رواية كياني الحلقه العاشره بقلم الكاتبه ابتسام نصيرات حصريه وجديده على مدونة النجم المتوهج للروايات والمعلومات
 |
بعد ما سمير عصب على كيان بعد ما قررت تهرب
دخلت كيان غرفتها ودموعها على خدها ، ورمت بنفسها على السرير ونامت من التعب
..
بمكتب سمير.
هاني... انت كثير كنت قاسي على كيان مش هيك يا سمير شوي شوي عليها نسيت وقفتها جنبك وانت محجوز، انت بنفسك خبرتني كيف اتحملت وتعبت مشانك، وكانت سبب انها تثبت براءتك من جريمة قتل
سمير .. هاني انا مولعه معي، اتركني بحالي
هاني.. على مهلك على الكل معصب ، اسمعلها لكيان هي بتحبك وانت عارف هالاشي
سمير .. يعني عاجبك كل ما يصير اشي، بتسحب حالها وتهرب، هيك هو الحب؟ ! افرض راحت واختفت ما لقيتها انا كيف بدي اعيش بعدها، انت متخيل ، قطعه منك تروح!
هاني... شو هالكلام الحلو وين مخبيه، ليش ما حكيتلها هيك
سمير... بتعرف ليش لانه انا وكيان بنختلف انغصبت على انور اخوي وانا كسرتها، احساسها بالعجز قدام أهلها وأنها مش قادرة توخد موقف في حياتها
هاني .... ما دامك عارف هالشي ليش قسيت عليها هيك وقدامنا كلنا ؟!
سمير... لازم اعمل هيك ، كيان متل الحصان الشَموص كل ما تزعل، بتهرب، وهذا غلط ، لازم تتعلم تواجه مش تهرب من مشاكل الحياة صعبة يا هاني بدي اياها تكون قوية، شخصيه قويه لكن كيان الي شافته ومن كتر الضغوط الي عليها اختارت الحل الأسهل أنها تهرب وتترك كل اشي وراه ظهرها، مش مهم تترك مين، ولا وين تروح ، المهم ما تواجه، هي شخصيتها مش ضعيفه والدليل وقفتها بحدي ، بس هي ديما بتختار الأسهل هو الهرب
هاني... المهم انت شو بدك تعمل معها زدتها كثير عليها؟ وانتبه لعمتك موضوع انشراح ما رح تتركه يروح هيك، والظاهر عقابك لكيان فتحتلها طريق ممكن تدخل منه
سمير ...كيف؟! انا مش رايقلك فهمني
هاني...لانها عرفت نقطة ضعفك ورح تبلش تنفخ براس كيان
هذا اذا بعدها ما بلشت
سمير...هيك يعني؟ رح اشوف كيان
هاني.. ههههه استحمل يا حبيبي الي بدو يصيرلك هههههه
سمير ... اختصر يا هاني انا شياطين كلها بتنط قدامي
روح شوف خطيبتك انت لتكون عمتي بتعبي راسها وانت بتعرف انها بترد عليها
هاني... اه والله جد كلامك صحيح
ترك سمير وراح ركض ، اما سمير راح لكيان لغرفتها لقاها نايمه، قرب عليها واخذ نفس
سمير (بينه وبين نفسه)...اااه يا قلبي لو تعرفي غلاوتك عندي كم، كان ما فكرتي ابدا تبعدي عني العمر كله
اخذ نفس وكمل بصوت عالي
سمير .. انتي قومي اصحي يلاااا
كيان(بكسل)... شو بدك
سمير(بصوت عالي)... انتي ليش نايمه هون ؟!
كيان(بقهر)... تركتلك الغرفه انت والعروس تبعتك تشبع فيها يا عريس
سمير كتم ضحكته
سمير ... ومفكره بدي اتجوز على نفس غرفة النوم؟! انا رح اجيب اغلى غرفة نوم بالبلد
كيان( بدموع )....شو بدك مني؟!
سمير... بدون صوت روحي لغرفتنا لا تخلي صوتي يعلى اكثر.من هيك
كيان.... انا ما بدي اقعد معك بنفس الغرفه
سمير... انا بحكي روحي لغرفتك وغيري ملابسك بدنا نتعشا الكل تحت يلااااا ، ولعلمك الكل عرف انك حامل
كيان...شوووو ؟! حكيتلهم ؟!
