رواية العذاب الممتع بقلم الكاتب حازم الباشا حصريه وجديده وكامله جميع الفصول على مدونة النجم المتوهج للروايات والمعلومات
 |
《المشهد الاول : من قلب العاصمه الفرنسيه ، باريس》
خرجت "نهله" من بوابة فيلا "مراد" بيه مديرها ، وصاحب الشركه
كانت بتجري وهي متوتره جدا ، وجسمها بيرجف من شدة الخوف !!!
وبسرعه ...
نطت في العربيه اللي مأجراها ، وشغلت جهاز تحديد المواقع GPS ، وانطلقت بأقصى سرعه
واول ما اطمنت انها بعدت عن الفيلا ، راحت متصله ب "عادل" جوزها على الموبايل
واول ما انفتح الخط ...
قالت له ، وهي لسه بتترعش من كتر الخوف :
الحقني بسرعه يا "عادل"
انا حاسه ان الزفت
اللي اسمه مراد ده
حطلي حاجه في العصير !!!
رد عادل وهو مذعور :
انتي فين دلوقتي ؟
وعصير ايه اللي بتتكلمي عنه !!!
ومراد بيه
هيحطلك ايه يعني
سم مثلا !!!
ردت نهله بعصبيه :
سم ايه بس يا عادل !!!
لا طبعا
انا قصدي انه حط لي مخدر
او منوم
رد عادل باندهاش :
ومراد بيه
هيحط لك مخدر ليه !!!
وايه اصلا اللي عرفك
انه حط حاجه في العصير
ممكن تهدي
وتفهميني الموضوع
من اوله ؟؟؟
بدأت نهله تهدا شويه ، وقعدت تشرح لعادل كل اللي حصل :
انا نزلت من الفندق
ورحت اوديله
الورق اللي كان طالبه
زي ما انت عارف
لقيته جايبلي عصير
وبيقولي لازم تشربيه !!!
واول ما دوقت العصير
لقيت طعمه غريب
فقلتله العصير وحش
ورحت جاريه بسرعه من قدامه
وفتحت الباب وخرجت
رد عادل وهو منفعل :
هو ده كل الموضوع !!!
بقا كل الجنان ده
عشان الراجل ضايفك في بيته
وجاب لك عصير
وطلع طعمه مش عاجبك !!!
انفعلت نهله لاقصى حد ، وقالت بنرفزه :
يا عادل
انا قلت لك ميت مره
اني مش مرتاحه للراجل ده
نظراته ليا
مش مريحاني
يا اخي افهمني بقا
انا ست وبحس باللي قصادي
رد عادل بنرفزه :
بطلي اوهام بقا يا نهله
الراجل ده أد ابوكي
وبيعاملك على انك زي بنته
انا بشتغل معاه
من قبل ما اعرفك واتجوزك
وعمري ما شفت منه
اي حاجه وحشه
بالعكس
ده كل الناس بتحلف بإخلاقه
ردت نهله وهي مخنوقه :
يا عادل انا بجد
بخاف من الراجل ده
واحساسي بيقولي
انه مش محترم
رد عادل بانفعال :
انتي بقالك اكتر من شهرين
وانتي شغاله معاه
هل عمل معاكي
اي حاجه مش مظبوطه ؟؟؟
ردت نهله باستسلام :
ايه اللي انت بتقوله ده
هو يعني لو عمل حاجه
انا كنت هاسكت له !!!
رد عادل :
يعني كل الموضوع
هو مجرد احساسك وبس
والراجل طلع اهو
ما عملش اي حاجه
نهله اتضايقت اكتر من برود جوزها ، وقالت بنرفزه :
هو ايه البرود اللي انت فيه ده
انا اصلا مش مستوعبه
انت ازاي وافقت
اني اروح له
لحد بيته لوحدي !!!
وبعدين اصلا ليه اصر اني لازم
اوديله الورق على البيت
نفخ عادل وقال بزعيق :
يعني بعقلك كده
مفروض ياخد منك الورق فين
يا نهله احنا مش في مصر
احنا في فرنسا
والراجل واخدنا معاه
عشان يخلص الصفقه بتاعته
ومعندوش مكتب هنا يقابلك فيه
وانا لولا مشوار البنك
كنت هاجي معاكي
ردت نهله بارتباك :
بطل زعيق يا عادل
واقفل بقا
انا الجي بي اس توهني
ومش عارفه ارجع للفندق بتاعنا
---------------------ء
في اللحظه دي ...
ونهله بتبص على برنامج تحديد المواقع على موبايلها ، عشان تشوف الطريق اللي لازم تدخله !!!
مخدتش بالها انها داست بزياده اوي على دواسه البنزين ، وعربيتها خبطت في العربيه اللي قدامها !!!
واتقلبت نهله بالعربيه !!!
---------------------ء
وبعد يومين من الحادثه ...
فاقت نهله ...
وفتحت عينيها بصعوبه ، وهي مدروخه جدا ، عشان تلاقي نفسها قاعده في غرفه عنايه مركزه في مستشفى !!!
كانت راسها مربوطه ، وايدها الشمال متجبسه ، وجسمها متوصل بالاجهزه الطبيه !!!
وحاسه بصداع فظيع ، ووجع في كل حته في جسمها
وفجأه ...
دخلت عليها ممرضه فرنسيه ، وحاولت تتكلم معاها باللغه الانجليزيه ، لأن نهله ما بتعرفش تتكلم فرنساوي !!!
وقالت لها ، انها وصلت للمستشفى من يومين ، وهي عندها نزيف بسيط في المخ ، وشويه كسور وجروح
وانها عملت عمليه ، والدكاتره قدروا يوقفوا النزيف ، وان حالتها استقرت ، ولازم ترتاح دلوقتي ، وما تبذلش اي مجهود
وراحت الممرضه حقناها بمنوم ، وفي لحظات فقدت نهله الوعي مره تانيه
--------------------ء
تاني يوم الصبح ...
صحيت نهله ، وكانت لسه مدروخه ، لقت "مراد" بيه نايم على كرسي جنبها وماسك ايدها !!!
اتخضت نهله لما من المنظر كله ، وزقت ايد مراد وبسرعه سحبت البطانيه وسترت جسمها ، وراحت مزعقه :
ايه اللي انت بتهببه ده !!!
انت ازاي تمسك
ايدي كده يا حيوان
اتفزع مراد من نومه ، واتنفض وقال :
الحمد لله
الحمد لله
حمد الله على السلامه يا ....
قاطعته نهله ، وهي مكشره ومنفعله :
وازاي تبات
معايا كده في الاوضه !!!
وفين عادل جوزي
اتفضل اطلع بره الاوضه
مش عاوزه اشوف وشك
رد مراد وهو بقمه الانفعال :
ايه التخاريف اللي
انتي بتقوليها دي
انتي مش عارفه انا مين ؟؟؟
ردت نهله ، بكل عصبيه :
طز فيك وفي فلوسك
انت واحد قذر
وانا غلطت لما وافقت
اشتغل مع واحد
زباله زيك
انا عاوزه عادل
فين عادل
وقف مراد متنح ، من ردة فعل نهله ، وقبل ما ينطق ، كانت نهله بدأت تزعق بصوت عالي :
يا عادل
يا عااااادل
دخل الدكتور الفرنساوي على صوت زعيق نهله ، واتكلم باللغه الفرنسيه
نهله ما فهمتش بيقول ايه !!!
بس مراد رد عليه ، وفضلوا يتكلموا شويه باللغه الفرنسيه ، بعدها مراد طلع وهو بيضرب كف على كف !!!
والدكتور بدا يتكلم مع نهله بالانجليزي :
صباح الخير
ارجوكي اهدي
انتي خارجه من عمليه في المخ
والانفعال خطر على صحتك
ردت نهله بالانجليزي :
صباح النور
فين جوزي ؟
وفين التليفون بتاعي ؟
لو سمحت انا عاوزه جوزي
رد الدكتور :
للمره التانيه بطلب منك تهدي
لان الانفعال خطر
وخليني افحصك الاول
وبعد كده
هانشوف فين جوزك
ونبلغك هو فين
استسلمت نهله ، وسابت الدكتور يفحص عينيها ، ويتأكد انها بقت كويسه
الدكتور طلب منها تحرك صوابع اديها ، ورجليها ، وقعد يسألها شويه اسئله :
النهارده يوم ايه في الاسبوع ؟
انتي اسمك ايه ؟
جوزك اسمه ايه ؟
هل فاكره انتي جيتي هنا ازاي ؟
حاصل ضرب رقم ٢ في رقم ٤ كام ؟
وخلص الفحص ، وقال لنهله :
مبروك
انتي سليمه
وتقدري تخرجي من المستشفى اخر اليوم
وانا هاسأل على رقم
جوزك في الاستقبال
ونتصل بيه
لان تليفونك تقريبا ضاع في الحادثه
وخرج الدكتور ، وساب نهله بتفكر وعقلها بيغلي ، وقعدت تقول لنفسها ....
(ازاي عادل يسيبني)
(وانا في الحاله دي)
(وازاي وافق ان الحيوان مراد ده)
(يبات معايا في الاوضه ) !!!
(يا ترى الزفت ده)
(عمل فيا ايه وانا نايمه)
(مش بعيد يكون هو اللي كشف البطانيه)
(من على جسمي)
(ويكون عمل .....!!!
فجأه انفتح الباب ، وانقطع حبل افكار نهله
ودخلت ممرضه بتتكلم انجليزي ، وبلغت نهله ، ان المستشفى اتصلت بعادل جوزها ، وهو في الطريق !!!
--------------------ء
وبعد حوالي ساعه ...
دخل عادل على نهله ، وهو مخضوض ومرتبك !!!
واول ما نهله شافته ، راحت مزعقه فيه :
كنت فين يا عادل
وازاي تسبني
وانا في الحاله دي
وازاي تسيب الزفت مراد ده
يبات معايا في نفس الاوضه
انا صحيت لقيت الحيوان ده
نايم على كرسي جنبي
وماسك ايدي !!!
