قصة هاروت وماروت
قالوا عليهم اتنين من الجن!!
وقالوا عليهم اتنين من الملائكه!!
وقالوا عليهم اتنين من البشر سحره وكفار!!
---
يا تري ايه الصحيح فى الكلام ده ؟!
ويا تري مين هما (هاروت وماروت) ؟!
---
عايزك ترجع ضهرك لوراء .. وتفتح عينك على الاخر..
ركز معايا كويس اوي..
عشان اللى هقوله لك دلوقتى ده ممكن تكون اول مره تسمعه..
لكنه حقيقة وبالمصادر..
================
■ هاروت وماروت : ملائكه ولا جن ولا بني ادمين ؟!
تعال نعرف مين دول...
================
■ القران الكريم ذكرهم فى موضع واحد فقط :
"وَاتَّبَعُوا مَا تَتْلُو الشَّيَاطِينُ عَلَىٰ مُلْكِ سُلَيْمَانَ ۖ وَمَا كَفَرَ سُلَيْمَانُ وَلَٰكِنَّ الشَّيَاطِينَ كَفَرُوا يُعَلِّمُونَ النَّاسَ السِّحْرَ وَمَا أُنزِلَ عَلَى الْمَلَكَيْنِ بِبَابِلَ هَارُوتَ وَمَارُوتَ ۚ وَمَا يُعَلِّمَانِ مِنْ أَحَدٍ حَتَّىٰ يَقُولَا إِنَّمَا نَحْنُ فِتْنَةٌ فَلَا تَكْفُرْ ۖ فَيَتَعَلَّمُونَ مِنْهُمَا مَا يُفَرِّقُونَ بِهِ بَيْنَ الْمَرْءِ وَزَوْجِهِ ۚ وَمَا هُم بِضَارِّينَ بِهِ مِنْ أَحَدٍ إِلَّا بِإِذْنِ اللَّهِ ۚ وَيَتَعَلَّمُونَ مَا يَضُرُّهُمْ وَلَا يَنفَعُهُمْ"
================
■ تعال معايا نرجع لوراء شويه..
الحياه قبل (هاروت وماروت) فى عهد (سليمان) عليه السلام..
وموت نبي الله (سليمان)..
-----------------
سيدنا (سليمان) كان ربنا مسخرله الانس والجن والحيوانات والطيور وكل المخلوقات..
ومن ضمن مهام سيدنا (سليمان) اثناء حياته زي باقي الانبياء, انه كان يتخلص من كل مدعي النبوه وانه يعمل مجتمع سليم سوي..
فى عهد سيدنا سليمان كان منتشر بكثرة (الكهنه والسحره) اللى كانوا كاتبين كتب سحر بمساعدة الشياطين والجن..
..
سيدنا (سليمان) تخلص من كل السحره خلال فترة ملكه وجمع كل كتبهم اللى الشياطين والجن كانوا بيقولوا انهم بيعرفوا المستقبل والغيب عن طريقها..
---
= " وَاتَّبَعُوا مَا تَتْلُو الشَّيَاطِينُ عَلَىٰ مُلْكِ سُلَيْمَانَ" :
فى الايه هنا توضيح لحاجه مهمه : الكهنه قبل سيدنا (سليمان) كانوا بيتواصلوا مع الشياطين ويسخروهم لخدمتهم عشان يعرفوا الغيب من السماء..
فكان الساحر بيؤمر الشيطان او الجن..
انه يطلع للسماء (يسترق السمع) عشان يعرف غيب السماء (مطر ورزق وخير وشر) ويستخدموه انهم يوهموا الناس ان الشياطين والجن عندهم الغيب والكهنه والسحره عارفين المستقبل..
..
ومن الشياطين والجان اللى كان بيموت بعد ما بيسمع الاخبار..
(إِلَّا مَنِ اسْتَرَقَ السَّمْعَ فَأَتْبَعَهُ شِهَابٌ مُّبِينٌ).. كان بيموت فى وقتها..
ومنهم اللى كان بينجوا من الشهاب ويروح يقول للسحره الاخبار
---
فلما ربنا بعث سيدنا سليمان وبدأ تكوين مملكه قويه..
جمع كل الكتب اللى عملها السحره دي وتخلص منها..
وفعلا جمعها كلها فى صندوق خاص بيهم وحطهم تحت (كرسيه -عرشه-) دفنهم تحته..
وسخر الجن والشياطين لخدمته فى دعوة الناس للايمان بربنا عز وجل..
وفي اخر ايامه دخل نبي الله (سليمان) محرابه اللى كان بيتعبد فيه..
وأمر جنوده ان محدش يفتح عليه نهائى المحراب..
---
وبالفعل بدأ يتعبد لربنا فى المحراب..
والجن مقيدين بالشغل والاعمال التقيله..
وكل ما يبصوا على المحراب يترعبوا لان سليمان باصص لهم.. فيرجعوا شغلهم تاني..
لحد ما قضاء ربنا جه لسيدنا سليمان ومات فى محرابه وهو ساند على العصايه بتاعته..
وفضل على الوضع ده مدة من الزمن طووويله..
كل ما الجن يبصوا عليه يلاقوه لسه ساند على العصا بتاعته فيرجعوا للشغل بسرعه..
---------------
■ بعد مرور فترة من الزمن..
يبعث ربنا (سوسة الخشب) تاكل فى عصا سيدنا سليمان لمدة (عام كامل).. تفضل تقرض وتاكل فيها..
وبعد ما تاكل نص العصا.. من ثقل جسم سيدنا سليمان يقع ويخبط فى الارض :
" فَلَمَّا قَضَيْنَا عَلَيْهِ الْمَوْتَ مَا دَلَّهُمْ عَلَىٰ مَوْتِهِ إِلَّا دَابَّةُ الْأَرْضِ تَأْكُلُ مِنسَأَتَهُ ۖ فَلَمَّا خَرَّ تَبَيَّنَتِ الْجِنُّ أَن لَّوْ كَانُوا يَعْلَمُونَ الْغَيْبَ مَا لَبِثُوا فِي الْعَذَابِ الْمُهِينِ"
..
وهنا اشارة من ربنا ان (الجن) ميعرفوش الغيب.. لو كانوا يعرفوه مكنش زمانهم فى العذاب بتاع الشغل وسليمان ميت..
------
■ فى اللحظه دي (اول ما عرفوا ان سليمان مات) الجن ياخدوا بالهم ويبدأوا يهربوا واللى منهم يدخل بيت سيدنا سليمان ويخربوا ملكه..
وامثلة الخراب دي :
ان واحد من الجن يتممثل فى صورة انسان .. ويروح لواحد من بني اسرائيل ويقوله " هل أدلكم على كنز لا تأكلونه أبدا"!!
فيردوا عليه "دلنا"..
فيرد الشيطان عليهم " احفروا تحت الكرسي وذهب معهم فدلهم على المكان"..
فبدأوا يحفروا تحت كرسي (عرش) سليمان عليه السلام..
لحد ما وصلوا للصندوق الخاص بالكتب..
وبالفعل فتحوا الصندوق ولقوا فيه كتب السحر والجن..
واعتقدوا ان دي كتب سليمان وهو اللى كان بيستخدمها ويسخر غيره فيها..
فاعتقدوا ان سيدنا سليمان كان (ساحر)!!
---
وانتشر بين الناس أن (سليمان) بن داود مش نبي بل هو ساحر وبني إسرائيل استخدموا الكتب دي فى السحر وتسخير الجن من جديد!!
وفضل الاعتقاد ده موجود لحد ما جاء سيدنا رسول الله..
وكان بينشر دعوة الاسلام وبدأ يعرف الناس على الانبياء ومنهم ذكر (سليمان)..
فرد عليه يهود المدينه : "ألا تعجبون لمحمد, يزعم أن سليمان بن داود كان نبيا! تالله ما كان إلا ساحرا كافرا"
فنزلت الايه الكريمه : " وَمَا كَفَرَ سُلَيْمَانُ وَلَٰكِنَّ الشَّيَاطِينَ كَفَرُوا يُعَلِّمُونَ النَّاسَ السِّحْرَ"..
نزلت الايه تبرئة من ربنا لسيدنا (سليمان) انه نبي وان تسخيره للجن والشياطين والحيوانات والطيور كان قوه وقدره من عند ربنا ومش سحر..
=====================
■ هاروت وماروت :
وهنا تيجي اللحظه الاهم..
مين دول ؟!
هل هما ملائكه ؟!
هل هما جن ؟!
هل هما بشر ؟!
---------------------
تعال نفهم مع بعض واحده واحده..
هنذكر اولا الروايه الصحيحه اللى فسرها الامام الاكبر (الشيخ الشعراوي)..
الايه القرانيه بتقول :
"وَمَا أُنزِلَ عَلَى الْمَلَكَيْنِ بِبَابِلَ هَارُوتَ وَمَارُوتَ ۚ وَمَا يُعَلِّمَانِ مِنْ أَحَدٍ حَتَّىٰ يَقُولَا إِنَّمَا نَحْنُ فِتْنَةٌ فَلَا تَكْفُرْ"
..
جملة : "وَمَا أُنزِلَ عَلَى الْمَلَكَيْنِ" :
دى مش معناها ان (هاروت وماروت) ملائكه..
بل دي معناها ما انزل على الملكين (اللى انتوا بتقولوا عليهم ملكين)!!
..
- ايه ده, يعني بني اسرائيل هما اللى كانوا بيتدعوا ان (هاروت وماروت) ملكين؟!!!
حلو سؤالك ده : والاجابه هي (اه) كانوا اتنين صالحين ومن كتر صلاحهم وعملهم الكويس بني اسرائيل افتكروهم ملكين..
..
وهما كانوا ظاهرين وهما بيعلموا الناس انهم بيعلموهم خير لكن فى الحقيقه كانوا (فتنه)..
فى الايه الكريمه جملة " (وَمَا أُنزِلَ عَلَى الْمَلَكَيْنِ بِبَابِلَ).. نمسك فيها كلمه (ما) .. فى تفسير الامام الشعراوي معناها نفي يعنى (لم)..
يبقا كده معني الايه (ان الشياطين كفروا وعلموا الناس السحر ولم ينزل الله على الملكين (اللى انتوا بتدعوا عليهم انهم ملكين) السحر عشان يعلموه لسليمان .. بل الشياطين كدابين!!
كده عندنا ملائكه وعندنا سحر وعندنا شخصين (هاروت وماروت)..
الشخصين دول هما اثنين من (بني ادم) .. ربنا وضعهم فى وسط قومهم فتنه .. كل القوم بيتعلموا وبيعلموا غيرهم السحر..
لكن (هاروت وماروت) ربنا اختارهم عشان يعملهم اختبار للناس .. وفيه هنا تفسير من الامام ( محمد راتب النابلسي) ان (هاروت وماروت) من كتر صلاحهم الناس كانت فكراهم ملائكه من السماء..
------
كانوا بيعلموا الناس السحر ويفرقوا لهم بين السحر والمعجزه الربانيه..
وكانوا بيعلموهم ازاي يصنعوا معجزات وكمان ازاي يعملوا سحر مخلتف منهم السحر الاسود..
--
وكل مره كانوا بيعلموهم حاجه كانوا لازم يذكروا لهم فى النهايه (احنا فتنه واختبار من ربكم, تذكروا دايما)..
وعلموهم علوم السحر كامله وربنا وضع بين ايد الانسان اختيار من الاتنين (اختيار الخير) و (اختيار الشر)..
وده من حكمة ربنا انه دايما بيدينا حرية الاختيار ويختبرنا يشوفنا هنكون ايه منهم..
= هل هنكون خير ؟!
= ولا هنكون شر ؟!
- وربنا عز وجل قالها صريحه فى القران :
(وَمَا هُم بِضَارِّينَ بِهِ مِنْ أَحَدٍ إِلَّا بِإِذْنِ اللَّهِ)..
محدش عنده مقدره على ضرر اي انسان..
---
واستمر (هاروت وماروت) فى فتنتهم لاهل الارض زمن طووويل جدا جدا الى ان ماتوا..
وبني اسرائيل استخدموا العلم الرباني فى فساد الارض ودمارها..
وانتشر بين اهل الارض جميعا ان (سليمان عليه السلام ساحر كافر!!) وكانت دي فتنة ربنا لبني اسرائيل على يد (هاروت وماروت) الاتنين البشر اللى كانوا فاكرينهم ملكين بيعلموهم..
..
والله اعلم..
==============
الروايات الخرافيه اللى منتشره عن (هاروت وماروت)!! :
الروايه اللى فاتت هي رواية القران الكريم الصحيحه..
-----
لكن فيه بعض الروايات التانيه اللى انتشرت عن قصة (هاروت وماروت)
انهم كانوا من الجن اللى فسقوا عن امر ربنا وبدأوا انهم يعلموا الناس السحر من كتب سيدنا سليمان بعد ما تم اخراجها من تحت كرسيه..
- وبرضه الروايه دي ضعيفه وغير صحيحه لان سيدنا سليمان كان لعن الجن والشياطين انهم ميقدروش يقربوا من الكرسي ولا العرش بتاعه, للسبب ده هما استخدموا بنى اسرائيل عشان يعلموا الناس السحر..
==============
المصادر :
1- تفسير سورة سبأ للامام القرطبى – الامام الشعراوي – الامام ابن كثير – الامام الطبري..
2- كتاب البدايه والنهايه : للامام ابن كثير..
3- محاضرات دكتور محمد راتب النابلسي : عن هاروت وماروت..
==============
لو وصلت لحد هنا فانا حابب اشكرك انك كملت قراءه لحد هنا ومبسوط انك اتبسط من المقاله
1- اعمل لايك للمقالة عشان اعرف انك مهتم واكمل كتابة..
2- اعمل شير للمقالة عشان غيرك يستفيد بيها..
3- اعمل منشن لصحابك المهتم بالنوع ده من المقالات ورشح له يقراء المقاله..
4- انزل فى الكومنتات قولى رايك فى النوع ده من المقالات وحابب تقرأ عن ايه تانى الفترة الجايه..؟!
