راديو شهرزاد بقلم الكاتبه نسرين بلعجيلي حصريه علي مدونة النجم المتوهج
راديو شهرزاد بقلم الكاتبه نسرين بلعجيلي حصريه علي مدونة النجم المتوهج
حلقة اليوم :
"إهتمي بنفسك"
بقلم نسرين بلعجيلي.
عصام : جاهزة يا شهرزاد؟
شهرزاد : جاهزة، على بركة الله.
شهرزاد على الهوا :
مساء الجمال والراحة النفسية على كل اللي بيسمعونا. كل يوم بنتكلم عن قضايا اجتماعية، عن الحب والجواز والمشاكل، لكن النهارده عايزة أتكلم عن حاجة شكلها بسيطة، بس معناها كبير جدًا.
_العناية بالبشرة…
أيوه، الكلمة اللي أول ما بنسمعها بنفتكر كريمات وسيرومات وسعرها العالي، لكن الحقيقة إن الموضوع أعمق من كدا بكتير.
النهارده موضوع مختلف شوية، بس مهم جدًا:
العناية بالبشرة، والإهتمام بالنفس.
سؤال بسيط لكل ست بتسمعني دلوقتي :
هل عندك روتين صباحي ومسائي لبشرتك؟ ولا بتغسلي وشك وخلاص؟
هل بتدي لنفسك خمس دقايق كل يوم تبصي في المراية وتشوفي نفسك؟ ولا نسيتِ شكلِك من كثر التعب والمسؤوليات؟
النهارده مش هنتكلم عن الميك أب ولا البرفانات، هنتكلم عن الحب : حب النفس، اللي يبدأ من أول لمسة كريم على وشّك، ومن أول لحظة تختاري تهتمي بنفسك.
سؤالي النهارده :
هل فعلاً الست المصرية والعربية عندها روتين عناية صباحي ومسائي؟ ولا بتغسل وشها بمية وخلاص؟ هل العناية بالنفس رفاهية؟ ولا ضرورة زي الأكل والنوم؟
نبدأ أول فاصل ونرجع نسمع آراءكم.
(فاصل موسيقي ناعم – موسيقى استرخاء خفيفة)
شهرزاد :
رجعنا لكم من تاني، وسؤالي ليكم : هل فعلاً لازم كل ست يكون عندها روتين عناية ببشرتها؟ ولا دي رفاهية مش ضرورية؟ نسمع أول مكالمة.
أول متصلة – مروة :
أيوه يا أستاذة شهرزاد، أنا بقول طبعًا أيوه. العناية بالنفس مش رفاهية، دي احترام للذات. أنا بشتغل طول اليوم، بس قبل ما أنام لازم أنظف وشي وأحط كريم. مش علشان أكون حلوة لحد، لا، علشان أكون مرتاحة مع نفسي. الست لما تهتم بنفسها، بتحس إنها قوية، وده بينعكس على نفسيتها.
شهرزاد :
كلامك جميل يا مروة، فعلاً الإهتمام بالنفس بيبدأ من الإحساس الداخلي. اللي بيحب نفسه، بيشع طاقة حلوة حواليه.
شهرزاد :
خلونا نسمع رأي تاني. ألو! مين معايا؟
ثاني متصلة – سامية :
أنا يا أستاذة شهرزاد رأيي مختلف. الكريمات غالية جدًا، والأسعار نار. يعني أنا أصرف على غسول وتونر وسيروم وكريم؟ ده غير الأكل والكهربا والمصاريف، صعب جدًا. الواحدة دلوقتي بتدور على لقمة العيش، مش كريم مرطب.
شهرزاد :
معاكِ حق إن الأسعار بقت صعبة يا سامية، بس خليني أقولك حاجة :
العناية بالنفس مش دايمًا معناها فلوس. ممكن تهتمي بنفسك بطرق بسيطة جدًا : مياه وصابونة كويسة، نوم بدري، شُرب ميه، أكل صحي. مش لازم منتجات فخمة، المهم إحساسك بنفسك.
شهرزاد :
قبل ما نكمل، معانا دلوقتي اتصال من الدكتورة هالة فوزي، استشارية الجلد والتجميل.
مساء الخير يا دكتورة.
الدكتورة هالة :
مساء النور يا شهرزاد، وسعيدة جدًا إنك بتفتحي موضوع بالشكل ده، لأن العناية بالبشرة مش بس شكل أو تجميل، دي صحة. البشرة أول حاجة بتتأثر بالحالة النفسية، بالأكل، وبقلة النوم. وأي ست لازم يكون عندها روتين بسيط مش شرط يكون غالي. كفاية تنظيف يومي، ترطيب، وحماية من الشمس. وفي حالات كثير بشوفها في العيادة، بنات عندهم 25 سنة وبشرتهم بايظة لأنهم مهملين، لا بيشربوا ميه، ولا بيناموا كويس، ولا بيهتموا. الإهتمام بالنفس مش أنانية، دا ضرورة.