رد عادل بتوتر اكبر :
اهدي يا نهله
العصبيه غلط جدا عليكي
انا عرفت كل اللي حصل
زادت عصبيه نهله وقالت :
انا عاوزه انزل مصر حالا
ومش عاوزه اشوف
وش الكلب ده تاني ابدا
رد عادل بارتباك وغضب شديد :
اهدي يا نهله
وبطلي غلط في الراجل
انتي مش فاهمه حاجه
الراجل ده بيعمل المستحيل
عشان ينقذك من السجن !!!
اتنفضت نهله وردت بذعر :
سجن !!!
سجن ايه !!!
انا مش فاهمه حاجه !!!
رد عادل بضيق :
انا من امبارح
وانا قاعد في قسم البوليس
بسبب الحادثه اللي حضرتك عملتيها
لانك خبطي واحد
وهو دلوقتي في المستشفى
وحالته حرجه
ده غير عربيته اللي اتدشدشت
ردت نهله بارتباك وخوف :
طب ما انا كمان في المستشفى
وعملت عمليه
وعربيتي اتدشدشت
قصدي العربيه اللي مأجراها يعني
رد عادل بامتعاض :
لا طبعا
الموضوع مش بالبساطه دي
اولا ... الحادثه متصوره
بكاميرات المراقبه اللي في الشارع
وانتي كنتي سايقه بسرعه عاليه
وكمان وماسكه الموبايل !!!
وتقربر البوليس مطلعك
انتي اللي غلطانه
وده معناه انك هتدخلي السجن
وممكن تتحبسي سنتين تلاته
ولو الراجل اللي خبطيه
ده مات بعد الشر
فالعقوبه ممكن توصل
لعشر سنين سجن !!!
انهارت نهله بالبكاء ، وقعدت تلطم على وشها وتقول :
يا نهار اسووود
يا نهار اسوووووود
طب والعمل
هنعمل ايه في المصيبه السودا دي
رد عادل :
مراد بيه بيحاول يوصل لحل
ودفع رشوه لادارة المستشفى
عشان يأجلوا خروجك
عشان المفروض انك
تخرجي من المستشفى عالسجن !!!
ردت نهله بكل حزم :
وايه المقابل بقا لكل ده
هو فاهم انه لما يعمل كده
هيقدر يشتريني !!!
رد عادل بكل نرفزه :
هو ده وقته يا نهله !!!
إحنا في كارثه
وانتي برضوا
لسه عايشه في اوهامك !!!
ما سألتيش نفسك
مين دفع تمن العمليه بتاعتك ؟؟
ومين دفع تمن تصليح عربيتك الايجار
عشان الشركه اللي
مأجره منها العربيه
ما ترفعش عليكي قضيه تانيه ؟؟
ومين دفع تمن تصليح العربيه اللي خبطيها ؟؟؟
تحبي اتصلك بمراد بيه
وتقولي له انك رافضه اي مساعده منه ؟؟؟
ردت نهله بارتباك :
ايوه
اتصل بيه
انا مش عاوزه اي حاجه من وشه
اندهش عادل من رده فعل نهله ، وقام مطلع التليفون واتصل بمراد وقال :
مساء الخير يا مراد بيه
نهله كانت عاوزه تكلم حضرتك
مسكت نهله التليفون بارتباك ، وقالت بصوت مبحوح :
انا ...
انااااا
انا اسفه يا مراد بيه
وراحت قافله الخط في وش مراد !!!
وراحت منفجره في العياط !!!
عادل راح مزعق فيها :
ده اللي انتي فالحه فيه
يا تزعقي
يا تعيطي
وراح سايبها وهي بتعيط ، وخرج من الاوضه ، وعلى وشه ابتسامه خبيثه مش مفهومه !!!
رواية " العذاب الممتع " - الحلقه الثانيه
فضلت نهله تعيط بحرقه ...
وتقول لنفسها ...
(ايه القرف اللي انتي عملتيه ده يا نهله) !!!
(بدل ما تهزقي الحيوان اللي اسمه مراد ده)
(تقومي تعتذري له) !!!
(كل ده عشان خايفه تتسجني) !!!
(زمانه دلوقتي بيقول عليكي بت صايعه)
(واكيد هيطمع فيكي اكتر)
(ومش بعيد يساومك على حريتك)
(مهو خلاص كده ... بقت حريتك في كفه)
(وشرفك في الكفه التانيه) !!!
وبدون اي مقدمات ، حست نهله بخوف ورعب من اللي ممكن يحصل فيها
وضربات قلبها زادت ، وبدا جسمها يتنفض جامد ، ونفسها انقطع ، وفجأه غابت عن الوغي ... وأغمى عليها !!!
------------------------ء
مرت حوالي ساعه ....
وفاقت نهله عشان تلاقي مشهد غريب جدا !!!
مراد بيه محاوط كف ايدها بإيديه الاتنين ، وعمال يعيط زي الاطفال
المره دي مسكت نهله اعصابها ، وحاولت تتحكم في انفعالها ، خصوصا وإن عياط مراد ، خلاه يعصب عليها
فسحبت ايديها بالراحه ، واول ما مراد حس انها فاقت ، سحب ايده ، ومسح دموعه ، وراح مهلل بصوت كله فرح وقال :
حمدالله على سلامتك
يا ست الكل
انتي حاسه بإيه
ردت نهله بصوت مبحوح :
الحمد لله
انا كويسه
شكرا لاهتمامك يا مراد بيه
فين عادل ؟؟؟
مراد في اللحظه دي كان اداها ضهره ، وطلع بسرعه ينادي على الدكتور ، ويبلغه ان نهله فاقت
ونهله كانت في حاله من الذهول ، وعماله تسال وتكلم نفسها ...
(هو الحيوان ده كان بيعيط ليه)
(معقوله يكون فعلا بيحبني زي بنته)
(وايه اللي خلاه يصبغ شعره اسود) !!!
(ده مش بس صابغ شعره ، ده تقريبا عمل بوتكس)
(تجاعيد وشه تقريبا اختفت)
(يا نهاااار اسود ... ليكون عمل كده عشاني انا)
قطع حبل افكارها ، دخول مراد مع الدكتور ، اللي اول ما دخل راح فحصها كالعاده ، وراح سائلها بالانجليزي :
انتي اسمك ايه ؟
ومين اللي واقف معانا ده ؟
وفضلت نهله تجاوب على كل الاسئله ، لحد ما سألها عن اسم المدرسه الابتدائيه بتاعتها !!!
وهنا حصلت الصدمه الكبيره !!!
نهله تنحت فجأه ، وما عرفتش تفتكر اسم المدرسه ، ولا تفتكر اي شيء من طفولتها !!!
وقالت للدكتور وهي بتعيط :
انا مش فاكره اي حاجه عن طفولتي
ولا حياتي وانا صغيره
انا فقدت الذاكره !!!
وارحت مفتوحه في العياط بشكل هيستيري ، ومراد كمان بدأت دموعه تنزل غصب عنه
حاول الدكتور يهدي الموقف المتأزم ده وقال بكل هدوء :
اهدي مدام نهله
دي حاله نشيان مؤقته
بسبب الحادثه والعمليه
وان الانفعال الزايد هو السبب
في ان الحاله دي ممكن تزيد !!!
فأرجوكي حاولي تهدي وتسترخي
وجودك في اجواء التوتر
اللي جوا المستشفى
بيزيد من سوء حالتك
فلازم تغيري جو
لان الاستقرار الذهني
هو العلاج اللي هيخليكي
تستعيدي ذاكرتك مره تانيه !!!
نهله بطلت عياط ، وشكرت الدكتور ، وبصلت لمراد بنظره كلها استغراب وقالت :
انا اسفه ...
بس بجد انا مش فاهمه
هو انت بتعمل كل ده ليه ؟؟؟
رد مراد وهو مندهش :
بعمل ايه يا نهله
وضحي كلامك
ردت نهله بارتباك :
اهتمامك ده كله ليه
وعياطك على شاني
والفلوس اللي عمال
تصرفها على علاجي
وقعادك ليل نهار
لازق كده جنبي في الاوضه
بصراحه ....
انا بدأت اقلق جدا منك
ومعلش سامحني ...
في اللي هاقوله ده
بالبلدي كده ...
انا مش مرتاحه
لوجودك في حياتي
تنح مراد شويه ، وحس ان كرامته اتبعثرت في الارض ، فرد بلهجه كلها غضب :
انا مش هارد على كلامك الجارح ده
لأني مقدر الحاله
اللي انتي فيها
واوعدك يا مدام نهله
انك مش هاتشوفي وشي تاني
قال كده وهو بيخرج بره الاوضه ، وبيرزع وراه الباب بكل غل !!!
-----------------------ء
وبعد اقل من ساعه ....
دخل عادل ومعاه ظابط بوليس فرنساوي على اوضة نهله !!!
وقال عادل ، وهو متوتر جدا :
انتي ايه اللي هببتيه ده
مراد بيه كلمني وهو شايط
وقالي انك هزقتيه وطردتيه !!!
ردت نهله برعب :
ايوه هزقته وطردته
انت بقا كنت فين ؟؟؟
وازاي سايبني
لوحدي مع الزفت مراد ده
والظابط ده جاي هنا ليه ؟؟؟
طلب عادل من الظابط انه يستنى بره الاوضه لحد ما نهله تغير هدومها
وبالفعل خرج الظابط ووقف على باب اوضه نهله من بره
واول ما خرج الظابط ، راح عادل شاخط في نهله بكل غيظ وقال :
مراد بيه سحب نفسه
من موضوعك خلاص
والمستشفى بلغت البوليس
انهم يقدروا ياخدوكي على الحجز
وانا ما كنتش بلعب
انا رحت لمحامي تبع مراد بيه
عشان يدافع عنك
بس طبعا خلاص
المحامي كمان سابني ومشي
بعد ما مراد بيه بلغه انه يمشي
انتفضت نهله من مكانها ، وبدات دموعها تنزل وهي بتقول :
يعني الظابط ده جاي معاك
عشان يقبض عليا
وخلاص كده هاتسجن
رد عادل بكل انفعال :
كل ده بسبب غباءك
انتي طردتي الشخص الوحيد
اللي كان ممكن ينقذك من الورطه دي
وعاوز اقولك على خبر
زي الزفت
الحجز في فرنسا مختلط
يعني هتقعدي وتباتي
وسط المجرمين الرجاله !!!
