رواية مديري مستر فرعون الفصل الثالث والرابع والخامس بقلم الكاتبه رحاب إبراهيم حسن حصريه وجديده على مدونة النجم المتوهج

رواية مديري مستر فرعون الفصل الثالث والرابع والخامس بقلم الكاتبه رحاب إبراهيم حسن حصريه وجديده على مدونة النجم المتوهج 

رواية مديري مستر فرعون الفصل الثالث والرابع والخامس بقلم الكاتبه رحاب إبراهيم حسن حصريه وجديده

بعد مرور أكثر من ساعة عقب مغادرة سميرة وأبنتها التي خدشتها القطة "شفيقة" وذهابهما إلى المشفى لأخذ المصل المضاد. 

جلست "ليلة العيد" بغرفتها شاردة الذهن تفكر بما حدث اليوم، وتسللت ابتسامة لشفتيها وهي تتذكر ذاك الرجل الفاتن التي رأته اليوم، كأنه خرج من قصة أسطورية رومانسية وتجسد أمامها .. واختفت أبتسامتها وهي توبخ نفسها بسخريةً لاذعةً :

_ بتفكري في إيه يا عبيطة أنتي، أحمدي ربنا أنه وافق يشغلك مؤقتا .. 

وتذكرت شيء جعلها تتنهد بعمق وخوف :

_ طب حتى لو قررت اكمل دراسة، هجيب الفلوس منين ؟! أنا محلتيش غير الخمسين جنيه اللي في البوك بتاعي على ما أول الشهر الجديد يبدأ بعد يومين وأخد الملاليم اللي باخدها كل أول شهر ..

وشعرت بمرارة وهي تتحسس القرط الذهبي بأذنها الذي كان الهدية الأخيرة من والديها قبل الحادثة المشؤومة بأيامًا بسيطة.. وقالت بغصة تكورت بحلقها :

_ غالي عندي أوي الحلق ده ومش هيهون عليا أبيعه .. لكن هبقى مضطرة. 

وطفرت دمعة من عيناها وهي تشعر بالأسف والعجز .. ولكنها مسحت عيناها سريعاً وتظاهرت بالنوم وهي تسحب القطة بين ذراعيها بضمة محكمة، وذلك عندما انتبهت لصوت فتح باب الشقة ويبدو أن " شلة اللصوص " قد عادووا،  وبالتأكيد يضمران الشر لها وللقطة المسكينة..

وما هي إلّا عشر دقائق وكان باب غرفتها يُفتح وتهجم شاهندة عليها لتوقظها وتأخذ القطة إجبارًا لتلقيها خارجًا .. انتفضت "ليلة العيد" من فراشها بعصبية وحاولت أنقاذ تلك القطة المسكينة من براثنها، بينما هتفت" شاهندة "بصياح وهي تلكم ليلة على كتفيها بغلظة وكراهيةً:

_ أنا مش هستنى لما نمرض ونموت بسبب المقرفة بتاعتك دي !. 

نظرت لها القطة "شفيقة" بغضب مخيف، وصدم الفتاتان عندما نطقت القطة بصوتٍ بشري قائلة :

_ سبيني لأحسن أولع فيكي وفي أمك ده أنا أجن مجنونـــــة !!. 

شهقت "شاهندة" بفزع ودفعت القطة بعيدةً عنها بصراخ وهي تخرج من الغرفة كأن يركض خلفها ثعبان، ثم ارتمت أرضاً فاقدة الوعي بصالة الشقة وهرعت إليها سميرة صارخة... بينما التجم صوت "ليلة العيد" بوجه شاحب هربت منه الدماء وجسدها متيبس الحركة بغرفتها ، ونظرت القطة لها بقلق وماءت مثل القطط الطبيعية لكي تُبعد الشكوك والظنون .. ولكن ليلة لم تكن تتوهم هذه المرة أيضاً وعلى يقين أن تلك القطة أضحى بها شيء مخيف وغير طبيعي ... 

فركضت القطة وأغلقت الباب جيدًا، ثم اقتربت من ليلة التي التصق ظهرها بالحائط وهي ترتعش بهلع وتردد آيات من القرآن الكريم .. وبعدها تشكلت القطة بثوانٍ قليلة إلى هيئتها الحقيقية، لتقف أمام ليلة أمرأة بأواخر سن الأربعين ولكنها مذهلة الجمال وترتدي زي فرعوني بكامل زينته وأناقته المعروف بها عبر الأجيال، بينما شعرها الأسود الحريري يسترسل لمنتصف ظهرها تقريبًا وكأنها تستخدم أغلى أنواع الزيوت بعصرنا الحالي.. 

وابتسمت لها قائلة بمحبة :

_ مكنتش عايزة اظهرلك دلوقتي ولا أعمل أي حاجة تثير شكوك أي حد هنا .. بس مقدرتش أسيبها تمد ايدها عليكي تاني وأسكت .. أنا حبيتك أوي واعتبرتك بنتي اللي مخلفتهاش .. 

تمتمت "ليلة العيد" بدهشة وصوت مخنوق :

_ أنتي مين يا ست أنتي ؟! 

اتسعت ابتسامة المرأة وقالت :

_ أنا زوجة الوزير الأول " لوتس در مون " ..  جيت في الزمن ده من غير إرادتي،  ومش همشي قبل نهاية قمر ليلة ٣٠ في الشهر الجديد .. ولأني من زمن تاني مكنش ينفع أظهر بهيئتي الحقيقية .. فتشكلت بقطة .. كان معايا قوة خفية في ست من العبيد أهدتني بيها .. لكن ما لحقتش استخدمها ، وفضل معايا بقايا منها .. أحتفظت بالبقايا لوقت اللزوم. 

صدمت "ليلة العيد" مما تسمعه وسألتها :

_ أنا مش فاهمة حاجة، زمن ايه وقوة ايه اللي بتتكلمي عنها ؟ 

عرّفت " لوتس " عن نفسها بفخر :

_ أنا زي ما قولتلك .. لوتس زوجة الوزير الأول " حات حوت" ، كنت عايشة في القرن التاسع عشر قبل الميلاد .. بلادي كيميت العظيمة .. أم التاريخ والحضارات .. 

وتابعت بألم ظهر  بعيناها المكحلة بكحل شديد السواد :

_ من كتر حبي لزوجي كنت دايمًا بشك فيه ، وبدأ بعض الجواري يوصلولي أخبار أنه بيحب ست تانية وبيروحلها .. كنت هتجنن ، ولقيت ست من العبيد جيالي وبتديني شربة أعشاب .. وقالتلي أن الأعشاب دي سحرية ، هتخليني أسمع أفكاره ، وكمان أعرف ادخل جوا دماغه وما أخليهوش يفكر غير فيا ويطيع كل أوامري .. هيفضل قلب الأنثى واحد في كل زمان وآوان. 

وتنهدت "لوتس " بضيق شديد وهي تتذكر شرود الأتفاقية: 

_بس الشرط أني لازم أبعد عنه شهرين كاملين ، فقررت أسافر لوالدي في الجنوب .. وفي الطريق دخلت كهف ظهر قدامي فجأة أنا والجارية بتاعتي عشان نستريح من تعب الطريق..  وبعدها معرفش حصل ايه ولقيتني في الأقصر على شكل قطة .. وواحد بيقولي بسخرية أنه عرف ينتقم من أخويا سركن وخطفني .. ومش هعرف أرجع لزماني غير بقمر ليلة ٣٠ .. لكن للأسف القوة الخفية اللي معايا ضعفت جدًا وبتقل يوم عن يوم .. وبتقل أكتر لما بستخدمها .. عشان كده ما حاولتش استخدمها خالص الفترة اللي فاتت ..

وعادت ابتسامتها الصادقة ونظرت لوجه "ليلة العيد" المصدوم مما تسمعه وقالت:

_ لكن بالبقايا دي مش هتردد أبدًا أني أساعدك بيها. 

رددت ليلة بعض الكلمات وقالت :

_ القرن التاسع عشر قبل الميلاد يعني الملك امنمحات الثالث .. سادس ملوك الأسرة الـ ١٢ .. الدولة الوسطى ووالده سنوسرت الثالث .. 

رفعت "لوتس" يدها لقلبها بالتحية الملكية عندما ذكرت ليلة اسم الملك وقالت :

_ آمون ..

نظرت لها ليلة بذهول وحاولت أن تصدق ما تراه عينيها، لا يمكن أن امرأة فرعونية من سلالة النبلاء في المملكة تخرج من خيالها المهووس بالفراعنة وتقف أمامها هكذا !!...

وخرجت ليلة من أفكارها على صوت صريخ " شاهندة" وهي تخبر أمها ما حدث ، وانتبهت أيضا لصوت أقدام تقترب ، فعادت "لوتس" لشكل القطة بأقل من الثانية ، وذلك عندما دخلت سميرة بوجه ممتقع وتهتف بعصبية :

_ أنا لازم اتصرف في القطة دي بالذات بعد اللي بنتي شافته منها ... القطة دي لابسها جن. 

ماءت القطة بصوتٍ عالٍ جعل سميرة ترتجف خوفا منها وتردد:

_ أعوذ بالله .. اللهم أحفظنا. 

تمتمت "ليلة العيد" بخفوت :

_ اللهم احفظهم كلهم في ثلاجة الموتى .

وعادت لخالتها قائلة :

_ مافيش حاجة حصلت من اللي شاهندة قالتها ، ما أنا واقفة أهو ما سمعتش حاجة .. 

بدأت تشك سميرة بما قالته أبنتها، ريثما أن ليلة تبدو طبيعية وثابتة تمامًا وتكذب الأمر أيضاً، ولو كان مثل ما قالت شاهندة لكانت ليلة الآن فاقدة للوعي من الهلع!. 

فذهبت سميرة من غرفة ليلة دون أضافة المزيد، بينما أسرعت ليلة للباب وأغلقته من الداخل بالمفتاح حتى لا يتثنى لمخلوق أقتحام جلستها مع تلك الاميرة الفرعونية ..  

وعادت "لوتس" لشكلها البشري من جديد .. ثم وقفت أمام مرآة الغرفة تتفحص مظهرها قائلة بأشتياق:

_ وحشني أوي حات .. ووحشني القصر .. 

نظرت لها ليلة العيد ورفعت كعادتها نظارتها أعلى عظمة أنفها وقالت وهي تنظر لها بإعجاب :

_ أنتي جميلة أوي أوي يا لوتس .. بس أزاي بتقوليلي أنك بتعتبريني زي بنتك يا مزة أنتي ... ده أنا اللي ماما. 

ضحكت "لوتس" من قلبها وقالت بعد ذلك :

_ أنا مش بنت مراهقة يا ليلة العيد .. أنا سني ٤٨ سنة .. يعني فعلًا أنفع أبقى أمك .. لكن الكل أتفق أن سني مش باين عليا ، يعني بالكتير شكلي يدي في العشرينات .. 

اتفقت ليلة مع ذلك الرأي ، وقالت :

_ لما جيتيلي في الحلم مكنتيش بالجمال ده .. بس أزاي جوزك يخون واحدة زيك كده ؟! .. 

اختفت تعابير المرح من وجه "لوتس" وقالت بمرارة :

_ متأكدتش من خيانته .. بس مجرد الظن كان هيموتني من القهر .. أنا بعشقه، والمفروض أن هو كمان بيعشقني. 

سرحت ليلة العيد بخيالها وتساءلت بفضول شديد :

_ يا ترى عامل ايه دلوقتي من غيرك .. 

تنفست لوتس بعمق وقالت :

_ منتظرة أشوف رد فعله لما أرجع. 

انتبهت ليلة العيد لشيء وسألتها :

_ أنتي عرفتي تتكلمي بالعامية المصرية كده بسرعة أزاي ؟! 

أجابت لوتس بثقة :

_ مش صعبة .. وبعدين في كلام كتير لسه باقي من اللغة القديمة .. 

جرى بفكر ليلة شيء واضيقت عيناها بشك قائلة :

_ أتمنى ما يكونش مقابلة الشغل واللي حصل فيها النهاردة أنتي اللي وراه ؟.

اقتربت" لوتس "منها ووقفت أمامها قائلة باعتراف :

_ أيوة أنا .. وكان لازم ده يحصل ، وإلا كانت هتضيع منك الفرصة دي .. وأنا وجودي هنا معاكي مش هيطول ومش هبقى جانبك أدعمك يوم ما تجيلك فرصة تانية.  

اعترضت "ليلة العيد" وقالت :

_ بس ده غش !! .. يعني خدت موافقة إجبارية من المدير ! .. 

صححت "لوتس" الفكرة وقالت بتأكيد:

_ مافيش إجبار ولا ده غش .. أنتي هتشتغلي شغلانة بسيطة جدًا على ما تقدري تكملي دراستك بتعبك ومجهودك .. وبعدين تثبتي نفسك لأنك أحق حد بالوظيفة دي .. يبقى فين الغش ؟! 

احتارت ليلة وقالت بقلق :

_ خايفة من اللي جاي ..

ابتسمت لوتس لها بحنان واقتربت منها قائلة :

_ متخافيش .. وبالنسبة لفلوس دراستك برضه ما تقلقيش هعرف اتصرف ... 

تصبغ وجه ليلة بالحرج وما باتت تعرف كيف تقول ..

_________________________________

وباليوم التالــــ

استيقظت "ليلة العيد" على وجه "لوتس" المبتسم بحماس ، وقالت وهي تسحبها لتنهض من الفراش قائلة:

_ جبتلك رزمة فلوس كبيرة  .. 

شهقت ليلة عندما رأت هذا المبلغ الكبير بين يديها ، وسألتها بشك:

_ جبتي الفلوس دي منين ؟! 

لم تخبرها "لوتس " بالحقيقة، ولكنها قالت بمواربة:

_ هو مش أنا معايا بقايا قوة خارقة وكده ، فأكيد يعني مش صعب أجيبلك الفلوس دي .. خديها وخبيها وشوفي مصاريف جامعتك ودراستك .. وكمان جبيلك شوية هدوم بدل هدومك دي ..

قطبت ليلة العيد جبينها وهي ترتدي نظارتها السميكة بتكشيرة :

_ مالها بقا هدومي !! 

قالت لوتس بغيظ :

_ وحشة ومش لايقة على سنك .. أنا عارفة أنك بتحبي الواسع والطويل ، لكن في برضه واسع وطويل وشيك !. 

نظرت ليلة للمبلغ بفضول وقالت :

_ يا ترى كام المبلغ ده ؟

أجابت لوتس بحماس :

_ بعملتكم ..  ٢٠٠ الف جنيه تقريبًا. 

فغرت ليلة فاها من الصدمة، فضحكت لوتس عليها وقالت وهي تغلق فم ليلة المفتوح:

_ اتبسطي وأفرحي وأشتري اللي نفسك فيه كله .. الفلوس دي بتاعتك ، مش بتاعة حد .. دي هديتي ليكي. 

نظرت لها ليلة بذهول، ثم نهضت وهي ترتمي بين ذراعيها بدموع وقاات :

_ مش عارفة أقولك ايه .. أنا...

قاطعتها لوتس بحنان :

_ أنتي تحضري نفسك عشان النهاردة أول يوم شغل .. وبعد الشغل هتروحي تشتري هدوم كتير هتحتاجيها .. 

________________________________

 وبالشركة السياحية... 

دخل " هاكان " المبنى وخلفه أثنان من رجال الحراسة ذو البنية الضخمة .. وتوجه نحو المصعد مباشرةً ، وتوقف حينما رأى تلك الفأرة تقف وهي تضم حقيبتها وتقف أمام باب المصعد الخاص به ... أغمض عيناه بنفاد صبر وقرر أن يتخذ ذاك الإجراء الحاسم معها ويرفض عملها هنا وإذا لزم الأمر سيطردها أيضاً..  

وحينما تقدم للمصعد وقف خلفها وقال بعصبية :

_ يا آنسة ...؟! 

قالت "ليلة العيد" ولم تهتم لأن تعرف حتى من صاحب الصوت :

_ هطلع أنا الأول وبعدين أبقى اطلع بعدي ، وأصلا في أسانسير تاني ولا ده عليه شيكولاته ؟!. 

ضيق "هاكان" عيناه بذهول وقال :

_ أنتي بتكلميني أنا ..؟! 

أومأت ليلة العيد رأسها بالتأكيد دون أن تستدير وتنظر له، فأستشاط "هاكان" غضبًا ورفع يده وأدارها من ذراعها بالقوة لتواجهه بوجه محتقن من العصبية ... فشهقت ليلة ونظرت لقبضة يده التي تقبض على ذراعها بعنف، ولم تشعر وهي تدوي على وجهه بصفعة من اليد الأخرى نظرًا لما فعله وتعديه لحدودها بهذا الحد الخطر !!. 

__________________________________،

و دارت عجلة الزمن لقرونً مضت .. خصيصاً في القرن التاسع عشر قبل الميلاد .. 

وقف الوزير الأول للبلاط الملكي " حات حوت " أمام نافذة واسعة بغرفة تابعة لمنزل حجري كبير تملأ جدرانه الرسومات والمنحوتات المحفورة بدقة ومهارة نادرة وفخامة أيضا، وقال بتنهيدة ثقيلة :

_ أين أنتِ يا لوتس .. أي مكانً على الأرض استطاع ساكنيه أن يخبأونك عن عيني ؟! .. الحياة لم تعد تطاق منذ أختفائك يا ونيسة روحي.  

استأذن خادمه وقال :

_ سيدي .. وصلتك رسالة.

استدار "حات حوت " واستلم البردية وفك خيطها المتين ثم بدأ في قراءتها، اضيقت عيناه بغضب وهتف :

_ ساحرة العبيد استطاعت التلاعب بزوجتي لوتس .. وتخبرني بمنتهى الوقاحة والخداع أنها فتحت لها بوابة زمنية ونقلتها لهناك!!.. عن أي زمانً تقصد وأي هراءً تقول؟!.

أتى بتلك اللحظة الصديق الاقرب والأوفى للوزير الأول"حات حوت " وشقيق زوجته أيضا وقال له :

_ أتيت لأخبرك بأمر يخص لوتس  ...

سأله "حات حوت" بأهتمام ولهفة بالغة :

_ أخبرني يا "سركن " ما الأمر 

تنفس سركن بعمق ثم قال :

_ ساحرة العبيد تظن نفسها خارقة الذكاء ولكني سركن يا صديق، 

حقيقة الأمر انها سحرت لوتس وجعلتها تيقن بخيانتك لها، ولكنها لم تنقلها لعالمًا آخر مثلما تدعي .. هناك قوةً خفية تريد التلصص على أرضنا وسرقة علومنا وحضارتنا واستطاعت فتح بوابة زمنية لهذا الغرض  .. منذ سنوات وأنا اتعامل مع الوافدين منهم والقنهم درسا لا ينسى على ارضنا 

وتابع بتوضيح :

_ لوتس شقيقتي غادرت  من هنا وقررت أن تسافر رحلةً طويلة لوالدينا بالجنوب وهي غاضبةً منك  .. ولكنها أثناء الطريق ظهر لها كوخا فقررت أن تستريح فيه من مشقة الطريق ومعها جاريتها .. ولكن الجارية رأت أن لوتس عندما دخلت الكهف واستندت على أحد الجدران ظهر من خلفها ضوءًا شديدًا ابتلعها برمقة عين ... لم تفهم الجارية ما حدث .. ولكني أعرف أنهم استخدموها ليبتزوني شخصيًا .. وفهمت المؤامرة. 

صدم "حات حوت" مما سمعه وقال بغضب :

_ زوجتي بمفردها الآن بزمانً لست فيه أنا، لا استطيع أن اتخيل كيف حالها  الآن؟! ..لن أرحم مخلوق شارك بتلك المؤامرة. 

قال سركن :

_ أهدأ لكي نجد حلًا .. 

هتف حات حوت بعنف :

_ وكيف عليّ أن أهدأ يا سركن ؟! .. كيف ؟!  لن تغمض عيني قبل أن تعود لوتس إلى جواري ، لن تستقر أنفاسي أبدًا وهي تائهة !... 

وأخرج سيفه من غمده قائلًا بنظرة شرسة أنتقامية :

_ سأدفن رأس من يمسها بسوء في رمالنا السوداء.  

ربت "سركن" على كتف "حات حوت " وقال ليمتص غضبه :

_ لا .. هذه مهمتي وعهدي وحدي .. شقيقتي بخير وتأكدت أنها بخير بطريقتي الخاصة .. سأذهب إلى ذلك الزمان وآتي بها إليك سالمةً.. وحتى ذلك الحين لا يجب عليك أن تغادر البلاد والملك مريضا أيضاً .. أبق هنا .. وأعدك أني سأعود بها. 

__________________________

#الفصل_الرابع 

وكأنما عقارب الساعة توقفت عندما حدج فيها "هاكان" بنظرة نارية وأصابع يده تتحسس موضع الصفعة!. 

توقفت أزواج العيون عليهما بأنتظار بركانً سيثور بعد قليل .. وجف ريق "ليلة العيد" بوجه شاحب كالأموات ودقات قلبها تدق بجنون وهي لا تعرف كيف فعلت ذلك ..! 

ولكنــه تعدى حدوده فعليــًا عندمـا لمس ذراعها بقوة وغرور، ظنا منه أنه يَحقُ له أنّ يعنف الجميع دون محاسبةً للخطوط الحمراء!. 

نظرتـه التي تنذر بقرب وقوع كارثة حتمية تقول أنه رجلًا اعتاد أن يأمر فيطاع! .. لا مجال للجدال ولا مناقشة ولا حتى مساحة للتفكير في قاموسه !. 

زم "هاكان" شفتيه بغضب شرس وتلك المرة قبض على ذراعها مرةً أخرى بقوة وعنـف حتى جرها لخارج المبنى أمام مرأى الجميع !!. 

ثم دفعها طردًا حتى سقطت نظارتها الطبية ولم تستطع أن ترى أين دُفعت، وهتف بصوتٍ عالٍ غاضب :

_ ده مكانك .. الشارع ، وكده كده كنت ناوي أطردك ، بس أنتي اللي قررتي تتهاني بعد اللي عملتيه ده. 

رماها بنظرة أحتقار ثم عاد للداخل مرةً أخرى .. وتيبس جسدها بلا حراك، وهي تقف أمام المبنى والجميع أعينهم مُسلطة عليها في شفقة ونظرات أخرى ملوثة بالأزدراء!!. 

ارتفعت أجراس الألم بقلبها وأنهمرت دموعها على خديها قهرًا، وحمدت للحظة سقوط نظارتها حتى لا ترى نظرات الشفقة بأعين الآخرين، ولم تستطع سؤال أحدهم عنها، فيكفيها ما تلقت من إهانة وسخط.. ومضت "ليلة العيد" في الطريق ببكاءً وخطواتها بطيئة يائسة من كل شيء في الحياة .. لا يبدو أن شيء سينصفها بهذا الكون الشاسع .. هكذا سرى بعقلها وهي تبك بحرقة وتقريبًا لا ترى شيئاً حولها بعينيها القصيرة النظر!!. 

شعرت أنها ستسقط مغشيًا عليها، فتحامت بجسد شجرة ضخمة يحاوطها فراغ صغير دائري به حشائش خضراء .. جلست أسفلها ليلة واغتنمت فرصة بُُعدها عن الأنظار وظلت تبك بحرقة وحدها. 

وفجأة شعرت بيد تربت على كتفها بمواساة، فشهقت بالبكاء أكثر وكأنها توقعت الأمر .. وبلحظات كانت "لوتس" تجلس أمامها بزيًا معاصر حتى لا تلفت الأنظار إليها .. وقالت بقلق :

_ جيت أشوفك عملتي ايه لقيت المدير بيزعق وجايب سيرتك .. ما فهمتش اللي حصل بالضبط .. بس كويس أني لقيتك .. حصل إيه ؟!

انتفضت "ليلة العيد " بالبكاء وأخبرتها ما حدث ، فضيقت "لوتس عينيها " بشرر وغضب ثم هتفت بتوعد:

_ بقا كده .. طب يستحمل بقا اللي هيحصله !. 

منعتها ليلة العيد وقالت برفض وهي تبك :

_ مش عايزة أروح هناك تاني ، ما تتعبيش نفسك .. كفاية اللي حصلي قدام الناس النهاردة. 

اعترضت "لوتس" بغضب شديد وقالت :

_ أنا اعتبرتك بنتي .. وأنا بنتي عمري ما هسمحلها تكون ضعيفة كده أبدًا .. أنا هعرف أرجعك بطريقتي وهتثبتي نفسك يا ليلة .. وهترجعي وهتشتغلي وفي الشركة دي بالذات بقا .. ده هيكون تحدي أكبر ليكي عشان تحققي اللي بتحلمي بيه. 

نظرت لها ليلة العيد ببكاء وضعف ثم قالت :

_ الحياة تعبتني أوي .. حاسة أني مابقتش قادرة أعافر وأحلم، حاسة أن جناحي اتكسر .. أنا بنت أحلامها بسيطة أوي .. لكن الدنيا مش سيباني في حالي .. كل ما أجي الاقي أمل عشان احلم ببكرا لازم يضيع !. 

ربتت "لوتس" على يدها بحنان وقالت بعينان مليئة بالمحبة :

_ الحياة زي ما بيقولوا فرص ، وفرصتك جتلك ، صحيح فيها شوية عقبات بس محلولة .. اوعي تضيعيها منك ، أوعدك انك هترجعي وهتشتغلي وهتكملي .. وأنتي عليكي تجتهدي. 

كانت عينان ليلة العيد مليئة بالحزن والتيه، فشعرت لوتس أن عليها أن تسرع التصرف في الأمر، فنهضت قائلة بإصرار:

_ هغيب شوية وهرجعلك تاني .. خليكي هنا لحد ما أرجع مش هتأخر. 

____________________________

ظل "هاكان" في مكتبه صامتًا صمتً مخيف، كان يزفر بغضب شديد وعيناه السوداء ناظرة للفراغ كلما تذكر صفعة تلك الفأرة أمام موظفين الطابق الأرضي .. 

انتبه لصوت نقر على باب المكتب وسمح بالدخول، حتى ظهر حارسه الشخصي متسائلًا :

_ أستنى حضرتك ؟ 

رد "هاكان" بعصبية :

_ لأ أمشي .. 

نظر الحارس لمَ بيده بتردد ثم قال وهو يضع نظارةً طبية على مكتب "هاكان" :

_ النظارة دي بتاعة البنت اللي ... 

