رواية قايمة جواز الحلقه الاولى بقلم الكاتبه أماني سيد حصريه وجديده على مدونة النجم المتوهج للروايات والمعلومات
رواية قايمة جواز الحلقه الاولى بقلم الكاتبه أماني سيد حصريه وجديده على مدونة النجم المتوهج للروايات والمعلومات
كانت قاعدة قصاد صاحبتها في كافيه صغير على ناصية الشارع، وكانت مش مصدقه اللى بتسمعه من صحبتها
قالت لها وهي مبهورة من برودها:
ـ أنا مصدومة... إزاي يا بنتي باردة كده وانتي عارفة إن خطيبك بكرة رايح يخطب واحدة تانية؟
رفعت عينيها في كباية القهوة، وبتنهيدة باردة ردت:
ـ عادي.
ـ عادي؟! طيب هو يعرف إنك عارفة؟
ـ لا.
ـ إنتي بتتكلمي بجد؟ ليه ماواجهتيهوش؟
ـ مايستحقش حتى إني أعاتبه أو أعمله قيمة... هو أقل بيكتير من أنى اقوله أنت عملت كده ليه
صاحبتها ضربت كف على كف:
ـ تصدقي ده جبروت؟ شغالين سوا، ومخطوبين، ورايح يخطب تاني من وراكي! مش بعيد يتجوزها كمان من غير ما يقولك. بس كل ده ممكن أعديه... إنما إزاي قدر يقنع زمايلنا مايحكولكيش؟!
ضحكت بسخرية وقالت:
ـ عايزني أبقى مسخرة قدامهم؟ يشوفني وأنا منهارة وبعيّط وبقوله "ليه بتعمل فيا كده؟"... هو نفسه يشوفني مكسورة.
ـ منه لله... روحي ارمي دبلته فوشه.
ـ إنتي غبية يا بنتي! لأ طبعًا... مش بالسهوله دى أنا ناوية أقلب اللعبة عليه وأديله درس عمره ما هينساه .
ـ إزاي يعني؟ هتتخطبي إنتي كمان بكرة؟ ولا هتسيبي الشغل وتقوليله إنك كنتي عارفة من الأول؟
ـ لأ يا قمر... بقولك درس مش هينساه. إنتي عايزاني أسيب الشغل وأهرب؟ لأ طبعًا.
أنا اللي هخليه هو اللي يبقى المصدوم... صورتي اللي بيشوّهها في دماغ زمايلنا، وكل كلمة باطل قالها عني، هعرف إزاي أقلبها عليه، وأخليه هو اللي يلبس فيها.
سكتت صاحبتها لحظة، وبصتلها بقلق، وقالت بصوت واطي:
ـ طب هو... بيعمل كده ليه
أخذت سميحه نفس عميق واخرجته ببطئ
ـ بقالي سبع شهور مخطوبة، كل مرتبي رايح على التجهيزات والفرش والأجهزة. ماما وبابا بيشيلوا اللقمة من بوقهم عشان يجهزونى ويجيبولي أحسن حاجة. حتى الخطوبة كلها كانت على حسابنا... ولا دفع جنيه لا فستان ولا ميكب ولا حتى حاجة ساقعة ، واحنا مطالبناش منه حاجه .. حتى الشبكه جاب دبله وخاتم صغيرين ، قولنا معرفش نقدر ظروفه
ـ والله ولاد أصول... عملوا اللي عليهم وزيادة.
ـ طبعًا، المهم من شهر بابا كتب كل حاجة إحنا جبناها و جه اتصل بيه عشان يسأله عن حاجته هو عشان تتكتب في القايمة.
ـ وده حقكم.
ـ الباشا طبعًا معجبوش الكلام، ورفض يكتب قايمة. فضل يقول لبابا: "إنتو بتخوني، ومبقاش فيه حاجة اسمها قايمة"، ويوريله صفحات فيس لشباب بيتكلموا عن إلغاء القايمه وانها ممكن تسجنه فى يوم من الأيام وإننا كده بنخونه
ـ لأ بجد؟!
ـ أه والله زى ما بقولك كظه بابا رد عليه: "خلاص يا ابن الناس... مش عايز تكتب قايمة؟ بلاها. بس تدفع مهر وتكون ملزوم تفرش شقتك من أولها لآخرها. وإحنا ولاد أصول، مش هنعترض هنرضى باللى هتجيبه . واللي جبناه بنتي الصغيرة أولى بيه. إنت بتكلمني ببوستات وفيس، وأنا بكلمك بشرع ربنا".
ـ والله أبوكي راجل.
ـ هو ملقاش رد، قاله: "أنا هشوف الحاجات وأكتبها وأقولك"، ومن يومها اختفى... كلامه بقى قليل.
ـ وإنتي رأيك إيه ؟
ـ الراجل اللي بيرمي ودنه للنت... مايلزمنيش. كل مشكلة هتحصل بينا هلاقيها منشورة في جروبات الفيس وحيتنا هتبقى مشاع للكل . أنا مش هبقى تريند لحد... أنا اللي هخليه تريند.
ـ والله عندك حق تقلقى منه مالوش أمان
ـ عشان كده أنا كنت ناويه اجبله شبكته واسيبه لكن لقيت ميار زميلتنا اللى كانت شغاله معانا هنا واتنقلت قسم تانى جت وحكتلى كل حاجه
ـ قالتلك ايه
ـ قالتلى إن البيه بيقولهم ان هو جايب كل حاجه وانا جايبه حاجات بسيطه ومرتبى كله بدخل بيه جمعيات وإن بابا خلاه هو اللى يجيب كل حاجه وفوق ده كله عايز يكتبه قايمه وإنه جايبلى دهب بشئ وشويات ده غير الهدايا واللذى منه
ـ صبرى جاب كله ده ضحكتينى
ـ متفكرنيش دى هى مره واحده بس اللى دخل عينا بحاجة فى ايده وكانت علبه حلويات من محل تحت بيتهم وفاكر نفسه ياما جاب شئ وشويات وانا مكنتش بحرجه كنت مدياله عذره انه بيجهز وانا الحمد لله مش ناقصنى حاجه
ده انا لو احكيلك موافقه معايا تقولى كنتى مستحملاه إزاى
تعرفى يا قمر امه كانت عندنا مره وفى وسط كلامها بتقولى . مرات ابنى الكبير بتجيلى كل يوم معادا الجمعه والسبت تنضفلى وتشوف طلباتى لما تتجوزى من صبرى تبقى انتى يوم وهى يوم
ـ ايه ده بجد
ـ اه والله
ـ وانتى رديتى عليها قولتلها ايه
ـ مردتش عملت نفسى ماسمعتش ولما كلمته تانى يوم قالى دى بتهزر
تعرفى عمرهم ماعذمونا عندهم بحجه إن امه ست كبيره ومش مخلفه بنات وصعب تطبخ لنفسها وشايفه انها عيبه تعزمنا على اكل جاهز .. لكن كل شهر كنا لازم نعمل عزمه كبيره ليهم
ده مره عرض عليا امى نعمل عزومه لاهلى عندهم بس شرط عليا انضف الشقه قبل ما امشى عشان امه ماتتعبش ومرات اخوه مش هتكون موجوده يومها . انا فى البداية كنت فكراه بيهظر لكن طلع بيتكلم جد ...
وقتها رفضنا طبعا وقولنا هنعملها عندنا وعزمنا أهلى وأهله
ـ إزاى استحملتى كل ده ؟؟
والله يا قمر اوقات كتير كنت بفكر افركش بس بقول عمرى بيجرى منى والوقت اللى قضيته معاه ده اعوضه إزاى
بس الحمد لله إن ده حصل ودى علامه من ربنا عشان مكملش
ـ طيب ناويه تعملى ايه
ـ ناويه أعلمه إن بنات الناس خط أحمر إن إحنا مش لعبه ومش خدامين لأهله
يتبع
تعليقات
إرسال تعليق