صرخت نهله وكل جسمها بيتنفض من الخوف وقالت وهي منهاره :
يا نهار اسود
ياااااا نهاااار اسود
مستحيل طبعا اقعد دقيقه
واحده وسط الرجاله المجرمين دول
ده انا اموت نفسي احسن
ابوس ايدك يا عادل اتصرف
اعمل اي حاجه
رد عادل :
انتي عارفه الحل
لازم تعتذري لمراد بيه
وتترجيه كمان يسامحك
ويقف معانا في الورطه دي !!!
ردت نهله باستسلام واضح :
حاضر يا عادل
اتصلي بمراد بيه
هدي عادل فجأه ، وبسرعه اتصل بمراد وقال :
معلش يا مراد بيه
نهله معايا اهه
وهي عاوزه تعتذر لحضرتك
ختم الكلمه وهو بيدي التليفون ، وهي بلعت ريقها بصعوبه ، وقالت بصوتها المخنوق بالعياط :
انا في عرضك يا مراد بيه
سامحني على اي كلمه قلتها
انا مكنتش في وعيي
وابوس رجلك اقف ....
قاطعها مراد بصوت هادي :
بس يا نهله
ما تقوليش كده
اهدي دلوقتي
وانا هاتصرف
اديني عادل لو سمحتي
ناولت نهله التليفون لعادل ، وانفجرت في العياط
وعادل خد التليفون ، وخرج من الاوضه وعلى وشه ابتسامه خبيثه !!!
----------------------ء
وبعد ربع ساعه ...
رجع عادل الاوضه ، وقال نهله وهو منفعل :
يلا يا نهله
لازم نتحرك دلوقتي حالا
ردت نهله ، وهي متوتره :
يلا فين !!!
هنروح فين يعني
والظابط اللي بره ده
هيسبنا نمشي !!!
رد عادل بنرفزه ، وهو بيساعد نهله تقعد على الكرسي المتحرك :
مفيش وقت للرغي ده
مراد بيه قالي اروح للدكتور
واديله التليفون
بعدها لقيت الدكتور قام
وراح اتكلم شويه مع الظابط
بعدها الظابط مشي
ومراد بيه قالي
انك لازم تهربي حالا
وانك لازم تغطي وشك
عشان الكاميرات
وتنزلي لوحدك على الكرسي ابو عجل
لحد باب المستشفى
وهناك هتلاقي عربيه
مرسيدس حمرا مستنياكي
اركبيها والسواق هياخدك
لحد فيلا مراد بيه
ردت نهله بصدمه :
ايه ده !!!
هو انا هاروح له لوحدي !!!
انت مش هتيجي معايا !!!!!!!!
رد عادل بعصبيه :
انا لازم انزل دلوقتي
اقعد في الريسبشن بتاع المستشفى
والكاميرات تصورني
وبعد ما تهربي
هاطلع هنا
واقدم بلاغ انك اتخطفتي !!!
لو ما عملتش كده
البوليس هيعتبر اني ساعدتك تهربي
وابقى انا كمان متهم زيك !!!
اقتنعت نهله بكلام عادل ووافقت على الخطه ، واخيرا استسلمت لحظها الهباب !!!
وبسرعه غطت وشها ، واتحاملت على نفسها ، ونزلت على الكرسي المحترك لحد باب المستشفى
وفعلا لقت العربيه مستنياها ، وراحت بيها لفيلا مراد بيه
---------------------ء
واول ما وصلت نهله لفيلا مراد بيه
لقت مراد واقف مستنيها على الباب ، وشالها من العربيه بين دراعاته ، بكل سهوله زي ما يكون شايل عصفوره !!!
وابتسم في وشها ، قال بصوت حنون :
حمد الله على السلامه
نورتي الفيلا يا نهله
كانت نهله حاسه باشمئزاز ، وايدين مراد محاوطه جسمها
وقلبها فضل يدق بقوه من كتر الخوف ، وقالت لمراد بصوت كله عصبيه :
من فضلك
نزلني يا مراد بيه
لو سمحت
انا هاقدر امشي
رد مراد وهو لسه شايلها :
هتقدري تطلعي السلم ده
ورجلك مجزوعه
وايدك مكسوره كده !!!
ردت نهله باستغراب :
اطلع فين !!!
لا طبعا ما ينفعش
انا هافضل قاعده هنا
وارجوووك بقا نزلني
رد مراد بكل ضيق ، وهو بينزل نهله بالراحه عشان تقف على الارض :
مدام نهله
يا ريت تاخدي بالك
انك حاليا مطلوب القبض عليكي
وانك هربانه من البوليس
ولو اي حد
جالي الفيلا هنا وشافك
هيبلغ عنك فورا
فلازم تستخبي فوق
في اوضه نومي
لحد ما المحامي يحل الموضوع
وتخلص الازمه
ردت نهله وهي واقفه بصعوبه على رجل واحده ، وسانده بايدها السليمه على اول ترابزين السلم :
انا موافقه استخبى فوق
بس مش في اوضه نومك
اكيد في اوض تانيه
ولي طلب
انه يكون معايا مفتاح الاوضه
اللي هاقعد وهنام فيها
وارجووووك بقا تفهم وضعي
انا ست متجوزه
ولولا الورطه اللي انا فيها
ما كنتش ممكن اقبل
بوضع زي ده
مراد رفع حواجبه باستغراب :
زي ما تحبي يا مدام نهله
اطلعي ونقي الاوضه اللي تعجبك
وهتلاقي مفتاح كل اوضه
محطوط في الباب من جوا
ردت نهله باستعطاف :
ولي طلب اخير
بلاش موضوع الشيل ده
وموضوع مسك الايد كمان
انا ما بحبش اي حد يلمسني
رد مراد بضيق :
يا بنتي انا بحاول اساعدك
بلاش تتعاملي معايا
بالعنف والحده دي !!!
حاولي تبقي لطيفه شويه !!!
ردت نهله بانفعال :
لطيفه ازاي يعني !!!
مش فاهمه قصد حضرتك !!!
هو يعني عشان بتساعدني
يبقى اسيبك تلمسني
وتحسس على جسمي !!!
احمر وش مراد من الغضب ، بص لنهله من فوق لتحت ، وراح سايبها
وخرج يقعد في الجنينه !!!
-------------------------ء
حاولت نهله تطلع السلم وهي سانده بايدها وبتنط على رجلها السليمه ، وبصعوبه شديده طلعت اول درجه
بس الالم في رجلها المكسوره ، خلاها تصرخ
فراحت قاعده على السلم ، وهي حاسه بكل العجز والارتباك والالم
حسيت نهله بإن الدنيا اسودت في عينيها ، ما بين جسمها العاجز ، وذاكرتها اللي بتضيع منها بالتدريج
وزاد من همها ، الوضع الغريب اللي هي فيه ، واللي خلاها تطلع بارادتها لحد اوضه نوم الشخص ، اللي قلبها بيقولها ، ان له غرض قذر من ورا كل اللي بيعمله معاها
وزي ما كانت نهله واثقه من إن مراد هيقدر يخلصها من مشكله السجن دي ، كانت متأكده ان اللي بيعمله معاها ده هيبقى ليه تمن ، وتمن غالي قوي !!!
دخل مراد عليها لقاها قاعده على درجه السلم وعماله تعيط !!!
وبدون ما ينطق حرف واحد ، راح شايلها ، وطالع بيها السلم ، وفتح اوضته ونيمها بكل حنيه على السرير
وهي ساكته ، وقلبها عمال يدق بقوه ، منتظره تشوفه هيعمل ايه فيها !!!
بصلها مراد بكل ود وقال :
المفتاح في باب الاوضه
بس انا مش عاوزك تتعبي نفسك
انا اتصلت ب" أمل" مراتي
وهي جايه في طيارة بالليل
واظن ده هو انسب حل
عشان تطمني
ردت نهله ، وهي بتبتسم وبتاخد نفسها اخيرا :
انا متشكره اوي لحضرتك
برغم ان "امل" هانم
مش بتطيقني
بس برضوا وجودها
هيخللي الوضع شكله
احسن بكتييييير
رد مراد وهو يبتسم :
يارب بقا اعصابك تهدا
وارتاحي بقا لحد
ما الغدا يوصل
انا طلبت لك اكل
من المطعم التركي اللي بتحبيه
وفجأه وبدون اي مبرر !!!
انتفضت نهله ، وفضلت تترعش ، ووشها اصفر ، وكأنها شافت شبح قصادها !!!
رواية " العذاب الممتع " (الحلقه الثالثه)
كانت نهله فجأه كده انتفضت بفزع ، وجسمها كله بيترعش ، ووشها اتسحبت منه الدم ، لما سمعت جملة مراد وهو بيقول انه طلب لها الغدا من المطعم التركي اللي هي بتحبه !!!
لأن في اللحظه دي ...
نط في عقل نهله مشهد غريب جدا !!!
مشهد بيجمعها هي ومراد ، وهما قاعدين سوا في المطعم ده ، ومراد بيهزر معاها ، وبيحط لها الاكل يإيده في بوقها !!!
واختفى المشهد ، برغم ان نهله ، حاولت باستماته انها تفتكر اي تفاصيل تانيه جوا المشهد ده
مراد انفزع لما شاف منظر نهله اللي اتقلب فجأه ، وسألها وهو مخضوض :
مالك يا نجوى
ايه اللي حصل
وشك اتقلب كده ليه !!!
ردت نهله ، وهي مرتبكه :
هو انا وحضرتك
رحنا المطعم ده قبل كده ؟؟؟
رد مراد وهو لسه مخضوض :
ايوه طبعا
رحناه كتير جدا
بس ايه علاقه المطعم
بوشك المخطوف ده!!!
