سارقة عشقي الفصل الاول بقلم الكاتبه عبير سليم حصريه وجديده على مدونة النجم المتوهج للروايات والمعلومات

سارقة عشقي الفصل الاول بقلم الكاتبه عبير سليم حصريه وجديده على مدونة النجم المتوهج للروايات والمعلومات 

سارقة عشقي الفصل الاول بقلم الكاتبه عبير سليم حصريه وجديده على مدونة النجم المتوهج للروايات والمعلومات 

من منا لم ينل الحب و العشق نصيبا من قلبه من منا لم يحتل الهوى وجدانه و فرح و شقى به فجميعنا قد عشنا الهوى منا من حالفه الحظ و تحقق على أرض الواقع و منا من ظل ذاك الحب عالقا بأحلامه و لم يكتب له القدر ان يرى نور الشمس 

و لكن هل للقلوب أن تنسى من عشقتهم و هل للافئده ألا تئن من غياب احبابهم ام أن الدهر له السطوه على اجبارنا على النسيان و الرضا بكل ما كُتِب لنا و قُدًر علينا 

فإن كانت الكلمه للقدر فأهلا به و مرحبا و لكن ماذا علينا أن نفعل ان كان من صنع البشر 

فحتما ستكون الأوجاع أشد ألما و مراره و لكن ليس بمقدورنا سوى الرضا بما قُدر علينا 

نحن الآن في عاصمة مصر الثانيه عروس البحر المتوسط إنها مدينة الإسكندرية التي لا يسأم سكانها و لا يسعون يوما للرحيل عنها 

ها هي تجلس في الشرفه المطله على ذاك البحر الذي يحمل بأحشائه الكثير مما افصحت به له وحده 

هو وحده ذاك البحر من استمع إليها بانصات و عرف بكل أسرارها 

ها هي تنظر إليه بأعين تفيض من الدمع لا تنطق بحرف فقط تكتفي بالنظر إليه و هي تعلم تمام اليقين بأنه وحده من يشعر بها و يتألم لآلامها

قومي يا حبيبتي الدنيا بردت حتتعبي يا ضي 

ضي و هي تمسح دموعها و تلتفت لأمها كريمه : متخافيش علية يا ماما الجو كويس 

كريمه : طب مش حتقومي تتعشي مع الولاد يا حبيبتي 

ضي : مليش نفس يا ماما

تجلس أمها بجوارها و تتحدث إليها : طب انتي بتعاقبي نفسك ممكن تقوليلي الولاد ذنبهم ايه 

لو مش عاوزاهم اديهم لباباهم و هو غصب عنه ملزم ياخد باله منهم دول ولاده 

ضي: انتي بتقولي ايه يا ماما ولاد مين اللي اديهم له تاليه و مروان دول ولادي انا و لا يمكن حسمح له انه ياخدهم مني مهما حصل 

الأم : و لما هما ولادك سايباهم على طول ليه هاه 

انتي سايبه ابوهم دلوقتي بقالك أسبوعين ومن ساعتها و انتي قافله على نفسك على طول و لا بتتكلمي مع حد فيهم و لا عارفه حتى إذا كانوا أكلوا و اللا لاء تعبانين و اللا كويسين و لا تعرفي حاجه عنهم طب لحد امتى عاوزه افهم 

هو مش كل ده كان باختيارك و قرارك و انتي اللي اخدتيه

ضي : وانتي كنتي عاوزاني اعمل ايه بس يا ماما كنتي منتظره مني ايه اعمل غير اللي عملته

كريمه : متزعليش مني يا بنتي بس انتي اللي غلطانه ما هي كل البيوت فيها مشاكل و الناس ممشيه حالها انتي اللي صممتي تطلقي و احنا سيبناكي براحتك لكن معلش بقى مش تخربي بيتك و كمان تقعديلنا كده 

ضي : أيوة صح معاكي حق انا غلطانه يا ماما المفروض كنت اكمل حياتي مع واحد خاين و كل يوم مع واحده بيبدلهم زي ما بيبدل هدومه المفروض كنت استحمل اهاناته لية و بهدلته فية كل شويه المفروض كنت اخد بالجزمه و اسكت عشان خاطر مخربش بيتي