حم حم الحارس بتوتر ثم تابع :

_ بتاعة البنت اللي حضرتك طردتها ، هي وقعت على الرصيف وعلى ما روحت اجيبها كانت البنت اختفت ، الحقيقة كنت محتار اعمل بيها ايه ، فقولت اسلمها لحضرتك. 

حدجه "هاكان" بشرر وفهم ما يرمي اليه، فيبدو أن الحارس قد استخدم تلك الوسيلة لكي يحث هاكان على تأنيب ضميره ، فأشار له "هاكان" أن يغادر المكتب ويذهب، وبعد قليل تسربت نظرة هاكان للنظارة الطبية وتردد أن يلمسها للحظات .. ولكنه بعد برهة أخذ النظارة وتمعن بالنظر فيها وادرك أن تلك الفتاة تعاني من ضعف شديد بالنظر !. 

وتذكر كيف جرها بعنف لخارج المبنى كالقمامة وبدأ يشعر بالفعل بوخزة تأنيب لضميره .. 

شرد لبعض الوقت حتى استأذنت "منة" سكرتيرته بالدخول وظهر على وجهها الضيق ، فقالت بشجاعة :

_ في كلمتين عايزة أقولهم لحضرتك يا فندم ، بس قبل ما أقولهم عايزة أعرف ده هيأثر على شغلي ولا لأ ؟

تنفس "هاكان" بعصبية وهو يعرف مسبقا ماذا ستقول، فقال عنها بحدة:

_ بصرف النظر أن أي رأي هتقوليه في أي شيء مش هيأثر على شغلك ، بس مش عايز اسمع سيرة البنت دي تاني هنا .. وإلا هتحصليها. 

صمتت منة ويبدو أنها ستنفجر من الكبت، فأشار لها "هاكان" أن تخرج من مكتبه، وبالفعل خرجت منة وهي تنفخ بعصبية .. ولكن قبل أن تُغلق منة الباب ، دخلت تلك القطة الغريبة الأطوار مجددًا إلى مكتبه !!. 

ولم ينتبه "هاكان" ببادئ الأمر ، ذهب للنافذة ليستنشق هواءً نقيًا، حتى استوقفه رؤية تلك الفتاة وهي جالسةً أسفل شجرة بحديقة جانبية للشركة وتبك بقوة .. أطرف عيناه وحاول أن يتجاهلها تمامًا ولكنه توقف عندما استندت تلك الفتاة ونهضت وكانت تبدو أنها تريد السير، ولكن مع عينيها المتورمتان بالبكاء ودون نظارتها أيضا يبدو الأمر شاقا عليها .. 

وذلك عندما تعثرت بحجارة صغيرة بالأرض وكادت أن تسقط أرضا .. فنظر للنظارة الطبية ثم إليها وفكر سريعا في شيء .. حتى خرج من مكتبه وهو يركض تقريبًا..!

وقفت لوتس في هيئة القطة وقالت بغيظ مستغلة فراغ المكان:

_ نفد بجلده مني كنت هكهرب شرايين مخه دلوقتي .. بس وراه وراه ..

_____________________________

مسحت "ليلة العيد " يدها الملطخة بالوحل بمنديل ورقي، واطرفت عينيها بقوة بمحاولة أن تنقي الرؤية حولها ولو قليلًا ولكن هيهات ... فأصبحت الرؤية ضبابية تمامًا ولن تستطيع السير هكذا !. 

فقالت بضعف ودموع :

_ أنتي فين يا لوتس !

أغمضت عينيها بضعف شديد، حتى شعرت بشيء يوضع على عينيها فجأة !! .... انفجر جفني ليلة العيد خلف نظارتها وأخيرًا استطاعت أن ترى أمامها .. ولكن تجمدت عندما وجدت "هاكان" يقف أمامها صامتًا تمامًا ، ولا يبدو عليه أي ملامح للغضب ! ..

أبعدت عيناها المليئة بالدموع عنه وقالت بصوت متهدج :

_أنت عاقبتني على القلم، بس مسألتش نفسك أنا عملت كده ليه .. ما هو أكيد مش هسمح لحد يمسكني من دراعي بالطريقة دي وهقف ساكتة .. مش ندمانة ولو اتكرر الموقف هعمل كده تاني .. ولو على الشغل فأرض الله واسعة، ولو على حلمي فهعرف أحققه في أي مكان هروحه  .. 

ثم نظرت له بحدة وهتفت وهي تبك:

_ أنت شخص مغرور .. مش بتسمح لحد أنه يفكرك أنك أنسان!. 

_خلصتي ..؟ 

اجفلت ليلة العيد من رده ولم تفهم، فوضع يده بجيوب بنطاله في ثبات وثقة عالية ثم أضاف بنظرة لم تطمئنها :

_ شغلك في الشركة هيبدأ من ٧ الصبح .. لما تيجي بكرا هتعرفي وظيفتك الجديدة. 

ورماها بنظرة ساخرة وذهب من أمامها بمنتهى البساطة ! .. وأتت اليها "لوتس" بهيئتها البشرية ووجدتها فاغرة فاها من الذهول .. فسألتها بقلق :

_ هو بيعمل ايه هنا ؟!. 

أشارت لها "ليلة العيد" وقالت بصدمة :

_ أنتي أقنعتيه أزاي أنه يجيلي ويرجعني الشغل ؟

وهذه المره شهقت "لوتس" بصدمة، ثم قالت :

_ وغلاوة حاتحوتي عندي ما جيت جنبه ! .. ده مشي قبل ما أعرف أسيطر على مخه !.... بس ملحوقة. 

ضيقت "ليلة العيد" عيناها بذهول وقالت :

_ يعني هو جاي كده من نفسه ؟!! 

صمتت "لوتس" للحظات ثم قالت لليلة بابتسامة خبيثة :

_ تخيلي ! .. 

لم تفهم ليلة العيد الأمر، بينما تمتمت لوتس بكلمات وهي تبتسم بخبث .. 

_____________________________

بحي شعبي فقير.. 

وقف شابًا عملاق ضخم البنية كأنه مقاتل شرس من العصور الوسطى برداء انتقاه ليناسب هذا العصر ولا يلفت الانظار إليه،  وارتسمت على ملامحه شديدة الجاذبية الصمت المطبق  ..  لا أحد يستطيع قراءة تلك التعابير المجهولة مهما أجتهد. 

نظر بعيناه الواسعتان الزرقاء رغم سمرة بشرته التي لوحتها الشمس، وتمعن في البشر حوله بدقة .. يبدو أن العصر الحديث ما زال محتفظا بالملامح المصرية الجذابة ولم يطمس تميّزها وجمالها. 

سار بخطوات هادئة وهو يفكر أين سيقضي مهمته حتى يجد شقيقته "لوتس"  

حتى أستوقفه على بُعد خطوات تجمع عدد غفير من الناس ويرتفع من بينهم صوت أنثوي عالِ وصارخ  ..  تقدم  "سركن"  نحو الصوت غاضبًا وظن أن ربما هناك امرأة تطلب المساعدة وتستغيث بمن حولها  ..  

ولكنه تفاجأ بفتاة تصرخ وتصيح بخصلات شعرها السوداء الطويلة والغجرية،  وترفع يدها القابض على حذائها وتهبط على رأس احد الرجال بغيظ: 

_ بقا يا راجل يا ناقص يا جوز الأربع نسوان ناططلي في كل حتة وعايز تماشيني وفاكر أني هكش وأخاف واتهدد!...  حوش حوش.  

وشهقت " شقاوة " شهقة عالية وتابعت: 

_ عارف أنا مين يلا؟  ... أنا شقاوة يا حيلتها،  يعني أشقيك وأحشيك وأتغدى بيك..  ورحمة جوز أمي اللي نفسي يفلسع لو شوفت وشك تاني  لهخلي اللي ما يشتري يتفرج عليك.  

_ ما هذا ..؟!  

وجه "سركن"  السؤال لها مباشرةً وهو ينوي أنا يبعدها تمامًا عن هذا الشجار الغير لائق أن بداخله امرأة،  بينما شهقت "شقاوة"  بغضب ونظرت له بعينيها السوداء قائلة بعصبية: 

_ ماذا هذا وذاك يا خويا؟!!  ... ما تتكلم عدل في نهارك ده!!... انت جاي من سوق الجواري يا جدع انت!!  

ضيق "سركن"  عيناه بغضب خطر وهمس بصوتِ خافت: 

_ من هذه التي تتحدث مع قائد الجيوش  "سركن در مون"  بهذه الطريقة الوقحة!!.. 

نظرت له "شقاوة"  بتعجب،  فهي أمام هذا العملاق مثل القطة أمام الفهد!!..  فهمست له صديقتها "سماح": 

_ ما تستفزيهوش انتي مش شايفة منظره عامل أزاي؟!  

ده لو كح هيبلعنا  كلنا!  

 

اقتربت منه شقاوة وهتفت بغيظ: 

_ هعلي صوتي واعمل اللي انا عايزاه كله،  واي بغل في الحتة هيتعرضلي بشبشي وعلى نفوخه  ..  أنا رقاصة آه بس توبت  ..  وعهد الله توبت

بدأ يفهم" سركن" سبب هذا الشجار بأكمله، فنظر لعينيها السوداء بصمت للحظات،  ثم اقترب لها قائلًا بنظرة غامضة: 

_ لديّ ملاحظةً على عينيكِ  ..  أيتها الشرسة. 

ورماها بنظرة جعلتها تقف متجمدة للحظات وهي تنظر له بصمت، وعندما أختفى من أمامها قالت "شقاوة"  بابتسامة : 

_ يلااااهوي. 

استفسرت "سماح" وقالت بعدم فهم: 

_ ملاحظة ايه دي ياختي؟  ..  أنتي مش غسلة وشك يابت؟! 

ضربتها "شقاوة" على كتفها بضحكة ثم قالت: 

_ اكتمي يابت  ..  ده كلام بالنحوي ما يفهمهوش اللي زيك. 

واضافت شقاوة بنظرة شاردة تتفقد خطواته المبتعدة:.

_ ده باين في فيلم هيبدأ يابت وقصة حياتي هتبتدي. 

لوت سماخ فمها بسخرية:

_ وهيحكوا قصة حياتك ليه يا أوخة  .. كنتي الملكة ليزابسة؟! 

ردت شقاوة بثقة: 

_ أحلى وأهم وحياتك  ..  أما نشوف بقا إيه الحكاية!.  

________________________

وأتت ساعات الليل ... 

وتمددت "شقاوة" بفراشها الذي يتوسط غرفة صغيرة على أسطح احدى المباني القديمة، وابتسمت كلما تذكرت نظرة ذلك الرجل الغريب ... لأول مرة تشعر بدقة القلب هذه وهي الفاتنة الذي ارتمى تحت قدميها أثرى الرجال لمجرد نظرة منها ومحادثة ...!

فتنهدت بعمق وقالت :

_ ده مين ده ؟ .. شكله غريب عن الحتة وناسها، لأ .. ده شكله غريب كله كده على بعضه ، بس عليه حتة نظرة عصرت قلبي عصر .. 

وضحكت عندما سمعت نفسها تقول ذلك ، فنهضت مرةً أخرى وتوجهت لمرآة الغرفة وهي تنظر لنفسها بتمعن ..  وقالت بابتسامة وزهو :

_ أن كان هو سيد الرجالة فأنا البت شقاوة .. اللي كل مادا بتزيد حلاوة .

وذهبت لخزانة ملابسها الصغيرة وانتقت منه فستانا أحمر وقررت أن ترتديه الآن حتى لو كانت ستمكث بغرفتها ..  وبدقائق كانت بدلت ملابسها وارتدت ذلك الفستان الأحمر المحكم تماما حتى منطقة الخصر ثم يتسرسل واسعا حتى الذيل .. وفردت شعرها الغحري الأسود الطويل مع لمسات صارخة من مرطب الشفاه .. وابتسمت بزهو وهي تقول :

_ كتري يابت من الروچ كتري هو أنتي يعني هتخرجي كده من أوضتك ولا مخلوق هيشوفك ! ... أهو تتبسطي شوية. 

ومضغطت العلكة بفمها بضحكة وهي تنظر لأنعكاس صورتها بالمرآة، حتى انتبهت لصوت طرقات على باب غرفة السطح وكأن أحدهم سيكسره!! .. فأنتفضت بخوف للحظات وقالت :

_ مين اللي بيخبط ؟! 

نطق بيومي "زوج أمها " وصاح بصوتٍ عال:

_ أفتحي يابت والا هكسر الباب على نفوخك!. 

أخذت "شقاوة" نفسا عميق بعصبية ثم ذهبت وفتحت الباب وهي تصيح بشراسة:

_ تكسره على نفوخي ليه أن شاء الله .. ليك عندي ايه يا بيومي ولا عشان اعتزلت وتوبت من الشغلانة السودة اللي جبرتني عليا من يوم ما اتلف عودي !. 

نظر بيومي لمظهرها المغري وقال بنظرة ماكرة :

_ يابت يا عبيطة ، آآه لو تسمعي كلامي .. ده الباشا إياه حفي وراكي ورايدك في الحلال وهيغرقنا كلنا فلوس وعز .. ولا أنتي عاجبك الفقر والضنك ده ؟! 

دفعته "شقاوة" ليخرج من الغرفة بعنف وصاحت بتهديد:

_ والله لو ما مشيت من قدامي وغورت بعيد عني ما حد هيخلصك من ايدي !. 

برقت عين "بيومي" بخطر وصاح مناديًا على رجلان ، واضحت نيته ظاهرة أنه سيأخذها بالاجبار أن لم تأت معه برغبتها .. فصرخت "شقاوة" وهي تدفع الرجلان بيديها وقدميها حتى يبتعدان عنها ، ولكنها لم تستطع صد قبضتيهما الشديدة على يدها .. فصرخت مجددًا تستغيث بالجيران ، فضحك بيومي بسخرية وقال :

_ ومن أمتى حد بيقدر يقف قدام بيومي يابت نعيمة. 

بصقت "شقاوة" ريقها بوجه بيومي وهي تبك وتلفظه بأشد الشتائم والتصقت خصلاتها الغجرية بوجهها المتعرق .. 

وتردد صدى صوتها الصارخ حتى أندفع أحد الرجلان بضربة جعلت قلبه سيتوقف من شدتها، بينما الآخر وجد نفسه محمولا على يدان صلبتان ويندفع بعنف على الأرض لمسافة بعيدة !!. ..

واستدارت "شقاوة" لطوق النجاة الذي أغاثها لتجده ذلك الغريب ، ابتسمت بوجهها الغارق بالدموع له، بينما وجه "سركن" كان أيقونة وكتلة من الغضب وهو ينظر لـ بيومي المصدوم مما حدث بلحظات سريعة ولم يستوعب الأمر ... فـ جر "سركن" بيومي من ياقة قميصه وصاح بشراسة :

_ لو لم يكن ذلك الرأس اللعين يمتلئ بالشيب لكنت الآن تلفظ أنفاسك الأخيرة أيها الحقير القذر .. ولكن يداي لن تلطخ أبدًا بدماء العجائز!.... 

رد "بيومي" بعدم فهم :

_ كلام مُقنع .. بس مش فاهمه !. 

تلقى بيومي صفعه قاتلة من يد "سركن" جعلته يسقط أرضا ويتلوى من الألم، حتى صاح "سركن" فيه وهدده بشراسة:

_ لو اقتربت منها مرةً أخرى سأقتلع عيناك من محجرها .. 

شعر بيومي بالخوف منه وركض هاربًا بعدما فر من معه من الرجال ... وتحسست شقاوة معصمها إثر قبضة الرجلان منذ قليل، فسألها "سركن" بأهتمام :

_ اتؤلمك يداك ؟

رفعت "شقاوة" عيناها لعيناه بنظرة طويلة وابتسامة ، ثم قالت وهي تائهة تمامًا بعيناه الزرقاء الساحرة:

_ أنت مين يا جدع أنت ؟

نظر لعينيها الجميلة "سركن" بشرود لبعض الوقت ثم قاوم شيء في نفسه وقال بثبات :

_ ليس من شأنك ... 

ووقعت عيناه رغما على ردائها الأنثوي حتى سحب نظرته بعيدًا وقد كافح لذلك ... ثم ابتعد عنها قائلًا بحدة:

_ لا تجعلي رجلًا يراكِ هكذا مرةً أخرى .. وإلا سأرتكب جريمة. 

اتسعت ابتسامتها وقالت :

_ بتتكلم بالنحوي بس تمام .. عجباني اللغة، بس هو يعني ماله شكلي .. ما أنا قمر أهو. 

تمتم بخفوت وبعصبية :

_ وتلك الأزمة !. 

استفهمت شقاوة :

_ بتقول ايه ؟!. 

رد بصرامة وهو يبتعد ويشير لها :

_ لن أنبهك ثانيةً ... أحذرك مني.  

وعندما هبط على السلم ظهرت ابتسامة "سركن" وهو يبتسم ويقول :

_ قطعة من القمر .. قلبي بمدينة غير آمنة. 

_______________________

#الفصل_الخامس 

وعندما هبط على السلم ظهرت ابتسامة "سركن" وهو يبتسم ويقول :

_ قطعة من القمر .. قلبي بمدينة غير آمنة. 

انفرجت ابتسامة على شفتيها، ثم هتفت قائلة وهي تركض لتسأله قبل أن يخرج من المبنى القديم:

_ صحيح هو أنت اسمك إيه يا أخينا ؟ 

توقف "سركن" عند أحدى درجات السلم الأخيرة بالطابق الأرض، ثم رفع عيناه الزرقاء لها مجيبًا بابتسامة التمعت فيها أسنانه البيضاء اللامعة:

_ المرة القادمة عندما نلتقي سأخبرك .. 

وما جعلها تتجمد هي تلك النظرة الساحرة بعيناه الذي ختم لقائه بها قبل أن يخرج من المبنى .. ابتلعت شقاوة ريقها وتنفست بعمق وضربات قلبها تكاد مسموعةً لها .. وقالت بأنفاسا متسارعة :

_ لا يابت يا شقاوة أهدي كده .. أهدي يخربيت ده أحساس بحسه قدامك يا دي الجدع .. ده انا لسه شيفاك من كام ساعة!. 

هتفت صديقتها "سماح" فجأة :

_ حصل إيه يا شقاوة .

شهقت شقاوة من الفزع وصاحت بوجه صديقتها :

_ يخربيتك يا سماح .. خضتيني يابت .. 

نظرت لها سماح بنظرة ضيقة ماكرة وسألتها بخبث :

_ هو الجدع اللي شبه البرج ده كان بيعمل إيه يابت على السطح السعادي ؟! .. 

لوت " شقاوة" فمها بسخرية وأجابت :

_ جه على صريخي ياختي ، جه ونجدني من بيومي والصيع اللي معاه .. بيومي النتن كان عايزني ارجع للرقص تاني ، وأنا ياختي توبت .. وعهد الله توبت . 

واستطردت بنظرة حالمة وتمنّي:

_توبت ونفسي اداري في ضل راجل يحميني من الدنيا .. راجل بجد ، راجل الناس كلها تخاف منه وتعمله الف حساب .. راجل يملا العين والقلب واتشحتف عليه لو غاب عني يوم .. وما يسبنيش لبيومي اللي مرمطني في الكباريهات من صغري ، كان بيبيعني عينك عينك زي حتة اللحمة .. ولولا ستر ربنا في كل مرة كان زماني ضيعت من زمان. 

 وكزتها سماح بغمزة خبيثة وهمست :

_ راجل زي الراجل البرج بتاعك ده ..

ابتسمت "شقاوة " بنظرة مليئة بالدفء وقالت :

_ الراجل بتاعي ، يسمع من بوقك ربنا ياختي .. ده شقاوة اللي وقع عند رجليها احسنها رجالة ولا عبرتهم قلبها بقا زي الطبل من بصة واحدة لعنيه ... جاي منين ده ! .. حتى كلامه كله بالنحوي زي ما يكون مدرس عربي معتمد .. مش كده يبقى معتمد اسماح ؟

أكدت سماح :

_ معتمد ونص ياختي .. 

تطايرت خصلات شعرها الغجرية وهي تتحرك نحو سور السطح بخطوات شاردة والابتسامة لا زالت على شفتيها وقالت :

_ ربنا يحرسك لشبابك يا دي الجدع ياللي معرفش اسمك .. 

واستندت بيدها على السور وانفرجت شفتيها بابتسامة ظهرت غمازتيها عندما وقعت نظرتها على "سركن" الجالس على الرصيف المقابل لمنزلها وينظر لها بابتسامته المُهلكة هذه واكدت :

_ بس هعرفه .. وعزة جلالة الله لأعرف اسمك ، وهناديلك بيه ..

قالت سماح بتفكير :

_ شكله يدي على فتحي .. أو شوكت. 

ضحكت "شقاوة" وقالت بعاطفة شديدة بعد ذلك:

_ لو على شكله فهو زي ما يكون كده أمير ولا سلطان .. قيمة وسيما والله ... مش مهم اسمه، أن شالله يكون اسمه عبد الجليل .. 

همست سماح قائلة بتمنّي:

_ يارب يكون عنده أخوات. 

نظرت لها "شقاوة" بغيظ وهتفت :

_ أنتي لاضمة معايا في أي سكة يا سماح ؟!  ... ياختي فوكي الخيط وسبيني أدخل دنيا لا أرى فيها سحنتة من سحنتكم ..

ثانية كده ... 

سألتها سماح باهتمام :

_ إيه ..؟! 

أجابت شقاوة بابتسامة :

_ يلااااهوي .. بقيت بتكلم بالنحوي زيه .. 

______________________________

بقصرًا كبير .. مِلك عائلة "هاكان كمـال الريان " 

التفـت الأسرة المكونة من أربعة أفراد حول مائدة العشاء، وعندما أنتهى الخدم من أتيان كافة الأطباق الشهية، حركت الأم " نورمان" معلقتها في طبق حساء دافئ والقت نظرة عميقة على أبنها "هاكان" الذي بدأ يتناول وجبته بـ روتينه الخاص وهو ارتشاف عصير البرتقال الطازج الخالِ من السكر تمامًا. وقالت بلهجة مصرية عامية جيدة نوعا ما نظرًا لأصلها التركي :

_ لورا وأمها هيحضروا بعد ساعة .. أتمنى تقعد معانا وترحب بيهم. 

كتم رشاد ضحكته الساخرة، بينما ابتلع "هاكان" ما بفمه ثم انتظر للحظات وبعدها قال بلا مبالاة :

_ لو كنت فاضي هحضر. 

تحدث والده "كمـال " بأمر وغلظة :

_ لازم تفضي نفسك .. وبعدين أنـت بعد ساعة هتكون بتعمل إيه يعني ؟! .. هاكان ! ... أنا سيبتك في أمور كتيـر أوي تختار اللي أنت عايزه .. بس المرادي أنا اللي هختار وده شيء مافيهوش نقاش !. 

تنفس "هاكان" بعمق وحاول أن لا تنفلت أعصابه، فهو مخلوق لا يقبل الأوامر ...فقال بلا اكتراث :

_ بابا .. أنا قبل كده وافقت على طلبك وقولتلك أن الجواز مش رقم واحد في حياتي .. وأني مش مرتبط بواحدة، ويوم ما هرتبط هتكون أكيد بنت مناسبة ليا ولعيلتي .. وقولت برضه أن لورا مش بطالة ومناسبة .. أذن أنا مرفضتش عشان كل شوية تفتح الموضوع ده معايا .. أحنا خلاص حددنا ميعاد الخطوبة آخر الشهر الجاي .. يعني المفروض دلوقتي نكون بنرتب للخطوبة مش لسه قلقان من موافقتي !. 

ابتسم "كمـال" بسخرية وقال :

_ قلقان وهفضل قلقان لحد ما أشوفك بعيني في الكوشة .. البنت دي بنت أهم شريك ليا ومش مستعد أخسره عشانك .. المشكلة يا "هاك" أنك غامض حتى بالنسبالي أنا أبوك !! .. أول مرة مابقاش عارف أفهم بني آدم ولا قادر أعرف بيفكر في إيه ؟! ... عارف أخوك رشاد رغم أنه صايع ومالوش في الشغل .. بس حافظه وفاهمه وأعرف أحكمه، أنما أنت تحيّر!. 

التوى فهم "رشاد" بغيظ، ونظر له "هاكان" بنظرة جانبية، ولكن فجأة تذكر التعليق الساخر لتلك الفأرة ذي النظارات على شقيقه بالمكتب واتسعت ابتسامته .. فقال رشاد بغيظ أشد :

_ أضحك أضحك. 

وبدأ "هاكان" يتناول عشائه بهدوء شديد، وبعد العشاء ببعض الوقت أعلنت احدى الخادمات لـ "نورمان" الجالسة بمقعد أمام المسبح بالهواء الطلق :

_ الآنسة لورا وأمها وصلوا يا ست هانم .

نظرت "نورمان" لأبنها" رشاد" الجالس قبالتها بمقعد آخر وقالت بأمر :

_ قول لـ هاكان ينزل يستقبلهم معانا ..

أطاع رشاد الأمر وصعد للطابق الثاني حيث جناح شقيقه الاكبر "هاكان" والذي بمثابة مملكة خاصة به وممنوع الاقتراب إلّا للضرورة !....

 نقر "رشاد" على الباب الزجاجي العريض حتى سمح له "هاكان" بالدخول بصوت حاد .. وقال رشاد بعدما دخل والقى نظرة متفحصة لشقيقه الجالس بمكتبته الخاصة المليئة بالكتب النادرة والثمينة في كافة المجالات، ويبدو أن "هاكان" كان يستثمر وقت فراغه في القراءة مثل العادة، فقال :

_ خطيبتك وصلت مع أمها ..

لم يبد "هاكان" أي ردة فعل ببادئ الأمر وهو ينظر بتمعن بأحد الكتب التاريخية مرتديًا نظارة قراءة برزت وسامته بشدة ، فكرر رشاد ما قاله بنفاد صبر .. حتى التفت له "هاكان" بنظرة حادة وقال :

_ أطلع وأقفل الباب وراك يا رشاد .. شوية وهنزل. 

رماه "رشاد" بنظرة حذرة كأنه يذكّره بما قاله لوالده :

_ ماينفعش تنطش ! .. هتجيب لنفسك وجع الدماغ على الفاضي. 

نهض "هاكان" من مقعده وبدأ فاتنا وهو يرتدي "تيشرت" أسود دون أكمام وبنطال قطني رياضي أسود أيضا برز برونزية بشرته المائلة للبياض .. ووضع الكتاب من يده بتقطيبة ثم قال :

_ دقيقتين وهطلع تاني .. الكتاب ده ميتسابش.  

أوقفه "رشاد" قائلًا بتعجب :

_ طالما ما بتحبهاش ولا بتطيق تقابلها مكمل في الجوازة دي ليه يا هاك ؟! .. أنت هتعيش معاها أزاي وأنت حتى مش عايز تنزل تسلم عليها كام دقيقة وتطلع ؟!.

رد "هاكان " بسخرية وهو يضع يداه بجيوب بنطاله في ثقة :

_ حب إيه يا رشاد .. أنا الحب مش فكري أصلًا ، وفكرة أني مش طايقها دي فكرة غلط .. هي بس دايمًا بتيجي في الوقت الغير مناسب .. مافيش حاجة اسمها حب وده اللي أنا مقتنع بيه .. الجواز بالنسبالي زوجة تأدي دورها في حياتي وأولاد .. 

لم يقتنع رشاد بالأمر وقال بدهشة :

_ الغريب أن كل بنات العيلة شايفينك فارس أحلامهم .. بنات كتير أوي تحلم تاخد حيز من تفكيرك وقلبك .. لكن يا هاك أنت مغرور .. ساعات بحس أنك شايف نفسك خسارة في أي بنت .. عقدة نارسيس .. أتمنى يكون ظني غلط. 

عقد "هاكان" حاجبيه ثم قال بحدة كأنه فوجئ بنظرة شقيقه له :

_ خلصت كلامك ؟ 

رد رشاد بيأس بعدما أيقن أن هاكان ينهي المناقشة:

_ تقريبًا.

أشار له " هاكان" وقال :

_ طب يلا ننزل عشان منتأخرش أكتر من كده.

______________________________

تورد وجه "لورا" بحمرة مشرقة وابتسامة مضيئة عندما لمحت "هاكان" يهبط درجات السلم الرخامي .. 

طالعته بنظرة عاشقة .. لم تكن تتخيل أن ذلك الرجل الفاتن سيتقارن اسمها به ويصبحان زوج وزوجة بالقريب .. انتفض قلبها بسعادة وهي ترميه بنظرة دافئة ... بينما همس "رشاد" لشقيقه "هاكان" وقال بضحكة خافتة :

_ البت واقعة من فوق برج القاهرة في حبك وأنت ولا هنا !!.

رحب بهما "هاكان" بلطف ثم جلس على مقعد بعيدًا عن الجميع واضعا ساقا على ساق بتجاهل المجلس برمته !!. 

تنفست والدته "نورمان" بغيظ منه وغمزت لولدها "رشاد" أن ينبه "هاكان" للجالستان وينظران له بتعجب كل برهة !. 

فنهض رشاد وجلس بجانب شقيقه هاكان ضاحكا :

_ افتكرت حاجة هتموتكم من الضحك .. امبارح جت بنت تقدم على وظيفة في شركتنا وشكلها لوحده أنتيكة.

وتابع وهو يقهقه من الضحك ويروي واصفا ليلة العيد بدقة  :

_ لا واسمها ايه تخيلوا ... اسمها "ليلة العيد سعيد رمضان" 

ضحك الجميع بقوة عدا "هاكان" الجالس واضعا ساقا على ساق ولم ينفرج فمه بأقل ابتسامة ولو بسيطة حتى .. فتوجه رشاد نحو شقيقه بمزاح قائلًا :

_ ياريتك كنت قبلتها يا هاك .. دي كانت هتبقى فقرتي الكوميديا المُفضلة .. 

قالت لورا بضحكة :

_ وهي بنت بالمواصفات دي جاية تشتغل ايه في شركة سياحة ؟! .. طبيعي تترفض!. 

مط هاكان شفتيه للحظة ثم قال بثبات وثقة:

_ اتقبلت ..

فوجئ الجميع لبرهة، حتى سأله رشاد بدهشة :

_ أنت لما خرجتني من المكتب وسيبتها معاك .. قبلتها بعد كده ؟!. 

توجهت "لورا" لهاكان بنظرة حادة وسألته :

_ سابها معاك ؟!!...

القى هاكان نظرة جانبية سريعة للورا، كأنه يحذرها أن لا تتعدى حدودها المسموحة لها بالتدخل في شؤونه ، وأجاب على تساؤولاتهم بهدوء مستفز :

_ آه اتقبلت .. بنت شاطرة وطموحة وهتكمل دراستها وهتجتهد .. أرفضها ليه ؟!.... بالعكس أنا الكسبان. 

وسألته "لورا" مجددًا بعصبية :

_ وكسبان إيه بقا ؟! .. ومن أمتى الشركات بتقبل الموظفين على حسب طموحاتهم مش شهاداتهم؟! 

وكزتها أمها " تهاني" لكي تصمت ولا تثير غضب هاكان، بينما اشتدت الحدة بعينان هاكان وظهر جليًا كرهه الداخلي للأرتباط بتلك المخلوقة المجادلة .. وقال ردًا على تعليقها المستفز لشخصه :

_ وقولت أنها شاطرة .. شاطرة يعني مناسبة جدًا للوظيفة، ولكن اللي ناقصها الشهادة .. أنا ليا أسلوبي وتفكيري الخاص في شغلي ومقتنع جدًا بالبنت دي وهساعدها لحد ما تخلص دراستها. 

امتقع وجه لورا بالغضب والغيظ، وابتسمت بسخط وهي تقول :

_ ده واضح أنها عجباك أوي ؟!

أجاب "هاكان" بتأكيد وثقة :

_ جدًا ..

كانت لورا تريد أن تنفجر بوجهه وتقول ما بداخلها، بينما نهض هاكان وقال بابتسامة كأنه أتم مهمته بنجاح:

_ بعد أذنكم .. مستني مكالمة شغل ضرورية. 

ولأول مرة ترتاح "نورمان" بمغادرة أبنها هاكان بوجود لورا ، ولكن على ما يبدو أنه لو لم يغادر كان سينشب شجارا بينهما لا محال !. 

فقالت تهاني بعصبية لـ "نورمان" :

_ هو ده ترحيب أبنك بينا ؟!. 

اعتذرت نورمان بمبالغة، ثم قالت :

_ هاكان دي شخصيته .. جاد وحاد ، لكن قلبه زي السما الصافية .. ما يقصدش أبدًا يضايقكم، ده حتى وأحنا على العشا كان بيفكرنا بترتيبات الخطوبة .

هدأت تهاني بعض الشيء ، بينما قال رشاد بضحكة وسخرية :

_ ما انتوا لو شوفتوا ليلة العيد دي لورا مش هتزعل أوي كده ، دي نظارتها بس تجيب جلطة .. شكلها مبهدل أوي في نفسها ، "هاكان" في الأول اتصدم أنها جاية للوظيفة وتقريبًا كان هيطردها... بس يظهر فعلًا أن البنت شاطرة في الشغل وأقنعته في الأنترفيو .. وهاك أخويا مخه كله في الشغل والأفواج والرحلات والفنادق .. 

هدأت لورا بعد حديث رشاد بعض الشيء، وعادت الأبتسامة لشفتيها بالتدريج. 

_________________________________

عادت "ليلة العيد " للمنزل في ساعةً متأخرة ليلًا وبيديها أكياس من المشتريات .. كانت تدرك أن لا أحد سيهتم بتأخرها ، ولكن حينما دخلت وجدت خالتها سميرة تربت على كتف زوجها وتقول بمواساة :

_ فداك يا خويا .. فداك أي حاجة ، المهم أنك بخير ووسط ولادك ..

كان الزوج يرمي رأسه بين يداه بكسرة ، وتابعت ليلة العيد سيرها لغرفتها دون الاهتمام بما حدث ، فلا أحد يشاركها أحزانها كي تشاركهم هي .. 

بينما قالت سميرة لزوجها وأولادها بتحذير :

_ أوعو حد يقول للبت دي على ال ٢٠٠ الف اللي اتسرقوا من خزنة المصنع ، لاحسن تطمع وتقول ما المصنع بيكسب أهو وهاتوا حقي وندخل في سين وجيم .. لو سألت قولوا أن المصنع جاله فلوس ضرايب ومضطرين ندفعها  ... 

قال الزوج " شوقي" بحسرة :

_ كل ما أجي اكسب واطلع فلوس وافرح بيها لازم تيجي حاجة وتضيعها مني .. تقوليش فلوس حرام !. 

ضربت سميرة على صدرها بخضة واعترضت :

_ تف من بوقك .. قال حرام قال ، أومال لو مكنتش بتدي كل واحد حقه على داير المليم .. هو في زيك أنت ،ربنا ما يحرمنا منك ومن حنية قلبك .. 