ردت نهله :
انا قصدي هل رحنا المطعم ده
انا وحضرتك بس
لوحدنا يعني ؟؟؟
رد مراد :
مش فاكر
بس ممكن جدا
يكون ده حصل
وبرضوا انا مش فاهم
ايه علاقه ده بوشك اللي
اتخطف كده فجأه
ارتبكت نهله ، واتكسفت تحكي موضوع المشهد اللي نط في دماغها لمراد
فقالت وهي بتحاول تبين انها بقت كويسه :
ما تقلقش يا مراد بيه
انا بس اتضايقت
اني مش فاكره اي حاجه
عن موضوع المطعم ده
هدي مراد لما شاف نهله بدأت تهدا وقال :
طيب انا هاسيبك ترتاحي
وهاقفل الباب عشان
تبقي براحتك
وما تخافيش
مش هادخل الا لما اخبط الاول
قال جملته ، وهو بيخرج من الاوضه ، وبيقفل الباب وراه
----------------------ء
فضلت نهله تفكر وعقلها هينفجر من كتر التفكير
هل فعلا المشهد اللي جه في دماغها ده حقيقي ، ولا مجرد تخاريف !!!
وازاي ممكن يكون ده حصل فعلا ، مع انها مش ممكن تسمح لنفسها تعمل كده ، وهي ست متجوزه ، وبتخاف ربنا !!!
مش بس كده ، دي مش بتطيق مراد بيه ، وبتقرف منه ، واستحاله تسيبه يأكلها في بوقها
فضلت راس نهله تلعب بيها ، لحد ما التعب اتمكن منها ، ونامت !!!
------------------------ء
وبعد ساعه تقريبا ...
صحيت نهله على صوت خبط الباب ، فاتعدلت بسرعه وردت :
اتفضل يا مراد بيه
انا صحيت واتعدلت
حضرتك ممكن تدخل
فتح مراد الباب ، وهو شايل صينيه كبيره ، مليانه اطباق ، كباب وكفته ، وكل انواع السلطات
وحطها على طرف سرير نهله ، وهو مبتسم وبيقول :
يلا بقا بالف هنا
عاوزك تمسحي الاطباق
دي كلها
واول ما تخلصي ناديني
ردت نهله وريقها بيجري على الاكل من جمال منظره وريحته اللي تجنن :
تسلم ايدك يا مراد بيه
بس هو انت مش هتاكل ؟
رد مراد :
انا سايب اكلي تحت
هاكل في الجنينه
وقلت اسيبك تاكلي براحتك
ابتسمت نهله وشكرته ، واول ما طلع من الاوضه ، انقضت على الاكل ، لان دي كانت اول وجبه محترمه تدخل معدتها من يوم الحادثه !!!
نهله للاسف ، نسيت ان معدتها ما اشتغلتش من فتره طويله ، فبمجرد ما خلصت اكل ، بطنها وجعتها
وراحت مرجعه كل الاكل ، لدرجه انها غرقت السرير وهدومها ، وبقى الوضع مقرف جدااااا
حاولت نهله تقوم لكن رجلها المكسوره ، وبطنها اللي وجعاها منعوها انها تتحرك
وفضلت محتاسه مش عارفه تتصرف ، ولا حتى تتحرك من مكانها !!!
بالصدفه ...
طلع مراد عشان يطمن عليها ، ويأكد انها اكلت ، وخبط على الباب كتير لحد ما ردت عليه نهله ، وهي بتعيط :
ثواني
ما تفتحش الباب
لو سمحت
ارجووووك
اتخض مراد ، ورد بارتباك :
في ايه يا مدام نهله
بتعيطي ليه ؟؟؟
ردت نهله وصوتها مليان عياط :
انا رجعت الاكل كله
وغرقت هدومي
وبهدلت الدنيا
وانفجرت بعدها في موجه من العياط زي الاطفال !!!
بسرعه مراد خد قراره ، وفتح الباب وهو بيقول :
وايه المشكله يعني
عادي يعني
كلنا بنتعب وبنرجع
وراح مقرب وشايلها من السرير ، ودخلها الحمام ونيمها جوا البانيو
وهي عماله تعيط وتقوله :
انا اسفه يا مراد بيه
انا اسفه بجد
رد مراد بكل ود :
بطلي هبل بقا
انا هاغمض عنيا
واودي وشي الناحيه التانيه
واسندك لحد ما تقلعي
اللبس ده
نهله مكنش عندها اي حل تاني غير انها توافق !!!
وفعلا مراد ساعدها تقلع كل هدومها ، وهو فعلا مغمض ومودي وشه الناحيه التانيه
وبعد كده خرج من الحمام وسابها تستحمى وتنضف جسمها
كانت نهله مذهوله من كل اللي حصل ، وفضلت تسأل نفسها ...
(هو ازاي مراد ما قرفش من شكلي ومن ريحتي) !!!
(ده انا كنت قرفانه من نفسي) !!!
(وازاي ما استغلش الفرصه دي ، وانا كنت عريانه بين ايديه)
(انا فعلا حسيت انه ابويا او اخويا)
(اول مره ما اخافش منه، ولا اقرف من لمسته ليا)
(هو انا فعلا كنت ظلماه) ؟؟؟
(ولا هو بيمثل دور الادب ده ، لحد ما تيجي الفرصه المناسبه ويعمل اللي ....)
قطع حبل افكارها ، صوت مراد وهو بيخبط على الباب الحمام وبيقول :
مدام نهله
خلصتي ولا لسه
انا غيرت كل الملايات
والمخدات في الاوضه
وجبت لك فوطه جديده
وبيجاما نضيفه
من بتوع "أمل" مراتي
ردت نهله وهي مكسوفه :
انا خلصت
اتفضل ادخل يا مراد بيه
بس ارجوووك تغمض عنيك
فتح مراد الباب ودخل وهو مغمض عينيه ، وقال وهو مبتسم :
حاضر يا مدام نهله
من غير ما تقولي
انا رابط غمامه سوده على عينيا
واقترب منها واعطاها الفوطه ، وساعدها تلبس هدومها ، وقام شايلها مرجعها للاوضه تاني
ولاول مره ... نهله كانت مطمنه لمراد وهو شايلها
واول ما قعدت عالسرير ، قالت له وهي مبتسمه :
انا بجد مكسوفه اوي
من اللي حصل
ومش عارفه اشكرك ازاي
ربنا يسترك
زي ما سترتني
بس هو ازاي هدوم مدام امل
جت مظبوطه عليا كده
مع انها اقصر مني بكتير !!!
رد مراد بكل حنيه :
انتي بجد زي بنتي
ومفيش كلمه شكرا
بين اب وبنته
وعادي يعني البيجاما دي اصلا
كانت كبيره على امل
مسك مراد تليفونه وقال :
انا هاتصل بعادل دلوقتي
عشان يروح المطار
ويجيب " أمل "
ردت نهله بخوف :
بلاش عادل ييجي هنا
انا خايفه البةليس يكون بيراقبه
ويعرفوا مكاني !!!
رد مراد بكل هدوء :
بالعكس طبعا
طبيعي جدا يجيي هنا
بحجه واضحه
انه بيوصل مراتي للبيت
وانتهى الحوار بأن نهله اخيرا بدات تحس بالامان في بيت مراد
ومراد سابها ترتاح ونزل يتصل بعادل
-------------------ء
وبعد ساعتين تقريبا ...
وصل عادل ومعاه مدام "أمل" ، واستقبلهم مراد بكل حفاوه
وطلع عادل يطمن على مراته ، ودار بينهم الحوار ده ...
عادل :
عامله ايه يا حبيبتي
طمنيني بقا
مرتاحه مع مراد بيه
ردت نهله :
الحمد لله كله تمام
طمني بقا
عملت ايه في موضوع البلاغ
رد عادل :
ما تقلقيش كل حاجه ماشيه تمام
انا عملت محضر انك اتخطفتي
والبوليس راجع كاميرات المستشفى
ومعرفش يوصل لاي حاجه
بس احتياطي
انا مش هاقدر اجيلك كتير
لانهم غالبا مراقبيني
طمنيني عن ذاكرتك
افتكرتي ايه حاجه ولا لسه
ردت نهله بكل ضيق :
لسه يا عادل
كأن كل حاجه اتمسحت
من مخي
انا قلقانه اوي
للموضوع يزيد
رد عادل بكل ثقه :
لا ما تقلقيش
الدكاتره اكدوا لمراد بيه
ان ذاكرتك هترجع لك قريب
انا لازم امشي دلوقتي
عشان محدش يشك في حاجه
نزل عادل ، وساب نهله منتظره دخول مدام امل عليها ، وهي بتقول لنفسها ...
(يا ترى الحربايه دي هتقول عليا ايه)
(لما تلاقيني لابسه بجامتها ونايمه في سريرها)
(مصيبه لمراد بيه يقولها انه هو اللي قلعني ولبسني)
قطع حبل أفكارها ... دخول "أمل" هانم عليها
وعلى غير المتوقع ، دخلت أمل وهي مخضوضه وقالت وصوتها مليان حزن :
الف سلامه عليكي يا نجمتنا
انشالله انا فداكي
سلمتك يا روح قلبي
وراحت جاريه وفضلت تبوس نهله وتحضن فيها !!!
اتصدمت نهله من ردة فعل امل ، وقال بصوت مرتبك :
ربنا يخليكي يا مدام أمل
الحمد لله على كل حال
واسفه اني لبست بيجامتك
وقاعده في اوضتك
ردت امل بكل ود :
ما تقوليش كده
عيب عليكي
ده انتي بنتي
تدخل مراد في الحوار وهو بيضحك بصوت عالي :
خلاص يا امل
ما تزوديهاش اوي كده
وتكبري نفسك
اهدي على نفسك شويه
ههههههههههه
اتراجعت امل وقالت بهدوء :
ان شاء الله ذاكرتك هترجع لك
وتخفي وتقومي لنا بألف سلامه
تدخل مراد بحزم ، وقال بعصبيه :
يلا بقا يا امل نسيب نهله ترتاح شويه
وانتي كمان راجعه من السفر
ووحشاني اوي
ابتسمت نهله بخجل ، بعد ما فهمت تلميح مراد بيه ، وقالت وهي مكسوفه :
شكرا ليكم بجد
انا حاسه اني في وسط اهلي
وانصرف مراد وزوجته ، وانتهى الحوار
ونامت نهله وهي بتشكر ربنا انه كرمها ونجاها من ورطه الحبس والسجن
------------------------ء
ومر أسبوع كامل ...
وصحة نهله بدات تتحسن ، لكن لسه فاقده الذاكره
وكان مراد وأمل بيخدموها بكل حب ، لدرجه كانت ملخبطه نهله
ازاي مراد بيه اتحول كده لانسان محترم وعطوف للدرجه كي !!!
وازاي الحربايه امل هانم ، بدأت تعاملها بالحب والاهتمام ده كله !!!
حتى عادل نفسه اتغير ، بقا بيزورها لدقايق محدوده ، كل كام يوم عشان يطمن عليها
ويطمنها ان القضيه بتاعتها ماشيه كويس
وكأنه بيأدي واجب !!!
راح فين حبه بتاع زمان ، وازاي طول المده دي ، ما حاولش حتى انه يلمسها !!!
كانت كل الحاجات دي ملخبطه نهله جدا !!!
لحد ما جت الليله المشؤومه !!!
واكتشفت نهله السر اللي ، ورا كل التصرفات الغريبه اللي بتحصل حواليها !!!
--------------------ء
في الليله المشؤومه دي ...
كان عادل جه ، وقعد مع نهله ١٠ دقايق بالظبط
واطمن عليها ، وفرح جدا ، انها بدأت تتحرك وتمشي لكن بصعوبه
وبعد كده سلم على مراد بيه وامل هانم ، ومشي
اما مراد وامل فقعدوا يرغوا شويه مع نهله
وكانت الامور بدأت تتحسن جدا بين نهله ومراد ، وعلاقتهم ببعض بقت فعلا زي الاب مع بنته
وبعد شويه استأذنت امل من نهله ، ودخلت تنام
وسابت مراد ونهله يكملوا قعدتهم ، لحد ما النوم كبس على مراد
ودخل نام ، وساب نهله تتفرج على فيلم رومانسي في التلفزيون في اوضتها ، لحد ما كبس عليها النوم
------------------------ء
نامت نهله ، واثناء نومها
حلمت بحلم غريب جدا
شافت نفسها ، قاعده على نفس السرير ، في نفس الاوضه ، ومراد قاعد قصادها وبيلعبوا كوتشينه !!!
وكان اللعب على رهان ، اللي يخسر دور ، يقلع قطعه من هدومه !!!
وفضلوا يلعبوا لحد ما نهله خسرت كل الادوار ، ومراد بدا يحضنها ويبوسها ، وهي عماله تدلع عليه ، وتضحك بصوت عالي !!!
خلص الحلم ...
ونهله قامت مفزوعه ، وقعدت تستغفر ربنا ، وتستعين من الشيطان الرجيم
بعض لحظات كانت نهله بدأت تهدا ، بس حسيت ان ريقها ناشف ، وجسمها كله عرقان
فقامت تمشي بصعوبه ، تروح الحمام عشان تغسل وشها وتشرب
وخرجت نهله ببطء من اوضتها ، ومشيت في الممر ، لحد ما سمعت صوت عادل جوزها طالع من الاوضه اللي في اخر الممر ، وهو بيقول ... ( وطي صوتك بدل ما نتفضح )
اتفزعت نهله ، وقلبها فضل يدق بسرعه ، وبقيت رجليها مش شايلاها !!!
واتسحبت وهي بتترعش ، لحد ما وصلت لباب الاوضه
وفتحت الباب عشان تتصدم صدمة عمرها !!!
عادل جوزها !!!!
وأمل هانم مرات مراد بيه !!!
نايمين في وضع رومان،سي على الس،رير !!!!!!!!!
رواية "العذاب الممتع" - الحلقه الرابعه
كانت الصدمه عنيفه جدا ، على نهله وهي بتشوف عادل جوزها وحب عمرها "عادل" ، وهو في الوضع المشين ده !!!
وكانت صدمتها اكبر في مدام أمل مرات مراد بيه ، الست اللي كانت بتعتبرها زي امها !!!
ازاي هان عليها دينها ، وجوزها المحترم ، وازاي اخلاقها سمحت لها تقبل بعلاقه حقيره زي دي !!!
فاقت نهله من صدمتها ، وصرخت فيهم وهي بتعيط :
ايه القرف اللي انا شايفاه ده
انا مش مصدقه عنيا
انتو ازاي بالحقاره دي
ازاي مستحملين نفسكم
حسبي الله ونعم الوكيل
فيكم انتوا الاتنين
انا لازم افضحكم
وافضح قذارتكم دي
في اللحظه دي ...
كان عادل نط بسرعه من السرير !!!
ولبس قميصه وبنطلونه بسرعه البرق ، وجري مسك دراع نهله بعنف ، وقال بكل عصبيه :
وطي صوتك
وبلاش فضايح
ردت نهله بعناد :
سيب دراعي يا حيوان
انا لازم اصحي مراد بيه
ييجي يشوف الزباله مراته
بتعمل ايه
مع الموظف اللي
من دور عيالها
رد عادل بعصبيه :
ريحي نفسك مراد بيه مش هنا
بس لو حصل
وفتحتي بوقك بكلمه قصاده
فأنا هابلغ عنك البوليس
واسجنك
اعقلي واهدي كده
عشان نتفاهم
في نفس اللحظه ...
كانت مدام امل اتعدلت ولبست قميص النوم والروب بتاعها
وجريت على نهلع وراحت مطبطبه على ضهرها ، وباست راسها ، وهي بتعيط وتقول :
ابوس ايدك ما تفضحينيش
استري عليا
يستر عليكي ربنا
احنا ولايا زي بعض
وانتي ما ترضيليش الفضيحه
وانا في السن ده
انا جوزي ممكن يقتلني
لو عرف بالموضوع ده
فضلت نهله واقفه وهي مذهوله ، وعماله تبص لهم هما الاتنين باستحقار ، وقالت بكل مراره :
هي وصلت بيك
الوساخه يا عادل
انك تهددني بالسجن
انا ازاي كنت مخدوعه فيك
طول السنين اللي فاتت دي !!!
بس الحمد لله
ان ربنا فضحك قصادي
رد عليها عادل وهو مرتبك :
ما تفوووووقي بقا
من الجنان والعبط اللي
انتي فيه ده !!!
انا عمري ما حبيتك
انا مستحملك
ومستحمل جنانك ده
عشان انتي صعبانه عليا
مش اكتر
ردت نهله وهي منهاره :
وايه اللي جابرك
تعيش معايا
واتجوزتني ليه من اصله
طالما ما بتحبنيش
رد عادل وهو خلاص على وشك انه يضرب نهله :
انا مستحمل طولت لسانك دي
عشان انتي واحده مريضه
بس نص كلمه كمان
وهاسمعك كلام زي الزفت
امل شافت عادل منفعل كده ، راحت ماسكاه ومقعداه على طرف السرير ، وقالت وهي بتستعطفه :
اهدا يا حبيبي
خلينا نعدي الليله دي
على خير
انا اللي هاروح في داهيه
لو الموضوع ده
ما اتحلش دلوقتي
تدخلت نهله في الحوار ، وقالت بكل اشمئزاز :
ولما انتي خايفه
اوي كده على سمعتك
بتتنيلي تعكي وتخوني
الراجل الطيب اللي
انتي على ذمته ليه
رد عادل بكل استفزاز :
خلصنا بقا يا نهله
من الاخر كده
انتي لا شفتي حاجه
ولا عرفتي حاجه
ومراد لو عرف بعلاقتي مع امل
فما تلوميش الا نفسك
لاني ساعتها
عليا وعلى اعدائي
وهابلغ البوليس عنك
وهاسجنك
ومش بس كده
ده انا هاروح لاهلك
واقولهم انك على
علاقه مع مراد بيه !!!
حسيت نهله ، ان قلبها خلاص هيقف من كتر الخوف ، وعقلها انجمد من الصدمه
وعرفت انها بقت تحت رحمه انسان حقير وندل اسمه ... عادل
فردت بكل استسلام :
انا هاعمل كل اللي
انت عايزه بس بشرط
تطلقني دلوقتي حالا
رد عادل وهو مبتسم :
غالي والطلب رخيص
انتي طالق يا نهله
طالق
طااااالق
بس قصاد الناس هتفضلي
مراتي وحبيبتي
وهاتعملي امل كويس
ومراد مش هايعرف اي حاجه
عن كل اللي حصل دلوقتي
مفهوم يا هااانم !!!
ردت نهله وهي حاسه بكل الذل والمراره :
مفهوم طبعا
حسبي الله ونعم الوكيل فيكم
ربنا قادر ياخد لي حقي
رد عادل وهو بيقرب من امل وبيحط دراعه عليها :
يلا بقا من غير مطرود
اطلعي وخدي الباب
في ايدك
وقام زاقق نهله بره الاوضه ، وقفل الباب عليه هو والحيوانه اللي اسمها ... أمل !!!
---------------------ء
رجعت نهله اوضتها ، وهي حاسه ان الارض بتلف بيها
واول ما دخلت اوضتها ، اترمت على سريرها ، وانفجرت بالعياط ، وفضلت تقول لنفسها ...
(انتي ازاي تقبلي كده)
(ازاي تشتركي معاهم في المؤامره القذره دي)
(بقا عشان تحافظي على حريتك)
(تخوني الراجل اللي مد لك ايده)
(وتسيبي عادل الحيوان ده)
(يمرمغ شرف مراد بيه ، وانتي واقفه تتفرجي)
(انتي حيوانه زيك زيهم ، ما تفرقيش حاجه عنهم)
فضلت نهله تندب حظها ، وتلوم نفسها طول الليل
والشيء اللي كانت نهله مستغرباه ، ان زعلها على مراد ، واحساسها بعذاب الضمير ، كان اكبر من صدمتها في عادل نفسه !!!
ونامت نهله ودموعها على خدها ...
-----------------------ء
فجأه صحيت على صوت مراد وهو بيلعب في شعرها ، وبيقول :
صباح الف يا احلى نونو
ردت نهله بكل تأثر ودموعها نزلت غصب عنها :
انت كنت فين طول الليل
سبتني لوحدي ليه
رد مراد وهو بيقرب منها وبيحضنها بكل حنان :
مالك بس يا روح قلبي
بتعيطي ليه
ولأول مره ، نهله تحس بأنها محتاجه حضن مراد ، اكتر من اي حاجه في الدنيا
فتتعلق فيه بكل قوتها ، وتدفس راسها جوا صدره ، وهو بدا يعصر جسمها بقوه وحنتن في نفس الوقت
و يحرك دراعه ، ويسحب بصوابعه طرف قميص النوم الازرق الطويل ، اللي كانت نهله لابساه
《مشهد رومانسي محذوف ، احتراما لقوانين الجروب》
ينتهي المشهد بان تستيقظ نهله لتكتشف ان هذه العلاقه لم تكن الا ... مجرد حلم !!!
ولكنها في ذات الوقت ، بدأت تشعر ان بداخل قلبها مشاعر مختلفه تجاه مراد
ليست مشاعر بنت وابوها !!!
-------------------ء
وبالفعل ...
انتهت الليله المؤسفه دي ، عشان تكتشف نهله الحقيقه المره
ان عادل جوزها ، طلع حيوان ، وانها فعلا ما كانتش فارقه معاه ، وان قصة حبهم كانت مجرد وهم كبير
وان مدام امل ، كانت بتعاملها كويس ، وبقت فرحانه بوجودها في الفيلا
لان ده كان بيسهل عليها ، انها تقابل عشيقها !!!
----------------------ء
صحي مراد من النوم ، ودخل يصحي نهله كالعاده ، اول ما دخل عليها ، اتخض من منظر عنيها ، واللي كان واضح فيهم انها عيطت كتير جدا
مراد اتخض عليها وسألها بلهفه :
صباح الخير
مالك يا نهله
فيكي ايه
انت كنتي بتعيطي ؟؟؟
ردت نهله وهي بتحاول تتماسك :
هو حضرتك كنت
فين طول الليل
انا قلقت جدا على حضرتك
لو سمحت ما تبقاش تبات
بره البيت تاني ابدا
رد مراد وهو مبسوط :
بجد هو ده سبب
زعلك وعياطك يا نهله
انا اسف يا ستي
انا خرجت اسهر مع صحابي
وبعدين انا سايب أمل
وموصيها تاخد بالها منك
هديت نهله وردت بكل ود :
ربنا يخليك ليا يا مراد بيه
انا دلوقتي ماليش حد
الدنيا دي غيرك
ابتسم مراد ومسك ايد نهله وقالها بكل حب :
يلا قومي
واتسندي عليا لحد الحمام
استحمي وفرفشي كده
واخر مره هابات بره
اهم حاجه انك تبقي بخير
وفعلا اتسندت نهله على مراد ، وقالت باستغراب :
اومال مدام أمل فين ؟؟؟
رد مراد وهو بيضحك :
مش عوايدك يعني
انك تسالي عنها
امل لسه نايمه
تحبي اصحيها
عاوزه حاجه منها
ما اعرفش اعملها انا ؟
ردت نهله ، وهي بتتصنع الكسوف :
اه لو سمحت
عاوزاها في حاجه حريمي
بس خلاص مش مهم
لما تبقى تصحى بقا
وقبل ما تخلص نطق كلمتها ، كان مراد بينادي بصوت عالي :
يا امل
اصحي يا امل
وتعالي لو سمحتي
وفي لحظه ...
فتحت امل باب الاوضه اللي كانت نهله قفشتها هي وعادل فيها ، وردت وهي مذعوره :
انا صاحيه
خير يا مراد
في ايه ؟؟؟
رد مراد :
تعالي بعد اذنك
اسندي نهله
وادخلي معاها الحمام
وبسرعه ردت امل ، وهي بتحط دراع نهله على كتفها وبتقول بنفس الذعر :
تعالي يا حبيبتي
اسندي عليا
ودخلوا الاتنين الحمام ، امل ونهله ، ودار بينهم الحوار ده
امل بصوت هامس :
ابوس ايدك يا نهله
ما تفضحيني
انا عارفه ان عادل
زودها امبارح
بس صدقيني
انا حبيته بجد
ومقدرتش امنع نفسي عنه
ردت نهله بصوت واطي :
انا ما يهمنيش اعرف
اي حاجه عن قصتكم
الزباله دي
اتحرقي انتي وهو
انا كل اللي يهمني
هو الراجل الغلبان
اللي استأمنك على شرفه
ومش هاسمح بأن اللي
حصل امبارح ده
يتكرر تاني ابدا
ردت أمل بخوف :
حاضر يا نهله
اوعدك اني مش هاعمل كده تاني
انا هاتحجج باي حاجه
واقول لمراد اني لازم
انزل مصر
ردت نهله بصوت عالي :
انا فعلا مش طايقه
اشوفك وشك ده
ولا لحظه
ردت أمل وهي بتعيط :
حاضر يا نهله
معاكي حق
انا فعلا ندمانه على اللي عملته
الله يقطع الحب وسنينه
ردت نهله وهي بتخرج من الحمام :
جتك القرف
اوعي من وشي
وخرجت نهله وهي بتتمنى فعلا ، ان الزفته امل دي تختفي من الفيلا ، ومن حياه مراد كلها
--------------------ء
دخلت نهله اوضتها ، عشان تلاقي مفاجاه جديده مستنيها !!!
مفاجأه خلتها تتسمر في مكانها ، وتصرخ بعلو صوتها :
مستحيل
مستحيل !!!
دي كانت اخر كلمه نطقتها ، قبل ما تقع على الارض مغمى عليها !!!
رواية "العذاب الممتع" - الحلقه الخامسه
دخلت نهله اوضتها وهي قرفانه من هدوم الحيوانه أمل ، ومش طايقاه انها تلمس جسمها
وفتحت دولاب مراد ، وقعدت تدور على اي حاجه تلبسها
وفجأه لقت شنطه صغيره مقفوله ، وبكل فضول راحت فتحه الشنطه ، عشان تتصدم صدمة عمرها !!!
الشنطه مليانه قمصان نوم !!!
ومن ضمن القمصان اللي في الشنطه ، نفس القميص الازرق اللي شافته في حلمها !!!
نهله مسكت القميص ، واول ما مسكته ، افتكرت تفاصيل الحلم ، واكتشفت انه مكنش مجرد حلم عابر في خيالها !!!
وانه كان ذكرى لاحداث حقيقيه ، لعلاقه حصلت بينها وبين مراد بيه في نفس الاوضه دي !!!
في اللحظه دي ، كانت عقل نهله مش قادر يستوعب ازاي ده حصل !!!
ووقعت من طولها ، مغمى عليها !!!
---------------------ء
استمرت اغماءه نهله لمدة ١٠ دقايق كامله
وبعدها فاقت وجسمها كله عرقان واعصابها سايبه ، وقامت ببطء وقفلت على نفسها الاوضه من جوه بالترباس
وراحت لابسه قميص النوم ، واتاكدت انه مقاسها !!!
وان ريحة جسمها لسه فيه !!!
وبجنون قلعته وجربت القمصان كلها ، وهي عماله تعيط
وكانت الصدمه ان كل القمصان طلعوا بالظبط على مقاسها هي !!!
وكانت نهله كل ما تجرب قميص ، وتقف تشوف نفسها فيه قصاد المرايا ، تفتكر مشهد يجمعها بمراد بيه ، في اجواء علاقه حميميه !!!
وبعد ما خلصت ، راحت مرجعه كل القمصان في الشنطه ، وحطت الشنطه مكانها زي ما كانت
وقعدت على سريرها تعيط ، وتقول لنفسها ....
(انا ازاي عملت كده) !!!
(ازاي انا كنت بالوساخه دي)
(إزاي بعت شرفي بالسهوله دي)
(لا مستحيل ، انا مش مصدقه)
(اكيد في حاجه غلط)
(اكيد دي اوهام وتخاريف بسبب الحادثه والعمليه)
(لا مش اوهام يا نهله)
(واجهي الحقيقه بقا)
(انتي انسانه قذره)
(ما تختلفيش في اي شيء عن الحيوانه امل)
(انتي مراد بيه حيوانات)
كان عقل نهله مشتت جدا !!!
لكنها وهي بتفكر في الكارثه بتاعتها دي ، افتركت حواراتها مع عادل ، وتصرفاتها مع مراد بيه بعد الحادثه
وقالت لنفسها ...
(انا اكيد توبت لربنا على اللي عملته)
(والدليل اني يوم الحادثه كنت فعلا خايفه من مراد بيه)
(عشان كده هو كان بيتقرب مني وقتها وبيبات معايا في المستشفى)
(وانا كنت بصده وبهزقه)
(الحمد لله انا فعلا اكيد استغفرت ربنا ، ورجعت لعقلي وبطلت القرف ده)
(وعهد عليا قصادك يا رب)
(انا عمري ما هافرط في شرفي ده ابدا)
(يارب اقبل توبتي ، ونجيني من شر نفسي)
(زي ما نجيتني برحمتك وكرمك من الحادثه)
وقامت نهله بسرعه ، وفضلت تصلي وتدعي ربنا يقبل توبتها ، ودعت ربنا يهديها ويرجع لها ذاكرتها
وقررت انها هتقفل الصفحه دي من حياتها للابد ، زي ما قفلت صفحه الحيوان عادل ... طليقها
-----------------------ء
انتبهت نهله لصوت الخبط على الباب ، ومراد عمال ينادي عليها :
نهله ...