ماما انا محدش شاف اللي شفته و لا عاش اللي عشته و انا مش ندمانه و عمري ما حندم إني سيبته انا اللي ندمانه عليه اني اتجوزت واحد زي ده و عمري ما حسامح نفسي اني قبلت اني اعيش معاه كل ده و اخلف منه و ابلي ولادي بأب زي ده

كريمه : معلش يا بنتي ربنا يعوضك خير يارب و هو منه لله بقى بس ولادك يا ضي ولادك يا حبيبتي متبعديش عنهم خديهم فحضنك و حسسيهم بحنانك دول هما اللي طلعتي بيهم من الدنيا

تقوم ضي : حاضر يا ماما هما صاحيين

كريمه : أيوة يا حبيبتي بيتفرجوا عالتليفزيون في اوضتهم روحيلهم يابنتي

تروح ضي أوضة ولادها و تدخل تلاقيهم قاعدين و التليفزيون مفتوح تقعد جنبهم و تاخدهم فحضنها تكلمهم و تضحك معاهم و تحاول تنسى معاهم احزانها اللي عايشاها معاهم

..............................................

يفتح باب الشقه يلاقيها بتجري عليه زي عادتها و ترتمي فأحضانه :هيما حبيبي الف حمد الله على السلامة وحشتني اوي

إبراهيم و هو بيحضنها : الله يسلمك يا بسمه و انتي كمان وحشتيني اوي بس انتي مش حتبطلي عادتك دي لازم يعني تقفي في البلكونه في الجو ده مانتي عارفه اني جاي في السكه و ممكن تستنيني جوة بدل ما تتعبي 

بسمه : خايف علية اتعب يا إبراهيم 

إبراهيم : و هو انا لو مخفتش عليكي انتي و الولاد حخاف على مين هو انا لية مين غيركم يا بسمه 

بسمه : يا حبيبي يا ابراهيم انا بحبك اوي ربنا يخليك لينا يارب 

ابراهيم : يبقى بلاش وقفة البلكونات دي تاني 

بسمه : بحب أشوفك و انت نازل من العربيه متعتي اني أملي عيني منك و انت داخل العماره بحس ان قلبي بيرفرف من السعاده و انا شايفاك قدام عيوني

إبراهيم : حبيبتي يا بسمه ربنا يخليكي لية

بسمه : انا حبيبتك صحيح يا إبراهيم 

إبراهيم : طبعا حبيبتي يا بسمه مش مراتي و ام ولادي

بسمه : يعني انا حبيبتك عشان مراتك و ام ولادك بس

إبراهيم : مالك يا بسمه النهارده فيكي ايه

بسمه : لا يا حبيبي مفيش حاجه طبعا سلامتك يا سيد الناس كلها بس أنا زي أي ست في الدنيا بيبقى نفسي أسمع كلمة حبيبتي  علطول و نفسي طول الوقت اتأكد اني انا لوحدي اللي فقلبك

ابراهيم : اطمني يا بسمه انا مفيش فحياتي غيرك انتي و الولاد و بس

بسمه : و قلبك يا ابراهيم مفيهوش  مكان لية 

إبراهيم : انتي غريبه اوي النهارده يا بسمه هو في ايه بالظبط 

بسمه :لا يا حبيبي طبعا مانا قلتلك مفيش حاجه

تقرب منه و تلف ايدها حوالين رقبته : عاملالك كل الاكل اللي بتحبه على ما تغير و تاخد دش حكون منتظراك

إبراهيم : أيوة بقى هو ده الكلام  يا جميل أحسن انا عصافير بطني بتزقزق

بس قوليلي الأول الولاد فين انا مش سامع صوتهم 

بسمه : امبارح كنا عند مامتك و قضينا معاها اليوم كله و شبطوا يباتوا عندها سيبتهم عشان ميزعلوش

إبراهيم : يا لئيمه علية انا بردو بقى هما اللي شبطوا و اللا انتي اللي سربتيهم

ابراهيم : هههههههه احبك و انت فاهمني اعمل ايه بس يا هيما ما هما الجذم دول ما بيخلونيش اتهنى عليك و بيفضلوا لزقين ليك ده انت بتنام و هما صاحيين و انت بقى وحشتني اوي و اللا انا موحشتكش زي ما وحشتني 

ابراهيم : هههههههه لا طبعا وحشتيني و وحشتيني اوي كمان يا بسمه 

بسمه : يبقى ياللا بقى و متضيعش وقت عاوزين نتمتع بكل لحظه فحياتنا يا حبيبي 

إبراهيم : شكلك كده ناويه على نية الليلادي 

بسمه : الليلادي انت حتكون الملك و انا جاريتك عاوزة ادلعك و ابسطك على اد ما اقدر يا حبيب قلبي ياللا بقى 

يضحك إبراهيم و يدخل الأوضة عشان يغير و ياخد دش و بسمه تحط الاكل عالسفره و تدخل بسرعه تلبس لانجيري شرياه جديد 

يخرج ابراهيم و يتفاجئ بهيئة بسمه كانت لابسه لانجيري أحمر قصير و عاري الصدر و الضهر و جذاب اوي و فارده شعرها الطويل على ضهرها 

شدتله الكرسي : اتفضل يا مولاي 

يقعد إبراهيم و تبدأ بسمه تأكله بايديها و هو كمان كان بيأكلها أكلوا سوا لحد ما شبعوا 

راح يغسل ايده و رجع لقاها شغلت اغنية بتونس بيك و انت معايا و بدأت ترقص له و تتمايل عليه و هو فقمة سعادته بحبها ليه و اهتمامها بيه لقى نفسه بيقوم و بيشيلها على ايديه و هي متعلقه برقبته و يدخلوا أوضة النوم و يعيش معاها أجمل لحظات الحب اللي بتجمع بين زوجين 

و بعد فتره طويله نامت على صدره و هي فرحانه و مبسوطه أوي بالوقت اللي قضته معاه و هو بيلعب في شعرها : مبسوط يا حبيبي 

إبراهيم : أكيد طبعا يا حبيبتي 

بسمه : وأنا مبسوطه أوي أوي ربنا يخليك ليا يا حبيبي 

ابراهيم عاوزاك توعدني ان مفيش قوة ممكن تفرق بيننا و لا حد ياخدك مني فيوم من الأيام 

إبراهيم : وانا ايه اللي حياخدني منك يا حبيبتي و ليه ياخدني منك أصلا انتي مراتي حبيبتي و أم ولادي 

بسمه : يعني انت سعيد معايا يا ابراهيم 

ابراهيم : طبعا يا حبيبتي ربنا يخليكي لية و الله انا قلبي بيقوللي ان في حاجه بسمه اتكلمي معايا بصراحه قوليلي في ايه انتي في حاجه حصلت مخبياها عني 

بسمه : وانا من امتى بخبي عنك حاجه بس يا حبيبي و بعدين هو انا يعني عشان عاوزة قلبي يطمن يبقى معنى كده ان في حاجه 

ابراهيم : أولا لأن دي مش عادتك إنك تعيدي و تزيدي كل شويه فنفس الحاجه و ثانيا بقى هو انتي كل السنين اللي عشناها مع بعض دي و لسه مش عارفه انتي عندي ايه و غلاوتك عندي اد ايه و بعدين اطمني يا ستي انا بحبك و انتي مراتي اللي مليش غيرها و اوعدك أن مفيش واحده ممكن تاخدني منك و لا حاجه حتاخدني منك اصلا الا بقى إذا مت و سيبتك يبقى تسامحيني بقى دي حاجه مش بأيدي 

بسمه : الف بعد الشر عنك اوعى يا حبيبي اوعى تقول كده تاني ربنا يخليك لينا و يطولنا فعمرك يارب ابراهبم انت كل حياتي و دنيتي و انا مليش غيرك ربنا يخليك لية يا حبيبي يارب 

ابراهيم : يا حبيبتي يا بسمه انا عارف و الله انك بتجبيني ربنا يخلينا لبعض و لولادنا يارب

بقولك صحيح يا بسمه انا كنت بفكر فحاجه و مش عارف اخد فيها قرار و كنت عاوز اخد رايك فيها لأني محتار الصراحه 

بسمه : خير يا حبيبي اتكلم انا سامعاك

ابراهيم : احنا من وقت ما اتجوزنا و انا بشتغل في القاهره و اديكي شايفه يادوب بنزل خميس و جمعه و بمشي السبت الصبح و لا بلحق اقعد معاكم و لا اشبع من الولاد و لا حتى بلحق ازور حد و لا اشوف حد حاسس اني انقطعت عن الدنيا كلها ده غير أن مسئولية البيت و الولاد و المجاملات و كل حاجه عليكي لوحدك 

ودلوقتي الشركه حتفتح فرع هنا في اسكندريه و نزلوا على جروب الشركه ان اللي عاوز يتنقل يكتب اسمه و انا بقول لو جيت هنا يبقى احسن لية و ليكم بس فنفس الوقت مستخسر مكانتي في الشركه فالقاهره و وضعي فيها و انا محتار انتي ايه رايك يا بسمه 

بسمه : بص يا ابراهيم اولا طبعا كونك تكون معانا و بيننا و فوسطنا و تبقى أدام عيوننا كل يوم دي حاجه اكيد تفرحنا أوي و تسعدنا لكن احنا نفكر بالعقل كده و نشوف إيه أفضل لينا و ليك 

انت اخدت وضعك في الفرع هناك والكل بيعملك الف حساب و سفرك كل أسبوع بتاخد أجره يعني يعتبر مش مصاريف زياده عليك 

اما بالنسبه للعبء اللي علية فأنا الحمد لله كويسه و مفيش حاجه تعباني و لا حسيت لحظه ان الحمل زياده علية يبقى مش عاوزاك تشغل بالك بينا من الناحيه دي خالص 

و بعدين كمان يا حبيبي انت هناك مرتبك حلو اوي ما شاء الله و احنا محتاجينه الصراحه متنساش ان الولاد مصاريف مدارسهم عالية اوي و لو اتنقلت الفرع هنا اكيد مرتبك مش حيكون زي مرتبك في القاهره

ابراهيم : يعني انتي من رأيك اني افضل هناك 

بسمه : أيوة طبعا يا حبيبي هناك احسن ليك و لينا و لو انت حابب تاخدنا معاك قلتلك كتير اني معنديش مانع انت اللي مش راضي 

ابراهيم : خلينا واقعيين يا بسمه احنا اهلنا كلهم هنا تقدري تقوليلي لو استقرينا في القاهره الظروف حتسمحلنا اننا نعرف ننزل لهم اسكندريه كل شويه و الله ما حيحصل و الحياه حتشغلنا و حتنسينا اهلنا و يوم ورا يوم حتنقطع علاقتنا بيهم فمينفعش يا بسمه انتوا هنا جمب مامتك و مامتي اهلك و اهلي و انا لما باجي بعرف اروح لماما اطمن عليها لكن لو بفينا هناك شوفي بقى حعرف أنزل كل اد ايه 

بسمه : خلاص يا حبيبي يبقى خليك انت فشغلك هناك و انا هنا ربنا يقويني و بعدين انت فكرك يعني لو اتنقلت هنا حتروح كل شويه عند اهلك و اهلي و الله أبدا وقتها حتكسل و تقول بكره بعده الدنيا تلاهي يا هيما 

ابراهبم : تمام يبقى الخيره فيما اختاره الله و أفضل في القاهره 

يسمعوا اذان الفجر بياذن

ابراهيم : الله أكبر الله اكبر 

ياللا يا حبيبتي تعالي نقوم نغتسل و نصللي الفجر انا و انتي جماعه عشان نلحق  ننام شويه قبل ما نروح لأمي

بعد مرور عدة ساعات بعد صلاة الجمعه يجلسون جميعهم في بيت والديه 

والدته : ياحبيبي يا بني متعرفش كل يوم خميس قلبي بيبقى عامل ازاي عليك و عقلي يفضل يودي و يجيب مبرتاحش غير لما تقوللي انك تحت العماره 

إبراهيم : يا حبيبتي يا ماما ربنا يخليكي لية يا سومه  يارب 

سومه : هههههههه احلى سومه بسمعها منك و الله يا حبيبي 

يفتح الباب و يدخل و الولاد معاه اللي اول ما يشوفوا باباهم يجروا عليه : بابا بابا 

يفتحلهم حضنه و ياخدهم جواه و يفضل يبوس فيهم : وحشتوني اوي يا حبايب بابا عاملين ايه يا قطاقيط

تيم : الحمد لله يا بابا 

تيا : جدو جابلنا حاجات كتير اوي يا بابا 

يقوم ابراهيم و يحضن باباه و يسلم عليه علطول الولاد دول تاعبينك كده يا بابا 

والده : تعبهم راحه يا حبيبي ربنا يخليهم ويبارك فيهم هما و ولاد اختك ايناس يارب 

ابراهيم : هي فين إيناس صحيح انا قلت حاجي حلاقيها هنا 

سومه : عندها مشوار حتروحه و حتعدي علينا اخر النهار ان شاء الله 

إبراهيم : ان شاء الله 

يقعدوا مع بعض يتكلموا في مواضيع كتيره لحد ما ييجي وقت الغدا و ياكلوا كلهم مع بعض فجو مليان بالحب و الدفء 

.............................................. 

وحشتيني أوي يا إيناس كده بردو تغيبي عني كل الوقت ده 

إيناس : حقك علية و الله يا ضي البيت و الولاد مش مخلييني عارفه التفت يمين و لا شمال 

طمنيني عليكي يا حبيبتي عامله ايه 

ضي : زي ما نتي شايفه الحمد لله على كل حال 

ايناس : عارفه يا ضي انتي مفيش حاجه حتفوقك من اللي انتي فيه ده غير الشغل انتي لازم تشتغلي يا ضي 

ضي : اشتغل بس انا عمري ما اشتغلت انتي عارفه 

إيناس : و جه الوقت إنك تشتغلي 

ضي : مش عارفه ماما حتوافق و اللا لاء 

إيناس : و ماما متوافقش ليه يا ضي 

ضي : انتي ناسيه اني دلوقتي بقيت مطلقه 

ايناس : و ايه علاقة طلاقك بالشغل مش فاهمه 

ضي : التحكمات اللي بيحكموها على اي واحده بتنفصل عن جوزها يا إيناس 

ايناس : ده اسمه تخلف سيبك من الكلام ده و شوفي انتي عاوزه ايه 

ضي : انا و الله ما عدت عاوزه حاجه يا ايناس غير اني افوق و انسى و ربنا يقدرني و اعوض ولادي عن غياب ابوهم و اربيهم بالشكل اللي يرضيني

ايناس :ان شاء الله يا حبيبتي ربنا حيقويكي عليهم 

ضي : يا حبيبتي يا إيناس ربنا يخليكي لية يارب سبحان الله مع انك أصغر مني بكذا سنه بس انتي اكتر واحده بتفهميني و بتحسي بية 

ايناس : بحس بيكي بعد ايه يا ضي يا ريتني كنت حسيت بيكي زمان مكنش حصل كل اللي حصل و لا وصلنا للي احنا فيه دلوقتي 

ضي : ياااه يا إيناس انتي لسه فاكره دي حاجه عدت عليها سنين و في الاول و في الآخر محدش بياخد اكتر من نصيبه و اللي مكتوبله

ايناس : نصيب لما يكون بأيد ربنا وحده مش بأيد حد تاني هو اللي رتب و خطط لكل شئ

ضي : خلاص يا إيناس الله يخليكي بلاش تفتحي فحاجه انا مش ناقصه وجع قلب كفايه علية اللي انا فيه 

ايناس : حقك علية يا حبيبتي مش قصدي و الله 

ضي : عارفه يا حبيبتي و الله قوليلي بقى عندك شغل لية 

إيناس : اوبا شكلك كده اقتنعتي

ضي : أيوة با ايناس انا فعلا محتاجه انزل اشتغل يمكن اقدر افوق بقى و انسى 

ايناس : خلاص يبقى سيبي الموضوع ده على ربنا و علية و انا حدعبس كده على اي حاحه مناسبه ليكي و ان شاء الله خير 

ضي : الله انتي قمتي ليه 

ايناس : يالهوي يا ضي انتي كل ده و مزهقتيش متي

ضي : انا لوقعدت معاكي العمر كله عمري ما ازهق منك ابدا ده انا بستنى اشوفك بفارغ الصبر ربنا يخليكي ليا يا رب 

إيناس : و يخليكي لية يا حبيبة قلبي بس معلش لازم امشي دلوقتي و اوعدك ان شاء الله اني حتصل بيكي فاقرب وقت و اقولك على موضوع الشغل ده

تخرج من الأوضة معاها :يا للا يا ولاد عشان نمشي 

كريمه : مستعجله ليه بس يا بنتي لسه بدري متقعدي شويه 

ايناس : بدري من عمرك يا طنط يادوب كده عشان نروح 

تاخد ولادها و تبوس ضي و تمشي 

و ضي تقعد مع ولادها و عقلها شارد في ذكريات مر عليها سنين لكن عمرها ما راحت من بالها و لا غابت عنها

اما ايناس فبعد مرور حوالي ساعه تكون وصلت عند مامتها و تسلم على اخوها و ولاده و مراته و ولادها يقعدوا يلعبوا مع ولاد خالهم 

ابراهيم : وعد و حور بقوا عسل يا انوس 

ايناس : بس تعبني اوي يا هيما و الله 

بسمه : ما هو انتي اللي غلطانه يا إيناس يادوب ولدتي وعد قمتي جبتي وراها حور علطول 

ايناس : نصيب يا بسمه 

بسمه : يا ستي و لا يهمك و اهي الايام بتجري و حيكبروا ان شاء الله 

ايناس : ان شاء الله 

سومه : انتي رحتي فين صحيح يا إيناس 

ايناس و هي عينها على بسمه : كنت عند ضي يا ماما 

بسمه ايدها ترتعش و فنجان القهوه يتهز في ايدها و زي ما تكون مش عاوزة ايناس تكمل كلام و بتدعي ربنا محدش يعلق 

و تحاول تغير الموضوع و تفتح شنطتها بسرعه : صحيح كنت حنسى

اتفضلي يا انوس 

ايناس : اتفضل ايه ايه ده 

بسمه : ازازة برفان يا حبيبتي عجبتني ريحتها اوي جيبت اتنين واحده لية و واحده ليكي

سومه : يا حبيبتي يا بسمه ربنا يخليكم لبعض يارب 

ايناس : شكرا يا بسمه بس مكنتيش كلفتي نفسك كده

بسمه : هي فين التكلفه دي و بعدين كله من خير اخوكي ربنا يخليهولي و يخليه لولاده يارب 

ايناس : ربنا يباركلنا فيه يارب

بسمه : حبيبي مش ياللا عشان نلحق نروح لماما 

ابراهيم : حاضر يا حبيبتي 

سومه : تصدقي انك فكرتيني يا إيناس بموضوع ضي ده انا كنت ناسياه خالص دلوقتي كريمه تزعل و تقول اني مستالتش عنهم 

بسمه : ياللا بقى يا حبيبي حنتاخر 

ابراهيم : هو في حاجه حصلت لطنط كريمه يا ماما 

سومه : لا يا حبيبي كريمه بخير لكن ضي يا حبيبتي هي اللي ظروفها بايظه تصدق انها اتطلقت يا ابراهيم 

إبراهيم : إيه ضي اتطلقت. 

 يتبع 

لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم 

الفصل الثاني والثالث من هنا