 |
✨🤍أجبرني أعشقه 🤍✨
من الشابتر الرابع حتي السادس
جه آدم من ورا شد ايديها فجأة .. بقت في حضنه
اتصدمت ولسة هتزقه مسكها بالعافية ..
واحدة واحدة قرب على ودنها
آدم بصوت واطي وبخبث : زي القمر ياروحي
كل حاجة فيكي كاملة ماعدا حاجة صغيرة نسيتيها للأسف
"خطيبك "
مليكة بتحاول تزقه : اوعى كدا انت اتجنننت ؟؟؟؟
نسيتك ازاي مش فاهمة !!
آدم : هي ماما مقالتلكيش ان يوم خطوبتك لازم تخرجي للناس وايدك في ايد خطيبك 🤔
مليكة : ااااادم راعي إني هتم الجوازة دي وانا بالعة قفص لمون فبعد اذنك عدي ام الأيام دي على خير
آدم عينيه بتحمر : ماهي فعلاً هتعدي علي خير ، بس للأسف الأيام اللي بعدها هي اللي مش هتعدي اصلا لا بخير ولا بشر
مليكة : قصدك ايه ؟؟
آدم : لا دي خليها مفاجأة 😉
مسك ايديها وخرج على الناس .. حفلة رقيقة جداً نظرا لأن المعازيم قليلين لأنها مجرد خطوبة وجت فجأة كمان و بسرعة
راحوا قعدوا على الكرسيين بتوعهم وبدأت الناس تسلم عليهم
💥💥💥💥💥💥💥💥💥💥💥
روان في اوضتها بتدور على معاذ اللي اختفى فجأة !!
تدور في الحمام وفي جنينة الأوضة وفي كل مكان .. ملوش أي أثر
أخدت شنطتها ونزلت على تحت عشان تلحق خطوبة أختها
💥💥💥💥💥💥💥💥💥💥💥
ثرية أم مليكة في أوضة أمينة أم آدم بتساعدها تنزل بالكرسي المتحرك عشان تحضر معاهم الخطوبة
💥💥💥💥💥💥💥💥💥💥💥
نشوى داخلة الجنينة وفي ايديها صينية الجاتوه الكبيرة .. جم الخدم يفرقوا على الناس ، قام رفعت بعصايته ووقف في نص الحفلة
رفعت : طبعاً ياجماعة كلكم عارفين اننا عملنا خطوبه صغيره معزمنيش كثير عشان الموضوع ده بسرعه وفجاه بس طبعا كل اللي حضر يشكر الخطوبه دي مش بس عشان مش بكم الخطوبه دي عملتها عشان اعلن إن حفلة زفاف بنت أخويا وابن اخويا هتكون كمان يومين بالظبط، والحاضر يعلم الغايب عشان زي مانتو شايفين ، الوقت صغير وانا حبايبي كتير ولازم الكل يكون موجود .. ودلوقتي أخت العروسة هتجيب الدهب تفرجكم عليه قبل ما العريس يلبس عروسته
آدم في ودن مليكة : العروسة كدا كدا لبست خلاص ☺️
مليكة باستغراب : لحقت تجيب الدهب امتي ياادم ؟!!!
آدم : آدم الخشاب مفيش حاجة تصعب عليه ابدا 😉
مليكة نفسها الأرض تنشق وتبلعها من الغضب والحزن ... بدأت روان تفرج الناس على الدهب
ثرية جارة الكرسي اللي عليه أمينة وداخلين هما الاتنين مبسوطين جداً
روان وقفت جنب آدم وادتله صينية الدهب عشان يبدأ يلبس مليكة
مليكة مسكت الصينية : هلبسه انا
آدم بيبصلها وساكت
رفعت : تلبسيه انتي ايه ياحبيبة جدك 😅 انا عارف إنك بتتكسفي بس مش للدرجة دي يعني
آدم بمنتهي الصمت بيشد من ايديها الصينية وبيحطها على رجله
مسك ايديها وبدأ يلبسها في الدهب وعينيه في عينيها وكلها تحدي
لبسته الدبلة وبدأت الناس تهنيهم ومليكة عينيها تدمع زيادة من قهرتها وحزنها
سهيلة واقفة بعيد بصالها بنظرة حزن
سهيلة : انا السبب في كل اللي انتي فيه.. والغريب إنك مستحملة وساكتة
💥💣تعالوا نختصر كل تفاصيل الخطوبة الكتير عشان ندخل على الأحداث على طول 💣💥
مليكة داخلة اوضتها بفستان الخطوبة .. قعدت على السرير وبصت للدهب اللي في ايديها باستحقار
قلعت كل الدهب وحطته عالكومودينو جنبها .. قامت وقفت قدام التسريحة وبصت في المراية
💥💥💥💥💥💥💥💥💥💥💥💥
رفعت وآدم واقفين في الريسبشن
رفعت : ألف مبروك ياعريس عقبال الليلة الكبيرة بقا
آدم : الله يبارك فيك ياجدي
رفعت : بس مش غريبة شوية !!
آدم : هي ايه الي غريبة ؟
رفعت : مكنتش موافق على الجوازة دي بالثُلُث وفجأة مرة واحدة وافقت وكمان مرحب بالجوازة ومبتسم طول الوقت
آدم : يعني انا موافقش حضرتك تزعل أوافق وارحب بالموضوع عشان ارضي حضرتك بردو ابقي وحش 😂
رفعت : انت مش وحش عشان مرحب بالموضوع ياادم .. الوحش بجد هو اللي مخوفني
آدم : مش فاهم حاجة !!