سمير... عادي ما حدا بعرف اشي ولا حدا رح يحسبلك كم وقت حملك ، خلصيني يلا
راحت للغرفه ولبست احلى ما عندها وكانت بغاية الجمال وتركت شعرها على ظهرها ، نزلت لقت الكل على السفره ، واستغربت جلوس انشراح بحد هاني وبيضحكو قربين كثير من بعض، والعمه نظراتها كلها حقد الهم
كيان ... مساء الخير
عيون سمير عليها معجب بشدة جمالها
ام انور... تعالي اقعدي بحد جوزك
العمه... عشت وشفت وقاحة الناس
كيان.... ما سمعت شو حكيتي يا عمه؟!
العمه.... بحكي هالحمل متى صار قبل الجواز ولا بعده
سمير(بغضب)... عمه انا ما بسمحلك تحكي عني وعن مرتي انتي بتعرفي انه اتجوزنا بس خلصت عدتها، رغم ما الها عدة بعد نزل حملها من انور ، وحياتنا الشخصيه ما بسمح لحدا يدخل فيها ، مين ما كان
قام سمير وقرب من كيان وباس ايدها وراسها قدام الكل
سمير... انا بعتذر لكيان قدامكم كلكم لاني زعلتها اليوم لاني عصبت ما تحملت فكرة انها تتركني، وسيطرة علي
سمير...حقك عليه يا كياني لا تزعلي مني
العمه... بعدين معك استحوا، والي بتهرب من بيت جوزها ، رقبتها بتنكسر ، يلا بدنا نوكل ونخلص
سمير... يا عمه ، حياتي انا الي بمشيها زي ما بدي
كل هالكلام وكيان تايهه مش فاهمه اشي من الي بدور حواليها ، وكل شوي عيونها تيجي على هاني وانشراح ملاحظه انسجام غريب بينهم
كيان....انا مثل الأطرش بالزفه ،حدا يفهمني يا جماعه شو في؟!
ضحك هاني وانشراح
انشراح.... انا بفهمك يا كيان ، انا وهاني كتبنا الكتاب
كيان... انتي وهاني؟! طيب وسمــير ؟!!! مش فاهمه؟!
سمير ... سمير خلص العدد عنده اكتمل بوجود احلى البنات كلهم، ومبسوط فيها ومستحيل اتجوز مره ثانيه
خجلت كيان من كلامه
هاني.... خلص بدنا نتعشا وانتي يا كيان لازم توكلي منيح وتشربي حليب الصبح ومسا مفيد جدا ببداية الحمل ولا شو رأيك يا عمتي
ام انور... اكيد يا حبيبتي لازم تشربي
كيان...حاضر رح اشرب كل يوم
استغرب سمير منها لانها ما اعترضت وافقت على الرغم انها ما بتحب الحليب
استمر الكل بالاكل وعيون سمير على كيان ما رفعها
خلصوا عشا وكيان استأذنت تطلع لغرفتها
كيان... مبارك يا انشراح انتي طيبه وبتستاهلي
سمير طلب من الشغاله تجهز كاسة حليب، هو ما صدق ولحقها مباشرة وسكر الباب وراه ، وحطلها كاسة الحليب وبدون اي كلمة فتح الخزانه واخد بجامة النوم ودخل الحمام ولبس، وطلع ونام على الكنبه بعد ما لف ظهره ونام
كيان (بينها وبين نفسها)... مش اعتذرلي تحت وكان هو الغلطان ، بس واضح أنه اعتذر بس قدامهم!!!
غيرت ملابسها و نامت
.
.
صحي سمير وهي ضلت نايمه، بدل ملابس النوم ونزل
نادى الشغاله
سمير ... جهزي كاسة حليب واطلعيها لكيان
الشغاله.... حاضر
سمير ... اذا لقيتيها نايمه اتركيها لا تصحيها بس تصحى بتشربها
سمع صوت أمة من بعيد
ام انور ... وين على هالصبح؟؟
انتبه لامه لقاها قاعده مع عمته
سمير .. صباح الخير لاحلى ام بالدنيا ، صباح الخير يا عمه
عمته ما ردت عليه
ام انور... صباح الورد وين؟
سمير... على العاصمه في شغل كثير واقف ولازم اخلصه بسرعه
ام انور .. وراجع اليوم؟!
سمير.... ما اظن ،يمكن بكره، او بعد بكره ليخلص الشغل
تاخرت انتبهي لكيان واهتمي باكلها هي ما بتوكل منيح
ام انور... لا تهتم تروح ترجع بالسلامه وانتبه وانت سائق
طلع سمير وعمته مخها شغال وبخطط
العمه... هي باي شهر كيان؟
ام انور... ما بعرف، ليش بتسالي، بتفرق معك يعني؟ تكون زي ما تكون المهم تقوم بالسلامة وتجيبلنا انور الصغير
العمه.... ان شاءالله
.
. (حكايات ام سهم)
صحيت كيان من النوم التفتت حواليها ما لقت سمير
كيان....وين راح ؟! اكيد نزل تحت يفطر طيب كان استناني ننزل سوا، شكلي رح اتعب كتير معه
شافت كاسة الحليب جنبها شربتها ولبست ونزلت ،ولقت انشراح قاعده مع هاني بيضحكوا
سمير ... صباح الخير
انشراح.... صباح الور للوردة
ابتسمت كيان الها وحست بحنانها وطيبتها
كانت عيون كيان بدور على سمير
الشغاله.... الفطور جاهز تفضلوا
الكل قعد على السفره وعيونها بدور عليه لاحظ هاني وفاهم. من نظرتها أنهم لسى ما بيحكوا مع بعض
هاني... وين سمير مش شايفه ، ليكون بعده نايم ؟!
ابو انور... صحيح وينه؟!
ام انور... طلع بكير للعاصمه
تفاجأت كيان بس التزمت الصمت ما علقت
ابتسم هاني علي طريقتها
هاني...اه صحيح نزل مشان اوراق الارض مشان نبلش بالتوسع ، وكمان الشركه تبعتك حكت معه كأنه فيها مشاكل
كانت سارحه وبعالم ثاني
هاني...كيان كيان انتي سامعيتني؟!
كيان.... هاه سامعك يا هاني
هاني... شكلك مش سامعيتني
كيان... معلش سرحت بالشغل
هاني... شو هي المشكله الي بشركتك وخلت سمير ينزل بسرعه
كيان.... ما بعرف، وانت من وين عرفت ؟
هاني... وصله تلفون واحنا بالمكتب من مكتبك والظاهر في مشكله كبيره عندكم
استأذنت وبسرعه قامت ، ولحقها هاني
هاني... انتبهي يا كيان لا تتصرفي شي يزعل سمير ، لا تروحي للعاصمه
كيان(ابتسمت)... مش لهدرجه انا عنيدة، لا تخاف ، بس بدي ارن على صديقتي ونائبة شغلي لاعرف شو القصه
العمه استغلت وقفت هاني بيحكي مع كيان
العمه.... شوف ترباية المدن !! لا حياء ولا ادب، واقفه مع الزلمه ولا كأنه مرتبط، صحيح يا ام انور مش هاني كان بدو يتجوز كيان؟
طلعت لغرفتها ورنت على سهاد
ام انور.... انتي ما بتعرفي الا تبثي سمك بكل موقف
انشراح... كيان ما في منها خلص يا امي
العمه ... شو حكيت انا ، بس انتو حاطين النار بجنب البنزين
دبت نوع من غيرة في قلب انشراح
رجع هاني قاعد لاحظ كهربة الجو وتغير لون وجه انشراح فهم انه امها حكت اشي وراه
قام هاني وماسك ايد انشراح
هاني.... عن اذنكم بدي اطلع انا وانشراح للحديقه
طلعوا الاثنين للحديقه
هاني.... ليش وجهك متغير؟
انشراح... ما في اشي
هاني ... اسمعي يا انشراح لازم تعرفي انه من لما اخترتك صرنا واحد، ولازم نصارح بعض بكل اشي ما نخبي عن بعضنا
لهيك ليش زعلانه؟!