يا نهله ....
انتي كويسه !!!
ردي عليا
ردت نهله بصوت كله انفعال :
انا بخير يا مراد بيه
لو سمحت انا عاوزه
اطلب منك حاجه
واعتبر ده اخر طلب
هاطلبه من حضرتك
رد مراد بكل اندهاش :
ليه اخر طلب !!!
وايه هو اصلا
وليه بتكلميني من ورا الباب
افتحي يا نهله لو سمحتي
انا مش فاهم اي حاجه
ردت نهله وهي حاسه براحه كبيره :
لو سمحت يا مراد بيه
انا مش هاينفع افتح الباب
انا بطلب من حضرتك تشتريلي
ايشارب ولبس طويل وواسع
ان خلاث قررت اني اتحجب !!!
رد مراد وهو بيضحك :
طب يا ستي
الف مبروك
اديني ساعه
وهاشتري لك احلى لبس
بس ادعي ربنا يكونوا بيبعوا
ملابس محجبات هنا
في فرنسا !!!
----------------------ء
وبعد ساعتين ...
كان مراد نزل واشترى لبس كتير محتشم لنهله ، وكذا ايشارب وطرحه راس
ورجع خبط على باب نهله ، وحطهم قصاد الباب ومشي
ونهله لبست الحجاب ، ونزلت بصعوبه على السلم ، وهي مقرره تواجه مراد بكل اللي جواها !!!
ودار بينهم الحوار ده ...
مراد وهو مبتسم :
بجد الف مبروك يا نهله
انتي قمر في الحجاب
قاطعته نهله بصرامه :
الله يبارك في حضرتك
بس انا مش لابساه
عشان ابقى قمر !!!
انا لابساه لاني توبت لربنا
عن اي حاجه فيها معصيه
رد مراد وهو مندهش :
ربنا يتقبل منك
بس تقصدي ايه بكلامك ده
هو انتي افتكرتي اي حاجه
من ذكرياتك قبل الحادثه !!!
ردت نهله بحسم :
ايوه يا مراد بيه
افتكرت حاجات زي الزفت
انت عارفها كويس
ومفيش داعي نتكلم فيها
رد مراد وهو بيبلع ريقه بصعوبه :
حاجات ايه اللي
بتتكلمي عنها دي ؟؟؟
اتكلمي لو سمحتي
ردت نهله وهي على وشك انها تعيط :
افتكرت العلاقه القذره
اللي كانت بنا يا مراد بيه
وشفت قمصان النوم
اللي حضرتك مخبيها
في شنطه في دولابك !!!
ارتبك مراد وهو بيرد عليها وبيقول:
انت بتسمي اللي بنا ده
علاقه قذره !!!
ده انتي اجمل حاجه
حصلت لي في حياتي
انتي حب عمري
قاطعته نهله بكل ضيق :
من فضلك لو سمحت
انا بتعذب كل ما بفتكر
اني كنت ست رخيصه اوي كده
انا معرفش ازاي ده حصل
بس خلاص
انا النهارده جايه اقول لحضرتك
اني ندمت وتوبت لله
على كل اللي عملته
وانه خلاص ما ينفعش
اقعد في بيتك اكتر من كده
انا قررت اسلم نفسي للبوليس
دي ارادة ربنا
وانا لازم اتحمل نتيجه افعالي
انفعل مراد وصرخ بقوه :
انتي اتجننتي
لا طبعا
ده مش هيحصل
لو هتسلمي نفسك
عشان تهربي من وجودي معاكي
فخلاص انا هاريحك
وهاسيب الفيلا
وامل هتفضل معاكي تخدمك
ردت نهله بحسره :
للاسف يا مراد بيه
انا لو ما سلمتش نفسي
الحيوان اللي اسمه عادل
هيبلغ عني وعنك !!!
رد مراد وهو مذهول :
وعادل هيعمل كده ليه !!!
انتي اكيد بتخرفي
ردت نهله بصوت مبحوح وكانت فعلا بدات دموعها تنزل :
انا هاحكي لك
على كل حاجه
وارجوك اتحمل كلامي بهدوء
واعرف انه كما تدين تدان
اللي انت عملته فيا
ربنا ردهولك في
مدام امل ... مراتك !!!
وحكت نهله لمراد على كل اللي شافته ، وعلى الحوار بينها وبين عادل ، وانه خلاص طلقها
اتجنن مراد ، واتصدم من اللي سمعه ، وفضلت نهله تهديه ، وتقوله ان ده حكم ربنا ، وعقابه ليهم ، وان اللي حصل ده هو العدل !!!
هدي مراد وراح قايل لنهله :
تتجوزيني يا نهله !!!
كانت الكلمه مفاجأه جدا لنهله ، اللي ارتبكت ووشها اتخطف في لحظه وفضلت ساكته متنحه لمراد
مراد حس بالارتباك اللي عمله لنهله ، فقال بكل حب وحنان :
نهله انا مش عاوز منك
اي رد دلوقتي
انا مقدر حالتك النفسيه
وحجم الضغوط اللي مأثره عليكي
وهسيبك تفكري في الموضوع
ومفيش اي داعي لفكرة
انك تسلمي نفسك للبوليس
ومش عاوزك تيجي اي سيره للكلبه
اللي اسمها امل دي
عن اني عرفت قصتها مع عادل
وخللي الدنيا ماشيه كده زي ما هي
لحد ما تتحسن صحتك
ايه رأيك ؟؟؟
ردت نهله بارتباك :
انا فعلا ما انكرش اني منجذبه ليك
لكن انا لسه في شهور العده
يعني كلامك ده
سابق جدا لأنوانه
وخلاص مش هاسلم نفسي
ولا هاعرف امل اي حاجه
عن حوارنا دلوقتي
واللي فيه الخير
يقدمه ربنا
وانتهى الحوار بأن نهله هتفضل في الفيلا ، بشرط ان مراد ما يدخلش اوضتها ابدا
وان التعامل كله يبقى رسمي ، وعن طريق امل ، اللي مراد هيطلقها بمجرد ما تخف نهله ، وتنتهي مشكلتها وترجع مصر !!!
مراد حاول يسند نهله وهي بتطلع السلم ، عشان تروح اوضتها ، لكنها رفضت بشده انه يلمسها او حتى يمسك ايدها
وكافحت لوحدها ، لحد ما وصلت اوضتها ، وقفلت عاى نفسها
ورجعت تصلي ، وتشكر ربنا انها ارتاحت من عذاب ضميرها ، وانه انقذها من السجن !!!
------------------------ء
وعدا كذا اسبوع على الاحداث دي ...
كان عادل اختفى تماما ، ونهله عرفت انه سابها ، وسافر مصر
وامل كانت بتخدم نهله ، وللاسف فضلت تكلم عادل من ورا جوزها !!!
اما مراد فبدا يعامل نهله بكل احترام ، ويغمرها بحبه واهتمامه
ونهله بدات تبادله المشاعر بالتدريج ، وتشوفه فارس احلامها
خصوصا وان عملية التجميل اللي عملها في وشه ، مع صبغه شعره الاسود ، خلته يبان اصغر بكتير من سنه الحقيقي
وفضلت نهله تتخيله وتحلم بيه ، لكن بدون ما تعرفه طبيعة مشاعرها دي
نهله ما كانتش حابه تاخد اي قرار يخص علاقتهم ، الا لما تخف وتستعيد ذاكرتها !!!
وكانت واثقه ان ربنا هيشفيها ، وتستعيد ذاكرتها ، وفضلت تقرب من ربنا ، وتدعيه وتتوسل اليه انه يلهمها الصواب !!!
-----------------------ء
وفي ليله من الليالي ...
صليت نهله العشاء ، وقعدت تدعي ربنا كتير انه يشفيها ، وتستعيد ذاكرتها
ونامت وهي كلها امل في رحمة ربنا ...
واثناء نومها ...
حلمت بانها في فرحها ، ولابسه فستان فرح جميل اوي ، وان مراد قاعد جنب وبيقولها ... مبروك يا عروسه !!!
صحيت نهله وهي فرحانه بالبشاره ، وقامت تصلي لربنا ركعتين شكر
وفجأه وهي بتسجد ، جسمها اتنفض ، وختمت الصلاه بسرعه ... !!!
وراحت فاتحه الدولاب ...
وطلعت قميص النوم الازرق من الشنطه
ولبسته وسرحت شعرها وحطت مكياج ومونوكير وبرفيوم
وخرجت من اوضتها ... وراحت لاوضه مراد
ودخلت الاوضه عليه وهو نايم
وراحت حضناه جامد ، وقعدت تبوس فيه ، وهي بتعيط !!!
رواية "العذاب الممتع" - الحلقه السادسه والأخيره
كانت نهله لبست قميص النوم الازرق ، وسرحت شعرها وحطت برفيوم ، واتشيكت
وراحت اوضه مراد ، اللي كان نايم في عز نومه
وبدأت تحضنه وتبوسه بكل حب ولهفه ، ودموعها بتنزل من عينيها غصب عنها
مت لمسات نهله ، بدأ مراد يصحى ، ويفوق بالتدريج
وفجأه انتفض من مكانه ، وقال وهو في قمة اندهاشه :
نهله !!!
ايه ده !!!
انتي بتعملي ايه !!!
وبتعيطي ليه
فيه ايه بالظبط
احنا لسه ما اتجوزناش !!!
حاول مراد يبعد نهله عن جسمه بلطف ، وبدون عنف
لكن نهله زقت ايديه وفضلت تبوس فيه وثالت وهي بتعيط :
اسكت بقا يا منير !!!
انا خلاص افتكرت كل حاجه
فجأه ... مراد دموعه نزلت ، وهو بيقول بكل لهفه :
حمدالله على السلامه
يا نجوى
وحشتيني اوووي اوووي
واندمج الاتنين في عناق وقبلات محمومه ، وقد امتزجت قبلاتهم بدموعهم
فاخيرا انتهى كل العذاب والحرمان !!!
