 |
جميله
الجزء الثانى
الحلقه الثامنه والثلاثون والتاسعه والثلاثون والاخيره
بقلم الشيماء محمد
قام خالد وخرج مع الشخص المتلتم ده اللي بدأ يخرجه للنور من تاني وابتسم بانتصار ان اخيرا هيحقق انتقامه بس المره دي لازم يلعبها صح ..... واول شيء يقتل وليد وفهد ....
اتضرب عليهم نار بس اللي كان معاه كان محترف وعرف ازاي يضرب وازاي يفادي لحد ما خرجوا بره
خالد: هنهرب في ايه !
@ هتشوف
جري وراه لحد ما اتفاجيء بموتسكيل وخالد شهق
خالد : موتسكيل انت بتهرج !!
@ : طبعا موتسيكل امال عربيه ويقفلوا الطريق نضيع اتحرك يالا اركب ورايا
ركب وراه بصمت واتحرك ووراه اتحرك اربع عربيات بوليس والطرق كلها بتتقفل في وشهم بس اللي كان سايق كان عارف هيمشي منين وازاي وهيتحرك ازاي وهنا خالد عرف انه عنده حق باختياره للموتسكيل لان لو عربيه مكنتش هتمشي في الحواري والطرق الضيقه دي وكانوا هيتمسكوا بسرعه جدا واخيرا اختفت عربيات البوليس ويعتبروا هربوا واخيرا وقفوا ونزلوا وطالع لبيت
خالد وقف : انت مين !! وهربتني ليه !
@ : نطلع وبعدين نتكلم قبل ما حد يشوفنا
خالد : مش هطلع معاك في اي مكان غير لما تعرفني انت مين !
@ : انا واحد خرجك من سجن مكنتش حتي في احلامك تهرب منه ده مش كفايا يخليك تثق فيا !!
خالد : انا ما بثقش في اي حد مهما يكون
@ : براحتك البلد قدامك واسعه عيش حياتك بس ماتعيطش لو مسكوك تاني انت هربان من مخابرات مش اي حد
سابه ودخّل موتسيكله وطلع وخالد بص حواليه وسمع صوت سرينه بوليس فجري وراه ودخل معاه البيت واول ما دخل اتفاجيء بمحسن ابوه وجري وحضنه والمتلتم قلع اللي مغطي وشه
خالد بصله : مقولتليش انك من طرفه ليه !!
@ : ما بكشفش اوراقي بسهوله
محسن : كويس انك خرجت كنت شاكك صراحه انه هيقدر يخرجك بس الحمد لله رجعتلي
خالد بقلق : آسر ابني اخباره ايه !!
محسن : كويس واللي سمعته انه هيتجوز كمان هو وندي
خالد ابتسم بحصرة للحظات بس رجع لقسوته : مين ده وتعرفه منين !!
محسن ابتسم : ده ربنا بعتهولي انا وانت .... اتعرفت عليه صدفه هنا من فتره كان محتاج لمأوي وانا كنت محتاج لمساعده وهو عنده قدرات تقدر تقول مهمه وساعدنا بعض طول الشهرين اللي فاتوا
خالد: خاطر بحياته ليه علشان يهربني ؟ كان ممكن يموت !
@ : تقدر تقول اني ما بموتش بسهوله .. الموت بيخاف مني وحتي لو متت معنديش اللي اخسره ولا عندي حد يخسرني
خالد : ايه المقابل !!
@ ابتسم : انضم للعيله بتاعتكم
خالد بصله وكشر وبص لابوه : انت موافق ! والعيله موافقه !!
محسن : بلغتهم وقالوا لو اثبت نفسه وقدر يخرجك ينضم
........................
دخل المكتب ظابط وادي التحيه وبلغ اللي قاعد بالفرنسيه : هربوا يا افندم
عميل جون : تمام روح انت
خرج وقفل الباب والعميل جون بص للي قاعد قصاده بأريحيه : اهو هرب لما نشوف الراجل بتاعك هيعمل ايه وياريت يكون قد الثقه اللي بتتكلم بيها دي !
ادهم ابتسم : اريان ده دراعي اليمين وبثق فيه اكتر من روحي ما تقلقش هيدخل وسطهم وهيجيبلك قرارهم كلهم وهتوقع المنظمه كلها او العيله زي ماهما بيسموا نفسهم
عميل جوون : وفي المقابل لمساعدتك دي !!
ادهم : خالد ومحسن يلزموني ... هيتعاقبوا في بلدهم مش هنا
عميل جون : سلمني المنظمه اسلمهملك !! اريان بتهريبه لخالد هيكتسب ثقه خالد ومحسن لكن مش العيله فبالتالي ممكن يصفوه محطتش ده في اعتبارك ! مش معني انه قضي شهرين مع محسن ان العيله هتثق فيه !
ادهم ابتسم : العيله فعلا اول شيء هتعمل هتصفيه لانهم مش هيدخلوا حد طالب يدخلهم والعاده انهم بيطلبوا منه اي طلب وبعد ما بينفذه بيتخلصوا منه .. محدش بيفرض عليهم يقبلوا مين او يرفضوا مين !!
عميل جون باستغراب : انت قلت ان اريان دراعك اليمين !
ادهم : فعلا دراعي اليمين و بمكانه ابني
عميل جون : هيصفوه ده عادي !!
ادهم ابتسم : ده تلميذي وتدريبي وهيعرف يحمي نفسه كويس ما تقلقش انت
عميل جون : اتمني ان ثقتك تكون في محلها .....
....................
الصبح العسكري جه خرج علاء من الحبس الانفرادي و اخده واستغرب انه مش مرجعه الزنزانه بتاعته وواخده ناحيه مكتب المأمور
علاء : انت واخدني ليه هناك !!
العسكري : هتعرف دلوقتي
دخل المكتب والمأمور اول ما شافه : اقعد يا علاء
علاء قعد بحذر مترقب للي هيتقال : خير في ايه ! ولو علي خناقه امبارح فآسف بس كنت مضايق شويه وبإذن الله مش هتتكرر تاني
المأمور : لا مش جايبك بخصوص كده
علاء : امال ايه !
المأمور : البقاء لله يا علاء
علاء هنا عنيه فتحها قوي وبياخد انفاس عاليه وبينهج والدنيا كلها اسودت قدامه وصرخ وهينهار : سالي بنتييييي
المأمور وقف : لا مش بنتك مش بنتك ... بنتك كويسه اهدي مش بنتك
علاء سكت وبصله بتوهان: اومال مين اللي مات ؟
المأمور : والدك محي ... الصبح زمايله بيصحوه ماردش والكشف الطبي قال ان جتله سكته قلبيه وهو نايم ف شد حيلك
علاء كان جامد ومش قادر يحدد مشاعره ايه ... هو ابوه بس في نفس الوقت سبب كل تعاسته في الدنيا
علاء وقف : الله يرحمه .. حضرتك عايز مني حاجه !
المأمور : لا .. خده يا عسكري
رجع زنزانته وقعد في سريره وبيبص لسرير ابوه الفاضي وحاول يفتكرله اي شيء كويس عملهوله بس تفكيره ما اسعفوش بس افتكر لحظه ما بيبلغوه بموت نسمه وبعدها موت ابنه ... دموعه نزلت علي حاله .. افتكر منظر بنته الجميله اللي بقت مشوهه .. تخيل اغتصابها وتخيل اللي اتعمل فيها وصلها للحاله دي .. عيط كتير وزمايله اتلموا عليه وبيواسوه علي موت ابوه ومحدش عارف انه بيعيط علي حاله اللي اتبدل وعمره اللي ضاع وبنته اللي ضاعت منه ...
.....................
فهد الصبح نازل علي الشركه وقعد فطر مع عيلته وكان مبسوط بامه العيله .. امه وابوه وعمته وجدته وعيال عمته .. اخيرا بقم عيله وابتسم لما تخيل جميله كمان موجوده تفطر معاه .. او ممكن يفطروا لوحدهم في اوضتهم !! لا ساعات يفطروا لوحدهم وساعات يفطروا كده مع بعض كلهم
وليد علّي صوته : ايه وصلت لفين ! عمال تبتسم وتسرح وتضحك ايه ! اتروشت علي الصبح !
جميله زقته : سيبه في حاله يسرح في حبيبته ويبتسم
فهد اتحرج وغير الموضوع : هتنزل الشركه !
وليد ابتسم : اه هنزل ... خلينا نظبط الدنيا قبل ما نسافر
آسر : تسافروا قصدك ! مش نسافر
وليد : لا ناصح يا واد لا اقصد نسافر
فهد : مين بقي دول اللي نسافر !
وليد : انتو مع مرتاتكم وانا مع مراتي ولا انتو بس تقضوا شهر العسل واحنا لأ ... احنا نستاهل شهر عسل اكتر منكم يا عيال امبارح
فهد ابتسم : انت هتقضي شهر عسل !!
وليد : عندك مانع !!
فهد : لا طبعا ... بالعكس ده شيء جميل
جميله : بجد هنسافر ! هنروح فرنسا !
وليد : الا فرنسا
كلهم ضحكوا وخلصوا فطارهم ونازلين كل واحد بعربيته بس قبل ما فهد يخرج موبيله رن وهو استغرب
وليد : مالك ! مين اللي بيرن!
فهد : المستشفي اللي فيها ميس !
وليد باستغراب : خير مالها علي الصبح ! كلمهم شوف في ايه !
فهد كلمهم وقف وبص لابوه : عايزني اروح اشوفها !
وليد : ليه خير !
فهد : معرفش ما وضحوش
وليد : طيب يالا هروح معاك يالا بينا
وصلوا المستشفي ودخلوا للدكتور
وليد : خير في ايه !ميس مالها !
الدكتور : تعالوا شوفوها بنفسكم اتفضلوا
اخدهم لاوضتها وفتح الباب كانت قاعده علي السرير وبتكلم نفسها
ميس : انتي مش عارفه انا مين ! انا ميس هانم وانتي خدامه هنا يالا غوري وروقي البيت كله ... انا امك يا فهد .. انا بحبك وانتي ابني ..... لا انا مش بطيقك اصلا كفايه انك ابنها ابن الخدامه اللي ما استنضفهاش تشتغل عندي حتي ، بس ابوك جابها ... انا لازم أأدب وليد انه بصلها .... لا لا انا لازم اقتله .. هههههههههه ايوه انا هقتله وهقتل جميله وهقتل فهد وهقتل نبيله الحربايه وكمان جميله خطيبه فهد ... انا هقتلهم كلهم ههههههه .... بابا حبيبي شوفت بنتك شاطره ازاي ... وقعت وليد في حبالي وهيتجوزني .... بابا وليد راجل شهم يعني حتي لما يعرف اني ما بخلفش مش هيسيبني ابدا ... مش هعرفه اني مش بخلف غير لما يكتشف بنفسه ... بابا انا عايزه الشركه كلها تكون ملكي ووليد كمان يكون ملكي ... كلهم ملكي .... كلهم خداميني .... كلهم
وليد : هيا مالها !!
الدكتور : عقلها مش متقبل واقعها فعملت لنفسها عالم تاني عايشه فيه
ميس بصتلهم: انت روح يالا هات القهوه بتاعتي ... وانت هات عربيتي يالا .... انت تعال هنا نضف الاوضه دي بسرعه
فهد قرب منها : ميس !! ( بصتله ) انا فهد
ميس : روح يالا امسح الاوضه ... يالا كلكم خدامين .. روح هاتلي وليد هنا تحت رجليا ... يالا اتحرك
فهد مسكها : ميس فوقي
ميس : ابعد انت ازاي تتجرأ تمسكني كده ... انا ميس هانم ... روح هات جميله هنا يالا
الدكتور شد فهد : هيا مش شيفاك اصلا
خرجوا وقفلوا الباب وهيا فضلت فعلا مستمره
ميس : انتي مش عارفه انا مين ! انا ميس هانم وانتي خدامه هنا يالا غوري وروقي البيت كله ... انا امك يا فهد .. انا بحبك وانتي ابني ..... لا انا ما مش بطيقك اصلا كفايه انك ابنها ابن الخدامه اللي ما استنضفهاش تشتغل عندي حتي بس ابوك جابها .