رفعت بيقرب من آدم وبيحط ايده على كتفه : مليكة دي بنت إبني وأمانة في رقابتي ليوم الدين ياادم .. ولو عرفت إن الابتسامة اللي على وشك دي تحدي او انتظار لانتقام هزعلك مني ياادم
سابه وطلع على اوضته ... آدم وقف سرح شوية وبعدين خرج على الجنينة
💥💥💥💥💥💥💥💥💥💥💥💥
روان بتفتح الباب وداخلة اوضتها .. معاذ قاعد على السرير
روان : كنت مختفي فين ؟؟؟
معاذ : غريبة يعني !! خدتي بالك إن جوزك اختفى معقولة ؟؟
روان : جاوب على قد السؤال يامعاااذ .. كنت فيييين وازاي اختفيت ومخرجتش من القصر في نفس الوقت !!
معاذ : سحر بقا تقولي ايه
روان : مش بس خاين .. انت كمان وراك سر انا مش قادرة أعرفه ، بس عموماً ملحوقة فاضل يومين على فرح مليكة ويوم الفرح يبقوا تلاتة
أوعدك من هنا ليومها هعرف ايه السر
معاذ : وايه اللي هيحصل بعدها بإذن الله ؟؟
روان : اللي هيحصل إن جدي هيطلقني منك يامعاذ ، كفاية اوي لحد كدا
معاذ بيضحك بسخرية : تمام 😂
سابها وخرج من الأوضة
روان : هو بيضحك علي ايه !!!!!
💥💥💥💥💥💥💥💥💥💥💥💥
مليكة قلعت الفستان وواقفة قدام التسريحة بالبيجامة بتمسح الميك اب .. باب اوضتها الأساسي موارب حاجة بسيطة وواقف وراه إبراهيم بيبص عليها
خلصت وراحت على السرير عشان تنام .. قعدت ع السرير وبدأت تفتكر اليوم كله
إبراهيم : حلو اوي كدا
لف وراح لباب اوضتها الخلفي اللي جنبه المسمار اللي رابط فيه الخيط
وبدأ يفك الخيط بهدوء ...
مليكة بدأت تحس بصوت غريب ، بصت يمين وشمال وهي قاعدة مكانها .. وبترفع عينيها على النجفة لقيتها بتفك وهتقع عليها برقت وصوتت بعلو صوتها وهي بتحط ايديها الاتنين على راسها
وفجأة دخل آدم يجري من الباب الأساسي نط وقف ع السرير وحط ايديه الاتنين تحت النجفة
وقعت على ايده هو 💥💥💥
خدها في ايده ونط بيها من ع السرير في الأرض عشان مفيش حاجة تقع على مليكة
مليكة : اااااادم 😱😱😱
آدم واقف في الأرض وسط الازاز دراعاته الاتنين غرقانين دم من الازاز المرشق فيهم
إبراهيم ورا الباب الخلفي واقف مبرق 😳😳 بص يمين وشمال وجري يستخبى بسرعة قبل ما يتكشف
قامت مليكة بسرعة على آدم تشوف ايديه وهي بتترعش وعينيها منزلين حنفيات دموع .. رفعت وسهيلة داخلين يجروا على الاوضة من علو الصوت
رفعت : ياساتر يارب ايه اللي حصصصصل
آدم : خلاص ياجماعة محصلش حاجة انا هطلع الازاز وكله هيبقي تمام
سهيلة : يالهوووي ازاز ايه اللي تطلعه ايه اللي عمل فيك كدا 😱😱😱😱
مليكة بتجري وبتمسك ايده جامد عشان تطلع الازاز من ايده
آدم بيبصلها وساكت تماماً
مليكة : روحي ياسهيلة بسرعة هاتيلي علبة الإسعافات
آدم بيشد ايده : وسعي يامليكة
مليكة : لااااا مش هوسع النجفة دي كانت هتقع على دماغي انا وكان زماني انا اللي متعورة
رفعت : أسمع الكلام ياادم خليها تطلع الازاز من جتتك عشان لو فيه حاجة خطر نروح المستشفى
بدأت مليكة تطلع في الازاز وتعقم في الجرح
نشوى داخلة تجري : ايه ياجماعة في ايه؟؟؟؟
سهيلة : مفيش ياعمتو النجفة فكت وكانت هتقع على مليكة بس آدم جه في الوقت المناسب وقعت عليه هو
نشوى: يالهوي .. طب ومليكة حصلها حاجة ؟؟
مليكة : لا ياعمتو انا زي الفل
مليكة ماسكة ايد آدم بتطلع اخد حتت في الازاز .. اخدت قطن ومعقم وبدأت تعقم الجرح لادم
الغريب إن آدم قاعد فارد دراعاته الاتنين بمنتهي الصمت ومن غير مايتألم .. وباصص على مليكة وهي بتشتغل نظرة غريبة !!
نشوى : ألف سلامة عليك ياحبيبي ، معلش اصلكوا كنتو زي القمر في الخطوبة بردو ودي أقل حاجة تحصل الناس عينيها وحشة 🥺
آدم : يلا الحمدلله
سهيلة باستغراب : أومال فين إبراهيم ؟!
نشوى : ابرهيم في اوضته ، شوفته نايم من شوية
سهيلة بتسرح شوية ..
Flash back 📸🔙
وقت الخطوبة .. سهيلة جاية من بعيد شايفة ابراهيم بيعمل حاجه غريبة جنب أوضة مليكة
رجعت تاني بسرعة من الفلاش باك 🔙
سهيلة : طيب ادينا اتطمنا عليك ياادم انا رايحة أعمل حاجة كدا علي طول وراجعة
رفعت : يلا يانشوى احنا كمان نخرج ونسيب الدكتورة تشوف شغلها مع خطيبها ☺️
نشوى : شغلها ايه يابابا ماتخلينا واقفين
رفعت : انا قولت يلا يعني يلا
شدها وخرجوا الأوضة
آدم قاعد باصص علي مليكة وهي بتعقم الجروح .. وفجأة شد ايده بعيد
آدم بخبث : خوفتي عليا اوي مش كدا 😉
مليكة : عملت كدا بس عشان النجفة دي كانت هتقع على دماغي انا , الدور والباقي عليك انت بقا
آدم : اوعي تفكري إني عملت كدا خوفا عليكي لا سمح الله
آدم بيتعدل وبيقرب منها : بس روحك دي محدش ليه الحق يعذبها غيري .. ولسة أوان التعذيب مجاش
وعشان كدا انقذتك 😉
قام وقف .. مليكة اتنطرت وقامت وقفت
مليكة : إذا كنت شايفني غلط عشان سلوكي اللي حاطط في دماغك إنه زبالة دا شئ طبيعي .. بس اللي مش طبيعي أسلوبك معايا
دا مش أسلوب واحد شايفني غلط !
دا أسلوب واحد شاف مني حاجة كبيرة اوي وعاوز ينتقم ياادم
آدم بيلف عشان يمشي : الله أعلم بقا
مليكة بتمسكه وبتوقفه : مفيييش حاجة إسمها الله اعلم .. انت هتقولي حالا في ايه
آدم بينزل ايديها من علي ايده : المسكة دي متتكررش تاني .. فاهمة ؟؟
بيتلفت وبيبص على الكومودينو شاف الدهب .. عينه برقت واحمرت
مشي بخطوات بطيئة ناحية الكومودينو .. اخد الدبلة من وسط الدهب ، رجع تاني على ناحية مليكة
مليكة بتبعد عنه وهو بيقرب ، بتبعد وبيقرب .. لحد ما لزقت في الحيطة
وقف وبينه وبينها أقل من ٢ سنتي
آدم : مش آدم الخشاب اللي دبلته تتقلع يامليكة
بيمسك ايديها بالعافية وبيلبسها الدبلة
آدم : المرة دي انا هكتفي بأني البسهالك عادي .. المرة الجاية انا هلزقها في ايدك لزق دايم ألمه يفكرك بالألم اللي هتعانيه معايا بقيت حياتك
مليكة بتنزل ايديها بعد ما لبست الدبلة : أطلع برا ياادم
آدم : تمام .. هسيبك ترتاحي بقا , بكرا يومك طويل ياعروسة
💥💥💥💥💥💥💥💥💥💥💥💥
سهيلة بتفتح باب أوضة ابرهيم وداخلة
سهيلة : ابراهيم
بتبص حواليها ملقتش إبراهيم في الأوضة !!
استغربت وقفلت الباب وخرجت على برا تدور عليه في القصر كله ملهوش اثر
دخلت الجنينة وبدأت تدور وبتبص ورا شجرة .. لقت ابراهيم واقف متوتر
سهيلة : ابراهيم !!
انت ايه اللي موقفك كدا
ابراهيم بيخرج لبرا : مفيش حاجة عادي
سهيلة : مستخبي ورا الشجرة عادي !!
ابراهيم : في ايه ياسهيلة هو تحقيق ؟؟
سهيلة : كنت بتعمل ايه في أوضة مليكة النهاردة وقت الفرح ياابراهيم !!!
💥💥💥💥💥💥💥💥💥💥💥💥
رفعت قاعد في اوضته بيكلم صاحب الديكورات عشان يخلص ديكور أوضة نوم مليكة وآدم في يوم واحد .. خلص وكلم الكهربائي ييجي يقفل الكهربا .. قفل وكلم الاتيليه يجيبوا أحدث الفساتين وييجوا بيها تاني يوم عشان يختاروا فستان مليكة
💥✨💥✨💥✨💥✨💥✨💥✨💥
"في أوضة مليكة "
مليكة قاعدة ع السرير بتبص للدبلة اللي في ايديها .. تليفونها رن رقم غريب
مسكت الفون وردت
مليكة : الو ؟؟
= كنتي عروسة زي القمر النهاردة .. مصدقتش إن هي دي مليكة اللي آخر مرة شوفتها كانت لحمة حمرا
🔥شابتر 5 🔥
أجبرني أعشقه ❤️✨
= كنتي عروسة زي القمر النهاردة .. مصدقتش إن هي دي مليكة اللي آخر مرة شوفتها كانت لحمة حمرا
مليكة بعد سكوت للحظات : مين معايا ؟؟؟؟
= معقولة نسيتي صوتي !
عندك حق .. ماهو بردو اللي عملته فيكوا مش قليل
مليكة ملامح وشها كلها بتتغير وبتبرق وتقفل السكة بسرعة ..
مليكة بتحط ايديها على دماغها : لا إله إلا الله .. لا إله إلا الله
يارب انا الاقيها منين ولا منين بس ، من ناحية الحظ يخليني اورط نفسي في مصيبة سودا عشان أنقذ البت الغلبانة وبسبب الإنقاذ دا اضطر اتجوز واحد لا بطيقه ولا بيطيقني ، من ناحية تانية فيه سبب تاني لكرهه ليا ورغبته في الانتقام انا مش فهماااااه ، من ناحية تالتة يظهرلي شخص مجهول وال ايه بيحبني وعارف إني بريئة طب ياترى يعرف ايه تاااني 😱
ووسط كل دا ...