شهرزاد :
كلام في غاية الأهمية يا دكتورة، شكرًا جدًا على وجودك معانا.
نسرين بلعجيلي
شهرزاد :
خلونا ناخذ مكالمة جديدة. ألو!
سناء :
أنا عايزة أقولك يا شهرزاد إن الحلقة دي لمستني جدًا. أنا من الناس اللي أهملت نفسي سنين. كنت بقول “مايهمش”، المهم جوزي وعيالي. دلوقتي عندي 35 سنة، بس شكلي بيدي أكثر من 50. كل اللي يشوفني يقول "مالك كده؟"، وأنا مابقيتش أعرف أرد. نسيت نفسي حرفيًا. حتى لما ببص في المراية، مش بلاقي الست اللي كنت أعرفها.
شهرزاد (بتأثر) :
ليه يا سناء؟ ليه دايمًا الست بتخلي نفسها آخر أولوياتها؟ تلاقيها بتصرف على كل اللي حواليها، بس لما تيجي على نفسها، تقول “مش وقته”. وسنين ورا سنين، تكتشف إنها راحت.
الست اللي بتنسى نفسها بتخسر مش شكلها بس، بتخسر ثقتها بنفسها، وابتسامتها، وحيويتها. وأنا بقولها بوضوح : اللي مايحبش نفسه، ماحدش هيحبه.
شهرزاد :
خلونا ناخذ مكالمة تانية. ألو!
المتصلة – منى (بتضحك) :
أنا مشكلتي غريبة يا أستاذة شهرزاد. أنا وجوزي كل يوم نتخانق علشان العناية بالبشرة.
شهرزاد :
إزاي يعني؟
منى :
لأني باهتم بنفسي زيادة. بنام بكريم، أصحى بسيروم، وأمشي بماسك. هو بقى مش طايق ريحة الكريمات ويقول إني “مغرورة”. بيقولي “إنتِ فاكرة نفسك ممثلة؟” مع إني بعمل ده علشان أكون مرتاحة، مش علشانه.
شهرزاد :
يا منى، اللي مش فاهم قيمة العناية، عمره ما هيقدّرها. خليكِ زي ما إنتِ، بس خذي بالك، الاعتدال أهم من المبالغة.
شهرزاد :
طيب قبل ما نكمل المكالمات، معانا دلوقتي ضيف مهم جدًا، الدكتور مروان خطاب، استشاري الجلدية والتجميل، علشان يشرح لنا ببساطة إزاي نهتم ببشرتنا من غير ما نرهق نفسنا ولا جيبنا.
مساء الخير يا دكتور مروان.
الدكتور مروان :
مساء النور يا أستاذة شهرزاد، وسعيد جدًا إنك بتفتحي موضوع بالشكل ده. الناس دايمًا فاكرة إن العناية بالبشرة رفاهية، لكن الحقيقة إنها جزء من الصحة العامة، زي ما بنغسل أسناننا كل يوم، لازم نهتم ببشرتنا.
شهرزاد :
كلام جميل يا دكتور، بس فيه سؤال دايمًا بيتكرر : ليه ستات كثير شكلهم أكبر من سنهم رغم إنهم لسه صغيرين؟
الدكتور مروان :
ده سؤال مهم جدًا. بصّي يا شهرزاد، الجلد عضو حساس جدًا، وأول حاجة بتتأثر بالعمر، بالإجهاد، وبسوء التغذية. فيه ٣ أسباب رئيسية بتخلي البشرة تعجز بسرعة :
أول سبب نقص الكولاجين، وده البروتين اللي بيخلي الجلد مشدود وناعم. من بعد سن 25، الجسم بيبدأ يقلل إنتاج الكولاجين طبيعيًا بنسبة 1% كل سنة، وده معناه إن من غير دعم، البشرة بتفقد مرونتها وتبتدي الخطوط تبان.
ثاني سبب نقص مضادات الأكسدة زي فيتامين C وE، دول بيحموا الجلد من التلوث والشمس والإجهاد، ولما يقلوا، بيظهر البهتان والهالات وتصبغات البشرة.
ثالث سبب قلة النوم والماء، النوم مش رفاهية، هو “إعادة شحن” للخلايا. والميه هي أرخص منتج تجميل في العالم. لما تقل، الجلد بيجف ويفقد النضارة.