الدكتور : بتقول نفس الكلام كل شويه
فهد : عالجها
الدكتور : بص يا فهد بيه بالعربي كده او بالعاميه هيا خلاص اتجننت .. احنا هنقوم بواجبنا طبعا بس ما اعتقدش ان في فايده
خارجين من عند الدكتور
وليد : زعلان !!
فهد : علشانها لأ عليها اه وانت ؟ دي برضه كانت مراتك في يوم من الايام
وليد : نفس إجابتك علشانها لأ عليها اه وبعدين انت لسه سامع كانت عارفه انها ما بتخلفش واعتمدت علي شهامتي اني مش هبعد عنها لما اعرف ...
فهد : تعرف انها مريضه اكتر من انها شريره
وليد : فعلا هيا مريضه وللاسف ابوها ساعدها تتمادي في مرضها بدال ما يقف جنبها ويحتضنها المهم سيبك منها ميس صفحه واتقفلت خلاص هتروح الشركه !!
فهد : اه يالا بينا
موبيل وليد رن وبصله : خير الواحد بقي بيقلق من كل تليفون
فهد : شوف مين طيب
وليد : ده مأمور السجن
رد عليه وسمعه شويه وبيشاور بدماغه لحد ما رد : البقاء والدوام لله
قفل وفهد سأل : مين مات ؟؟
وليد : محي !!
فهد : يالا مع السلامه
وليد : هنعمله جنازه !!
فهد : لا طبعا.. نعمل جنازه النهارده وبعد اسبوع نعمل فرح ؟
وليد : طيب وفيها ايه !
فهد : جنازات مش هنعمل ... والفرح مش هيتأجل تاني اياكش حتي اموت انا نفسي تعمل الفرح
وليد ضحك وفهد كمل : وهيا تطلع وتقعد علي الكوشه
هنا وليد انفجر في الضحك وفهد كمان معاه .. ضحكوا كتير قوي لحد ما سكتوا وبصوا لبعض
فهد بتأكيد : الفرح مش هيتأجل !!
وليد بحب : الفرح مش هيتأجل
فهد : اطلع بقي علي الشركه
وليد راح علي الشركه وصّل فهد وراح هو للسجن يزور علاء والمأمور سمحله يقابله
وليد : البقاء لله يا علاء
علاء : بتعزيني يا وليد !
وليد : ده والدك
علاء بوجع : كان فعلا والدي بس كمان كان سر تعاستي
وليد : ما ترميش اخطاءك علي غيرك كل واحد ربنا بيديه عقل يميز بيه .. انت اخترت تلغيه وتمشي وراه ما تلموش هو دلوقتي
علاء: هو السبب في كل حاجه !
وليد : اخدك وسافر عمرك كله ورجع يقول الشركه شركتنا مكنش عندك عقل تعقل بيه ! هو بيتعامل في التهريب والاجهزه المضروبه واتهمتوني فيها ! مكنتش عارف انه هو !! كان عندك عقلك وكنت عارف انه غلط بس اخترت تمشي وراه وسيبت بنتك له ودلوقتي انت وبنتك اللي بتدفعوا التمن
علاء : بنتي ..... بنتي اللي ضاعت خلاص
وليد : لسه ما ضاعتش لسه في امل بس ياريت هيا تفكر صح وتشيل الافكار السودا اللي في دماغها
علاء : تشيلها ازاي وهيا لوحدها كده ! خليك حنبها يا وليد وسامحها وخلي الكل يسامحها ... خليكوا جنبها يا وليد ... ارجوك ( عيط وهو بيتكلم ) ارجوك يا وليد خلي بالك من بنتي ... اوعي تعمل فيها زي ما عملنا احنا في ابنك ... خليك انت احسن مني زي ما طول عمرك احسن مني
وليد : انا مش احسن منك انا جيبتلك زياره لبنتك علشان اشمت فيك يا علاء
علاء : وشمت فيا !! ولا زعلت عليا !! وليد انت مهما تعمل عمرك ما هتوصل لدرجه من السوء الل احنا كنا فيه بدليل اهو انك بتعترفلي بذنبك او اللي انت متخيلو ذنب ... يا ابني تفكيرك في الشماته يعتبر لاشيء جنب اللي كنا بنعمله او نفكر فيه ... انت راجل يا وليد راجل بمعني الكلمه ...
وليد : بنتك في امان يا علاء طول ما هيا عاقله
سابه وخرج كان اكرم في انتظاره
وليد : خير
اكرم : عرفت باللي حصل وعرفت انك هنا جيتلك ! الدفن امتي !
وليد : بكره الصبح هنطلعه وندفنه
اكرم : علاء هيحضر ؟
وليد : اه هيحضر
تاني يوم العيله كلها اتجمعت وراحوا دفنوا محي وعلاء كان متكلبش وبصلهم كلهم ايد في ايد جنب بعض وافتكر نسمته اللي علي طول كانت ايدها في ايده
اترجي وليد يساعده انه يزور بنته وبالفعل وليد كلمله المأمور ووافق انه يزور بنته ....
سالي فرحت جدا بزياره ابوها اللي قعد قصادها
سالي : انت زعلان علي جدو !
علاء : جدك كان !!! جدك ما يتزعلش عليه يا سالي ... جدك هو اللي اتسبب في موت امك واخوكي محدش غيره
سالي : انتو قلتو وليد
علاء بزعل : حاجات كتير اتهمنا فيها وليد وده كان غلط احنا افترينا كتير قوي عليه وعلي عيلته ...جدك طلب الشحنه المضروبه علشان يوقع وليد وللاسف مات فيها امك واخوكي ولما وليد سافر يشوف ايه اللي حصل سافرنا وراه وقتلناه وخالد حطله فلاشه الله اعلم كان جايبها منين بس كان فيها اسرار عسكريه لفرنسا و ساعتها وليد مامتش زي ما تخيلنا لا قبضوا عليه وعالجوه وحبسوه واحنا رجعنا لبسنا مراته قضيه واتقبض عليها وفهد اخدته ميس حق مكتسب واعتقد الباقي انتي عارفاه ... احنا الوحشين في الحكايه يا سالي ..
سالي : واللي خطفت مني فهد ؟
علاء: جميله خطيبه فهد بنت خاله وهيا بتحبه فعلا وهو بيحبها لكن انتي جدك محي اللي جبر فهد يوافق واقنعه من حته العيله والمصلحه وانتي نفسك يا سالي ما بتحبيهوش انتي بس بتعملي زي ميس ما عملت في وليد .. ملكيه بتحافظ عليها بس اوعي تضيعي عمرك زي ما ميس عملت لان عمرها ما عرفت يعني ايه حب . اتمني انك انتي تحبي
سالي عيطت : ومين اللي هيحب واحده زيي !! انا خلاص اتدمرت يا بابا
علاء مسك وشها : انتي اقوي من كده واستغلي قوتك دي في الصح وصلحي اللي ابوكي عمله ... اقفي علي رجليكي وخليكي انسانه كويسه ... مين اللي كان يصدق ان بنت يتيمه فلاحه فقيره عايشه في عشه مش في بيت حتي يحبها واحد صاحب اكبر شركه في مصر هاه !! واهي ربنا حطها في طريقه واترفعت لفوق ... الحب لما بيجي ما بيفرقش بس في ناس ربنا بيحبها تستاهل الحب ده وناس زيي ربنا بيديها فرصه
تتوب ويديها الحب بس بتفضل مصره علي الذنب فبياخد منها الحب ده ... ربنا عطاني نسمه وانتي وكان المفروض احمده واشكره بس للاسف معملتش كده فاخدها مني لان براءتها ما ينفعش تعيش مع حد زيي انا ...
سالي : بس انا مش هقدر اعيش تاني واواجه الناس تاني واخرج تاني واصلا محدش هيقبلني ابدا
علاء : عمك هيقبلك ومراته هتعتبرك بنته وعمتك ندي وجدتك نبيله كلهم هيفتحوا دراعاتهم ليكي بس المهم انك تتغيري من جواكي ومش علشانهم هما ... لا يا حبيبتي علشان نفسك ... علشان تستاهلي حب ربنا ليكي علشان ربنا يرزقك بالسعاده يا بنتي ... ارجوكي يا سالي ما تكونيش زي ابوكي حاولي تكوني نسمه تانيه ... نسمه في جمالها وحلاوتها ونفسها الحلوه وطيبتها وحبها لكل الناس ... نسمه حبتني انا ... متخيله انا بوحاشتي حبتني ...جميله وندي ونسمه كانوا اصحاب جدا والاتنين هيقبلوكي لانك بنتها بس انتي خدي خطوه ....
سالي : انا مش هقدر
علاء : هتقدري ... بصي بس للامور من ناحيه تانيه وهتقدري
الزياره انتهت واخدوا علاء منها وهيا فضلت تعيط .....
المفروض انها تخرج من المستشفي والدكتور كتبلها خروج وقعدت في وسط الاوضه مش عارفه هتروح فين او هتعمل ايه !! ده حتي حاجتها مش قادره تقوم وتلمها هتعمل ايه !!!!! عيطت وحطت ايديها علي وشها وفضلت تعيط لحد ما سمعت خبطه علي الباب شالت ايديها ومسحت دموعها وقالت بصوت مهزوز : ادخل
الباب اتفتح ودخلت امل : ينفع ادخل !!
سالي استغربت : طبعا
امل : انا مش لوحدي
امل فتحت الباب ودخلت جميله ومي دخلوا التلاته ووقفوا قصادها
جميله : تسمحيلنا نساعدك !!
سالي : انتي هتساعديني !!
جميله : والله هسمع لعمتي اللي ديما تقول كل انسان جواه الخير والشر ساعات الشر بينتصر وساعات الخير بس لو اخد فرصه يظهر الخير اللي جواه مش هيتردد ... فانا هديكي فرصه اخيره يا سالي تظهري الخير اللي جواكي ..( مدت ايدها ) انا مش هقولك اخوات لاني صراحه مش هقدر اتقبلك بالسهوله دي او اسامحك علي اللي عملتيه او حاولتي تعمليه بس هحاول اتقبل فكره الاصحاب ونشوف هنروح لفين فهاه اصحاب ؟
سالي اترددت وافتكرت كل كلام ابوها وقررت هتجرب وتشوف الدنيا هتعمل فيها ايه !! ومدت ايدها لجميله
سالي : نحاول فعلا .... اصحاب
بصت لمي اللي قربت منها ومدت ايدها : انا مي صلاح خطيبه آسر
سالي افتكرت اللي ابوها حكاه عن البنت دي واللي عمله فيها ومدت ايدها : اتمني انك تسامحي بابا علي اللي عمله
مي ابتسمت : ربنا اللي بيسامح بقي ... وزي ما جميله قالت اننا كلنا هنحاول نبدأ صفحه جديده مع بعض وربنا يسهل
امل بقي وقفت قدامها : انا مش هقولك زيهم اصحاب لان انا وانتي طول عمرنا مع بعض ايوه كنتي كتير غبيه بس انا مستعده اسامحك واعذرك واتمني نرجع اخوات زي زمان
سالي عيطت وضمتها : انا اسفه يا امل بس فعلا كنت بغير منك ... كنت بغير ان عندك مامتك بتحبك وتخلي بالها منك وانا لأ وعلشان كده ديما كنت بحاول اهز ثقتك في نفسك واحسسك اني احسن منك علشان اضحك علي نفسي واقدر اكمل
امل مسحت دموعها وابتسمت : يبقي صفحه جديده ؟
سالي شاورت بدماغها : صفحه جديده
البنات ساعدوها تلم حاجتها واخدوها ونزلوا
سالي : هنروح ازاي ! ولا هنروح فين اصلا !!
هنا ظهر فهد بعربيته ووراه آسر بعربيته وقفوا قصاد الباب ونزلوا من عربياتهم
آسر : حمدالله علي السلامه يا سالي .. هاتوا يا بنات الحاجه
فهد وقف قصادها فجميله اتكلمت بتحذير : فهد
فهد ما بصلهاش وفضل قصادها : قسما بالله يا سالي اقل غلطه منك مقصوده او غير مقصوده هقتلك بايدي فاهمه !!
جميله : وبعدين يا فهد احنا اتفقنا علي ايه !!
فهد بصلها : تحمد ربنا اني اتنازلت عن المحضر اللي اتعمل وقفلته وده اخر ما عندي اكتر من كده سوري معنديش ... الطيبه اللي عند جميله وزرعتها فيكي للاسف مش عندي ولا نسيتي انا تربيه ميس ( قالها بتريقه ) فاكراها يا سالي ميس اللي كنتي واخداها مثل اعلي ليكي !! اهي في مستشفي الامراض العقليه واتجننت تماما تحبي تحصليها
جميله : كفايه بقي يا فهد وبعدين !
سالي : سيبيه يا جميله هو عنده حق في كل كلمه قالها وانا عارفه ان مشواري مش هيكون سهل
فهد : لا يا سالي مش هيكون سهل لانك مطلوب منك تقتلي شبح الانسانه اللي جواكي وتزرعي جواها انسانه جديده بتحس ساعتها ممكن اقبلك .. يالا
امل اخدتها مع اسر اخوها وكمان مي معاهم وجميله ركبت مع فهد واتحركوا علي البيت ... كان في استقبالهم جميله وندي ونبيله واستقبلوها وطلبت ترتاح فجميله اخدتها لاوضه وريحتها فيها وحطتها في السرير ترتاح
جميله الكبيره : شوفي يا سالي انا حاسه بيكي .. انتي حاسه انك في وسط ناس مش بيحبوكي وحاسه انك ضعيفه وتايهه ومش عارفه الدنيا هتعمل فيكي ايه انا عارفه الاحساس ده كويس لاني سبق وعشته يوم ما دخلت البيت ده بس مع فرق ان انتي هنا وسط اهلك وعيلتك اه ممكن يكونوا زعلانين منك بس دول عيلتك وهيسامحوكي بس انتي لازم تديهم سبب يسامحوكي عليه ...
سالي : محدش هينسي .. اه ممكن يمثلوا انهم هينسوا لكن محدش هينسي اني حاولت اقتل بنت اخوكي مره وحاولت اخطفها مره تانيه
جميله : مش هينسوا سالي القديمه دي ابدا وفعلا محدش هيقدر ينساها ... بس انتي دلوقتي انسانه جديده ومن النهارده انتي صفحه بيضه شكليها زي ما تحبي .. سالي ماتت في الحادثه اللي حصلتلها دلوقتي احنا قدام سالي جديده ومترقبين سالي الجديده دي طبعها ايه فانتي ارسمي الصوره اللي انتي عايزاها ... ومع الوقت هيتطبعوا بطباعك الجديده
سالي : كلميني عن نسمه بابا قالي انك كنتي صاحبتها قوي
جميله ابتسمت لها وقعدت جنبها : لا دي محتاجه قعده طويله خديني جنبك ...
اتغطت جنبها وبدئت تحكيلها عن نسمه وسالي بتسمع ومستغربه تماما الست اللي قدامها دي وكميه التسامح والطيبه اللي فيها .....
فهد مع جميله وصلوا وقعدوا مع الكل لحد ما فهد سأل عن امه اللي اتأخرت وعرف انها مع سالي وطلعلها وخبط ودخل كانت جنبها علي السرير وده ضايقه
فهد : تعالي عايزك
جميله : حاضر حبيبي... ارتاحي يا سالي دلوقتي وهنكمل كلامنا بعدين يا بنتي
قامت وخرجت وفهد راح اوضته وهيا وراه واستني لحد ما قفلت الباب وانفجر فيها
فهد : دي من كام يوم كانت هتخليكي ارمله ولا نسيتي واتشليتي فيها انتي بتنسي بسرعه كده ليه !
جميله : هو انت اللي هتحاسب الناس ولا ايه وبعدين تابت ورجعت وندمت
فهد : وانتي ايش عرفك انها تابت فعلا ؟ دخلتي جواها
ولا اي حد ينزل دمعتين نصدقه ونسامحه ؟ ما يمكن تكون بتمثل علشان تعرف تضرب ضربتها من جوه
جميله : اللي ربنا كاتبه لينا هنشوفه ... ربنا اللي بيحمينا ويحرسنا مش احنا ... انا احساسي بيقولي انها فعلا اتغيرت وهمشي وراه
فهد : ولو احساسك غرقك !!
جميله : عمره ما غرقني قبل كده
فهد : انتي حره
جميله : ايوه انا حره خليك انت في فرحك اللي بعد يومين ده يالا شوف وراك ايه
.......................
في فرنسا الصبح بدري
محسن : انا هنزل اجيب فطار
خالد : خليه هو ينزل عايز اتكلم معاك شويه
محسن : حاضر
خرج محسن وطلب من اريان يجيب فطار ونزل اريان وهو بيجيب الفطار حد وراه بياكل ساندوتش
ادهم : ايه الاخبار
اريان ابتسم وبدون ما يلتفت : كله تمام والنهارده المفروض اننا هنروح للمنظمه دي .. عملوا الترتيبات كلها امبارح
ادهم : انت عارف انهم مش هيفتحوا دراعاتهم ليك !
اريان : عارف ما تقلقش عليا
ادهم : واثق انك هتقدر ؟
اريان : عيب انا تلميذك ...
ادهم : وانا هكون في ظهرك وهتكون تحت عيني ما تقلقش
في البيت خالد ومحسن
خالد : انت عارف ان العيله مش بيقبلو حد بسهوله ومش معني انه ساعدنا انهم هيقبلوه
محسن : وبعدين هنعمل ايه !
خالد : انا معرفش
محسن : خلاص هما حرين المهم ان انت خرجت مهما يكون بقي التمن ما يهمنيش
خالد : تمام هنروح النهارده ونشوف
..............
ليلي في بيتها بتفطر وآسيا نزلت
آسيا : جوزك ما اتصلش بيكي
ليلي : يا فتاح يا عليم يا رزاق يا كريم
آسيا : جوزك اتصل ؟؟
ليلي : اتصل عايزه ايه انتي بقي !
آسيا : هو فين !
ليلي : كل الي اعرفه انه في فرنسا بيعمل ايه ما اعرفش قال انها خدمه مش اكتر وحاجات بيظبطها
آسيا بغيظ : واخد اريان معاه .. ماشي ماشي بس لما يرجع بس كله منك انتي
ليلي : الله وانا مالي انا !
آسيا بتريقه : انتي مالك ما تلاقيكي اتمسكنتي عليه وفضلتي تقوليله ... ادهم بنتنا .. بنتي خايفه عليها .. حبيبي علشان خاطري بلاش هيا... ادهوم
كانت بتتريق عليها بغيظ وبتقلدها
ليلي : انا مش هرد عليكي لاني اصلا معرفش ابوكي راح فين او اخد معاه مين
آسيا شوحت بايدها : صح صح ادهم ما بيقولكيش انتي تصدقي اقنعتيني
ليلي : بت انتي لمي نفسك علي الصبح واتكلمي عدل
آسيا : يبقي سيادتك تبطلي تدخلي في شغلي وما تستغليش علاقتك ب بابا في انه يمنعني اشتغل او اسافر زي اي ظابط تاني
يوسف من وراها : ما تتكلمي بادب يا بت انتي وانتي بتكلمي امك ده مش اسلوب ده
آسيا : انت مالكش دعوه
يوسف مسكها من دراعها : يعني ايه ماليش دعوه
ليلي : يوسف سيب اختك
يوسف : لما تلم نفسها
آسيا شدت دراعها بعنف : انا مااسمحلكش تمسكني كده اصلا فاهم !
يوسف : لا مش فاهم يا ست آسيا فهميني
ليلي وقفت في النص وشدتهم بعيد عن بعض
ليلي : انتو هتتخانقوا ولا ايه !! ما تلموا نفسكم انتو الاتنين .. انت اتفضل روح علي مستشفتك مش كان وراك عمليه بدري !! يالا
يوسف : ماما بس
قاطعته : اتفضل
يوسف مشي وهيا وقفت قصاد بنتها : الاسلوب اللي اتكلمتي بيه ده مش عايزه اسمعه تاني
آسيا باعتراض : بس يا ماما
ليلي بصرامه : سمعتيني !!
آسيا : اسفه
ليلي : ابوكي اه مديرك بس في الشغل نادرا ما بيعاملك علي اساس انك بنته وبيقول انك ظابط كفؤ وبيثق فيكي كتير .. لو هو اختار اريان يسافر معاه فأكيد هو عنده اسبابه ولما يرجع بإذن الله تقعدي وتفهمي منه ايه سبب اختياره لاريان
آسيا : حاضر
ليلي : اما بقي انا وعلاقتي بيه فده شيء ما يخصكيش .. اما نقطه اني بتكلم واطلب منه ما ياخدكيش او ما يشغلكيش فده اسمه هبل .. من زمان وانتي حابه المجال ده واخوكي حب مجال الطب وناس كتيره استغربت ازاي البنت مع ابوها وازاي الولد هو اللي مع امه بس احنا احترمنا ميولكم وسيبنا كل واحد فيكم يختار الطريق اللي يعجبه وينجح فيه ولو انا مش موافقه علي اختيارك مكنتش هسمحلك تمشي فيه من وانتي عيله انا احترمت اختيارك وساعدتك فيه علي قد ما اقدر وابوكي ساعدكم علي قد ما يقدر فأكيد مش بعد ما كبرتي وبقيتي ظابط ليكي وضعك واسمك هاجي اقف في طريقك واعمل الهبل والتخلف اللي انتي قولتيه من شويه
آسيا بحرج : انا اسفه مكنتش اقصد بس اتضايقت انه اخد اريان وسابني وحضرتك كنتي قدامي
ليلي : وانا مش كيس الملاكمه اللي هتفشي فيه غليلك
آسيا باصه للارض : ما اسموش كيس ملاكمه
ليلي بغيظ : اسمه قرد ازرق المهم المعني وصلك
آسيا : وصلني واسفه مره تانيه بس لو اتصل قوليله
بنظره منها قطعت كلامها
آسيا : خلاص لما يرجع انا هتكلم معاه
ليلي : ايوه ... ودلوقتي انا ورايا شغل بعد اذنك
ليلي خارجه وآسيا جريت وراها وقفت قصادها
ليلي : عايزه ايه !
آسيا باستها في خدها : انا اسفه بجد انا عارفه انك ساندتيني كتير يمكن اكتر من بابا كمان لانك كنتي ديما دعم ليا ولما بفقد ثقتي اني هقدر اكمل كنتي بترجعيهالي تاني فحقك عليا
ليلي ابتسمت لبنتها : اسفك مقبول يا آسيا
آسيا : نهارك ابيض يا مزه
ليلي ضحكت وخرجت مبسوطه وراحت لشغلها
..............
اريان وخالد ومحسن راحوا ودخلوا زي قصر كبير محاوط بأمن كتير واريان بيدرس كل حاجه بيشوفها وحس ان الخروج من هنا هيكون معجزه .. وخصوصا انه يخرج حي ...
دخلوا وقعدوا في قاعه علي تربيزه اجتماعات
اريان : هو في ايه !! والقاعه فاضيه ليه !
محسن : دلوقتي هتتملي وربنا يستر بقي هيقبلوك ولا
اريان : ولا ايه ؟ انت جاي هنا تقولي هيقبلوني ولا !