الحج محمد المصون اللي رماني انا وامي واختي واحنا لسة لحمة حمرا يظهر فجأة بعد كلللل السنين دي
انا ايه اللي بيحصلي بس .. ايه اللي بيحصلي
💥✨💥✨💥✨💥✨💥✨💥✨
سهيلة : كنت بتعمل ايه في أوضة مليكة النهاردة وقت الفرح ياابراهيم !!!
إبراهيم : كنت ببص على حاجة في الكهربا عشان العداد شكله مخرف
سهيلة : يعني انت شايف إنه طبيعي أشوفك جنب أوضة مليكة بتعمل حاجة غريبة وفي نفس اليوم النجفة تقع على مليكة !!
إبراهيم : صدفة
سهيلة : صدفة !!
إبراهيم : اه صدفة ياسهيلة .. واحسنلك نعتبرها صدفة
متخلينيش احطك في دماغي بقا انا كمان واقرفك في عيشتك
سهيلة : ماشي ياابراهيم .. انا هسكت دلوقتي واعتبرها صدفة بجد لكن ورحمة ابويا لو حسيت إنك بتفكر تأذي مليكة من بعيد ولا من قريب لاخرب الدنياااا
سابته ودخلت على الفيلا
💥✨💥✨💥✨💥✨💥✨💥💥💥
*تاني يوم الصبح *
الشغالة بتجهز الفطار على السفرة .. رفعت قاعد على الكرسي بتاعه ، بدأت العيلة كلها تتجمع على السفرة
رفعت : اومال فين آدم ومليكة
سهيلة : آدم كان نازل ورايا ومليكة في الجنينة بتكلم صحبتها وهتيجي تفطر
ثرية : الله يعينه الشغل كله فوق دماغه
رفعت : تربيتي ولازم يطلع قد المسؤولية طبعاً
آدم نازل ع السلم مستعجل جداً
آدم داخل عليهم : صباح الخير ياجماعة
أمينة : صباح النور ياقلب امك .. اقعد افطر يابني مالك واقف بعيد ليه كدا
آدم بيقرب وبياكل كام حاجة وهو واقف : لا ياامي مفيش وقت والله ورايا بلاوي متلتلة في المكتب لازم الحق اخلصها قبل الفرح
بيلف عينه على كل اللي قاعدين بيحسب مليكة في وسطهم ملقاهاش
سهيلة : ربنا معاك ياحبيبي ويوفقك
آدم : اللهم آمين ، يلا استأذن انا بقا
سابهم وخارج من الباب على الجنينة بسرعة ، ومن الناحية التانية مليكة داخلة هي كمان بسرعة
كانوا هيخبطوا في بعض لولا أن آدم رجع بضهره في آخر لحظة
مليكة بخضة : لا إله إلا الله .. على الصبح كدا 😒
آدم : لا ياحبيبتي اتعودي علي كدا .. كلها يوم وهبقى في وشك ٢٤ ساعة ☺️
وياريتها هتيجي بس على إني أكون في وشك دا انا...
وقبل ما يكمل الكلمة كانت مليكة بتزقه بعزم ما فيها وبتدخل القصر
وقف اتعدل : تمام
خرج على برا ركب عربيته ومشي في إتجاه الشركة
💥✨💥✨💥✨💥✨💥✨💥✨💥✨💥
مليكة دخلت شدت كرسي وقعدت : اومال فين روان ؟
سهيلة : بتنيم ياسين وجاية
مليكة : طيب انا هطلع أشوفها الأول عشان نفطر كلنا سوا
نشوى : ما تسيبيها هي هتخلص وتنزل
مليكة قامت وبدأت تتحرك : معلش ياعمتي عارفاني مبعرفش اكل من غيرها
سابتهم وطلعت جري على فوق
ثرية : ربنا يخليهم لبعض يارب
💥💥💥💥💥💥💥💥💥💥💥💥💥
مليكة طالعة على السلم .. ماشية في الطرقة رايحة على أوضة روان
إبراهيم جاي في وشها وعينه كلها شر
مليكة : ازيك ياابراهيم عامل ايه
إبراهيم : كويس الحمدلله انتي أخبارك ايه ؟
مليكة : بخير الحمدلله
إبراهيم : بخير ! غريبة دي
مليكة : هي ايه اللي غريبة
إبراهيم : فيه واحدة فرحها على آدم الخشاب بكرا وتبقي بخير ؟؟
مليكة : ايه ياابراهيم انت من امتى بتتكلم كدا عن أخوك !
إبراهيم : بتكلم كدا عن اخويا عشان اوعيكي وافوقك إن مش غلطة ممكن تكوني بريئة فيها كمان هتخليكي ترمي نفسك الرمية دي .. على الرغم أنك لو ركزتي شوية هتلاقي الف مين يتمناكي وموجودين حواليكي بس انتي مش شايفة
مليكة بتركز وبتفتكر اللي حصلها قبلها بيوم في المخزن ..
مليكة : ابراهيم هو انت ا....
نشوى في آخر الطرقة : جرا ايه يامليكة يعني انتي قايمة تشوفي اختك تقفي ترغي مع ابراهيم !
يلا روحي اندهي لاختك خلينا نفطر ونخلص ورانا شغل كتير وانت ياابراهيم تعالي افطر يلا
سابتهم مليكة وراحت على أوضة روان .. وهي بتقرب منها سمعت روان بتصوت بعلو صوتها وبتزعق
" اطلع برااااااا يامعاذ بقولك انت مش هتقعد معايا في الأوضة دي دقيقة كماااان "
مليكة بتبرق ومصدومة من اللي بتسمعه وفجأة سمعت حاجة بتتكسر .. برقت زيادة ودخلت بسرعة على الأوضة اللي كانوا اصلا سايبين بابها مفتوح
معاذ واقف في نص الأوضة بعد ما كسر أكبر فازة موجودة
معاذ بزعيق : انا مش هستحمل الوضع دا كتير ياروان .. ومكانتش غلطة غلطاناها يابخاري
مليكة : في ايه ياجماعة صوتكم جايب آخر الشارع
معاذ : اهلااااا .. اهو البطل الحقيقي وصل
عقلي أختك بقا ياعاقلة
مليكة : البطل الحقيقي !!
في ايه ياروان مالك
روان : في إني لازم اتطلق من الحيوان دا النهاردة قبل بكرا وساكتة لحد ما فرحك يتم
معاذ بيقرب ولسة هيضربها : حيوان ايه ماتحترمي نفسسسسك يابت انتي
مليكة بتجري وبتمسك ايديه الاتنين وهي الشر بينط من عينيها
معاذ بيتلفت وبيبص لايديها اللي ماسكة ايده وبيبتسم بخبث
مليكة : لاااااا يامعاذ لحد هنا واستوب
انا ممكن أقبل واستحمل أي حاجة في الدنيا إلا إن حد يأذي اختي ام امي .. احنا اتأذينا كتيييير بما فيه الكفاية ومش هقبل بأذية تاني
اتفضل بعد إذنك اطلع برا لحد ماقعد مع أختي وافهم فيه ايه
معاذ : تمام .. عشان خاطرك انت بس ياقمر
روان بتبرق : بصي بصي بيكلمك ازاي الحيوان الندل
معاذ : تاااااني بردو .. غلط تاني
مليكة : خلااااص ياروان خلصنا ، اتكل علي الله يامعاذ شوف انت رايح فين
سابهم معاذ ونزل على تحت
مليكة : ايه ياروان احكيلي مالك بقا
💥💥💥💥💥💥💥💥💥💥💥💥
آدم داخل الشركة بيسلم على الموظفين ورايح على مكتبه ..
دخل المكتب قعد ومسك الملفات يبص عليها ، الباب خبط ودخل إسلام صاحبه وزميله في الشركة
إسلام : ايه يابني مجتش امبارح ليه ؟
آدم : شوية حوارات وقرف كدا عالماشي
إسلام : حوارات ايه يابني خير
آدم : مفيش .. أصل انا فرحي بكرا 😅
وخطوبتي كانت امبارح بالليل
إسلام : ايه 😳
فرح ايه وخطوبة ايه ، انت اكيد بتهزر صح
آدم : ياريتني كنت بهزر ياعم
إسلام : جواز ااايه اللي بالسرعة دي ياادم وازاي حاجة زي دي تحصل من غير ماتقولي .. ومن سعيدة الحظ اللي هتتجوزك دي أصلا
آدم : مليكة ☺️
إسلام : 😮
آدم : اقفل بوقك عشان الشياطين متخشش بس
إسلام : مليكة مين ياادم ؟؟؟؟؟
آدم : مليكة بنت عمي
إسلام : لا في دي بتهزر بجد
انت هتتجوز مليكة بعد كل اللي عملته فيك زمان
آدم : اه يااسلام هتجوزها .. حكم القوي بقا نعمل ايه
إسلام : قوي ايه ؟ متصيعش عليا ياادم انت آخر واحد ممكن يتجبر على حاجة
انت ايه الي في دماغك بالظبط رسيني
آدم : عملت خطة طوووويلة عريضة عشان في الآخر تدسبني فيها واتجوزها وتمحي كل اغلاطها فيا انا .. ووراها جدي الكبير العظيم اللي شايف إنه مبيغلطش حاول يجبرني عليها
وبعدهم العيلة الكريمة كلها وافقت ورحبت
وبناءً عليه انا كمان وافقت ورحبت ، والبادي أظلم
إسلام : طب وداليدا هتعمل فيها ايه ؟؟
آدم : أهي دي الحاجة الوحيدة اللي مزولاني من امبارح ، بس اكيد هلاقي حل بإذن الله
إسلام : ولا حتي متلاقيش مش فارقة🙄
آدم : جرا ايه ياادم مابلاش الكلام دا
داليدا بت جدعة وبنت أصول بردو
إسلام : جدعة وبنت أصول بس انت مبتحبهاش ياادم ، انت محبتش غير مليكة
والقاضية بقا ... مش هتحب غير مليكة
آدم قام وقف وعروقه كلها نفرت ونبرة صوته اخشنت : انا لا حبيت مليكة ولا حبيت غيرها يااسلام .. ومتفتحتش الموضوع دا تاني
إسلام : خلاص خلاص ياعم انا آسف اقعد بس
آدم : لا انا هروح بقا عشان الراجل بتاع التصوير جاي ياخدلنا صور كتب الكتاب
إسلام : طب والشغل ؟؟
آدم : سبتلك ع المكتب الورقة دي فيها البلان اللي هتمشوا عليها الفترة الجاية لحد ماارجع بعد الجواز
إسلام : طيب وانا هخلص شغل على طول واجيلكو عشان لو احتاجتني في حاجة
آدم : تمام
💥💥💥💥💥💥💥💥💥💥💥💥💥
*في القصر *
مليكة : يالهوي ياروان .. كل دا حصل ومتحكيليش حاجة !!!
روان : احكيلك ايه بس في الظروف المنيلة اللي بتمري بيها .. انا بس هموت وأعرف مين البنت اللي يعرفها عليا دي
قلبي حاسس إنها مش حد بعيد بالعكس قريبة جداً مني
مليكة : طيب اهدي كدا ويوم الفرح الأسود دا بس يعدي وهنشوف حل مع بعض
روان : الحل هو الطلاق معروفة ، انا بس اللي صعبان عليا الواد الغلبان اللي هيتشرد بين أمه وابوه بدري بدري دا
مليكة : لا إله إلا الله .. انا مش عارفة ايه اللي بيحصلنا دا اقسم بالله
رفعت داخل عليهم : مليكة تعالي عايزك ثواني .. خليكي انتي ياروان عشان لو ابنك صحي تبقي جنبه
مليكة : حاضر ياجدو
قامت معاه .. مشيوا لحد آخر القصر
فتح رفعت باب أوضة ودخلوا
أوضة كبيييييرة شبه جناح .. متشطبة تشطيب كامل وعفش غالي وديكورات
رفعت : ها ايه رأيك ؟؟
مليكة : ايه دي ؟
رفعت : دا المكان اللي هتتجوزي فيه انتي وآدم
كنت عمال أفكر اشطبلكم شقة ، بس حبيت انكو تكونوا معانا في نفس القصر ومن ناحية تانية يكون المكان كبير عشان يليق بيكم بردو 😍
مليكة بحزن : ماشي ياجدو ، حلوة
رفعت : طيب اسيبك بقا تتفرجي عليها كويس وتشوفي دولابك والهدوم الي فيه وانا هنزل أكمل التجهيزات انا وامك وحماتك
مليكة : تمام
خرج رفعت من الأوضة نزل على تحت .. دخلت مليكة وبدأت تتفرج علي الأوضة ، فتحت الدولاب
درفة كاملة مليانة لانجيري وبيجامات ليها
ملامح وشها اتغيرت وعينيها دمعت ..
مليكة : يعني خلاص كدا مفيش مفر وبكرا كل حاجة هتنتهي وهتكتب على إسم الحيوان دا
سندت دماغها على الدولاب
وفجأة ...
نور الأوضة كله اتطفى
اتخضت مليكة واتعدلت بسرعة وبصت حواليها .. الأوضة ضلمة كحل وابوابها عمالة تترزع تتقفل
وكلهم بيندهوا عليها بصوت عااااالي من الريسبشن تحت "مليييييييكة انزلي بسررررررعة "
💥💥💥💥💥💥💥💥💥💥
تفتكروا ايه اللي بيحصل ؟؟
❤️❤️❤️❤️
❤️❤️شابتر 6 ❤️❤️
وفجأة ...
نور الأوضة كله اتطفى
مليكة اتخضت واتعدلت بسرعة وبصت حواليها .. الأوضة ضلمة كحل وابوابها عمالة تترزع تتقفل
جاية تجري على الباب عشان تفتحه لقيته مش بيفتح .. بدأت تعرق وعينيها تدمع من الخوف
بتغمض عينيها : أشهد أن لا إله إلا الله
واشهد أن محمداً رسول الله .. يارب احميني انا أعصابي بااااظت
وجاية بتلف وشها خبطت في حد لسة هتصوت كتم بوقها
غمضت عينيها تاني من الخوف : انت ميييي...
وقبل ما تكمل الكلمة بدأت تميز ريحة البرفيوم بتاعته واكتشفت إنها ريحة *آدم* فتحت عينيها تاني
آدم : جالي خبر ان الحكومة داخلة على البيت عشان تقبض عليكي ، والتهمة انا لسة معرفهاش
سبقتهم وطلعت على هنا وطفيت النور عشان أحذرك متنزليش من الأوضة دي غير لما انا أطلع اجيبك
خلص كلامه ونزل ايده من على بوقها
مليكة : وانت مصلحتك ايه في كل دا ؟؟
آدم : مش لازم تعرفي مصلحتي ايه دلوقتي .. المهم تنفذي اللي قولتلك عليه
متتحركيش من هنا ولا تعملي صوت ولا تنوري النور
سابها وخرج على برا نزل من السلم الخلفي على الجنينة .. وبص على البيت
الظابط داخل ومعاه امنا الشرطة : انا معايا أمر بالقبض على مليكة محمد الخشّاب
رفعت : نعم ؟؟؟
تقبض عليها بتهمة ايه ياحضرة الظابط !!
الظابط : بتهمة سرقة كوليه الماظ تمنه نص مليون جنيه
ثرية بتدب على قلبها : ياحوستي السودا نص مليون اااايه انا بنتي مش حرامية يا...
الظابط : طب عشان انا بحترم البيت دا والعيلة دي عشان مش بنسمع عنكم غير كل خير مش هعمل شوشرة ولا هزعق بس بعد اذنكم سلمونا المتهمة بهدوء
رفعت بينده : مليييييكة .. انزلي بسرعة
آدم داخل عليهم : بس انا خطيبتي مش هتخرج من البيت دا ياحضرة الظابط
الظابط : معناه ايه الكلام دا ؟؟
آدم : اقولك معناه ايه ياباشا
مد ايده في جيبه طلع دفتر الشيكات .. كتب شيك ب٥٠٠ ألف جنيه
آدم : اتفضل ياباشا الشيك دا هيفضل رهن معاكو لحد مانلاقي عقد الالماظ بس شعره من خطيبتي اللي بكرا هتكون مراتي تتمس .. آسف دي ممكن يطير فيها رقاب ✋
ثرية وأمينة وسهيلة وروان واقفين خايفين ومرعوبين من اللي ممكن يحصل دلوقتي لمليكة
الظابط : يطير فيها رقاب الحكومة ياادم ؟؟؟
رفعت : لا ياباشا العفو آدم أكيد ميقصدش بس الفكرة إن احنا حريمنا مبتباتش في الأقسام
آدم : دا غير إن مليكة مش موجودة في البيت أصلا في الشارع بتجيب طلبات لنفسها .. ثم إني سلمت حضرتك الشيك واعتقد كدا مبقاش علينا حق
الظابط : حتى لو ادتني الشيك فيه إجراءات لازم تحصل مع مليكة في القسم عشان نخلي سبيلها .. خصوصاً وإن اللي مبلغة على العقد رافضة تماماً أي تعويض وعايزة العقد بتاعها
رفعت : طيب شوف ياحضرة الظابط .. انا لو عليا كرفعت الخشاب أقدر حالاً اقلبها حرب ورجالتي يغربلوا كل الموجودين في المكان بس انا مش هعمل دا عشان انا راجل بفهم في الأصول ... فبعد إذنك خد الشيك وحقق كويس في الموضوع قبل ما تقبض علي حد ، حفيدتي مش حرامية ياباشا
الظابط بعد تنهيدة : ماشي ياجماعة .. انا هاخد الشيك وامشي وهعرض الموضوع على اللي أعلى مني ونشوف رأيهم ايه
بس خليكم فاكرين الموضوع منتهاش .. انا همشي بس احتراماً للعيلة دي
رفعت : آنست وشرفت ياسعادة الباشا
خرج الظابط والامنا معاه ..
ثرية قعدت على الكرسي اللي تحتها من صعوبة الموقف
ثرية بتحط ايديها على دماغها : ايه اللي بيحصلنا دا بس
آدم : متقلقيش ياامي انا هخرجها من الموضوع ده
يعدي اليوم بتاع بكرا دا بس وانا هشوف مين اللي ورا الموضوع واللي بلغ عنها واشمعنا هي بالذات
نشوى : إن شاء الله خير ياثرية متخافيش
سهيلة بتطبطب على ثرية : خير ياعمتو خير بإذن الله
روان بتبصلها بغيظ
روان : انا هطلع أشوف مليكة زمانها مرعوبة فوق
الشغالة : الراجل بتاع التصوير جه ياجماعة وطالب العريس والعروسة عشان صور كتب الكتاب
رفعت : دخليه على الصالون ياحنان وهما هيجهزوا ويروحوا
💥💥💥💥💥💥💥💥💥💥💥💥
روان داخلة على مليكة الاوضة .. نورت النور
مليكة : مشيوا ؟؟؟
روان : اه مشيوا خلاص
مليكة : كان فيه ايه ياروان
روان : مش عارفة حاجة غريبة اوي
فيه حد مبلغ إنك سارقة منه عقد الماظ بنص مليون جنيه من كام يوم
مليكة بتبرق : ايه 😳😳😳
انتي بتهزري صح ؟؟
روان : والله بكلمك بجد .. بس آدم حلها
مليكة : وحلها ازاي سي آدم
روان : كتب للظابط شيك بنص مليون جنيه واداهوله رهن لحد ما نلاقي العقد الحقيقي
مليكة بتقعد ع السرير : لا حول ولا قوه الا بالله
روان بتتفرج عالاوضة : بس حلوة الأوضة والله مشطبينها حلو ديكورات وعفش غالي وبتاع
مليكة : والنبي ياروان تسكتي أوضة ايه دي اللي بتتكلمي عنها
سهيلة داخلة عليهم : الجماعة بيندهولك يامليكة عشان الراجل بتاع التصوير جه
مليكة : تصوير ااااايه هو دا وقته
سهيلة : خلاص بقا يامليكة ريحيهم وانزلي يعني هي كل حاجة ماشية عدل أوي ودي اللي غريبة
روان بسخرية : وكل حاجة هتمشي عدل ازاي والنبي 😒
سهيلة : روان بعد إذنك الوضع ميسمحش نهاااائي بأي تجريح .. كل واحد فينا شايل اللي مكفيه وزيادة
يلا يامليكة عشان متتأخريش
💥💥💥💥💥💥💥💥💥💥💥💥
بعد نص ساعة .. مليكة خلصت لبس ونزلت الصالون عشان تتصور هي وآدم
💥💥💥💥💥💥💥💥💥💥💥💥
معاذ خارج من اوضته بيبص يمين وشمال .. اتأكد إن مفيش حد موجود
مشي على طول ودخل أوضة اوض الضيوف في الخباثة وقفل الباب
بعد ربع ساعة ... روان ماشية في الطرقة جنب نفس الأوضة
سمعت صوت معاذ في الأوضة بيتكلم مع حد
روان باستغراب : هو معاذ من امتى بيدخل اوض الضيوف ، وياتري بيكلم مين جوا
حطت ايديها على اوكرة الباب وبتفتح ، الباب مبيفتحش
*مقفول بالترباس من جوا*
بدأت روان تخبط ع الباب بعزم ما فيها
روان : افتتتتتح الباب يامعاااااذ انت بتعمل ااايه جوا
استمرت في التخبيط جامد جدااا وبعد دقيقة معاذ فتح الباب
روان داخلة الأوضة تجري وتبص حواليها : قاعد بتعمل ايه جوا ومع مين
معاذ : هو انتي مجنونة ؟؟
كنت قاعد لوحدي مبعملش حاجة
روان : لا يامعاذ انا مش مجنونة انت اللي عاوز تجنني .. انا سمعاك بودني بتتكلم مع حد يامعاااذ بتكلم مييين أنطق
فضلت تدور يمين وشمال وتفتح البلكونة تبص ملقتش اي أثر لأي حد
معاذ بيضحك بسخرية : شوفتي بقا إنك اتجننتي ؟
روان بغيظ : مااااشي يامعاذ .. مسيري اقفشك متلبس كدا في مرة
ولا اقفشك ليه ؟؟ خلاص هانت كلها بكرا وكل حاجة تخلص
سابته وخرجت من الأوضة .. قفل الباب وراها
انتظر دقيقتين لحد مااتأكد انها نزلت
فتح الدولاب
معاذ : اخرجي ياحبيبتي نزلت خلاص
💥💥💥💥💥💥💥💥💥💥💥💥
*في الصالون *
مليكة وآدم خلصوا تصوير
رفعت : يلا ياادم انا وصيتلك على البدلة في وسط البلد روح استلمها .. وانتي يامليكة غيري هدومك علي ما الاتيليه يبعت بنت بالفساتين عشان تختاري فستان .. وخلصوا بسرعة عشان لازم ننام بدري ونصحى بدري عشان بكرا المأذون هييجي على العصر ولازم نكون جاهزين ومجهزين كل حاجة
سهيلة جاية من بعيد : طيب وديكورات الفرح هتخلص امتى ياجدي احنا كدا مش هنلحق
رفعت : ودي حاجة تفوتني بردو 🤔
كلمت سليم وقولتله يجهز نفسه هو والصبيان اللي معاه عشان هييجي ٦ الصبح يبدأ على طول
سهيلة : تمام
مليكة وآدم بيبصوا لبعض واحد كاره التاني ومش مستوعب ازاي بكرا هيتجوزه
💥💥💥💥💥💥💥💥💥💥💥💥
*في أوضة أمينة *
أمينة وثرية قاعدين على السرير جنب بعض
ثرية : ايه العلاج عامل مفعول ولا ايه النظام ؟؟
أمينة : والله ولا عامل أي حاجة .. بس انا عندي أمل كبير في ربنا إن في يوم من الأيام هيفرجها عليا ، ربنا كبير اوي
ثرية : ونعم بالله .. جدعة ياامينة هي دي أختي اللي اتعودت عليها
أمينة : قوليلي بقا .. مالك كدا وشك حزين وعينك دبلانة
ولا تكونيش خايفة على مليكة من الجواز 🤔😹
ثرية : لا أخاف عليها من ايه .. دا انا هدي بنتي لابني ياامينة
امينة : اومال ايه اللي مزعلك كدا
ثرية : ابدا .. قلبي واكلني عليها بس إن في يوم زي دا واقفة بطولها لا معاها أب ولا اخ وجدها يبقى هو وكيلها
امينة : ربنا مبيديش حد اكتر من نصيبه ياثرية .. ومليكة بنتك غلبانة وبنت حلال وبكرا ربنا يعوضها بحاجة أحسن من وجود أبوها ميت مرة
ثرية : يارب ياامينة .. يعلم ربنا ان مليكة بنتي دي متستاهلش غير كل خير
طول عمرها نضيفة وقلبها ابيض من البفتا ، عندها إستعداد تشيل عن كل اللي حواليها ومتبينش وجعها ابدااا
امينة : وعشان كدا بقولك بكرا ربنا يكرمها ويعوضها .. وإذا كان علي علاقتها بادم هفكرك بكرا لما يحبوا بعض إن كل واحد فيهم هيبقي بيموت على التاني
ثرية : ياااارب ياامينة
💥💥💥💥💥💥💥💥💥💥💥💥
تاني يوم الصبح 🌄🌄
مليكة صحيت من النوم وقاعدة على السرير باصة قدامها .. جسمها ثابت ومخها مشلول عن الحركة
"هو انا بجد هعمل في نفسي كدا ؟!"
ثرية : صباح الخير ياعروسة 😍😍😍
مليكة : صباح النور ياماما
ثرية : فيه عروسة تنام لحد دلوقتي بردو 🤔🤔 يابنتي كتب الكتاب ع العصرية 😱😱
مليكة : ماخلاااااص ياماما هقوم في ايه الفرح هيطير
ثرية بزعل : اول مرة تشخطي في أمك يامليكة
دا بدل ما تقومي تحضنيني في آخر ساعات قبل فرحك يابنت بطني
مليكة حست بالذنب .. قامت من ع السرير في اتجاه امها
باست دماغها وايديها وحضنتها : انا آسفة ياامي حقك عليا .. انا بس أعصابي تعبانة شوية
ثرية بتمسحلها دموعها : صدقيني يابنتي ربنا هيراضيكي وهيجازيكي خير بس انتي اضحكي وارضي بنصيبك
رفعت داخل الأوضة : لاااا مش وقته دموع وعواطف بقا هي مش هاتسيبك وتهاجر دي هتبقي معاكي في نفس البيت
يلا يامليكة خشي اغسلي وشك الكوافيره على وصول خلاص
فجأة سمعوا زعيق جامد اوي وقلق جاي من برا الأوضة
وقفوا برقوا هما التلاتة
رفعت : ياستار يارب .. انا هنزل أشوف فيه ايه
نزل بسرعة على تحت في مدخل القصر .. اكتر من ١٠ أفراد واقفين يزعقوا ويهللوا
"فين رفعت الخشااااااب "
💥💥💥💥💥💥💥💥💥💥💥💥
بما انكم فرحتوني امبارح فأنا هنفذ وعدي ليكم وانزل شابتر تاني النهاردة أول ما الشابتر دا يعدي 3000🙈🙈
يلا قولوا توقعاتكم واتفاعلوا ❤️❤️❤️❤️🔥🔥
تعليقات
إرسال تعليق