب زيهم ؟

-: انا رايح اقابل جاكلين عشان انهى الخطوبة السودا الى مدبس فيها دى ..

نجلا : يعنى ايه كلكم بتهربوا ومحدش عاوز يشوف حل للمصيبة دى 

ذم سراج شفتيه ليقول 

-: ولله انا مش شايف انها مصيبة ولا حاجة فلوس جدى كتير ومهما يوزع منها مش هتقل ..

نجلا بغل 

-: اه مانت مش فارقة معاك لانك ليك شركتك الخاصة مش محتاج لفلوس جدك ..

-: انتى الكلام معاكى يجيب صداع ولله عنده حق جاسر يزهق منك ..

عند جاسر الى اخد عربيته وخرج من القصر ومسك تليفونه واتصل على صاحبة مراد وقاله 

-: عملت ايه فى سهرة النهاردة ؟

-: كلمت البنات وهيجولنا عالشقة الساعة ١٠ ..

-: تمام ماشي انا رايح الشركة دلوقتى امضي شوية اوراق وهقابلكم هناك ....

بعد قليل توجه سراج الى احدى الكافيتريات ليقابل خطيبته جاكلين لينهى امر خطبته منها فهى صديقته منذ الصغر وقد ترعرعا الاثنين سويا حتى انهما درسا في نفس المجال في ادارة الاعمال لم يراها سراج يوما سوى اختا له ورفيقة الدرب اما هى فقد باتت تعشقه حد الجنون الا ان قامت فى احدى المرات بقطع شرايين يدها حينما اعترفت لسراج بحبها وهو قابلها بفتور ، ليأتى اليه ابيها ويرجوه باتمام خطبة مؤقتة الا حين انهاء جاكلين علاجها النفسي للتخلص من عشقها وهوسها به ..

دلف الى ذلك المكان اللذان اعتادا زيارته سويا ليجدها بنتظاره .. اقترب منها وبعد ان تبادلا السلام جلس امامها يستجمع كلامته لتقطع هى الصمت قائلة 

-: فى ايه يا سراج انت جايبنى هنا عشان تسكت كده !

-: بصراحة يا جاكلين فى موضوع مهم عاوز افاتحك فيه ..

-: طبعا موضوع جوازنا مش كده ايوه احنا مش محتاجين فترة خطوبة تطول عن كده احنا نعرف بعض من زمان مش محتاجين نتعرف يعنى ..

-: لا يا جاكلين الموضوع مش كده كل الحكاية ان 

قاطع حديثة الصوت العالى الذى ياتى من الخلف فالتفت ليجد فتاة قصيرة القامة ترتدى ملابس اشبه بالرجال ترفع شعرها باهمال على هيئة كعكة لشعرها الاسود .. يقف امامها اربع رجال وكأنهم يتأهبون لحملها وزجها خارج المكان 

الفتاة : لا بقولك ايه مش انا الى يضحك عليه .. انا عملت الشغل زى ما طلبتم وجبته لغاية عندكم يبقى الاصول انكم تدونى باقى فلوسي ..

مدير المطعم : بصي يا بت انتى انا ممكن اكلم البوليس دلوقتى يجى ياخدك ونعملك قضية كمان فامشي بالزوق بدال ما ومشيكى انا بالعافية .. واخلى الرجالة دى ترميكى برا 

-: احيه بالكركديه على اخر الزمن يجى نطع زيك ياكل عرقى لا بقولك ايه انا قتيلة هنا ومش همشي غير لما اخد فلوسي ..

جلست الفتاة فالأرض وقالت 

-: بص يا حلو انت يا ابو بدلة يا تدينى الألفين جنيه بتوعى ويا دار ما دخلك شر يا خلينى قاعدة كده وافضحكم ..

اشار مدير المطعم لأحد الرجال فاقترب منها وجذبها بعنف من مرفقها وهو يجرها لخارج المطعم وهنا سراج لم يستطع ان يجلس وينتظر فقام من مقعده حينما رأى احد الاشخاص يرفع يده ليضرب الفتاة الا ان سراج كان الاسرع حينما فاجاه بكسر يده قائلا 

-: عيب على راجل زيك يمد ايده على واحدة ست .. ده لو كنت راجل اصلا ..

-: ايوه قوله يا سي الاستاذ ولله انت جدع 

تراجع باقى الرجال فمن هم ليقفوا امام سراج السيوفى اقترب مدير المطعم منه ليوضح الامر قائلا 

-: دد دى واحدة بترمى بلاها علينا 

وقفت هى لتهندم ملابسها وتنفض عنها التراب لتقول 

-: كداب وضلالى الراجل ده طلب منى شغل ب ٥ الاف جنيه وجه ادانى ٣ الاف جنيه وعملتله الشغل زى ما طلبه وبعد كده جه اخد نص البضاعة وقالى مش عاوز الباقى .. يرضي مين ده بس يا سي الاستاذ ..

سراج وجه كلامه لمدير المطعم 

-: صحيح الكلام ده !

-:اه اصل شغلها طلع شعبى مش مناسب لديكور المطعم وصاحب المطعم قال رجعهولها بس انا حليت الموضوع معاه وقال خلاص ناخد نص البضاعة وهى تبيع التانى بمعرفتها ..

تحدث سراج بغضب قائلا 

-: هى ملهاش فيه كنت اختار الناس الى بتتعامل معاهم من الاول .. اتفضل طلع باقى فلوسها وادهالها وبضاعتك خدها ترميها بقى تولع فيها براحتك ..

-: بب بس يا سراج بيه 

-: مبسش يلا عشان مقفلش الزفت ده واقعدكم فالبيت ..

اخرج مدير المطعم المال واعطالها لها وهو يناظرها بضيق لتاخذ المال قائلة 

-: شكرا يا استاذ سراج الهى ربنا يكرم أصلك وميوقعك فى ضيقة ابدا ...

تجاهل حديثها لينصرف من امامها متجها نحو جاكلين التى تجلس بنتظاره ويكاد الغيظ يقتلها ...

رايكم يهمنى متبخلوش عليه بيه ؟ 

الرواية هتنزل كل يوم لو لقيت عليها تفاعل