خالد: دي منظمه من اكبر المنظمات في فرنسا متخيل اي حد يخبط علي الباب يقولهم دخلوني يقولولو اهلا وسهلا ده انت عبيط بقي
اريان : لا مش اي حد وانا مش اي حد
هنا دخل حد ووراه ناس كتير قعدوا علي اماكنهم وكل واحد وراه اتنين بودي جارد
@ انت فعلا مش اي حد !!! انت ظابط مخابرات
خالد ومحسن وقفوا وبصوله باستغراب واريان ملامحه غامضه
@ بس السؤال هنا اي مخابرات !! انت موجود هنا بقالك فتره كبيره بتتنطط من بلد لبلد ومعروف في بعض الاماكن باسم ال ( hidden hand ) ( اليد الخفيه ) فياتري انت يد خفيه لحساب مين بالظبط ! وليه هربتو ! وايه غرضك ! تدخل بينا ؟ ليه !
اريان : ما انت ذكي اهو وبتعرف حاجات كتيره اعرف بنفسك
@ ابتسم : انا فعلا هعرف بنفسي ... خدوهم الاتنين وده تعرفولي عنه كل حاجه من يوم ما اتولد لحد النهارده
محسن : طيب ابني ليه !
@ : مشاكلكم كترت وابنك اتكشف خلاص وبقي ورقه محروقه ومعني هروبه بالشكل ده انهم هما اللي هربوه وبالتالي معدش ينفعنا
محسن : ابني لأ
@ : يبقي انت كمان معاه
محسن هنا سكت وهما اخدوا اريان وخالد للتحقيق معاهم
ادهم مع جون هيتجنن
ادهم : وبعدين الكاميرات اتقفلت ليه !! رد عليا
عميل جون سأل حد من رجالته اللي بدأ يشرح لادهم
& شوف حضرتك الجهاز اللي مزروع في دراع اريان عباره عن حاجه زي جهاز ارسال بيتسقبله القمر الصناعي وبيحدد مكانه وبنقدر نشوفه فده مش كاميرا مثلا بتصور لا دي اشارات استقبال وارسال وممكن المكان اللي هو فيه محطوط فيه اجهزه تعطل الارسال بحيث زي امان لهم ان محدش يكشف مكانهم احنا معانا اخر مكان اتواجد فيه
ادهم بص لجون : انا معنديش استعداد اخسر الراجل بتاعي
جون : انا قلتلك ان دي مخاطره وانت كنت مستعد لها
ادهم زعق : علي اساس انه تحت عيني
جون : انا مش هعرض مهمتي للخطر وهنستني تأكيد من الراجل بتاعك
ادهم : ولو جراله حاجه !
جون : ثقتك فيه راحت فين ! ولا ده الاب اللي بيتكلم
ادهم سكت وهيتجنن وفضل نص ساعه كمان وبعدها وقف : سوري كده خلاص .. انا هروح اطلع الراجل بتاعي بعد اذنكم
جون حاول يوقفه بس مقدرش وبالتالي امر رجالته وراه وهينفذوا الخطه البديله
وصلوا لاخر مكان ظهر فيه اريان ولقوا نفسهم قدام قصر كبير عليه حراسه كبيره
جون: هنقولهم ايه !
ادهم قفل صمام الامان لمسدسه : دول ما بيتعاملوش بالكلام ولا انت قعدتك علي المكتب نستك الناس دي بتتعامل ازاي
جون مسك ادهم : احنا كبرنا علي الكلام ده هبعت رجالتي
ادهم شد ايده : اتكلم عن نفسك
ادهم نزل وجون اتردد بس نزل وراه وحصله
ادهم ابتسم : غيرت رأيك !
جون ابتسم : خلينا نعيد امجاد الماضي ... بس يا تري قلبنا هيستحمل الاثاره دي
ادهم ضحك وجون كمان ودخلوا ووراهم رجالتهم وفتحوا ابواب جهنم علي كل اللي يقابلهم ......
لما اخدوا اريان ربطوه علي كرسي وبدؤا يستجوبوه
الراجل للي بيعذبه : انا اسمي اكس (axe)
اريان : ( ace ) هاي
اكس ضربه جامد في وشه : اسمه اكس مش اس
اريان : هحاول افتكر بس ما اوعدكش
ضربه تاني : انت اسمك ايه !
اريان : اكيد مش اس
ضربه اكتر واريان مسح الدم من بوقه في كتفه وبصله
اريان : علي فكره ده مش اسلوب حوار خالص لازم تكون متمدن شويه
ضربه تاني وتاني : شغال لحساب مين !
اريان : امك
ضربه تاني واريان وقفه : انت مستعجل سيبني اكمل الجمله انا مش قصدي امك بشتغل معاها انا اقصد امك ازاي مستحملاك
ضربه كتير واريان ما بيقلوش اي كلمه لها معني
بدأ يعذبه بالكهربا ونفس الموضوع ما بينطقش
راح وجاب كيس في ادوات كتيره فتحها قدام اريان اللي عنده عين اتقفلت تماما من ورمها والتانيه مش شايف بيها من الدم اللي مغرقها فرفع عنيه علشان يشوف جايب ايه ولقاها ادوات غريبه للتعذيب
اريان ضحك : شكلنا هنوطد علاقتنا اكتر ببعض
مسك الراجل حاجه طويله رفيعه مدببه وبكل عنف حطها فوق ركبه اريان اللي صرخ جامد وبعدها ضحك وفضل يتنفس بصوت عالي وده بيضايق اكتر الراجل فراح شالها وحطها من تاني في رجله التانيه واريان اغمي عليه والراجل جاب ميه ورشها في وشه
اريان بتعب : مش قادر علي بعدي صح !! يالا نكمل
يا تري حد حبك قبل كده في حياتك البائسه دي ولا انا اول حد في حياتك
هنا في صوت ضرب نار كتير وانفجارات والراجل قلق
اريان : انا مش هروح في مكان انا هرتاح شويه وانت اطلع شوف في ايه ولا اطلع اهرب
الراجل طلع يشوف في ايه فعلا بس ما رجعش تاني واريان حاول يحرك ايديه علشان يفك نفسه بس ايديه الاتنين بينزفوا ومعندوش اي سيطره عليهم فضحك وبص للسقف وتقريبا اغمي عليه ودماغه لفوق
ادهم ماكانش بيرحم اي حد في وشه وبيضرب الكل ومسك واحد من رقبته : الراجل بتاعي فين !!
الراجل : معرفش
ادهم قتله ومسك اللي جنبه : نفس السؤال
التاني : اكيد تحت اللي بيستجوبوهم بيكونوا تحت
ادهم : خدني عنده
الراجل مشي قدام ادهم ونزله وشاورله علي باب
ادهم : روح وافتح الباب ده اتفضل
الراجل مشي بتردد واول ما فتح الباب حد ضربه بالنار وطلع يشوف ايه فادهم ضربه ومشي بحذر للاوضه ودخلها مكنش فيها حد بس في باب تاني راح وفتحه ووقف بعيد بس محدش خرج فقرب وبص جوه وهنا شاف اريان علي كرسي دماغه لوري للسقف ومربط فجري عليه بخوف : اريان اريان
افتكره ميت من منظره وحط ايده علي رقبته بخوف بس في نبض فاتنفس
ادهم : وقعت قلبي يا زفت انت
فضل يضرب فيه علي وشه علشان يفوق بس مفيش وبص حواليه ولقي جهاز الكهربا فمسكه وصعق اريان بس صعقه خفيفه فاريان اتعدل بسرعه وفتح عنيه علي اخرهم واتفاجيء بادهم قدامه
اريان : انت بتصعقني ؟
ادهم : اديك فوقت اهو
اريان مش مصدق : انت بتصعقني !!
ادهم : الغايه تبرر الوسيله اثبت بقي
ادهم بص حواليه لقي مشرط مسكه ورفعه
اريان : لا لا لا اهدي كده وقول هديت ... ايه !
ادهم : اهدي انت واثبت خلي اشوف حل لعينك دي
اريان بيرفض وادهم مسكه من دماغه وبالمشرط فوق عينه عمل جرح صغير وبمجرد ما اتفتح عينه نزفت كتير جدا وادهم مسحلوا عينه
ادهم : الورم اختفي اهو يا شاطر
مسك سكينه طويله واريان صرخ : هتعمل ايه تاني !
ادهم ضحك : هقطع الحبال انت بقيت خفيف كده ليه ! ما تجمد شويه
قطع الاحبال وحاول يقف بس مقدرش فادهم ساعده
حط دراعه حوالين رقبته وشده وخارجين مع بعض
ادهم : انا فعلا كبرت علي الكلام ده علي رأي ليلي وجون ... يالا يا ابني نطلع من هنا
...................
اول ما حصل ضرب النار محسن جري بسرعه يدور علي ابنه ونزل كان في اتنين معاه قتلهم بمسدس في ايده وبسرعه فك ابنه وخرج بيه يهربوا بسرعه لان دي فرصتهم ....
ادهم خارج بأريان و قابلهم جون : ملقيناش خالد ومحسن مش في المبني
ادهم : بعدين يالا بس نخرج من هنا
خارجين وبره لمحوا محسن بيجري ووراه خالد ورجاله جون وراهم بيحاولوا يوقفوهم
محسن وقف واستسلم اما خالد : لا مش هيتقبض عليا انا مش هسمحلهم يقبضوا عليا
محسن : خلاص يا خالد ارمي المسدس اللي معاك
خالد في ايده المسدس وحواليه الامن : انا مش هيتقبض عليا
الامن : استسلم والا هنضرب .. ارمي المسدس اللي في ايدك
خالد بصلهم كتير وجنبه محسن وخالد هز دماغه ومحسن بيحاول يقنعه يستسلم بس نظره خالد فهمت محسن هو ناوي علي ايه
في اللحظه اللي خالد رفع فيها المسدس في وش الامن الامن ضربوا بالنار ومحسن كمان اتحرك قدام ابنه والرصاص كله جه في محسن اللي واقف قصاد ابنه
جون امر الكل يوقف ضرب النار ومحسن وقع في الارض بين ايدين ابنه خالد اللي بيعيط ويصرخ
خالد : ليه كده !!
محسن : انت ابني !!
خالد حاول يفوقه او يقومه بس خلاص مات محسن بين ايدين ابنه وخالد بص لادهم فوقه
ادهم : البقيه في حياتك واتمني انها تكون طويله لان لسه عندك حساب هتصفيه وتمن هتدفعه ...
خالد بغيظ : وليد اللي باعتك !!
ادهم : وليد مالوش علاقه بشغلك ولا ايه !! علي العموم هندردش كتير بس مش هنا واه صح البقاء لله
خالد : ما انت لسه قايلها
ادهم : لا مش في ابوك اقصد عمك محي ...
خالد حس هنا بالهزيمه وانه وليد انتصر عليه وادهم اخده ونزل بيه مصر ... واريان كمان نزل معاه وشكله كان يغني عن اي كلام
وبعد ما وصل بيته وارتاح شويه دخلت آسيا زي المجنونه لابوها
آسيا : بقي تاخد اريان وتسيبني انا !!
اريان : يا ريته يا اختي كان خدك انتي ..
آسيا : اسكت انت بشكلك المتشلفط ده !!
اريان : ابوكي صعقني وقال ايه بيفوقني وبعد ما صعقني فتح عيني ( غمض عينه ) شايفه الجرح ده ؟ ده ابوكي وقال ايه علشان يفضي الورم علشان اشوف
ليلي ضحكت وبصت لجوزها : انت عملت كده فعلا !
ادهم : مكنش عايز يفوق وبمجرد ما صعقته اتعدل
ليلي ضحكت : وعينه !!
ادهم : كانت وارمه ومكنش شايف !! انا غلطان ؟؟
ليلي : لا ابدا
اريان : اضحكوا انتو الاتنين ...
آسيا بعد ما كانت بتضحك كشرت : ما تاخدنيش في دوكه انت ليه اخدت اريان ! مكنتش انا هعرف اهرب خالد ! ما انا هربت وليد قبله ولا نسيت ؟
ادهم : لا ما نسيتش بس انا مكنش غرضي اهرب خالد
آسي نكمل بعدالتفاعل باقى حلقتين تفاعل علشان متأخرش
الحلقة 39 (الأخيرة) صبرى الجوهرى
المسؤولين الاعزاء والقراء والمتابعين الكرام اشكركم جداعلى الفتره الماضيه واتمنى ان اكون تركت ذكرى حلوه معكم وللاسف سوف اغادرالجروب بكل هدوء بعداستكمال هذه الروايه نظرالان منشوراتى يتم رفضهابدون اسباب شكراللجميع وكل عام وحضراتكم بخير
الخاتمه بعدالتفاعل لايك وعشرملصقات
الرجاله والعرسان وصلوا البيوتي سنتر وانتظروا
جميله الكبيره طلعت اول واحده وفهد قابلها وضمها
فهد : ده ايه الجمال ده !! ( قلب الكلام ) امال جميله فين !!
امه ضحكت : طالعه ورايا ما تقلقش ابوك فين !
فهد ابتسم : ورايا ما تقلقيش
جميله سابت ابنها وراه وليد ابن اخوها باسته وسلمت عليه وسلمت علي اسر وكمان عماد اخوها وعينها طول الوقت علي وليد جوزها اللي مبتسم ومنتظر دوره لحد ما اخيرا وصلتله وقفت قصاده
جميله اتحرجت من نظراته : ايه مش هتقول حاجه !!
وليد بغلاسه : اللي قبلي قالو كتير .. بصي وراكي كده في كام راجل قبلي !!
جميله كشرت : ابنك واخويا وابنه و
قاطعها : ماليش فيه كل الكلام ده ...
جميله مسكت ياقته : يعني المفروض اعمل ايه ! اسيب ابنك اللي في وشي واقوله استني اروح لحبيبي الاول
وليد : برضه ماليش فيه
جميله بصت حواليها وكانت مي خارجه والكل مشغول بيها فقربت من وليد وباسته في خده بحب : مفيش قبلك ولا في بعدك انت وبس ...
وليد ابتسم : دي مش نافعه
جميله ابتسمت : دي تحت الحساب ولما نكون وحدنا هصالحك كويس وبما يرضي ضميرك
وليد ابتسم : ما يرضي ضميري !! انتي قد الجمله دي
جميله ضحكت : قدها
وليد ابتسم وحط ايدها في ايده : ماشي هنشوف تعالي نشوف ابنك وعروسته
مي خرجت واستقبلها ابوها وامها بفرحه وبعدها آسر وقف قصادها وباسها في دماغها وحط ايده في ايدها
خرجت بعد كده امل ومعاها امها ندي و وليد قابلها وباس ندي في خدها واخد مراته امل وباسها في دماغها بحب اما ندي فعنيها بتلقائيه بتدور في الوشوش مش عارفه بتدور علي مين ... لحد ما عنيها وقعت علي اكرم وابتسمت وهو بادلها الابتسامه و ابنه مركز قوي معاه .....
يزيد : انت مبتسم كده ليه !
اكرم : وانت مالك ما تخليك مركز مع مراتك
فهد منتظر علي نار جميله تطلع واخيرا الدور عليها وطلعت بهاله كبيره حواليها او هو اتهيأله كده وقفت قصاده وبصتله وابتسمت وسحرته وهو عايز يعمل حاجات كتيره قوي بس مش عارف يعمل ايه !! احاسيس كتير قوي جواه عايزه تطلع مره واحده وهيا واقفه قصاده مكسوفه ومحروجه ومش عارفه هو واقف كده ليه وبيفكر في ايه ! ما كل واحد باس عروسته في دماغها وخلاص ما تعمل زيهم يا فهد
وليد : ابنك ماله !
جميله : انا عارفاله واقف كده ليه ! انا هروحله
يدوب هتتحرك كان فهد كمان اتحرك وقرب من جميله اللي اتوترت وبصتله لفوق ومستغربه
فهد : اخيرا
جميله ابتسمت : اخيرا
فهد قرب قوي : مش هتقولي تاني مش من حقك فاهمه
قبل ما ترد كان هو باسها
وليد مسك ايد جميله وضحك : ابنك هيعرف يتصرف سيبيه وروحي لاخوكي اللي بيضرب اخماس في اسداس ده وقوليله يهدي كده ويقعد علي جنب ويسيب العيال يتبسطوا
جميله ضحكت وراحت لاخوها فعلا واتفاجئت بدموعه
جميله : عماد مالك !
عماد : بنتي كبرت واتجوزت ... عيالي الاتنين يا جميله بيتجوزوا
جميله اتنهدت : خضتيني انا قولت ماله .. طيب المفروض تفرح
عماد مسح دموعه : ماهو انا فرحان
ضم اخته في حضنه : لولا انتي ولولا تضحيتك مكنتش وقفت هنا دلوقتي فرحان ومبسوط ... انتي يا جميله سبب الفرحه اللي الكل فيها النهارده انتي وبس
جميله عنيها دمعت : انا بس عملت اللي اي اخت هتعمله لاخوها
وليد جه وراهم وحط ايديه علي اكتفاهم الاتنين : ايه حكايه الدموع اللي ملهاش مكان النهارده دي
عماد : لا ابدا دي دموع فرح .. بشكر جميله انها سبب الفرحه دي النهارده
وليد : فعلا هيا سبب فرحه الكل النهارده
جميله : انا معملتش حاجه
وليد بحب : انتي عملتي كل حاجه !! انتي زرعتي ورد يا جميله .. زرعتي ورود في قلوب الكل وكان لازم تحصدي ورود
جميله خبت وشها في كتف جوزها بحب
اما فهد بعد ما بعد عن جميله ضمها بحب وهيا ضمته
اتجمع العرسان التلاته بعروساتهم وكل واحد بارك للتاني وكل عريس اخد عروسته علي عربيته
ندي بصت حواليها تشوف وتفكر هتعمل ايه وهتركب مع مين لانها رفضت تركب مع آسر ورفضت امل كمان
اكرم شافها واقفه فراح ناحيه وليد و وقف قصاده
وليد كان واقف مع جميله ونبيله ورايح لاخته يجيبها
وليد : خير يا اكرم
اكرم : ينفع انا اوصل ندي هانم للقاعه
وليد بصله كتير
اكرم : ده بعد اذنك طبعا
وليد : ماشي يا اكرم وصلها
اكرم ابتسم : متشكر يا وليد يالا وراك علي طول
وليد ركب عربيته واتحرك وندي استغربت ان اخوها سابها ومشي واتفاجئت بأكرم جنبها
اكرم : بتدوري علي حد !
ندي : وليد سابني ومشي
اكرم : ما سابكيش
ندي بعدم فهم : امال ايه !
اكرم : انا طلبت منه يمشي وانا هوصلك تسمحيلي
شاور علي عربيته وهيا قلبها دق زي المراهقات ومشيت قدامه فتحلها الباب وركبها عربيته وركب جنبها واتحرك
اكرم : ينفع اقولك انك رائعه الجمال النهارده اللي يشوفك ما يصدقش ابدا انك والده عروسه وعريس ابدا يدوب اختهم
ندي : ما تبالغش يا اكرم
اكرم بصلها : انا مهما اتكلم مش هوفيكي حقك ابدا
الكل وصل القاعه ودخلوا ورقصوا سلو مع بعض كل واحد مع حبيبته .. علي اغنيه خاصه طلبها
ادهم كمان هو ومراته حضروا الحفله من اولها ..
فهد طلب من الديجي يشغلوا الاغنيه اللي جميله طلبتها منه يوم حفلتهم وبالفعل شغلهالها وادهم ابتسم وفهد شاورله
اغنيه ( how i love you ) ورقص معاها علي الاغنيه دي واتفاجئت جميله كمان بالتورته لما دخلت عشر ادوار زي ما طلبت وفوق عروسه وعريس صغيرين
وضمت فهد اللي باسها بحب
فهد بهمس : احلامك اوامر
جميله ابتسمت : ربنا ما يحرمني منك ابدا
قطعوا التورته واتعشوا كل عروسه مع عريسها وكل حبيب مع حبيبه
بعد العشا الكل اتفاجيء بوليد علي الاستيج وطلب من الديجي اغنيه وبدأ يغني ( لو كان بخاطري انا ما كنت اسيبك يوم ولا ثانيه )
واتفاجؤا اكتر لما طلعت جميله تغني معاه دويتو والكل هيص بيهم جدا مع ان صوتهم كان عادي بس الحب اللي كان بينهم مش عادي ابدا .....
بعدها طلبوا من كل عريس يغني بنفسه اغنيه لعروسته
فهد غني اغنيه ( my baby you )
اسر غني اغنيه ( no promises)
وليد غني لامل ( بحبك مش هقول تاني لوائل جسار)
ادهم طلبوا منه يغني بس رفض تماما لان الليله دي مش بتاعته هو ومش عايز يخطف اي اضواء من حد
سالي كانت بتتفرج عليهم من بعيد وشافت فرحت كل عروسه بعريسها وسألت نفسها هل ممكن يجي يوم هيا تلبس فستان ابيض وترقص بحب وفرحه كده .. تقريبا هيا عمرها ما فرحت بالشكل ده .. بصت لجميله وضحكة عيونها ونظراتها لفهد ونظراته هو ليها وافتكرت خطوبتهم وقعدته جنبها مجبور وعنيه طايره علي جميله
كانت عارفه ساعتها انه ما بيحبهاش .. استغربت ليه قبلت وضع زي ده علي نفسها .. ازاي قبلت ترتبط بواحد مش بيبصلها بالطريقه دي .. مش بيحضنها بعنيه قبل ايديه .. واحد تكون هيا دنيته وحياته ... ازاي كانت حياتها كلها غلط بالشكل ده !! لازم تغير كل حاجه وتتغير كلها علشان تلاقي الحب ده والنظره دي ... لازم تسافر وتبدأ من جديد ....
عماد كان بيتفرج عليهم وبعدها راح للبوفيه وطلب كوبايتين عصير واخدهم ورايح ياخد جنب يشربهم لوحده
عماد لنفسه : بما ان كل واحد مع حبيبه انا كمان اخد كوبايتين استفرد بيهم ، خليني اجيب طبق واتعشي كويس الليله شكلها هتكون طويله
رجع جاب طبق وشكله وماشي بالطبق والكوبايتين بالعافيه ومركز قوي معاهم وده خلاه مش واخد باله من اللي جايه في وشه تبرطم وترغي ولبسوا في بعض والبنت صرخت من العصير اللي غرقها وعماد وقف قصادها مذبهل
عماد : انا اسف انا اسف انا اسف
البنت عندها حاله ذهول وبصتله : النظاره
عماد مش فاهم : انا ماخدتش نظارات
البنت بصت حواليها فعماد فهم انها وقعت منها وبص كانت في الارض فجابها وعطاهالها وبسرعه رجع لتاع البوفيه جاب مناديل كتيره واخدها بره وجرسون شافهم وشاف الموقف كله اخدهم جوه بعيد عن القاعه وبدأ عماد يساعدها تنظف هدومها وعمال يتأسف
البنت نظفت علي قد ما قدرت
الجرسون : انا لازم ارجع لمكاني انتو محتاجين مني حاجه ! براحتكم هنا بس اقفلوا الباب وانتو خارجين
عماد : متشكر يا ابني روح انت لشغلك
البنت بصتله : بتعمل ايه بكوبايتين عصير !!
عماد : كنت هشربهم هعمل بيهم ايه يعني !!
البنت : الاتنين !!
عماد باستغراب : اه الاتنين انا حر اشرب اتنين ولا تلاته
البنت : تشربهم مش تلبسهم للخلق
عماد : انا اسف بقي يا ستي وبعدين انتي لو مركزه كنتي شوفتيني .. انا مركز في العصير والاكل انتي بقي تايهه ليه !!
البنت بصتله وكشرت : انا مكنتش تايهه انا كنت بتكلم في التليفون
عماد : علي العموم انا اسف بعدين دلوقتي تنشفي
البنت بصتله وماردتش وفضلت تبرطم مع نفسها
عماد بيسمعها وهيا بصتله فرفع دماغه
عماد : علي فكره انا ما بحبش اللي يفضل يبرطم كتير ده اتكلمي كلام واضح
البنت : علي فكره ده شيء ما يخصكش.. هو انت اسمك ايه !
عماد : اسمي عماد ابو العروسه والعريس
البنت فرحت : مين فيهم ! انا عارفه ان في ولد وبنت اخوات و ولد وبنت اخوات .. امل واسر ولا جميله و وليد
عماد : جميله و وليد !!
البنت مدت ايدها تسلم عليه : انا ابتسام خاله مي مرات آسر
عماد : كنت متخيلك اختها مثلا
ابتسام : اختها هههههه لا يا عم انا خالتها
عماد : جوز حضرتك فين !
ابتسام : انا مش متجوزه انا مطلقه
عماد : انا اسف
ابتسام : لا ما تتأسفش طلاقي منه كان اجمل شيء حصلي في حياتي
عماد : طيب مش هنتأسف بس بما اننا عيله بقي تسمحيلي اعوضك واجيبلك عصير
ابتسام : انا ما اتعشتش اصلا
عماد ضحك : طيب تعالي نجيب اربعه عصير وطبقين محترمين ونتعشي
ابتسام ضحكت : انت شايف كده
عماد : يعني بما ان العروسه للعريس والجري للمتاعيس اللي هو احنا يبقي نطلع علي الاقل بالعشا
ابتسام ضحكت : ما نبقاش متاعيس قوي يعني ..
عماد ضحك : بالعشا نص متاعيس
ابتسام : نص متاعيس افضل ... يالا
اخدها وراحوا يتعشوا علي تربيزه بعيده عن الدوشه شويه ويتعرفوا اكتر علي بعض ......
الحفله كانت فوق الخيال وخلصت الليله علي خير وكل عريس روح بيته ... فهد في الفيلا بتاعته
آسر في فيلا ابوه اما وليد في شقته اللي كانت هديه من وليد نصار ... وليد اشتري تلات شقق كبار فوق بعض للتلات عرسان بس فهد وآسر حبوا يقضوا لياليهم الاولي في البيت اللي اتولدوا فيه كالعاده
وليد دخل وهو و امل شقتهم وكانت امل في منتهي التوتر و وليد كمل عليها
وليد : وبعدين بقي !!
امل : بعدين ايه مالك !
وليد : مبحبش انام جنب اي حد شوفي بقي ياستي من اولها كده كل واحد فينا في اوضه لاتزهقيني ولا ازهقك خلاص
امل زعلت : براحتك طبعا
وليد : انا مرضيتش اقول الكلام ده بدري علشان ايه محدش يتدخل بينا بس انا كمان عايزك زي الشاطره كده تنقليلي هدومي وحاجتي كلها في اوضتي او تنقلي حاجتك انتي بره الاوضه احنا نتفق من دلوقتي انهي اوضتك وانهي اوضتي
امل كانت هتعيط : انت عايز دلوقتي تقسم الحاجات ؟
وليد : ايوه طبعا امال انا هنام فين ! وهغير ازاي ؟ وهنزل الصبح شغلي ازاي ؟
امل : انت هتنزل الصبح الشغل ؟؟
وليد : طبعا امال انتي فاكره ايه !!
امل : بس احنا مش هنسافر شهر العسل ؟
وليد : شهر عسل ايه وكلام فاضي ايه !! ده للناس الفاضيه انا مش فاضي وبعدين من اولها كده يا شاطره لا ليا دعوه بفهد عمل ايه ولا آسر اخويا راح فين هما لهم حياتهم واحنا لينا حياتنا ودلوقتي يالا
امل : يالا فين !
وليد : ادخلي جهزيلي عشا جعان انتي فاكره اللي كلناه ده اكل ... خشي يا اما اعمليلي اكل عدل اكله قبل ما نام يالا
امل مشيت من قدامه بصمت وقبل ما تدخل المطبخ اتفاجئت بيه بيشدها من دراعها وبصتله
وليد بابتسامه : نفسي مره واحده بس ... مره يا امل تعرفي اني بهزر
امل فضلت واقفه مش مستوعبه شويه ايه هو اللي بيهزر فيه
امل : بتهزر في ايه ؟ مش عايز عشا ؟
وليد : بهزر في كل الكلام اللي قولته ده !! في كل حاجه الاوضه والهدوم وشهر العسل وكله
امل كشرت : بتهزر !
وليد : طبعا بهزر ده انا هموت عليكي نكون مع بعض في اوضه واحده ونسافر نقضي أجمل شهر عسل في الدنيا
امل : ينفع استأذنك لحظه !!
وليد : براحتك يا قلبي
امل راحت علي اوضه نومها ودخلت وقبل ما تقفل الباب
امل : الكنبه عندك قضي ليلتك عليها
قبل ما وليد يوصلها كانت قافله الباب بالمفتاح في وشه
وليد : ما تهزريش يا امل
امل : امال اسيبك انت وحدك تهزر
وليد : طيب هزري بس افتحي الباب
امل : قضي ليلتك عندك لاني مش هفتح
وليد : واهون عليكي وليد حبيبك ؟
امل : تهون ؟ ده انت تهون وتهون وتهون لبكره تهون بعدد كل المرات اللي اشتغلتني فيها تهون
وليد : عيب عليكي يا امل تنومي جوزك اول ليله بعيد عنك
امل : لا مش عيب ده عيب عليا لو سمحتلك بس تشوف حتي وشي اسبوع يا وليد هتقعد عندك
وليد شهق : انتي بتهرجي ولا ايه قسما بالله اكسر الباب امال انتي فاكره ايه !
امل سندت علي الباب مبتسمه : يالا كتفك وفي الباب بس اوعي كتفك يتخلع يا حبيبي
وليد : امل افتحي بقي خلاص مش هشتغلك تاني
امل : تقضي ليله كده علي الكنبه تعد نجوم الليل وبعدها افتحلك
وليد : ماشي اقضي ليله اعد النجوم بس مش الليله دي
امل : ده الليله دي أجمل ليله انت بتقول ايه !!
وليد : امل
امل : وليد
وليد : بطلي رخامه
امل : انا ابطل رخامه !! بقالك كام شهر بترخم عليا !! انا هردلك رخامتك كلها الليله ... تصبح علي خير انا هنام اصلا من الصبح هموت وانام تصبح علي خير حبيبي
مهما يكلمها معدتش بترد عليه راح الصاله وفضل رايح جاي منتظرها تفتح بس منشفه دماغها واخيرا قرر يتصل بندي اللي اتفاجئت : خير يا وليد في ايه ! امل مالها يا قلبي
وليد : قافله الباب ومش راضيه تفتحلي
ندي ضحكت : طيب بالهداوه كده وهيا هتفتح ما تقلقش تلاقيها بس مكسوفه شويه منك وهتغير وتفتح
وليد : حضرتك مش فاهمه اصل انا !!
ندي قلقت : انت ايه ! انت زعلتها !!
وليد : مش قوي
ندي : وليد انطق علي طول انت ايه !!
وليد : اشتغلتها شويه زي ما بشتغلها كل شويه وهيا قفشت وعاقبتني باني اقضي الليله علي الكنبه يرضيكي كده !!
ندي ضحكت : اممممم طيب دي بقي مشكلتك انت مش مشكلتي انا وتاني مره ما تدخلنيش في حل مشاكلكم انا جوزتها وهنا مهمتي انتهت تعامل انت مع مراتك تصبح علي خير يا حبيبي
قفلت ندي مبتسمه ومطمنه علي بنتها ...
وليد فضل بره بابها ساعه كامله يترجاها تفتح وهيا رافضه لحد ما قررت تخرج .. فتحت الباب وخرجت
وليد جري عليها : اخص عليكي يا امل بجد
امل : انا رايحه عند ماما ... اتفضل وصلني
وليد : اوصلك فين انتي عبيطه ولا ايه !! خلاص بقي ما تكبريش الموضوع
امل : لا انا كبرته بقي مش كل يوم تشتغلني كده اتفضل يالا وصلني يا اما هطلب اوبر او هكلم آسر
وليد : آسر مش فاضيلك
امل : بمكالمه مني هيفضالي
وليد : امل خلاص بقي قولتلك حقك عليه ومش هشتغلك تاني خلاص
امل بصرامه : وصلني اتفضل يا هنزل واوقف تاكسي
وليد : يا بنتي
امل قاطعته : وصلني
وليد بصلها وهيستسلم وهنا هيا ضحكت وهو بصلها وفهم انها بتشتغله المره دي
وليد : انتي بتشتغليني !!
امل : اتضايقت ! دمك اتحرق ! صدقت ! هو ده احساسي في كل مره بتشتغلني فيها
وليد مره واحده طلع يجري وراها وهيا تجري وتصرخ وهو وراها
وليد : قسما بالله بس اطولك يا امل
فضل يجري وراها لحد ما مسكها وشدها وشالها علي كتفه وهيا بتحاول تفلت منه بس خلاص دخل اوضه النوم وحدفها علي السرير وراح قفل الباب بالمفتاح واخد المفتاح وهيا اتوترت بس بفرحه مش خوف
قلع جاكت بدلته وحدفه بعيد : انا هوريكي ازاي تشتغليني هاه ...
امل صرخت بدلع: وليييييد
..................
عند آسر دخلوا الفيلا بتاعت ابوه وشالها لحد اوضه نومهم ودخلوا وآسر شغل مزيكا هاديه
آسر مد ايده : تسمحيلي سنيوريتا !!
مي ضحكت ومسكت ايده : طبعا
بدئت ترقص معاه وهيا طايره وهو شد طرحتها من علي شعرها ورماها بعيد وهيا فكت شعرها وهو دفن وشه فيه وهو بيرقص معاها
مي : بتحبني !!
آسر من غير ما يرفع دماغه من شعرها : لأ .. بعشقك
مي بابتسامه : مبسوط ؟
اسر باسها في رقبتها : فوق ما تتخيلي
سكتت هيا فرفع دماغه وبصلها : انتي مبسوطه !
مي بحب : وانا في حضنك اسعد انسانه في الدنيا
آسر : مقولتليش عايزه تفضلي هنا ولا نروح الشقه اللي جابها خالي وليد !
مي حطت ايديها حوالين رقبته : اللي يريحك انت ... بس لو كلهم هيقعدوا في الشقق يبقي الافضل لو كلنا في عماره واحده
آسر : خالي وليد عارض اننا كلنا نعيش معاه في نفس الفيلا لو انتي عايزه تكوني مع الكل
مي : لأ مش عايزه بيت واحد صعب مش هنكون براحتنا لكن عماره واحده وكل واحد له شقته دي جميله
كل واحد براحته في شقته ووقت ما نحب نكون مع بعض سهله
مي : احنا هنسافر امتي شهر العسل !
آسر : وقت ما نحدد بكره بعده اللي يناسبنا
مي : الصبح نسافر
آسر ابتسم : الصبح نسافر
مي : ولا خلينا نفضل مع بعض الاول شويه وبعدها نسافر
آسر : ما هو احنا لما نسافر هنكون برضه مع بعض
مي : مش كلنا هنكون مع بعض !
آسر : ايوه ماشي بس كل واحد براحته احنا مش طالعين رحله يعني
مي ضحكت : يعني هنكون براحتنا انا وانت !
آسر : طبعا محدش له دعوه بينا ... تعرفي سمعت ان وليد نصار لما حب جميله اخدها شهر عسل وقضوا الشهر كله في اوضه في فندق مخرجوش منها ابدا
مي ضحكت : مين قالك !
آسر : امي يعني هيكون مين! كانت علي طول تحكيلنا عن حبهم الاسطوري
مي : هما فعلا حبهم اسطوري .. آسر حبني زي اونكل وليد ما بيحب جميله !!
آسر : تعالي يالا وانا احبك
آسر شالها وبدأ يوريها ايه هو الحب ودخلها جنته او جنتهم الخاصه ..
................
فهد دخلوا الفيلا والاتنين متحفزين ومتوترين
فهد : فاكره اول مره دخلتي هنا ؟
جميله : معاك ساعت حفله ميس
فهد : عمرك تخيلتي اننا ندخلها عريس وعروسه !