شهرزاد:
طيب يا دكتور، الناس بتسمع دايمًا عن الكولاجين ونَدت الـ NAD، لكن مش فاهمة بالظبط بيعملوا إيه. تقدر تشرحها ببساطة؟
الدكتور مروان :
أكيد.
الكولاجين ببساطة هو “الهيكل” اللي بيشيل بشرتنا. لما يقل، الجلد يترهل والخطوط تبان. علشان كده مهم ناخذه كمكمّل غذائي، خصوصًا في شكل مشروب أو بودر، لأن الجسم بيمتصه أسرع من الأقراص. هو مش بيمنع الشيخوخة، لكنه بيبطئها وبيدي مظهر صحي ومرن.
أما مادة NAD، فهي أحدث حاجة في الطب التجميلي دلوقتي. دي مادة طبيعية موجودة في الجسم مسؤولة عن تجديد الخلايا وإصلاحها. لما بنكبر، مستواها بيقل، فالجسم بيتعب أسرع. لكن لما نزوّدها، كأننا بندي للجسم طاقة جديدة، بتخلّي البشرة تفتّح، تشدّ، وتستعيد الحيوية. وده مش كلام تسويق، دي مادة مدروسة علميًا في الطب الوقائي والتجميلي.
شهرزاد :
يعني يا دكتور العناية مش بس غسول وكريم؟
الدكتور مروان :
بالظبط، دي منظومة كاملة. العناية الحقيقية تبدأ من الداخل، مش من المراية. وده معناه إن أي ست محتاجة توازن بين :
فيتامينات داخلية زي الكولاجين، الـNAD، الأوميجا 3، فيتامين D وB12.
و روتين خارجي بسيط : غسول، مرطب، واقي شمس.
نظام حياة صحي: نوم كفاية، شُرب مية، تقليل السكر والتدخين.
وكمان مهم جدًا نعرف إن التوتر بيبوّظ البشرة أكثر من الشمس. فيه ستات كثير بييجوا العيادة يقولوا “وشي وقع فجأة”، ولما نحلل السبب، نكتشف إنهم في ضغط نفسي كبير.
شهرزاد :
يعني نقدر نقول إن الجمال النفسي هو اللي بيصنع الجمال الخارجي؟
الدكتور مروان :
تمامًا يا شهرزاد. الست اللي بتحب نفسها وبتديها وقت تهتم بيها، شكلها بيتغيّر فعلًا، حتى لو ما صرفتش كثير. أنا بشوف بنات في العشرينات شكلهم أكبر من 35، وفي المقابل، ستات في الأربعينات وشّهم منوّر لأنهم بيحبوا نفسهم وبيعتنوا بيها.
شهرزاد :
نصايحك مفيدة جدًا يا دكتور، بس إيه أكثر خطأ بتشوفه عند الستات؟
الدكتور مروان :
الإهمال، والإستهانة بجمالهم. فيه ستات تقول “مافيش وقت”، “مش فاضية”، لكن لو خصصت لنفسها 10 دقايق بس في اليوم، هتتغير مش بس بشرتها، حالتها النفسية كمان.
شهرزاد :
آخر نصيحة من حضرتك لكل ست بتسمعنا دلوقتي.
الدكتور مروان :
هقولها بكل بساطة: إبدئي النهارده، مش بكرة. العناية مش رفاهية، دي وعد لنفسك إنك تستحقي الأفضل. ما تستنيش لما تبصي في المراية وتندمي، إبدئي بخطوات بسيطة، واعمليها بإحساس حب، مش واجب. وجمالك مش في الفلوس،
جمالك في الاستمرارية.
شهرزاد :
كلامك فعلاً درس يا دكتور، بشكرك جدًا على وجودك معانا، وعلى إنك خليت العلم يوصل للقلب قبل العقل.
الدكتور مروان :
العفو يا شهرزاد، وسعيد جدًا إنك بتقدمي محتوى محترم.
شهرزاد :
وناخذ إتصال كده نسمع صوت الرجالة. ألو!
المتصل – خالد (صوته متضايق) :
مساء الخير يا أستاذة شهرزاد. بصراحة أنا أول مرة أشارك، بس مضايق جدًا من مراتي.
شهرزاد (بحذر) :
خير يا أستاذ خالد، حصل إيه؟
خالد :
مراتي أخذت موضوع العناية بالبشرة بزيادة. بقت نايمة طول اليوم بالكريمات والماسكات، وأكثر من كده إنها تنام جنبي وهي كلها ريحة بصل وثوم، بتقولي وصفة طبيعية من النت، ووشها كله أبيض ومعجون. أنا مش عارف أبوسها ولا أقرب منها. بجد بقيت أخاف أدخل الأوضة.
شهرزاد (تضحك) :
يا أستاذ خالد، واضح إن الوصفة ضايقتك جدًا. بس خليني أقولك : الست لما تهتم بنفسها حتى لو بالغلط، دي رسالة إنها بتحاول. بس يا جماعة البنات، بلاش تجارب المطبخ في السرير، خلي الطماطم في السلطة مش على الوش.
خالد (يضحك) :
يا ريت تسمعيها الكلام ده بنفسك.
شهرزاد :
وعد، الحلقة دي كلها ليها. العناية مش معناها روتين يزهق الراجل،
هي توازن بين الراحة والجمال الطبيعي.
ناخذ فاصل و نرجع ليكم.....
Nisrine Bellaajili
شهرزاد :
و رجعنا معاكم نسمع مكالمة جديدة. ألو!
المتصلة – سناء (بصوت حزين) :
أنا من الناس اللي ضيعت نفسها. كنت دايمًا أقول "مش وقته"، "المهم العيال"، "المهم البيت". دلوقتي عندي 34، بس شكلي يدي 45. وشي كله تصبغات، والهالات ما بتروحش. جوزي بقى ما بيبصليش، وأنا بقيت مش عارفة نفسي.
شهرزاد (بهدوء) :
يا سناء، أكثر كلمة مؤلمة سمعتها منك هي "مش عارفة نفسي". الست لما تهمل نفسها بتخسر جزء من روحها. مش غلط تهتمي ببيتك وولادك، بس الغلط إنك تنسي نفسك وسطهم. لأن اللي ما يحبش نفسه، عمره ما يعرف يدي حب حقيقي.
شهرزاد :
قبل ما نكمل مكالماتكم، معانا دلوقتي مكالمة من خبيرة تجميل طبيعية، الأستاذة ريهام سامي، خبيرة العناية بالبشرة والتغذية الجلدية.
أهلاً بيكِ يا أستاذة ريهام.
ريهام :
أهلاً بيكِ يا شهرزاد، وسعيدة جدًا بالموضوع ده لأنه فعلاً مهم ومغلوط عند ناس كتير. فيه فكرة غلط إن العناية بالبشرة لازم تكون بماركات غالية أو منتجات مستوردة. لكن الحقيقة إن البشرة ممكن نحافظ عليها بحاجات بسيطة جدًا من البيت.
شهرزاد :
زي إيه مثلاً؟ لأن ناس كثير بتقول الأسعار نار ومافيش إمكانيات.
ريهام :
هقولك روتين طبيعي واقتصادي، أي ست تقدر تعمله حتى لو ميزانيتها محدودة :
1 الغسول :
مش لازم غسول غالي، معلقة دقيق شوفان + شوية لبن أو مية ورد = أنظف غسول طبيعي ينظف ويرطّب. تغسلي بيه وشك صباح ومساء.
2 الترطيب :
بدل الكريمات الغالية، ممكن تستخدمي زيت جوز الهند أو زيت اللوز الحلو أو زيت الورد. نقطة صغيرة على وشك قبل النوم، بتدي لمعة وترطيب وتغذي الجلد بعمق.
3 التونر :
ممكن تعمليه في البيت من مية ورد + نقطة خل تفاح (نقطة بس). ينظّف المسام ويوازن حموضة البشرة.
4الماسكات :
لو عندك عسل نحل طبيعي، ده كنز. معلقة صغيرة عسل + نقطة لمون (للبشرة الدهنية) أو لبن (للبشرة الجافة). ده مش بس بيفتح البشرة، كمان بيغذيها ويريّحها من الإرهاق.
5 واقي الشمس الطبيعي :
لو مش قادرة تشتري واقي غالي، حطي طبقة خفيفة من زيت السمسم أو جل الألوفيرا قبل الخروج. هو مش بديل تام، لكن بيعمل طبقة حماية طبيعية كويسة.
شهرزاد :
يعني ممكن نحافظ على بشرتنا حتى بإمكانيات بسيطة؟
ريهام :
بالظبط. الفكرة مش في المنتج، الفكرة في الاستمرارية. البشرة زي الزرعة، مش محتاجة سقي كثير مرة واحدة، محتاجة نقطة مية كل يوم.
لو كل يوم خذتِ خمس دقايق لنفسك، النتيجة هتظهر.
شهرزاد :
كلامك جميل يا ريهام، وفعلاً فيه درس في كلامك. يعني الجمال مش في الفلوس، الجمال في العادة اليومية.
ريهام :
بالظبط، وأنا دايمًا بقول للبنات :
إهتمي بنفسك مش علشان تكوني شبه حد، إهتمي بنفسك علشان لما تبصي في المراية تحسي إنك بخير.
شهرزاد :
بشكرك جدًا يا أستاذة ريهام على النصايح الجميلة دي، ورسالتي لكل اللي بيسمعونا :
الجمال مش غالي، اللي غالي إنك تسيبي نفسك وتنسي إنك تستحقي وقتك.
شهرزاد :
ناخذ مكالمة تانية، ألو!
المتصل – أحمد (صوته فيه حزن) :
أنا راجل، بس نفسي أقول حاجة مهمة. مراتي كانت زمان ملاك، مهتمة بنفسها وشكلها، بس بعد الجواز والعيال، بقت إنسانة تانية. وشها كله كرمشة، لبسها دايمًا واسع وقديم، وريحتها بصل وثوم طول اليوم، وكل ما أقولها إهتمي بنفسك تقولي "مافيش وقت"، "العيال". أنا مش بطلب منها تكون موديل، بس نفسي أشوف الست اللي حبيتها تاني.
شهرزاد (بنبرة قوية) :
أستاذ أحمد، كلامك واقعي جدًا، بس خليني أقولك حاجة. الست اللي إنت شايفها “مهملة”، ممكن تكون موجوعة. مشكلتها مش في كريم ولا لبس، مشكلتها إنها محتاجة “تفتكر إنها أنثى”. ساعدها مش تلومها. إدّيها وقت ترتاح، كلمة حلوة، نظرة امتنان. الست لما تطمن، بترجع تنوّر من تاني.
نسرين بلعجيلي
و في ختام حلقتنا عايزه أقول لكل ست بتسمعني دلوقتي كلمة من القلب :
إهتمي بنفسك. مش علشان تبهري الناس، ولا علشان يسمّوك حلوة، إهتمي بنفسك علشان تكوني مرتاحة مع نفسك، علشان تبصي في المراية وتبتسمي بدل ما تتنهّدي.
إعرفي إنك مش “أم” بس، ولا “زوجة” بس، إنتِ إنسانة ليها ملامح، وليها طاقة، وليها حق في الراحة والوقت والجمال.
البيت من غيرك بيتهد، بس إنتِ من غير نفسك… بتروحي.
العناية مش كريم، ولا ماسك، العناية إنك تسألي نفسك كل يوم : أنا بخير؟ أكلت؟ نمت؟ ضحكت النهارده؟ ولا عايشة على “بكرة هبدأ”؟
مافيش بكرة يا بنتي.. بكرة هو دلوقتي.
إعملي اللي تقدري عليه :
نقطة زيت على وشك، ماسك طبيعي، أو حتى كباية ميه على الريق وشوية هواء نظيف. بس متنسيش إن روحك كمان محتاجة عناية.
إقري، صلّي، إكتبي، غني، إمشي شوية لوحدك. إعرفي إن الجمال مش ملامح، الجمال “حضور” وراحة وهدوء. مش في الفلوس ولا في الماركات، بس في السلام اللي يطلع من جواكِ لما تكوني راضية.
الست اللي تهتم بنفسها مش أنانية،
الست اللي تهمل نفسها هي اللي بتظلمها. اللي بيحب نفسه بيدّي أكثر، بيحسّ بالأمان، وبيعلّم اللي حواليه إن الجمال مش للعرض، الجمال أسلوب حياة.
خلي في كل يوم ليكِ خمس دقايق، خمس دقايق تكوني فيهم أنتِ، من غير دوشة، من غير ضغط، من غير لوم. وشويّة شويّة، هتشوفي إن التعب قل، والضحكة رجعت، ووشّك منوّر حتى لو من غير نقطة ميك أب.
خلي شعارك بسيط :
"أنا أستحق أكون بخير."
وكل ما الدنيا تسرقك، إفتكري إنك مش نسخة، إنتِ الأصل، والبداية، والمصدر.
إهتمي بنفسك علشان تفضلي جميلة، مش في نظر الناس، لكن في عينك إنتِ. لأنك لما تبقي بخير، العالم حواليك بيكون بخير.
كانت معاكم شهرزاد....
وبقولها من قلبي لكل واحدة بتسمعني :
إهتمي بنفسك، وافتكري إنك مش أقل من أي حد، إنتِ “القيمة” مش “القالب”.
تصبحوا على خير، وعلى جمال يطلع من جوا الروح قبل المراية.
نسرين بلعجيلي
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
تعليقات
إرسال تعليق