__________________________

وقفت "ليلة العيد" أمام المرآة تختبر الملابس الجديدة بسعادة .. وجلست لوتس تراقبها في بهجة وابتسامة عريضة .. حتى قالت بفخر :

_ شوفتي ذوقي حلو أزاي يا ليلة؟

كادت ليلة العيد أن تقفز كالأطفال من السعادة :

_ ذوقك يجنن يا لوتس، من زمان ما أشتريتش لبس كتير أوي كده .. لا وكله تحفة حرفيًا .. أنا مش مصدقة أني أشتريت لبس ب ٣٠ الف جنيه مرة واحدة .. كويس أنك خبيتي الشنطة الكبيرة عن عنيهم والا كانوا هيستغربوا جبت ده كله منين .

ضحكت لوتس وقالت :

_ استخدمت قوتي وجبتها قدامهم ومشافونيش .. لما تبدأي شغل بقا جيبي بالباقي وهيبقى عندك حجة أنك اشتغلتي .

تسمرت ليلة العيد للحظة ، ثم قالت بتوتر :

_ أحنا نسينا حاجة .. أنا ما قولتلهمش على الشغل .. ولو شاهندة عرفت أني أشتغلت في الشركة اللي اترفدت منها هتطين عيشتي .. أنا أزاي ما فكرتش وحسبت حساب كده ؟!. 

نهضت لوتس وقالت بدعم وثقة :

_ أنا معاكي ،ومحدش هيقدر يمنعك تشتغلي ، والا أنتي عارفة هحلها أزاي !. 

نظرت ليلة العيد لها وتدرجت ابتسامتها على ثغرها ، ثم ضمتها بعناق حنون وقالت :

_ ربنا يخليكي ليا يارب. 

نظرت لها لوتس بابتسامة وعاطفة الأمومة تغزو قلبها ..

___________________________

وباليوم التاليــــــ

استيقظت ليلة العيد مبكرًا جدًا، وذهبت لأخذ دشا دافئ ، وحينما انتهت وخرجت من الحمام وهي ترتدي كامل ملابسها وحجابها كالمعتاد .. وجدت سميرة قد استيقظت للتو ويدها على خدها وتتألم :

_ ضروسي رجعوا يوجعوني تاني ، آآآه ياني . 

استغلت ليلة العيد الفرصة وقالت لها سريعا :

_ أنا هلبس واروح الشغل ، النهاردة أول يوم ليا .. 

تأوهت سميرة بألم وصاحت فيها :

_ ياختي ما تغوري في داهية هو أنا نقصاكي. 

ولأول مرة لم تستاء ليلة العيد من هذا الرد القاس، بل ابتسمت وذهبت لغرفتها لتبدل ملابسها سريعا قبل أن يستيقظ الجميع وتنهمر على رأسها التساؤولات ..

وحالما انتهت من أرتداء "بدلة" أنثوية باللون الأسود الفحمي ، وقميص أبيض ناصع أسفل المعطف .. وأحكمت حجابها الرقيق، وقفت أمام المرآة بثقة وابتسامة عريضة .. لا يشوب هذا المظهر سوى تلك النظارة السميكة على عينيها .. 

وشردت فجأة حينما تذكرت الأمس وهو يضع نظارتها على عينيها وقف أمامها متأملًا وجهها بثبات .. 

نفضت ليلة أفكارها سريعاً .. حتى همست لها لوتس بدعم :

_ خليكي دايمًا فاكرة أهم حاجة .. أنك تستحقي كل خير .

تبسمت ليلة العيد لها بمحبة وسألتها بصدق :

_ كده شكلي كويس ؟

صفرت لواس بإعجاب وقالت بغمزة :

_ كويس جدًا جدًا .. روحي أنتي وأنا ورايا مشوار مهم وجاية وراكي. 

لم تسألها ليلة من رغبتها في أن تغادر المنزل بأسرع وقت ، فحملت حقيبة كتفها واسرعت الخطا متجاهلة تمامًا النظرات الجانبية لخالتها سميرة التي لاحقتها بدهشة وهي متوجهة للخارج. 

_____________________________

وبالشركـــة السياحية ..

خرجت "ليلة العيد " من سيارة أجرة خاصة أمام مبنى الشركة .. وسارت بثقة لم تشعر بها يوما بنفسها، رغم أن تلك الثقة لا زالت ممزوجة بالقلق والتوتر والشك .. 

وحينما دخلت المبنى وسارت عدة خطوات وقفت وهي تنظر للمصعد وتذكرت ما حدث بالأمس ... فابتلعت ريقها بصعوبة وابتعدت عن ذلك المصعد اللعين ووقفت أمام الآخر الخاص بالموظفين .. 

وفتح باب المصعد ودخلته ، وما كادت أن تضغط زر الصعود حتى دهشت بدخول "هاكان" بملامح وجهه الجامدة مع حارسيه الضخمان ، ولم يلقي عليها أدنى نظرة حتى ..  رفعت نظارتها أعلى أنفها بتوتر شديد ولم تستطع الأعتراض، وتساءلت بخفوت :

_ هو في إيه .. مش المفروض ده بتاع الموظفين؟! 

ويبدو أنه قرأ أفكارها ، فقال للحارسان بعصبية :

_ هاتوا أي حد للصيانة بسرعة .. مش معقول هستخدم الأسانسير ده ؟! 

وهنا فهمت ليلة العيد الأمر، فالمصعد الآخر قد تعطل ! .. رغما عنها ضحكت .. فألتفت لها "هاكان" بنظرة مهددة ومتوعدة أيضاً عندما لاحظ ضحكتها المتشفية فيه ... 

حاولت "ليلة العيد" كتم ضحكتها بما لديها من قوة، ولكن انفلتت منها وضحكت بخفوت .. ضحكتها جعلت الحارسان يبعدان وجهها عن "هاكان" لكي لا يرا بوادر الأبتسامة عليهما ! ... 

ووقف المصعد أمام الطابق الخامس ... وخرج "هاكان " أولًا ... ولكنه توقف واستدار لها ، بينما كانت ليلة العيد في طريقها لـ "منة" كي تعرف وظيفتها المؤقتة وتبدأ فيها .. ولكن أشار لها "هاكان" أن تتبعه حتى مكتبه .. 

ابتلعت ليلة العيد ريقها بتوتر وسارت خلفها مرغمة ، وتحاشت أن تثير أستفزازه أكثر من ذلك .. 

وبعدما جلس "هاكان" أمام مكتبه بكامل هيبته وحضوره الشرس .. رمقها بنظرة متفحصة لمَ ترتديه وابتسم بسخرية وقال :

_ تعبتي نفسك على الفاضي .. 

لم تفهم قصده ليلة العيد وتساءلت بريبة :

_ مش فاهمة حضرتك تقصد ايه ؟! 

ضيّق عيناه عليها ثم نهض ووقف قبالتها مباشرةً بثقة قريبة للغرور :

_ حضرتي يقصد أن اللبس ده مش مناسب أبدًا لشغلك الجديد .. أصل شهادتك ما تشغلكيش عندي غير أنك تعمليلي قهوة كل لما أطلب .. 

فغرت "ليلة العيد" فاها من الصدمة ولم تتخيل الأمر نهائيًا ، والتمعت عيناها بدمعة جاهدت أن تخفيها ، ثم نظرت لعيناه المنتصرة الشامتة في ضيقها وقالت بقبول لكي لا يهنأ بأنتصاره الرخيص :

_ تمام .. حضرتك بتشربها إيه ؟ 

ضيّق "هاكان" عيناه بغيظ وظهرت عروق فكيه المشيرة لشدة عصبيته .. وهتف بها :

_ لما أعوز هبقى أقولك .. هتلاقي المطبخ آخر الممر .. ده مكانك المناسب .. 

لم تعرف ليلة لما فعلت ذلك، ولكنها نظرت له نظرة مليئة بالعتاب وشفتيها ترتعشان بالدموع وكأنها طفلة تشعر بالظلم .. وسارت متوجهة للخارج وهي تبتلع مرارة بحلقها .. هي حقا لا تعرف لمَا يتحداها لهذه الدرجة !. 

وبالمطبخ الكبير ..

الذي به كل الامكانيات لإعداء جميع المشروبات الدافئة والعصائر الطازجة ....

جلست "ليلة العيد" على مقعد خشبي وجدته أمامها واستندت بمرفقيها على طاولة مستطيلة خشبية واجهشت بالبكاء .. 

حتى انتبهت لصوت يسألها بتعجب :

_ بتعيطي كده ليه ؟! 

فزعت ليلة العيد بأول وهلة، ثم سألته وهي تمسح عينيها :

_ أنت مين ؟! 

أجاب الصبي ذو الثامنة عشر عاما وقال :

_ أنا سقراط .. بتاع الشاي .

____________________________

يتبع 

بداية الرواية من هنا

لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم 

جميع الروايات كامله من هنا 👇 ❤️ 👇 

روايات كامله وحصريه

اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇 

روايات كامله وحديثه

❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