جميله : في اليوم ده لأ طبعا
فهد قرب منها : امتي تخيلتيني عريسك وان انا وانتي لبعض واتمنيتي ده !!
جميله فكرت شويه : اول مره شوفتك فيها حسيت للحظه انك تخصني انا ،، ملكي ،، بس بعدها مفكرتش كده لفتره
فهد مستمتع : فكرتي امتي تاني !
جميله : لما ضربتك بالفازه واتعورت تاني يوم وانت تعبان كان نفسي ساعتها يكون ليا حق عليك اخدك في حضني واقولك ارتاح هنا في حضني ده مكانك
فهد مسك ايديها الاتنين : فعلا ده مكاني ....
جميله بعدت شويه وفهد تقبل حرجها وبعدها
فهد : مقولتيش برضه امتي تخيلتيني عريسك !
جميله : يوم خطوبتك علي سالي ... اتمنيتك تكون ليا فهد : علشان كده عيطتي !
جميله : وعلشان كده عيطت .. تعرف يومها لما عطتني ظهرك وقولتلي امشي تخيلتك بصتلي وجيت مسحت دموعي وبوستني وفوقت لما قولتلي ( قلدته ) انتي لسه هنا يالا اتفضلي
فهد ضحك : تصدقي ان انا كمان تخيلت ده بس فوقت للوضع اللي انا فيه وعلشان ما اضعفش مشيتك انتي
جميله : انت امتي تخيلتني عروستك ! ملكك انت وبس
فهد : يوم ما كنتي في الكافتيريا ماسكه موبيلك ومركزه معاه قوي وعماله تبتسمي وتكشري كان نفسي ساعتها تكوني ملكي واقوم اشد الموبيل من ايدك واقولك ما تفكريش غير فيا انا وكان عندي استعداد ادفع نص عمري واعرف بتكلمي مين ساعتها
جميله ضحكت : عايز تعرف كنت بكلم مين !!
فهد : اكيد
جميله ابتسمت : انت
فهد : انا ايه !
جميله : كنت بصورك انت ...
فهد ابتسم باستغراب : بتصوريني ؟ ليه ؟
جميله : علشان عمتو ... كان نفسها تشوفك وكل يوم تسألني جيت من السفر ولا لأ واليوم ده صورتك يجي عشرين صوره لعمتو
فهد ضحك : يا بنت الايه وانا فضلت اتخيل مليون سيناريو وسيناريو ولا واحد فيهم صح ... بس ملحوقه من النهارده ممنوع السرحان تماما
جميله : ممنوع السرحان اتفقنا فهد وطي وشالها بين ايديه وهيا ضحكت : تعالي نكمل اتفاقتنا فوق
طلعوا ونزلها براحه في الارض ويدوب باسها برقه وبعدها بعدت
فهد : بعدتي ليه !
جميله : الفستان تقيل قوي ومضايقني .. ينفع اغيره ؟
فهد ابتسم : براحتك طبعا
جميله طلبت منه يفتح السوسته وبمجرد ما فتحها جريت علي اوضه اللبس وقفلت عليها وغيرت هدومها في نص ساعه وهو منتظرها بره
فهد خبط عليها : انتي كويسه جوه !!
جميله : كنت متخيله الموضوع سهل .. طلع صعب لحظه وخارجه
فهد : محتاجه مساعده
جميله : لا يا قلبي
جميله فضلت ربع ساعه تحاول تختار هتلبس ايه ! واخيرا استقرت علي بيجامه بيضا ستان طويله لبستها وليست فوقها روب وطلعت وفهد اول ما شافها
فهد : ما لبستيش طرحه كمان ليه !
جميله : لا ما انا هلبسها واحنا بنصلي
فهد تقبل كلامها بمزاجه ودخل هو كمان يغير هدومه وطلع : يالا نصلي !!
جميله : لحظه البس الاسدال
لبست اسدالها ووقفت وراه وصلوا وبعد ما خلصوا وفهد حط ايده علي دماغها وقال الدعاء واول ما خلص وقفت وقلعت الاسدال وفهد لمح البيجامه اللي تحت الروب وابتسم
قام يدوب هيقرب منها
جميله : لحظه يا فهد
فهد : انتي رايحه فين !!
جميله : دقيقه وجايه
نزلت جميله وفهد فضل منتظرها وبعدها قام يشوفها فين ونزل يدور عليها وفجأه خطر علي باله السوبر ماركت فراح علي المطبخ ودخل لمح التلاجه مفتوحه بس هيا مش موجوده فنادي : جميله !
جميله طلعت من جوه التلاجه وبصتله وفي بوقها شريحه لانشون
فهد : انتي بتعملي ايه ! ما احنا اتعشينا في الفندق
جميله : الفستان كان طابق علي نفسي ولما قلعته حسيت اني هموت من الجوع .. يرضيك اموت من الجوع!
فهد بغيظ : لا طبعا ما يرضينيش
جميله حطت الاكل علي السفره وهتقعد
فهد بصلها : انتي لسه هتقعدي ! امال كنتي بتعملي ايه جواها !
جميله : كنت بختار ودلوقتي هاكل
فهد : امال اللي كان في بوقك كان ايه
جميله : دي يدوب شريحه لانشون يا فهد
فهد : طيب طيب كلي يا جميله كلي
جميله عملت ساندوتشين وفهد بيتفرج عليها حاطط ايد علي خده وبيتفرج والايد التانيه بينقر بيها علي السفره ورجله بيهزها بتوتر وباصصلها وهيا بتاكل
جميله : علي فكره انا كده هزور ..، ما تبصليش كده
فهد بغيظ : انتي بتعملي ساندوتش ايه ! انتي حطيتي رومي علي فلامنك علي جبنه بيضا علي لانشون ومعاهم زيتون ... ايه ده !
جميله : كوكتيل حبيبي تدوق ؟
فهد :لا شكرا انتي عارفاني مبحبش حاجه مع التاني
جميله : لو دوقته هيعجبك !
فهد : جميله مش هدوق انجزي في ام الليله دي
اكلت وخلصت ويدوب فهد هيقف كانت طلعت طبق تاني وهو بصلها : ايه ده !
جميله : حته من التورته ... انت يدوب دوقتهالي عايزه ادوقها وبعدين هحلي
فهد وصل لاخره : هتحلي !!! حلي يا جميله انا طالع فوق
سابها وطلع وهيا ضحكت واكلت التورته ومبسوطه وبتستمتع بكل قطمه من التورته ...
جميله لنفسها : ياه يا بت يا جميله لو تحبسيلك بكوبايه شاي ... اممممم بس اعمل لفهد ولا ممكن يلبسه في وشي !! لا بلاش الشاي اطلعله بقي
خرجت من المطبخ وقفلت النور ورجعت تاني نورته وعملت الشاي واخدته في ايدها وطلعت
فهد اول ما شافها بتريقه : بتحبسي سيادتك صح !
جميله : كوبايه شاي ايه مش قادره اقولك ... دماغي هتنفجر اليوم كله تخيل ما شربتش شاي .. كنت هعملك كوبايه بس صراحه خوفت من رد فعلك
فهد : لا كويس فعلا انك معملتيهاش لان رد فعلي مكنش هيعجبك
جميله قعدت جنبه علي السرير : الا عمتك ندي وجدتك نبيله فين ! مع عمتو واونكل وليد !
فهد : وليد اصلا زمانه هايص دلوقتي هما مع سالي في فيلتها
جميله : انت بتقر علي ابوك !
فهد : بقر لا انا بحسده بس علي مراته اللي بتحبه تخيليها كده لاطعه وليد وقاعده بتاكل !! متخيلاها ؟
جميله فكرت لحظه : لا عمتو ما تعملهاش ما تسيبش اونكل وليد لحظه
فهد : طيب ما تقلديها
جميله : ما انا قاعده معاك اهو
فهد اخد من ايدها كوبايه الشاي حطها علي الكوميدينو : خلصت اهي اخيرا احمدك يارب
يدوب هيقرب من شفايفها قامت
فهد : ايه ؟ اكل واكلتي ؟ حلو وحليتي ؟ شاي وحبستي ؟ عايزه ايه تاني ؟
جميله : هدخل بس الحمام افرش اسناني و
فهد ما استناش تكمل وقام شد مفاتيح عربيته واخد موبيله وهيا مستغربه
جميله: انت رايح فين !
فهد لبس جاكت بدلته وماردش عليها
جميله : انت رايح فين رد عليا
فهد بصلها : في مثل بيقولك الجواب بيبان من عنوانه
جميله : ايوه يعني رايح فين !
فهد : هريحك من الحجج الكتير دي بعد اذنك
جميله وقفت قصاده : فهد انا مش بتحجج
فهد بعدها من قدامه وخارج بره الاوضه ومهما تنادي عليه الا انه خرج ورزع باب الاوضه وراه
جميله فضلت متضايقه واتصلت بعمتها اللي ما ردتش عليها ورنت تاني فردت
جميله الكبيره : مالك يا حبيبتي خير
جميله : ابنك سابلي البيت
عمتها : لحظه يا وليد ..
جميله : سيبك من اونكل وليد لحظه وشوفيلي ابنك راح فين !
عمتها : انتي زعلتيه ! زعلتيه وطفشتيه من اول ليله ! عملتي ايه يا مصيبه
جميله : والله ما عملتله حاجه
عمتها : طيب بلاش عملتيله ايه !! عملتي ايه من ساعت ما روحتو البيت
جميله : يدوب اتعشيت وحليت وشربت شاي بس
وليد انفجر في الضحك جنبها وعمتها ضحكت : بس يا جميله ! محمرتيش فرختين ليه ولا عملتيلك صنيه بشاميل
جميله : ماهو فهد مكنش هيصبر عليا
وليد ضحك اكتر : بنت اخوكي مش طبيعيه ... عيني عليك يا فهد
جميله : انتو معايا ولا مع ابنكم ؟ جعانه ما اكلش يعني !
عمتها : طيب عشتيه هو ولا انتي بس !
جميله : مارضيش ياكل
عمتها : يعني اعمل فيكي ايه يا جميله !! هشوف وليد يشوفه فين !!
جميله : بسرعه بقي يا عمتو انتي عارفه بخاف افضل لوحدي والنور لو قطع ممكن اموت في الفيلا دي لوحدي
جرس الباب ضرب
وليد : اكيد ده هو
جميله : اونكل ابعته علي هنا او انت هاته
وليد قام وشد بنطلون لبسه بسرعه وخرج يفتح الباب وفعلا كان فهد ابنه اللي اول ما شافه
فهد : هايص انت هايص
وليد ضحك : انت سيبت بيتك ليه !
فهد : سيادتها بتعملي في ساندوتشات ... ساندوتشات غريبه ... لا وبتحلي ... خلص بقي علي كده لا لازم تحبس بالشاي
وليد : طيب اتعشت يا فهد تلاقيها ما اكلتش اليوم كله
فهد علي اخره : بتتعشي في ساعتين خلصنا بقي العشا هندخل بقي في قصه هغسل وشي وهفرش اسناني لا انا هاخد شاور ودول فيهم بتاع ساعتين كمان
وليد ماسك نفسه من الضحك بالعافيه وفهد بيقلد في جميله
فهد دخل وقعد علي الكنبه وبيهز رجله بغيظ وتوتر
فهد : بني ادمه مستفزه بتاعت سحر اللحظه
وليد كشر : سحر لحظه ايه ؟
فهد : يوم خطوبتنا بوستها وقبل ما تنزل عند بيتهم جيت ابوسها تقولي ايه لا ما ينفعش ليه يا بنتي اصل سحر اللحظه انتهي ... سحر لحظه ايه اللي انتهي ده ! هاه !
هنا امه خرجت وهو بصلها : لابسه روب سيادتك وانت واقف علي الباب !! انت متخيل اني همشي !! انا قاعد هنا الليله دي ... انتو مش هتهيصو جوه وانا افضل احرق في ام دمي هنا
وليد قفل الباب ومراته ناولته تيشرت وهو اخده ولبسه
فهد : ايوه البس علشان ليلتنا طويله
وليد : قوم ياد روح لمراتك ما تسيبهاش ليله فرحكم
فهد : بص انا دمي محروق وعلي اخري مرواح مش هروح ونوم انتو الاتنين كل واحد هينام في اوضه
وليد ضحك : قوم ياد اطلع بره يالا انا غلطان اصلا اني فتحتلك .. قوم روح لمراتك
جميله قعدت جنب ابنها : حبيبي جميله فعلا تصرفاتها مستفزه بس النهارده ليله فرحكم يعني دي ليله حب
فهد : دي ليله اكل وحرق دم
جميله : هيا ما تقصدش تزعلك بدليل انها كلمتني وعماله تعيط وتعيط وتقول مكنتش تعرف انك هتضايق لو هيا اكلت وبتوعدك مش هتاكل تاني طول ما انت في البيت
فهد : بقولك ايه ماتحوروش في الكلام انتي وبنت اخوكي انا ما اضايقتش من اكلها انا اتضايقت من طريقتها وتصرفاتها انا مش هتكون جعانه وامنعها تاكل يعني
جميله : طيب هيا مستفزه ده مش جديد عليك بس ليه ما فكرتش انها ممكن تكون خايفه او متوتره ودي الطريقه اللي بتقضي بيها علي توترها
فهد كشر وبدأ يسمع لامه وبصلها وهيا بصت لجوزها يتكلم
وليد : البنت في الليله دي بتكون خايفه
فهد : جميله ما بتخافش
وليد : جميله اللي بتنهار لو النور قطع ما بتخافش !!
فهد : ايوه ماشي بتخاف في الظلمه بس مش هتخاف مني يعني
وليد : مين قالك ! ده موضوع جديد ليكم انتو الاتنين تعرف منين هيا بتتعامل معاه ازاي ؟ اتكلمت معاها ؟ هدتها في حضنك وحاولت تطمنها ؟ ولا فضلت قاعد تبصلها ومترقب اللحظه اللي هتنقض فيها علي فريستك
فهد : فريسه ايه وانقض ايه ! هيا بطلت اكل اصلا علشان اخدها في حضني ولا اتنيل اقرب منها
جميله : انت غلطان انك سيبت بيتك في ليله زي دي قوم لمراتك واوعي تعاقبها بانك تسيب اوضتك تاني مفيش شيء في الدنيا يضايق الست ويجرحها قد ان جوزها يسيب اوضه نومه ما بالك بيته وما بالك في ليله فرحهم !! قوم يا حبيبي لحضن مراتك اللي بتحبك
وليد : ليله زي دي ما بتتعوضش يا فهد اوعي تسمح لاي شيء في الكون يضيعها منكم ...
فهد قام : حاضر هسيبكم
وليد بجديه : والله ما قصدي ابدا بس بجد مش عايز تفوتك ليله زي دي
فهد : عارف تصبحو علي خير
جميله : ابقي طمني لما توصل
فهد رجع بيته ووصل ودخل الفيلا ووقف تحت يفكر هيطلع باي وش او هيقولها ايه !!
جميله فوق حست انها زودتها قوي معاه فقامت غيرت هدومها ولبست اللي اختارته جميله لها وجددت الميكب بتاعها وبقت عروسه فعلا اجمل ما يكون وقعدت منتظره فهد يرجع...
فهد تحت متردد يطلع ولا لأ وهو علي السلم باصص لفوق يطلع ولا لأ النور اتقطع والدنيا بقت كحل كلها
جميله فوق انفاسها وقفت وعنيها برقوا والخوف سيطر عليها بس سمعت صوته : جميله ، جميله
جميله : فهد انا هنا
فهد نادي عليها علشان ما تتفاجئش بيه وفتح الباب وفي ايده موبيله منوره ودخل وهيا رمت نفسها بسرعه في حضنه وهو ضمها قوي
جميله بعياط : ما تبعدش عني تاني كده !
فهد ضمها قوي : حقك عليا يا عمري كله
رفع دماغها وباسها بوسه طويله واستوعب هنا انها مش لابسه البيجامه وابتسم : طيب ليه مش من الاول
جميله بتكشيره مصطنعه : انت ما بتصبرش
فهد : انا برضه ولا انتي اللي غلسه
جميله هتتكلم بس حط ايده علي شفايفها منعها
فهد : كفايه كلام علشان خاطري
ابتسمت وسكتت وسمحتله يقرب وشالها حطها علي السرير برقه ويدوب هيقرب منها
جميله : ينفع تتصرف في الظلمه دي ولا هنقضي الليله علي كشاف الموبيل
فهد وقف وبص حواليه: هيا ليله باينه من اولها
جميله : في جوه درج فيه شمع
فهد دخل وقلب شويه وخرج بالدرج كله وهيا ضحكت
جميله : ليه الدرج كله ؟
فهد : هتشوفي
فهد طلع كل الشمع اللي في الدرج ووزعه في الاوضه كلها ونوره كله وبقت الاوضه كلها شموع وشكلهم تحفه
فهد : اعتقد ليله رومانسيه مفيش بعد كده
جميله ضحكت : كانت واحده كفايه
فهد : لا كده حلو ...
فهد قصادها علي السرير : نفسك في اي حاجه تانيه بره الاوضه دي ؟
جميله ابتسمت بحب ومسكت ايده : اللي نفسي فيه قدامي اهو
فهد قرب منها : يعني خلاص مش عايزه ساندوتش ولا شاي ولا حلو ولا قهو
ما سابتوش يكمل الكلمه وهيا اللي باسته وده كان ضوء اخضر لفهد انها ملك ايديه ....
وبعد فتره طويله من الحب كانت نايمه علي صدره وهو بيلعب في شعرها
فهد : مبسوطه !!
جميله : تقريبا مفيش حد في الدنيا دي كلها مبسوط زيي
فضلوا ساكتين شويه
جميله : انا عايزه انام ومش عايزه انام !!
فهد ابتسم وبصلها وباسها في دماغها : نامي يا قمر
وكأنها كانت منتظره الكلمه دي منه لانها غمضت عنيها وفي اقل من دقيقه كانت نامت في حضنه وهو كمان نام بسرعه زيها .....
بعد فتره فهد حس ان الجو حر جدا وفتح عنيه جميله لسه في حضنه زي ماهي بس الدنيا نور قوي .. نور اصفر وحر جدا .. غمض عنيه وفتحهم تاني واستوعب ان ده مش نور دي نار مولعه في الاوضه كلها حواليهم
اتعدل
فهد : جميله اصحي
جميله : عايزه انام
فهد بيشدها : قومي يخربيت كده الاوضه بتولع
جميله فتحت وبصت حواليها وصرخت ووقفت علي السرير وفهد شد ملايه السرير لفها بيها وشالها خرجها بره الاوضه ونزلوا بسرعه علي تحت وطالع تاني
جميله مسكته : انت رايح فين !
فهد : هجيب موبيلي اصبري .. نطلب المطافي والا اي حد
جميله : لا مش هتطلع تاني اطلب من الارضي
فهد : مش حافظ رقم اي حد اصبري بقي
شد نفسه منها وطلع جري لمح موبيله على الكوميدينو بس الطريق كله نار وقرر يخاطر ودخل جاب موبيله وخرج ونزل لجميله اللي رمت نفسها في حضنه واخدها وخرج بره الفيلا خالص
اتصل بأبوه اللي رد بالعافيه وبصوت نايم : عايز ايه ياد انت
فهد بصوت عالي : البيت بيولع
وليد فتح عنيه واتعدل شويه : بيت ايه اللي بيولع !
فهد : الفيلا بتولع .. اتصل بالمطافي ولا باي حد بسرعه قبل ما الفيلا كلها تولع
وليد اتعدل ووقف : انت بتتكلم بجد ولا بتهزر ؟
فهد زعق : يا بابا يعني ههزر معاك الساعه ٦ الصبح اقولك البيت بيولع ده ايه هزار البوابين ده !! اتصل بالمطافي
فهد قفل و وليد جميلته صحيت : في ايه ابنك ماله !
وليد : بيقول البيت بيولع
جميله شهقت : هما كويسين ؟
وليد : اكيد انا ما سألتوش
جميله شدت من ايده الموبيل واتصلت بابنها : انت ومراتك كويسين ؟
فعد : ايوه احنا كويسين بس كلموا المطافي وهاتي هدوم لجميله وتعالي انا لاففها بملايه
جميله : حاضر هنجيلك دلوقتي
قفلت وقامت جري لبست في لحظه ووليد جه يبلغ المطافي معرفش اي ارقام لهم فاتصل بأكرم وقاله يتصرف
اكرم ساعتها كان بيكلم ندي وسهرانين مع بعض علي الفون وقفل معاها لما وليد ظهر في الانتظار
وبعد ما قفل ندي كلمته تسأله في ايه واضطر يقولها ايه اللي حصل وهيا بلغت آسر ينزل لابن عمه وبلغت وليد علشان يروح لاخته ولكهم قاموا مفزوعين من نومهم بالخبر ده ... جميله كمان بلغت اخوها عماد
فهد وهو مع جميله بصلها : انا هطلع اجيبلك اي هدوم من فوق
جميله بخوف : ما تدخلش اوضتنا تاني !!
فهد : هجيب من اوضه عمتو او تيته ...
جميله اتعلقت في ايده: اوعي تخاطر بنفسك فاهم
فهد ابتسم : ما تخافيش
فهد دخل وطلع السلم بس النار خرجت من الاوضه وقفلت الطريق تماما وفكر يخاطر بس لقي جميله وراه علي السلم
جميله : لو خطيت خطوه واحده هروح وراك انت فاهم !
فهد بصلها وبص للنار واخدها ونزل سمعوا سارينات المطافي وفهد اخد جميله بعيد علشان تكون بعيده عن طريقهم وهما دخلوا وعرفهم ان مفيش حد جوه
وليد وجميلته وصلوا وجريوا عليهم ووراهم وصل عماد وبعدها اكرم ويزيد وبعدها اسر و وليد وكل واحد معاه مراته وندي ونبيله كمان ....
جميله عمتها اخدتها للملحق اللي جنب حمام السباحه ولبستها
وليد جنب فهد خبط علي كتفه : مقولتليش ليه اجيبلك حتي تيشرت
فهد بصله : مكنش فيا دماغ
يزيد : انا معايا هدوم في عربيتي ... لحظه
يزيد جاب تيشرت لفهد يلبسو ووقفوا كلهم وجت جميله وعمتها واخيرا المطافي خلصت وطلعوا
راجل المطافي : في شمع كتير في الاوضه اعتقد دي اللي عملت الحريقه
فهد بصوت واطي : لا ناصح
راجل المطافي : ابقوا خلو بالكم بقي
اكرم تعامل مع بتوع المطافي وبعد ما مشيوا الكل قعد في الجنينه حوالين بعض والكل ساكت ومره واحده جميله الصغيره بدئت تضحك والكل مستغرب وباصصلها لان كلهم زعلانين وهيا بتضحك وضحكها بيزيد ويعلي ويعلي
فهد : في ايه !!
جميله مش قادره تتكلم من الضحك : اصلي هههههه دعيت ههههه علي الاوضه ( ميته من الضحك )
فهد مش فاهم : دعيتي عليها ازاي !
جميله بتحاول تتكلم من وسط ضحكها والكل بدأ يضحك شويه شويه معاها
جميله بضحك هستيري : واحنا بنشرتيها وانت اصريت انها تكون سودا دعيت انها تولع .. ما تخيلتش انها هتولع ليله دخلتنا هههههههه واحنا فيها
فهد بصلها بغيظ وعض علي شفايفه نفسه لو يضربها
وهيا مسكت ايديه وبتضحك والكل حواليها بي
تفاعل بلايك وعشرملصقات علشان الختام
إنتظرو الخاتمه
تعليقات
إرسال تعليق