انشراح.... بصراحه انا طبعي ما بعرف اخبي اشي، بس شو في بينك وبين كيان شي
هاني(بزعل)... انتي مجنونه؟! كيان هاي تعتبر زوجة اخوي انتي عارفه مين سمير؟! سمير يا انشراح!!
انشراح... طيب ليش لحقتها
هاني... كنت بفكرك اعقل من هيك، هي كل كلمه تحكيها امك تصدقيها!!! انتي عندك عقل تفكري فيه، لا تخافي لحقتها من خوف تتصرف اشي يزعل سمير ، خفت تعاند وتتهور وتروح وتلحقه للعاصمة، وشكلها ما بتعرف عن المشكله ولا بتعرف انه راح للعاصمه الا من عمتي
انشراح ... همه لسى زعلانين من بعض؟
هاني.... هيك باين
انشراح... انا اسفه يا هاني
هاني... لا تصدقي اي كلام فاهمه، كيان متل اختي
وعيب تصدقي كلام متل هيك، وانتبهي تحكي لامك اي اشي بسير بينا انتبهي
انشراح ...اكيد عيب احكيلها اي اشي بصير بينا
مسك ايدها وضحك مع طلعت العمه
العمه.... استحوا على حالكم بلا قلت حيا عاد
هاني... شو عاملين؟!
انشراح... وين رايحه يا امي
العمه(بتوتر) .. مشوار ولا ممنوع ؟!
انشراح... طبعا لا يا امي بس غريبه رايحه بكير
العمه... لا تتدخلي وضلك بالمسخره الي انتي فيها ، ساعة زمن وراجعه
. (ابتسام نصيرات ـ ام سهم العيسى)
.
كيان.... الو شو في بالشركه يا سهاد
سهاد... انتي مين حكالك ؟! سمير؟ هو منبه علي ما خبر حدا
كيان(بعصبيه).... والأوامر بتوخذيها من سمير ولا مني؟!! شو فيه يا سهاد؟!
سهاد... اهدي يا كوكو مش هيك
كيان... خلصيني شو فيه
سهاد...في واحد من العملاء تبعونا رفع قضيه نصب بتهمنا بتاخير تسليم الشغل بوقته وسارقين تصاميم غيرنا
كيان(غضب)...شووو، طول عمري شغلي صح الصح ولا عمره عميل اشتكى منا، اي من التصاميم الي بعثتهم هذا الاسبوع؟
احكي بسرعه
سهاد... اهدي يا كيان شوي ، سمير هون ورح يحل المشكله كلها والي رفع القضيه موجود يتفاهم معه
كيان...مش عارفه ليش هالاتهام انا بشتغل بتميز وعندي افكار كتيرة غير عن باقي شركات التصميم وبتعب على شغلي، كيف بحكوا انه بنسرق تصاميم غيرنا؟!!!
فجأة سمعت صوت سمير بصرخ
سهاد... سكري الخط وبحكي معك بعدين
كيان... لا خلي الخط مفتوح بدي اسمع شو بصير ، لا تحكي لحدا اني على الخط
دخلت سهاد على مكتب سمير
سمير... انت غلطان التصاميم كلها عملتها مدام كيان فوق الوصف واي شركة بتتمنى هيك شغل، وانا شخصيا شفتها وهي بتصممه، فكيف بكون مسروق؟!!
العميل... لانه شفت هالتصميم عند صاحبي بشتغل نفس شغلي
سمير.... لو سمحت اعطيني رقمه لاعرف من وين حصل عليه
اخد سمير الرقم من العميل وحكى معه، وطلب منه يحضر فورا
بعد نص ساعه
وصل الشخص الي حكى معه سمير
سمير....انا سمير الــ....
.... معروف يا استاذ سمير اسمك غني عن التعريف
سمير .. المشكله انه صديقك بيتهمنا بسرقه تصاميم غيرنا فيا ريت نعرف التصميم الي شافه عندك من وين حصلت عليه لو سمحت
....انا اشتريته من شب من اسبوع وباعني اياه
على اساس أنه من تصميمة وانا اشتريت منه
سمير.... اذا شفت هذا الشب بتعرفه؟!
.....اكيد
سمير .. تفضل معي لو سمحت
بدأ سمير بعرض الموظفين كلهم عليه
.... هذا استاذ سمير الي باعني التصميم
طلب سمير من امن الشركه التحفظ على الشب لحتى يخلص مع العملاء وينهي القضيه
سمير.... على ما اظن هيك اتضحت القصه وعرفت حضرتك انه احنا مش سراقين والشغل شغلنا ما بنسرق تعب حدا ، وانا الي رح ارفع قضيه عليك رد اعتبار لمدام كيان ، ولسمعت شركتها، واعتبر هاي اخر مره بتتعامل معنا والمبلغ الي دفعته اعتبره جزء لتعويض السمعه ، والله معكم بدي اكمل شغلي
العميل.... بس لو سمحت هيك رح اتاخر على انجاز شغلي ورح اخسر كثير
سمير.... ليش ما فكرت بهيك قبل ما تشوه سمعت شركتنا، وترفع قضيه، انت الي وصلت حالك لهون
العميل... انا بعتذر منك والي بدكم اياه بعمله ورح انزل اعتذار رسمي لمدام كيان
سمير... هيك تمام ، وحضرتك انت مره ثانيه لما يجيك شخص معه تصاميم لازم تراجع نفسك ، وهيني بحكيلكم انت الاثنين ، اذا انا شخصيا ادخلت مره ثانية ، رح تضايقوا بالسوق وانتوا بتعرفو مين سمير الـــ .....
كل هالكلام وكيان بتسمع معجبه بشخصيته القوية الوثقانه بنفسه، وادارته للامور بكل حزم وسلاسه ،وفي نفس وقت زعلانه أنه لغى وجودها واتصرف مكانها
.
.
طبعا سمير طرد الموظف الي سرق التصميم بدون ما يرفع قضيه عليه، وحرمه من حقوقه كلها واعتبره خاين
.
.
العمه لما طلعت من البيت راحت للصيدلية
العمه... لو سمحتي يا بنتي بدي خدمه منك
البنت... تفضلي بالي بقدر عليه
العمه... انا عندي بنتي حامل وعندها طفل صغير عمره ثلاث شهور وبدها تنزل الي بطنها
البنت ... بس هذا ممنوع يا حجه وحتى لو بدي اعطيك لازم بوصفه من دكتور مختص
العمه... رح اعطيك المبلغ الي بدك اياه
وطلعت من جزدانها مبلغ مرتب والبنت طمعت
البنت.... طيب بس انا ما الي بلي بصير، واذا صار اشي رح انكر اني شفتك نهائي
العمه... طيب ، اعطيني الدوا ويكون سريع المفعول
البنت... تفضلي ، حبه بكاسة عصير وساعتين زمن كله بكون تمام
العمه... المهم ما يكون خطر على حياتها
البنت.... انا ما بضمنلك اشي
العمه... طيب هاتي هاتي ما بصير اشي
رجعت للبيت وقبل ما تدخل لقاها اخوها ابو انور
ابو انور... وين كاينه يختي
العمه... شو قصتكم انا بسجن ممنوع اطلع؟
ابو انور... لا لا روحي وين ما بدك الواحد ما بخلص من لسانك
.
.
المسا دخلت العمه المطبخ
الشغاله...بدك اشي انا بعملك اياه
العمه.... وانتي شو بتعملي
الشغاله.. بعمل كاسة حليب لمدام كيان ، سمير وصاني عليها
العمه....هالكيان الي طلعتنا، اتركي الي بأيدك واعمليلي فنجان قهوة بسرعه يلااااا
الشغاله... حاضر حاضر انتي روحي وانا بجيبها الك
العمه... لا انا واقف عندك هون
الشغاله انشغلت بعمل القهوة وانتهزت العمه فرصه وحطت حبة بكاسة الحليب
اخذت فنجان القهوة
العمه... مره ثانيه بتتركي كل اشي من ايدك بس اطلب منك فاهمه وله
الشغاله .... حاضر
اخذت الشغاله كاسة الحليب لكيان ولقتها نايمه
كيان... يييي نامت من غير ما تشرب الحليب وكمان ما اكلت طول النهار لو سمير يعرف رح يبهدلني
نزلت الشغاله وفي أيدها كاسة الحليب ، مع دخلت سمير
وشافه اول واحد هاني
هاني... اهلا وسهلا توقعت تقعد يومين
سمير ... خلصت شغلي ورجعت ما الها لازمه القعده
كانت عيونه بدور عليها
هاني... هههه يا لطيف يا حنين ههههه ما نزلت من غرفتها اليوم بالمره
سمير.... بتحكي جد ما نزلت؟!
هاني... ما شفتها من وقت الفطور الصبح ، وكيف تطلع بدون ما تخبرها ، انقلب وجها لما عرفت انك رايح العاصمه وانه في مشكله عندها كمان
سمير .. خلص يا هاني انا تعبان كثير، بعدني ما اكلت اشي
وين الشغاله
هاني... هيها نازله من فوق
شاف كاسة الحليب بايدها والكل قاعد والعمه عيونها على الكاسه
سمير...ليش ما شربت
الشغاله.... لقيتها نايمه والله
سمير... انتي تاخرتي عليها صح؟
الشغاله(بخوف)... هو ااا هو ما اكلت طول النهار ما نزلت من غرفتها
سمير(بصياح)... كيف بتتركيها بدون اكل وانا وصيتكم عليها
ام انور... معلش يا امي انت بتعرف كيان عنديه ما في حدا بقدر عليها ، خلص انتي روحي على المطبخ
انشراح.. هاتي كاسة الحليب انا بشربها اجت بوقتها
كانت امها بدها تقوم توخذها بس ايد انشراح اسرع وشربتها بسرعه
العمه... يا ويلي يا ويلي
ام انور... خير شو مالك؟! شو فيه؟!
ما اهتم سمير وطلب عشا من الشغاله تجهزه واطلعه لفوق بغرفته
سمير... وعملي كاسة حليب ثانيه، بدل الي شربتها الفجعانه
هاني...ابعد عن انشراح
سمير... الف صحه وهنا انا بس بتغزل فيها
هاني(بمزح)... ما الك فيها وطلع شوف عمايلك السودا فوق
سمير... طالع ربنا يستر
طلع سمير ولقى كيان نايمه ولسى بدو يغير ملابسه
كيان... متى اجيت؟!
سمعوا صوت من تحت
سمير... مش هذا صوت انشراح؟!
كيان... ليش بتصرخ هيك؟!
سمير... مش عارف خليني انزل اشوف.
بسرعه كيان لبست وراحت وراه كانت انشراح بتتوجع بشكل فضيع من بطنها. وامها بتصرخ
كيان .... اتصلوا بسرعه بالأسعاف
هاني شال انشراح وبسرع على سيارته وعلى المستشفى على طول ولحقهم سمير وكيان
الدكتور بعد الفحص السريع
الدكتور ... هي حامل؟
هاني... لا يا دكتور
الدكتور.... معها نزيف حاد
هاني(بعصبيه)... انت ما بتفهم بحكيلك لا لسى مخطوبه
سمير... اهدى يا هاني خليني نفهم بهدوء
الدكتور... طيب شو بتوخذ ادوية
هاني... ما اخذت اشي، انا كنت معها طول النهار
الدكتور... شو اخر شي اكلته
سمير.. كاسة حليب ، ولا اكلت شي بعدها يا هاني؟
هاني.. لا ابدا اصلا بعد ما شربتها بشوي صار الي صار
الدكتور... اذا ما اخذت اي ادوية اكيد الحليب فيه اشي، لانه الاعراض الي صارت بتأكد انها تناولت حبوب اجهاض ، سببلها وجع حاد ونزف
سمير .. حبوب شوو؟
كيان.... حبوب اجهاض
الدكتور... انا متأكد من كلامي رح نعمللها الازم ونتأكد اكثر بعد التحليل
تركهم الدكتور لاكمال اسعاف انشراح
سمير... حبوب اجهاض؟؟ الحليب كان المفروض تشربه كيان
انت بتعرف يا هاني انه المقصوده كانت كيان !!! بدهم يموتوا ابني وكيان تروح فيها
كيان(بخوف )... يموتوا ابني؟!! انا مستحيل اضل بالبلد، لازم اروح على العاصمه...
غدا نتابع الحلقه الأخيرة
شو بتتوقعوا تكون النهاية ؟!
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺
اتفضلوا حضراتكم كملوا معنا هنا 👇 ❤️ 👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺
