رواية سرطان الحلقه الاولى والثانية والثالثة والرابعة والخامسة حصريه وجديده

رواية سرطان الحلقه الاولى والثانية والثالثة والرابعة والخامسة حصريه وجديده 

رواية سرطان الحلقه الاولى والثانية والثالثة والرابعة والخامسة حصريه وجديده 

العيال كبرت والفقر جاب اخره معايا 

دة اللي قاله جاك طبيب مملكة الفردوس  ل مراته صوفيا اللي قالت

ما شغلتك ك طبيب للمملكة ما بقتش تقضي احتياجتنا بسبب الطبيب الجديد توماس ودة علشان هو شاب وقوي ويمتلك من العلم اللي يخلي اشطر منك

جاك بعصبية

صوفيا شكلك نسيتي زي بقيت سكان المملكة اني انا العبقري

صوفيا

لكل وقت اذان و دة مش وقتك دة وقت توماس

جاك

تبقي غبيه لو افتكرتي ان جاك انتهي انا علمي كله ورثته ل ابني الكبير العبقري سرطان

صوفيا

وهيعمل اية ابنك بالعلم بتاعك وهو مشلول الاطراف الاربعه وبيخاف من اي شئ ونظرة ضعيف 

جاك

انا خلاص وصلت للعلاج وهخلي سرطان ابننا اعظم دكتور شافته المملكة

صوفيا

اسفه جاك نفسي اصدقك بس انا بسمع الكلام دة من سنين وحاله ابنك زي ما هي

جاك

اصل علاج ابني في موت الاربعه التانين من ولادي

صوفيا اتصدمت وقالت

انت بتقول اية يا جاك

جاك

اللي انتي سمعتي انا عندي خمس شباب تؤام  في سن ال 13 سنه. كل واحد فيهم مولود باعاقة تمنعو يكمل مسيرتي علشان كدة انا ناويت وقررت ان الخمسة يكونو واحد قوي يقدر يكون مكاني في المملكة ويقدر يتغلب علي توماس في الطب

صوفيا

انت مجنون جاك

جاك

اي عبقري عنده نصيب كبير من الجنان.

صوفيا

انا مستحيل اخليك تعمل كدة في ولادنا

جاك

دول ولادي انا صوفيا وانتي ليهم مجرد مرات اب يعني مالكيش الحق ترفضي 

او توافقي 

صوفيا

بس العمل دة اجرامي وضد قانون المملكة

جاك

العلم دوله لايطبق فيها  القانون وكلها يومين واعمل العملية واياك يا صوفيا اي فرد في المملكة يعرف باللي انا ناوي اعملو دة  ،،،،،،،

اهلا بيكم واقتباس جديد من قصتين قرتهم زمان. اتعملو افلام انا بقي خد فكرتهم وحطتهم في حكاية واحدة بعد ما حطيت مناخيري في الاحداث وألفت احداث تانية. وسمتها 

سرطان 

اقتباس و تاليف

محمد منصور 

**منص**

وقبل ما نبدأ نوحد الله ونصلي علي خير خلق الله سيدنا محمد.

اللهم صل وسلم علي محمد صلاة تحل بيها العقد وتفك بيها الكرب

ويتغير المشهد ونشوف جاك واقف جوة اوضة كبيرة تشبه اوضة العمليات جوة منها خمس طولات للتشريح علي كل طاوله شاب عاري النص اللي فوق من الجسم ودول ولاد جاك اللي وقف وسط الطولات بالظبط وبص لهم وقال مع انهم مغمي عليهم

اللي هعملو دة مش معني اني زعلان من حد فيكم لكن انا بقيت راجل عجوز والفقر اتمكن مني وانتم رغم عددكم الكبير لكن ولا واحد فيكم ينفع يكون مصدر دخل ليا

وراح ناحية اول شاب وقال

يعني انت يا اليكس بتمتلك ذراعات قويه جدا لكن عقلك عقل طفل مهما تكبر وتزيد قوتك لسة مجرد طفل. صعب تشتغل وتجيب فلوس ولا نسيت  صاحب المزرعة اللي وافق يشغلك عنده بعد محايله مني وكنت هتقتله علشان بس زود عليك في الشغل. علشان كدة انا هاخد منك احسن حاجة فيك ذراعتك القويه. وهزرعهم 

ل اخوك سرطان

وطلع مشرط من هدومة وعمل دايرة حوالين الذراعين من فوق و ساب الكيس وراح عند تاني طاوله وبص للشاب اللي عليها وقال

وانت يا لويس.  عارف انا بحبك قد اية ومع انك بتمتلك اقوي رجلين في اخواتك و اسرعهم في الحركة لكن ما بتسمعش مولود اطرش ومهما اتكلمت معاك مش هتسمع ودة خلاك ما تلقيش اي شغل في المملكة علشان كدة رجلك خسارة فيك. لكن حلال علي اخوك سرطان 

وعلم بالمشرط عند اول الرجل من فوق وراح عند تالت طاوله ووقف قصاد الشاب اللي عليها وبص له وقال

مايكل.  اشجع ولد في ولادي تنفع تكون مصارع بتمتلك قلب من حديد لكن مع الاسف اتولد اعمي وانا اشهد لك انك لولا اعاقتك كنت هتبقي الابن المفضل ليا لاني جبان مش شجاع زيك لكن هتعمل اية بشجاعتك وانت اعمي علشان كدة قلبك مش هيكون ملكك. هيكون ملك اخوك سرطان 

وعلم بالمشرط في الصدر عند مكان القلب وراح عند الطاوله الرابعة ووقف قصاد الشاب اللي عليها وقال

وانت يا جون. بتملك عيون حادة زي عيون الصقر لكن مع الاسف اخرس و بطي الحركة علشان كدة ما كانش ينفع حد في المملكة كلها يعتمد عليك في اي شغل وعيونك مش المفروض يكونو في جسم واحد زيك لكن الصح يكونو في جسم سرطان العبقري الجديد خليفة العبقري جاك. اول واخر طبيب في مملكة الفردوس.  

وعلم بالمشرط حوالين عيون مايكل وراح ل اخر طاوله ووقف قصاد الشاب سرطان وبص له وقال

اربعه هيموتو علشان تتولد انت من جديد. عندك ذكاء اشهد لك ان ما فيش حد في المملكة يمتلك نص ذكائك لكن يا خسارة مشلول علشان كدة اعضاء اخواتك هيكونو ملكك وانت هتكون الاوحد. سرطان اللي مافيهوش غلطة

والضمور اللي في اعصابك انا لقيت له علاج في نقل اعصاب اخواتك ليك. العملية الاولي من نوعها في الزمن دة. و هتنجح 

و بص ل ولاده البصة الاخيرة و بدات العمليه ،،،،،،،

وبعد كام ساعة خرج جاك من الاوضة و هدومة عليها دم اولاده وشافته مراته صوفيا وقالت

خلاص عملت اللي في دماغك

جاك كان تعبان جدا وقعد علي اقرب كرسي قابله وقال

هات لي كاس من النبيذ

صوفيا

بعد الاجرام اللي عملته ليك نفس تشرب الخمر

جاك بحدة

صوفيا الافضل ليكي السكوت والا هتكوني مع اولادي في قبورهم. وهاتي كاس نبيذ 

صوفيا سكتت ومشيت من قدامو وراحت تجيب له النبيذ وشرب ازازة بحالها وقعد علي اقرب كرسي وفضل يبص لفيروز. اللي استغربت بصاتو ليها فقالت

انت عمال تبص لي لية كدة

قام وقف جاك بصعوبه وقال

خايف من بكرة لان ما فيش ست في المملكة دي كلها ينفع تكون امينه علي سر

وبدا جاك يقرب من صوفيا وهي بدات تخاف وترجع لوراء وبتقول

جاك الخمر والشيطان بداو يلعبو بدماغك انا مراتك من 10 سنين و مهما شوفت منك مستحيل افضح لك سر

جاك لسة بيقرب منها وهو بيقول

ابقي مجنون لو صدقت انك تقدري تستحملي كتمان سر زي دة. لان اللي حصل ماكنش قليل دة انا قتلت اربعه من اولادي علشان يعيش سرطان ملك في الطب. و ما قدرش اسيب ورايا نقطة ضعف بسببها في يوم من الايام ينكشف بها امري

وهجم مرة واحدة علي صوفيا اللي جريت ناحية الاوضة اللي حصلت فيها العملية ودخلت الاوضة وقفلت الباب وراء منها وهو بدا يرزع علي باب الاوضة بكل قوته وعمال يقول

افتحي الباب. يا صوفيا

لكن صوفيا ما فتحتش وشافت جثث الاربع شباب

و سرطان الشاب الخامس ملفوف علي ايدية الاثنين ورجلي الاثنين شاش ملطخ بالدم وعلي وشة شاش ملطخ بالدم وعند صدرة برضو شاش ملطخ بالدم خافت من المنظر وصرخت باعلي صوتها في الوقت دة كان في سيف اخترق خشب الباب المتهالك والسيف دة بتاع والد جاك اللي كان فارس وجاك كان محتفظ بي والسيف اخترق بطن صوفيا اللي صرخت وسحبت جسمها من السيف ومشيت بعيد عن الباب و هنا جاك كسر الباب ودخل الاوضة وقال

كنتي فاكره انك هتقدري تهربي مني. دة انا جاك يا صوفيا

وبدا يقرب منها وصوفيا بتنزف و خطواتها بطيئة لان اصابتها خطيرة لكنها جمعت كل قوتها ومسكت مشرط من اللي بيستخدمو جاك في العمليات وهجمت علي جاك وحطت المشرط في رقبته وهو اتوجع وغرز السيف في بطنها اكتر لكن صوفيا سحبت المشرط بالعرض وذبحت جاك والاثنين وقعو علي الارض سايحين في دمهم.  واستمر الحال علي كدة تلت ايام وريحة الجثث بدات تفوح برة البيت وتم تبليغ حرس المملكة وجم الحرس وكسروا ابواب البيت في نفس الوقت كان سرطان بينزل من فوق طاوله التشريح وبيقف علي رجله

 ل اول مرة وبدا يحرك ايدة علشان يشيل الشاش اللي علي عيونه. وبص ل ايدة ورجله ورغم الوجع بسبب الخياطة وجرح العملية لكنه كان فرحان جدا انه بيقدر يمشي وكمان بيحرك ايدة واستغرب ازاي دة حصل وخرج من الحاله دي لما شاف جثث اخواته الاربعه 

و جثتين جاك و صوفيا فتح عيونه ولقي نفسه وسط مجزرة صرخ باعلي صوته ومع صرخته دخل عليه الاوضة حراس المملكة وبصو له وبصو للجثث وقال القائد

اقبضو عليه بتهمة قتل عيلته

ومسكو الحراس سرطان اللي صرخ وقال

انا ما عملتش كدة انا برئ من المجزرة دي انا برئ،،،،،،،

ح(2)

تم دفن الجثث سيدي 

دة اللي قاله ميشيل حارس من حراس المملكة ل هنري قائد حراس المملكة اللي رد عليه وقال

وفين سرطان

ميشيل

في السجن يا سيدي. لكن قاضي المملكة هيعمل اية في جريمة زي دي وخصوصا ان سرطان لم يتم سن ال 20 علشان يتم قطع راسه 

هنري

الغريب ازاي سرطان اللي كان مشلول بقي يقدر يمشي وكمان يقتل

ميشيل

وعمل كل دة وهو في سن 

ال 13. انا مستحيل اصدق ان هو وراء المجزرة دي

هنري

اومال هيكون مين وكل جيران جاك اكدو ان ما فيش حد غريب دخل او خرج منزل جاك في اخر اسبوع

ميشيل

يبقي لازم توماس طبيب المملكة يقوم بالكشف علي سرطان ويعرف اي سر شفائة،،،،،،

سرطان 

اقتباس و تاليف

محمد منصور 

**منص**

وقبل ما نبدأ نوحد الله ونصلي علي خير خلق الله سيدنا محمد.

ونروح ل قصر الملك ألفريد اللي كان قاعد مع انتوني قاضي المملكة في انتظار وصول دكتور توماس وفعلا وصل توماس وقدم التحية وقال له الملك 

عرفت بالمجزرة اللي حصلت في منزل الدكتور جاك

توماس

عرفت يا مولاي. واستغربت جدا ان وراء المجزرة دي سرطان. الولد اللي كان مشلول

القاضي انتوني

وفي زمنا اصبح للشلل علاج

توماس ابتسم وقال

انا طبيب المملكة من سنين واؤكد لك يا سيادة القاضي ان مرض الشلل ملهوش اي علاج في زمنا دة

انتوني

اومال سرطان رجع ازاي طبيعي. واضح ان للشلل علاج انت ما تعرفهوش يا طبيب المملكة ودة يخلي منصبك كطبيب للمملكة في مهب الريح

توماس ارتبك لكنه جمع اعصابه وقال للملك

مولاي كلام سيدي القاضي في اهانه ليا وانا طبيبك وانت عارف اني عبقري

 وما فيش في كل الممالك اللي حاولين مننا طبيب زيي

ألفريد

القاضي أنتوني ما غلطتش وواضح ان في اللي اشطر منك في مجال الطب ودة معني انه المفروض يكون هو طبيب المملكة مش انت يا توماس 

توماس

سيدي اديني فرصة اعرف ازاي سرطان خف ودة هعرفه لما اقوم بالكشف عليه لانه ممكن يكون خف بسبب السحر الاسود

أنتوني

السحراء كلهم خلصنا منهم ومملكة الفرودس ما فيهاش سحر اسود اعترف انك فاشل وفي الافضل منك

توماس

سيدي القاضي انا برفض اللهجة دي 

ألفريد بلهجة الامر

توماس. قوم بالكشف علي سرطان ومعاك كل الصلاحيات بس توصلي

 ل اجابه واضحة وصريحة ازاي سرطان بقي سليم ولية قتل عيلته 

توماس

أمر مولاي،،،،،،،

ويتغير المشهد ونشوف توماس في اوضة الخاصة بي واللي بيتم فيها الكشف علي المرضي وكان قصاد منه سرطان اللي بص له توماس بتركيز شديد وقال

يعني انت كنت نايم وصحيت لقيت عيلتك مقتوله

سرطان

أقسم بالرب ان دة اللي حصل

توماس

طيب اقلع هدومك و نام علي الطاوله دي علشان اقوم بالكشف عليك

سرطان

حاضر طبيب توماس

وفعلا قلع سرطان ونام علي الطاوله وبدا توماس يكشف عليه واستغرب لما شاف ايدين لونهم قمحي مع ان لون جلد سرطان ابيض ولسة مكان الجرح باين ورجلي برضو مش بتوعه ولسة مكان الجرح باين وخياطة في صدر عند مكان القلب. ما كنتش محتاجة طبيب بارع زي توماس علشان يعرف ان تم نقل اعضاء ل جسمه وزرع خلايا عصبية بدل الخلايا المولود بيها سرطان وكان بيها ضمور. ودة خلي توماس يعرف ان اللي عمل العملية دي اكيد جاك. بس مين اللي قتل جاك وقتلو ليه دة ما كانش لي تفسير عند توماس. وبص توماس ل سرطان وقال

انا هخرج دلوقتي وهبقي ارجع لك تاني 

وخرج توماس من اوضة الكشف وهنا قابلته مراته كاترين وقالت له

عرفت تم علاجة ازاي

توماس

تم نقل اعضاء من جسم سليم ل جسم سرطان والخلايا استجابت ل عملية النقل بمنتهي النجاح والجرح بيلم بطريقة طبيعية من غير اي تاثير سلبي علي سرطان

كاترين

ومين عمل عملية بالتعقيد دة

توماس

مافيش غيره جاك

كاترين

وازاي جاك وصل بالعلم في زمنا دة لعملية نقل اعضاء بالكفاءة دي

توماس بضيق

علشان عبقري ومجاش زيه في مجال الطب

كاترين

ما فيش حد عبقري اكتر منك

توماس بغل 

لا في جاك كان الاذكي في عالم الطب وانا دلوقتي لو بلغت الملك بنتيجة كشفي علي سرطان هيتم طردتي من منصب الطبيب الاول للمملكة

كاترين

اومال هتقوله اية لما يسالك عن سبب شفاء سرطان

توماس

هقول له ان تم علاجه بالسحر الاسود

كاترين

كدة بتحكم علي سرطان انه يعيش في المملكة طول عمره منبوذ

توماس

مش افضل ما اعيش انا مجرد طبيب بلا قيمة لان في الافضل منه

كاترين

الافضل منك كان جاك وخلاص جاك مات

توماس

الملك ألفريد مش هيرحمني لو عرف الحقيقية وخلاص دة قرار نهائي. سرطان اتعالج ب السحر الاسود ،،،،،،،،

ويتغير المشهد ونشوف سرطان حراس الملك مسلسلينو بالحديد الاسود وبيسحبو علي الارض ورايحين بي ناحية اسطبل الخيول ومزرعه الكلاب ورمو وسط الخيول وقال واحد من الحراس بعد ما تم فك قيوده

قدامك 7 سنين قبل ما يتم قطع راسك هتعيشهم وسط الحيونات لانك منبوذ بألامر المباشر من القاضي أنتوني. يعني هتاكل بواقي اكل الكلاب والخيول وتشرب من الاحواض المخصصة ل شربهم 

سرطان قام وقف بصعوبه ونفض هدومه من التراب والطين وقال

ولية اتحكم عليه الحكم دة انا برئ من دم عيلتي

الحارس

الامر بقي اكبر من جريمة قتل. في اللي استخدم السحر الاسود علشان علاجك

سرطان

يعني اية. ولو فعلا تم علاجي بالسحر الاسود لية انا بيتم عقابي ويتحكم عليه بالحياة وسط الحيونات ما تشوفو مين اللي عالجني وقتل عيلتي وقومو بالحكم عليه 

الحارس

دة حكم القاضي واحنا بنفذو وبس

سرطان

حكم ظالم من قاضي ظالم وملك بيعيش علي الظلم

الحارس

لولا انك طفل كان زماني قطعت راسك بعد تطاولك علي القاضي والملك 

وسابو الحراس ومشيو وسط الخيول والكلاب ومابقاش عارف سرطان المفروض يعمل اية وبص للخيول والكلاب اللي كانت هايجة وزي اي طفل لقي نفسه وسط الحيونات بدا الخوف يمتلك قلبه وقعد علي جنب يعيط،،،،،،،،

و بعد مرور 7 سنين وبقي فاضل 40 يوم قبل ما يتم سرطان 20 سنه ويتنفذ حكم القاضي بقطع راسه. كان في مملكة اسمها البحر الاعلي. كان بيحكم المملكة دي الملك قاسم ودة ملك من اصول عربيه عنده ابن مريض بالشلل وعلي خلاف مع الملك ألفريد. و عرف قاسم من وزيره يوسف حكاية سرطان فقال

يعني يا يوسف في علاج لمرض الشلل اللي ابني مولود بي

يوسف

في يا مولاي. وسرطان كان زي حاله ابنك وتم علاجه هما صحيح بيقولو ان العلاج تم بالسحر الاسود لكن الجواسيس بتوعنا في مملكة الفردوس اكدو لية ان مافيش اي سحر اسود في المملكة بعد قطع راس السحراء الخمسة

قاسم

اومال لية اتقال ان سرطان دة اتعالج بالسحر الاسود

يوسف

دة سؤال ملهوش اي اجابه عندنا لكن اللي اقدر اكده ليك ان سرطان اتعالج علي ايد طبيب عبقري والاغلب ان علاجه تم علي ايد جاك والده 

قاسم

وراح فين جاك دة

يوسف

مات مقتول في مجزرة عدي عليها سنين

قاسم

يوسف ادي الامر لجواسيسنا بخطف سرطان واحضاره للمملكة هنا قبل قطع راسه وبعد ما يجي هنا أمر الطبيب عثمان بالكشف عليه واكتشاف اسباب شفائة 

يوسف

بس دة ممكن يكون السبب في حرب بينا وبين مملكة الفردوس

قاسم بمكر 

دة لو احنا لينا علاقة بخطف سرطان

فهم يوسف. كلام الملك قاسم فابتسم وقال

امر مولاي 

ومشي يوسف من قصاد الملك قاسم،،،،،،

ويتغير المشهد ونروح للاسطبل المسجون في سرطان اللي بقي في لغة تواصل بينه وبين اي حصان او كلب موجود في الاسطبل وكان قاعد وسطهم بعد ما كل من اكلهم وشرب من ميتهم وقال

هتوحشوني لكن انا ما ينفعش افضل ساكت وانا عارف ان قريب هتنقطع راسي علشان ذنب انا ما عملتوش وعلشان كدة وصلت حكايتي ل ملك مملكة البحر الاعلي وهو علشان محتاجني قريب هيبعت اللي يخطفني. علشان اعالج ابنه المشلول. 

وضحك بخبث وقال

ويا ويل البشر مني. لان من النهاردة سرطان مش هيكون بني ادم هيكون وحش يحرق قلوبهم علي اغلي ما عندهم

وشم الهواء بطريقة مخيفة طريقة تشبه الحيونات مش البشر. وقال

شامم ريحتهم العرب اتحركو علشاني علشان سرطان

وبرق بطريقة مخيفة. وبدا يعوي زي الديابة ودة خلي كل الحيوناتنه خافو وبعدو عنه

وهو فضل واقف مكانه ثابت زي الصخر، ،،،،،،،،، 

سرطان وصل ازاي ل ملك العرب وعرف ازاي انه عنده ابن مشلول دة سؤال اجابته عندكم ولا عندي 

ح(3) 

ازاي سرطان عرف أن قاسم ملك مملكة البحر الاعلي عنده ابن مشلول تعالو اقول لكم،،،

ونرجع بالاحداث ل شهرين فاتو.  وقت ما كان اتنين من حراس الملك في اسطبل الخيل المسجون في سرطان و الحارسين دول مكلفين 

ب انهم يجيبو الاكل للاحصنه والكلاب الموجودين في الاسطبل 

و كانو واقفين مع بعض وداير بينهم الحوار دة وما يعرفوش ان سرطان بيسمعهم  والحارس الاول ديفيد بيقول للحارس التاني  جارسيا

ما افتكرش ان هيبقي في حرب بينا وبين مملكة البحر الاعلي علي الاقل السنة دي

جارسيا

لية بتقول كدة كنت يا صعلوك قاعد في البلاط الملكي وحاضر اجتماع الملك مع وزيره

ديفيد كان بيفضي الاكل قصاد الاحصنه وقت ما كان بيقول

انا مش صلعوك زيك يا جرسيا  انا ابقي اخو الجاسوس الاكبر في مملكة البحر الاعلي. البطل صيرا وصيرا كان في زيارة لينا من كام يوم وقال  ان الملك قاسم دلوقتي ما بيفكرش في اي شئ الا الوصول ل علاج ابنه المشلول. وما عندوش اي استعداد للدخول في اي حرب معانا 

جرسيا

صيرا بطل. حرامي البهائم خليتو بطل 

ديفيد بعصبية 

جرسيا من الافضل ليك السكوت والا قتلتك وجعلت من عظامك طعام للكلاب الجائعة

وهنا يلاحظ ديفيد تركيز سرطان معاهم فقال له بعصبية

انت بتعمل اية عندك. يا منبوذ تعالي خد العظام دة وحطها قدام الكلاب. وبلاش تشيل ليك اللي اكتر من اللي جسمك محتاجة

سرطان بص له وهو ساكت وشال العظم وقال جارسيا  بسخرية

حرام عليك ديفيد تتهمه بانه بياكل اكل الكلاب.  دة هو نفسه اصبح مجرد هيكل عظمي

بص سرطان ل جسمه النحيف وابتسم من القهر وقال لنفسه 

سخريتكم مني هتتحول في يوم من الايام ل نار تحرق افراحكم ،،،،،

سرطان 

اقتباس و تاليف

محمد منصور 

**منص**

وقبل ما نبدأ نوحد الله ونصلي علي خير خلق الله سيدنا محمد.

وجه الليل علي سرطان اللي كان قاعد وسط الكلاب وماسك عصايا و بيحفر بيها في الرمله و بيخطط ازاي يقدر يستغل المعلومة اللي عرفها من الحراس وكان في كلب جنب منه بيبص له وهو عمال يرسم علي الارض فبص سرطان للكلب وقال

عايز تفهم انا بعمل اية. هقول لك مع اني عارف انك مش هتفهمني بس انا ماليش غيركم هنا اتكلم مع. انا كلام في سرك ناوي اهرب من السجن دة 

الكلب بص له باستغراب شديد فقال سرطان

فاكرني مجنون مش كدة. ومعاك حق لاني ما اقدرش اهرب من هنا من غير  مساعدة وعلشان كدة انا بخطط لان اللي يساعدني من الهروب من هنا هو ملك البحر الاعلي. بتسال يهربني ليه.   علشان اعالج ابنه المشلول  بس ازاي بقي هقول لك. في جحر قريب مننا هنا في افاعي سامة وسط الجبال. لو قدرت اصطاد افعي. هقدر اخلي الحارس ديفيد يهربني

وقام سرطان وقف وقال للكلب

تعالي معايا

وراح هو والكلب ناحية جحر الافاعي وبدا يغرق الجحر بالمية ودة خلي افعي سامة تخرج من الجحر وقد يمسكها بطريقة تمنع الافعي من لدغه وراح بالافعي ناحية مهر صغير لسة مولود وهو ماسك راسها وقال للحصان

ما ذنبكش حاجة في اللي يحصل لك بسببي لكني محتاجك تموت علشان اعيش انا

وقرب من رقبه المهر وساب راس الافعي اللي بحركة لا ارادية لدغت رقبه المهر اكتر من لدغه وبدا المهر يهيج ويرفس بسبب الوجع. وبعدها بكام دقيقة رقبته بدات تتورم وبدا السم يتمكن منه و جاله ضيق في التنفس ومات  المهر بعدها بكام ساعة وبعد ما مات راح سرطان ناحيته وكان في ايدة اله حادة صنعها بنفسه وخلاها تشبه انياب الكلب وبدا يغرز الاله دي في رقبه الحصان وبقي اللي يشوف رقبه الحصان يقول انه مات بسبب عضه كلب. مش لدغه افعي ودة اللي كان بيخطط له سرطان واستني رجوع الحارسين ديفيد و جارسيا وكان مجوع كلب شرس واول ما قرب ديفيد بالعظم همس سرطان في ودن الكلب بلغة وكانه الكلب فهمها وهجم الكلب علي ديفيد وعضة من رقبته و ذراعه وما قدرش يتخلص ديفيد منه الا لما جارسيا غرز سيفه في بطن الكلب و توجع الكلب وبص ل سرطان بصة معناها اني موت بسببك لكن سرطان قرب من ديفيد اللي كان بيقول ل جارسيا.

لية الكلب دة هجم عليه بالوحشية دي 

هنا سرطان وقف قصاد منه وقال بخبث 

مش اول مرة يعملها. عملها من المهر ومات 

وشاور سرطان ناحية اسطبل الخيول وراح ديفيد وهو حاطط ايدة علي رقبته اللي بتجيب دم ومع جارسيا ناحية الاسطبل ووراء منهم كان ماشي سرطان وشافو المهر الميت فقال جارسيا

وانت كنت فين لما الكلب عمل كدة في المهر

سرطان

كنت نايم ومن شدة التعب ما سمعتش اي صوت.

ديفيد

وازاي العضة موتت المهر

سرطان

اصلها عضه كلب مسعور. واسف سيدي الحارس دة هيكون مصيرك لو انا مالحقتش اعالجك

ديفيد

منبوذ زيك يعالجني انا هروح ل توماس طبيب المملكة

سرطان ابتسم بخبث وقال

جرحك ملوث و معدي  

و هيأمر الحراس برميك في قفص السباع علاجك موجود في بيت والدي الطبيب جاك وانا المفروض اني اكون طبيب لان تعلمت الكتير من والدي لكني في حاجة ل اوراقه الموجودة في البيت

ديفيد

هروح اجيبها ليك

سرطان

سيدي الحارس لو حد شاف عضة الكلب وشكل الجرح مش هتعرف ترجع تاني انت قدامك ساعات وتموت لازم سيدي الحارس جارسيا هو اللي يروح البيت ويجيب الاوراق اللي هناك علشان يتم علاجك باسرع وقت

ديفيد بص ل جارسيا وقال

جارسيا اتوسل اليك اذهب 

ل بيت الدكتور جاك و احضر اي اوراق هناك وبلاش حد يعرف باللي حصل هنا 

جارسيا

واية هو المقابل لهذة الخدمة

ديفيد

500 قطعه ذهب من حصتي

جارسيا

حياتك تساوي 500 بس

ديفيد

1000 قطعه ذهب

جارسيا بطمع

موافق

وركب حصانه وانطلق باقصي سرعه، ،،،،،،،،

و بعدها بساعتين رجع جارسيا ومع كل الاوراق اللي كانت موجوده في بيت الطبيب جاك و ادي الاوراق دي ل سرطان اللي بدا يبص في الاوراق ويعرف ادق اسرار علم التشريح والطب وازاي قدر جاك يخلي من طفل مشلول ل شاب قوي لكن سرطان مسك ورقة وقال ل ديفيد

وجد طريقة علاجك

الورقة ما كنش فيها اي حاجة تخص عضه الكلاب المسعورة لكن سرطان كان بيخطط للي هو ابعد من كدة و قال ديفيد بفرحة

يعني هعيش

سرطان

هتعيش

جارسيا 

لغاية ما يتم علاجك ديفيد انا هقوم بتفريغ الطعام في اسطبل الخيول علشان الوقت اصبح ضدنا 

و فعلا مشي جارسيا وبدا سرطان يعالج ديفيد وبعد تنظيف الجرح ولفه بقطع قماش من ملابس ديفيد قال سرطان

كدة معاك يومين قبل نهاية حياتك

ديفيد اترعب وقال

لية بس مش الاوراق فيها علاجي

سرطان

فيها علاجك لكن مافيهاش الثمن. ل علاجك

ديفيد

مش فاهم

سرطان بصوت واطي وهو بيبص علي جارسيا وبيتاكد انه مش سامعو 

حياة قصاد حياة

ديفيد

فهمني اكتر

سرطان

هروبي من هنا ثمن المصل اللي هركبو ليك وبي تعيش من غير اي قلق من عدوي سعار الكلب.

ديفيد قال بصوت واطي وكان باصص هو كمان علي جارسيا

انا ما قدرش اهربك دي فيها قطع رقبتي

سرطان

ومين قال انك انت اللي هتهربني.

ديفيد

اومال مين

سرطان

ملك البحر الاعلي.

ديفيد

الملك قاسم يهربك انت طيب ازاي ولية 

سرطان

مش بتاعتك عرفو بس اني انا مسجون هنا واني ابن الطبيب جاك وكنت مشلول زي ابنه وعندي العلاج

ديفيد

ازاي انا اقدر اعمل دة كله

سرطان

بلغ صيرا الجاسوس اخوك وهو يوصلها لجواسيس الملك قاسم هنا في المملكة 

ديفيد 

و تفتكر ان صيرا يعرف جواسيس المملكة هنا اكيد كان بلغ عنهم الملك ألفريد 

سرطان ابتسم وقال

مافيش جاسوس بيبلغ عن جاسوس علشان توصل المعلومات غلط عن طريق الجواسيس اللي المملكة عرفاهم

ديفيد

انت ازاي عرفت الكلام دة

سرطان

لاني لو مكان الملك مش هقبض علي الجواسيس اللي انا عرفتهم علشان استغلهم في وصول معلومات كاذبة للعدو زي ما الملك قاسم عارف ان صيرا جاسوس في مملكته ورغم كدة هتلاقي سايبو. بلغ صيرا ان علاج ابن الملك قاسم عندي ومالكش دعوي بالباقي لان الملك قاسم هيتصرف.  ولو ما عملتش كدة انسي المصل وجهز نفسك لنهاية حكايتك،،

و بلغ صيرا جواسيس الملك قاسم بحكاية سرطان واتحرك جواسيس الملك قاسم في الليل علشان يتم تهريب سرطان وفعلا هربو سرطان. وقبل ما يخرجو بي  من المملكة حراس الملك ألفريد شافوهم واتحركو ناحيتهم. وهما فوق الاحصنه بتاعتهم. وكانت هتبدا حرب بينهم قبل ما سرطان يقف علي رجله  وبص في عيون احصنه حراس الملك ألفريد وقال،،،

ايوة يا بابا. جاي اهو. لغاية ما اروح اشوف بابا عايز اية اللي يعرف سرطان قال اية ل احصنه الحراس يقولي 

ح (4)

بص سرطان للاحصنه وقال

هيجان

ونزل علي ركبه وخد وضع السجود وفضل ساند علي ركبه ورفع ايديه الاثنين 

ل فوق وعمل صوت صهيل الاحصنه بصوت عالي ودة خلي الاحصنه كلها تقف مرة واحدة علي رجليها اللي وراء في حركة مفاجئة ووقعو  الحراس من فوق ظهورهم. ابتسم سرطان. بخبث وقام وقف علي رجله وقال لجواسيس الملك قاسم

الخطر زال ونقدر نتحرك دلوقتي

بصو له باستغراب شديد. وانطلقو ناحية مملكة البحر الاعلي، ،،،

سرطان 

اقتباس و تاليف

محمد منصور 

**منص**

وقبل ما نبدأ نوحد الله ونصلي علي خير خلق الله سيدنا محمد.

ونروح ل قصر الملك ألفريد اللي كان واقف قصاد منه حراس الحدود واللي قدر سرطان يهرب منهم. وكان علي راس الحراس دول  قائدهم لويس اللي كان باصص له الملك ألفريد وبيقوله بمنتهي العصبية 

هرب. جه الوقت علي مملكتي ان سجين محكوم عليه ب قطع راسه بالهرب قبل تنفيذ الحكم بأ يام 

لويس

سرطان دة شيطان يا مولاي و بكلمة واحدة وحركة ما فهمناش يقصد بيها اية. الاحصنه تمردوا علي الحراس ورفضو انهم يكونو فوق ظهورهم

ألفريد

دة كلامه يقوله قائد حراس مملكتي. دة كلام مجانين 

لويس

يا مولاي انا شوفت دة بعينيه لاني كنت علي رأس فرقة المطاردة 

ألفريد

يعني اية السحر الاسود رجع تاني مملكتي و سرطان المنبوذ بيخدمو الجن

لويس

مش بعيد يا مولاي دة كان مشلول ورجع يمشي من تاني 

ألفريد

وما قدرش تعرف مين اللي خطفو سرطان

لويس

كانو ملثمين يا مولاي. وبمساعدة سرطان ليهم أوكد لك انه مش مخطوف دة هو اللي خطط ل هروبه من المملكة بمساعدة الملثمين دول 

ألفريد قال  بصيغة الامر المباشر والتهديد الصريح

لويس.   لو ما عرفتش مين وراء اللي حصل دة. قبل الميعاد المحدد ل قطع راس سرطان.  هتكون راسك هي المقطوعه في اليوم دة ،،،،،،،،

ونروح ل قصر الملك قاسم اللي كان واقف سرطان قصاد منه و بيقول قاسم

انت بقي سرطان صاحب المعجزة الطبيه

سرطان

انا يا مولاي

قاسم

انت عارف انك مدين ليا بحياتك

سرطان

عارف.  واعرف كمان ان بايدية دول اقدر اكون السبب في شفاء ابنك

وبص سرطان ل ايدية. فقال قاسم

انت طبيب

سرطان

رسميا انا لاشئ. لكن انا الوريث الشرعي والوحيد 

ل الطبيب جاك العبقري اللي العالم كله ما كانش يمتلك طبيب زيه

كان وزير المملكة يوسف واقف وقال

لغة الغرور دي ما ينفعش تتكلم بيها مع الملك قاسم

بص سرطان ل يوسف وقال

في فرق كبير بين الغرور والثقة في النفس. وانا واثق في نفسي. ومعايا الشفاء 

ل ابن الملك 

يوسف

المملكة فيها طبيب وهو يقدر يعالج ابن مولاي

سرطان

لو يقدر يعالجه ما كنتش انا بقيت هنا

قاسم

هو هيكشف عليك ويقدر يحدد ازاي انت خفيت ويبدا علاج ابني بالطريقة اللي تم بيها علاجك

سرطان 

اسف يا مولاي بس دي قدرات والطبيب عندك مش هيقدر يعرف انا خفيت ازاي ولو قدر. يعرف مش هيقدر يقوم بالعملية اللي اتعملت ليا علشان اقف علي رجلي من تاني. والعملية دي انا عرفت كل اسرارها من اوراق والدي الطبيب جاك.

يوسف

وفين الاوراق دي

شاور سرطان علي مخه وقال

هنا

بس يوسف للملك قاسم اللي قال

هات الطبيب. كاهل يكشف عليه وهو اللي يحدد الخطوة الجاية تكون اية،،،،،،

وتم الكشف علي سرطان.  وكاهل راح للملك قاسم وقال

تم شفائة بعد اجراء عدة عمليات معقدة ونقل اعضاء وزرع خلايا عصبية باتقان شديد

قاسم

يعني تقدر تعمل عملية زيها ل ابني

كاهل

شفاء ابنك يا مولاي هيعتمد علي موت الغير. ودة ضد قوانين المملكة

قاسم بحدة

الي الجحيم قوانين المملكة انا عايز ابني الوحيد

و خليفتي في الحكم يكون زي سرطان ساعدني يا طبيب 

كاهل

مستحيل يا مولاي اساعدك في علاج ابنك بموت الغير.

قاسم ندهه باعلي صوته وقال

يا حراس

دخلو الحراس بص قاسم للطبيب كاهل وقال

اقبضو علي الطبيب كاهل بتهمة عصيان امر ملكي

وتم القبض علي كاهل اللي قال

دة ظلم يا مولاي

قاسم

عين الظلم اني اعرف ان في علاج ل ابني و ارفض السعي في دة. علشان خاطر القوانين.

وقال للحراس باعلي صوت عنده

خدو من قدامي

وهنا يوسف قال

مولاي اهدئة

بص له قاسم وقال

هات سرطان

يوسف

بتفكر في اية يا مولاي

قاسم بنفس الحدة

أمرتك باحضار سرطان.

وفعلا خرج يوسف ورجع ومع سرطان وبص قاسم ل سرطان وقال

هتحتاج اية علشان العملية

يوسف

مولاي سرطان دة مش طبيب ازاي تخلي يعمل عمليه ل ابنك الوحيد

سرطان بخبث

الوزير يوسف خايف علي ابن الملك مني ولا خايف من شفاء ابن الملك علي ايدي

يوسف سحب سيفه من جرابه وحط السيف علي رقبه سرطان وقال

انت يا صعلوك بتتهمني بالخيانه ل مولاي

قاسم

يوسف رجع سيفك مكانه

يوسف بص للملك وقال

مولاي دة بيحاول الايقاع بيني وبينك

قاسم مسك سيف يوسف وقدر يبعده عن رقبه سرطان وقال

بدل محاوله قطع راس سرطان جاوب علي السؤال.

وبص قاسم في عيون يوسف وقال

خايف علي ابني. ولا خايف ان يتم شفائة ويصبح من بعدي الملك وتتحول احلامك في الحكم الي سراب

يوسف رجع سيفه ل جرابه وقال

مولاي بيشك فيا

قاسم

جاوب علي السؤال

يوسف

ما عنديش اجابه الا التنحي عن خدمتك يا مولاي وافساح الطريق لما هو اوفي مني

وخرج يوسف والملك قاسم بص عليه وهنا سرطان قال بلهجة الشيطان

ادائه ل دور المظلوم خلاني اصدق ان هو الظالم

قاسم بص ل سرطان وقال

يوسف امره انتهي. ركز في احتياجاتك. ل نجاح عمليه ابني

سرطان

هحتاج اربع اقوياء من المملكة في نفس سن ابنك

قاسم

افضل الفرسان يكونو عندك

سرطان بخبث

ولما نقضي علي افضل الفرسان مين يكون في حماية مولاي. الافضل احضار اربعه اقوياء من فقراء المملكة. اللي موتهم ما يكونش السبب في صراع يصيب مولاي بالصداع

قاسم

فهمتك

وقال باعلي صوته

يا حراس

جم الحراس بص لهم وقال

انزلو ارض الفلاحين واحضرو اربع شباب اقوياء. يكونو من الفقراء

وخرجو الحراس لتنفيذ الامر وبعدها قال سرطان للملك

تسمح لي يا مولاي بالخروج من القصر ل احضار معدات هستخدمها في العمليه

قاسم

هرسل معاك اللي يدلك علي الطريق

سرطان

اكون شاكر ليك يا مولاي،،،،

ويتغير المشهد ونشوف الحراس وهما بيسحبو اربع شباب اقوياء قصاد اهاليهم وبالقوة وهنا ظهر سرطان وسط الفلاحين وهو ملثم  وقال

الملك قرر علاج ابنه بموت عيالكم.  يا ويلكم لو رضيتو 

وابتسم سرطان واهالي الفلاحين بيضربو في الحراس والحراس بيضربو فيهم وكانت مجزرة. واتحرك سرطان ناحية القصر وهو سايب وراء منه بحر من الدم لكن هنا شاف يوسف قصاد منه بص له وابتسم ويوسف كمان ابتسم وقال سرطان

مبروك عليك الحكم.،،،،،

وسابو ومشي وعدي علي اسطبل خيول وقف قصاد منهم وبص لهم في عيونهم وقال

هيجان

وفتح لهم الابواب والخيول خرجت من الاسطبل وبدات تدوس وترفس اي حد قصاد منها.،،،،،،،،

اية علاقة يوسف ب سرطان واية اللي جاي 

ح(5)

تعالو نجاوب علي سؤال عارف انه محيركم وهو اية علاقة يوسف ب سرطان ولية سرطان قال له

مبروك عليك الحكم.

انا النهاردة جاي اقول لكم ومش ناوي اخبي عليكم اللي حصل قبل ما الطبيب كاهل يكشف علي سرطان اللي كان في اوضة جوة القصر وطلب مقابلة الوزير يوسف في وقت متاخر من الليل وراح له يوسف ووقف قصاد منه وقال

الحراس قالو لي انك عايزني

سرطان

اقفل الباب وقرب مني خليني اقول لك انا طلبتك لية

قفل يوسف الباب ودخل وقعد قصاد سرطان وقال

اديني قفلت الباب قول اللي عندك

سرطان

جاي لك بعرض ما يترفضش

يوسف بابتسامة سخرية

عرض منك انت

سرطان

انا صحيح لا شئ لكن اقدر اخليك الملك

يوسف برق له وماكنش مصدق اللي هو قالو، ،،،،،،

سرطان 

اقتباس و تاليف

محمد منصور 

**منص**

وقبل ما نبدأ نوحد الله ونصلي علي خير خلق الله سيدنا محمد.

سرطان بص ل يوسف اللي كان مبرق. ومش مستوعب اللي اتقال. و هنا قال سرطان

هتفضل باصص لي كدة كتير وساكت

يوسف قام وقف وقال

انت عيونك فيهم شر مخيف وانا مستحيل اسمع لك

سرطان كان لسة قاعد وقت ما مسك ايد يوسف وبص في الارض وقال

بلاش اكلمك وعيوني في عيونك لكن هكلمك وانا باصص في الارض يا ملك مملكة البحر الاعلي

الجملة رنيت في ودان يوسف اللي بص ل سرطان اللي لسة باصص في الارض وقال

ماهو انت ما ينفعش يكون جزاك بعد كل اللي عملتو للمملكة ان ابن الملك المشلول يخف ويكون خليفته. المملكة عايزا فارس زي مولاي يوسف

وهنا رفع سرطان عيونه في عيون يوسف وقال يوسف

وازاي هبقي الملك والطبيب كاهل مع شروق الشمس هيكشف عليك ويعرف انت خفيت ازاي واكيد هيعالج ابن الملك قاسم

سرطان

انا علشان اخف من الشلل والدي الطبيب جاك قتل اخواتي و نقل اعضائهم ل جسمي. لانه مجرم مش طبيب. تفتكر ان الطبيب كاهل ممكن يكون زي والدي ويقبل بانه يعالج ابن الملك ب موت اربع شباب من سنه

يوسف

كاهل مستحيل يعمل كدة

سرطان

يبقي خطتي هتتنفذ بسهوله

يوسف

خطة اية

سرطان

الخلاص من الملك قاسم 

يوسف

وانت لية عايز تخلص من الملك قاسم

سرطان

علشان انا عارف ان بعد ما اكون السبب في علاج ابنه هو هيخلص عليه او يرجعني تاني للملك ألفريد يقطع راسي

يوسف

وهو لية يعمل كدة

سرطان

علشان يضمن ان سر علاج ابنه مات معايا ما هو ابنه هيتعالج ب موت الغير

يوسف

يعني انت مش هتعالج ابنه وفي نفس الوقت تخلص منه

سرطان

وتكون انت الملك الجديد بعد موته

يوسف

وانت ازاي هتعمل كل دة

سرطان

هقول لك بس اهم خطوة في الخطة خناقة بيني وبينك تتم قصاد الملك قاسم وسيب الباقي عليا، ،،،،،،،،

ونرجع بقي لما بعد المجزرة اللي حصلت بين الحراس والفلاحين وسرطان بيجري باقصي سرعته ناحية القصر الملكي ودخل القصر وهو بينهج ووصل للملك قاسم ووقف قصاد منه وقال

الحق يا مولاي. مصيبة

قاسم

في اية

سرطان وهو لسة بينهج

الوزير يوسف قدر يوقع بين الحراس والفلاحين وعرفهم انت بتخطف اربعه من اولادهم لية

وقف الملك قاسم وهو غضبان وقال 

الخاين الملعون. لازم يموت

سرطان

لو مات وسط الفلاحين هيكون بطل وسبب مجازر كتير بين الحراس والفلاحين اطلبه يجي هنا وخلص عليه من غير ما اي حد يعرف

قاسم

مظبوط

وندهه قاسم علي الحراس وجم وبص لهم وقال

ابعتو للوزير يوسف وعرفو اني عايز اشوفو،،،،،،،،

و جه يوسف ووقف قصاد الملك قاسم وقال قاسم

المملكة دي احنا خلانها تكبر علي مدار 20 سنه. وكنت طول الوقت جنبي 

يوسف

وعلشان كدة شكيت فيا واتهمتني بالخيانه

قاسم

ما انت فعلا خاين يا يوسف ومش عايز ابني يخف

يوسف

يخف ويبقي الملك بعدك مش كدة

قاسم

مش دة قانون المملكة الخلافة

يوسف

الخلافة بتم لكل ما هو عاقل و غير مريض. انما ابنك مشلول ازاي يكون ملك

قاسم

اومال مين اللي ينفع يكون ملك. انت مش كدة

يوسف

انا الافضل والاحق بحكم المملكة

قاسم

عايز تكون الملك خد الحكم بالسيف

وطلع قاسم سيفه من جرابه يوسف بص له وقال

لك ما طلبت

وطلع هو كمان سيفه وبدات بينهم مبارزة دامت ل 1/4 ساعة كاملة انتهت بموت قاسم علي ايد يوسف وهنا دخل سرطان من باب خلفي بص له يوسف وقال

نجح المخطط بتاعك يا سرطان وبقيت الملك

سرطان بخبث

انا اخون مولاي قاسم

يوسف استغرب وقال

مش دة كان المخطط بتاعك الخلاص من الملك قاسم علشان اكون انا الملك الجديد

سرطان

هو انا قولت كدة

يوسف

ايوة دة كان اتفاق وعهد بيني وبينك

سرطان

سرطان مايعرفش اي عهد مع عبيد السلطة

وطلع سرطان خنجر من هدومه ورمي الخنجر ناحية يوسف جه الخنجر في رقبه يوسف ووقع علي الارض جثة ودمه اختلط بدم الملك قاسم. وبدا سرطان يشم ريحة الدم بفرحه شديدة ووقف وسط دمهم وبص لجثثهم وقال

انا ما اتظلمتش بسببكم لكن ثمن نومي وسط الحيونات هيدفعو بني جنسكم يا ولاد ادم.  

ورجع يشم ريحة الدم تاني وخرج من نفس الباب اللي هو دخل منه لكنه خرج بصندوق مليان الماظ وذهب الملك قاسم وركب حصان عربي اصيل اسمه برق همس في ودن برق اللي جري باقصي سرعه وسط شوارع  المملكة اللي كان فيها خراب ودمار وحرب لسة دايرة بين الحراس والفلاحين. وراح قعد في اسطبل الخيل اللي كان فاضي وركن علي جنب وفضل يعيط بحرقه ويترعش ووقع علي الارض والرعشة مستمرة واستمرت ل دقيقة وبعدها انتهت اتعدل وخد نفس عميق وقال

جه وقت الرجوع لمملكة الفردوس. وبداية العذاب 

ل سكان المملكة 

وبص ل جسمو وقال

جاهزين يا اخواتي ناخد بتارنا من اللي خلانا نعيش وسط الحيونات

هنا حصلت حاجة غريبة جدا ان جه الرد من جسمو بكذا صوت. بالتحديد باربع اصوات.   ودي اصوات اخواته اللي كلهم قالو

جاهزين.

وبص ل فوق وصرخ باعلي صوته وخرج من جسمه اربع شبه بعض في صوره اطياف. وكأن ارواح اخواته بقو مسجونين جوة منه.و اخواته الاربعة صرخو  ورجعو تاني جوة جسمه ،،،،،

ومع شروق الشمس يوصل سرطان لمملكة الفرودس المملكة اللي بيحكمها الملك ألفريد وكان متنكر في زي تاجر عربي صانع للعطور وسمي نفسه.  غدير. ودخل المملكة واشتري بيت و دكان كبير بدا يصنع في العطور. ومن هنا بدات الحكاية.،،،،،،

خلصت الحلقة لكن ماخلصتش الحكاية. وللناس اللي بتقراء وما تعلقش شكرا علي انك ما بتفكرش تقدر تعبي ولو بكلمة. اللي تعجبه الحلقة يسيب تعليق ولو في حرف بس علشان القصة توصل ل غيرك. سلام

لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم 

جميع الروايات كامله من هنا 👇 ❤️ 👇 

روايات كامله وحصريه

اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇 

روايات كامله وحديثه

❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