رواية أوتار أحد من السيف الفصل التاسع عشر والعشرين والحادي والعشرون بقلم الكاتبه زهرة الربيع حصريه وجديده على مدونة النجم المتوهج
رواية أوتار أحد من السيف الفصل التاسع عشر والعشرين والحادي والعشرون بقلم الكاتبه زهرة الربيع حصريه وجديده على مدونة النجم المتوهج
دياب احتدت عيونه بغضب رهيب لما شاف عقبه قاعد قصاده وبيبصله بنظرات اسوء بكتييير
وقف بالعافيه وهو حاطط ايده على دماغه بالم وقال بغضب...ايه اللي هببته ده...راسي..راسي بتنزف عايز تخلص عليا اتجنيت خلاص مبقاش فيك عقل واصل
هنا عقبه غمض عنيه وهو بيفتكر شكل فاطمه وهيه مرعوبه ومتبهدله هجم على دياب بشراسه وضربه بركبته في بطنه بقوه وهو بيقول....انا اللي اتجنيت يا ابن الحرام يا وسخ
وطبعا في الوقت ده دياب كان فريسه سهله جدا لان جرح جنبه نزف تاني من المجهود ودماغه كمان بتنزف
عقبه وقعه على الارض وبقى يضربه بغل وهو مش ناسي منظر فاطمه
دياب حس بتعب شديد وحاول يوقفه بس كان اول مره يشوف عقبه بالشكل ده حاول بكل قوته ومسك ايده قبل ما يضرب اكتر وقال وهو بينهج ...هموت....هموت يا عقبه كفايه....دمي اتصفى
عقبه بصله باستفهام لما قال كده وبعد عنه واتفاجأ لما لقى جلابيته غرقانه دم اتنهد بخنقه وقال...حلال فيك الموت ....بس انت عارف زين اني مهقدرش اعملها عشان كده واخد راحتك ومكتر
وشده من هدومه ورماه على الكنبه ودياب كان تعبان جدا حط ايده على جنبه بالم شديد وقال بسخريه...شكلي هفارق خلاص ...صاحبك مكتفاش بجرح قلبي
عقبه زعق فيه وقال بغضب شديد.....هو مين اللي جرح مين...بطل تعمل كيف الي قتل القتيل ومشى في جنازته...قسما بالله لولا اني معايزش اشيل دمك يوم القيامه...كنت سبتك هنه لحد ما تتصفى ونرتاح كلنا منك
دياب بلع ريقه بالعافيه وقال..في دي معاك حق يا شيخ عقبه...انا لو مش موجود كان زمانكم كلكم مرتاحين ....صدقت ...ومتقلقش مسيري ههملكم ترتاحوا
عقبه بصله بضيق شديد وراح جاب مفرش شق منه قطعه وربطهوله على جنبه وحته تاني فوق دماغه وقال....احمد ربك على اللي انت فيه ده ....لولاه كنت ربيتك الربايه اللي اهلك مقدروش عليها
دياب رفع حاجبه وضحك بالم وقال...لولا اللي انا فيه... ولولا انك ضربتني غدر من ضهري مكنتش قدرت تسد وياي وكان زمان كل حته فيك تشهد ...خليني اشد واقف على حيلي وتعالى واجهني وش لوش ووريني الرجوله يا سبع
عقبه بصله بغضب شديد ولسه هيتكلم جاتله مكالمه و اتوتر جدا لما لقاها من فياض رد بارتباك وقال...احم.... كيفك يا فياض
فياض قال بقلق شديد...فاطمه يا عقبه مرجعتش البيت بعد الدرس ...الله اعلم البت راحت فين ولا جرالها ايه و...
عقبه قاطعه بسرعه وقال........اهدى فاطمه معاي
فياض وقف العربيه فجأه وهو مصدوم وقال بحده...معاك...معاك كيف
عقبه حاول يبان ضبيعي وقال....فيه ايه هتخاف عليها مني ولا ايه....كل الحكايه اني زعلت عليها امبارح واستنيتها بعد الدرس لجل نتكلموا كلمتين سوا واشوف هيه رفضاني ليه يعني..معلش مخدتش اذنك بس اهي جات في دماغي كده
فياض استغرب جدا جدا لان عقبه مش دي عادته ولا طبعه ولو كان عايز يتكلم مع فاطمه كان هيستاذنه ويتكلم قدامهم قال بسرعه....اديني فاطمه اكلمها
عقبه بلع ريقه ومكانش عارف يرد ودياب اتنهد بخنقه وشاورله على الحمام
عقبه قال بسرعه...اه في الحمام
فياض قال باستغراب...في الحمام ...حمام ايه
عقبه قال بتوتر...اصل فاطمه محبتش نقعد لوحدنا واخدت واحده زميلتها معاها وكنا قاعدين والبت اللي معاها كانت عايزه تروح الحمام وفاطمه قامت معاها.... لما يرجعوا هخليها تكلمك
فياض قال بخنقه..انا مداخلش راسي الحديت ده.... انتو فين انا جايلكم
عقبه قال بسرعه.....انت بتكدبني..هو انا عمري كدبت عليك...اسمع ربع ساعه بالكتير وهرجعها الدار واتصل هتلاقيها هناك....ولا انت مش مأمن لي ولا ايه
فياض قال بقلق..اكيد لا يا عقبه انت بتقول ايه...بس قلقت لما امي قالتلي انها مرجعتش خلاص شويه وهكلمها
قال كده وقفل معاه ورجع على السرايه بقلق وهو حاسس ان فيه حاجه غلط
عند عقبه بص لدياب وقال بخنقه....الله يسامحك خليتني كدبت عليه
دياب اتنهد و طلع تليفونه واتصل بمحل هدوم يعرفه وبيجيب منه هدوم لغفران وقال....ايوه يا حسن عايز فستان طويل بكمام ...ايوه زي اللي باخدهم ...ومتبعتهوش على الدار هبعتلك العنوان في رساله
قال كده وقفل معاه وبعتله الرساله وهو تعبان جدا
عقبه بصله بسخريه وقال بتريقه...تشكر والله ....معارفينش نشكرك كيف على كرمك وشهامتك
دياب اتنهد وقال....جيت هنه كيف
بقلم...زهرة الربيع
عقبه قال بغضب....مشيت وراها كنت متأكد هتاجيلك ومتأكد انك وسخ مليكش عزيز ...بس لسوء الحظ العربيه اللي اخدتها وقفت في حته مقطوعه.... وجيت جري على رجليا فتأخرت ولحسن الحظ اني اعرف البيت ده ومن الطريق فهمت انك هتجيبها فيه ...في البيت اللي ياما اجتمعنا فيه وسهرنا ..وكنت تقعد ويا اخوها فيه وكانكم اخوات يا خسيس يا ندل
دياب قال بخنقه وغضب.... انا ممستنيش منك دروس في الاخلاق يا شيخ عقبه ...كل واحد ادرى باللي فيه
وطلع مفاتيح البيت حطهم على الطاوله وقال...اقفل الباب لما تاجي تمشي
ووقف بالعافيه ولسه هيمشي عقبه وقف قدامه وقال بغضب وحده.....اخر مره هقولك شيلها من دماغك يا دياب ...لو قربتلها تاني ولا حتى كلمتها كلام...اقسم بالله هخلص عليك وما هتردد
دياب ابتسم بسخريه وخرج وهو بيتالم جدا من غير ما ينطق بحرف
عقبه كان بيبص لطيفه وقلقان عليه لانه تعبان وبينزف بس كان قلبه محروق منه ومش قادر ينسى اللي عمله
اتنهد وراح بسرعه اوضة فاطمه علشان يفوقها قبل ما العامل يجيب الفستان علشان تلبس ويروحو ويكلمه فياض
عند خطاب نزل تحت لقى اوصاف قاعده بتهزر مع الخدم ومش تعبانه ولا حاجه احتدت عيونه وقرب مسكها من دراعها وقال بغضب....انتي ولا ترحمي ولا تسيبي رحمة ربنا تنزل
اوصاف اصطنعت عدم الفهم وقالت...فيه ايه بس انا عملت ايه
خطاب قال بغضب...عملك اسود ومهبب...انتي مش لسه من شويه كنتي بتموتي واخدتي غفران من اوضتي توصلك كنك مكسحه
اوصاف قالت بضيق...ما انا كنت تعبانه وخفيت هو انت عايزني اقعد تعبانه على طول ولا ايه
خطاب داس على سنانه بغضب وقال....انهارده اخر يوم يا غفران وبكره هبدأ ادعي في البلد واجهزلك اوضتك يا عروسه..معاكي لباقي النهار لو مسمعتيش الكلام اعتبري نفسك مرتي وعمرك ما هترجعي لاهلك تاني....لان انا مش هدعي الناس واقولهم كنت بهزر
قال كده وسابها واقفه مكانها بتوتر وقلق
في الوقت ده دخل فياض وقال....خطاب بيه عايزينك في الاسطبل
خطاب بصلو بغضب وقال..وانت كمان اتأخرت ليه...هلاقيها منين ولا منين
فياض اتنهد وقال..انا مكنتش هاجي واصل ....بس لما انت بعتلي الغفير جيت لجل خاطرك
خطاب مسح على وشه وقال....فياض يا ولدي خلي امورك مع دياب بعيد عن شغلنا انا مسلمك كل امور الشغل متوقفش حالي لجل انك متخانق وياه سامع
فياض اتنهد وهز راسه بهدوء
وخطاب طلع على الاسطبل بغضب شديد
اوصاف اتقدمت على فياض بقلق وقالت....لازم اطلع الجبل يا فياض ...لازم انهارده مبقاش فيه وقت
فياض استغرب وقال ...ما انا قولتلك الليله ..فيه ايه حصلت حاجه جديده
اوصاف قالت بتوتر...مفيش...بس كيف ما قولتلك الراجل قاعد من غير فلوس
فياض اتنهد وقال....والله انا معارف المشكله بقت في دماغي ولا فيكم ...مفيش حد بيقولي حاجه اليومين دول وتدخل دماغي..مهو اكيد المشكله في دماغي مش ممكن تكونو كلكم بتكدبو
اوصاف ضحكت وقالت....سلامة دماغك يا ريس...انت بس اللي دماغك فوق الناس دي ...عشان كده كلامهم مش مقاسها
فياض قرب منها خطوه وابتسم وقال....سامع كلام حلو من الصبح ...كل ده عشان هاخدك الجبل
اوصاف ضحكت وقالت....وه قصدك اني بستغلك ..انا وش كده برضك
فياض ابتسم وقال...الصراحه اه
اوصاف ضحكت جامد وقالت..طوالي كده ...على العموم فهمتني غلط ..انا بس طبيعتي كده اقول للكداب انت كداب في وشه.... والعاطل انت عاطل في وشه
وقربت منه وقالت برقه....وللجامد انت جامد في وشه
فياض ضحك جامد وقال.....وهو فيه اجمد منك
اوصاف ابتسمت وقالت....ايوه كده يا عم اضحك الدنيا ممستهلاش
فياض ابتسم وبصلها شويه واوصاف كمان وكانت بينهم نظرات حلوه جدا
فياض لا اراديا حس بقلبه بيدق تاني لاول مره من وقت طويل .....اول ما حس بكده رجع فورا وعلامات الخوف على وشه وقال..احم....انا ورايا شغل و...
بس قبل ما يكمل غفران طلعت من اوضتها ونادت للخدامه وقالت ..سنيه....ناديلي حد للحقنه بتاعتي مخدتهاش امبارح
فياض واوصاف بصولها وغفران شافتهم قريبين من بعض
واوصاف قالت بسرعه...انا ادهالك ..ده انا شاطره قوي وكنت بدي الجبل كله
غفران فضلت بصالهم شويه وبتفكر ياترى فيه بينهم حاجه بس اتسعت عيونها فجأه وصرخت وقالت...يا مري...دياب
ونزلت جري
فياض واوصاف بصو وراهم لقو دياب بيتكأ على الحيطان بتعب شديد وهدومه غرقانه دم ودماغه مربوطه
اوصاف ضربت على صدرها وقالت ....يا مراري
وفياض جري عليه سنده بسرعه وقال...دياب...دياب مالك ايه اللي حصل
دياب مسك فيه بتعب ومكانش قادر ينطق واخدوه على الكنبه
وغفران جريت عليه وحطت ايدها على خده وهيه بتقول برعب..دياب ايه اللي عمل فيك كده
دياب بصلها شويه وابتسم لاول مره يشوفها خايفه عليه رفع ايدها بالعافيه وباسها من كفتها بتعب شديد
غفران وقعت دموعها بقلق والتفتت لفياض وقالت ..اتصل على الدكتور قوام يا فياض
فياض اتصل على الدكتور بسرعه وقلق
واوصاف وغفران فضلو جمبه
عند عقبه بقى يفوق فاطمه بشويه ميه واخيرا صحيت معاه واول ما فاقت رجعت لورا برعب وهيه بتقول...بعد عني..بعد خليك بعيد
عبقه بصلها بحزن وقال...اهدي...اهدي انا معاك متخافيش
فاطمه اول ما استوعبت نزلت عيونها بحرج و انفجرت بالبكا وبقت تشهق بقوه وتقول....سامحني...سامحني والله انا مكنتش اعرف...مكنتش اعرف ان قصده كده انا..انا غبيه قوي
وبقت ترتعش بخوف شديد وتبكي بهستريا ومش راضيه تسكت
عقبه اتنهد وجاب قطعة خشبه صغيره وقال بهدوء...امسكي دي يا فاطمه
فاطمه مسكتها بخوف وعقبه بدأ يتلو ايات الرقيه الشرعيه بصوت عذب هدء نفسها جدا ومكملش نصها وكانت بطلت تتنفض وسكتت وهديت جدا
بعد ما خلص اداها ميه تشرب وقال...البني ادم خطاء المهم نتعلم يا فاطمه
وادلها الفستان اللي استلمه من العامل وقال بضيق....البسي ده لازم نروح اهلك هيتجننه عليك
فاطمه اتغيرت ملامحها وكأن الدم هرب من عروقها لما افتكرت اهلها بس عقبه قال بسرعه..متخافيش....انا ظبطت كل حاجه...محدش هيعرف...ربنا يسامحني على الكدب اللي كدبته انهارده ..البسي ويلا بينا وعلى الطريق هقولك تقولي ايه
في البيت كانوا حوالين دياب والدكتور قال بضيق..انا مش طلبت منك ترتاح يا دياب بيه..الجرح اتفتح جامد ليه تعمل في روحك كده...شوفت جسمك ضعف كيف
وبص لغفران وقال باستغراب..هو معقول كل الهفتان ده لانه نزف انهارده
كلهم بصو لبعض بتوتر وغفران قالت..لاه يا دكتور وامبارح نزف كتير اتخانق ويا فياض ونزف
وكملت بعفويتها المعتاده....علشان هو مبيسمعش الكلام
وراسه ناشفه ولا ليه كبير واصل
دياب ابتسم على كلامها وقال...ده مكانش نزيف يادوبك حتت دم متذكرش يا دكتور هيه غفران بتخاف ذياده
غفران هزت راسها بيأس والدكتور قال..لا مش بتخاف ذياده انت وشك اصفر ده كلام ...خد بالك من روحك ومتفتحش الجرح تاني ولا تشيل اللزق اللي حطيتهولك مش كل شويه هاجيلك سامع
دياب قال بغضب..انت بتزعق ليه انت كمان
ولسه هيقوم اوصاف مسكته من كتافه علشان يفضل مكانه وقالت بسرعه....بارك الله فيك يا دكتور ..بارك الله فيك
الدكتور بلع ريقه بتوتر وقال ...انا كتبتله فيتامينات وادويه عشان الجرح يلم قوام ...بالاذن
قال كده ومشي وغفران اتنهدت وقالت..هتقدر تطلع اوضتك
فياض قال بضيق شديد...ممكن اساعد لو تحب
دياب بصله بسخريه وقال...ساعد روحك...يلا روح اركن العربيه سبتها بره ...شوف شغلك
قال كده وحاول يوقف وكان بيتألم فاوصاف مسكت ايده وقالت..على مهلك ومشيت معاه
دياب ضغط على ايدها و قال بمشاكسه...ايه الحرير اللي في يدي ده...بالك انتي الدكتور اديه كيف الشوك....الحريم دول نعمه يا بت نعمه
اوصاف ضحكت جامد وقالت...ما تتلم ربنا هيعمل فيك ايه اكتر من كده
غفران وفياض كانو متابعينهم بعيونهم وغفران جريت قصادهم ومسكت ايد دياب بسرعه وقالت..عنك يا حبييتي مش عايزين نتعبك..انا كده كده طالعه هيطلع وياي
بقلم...زهرة الربيع
اوصاف قالت باستغراب..بس انتي دراعك مكسور كيف ..
بس قاطعها دياب وقال بسرعه وهو متفاجأ....همليها...هتعرف
اوصاف قالت...على راحتكم لو احتاجتوني نادو
غفران قالت بضيق..مش هنحتاج ان شاء الله
وبصت لدياب بغضب وقالت...امسك كويس....ولا دي مش ناعمه كفايه
دياب كان مصدوم من تصرفاتها وقال..ناعمه...ناعمه وملبن كمان
غفران سندته بضيق وطلعو سوا على اوضتهم
اوصاف ضحكت وقالت..البت دي بتغير عليه مني ...عارف ده معناه ايه
فياض بلع ريقه بوجع وقال..ايه
اوصاف قالت بابتسامه.....معناه انها هتحبه
فياض اتنهد بضيق لما قالت كده وحاول يتجاهل احساسه وقال...هيه مرته...طبيعي تحبه...ده العادي ..بالاذن
قال كده وطلع وغفران ابتسمت بحزن عليه وقالت..ده العادي يا فياض....العادي ولازم تعديه
واتنهدت وقالت..ايه الزهق ده هيه فين نعمات ولدها جابوله الدكتور وهيه نايمه...لما اروح اتسلى واجلطها
عند دياب وغفران كانو طلعو اوضتهم وغفران نيمته على السرير
دياب ابتسم بسخريه وقال......ايه الرضا ده كله
غفران قالت بضيق......يمكن ربنا يهديك وتقعد هنه ومتنزلش تجيب لنفسك مصيبه وتاجي
دياب اتنهد بخنقه لما افتكر حوار السلسله وقال....مهو جو الاوضه يخنق
غفران قالت بضيق....تحب اناديلك اوصاف تقعد معاك ..لو هيه مش بتخنقك نجيبها المهم راحتك
دياب قال باستغراب ...فيه ايه....مركذه معاها ليه مش فاهم
غفران ابتسمت وقالت...عشان دي حبيبتي ...اسكت مش بقينا صحاب وقعدنا سوا كل الوقت اللي كنت فيه بره وحكينا كتير
دياب قال بعدم اهتمام ..صحاب ...ماشاء الله ..وحكيتو في ايه بقى
واتناول كباية ميه كانت على الكمود وبقى يشرب بهدوء
غفران ابتسمت بخبث وقالت...عنك..قالتلي كلام عجيب.....قال ايه انت بتحبني.......ومن قبل ما نتجوز كمان ...شوفت الهوايل
دياب شرق وهو بيشرب وبقى يكح وقال بصدمه......ايه وووو
العشرون
قالتلي كلام ميدخلش العقل قال ايه انت بتحبني ومن قبل ما نتجوز كمان شوفت الهوايل
دياب شرق وبقى يكح جامد وقال بصدمه..ايه...قالت ايه
غفران ابتسمت وقالت ...وحياتك زي ما سمعت كده
دياب داس على اسنانه بغيظ من اوصاف وقال بهمس...اه يا بت ال...
بس حاول ميبينش وضحك بخفه وقال...والله اوصاف دي عليها حاجات...متشغليش راسك بحديتها ..هيه كده عادتها تحدف كلام مشرق مغرب ملوش عازه ..قال انا بحبك ومن قبل جوازنا كمان.... دي شكلها بس كانت بتحلم حلم عصاري وممتغطياش زين كمان
غفران ابتسمت بسخريه وقالت ...انا قولت كده برضك..بس هيه كانت تبان متاكده ...عموما انا قولتلها وفهمتها انها غلطانه
بالاذن انا هروحلها اوضتها دقيقه اخد الحقنه واجي ..هيه قالتلي بتعرف تضربها
ولسه هتمشي مسك ايدها وقال ...يا بت الناس خليني ادهالك ولا تروحي ولا تاجي..انا اولى من الغريب
غفران سحبت ايدها وقالت ...بعينك مهتدهاليش لو اتنططت على دماغك
دياب قال بغيظ..... واتنطط على دماغي ليه ...هشوف العجب اياك
غفران قالت بضيق...اممم طبعا ما انت شايف كتييير ...ده كفايه اوصاف
دياب قال بضيق وسرعه...غفران ...متذودهاش هتشيلي ذنبها ...البنيه مش كده واصل ولا معاي ولا مع غيري
غفران قعدت قصاده على السرير بسرعه وقالت باندفاع..انا مليش صالح بغيرك ...انت صوح ملمستهاش يا دياب
دياب اتفاجأ بشده من اللهفه والانتظار اللي في عيونها وقعد بقى قريب منها جدا وقال....يهمك تعرفي
غفران خدت بالها للهفتها وقالت بتوتر....احم يعني ..فضول
دياب مرر ايده على خدها وبعد خصلات من شعرها عنه وقال بابتسامه.....ولا لمستها ولا هيه ولا غيرها...انا دوقت اغلى تفاح في البلد ولا يحلالي اي فاكهه بعديه
غفران نزلت عيونها بكسوف وقالت....طيب...احم ريح دلوك وانا..... انا هاخد الحقنه واجي طوالي
وجريت بسرعه من قدامه وهيه مكسوفه جدا
اما دياب كان هيتجنن حرفيا مشى ايده على شعره وقال بذهول....غيرانه ياض....ملهاش تاني...ايوه غيرانه عليا ... مش مصدق ..طب كيف....اهدى..اهدى يا دياب كل حاجه هتبان ..هتبان يا بركة جيتك يا اوصاف
عند عقبه وصل فاطمه لحد بيتها وامها اول ما فتحت حضنتها بقوه وقالت بقلق....فاطمه...يا حبيبتي يا بتي....كده بردك يا فاطمه وقعتي قلبي
فاطمه كانت بتحاول متبكيش وقالت..اهدى يا اما انا زينه اها ..ايه هيحصلي يعني
امها بصتلها وقالت..الحمد لله يا بتي انا قلبي مهداش الا لما اخوك كلمني وقالي انك مع عقبه...صوح هو عقبه فين
فاطمه بلعت ريقها بحزن وقالت...وصلني لحد هنه وراح على داره ..قال انه تعبان وعايز ينام
امها بصتلها باستغراب وقالت.....ايه ده يا فاطمه ....ده مش فستانك
فاطمه ابتسمت ولفت قدامها بفرحه مصطنعه وقالت ...ايه رايك عقبه جابهولي...فستاني اتكب عليه العصير ومعرفتش امشي بيه فجابلي ده وشلنا الفستان في الشنطه دي لحد ما اغسله ... ايه رأيك
امها بصتلها بعدم تصديق وقالت ....حلو....بس ايه اللي جرالك مش عقبه ده اللي مكنتيش طيقاه....فياض بيقولي طلعتوا تتكلمو ودلوك بتقولي جابلك فستان
فاطمه قالت بتوتر....عادي الجدع كان بيطيب خاطري ...احسن من امي اللي ضربتني ...يلا انا هدخل انام تعبانه شويه
امها اتنهدت وقالت....كلمي اخوكي الاول قلقان عليك
فاطمه اتوترت جدا وهزت راسها بالموافقه وقالت ...ماشي هكلمه
قالت كده ودخلت اوضتها وامها اتنهدت وقالت ...يارب تكوني صادقه يا فاطمه
عند اوصاف كانت بتخبط على اوضة نعمات وبتقول...نعومه....افتحي يا نواعم ...افتحي نتحدتو سوا ..اكيد اشتاقتيلي
نعمات كانت رابطه دماغها وقالت بغضب من جوه ....يشتاقلك الموت يا بعيده ...عايزه ايه
اوصاف ضحكت وقالت...شكلك لسه زعلانه لاني كفيتك على بوزك تحت...معلش امسحيها في فستاني وانا هبقى اغسله
وضحكت بطريقه نرفزت نعمات جدا وقالت بغيظ...صبرك عليا يا غازيه ...انا هعرفك قيمتك
اوصاف اتنهدت وقالت....مهتطلعيش يعني...طيب احسن ..ده ايه البيت اللي ولا فيه تلفزيون ولا حد نتحدتو وياه حتى البومه مفتحتش رضينا بالهم والهم قافل اوضته
بس انتبهت بفزع على ايد على كتفها التفتت وكانت غفران قالتلها باستغراب...واقفه تكلمي روحك هنه ليه
اوصاف اتنهدت وقالت....فزعتيني يا غفران....بتعملي ايه هنه مش كنتي طلعتي مع جوزك
غفران قالت...جايالك عايزه اخد الحقنه...هتدهالي ولا كنتي بتقولي اي كلام
اوصاف قالت بابتسامه..... ادهالك طبعا تعالي اوضتي يلا
عند فياض كان تحت بيكلم فاطمه وقال بضيق....يعني انتي زينه يا فاطمه..امورك تمام
فاطمه ابتسمت بدموع وقالت..انا زينه قوي يا اخوي ....بس ...بس كنت عايزه اقولك...اقولك حقك عليا ...على اللي عملته الصبح انا اسفه ...اسفه قوي متزعلش مني
فياض اتنهد وقال...انا مش زعلان يا فاطمه...بس كنت اتمنى تكوني فاهمه اني معنديش اغلى منك ومش رايد غير مصلحتك
فاطمه نزلت دموعها وحطت ايدها على بقها علشان ميعرفش انها بتبكي بس فياض حس بيها وقال...انتي بتبكي يا فاطمه ولا ايه
فاطمه حاولت تهدى وقالت....لاه...لاه يا اخوي...بس مش عيزاك تفضل شايل مني
فياض ابتسم وقال....عمري ما اشيل منك ...انتي بتي يا فاطمه مش بس اختي ..يلا متزعليش روحك حصل خير ..طالما عقبه مزعلش منك خلاص....صوح كنت عايز اقولك انا هروح مشوار كده وان شاء الله ارجع منيه على الفجر اقفلو بابكم زين ومتستنونيش على العشا
فاطمه ابتسمت وقالت.... تعاود بالسلامه يا اخوي
وقفلت معاه ومددت على السرير وبقت تبكي بقوه وهيه بتفتكر دياب واللي عمله معاها وكلامه القاسي جدا اللي قاله
عند غفران اخدت الحقنه وقالت ...يدك خفيفه....تسلمي
اوصاف ابتسمت وقالت....طبعا انا ياما اديت حقن ...اديت حمير وعجول وجمال و...
قاطعتها غفران بصدمه وقالت.....ايه...انتي كنتي بتدي بهايم بس..... يعني بتجربي فيا
بقلم...زهرة الربيع
اوصاف ضحكت وقالت..متفرقيش كتير عنهم يا غفران
غفران بصتلها بغيظ واوصاف ضحكت وقالت....بهزر وياك يا بت.... انا كنت بدي ناس طبعا متقلقيش
قوليلي بقى دياب عامل ايه دلوك
غفران قالت بضيق...بخير...قوليلي ....هو انتي خلاص معيزاش ترجعي لاهلك ولا ايه
اوصاف قالت ...خير زهقتي مني ولا ايه
غفران قالت بضيق...ابدا كنت بسأل بس...يلا بالاذن
ولسه هتخرج اوصاف قالت بسرعه....لو شوفتي ابوك تاني قدامك هتعملي ايه يا غفران
غفران وقفت شويه بوجع و بصتلها بغضب وقالت .....معيزاش اشوفه ...انا ابويا مات يوم ما اتخلى عني ..تصبحي على خير
قالت كده ومشيت واوصاف قعدت بحزن وقالت ...انا السبب يا غفران سامحيني
على الساعه واحده كان الكل نام والسرايا في هدوء تام ...وكانت اوصاف في البلكونه مستنيه اشارة من فياض
فياض كان قدر بطريقته ينيم الحرس وطلع العربيه بهدوء وشاور لاوصاف نزلت له
اول ما طلعو بره اتفاجأت باربع رجاله واقفين اتفزعت
فياض قال بسرعه ..متقلقيش دول تبعي
وبص للرجاله وقال....خدو بالكم الحرس كلهم نايمين بعني فتحو عنيكم زين السرايه هتبقى في عهدتكم لحد ما ارجع
قال كده وركب العربيه هو واوصاف اللي قالت باستغراب...انت نيمت الحرس وجبت حرس غيرهم
فياض اتنهد وقال..طبعا امال عيزاني انيمهم واطلع وياك ونسيب السرايه تتسرق ولا يحصل لاهلها حاجه...دي مسؤليه ...الرجاله دول تبعي ولا يعرفو احنا رايحين فين ولا جاين منين اول ما نوصل باذن الله همشيهم
اوصاف حاولت تبتسم وقالت بحزن...قلبك ميتقدرش بمال يا فياض ...مش عيزاك تزعل مني واصل ...مهما حصل
فياض بصلها باستغراب وقال...مش فاهم انتي ناويه تزعليني في ايه...متقلقنيش
اوصاف اتنهدت وقالت...لا متقلقش..ان شاء الله خير
فياض استغرب كلامها وحس بقلق شديد بس فضل مكمل ومسلمها لله
اول ما وصلو الجبل اوصاف قالت بقلق...خليك هنه بلاش تاجي وياي...وصدقني هرجعلك والله هرجع
فياض فضل مكمل وقال...احنا اتفقنا رجلي على رجلك انتي امانه وياي
اوصاف قلقت جدا وقالت...صدقني الاحسن تفضل هنه اسمع الكلام يا ود الناس
بس فياض فضل مكمل ومردش عليها وهيه بصت قدامها بقلق شديد
بعد شويه وصلو راس الجبل واوصاف نزلت وقالت بسرعه...كده اخرك...مينفعش تدخل وياي البيوت لها حرمه وهنه فيه حريم
بقلم..زهرة الربيع
فياض اتنهد وقال....ماشي هفضل مستني هنه متتأخريش...وكمان متحاوليش تهربي عشان انا عيني على البيت ومش هتحرك
اوصاف هزت راسها بقلق وراحت خبطت والشاب مهران فتح لها وقال بفرحه..اوصاف...ابوي..ابوي اوصاف عاودت يا ابوي
اوصاف جريت على الراجل العجوز حضنته وقالت...كيفك يا عم غالب...والله لك وحشه
غالب حضنها وقال..انتي اكتر يا غاليه يا بت الغالي ...ايه كل ده وقفتي قلوبنا عليك يا اوصاف
اوصاف ابتسمت وقالت...ألف بعيد الشر عليك يا عم غالب ...بس حصلتلي مشاكل ما يعلم بيها الا ربنا
وقربت من السرير ومسكت ايد الراجل التعبان وقالت بابتسامه...عمي قاسم...اخبارك ايه...انا جيبتلك اخبار حلوه انا شوفت غفران..وهيه زينه ومستنيه رجعتك
الراجل اتفاجأ و بصلها بدموع وحاول يتكلم وهو مش مصدق نفسه بس مكانش عارف ينطق
اوصاف هزت راسها بدموع وقالت....ايوه ..ايوه قابلتها واتحدت وياها كمان.... شد حيلك عاد علشان ترجعلها...وانا كمان مستنياك يا عم قاسم...اخوك مش سايبني في حالي
قاسم رفع ايده اللي بترتعش واوصاف قربت ومشى ايده على شعرها بحنان
اوصاف وقعت دموعها وقالت بابتسامه...تسلم يا عمي ....انا همشي دلوك وهرجعلك تاني ...ومتقلقش على غفران....هيه مع اكتر واحد حبها...واكتر واحد مش هيسيلها لحالها واصل
قاسم لمس صباعه بتساؤل ولهفه
اوصاف قالت بابتسامه...ايوه ايوه اتجوزت ..اتجوزت دياب
قاسم اختفت ابتسامته واتسعت عيونه بذهول وصدمه
اوصاف قالت بسرعه..متقلقش....دياب اكتر حد هيحميها ..انت بس خد بالك لصحتك علشان ترجعلنا انا وهيه محتاجينك قوي
وطلعت فلوس ادتها لغالب وقالت ...خلي بالك ليه زين يا عم غالب
غالب قال ..طب وانتي ...مش هتطمنينا عليكي يا بتي
اوصاف ابتسمت وقالت ..انا تمام يا عم.... وقريب هاجيلكم تاني ..متقلقوش عليا
قالت كده وسلمت عليهم وخرجت بحزن
فياض بصلها باستفهام وقال...انا عمري ما كنت فضولي ..بس هموت واعرف مين جوه
اوصاف ضحكت وبصتله شويه وقالت...وانا عمري ما كنت خاينه ...بس مهقدرش ارجع وياك يا فياض...سامحني
فياض بصلها باستغراب ولسه هيرد اتفاجأ بنعيم ورجالته حواليه
نعيم قرب منهم وقال بابتسامه...نورتي الجيل يا اوصاف...جدعه يا بت وتربيتي....انا صوح كنت مخلي الرجاله يستنوكي هنه وكنت متاكد انك جايه ....بس لولا اتصالك بيا كان زمان الحمير دول في سابع نومه انا عارفهم
فياض اتسعت عنيه وبص لاوصاف بدهشه
اوصاف لمعت عيونها بالدموع وقالت...روح يا فياض ...ارجع وكأنك مشوفتنيش