《مشهد رومانسي طويل ، تم حذفه احتراما لقوانين الجروب ، وسيتم نشره في صفحتي الشخصيه فقط》
-----------------------ء
وحتى نعرف كيف تحولت نهله ... الى نجوى !!!
وكيف تحول مراد .. الى منير !!!
فسوف نعود بك عزيزي القاريء بالزمن ، الي سنه كامله الى الوراء ...
عندما قامت الكاتبه المغموره/ نجوى عبدالغني ، بتاليف اول روايه لها بعنوان (عقاب الحب)
والتي تدور احداثها حول محاولات رجل الاعمال الكهل (مراد بيه) الايقاع بسكرتيرته الحسناء (نهله)
والتي هي بنفس الوقت ، زوجة (عادل) الذي يعمل موظفا لديه في الشركه !!!
وقد لاقت الروايه نجاحا جماهيريا كبيرا !!!
مما دفع النجم والمنتج السنيمائي الشهير ... ( الفنان/ منير وجدي )
الى التعاقد مع "نجوى" ، لتحويل روايتها الى فيلم سنيمائي ضخم
وحدث التعارف بين الطرفين ، واستطاع منير اقناع نجوى ، بانها تمتلك موهبه التمثيل ، بالأضافه الى ان وجهها سنيمائي جدا
.
واتفق الاثنان على منحها اول دور بطوله لها بهذا الفيلم ، حيث ستلعب دور السكرتيره (نهله) !!!
وبرغم ان بطل الروايه (مراد بيه) يتجاوز الستين عاما ، الا ان منير قد نجح في تجسيد هذا الدور ببراعه
وذلك بمعاونه طاقم محترف من المكييرات ، الذين نجحوا في جعل ملامحه تبدوا اكبر من سنه الحقيقي بعشرين عاما !!!
ومع الوقت ...
تطورت العلاقه بين نجوى ومنير ، وتحولت الى قصه حب ، تم تكليلها بزواج سريع
وبعد تصوير بعض مشاهد الفيلم بالقاهره
ذهب العروسان لقضاء شهر العسل في فرنسا ، حيث كان مقررا تصوير بعض مشاهد الفيلم فيها
وقد تم اسناد دور (امل) زوجه (مراد بيه) الى النجمه/ علا الحلواني ، والتي كانت قد ابتعدت عن الاضواء ، بعد ان تجاوز سنها الخمسين عاما
والتي اشترطت ان يتم اسناد دور (عادل) الى صديقها الممثل الشاب المغمور (هيثم صلاح)
والتي كانت تدور الكثير من الشائعات حول علاقته المشبوهه ، بالنجمه علا الحلواني ، مما اثار حفيظه زوجها
ومن المعروف للجميع ان زوج علا ، قد هددها بشكل صريح بالقنل !!! ، اذا ما اكتشف صحه تلك الشائعات
--------------------ء
وفي صبيحه احد ايام التصوير ...
كانت نجوى تقوم بتصوير مشهد هروبها ، من فيلا مراد بيه ، وهو نفس المشهد الذي بدأت معه احداث قصتنا !!!
وكان فريق التصوير قد جهز سيارة نجوى بكافة الكاميرات والمكيروفونات اللازمه لتسجيل ذلك المشهد
بالاضافه الى تجهيز سياره اخرى ، نصف نقل ، وكان مخططا ان تسير تلك السياره امام سيارة نجوى
وذلك لتسجيل بعض اللقطات الحيه للطريق اثناء تصوير المشهد
وبالفعل بدأ التصوير ، وركبت نجوى السياره وانطلقت بها كما كان مخططا
الا ان اندماج نجوى الزائد في تقمص شخصيه نهله ، اثناء مكالمتها مع (عادل) ، قد منعها من ملاحظه سرعه سيارتها
فارتطمت بعنف في مؤخرة سياره التصوير ، وحدثت لها تلك الحادثه
التي ادت الى نزيف بسيط للمخ ، وقد تسبب ذلك النزيف في حالة من المحو المؤقت لذاكرة نجوى الحقيقيه
واستبدالها بذاكرة اخر شيء حدث لنجوى قبل اجراء العمليه ، وهو ذلك الدور الذي كانت قد نسجته في روايتها على مدار ثلاثه سنوات من التأليف
هذا ما اكتشفه منير ، فور استيقاظ نجوى من غيبوبتها بعد العمليه
----------------------ء
وقد دار ذلك الحوار بين منير ، والطبيب الفرنسي الذي قام بفحص نجوى بعد الافاقه مباشره
وهو الحوار الذي لم تفهمه نجوى ، لانها لا تجيد اللغه الفرنسيه !!!
الدكتور الفرنسي :
انا اسف مسيو منير
لكن لازم ابلغك بحاله
مدام نجوى
انها فقدت ذاكرتها الاصليه
وعقلها فقد التمييز بين الواقع
وبين دورها في الفيلم
منير :
الحاله دي هتتعالج ازاي
ارجوك طمني يا دكتور
الدكتور الفرنسي :
غالبا الحاله دي بتنتهي لوحدها
ممكن تستمر ايام
وممكن شهور
بس اهم شيء
انها ما تعرفش انها فاقده الذاكره
لازم تجاريها في خيالها
لحد ما عقلها ينشط لوحده
ويستعيد الذاكره الحقيقيه
منير :
ليه يا دكتور ما نحاولش
نعرفها الحقيقه
ونحاول نفكرها احنا بانها
نجوى
مش نهله !!!
رد الدكتور بشكل قاطع :
لو حاولت تعمل كده
ممكن تجيلها صدمه عصبيه حاده
وتفقد الذاكره للابد
الحل الوحيد عشان
ترجعلها الذاكره بسرعه
انك تجاريها في خيالها
انت وكل الناس اللي حواليها
والاهم من ده
انك تبعدها عن اي توتر او انفعال
رد منير :
طيب ممكن اخدها
ونرجع مصر ؟؟؟
رد الدكتور :
لا طبعا
السفر خطر عليها جدا
بسبب النزيف اللي حصلها
وقت الحادثه
وخلص حوار منير مع الدكتور ، وفضل منير يدور على خطه يقدر ينفذ بيها اللي طلبه الدكتور منه
-------------------ء
اجتمع منير مع فريق العمل بتاع الفيلم ، وشرح لهم مشكله نجوى ، وانها لازم تفضل مقتنعه بإنها (نهله) اللي لسه عقلها عايش جوا احداث الفيلم !!!
وبعد مناقشات طويله وتفكير عميق ...
وصلوا كلهم للفكره الجهنميه دي !!!
انهم يقنعوا نجوى انها خبطت واحد ، وان البوليس هيقبض عليها
واستدعوا ممثل فرنسي ، كان ضمن فريق عمل الفيلم
ولبسوه بدلة ظابط بوليس ، واتفقوا مع ادارة المستشفى ومع الدكتور الفرنسي
انهم يرتبوا المشهد التمثيلي ده ، عشان يقنعوا نجوى انها فعلا متهمه !!!
ومشيت كل احداث الخطه زي ما كان مترتب لها بالظبط
ما عدا حدث واحد بس !!!
اللي مكنش من ضمن الخطه نهائيا !!!
--------------------ء
في الليله اللي صحيت فيها نهله ، وظبطت امل مع عادل !!!
كان منير طلب من الفنانه علا ، اللي كانت طبعا بتبات في اوضتها ، لوحدها كل ليله
انها تاخد بالها من نجوى مراته ، لانه هيسهر مع مجموعه من اصحابه المصريين القيمين في فرنسا ، وهيبات معاهم
وعلا انتهزت فرصه خروج منير ، واتصلت بصديقها هيثم ، وطلبت منه ييجي يبات معاها
لكن حظها كان اسود زي افعالها ، ونجوى صحيت وظبطتها
وهيثم لقى نفسه هيتفضح هو وعلا ، وختبقى كارثه لو جوز علا شم خبر بعلاقتهم
فاضطر يرتجل ويفكر في حل ، وهو انه يوهم نجوى انه هيبلغ عنها !!!
واتغير سيناريو الخطه من اللحظه دي
لكن سبحان الله ، التغيير ده كان في مصلحة نجوى
لانها كرهت تفصل لابسه هدوم امل ، ودورت على اي هدوم
وتوالت بعد كده باقي الاحداث اللي احنا عارفينها !!!
----------------------ء
وبعد مرور اسبوع من استعادة نجوى لذاكرتها ...
قعدت نجوى جمب في منير في كراسي الدرجه الاولى ، على طياره مصر للطيران المتجهه الى مطار القاهره ، وهي بتهمس في ودنه بكل حب ، وتقول :
انا اسفه يا حبيبي
بوظت لك الفيلم بتاعك
عذبتك معايا
طول المده اللي فاتت
بس بجد
اللي حصل ده خلاني
احبك
اكتر من الاول
الف مره
رد منير وهو ماسك ايد نجوى وبيبوسها :
فداكي الف فيلم
يا روح قلبي
انا بجد فرحان اوي
انك اتحجبتي
انتي متعرفيش
انا كنت بحس بإيه
وانتي بتتكلمي
على الزفت اللي اسمه هيثم ده
وكأنه جوزك بجد
انا كنت بغلي من جوايا
يمكن ربنا عمل كل ده
عشان يرجعنا لطريقه
وعلى اد ما اتألمنا
احنا الاتنين
في التجربه دي
لكن حبنا انتصر في النهايه
وبرغم الالم والعذاب
الا انه في النهايه
كان "عذاب ممتع"
(انتهت الحلقه السادسه والاخيره)
اتمنى ان الروايه تكون عجبتكم
❤️🌺❤️💙🌺❤️💙🌺❤️💙🌺❤️💙🌺❤️💙🌺
الروايات الكامله والحصريه من هنا
انضموا معنا على تليجرام ليصلكم اشعار بالروايات فور نزولها من هنا
❤️💙🌺❤️💙🌺❤️💙🌺❤️💙🌺❤️💙🌺❤️💙🌺
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺
اتفضلوا حضراتكم كملوا معنا هنا 👇 ❤️ 👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺
