رواية زهرة البيت الفصل الاول بقلم روان الشبلاق حصريه وجديده
رواية زهرة البيت الفصل الاول بقلم روان الشبلاق حصريه وجديده
ام احمد. روعة روحي ساعدي مرت اخوكي بالمطبخ عم تحط فطور للشباب اللي عم يشتغلو
روعة. والله اللي بشوفكن يا امي عم تعمرو هالطابق التاني بقول مافي حرب بهالبلد ومافي بيوت كل يوم عم تنهدم
ام احمد. لك يا بنتي البيت صغير واخوانك بدهم يتزوجو هيك كل واحد بيسكن بشقة
لأن اذا بدنا نستنى الحرب لتخلص بحياتا ما بتخلص
روعة. طيب انا رايحة ع المطبخ ساعد حنان
ام احمد. اي وانا رايحة اخد موعد من جماعة بقولو عندهن بنات للخطبة
مشان نروح عليهن بكرا
روعة. اي ان شاء الله خير
في المطبخ
روعة. الله يعطيكي العافية يا احلى مرت اخ
حنان. يعافي قلبك
روعة. بشو ساعدك
حنان. لا خلصت تعي خلينا نطلع الاكل للشغيلة
روعة. انا وانتي !!
حنان. اي مافي مافي الا زلم تنين كبار بالعمر
الحقيني بالخبز والشاي يلا
روعة. اي يلا
طلعنا ع السطح وطالعنا الاكل
نزلت حنان وانا كنت نازلة
ناداني واحد من الزلم لتنين.. ياعمي اغلبك
روعة. تفضل
ابو وسام. معليش تجيبيلي كاسة مي
روعة. اي اكيد هلأ كنت نازلة جيب المي
طالعت مي ع السطع واعطيتو ياها
ابو وسام. انتي بنتو ل ابو احمد
روعة. اي بنتو
ابو وسام. ماشاء الله عليكي .. كم عمرك
روعة. 26 سنة .. يلا عن اذنك لازم روح
نزلت وعملت قهوة الي ولحنان
وقعدنا نشربها بغرفة حنان
روعة. معقول تزبط العروس اللي بدها تشوفها امي بكرا
حنان. ياريت ان شاء الله
روعة. بس انتي ليش مابدك تسكني بالشقة الجديدة ليش حابة تبقي معنا هون
حنان. مو فارقة معي المهم كون مرتاحة
وبصراحة اخوكي ماعم يشيل فكرة السفر من راسو
عم يقول بدنا نطلع ع الاردن بس عم يستنا حتى امك تزوج اخوانك لأنو بدو ياكن تروحو معنا انتي وامك وابوكي
روعة. يعني مافقد الأمل لأن امي مستحيل توافق
حنان. وقت الجد بيقنعها
روعة. الله يختارلنا الخير .. بس ليش ع الاردن ليش مو ع الكويت لعند اخي ابراهيم
حنان. والله مابعرف
روعة. انتي حابة تسافري
حنان. بس مشان الأولاد كتير عم خاف عليهم واهكل همهم وهني بالمدرسة
روعة. اي معك حق الله يفرجها
حنان. امين يارب
روعة. لك هاد الزلما اللي عم يشتغل عنا وقف معي وسألني عن عمري .. ليش شو بكون بدو
وسألني انو انا بنتو لأبو احمد
حنان. بتكوني عجبتيه وبدو يتزوجك هههههه
روعة. ههههه الله ياخدك لك هاد اكبر من ابي
حنان. اي مزالك معندة وماعم تقبلي تتزوجي بكرا مابقى يجيكي الا بعمرو
روعة. انا ماكنت متخيلة اني اترك دراستي واقعد بالبيت لا شغلة ولا عملة
ومجرد ما اتخيل اني اتزوج وابعد عن امي بشيل الفكرة كلا من راسي
حنان. لك لأيمتى يعني اذا امك حابة تفرح فيكي وكلنا كمان مو بس هيي
روعة. ليش اجا الشخص المناسب وانا قلت لا
حنان. ليش من شو بيشكو اللي عم يتقدمولك
روعة. ولا من شي بس حتى يصير نصيب .. قولي انك حابة تخلصي مني
حنان. بالعكس والله رح يفضى البيت لك كبرنا سوا انا وياكي وتعودنا ع بعض كيف رح يجي يوم
ونفترق
روعة. اي والله خلص بطلت اتزوج هههههه
حنان. هههههه
بالليل كانت سهرانة روعة هي واهلها
ابو احمد. روعة اعطيني كاسة المي والدوا من جنبك خليني اخدهن
روعة. اي تفضل بابا
ابو احمد. يسلم هالديات يابنتي
روعة. وايديك بابا
ابو احمد. تذكرت شغلة ، اليوم الزلما اللي بيشتغل عنا اللي اسمو ابو وسام حكا معي بخصوصك يا روعة
اتفاجأت روعة واتطلعت بحنان وضحكو التنتين
روعة في نفسها العمى والله طلع حكي حنان صحيح هاد الزلما معقول بدو يطلب ايدي
ابو احمد. شو ليش عم تضحكي .. شو رأيك الزلما حابب يجي ويطلب ايدك لأبنو
شو قلو ؟
روعة. لأبنو ؟
ابو احمد. اي لكن الو قال انو ابنو عمرو 27 سنة .. شو رأيك
روعة ضحكت واتطلعت بحنان وقالت مابعرف
ابو احمد. رح قلو يجي يوم الخميس وبنتعرف عليهم واذا كان الشب مناسب ليش لأ
روعة. اي متل مابدك
دخلت روعة ع غرفتها ولحقتها حنان
حنان. والله بتكوني مجنونة اذا رفضتي هي الشب عمرو مناسب يعني اكبر منك كل مرة بتكون حجتك انو بكون العريس اصغر منك
روعة. اي طولي بالك لسا ما شفتو
حنان. الله اعلم شو العلة اللي رح تطالعيها فيه
روعة. ههههههه والله اذا كان مناسب رح وافق
حنان. اي ان شاء الله
في بيت ابو وسام
وسام. شو الشي اللي بدك تقلي ياه
ابو وسام. اليوم شفت بنت الزلما اللي بشتغل عندو بنت حلوة ومأدبة
حكيت مع ابوها اذا وافقو بنروح وبنشوفها
وسام. هيك بهالسرعة ليش انت بتعرفهن للجماعة
ابو وسام. اي بعرفهن البنت وحيدة لأهلها عندها اربع اخوة شباب
وابوها معو مصاري مابتاكلها النيران وعندو اراضي ومزارع وهي دارسة ومتعلمة
بس في مشكلة صغيرة
وسام. شو هيا
ابو وسام. انو البنت اكبر منك بسنة
وسام. اها .. اي !!
ابو وسام. شو اي .. اذا وافقو رح تتزوجها
وسام. لا مابدي قال اكبر مني
ابو وسام. لا تجن عم قلك ابوها عندو املاك وهي البنت الوحيدة عندو
بتتزوجها يعني واذا اكبر منك شو بصير
فكر منيح عاجبيتك حياتنا هيك بالفقر وانت قاعد لا شغلة ولا عملة
ع الاقل ابوها بدبرلك شغل بالكويت عند ابنو وهي بيطلعلها ورثة من اهلها بتعيشك احسن عيشة
وسام. مابدي
ابو وسام. مشان العمر يعني
وسام. هيك شي
ابو وسام. اي اتطمن مارح ترفضك لأنو قلت لأبوها انو عمرك 27 يعني اكبر منها بسنة
ع الاقل بنخبي الحقيقة لحتى تتزوجو
وسام. كمااان .. مابدي انسى الموضوع فوق مابدك ياني ادخل ع طمعة مكزب بعمري
ابو وسام. والله مشانك روح شوف عيشتهم لك الحرب مو مأثرة عليهم بشي لك العالم عم بتهرب من بيوتها وهني عم يعمرو بيوت وبيعرفو انو طيارة رايحة وصاروخ جايي ورغم هيك مو فارقة معهم
وسام. والله مابعرف انسى انو معهم مصاري بس يعني ماعم تزبط معي انو اكبر مني
ابو وسام. لك مو مبين عليها انت بس تشوفها بتغير رأيك عأساس انت لقيت غيرها واحسن منها وقلنا لا
مين بدها تقبل فيك وانت واسمك مابتعرف تكتبو
شو قلت ؟
وسام. اي بس اذا زبطت وصار نصيب مابتقولو قدام الناس انها اكبر مني
ابو وسام. ماشي
يوم الخميس كان الموعد وروعة جهزت حالها لأن وسام واهلو بدهن يجو يشوفوها
في بيت وسام
ابو وسام. خلصنا اتأخرنا ع الجماعة
وسام. في شغلة بدنا نتفق عليها قبل مانروح
ابو وسام. شو الشغلة
وسام. انا مع مرتك مارح اسكن رح بستأجر بيت لوحدي وبسكن فيه
ابو وسام. وطي صوتك .. هي اللي عم تقول عنها مرتي هيي اللي ربتك انت واخوك بعد ما ماتت امك
ورغم المنيح اللي عملتو معكم عم تحكي عليها
وسام. انا ماعم قول انها مو منيحة بس مابدي يصير مشاكل شوف اخي وسيم من لما تزوج كل يوم عم يصير مشكلة بهالبيت
ابو وسام. الحق ع مرت اخوك هي مو منيحة وكمان لا تنسى اخوك اصغر منك وتزوج قبلك كان صغير لهيك كان يصير مشاكل بس هلأ بعد ماتتزوج انت بتتغير حياتنا
ولا تقول هالحكي قدام امك بتبطل تروح معنا اليوم
وسام. كم مرة قلتلك لا تقول امي .. امي الله يرحمها
ابو وسام. لك اي خلص فهمنا .. انا قصدي انو خالتك بمقام امك ربتك من وهوا عمرك 3 سنين
وسام. طيب انا جاهز خلينا نمشي
في بيت روعة
دخلت حنان لعند روعة ع الغرفة
روعة واقفة ع المراية وعم تحاكي حالها لك الله يسعدني ما احلاني امووواه
حنان. ههههههه عم تتغزلي بحالك
روعة. هههههه من ايمتى انتي هون
حنان. انتي جاهزة الساعة صارت 9 مابقى الا يوصلو
روعة. اي جاهزة
حنان. كتير طالعة حلوة
روعة. عيونك الحلوة
حنان. نيمت الاولاد قبل مايجو مابدي يصرعونا هلأ بالسهرة
روعة. اي منيح
حنان. مابعرف ليش حاسة انو هالمرة رح يصير نصيب ويطلع الشب منيح
روعة. ان شاء الله
حنان. مانك متوترة
روعة. شو شايفيتني عمري 18 سنة
حنان. بالموقف هاد مادخل العمر .. الباب عم يندء اكيد هدول هنن
وصلو بيت ابو وسام وتعرفو ع بعض
ابو وسام. هي ابني وسام وهي مرتي ايمان
امو ل وسام الله يرحمها
وهي ابني وسيم الاصغر من وسام متزوج وهي مرتو اسراء
ابو احمد. تشرفنا اهلا وسهلا فيكم
شافو روعة وقدمتلهن القهوة وتعرفو اكتر وحكو بأمور كتير
شافت وسام وهوا كل الوقت يتطلع فيها
كانت تطلع فيه وهي محتارة وعم تفكر انو توافق او لا
بس ع الأغلب رح توافق
وسام عجبتو روعة وماكان باين ابدا انها اكبر منو
بالليل بعد ماراحو دخلت حنان لعند روعة ع غرفتها
حنان. شو فكرتي ولا لسا
روعة. والله محتارة انتي شو رأيك ؟
حنان. القرار الك بس انو شو اللي محيرك
روعة. هلأ هوا حلو وحلو كتير كمان بس يعني هوا مانو دارس وغير هيك رح نسكن مع مرت ابوه لو مع امو عادي وكمان اخوه ومرت اخوه بنفس البيت ماعندي مشكلة بس بخاف اذا صرت قارن بين عيشتنا هون وبين هنيك تخرب حياتي
ومافي فرق كبير بينا بالعمر
حنان. هلأ موضوع الدراسة مانو مهم هي اخوتك مو دارسين بس كل واحد بأيدو شغلة احسن من الدراسة
وبالنسبة لمرت ابوه معك حق يعني اكيد مارح تكون متل امو
ومشان وضعو المادي ماتهكلي هم اكيد اخوتك وابوكي رح يساعدوكم وتطلعو ع بيت لوحدكم
واهم شي انو اكبر منك حتى لو بسنة
وبعدين سمعتي حكيو باين انو محترم وفهمان وغير هيك شخصية
روعة. مرت اخوه باين انو منيحة كتير حسيتها مرحة ورح نتفق انا وياها صارت تحكي معي وكأنو بتعرفني من زمان
حنان. ع كل حال فكري منيح وان شاء الله بصير خير
في بيت وسام
ايمان. بتعرف يا ابو وسام اذا صار نصيب رح نقبر الفقر لك مامعقول اديش معهم مصاري لك باين من الضيافة اللي ضيفونا ياها ومن عفش بيتهم ومن تيابهم
ابو وسام. انتي ماشفتي شي انا اشتغلت عندهم وبعرف كل شي عنهم
ايمان. وسام شو رأيك بالبنت
وسام. هلأ انتو شو مفكرين حتى عم تخططو يعني اهلها رح يصرفو علينا
ايمان. اي وين المشكلة اذا ساعدونا
وسام. وليش ليساعدونا
ايمان. مابكفي انو كتر خيرنا قلبلنا ناخد بنتهم وهي اكبر منك
وسام. من هلأ بلشنا بقصة اكبر منك منيح حكيتو هالحكي قبل مايصير شي خليتوني ارجع فكر لحتى اعرف اخد قرار
ابو وسام. هلأ لا تعملي فيها انك الشب المثالي ومابتقبل تاخد بنت اكبر منك
كتر خيرها اذا قبلت فيك مابكفي انك لا شغلة ولا عملة
على شو شايف حالك مابعرف
وسام. انا اذا بدي اتزوجها لأن عجبتني مو مشان مصاريها بس رح خبرها بعمري الحقيقي
اسراء مرت اخوه. اي والله يا وسام اذا بتخبرها بكون احسن
ايمان. انتي اخرسي ماحدا اخد رأيك مفكريتها متلك ماسدئتي لقيتي حدا يتزوجك هي اذا خبرها مستحيل تقبل فيه
تاني يوم بالليل في بيت روعة
ابو احمد. شو روعة بدي رد خبر للجماعة صارو متصلين مرتين لأنو مستعجلين شو خبرهم
انا سألت عن الشب والكل قالو انو سمعتو منيحة بس بقولو انو مرت ابوه قوية
روعة. موافقة اذا انتو موافقين
في بيت وسام
ابو وسام. هي الجماعة اتصلو وقالو موافقين
يا وسام لا تعملي مشاكل بعد ماتكتبو الكتاب بتخبرها اللي بدك ياه
هيا كذبة صغيرة وما بتأثر عليكم اذا كنتو متفقين وحابين بعض
وحاول ماتخليها تشوف هويتك
وسام. طيب اتوكل ع الله
بعد كم يوم كتبو كتابهن وعملو حفلة خطبة عائلية واتفقو ع موعد العرس بعد شهرين لحتى يجي ابراهيم اخو روعة من الكويت
مرق اول شهر بالخطبة بسرعة و وسام كتير كان منيح مع روعة
وهي حبتو كتير وتعلقت فيه
وايمان كانت توصي وسام كل مايروح ياخد معو هدية تقيلة ل روعة
وسام كان بعاني من مشكلة وهيي انو ماعم بصيرلو يقعد مع روعة
في غرفة روعة كانت عم تحكي مع وسام
وسام. روعة والله بكفي هيك احكي مع اخوكي خليه يرجع من السفر يعني لسا بدنا نستنا شهر والله كتير
روعة. ياحبيبي والله ع قد ما بتظل تحكي بهالموضوع قلتلو لأبراهيم انو مستعجلين وقال مابيقدر يجي قبل شهر
وسام. طيب ارجعي حاولي معو
روعة. لك لحتى تجهز غرفة النوم وحتى خلص جهازي انا بكون صار اكتر من شهر
ليش مستعجل مابعرف
وسام. بدي انو نتزوج يعني بدنا نقضيها هيك ع التلفون لك وقت بجي عليكم ماعم بقدر احكي معك كلمتين فورا بيستلموني اخوتك
روعة. هي وقت روح لعندكم عم بكون لوحدي وبنظل طول النهار مع بعض
وسام. اي هني مرتين روعة. مو عاجبك مرتين بالشهر
وسام. ليكي مابقى افتح هالموضوع معك
بس بكرا جايي لعندكم وبدي نقعد انا وانتي لوحدنا
روعة. اممم
وسام. شو امممم !! شو قلتي
روعة. ههههه لك كيف بدي قلن لا تقعدو معنا
وسام. مابعرف تسطفلي
روعة. انا مادخلني مو انت اللي علمتهن ع الاركيلة ولعب الشدة وهني مابقى يقعدو بدونك
وسام. يعني صار الحق عليي .. والله صرت انا ادعيلهم انو يلاقو عرايس ويخطبو ويحلو عننا
روعة. هههههه
وسام. تسلملي هالضحكة
روعة. الله يسلمك
وسام. اففف خلصو وحداتي وانا احكي عن اخوتك
روعة. ههههه بحبككك
وسام. وانا بحبكك
روعة. طيب سكر انت وانا هلأ بتصل فيك
وسام. طيب يلا
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
جميع الروايات كامله من هنا 👇 ❤️ 👇
اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇
❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺
إرسال تعليق