فياض لسه هيرد نعيم قال بسخريه..يروح كيف هو دخول الحمام زي خروجه...ده ضيفنا اللي خطف بتنا ...ويعز علينا ....ومجهزله تشريفه تليق بيه
وشاور لرجالته مسكو فياض كلهم واوصاف اتصدمت وووووو
الحادي والعشرين
نهملوه يمشي كيف..ده الريس فياض خطف بتنا من دارنا يعني ليه واجب ولازم ياخده
وشاور لرجالته مسكوه بقوه
فياض بقى يحاول يبعدهم وهو بيقول بغضب..بعد انت وهو ..بعد ياض انت وهو احسنلكم
اوصاف جريت على نعيم وقالت بذهول...انت قولتلي هتهمله يمشي ..قولتلك هو ملوش صالح
نعيم مسك ايدها بقوه وقال...امال مين اللي له صالح مش هو اللي جيه اخدك من هنه ...اخدك فين ...وانتي كلمتيني من تلفون دياب كيف ...ايه عرف دياب طريقكم
اوصاف اتنهدت وقالت.....ده موال طويل....وهقولك كل حاجه بس همل الجدع يمشي دلوك...هو خدني واها جابني يلا همله
وراحت لرجالة نعيم وبقت تبعد اديهم عن فياض وهيه بتقول بقلق...بعد عنيه انت وهو ...هملوه يلا
فياض ابتسم بحزن وقال....فاجاتيني يا بت الجبل...بس مش هقدر الومك...انا اللي بدات بالاذى..بس يعلم ربي اني مكنتش اقصد واصل
اوصاف بصتله بدموع وقالت...وانا يعلم ربي اني مقصداش اخد حق اللي انت عملته يا فياض ..بس مهقدرش اقعد هناك واصل ..خطاب مش هيسيبني في حالي..هنه امن مكان ليا...حقك عليا
فياض ابتسم وقال ...يهمني قوي تبقي بخير....طول ما انتي في امان انا راضي
اوصاف نزلت دموعها ولسه هتتكلم نعيم قال بغضب...اوصاف هملي الرط ده دلوك وردي علي دياب عايز ايه منك ...ولقاكي فين ...وايه الي بينه وبين الواد ده...هو اللي باعته
اوصاف اتنهدت وقالت بضيق...كنت عند خطاب....هو اللي خطفني ارتحت كده
نعيم بصلها بدهشه وقال..خطاب...خطاب ايه معرفته بدياب...انتي لما اتصلتي كان رقم دياب
اوصاف ابتسمت بسخريه وقالت...طلع ولده..والباقي نتكلم فيه بعدين....يلا همل الراجل خلينا نمشو من البرد ده
نعيم ابتسم وقال ...من عيني
وطلع مسدس وقال بغضب...يعني ده راجل خطاب...يبقى ميلزمناش ...وبتهيالي مهيلزمهوش هو كمان
ووجه سلاحه على فياض
بقلم...زهرة الربيع
اوصاف فورا وقفت قدام فياض وقالت بذهول..هتعمل ايه اتجنيت اياك... نزل الفرد ده
فياض اتوتر وقال ....بعدي يا اوصاف بعدي لتتأذي
نعيم زعق في اوصاف وقال ..بعدي يا بت ...بعدي بقولك
وشاور لواحد من رجالته سحبها بقوه وهيه كانت رافضه جدا وماسكه في فياض بطريقه اذهلته بس الراجل قدر يشيلها ويبعدها
ونعيم ضرب رصاصه بغضب استقرت في بطن واحد من رجالته لما فياض لف ايده اللي كان ماسكه بيها وجابه قدامه بسرعه
نعيم اتصدم وفياض سحب سلاح الشاب اللي اتقتل وضرب نعيم في ايده وقع السلاح منه
و في اقل من دقيقه قلب الوضع ورفع السلاح في وش رجالة نعيم اللي سابوه فورا بخوف
نعيم كان على الارض بيتالم من ايده وفياض مسك ايد اوصاف وهو بيهددهم بالسلاح وقال بغضب....خليك مكانك انت وهو ... يلا وياي يا اوصاف...يلا
اوصاف قالت بذهول من الموقف...يلا فين....لاه..لاه يا فياض انت اهرب وهملني يلا ...دي بلدي ودول اهلي
فياض قال بغضب..دول مش اهلك ...اللي تاجرو بعرضك مستحيل يكونو اهل...الكلب ده باعك مره و يقدر يعملها تاني مش هسيبك ليه ..يلا قولتلك
اوصاف بقت تحاول تدفع ايده وهيه بتقول بصراخ...لاه لاه مقدرش انا لازم افضل هنه.... بعد يا فياض هملني بعد
بس فياض كان بياخدها بالعافيه ورجالة نعيم بيضربوا نار عليهم وفياض بيرد عليهم وهو بيحمي اوصاف وبيجري بيها على العربيه
اوصاف كانت عايزه تحاول تدفعه بس ضرب النار خوفها وخافت ليتصاب فجريت معاه وركبوا العربيه وطلع بيها بسرعه ورجالة نعيم بقو يضربوا ناحية العربيه بس فياض ساق باقصى سرعه وقدر يهرب رغم ان العربيه اتضررت جدا
عند دياب كان نايم وغفران جنبه وقام يشرب وهو مضايق جدا
غفران حست بيه وقامت وقالت بنوم...فيه ايه...مالك
دياب اتنهد وقال...مفيش قلقت حبه
غفران قعدت وقالت باستغراب...خير
دياب التفت لها وقال بابتسامه...خير متقلقيش انا بس مقلق شويه ارتاحي انتي
غفران قالت..... انا زينه..وعايزه اعرف ايه اللي قالقك
دياب مسح على رقبته بحرج وقال.... اللي قالقني مش هيعجبك...بلاها ..خلينا هادين بدل ما نتخانقوا على المسا وانا مش ناقص
غفران الفضول جننها لما قال كده وبصتلو باهتمام وقالت ...لا بقى انا عايزه اعرف ...قولي فيه ايه شكلك عامل بلوه
دياب اتنهد وقال...يا بت الناس نامي واخزي الشيطان انا مخنوق الساعه دي
غفران قالت باصرار...بس انا بقى مهنامش الا لما اعرف متلاوعش في الحديت اصلا شكلك عامل حاجه
دياب قال بكدب..لاه مفيش...بس امبارح اوصاف قالتلي عايزه تتكلم من تلفوني ...وانا اديتها تتكلم وخايف ابوي يزعل لو عرف بس كده
غفران رفعت حاجبها وقالت ....مش ده اللي شاغلك يا دياب...هتقول ولا لاه
دياب قال بضيق .....لاه..ونامي عاد
غفران بصتلو بغيظ وابتسمت وقالت بخبث..خلاص على راحتك...كنت فاكره انك بقيت تعتبرني مرتك وسرك وهتحكيلي كل اللي شاغلك ...طلعت غلطانه
وشدت عليها الغطا وقالت ...تصبح على خير
دياب كان عارف انها بتقول كده علشان يتكلم بس بيتمنى لو الكلام ده يتحقق قال بابتسامه ...ولو انك بتلفي علي كيف الحي يا بت العم ....لكن انا فعلا بعتبرك مرتي وسري ...وهقولك والامر لله
غفران قعدت بسرعه وبصتله بابتسامه وفضول شديد
دياب اتنهد وقال...بس بعد ما اقولك عايزك تفضلي هاديه وتحاولي تفهميني..اتفقنا انك سري من دقيقه لو فاكره
غفران ابتسمت وقالت ...متقلقش عيب عليك
دياب اتنهد وقال بقلق...فاطمه
غفران اختفت ابتسامتها وقالت بقلق...فاطمه..مالها
دياب بلع ريقه وقال...انا..احم..انا عملت حاجه غلط قوي...و..وندمان....ندمان قوي والله...وكمان قلقان... البت عيله وخايف تعمل في روحها حاجه
غفران قلبها دق بقوه ولسانها اتعقد من شدة الخوف ..نطقت بالعافيه وقالت....انت....انت عملت ايه يا دياب...انت قربت للبت...اوعى يكون اللي في بالي
دياب قال بسرعه..كنت..كنت والله بس مقدرتش ..سبتها وملمستهاش
وكمل بحرج وقال..بس البت اتبهدلت قلبها اتكسر واترعبت وكانت بتبكي قوي وانا خايف يكون جرالها حاجه ..او تأذي روحها
غفران بصتله بحده وغضب وقالت ....انا كنت عارفه انك مستحيل تبقى راجل نهائي...مستحيل تبقى بني ادم من اساسه
دياب بصلها بحده وقال..غفران ..اتمسي متخلنيش امسيكي
غفران قالت بغضب وزعيق...اتمسى..ليه ..هو انا لسه قولت حاجه ده انا هقول واقول ...كل يوم بلوه جديده....و كل ما اقول اصفالك تندمني..انت ايه يا اخي ايه معندكش دم واصل فقعت مرارتي ...مش كفايه كل يومين واحده شكل...حتى العيله دي معتقتهاش...عايز تجنني عايز تموتني و
بس قطعت كلامها واتسعت عيونها بصدمه لما شدها من شعرها وقربها ليه بقوه في لحظه جميله جنونيه اتمناها بقاله كتير ودوبت كل المسافات بينهم
بعد عنها وهو مش مصدق نفسه انها مبعدتش عنه وقال بهمس...صوح لسانك كيف الطبنجا... بس الشفايف اطعم من المنجا
غفران بقت ترمش بعيونها وهيه متفاجأه جدا حاولت تتكلم بس حست صوتها راح من الكسوف نزلت عيونها وسحبت البطانيه عليها وعملت نايمه علشان مش قادره تواجهه ابدا
دياب ضحك جامد لما عملت كده وقال...غفران..انتي يا بت..انتي مكسوفه مني ...يا خيبتك السوده يا دياب
عند اوصاف وفياض كانو في منطقه جبليه قاعدين في مكان بالحجر شبه الكهف
فياض كان بيحاول يولع نار بالحجاره والحطب لان المكان برد جدا بس الحجر مش بيشتعل
اما اوصاف كانت رايحه جايه بغضب وبتقول بزعيق...الحق عليا...ايوه الحق عليا..كنت سبتهم موتوك..ولا ولعوا فيك انا مالي ..انا مالي ادخل ليه...عاجبك كده ادينا تايهين والعربيه خربت ومفيش شبكه واصل هنرجع كيف هنموت هنه في البرد والجوع منك لله منك لله يا بعيد
فياض اتنهد بخنقه من الحجاره اللي مكانتش راضيه تولع ومن كلامها المستفز وطلع من المكان اللي شبه الكهف ده وقرب منها بغضب وقال....وانا ذنبي ايه..العربيه باظت من كتر ما اهلك ضربو عليها نار ...هو انا اللي عطلتها
اوصاف بصتله بحده وقالت....انت ليك عين تتحدت ...انا قولتلك هملني هناك وامشي...بتتدخل ليه..عاجبك اللي احنا فيه دلوك
فياض اتغاظ منها وقال بغضب...الحق عليا كنت عايز امنك من الخسيس اللي عايز يتاجر بلحمك بس الظاهر ان انتي عاجبك الموضوع ومعندكش مانع
قال كده ومشي بغضب راح يولع النار واوصاف اتنرفزت مسكت حجر صغير وحدفته في ضهره وقالت بغضب...دي امك اللي بيعجبها الموضوع
فياض بصلها بنظره رعبتها وداس على شفته بغيظ
غفران بلعت ريقها بخوف منه وقالت.... مش بيعجبها قوي يعني
واول ما اتقدم عليها جريت بسرعه وخوف وفياض جري وراها وهو هيتجنن منها ومن كلامها ومفيش خطوات وقدر يمسكها من شعرها ووقعها على الارض ووقع معاها
اوصاف حطت اديها على وشها بخوف وقالت...فياض فياض عيب عليك هتضرب مره عيب انت ارجل من كده بالله عليك
فياض مسكها من فكها بغضب وقال..دلوك جبتي تلاته متر ورا ها....من شويه لسانك كان اطول من شارعكم...لمي روحك معايزش اعملك قبر في الرمله هنه سامعه
اوصاف هزت راسها بالموافقه بسرعه وقالت ..مهنطقش
فياض اتنهد وكان هيسيبها بس جات عيونه في عيونها اللي كل ما يشوفهم يسحروه وبقى يبصلها بتوهان وقال....اول مره اشوف خوف حلو كده
اوصاف ابتسمت وقالت ....يمكن مش خوف ...يمكن حاجه تانيه مش عارف تشوفها زين
فياض اتوتر لما قالت كده وبلع ريقه ووقف ومدلها ايده
اوصاف مسكت ايده ووقفت وبقت تنفض هدومها وقالت...هنعمل ايه دلوك
فياض قال بضيق.....هطبلك وترقصي بتعرفي ترقصي
اوصاف بصتله بضيق وهو قال بخنقه..هنعملوا ايه يعني هنحطوا خيبتنا على جنب ونقعدوا جارها للصبح...يمكن لما النهار يطلع نعرف نعمل حاجه ولا نلاقي طريق
اوصاف قالت بتوتر..هنباتوا هنه انا خايفه يلقانا ديب سعران
فياض ابتسم بسخريه وقال...الديب ميخوفش قد الديابه اللي هيدورو علينا اول ما يطلع النهار....خطاب هيعرف بغيابنا ويدور وناسك كمان هيقلبو الدنيا علينا...واللي يضحك ولا هنعرف نروح لاهلك ..ولا هنعرف نرجع لخطاب
وقعد واتنهد بتعب وقال....دنيا عجيبه قضيت عمري اتخلى عن كل حاجه بحبها...واعمل اللي عايزه واللي معايزهوش لجل ارضي خطاب بيه...وعشانك انتي هخسره...الله اعلم هيعمل ايه لما يعرف اني حاولت اهربك
في صباح يوم جديد دخلت والدة فاطمه عندها واستغربت لما لقتها نايمه قالت ..فاطمه ....فاطمه انتي يا بت
وراحت فتحت الشباك
فاطمه فتحت عيونها اللي كانوا تعبانين من البكا وقالت....اقفلي الشباك ده يا اما ....الشمس جات في عيني
امها قالت باستغراب ..شمس ايه وهباب ايه...انتي نايمه كيف لدلوك ..قومي يلا اجهزي بسرعه وانا هجهزلك اي حاجه تاكليها يلا اتاخرتي على حصصك ولا ناسيه انك في ثانويه عامه
فاطمه رجعت نامت تاني وقالت......معيزاش اروح يا اما..تعبانه مريحاش
امها قالت بغضب..انتي ايه حكايتك يا بت ..كيف يعني مريحاش..لو تعبانه نجبلك دكتور
فاطمه قالت بضيق..يوووه يا اما قولتلك مقدراش ومعيزاش دكاتره لما اقدر هروح لوحدي همليني انام
امها استغربت اكتر وقلقت وقالت....قومي يا فاطمه روحي مدرستك ....متخلنيش اوديك بالعافيه كيف اعيال
فاطمه انفعلت جدا وقالت ببكا...... يا اما حرام عليك حرام سيبيني في همي معيزاش..معيزاش مدارس معيزاش اعيش من اساسه ....سيبوني بقى مبقتش طايقه نفسي
امها خافت جدا عليها من حالتها اللي ملهاش سبب وفاطمه لفت رجليها لصدرها و بقت تبكي بشده ونامت تاني
امها طلعت من عندها وهيه مصدومه من حالتها واتصلت على عقبه بسرعه وقالت....صباح الخير يا ولدي
عقبه رد وقال....صباح الخير يا خاله ..اخبارك ايه
ام فاطمه قالت بحزم...همل اخباري دلوك....عيزاك ضروري ..دلوك تبقى قدامي يا عقبه
بقلم...زهرة الربيع
عند خطاب نزل على الجنينه وهو بينادي واحد من الغفر زي العاده
الغفر كانو صحيوا من المنوم على الفجر وكانو فاكرين ان راحت عليهم نومه واول ما صحيوا الحرس اللي جايبهم فياض مشيو فورا من غير ما الغفر ياخدو بالهم
لما راح خطاب على الجنينه كان يبان كل شيئ طبيعي قال ....فياض فين ...خليه يحصلني على الصاله عايزه
ولسه هيدخل الغفير قال....الريس فياض مجاش لسه جنابك
خطاب استغرب وقال...ليه اتاخر كده ...ابعت ناديله عايزه ضروري
ودخل البيت ونادى للخدامه وقال..روحي يا بتي ناديلي اوصاف....لما نشوف اخرتها معاها
الخدامه قالت ....حاضر
وطلعت تناديلها وخطاب قعد يشرب قهوته
في الوقت ده دياب نزل وهو مروق جدا وبيصفر وقال...صباح الخير يا ابوي
خطاب ابتسم بسخريه وقال...صباح الخير...اقعد عايزك
دياب قعد وخطاب قال بضيق..مرتك فين
دياب افتكر من وقت اللي عمله امبارح وهيه نامت ولسه عامله نايمه مش عايزه تواجهه ولا نطقت اي كلمه ابتسم وقال...لسه نايمه
ابوه اتنهد وقال..تمام قوي...خلينا نتكلموا على راحتنا....شوف يا ولدي الجواز والطلاق نصيب و غفران عايزه تتطلق .....وانت اتجوزتها مغصوب انا جوزتهالك لجل الفلوس متروحش لغريب بس هيه دلوك عايزه تسيب كل الفلوس من غير اي حاجه يلا بقى يا ولدي استهدى بالله وطلقها خلينا نخلصوا
دياب اتنهد بخنقه وقال..انا تعبان والمفروض ارتاح وبنزل علشان بتخنق من الاوض فمش كل ما تلاقيني تقولي طلق لاني مش هطلق يا ابوي ...ولا هتجوز تاني يعني غفران مرت ولدك والفلوس دي فلوسها انا معايزش منها قرش..واطمن اهي وياها ومهتروحش لغريب
خطاب وقف وضرب عصايته في الارض وقال...يعني ايه المال يبقى في يدنا ونقدروا نشغلوه ونكبروه وتقولي نركنه كده
دياب اتنهد وقال.... لان ده مالها يا ابوي باسمها ...واحنا اللي عندنا كفايه
خطاب بصلو بتهديد وقال....انت كده هتجبلها الاذى وانت عارف
دياب اتوتر وقال ...يعني ايه...هتزعلني يا ابوي ...هتخسرني علشان قرشنات
خطاب قال بغضب....ده كلو ليك .... انت معايزش تفهم ليه
دياب قال بغضب ..انت اللي معايزش تفهم...مفيش فلوس هتعوضني عنها ...معايزش معايزش....هملها في حالها بقى لجل خاطر ولدك
خطاب لسه هيرد نزلت الخدامه جري وقالت ...خطاب بيه ..خطاب بيه...الست اوصاف مش فوق..... مش في الدار كلها
دياب اتصدم وخطاب وقعت العصايه من ايده وقال بذهول...بتقولي ايه وووو
تفاعل جامد جامد لايك وشير يا غوالي الاحداث ولعانه واللي جاي اخطر انطلقوووووووو
ومتنسوش روايتنا ظلي المبتور قصه مشحونه بالصدمات وجرعه مضاعفه من التشويق المعتاد بتاعنا💪💪
متواجده في دار نبض القمه للنشر والتوزيع صاله 2 ....جناح A36
السعر 90 جنيه فقط لا غير
وتقدرو تحجزوها من مكانكم وتوصلكم لحد البيت للحجز والاستفسار واتساب على الرقم ده 👇👇
01061937672
لو فيه حد عايز يحصل عليها من المغرب او سوريا او لبنان او الاردن او الجزائر يتواصل على نفس الرقم متاح التوصيل
تفاعل جبار على البوست ده علشان يوصل للكل حبيبات زهره 🥰
ظلي_المبتور
الكاتبه_زهرة_الربيع
دار_نبض_القمه_للنشر_والتوزيع
معرض_القاهره_للكتاب_2026
لا_دواء_للقلب_إلا_ذاته
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
جميع الروايات كامله من هنا 👇 ❤️ 👇
اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇
❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺
إرسال تعليق